Ezayíi
44 “Mɛsɛntɔ́ ce Jakɔ́bu è, din ɔ, ɖǒtó,
hwɛ Izlayɛ́li, mɛ e un sɔ́ é, ɖǒtó.
‘Mɛsɛntɔ́ ce Jakɔ́bu, ma ɖi xɛsi ó,
hwɛ Yeculúnu* e un sɔ́ é, ma ɖi xɛsi ó.
3 Ðó un ná gba sin kɔn nyi mɛ* e kɔ xú é jí,
bo ná bló bɔ tɔ ná sa ɖo ayǐkúngban xúxú jí.
Un ná gba gbigbɔ ce kɔn nyi kúnkan* towe jí,
bo ná kɔn nyɔ̌ná ce dó vǐ towe lɛ́ jí.
4 Yě ná tɔ́n kun gběhan mǔ lɛ́ tɛ́ntin wɛ yě ɖe ɖɔhun,
pepliyéetín e ɖo tɔsisa tó lɛ́ é ɖɔhun.
5 Mɛɖé ná ɖɔ: “Jexóva tɔn wɛ un nyí.”
Mɛ ɖěvo ná ylɔ́ éɖée kpó nyǐkɔ Jakɔ́bu tɔn kpó,
bɔ mɛ ɖěvo ná wlán dó alɔkpákpá éɖésúnɔ tɔn mɛ ɖɔ: “Jexóva tɔn.”
É ná sɔ́ nyǐkɔ Izlayɛ́li tɔn.’
6 Nǔ e Jexóva,
axɔ́sú Izlayɛ́li tɔn, Mɛ e vɔ́ ɛ xɔ é, Jexóva ahwankpá lɛ́ tɔn ɖɔ é ɖíe:
‘Nyɛ wɛ nyí mɛ nukɔntɔn ɔ, bo nyí mɛ gǔdo tɔn ɔ.
Mawu ɖě ɖe zɛ nyɛ wú ǎ.
7 Mɛ̌ ka ɖo fínɛ́ bo cí nyɛ ɖɔhun?
É ní sú xó bo ɖɔ lobo ɖe xlɛ́ mì!
Sín tɛgbɛ e un ɖó togun ɔ ayǐ é ɔ,
yě ní ɖɔ nǔ e ná wá jɛ lɛ́ é
kpó nǔ e ná wá jɛ ɖo nukɔnmɛ lɛ́ é kpó.
8 Ado ma hu mi ó,
xɛsi ní ma ka lɛ́ hu mi ɖó akpo ó.
Un ɖɔ nú ɖokpó ɖokpó mitɔn jɛ nukɔn, bo lɛ́ jlá mi ǎ cé?
Mi wɛ nyí kúnnuɖetɔ́ ce.
Mawu ɖě ka ɖe zɛ nyɛ wú a?
Éǒ, Só ɖěvo ɖěbǔ ɖe ǎ; un tuun ɖě ǎ.’”
9 Mɛ e nɔ kpa bǒcyɔ lɛ́ é nyí nǔtí ǎ,
nǔ e yě nɔ wlíbo ná lɛ́ é ná hɛn le ɖě wá ǎ.
Yě nyí kúnnuɖetɔ́ yětɔn, yě* ka nɔ mɔ nǔtí ǎ, mɔ̌ jɛ́n yě ma tuun nǔtí ǎ é nɛ́;
énɛ́ wú wɛ è ná dó winnyá mɛ e bló yě lɛ́ é.
10 Mɛ̌ ka bló nǔmɛsɛn alǒ ganbócyɔ,*
éé ma sixú hɛn le ɖě wá ǎ é?
11 Éɖíe! È ná dó winnyá gbɛ̌ tɔn lɛ́ bǐ!
Alɔlyɛnzɔ́watɔ́* lɛ́ ɔ, gbɛtɔ́ kpowun wɛ yě nyí.
Yě bǐ ní xo yěɖée kplé bo sɔ́ tɛnmɛ yětɔn.
Xɛsi ná jɛ yě jí, bɔ è ná dó winnyá yě ɖó kpɔ́.
12 Fletuntɔ́ nɔ zán azɔ̌wanú tɔn dó xo zo dó gan ɖo myɔkán mɛ.
É nɔ sɔ́ zǔnkpé lɛ́ dó tun gan ɔ,
lobo nɔ zán awa tɔn hlɔ̌nhlɔ́nnɔ ɔ dó w’azɔ̌ ɖ’é wú.
