NǓNYWƐ́XÓ

 2 Nǔnywɛ́xó énɛ́ lɛ́ nɔ bló bɔ è nɔ nyɔ́nǔi,* yě nɔ ná kplɔ́n mɛ;

yě nɔ bló bɔ è nɔ mɔ nǔ jɛ nǔnywɛ́ sín xó lɛ́ wú;

 3 yě nɔ ná kplɔ́n e nɔ zɔ́n bɔ è nɔ ɖó nukúnnúmɔjɛnǔmɛ,

nɔ wa nǔ jlɔ́jlɔ́, nɔ ɖɔ hwɛ jlɔ́jlɔ́, bo nɔ lɛ́ ɖɔ nǔgbó é* mɛ;

 4 yě nɔ bló bɔ mɛ e ma mɔ nǔ kpɔ́n ǎ lɛ́ é nɔ nɔ acéjí;

yě nɔ ná nǔtuuntuun kpó nǔwúkpíkpé tamɛ linlin tɔn kpó mɛ wínnyáwínnyá lɛ́.

 5 Mɛ e ɖó nǔnywɛ́ é nɔ ɖótó wěɖexámɛ bo nɔ kplɔ́n nǔ d’é jí;

mɛ e ɖó nukúnnúmɔjɛnǔmɛ é nɔ tɛ́n kpɔ́n bɔ è nɔ xlɛ́ ali i kpó azɔ̌tuuntuun* kpó,

 6 é nɔ mɔ nǔ jɛ nǔnywɛ́xó kpó xó e gɛ́dɛ́ é* kpó mɛ,

énɛ́ wɛ nyí nǔnywɛ́tɔ́ lɛ́ sín xó kpó lǒ yětɔn lɛ́ kpó.

 8 Vǐ ce, ɖǒtó kplɔ́n e ná we wɛ tɔ́ towe ɖe é,

ma gbɛ́ nǔkplɔ́nmɛ* nɔ towe tɔn ó.

 9 Jɛ̌gbákún ɖɛkpɛ ɖɛkpɛ wɛ yě nyí ɖo ta towe,

bo nyí kɔjɛ́ ɖagbe ɖagbe ɖo kɔ towe.

12 Mǐ ná mì yě gbɛɖe Yɔdo* ɖɔhun,

mǐ ná mì yě kpéte mɛ ɖěɖěe ɖo domɛ yi wɛ lɛ́ é ɖɔhun.

13 Mǐ ní bɛ́ nǔ xɔ akwɛ́ yětɔn lɛ́ bǐ;

mǐ ná bɛ́ nǔ e mǐ bɛ́ ɖo ahwangbénu lɛ́ é gɔ́ xwé mǐtɔn lɛ́.

14 A ɖó ná gɔ́ nú mǐ,*

bɔ mǐ mɛ bǐ ná má nǔ e mǐ fin lɛ́ é ɖó zɛ̌nzɛ̌n.”*

Ma mlɛ́ ali yětɔn ó.

16 Ðó yě* nɔ dó wezun bo nɔ yi wa nǔ nyanya;

mɛhuhu wɛ yě nɔ hwlɛndó.

18 Nǔ e wú yě mɛ énɛ́ lɛ́ nɔ tɔ wu bo ná dó kɔn hun kɔn nyi ayǐ é nɛ́;

yě nɔ hɔn hwlá cí nǔglɔ́ bá dó gblé gbɛ dó nú mɛ ɖěvo lɛ́.

19 Mɔ̌ wɛ mɛ e nɔ wa nǔ agɔ dó ɖu le lɛ́ é nɔ wa nǔ gbɔn,

bɔ le e yě nɔ ɖu é wɛ ná gblé gbɛ dó nú yě.

Énɛ́ ɔ, un ná gba gbigbɔ ce kɔn nyi mi jí;

un ná bló bɔ mi ná tuun xó ce lɛ́.

24 Ðó un sú xó ylɔ́ mi, amɔ̌, mi gbɛ́ tó ɖó mì,

un kɛ alɔ nú mi, amɔ̌, mɛ ɖěbǔ kpɔ́n jɛ ce jí ǎ,

25 mi nɔ dó vɛ̌ nú wěɖexámɛ ce lɛ́ bǐ,

bo nɔ gbɛ́ nu e un kɛ dó nǔ wú nú mi é,

26 nyi lɔ ná ko mi hwenu e awě ná xo mi é;

un ná cá nú mi hwenu e nǔ e ɖi xɛsi ná wɛ mi ɖe tawun é ná wá é,

27 hwenu e nǔ e ɖi xɛsi ná wɛ mi ɖe tawun é ná wá jɔhɔn ɖaxó ɖɔhun,

bɔ awě e ná xo mi é ná wá axásáxásá jɔhɔn syɛ́nsyɛ́n ɖɔhun é,

hwenu e aluwɛ kpó adohu adohu kpó ná wá mi jí é.

28 Hwenɛ́nu ɔ, yě ná nɔ ylɔ́ mì, amɔ̌, un ná nɔ kɛ nu d’é mɛ nú yě ǎ;

yě ná ba mì nukún myámyá, loɔ, yě ná mɔ mì ǎ,

29 ɖó yě gbɛ́ wǎn nú nǔtuuntuun,

bo nɔ ba ná ɖó sísí e gɔ́ngɔ́n é nú Jexóva ǎ.

30 Yě gbɛ́ wěɖexámɛ ce;

yě ɖó sísí nú nu e un kɛ dó nǔ wú nú yě lɛ́ é ɖě ǎ.

31 Énɛ́ wú ɔ, yě ná sún nǔ e yě wa é sín sin,*

bɔ wěɖexámɛ* yěɖésúnɔ tɔn lɛ́ wɛ ná xwyɔ́ kɔ nú yě.

32 Ðó gǔfínfɔ́n mɛ e ma mɔ nǔ kpɔ́n ǎ lɛ́ é tɔn ná hu yě,

bɔ yamakénúnǔ xlonɔ lɛ́ tɔn ná sú kún dó nú yě.

33 Amɔ̌, mɛ e nɔ ɖótó mì é ná nɔ ayijayǐ mɛ,

é ná ɖi xɛsi nú awěxomɛ ǎ.”

2 Vǐ ce, ényí a yí gbe nú xó ce lɛ́,

bo hwlá gbeɖiɖe ce lɛ́ dɔkun ɖɔhun ɔ,

 2 ényí a hun tó towe nú nǔnywɛ́,

bo hun ayi towe nú nukúnnúmɔjɛnǔmɛ ɔ,

 3 gɔ́ ná ɔ, ényí a sú xó ylɔ́ nukúnnúmɔjɛnǔmɛ,

bo zé gbe dó jǐ dó ylɔ́ nǔwúkpíkpé e nɔ da nǔ lɛ́ kpɔ́n é ɔ,

 4 ényí a nɔ ɖo biba ɛ wɛ kpatágan ɖɔhun,

bo nɔ ɖo biba ɛ wɛ dɔkun e ɖo hwlǎhwlá lɛ́ é ɖɔhun ɔ,

 5 a ná mɔ nukúnnú jɛ nǔ e sísí e gɔ́ngɔ́n é ɖíɖó nú Jexóva nyí é wú,

bɔ nǔ kplɔ́nkplɔ́n dó Mawu wú ná kpa we.

 6 Ðó Jexóva ɖésúnɔ wɛ nɔ ná nǔnywɛ́ mɛ;

nu tɔn mɛ wɛ nǔtuuntuun kpó nukúnnúmɔjɛnǔmɛ kpó nɔ gosín.

 7 É nɔ sɛ nǔnywɛ́* xwe nú nǔgbóɖɔtɔ́ lɛ́;

é nyí gǎglónú ɖé nú gbejínɔtɔ́ lɛ́.

 8 É nɔ kpé nukún dó hwɛjijɔnɔ lɛ́ sín ali wú,

bo ná cɔ́ gbejínɔtɔ́ tɔn lɛ́ sín ali.

 9 Énɛ́ ɔ, a ná mɔ nukúnnú jɛ nǔ e nyí nǔ jlɔ́jlɔ́ é, nǔ e sɔgbe é kpó nǔ e nyí nǔgbó é kpó wú,

énɛ́ wɛ nyí, a ná mɔ nukúnnú jɛ ali ɖagbe ɔ wú.

10 Ényí nǔnywɛ́ byɔ́ ayi towe mɛ,

bónú nǔtuuntuun wá víví nú lǐndɔ̌n* towe ɔ,

11 nǔwúkpíkpé tamɛ linlin tɔn ná nɔ kpé nukún dó wǔ we,

bɔ nukúnnúmɔjɛnǔmɛ ná nya xɛ ɖo jǐ towe,

12 nǔ énɛ́ lɛ́ ná hwlɛ́n we sín ali nyanya jí,

bo ná hwlɛ́n we sín mɛ e nɔ ɖɔ xó gblégblé lɛ́ é sí,

13 yě ná hwlɛ́n we sín mɛ ɖěɖěe nɔ jó ali nǔgbó ɔ dó,

bo nɔ ɖi zɔnlin ɖo zǐnflú mɛ lɛ́ é sí,

14 yě ná hwlɛ́n we sín mɛ ɖěɖěe nǔnyanyawiwa nɔ víví ná,

bɔ nǔ baɖabaɖa lɛ́ kpó nǔ gblégblé lɛ́ kpó nɔ hun xomɛ ná lɛ́ é sí,

15 mɛ ɖěɖěe sín ali gɔ́ndɔ́n,

bɔ yě kpo nú mɛ hízíhízí ɖo gbɛzán yětɔn mɛ lɛ́ é.

16 Nǔnywɛ́ ná hwlɛ́n we sín nyɔ̌nu banáwatɔ́* ɔ sí,

bo ná hwlɛ́n we sín nyɔ̌nu nǔblíblíwatɔ́* ɔ sín xó víví lɛ́* sí,

17 nyɔ̌nu e gbɛ́ asú* e é da ɖo wǐnnyáwínnyá mɛ é,

bo wɔn akɔ e é jɛ xá Mawu tɔn é;

18 ɖó xwé tɔn ɔ, kú wɛ é nɔ kplá mɛ yi,

bɔ ali* e yi xwé tɔn gbe é nɔ kplá mɛ yi yɔdo mɛ.

19 Mɛ e nɔ ɖóxó xá ɛ* lɛ́ é ɖě ná lɛ́ kɔ ǎ,

mɔ̌ jɛ́n yě ma ka ná lɛ́ mɔ gbɛli ɔ ǎ é nɛ́.

20 Énɛ́ wú ɔ, mlɛ̌ ali mɛ ɖagbe lɛ́ tɔn,

bo nɔ ali nǔjlɔ́jlɔ́watɔ́ lɛ́ tɔn jí,

21 ɖó mɛ e nɔ wa nǔ e sɔgbe lɛ́ é kɛ́ɖɛ́ wɛ ná nɔ ayǐkúngban ɔ jí,

bɔ mɛ e wú è ma nɔ mɔ nǔɖé ɖɔ dó ǎ lɛ́ é* wɛ ná nɔ jí.

22 Amɔ̌, mɛ nyanya lɛ́ ɔ, è ná ɖe yě sín ayǐkúngban ɔ jí,

bɔ gbejímanɔtɔ́ lɛ́ ɔ, è ná sú kún yětɔn dó.

3 Vǐ ce, ma wɔn nǔkplɔ́nmɛ* ce ó,

xwedó gbeɖiɖe ce lɛ́,

 2 ɖó yě ná dó azǎn azǎn jí nú we,

dó xwe xwe jí nú we, bɔ gbɛzán towe ná ɖó fífá.

Sin yě dó kɔ;

wlǎn yě dó ayi towe mɛ.

 4 Énɛ́ ɔ, nǔ towe ná nyɔ́ Mawu kpó gbɛtɔ́ kpó nukúnmɛ,

bɔ yě ná nɔ kpɔ́n we dó mɔ mɛ e ɖó nukúnnúmɔjɛnǔmɛ ɖaxó é.

 5 Ðeji dó Jexóva wú kpó ayi towe bǐ kpó,

ma nɔ gán jɛ nukúnnúmɔjɛnǔmɛ hwiɖésúnɔ tɔn wú ó.

 6 Nɔ flín i ɖo nǔ e a nɔ wa lɛ́ é bǐ mɛ,

énɛ́ ɔ, é ná jlɔ́ ali towe lɛ́.

 8 Énɛ́ ná gbɔ azɔn nú agbaza* towe,

bo ná ná fífá xú towe lɛ́.

 9 Zǎn nǔ xɔ akwɛ́ towe lɛ́ dó wlí yɛ̌yi nú Jexóva,

lɛ̌ sɔ́ nǔkún towe nukɔn nukɔntɔn lɛ́ bǐ* dó wa mɔ̌.

10 Énɛ́ ɔ, jinukún ná gɔ́ agɔ̌ towe lɛ́ bǐ mlɛ́mlɛ́,

bɔ vɛ̌ɛn yɔ̌yɔ́ ná gɔ́ vɛ̌ɛnhɛnnú* towe lɛ́ bo túnflá.

11 Vǐ ce, ma hɔn kplɔ́n Jexóva tɔn nyi gbě ó,

ényí é kɛ nu dó nǔ wú nú we hǔn, ma gbɛ́ wǎn ná ó.

12 Ðó mɛ e Jexóva yí wǎn ná lɛ́ é wɛ é nɔ kɛ nu dó nǔ wú ná,

lěe tɔ́ ɖé nɔ bló gbɔn nú vǐ e wú xomɛ tɔn hun dó é gbɔn é.

13 Awǎjijɛnɔ wɛ nyí mɛ e mɔ nǔnywɛ́ é

kpó mɛ e ɖó nukúnnúmɔjɛnǔmɛ é kpó.

14 Nǔnywɛ́ ɖíɖó nyɔ́ hú kpatágan ɖíɖó.

Nǔnywɛ́ ɖíɖó ɖó le hú siká ɖíɖó.

15 É xɔ akwɛ́ hú awǐnnya koláyi;*

è sixú sɔ́ nǔ e nɔ jló we lɛ́ é ɖě jlɛ́ dó wǔ tɔn ǎ.

16 Jidɔ́ ɖo ɖisílɔ tɔn mɛ;

dɔkun kpó susu kpó ɖo amyɔlɔ tɔn mɛ.

17 Ali tɔn lɛ́ dɔn mɛ,

bɔ fífá ɖo ali tɔn lɛ́ bǐ jí.

18 Atín e nɔ ná gbɛ mɛ é wɛ é nyí nú mɛ ɖěɖěe nɔ tɛ́ d’é wú lɛ́ é,

bɔ è ná ylɔ́ mɛ ɖěɖěe nɔ tɛ́ d’é wú gbánwúngbánwún lɛ́ é ɖɔ awǎjijɛnɔ.

20 Gbɔn nǔtuuntuun tɔn gblamɛ ɔ, sin ɖaxó ɖaxó lɛ́ má ɖó vovo,

bɔ ahǔn ja sín akpɔ́kpɔ́ e ɖo jǐnukúnsin lɛ́ é mɛ.

Nya xɛ ɖo nǔnywɛ́* kpó nǔwúkpíkpé tamɛ linlin tɔn kpó jí;

22 yě ná ná gbɛ we,*

bo ná nyí kɔjɛ́ ɖo kɔ towe.

23 Énɛ́ ɔ, a ná ɖi zɔnlin ɖo ali towe jí ɖo ayijayǐ mɛ,

bo ná klɛ́n afɔ* gbeɖé ǎ.

24 Ényí a mlɔ́ ayǐ ɔ, nǔ ɖě ná dó xɛsi we ǎ;

a ná mlɔ́ ayǐ, bɔ amlɔ towe ná víví.

25 A ná ɖi xɛsi nú adǎn e nɔ wá gbo mɛ ajijimɛ é ɖě ǎ,

mɔ̌ jɛ́n a ma ka ná lɛ́ ɖi xɛsi nú awě e ja mɛ nyanya lɛ́ xo gbé jɔhɔn ɖaxó ɖɔhun é ǎ é nɛ́.

26 Ðó Jexóva ná xlɛ́ ɖɔ émí nyí gǎnjɛwú towe;

é ná lɔn nú afɔ towe ní jɛ mɔ mɛ ǎ.

27 Ényí a kpé wú* bo ná d’alɔ mɛ hǔn,

ma tɛ nǔ ɖagbe mɛ ɖěɖěe a ɖó ná ná lɛ́ é* ó.

29 Ma lin nyanya nɔzo towe e kpó hwi kpó ɖo kpɔ́,

bɔ é ɖeji dó wǔ we é tɔn ó.

30 Ényí é ma sín nǔɖé wú ǎ hǔn, ma ɖɔ jlɛ xá mɛɖé ó,

ényí é ma wa nǔ nyanya ɖé nú we ǎ ɔ nɛ́.

31 Ma jló dǎkaxotɔ́ sín gbɛ ó,

ma ka lɛ́ wa nǔ éɖɔhun ɖo ali ɖěbǔ nu ó,

32 ɖó Jexóva gbɛ́ wǎn nú mɛ e nɔ hízí mɛ é,

amɔ̌, é nɔ zun xɔ́ntɔn vívɛ́ xá nǔgbóɖɔtɔ́ lɛ́.

33 Jexóva nɔ dó nu mɛ nyanya sín xwé,

amɔ̌, é nɔ kɔn nyɔ̌ná dó nǔjlɔ́jlɔ́watɔ́ sín xwé jí.

34 Ðó é nɔ cá nú mɛcákotɔ́ lɛ́,

amɔ̌, é nɔ ná fɛ́nú tɔn mɛɖéesɔ́hwetɔ́ lɛ́.

35 È ná wlí yɛ̌yi nú nǔnywɛ́tɔ́ lɛ́,

amɔ̌, nǔ e nɔ dɔn winnyá wá lɛ́ é wɛ nɔ xɔ akwɛ́ nú xlonɔ lɛ́.

4 Vǐ ce lɛ́ mi, mi ɖótó kplɔ́n e ná mi wɛ tɔ́ ɖé ɖe é;

mi wlí tó wú bá dó ɖó nukúnnúmɔjɛnǔmɛ.

 2 Ðó un ná kplɔ́n nǔ ɖagbe mi;

mi ma hɔn nǔkplɔ́nmɛ* ce nyi gbě ó.

 3 Vǐ jɔ vǐ wɛ un nyí nú tɔ́ ce,

bɔ nyɛ wɛ nyí vǐ e nɔ ce yí wǎn ná tawun é.

 7 Nǔnywɛ́ wɛ nyí nǔ e ɖo tají hú gǎn é, énɛ́ wú ɔ, tɛ́n kpɔ́n bo ɖó nǔnywɛ́,

bo lɛ́ tɛ́n kpɔ́n bo ɖó nukúnnúmɔjɛnǔmɛ gɔ́ nú nǔ e a ɖó lɛ́ é bǐ.

 9 É ná sɔ́ jɛ̌gbákún ɖɛkpɛ ɖɛkpɛ ɖé ɖó ta towe;

é ná sɔ́ axɔ́súgbákún e nyɔ́ ɖɛkpɛ é ɖé dó ba acɔ́ nú we.”

10 Vǐ ce, ɖǒtó xó ce lɛ́, bo yí gbe ná,

énɛ́ ɔ, xwe ná jɛ xwe jí nú we.

11 Un ná kplɔ́n we nǔnywɛ́li;

un ná kplá we gbɔn nǔjlɔ́jlɔ́wiwa sín ali lɛ́ jí.

12 Ényí a ɖo zɔnlin ɖi wɛ ɔ, afɔklɛ́nnú ɖě ná ɖo ali towe jí ǎ,

bɔ ényí a ɖo wezun kán wɛ ɔ, a ná klɛ́n afɔ ǎ.

14 Ma mlɛ́ ali mɛ nyanya lɛ́ tɔn ó,

ma gbɔn ali nǔnyanyawatɔ́ lɛ́ tɔn jí ó.

15 Gbɔn zɔ ná, ma mlɛ́ ó;

dǒ gǔdo è, ma sɔ́ ali énɛ́ ó.

17 Nǔnyanyawiwa nɔ cí wɔ̌xúxú ɖuɖu ɖɔhun nú yě,

bɔ dǎkaxixo nɔ cí vɛ̌ɛn nunu ɖɔhun nú yě.

18 Amɔ̌, ali nǔjlɔ́jlɔ́watɔ́ lɛ́ tɔn cí wěziza zǎnzǎn tɔn e ɖo hǐnhɔ́n wɛ é ɖɔhun;

é nɔ ɖo hǐnhɔ́n d’é jí wɛ káká bɔ hwesivɔ́ nɔ hun bǐ.

19 Ali mɛ nyanya lɛ́ tɔn cí ablu ɖɔhun;

yě tuun nǔ e nɔ zɔ́n bɔ yě nɔ klɛ́n afɔ é ǎ.

20 Vǐ ce, hɛn ayi dó xó ce lɛ́ wú;

ɖǒtó xó ce lɛ́ kpó sɔxwixwe kpó.

21 Ma wɔn yě ó;

hɛn yě dó ayi gɔngɔn towe mɛ,

22 ɖó gbɛ wɛ yě nɔ nyí nú mɛ ɖěɖěe nɔ yí yě lɛ́ é,

bo nɔ zɔ́n bɔ lanmɛ yětɔn blěbú* nɔ ɖo ganjí.

23 Nya xɛ ɖo ayi towe jí hú nǔ e jí a nɔ nya xɛ ɖe lɛ́ é bǐ,

ɖó é wɛ nɔ ná gbɛ mɛ.

24 Ðǒ wǔ zɔ nú adingbanxó lɛ́,

bo nɔ zɔ tawun nú mɛhízíhízíxó lɛ́.

25 Nukún towe lɛ́ ɖó ná kpɔ́n nukɔn dáán,

ɛɛn, sɔ́ nukún towe lɛ́ ɖó nǔ e ɖo nukɔn nú we lɛ́ é jí dáán.

26 Ðe afɔklɛ́nnú lɛ́ sín ali towe jí,*

énɛ́ ɔ, ali towe lɛ́ bǐ ná ɖó gǎnjɛwú.

Ðǒtó nǔ e kplɔ́n mɛ wɛ un ɖe dó nukúnnúmɔjɛnǔmɛ wú é kpó sɔxwixwe kpó,

 2 bo ná dó sixú nya xɛ ɖo nǔwúkpíkpé tamɛ linlin tɔn towe jí,

lobo zán nu towe dó nya xɛ ɖo nǔtuuntuun jí.

 3 Ðó nyɔ̌nu banáwatɔ́* sín nufló víví wǐinjá ɖɔhun,

bɔ nu tɔn ɖíɖí hú ami.

 4 Amɔ̌, ɖo vivɔnu ɔ, é nɔ vɛ́ vǐvɛ́ ɖɔhun,

lobo nɔ ɖá hwǐ nuwenɔ ɖɔhun.

 7 Din ɔ, vǐ ce lɛ́ mi, mi ɖótó mì,

bo ma lɛ́ kɔ sín nǔ e ɖɔ wɛ un ɖe lɛ́ é gúdo ó.

 8 Nɔ zɔ vwéé dó nyɔ̌nu mɔ̌hun;

ma sɛkpɔ́ ali e yi xwé tɔn gbe é ó,

 9 énɛ́ ɔ, wi e ɖo ta towe é ná kɔ́n ǎ,

mɔ̌ jɛ́n a ma ná se wǔvɛ́ nú xwe gěgé ǎ é nɛ́;

10 mɔ̌ ɖokpó ɔ, jǒnɔ lɛ́ ná vɔ nǔɖókan towe lɛ́* ǎ,

bɔ nǔ e a jɛ tagba bo ɖó lɛ́ é ná yi toɖévomɛnu xwégbe ǎ.

11 É ma nyí mɔ̌ ǎ ɔ, a ná wɛn azɔn ɖo vivɔnu gbɛzán towe tɔn,

hwenu e hlɔ̌nhlɔ́n towe kpó agbaza towe kpó ná yi gǔdo é.

12 A ná ɖɔ: “Étɛ́wú un ka gbɛ́ wǎn nú kplɔ́n e è ná mì é?

13 Un ɖótó nǔkplɔ́nmɛtɔ́ ce lɛ́ sín gbe ǎ,

un hɛn ayi dó nǔ e mɛ̌si ce lɛ́ ɖɔ lɛ́ é wú ǎ.

14 Xó ce ko ɖibla fó bǐ

ɖo agun ɔ blěbú tɛ́ntin.”*

15 Nɔ nu sitɛ́nu hwiɖésúnɔ tɔn sín sin,

nɔ nu sin e nɔ sa sín dotɔ hwiɖésúnɔ tɔn mɛ é.*

16 Tɔjɔtɛn towe lɛ́ ɖó ná fúnfún kpé kɔ́xo wɛ a?

Sin towe e ɖo sisa wɛ lɛ́ é ɖó ná kpé tokplétɛn lɛ́ wɛ a?

