NǓNYWƐ́TƆ́XÓ

1 Xó e nǔkplɔ́nmɛtɔ́,* éé nyí Davídi ví, bo nyí axɔ́sú ɖo Jeluzalɛ́mu é ɖɔ lɛ́ é ɖíe:

 7 Tɔsisa lɛ́* bǐ wɛ nɔ sa kɔn nyi xu mɛ, é ɖo mɔ̌ có, xu ɔ gɔ́ gbeɖé ǎ.

Tɔsisa lɛ́ nɔ lɛ́ kɔ yi fí e yě sa sín é, bo ná dó sixú lɛ́ sa ɖěvo.

10 Nǔɖé ka ɖe bɔ mɛɖé sixú ɖɔ d’é wú ɖɔ: “Kpɔ́n nǔ élɔ́, nǔ yɔ̌yɔ́ wɛ” a?

12 Nyɛ nǔkplɔ́nmɛtɔ́ ɔ nyí axɔ́sú Izlayɛ́li tɔn kpɔ́n ɖo Jeluzalɛ́mu. 13 Un dó gǎn kpó ayi ce bǐ kpó, bo ná kplɔ́n nǔ e è wa ɖo hwe glɔ́ fí lɛ́ é bǐ, bo gbéjé yě kpɔ́n kpó nǔnywɛ́ kpó; un ba do nú azɔ̌ e nɔ ɖ’akpɔ nú mɛ, bɔ Mawu sɔ́ d’así nú gbɛtɔ́ lɛ́ dó hɛn alɔnu yětɔn ján lɛ́ é.

16 Énɛ́ gúdo ɔ, un ɖɔ dó ayi mɛ ɖɔ: “Un tɛ́n kpɔ́n bo ɖó nǔnywɛ́ hú mɛ e jɛ nukɔn nú mì ɖo Jeluzalɛ́mu lɛ́ é bǐ, bɔ nǔnywɛ́ kpó nǔtuuntuun kpó túnflá ɖo ayi ce mɛ.” 17 Un dó gǎn kpó ayi ce bǐ kpó bo ná mɔ nukúnnú jɛ nǔnywɛ́, taɖu* kpó xlojijɔ kpó mɛ; énɛ́ lɔ ɔ, wezun kán ɖo jɔhɔn gúdo wɛ.

2 Énɛ́ gúdo ɔ, un ɖɔ dó ayi mɛ ɖɔ: “Wǎ bo tɛ́n gbɛɖuɖu* kpɔ́n, lobo kpɔ́n nǔ ɖagbe e ná tɔ́n sín mɛ é.” Amɔ̌, énɛ́ lɔ ɔ, nǔ yǎyá wɛ.

 2 Un ɖɔ dó nǔkiko wú ɖɔ: “Taɖu wɛ!”

Bo ɖɔ dó gbɛɖuɖu* wú ɖɔ: “Étɛ́ è ka ná sɔ́ dó wa?”

3 Un jó nyiɖée dó nú vɛ̌ɛn dó gbéjé nǔ kpɔ́n kpó ayi ce kpó; un ɖo nunu wɛ có, nǔnywɛ́ kpo ɖo ali xlɛ́ mì wɛ; un tlɛ jó nyiɖée dó nú xlojijɔ bo ná mɔ do nú nǔ e nyɔ́ hú gǎn ɖɔ gbɛtɔ́ lɛ́ ní wa, ɖo azǎn kpɛ e yě nɔ nɔ gbɛ xɔ ɖo hwe glɔ́ é vlamɛ é. 4 Un dó azɔ̌ ɖaxó ɖaxó lɛ́ sin. Un gbá xwé nyiɖésúnɔ tɔn lɛ́; un tun vǐwuntín nyiɖésúnɔ tɔn lɛ́. 5 Un bló jikpá nyiɖésúnɔ tɔn lɛ́, kpɛví kpó ɖaxó kpó, bo tun atínsínsɛ́n alɔkpa lɛ́ bǐ dó yě mɛ. 6 Un kun sindo nyiɖésúnɔ tɔn lɛ́, bo ná dó hú sin nú atínvú e ɖo gle* ce mɛ lɛ́ é. 7 Un tɛ́n kpɔ́n bo ɖó mɛsɛntɔ́ súnnu kpó nyɔ̌nu kpó, bo lɛ́ ɖó mɛsɛntɔ́ e è ji ɖo xwé ce gbe lɛ́ é.* Un lɛ́ tɛ́n kpɔ́n bo ɖó kanlinhwan gěgé, nyibú kpó gbɔ̌ kpó, hú mɛ ɖěbǔ e jɛ nukɔn nú mì ɖo Jeluzalɛ́mu lɛ́ é. 8 Un xo kpatágan kpó siká kpó kplé nú nyiɖésúnɔ, bo xo dɔkun* axɔ́sú lɛ́ tɔn kpó tokpɔn lɛ́ tɔn kpó kplé. Un xo hanjitɔ́ súnnu kpó nyɔ̌nu kpó kplé nú nyiɖésúnɔ, gɔ́ nú nǔ e nɔ ná awǎjijɛ ɖaxó súnnu lɛ́ é: nyɔ̌nu, ɛɛn, nyɔ̌nu gěgé.* 9 Énɛ́ ɔ, un ɖó nǔ tawun bo hú gǎn mɛ e jɛ nukɔn nú mì ɖo Jeluzalɛ́mu lɛ́ é bǐ. Bɔ nǔnywɛ́ kpo ɖo ali xlɛ́ mì wɛ.

