Ezayíi
12 Ðo azǎn énɛ́ gbe ɔ, é ɖo wɛn ɖɔ a ná ɖɔ:
“Jexóva è, un dó kú nú we,
ɖó a sin xomɛ dó mì có,
xomɛsin towe fá kpɛɖé kpɛɖé bɔ a dó gbɔ nú mì.
2 Éɖíe! Mawu wɛ nyí hwlɛngán ce.
Un ná ɖeji, xɛsi ɖě ná ɖi mì ǎ;
ɖó Jǎa* Jexóva wɛ nyí hlɔ̌nhlɔ́n ce, bo lɛ́ nyí agbɔ̌n e un ɖó é,
é húzú hwlɛngán ce.”
3 Kpó awǎjijɛ kpó wɛ mi ná nɔ wún sin
ɖo tɔjɔtɛn hwlɛngán tɔn lɛ́ mɛ.
4 Gɔ́ ná ɔ, ɖo azǎn énɛ́ gbe ɔ, mi ná ɖɔ:
“Mi dó kú nú Jexóva, mi xomlá nyǐkɔ tɔn,
mi bló bónú è ní tuun nǔwiwa tɔn lɛ́ ɖo togun lɛ́ tɛ́ntin!
Mi jlá ɖɔ è xɔ susu nú nyǐkɔ tɔn.
5 Mi ji han dó kpa susu* nú Jexóva, ɖó é bló nǔ e jí wǔ lɛ́ é.
Mi jlá nú è ní tuun gbɔn ayǐkúngban ɔ bǐ jí.
6 Hwi mɛ* e ɖo Sinyɔ́ɔ é, zě gbe dó jǐ, bo sú xó kpó awǎjijɛ kpó,
ɖó Mɛ mímɛ́ Izlayɛ́li tɔn e ɖo tɛ́ntin towe é kló.”