17 Yě ní nyí hwiɖokpónɔ tɔn,

bo ma nyí hwi kpó jǒnɔ lɛ́ kpó tɔn ó.

18 Nyɔ̌ná ní kɔn dó tɔjɔtɛn* hwiɖésúnɔ tɔn jí,

j’awǎ xá asi e a da ɖo wǐnnyáwínnyá mɛ é,

19 agbanlín asi ɖagbe ɖagbe ɖé wɛ, sógbɔ́ ɖɛkpɛ ɖɛkpɛ ɖé wɛ.

20 Énɛ́ wú ɔ, vǐ ce, étɛ́wú nyɔ̌nu banáwatɔ́* ka ná jló we?

Étɛ́wú a ka ná zunfán nyɔ̌nu nǔblíblíwatɔ́* gbánwúngbánwún dó akɔ́nnu?

21 Ðó ali gbɛtɔ́ tɔn lɛ́ bǐ wɛ Jexóva nɔ mɔ;

é nɔ gbéjé ali tɔn lɛ́ bǐ kpɔ́n.

22 Mɛ nyanya ɔ, nǔwanyido éɖésúnɔ tɔn lɛ́ wɛ nɔ nyí mɔ n’i,

hwɛ éɖésúnɔ tɔn sín kan wɛ ná blá ɛ.

23 É ná kú, ɖó é se kplɔ́n ǎ wútu.

É ná bú ali, ɖó xlonɔnúwiwa tɔn zɛ jlɛ̌ wú wútu.

6 Vǐ ce, ényí nɔzo towe ja axɔ́ ɖu gbé, bɔ a nɔ nukɔn* n’i hǔn,

ényí a ná alɔ* jǒnɔ ɖé hǔn,

 2 ényí a jɛ mɔ mɛ, ɖó akpá e a dó é wú,

bɔ xó e tɔ́n sín nu towe mɛ lɛ́ é wlí we hǔn,

 3 vǐ ce, wa nǔ élɔ́ dó tún kan nú hwiɖée,

ɖó a ko jɛ nɔzo towe sín alɔ mɛ:

 4 Ma lɔn bo d’amlɔ ó,

ma ka lɛ́ lɔn bo sa kɔmlɔgɔ́ ó.

 5 Tún kan nú hwiɖée, lěe tɛ́ nɔ zlɔ́n sín gběnyatɔ́ sín alɔ mɛ gbɔn é ɖɔhun,

lěe xɛ nɔ zlɔ́n sín xɛwlítɔ́ sín alɔ mɛ gbɔn é ɖɔhun.

 6 Fɔnlínnɔ, yi ayǐsínzɛn gɔ́n;

ɖǒ ayi lěe é nɔ wa nǔ gbɔn é wú, bo húzú nǔnywɛ́tɔ́.

 7 É ɖó ahwangán ɖaxó, sɔ́ja, alǒ acɛkpatɔ́ ǎ có,

 8 é nɔ sɔ́ nǔ nú nǔ e é ná ɖu é ɖo yǒzohwenu,

bo nɔ xo nǔ e é ná ɖu é kplé ɖo nǔkúnyiyahwenu.

10 Amlɔ kpɛɖé, kɔmlɔgɔ́ sisa kpɛɖé,

alɔ bíblá dó wǔ bá gbɔjɛ kpɛɖé,

11 bɔ ya ná fyán we ajotɔ́ ɖɔhun,

lobɔ hɛ̌n ná fyán we ajotɔ́ axánsúnxó ɖɔhun.

12 Gbɛtɔ́ e ma nyí nǔɖéwanú ǎ bo nyí mɛ nyanya é nɔ ɖo yiyi wɛ bo nɔ ɖo adingban te;

13 é nɔ sɔ́ nukún dó ɖɔ xó, bo nɔ sɔ́ afɔ dó ɖɔ xó, lobo nɔ sɔ́ alɔ dó ɖɔ xó.

14 É nɔ zán ayi gblégblé

dó ɖo nǔ nyanya sín wě ɖe wɛ hwebǐnu, bo nɔ ɖo hun dɔn kpé wɛ hwebǐnu.

15 Énɛ́ wú ɔ, awě e ná xo è é ná wá ajijimɛ;

ɖo nukúnxwixwe ɖokpó mɛ ɔ, è ná gba ɛ hánnyá, bɔ ɖěwagbɛn ná hán.

16 Nǔ ayizɛ́n ɖé lɛ́ tíin bɔ Jexóva gbɛ́ wǎn ná;

ɛɛn, nǔ tɛ́nwe ɖé lɛ́ tíin bo nyí nǔvɛ́mɔ n’i:*

17 nukún goyíyí tɔn, ɖɛ̌ e nɔ ɖó adingban é, alɔ e nɔ kɔn xomɛvɔ́nɔ sín hun nyi ayǐ é,

18 ayi e nɔ bló tuto nǔ nyanya tɔn é, afɔ e nɔ hwlɛndó nǔnyanyawiwa kɔn é,

19 kúnnuagɔɖetɔ́ e nɔ ɖo adingban te é,

kpó mɛ ɖěbǔ e nɔ ɖo hun dɔn kpé wɛ ɖo nɔví nɔví tɛ́ntin é kpó.

20 Vǐ ce, xwedó gbeɖiɖe tɔ́ towe tɔn,

ma gbɛ́ nǔkplɔ́nmɛ* nɔ towe tɔn ó.

21 Blǎ yě dó ayi towe wú hwebǐnu;

sin yě dó kɔ.

22 Ényí a ɖo zɔnlin ɖi wɛ ɔ, yě ná xlɛ́ ali we;

ényí a mlɔ́ ayǐ ɔ, yě ná nya xɛ ɖo jǐ we;

ényí a fɔ́n ɔ, yě ná ɖɔ xó nú we.*

23 Ðó zogbɛ́n wɛ gbeɖiɖe nyí,

bɔ sɛ́n nyí wěziza,

lobɔ nǔgbɛ́númɛ nyí ali e nɔ kplá mɛ yí gbɛ mɛ é.

24 Yě ná nya xɛ ɖo jǐ we sín nyɔ̌nu baɖabaɖa sí,

yě ná hwlɛ́n we sín xó víví nyɔ̌nu nǔblíblíwatɔ́* tɔn sí.

25 Ðɛkpɛ tɔn ní ma jló we ɖo ayi towe mɛ ó,

ma ka lɔn nú é bló nukún nú we dó dɔn we ó,

26 ɖó é nɔ sín nyɔ̌nu tonyatɔ́ wú, bɔ nǔɖé sɔ́ nɔ kpo nú súnnu hú wɔ̌xúxú fínfɛ́n ɖokpó ǎ,

amɔ̌, asi súnnu ɖěvo tɔn nɔ ɖó mɔ bo nɔ wlí gbɛ* xɔ akwɛ́ mɛtɔn.

29 Nǔ ɖokpó ɔ wɛ nɔ gbo mɛ ɖěbǔ e ɖóxó xá nɔzo tɔn sín asi é;

mɛ ɖěbǔ e ná ɖ’alɔ nyɔ̌nu mɔ̌hun wú é ɔ, è ná gɔn tó dɔn n’i ǎ.

30 Ényí mɛɖé j’ajo bo ná dó gbɔ adɔ ɔ,

mɛ lɛ́ nɔ gbɛ́ wǎn n’i ǎ.

31 É ɖo mɔ̌ có, ényí è wlí i ɔ, é ná sú nǔ e é fin é donu tɛ́nwe;

nǔ e ɖo xwé tɔn gbe lɛ́ é bǐ wɛ é ná bɛ́ jó.

32 Mɛ ɖěbǔ e ba mɛsi é ɔ, ayivɔ wɛ vún i;

mɛ e wa mɔ̌ é ná sú kún dó nú éɖée.*

33 Wǔ jɛ́n é ná gblé éɖée, bo ná lɛ́ dó winnyá éɖée,

bɔ wi tɔn e ná kɔ́n é ná bú gbeɖé ǎ.

34 Ðó wǔhwinhwan nɔ zɔ́n bɔ asú nɔ jɛ ma;

é ná se wǔvɛ́ ɖěbǔ xá mɛ hwenu e é ɖo hlɔn ba wɛ é ǎ.

35 É ná yí gbe nú è ní sú axɔ́* ɛ ǎ;

ényí nǔ e a ná ɛ é ná bo sukpɔ́ gbɔn ɖěbǔ ɔ, é ná se gbɔ ǎ.

7 Vǐ ce, xwedó xó ce lɛ́,

bo hwlá gbeɖiɖe ce lɛ́ dɔkun ɖɔhun.

 2 Xwedó gbeɖiɖe ce lɛ́ bo nɔ gbɛ;

nǔkplɔ́nmɛ* ce ní xɔ akwɛ́ nú we nukúnzin towe ɖɔhun.

 3 Sin yě dó alɔví towe lɛ́ wú;

wlǎn yě dó ayi towe mɛ.

 5 bónú yě ná nya xɛ ɖo jǐ we sín nyɔ̌nu banáwatɔ́* ɔ sí,

lobo ná hwlɛ́n we sín nyɔ̌nu nǔblíblíwatɔ́* ɔ kpó xó víví e é nɔ ɖɔ lɛ́ é* kpó sí.

 6 Un ɖo xɔ ce sín flɛtɛ́li nu gbe ɖokpó,

bo ɖo do kpɔ́n sɛ́ dó wɛ,

 7 bɔ un mɔ mɛ e ma mɔ nǔ kpɔ́n ǎ* lɛ́ é;

un ɖó ayi dɔ̌nkpɛvú ɖokpó wú ɖo mɛ wínnyáwínnyá lɛ́ mɛ bɔ ayivɔ vún i.

 8 É gbɔn toxomɛli e sɛkpɔ́ aliklán nyɔ̌nu énɛ́ tɔn é,

bo ɖi zɔnlin ɖidó nyɔ̌nu ɔ sín xɔ kɔn,

 9 ɖo gbadanu hwenu e zǎn ɖo bibɔ wɛ,

bɔ ablu ɖo dídó wɛ é.

10 Énɛ́ ɔ, un mɔ bɔ nyɔ̌nu ɔ wá kpé è,

é sɔ́ nǔ tonyatɔ́ ɖɔhun,* bo ɖó ayi wínníwínní.

12 A mɔ ɛ ɖo kɔ́xo din ɔ, a ná mɔ ɛ ɖo tokplétɛn lɛ́ din,

é nɔ tɔ wu ɖo aliklán lɛ́ bǐ kpá.

13 É zunfán dɔ̌nkpɛvú ɔ bo kí si n’i;

é ɖɔ n’i kpó wunhínhɔ́n kpó ɖɔ:

15 Énɛ́ wú wɛ un tɔ́n bo wá kpé we,

un jɛ gbě towe mɛ, bo mɔ we.

16 Un ko tɛ́ avɔ ɖagbe ɖagbe lɛ́ ɖó zan ce jí,

lɛ̌ɛnkanvɔ e ɖó sinmɛ vovo bo gosín Ejípu é wɛ.

18 Wǎ, mǐ ní nu wǎnyíyí mǐtɔn gɔ́ xo káká jɛ zǎnzǎn;

mǐ ní ɖu vǐví wǎnyíyí zozo tɔn ɖó kpɔ́,

19 ɖó asú ce ɖo xwégbe ǎ;

hwɛ línlín wɛ é zɛ.

20 É hɛn akwɛ́ dó éɖée jí,

é ná lɛ́ kɔ wá cóbónú sun ná kpé ká ǎ.”

22 Ajijimɛ ɔ, é xwedó è nyibúsú e è kplá xwe huhu gbé é ɖɔhun,

é xwedó è xlonɔ e è ná dɔn tó ná ɖo sókpo* mɛ é ɖɔhun,

23 káká bɔ gǎ ɖé wá xo alǐn tɔn zlɛ́;

é cí xɛ e hwlɛndó bo yi jɛ mɔ mɛ é ɖɔhun, é tuun ɖɔ gbɛ* émítɔn ná yi ɖ’é mɛ ǎ.

24 Din ɔ, vǐ ce lɛ́ mi, mi ɖótó mì;

mi hɛn ayi dó xó e ɖɔ wɛ un ɖe lɛ́ é wú.

Ma ɖo flúflú wɛ bo yi gbɔn ali tɔn jí ó,

26 ɖó mɛ e é ko sín wǔ tɔn bɔ yě kú lɛ́ é sukpɔ́,

mɛ ɖěɖěe é ko hu lɛ́ é gégé.

27 Xwé tɔn ɔ, Yɔdo* mɛ wɛ é nɔ kplá mɛ yi;

é nɔ kplá mɛ yi maɖɔnǔxwɛ.*

 2 Nǔnywɛ́ ɖo fí e yi jǐ ɖo alitó lɛ́ é,

é ɖo te ɖo alikpléhɔ̌nkantɛn lɛ́.

 3 É ɖo hɔntogbó e nu è nɔ gbɔn dó byɔ́ toxo ɔ mɛ lɛ́ é kpá,

ɖo ali e byɔ́ toxo ɔ mɛ lɛ́ é jí,

é nɔ ɖo xó sú wɛ tlílí ɖɔ:

 4 “Gbɛtɔ́ lɛ́ mi, mi ylɔ́ wɛ un ɖe;

mi mɛ bǐ* ɖɔ xó ná wɛ un ɖe.

 5 Mi mɛ e ma mɔ nǔ kpɔ́n ǎ lɛ́ é mi, mi kplɔ́n acéjíninɔ;

xlonɔ lɛ́ mi, mi dó gǎn bo ɖó nukúnnúmɔjɛnǔmɛ sín ayi.*

 6 Mi ɖótó mì, ɖó nǔ e ɖɔ wɛ un ɖe é ɖo tají,

nǔ e sɔgbe é ɖɔ wɛ nu ce ɖe.

 7 Ðó nǔgbó wɛ nu ce nɔ ɖɔ,

bɔ nufló ce lɛ́ gbɛ́ wǎn nú nǔ nyanya.

 9 É bɔ wǔ bɔ mɛ e ɖó nukúnnúmɔjɛnǔmɛ é ná mɔ nǔ jɛ bǐ mɛ,

bo lɛ́ sɔgbe ɖo mɛ e mɔ nǔtuuntuun lɛ́ é sín nukúnmɛ.

10 Sɔ́ kplɔ́n e ná we wɛ un ɖe é, é ní ma nyí kpatágan ó,

sɔ́ nǔtuuntuun, é ní ma nyí siká akú ó.

11 Ðó nǔnywɛ́ nyɔ́ hú awǐnnya koláyi;*

è sixú sɔ́ nǔ ɖěvo e nɔ jló mɛ lɛ́ é ɖě jlɛ́ dó wǔ tɔn ǎ.

12 Nyɛ nǔnywɛ́ ɔ, un nɔ nɔ kpɔ́ xá acéjíninɔ;

un mɔ nǔtuuntuun kpó nǔwúkpíkpé tamɛ linlin tɔn kpó.

14 Wěɖexámɛ ɖagbe lɛ́ kpó nǔnywɛ́ kpó ɖo así ce;

ce wɛ nyí nukúnnúmɔjɛnǔmɛ kpó hlɔ̌nhlɔ́n kpó.

15 Nyɛ wɛ zɔ́n bɔ axɔ́sú lɛ́ kpo ɖo acɛ kpa wɛ,

bɔ axɔ́súzɔ́watɔ́ nukúnɖéjí lɛ́ nɔ ɖe gbetakɛ́n jlɔ́jlɔ́ lɛ́ tɔ́n.

16 Nyɛ wɛ zɔ́n bɔ axɔ́ví lɛ́ kpo ɖo acɛ kpa wɛ,

bɔ mɛ nukúnɖéjí lɛ́ nɔ ɖɔ hwɛ jlɔ́jlɔ́.

17 Un yí wǎn nú mɛ ɖěɖěe yí wǎn nú mì lɛ́ é,

mɛ e ɖo biba mì wɛ lɛ́ é ná mɔ mì.

18 Dɔkun kpó susu kpó ɖo así ce,

dɔkun e nɔ nɔ ayǐ sɔ́yi é* kpó nǔjlɔ́jlɔ́wiwa kpó ɖo así ce.

19 Sínsɛ́n ce nyɔ́ hú siká, é tlɛ nyɔ́ hú siká akú,

bɔ nǔ e un nɔ ná mɛ é nyɔ́ hú kpatágan akú.

20 Un nɔ ɖi zɔnlin gbɔn nǔjlɔ́jlɔ́wiwali jí,

un nɔ ɖi zɔnlin gbɔn ali e jí è nɔ ɖɔ hwɛ jlɔ́jlɔ́ ɖe lɛ́ é tɛ́ntin.

21 Un nɔ ná gǔ ɖagbe ɖagbe mɛ ɖěɖěe yí wǎn nú mì lɛ́ é,

un nɔ bɛ́ nǔ dó agɔ̌ yětɔn lɛ́ mɛ bɔ é nɔ gɔ́.

22 Jexóva dá mì bɔ un nyí nǔɖíɖó tɔn nukɔn nukɔntɔn ɔ,

un nyí nǔ nukɔntɔn ɔ ɖo nǔ ɖěɖěe é bló sín hwenu línlín ɖíe lɛ́ é mɛ.

23 Sín hwexónu* wɛ è ko sɔ́ mì ɖó tɛn e mɛ un ɖe é,

è sɔ́ mì ɖó fínɛ́ sín bǐbɛ́mɛ, sín hwenu e jɛ nukɔn nú hwenu e è dá ayǐkúngban ɔ é.

24 È ji mì hwenu e xu e gɔ́ngɔ́n é ɖě ma ko tíin ǎ é,

hwenu e tɔjɔtɛn ɖě ma ko tíin ǎ é.

25 Cóbónú è ná ɖó só ɖaxó lɛ́ ayǐ ɔ,

cóbónú è ná ɖó só kpɛví lɛ́ ayǐ ɔ, è ko bló mì,

26 hwenu e é ma ko bló ayǐkúngban ɔ kpó gle tɔn lɛ́ kpó ǎ é,

alǒ, hwenu e é ma ko bló ayǐkúngban ɔ sín kɔ́ nukɔntɔn ɔ ǎ é.

27 Hwenu e é sɔ́ nǔ nú jǐnukúnsin é ɔ, un ɖo fínɛ́;

hwenu e é ɖó dogbó* ɖé ayǐ ɖo sin nukúnmɛ é,

28 hwenu e é ɖó akpɔ́kpɔ́ lɛ́ ayǐ* ɖo aga é,

hwenu e é ɖó tɔjɔtɛn e gɔ́ngɔ́n lɛ́ é ayǐ é,

29 hwenu e é ɖe gbetakɛ́n ɖé tɔ́n nú xu ɖɔ

sin e ɖ’é mɛ lɛ́ é kún ɖó ná zɛ gbe e émí ɖe é wú ó é,

hwenu e é ɖó dodónu ayǐkúngban ɔ tɔn lɛ́ ayǐ* é,

30 hwenɛ́nu ɔ, un ɖo akpá tɔn azɔ̌gán ɖé ɖɔhun.

Un nɔ dó xomɛhunhun n’i ayǐhɔ́ngbe ayǐhɔ́ngbe;

un nɔ ɖo awǎ jɛ wɛ ɖo nukɔn tɔn hwebǐnu;

31 un nɔ j’awǎ ɖó ayǐkúngban e é bló bɔ è sixú nɔ jí é wú,

bɔ xomɛ nɔ hun mì tawun dó gbɛtɔ́ lɛ́ wú.

32 Din ɔ, vǐ ce lɛ́ mi, mi ɖótó mì;

ɛɛn, awǎjijɛnɔ wɛ nyí mɛ ɖěɖěe nɔ xwedó ali ce lɛ́ é.

33 Mi ɖótó kplɔ́n e ná mi wɛ un ɖe é bo húzú nǔnywɛ́tɔ́,

mi ma dó vɛ̌ ná gbeɖé ó.

34 Awǎjijɛnɔ wɛ nyí mɛ e nɔ ɖótó mì,

bo nɔ fɔ́n zǎn wá* hɔn ce nukɔn ayǐhɔ́ngbe ayǐhɔ́ngbe é,

bo nɔ nɔ te ɖo dotín hɔn ce tɔn lɛ́ kpá é;

35 ɖó mɛ e mɔ mì é ná mɔ gbɛ,

bɔ nǔ tɔn ná nyɔ́ Jexóva nukúnmɛ.

36 Amɔ̌, mɛ e ma nɔ ké ya nú mì ǎ é ná wa nǔ dó éɖée* wú,

bɔ mɛ ɖěɖěe gbɛ́ wǎn nú mì lɛ́ é ɔ, kú wɛ yě yí wǎn ná.”

9 Nǔnywɛ́ jɔ nǔnywɛ́ gbá xɔ tɔn;

é kpa dotín tɛ́nwe ná.

 2 É ɖa nǔɖuɖu tɔn ganjí;

é ɖa vɛ̌ɛn tɔn;

é lɛ́ tɛ́ távo tɔn.

 3 É sɛ́ mɛsɛntɔ́ tɔn nyɔ̌nu lɛ́ dó

ɖɔ yě ní nɔ fí e yi jǐ ɖo toxo ɔ mɛ lɛ́ é bo sú xó ɖɔ:

 5 “Mi wá bá ɖu nǔɖuɖu ce,

lobo nu vɛ̌ɛn e un ɖa é.

 6 Mi jó xlojijɔ dó bá nɔ gbɛ;

nukúnnúmɔjɛnǔmɛ ní xlɛ́ ali mi.”

 7 Mɛ e nɔ gbɛ́ nǔ nú mɛcákotɔ́ é ná ɖu winnyá,

mɛ ɖěbǔ e nɔ kɛ nu dó nǔ wú nú mɛdídá é ná wa nǔ dó éɖée wú.

10 Sísí e gɔ́ngɔ́n é ɖíɖó nú Jexóva wɛ nyí fí e nǔnywɛ́ bɛ́ sín é,

Mɛ e mɛ́ bɔ nǔ bǐ vɔ ɖ’é wú é tuuntuun wɛ nɔ ná nukúnnúmɔjɛnǔmɛ.

11 Ðó un ná bló bɔ azǎn towe lɛ́ ná sukpɔ́,

bɔ xwe ná jɛ xwe jí nú we.

12 Ényí a húzú nǔnywɛ́tɔ́ ɔ, ɖagbe hwiɖésúnɔ tɔn wɛ,

amɔ̌, ényí a nyí mɛcákotɔ́ ɔ, hwiɖokpó wɛ ná hɛn agban tɔn.

14 É nɔ jínjɔ́n xwé tɔn sín ali nu,

ɖo zinkpo jí ɖo fí e yi jǐ ɖo toxo ɔ mɛ é,

15 bo nɔ sú xó ylɔ́ mɛ ɖěɖěe ɖo fínɛ́ gbɔn wɛ lɛ́ é,

mɛ ɖěɖěe ɖo zɔnlin ɖi wɛ tlélé ɖo ali yětɔn jí lɛ́ é ɖɔ:

17 “Sin e è fin nu é nɔ víví,

bɔ nǔ e è ɖu ɖo nǔglɔ́ é nɔ nyɔ́.”

18 Loɔ, yě tuun ɖɔ mɛ ɖěɖěe kú lɛ́ é wɛ ɖo dɔ̌n ǎ.

Mɛ e sín jǒnɔ é yí lɛ́ é yi Yɔdo* gɔngɔn mɛ.

Vǐ e nyɔ́nǔi é nɔ dó xomɛhunhun nú tɔ́ tɔn.

Amɔ̌, vǐ e jɔ xlo é nɔ dɔn nɔ tɔn dó aluwɛ mɛ.

 2 Dɔkun e è wa nǔ nyanya dó jɛ é ná hɛn le ɖě wá nú mɛ ǎ,

amɔ̌, nǔjlɔ́jlɔ́wiwa wɛ nɔ hwlɛ́n mɛ ɖo kú sí.

 3 Jexóva ná jó nǔjlɔ́jlɔ́watɔ́* dó bónú xovɛ́ ná dó ya n’i ǎ,

amɔ̌, nǔ e ba wɛ mɛdídá ɖe vɛ́návɛ́ná é ɔ, é ná tɛ ɛ.

 4 Alɔ e ɖi fɔnlín é ná dɔn ya wá,

amɔ̌, alɔ e nɔ ɖó kan dó nǔ wú é nɔ dó dɔkun nú mɛ.

 5 Vǐ e nɔ wa nǔ kpó nukúnnúmɔjɛnǔmɛ kpó é nɔ xo jinukún kplé ɖo yǒzohwenu,

amɔ̌, vǐ e nɔ wa winnyánú é nɔ d’amlɔ bo nɔ wɔn ya ɖo nǔkúnyiyahwenu.