10 Nǔ ɖěbǔ jló mì ɔ,* un nɔ gbɛ́ nú nyiɖée ǎ. Un tɛ gbɛɖuɖu* alɔkpa ɖěbǔ ayi ce ǎ, ɖó azɔ̌ syɛ́nsyɛ́n e un wa lɛ́ é bǐ zɔ́n bɔ ayi ce j’awǎ; bɔ énɛ́ wɛ nyí azɔ̌ syɛ́nsyɛ́n e un wa lɛ́ é bǐ sín ajɔ. 11 Amɔ̌, ée un lin tamɛ dó azɔ̌ e un sɔ́ alɔ nyiɖésúnɔ tɔn dó wa lɛ́ é bǐ kpó azɔ̌ syɛ́nsyɛ́n e un jɛ tagba bo wa lɛ́ é bǐ kpó jí é ɔ, un mɔ ɖɔ nǔ bǐ wɛ nyí nǔ yǎyá, bo nyí wezun kán ɖo jɔhɔn gúdo; nǔ ɖě ɖo hwe glɔ́ bo xɔ akwɛ́ lě tawun* ǎ.

12 Énɛ́ gúdo ɔ, un sɔ́ ayi ce ɖó nǔnywɛ́, taɖu kpó xlojijɔ kpó jí. (Ðó étɛ́ mɛɖé sixú wa, bɔ axɔ́sú ɔ ma ko wa kpɔ́n ǎ? Nǔ e è ko wa kpɔ́n é jɛ́n é ná nyí.) 13 Bɔ un mɔ ɖɔ nǔnywɛ́ ɖó le hú xlojijɔ, lěe wěziza ɖó le hú ablu gbɔn é ɖɔhun.

14 Nǔnywɛ́tɔ́ sín nukún nɔ ɖo ta tɔn wú;* amɔ̌, xlonɔ nɔ ɖo zɔnlin ɖi wɛ ɖo ablu mɛ. Un lɛ́ wá mɔ ɖɔ nǔ ɖokpó ɔ wɛ nɔ gbo yě bǐ.* 15 Énɛ́ gúdo ɔ, un ɖɔ dó ayi mɛ ɖɔ: “Nǔ e gbo xlonɔ é ná gbo nyi lɔ.” Hǔn, le tɛ́ ka ɖo nǔnywɛ́tɔ́ nyínyí zɛ xwé wú mɛ nú mì? Énɛ́ wú ɔ, un ɖɔ dó ayi mɛ ɖɔ: “Énɛ́ lɔ ɔ, nǔ yǎyá wɛ.” 16 Ðó è ná flín nǔnywɛ́tɔ́, alǒ xlonɔ káká sɔ́yi ǎ. Azǎn e ja lɛ́ é gbe ɔ, mɛ lɛ́ bǐ wɛ è ná wɔn. Bɔ nɛ̌ nǔnywɛ́tɔ́ ka ná kú gbɔn? É ná kú lěe xlonɔ nɔ kú gbɔn é.

17 Énɛ́ wú ɔ, un wá gbɛ́ wǎn nú gbɛ, ɖó nǔ e è nɔ wa ɖo hwe glɔ́ lɛ́ é bǐ nɔ ɖó akpɔ nú mì, nǔ bǐ wɛ nyí nǔ yǎyá, bo nyí wezun kán ɖo jɔhɔn gúdo. 18 Un wá gbɛ́ wǎn nú nǔ e un w’azɔ̌ syɛ́nsyɛ́n ɖo hwe glɔ́ bo mɔ lɛ́ é bǐ, ɖó un ná wá jó yě dó nú mɛ e ná jɛ tɛn ce mɛ é. 19 Mɛ̌ ka tuun nú é ná nyɔ́nǔi, alǒ jɔ xlo? É ka ná wá ɖó acɛ dó nǔ e un zán hlɔ̌nhlɔ́n ɖaxó kpó nǔnywɛ́ kpó, bo tɛ́n kpɔ́n bo ɖó ɖo hwe glɔ́ lɛ́ é bǐ jí. Énɛ́ lɔ ɔ, nǔ yǎyá wɛ. 20 Énɛ́ wú ɔ, un flú ɖo ayi mɛ, ɖó azɔ̌ syɛ́nsyɛ́n e un jɛ tagba bo wa ɖo hwe glɔ́ lɛ́ é bǐ wú. 21 Ðó nǔnywɛ́, nǔtuuntuun kpó azɔ̌tuuntuun kpó sixú xlɛ́ ali mɛɖé bɔ é ná wa azɔ̌ syɛ́nsyɛ́n, amɔ̌, é ná jó kanta tɔn dó* nú mɛ e ma w’azɔ̌ ɖě dó takún tɔn mɛ ǎ é. Énɛ́ lɔ ɔ, nǔ yǎyá wɛ, bo nyí awě ɖaxó.

22 Azɔ̌ syɛ́nsyɛ́n e mɛɖé nɔ wa lɛ́ é bǐ, gɔ́ nú jlǒ e nɔ sísɛ́ ɛ* bɔ é nɔ w’azɔ̌ syɛ́nsyɛ́n ɖo hwe glɔ́ é ɔ, étɛ́ é ka ná mɔ ɖ’é mɛ tawun? 23 Ðó ɖo azǎn tɔn lɛ́ bǐ gbe ɔ, wǔvɛ́ kpó akpɔ kpó wɛ azɔ̌ tɔn nɔ hɛn wá; é ná bo tlɛ nyí ɖo zǎnmɛ ɔ, ayi tɔn nɔ gbɔjɛ ǎ. Énɛ́ lɔ ɔ, nǔ yǎyá wɛ.

24 Nǔ ɖě sɔ́ nyɔ́ hú ɖɔ gbɛtɔ́ ní ɖu nǔ, nu ahan, bo mɔ awǎjijɛ* ɖo azɔ̌ syɛ́nsyɛ́n e é wa é mɛ ǎ. Énɛ́ lɔ ɔ, un mɔ ɖɔ Mawu nǔgbó ɔ sín alɔ mɛ wɛ é ɖe. 25 Ðó mɛ̌ ka ɖu nǔɖuɖu e nyɔ́ hú gǎn lɛ́ é, bo nu ahan e nyɔ́ hú gǎn lɛ́ é hú mì?

