Ezayíi
45 Nǔ e Jexóva ɖɔ nú Silúsi, mɛ e é sɔ́
bo hɛn ɖisílɔ tɔn gbánwúngbánwún,
bo ná ɖu ɖo akɔta lɛ́ jí ɖo nukɔn tɔn,
yí ahwanfunnú sín axɔ́sú lɛ́ sí,*
hun hɔn vǐ wenɔ lɛ́ ɖo nukɔn tɔn,
bónú hɔntogbó lɛ́ ní ma sú ó é ɖíe:
2 “Un ná jɛ nukɔn towe,
bo ná gbígbá só kpɛví lɛ́.
Un ná gba ganvɔhɔn lɛ́ hánnyá,
bo ná sɛ́n gankpo lɛ́.
3 Un ná ná we dɔkun e ɖo ablu mɛ lɛ́ é,
bo ná ná we dɔkun e ɖo hwlǎhwlá ɖo fí e hwlá lɛ́ é,
bónú a ní dó tuun ɖɔ nyɛ wɛ nyí Jexóva,
Mawu Izlayɛ́li tɔn e sɔ́ nyǐkɔ towe dó ɖo ylɔ̌ylɔ́ we ná wɛ é.
4 Ðó mɛsɛntɔ́ ce Jakɔ́bu kpó Izlayɛ́li mɛ e un sɔ́ é kpó wú ɔ,
un sɔ́ nyǐkɔ towe dó ɖo ylɔ̌ylɔ́ we wɛ.
A tuun mì ǎ có, un ɖo nyǐkɔ e wlí yɛ̌yi é ɖé ná we wɛ.
5 Nyɛ wɛ nyí Jexóva, bɔ mɛ ɖěvo ɖě sɔ́ ɖe ǎ.
Mawu ɖě sɔ́ ɖe zɛ nyɛ wú ǎ.
A tuun mì ǎ có, un ná ná hlɔ̌nhlɔ́n we,*
6 bónú gbɛtɔ́ lɛ́ ní dó sixú tuun
sín fí e hwe nɔ tɔ́n sín é, yi fí e é nɔ yi xɔ dó é*
ɖɔ mɛ ɖě kún sɔ́ tíin zɛ nyɛ wú ó.
Nyɛ wɛ nyí Jexóva, bɔ mɛ ɖěvo ɖě sɔ́ ɖe ǎ.
7 Un nɔ bló wěziza bo nɔ bló ablu,
un nɔ hɛn fífá wá bo nɔ dɔn awěxomɛ wá;
nyɛ, Jexóva, wɛ ɖo nǔ énɛ́ lɛ́ bǐ bló wɛ.
8 Hwi jǐnukúnsin è, ja jǐ sín aga!
Akpɔ́kpɔ́ lɛ́ ní kɔn nǔjlɔ́jlɔ́wiwa kɔn nyi ayǐ.
Ayǐkúngban ní hun nu, bo ná sínsɛ́n hwlɛngán tɔn,
é ní bló bónú nǔjlɔ́jlɔ́wiwa ní tɔ́n kun ɖo hwe ɖokpó ɔ nu.
Nyɛ Jexóva wɛ dá ɛ.”
9 Heelú mɛ e nɔ liza* xá Mɛ e bló è* é,
ɖó kozɛ́n fínfɛ́n ɖé kpowun wɛ é nyí
ɖo kozɛ́n fínfɛ́n ɖěvo e ɖo kɔ́mɛ lɛ́ é mɛ!
Ko sixú ɖɔ nú Zɛ̌nmɛtɔ́ ɔ* ɖɔ: “Étɛ́ bló a ɖe?” wɛ a?
Alǒ azɔ̌ towe sixú ɖɔ: “A ɖó alɔ ǎ” wɛ a?*
10 Heelú mɛ e ɖɔ nú tɔ́ ɖé ɖɔ: “Étɛ́ a ka húzú tɔ́ ná?” é,
bo ɖɔ nú nyɔ̌nu ɖé ɖɔ: “Étɛ́ ji wɛ a ɖe?”* é.
11 Nǔ e Jexóva, Mɛ mímɛ́ Izlayɛ́li tɔn ɔ, Mɛ e bló è é ɖɔ é ɖíe:
“A ná kan nǔ byɔ́ mì dó nǔ e ja lɛ́ é wú,
bo ná ɖe gbe nú mì dó vǐ súnnu ce lɛ́ kpó alɔ ce núwiwa lɛ́ kpó wú wɛ a?
12 Un bló ayǐkúngban ɔ, bo dá gbɛtɔ́ ɖ’é jí.
Un vlɔ́n jǐnukúnsin kpó alɔ nyiɖésúnɔ tɔn lɛ́ kpó,
bo ɖe gbe nú ahwankpá tɔn lɛ́ bǐ.”
13 “Un sɔ́ mɛɖé sí te ɖo nǔjlɔ́jlɔ́wiwa mɛ,
bo ná bló bɔ ali tɔn lɛ́ bǐ ná jlɔ́.
É wɛ nyí mɛ e ná gbá toxo ce,
bo ná ɖe mɛ e ɖo kannumɔgbénu lɛ́ é nyi te ma yí akwɛ́, alǒ ɖu nǔ ɖo nǔ mɛ é,” wɛ Jexóva ahwankpá lɛ́ tɔn ɖɔ.