 6 Nyɔ̌ná wɛ ɖo ta nú mɛ e nɔ wa nǔ jlɔ́jlɔ́ é,

amɔ̌, dǎkaxixo wɛ hwlá cí mɛdídá sín nu mɛ.

 7 È ná flín mɛ e nɔ wa nǔ jlɔ́jlɔ́ é, bo ná lɛ́ kɔn nyɔ̌ná dó jǐ tɔn,

amɔ̌, è ná wɔn nyǐkɔ mɛdídá tɔn.

 8 Mɛ e nyí nǔnywɛ́tɔ́ ɖo ayi mɛ é ná yí gbe nú wěɖexámɛ lɛ́,*

amɔ̌, mɛ e nɔ ɖɔ xlonɔxó é ɔ, è ná tɛ afɔ jǐ tɔn.

 9 Mɛ e nɔ ɖi zɔnlin kpó gbejíninɔ kpó é ná ɖi zɔnlin ɖo ayijayǐ mɛ,

amɔ̌, mɛ e nɔ bló bɔ ali tɔn lɛ́ nɔ gɔ́ndɔ́n é ɔ, è ná gbo è dó.

10 Mɛ e nɔ nɔ nǔglɔ́, bo nɔ bló nukún nú mɛ é nɔ dɔn aluwɛ wá,

mɛ e nɔ ɖɔ xlonɔxó é ɔ, è ná tɛ afɔ jǐ tɔn.

11 Jɔtɛn gbɛ tɔn wɛ nǔjlɔ́jlɔ́watɔ́ sín nu nyí,

amɔ̌, dǎkaxixo wɛ hwlá cí mɛdídá sín nu mɛ.

12 Wǎngbɛ́númɛ wɛ nɔ dɔn hun wá,

amɔ̌, wǎnyíyí nɔ cyɔ́n nǔ dó nǔwanyido lɛ́ bǐ.

13 Nǔnywɛ́ nɔ tɔ́n sín mɛ e ɖó nukúnnúmɔjɛnǔmɛ é sín nu mɛ,

amɔ̌, kpo wɛ nɔ ɖo gǔdo nú mɛ e ayivɔ vún é.

14 Mɛ ɖěɖěe ɖó nǔnywɛ́ lɛ́ é nɔ hwlá nǔtuuntuun dɔkun ɖɔhun,

amɔ̌, xlonɔ sín nu nɔ dɔn kúnsúdónúmɛ wá.

16 Nǔ e nǔjlɔ́jlɔ́watɔ́ nɔ wa lɛ́ é nɔ ná gbɛ;

amɔ̌, hwɛhuhu wɛ nǔ e mɛdídá nɔ wa lɛ́ é nɔ ji.

17 Mɛ e nɔ wlí tó kplɔ́n e ná ɛ wɛ è ɖe é wú é nyí gbɛli nú mɛ ɖěvo lɛ́,*

amɔ̌, mɛ e nɔ dó vɛ̌ nú nu e è kɛ dó nǔ wú n’i é nɔ dɔn mɛ ɖěvo lɛ́ bú.

18 Mɛ e nɔ sɔ́ wǎngbɛ́númɛ tɔn hwlá é nɔ ɖó adingban,

bɔ mɛ e nɔ fúnfún xó nyanya lɛ́* kpé é ɔ, xlonɔ wɛ n’i.

19 Ényí xó sukpɔ́ ɔ, nǔwanyido sixú hán ǎ,

amɔ̌, mɛ ɖěbǔ e nɔ hɛn nu tɔn é nɔ wa nǔ kpó ayiɖote kpó.

20 Ðɛ̌ nǔjlɔ́jlɔ́watɔ́ tɔn cí kpatágan akú ɖɔhun,

amɔ̌, mɛdídá sín ayi xɔ akwɛ́ sɔmɔ̌ ǎ.

21 Nǔjlɔ́jlɔ́watɔ́ sín nu nɔ ná nǔɖuɖu* mɛ gěgé,

amɔ̌, xlonɔ nɔ kú ɖó ayivɔ vún i wútu.

22 Nyɔ̌ná Jexóva tɔn wɛ nɔ dó dɔkun nú mɛ,

é ka nɔ gɔ́ wǔvɛ́* ɖě ná ǎ.

23 Wunhínhɔ́nnúwiwa cí ayihún ɖɔhun nú xlonɔ,

amɔ̌, nǔnywɛ́ ɔ, mɛ e ɖó nukúnnúmɔjɛnǔmɛ é tɔn wɛ.

24 Nǔ e ɖi xɛsi ná wɛ mɛdídá ɖe é ná gbo è,

amɔ̌, nǔ e nɔ jló nǔjlɔ́jlɔ́watɔ́ é ɔ, è ná ná ɛ.

25 Ényí jɔhɔn syɛ́nsyɛ́n nyi ɔ, mɛdídá sɔ́ ná ɖe ǎ,

amɔ̌, nǔjlɔ́jlɔ́watɔ́ cí dodónu ɖé ɖɔhun káká sɔ́yi.

26 Lěe vɛ̌ɛn sinvɛ́sinvɛ́ nɔ cí nú aɖǔ, bɔ azizɔ nɔ cí nú nukún é ɔ,

mɔ̌ wɛ fɔnlínnɔ ɖe nú mɛ e sɛ́ ɛ dó é.*

27 Sísí e gɔ́ngɔ́n é ɖíɖó nú Jexóva nɔ dó azǎn azǎn jí nú mɛ,

amɔ̌, xwe e mɛdídá ná nɔ gbɛ ná é ɔ, è ná ɖe kpo.

28 Nǔ e ɖó nukún wɛ nǔjlɔ́jlɔ́watɔ́ ɖe é nɔ hɛn awǎjijɛ wá,

amɔ̌, nukúnɖíɖó mɛdídá tɔn ná sú dó.

29 Ali Jexóva tɔn nyí ahohó ɖé nú mɛ e wú è ma nɔ mɔ nǔɖé ɖɔ dó ǎ é,

amɔ̌, ali énɛ́ nɔ sú kún dó nú nǔnyanyawatɔ́ lɛ́.

30 È ná zin nǔjlɔ́jlɔ́watɔ́ dɛ́ gbeɖé ǎ,

amɔ̌, mɛdídá sɔ́ ná nɔ ayǐkúngban ɔ jí ɖě ǎ.

31 Nǔjlɔ́jlɔ́watɔ́ sín nu nɔ ji nǔnywɛ́,*

amɔ̌, è ná sɛ́n ɖɛ̌ e nɔ ɖɔ xó gblégblé é síin.

32 Nǔjlɔ́jlɔ́watɔ́ sín nu nɔ tuun nǔ e nyɔ́ é,

amɔ̌, nǔ gblégblé wɛ nɔ tɔ́n sín mɛdídá nu mɛ.

11 Nǔdagan e ma sɔgbe ǎ* lɛ́ é nɔ vɛ́ mɔ nú Jexóva,

amɔ̌, nǔdagan e sɔgbe é* nɔ dó xomɛhunhun n’i.

 2 Ényí mɛɖé húzú goyítɔ́ ɔ, é ná ɖu winnyá,

amɔ̌, nǔnywɛ́ ɖo jlɛ̌jínɔtɔ́ lɛ́ gɔ́n.

 3 Gbejíninɔ nǔjlɔ́jlɔ́watɔ́ lɛ́ tɔn wɛ nɔ xlɛ́ ali yě,

amɔ̌, mɛ hízíhízí gbejímanɔtɔ́ lɛ́ tɔn ná sú kún dó nú yě.

 4 Dɔkun* ná hɛn le ɖě wá nú mɛ ɖo xomɛsinzángbe ǎ,

amɔ̌, nǔjlɔ́jlɔ́wiwa wɛ ná hwlɛ́n mɛ ɖo kú sí.

 5 Nǔjlɔ́jlɔ́wiwa mɛ e wú è ma nɔ mɔ nǔɖé ɖɔ dó ǎ é tɔn nɔ jlɔ́ ali tɔn,

amɔ̌, mɛdídá ná j’ayǐ ɖó nǔnyanyawiwa éɖésúnɔ tɔn wútu.

 6 Nǔjlɔ́jlɔ́wiwa nǔjlɔ́jlɔ́watɔ́ lɛ́ tɔn ná hwlɛ́n yě,

amɔ̌, gbejímanɔtɔ́ lɛ́ ɔ, jlǒ yěɖésúnɔ tɔn lɛ́ wɛ ná nyí mɔ nú yě.

 7 Ényí mɛdídá kú ɔ, nukúnɖíɖó tɔn nɔ sú dó;

bɔ nǔ ɖěɖěe ɖó nukún wɛ è ɖe ɖó hlɔ̌nhlɔ́n tɔn wútu lɛ́ é lɔ nɔ sú dó.

 8 È nɔ hwlɛ́n nǔjlɔ́jlɔ́watɔ́ sín aluwɛ mɛ,

bɔ mɛdídá ka nɔ jɛ tɛn tɔn mɛ.

 9 Gǔfɔ́ndómawujítɔ́* nɔ zán nu tɔn dó sú kún dó nú nɔzo tɔn,

amɔ̌, è nɔ hwlɛ́n nǔjlɔ́jlɔ́watɔ́ lɛ́ gbɔn nǔtuuntuun gblamɛ.

10 Ðagbewiwa nǔjlɔ́jlɔ́watɔ́ tɔn nɔ bló bɔ toxo ɖé nɔ j’awǎ;

ényí è sú kún dó nú mɛdídá ɔ, è nɔ sú xó kpó awǎjijɛ kpó.

11 É nɔ sín nyɔ̌ná nǔjlɔ́jlɔ́watɔ́ tɔn wú bɔ è nɔ sɔ́ toxo ɖé su,

amɔ̌, mɛdídá sín nu nɔ kíjá toxo ɔ.

12 Mɛ ɖěbǔ e ayivɔ vún é nɔ gbɛ́ wǎn nú nɔzo tɔn,*

amɔ̌, mɛ e ɖó nukúnnúmɔjɛnǔmɛ adodwé é nɔ cí xwíí.

13 Jidómɛtɔ́ nɔ ɖo yiyi kpé wɛ, bo nɔ ɖo xó e nyí kpáxó é ɖe gba wɛ,

amɔ̌, mɛ e nyí mɛ ɖejidéwú é* nɔ hɛn xó xomɛ.*

14 Ényí è ma xlɛ́ ali mɛ kpó azɔ̌tuuntuun* kpó ǎ ɔ, gbɛtɔ́ lɛ́ nɔ j’ayǐ,

amɔ̌, ényí wěɖexámɛtɔ́ sukpɔ́ ɔ, ɖuɖéjí* nɔ tíin.

15 Mɛ ɖěbǔ e jǒnɔ ɖé ja akwɛ́ nya gbé bɔ é nɔ nukɔn* n’i é ná dɔn tagba dó kɔ jɛ́n wɛ,

amɔ̌, mɛ ɖěbǔ e nɔ nyi alɔ nú* alɔ níná mɛ dó dó akpá ɖé é ná nɔ ayijayǐ mɛ.

16 Nyɔ̌nu ɖagbe ɔ, è nɔ xɔ susu n’i,

amɔ̌, súnnu e ma nɔ kú nǔbláwǔ nú mɛ ǎ lɛ́ é ɔ, dɔkun kɛ́ɖɛ́ jɛ́n yě nɔ tɛ́n kpɔ́n bo nɔ jɛ.

17 Mɛ e nɔ nyɔ́ xomɛ é* nɔ hɛn le wá nú éɖésúnɔ,*

amɔ̌, dǎkaxotɔ́ nɔ dɔn éɖée dó hɔzɔ mɛ.*

18 Mɛdídá ɔ, le vɔ̌tɔ́ wɛ é nɔ ɖu,

amɔ̌, mɛ e nɔ dó nǔjlɔ́jlɔ́wiwa é nɔ mɔ ajɔ adodwé yí.

19 Mɛ e nɔ tɛ́ dó nǔjlɔ́jlɔ́wiwa wú gbánwúngbánwún é ná nɔ gbɛ,

amɔ̌, mɛ e nɔ ɖo nǔ nyanya gbé mɛ é ná kú.

20 Mɛ ɖěɖěe sín ayi gɔ́ndɔ́n lɛ́ é nɔ vɛ́ mɔ nú Jexóva,

amɔ̌, mɛ ɖěɖěe è ma nɔ mɔ nǔɖé ɖɔ dó ali yětɔn wú ǎ lɛ́ é nɔ dó xomɛhunhun n’i.

21 Ðeji dó xó élɔ́ wú:* È ná dɔn tó nú mɛ nyanya jɛ́n wɛ,

amɔ̌, nǔjlɔ́jlɔ́watɔ́ sín vǐ lɛ́ ná gán.

22 Nyɔ̌nu ɖɛkpɛ ɖɛkpɛ e ayivɔ vún é

cí sikálɔkɛ́ e è dó awɔntín nú aglǔza é ɖɔhun.

23 Nǔ e nɔ jló nǔjlɔ́jlɔ́watɔ́ é nɔ tɔ́n kɔ dó nǔ ɖagbe mɛ,

amɔ̌, nǔ e mɛdídá nɔ ɖó nukún é nɔ tɔ́n kɔ dó xomɛsin syɛ́nsyɛ́n mɛ.

24 Mɛɖé nɔ hun alɔ bo nɔ ná nǔ mɛ* bɔ ɖo vivɔnu ɔ, é nɔ ɖó nǔ d’é jí,

mɛ ɖěvo nɔ tɛ nǔ e è ɖó ná ná mɛ é mɛ, bɔ wǎgbɔ tɔn ɔ, é nɔ byɔ́ ya mɛ.

25 Mɛ* e nɔ hun alɔ dó ná nǔ mɛ é ná ɖó nukɔnyiyi,

bɔ mɛ ɖěbǔ e nɔ fá kɔ nú mɛ ɖěvo lɛ́* é ɔ, è ná fá kɔ nú é lɔmɔ̌.

26 Gbɛtɔ́ lɛ́ ná dó nu mɛ e ma nɔ sa jinukún ǎ é,

amɔ̌, yě ná byɔ́ nyɔ̌ná nú mɛ e nɔ sa é.

27 Mɛ e nɔ ba vɛ́návɛ́ná bo ná wa nǔ ɖagbe é ɔ, fɛ́nú ba wɛ é ɖe,

amɔ̌, mɛ e nɔ nya nǔ nyanya gbé é ɔ, nǔ nyanya ná gbo è jɛ́n wɛ.

28 Mɛ e nɔ ɖeji dó dɔkun tɔn wú é ná j’ayǐ,

amɔ̌, nǔjlɔ́jlɔ́watɔ́ ná vun kan ama ɖɔhun.

29 Mɛ ɖěbǔ e nɔ dɔn xwédo tɔn dó hɔzɔ mɛ* é ná ya jɔhɔn,

bɔ xlonɔ ná nyí mɛsɛntɔ́ nú mɛ e nyí nǔnywɛ́tɔ́ ɖo ayi mɛ é.

30 Sínsɛ́n e nǔjlɔ́jlɔ́watɔ́ nɔ ná é nyí atín e nɔ ná gbɛ mɛ é,

bɔ mɛ e nɔ d’alɔ mɛ ɖěvo lɛ́ bónú yě ná wa nǔ ɖagbe é nyɔ́nǔi.

31 Nǔgbó ɔ, ényí nǔjlɔ́jlɔ́watɔ́ nɔ mɔ nǔ e é jɛxá é ɖo ayǐkúngban jí ɔ,

mɛdídá kpó hwɛhutɔ́ kpó tɔn zun kwínkwín má kwín.

12 Mɛ e yí wǎn nú kplɔ́n é yí wǎn nú nǔtuuntuun,

amɔ̌, mɛ e ma nɔ ba ɖɔ è ní kɛ nu dó nǔ wú nú émí ǎ é nɔ lin tamɛ ǎ.*

 2 Mɛ e nyí mɛ ɖagbe é sín nǔ nɔ nyɔ́ Jexóva nukúnmɛ,

amɔ̌, é nɔ ɖó hwɛ nú mɛ e nɔ bló tuto nǔ nyanya tɔn é.

 3 Mɛɖé sixú nɔ ayijayǐ mɛ gbɔn nǔnyanyawiwa gblamɛ ǎ,

amɔ̌, è ná hɔn ɖɔ nú nǔjlɔ́jlɔ́watɔ́ gbeɖé ǎ.

 4 Nyɔ̌nu ɖagbe ɔ, axɔ́súgbákún wɛ é nyí nú asú tɔn,

amɔ̌, nyɔ̌nu e nɔ wa winnyánú é cí xúɖuxúɖu ɖɔhun nú asú tɔn.

 5 Linlin nǔjlɔ́jlɔ́watɔ́ tɔn lɛ́ nɔ sɔgbe,

amɔ̌, wěɖexámɛ mɛdídá tɔn nɔ blɛ́ mɛ.

 6 Mɛdídá sín xó cí mɔ e nɔ hu mɛ é ɖɔhun,*

amɔ̌, nǔjlɔ́jlɔ́watɔ́ sín nu nɔ hwlɛ́n mɛ.

 7 Ényí è sú kún dó nú mɛdídá lɛ́ ɔ, yě sɔ́ nɔ tíin ǎ,

amɔ̌, nǔjlɔ́jlɔ́watɔ́ lɛ́ sín xwé ná kpo ɖo te.

 8 È nɔ kpa susu nú mɛ e nɔ hɛn nu tɔn é,

amɔ̌, è ná ké ya nú mɛ e ɖó ayi mɛblɛ́blɛ́ tɔn é ǎ.

 9 È nyí mɛ yǎyá bo ɖó mɛsɛntɔ́ ɔ, é kpɔ́n te

hú è ní nɔ ɖo mɛɖée sɔ́ su wɛ, bo ka ɖó nǔɖuɖu* ɖě ǎ.

10 Nǔjlɔ́jlɔ́watɔ́ nɔ kpé nukún dó xwégbekanlin tɔn lɛ́* wú,

amɔ̌, nǔbláwǔkúnúmɛ mɛdídá tɔn ɔ, dǎkaxixo wɛ é tlɛ nɔ nyí.

11 Mɛ e nɔ lɛ gle tɔn é ná mɔ nǔɖuɖu bɔ é ná jɛmɛ n’i,

amɔ̌, mɛ e nɔ ɖo nǔ maɖótaɖé lɛ́ gbé mɛ é ɔ, ayivɔ wɛ vún i.

12 Mɛdídá nɔ jló nǔ e mɛ nyanya ɖěvo lɛ́ kpé wú bo ɖó é,

amɔ̌, nǔjlɔ́jlɔ́watɔ́ cí atín e dó ɖɔ do ganjí bo nɔ ná sínsɛ́n é ɖɔhun.

13 Hwɛhuhuxó e mɛ nyanya nɔ ɖɔ é wɛ nɔ nyí mɔ n’i,

amɔ̌, nǔjlɔ́jlɔ́watɔ́ nɔ gán sín aluwɛ mɛ.

14 Xó e nɔ tɔ́n sín mɛɖé nu mɛ é nɔ zɔ́n bɔ é nɔ ɖu nǔ ɖagbe lɛ́ sín vǐví,

azɔ̌ e é sɔ́ alɔ tɔn dó wa é ná d’ajɔ ɛ.

15 Ali xlonɔ tɔn nɔ jlɔ́ ɖo nukún éɖésúnɔ tɔn mɛ,

amɔ̌, nǔnywɛ́tɔ́ nɔ yí gbe nú wěɖexámɛ.

16 Xlonɔ nɔ yá wǔ xlɛ́ ɖɔ émí sin xomɛ,*

amɔ̌, mɛ e nɔ nɔ acéjí é nɔ ké ya nú zun ǎ.*

17 Mɛ e nɔ ɖe kúnnu kpó gbejíninɔ kpó é ná ɖɔ nǔgbó,*

amɔ̌, kúnnuɖetɔ́ adingbannɔ nɔ ɖɔ xó dó blɛ́ mɛ.

18 Xó e è ma lin tamɛ cóbó ɖɔ ǎ é nɔ cí è sɔ́ hwǐ mɛ ɖɔhun,

amɔ̌, nǔnywɛ́tɔ́ sín ɖɛ̌ nɔ gbɔ azɔn.

19 Nu e nɔ ɖɔ nǔgbó é ná nɔ ayǐ káká sɔ́yi,

amɔ̌, ɖɛ̌ e nɔ ɖó adingban é ɔ, hwenu kpɛɖé jɛ́n é ná nɔ ayǐ ná.

20 Mɛblɛ́blɛ́ wɛ ɖo mɛ ɖěɖěe nɔ ɖo nǔ nyanya sín tuto bló wɛ lɛ́ é sín ayi mɛ,

amɔ̌, mɛ ɖěɖěe nɔ xo fífá kan lɛ́ é* nɔ ɖó awǎjijɛ.

21 Nǔ nyanya ɖě ná wa nǔjlɔ́jlɔ́watɔ́ ǎ,

amɔ̌, mɛdídá lɛ́ ɔ, awě ná xo yě túnflá.

22 Nu e nɔ ɖó adingban é nɔ vɛ́ mɔ nú Jexóva,

amɔ̌, mɛ e nɔ wa nǔ kpó gbejíninɔ kpó lɛ́ é nɔ dó xomɛhunhun n’i.

23 Mɛ e nɔ nɔ acéjí é nɔ hwlá nǔ e é tuun é,

amɔ̌, xlonɔ lɛ́ nɔ kɔ́n sɛ sín xlojijɔ yětɔn jí.

24 Alɔ e nɔ ɖó kan dó nǔ wú é ná kp’acɛ,

amɔ̌, è ná ɖó azɔ̌ syɛ́nsyɛ́n kɔ jí nú alɔ e nɔ ɖi fɔnlín é.

25 Adohu adohu ɖo ayi mɛ nú mɛ ɔ, è nɔ ba gǎn kpo,*

amɔ̌, xó ɖagbe nɔ zɔ́n bɔ wǔ nɔ yá mɛ.

26 Nǔjlɔ́jlɔ́watɔ́ nɔ ba amagbo tɔn,

amɔ̌, ali e mɛdídá lɛ́ wlí é nɔ dɔn yě yi bú.

27 Fɔnlínnɔ nɔ kán wezun ɖo gbělan gúdo ǎ,

amɔ̌, kanɖódónǔwú wɛ nyí dɔkun xɔ akwɛ́ e mɛɖé sixú ɖó é.

28 Ali nǔjlɔ́jlɔ́wiwa tɔn nɔ kplá mɛ yi gbɛ mɛ;

kú ɖo ali tɔn lɛ́ jí ǎ.

13 Vǐ e ɖó nǔnywɛ́ é nɔ yí gbe nú kplɔ́n e ná ɛ wɛ tɔ́ tɔn ɖe é,

amɔ̌, mɛcákotɔ́ nɔ yí gbe nú nǔgbɛ́númɛ* ǎ.

 2 Xó e nɔ tɔ́n sín mɛɖé nu mɛ é ná zɔ́n bɔ é ná ɖu nǔ ɖagbe sín vǐví,

amɔ̌, nǔ e gbejímanɔtɔ́ nɔ ba vɛ́návɛ́ná é wɛ nyí dǎkaxixo.

 3 Mɛ e nɔ cɔ́ nu tɔn é* nɔ nya xɛ ɖo gbɛ* tɔn jí,

amɔ̌, mɛ e nɔ ɖɔ xó dín é ná dɔn.

 4 Nǔ gěgé wɛ nɔ jló fɔnlínnɔ, é* ka ɖó nǔ ɖě ǎ,

amɔ̌, mɛ e nɔ ɖó kan dó nǔ wú é* ná ɖó nǔ gěgé.*

 5 Nǔjlɔ́jlɔ́watɔ́ nɔ gbɛ́ wǎn nú adingban,

amɔ̌, nǔ e mɛdídá nɔ wa lɛ́ é nɔ dɔn winnyá wá, bo nɔ lɛ́ zɔ́n bɔ wi nɔ kɔ́n.

 6 Nǔjlɔ́jlɔ́wiwa nɔ nya xɛ ɖo xomɛvɔ́nɔ jí,

amɔ̌, dǎkaxixo nɔ zín hwɛhutɔ́ dó do.

 7 Mɛɖé tíin bo nɔ bló dɔkunnɔ, é ka ɖó nǔtí ǎ;

mɛ ɖěvo tíin bo nɔ bló wamamɔnɔ, amɔ̌, dɔkun ɖo así tɔn titewungbe tɔn.

 8 Dɔkun mɛɖé tɔn wɛ nɔ xɔ gbɛ n’i,*

amɔ̌, wamamɔnɔ lɛ́ ɔ, mɛɖé tlɛ nɔ gblɔ́n adǎn nú yě ǎ.*

 9 Wěziza nǔjlɔ́jlɔ́watɔ́ tɔn nɔ kɔ́n lánlán,*

amɔ̌, zogbɛ́n mɛdídá tɔn ná cí.