26 Mawu nǔgbó ɔ nɔ ná nǔnywɛ́, nǔtuuntuun kpó awǎjijɛ kpó mɛ e sín nǔ nyɔ́ nukún tɔn mɛ é, amɔ̌, hwɛhutɔ́ ɔ, é nɔ zɔ́n ɛ ɖɔ é ní xo nǔ kplé bo bɛ́ ɖó sɛxwetɛn, bónú è ná ná mɛ e sín nǔ nyɔ́ nukún tɔn mɛ é. Énɛ́ lɔ ɔ, nǔ yǎyá wɛ, bo nyí wezun kán ɖo jɔhɔn gúdo.

9 Étɛ́ azɔ̌watɔ́ ka nɔ mɔ ɖo gǎn e é nɔ dó lɛ́ é bǐ mɛ? 10 Un mɔ azɔ̌ e Mawu sɔ́ dó así nú gbɛtɔ́ lɛ́, bo ná dó hɛn alɔnu yětɔn ján lɛ́ é. 11 É bló nǔ lɛ́ bǐ bɔ yě nyɔ́ kpɔ́n,* bo lɛ́ bló yě dó hwetɔnnu. É tlɛ sɔ́ jlǒ gbɛ ninɔ káká sɔ́yi tɔn* dó ayi mɛ nú gbɛtɔ́ lɛ́; é ɖo mɔ̌ có, yě ná tuun azɔ̌ e Mawu nǔgbó ɔ wa sín bǐbɛ́mɛ yi vivɔnu é sín do gbeɖé ǎ.

12 Un wá mɔ nǔ jɛ wú ɖɔ nǔ ɖě kún sɔ́ nyɔ́ nú yě hú gǎn ɖɔ yě ní j’awǎ, bo wa nǔ ɖagbe ɖo gbɛhwenu yětɔn ó, 13 gɔ́ ná ɔ, mɛ ɖokpó ɖokpó ɖó ná ɖu nǔ, bo nu ahan, lobo mɔ awǎjijɛ ɖo azɔ̌ syɛ́nsyɛ́n e é nɔ wa é bǐ mɛ. Nǔníná Mawu tɔn wɛ.

14 Un wá tuun ɖɔ nǔ e Mawu nǔgbó ɔ bló lɛ́ é bǐ ná nɔ ayǐ káká sɔ́yi. Nǔ ɖě ɖe bɔ è ná d’é jí ǎ, nǔ ɖě ka lɛ́ ɖe bɔ è ná ɖe sín mɛ ǎ. Mawu nǔgbó ɔ bló nǔ lɛ́ bǐ gbɔn mɔ̌, bónú gbɛtɔ́ lɛ́ ní ɖó sísí e gɔ́ngɔ́n é n’i.

15 Nǔ ɖěbǔ e ɖo jijɛ wɛ é ko jɛ kpɔ́n, nǔ e ná wá tíin é ko tíin kpɔ́n; amɔ̌, nǔ e gbé gbɛtɔ́ lɛ́ nya é* wɛ Mawu nǔgbó ɔ nɔ yi ba.

16 Un lɛ́ mɔ nǔ élɔ́ ɖo hwe glɔ́: fí e hwɛjijɔ ɖó ná ɖe é ɔ, nǔnyanyawiwa wɛ ɖo fínɛ́, bɔ fí e nǔjlɔ́jlɔ́wiwa ɖó ná ɖe é ɔ, nǔnyanyawiwa wɛ ɖo fínɛ́. 17 Énɛ́ wú ɔ, un ɖɔ dó ayi mɛ ɖɔ: “Mawu nǔgbó ɔ ná ɖɔ hwɛ xá nǔjlɔ́jlɔ́watɔ́ kpó mɛdídá kpó bǐ, ɖó hwenu e è ná w’azɔ̌ ɖokpó ɖokpó, alǒ nǔ ɖokpó ɖokpó dó é ɖe.”

18 Un ɖɔ dó ayi mɛ dó gbɛtɔ́ lɛ́ wú ɖɔ Mawu nǔgbó ɔ ná tɛ́n yě kpɔ́n, bo ná xlɛ́ yě ɖɔ kanlin lɛ́ ɖɔhun wɛ yě cí, 19 ɖó nǔɖé* ɖo te kpɔ́n gbɛtɔ́ lɛ́ bo lɛ́ ɖo te kpɔ́n kanlin lɛ́; nǔ ɖokpó ɔ wɛ ɖo te kpɔ́n yě bǐ. Lěe kanlin nɔ kú gbɔn é wɛ gbɛtɔ́ nɔ kú gbɔn; gbigbɔ ɖokpó ɔ wɛ yě bǐ ɖó. Énɛ́ wú ɔ, gbɛtɔ́ nyí nǔɖé hú gǎn kanlin lɛ́ ǎ, ɖó nǔ bǐ wɛ nyí nǔ yǎyá. 20 Fí ɖokpó ɔ wɛ yě bǐ xwe. Kɔ́ wɛ è sɔ́ dó bló yě bǐ ná, bɔ yě bǐ ná lɛ́ húzú kɔ́. 21 Gbigbɔ gbɛtɔ́ lɛ́ tɔn to nɔ yi jǐ aga, bɔ gbigbɔ kanlin lɛ́ tɔn to nɔ jɛ te byɔ́ ayǐkúngban mɛ hǔn, mɛ̌ ka tuun tawun? 22 Un mɔ ɖɔ nǔ ɖě kún sɔ́ nyɔ́ nú gbɛtɔ́ hú ɖɔ é ní mɔ awǎjijɛ ɖo azɔ̌ tɔn mɛ ó, ɖó ajɔ* tɔn nɛ́; ɖó mɛ̌ ka sixú bló bɔ é ná mɔ nǔ e ná wá jɛ ɖo kú tɔn gúdo lɛ́ é?

