Nǔnywɛ́xó
4 Vǐ ce lɛ́ mi, mi ɖótó kplɔ́n e ná mi wɛ tɔ́ ɖé ɖe é;
mi wlí tó wú bá dó ɖó nukúnnúmɔjɛnǔmɛ.
2 Ðó un ná kplɔ́n nǔ ɖagbe mi;
mi ma hɔn nǔkplɔ́nmɛ* ce nyi gbě ó.
3 Vǐ jɔ vǐ wɛ un nyí nú tɔ́ ce,
bɔ nyɛ wɛ nyí vǐ e nɔ ce yí wǎn ná tawun é.
4 Tɔ́ ce kplɔ́n nǔ mì bo ɖɔ: “Hɛn xó ce lɛ́ ganjí dó ayi towe mɛ.
Nɔ xwedó gbeɖiɖe ce lɛ́ bá dɔ́ ji.
5 Dǒ gǎn bo ɖó nǔnywɛ́, dǒ gǎn bo ɖó nukúnnúmɔjɛnǔmɛ.
Ma wɔn nǔ e un ɖɔ lɛ́ é ó, ma dó gǔdo yě ó.
6 Ma gbɛ́ nǔnywɛ́ ó, é ná nya xɛ ɖo jǐ we.
Yǐ wǎn ná, é ná cyɔ́n alɔ jǐ we.
7 Nǔnywɛ́ wɛ nyí nǔ e ɖo tají hú gǎn é, énɛ́ wú ɔ, tɛ́n kpɔ́n bo ɖó nǔnywɛ́,
bo lɛ́ tɛ́n kpɔ́n bo ɖó nukúnnúmɔjɛnǔmɛ gɔ́ nú nǔ e a ɖó lɛ́ é bǐ.
8 Sɔ́ nǔnywɛ́ dó ɖó nǔ e ɖo tají nú we hú gǎn é, énɛ́ ɔ, é ná sɔ́ we su.
É ná wlí yɛ̌yi nú we, ɖó a zunfán ɛ wútu.
9 É ná sɔ́ jɛ̌gbákún ɖɛkpɛ ɖɛkpɛ ɖé ɖó ta towe;
é ná sɔ́ axɔ́súgbákún e nyɔ́ ɖɛkpɛ é ɖé dó ba acɔ́ nú we.”
10 Vǐ ce, ɖǒtó xó ce lɛ́, bo yí gbe ná,
énɛ́ ɔ, xwe ná jɛ xwe jí nú we.
11 Un ná kplɔ́n we nǔnywɛ́li;
un ná kplá we gbɔn nǔjlɔ́jlɔ́wiwa sín ali lɛ́ jí.
12 Ényí a ɖo zɔnlin ɖi wɛ ɔ, afɔklɛ́nnú ɖě ná ɖo ali towe jí ǎ,
bɔ ényí a ɖo wezun kán wɛ ɔ, a ná klɛ́n afɔ ǎ.
13 Tɛ́ dó kplɔ́n e a yí é wú; ma jó dó ó.
Sɔ́ ɛ hwlá, ɖó é wɛ ná nyí gbɛ nú we.
14 Ma mlɛ́ ali mɛ nyanya lɛ́ tɔn ó,
ma gbɔn ali nǔnyanyawatɔ́ lɛ́ tɔn jí ó.
15 Gbɔn zɔ ná, ma mlɛ́ ó;
dǒ gǔdo è, ma sɔ́ ali énɛ́ ó.
16 Ðó nú yě ma wa nǔ nyanya ǎ ɔ, yě nɔ sixú d’amlɔ ǎ.
Yě ma zin mɛ dɛ́ ǎ ɔ, adɔ̌ nɔ vɛ́ yě.
17 Nǔnyanyawiwa nɔ cí wɔ̌xúxú ɖuɖu ɖɔhun nú yě,
bɔ dǎkaxixo nɔ cí vɛ̌ɛn nunu ɖɔhun nú yě.
18 Amɔ̌, ali nǔjlɔ́jlɔ́watɔ́ lɛ́ tɔn cí wěziza zǎnzǎn tɔn e ɖo hǐnhɔ́n wɛ é ɖɔhun;
é nɔ ɖo hǐnhɔ́n d’é jí wɛ káká bɔ hwesivɔ́ nɔ hun bǐ.
19 Ali mɛ nyanya lɛ́ tɔn cí ablu ɖɔhun;
yě tuun nǔ e nɔ zɔ́n bɔ yě nɔ klɛ́n afɔ é ǎ.
20 Vǐ ce, hɛn ayi dó xó ce lɛ́ wú;
ɖǒtó xó ce lɛ́ kpó sɔxwixwe kpó.
21 Ma wɔn yě ó;
hɛn yě dó ayi gɔngɔn towe mɛ,
22 ɖó gbɛ wɛ yě nɔ nyí nú mɛ ɖěɖěe nɔ yí yě lɛ́ é,
bo nɔ zɔ́n bɔ lanmɛ yětɔn blěbú* nɔ ɖo ganjí.
23 Nya xɛ ɖo ayi towe jí hú nǔ e jí a nɔ nya xɛ ɖe lɛ́ é bǐ,
ɖó é wɛ nɔ ná gbɛ mɛ.
24 Ðǒ wǔ zɔ nú adingbanxó lɛ́,
bo nɔ zɔ tawun nú mɛhízíhízíxó lɛ́.
25 Nukún towe lɛ́ ɖó ná kpɔ́n nukɔn dáán,
ɛɛn, sɔ́ nukún towe lɛ́ ɖó nǔ e ɖo nukɔn nú we lɛ́ é jí dáán.
26 Ðe afɔklɛ́nnú lɛ́ sín ali towe jí,*
énɛ́ ɔ, ali towe lɛ́ bǐ ná ɖó gǎnjɛwú.
27 Ma yi ɖisíxwé, alǒ amyɔxwé ó.
Ðe afɔ towe sín nǔ nyanya mɛ.