10 Goyíyí ɔ, jlɛ jɛ́n é nɔ dɔn wá,

amɔ̌, nǔnywɛ́ ɔ, mɛ e nɔ ba wěɖexámɛ lɛ́ é* tɔn wɛ é nyí.

11 Dɔkun e è jɛ zogbe é ná ɖe kpo,

amɔ̌, mɛ e nɔ xo dɔkun kplé kpɛɖé kpɛɖé é* ɔ, dɔkun tɔn ná jɛjí.

12 È ɖo nǔɖé ɖó nukún wɛ bónú é ma ɖo wǐwá wɛ ǎ ɔ, azɔn wɛ é nɔ dó ayi mɛtɔn,

amɔ̌, è jló nǔɖé bónú é jɛnu ɔ, atín e nɔ ná gbɛ mɛ é ɖɔhun wɛ é ɖe.

13 Mɛ ɖěbǔ e gbɛ́ wěɖexámɛ* é ná sún sin tɔn,

amɔ̌, mɛ e nɔ se tónú nú sɛ́n é ná mɔ ajɔ tɔn.

14 Jɔtɛn gbɛ tɔn wɛ nǔkplɔ́nmɛ* nǔnywɛ́tɔ́ tɔn nyí,

é nɔ zɔ́n bɔ è nɔ zɔn kú sín mɔ mɛ ǎ.

15 Mɛ e ɖó nukúnnúmɔjɛnǔmɛ adodwé é sín nǔ nɔ nyɔ́ mɛ ɖěvo lɛ́ nukúnmɛ,

amɔ̌, ali mɛ e wú è ma nɔ ɖeji dó ǎ é tɔn nɔ dɔn tagba gěgé wá.

16 Mɛ e nɔ nɔ acéjí é nɔ wa nǔ kpó nǔtuuntuun kpó,

amɔ̌, xlonɔ nɔ fɔ xlojijɔ tɔn wá tɛ́.

17 Wɛndótɔ́ nyanya nɔ dɔn éɖée dó hɔzɔ mɛ,

amɔ̌, wɛndótɔ́ gbejínɔtɔ́ nɔ hɛn gbɔdónúmɛ wá.

18 Mɛ ɖěbǔ e dó vɛ̌ nú kplɔ́n é ná jɛ ya mɛ, bɔ wi tɔn ná lɛ́ kɔ́n,

amɔ̌, è ná sɔ́ mɛ e nɔ yí gbe bɔ è nɔ gbɛ́ nǔ n’i* é su.

19 È jló nǔɖé bo mɔ ɔ, é nɔ víví nú mɛ* tawun,

amɔ̌, xlonɔ nɔ ba ná lɛ́ kɔ sín nǔnyanyawiwa gúdo ǎ.

20 Mɛ e nɔ dó nǔnywɛ́tɔ́ há é ná húzú nǔnywɛ́tɔ́,

amɔ̌, mɛ e nɔ dó gbɛ̌ xá xlonɔ é ná dɔn tagba dó kɔ.

21 Awěxomɛ nɔ ɖo hwɛhutɔ́ lɛ́ gúdo,

amɔ̌, nyɔ̌ná wɛ è ná sɔ́ dó d’ajɔ nǔjlɔ́jlɔ́watɔ́.

22 Mɛ ɖagbe nɔ jó gǔ dó nú vǐvú tɔn lɛ́,

amɔ̌, è ná xo dɔkun hwɛhutɔ́ tɔn kplé nú nǔjlɔ́jlɔ́watɔ́.

23 Gle wamamɔnɔ tɔn e è lɛ é nɔ ná nǔɖuɖu gěgé,

amɔ̌, nǔagɔwiwa sixú bɛ́ bǐ.*

24 Mɛ ɖěbǔ e ma nɔ ɖó bǎ nú* vǐ tɔn ǎ é gbɛ́ wǎn n’i,

amɔ̌, mɛ e yí wǎn nú vǐ tɔn é nɔ kplɔ́n ɛ kpó sɔxwixwe kpó.*

25 Nǔjlɔ́jlɔ́watɔ́ nɔ ɖu nǔ, b’ɛ nɔ jɛmɛ n’i,*

amɔ̌, mɛdídá sín adɔgo nɔ nɔ vɔ̌.

14 Nyɔ̌nu e nyɔ́nǔi nǔgbó nǔgbó é nɔ gbá xwé tɔn,

amɔ̌, nyɔ̌nu xlonɔ nɔ sɔ́ alɔ éɖésúnɔ tɔn dó kíjá xwé tɔn ná.

 2 Mɛ e nɔ xwedó nǔjlɔ́jlɔ́wiwa sín ali é nɔ ɖó sísí e gɔ́ngɔ́n é nú Jexóva,

amɔ̌, mɛ e nɔ hízí mɛ é* nɔ ké ya n’i ǎ.

 3 Goyíyíxó e xlonɔ nɔ ɖɔ é cí kpo ɖɔhun,

amɔ̌, nǔnywɛ́tɔ́ lɛ́ sín nu ná nya xɛ ɖo yě jí.

 4 Fí e nyibú ɖě ma ɖe ǎ é ɔ, nǔ e mɛ kanlin lɛ́ nɔ ɖu nǔ ɖe é nɔ ɖo mǐmɛ́ jí,

amɔ̌, hlɔ̌nhlɔ́n nyibúsú tɔn nɔ zɔ́n bɔ è nɔ ya jinukún gěgé.

 5 Kúnnuɖetɔ́ gbejínɔtɔ́ nɔ ɖó adingban ǎ,

amɔ̌, kúnnuagɔɖetɔ́ nɔ ɖo adingban te.

 6 Mɛcákotɔ́ nɔ ba nǔnywɛ́, é ka nɔ mɔ ǎ,

amɔ̌, nǔtuuntuun nɔ bɔ wǔ nú mɛ e ɖó nukúnnúmɔjɛnǔmɛ é.

 7 Nɔ zɔ nú xlonɔ,

ɖó nǔtuuntuun ɖě ɖo nu tɔn mɛ ǎ.

 8 Gbɔn nǔnywɛ́ gblamɛ ɔ, mɛ e ɖo acéjí é nɔ mɔ nukúnnú jɛ ali e é mlɛ́ é wú,

amɔ̌, xlonɔ lɛ́ ɔ, xlojijɔ yětɔn wɛ nɔ flú yě.*

 9 Xlonɔ lɛ́ wa nǔ nyi do ɔ, yě nɔ ko,*

amɔ̌, ɖo nǔjlɔ́jlɔ́watɔ́ lɛ́ tɛ́ntin ɔ, è nɔ ba ná dó hwɛ gbɔ.*

10 Ényí mɛɖé ɖo wǔvɛ́ se wɛ ɔ, mɛ ɔ ɖokpónɔ jɛ́n nɔ tuun lěe nǔ cí n’i é,*

mɔ̌ jɛ́n ényí é ɖo awǎ jɛ wɛ ɔ, mɛ e ɖo zɔ é ɖě ma sixú tuun nǔ e sín awǎ jɛ wɛ é ɖe é ǎ é nɛ́.

11 È ná sú kún dó nú mɛdídá sín xwé,

amɔ̌, goxɔ nǔjlɔ́jlɔ́watɔ́ tɔn ná gbló ada d’é jí.

12 Mɛɖé sixú lin ɖɔ émí ɖo ali ɖagbe ɔ jí,

amɔ̌, ɖo vivɔnu ɔ, kú wɛ ali énɛ́ nɔ kplá mɛ yi.

13 È tlɛ sixú ɖo nǔ ko wɛ cóbó ka ɖo wǔvɛ́ se wɛ ɖo ayi mɛ,

mɔ̌ jɛ́n awǎjijɛ sixú wá fó kpó aluwɛ kpó.

14 Mɛ e nyí hwɛhutɔ́ ɖo ayi mɛ é ná ya nǔ e nǔwiwa tɔn lɛ́ ji lɛ́ é,

amɔ̌, mɛ ɖagbe nɔ ya ajɔ e nɔ tɔ́n sín nǔwiwa tɔn lɛ́ mɛ lɛ́ é.

15 Mɛ e ma mɔ nǔ kpɔ́n ǎ é nɔ ɖi nǔ nú xó bǐ,

amɔ̌, mɛ e nɔ nɔ acéjí é nɔ lin tamɛ cóbó nɔ wa nǔ.

16 Mɛ e nyɔ́nǔi é nɔ nɔ acéjí bo nɔ hɔn nú nǔnyanyawiwa,

amɔ̌, xlonɔ nɔ ké ya nú nǔɖé ǎ,* bo nɔ ɖeji zɛ xwé wú.

17 Mɛ e nɔ yá wǔ sin xomɛ é nɔ wa xlonɔnú,

amɔ̌, è nɔ gbɛ́ wǎn nú mɛ e nɔ lin tamɛ dó nǔ jí é.*

18 Mɛ e ma mɔ nǔ kpɔ́n ǎ é ná ɖu xlojijɔ sín gǔ,

amɔ̌, axɔ́súgbákún e è ná xwe nú mɛ e nɔ nɔ acéjí lɛ́ é wɛ nyí nǔtuuntuun.

19 Mɛ nyanya lɛ́ ná wá ɖe kɔ́ nú mɛ ɖagbe lɛ́,

bɔ mɛdídá lɛ́ ná wá ɖe kɔ́ ɖo nǔjlɔ́jlɔ́watɔ́ lɛ́ sín hɔntogbó ta.

20 È nɔ gbɛ́ wǎn nú wamamɔnɔ, nɔzo tɔn lɛ́ lɔ tlɛ nɔ wa mɔ̌,

amɔ̌, mɛ e jɛ dɔkun é nɔ ɖó xɔ́ntɔn gěgé.

21 Mɛ e nɔ dó vɛ̌ nú nɔzo tɔn é ɔ, hwɛ wɛ é hu,

amɔ̌, mɛ ɖěbǔ e se wǔvɛ́ xá wamamɔnɔ é nɔ ɖó awǎjijɛ.

23 Azɔ̌syɛ́nsyɛ́nwiwa bǐ wɛ ɖó le,

amɔ̌, xó kpowun ɖiɖɔ nɔ dɔn mɛ dó ya mɛ.

24 Axɔ́súgbákún nǔnywɛ́tɔ́ lɛ́ tɔn wɛ nyí dɔkun yětɔn;

amɔ̌, xlonɔ lɛ́ nɔ tɔ́n sín xlo yětɔn mɛ gbeɖé ǎ.

25 Kúnnuɖetɔ́ e nɔ ɖɔ nǔgbó é nɔ hwlɛ́n gbɛ* gán,

amɔ̌, mɛ e nɔ blɛ́ mɛ é nɔ ɖo adingban te.

26 Mɛ e nɔ ɖó sísí e gɔ́ngɔ́n é nú Jexóva é nɔ ɖeji dó wǔ tɔn bǐ mlɛ́mlɛ́,

mɛ mɔ̌hun sín vǐ lɛ́ ná mɔ bibɛtɛn.

27 Sísí e gɔ́ngɔ́n é ɖíɖó nú Jexóva nyí tɔjɔtɛn e nɔ ná gbɛ mɛ é,

é nɔ zɔ́n bɔ è nɔ zɔn kú sín mɔ mɛ ǎ.

28 Ényí gbɛtɔ́ sukpɔ́ ɔ, susu wɛ é nɔ nyí nú axɔ́sú,

amɔ̌, acɛkpatɔ́ e ma ɖó toví ɖě ǎ é sín xó nɔ fó.

29 Mɛ e ma nɔ yá wǔ sin xomɛ ǎ é ɖó nukúnnúmɔjɛnǔmɛ ɖaxó,

amɔ̌, mɛ e ma nɔ ɖó suúlu ǎ é nɔ ɖe xlonɔ e é nyí é xlɛ́.

30 Ayi e fá é nɔ ná gbɛ agbaza,*

amɔ̌, wǔhwinhwan nɔ zɔ́n bɔ xú nɔ nyɔ.

31 Mɛ e nɔ táfú mɛmaɖómɛɖé é ɔ, mɛ e bló è é wɛ é zun,

amɔ̌, mɛ ɖěbǔ e nɔ se wǔvɛ́ xá wamamɔnɔ é sɔ́ mɛ e bló è é su.

32 Mɛdídá ɔ, nǔnyanyawiwa éɖésúnɔ tɔn wɛ ná zin i dɛ,

amɔ̌, gbejíninɔ nǔjlɔ́jlɔ́watɔ́ tɔn ná nyí bibɛtɛn n’i.

33 Nǔnywɛ́ nɔ gbɔjɛ xwíí ɖo mɛ e ɖó nukúnnúmɔjɛnǔmɛ é sín ayi mɛ,

amɔ̌, é nɔ ba dandan bo ná ɖe éɖée xlɛ́ ɖo xlonɔ lɛ́ tɛ́ntin.

34 Nǔjlɔ́jlɔ́wiwa nɔ sɔ́ akɔta su,

amɔ̌, hwɛhuhu ɔ, winnyá wɛ é nɔ nyí nú togun ɖé.

35 Mɛsɛntɔ́ e nɔ wa nǔ kpó nukúnnúmɔjɛnǔmɛ kpó é nɔ dó xomɛhunhun nú axɔ́sú,

amɔ̌, é nɔ sin xomɛ dó mɛ e nɔ wa winnyánú é.

15 Xósin e è ná kpó gbe fífá* kpó é nɔ cí asɔ nú xomɛsin,

amɔ̌, xó vɛ́ sin* nɔ fɔ́n xomɛsin dó jǐ.

 2 Ðɛ̌ nǔnywɛ́tɔ́ tɔn nɔ zán nǔtuuntuun ganjí,

amɔ̌, xlonɔ sín nu nɔ kɔ́n sɛ sín xlojijɔ tɔn jí.

 3 Nukún Jexóva tɔn nɔ mɔ nǔ jɛ fí bǐ,

é nɔ ɖo mɛ nyanya kpó mɛ ɖagbe kpó bǐ kpɔ́n wɛ.

 4 Atín e nɔ ná gbɛ mɛ é wɛ ɖɛ̌ e nɔ nɔ xwíí é* nyí,

amɔ̌, mɛblɛ́blɛ́xó nɔ zɔ́n bɔ è nɔ flú.*

 5 Xlonɔ nɔ ɖó sísí nú kplɔ́n e tɔ́ tɔn ná ɛ é ǎ,

amɔ̌, mɛ e nɔ nɔ acéjí é nɔ yí gbe nú nǔgbɛ́númɛ.*

 6 Dɔkun ɖo nǔjlɔ́jlɔ́watɔ́ xwégbe bo túnflá,

amɔ̌, sínsɛ́n e mɛdídá nɔ ná é nɔ dɔn ɛ dó hɔzɔ mɛ.

 7 Nǔnywɛ́tɔ́ sín nu nɔ fúnfún nǔtuuntuun kpé,

amɔ̌, xlonɔ sín ayi nɔ wa mɔ̌ ǎ.

 8 Vɔ̌sísá mɛdídá tɔn nɔ vɛ́ mɔ nú Jexóva,

amɔ̌, nǔjlɔ́jlɔ́watɔ́ sín ɖɛ nɔ dó xomɛhunhun n’i.

 9 Jexóva gbɛ́ wǎn nú mɛdídá sín ali,

amɔ̌, é nɔ yí wǎn nú mɛ e nɔ xo nǔjlɔ́jlɔ́wiwa kan é.

10 Kplɔ́n e ná mɛ wɛ è ɖe é nɔ cí nǔ e nylá é* ɖɔhun ɖo mɛ e gosín ali ɖagbe jí é nukúnmɛ,

amɔ̌, mɛ ɖěbǔ e ma nɔ ba ɖɔ è ní kɛ nu dó nǔ wú nú émí ǎ é ná kú.

13 Awǎjijɛ gɔ́ ayi mɛ nú mɛ ɔ, nukúnmɛ mɛtɔn nɔ hɔ́n,

linkpɔ́n ka ɖo ayi mɛ nú mɛ ɔ, wǔ nɔ kú mɛ.

14 Ayi e ɖó nukúnnúmɔjɛnǔmɛ é nɔ ba nǔtuuntuun,

amɔ̌, xlonɔ lɛ́ ɔ, xlojijɔ wɛ yě nɔ ɖu.*

15 Azǎn lɛ́ bǐ wɛ nɔ nyí azǎn nyanya nú mɛ e ɖo wǔvɛ́ se wɛ é,

amɔ̌, mɛ e awǎjijɛ gɔ́ ayi tɔn mɛ é* nɔ ɖo agɔ̌ ɖu wɛ magbokɔ.

16 È ɖó nǔ kpɛɖé bo ɖó sísí e gɔ́ngɔ́n é nú Jexóva ɔ,

é nyɔ́ hú è ní jɛ dɔkun gěgé bɔ linkpɔ́n ka xo kpóɖó ná.*

17 È ɖu mǎ yǎyá ɖo fí e wǎnyíyí ɖe é ɔ,

é nyɔ́ hú è ní ɖu nyibúsú e dó jǒ é ɖo fí e wǎngbɛ́númɛ ɖe é.

18 Mɛ e nɔ yá wǔ sin xomɛ é nɔ fɔ́n jlɛ dó jǐ,

amɔ̌, mɛ e ma nɔ yá wǔ sin xomɛ ǎ é nɔ cí asɔ nú hun.

19 Fɔnlínnɔ sín ali cí wunkan sín kpá ɖɔhun,

amɔ̌, nǔjlɔ́jlɔ́watɔ́ sín ali cí ali ɖaxó e è jlɔ́ é ɖɔhun.

20 Vǐ e nyɔ́nǔi é nɔ dó xomɛhunhun nú tɔ́ tɔn,

amɔ̌, xlonɔ nɔ ké ya nú nɔ tɔn ǎ.

21 Awǎjijɛ wɛ xlojijɔ nyí nú mɛ e ayivɔ vún é,

amɔ̌, mɛ e ɖó nukúnnúmɔjɛnǔmɛ é nɔ ɖi zɔnlin tlélé.

22 Nú è ma ba wěɖexámɛ* ǎ ɔ, tuto e è bló lɛ́ é nɔ yi ta ǎ,

amɔ̌, ényí wěɖexámɛtɔ́ sukpɔ́ ɔ, nǔ lɛ́ nɔ yi ta.

23 Nú è ná xósin e sɔgbe é ɔ,* xomɛ nɔ hun mɛ,

xó e è ɖɔ bɔ é jɛ gan é nɔ nyɔ́ mɛ nya!

24 Mɛ e ɖó nukúnnúmɔjɛnǔmɛ é ɖo ali e nɔ kplá mɛ yi gbɛ ɖagbe mɛ é jí,

é nɔ dó gǔdo ali e nɔ kplá mɛ yi Yɔdo* mɛ é.

25 Jexóva ná sú kún dó nú goyítɔ́ sín xwé,

amɔ̌, é ná nya xɛ ɖo gle asúkúsi tɔn sín dogbó lɛ́ jí.

26 Jexóva gbɛ́ wǎn nú ayi gɛ́dɛ́gɛ́dɛ́ mɛdídá tɔn lɛ́,

amɔ̌, xó e nɔ nyɔ́ se lɛ́ é nɔ mɛ́ ɖo nukún tɔn mɛ.

27 Mɛ e nɔ wa nǔ agɔ dó ɖu le é nɔ dɔn xwédo éɖésúnɔ tɔn dó hɔzɔ mɛ,*

amɔ̌, mɛ e gbɛ́ wǎn nú nǔɖuɖonǔmɛ é ná nɔ gbɛ.

28 Ayi nǔjlɔ́jlɔ́watɔ́ tɔn nɔ lin tamɛ cóbó nɔ ná xósin,*

amɔ̌, mɛdídá lɛ́ kɛ nu ɔ, nǔ nyanya lɛ́ wɛ yě nɔ ɖɔ.

29 Jexóva lín dó mɛdídá lɛ́,

amɔ̌, é nɔ ɖótó nǔjlɔ́jlɔ́watɔ́ lɛ́ sín ɖɛ.

30 Nukúnmɛ mɛtɔn hɔ́n ɔ,* é nɔ dó awǎjijɛ nú ayi mɛtɔn;

wɛn ɖagbe nɔ dó wǔsyɛ́n lanmɛ nú mɛ.*

31 Mɛ e è zán xógbe e nɔ ná gbɛ mɛ é dó kɛ nu dó nǔ wú n’i ɔ, é nɔ ɖótó é

ɖó tɛn tɔn ɖo nǔnywɛ́tɔ́ lɛ́ tɛ́ntin.

32 Mɛ ɖěbǔ e gbɛ́ kplɔ́n é ké ya nú gbɛ* éɖésúnɔ tɔn ǎ,

amɔ̌, mɛ ɖěbǔ e nɔ ɖótó nu e è kɛ dó nǔ wú n’i é nɔ ɖó nukúnnúmɔjɛnǔmɛ.*

33 Sísí e gɔ́ngɔ́n é ɖíɖó nú Jexóva ɔ, nǔnywɛ́ kplɔ́nkplɔ́n wɛ,

mɛɖée wɛ è nɔ sɔ́ hwe cóbɔ è nɔ sɔ́ mɛ su.

16 Gbɛtɔ́ nɔ to nǔ e lin wɛ é ɖe ɖo ayi tɔn mɛ lɛ́ é,*

amɔ̌, xósin e é nɔ ná é* ɔ, Jexóva gɔ́n wɛ é nɔ gosín.

 2 Ali e gbɛtɔ́ nɔ mlɛ́ lɛ́ é bǐ nɔ cí nǔ e sɔgbe* é ɖɔhun ɖo nukún éɖésúnɔ tɔn mɛ,

amɔ̌, Jexóva nɔ gbéjé nǔ e nɔ sísɛ́ mɛ bɔ è nɔ wa nǔ é* kpɔ́n.

 3 Sɔ́ nǔ ɖěbǔ e a nɔ wa é dó alɔ mɛ nú Jexóva,*

énɛ́ ɔ, tuto towe lɛ́ ná yi ta.

 4 Jexóva bló bɔ nǔ lɛ́ bǐ nɔ wa azɔ̌ nú linlin tɔn,

é tlɛ nɔ bló bɔ è ná sú kún dó nú mɛdídá ɖo awěxomɛzángbe.

 6 Wǎnyíyí e ma nɔ sɛ do ǎ é kpó gbejíninɔ kpó nɔ zɔ́n bɔ è nɔ sɔ́ hwɛ kɛ mɛ,

sísí e gɔ́ngɔ́n é ɖíɖó nú Jexóva nɔ zɔ́n bɔ è nɔ hɔn nú nǔnyanyawiwa.

 7 Ényí ali mɛɖé tɔn nyɔ́ Jexóva nukúnmɛ ɔ,

é nɔ bló bɔ kɛntɔ́ mɛ ɔ tɔn lɛ́ tlɛ nɔ nɔ fífá mɛ xá ɛ.

 8 È ɖó nǔ kpɛɖé bo nɔ wa nǔ jlɔ́jlɔ́ ɔ,

é nyɔ́ hú è ɖó nǔ gěgé bo ka nɔ wa nǔ e ma sɔgbe ǎ é.

 9 Gbɛtɔ́ sixú to nǔ e wa gbé é ja lɛ́ é ɖo ayi tɔn mɛ,

amɔ̌, Jexóva wɛ nɔ xlɛ́ ali afɔ tɔn lɛ́.

10 Gbeta e gosín Mawu gɔ́n é ɖó ná ɖo axɔ́sú ɖé sín nu;

é ɖó ná ɖɔ hwɛ agɔ gbeɖé ǎ.

11 Jexóva gɔ́n wɛ nǔdagan kpó nǔjlɛ́nú kpó e sɔgbe lɛ́ é nɔ gosín;

nǔjlɛ́nú e ɖo sáki ɔ mɛ lɛ́ é bǐ wɛ nyí nǔwiwa tɔn.

12 Nǔnyanyawiwa nɔ vɛ́ mɔ nú axɔ́sú lɛ́,

ɖó è ɖó axɔ́súzinkpo ɔ ayǐ ɖó dodónu syɛ́nsyɛ́n jí gbɔn nǔjlɔ́jlɔ́wiwa gblamɛ.

14 Xomɛsin axɔ́sú tɔn cí mɛ e è sɛ́ dó mɛ hu gbé é ɖɔhun,

amɔ̌, nǔnywɛ́tɔ́ nɔ hwíhwɛ́ ɛ.*

15 Ényí axɔ́sú ná fɛ́nú mɛɖé ɔ, mɛ énɛ́ ná ɖó gbɛ ɖagbe;

fɛ́nú tɔn cí akpɔ́kpɔ́ e nɔ dɔn jǐ wá xwejíhwenu é ɖɔhun.

18 Kún mɛtɔn ja súsú dó gbé ɔ, goyíyí wɛ è nɔ bɛ́,

bɔ mɛɖée mimɔ nɔ jɛ nukɔn nú ayǐjijɛ.

