Ezayíi
48 Kúnkan Jakɔ́bu tɔn è,
mi mɛ e nɔ sɔ́ nyǐkɔ Izlayɛ́li tɔn dó ylɔ́ miɖée,
bo gosín sin Judáa tɔn mɛ lɛ́ é,*
mi mɛ e nɔ xwlé nǔ gbɔn nyǐkɔ Jexóva tɔn gblamɛ,
bo nɔ xomlá Mawu Izlayɛ́li tɔn,
bɔ é ma ka nyí kpó nǔgbó kpó, kpódó nǔjlɔ́jlɔ́wiwa kpán ǎ lɛ́ é mi, mi ɖótó xó élɔ́.
2 Ðó yě nɔ ylɔ́ yěɖée lɛ́ ɖɔ toxo mímɛ́ ɔ mɛ nu lɛ́,
bo nɔ ba alɔdó Mawu Izlayɛ́li tɔn,
éé sín nyǐkɔ nɔ nyí Jexóva ahwankpá lɛ́ tɔn é tɔn.
3 “Un ɖɔ nǔ xóxó* lɛ́ nú we sín hwenu línlín ɖíe.
yě tɔ́n sín nu nyiɖésúnɔ tɔn mɛ,
bɔ un bló bɔ è tuun yě.
Ajijimɛ ɔ, un wa nǔ, bɔ yě jɛnu.
4 Ðó un tuun lě do a nɔ syɛ́n ta sɔ é,
un tuun ɖɔ kɔxú towe cí gan ɖɔhun, bɔ nukɔn towe cí ganvɔ ɖɔhun.
5 Un ko ɖɔ nú we sín hwenu línlín ɖíe.
Cóbónú é ná jɛ ɔ, un ko bló bɔ a se,
bónú a ní ma wá ɖɔ xó élɔ́ ó: ‘Bǒcyɔ ce wɛ bló nǔ élɔ́;
bǒcyɔ kpikpa ce kpó ganbócyɔ ce* kpó wɛ ɖe gbe élɔ́.’
6 A se, bo mɔ nǔ énɛ́ lɛ́ bǐ.
A ná jlá ǎ cé?
Bɛ́ sín din ɔ, un ɖo nǔ yɔ̌yɔ́ lɛ́ ɖɔ nú we wɛ,
nǔbúdo ɖěɖěe è hwlá bɔ a ma tuun ǎ lɛ́ é wɛ.
7 È jɛ yě dá jí din é ɔ, é ko lín ǎ, din jɛ́n è ɖo yě dá wɛ,
nǔɖé lɛ́ wɛ bɔ káká jɛ égbé ɔ, a ko se kpɔ́n gbeɖé ǎ,
bónú a ní ma wá ɖɔ: ‘Éɖíe! Un ko tuun yě’ ó.
8 Éǒ, a ko se ǎ, a ko tuun ǎ,
è ko hun tó towe lɛ́ ɖ’ayǐ ǎ.
Ðó un tuun ɖɔ gbejímanɔtɔ́ ɖaxó wɛ nú we,
bɔ sín hwenu e è ji we é wɛ è ylɔ́ we ɖɔ sɛ́ngbatɔ́.
9 Amɔ̌, ɖó nyǐkɔ ce wú ɔ, un ná ɖu ɖo xomɛsin ce jí;
ɖó susu nyiɖésúnɔ tɔn wú ɔ, un ná ɖu ɖo nyiɖée jí,
bo ná sú kún dó nú we ǎ.
10 Éɖíe! Un ko ɖe nǔ kwíji sín wǔ we, amɔ̌, é nyí lěe è nɔ bló gbɔn nú kpatágan é ɖɔhun ǎ.
Un ko tɛ́n we kpɔ́n* ɖo wǔvɛ́ sín myɔkpó e nɔ sínsín nǔ é mɛ.
11 Ðó nyiɖésúnɔ wútu, ɛɛn, ɖó nyiɖésúnɔ wútu ɔ, un ná wa nǔ.