4 Un lɛ́ sɔ́ ayi ce ɖó kɔgbídínúmɛ núwiwa e ɖo ayǐ ɖo hwe glɔ́ lɛ́ é bǐ jí. Un mɔ mɛ e gbídí kɔ ná wɛ è ɖe lɛ́ é sín ɖasin, bɔ mɛ ɖěbǔ ɖe bo ná dó gbɔ nú yě ǎ. Mɛ e ɖo kɔ gbídí nú yě wɛ lɛ́ é ɖó hlɔ̌nhlɔ́n, nǔ e wú mɛ ɖě ma ɖe bo ná dó gbɔ nú yě ǎ é nɛ́. 2 Énɛ́ wú ɔ, un kpa mɛ e ko kú lɛ́ é hú mɛ e kpo ɖo gbɛ lɛ́ é. 3 Mɛ e è ma ko ji, bónú é mɔ nǔ nyanya e nɔ jɛ ɖo hwe glɔ́ lɛ́ é ǎ é ɔ, éyɛ́tɔn kpɔ́n te hú mɛ e ko kú lɛ́ é kpó mɛ e kpo ɖo gbɛ lɛ́ é kpó bǐ tɔn.

4 Un mɔ lěe agba e mɛ lɛ́ nɔ hwlɛ́n xá yěɖée lɛ́ é nɔ zɔ́n bɔ yě nɔ dó gǎn* tawun bo nɔ w’azɔ̌ ganjí sɔ é; énɛ́ lɔ ɔ, nǔ yǎyá wɛ, bo nyí wezun kán ɖo jɔhɔn gúdo.

5 Xlonɔ nɔ gbɛ́ nǔɖé wa, bo nɔ blá alɔ dó wǔ, lobo nɔ wá xú dó te.*

6 Gbɔjɛ kpɛɖé* nyɔ́ hú azɔ̌ syɛ́nsyɛ́n wiwa zɛ xwé wú* kpó wezun kán ɖo jɔhɔn gúdo kpó.

7 Un lɛ́ sɔ́ ayi ce ɖó nǔ ɖěvo e nyí nǔ yǎyá ɖo hwe glɔ́ é jí. 8 Nya ɖé tíin, bo ɖo éɖokpó bo ɖó xɔ́ntɔn ɖě ǎ, é ɖó vǐ alǒ nɔví ɖě ǎ, loɔ, azɔ̌ syɛ́nsyɛ́n wa wɛ jɛ́n é nɔ ɖe magbokɔ. Dɔkun nɔ jɛmɛ n’i* gbeɖé ǎ. É ka nɔ kan nǔ élɔ́ byɔ́ éɖée a: ‘Mɛ̌ wú un ka ɖo azɔ̌ syɛ́nsyɛ́n wa wɛ, bo nɔ tɛ nǔ ɖagbe lɛ́ nyiɖée’?* Énɛ́ lɔ ɔ, nǔ yǎyá wɛ, bo nyí nǔ wa dó wǔvɔ́.

9 Mɛ we kpɔ́n te hú mɛ ɖokpó, ɖó yě nɔ mɔ ajɔ ɖagbe* ɖó azɔ̌ syɛ́nsyɛ́n yětɔn wú. 10 Ðó ényí mɛ ɖě j’ayǐ ɖo yě mɛ ɔ, mɛ ɖě ɔ sixú d’alɔ wegɔ́ tɔn nú é ná sí te. Amɔ̌, étɛ́ ka ná jɛ dó mɛ e j’ayǐ bo ma ɖó mɛ ɖě bónú é ná d’alɔ ɛ nú é ná sí te ǎ é wú?

11 Gɔ́ ná ɔ, ényí mɛ we mlɔ́ kpɔ́ ɔ, yě ná glɔ́n jɔ nú yěɖée lɛ́. Amɔ̌, nɛ̌ mɛ ɖokpó ka sixú glɔ́n jɔ nú éɖée gbɔn? 12 È sixú ɖu ɖo mɛ e ɖo éɖokpó é jí, amɔ̌, ényí mɛ we wɛ ɔ, yě sixú jɛ hun dó yěɖée jí bɔ é ná kpa yě. È gbɛ kan atɔn kplé ɔ, é sixú yá wǔ wɛ́n ǎ.*

13 Vǐ e nyí wamamɔnɔ, bo ka nyí nǔnywɛ́tɔ́ é kpɔ́n te hú axɔ́sú e nyí mɛxó, bo ka jɔ xlo, bo ma sɔ́ nɔ ba ná ɖótó akpágbanúmɛ ǎ é. 14 Ðó é* tɔ́n sín gankpá mɛ, bo ná dó húzú axɔ́sú, é ɖo mɔ̌ có, ɖo acɛkpikpa mɛ énɛ́ tɔn glɔ́ ɔ, wamamɔnɔ tɔn wɛ è ji. 15 Un mɔ nǔ e nɔ xá mɛ e ɖo gbɛ, bo ɖo zɔnlin ɖi wɛ ɖo hwe glɔ́ lɛ́ é bǐ, gɔ́ nú nǔ e nɔ xá mɛ wínnyáwínnyá e jɛ axɔ́sú ɖěvo tɛnmɛ é. 16 Mɛ e ɖo gǔdo n’i lɛ́ é sukpɔ́ tawun có, mɛ e ná wá bɔ dó wǔ tɔn lɛ́ é ná hun xomɛ dó wǔ tɔn ǎ. Énɛ́ lɔ ɔ, nǔ yǎyá wɛ, bo nyí wezun kán ɖo jɔhɔn gúdo.