Énɛ́ gúdo ɔ, xovɛ́ nɔ sin i bɔ é nɔ ba hlɔ̌nhlɔ́n kpo;
é nɔ nu sin ǎ bɔ nǔ nɔ ci kɔ n’i.
13 Atínkpatɔ́ nɔ jlɛ́ nǔjlɛ́kan dó atín ɔ jí, bo nɔ sɔ́ hwě vɔvɔ dó ɖe akpajlɛ́ ɔ dó jǐ tɔn.
É nɔ zán atínxwlɛ́nú dó xwlɛ́ ɛ, bo nɔ zán xwizɛnú dó zɛ xwi dó jǐ tɔn.
É nɔ kpɔ́n gbɛtɔ́ dó bló akpajlɛ́ tɔn,
ɛɛn, é nɔ kpɔ́n gbɛtɔ́ sín ɖɛkpɛ dó bló è,
bónú é ná nɔ xwé ɖé gbe.*
14 Mɛɖé ɖe bɔ azɔ̌ tɔn wɛ nyí ɖɔ é ní gbo sɛ́dlutín lɛ́.
É nɔ cyán atín alɔkpa ɖé, énɛ́ wɛ nyí cɛ́nitín,
bo nɔ jó è dó bɔ é nɔ d’agba ɖo atín e ɖo zungbó ɔ mɛ lɛ́ é tɛ́ntin.
É nɔ dó lolíyetín bɔ jǐ nɔ bló bɔ é nɔ su.
15 Énɛ́ gúdo ɔ, é nɔ húzú nakí bɔ gbɛtɔ́ nɔ zán dó bɔ myɔ.
É nɔ zán akpáxwé tɔn ɖé bo ná dó glɔ́n yǒzo nú éɖée;
é nɔ bɔ myɔ bo nɔ ɖa wɔ̌xúxú.
Amɔ̌, é nɔ lɛ́ bló nǔmɛsɛn ɖé bo nɔ sɛn.
É nɔ sɔ́ ɛ dó bló bǒcyɔ kpikpa ɖé, bo nɔ ɖe kɔ́ ɖo nukɔn tɔn.
16 É nɔ dó vlɔ̌ zo ɖo myɔ mɛ;
é nɔ sɔ́ vlɔ̌ énɛ́ dó hi lan e é nɔ ɖu é bɔ é nɔ jɛmɛ n’i.
É nɔ lɛ́ glɔ́n yǒzo nú éɖée bo nɔ ɖɔ:
“Éénɛ́! Un mɔ yǒzo hwenu e un ɖo myɔ ɔ kpɔ́n wɛ é.”
17 Amɔ̌, é sɔ́ éé kpo é dó bló nǔmɛsɛn ɖé, é sɔ́ dó bló bǒcyɔ kpikpa.
É ɖe kɔ́ n’i bo sɛn ɛ.
É nɔ xo ɖɛ sɛ́dó è bo nɔ ɖɔ:
“Hwlɛ̌n mì, ɖó hwi wɛ nyí mawu ce.”
18 Yě tuun nǔtí ǎ, yě mɔ nukúnnú jɛ nǔ ɖě mɛ ǎ,
ɖó nukún yětɔn lɛ́ ɖo súsú gbánwúngbánwún bɔ yě sixú mɔ nǔ ǎ,
lobɔ nukúnnúmɔjɛnǔmɛ ɖě ɖo ayi yětɔn mɛ ǎ.
19 Yě mɛ ɖěbǔ nɔ lin nǔ dó ayi mɛ,
alǒ tuun nǔ abǐ mɔ nukúnnú jɛ nǔ mɛ, bo nɔ ɖɔ xó élɔ́ ǎ:
“Un dó vlɔ̌ zo ɖo myɔ mɛ,
bo ɖa wɔ̌xúxú ɖo akán tɔn jí, lobo lɛ́ hi lan ɖ’é jí bá dó ɖu.
Din ɔ, un ɖó ná sɔ́ éé kpo é dó bló nǔvɛ́mɔ ɖé wɛ a?
Un ɖó ná sɛn atínkpo e gosín atín wú é wɛ a?”
20 É nɔ ɖu afín.
Mɛblɛ́blɛ́ sín ayi éɖésúnɔ tɔn bló bɔ é zɛ gbě.
É sixú hwlɛ́n éɖée ǎ, mɔ̌ jɛ́n é ma sixú ɖɔ:
“Mɛblɛ́nú wɛ ɖo ɖisílɔ ce mɛ” ǎ é nɛ́.