Ðó nɛ̌ un ka ná yí gbe bɔ è ná hɛn mì blí gbɔn?
Un nɔ sɔ́ susu ce jó nú mɛ ɖěvo ɖěbǔ ǎ.
12 Jakɔ́bu è, ɖǒtó mì, hwi Izlayɛ́li e un ylɔ́ é.
Mɛ ɖokpó ɔ wɛ un nyí. Un nyí mɛ nukɔntɔn ɔ; un lɛ́ nyí mɛ gǔdo tɔn ɔ.
13 Alɔ ce ɖésúnɔ wɛ ɖó dodónu ayǐkúngban ɔ tɔn ayǐ,
bɔ ɖisílɔ ce vlɔ́n jǐnukúnsin.
Ényí un ylɔ́ yě ɔ, yě nɔ sí te ɖó kpɔ́.
14 Mi bǐ ní xo miɖée kplé ɖó kpɔ́ bo ɖótó.
Mɛ̌ ka ɖo yě mɛ bo ɖɔ nǔ énɛ́ lɛ́?
Jexóva yí wǎn n’i.
É ná wa nǔ e nɔ jló è é dó Babilɔ́nu wú,
bɔ awa tɔn ná jɛ Kaludéenu lɛ́ wú.
15 Nyiɖésúnɔ wɛ ɖɔ xó, un ko ylɔ́ ɛ.
Un kplá ɛ wá, nǔ e é nɔ wa lɛ́ é ná kpa ɛ.
16 Mi sɛkpɔ́ mi, bo se xó élɔ́.
Sín bǐbɛ́mɛ ɔ, un ɖɔ xó ɖo nǔglɔ́ ǎ.
Sín hwenu e é jɛ é ɔ, un ɖo fínɛ́.”
Bɔ din ɔ, Aklúnɔ Nǔbǐwúkpétɔ́ Jexóva sɛ́ mì dó, kpó gbigbɔ tɔn kpó.*
17 Nǔ e Jexóva, Mɛ e vɔ́ we xɔ é, Mɛ mímɛ́ Izlayɛ́li tɔn ɔ ɖɔ é ɖíe:
“Nyɛ Jexóva ɔ, nyɛ wɛ nyí Mawu towe,
Nyi wɛ ɖo nǔ kplɔ́n we wɛ nú le hwiɖésúnɔ tɔn,*
Nyi wɛ ɖo ali xlɛ́ we wɛ ɖo ali e a ɖó ná gbɔn é jí.
18 Ényí a ko wlí tó gbeɖiɖe ce lɛ́ wú wɛ ɔ,
fífá towe ná cí tɔsisa ɖɔhun,
bɔ nǔjlɔ́jlɔ́wiwa towe ná cí aslɔkɛ́ xu tɔn lɛ́ ɖɔhun.
19 Kúnkan* towe ná sukpɔ́ kɔ́gúdu ɖɔhun,
bɔ vǐ towe lɛ́ ná sukpɔ́ nyɛ̌kɛ́n ɖɔhun.
È ná súnsún nyǐkɔ yětɔn, alǒ ɖe nyǐkɔ yětɔn sín nukɔn ce gbeɖé ǎ.”
20 Mi tɔ́n sín Babilɔ́nu!
Mi hɔn sín Kaludéenu lɛ́ gɔ́n!
Mi sú xó kpó awǎjijɛ kpó dó ɖɔ! Mi jlá!
Mi bló bónú fí e ayǐkúngban ɔ kponu ɖó lɛ́ é ní tuun.
Mi ɖɔ: “Jexóva vɔ́ mɛsɛntɔ́ tɔn Jakɔ́bu xɔ.
21 Hwenu e é kplá yě gbɔn nɔtɛn e è gba hánnyá lɛ́ é ɔ, kɔ xú yě ǎ.
É bló bɔ sin sa sín só mɛ nú yě;
é zɛ só, bo bló bɔ sin gba wu sín mɛ.”
22 “Fífá ɖě ɖe nú mɛdídá ǎ,” wɛ Jexóva ɖɔ.