5 Nú a yi Mawu nǔgbó ɔ xwégbe hweɖébǔnu hǔn, nɔ cɔ́ lěe a nɔ wa nǔ gbɔn é; é nyɔ́ ɖɔ è ní yi fínɛ́ bo ɖótó nǔ e è ɖɔ é hú ɖɔ è ní sá vɔ̌ lěe xlonɔ lɛ́ nɔ bló gbɔn é. Ðó yě tuun ɖɔ nǔ e wa wɛ émí ɖe é nylá ǎ.

2 Ma nɔ yá nu ó, ma ka nú ayi towe ní sísɛ́ we nú a nɔ ɖɔ xó ma lin tamɛ ɖo Mawu nǔgbó ɔ nukɔn ó, ɖó Mawu nǔgbó ɔ ɖo jǐxwé, hwɛ ka ɖo ayǐkúngban jí. Nǔ e wú xó towe ɖó ná nɔ nyí kpɛɖé é nɛ́. 3 Nǔ gěgé ɖo hǔnmɛ nú mɛ ɔ wɛ* è nɔ kú dlɔ̌, bɔ xó gěgé ɖiɖɔ nɔ zɔ́n bɔ xlonɔ nɔ wlí nǔ ɖɔ. 4 A dó akpá nú Mawu hweɖébǔnu hǔn, ma lín cóbó ɖe ó, ɖó xlonɔ lɛ́ sín nǔ nɔ nyɔ́ nukún tɔn mɛ ǎ. Akpá e a dó é ɔ, ɖe. 5 É nyɔ́ nú we ɖɔ a ní ma dó akpá ó, hú ɖɔ a ní dó bo gɔn ɖiɖe. 6 Ma lɔn nú nu towe ní zɔ́n bónú a* ní hu hwɛ ó; gɔ́ ná ɔ, ma ɖɔ ɖo wɛnsagun* ɔ nukɔn ɖɔ nǔwanyido wɛ ó. Étɛ́wú a ka ná dó xomɛsin nú Mawu nǔgbó ɔ gbɔn xó towe gblamɛ, bɔ é ná hɛn azɔ̌ e a sɔ́ alɔ towe lɛ́ dó wa é gblé? 7 Ðó lěe, nú nǔ gěgé ɖo hǔn mɛ nú mɛ ɔ, é nɔ zɔ́n bɔ è nɔ kú dlɔ̌ gbɔn é ɔ, mɔ̌ ɖokpó ɔ, nú mɛɖé nɔ ɖɔ xó dín ɔ, xó tɔn lɛ́ nɔ nyí nǔ yǎyá. Amɔ̌, ɖǒ sísí e gɔ́ngɔ́n é nú Mawu nǔgbó ɔ.

8 Ényí a mɔ bónú è ɖo ya dó nú wamamɔnɔ wɛ, bo ɖo afɔ tɛ hwɛjijɔ kpó nǔjlɔ́jlɔ́wiwa kpó jí wɛ ɖo tokpɔn towe mɛ hǔn, ma nú é kpácá we ó. Ðó mɛ ɖěvo yi jǐ hú axɔ́súzɔ́watɔ́ ɖaxó énɛ́ bo ɖo kpínkpɔ́n ɛ wɛ, bɔ mɛ ɖěvo lɛ́ lɛ́vɔ́ yi aga hú gǎn yě.

9 Gɔ́ ná ɔ, yě nɔ má ayǐkúngban sín le ɖo yěɖée lɛ́ tɛ́ntin; gle nɔ ná nǔɖuɖu axɔ́sú ɔ lɔ.

10 Mɛ e yí wǎn nú kpatágan é ɔ, kpatágan ná kpé è gbeɖé ǎ, mɔ̌ jɛ́n mɛ e yí wǎn nú dɔkun é ɔ, dɔkun ma ná kpé è ǎ é nɛ́. Énɛ́ lɔ ɔ, nǔ yǎyá wɛ.

11 Ényí nǔ ɖagbe ɖo kpɔ́ su d’é jí wɛ ɔ, ɖuɖutɔ́ lɛ́ lɔ nɔ ɖo kpɔ́ su d’é jí wɛ. Le tɛ́ ka ɖ’é mɛ nú mɛ e tɔn wɛ é, zɛ é ná kpɔ́n yě kpó nukún kpó wú?

12 Mɛsɛntɔ́ sín amlɔ nɔ víví, é ná bo ɖu nǔ kpɛɖé, alǒ sukpɔ́ ɔ nɛ́. Amɔ̌, nǔɖókan dɔkunnɔ tɔn e sukpɔ́ é nɔ lɔn nǔ n’i bónú é ná d’amlɔ ǎ.

13 Un lɛ́ mɔ awě ɖaxó élɔ́ ɖo hwe glɔ́: dɔkunnɔ nɔ xo dɔkun kplé, bo ná dó wa nǔ dó éɖésúnɔ wú. 14 Dɔkun énɛ́ lɛ́ bú ɖó tutomɛ* e ma yi ganjí ǎ é ɖé wú, bɔ ɖo hwenu e é ji vǐ súnnu ɖokpó é ɔ, nǔ ɖěbǔ sɔ́ kpo n’i ǎ.

15 Lěe mɛɖé nɔ zɔn mɛ̌, bo nɔ gosín nɔ tɔn xomɛ gbɔn é ɔ, mɔ̌ jɛ́n é ná lɛ́ zɔn mɛ̌ bo yi gbɔn. É sixú hɛn nǔ e é w’azɔ̌ syɛ́nsyɛ́n bo ɖó lɛ́ é ɖěbǔ yi ǎ.