21 “Jakɔ́bu è, flín nǔ énɛ́ lɛ́, ɛɛn, hwi Izlayɛ́li è,
ɖó mɛsɛntɔ́ ce wɛ a nyí.
Nyi wɛ bló we, mɛsɛntɔ́ ce wɛ a nyí.
Izlayɛ́li è, un ná wɔn we ǎ.
22 Un ná súnsún nǔwanyido towe lɛ́ cí nǔ ɖɔ akpɔ́kpɔ́ wɛ è cyɔ́n dó yě ɖɔhun,
bo ná súnsún hwɛ towe lɛ́ cí nǔ ɖɔ akpɔ́kpɔ́ tlitli wɛ è cyɔ́n dó yě ɖɔhun.
Lɛ̌ kɔ wá gɔ̌n ce, énɛ́ ɔ, un ná vɔ́ we xɔ.
23 Jǐnukúnsin è, sú xó kpó awǎjijɛ kpó,
ɖó Jexóva ko wa nǔ!
Fí e yi do ɖo ayǐkúngban jí lɛ́ é ní sú ɖuɖéjí sín xó!
Só lɛ́ mi, mi sú xó kpó awǎjijɛ kpó,
zungbó è, hwi kpó atín towe lɛ́ bǐ kpó ní sú xó kpó awǎjijɛ kpó!
Ðó Jexóva vɔ́ Jakɔ́bu xɔ,
é ɖe susu tɔn xlɛ́ Izlayɛ́li.”
24 Nǔ e Jexóva, Mɛ e vɔ́ we xɔ é,
Mɛ e bló we sín hwenu e a ɖo adɔgo mɛ é ɖɔ é ɖíe:
“Nyɛ wɛ nyí Jexóva, mɛ e bló nǔ bǐ é.
Nyiɖésúnɔ wɛ vlɔ́n jǐnukúnsin,
nyi wɛ tɛ́ ayǐkúngban ɔ.
Mɛ̌ ka ɖo fínɛ́ xá mì?
25 Un ɖo xóvɔ̌tɔ́ɖɔtɔ́* lɛ́ sín wuntun lɛ́ sɔ́ dó húzú nǔ yǎyá wɛ,
nyi wɛ nyí Mɛ e nɔ bló bɔ amɔɛkantɔ́ nɔ wa nǔ xlonɔ ɖɔhun é;
Mɛ e nɔ bló bɔ nǔ bǐ nɔ fan dó súnnu nǔnywɛ́tɔ́ lɛ́,
bo nɔ bló bɔ nǔtuuntuun yětɔn nɔ húzú xlojijɔ é;
26 Mɛ e nɔ bló bɔ mɛsɛntɔ́ tɔn sín xó nɔ jɛnu,
bo nɔ bló bɔ nǔ e wɛndótɔ́ tɔn lɛ́ ɖɔ ɖ’ayǐ lɛ́ é nɔ jɛnu bǐ mlɛ́mlɛ́ é;
Mɛ e ɖo ɖiɖɔ dó Jeluzalɛ́mu wú wɛ ɖɔ: ‘Gbɛtɔ́ ná nɔ mɛ’ é,
bo ɖo ɖiɖɔ dó toxo Judáa tɔn lɛ́ wú wɛ ɖɔ: ‘È ná vɔ́ yě gbá,
un ná jlá dǒglin tɔn lɛ́ ɖó’ é;
27 Mɛ e ɖo ɖiɖɔ nú tɔ e gɔ́ngɔ́n lɛ́ é wɛ ɖɔ: ‘Mi mɛ,
un ná bló bɔ tɔsisa mitɔn lɛ́ bǐ ná xú’ é;
28 Mɛ e ɖo ɖiɖɔ nú Silúsi wɛ ɖɔ: ‘É wɛ nyí lɛ̌ngbɔ́nyitɔ́ ce,
é ná bló bɔ jlǒ ce lɛ́ bǐ ná nyí wiwa mlɛ́mlɛ́’ é;
Mɛ e ɖo ɖiɖɔ dó Jeluzalɛ́mu wú wɛ ɖɔ: ‘È ná vɔ́ ɛ gbá,’
bo ɖo ɖiɖɔ dó sinsɛnxɔ ɔ wú wɛ ɖɔ: ‘È ná ɖó dodónu towe ayǐ’ é.”