Ezayíi
30 “Heelú vǐ tasyɛ́ntɔ́ lɛ́,” wɛ Jexóva ɖɔ,
“yě nɔ wa nǔ sɔgbe xá tuto e ma nyí ce ǎ lɛ́ é,
bo nɔ jɛ akɔ,* é ka nyí gbɔn gbigbɔ ce gblamɛ ǎ,
bo ná mɔ tɛn dó hu hwɛ dó hwɛ jí.
2 Yě jɛ te yi Ejípu, yě ka kan nǔ byɔ́ mì* hwɛ̌ ǎ,
bo ná bɛ yɛ ɖo Falawɔ́ɔn sín xɛnyaɖomɛjí glɔ́,*
lobo ná ba bibɛtɛn ɖo Ejípu sín yɛtɛn!
3 Amɔ̌, xɛnyaɖomɛjí Falawɔ́ɔn tɔn ná húzú hwɛjijɔ e wú winnyá ná hu mi é,
bɔ bibɛtɛn biba ɖo Ejípu sín yɛtɛn ná húzú nǔ e wú è ná kɔ́n wi mitɔn é.
4 Ðó axɔ́ví tɔn lɛ́ ɖo Sowáan,
bɔ afɔsɔ́ɖótetɔ́ tɔn lɛ́ yi Hanɛ́si.
5 Togun e ma sixú hɛn le ɖěbǔ wá nú yě ǎ é
ná dó winnyá yě mɛ bǐ.
É sixú d’alɔ ɖě alǒ hɛn le ɖě wá nú yě ǎ,
nǔ e é sixú wa é jɛ́n nyí ɖɔ é ná dó winnyá yě bo kɔ́n wi yětɔn.”
6 Hwɛ e è ɖó nú gběkanlin tofɔligbé tɔn lɛ́ é ɖíe:
yě nɔ blá dɔkun yětɔn lɛ́ dó tócí lɛ́ sín nɛgbé,
bo nɔ bɛ́ nǔníná yětɔn lɛ́ ɖó lǎkúnmí lɛ́ sín kpó jí,
bo nɔ gbɔn adohu adohu kpó wǔvɛ́ kpó,
kinnikínní, ɛɛn, kinnikínní e ɖo adǎn jí é,
jakpata kpó dan aɖǐvɛ́nɔ* e nɔ zɔn é kpó sín to mɛ.
Amɔ̌, nǔ énɛ́ lɛ́ ná hɛn le ɖě wá nú togun ɔ ǎ.
7 Ðó alɔdó Ejípu tɔn nyí nǔɖéwanú ɖo ali ɖěbǔ nu ǎ.
Énɛ́ wú wɛ un ylɔ́ ɛ ɖɔ: “Hlaxábu, mɛ e ɖo ayǐjínjɔ́n xwíí é.”
8 “Din ɔ, yi, wlǎn dó awǐnnyatɛ ɖokpó jí ɖo nukún yětɔn mɛ,
wlǎn dó wěma ɖé mɛ,
bónú è ná zán ɖo azǎn e ɖo nukɔn ja é ɖé jí
kúnnuɖenú tɛgbɛ tɔn ɖé ɖɔhun.
9 Ðó togun gǔfɔ́ntɔ́ ɖé wɛ yě nyí, vǐ mɛblɛ́tɔ́ lɛ́,
vǐ e ma ɖó jlǒ bo ná ɖótó sɛ́n* Jexóva tɔn ǎ lɛ́ é.
10 Yě nɔ ɖɔ nú mɛ e nɔ mɔ nǔ lɛ́ é ɖɔ: ‘Mi ma mɔ nǔ ó.’
Bo nɔ ɖɔ nú nǔmɔtɔ́ lɛ́ ɖɔ: ‘Mi ma ɖɔ nǔmimɔ e nyí nǔgbó lɛ́ é nú mǐ ó.
Mi ní nɔ ɖɔ mɛklɔ́klɔ́xó* lɛ́ nú mǐ; mi ní mɔ nǔmimɔ mɛblɛ́blɛ́ tɔn lɛ́.
11 Mi lɛ́ kɔ sín ali ɔ jí; mi zɛ sín ali ɔ jí.
Mi ma sɔ́ ɖɔ Mɛ mímɛ́ Izlayɛ́li tɔn ɔ sín xó nú mǐ ɖě ó.’”