16 Awě ɖaxó wɛ nyí nǔ élɔ́ lɔ: lěe é wá gbɔn é pɛ́pɛ́ wɛ é ná yi gbɔn; bɔ le tɛ́ ka ɖ’é mɛ nú mɛ e nɔ ɖo azɔ̌ syɛ́nsyɛ́n wa wɛ dó jɔhɔn mɛ é? 17 Gɔ́ ná ɔ, é nɔ ɖu nǔ kpó awǎjijɛ kpó gbeɖé ǎ. É nɔ ɖu nǔ kpó akpɔ, azɔn kpó xomɛsin ɖaxó kpó.

18 Nǔ e un mɔ ɖɔ é nyí nǔ ɖagbe bo sɔgbe é ɖíe: gbɛtɔ́ ɖó ná ɖu nǔ, bo nu ahan, lobo mɔ awǎjijɛ ɖo azɔ̌ syɛ́nsyɛ́n e é jɛ tagba bo wa ɖo hwe glɔ́ lɛ́ é bǐ mɛ, ɖo azǎn kpɛ e Mawu nǔgbó ɔ ná ɛ bɔ é ná nɔ gbɛ xɔ é vlamɛ, ɖó ajɔ* tɔn nɛ́. 19 Gɔ́ ná ɔ, nú Mawu nǔgbó ɔ ná dɔkun kpó nǔɖókan kpó mɛɖé, lobo lɛ́ ná ɛ nǔwúkpíkpé bónú é ná ɖu vǐví yětɔn ɔ, é ɖó ná yí ajɔ* tɔn bo j’awǎ ɖó azɔ̌ syɛ́nsyɛ́n e é wa é wú. Nǔníná Mawu tɔn wɛ. 20 Ðó é ná vɛ́ wǔ ɖɔ é ní ɖó ayi wú* ɖɔ gbɛzán tɔn ɖo wǐwá yi wɛ, ɖó Mawu nǔgbó ɔ bló bɔ awǎjijɛ e ɖo ayi tɔn mɛ é ján alɔnu n’i.

6 Awě ɖěvo tíin bɔ un mɔ ɖo hwe glɔ́, bɔ é nɔ xo mɛ gěgé. 2 Mawu nǔgbó ɔ ná dɔkun, nǔɖókan kpó susu kpó mɛɖé, bónú nǔ ɖěbǔ e é jló é ní ma hwedó è* ó. É ɖo mɔ̌ có, Mawu nǔgbó ɔ lɔn bónú é ɖu vǐví nǔ énɛ́ lɛ́ tɔn ǎ, loɔ, jǒnɔ wɛ ɖu vǐví yětɔn. Énɛ́ lɔ ɔ, nǔ yǎyá wɛ, bo lɛ́ nyí wǔvɛ́ syɛ́nsyɛ́n. 3 Ényí súnnu ɖé ji vǐ kanweko, bo nɔ gbɛ nú xwe gěgé, lobo wá kpo, bónú é* ma ka ɖu nǔ ɖagbe e é ɖó lɛ́ é sín vǐví cóbó yi yɔdo mɛ ǎ* ɔ, nyɛ mɔ ɖɔ vǐ e è ji kúkú tɔn é kpɔ́n te hú i. 4 Ðó vǐ énɛ́ wá gbɛ ɔ mɛ dó wǔvɔ́, bo lɛ́ kɔ yi ɖo zǐnflú mɛ, lobɔ zǐnflú cyɔ́n nyǐkɔ tɔn. 5 Éyɛ́ mɔ hwe kpɔ́n, alǒ tuun nǔ ɖě ǎ có, éyɛ́tɔn kpɔ́n te hú mɛ ɖě ɔ tɔn.* 6 Ényí è nɔ gbɛ nú xwe afatɔ́n donu we, bo ma ka ɖu vǐví tɔn ɖěbǔ ǎ ɔ, le tɛ́ ka ɖ’é mɛ? Mɛ bǐ wɛ ná wá yi fí ɖokpó ɔ ǎ cé?

7 Azɔ̌ syɛ́nsyɛ́n e gbɛtɔ́ nɔ wa lɛ́ é bǐ ɔ, bónú adɔgo tɔn ná gɔ́ wútu wɛ; é ɖo mɔ̌ có, é nɔ sú nǔ e nɔ jló è* lɛ́ é sín do gbeɖé ǎ. 8 Ðó étɛ́ nǔnywɛ́tɔ́ ka ɖó hú xlonɔ? Alǒ, ényí wamamɔnɔ tuun lěe é ná gézé gbɔn é* ɔ, le tɛ́ ka ɖ’é mɛ n’i? 9 Ényí è nɔ ɖu vǐví nǔ e nukún nɔ mɔ lɛ́ é tɔn ɔ, é kpɔ́n te hú è ní nɔ ɖo flúflú wɛ ɖo nǔ e nɔ jló mɛ lɛ́ é gúdo.* Énɛ́ lɔ ɔ, nǔ yǎyá wɛ, bo nyí wezun kán ɖo jɔhɔn gúdo.

10 Nǔ ɖěbǔ e wá tíin é ɔ, è ko ɖó nyǐkɔ n’i ɖ’ayǐ, è ko tuun nǔ e gbɛtɔ́ nyí é ɖ’ayǐ; gbɛtɔ́ kpé wú bo ná dɔn nǔ xá mɛ e ɖó hlɔ̌nhlɔ́n hú i é* ǎ. 11 Lěe xó* sukpɔ́ sɔ é ɔ, mɔ̌ wɛ é nɔ nyí nǔ yǎyá sɔ, bɔ le tɛ́ yě ka ná hɛn wá nú gbɛtɔ́? 12 Mɛ̌ ka tuun nǔ e kpɔ́n te nú mɛɖé, bɔ é ná wa ɖo gbɛ mɛ ɖo azǎn kpɛ e é ná zán gbɛ tófwé ná, bɔ é ná wá yi bléwún yɛtɛn ɖɔhun é vlamɛ é? Mɛ̌ ka sixú ɖɔ nǔ e ná jɛ ɖo hwe glɔ́ ɖo kú mɛɖé tɔn gúdo é n’i?

