XÓXWLÉMƐ
Mawu wɛ sɔ́ Nǔwlánwlán mímɛ́ lɛ́ dó ayi mɛ nú mɛ e wlán lɛ́ é, bɔ yě wlán dó Ebléegbe, Alámugbe kpó Glɛ̌kigbe kpó mɛ. Bónú mɛ e ɖo “akɔta lɛ́ bǐ” mɛ lɛ́ é ná ɖu Xó Mawu tɔn sín le ɔ, è ɖó ná tínmɛ Nǔwlánwlán mímɛ́ lɛ́ dó gbe gěgé mɛ. (Matíe 24:14) È nɔ ylɔ́ wěma Biblu tɔn 27 e bɛ́sín Matíe jɛ Nǔɖexlɛ́mɛ lɛ́ é ɖɔ “Nǔwlánwlán mímɛ́ Glɛ̌kigbe tɔn lɛ́,” ɖó Glɛ̌kigbe mɛ wɛ nǔwlántɔ́ klisánwun ɖěɖěe Mawu sɔ́ xó e ɖo yě mɛ lɛ́ é dó ayi mɛ ná lɛ́ é wlán dó ɖo xwe kanweko nukɔntɔn H.M. tɔn mɛ.
Nǔwlánwlán mímɛ́ Glɛ̌kigbe tɔn lɛ́. Biblu gbɛ yɔ̌yɔ́ ɔ tɔn tɔ́n dó Glɛ̌nsigbe mɛ azɔn nukɔntɔn ɔ ɖo 1950. Biblu Glɛ̌kigbe tɔn nukúnɖéjí Westcott kpó Hort kpó tɔn jí wɛ é jínjɔ́n hú gǎn; Biblu énɛ́ sɔgbe xá wěma Biblu tɔn ɖěɖěe è wlán kpó alɔ kpó bɔ yě dóxó hú gǎn, bo ɖo Glɛ̌kigbe mɛ lɛ́ é. Biblu gbɛ yɔ̌yɔ́ ɔ tɔn tínmɛ nǔwlánwlán Glɛ̌kigbe tɔn ɔ kpó gbejíninɔ kpó lěe é nyɔ́ bló gbɔn é. Biblu Fɔngbe tɔn élɔ́ jínjɔ́n Glɛ̌nsigbe tɔn 2023 tɔn jí, bɔ è tɛ́n kpɔ́n bo nɔ gbejí ɖo é lɔmɔ̌ mɛ. Gbejí ninɔ nú nǔwlánwlán dodó lɛ́ kɛ́ɖɛ́ gbé wɛ mǐ nya ǎ, loɔ, mǐ lɛ́ tɛ́n kpɔ́n bɔ nǔ e è tínmɛ lɛ́ é za wě bɔ xixa tɔn lɛ́ bɔkun. Ðo Mɔjɛmɛ ɖěvo lɛ́ glɔ́ ɔ, xóta “Nǔgbódodó Biblu tíntínmɛ dó gbe ɖěvo mɛ tɔn lɛ́,” “Nǔ e ɖo Biblu élɔ́ mɛ lɛ́ é” kpó “Lěe Biblu ɔ jɛ mǐ sí gbɔn é” kpó ɖɔ xó dó gbeta ɖěɖěe kɔn è wá ɖo gbe sín akpáxwé ɖo Biblu élɔ́ mɛ é ɖé lɛ́ jí.
Azɔn 237 wɛ nyǐkɔ Mawu tɔn ɖokpó ɔ, Jexóva, tɔ́n ɖo Nǔwlánwlán mímɛ́ Glɛ̌kigbe tɔn lɛ́. Biblu gbɛ yɔ̌yɔ́ ɔ tɔn sín wěmafɔ lɛ́ mɛ. Ðó é ɖo tají tawun ɖɔ è ní bló bónú nyǐkɔ Mawu tɔn ní nyí nǔ mímɛ́, lobɔ mɛ bǐ ka ɖó ná ylɔ́ nyǐkɔ énɛ́ cóbá gán wútu ɔ, Biblu élɔ́ zán nyǐkɔ Jexóva ɔ ɖo fí e é ɖó ná nɔ ɖo Nǔwlánwlán mímɛ́ lɛ́ mɛ lɛ́ é. (Matíe 6:9; Hlɔ̌manu lɛ́ 10:13) Xóta “Nyǐkɔ Mawu tɔn ɖo Nǔwlánwlán mímɛ́ Glɛ̌kigbe tɔn lɛ́ mɛ” e ɖo Mɔjɛmɛ ɖěvo lɛ́ glɔ́ é tínmɛ hwɛjijɔ e wú mǐ sɔ́ nyǐkɔ Jexóva ɔ dó wěmafɔ lɛ́ mɛ é ɖé lɛ́.
Nyǐkɔ Biblu gbɛ yɔ̌yɔ́ ɔ tɔn ɔ jínjɔ́n gbɛ yɔ̌yɔ́ e mɛ è ná nɔ wa nǔ jlɔ́jlɔ́ ɖe, bɔ Mawu d’akpá tɔn, bónú gbɛtɔ́ lɛ́ bǐ ná ɖu le tɔn é jí. (2 Piyɛ́ɛ 3:13) Mɛ ɖěɖěe tínmɛ Biblu élɔ́ lɛ́ é yí wǎn nú Mawu e nyí Dǒwátɔ́ Nǔwlánwlán mímɛ́ lɛ́ tɔn é, bo mɔ ɖɔ azɔ̌ bǔnɔ ɖé wɛ é sɔ́ d’así nú émí, bónú émí ná tínmɛ linlin tɔn lɛ́ kpó xó tɔn lɛ́ kpó b’ɛ ná sɔgbe lěe é nyɔ́ bló gbɔn é. Ðɛ mǐtɔn wɛ nyí ɖɔ Biblu élɔ́ ní xɔ akwɛ́ tawun nú nǔxatɔ́ ayijlɔ́jlɔ́nɔ ɖěɖěe ɖo gǎn dó wɛ, bo ná “ɖó nukúnnúmɔjɛnǔmɛ e sɔgbe é dó nǔgbó ɔ wú” lɛ́ é.—1 Timɔtée 2:4.