12 Énɛ́ wú ɔ, nǔ e Mɛ mímɛ́ Izlayɛ́li tɔn ɔ ɖɔ é ɖíe:
“Ðó mi gbɛ́ xó énɛ́,
bo gán jɛ ahizi kpó mɛblɛ́blɛ́ kpó wú,
lobo ɖeji dó nǔ énɛ́ lɛ́ wú wútu ɔ,
13 nǔwanyido énɛ́ ná cí dǒ e zɛ é ɖɔhun nú mi,
é ná cí ahohó e nya bo ko jló ná mu é ɖɔhun.
É ná gba hánnyá ajijimɛ, ɖo nukúnxwixwe ɖokpó mɛ.
14 È ná gba ɛ zɛ̌nmɛtɔ́ sín zɛ̌n ɖaxó ɖé ɖɔhun,
è ná gba ɛ hánnyá sɔmɔ̌ bɔ é sɔ́ ná kpo fínfɛ́n tɔn ɖě,
bónú è ná ɖe myɔ sín ado mɛ ná,
alǒ xwá sin sín sindo* mɛ ná ǎ.”
15 Ðó nǔ e Aklúnɔ Nǔbǐwúkpétɔ́ Jexóva, Mɛ mímɛ́ Izlayɛ́li tɔn ɖɔ é ɖíe:
“Ényí mi lɛ́ kɔ wá gɔ̌n ce, bo nɔ te kpɔ́n mì ɔ, è ná hwlɛ́n mi gán;
hlɔ̌nhlɔ́n mitɔn wɛ ná nyí ɖɔ mi ní cí xwíí bo ɖeji dó wǔ ce.”
Amɔ̌, é jló mi ǎ.
16 É nyɔ́ wa ɔ, mi ɖɔ: “Éǒ, mǐ ná xá sɔ́ lɛ́, bo ná hɔn!”
Hɔn ɔ jɛ́n mi ka ná hɔn nǔgbó.
“Mǐ ná xá sɔ́ e afɔ yá ná lɛ́ é!”
Énɛ́ wú ɔ, mɛ e ɖo mi nya wɛ lɛ́ é ná yá afɔ.
17 Mɛ 1000 ná sísɔ́ ɖó adǎngblɔ́nnúmɛ mɛ ɖokpó tɔn wú;
adǎngblɔ́nnúmɛ mɛ atɔ́ɔ́n tɔn ná zɔ́n bɔ mi ná hɔn,
káká bɔ mɛ e ná kpo ɖo mi mɛ lɛ́ é ná cí asyákpo e ɖo só ɖaxó ɖé sín ahɔn mɛ é ɖɔhun,
yě ná cí asyá e ɖo só kpɛví ɖé jí é ɖɔhun.
18 Amɔ̌, Jexóva ɖo te nɔ wɛ kpó suúlu kpó* bo ná nyɔ́ xomɛ dó mi wú,
é ná sí te bo ná kú nǔbláwǔ nú mi.
Ðó Jexóva ɔ, Mawu hwɛjijɔ tɔn wɛ é nyí.
Awǎjijɛnɔ wɛ nyí mɛ e nɔ fɔ́n bo nɔ ɖo nukún ɖó è wɛ lɛ́ é* bǐ.
19 Hwenu e togun ɔ ná nɔ Sinyɔ́ɔ ɖo Jeluzalɛ́mu é ɔ, a ná ya avǐ ɖo ali ɖěbǔ nu ǎ. Ényí a sú xó bo byɔ́ alɔdó ɔ, é ɖo wɛn ɖɔ é ná nyɔ́ xomɛ dó wǔ we; ényí é se lě tlóló ɔ, é ná ná xósin we. 20 Jexóva ná ná we wǔvɛ́ wɔ̌xúxú ɖɔhun, bo ná ná we yadónúmɛ sin ɖɔhun, é ɖo mɔ̌ có, Mɛ̌si Ðaxó towe sɔ́ ná hwlá éɖée ɖě ǎ, bɔ a ná mɔ Mɛ̌si Ðaxó towe kpó nukún hwiɖésúnɔ tɔn lɛ́ kpó. 21 Ényí a zɛ gbě yi ɖisíxwé alǒ yi amyɔxwé ɔ, tó hwiɖésúnɔ tɔn lɛ́ ná se gbe ɖé ɖo gǔdo towe ɖɔ: “Ali ɔ ɖíe. Mi ɖi zɔnlin gbɔn jí.”