7 Nyǐkɔ ɖagbe* nyɔ́ hú ami ɖagbe, lobɔ gbe e gbe è kú é nyɔ́ hú gbe e gbe è jɔ é. 2 È yi xwé e gbe è ɖo aluwɛ mɛ ɖe é ɔ, é nyɔ́ hú è yi xwé e gbe è ɖo agɔ̌ ɖu ɖe wɛ é, ɖó kú wɛ nyí vivɔnu gbɛtɔ́ lɛ́ bǐ tɔn. Bɔ mɛ e ɖo gbɛ lɛ́ é ɖó ná hɛn énɛ́ ayi mɛ. 3 Aluwɛ nyɔ́ hú nǔkiko, ɖó ényí nukúnmɛ mɛtɔn blá wǔ ɔ, é nɔ zɔ́n bɔ wǔ nɔ yá ayi mɛtɔn. 4 Nǔnywɛ́tɔ́ sín ayi nɔ ɖo xwé e gbe è ɖo aluwɛ mɛ ɖe é, amɔ̌, xlonɔ sín ayi nɔ ɖo xwé e gbe è ɖo awǎ jɛ ɖe wɛ* é.

5 Nǔnywɛ́tɔ́ gbɛ́ nǔ nú mɛ bónú è ɖótó ɔ, é nyɔ́ hú è ní ɖótó han e ji wɛ xlonɔ lɛ́ ɖe é. 6 Ðó lěe wun e nɔ ɖo jiji wɛ ɖo zɛ̌n glɔ́ é nɔ ɖɔ nǔ gbɔn é ɔ, mɔ̌ wɛ nǔkiko xlonɔ tɔn nɔ cí; énɛ́ lɔ ɔ, nǔ yǎyá wɛ. 7 Amɔ̌, kɔgbídínúmɛ sixú zɔ́n bɔ nǔnywɛ́tɔ́ ná wa nǔ taɖunɔ ɖɔhun. Nǔɖuɖonǔmɛ nɔ zɔ́n bɔ è nɔ ɖó ayi hízíhízí.

8 Vivɔnu nǔɖé tɔn nɔ nyɔ́ hú bǐbɛ́mɛ tɔn. È ɖó suúlu ɔ, é nyɔ́ hú è ní yí go. 9 Ma nɔ yá wǔ sin xomɛ ó, ɖó xomɛ sinsin ɔ, xlonɔ lɛ́ gɔ́n wɛ é kpa zinkpo ɖe.*

10 Ma nɔ ɖɔ: “Étɛ́wú azǎn e wá yi lɛ́ é ka nyɔ́ hú din tɔn lɛ́?” ó. Ðó mɔ̌ kinkanbyɔ́ nyí nǔnywɛ́nú ǎ.

11 Ényí mɛ e ɖó nǔnywɛ́ é ɖu gǔ ɔ, nǔ ɖagbe wɛ. Nǔnywɛ́ nɔ ɖó le nú mɛ e nɔ mɔ wěziza kéze tɔn lɛ́ é.* 12 Ðó nǔnywɛ́ nɔ nya xɛ ɖo mɛ jí lěe akwɛ́ nɔ nya xɛ ɖo mɛ jí gbɔn é. Loɔ, le e ɖo nǔtuuntuun mɛ é ɖíe: nǔnywɛ́ nɔ nya xɛ ɖo mɛ e ɖó é sín gbɛ jí.

13 Lin tamɛ dó azɔ̌ Mawu nǔgbó ɔ tɔn jí, ɖó mɛ̌ ka sixú jlɔ́ nǔ e é gɔ́ndɔ́n é? 14 Ényí azǎn ɖé nyí ɖagbe hǔn, ɖe ɖagbewiwa énɛ́ xlɛ́. Amɔ̌, ényí azǎn ɖé nyí awěxomɛzán hǔn, tuun ɖɔ Mawu wɛ tin bɔ azǎn ɖě ɔ nyí ɖagbe, bo lɛ́ tin bɔ énɛ́ nyí awěxomɛzán. Nǔ nyí mɔ̌ bónú gbɛtɔ́ lɛ́ ní ma kú dó nǔ ɖěbǔ e ná jɛ dó yě wú ɖo sɔgúdo é jí ó.*

15 Ðo gbɛzán ce tófwé ɔ mɛ ɔ, nǔ bǐ wɛ un mɔ, bɛ́ sín nǔjlɔ́jlɔ́watɔ́ e nɔ ɖo nǔ jlɔ́jlɔ́ wa wɛ cóbó ka kú é jí, káká jɛ mɛdídá e nɔ ɖo nǔ nyanya wa wɛ cóbó ka dɔ́ ji é jí.

16 Ma nyí nǔjlɔ́jlɔ́watɔ́ zɛ xwé wú ó, ma ka ɖe xlɛ́ zɛ xwé wú ɖɔ émí nyɔ́nǔi ó. Étɛ́wú a ka ná sú kún dó nú hwiɖée? 17 Ma nyí mɛdídá zɛ jlɛ̌ wú ó, ma ka nyí xlonɔ ó. Étɛ́wú a ka ná wɛ́n kú? 18 É nyɔ́ hú ɖɔ a ní xwedó akpágbanúmɛ we énɛ́ lɛ́ bǐ, bo ma jó ɖěbǔ dó ó. Ðó mɛ e nɔ ɖó sísí e gɔ́ngɔ́n é nú Mawu é ná xwedó we lɛ́ bǐ.