19 É nyɔ́ ɖɔ è ní nɔ sɔ́ mɛɖée hwe* ɖo mɛɖéesɔ́hwetɔ́ lɛ́ tɛ́ntin,

hú ɖɔ è ní má nǔ e mɛ e nɔ mɔ yěɖée lɛ́ é bɛ́ ɖo ahwangbénu lɛ́ é xá yě.

20 Mɛ e nɔ ɖe nukúnnúmɔjɛnǔmɛ xlɛ́ ɖo ninɔmɛ ɖé mɛ é ná mɔ nu tɔn,*

awǎjijɛnɔ wɛ nú mɛ e nɔ ɖeji dó Jexóva wú é.

21 È ná ylɔ́ mɛ e nyí nǔnywɛ́tɔ́ ɖo ayi mɛ é ɖɔ mɛ e ɖó nukúnnúmɔjɛnǔmɛ é,

mɛ e nɔ ɖɔ xó kpó xomɛnyínyɔ́ kpó é* nɔ ɖu ɖo mɛ jí hú gǎn.

22 Nukúnnúmɔjɛnǔmɛ ɔ, jɔtɛn gbɛ tɔn wɛ é nyí nú mɛ ɖěɖěe ɖó lɛ́ é,

amɔ̌, xlonɔ lɛ́ ɔ, xlojijɔ yěɖésúnɔ tɔn wɛ nɔ ná kplɔ́n yě.

23 Ayi nǔnywɛ́tɔ́ tɔn nɔ ná nukúnnúmɔjɛnǔmɛ nu tɔn,

bɔ xó tɔn nɔ ɖu ɖo mɛ jí hú gǎn.

24 Xó e nɔ dɔn mɛ lɛ́ é cí wǐinkpa ɖɔhun,

yě nɔ víví nú lǐndɔ̌n,* bo nɔ gbɔ azɔn nú xú.

25 Mɛɖé sixú lin ɖɔ émí ɖo ali ɖagbe ɔ jí,

amɔ̌, ɖo vivɔnu ɔ, kú wɛ ali énɛ́ nɔ kplá mɛ yi.

26 Xovɛ́ e nɔ sin jokóxotɔ́ é* nɔ zɔ́n bɔ é nɔ wa azɔ̌ syɛ́nsyɛ́n,

ɖó xovɛ́ e ɖo sinsin i wɛ é* wɛ nɔ sísɛ́ ɛ d’é kɔn.

27 Mɛ e nyí nǔvɔ́nɔ é nɔ kun nǔ nyanya tɔ́n;

xó e é nɔ ɖɔ lɛ́ é cí myɔ hɛhɛ ɖɔhun.

28 Hunnyahunnyadɔnnyayǐtɔ́* nɔ dɔn kínklán wá,

bɔ jidómɛtɔ́ nɔ klán xɔ́ntɔn vívɛ́ lɛ́.

29 Dǎkaxotɔ́ nɔ lú nɔzo tɔn,

bo nɔ dɔn ɛ yi ali nyanya jí.

31 Jɛ̌gbakún ɖɛkpɛ* tɔn wɛ hwa nyí,

ényí è mɔ mɛ e ta é ɖe é ɖo nǔjlɔ́jlɔ́wiwa sín ali jí ɔ nɛ́.

32 Mɛ e ma nɔ yá wǔ sin xomɛ ǎ é nyɔ́ hú súnnu hlɔ̌nhlɔ́nnɔ,

mɛ e nɔ ɖu ɖo xomɛsin tɔn jí é* nyɔ́ hú mɛ e ɖu ɖo toxo ɖé jí é.

33 Akpo* mɛ wɛ è nɔ nyi akɔ dó,

amɔ̌, Jexóva gɔ́n wɛ gbeta akɔ e è nyi é tɔn lɛ́ bǐ nɔ gosín.

17 Ényí è ɖu wɔ̌xúxú kánkpo ɖo fí e fífá* ɖe é ɔ,

é nyɔ́ hú xwé e gbe è nɔ ɖo agɔ̌ ɖu ɖe wɛ* gbɛmɛ, bɔ jlɛ ka ɖe é.

 2 Mɛsɛntɔ́ e ɖó nukúnnúmɔjɛnǔmɛ é ná kp’acɛ dó vǐ súnnu e nɔ wa winnyánú é jí;

é ná ɖó mǐmá ɖo gǔ ɔ mɛ gǎn ɔ sín vǐ súnnu lɛ́ ɖɔhun.

 3 È nɔ ɖe nǔ kwíji sín kpatágan wú ɖo zɛ̌n mɛ, bo nɔ xo zo dó siká ɖo myɔkpó mɛ,

amɔ̌, Jexóva wɛ nyí mɛ e nɔ gbéjé ayi mɛ kpɔ́n é.

 4 Mɛdídá nɔ wlí tó xó é nɔ gblé wǔ mɛ lɛ́ é wú,

bɔ mɛblɛ́tɔ́ nɔ ɖótó xó nyanya lɛ́.

 5 Mɛ ɖěbǔ e cá wamamɔnɔ ko é zun Mɛ e bló è é,

bɔ mɛ ɖěbǔ e j’awǎ, ɖó awě e xo mɛ ɖěvo é wú é ɔ, è ná gɔn tó dɔn n’i ǎ.

 6 Jɛ̌gbákún wɛ vǐvú lɛ́ nyí nú mɛxómɔ lɛ́,

bɔ tɔ́* lɛ́ nyí susu nú vǐ yětɔn lɛ́.

 8 Nǔníná ɖé cí awǐnnya xɔ akwɛ́ ɖé* ɖɔhun nú mɛ e tɔn wɛ é;

é yi fí ɖěbǔ ɔ, é nɔ zɔ́n bɔ nǔ nɔ nyɔ́ n’i.

 9 Mɛ ɖěbǔ e sɔ́ nǔwanyido kɛ mɛ* é ɖo wǎnyíyí ba wɛ,

amɔ̌, mɛ e nɔ fɔ́n bo nɔ ɖo xó ɖokpó ɔ jí wá wɛ é nɔ klán xɔ́ntɔn vívɛ́ lɛ́.

10 Nǔgbɛ́númɛ nɔ kplɔ́n nǔ mɛ e ɖó nukúnnúmɔjɛnǔmɛ é tawun

hú xlonɔ ɖé xixo azɔn kanweko.

11 Gǔfínfɔ́n jɛ́n nɔ myá nukún nú mɛ nyanya,

amɔ̌, è ná sɛ́ dǎkaxotɔ́ dó, bónú é ná dɔn tó n’i.

12 Ényí è xo go lɔnmɔ e è yí vǐ tɔn lɛ́ sín así tɔn é ɔ,

é kpɔ́n te hú è kpé mɛ e nyí xlonɔ bo nɔ wa taɖunɔnú é.

13 Ényí mɛɖé nɔ sɔ́ nyanya dó sú ɖagbexɔ́ ná ɔ,

nǔ nyanya ná hán ɖo xwé tɔn gbe ǎ.

14 Ényí è bɛ́ hun ɔ, é cí ali hunhun nú sin gěgé* ɖɔhun;

cóbónú jlɛ ná bɛ́ hǔn, ɖidó.

15 Mɛ ɖěbǔ e nɔ bló bɔ hwɛ nɔ jó mɛdídá é kpó mɛ ɖěbǔ e nɔ ɖó hwɛ nú nǔjlɔ́jlɔ́watɔ́ é kpó ɔ,

yě bǐ wɛ nɔ vɛ́ mɔ nú Jexóva.

16 Ényí xlonɔ ɖó nǔwúkpíkpé e ná ɖó nǔnywɛ́ é,

bo ma ka ba ná ɖó ayi e ɖó nǔnywɛ́ é ǎ ɔ,* le tɛ́ ka ɖ’é mɛ?

17 Xɔ́ntɔn jɔ xɔ́ntɔn nɔ ɖe wǎnyíyí xlɛ́ hwebǐnu,

bo nyí nɔví e è nɔ mɔ ɖo adǎngbomɛ hwenu é.

18 Mɛ e ayivɔ vún é nɔ ná alɔ mɛ, bo nɔ yí gbe

bo nɔ nɔ nukɔn* nú mɛ e ja akwɛ́ nya gbé é ɖo nɔzo tɔn nukɔn.

20 Mɛ e sín ayi gɔ́ndɔ́n é ná ɖó ɖuɖéjí* ǎ,

mɛ e nɔ ɖɔ mɛblɛ́blɛ́xó é ná byɔ́ ya mɛ.

21 Mɛ e ji vǐ xlonɔ é ná byɔ́ aluwɛ mɛ;

vǐ e ayivɔ vún é sín tɔ́ nɔ ɖó awǎjijɛ ɖě ǎ.

22 Ényí awǎjijɛ gɔ́ ayi mɛtɔn mɛ ɔ, amasin ɖagbe ɖé wɛ,*

amɔ̌, awakanmɛ kú mɛ nɔ zɔ́n bɔ gǎn nɔ vɔ ɖo mɛ wú.

23 Mɛdídá ná ɖu nǔ ɖo nǔ mɛ ɖo nǔglɔ́,

bo ná dó sló kɔ nú hwɛ jlɔ́jlɔ́.

24 Nǔnywɛ́ wɛ nyí nǔ e gbé mɛ e ɖó nukúnnúmɔjɛnǔmɛ é nɔ nya é,

amɔ̌, xlonɔ sín nukún nɔ xwlé axi káká yi fí e ayǐkúngban ɔ kponu ɖó é.

25 Vǐ e jɔ xlo é nɔ dɔn tɔ́ tɔn dó aluwɛ mɛ,

bo nɔ ɖó wǔvɛ́* nú mɛ e ji i é.

26 É nyɔ́ ɖɔ è ní dɔn tó nú* nǔjlɔ́jlɔ́watɔ́ ǎ,

bǎ ɖíɖó nú mɛ e sísí jɛxá lɛ́ é sɔgbe ǎ.

27 Mɛ e ɖó nǔtuuntuun é nɔ cɔ́ xó tɔn lɛ́,

mɛ e ɖó nukúnnúmɔjɛnǔmɛ é ná cí xwíí.*

28 È ná kpɔ́n taɖunɔ e nɔ cí xwíí é dó mɔ nǔnywɛ́tɔ́,

bo ná kpɔ́n mɛ e nɔ hɛn nu tɔn é dó mɔ mɛ e ɖó nukúnnúmɔjɛnǔmɛ é.

18 Mɛ ɖěbǔ e nɔ ɖó wǔ zɔ nú mɛ ɖěvo lɛ́ é nɔ nya jlǒ cejɛ́nnábí tɔn éɖésúnɔ tɔn lɛ́ sín gbě;

é nɔ hɔn nǔnywɛ́ alɔkpa bǐ nyi gbě.*

 2 Xlonɔ nɔ ba ná mɔ nukúnnú jɛ nǔ ɖě mɛ ǎ;

é nyɔ́ wa ɔ, é nɔ kɔ́n sɛ sín nǔ e ɖo ayi tɔn mɛ é jí.

 3 Ényí mɛdídá wá ɔ, wǎngbɛ́númɛ lɔ nɔ jɛ túnu tɔn,

è kɔ́n wi mɛtɔn ɔ, winnyá wɛ nɔ jɛ túnu tɔn.

 5 É nyɔ́ ɖɔ è ní nɔ mɛdídá jí,

alǒ tɛ hwɛjijɔ nǔjlɔ́jlɔ́watɔ́ ǎ.

 6 Xlonɔ sín xó nɔ dɔn jlɛ wá,

bɔ nu tɔn nɔ dɔn hunxixo wá.

 7 Xlonɔ sín nu ɖésú wɛ nɔ sú kún tɔn dó,

bɔ nufló tɔn lɛ́ nyí mɔ nú gbɛ* tɔn.

 8 Jidómɛtɔ́ sín xó cí nǔɖuɖu e dó tɔ́n é* ɖɔhun;

è nɔ mì hlowun, bɔ é nɔ yi tɔ́n ɖo adɔgo mɛ.

 9 Mɛ ɖěbǔ e nɔ ɖi fɔnlín ɖo azɔ̌ tɔn kɔn é

nyí nɔví nú mɛ e nɔ sú kún dó nú nǔ é.

11 Dɔkun e dɔkunnɔ jɛ é cí toxo e ahohó lɛ́ lɛ̌ dó é ɖɔhun n’i;

ɖo linlin tɔn mɛ ɔ, dɔkun tɔn cí dǒ e nɔ nya xɛ ɖo mɛ jí é ɖɔhun.

12 Goyíyí e ɖo gbɛtɔ́ sín ayi mɛ é wɛ nɔ sú kún tɔn dó,

mɛɖée wɛ è nɔ sɔ́ hwe cóbɔ è nɔ sɔ́ mɛ su.

13 Ényí mɛɖé kɛ nu dó xó ɖé wú cóbó se nǔ e kunkplá xó ɔ lɛ́ é bǐ ɔ,

xlonɔnú wɛ é wa bo lɛ́ dó winnyá éɖée.

14 Mɛ e kpankɔ́n é ná kpé wú bo ná dɛ hwenu e é ɖo azɔn jɛ wɛ é,

amɔ̌, mɛ̌ ka sixú dɛ ɖo awakanmɛ kú mɛ nu?

15 Mɛ e ɖó nukúnnúmɔjɛnǔmɛ é sín ayi nɔ ɖó nǔtuuntuun,

bɔ tó nǔnywɛ́tɔ́ tɔn nɔ ba nǔtuuntuun mɔ.

16 Nǔ e mɛɖé ná é nɔ hun ali n’i;

é nɔ hun ali n’i yi gbɛtɔ́ nukúnɖéjí lɛ́ gɔ́n.

17 Nú mɛɖé wá jɛ hwɛ dó nukɔn ɔ, é nɔ cí ɖɔ hwɛ tɔn jɔ wɛ ɖɔhun,

káká jɛ hwenu e mɛ wegɔ́ ɔ nɔ wá, bo nɔ ɖɔ é ní ná kúnnuɖenú lɛ́ é.*

18 Akɔ nyinyi nɔ ɖó nǔ nǔdindɔn nu,

é nɔ dó hwɛ gbɔ nú* mɛ e ɖo nǔ dɔn wɛ syɛ́nsyɛ́n lɛ́ é.

19 Nɔví e è wa nǔ nyi do ná é nɔ hɛn nǔ gángángán b’ɛ nɔ syɛ́n hú toxo e è mɛ ahohó lɛ́ lɛ̌ dó é,

nǔdindɔn ɖé lɛ́ tíin bo cí toxo e è mɛ ahohó lɛ́ lɛ̌ dó é sín hɔnkpo lɛ́ ɖɔhun.

20 Xó e nɔ tɔ́n sín mɛɖé nu mɛ é ná zɔ́n bɔ adɔgo tɔn ná gɔ́;

nǔ e nu tɔn ji lɛ́ é ná kpé è kpo.

21 Ðɛ̌ ɖó hlɔ̌nhlɔ́n bo ná hu mɛ alǒ hwlɛ́n gbɛ gán;

mɛ e yí wǎn ná bo nɔ zán lɛ́ é ná ɖu sínsɛ́n tɔn lɛ́.

22 Mɛ e mɔ asi ɖagbe é ɔ, dɔkun wɛ é mɔ,

é nɔ mɔ fɛ́nú* Jexóva tɔn.

23 Wamamɔnɔ nɔ ɖo vo sa wɛ hwenu e é nɔ ɖo xó ɖɔ wɛ é,

amɔ̌, dɔkunnɔ nɔ kán gbe nú mɛ dó ná xósin.

24 Xɔ́ntɔn ɖé lɛ́ tíin bo nɔ ɖo gbesisɔmɛ bo ná wa nǔ dó yěɖée lɛ́ wú,

amɔ̌, xɔ́ntɔn ɖé lɛ́ tíin bo nɔ tɛ́ dó mɛ wú hú nɔví.

19 È nyí wamamɔnɔ bo nɔ ɖi zɔnlin kpó gbejíninɔ kpó ɔ,

é nyɔ́ hú è nyí xlonɔ, bo nɔ lɛ́ ɖó adingban.

 2 É nyɔ́ nú mɛɖé* ní gɔn nǔtuuntuun ɖó ǎ,

mɛ e nɔ zɔn kplakpla jí dó wa nǔ é* nɔ hu hwɛ.

 3 Xlo e mɛɖé jɔ é nɔ zɔ́n bɔ é nɔ wlí ali nyanya,

loɔ, Jexóva wɛ é nɔ sin xomɛ dó ɖo ayi tɔn mɛ.

 4 Dɔkunnɔ nɔ ɖó xɔ́ntɔn gěgé,

amɔ̌, wamamɔnɔ ɔ, mɛ e tlɛ nyí xɔ́ntɔn tɔn é ɖésú ná jó è dó.

 5 È ná gɔn tó dɔn nú kúnnuagɔɖetɔ́ ǎ,

mɛ e nɔ ɖo adingban te é ná gán ɖ’é mɛ ǎ.

 6 Mɛ gěgé wɛ nɔ jló ná nyɔ́ ɖo mɛ nukúnɖéjí* sí,

mɛ bǐ wɛ nɔ nyí xɔ́ntɔn mɛ e nɔ ná nǔ mɛ é tɔn.

 7 Wamamɔnɔ sín nɔví lɛ́ bǐ wɛ nɔ gbɛ́ wǎn n’i;

hɔn e xɔ́ntɔn tɔn lɛ́ nɔ hɔn n’i é tɔn zun kwínkwín má kwín!

 9 È ná gɔn tó dɔn nú kúnnuagɔɖetɔ́ ǎ,

mɛ e nɔ ɖo adingban te é ná dɔn.

10 É sɔgbe nú xlonɔ ní zán vivogbɛ ǎ;

é ka lɛ́ sɔgbe ɖěbǔ ɖɔ mɛsɛntɔ́ ní kpa acɛ dó axɔ́ví lɛ́ jí ǎ!

11 Mɛ e ɖó nukúnnúmɔjɛnǔmɛ é nɔ yá wǔ sin xomɛ ǎ,

ya e é ma nɔ ké nú nǔ e è wa nyi do n’i é* ǎ é* wɛ nɔ nyí susu n’i.

12 Xomɛsin axɔ́sú tɔn cí adǎn e kinnikínní* nɔ wa é ɖɔhun,

xomɛnyínyɔ́ tɔn ka nɔ cí ahǔn e nɔ ja dó gběhan jí é ɖɔhun.

13 Vǐ súnnu e jɔ xlo é nɔ dɔn tɔ́ tɔn dó tagba mɛ,

nyɔ̌nu tagbanɔ* cí xɔ e nɔ ɖo sin kun wɛ magbokɔ é ɖɔhun.

14 Tɔ́ lɛ́ sí wɛ è nɔ ɖu xwé kpó dɔkun kpó sín gǔ ɖe,

amɔ̌, Jexóva wɛ nɔ ná mɛ asi ayiɖotenánɔ.

15 Fɔnlín ɔ, amlɔ wɛ é nɔ dó mɛ zɛ xwé wú,

mɛ* e nɔ dán lɛjɛlɛjɛ é ná nɔ xovɛ́.

16 Mɛ e nɔ nyi sɛ́n é nɔ nya xɛ ɖo gbɛ* éɖésúnɔ tɔn jí;

mɛ e ma nɔ ké ya nú nǔ e nǔwiwa tɔn lɛ́ ná ji é ǎ é ná dɔn.

17 Mɛ e nɔ wa ɖagbe nú wamamɔnɔ é ɔ, Jexóva nya nǔ ná wɛ é ɖe,

É ná sú nǔ e é wa é sín axɔ́ ɛ.*

18 Kplɔ́n vǐ towe hwenu e nukúnɖíɖó ɖe é,

bónú kú tɔn ní ma wá sín wǔ we ó.*

19 Mɛ e nɔ yá wǔ sin xomɛ é ná se xɔxɔ tɔn;

ényí a tɛ́n kpɔ́n bá d’alɔ ɛ ɔ, é ná se gbɔ ǎ.

20 Nɔ ɖótó wěɖexámɛ, bo yí gbe nú kplɔ́n,

énɛ́ ɔ, a ná húzú nǔnywɛ́tɔ́ ɖo sɔgúdo.

21 Nǔ gěgé wɛ gbɛtɔ́ nɔ lin ná wa,

amɔ̌, jlǒ Jexóva tɔn wɛ ná nɔ ayǐ káká sɔ́yi.

22 Wǎnyíyí e ma nɔ sɛ do ǎ e mɛɖé nɔ ɖe xlɛ́ é nɔ zɔ́n bɔ nǔ tɔn nɔ nyɔ́ mɛ nukúnmɛ;

è nyí wamamɔnɔ ɔ, é nyɔ́ hú è nyí adingbannɔ.

23 Mɛ e nɔ ɖó sísí e gɔ́ngɔ́n é nú Jexóva é ná mɔ gbɛ;

mɛ mɔ̌hun ná d’amlɔ víví ɖo ayijayǐ mɛ.

24 Fɔnlínnɔ sɔ́ alɔ dó nǔɖuká ɖaxó mɛ,

amɔ̌, é tlɛ sɔ́ jɛ tagba bo lɛ́ kɔ nú alɔ ɔ yi nu ǎ.

25 Xo mɛcákotɔ́, bónú mɛ e ma mɔ nǔ kpɔ́n ǎ é ní dó sixú ɖó ayi te,

gbɛ̌ nǔ nú mɛ e ɖó nukúnnúmɔjɛnǔmɛ é, bónú nǔtuuntuun tɔn ná jɛjí.

26 Vǐ e nɔ dó ya nú tɔ́ tɔn, bo nɔ nya nɔ tɔn dó gbě é ɔ,

winnyá kpó hɛ̌n kpó wɛ é nɔ dɔn wá.

27 Vǐ ce, ényí a gɔn tó ɖó kplɔ́n ɔ,

a ná jɛ zɔ nú nǔtuuntuun.

28 Kúnnuɖetɔ́ e ma vó nǔtí ǎ é nɔ ké ya nú nǔ jlɔ́jlɔ́ ǎ,

mɛ nyanya sín nu ɔ, nǔ nyanya wɛ nɔ víví n’i.

29 Hwɛɖónúmɛ ɖo te kpɔ́n mɛcákotɔ́ lɛ́,

xlonɔ lɛ́ ɔ, bǎ wɛ ɖo te kpɔ́n nɛgbé yětɔn.

20 Vɛ̌ɛn nɔ zɔ́n bɔ è nɔ cá mɛ ko, ahan syɛ́nsyɛ́n nɔ zɔ́n bɔ è nɔ sixú ɖu ɖo mɛɖée jí ǎ;

mɛ ɖěbǔ e zɛ gbě ɖó yě wú é nyɔ́nǔi ǎ.

 2 Xɛsi ɖaxó e axɔ́sú nɔ dó mɛ é nɔ cí adǎn e kinnikínní* nɔ wa é ɖɔhun;

mɛ ɖěbǔ e dó xomɛsin n’i é nɔ sɔ́ gbɛ éɖésúnɔ tɔn ɖó axɔ́ nu.

 3 É jɛxá ɖɔ è ní wlí yɛ̌yi nú mɛ e nɔ nyi alɔ nú jlɛɖiɖɔ é,

amɔ̌, xlonɔ bǐ ná dó ta jlɛɖiɖɔ mɛ.

 4 Fɔnlínnɔ nɔ lɛ gle avivɔhwenu ǎ;

é ná nɔ ɖo nǔ byɔ́ ɖu wɛ ɖo nǔkúnyiyahwenu, ɖó é ɖó nǔɖé ǎ wútu.*

 5 Linlin* e ɖo gbɛtɔ́ sín ayi mɛ é cí sin e ɖo tɔ e gɔ́ngɔ́n é mɛ é ɖɔhun,

amɔ̌, mɛ e ɖó nukúnnúmɔjɛnǔmɛ é nɔ dɔn tɔ́n.

 6 Mɛ gěgé nɔ ɖɔ ɖɔ émí ɖó wǎnyíyí e ma nɔ sɛ do ǎ é,

amɔ̌, mɛ̌ ka sixú mɔ mɛ e ɖo gbejí é ɖé?

 8 Ényí axɔ́sú ɔ jínjɔ́n axɔ́súzinkpo jí bo ná ɖɔ hwɛ ɔ,

é nɔ ɖó ayi nǔ e nyí nǔ nyanya é bǐ wú.

 9 Mɛ̌ ka sixú ɖɔ: “Un lɛ ayi ce wé;

un mɛ́, hwɛ ɖě ɖo kɔ nú mì ǎ”?

10 Nǔdagan e ma sɔgbe ǎ é kpó nǔjlɛ́nú e ma sɔgbe ǎ é kpó*

bǐ wɛ nɔ vɛ́ mɔ nú Jexóva.