22 Mi ná hɛn bǒcyɔ kpikpa mitɔn e è kɔn kpatágan dó lɛ́ é kpó ganbócyɔ mitɔn e è kɔn siká dó lɛ́ é* kpó blí. A ná bɛ́ yě nyi gbě gǒdónú ɖɔhun, bo ná ɖɔ nú yě ɖɔ: “Mi yi!”* 23 É ná ná jǐ dó nǔkún e a dó dó ayǐkúngban jí é jí, bɔ jinukún e ayǐkúngban ɔ ná ná é ná nyɔ́ bo ná túnflá.* Ðo azǎn énɛ́ gbe ɔ, kanlinhwan towe ná ɖu ama ɖo amagbo e d’agba é mɛ. 24 Nyibú kpó tócí kpó ɖěɖěe nɔ lɛ gle lɛ́ é ná ɖu jinukún e è zán pɛ́li kpó pɛ́li fɛnnɔ kpó dó fún bo cáká lɛ́ é. 25 Tɔsisa lɛ́ kpó sinhwín lɛ́ kpó ná tíin ɖo só ɖaxó lɛ́ kpó só kpɛví e yi jǐ lɛ́ é kpó jí, ɖo azǎn e gbe è ná hu mɛ tɛ́ ɖo hwenu e ahohó lɛ́ ná mu é. 26 Sunkpéká sín wěziza ná wá cí hwesivɔ́ sín wěziza ɖɔhun; bɔ wěziza hwesivɔ́ tɔn ná syɛ́n d’é jí azɔn tɛ́nwe, bo ná cí wěziza azǎn tɛ́nwe tɔn ɖɔhun, ɖo azǎn e gbe Jexóva ná blá akpa* nú togun tɔn, bo ná hu agadá e ɖo wǔ tɔn ɖó é dó nǔ i wútu é.
27 Éɖíe! Jexóva* jawě sín fí línlín,
é ɖo xomɛsin ɖaxó jí bo zɔn akpɔ́kpɔ́ tlitli mɛ.
É ɖo xó ɖɔ wɛ kpó xomɛsin kpó,
bɔ ɖɛ̌ tɔn cí myɔ e nɔ fyɔ́ nǔ é ɖɔhun.
28 Gbigbɔ* tɔn cí tɔgbamɛ ɖaxó e fán mɛ dó kɔ é ɖɔhun,
é ná húnhún akɔta lɛ́ ɖo nǔtanú kúnsúdónúnǔ tɔn* ɖé mɛ;
è ná dó gan ɖé aglan mɛ nú togun lɛ́ bɔ é ná dɔn yě bú.
29 Amɔ̌ midɛɛ lɛ́ ɔ, han mitɔn ná cí han e è ji zǎnmɛ
hwenu e mi ɖo xwenú sɔ́ wɛ* é ɖɔhun,
bɔ ayi mitɔn ná j’awǎ
mɛ e ɖo kpete kún wɛ* bo ɖo zɔnlin ɖi wɛ xweyǐgbe
Jexóva e nyí Só Izlayɛ́li tɔn é sín só jí é ɖɔhun.
30 Jexóva ná bló bɔ è ná se gbe tɔn susunɔ ɔ,
é ná ɖe hlɔ̌nhlɔ́n tɔn xlɛ́ hwenu e awa tɔn ná ɖo te jɛ wɛ ɖo xomɛsin ɖaxó mɛ,
ɖo myɔ e nɔ fyɔ́ nǔ é mɛ,
ɖo jǐgbó, xɛbyoso kpó kɛ́njí kpó mɛ é.
31 Ðó gbe Jexóva tɔn wútu ɔ, adohu adohu ná xo Asilíi;
é ná xo è kpó kpo kpó.
32 Hweɖébǔnu e Jexóva ná zán tódɔnnúmɛ sín kpo tɔn
dó xo Asilíi é ɔ,
è ná nɔ xo hǔn kpó agǐdigbo kpó d’é mɛ,
hwenu e é ná dlɛ́n awa tɔn dó jǐ yětɔn ɖo ahwanfunfun mɛ é.
33 Ðó è ko sɔ́ nǔ nú Tofɛ́ti* tɔn;
è ko lɛ́ bló bɔ é ɖo gbesisɔmɛ nú axɔ́sú ɔ.
É bló bɔ fí e è to nakí lɛ́ ɖó é gɔ́ngɔ́n bo gbló,
bɔ myɔ kpó nakí kpó túnflá.
Hwemí wǒkógo ɖé ɖɔhun ɔ, funfún Jexóva tɔn
ná flɔ́ myɔ d’é mɛ.