14 Nǔ e Jexóva ɖɔ é ɖíe:
“Le* Ejípu tɔn lɛ́ kpó ajɔ̌nú* Etiopíi tɔn lɛ́ kpó, gɔ́ nú Sébanu lɛ́, énɛ́ wɛ nyí súnnu gaga lɛ́,
ná wá gɔ̌n towe, bo ná húzú towe.
Yě ná ɖo wlɔ mɛ, bo ná ɖi zɔnlin ɖo gǔdo towe.
Yě ná wá gɔ̌n towe, bo ná ɖe kɔ́ nú we.
Yě ná ɖɔ nú we kpó sísí ɖaxó kpó ɖɔ: ‘É ɖo wɛn ɖɔ Mawu ɖo kpɔ́ xá we,
mɛ ɖěvo ɖě sɔ́ ɖe ǎ; Mawu ɖěvo ɖě sɔ́ ɖe ǎ.’”
15 Hwi Mawu Izlayɛ́li tɔn, Mɛhwlɛ́ngántɔ́ ɔ,
Mawu e nɔ sɔ́ éɖée hwlá é wɛ a nyí nǔgbó.
16 È ná dó winnyá yě bǐ, bo ná kɔ́n wi yětɔn;
mɛ e nɔ bló bǒcyɔ lɛ́ é bǐ ná ɖidó kpó winnyá kpó.
17 Amɔ̌, Jexóva ná hwlɛ́n Izlayɛ́li, b’ɛ ná nyí hwlɛngán mavɔmavɔ ɖé.
È ná dó winnyá mi, alǒ kɔ́n wi mitɔn káká sɔ́yi ǎ.
18 Ðó nǔ e Jexóva,
Mɛ e dá jǐnukúnsin é, Mawu nǔgbó ɔ,
Mɛ e bló ayǐkúngban ɔ é, éyɛ́ Mɛ e dó è do nyi dodónu syɛ́nsyɛ́n jí,
bo ma bló è ɖó wǔvɔ́* ǎ, loɔ, bónú gbɛtɔ́ ní dó nɔ jí é ɖɔ é ɖíe:
“Nyɛ wɛ nyí Jexóva, mɛ ɖěvo ɖě sɔ́ ɖe ǎ.
19 Un ɖɔ xó ɖo fí e hwlá é ɖé, alǒ ɖo to e dó ablu é ɖé mɛ ǎ;
un ɖɔ xó élɔ́ nú kúnkan* Jakɔ́bu tɔn ǎ:
‘Mi ba mì, é ka ná nyí ɖó wǔvɔ́.’
Nyɛ wɛ nyí Jexóva, mɛ e nɔ ɖɔ nǔ e nyí nǔ jlɔ́jlɔ́ é, bo nɔ jlá nǔ e sɔgbe é.
20 Mi xo miɖée kplé bo wá,
mi mɛ e hɔn sín akɔta lɛ́ mɛ lɛ́ é mi, mi nɔ kpɔ́ bo sɛ wá.
Yě mɛ e nɔ ɖo bǒcyɔ kpikpa lɛ́ hɛn kpé wɛ,
bo nɔ ɖo ɖɛ xo sɛ́dó nǔmɛsɛn e ma sixú hwlɛ́n yě ǎ é wɛ lɛ́ é ɔ, yě tuun nǔtí ǎ.
21 Mi ɖó gbe, mi ɖɔ xó e hɛn mi wá é.
Yě ní nɔ bǔ, bo ɖe wě ɖó kpɔ́.
Mɛ̌ ka ɖɔ nǔ énɛ́ lɛ́ ɖ’ayǐ sín hwenu línlín ɖíe?
Bo jlá yě sín hwexónu?
Nyɛ Jexóva wɛ ǎ cé?
Mawu ɖěvo ɖe zɛ nyɛ wú ǎ;
Mawu nǔjlɔ́jlɔ́watɔ́, Mɛhwlɛ́ngántɔ́, ɖě ɖe zɛ nyɛ wú ǎ.
22 Mi mɛ e nɔ nɔ fí e ayǐkúngban ɔ kponu ɖó lɛ́ é bǐ è mi, mi wá gɔ̌n ce, bo ná gán,
ɖó nyɛ wɛ nyí Mawu, mɛ ɖěvo ɖě sɔ́ ɖe ǎ.
23 Un xwlé nyiɖée;
xó élɔ́ e tɔ́n sín nu ce mɛ é nyí nǔgbó,
é ná lɛ́ kɔ ǎ:
koli lɛ́ bǐ ná yi do nú mì,
ɖɛ̌ lɛ́ bǐ ná xwlé ɖɔ émí ná nɔ gbejí nú mì,
24 bo ná ɖɔ: ‘Nǔgbó ɔ, Jexóva gɔ́n wɛ nǔjlɔ́jlɔ́wiwa adodwé ɔ kpó hlɔ̌nhlɔ́n kpó ɖe.
Mɛ ɖěɖěe sin xomɛ dó è syɛ́nsyɛ́n lɛ́ é bǐ ná wá nukɔn tɔn kpó winnyá kpó.
25 Kpó alɔdó Jexóva tɔn kpó ɔ, kúnkan* Izlayɛ́li tɔn bǐ sín hwɛ ná jɔ,
bɔ yě ná gó ɖó éyɛ́ wú.’”