11 Ényí yɔkpɔ́vú* ɖé sín walɔ mɛ́ bo sɔgbe ɔ,

nǔwiwa tɔn lɛ́ wɛ nɔ xlɛ́ mɔ̌.

12 Tó e nɔ se nǔ é kpó nukún e nɔ mɔ nǔ é kpó ɔ,

Jexóva wɛ bló yě bǐ.

14 Nǔxɔtɔ́ nɔ ɖɔ: “É nyɔ́ ǎ, é nyɔ́ ǎ!”

É ka ɖidó gúdo ɔ, é nɔ gó dó éɖée wú.

15 Siká tíin, bɔ awǐnnya koláyi* gěgé lɔmɔ̌ tíin,

amɔ̌, nu e nɔ ɖɔ xó kpó nǔtuuntuun kpó é xɔ akwɛ́ hú gǎn.

16 Ényí mɛɖé d’akpá ɖɔ émí ná sú axɔ́ e jǒnɔ ɖé ɖu é hǔn, yǐ awu tɔn;

ényí nyɔ̌nu toɖévomɛnu* tamɛ wɛ é d’akpá ɔ dó hǔn, yǐ nǔ e é sɔ́ ɖó gbanu é sín así tɔn.

17 Wɔ̌xúxú e mɛɖé blɛ́ mɛ bo yí é nɔ víví n’i,

amɔ̌, énɛ́ gúdo ɔ, kɛ́n wɛ ná gɔ́ nu tɔn mɛ.

18 Nú è ba wěɖexámɛ ɔ, tuto e è bló lɛ́ é ná yi ta,*

ali e è xlɛ́ mɛ kpó azɔ̌tuuntuun* kpó é wɛ a ɖó ná xwedó dó fun ahwan.

19 Jidómɛtɔ́ nɔ ɖo yiyi kpé wɛ, bo nɔ ɖo xó e nyí kpáxó é ɖe gba wɛ.

Ma dó gbɛ̌ xá mɛ e yí wǎn nú mɛnúɖiɖɔ é* ó.

20 Mɛ ɖěbǔ e dó nu tɔ́ tɔn alǒ nɔ tɔn é ɔ,

zogbɛ́n tɔn ná cí hwenu e ablu dó é.

21 Gǔ e è ɖu gbɔn nukúnkɛndídó gblamɛ ɖo bǐbɛ́mɛ é

ná hɛn nyɔ̌ná wá ɖo vivɔnu ǎ.

23 Nǔdagan e ma sɔgbe ǎ lɛ́ é* nɔ vɛ́ mɔ nú Jexóva,

nǔjlɛ́nú mɛ hízíhízí tɔn lɛ́ zínzán nyɔ́ ǎ.

24 Jexóva wɛ nɔ xlɛ́ ali gbɛtɔ́ sín afɔ;

nɛ̌ gbɛtɔ́ ka sixú mɔ nukúnnú jɛ ali éɖésúnɔ tɔn lɛ́* wú gbɔn?

26 Axɔ́sú e nyɔ́nǔi é nɔ cyán mɛdídá lɛ́ ɖó vo,

bo nɔ kun nǔkúnsónú gbɔn yě jí.

27 Funfún gbɛtɔ́ tɔn wɛ nyí zogbɛ́n Jexóva tɔn,

é nɔ tá wěziza dó nǔ e é nyí ɖo ayi gɔngɔn tɔn mɛ é jí.

28 Wǎnyíyí e ma nɔ sɛ do ǎ é kpó gbejíninɔ kpó nɔ nya xɛ ɖo axɔ́sú jí;

é nɔ bló bɔ axɔ́súzinkpo tɔn nɔ lí dǒ, gbɔn wǎnyíyí e ma nɔ sɛ do ǎ é gblamɛ.

29 Susu mɛ wínnyáwínnyá lɛ́ tɔn ɔ, hlɔ̌nhlɔ́n yětɔn wɛ,

bɔ ɖɛkpɛ mɛxómɔ lɛ́ tɔn ɔ, hwa yětɔn wɛ.

30 Hun só dó lanmɛ nú mɛ kpó akpa kpó nɔ ɖe* nǔ nyanya síin,

mɛ xixo nɔ lɛ nǔ e è nyí ɖo ayi gɔngɔn mɛtɔn mɛ é wé.

 2 Ali e gbɛtɔ́ nɔ mlɛ́ lɛ́ é bǐ nɔ cí nǔ e sɔgbe é ɖɔhun ɖo nukún éɖésúnɔ tɔn mɛ.

Amɔ̌, Jexóva nɔ gbéjé ayi mɛtɔn* kpɔ́n.

 3 Nǔ e sɔgbe bo jlɔ́ é wiwa

nɔ hun xomɛ nú Jexóva hú vɔ̌sísá.

 4 Nukún goyíyí tɔn kpó ayi goyíyí tɔn kpó wɛ nyí zogbɛ́n e nɔ xlɛ́ ali mɛdídá é;

bɔ nǔ énɛ́ lɛ́ ka nyí hwɛhuhu.

 5 Mɛ e nɔ ɖó kan dó nǔ wú é sín tuto lɛ́ nɔ yi ta* jɛ́n wɛ,

amɔ̌, mɛ e nɔ zɔn kplakpla jí dó wa nǔ lɛ́ é bǐ ná byɔ́ ya mɛ dandan.

 6 Adingban ɖíɖó dó jɛ dɔkun

cí amǔ e ɖo hǐnhɔ́n wɛ é ɖɔhun, é cí mɔ e nɔ hu mɛ é ɖɔhun.*

 7 Dǎkaxixo mɛdídá lɛ́ tɔn ná sú kún yětɔn dó;

ɖó yě nɔ gbɛ́ ɖɔ émí kún ná wa nǔ kpó hwɛjijɔ kpó ó.

 8 Mɛ e hu hwɛ é sín ali nɔ gɔ́ndɔ́n,

amɔ̌, mɛ e mɛ́ é sín nǔwiwa nɔ jlɔ́.

 9 È yi cí xɔ ta ɖo zwe mɛ ɔ,

é kpɔ́n te hú è ní nɔ xwé ɖokpó ɔ gbe xá nyɔ̌nu tagbanɔ.*

10 Nǔ nyanya wɛ nɔ gbo vɛ̌ mɛdídá;*

é nɔ nyɔ́ xomɛ ɖěbǔ dó nɔzo tɔn wú ǎ.

11 Ényí è dɔn tó nú mɛcákotɔ́ ɔ, mɛ e ma mɔ nǔ kpɔ́n ǎ é nɔ húzú nǔnywɛ́tɔ́,

ényí mɛ e ɖó nǔnywɛ́ é ɖó nukúnnúmɔjɛnǔmɛ ɔ, é nɔ tuun nǔ.*

12 Nǔjlɔ́jlɔ́watɔ́ nɔ ɖó ayi mɛdídá sín xwé wú;

é nɔ sú kún dó nú mɛdídá.

13 Mɛ ɖěbǔ e nɔ tin dó xó e sú wɛ wamamɔnɔ ɖe é

lɔ ná wá sú xó, mɛ ɖě ka ná gbɔ d’é mɛ n’i ǎ.

14 Nǔ e è ná mɛ ɖo nǔglɔ́ é nɔ cí asɔ nú xomɛsin,

bɔ nǔ e è ɖu ɖo nǔ mɛ ɖo nǔglɔ́ é nɔ cí asɔ nú xomɛsin syɛ́nsyɛ́n.

15 Nǔ wiwa kpó hwɛjijɔ kpó ɔ, awǎjijɛnú wɛ é nɔ nyí nú nǔjlɔ́jlɔ́watɔ́,

loɔ, nǔ wa gbɔn mɔ̌ nɔ vɛ́ mɔ nú mɛ e nɔ wa nǔ nyanya lɛ́ é.

16 Mɛ e zɛ gbě sín nukúnnúmɔjɛnǔmɛ sín ali jí é

ná gbɔjɛ kpó mɛ e kú lɛ́ é kpó.

17 Mɛ e yí wǎn nú gbɛɖuɖu é ná byɔ́ ya mɛ;

mɛ e yí wǎn nú vɛ̌ɛn kpó ami kpó é ná jɛ dɔkun ǎ.

18 Gbɛxixɔ wɛ mɛdídá nyí nú nǔjlɔ́jlɔ́watɔ́,

è ná dɔn tó nú gbejímanɔtɔ́ dó nǔjlɔ́jlɔ́watɔ́ tɛnmɛ.

19 È yi cí gbětótló mɛ ɔ,

é kpɔ́n te hú è ní nɔ kpɔ́ xá nyɔ̌nu tagbanɔ* e lɛ́ nyí xomɛsinnɔ é.

20 È nɔ mɔ dɔkun xɔ akwɛ́ kpó ami kpó ɖo nǔnywɛ́tɔ́ xwégbe,

amɔ̌, mɛ e nyí xlonɔ é ná hɛn nǔ e é ɖó é fun.*

21 Mɛ ɖěbǔ e nɔ nya nǔjlɔ́jlɔ́wiwa kpó wǎnyíyí e ma nɔ sɛ do ǎ é kpó gbé é

ná mɔ gbɛ, nǔjlɔ́jlɔ́wiwa kpó susu kpó.

22 Mɛ e nyɔ́nǔi é hɛn ɔ, é ná fán toxo hlɔ̌nhlɔ́nnɔ lɛ́ tɔn sín dǒ,*

bo ná vɔ́ da nú hlɔ̌nhlɔ́n e wú yě ɖeji dó é.

23 Mɛ e nɔ cɔ́ nu tɔn kpó ɖɛ̌ tɔn kpó é

nɔ nyi alɔ nú tagba.

24 Mɛ e nɔ wa nǔ e sín acɛ é ma ɖó ǎ, bo nɔ yí go, lobo nɔ zé éɖée dó jǐ é wɛ è nɔ ylɔ́

mɛ e nɔ wa nǔ kpó goyíyí kpó bo ma nɔ ké ya nú nǔ e é ná ji lɛ́ é ǎ é ɖɔ.

25 Nǔ e nɔ gbo vɛ̌ fɔnlínnɔ é ná hu i,

ɖó alɔ tɔn lɛ́ nɔ gbɛ́ nǔ wa.

26 Nukúnkɛn wɛ nɔ xlɛ́ ali linlin tɔn ɖo kéze ɔ bǐ mɛ,

amɔ̌, nǔjlɔ́jlɔ́watɔ́ nɔ ná nǔ mɛ, é nɔ tɛ nǔ ɖěbǔ mɛ ǎ.

28 Kúnnuɖetɔ́ e nɔ ɖó adingban é sín kún ná sú dó,

amɔ̌, mɛ e nɔ ɖótó mɛ é ná ɖe kúnnu kpó ɖuɖéjí kpó.*

29 Mɛdídá nɔ ɖó winnyá ǎ,

amɔ̌, nǔjlɔ́jlɔ́watɔ́ sín ali wɛ nyí ali e ɖó jiɖe é.*

31 È nɔ sɔ́ nǔ nú sɔ́ nú ahwanfunfunzángbe,

amɔ̌, Jexóva gɔ́n wɛ hwlɛngán nɔ gosín.

22 È ɖó nyǐkɔ ɖagbe* ɔ, é nyɔ́ hú dɔkun sukpɔ́;

mɛ ɖěvo lɛ́ ɖó sísí nú mɛ ɔ, é nyɔ́ hú kpatágan kpó siká kpó.*

 3 Mɛ e nɔ nɔ acéjí é nɔ mɔ awǒvinú, bo nɔ hwlá éɖée,

amɔ̌, mɛ e ma mɔ nǔ kpɔ́n ǎ é nɔ kpo ɖo yiyi wɛ, bo nɔ se xɔxɔ tɔn.*

 4 Nǔ e nɔ tɔ́n sín mɛɖéesɔ́hwe kpó sísí e gɔ́ngɔ́n é ɖíɖó nú Jexóva kpó mɛ é

wɛ nyí dɔkun, susu kpó gbɛ kpó.

 5 Wun kpó fɛ́ca kpó wɛ ɖo mɛ e nɔ hízí mɛ é sín ali jí,

amɔ̌, mɛ ɖěbǔ e gbɛ* tɔn xɔ akwɛ́ ná é nɔ nɔ zɔ vwéé dó nǔ énɛ́ lɛ́.

 6 Kplɔ́n vǐ* ɖó ali e é ɖó ná mlɛ́ é jí;

nú é tlɛ wá su ɔ, é ná gosín jí ǎ.

 7 Dɔkunnɔ nɔ kp’acɛ dó wamamɔnɔ jí,

bɔ axɔ́ɖutɔ́ nyí kannumɔ nú axɔ́tɔ́nɔ.

 8 Mɛ ɖěbǔ e dó nǔagɔwiwa é ná ya adla,

bɔ è ná wɛ́n kpo e é nɔ zán hwenu e xomɛ sin i é.

 9 Mɛ e nɔ hun alɔ dó ná nǔ mɛ é* ɔ, è ná kɔn nyɔ̌ná dó jǐ tɔn,

ɖó é nɔ má nǔɖuɖu tɔn xá wamamɔnɔ.

10 Nya mɛcákotɔ́,

énɛ́ ɔ, jlɛɖiɖɔ ná bú;

nǔdindɔn* kpó mɛzunzun kpó ná yi xɔ.

11 Mɛ e mɛ́ ɖo ayi mɛ bɔ xó tɔn lɛ́ nɔ nyɔ́ se é

ná zun xɔ́ntɔn xá axɔ́sú.

12 Nukún Jexóva tɔn lɛ́ nɔ nya xɛ ɖo nǔtuuntuun jí,

amɔ̌, é nɔ flí gbejímanɔtɔ́ lɛ́ sín xó xwe.

15 Xlojijɔ wɛ kpa azinkpo bo jínjɔ́n ayǐ ɖo yɔkpɔ́vú* sín ayi mɛ,

amɔ̌, bǎ nǔgbɛ́númɛ tɔn ná sɛ xlojijɔ ɔ dó zɔ vwéé n’i.

16 Mɛ e nɔ táfú wamamɔnɔ bo ná dó jɛ dɔkun dó dɔkun jí é

kpó mɛ e nɔ ɖo nǔ ná dɔkunnɔ wɛ é kpó

ná wá byɔ́ ya mɛ.

17 Tɛ́ tó bo ɖótó nǔnywɛ́tɔ́ sín xó lɛ́,

bo ná dó hɛn nǔ e un kplɔ́n we é ayi mɛ.

18 Ðó nú a hɛn xó énɛ́ lɛ́ ayi mɛ ɔ, a ná ɖó awǎjijɛ,

bɔ xó énɛ́ lɛ́ bǐ ná ɖo nu towe hwebǐnu.

19 Bónú a ní dó ɖejí dó Jexóva wú ɔ,

un ɖo nǔtuuntuun ná we wɛ égbé.

20 Un ko wlán nǔ sɛ́dó we,

bo ɖe wě xá we, bónú a ná lɛ́ tuun nǔ,

21 lobo lɛ́ kplɔ́n nǔgbó kpó xó ɖejidéwú lɛ́ kpó we,

bónú a ná dó sixú lɛ́ kɔ, bo yi ɖó gbe e sɔgbe é nú mɛ e sɛ́ we dó é ǎ cé?

22 Ma j’ajo dó yatɔ́nɔ, ɖó é nyí yatɔ́nɔ wútu ó,

ma nyínyɛ́ wamamɔnɔ ɖo toxo ɔ sín hɔntogbó ta ó,

23 ɖó Jexóva ɖésúnɔ ná bló bɔ è ná ɖɔ hwɛ jlɔ́jlɔ́ nú yě.

É ná gblé gbɛ dó nú mɛ ɖěɖěe nɔ táfú yě lɛ́ é.

24 Ma nɔ dó mɛ e nɔ yá wǔ sin xomɛ é sín hǎ ó,

ma ka kpé nǔ ɖě xá mɛ e nɔ yá wǔ jɛ ma é ó,

25 énɛ́ ɔ, a ná kplɔ́n ali tɔn lɛ́,

bo ná dɔn hwiɖée* dó fɛ́ca mɛ gbeɖé ǎ.

26 Ma nɔ nɔ mɛ ɖěɖěe nɔ ná alɔ mɛ dó dó akpá lɛ́ é tɛ́ntin ó,

ma nɔ nɔ mɛ ɖěɖěe nɔ nɔ nukɔn nú mɛ e ja akwɛ́ nya gbé lɛ́ é tɛ́ntin ó.

27 Ényí a ma ɖó nǔtí bo ná dó sú ná ǎ ɔ,

è ná yí zan towe sín glɔ̌ towe.

28 Ma sɛ dogbó sín wuntun xóxó

e tɔ́gbó towe lɛ́ ɖó ayǐ é ó.

Axɔ́sú lɛ́ nukɔn wɛ é ná nɔ te ɖe;

é ná nɔ te ɖo gbɛtɔ́ kpaa lɛ́ nukɔn ǎ.

23 Ényí a jínjɔ́n ayǐ bo ná ɖu nǔ xá axɔ́sú hǔn,

gbějé nǔ e ɖo nukɔn towe é kpɔ́n ganjí.

 2 Sɔ́ jivǐ dó vɛ̌go mɛ,*

ényí xovɛ́ sin we tawun* ɔ nɛ́.

 3 Nǔɖuɖu tɔn e dó jǒ lɛ́ é ní ma gbo vɛ̌ we ó,

ɖó nǔɖuɖu mɛblɛ́blɛ́ tɔn wɛ.

 5 Ényí a sɔ́ nukún towe lɛ́ ɖó dɔkun jí ɔ, é sɔ́ ɖo fínɛ́ ǎ,

ɖó é ná wú awa hɔ̌n ɖɔhun jɛ́n wɛ, bo ná zɔn yi jǐnukúnsin.

 6 Ma ɖu gwěnɔ sín nǔɖuɖu ó;

nǔɖuɖu tɔn e dó jǒ lɛ́ é ní ma gbo vɛ̌ we ó,

 7 ɖó é cí mɛ e nɔ sɔ́ kɛ́n nǔ nabí e a ɖu é tɔn é* ɖɔhun.

 8 A ná vi nǔ e a ɖu lɛ́ é,

bɔ xó ɖagbe e a ɖɔ lɛ́ é ná gú we.

 9 Ma ɖɔ xó dó tó mɛ nú xlonɔ ó,

ɖó é ná dó vɛ̌ nú nǔnywɛ́ e ɖo xó towe mɛ é.

10 Ma sɛ dogbó sín wuntun e ko ɖo ayǐ xóxó é,

alǒ byɔ́ tɔ́cyɔvǐ lɛ́ sín gle mɛ ó.

11 Ðó Mɛ e nɔ jɛ hun dó yě jí é* ɖó hlɔ̌nhlɔ́n;

é ná jɛ hun dó yě jí, bo ná klán gbe xá we.

12 Hun ayi towe, bo yí kplɔ́n,

hun tó towe, bo ɖótó nǔtuuntuun sín xó lɛ́.

14 A ɖó ná sɔ́ bǎ dó xo è ná,

bo ná dó hwlɛ́n ɛ* ɖo Yɔdo* sí.

15 Vǐ ce, ényí a* húzú nǔnywɛ́tɔ́ ɔ,

un ná j’awǎ.

16 Un ná j’awǎ ɖo xo ce mɛ dɔ̌n,*

hwenu e nu towe ná ɖo nǔ e sɔgbe é ɖɔ wɛ é.

17 Ayi towe ní ma jló hwɛhutɔ́ lɛ́ sín gbɛ ó,

amɔ̌, ɖǒ sísí e gɔ́ngɔ́n é nú Jexóva ɖo azǎn ɔ bǐ jí,

18 ɖó mɔ̌ mɛ ɔ, a ná ɖó sɔgúdo ɖagbe,

bɔ nukúnɖíɖó towe ná cifo ǎ.

19 Vǐ ce, ɖǒtó mì, bo húzú nǔnywɛ́tɔ́,

jlɔ̌ ayi towe ɖó ali e sɔgbe é jí.

20 Ma nɔ nɔ mɛ e yí wǎn nú vɛ̌ɛn gěgé nunu lɛ́ é tɛ́ntin ó,

ma nɔ nɔ mɛ e nɔ sɔ́ lan dó ján hǔn lɛ́ é tɛ́ntin ó.

21 Ðó ahannumúnɔ kpó adɔtɔ́nɔ kpó ná byɔ́ ya mɛ,

kɔmlɔgɔ́ sisa ná zɔ́n bɔ yě ná dó nǔkíja.

22 Ðǒtó tɔ́ towe e ji we é,

ma gɔn ya ké nú nɔ towe ɖó é kpo kpowun wútu ó.

23 Xɔ* nǔgbó, bo ma sa gbeɖé ó,

lɛ̌ xɔ nǔnywɛ́, kplɔ́n kpó nukúnnúmɔjɛnǔmɛ kpó.

24 Nǔjlɔ́jlɔ́watɔ́ sín tɔ́ ná j’awǎ dandan;

mɛ ɖěbǔ e ji vǐ nǔnywɛ́tɔ́ é ná j’awǎ ɖó wǔ tɔn.

25 Tɔ́ towe kpó nɔ towe kpó ná j’awǎ,

nyɔ̌nu e ji we é ná j’awǎ.

26 Vǐ ce, kɛnklɛ́n ɖótó mì kpó ayi towe bǐ kpó,

ali ce lɛ́ ní nyɔ́ nukún towe mɛ.

27 Ðó do e gɔ́ngɔ́n é wɛ tonyatɔ́ nyí,

bɔ nyɔ̌nu nǔblíblíwatɔ́* nyí dotɔ e sóbwé é.

28 É nɔ tɔ wu nú mɛ ajotɔ́ axánsúnxó ɖɔhun,

é nɔ bló bɔ súnnu gbejímanɔtɔ́ lɛ́ sín kɛ́n nɔ jɛjí.

30 Mɛ e nɔ cí vɛ̌ɛn kɔn bo nɔ gbɛ́ te sí lɛ́ é wɛ;

mɛ e nɔ ɖo vɛ̌ɛn e è cáká é gbé nya wɛ lɛ́ é* wɛ.

31 Ma nɔ kpɔ́n sinmɛ vɔvɔ e vɛ̌ɛn nɔ ɖó,

hwenu e é ɖo fún nyɛ wɛ ɖo kɔ́fu mɛ, bo nɔ ɖíɖí byɔ́ vɛ̌go mɛ é ó.

32 Ðó ɖo vivɔnu ɔ, é nɔ xú aɖǔ mɛ dan ɖɔhun,

bo nɔ tún aɖǐvɛ́ jakpata ɖɔhun.

33 Nukún towe ná nɔ mɔ nǔ we we,

bɔ ayi towe ná nɔ ɖɔ xó gblégblé lɛ́.

34 A ná cí mɛ e ɖo ayǐmlɔ́mlɔ́ ɖo xu tɛ́ntin é ɖɔhun,

bo ná cí mɛ e ɖo ayǐmlɔ́mlɔ́ ɖo asyákpo tɔjíhún tɔn sín ta nu é ɖɔhun.

24 Ma jló mɛ nyanya lɛ́ sín gbɛ ó,

gbɛ̌ yětɔn dídó ní ma ka gbo vɛ̌ we ó,

 2 ɖó yě nɔ ɖo tamɛ lin dó dǎkaxixo jí wɛ,

bɔ nu yětɔn nɔ ɖo nǔ nyanya ɖɔ wɛ.

 3 Nǔnywɛ́ wɛ è nɔ zán dó gbá xwé,*

nukúnnúmɔjɛnǔmɛ wɛ è nɔ zán dó bló bɔ é nɔ lí dǒ.

 4 Nǔtuuntuun wɛ è nɔ zán dó bló bɔ dɔkun xɔ akwɛ́ lɛ́

kpó éé dɔn mɛ lɛ́ é kpó alɔkpa lɛ́ bǐ nɔ gɔ́ xwé ɔ sín xɔ lɛ́ mɛ.

 5 Mɛ e ɖó nǔnywɛ́ é ɖó hlɔ̌nhlɔ́n,

nǔtuuntuun nɔ zɔ́n bɔ hlɔ̌nhlɔ́n mɛɖé tɔn nɔ jɛjí.

 6 Ali e è xlɛ́ we kpó azɔ̌tuuntuun* kpó é wɛ a ná xwedó dó fun ahwan,

ényí wěɖexámɛtɔ́ sukpɔ́ ɔ, ɖuɖéjí* nɔ tíin.

 7 Nǔnywɛ́ jɔ nǔnywɛ́ ɖíɖó vɛ́ xlonɔ;

é ɖó nǔ ɖě bo ná ɖɔ ɖo hɔntogbó toxo ɔ tɔn ta ǎ.

 8 Mɛ ɖěbǔ e nɔ bló tuto nǔ nyanya tɔn é ɔ,

è ná ylɔ́ ɛ ɖɔ ayiwínníwínnígán.

 9 Xlojijɔ* sín tuto lɛ́ ɔ, hwɛhuhu wɛ,

è nɔ gbɛ́ wǎn nú mɛcákotɔ́.

10 Ényí awakanmɛ kú we ɖo adǎngbomɛzángbe* ɔ,

hlɔ̌nhlɔ́n towe ná ɖe kpo.

11 Hwlɛ̌n mɛ ɖěɖěe è kplá xwe kú lɛ́ é,

bo d’alɔ mɛ ɖěɖěe ɖo sa fún wɛ xwe fí e è ná hu yě ɖe lɛ́ é.

Ɛɛn, Mɛ e ɖo kpínkpɔ́n we wɛ* é ná tuun,

é ná sú axɔ́ mɛ ɖokpó ɖokpó sɔgbe xá nǔ e mɛ ɔ wa é.

13 Vǐ ce, nɔ ɖu wǐin, ɖó é nyɔ́;

wǐin e gosín wǐinkpa mɛ é nɔ víví ɖo nu mɛ.

Ényí a mɔ ɔ, a ná ɖó sɔgúdo ɖagbe,

bɔ nukúnɖíɖó towe ná cifo ǎ.

15 Ma ɖó ayi dídá, bo tɔ wu ɖo nǔjlɔ́jlɔ́watɔ́ sín xwé kpá ó;

ma kíjá fí e é nɔ gbɔjɛ ɖe é ó.

16 Ðó nǔjlɔ́jlɔ́watɔ́ sixú j’ayǐ azɔn tɛ́nwe, amɔ̌, é ná lɛ́ sí te,

loɔ, awě wɛ ná zin mɛdídá dɛ́.

17 Ényí kɛntɔ́ towe j’ayǐ hǔn, ma j’awǎ ó,

ényí é klɛ́n afɔ hǔn, xomɛ ní ma hun we ó;

18 é ma nyí mɔ̌ ǎ ɔ, Jexóva ná mɔ,

bɔ é ná nyɔ́ nukún tɔn mɛ ǎ, lobɔ é sɔ́ ná sin xomɛ dó è* ǎ.

19 Xomɛ ní ma sin we* ɖó mɛ nyanya lɛ́ wú ó;

ma jló mɛdídá lɛ́ sín gbɛ ó,

20 ɖó sɔgúdo ɖagbe ɖě ɖe nú mɛ ɖěbǔ e nyí mɛ nyanya é ǎ;

è ná cí mɛdídá sín zogbɛ́n.

Ma dó gǔfɔ́ntɔ́ lɛ́* há ó,

22 ɖó awě e ná xo yě é ná wá ajijimɛ.

25 Amɔ̌, nǔ bǐ ná yi ganjí nú mɛ e nɔ kɛ nu dó nǔ wú n’i lɛ́ é;

nyɔ̌ná ná kɔn dó jǐ yětɔn.

27 Blǒ tuto azɔ̌ e ɖo gle towe mɛ é tɔn, bo sɔ́ nǔ nú nǔ bǐ ɖ’ayǐ ɖo gle towe mɛ.

Énɛ́ gúdo hǔn, gbǎ xwé towe.*

29 Ma ɖɔ lě ó: “Lěe é bló gbɔn nú mì é wɛ un ná bló gbɔn n’i;

un ná sú nǔ e é wa é sín axɔ́ ɛ.”*

30 Un gbɔn fɔnlínnɔ sín gle mɛ,

ɛɛn, un gbɔn mɛ e ayivɔ vún é sín vǐwungbo mɛ.

31 Un mɔ bɔ gběhan nyanya gɔ́ mɛ;

wunkan lɛ́ vun blá ayǐkúngban ɔ,

bɔ dǒ tɔn* e è sɔ́ awǐnnya dó bló é gba hánnyá.

32 Un kpɔ́n nǔ énɛ́ bo hɛn dó ayi mɛ;

un mɔ nǔ énɛ́ bo kplɔ́n nǔ élɔ́:*

33 Amlɔ kpɛɖé, kɔmlɔgɔ́ sisa kpɛɖé,

alɔ bíblá dó wǔ bá gbɔjɛ kpɛɖé,

34 bɔ ya ná fyán we ajotɔ́ ɖɔhun,

lobɔ hɛ̌n ná fyán we ajotɔ́ axánsúnxó ɖɔhun.

 2 Nǔ hɛn dó hwlǎhwlá jí wɛ nyí susu Mawu tɔn.

Susu axɔ́sú lɛ́ tɔn wɛ nyí ɖɔ yě ní ba do nú nǔɖé tɛ́nwín lɛnwín.

 3 Lěe jǐnukúnsin yi aga, bɔ ayǐkúngban xomɛ gɔ́ngɔ́n gbɔn é ɔ,

mɔ̌ wɛ è ma sixú mɔ do nú axɔ́sú lɛ́ sín ayi ǎ gbɔn é nɛ́.

 4 Ðe nǔ kwíji sín kpatágan wú,

énɛ́ ɔ, é ná húzú kpatágan akú.

 5 Ðe mɛdídá sín axɔ́sú nukɔn,

énɛ́ ɔ, axɔ́súzinkpo tɔn ná jínjɔ́n nǔjlɔ́jlɔ́wiwa jí gbánwúngbánwún.

 6 Ma wlí yɛ̌yi nú hwiɖée ɖo axɔ́sú nukɔn ó,

ma sɔ́ tɛnmɛ ɖo mɛ nukúnɖéjí lɛ́ tɛ́ntin ó,

 7 ɖó é kpɔ́n te ɖɔ é ní ɖɔ nú we ɖɔ: “Wǎ jínjɔ́n fí,”

 8 Ma hwlɛndó bo dɔn nɔzo towe yi hwɛ nukɔn ó,

ɖó ényí nɔzo towe wá dó winnyá we ɔ, étɛ́ a ka ná wa?

 9 Ðɔ xó ɔ gbo xá nɔzo towe,

amɔ̌, ma kɔ́n sɛ sín kpáxó e è ɖɔ nú we é* jí ó,

10 énɛ́ ɔ, mɛ e ɖo tó ɖó we wɛ é ná dó winnyá we ǎ,

gɔ́ ná ɔ, a ná fúnfún xó nyanya* e è ma sixú ɖó te ǎ é kpé ǎ.

11 Xó e è ɖɔ bɔ é jɛ gan é

cí sikápɔ́mu e ɖo gannú e è sɔ́ kpatágan dó bló ná é mɛ lɛ́ é ɖɔhun.

12 Nu e nǔnywɛ́tɔ́ kɛ dó nǔ wú nú mɛ é

cí sikátógbé kpó acɔ́banú ɖagbe ɖagbe e è sɔ́ siká dó bló ná é kpó ɖɔhun ɖo mɛ e se é sín tó mɛ.

13 Lěe laglási linfín nɔ fá gbɔn ɖo nǔkúnyiya sín azǎn gbe é

ɖɔhun wɛ wɛndótɔ́ gbejínɔtɔ́ ɖé cí nú mɛ ɖěɖěe sɛ́ ɛ dó lɛ́ é,

ɖó é nɔ fá kɔ nú gǎn tɔn.*

14 Mɛ e ɖo nugo yí wɛ dó nǔníná e é ma ná mɛ gbeɖé ǎ é wú é*

cí akpɔ́kpɔ́ kpó jɔhɔn kpó e ma hɛn jǐ wá ǎ é ɖɔhun.

15 Gbɔn suúlu ɖíɖó gblamɛ ɔ, è nɔ ɖu ɖo ahwangán ɖaxó jí,

ɖɛ̌ e mlɛ́* é sixú gba xú.

16 Ényí a mɔ wǐin hǔn, ɖu éé sín hudó a ɖó é kɛ́ɖɛ́,

ɖó ényí a ɖu dín ɔ, a sixú wá vi.

17 Afɔ towe ní ma nɔ tíin ɖo nɔzo towe xwé dín ó,

é ma nyí mɔ̌ ǎ ɔ, agbɔ̌n towe ná kpé è, bɔ é ná gbɛ́ wǎn nú we.

18 Mɛ e nɔ ɖe kúnnu agɔ dó nɔzo tɔn wú é

cí kpo e è nɔ dó fun ahwan ná é, hwǐ kpó gǎ nu xwíɖíxwíɖí kpó ɖɔhun.

19 Ji ɖiɖe dó mɛ e wú è ma sixú ɖeji dó ǎ é* wú ɖo wǔvɛ́ hwenu

cí aɖǔ e fɛ́n é, alǒ afɔ e ma lí dǒ ǎ é ɖɔhun.

20 Mɛ e nɔ ji han nú mɛ e wǔ kú é

cí mɛ e ɖe awu ɖo azǎn e gbe jɔhɔn fá é ɖɔhun,

é cí vinɛ́glu e è kɔn dó sóɖa jí é ɖɔhun.

21 Ényí xovɛ́ sin kɛntɔ́ towe* hǔn, nǎ ɛ nǔɖuɖu bónú é ní ɖu;

ényí kɔ xú i hǔn, nǎ ɛ sin bónú é ní nu,

22 ɖó ényí a ɖo mɔ̌ bló wɛ ɔ, é ná cí ɖɔ myɔkán kplé ɖó ta n’i wɛ a ɖe ɖɔhun,*

bɔ Jexóva ná d’ajɔ tɔn we.

23 Jɔhɔn totaligbé tɔn nɔ dɔn jǐ ɖaxó wá,

ɖɛ̌ e nɔ ɖɔ mɛnú é nɔ dɔn xomɛsin wá.

24 È yi cí xɔ ta ɖo zwe mɛ ɔ,

é kpɔ́n te hú è ní nɔ xwé ɖokpó ɔ gbe xá nyɔ̌nu tagbanɔ.*

25 Lěe sin fífá nɔ cí nú lǐndɔ̌n* e nǔ ci kɔ ná é ɖɔhun wɛ

gbeɖíɖó ɖagbe e gosín to línlín mɛ é nɔ cí.

26 Nǔjlɔ́jlɔ́watɔ́ e jó éɖée dó nú mɛdídá* é

cí tɔjɔtɛn e babá gɔ́ é kpó dotɔ e gblé é kpó ɖɔhun.

27 É nyɔ́ ɖɔ è ní ɖu wǐin dín ǎ,

mɔ̌ jɛ́n é ma nyɔ́ ɖɔ è ní ba susu mɛɖésúnɔ tɔn ǎ é nɛ́.

28 Mɛ e ma sixú ɖu ɖo xomɛsin* tɔn jí ǎ é

cí toxo e è gba hánnyá bɔ é ma sɔ́ ɖó dǒ ǎ é ɖɔhun.

26 Laglási linfín nɔ ja ɖo yǒzohwenu ǎ, jǐ nɔ ja ɖo nǔkúnyiyahwenu ǎ,

mɔ̌ ɖokpó ɔ, é jɛxá ɖɔ è ní wlí yɛ̌yi nú xlonɔ ǎ.

 2 Lěe xɛ ma nɔ nɔ yǎyá bo nɔ hɔn ǎ, bɔ azɔnxɛ ma nɔ nɔ yǎyá bo nɔ zɔn ǎ gbɔn é ɔ,

mɔ̌ jɛ́n è ma nɔ nɔ yǎyá bo nɔ dó nu mɛ ǎ gbɔn é nɛ́.*

 3 Bǎ ɔ, sɔ́ tɔn wɛ, bɔ gan nyí tócí tɔn,

amɔ̌, kpo wɛ nɔ ɖo gǔdo nú xlonɔ lɛ́.

 4 Ma ná xósin xlonɔ, xlonɔ ɖɔhun ó,

é ma nyí mɔ̌ ǎ ɔ, a ná sɔ́ hwiɖée ɖó hǎ tɔn jí.*

 5 Nǎ xósin xlonɔ, xlonɔ ɖɔhun,

bónú é ní ma lin ɖɔ émí nyí nǔnywɛ́tɔ́ ó.

 6 Mɛ e sɔ́ xó ɖé d’alɔ mɛ nú xlonɔ é

cí mɛ e já afɔ nú éɖée, bo gblé wǔ éɖée* é ɖɔhun.

 7 Nǔnywɛ́xó e nɔ tɔ́n sín xlonɔ nu mɛ é

cí afɔkponɔ e ɖo tintɔn* wɛ é ɖɔhun.

 8 Susu kpikpa nú xlonɔ cí

awǐnnya bíblá dó klohwán mɛ ɖɔhun.

 9 Nǔnywɛ́xó e nɔ tɔ́n sín xlonɔ nu mɛ é cí

atín wunnɔ e wá xwetɔ́n ɖo ahannumúnɔ sín alɔ mɛ é ɖɔhun.

10 Mɛ e nɔ xáya xlonɔ, alǒ aligbɔntɔ́ lɛ́ é

cí gǎdatɔ́ e nɔ gblé wǔ mɛ ɖěbǔ e jɛ mɛ* é ɖɔhun.

11 Xlonɔ nɔ ɖo xlonɔnú tɔn lɛ́ vɔ́ wa wɛ,

cukú e lɛ́ kɔ yi nǔ e éɖésúnɔ vi é kɔn é ɖɔhun.

13 Fɔnlínnɔ nɔ ɖɔ: “Kinnikínní wínnyáwínnyá ɖo ali jí,

kinnikínní ɖo tokplétɛn!”

14 Fɔnlínnɔ nɔ ɖo aja húzú wɛ ɖo zan tɔn jí,

lěe hɔn nɔ ɖo lǐlɛ́ lílɛ́ wɛ ɖo hɔnsóswé jí gbɔn é.

15 Fɔnlínnɔ sɔ́ alɔ dó nǔɖuká ɖaxó mɛ,

amɔ̌, nǔ ci kɔ n’i sɔmɔ̌ bɔ é sixú lɛ́ kɔ nú alɔ ɔ yi nu ǎ.

16 Fɔnlínnɔ nɔ lin ɖɔ émí nyɔ́nǔi hú

mɛ e ná xósin e nǔnywɛ́ kpé é tɛ́nwe.

17 Aligbɔntɔ́ e sin xomɛ ɖó jlɛ e ma kan ɛ ǎ wú* é

cí mɛ e wlí cukú sín tó é ɖɔhun.

18 Taɖunɔ nɔ da gǎ kpɛví kpɛví myɔnɔ kpó gǎ e nɔ hu mɛ lɛ́ é kpó dó mɛ.

19 Mɛ e nɔ wa nǔ dó nɔzo tɔn wú ɖo ali nyanya nu bo nɔ ɖɔ: “Ayihún da xá ɛ wɛ jɛ́n un ɖe kpowun!” é cí taɖunɔ énɛ́ ɖɔhun.

20 Nakí ma ɖo fí ɖé ǎ ɔ, myɔ nɔ cí,

jidómɛtɔ́ ma ɖo fí ɖé ǎ ɔ, jlɛ nɔ xwɛ.

21 Tagbanɔ nɔ flɔ́ zo dó glɔ̌ nú jlɛɖiɖɔ,

lěe akán nɔ bló nú myɔkán, bɔ nakí nɔ bló nú myɔ gbɔn é ɖɔhun.

22 Jidómɛtɔ́ sín xó cí nǔɖuɖu e dó tɔ́n é* ɖɔhun;

è nɔ mì hlowun, bɔ é nɔ yi tɔ́n ɖo adɔgo mɛ.

23 Xomɛnyínyɔ́xó e nɔ tɔ́n sín mɛdídá sín ayi mɛ é

cí kpatágan e è sá dó kozɛ́n fínfɛ́n é ɖɔhun.

24 Mɛ e nɔ gbɛ́ wǎn nú mɛ ɖěvo lɛ́ é nɔ sɔ́ nufló tɔn lɛ́ dó sɔ́ hwlá,

amɔ̌, mɛblɛ́blɛ́ wɛ kpa azinkpo ɖo ayi tɔn mɛ.

25 É ɖo xó e nyɔ́ se lɛ́ é ɖɔ wɛ có, ma ɖeji dó wǔ tɔn ó,

ɖó nǔ baɖabaɖa tɛ́nwe wɛ ɖo ayi tɔn mɛ.*

26 É nɔ blɛ́ mɛ dó cyɔ́n nǔ dó wǎngbɛ́númɛ tɔn,

amɔ̌, è ná kɔ́n sɛ sín nǔ nyanya e é nɔ wa lɛ́ é jí ɖo togun mɛ.

27 Mɛ e kun do é ná jɛ mɛ,

bɔ mɛ ɖěbǔ e blí awǐnnya ɖé síin é ɔ, awǐnnya ɔ ná lɛ́ kɔ wá gbɔn jǐ tɔn.

28 Ðɛ̌ e nɔ ɖó adingban é nɔ gbɛ́ wǎn nú mɛ ɖěɖěe wú adingban tɔn nɔ wa nǔ dó lɛ́ é,

nu e nɔ klɔ́ mɛ é nɔ sú kún dó nú mɛ.

27 Ma yí nugo ɖó sɔ e ja é wú ó,

ɖó a tuun nǔ e azǎn ɖokpó ɖokpó ná hɛn nu* é ǎ.

 2 Nǔ mɛ ɖěvo* ní kpa susu nú we, ní ma nyí nu hwiɖésúnɔ tɔn ó;

mɛ ɖěvo lɛ́* ní kpa susu nú we, ní ma nyí nufló hwiɖésúnɔ tɔn lɛ́ ó.

 3 Awǐnnya nɔ kpɛn, bɔ kɔ́gúdu lɔ nɔ kpɛn,

amɔ̌, akpɔ e xlonɔ nɔ ɖó nú mɛ é nɔ kpɛn hú we lɛ́ bǐ.

 4 Majijɛ ɔ, nǔ baɖabaɖa wɛ, xomɛsin nɔ hɛn nǔ gblé tɔgbamɛ ɖɔhun.

Mɛ̌ ka sixú dɛ ɖo wǔhwinhwan nu?

 6 Wǔ e xɔ́ntɔn nɔ gblé mɛ lɛ́ é nɔ xlɛ́ gbejíninɔ tɔn,

amɔ̌, si e kɛntɔ́ nɔ kí nú mɛ lɛ́ é nɔ túnflá.*

 7 Mɛ* e gɔ́ xo é nɔ ɖe kɔ dó* wǐin e gosín wǐinkpa mɛ é,

amɔ̌, nǔ e tlɛ vɛ́ é nɔ víví ɖo mɛ* e xovɛ́ ɖo sinsin wɛ é sín nu mɛ.

 8 Mɛ e jɛ zɔ nú xwé tɔn é

cí xɛ e jɛ zɔ nú adɔ̌ tɔn* é ɖɔhun.

 9 Ami kpó zǎlínkpɔ́n kpó nɔ bló bɔ ayi nɔ j’awǎ;

nǔ ɖokpó ɔ wɛ é nɔ nyí, hwenu e xɔ́ntɔn ɖé ɖe wě xá mɛ dó nǔjɔnǔ mɛ* é.

10 Ma jó xɔ́ntɔn towe, alǒ tɔ́ towe sín xɔ́ntɔn dó ó,

ma ka byɔ́ nɔví hwiɖésúnɔ tɔn sín xwégbe gbe e gbe awě xo we é ó.

Nɔzo e sɛkpɔ́ mɛ é kpɔ́n te hú nɔví e ɖo zɔ vwéé é.

11 Vǐ ce, nyɔ̌nǔi, bo hɛn xomɛ ce hun,

bónú má dó sixú ná xósin mɛ e ɖo nǔɖɔ ba mì wɛ é.

12 Mɛ e nɔ nɔ acéjí é nɔ mɔ awǒvinú, bo nɔ hwlá éɖée,

amɔ̌, mɛ e ma mɔ nǔ kpɔ́n ǎ é nɔ kpo ɖo yiyi wɛ, bo nɔ se xɔxɔ tɔn.*

13 Ényí mɛɖé d’akpá ɖɔ émí ná sú axɔ́ e jǒnɔ ɖé ɖu é hǔn, yǐ awu tɔn;

ényí nyɔ̌nu toɖévomɛnu* tamɛ wɛ é d’akpá ɔ dó hǔn, yǐ nǔ e é sɔ́ ɖó gbanu é sín así tɔn.

14 Ényí mɛɖé zé gbe dó jǐ zǎnzǎn tɛɛn, bo byɔ́ nyɔ̌ná nú nɔzo tɔn ɔ,

é ná cí nu wɛ é dó nɔzo ɔ ɖɔhun.

16 Mɛ ɖěbǔ e kpé wú bo ɖó è te é hɛn ɔ, é ná wlí jɔhɔn,

bo wlí ami hɛn dó ɖisílɔ tɔn mɛ.

17 Gan nɔ gan gan,

mɔ̌ ɖokpó ɔ, mɛɖé nɔ d’alɔ xɔ́ntɔn tɔn bɔ é nɔ yi nukɔn.*

18 Mɛ e kpé nukún dó fígitín wú é ná ɖu sínsɛ́n tɔn,

è ná wlí yɛ̌yi nú mɛ e kpé nukún dó gǎn tɔn wú é.

19 Sin nukúnmɛ nɔ ɖe nukúnmɛ mɛtɔn xlɛ́,

mɔ̌ ɖokpó ɔ, ayi mɛɖé tɔn nɔ ɖe mɛ ɖěvo tɔn xlɛ́.

20 Yɔdo* kpó fí e è nɔ sú kún dó nú nǔ ɖe é kpó* nɔ gɔ́ xo gbeɖé ǎ,

mɔ̌ jɛ́n nǔ ma nɔ gɔn gbɛtɔ́ jló gbeɖé ǎ é nɛ́.

21 È nɔ ɖe nǔ kwíji sín kpatágan wú ɖo zɛ̌n mɛ, bo nɔ xo zo dó siká ɖo myɔkpó mɛ,

mɔ̌ ɖokpó ɔ, susu e è nɔ kpa nú mɛɖé é nɔ ɖe mɛ alɔkpa e mɛ ɔ nyí é xlɛ́.*

22 Ényí a tlɛ só xlonɔ kpó tonusú kpó,

lěe è nɔ só nǔkún ɖo to mɛ gbɔn é ɖɔhun ɔ,

xlojijɔ tɔn ná jó è dó ǎ.

Kpé nukún dó lɛ̌ngbɔ́ towe lɛ́ wú ganjí,*

24 ɖó dɔkun nɔ nɔ ayǐ sɔ́yi ǎ,

mɔ̌ jɛ́n axɔ́súgbákún ma nɔ nɔ ayǐ nú jijimɛ lɛ́ bǐ ǎ é nɛ́.

25 Gběhan lɛ́ nɔ mlú ɖa, bɔ gběhan yɔ̌yɔ́ lɛ́ nɔ tɔ́n,

bɔ è nɔ xo gběhan e ɖo só ɖaxó lɛ́ jí é kplé.

26 Agbo wínnyáwínnyá sín fún wɛ nɔ bló awu towe,

gbagbǎ sín akwɛ́ nɔ xɔ gle.

27 A ná ɖó gbɔ̌ sín anɔ̌sin e kpé, bo ná ná nǔɖuɖu hwi

kpó xwédo towe kpó, bo lɛ́ hɛn mɛsɛntɔ́ towe nyɔ̌nu lɛ́ é.

28 Mɛdídá lɛ́ nɔ hɔn, mɛ ɖěbǔ ka nɔ ɖo yě nya wɛ ǎ,

amɔ̌, nǔjlɔ́jlɔ́watɔ́ lɛ́ nɔ gbó adɔ kinnikínní* ɖɔhun.

 2 Ényí sɛ́ngbigba* ɖo to ɖé mɛ ɔ, è nɔ ɖyɔ́ axɔ́ví lɛ́ hwɛhwɛ,

amɔ̌, kpó alɔdó mɛ e ɖó nukúnnúmɔjɛnǔmɛ bo lɛ́ tuun nǔ é tɔn kpó ɔ, axɔ́ví ɖé* ná kpa acɛ nú hwenu línlín.

 3 Wamamɔnɔ e nɔ táfú mɛmaɖómɛɖé é,

cí jǐ e nɔ kplɔ́ nǔɖuɖu bǐ kɔn nyi gbě é ɖɔhun.

 4 Mɛ e ma nɔ xwedó sɛ́n ǎ lɛ́ é nɔ kpa susu nú mɛdídá lɛ́,

amɔ̌, mɛ e nɔ nyi sɛ́n lɛ́ é nɔ sin xomɛ dó yě.

 5 Mɛdídá lɛ́ sixú mɔ nukúnnú jɛ hwɛjijɔ wú ǎ,

amɔ̌, mɛ e nɔ ba Jexóva lɛ́ é sixú mɔ nukúnnú jɛ nǔ bǐ wú.

 6 Wamamɔnɔ e nɔ ɖi zɔnlin kpó gbejíninɔ kpó é,

kpɔ́n te hú dɔkunnɔ e sín ali hízí é.

 7 Vǐ e ɖó nukúnnúmɔjɛnǔmɛ é nɔ nyi sɛ́n,

amɔ̌, mɛ e zun xɔ́ntɔn xá adɔtɔ́nɔ lɛ́ é nɔ kɔ́n tɔ́ tɔn sín wi.

 8 Mɛ e nɔ yí akwɛ́ví, alǒ nɔ ɖu le agɔ ɖo mɛ jí dó jɛ dɔkun dó dɔkun jí é

nɔ kplé ɖ’ayǐ nú mɛ e nɔ kú nǔbláwǔ nú wamamɔnɔ é.

 9 Mɛ e nɔ gbɛ́ sɛ́n nyi é ɔ,

ɖɛ e é tlɛ nɔ xo é nɔ vɛ́ se nú Mawu.

10 Mɛ e dɔn nǔjlɔ́jlɔ́watɔ́ yi ali nyanya jí é ná jɛ do e éɖésúnɔ kun é mɛ,

amɔ̌, mɛ e wú è ma nɔ mɔ nǔɖé ɖɔ dó ǎ é ná ɖu nǔ ɖagbe sín gǔ.

11 Dɔkunnɔ nɔ nyɔ́nǔi ɖo nukún éɖésúnɔ tɔn mɛ,

amɔ̌, wamamɔnɔ e ɖó nukúnnúmɔjɛnǔmɛ é nɔ tuun mɛ e é nyí nǔgbó nǔgbó é.

12 Ényí nǔjlɔ́jlɔ́watɔ́ ɖó ɖuɖéjí ɔ, susu kpikpa ɖaxó nɔ tíin,

amɔ̌, ényí mɛdídá kp’acɛ ɔ, gbɛtɔ́ lɛ́ nɔ hɔn hwlá.

13 Mɛ e nɔ sɔ́ nǔwanyido tɔn lɛ́ hwlá é ɔ, é ná kpa ɛ ǎ,

amɔ̌, è ná kú nǔbláwǔ nú mɛ ɖěbǔ e nɔ ɖɔ nǔwanyido tɔn lɛ́, bo nɔ lɛ́ kɔ sín gúdo é.

14 Awǎjijɛnɔ wɛ nyí mɛ e nɔ ɖo acéjí hwebǐnu é,*

amɔ̌, awě ná xo mɛ ɖěbǔ e nɔ syɛ́n ta é.

15 Mɛdídá e nɔ kp’acɛ dó togun e ma ɖó ɖɔxátɔ́ ǎ é jí é

cí kinnikínní e ɖo gbe dó wɛ, alǒ lɔnmɔ e jɛ ma é ɖɔhun.

16 Nukɔntɔ́ e ma ɖó nukúnnúmɔjɛnǔmɛ ǎ é nɔ zán acɛ tɔn nyi do,

amɔ̌, mɛ e gbɛ́ wǎn nú nǔagɔwiwa dó ɖu le é ná dɔ́ ji.

18 Mɛ e è ma nɔ mɔ nǔɖé ɖɔ dó nǔwalɔ tɔn wú ǎ é ɔ, è ná hwlɛ́n ɛ gán,

amɔ̌, mɛ e sín ali gɔ́ndɔ́n é ná j’ayǐ ajijimɛ.

19 Mɛ e nɔ lɛ gle tɔn é ná ɖó nǔɖuɖu kpɔ́ gégé,

amɔ̌, mɛ e nɔ nya nǔ maɖótaɖé lɛ́ gbé é ná ji ya bo gbɛ́.

20 Mɛ e ɖo gbejí é ná mɔ nyɔ̌ná gěgé yí,

amɔ̌, mɛ e ɖo hwlɛndó jí bá jɛ dɔkun é ná nɔ xomɛvɔ́ ǎ.

21 É nyɔ́ bónú è ná ɖe mɛɖé ɖó vo ɖo mɛɖé mɛ ǎ;

amɔ̌, mɛɖé sixú wa nǔ nyanya ɖó wɔ̌xúxú fínfɛ́n ɖokpó wú.

22 Akpakpa nɔ sɔ́ mɛnújlótɔ́* dó dɔkun jijɛ wú,

é ka tuun ɖɔ ya wɛ ná vun blá émí ǎ.

23 Mɛ ɖěbǔ e kɛ nu dó nǔ wú nú mɛɖé é ná wá mɔ fɛ́nú

hú mɛ e nɔ zán ɖɛ̌ tɔn dó klɔ́ mɛ é.

25 Mɛ e nɔ dó nukúnkɛn é* nɔ dɔn kínklán wá,

amɔ̌, mɛ ɖěbǔ e ɖeji dó Jexóva wú é ná ɖó nukɔnyiyi.*

26 Mɛ ɖěbǔ e ɖeji dó ayi éɖésúnɔ tɔn wú é ɔ, xlonɔ wɛ n’i,

amɔ̌, mɛ e nɔ ɖi zɔnlin kpó nǔnywɛ́ kpó é ná gán.

27 Mɛ ɖěbǔ e nɔ ná nǔ wamamɔnɔ lɛ́ é ɔ, nǔ ɖě ná hwedó è ǎ,

amɔ̌, mɛ e ma nɔ d’alɔ yě ǎ é ɔ, nu gěgé wɛ è ná dó è.

28 Ényí mɛdídá kpa acɛ ɔ, gbɛtɔ́ nɔ hwlá éɖée,

amɔ̌, ényí kún tɔn sú dó ɔ, nǔjlɔ́jlɔ́watɔ́ sín kɛ́n nɔ jɛjí.

29 Mɛ e è kɛ nu dó nǔ wú ná azɔn mɔ̌kpán, bɔ é ka fɔ́n ɔ, ta syɛ́n wɛ jɛ́n é nɔ ɖe é ɔ,

è ná gba ɛ hánnyá ajijimɛ, bɔ ɖěwagbɛn ná hán.

 2 Ényí nǔjlɔ́jlɔ́watɔ́ sukpɔ́ ɔ, togun ɔ nɔ j’awǎ,

amɔ̌, ényí mɛdídá kpa acɛ ɔ, togun ɔ nɔ wɛn azɔn.

 3 Mɛ e yí wǎn nú nǔnywɛ́ é nɔ hɛn tɔ́ tɔn sín xomɛ hun,

amɔ̌, mɛ e nɔ dó gbɛ̌ xá tonyatɔ́ lɛ́ é nɔ hɛn dɔkun tɔn fun.

 4 Axɔ́sú ɖé nɔ bló bɔ to tɔn nɔ lí dǒ gbɔn hwɛjijɔ gblamɛ,

amɔ̌, mɛ e nɔ ba ná ɖu nǔ ɖo nǔ mɛ é nɔ sú kún dó nú to tɔn.

 5 Mɛ e nɔ klɔ́ nɔzo tɔn é

ɖo ɖɔ nyi dó afɔ n’i wɛ.

 6 Nǔwanyido mɛ nyanya tɔn wɛ nɔ nyí mɔ n’i,

amɔ̌, nǔjlɔ́jlɔ́watɔ́ nɔ sú xó kpó awǎjijɛ kpó, bo nɔ j’awǎ.

 7 Acɛ e wamamɔnɔ ɖó é nɔ ɖu ayi mɛ nú nǔjlɔ́jlɔ́watɔ́,

amɔ̌, énɛ́ nɔ ɖu ayi mɛ nú mɛdídá ǎ.

 8 Mɛ e nɔ yí nugo lɛ́ é nɔ dó toxo zo,

amɔ̌, mɛ e nyí nǔnywɛ́tɔ́ lɛ́ é nɔ lílɛ́ jɔ nú xomɛsin.

 9 Ényí nǔnywɛ́tɔ́ dɔn nǔ xá xlonɔ ɔ,

xósúsú kpó mɛcáko kpó nɔ tíin, amɔ̌, é nɔ ná nǔ ɖagbe ɖě ǎ.

10 Mɛ e hun kinkɔn nyi ayǐ sín kɔ nɔ xú lɛ́ é nɔ gbɛ́ wǎn nú xomɛvɔ́nɔ,*

bɔ yě nɔ ba ná gblé gbɛ dó nú nǔjlɔ́jlɔ́watɔ́.*

11 Xlonɔ nɔ ɖe lěe nǔ cí n’i é* bǐ xlɛ́,

amɔ̌, nǔnywɛ́tɔ́ nɔ cí xwíí, bo nɔ ɖu ɖo lěe nǔ cí n’i é jí.

12 Ényí acɛkpatɔ́ ɖé nɔ wlí tó adingban wú ɔ,

mɛsɛntɔ́ tɔn lɛ́ bǐ ná húzú mɛdídá.

14 Nú axɔ́sú ɖé nɔ ɖɔ hwɛ jlɔ́jlɔ́ nú wamamɔnɔ ɔ,

axɔ́súzinkpo tɔn ná lí dǒ káká sɔ́yi.

15 Bǎ* kpó nukɛdónǔwúnúmɛ kpó nɔ zɔ́n bɔ è nɔ ɖó nǔnywɛ́,

amɔ̌, vǐ e è jó dó nyi gbawunjo mɛ é nɔ dó winnyá nɔ tɔn.

16 Ényí mɛdídá lɛ́ ɖo kpɔ́ su wɛ ɔ, nǔwanyido nɔ ɖo jijɛjí wɛ,

amɔ̌, nǔjlɔ́jlɔ́watɔ́ lɛ́ ná mɔ ayǐjijɛ yětɔn.

17 Kplɔ́n vǐ towe, énɛ́ ɔ, é ná ná gbɔjɛ we;

é ná bló bɔ a* ná ɖó awǎjijɛ ɖaxó.

18 Fí e nǔmimɔ* ɖě ma ɖe ǎ é ɔ, gbɛtɔ́ lɛ́ nɔ nɔ gbawunjo mɛ,

amɔ̌, awǎjijɛnɔ wɛ nyí mɛ ɖěɖěe nɔ xwedó sɛ́n lɛ́ é.

19 Mɛsɛntɔ́ ɖé ná lɔn nú è ná sɔ́ xó dó dɔn tó n’i ǎ,

ɖó é nɔ mɔ nukúnnú jɛ mɛ có, é nɔ se tónú ǎ.

21 Ényí è bóɖó* mɛsɛntɔ́ ɖé sín vǔ ɔ,

é nɔ húzú ɖumakpamɛsi ɖo nukɔnmɛ.

22 Mɛ e nɔ yá wǔ sin xomɛ é nɔ fɔ́n jlɛ dó jǐ;

mɛ ɖěbǔ e nɔ yá wǔ jɛ ma é nɔ wa nǔ gěgé nyi do.

23 Goyíyí mɛɖé tɔn ná zin i dó do,

amɔ̌, è ná kpa susu nú mɛ ɖěbǔ e nɔ sɔ́ éɖée hwe é.

25 Sísɔ́sísɔ́ ɖo gbɛtɔ́ nukɔn* ɔ, mɔ wɛ,*

amɔ̌, è ná nya xɛ ɖo mɛ e nɔ ɖeji dó Jexóva wú é jí.

26 Mɛ gěgé nɔ ba ɖɔ acɛkpatɔ́ ɖé ní yí émí,*

amɔ̌, Jexóva wɛ nɔ ɖɔ hwɛ jlɔ́jlɔ́ nú gbɛtɔ́.

27 Nǔagɔwatɔ́ nɔ vɛ́ mɔ nú nǔjlɔ́jlɔ́watɔ́,

amɔ̌, mɛ e sín ali jlɔ́ é nɔ vɛ́ mɔ nú mɛdídá.

 2 Un ɖo vi mɛ hú mɛ ɖěvo ɖěbǔ,

nukúnnúmɔjɛnǔmɛ e gbɛtɔ́ ɖó ná ɖó é hwedó mì.

 3 Un kplɔ́n nǔ e nǔnywɛ́ nyí é ǎ,

un ka tuun nǔ e Mɛ e mɛ́ bɔ nǔ bǐ vɔ ɖ’é wú é tuun é ǎ.

 6 Ma gɔ́ nǔ ɖěbǔ nú xó tɔn lɛ́ ó,

é ma nyí mɔ̌ ǎ ɔ, é ná kɛ nu dó nǔ wú nú we,

bɔ a ná nyí adingbannɔ.

Nɔ ná nǔɖuɖu e ná kpé mì é mì kpowun,

 9 bónú un ma wá gɔ́ xo, bo gbɛ́ we, lobo ɖɔ: “Mɛ̌ ka nyí Jexóva?” ó.

10 Ma dó ji mɛsɛntɔ́ ɖo gǎn tɔn gɔ́n ó,

é ma nyí mɔ̌ ǎ ɔ, é sixú dó nu we, bɔ a ná kú hwɛ.

11 Jijimɛ ɖé tíin, bo nɔ dó nu tɔ́ yětɔn,

lobo nɔ byɔ́ nyɔ̌ná nú nɔ yětɔn ǎ.

12 Jijimɛ ɖé tíin, bo nɔ mɔ ɖɔ émí nyí mɛ mímɛ́,

amɔ̌, è ko ɖe nǔ kwíji* sín wǔtu tɔn ǎ.

13 Jijimɛ ɖé tíin bo ɖó nukún goyíyí tɔn,

lobo nɔ hu tɛ́ nú mɛ ɖěvo lɛ́.

14 Jijimɛ ɖé tíin, bɔ aɖǔ yětɔn nyí hwǐ,

bɔ aglan yětɔn nyí jivǐ e nɔ hu nǔ é;

yě nɔ vúnvún mɛmaɖómɛɖé e ɖo ayǐkúngban ɔ jí lɛ́ é,

bo nɔ vúnvún wamamɔnɔ sín gbɛtɔ́ lɛ́ mɛ.

Nǔ atɔn tíin bo nɔ gɔ́ xo ǎ,

ɛɛn, nǔ ɛnɛ, bo nɔ ɖɔ gbeɖé ɖɔ: “É kpé!” ǎ.

16 Nǔ énɛ́ lɛ́ wɛ nyí Yɔdo,* nyɔ̌nu wɛnsinɔ,

ayǐkúngban e ba sin kpo é,

kpó myɔ e ma nɔ ɖɔ: “É kpé!” gbeɖé ǎ é kpó.

17 Mɛ e nɔ cá nú tɔ́ tɔn, bo ma nɔ ké ya nú tónú sise nú nɔ tɔn ǎ é ɔ,

avǔnsákɔwó tɔdo* mɛ tɔn lɛ́ ná lyɔ́ nukún tɔn,

bɔ hɔ̌n wínnyáwínnyá lɛ́ ná ɖu i.

18 Nǔ atɔn tíin, bo zɛ nukúnnúmɔjɛnǔmɛ ce wú,*

ɛɛn, nǔ ɛnɛ, bɔ un tuun do yětɔn ǎ:

19 Ali e hɔ̌n e ɖo zinzɔn gbɔn jǐnukúnsin wɛ é nɔ gbɔn é,

ali e dan e ɖo awǐnnya jí gbɔn wɛ é nɔ gbɔn é,

ali e tɔjíhún e ɖo yiyi wɛ ɖo xu faɖaɖa jí é nɔ gbɔn é,

kpó lěe súnnu ɖé nɔ wa nǔ gbɔn, hwenu e é ɖo ɖyɔ̌vǐ ɖé gúdo é kpó.

É nɔ ɖu nǔ, bo nɔ súnsún nu;

énɛ́ gúdo ɔ, é nɔ ɖɔ: “Un wa nǔ ɖě gbɔ ǎ.”

21 Nǔ atɔn tíin, bo nɔ húnhún ayǐkúngban ɔ,

ɛɛn, nǔ ɛnɛ, bɔ gbɛtɔ́ nɔ sixú dɛ ɖ’é nu ǎ:

22 Hwenu e kannumɔ húzú axɔ́sú é,

hwenu e xlonɔ ɖu nǔ dín é,

23 hwenu e è sɔ́ nyɔ̌nu e è gbɛ́ wǎn ná é* dó ɖó asi é,

kpó hwenu e mɛsɛntɔ́ nyɔ̌nu yí gǎn tɔn nyɔ̌nu sín tɛnmɛ* é kpó.

24 Nǔ ɛnɛ tíin ɖo ayǐkúngban jí, bo ɖo nǔ e hwe hú gǎn lɛ́ é mɛ,

amɔ̌, yě ɖó nǔnywɛ́ ɖo jɔwámɔ linu:*

25 Ayǐsínzɛn lɛ́ nyí nǔɖíɖó hlɔ̌nhlɔ́nnɔ lɛ́ ǎ,*

é ɖo mɔ̌ có, yě nɔ sɔ́ nǔ nú nǔɖuɖu yětɔn ɖo yǒzohwenu.

26 Agidigbǎnwún lɛ́ ɖó hlɔ̌nhlɔ́n sɔmɔ̌ ǎ,*

é ɖo mɔ̌ có, yě nɔ wa xwé nyi sókan mɛ.

27 Bɔkle lɛ́ ɖó axɔ́sú ǎ,

é ɖo mɔ̌ có, yě bǐ nɔ ɖo tuto jí,* bo nɔ ɖo yiyi wɛ.

28 Nyɔxwenyɔxwe nɔ fán nǔ kpó afɔ tɔn lɛ́ kpó,

bo nɔ yi axɔ́sú sín hɔnmɛ.

29 Nǔ atɔn tíin bɔ ényí yě ɖo zɔnlin ɖi wɛ ɔ, é nɔ jí wǔ,

ɛɛn, nǔ ɛnɛ, bɔ ényí yě ɖo yiyi wɛ ɔ, é nɔ jí wǔ. Yě wɛ nyí:

30 Kinnikínní, é wɛ ɖó hlɔ̌nhlɔ́n hú gǎn ɖo kanlin lɛ́ mɛ,

é nɔ jó agɔ yi gǔdo ɖo mɛ ɖěbǔ nukɔn ǎ;

31 cukú; gbɔ̌sú;

kpó axɔ́sú e ahwankpá tɔn ɖo kpɔ́ xá ɛ é kpó.

32 Ényí xlojijɔ zɔ́n bónú a sɔ́ hwiɖée su,

alǒ, ényí a ɖo tuto bló wɛ bo ná wa mɔ̌ hǔn,

sú alɔ nu.

33 Ðó ényí è xo anɔ̌sin ɔ, é nɔ ná bɔ̌ta,

ényí è dó nǔ awɔntín jí ɔ, hun nɔ tɔ́n,

mɔ̌ ɖokpó ɔ, xomɛsin fɔ́n dó jǐ nɔ dɔn jlɛ wá.

 2 Vǐ ce, étɛ́ un ka ɖó ná ɖɔ nú we?

Xo ce mɛ ví, étɛ́ un ka ɖó ná ɖɔ nú we?

Vǐ e un dó akpá bo ji é, étɛ́ un ka ɖó ná ɖɔ?

 3 Ma zán hlɔ̌nhlɔ́n towe dó nyɔ̌nu lɛ́ wú ó,

ma mlɛ́ ali ɖěɖěe nɔ sú kún dó nú axɔ́sú lɛ́ é ó.

 4 Lemuwɛ́li è, axɔ́sú lɛ́ ɖó ná nu vɛ̌ɛn ǎ,

ɛɛn, é nyí axɔ́sú lɛ́ ǎ,

acɛkpatɔ́ lɛ́ ɖó ná ɖɔ: “Fítɛ́ ahan ce ka ɖe?” ǎ.

 5 É ma nyí mɔ̌ ǎ ɔ, yě ná nu ahan bo ná wɔn gbetakɛ́n e è ɖe tɔ́n é,

lobo ná t’afɔ acɛ e mɛmaɖómɛɖé lɛ́ ɖó lɛ́ é jí.

 6 Nǎ ahan syɛ́nsyɛ́n mɛ e ɖo dindɔn wɛ lɛ́ é,

bo ná vɛ̌ɛn mɛ e ɖo wǔvɛ́ syɛ́nsyɛ́n mɛ lɛ́ é.

 7 Yě ní nu bo wɔn ya yětɔn;

yě ní ma sɔ́ flín tagba yětɔn ɖě ó.

 8 Ðɔ xó dó ɖɛ̌kúnánɔ lɛ́* tamɛ;

jɛ hun dó mɛ e ɖo dindɔn wɛ lɛ́ é bǐ sín acɛ jí.

 9 Ðɔ xó bo ɖɔ hwɛ jlɔ́jlɔ́;

jɛ hun dó mɛmaɖómɛɖé lɛ́ kpó wamamɔnɔ lɛ́ kpó sín acɛ jí.*

11 Asú tɔn nɔ ɖeji dó wǔ tɔn sín ayi mɛ,

nǔ xɔ akwɛ́ ɖěbǔ nɔ hwedó asú tɔn ǎ.

12 Ðo gbɛzán tɔn sín azǎn lɛ́ bǐ jí ɔ,

é nɔ sɔ́ nǔ ɖagbe dó dó ajɔ asú tɔn, é nyí nǔ nyanya ǎ.

13 É nɔ xɔ lɛ̌ngbɔ́fún kpó lɛ̌ɛnkanvɔ kpó;

alɔ tɔn lɛ́ zínzán dó w’azɔ̌ nɔ hun xomɛ n’i.

14 É cí ajɔ̌tɔ́ sín tɔjíhún lɛ́ ɖɔhun,

é nɔ hɛn nǔɖuɖu tɔn sín fí línlín.

15 É nɔ fɔ́n hwenu e ablu kpo ɖo te é,

é nɔ ná nǔɖuɖu xwédo tɔn,

bo nɔ ná nǔɖuɖu* mɛsɛntɔ́ tɔn nyɔ̌nu lɛ́.

16 É sɔ́ ayi tɔn ɖó gle ɖé jí bo xɔ;

é tun vǐwungbo, gbɔn azɔ̌ syɛ́nsyɛ́n e éɖésúnɔ wa lɛ́ é* gblamɛ.

17 É nɔ sɔ́ nǔ nú éɖée bo ná wa azɔ̌ syɛ́nsyɛ́n,

é nɔ ná hlɔ̌nhlɔ́n awa tɔn lɛ́.

18 É nɔ mɔ ɖɔ ajɔ̌ émítɔn ɖo le hɛn wá wɛ;

zogbɛ́n tɔn nɔ cí zǎnmɛ ǎ.

19 É nɔ sɔ́ alɔ tɔn lɛ́ dó sɔ́ kpo e nɔ lɔn avɔ é,

bo nɔ sɔ́ alɔ tɔn lɛ́ dó hɛn avɔlɔnnú.

20 É nɔ dlɛ́n alɔ tɔn bo nɔ d’alɔ mɛmaɖómɛɖé,

é nɔ hun alɔ tɔn lɛ́ nú wamamɔnɔ.

21 Ado nɔ hu i dó xwédo tɔn wú, ɖó laglási linfín ɖo jija wɛ wú ǎ,

ɖó xwédo tɔn blěbú wɛ dó awu e nɔ glɔ́n jɔhɔn lɛ́ é.*

23 È tuun asú tɔn ganjí ɖo hɔntogbó toxo ɔ tɔn lɛ́ ta,

fí e é nɔ jínjɔ́n tomɛxó lɛ́ tɛ́ntin ɖe é.

24 É nɔ bló awu* e è sɔ́ lɛ̌ɛnkanvɔ dó lɔn ná lɛ́ é bo nɔ sa,

é nɔ sa gǒjíblánú nú ajɔ̌tɔ́ lɛ́.

25 Hlɔ̌nhlɔ́n kpó susu kpó nyí acɔ́ɖónú tɔn,

é nɔ kpɔ́n sɔgúdo sɛ́dó kpó jiɖiɖe kpó.*

26 É hun nu ɔ, nǔnywɛ́ nɔ tɔ́n sín mɛ;

xomɛnyínyɔ́ sín sɛ́n* ɖo ɖɛ̌ tɔn ta.

27 É nɔ kpé nukún dó xwédo tɔn sín azɔ̌ lɛ́ wú,

é nɔ ɖi fɔnlín ɖěbǔ ǎ.

28 Vǐ tɔn lɛ́ nɔ fɔ́n bo nɔ ɖɔ ɖɔ awǎjijɛnɔ wɛ n’i;

asú tɔn nɔ fɔ́n bo nɔ kpa susu n’i.

29 Nyɔ̌nu jɔ nyɔ̌nu* gěgé wɛ tíin,

amɔ̌ hwɛ ɔ, a zɛ yě bǐ wú.

30 Nǔ e dɔn mɛ é sixú nyí mɛblɛ́blɛ́ tɔn, bɔ ɖɛkpɛ sixú wá cá,*

amɔ̌, è ná kpa susu nú nyɔ̌nu e nɔ ɖó sísí e gɔ́ngɔ́n é nú Jexóva é.

31 Nǎ nǔ e é wa lɛ́ é sín ajɔ ɛ,*

azɔ̌ tɔn lɛ́ ní kpa susu n’i ɖo hɔntogbó toxo ɔ tɔn lɛ́ ta.