19 Nǔnywɛ́ nɔ bló bɔ nǔnywɛ́tɔ́ nɔ ɖó hlɔ̌nhlɔ́n hú súnnu hlɔ̌nhlɔ́nnɔ wǒ e ɖo toxo ɖé mɛ lɛ́ é. 20 Ðó nǔjlɔ́jlɔ́watɔ́ ɖě ɖo ayǐkúngban jí, bo nɔ wa nǔ ɖagbe hwebǐnu, bo gɔn hwɛ hu kpɔ́n ǎ.

21 Gɔ́ ná ɔ, ma nɔ sɔ́ ayi ɖó nǔ e mɛ lɛ́ nɔ ɖɔ lɛ́ é bǐ jí ó; é ma nyí mɔ̌ ǎ ɔ, a ná se bɔ mɛsɛntɔ́ towe ná ɖo nu dó we wɛ. 22 Ðó a tuun ganjí ɖo ayi towe mɛ ɖɔ, émíɖésúnɔ ko dó nu mɛ ɖěvo lɛ́ kpɔ́n azɔn gěgé.

23 Un gbéjé nǔ énɛ́ lɛ́ bǐ kpɔ́n kpó nǔnywɛ́ kpó, bɔ un ɖɔ: “Un ná húzú nǔnywɛ́tɔ́.” Amɔ̌, é gló mì. 24 Nǔ e jɛ lɛ́ é bǐ wɛ gló mǐ, bo gɔ́ngɔ́n tawun. Mɛ̌ ka sixú mɔ nukúnnú jɛ mɛ? 25 Un wá gbeta ɔ kɔn bo ná tuun nǔnywɛ́, bo gbéjé kpɔ́n, bo lɛ́ ba do ná, lobo ná tuun hwɛjijɔ e wú nǔ lɛ́ nɔ jɛ é, lobo lɛ́ mɔ nukúnnú jɛ nǔnyanyawiwa xlonɔ lɛ́ tɔn kpó taɖunɔnúwiwa taɖunɔ lɛ́ tɔn kpó wú. 26 Énɛ́ ɔ, un wá mɔ nǔ élɔ́: nyɔ̌nu e cí gběnyatɔ́ sín ɖɔ ɖɔhun, bɔ ayi tɔn cí ɖɔgbó ɖɔhun, lobɔ alɔ tɔn lɛ́ cí gankpá mɛ sín wlɔ lɛ́ ɖɔhun é nylá* hú kú. Mɛ e nɔ hɛn xomɛ Mawu nǔgbó ɔ tɔn hun é ná xo gló è, amɔ̌, hwɛhutɔ́ ná jɛ fɛn tɔn mɛ.

27 “Éɖíe, nǔ e un wá mɔ é ɖíe,” wɛ nǔkplɔ́nmɛtɔ́ ɔ ɖɔ. “Un gbéjé nǔ lɛ́ kpɔ́n ɖěbɔdóɖěwú, bo wá gbeta ce kɔn. 28 Amɔ̌, nǔ e un* ba magbokɔ é ɔ, un mɔ ǎ. È sɔ́ gbɛtɔ́ afatɔ́n ɖó te ɔ, un mɔ súnnu nǔjlɔ́jlɔ́watɔ́ ɖokpó, amɔ̌, un mɔ nyɔ̌nu nǔjlɔ́jlɔ́watɔ́ ɖě ɖo yě mɛ ǎ. 29 Nǔ ɖokpó e un mɔ é ɖíe: Mawu nǔgbó ɔ bló gbɛtɔ́ lɛ́ jlɔ̌jlɔ́ tɔn, amɔ̌, yěɖésúnɔ bló tuto gěgé.”

8 Mɛ̌ ka cí nǔnywɛ́tɔ́ ɔ ɖɔhun? Mɛ̌ ka tuun lěe è ná ɖe ɖɛ tagba ɖé gbɔn é?* Nǔnywɛ́ e mɛɖé ɖó é nɔ zɔ́n bɔ nukúnmɛ tɔn nɔ hɔ́n, bɔ é sɔ́ nɔ hɛn nǔ gángángán ǎ.

2 Un ɖɔ: “Se tónú nú gbeɖiɖe axɔ́sú ɔ tɔn lɛ́ ɖó nǔ e a xwlé nú Mawu é wú. 3 Ma yá wǔ gosín nukɔn tɔn ó. Ma nɔ gǔdo nú nǔ nyanya ɖěbǔ ó; ɖó é sixú wa nǔ ɖěbǔ e jló è é. 4 Ðó xó e axɔ́sú ɖɔ é ɔ, fɛn nɔ tɔ́n ǎ. Mɛ̌ ka sixú ɖɔ n’i ɖɔ: ‘Étɛ́ wa wɛ a ka ɖe?’ ”

5 Mɛ e nɔ xwedó gbeɖiɖe é ɔ, nǔ nyanya ɖě ná wa ɛ ǎ. Nǔnywɛ́tɔ́ sín ayi ná tuun hwenu ɖagbe ɔ, kpó lěe è ná wa nǔ gbɔn é kpó. 6 Nǔ ɖokpó ɖokpó wɛ ɖó hwenu e è ná ɖe ɖɛ é kpó lěe è ná ɖe ɖɛ gbɔn é kpó, ɖó tagba gbɛtɔ́ lɛ́ tɔn túnflá. 7 Ðó mɛ ɖěbǔ ma tuun nǔ e ná jɛ é ǎ wútu ɔ, mɛ̌ ka sixú ɖɔ lěe é ná jɛ gbɔn é?

8 Lěe mɛɖé ma ɖó hlɔ̌nhlɔ́n dó gbigbɔ* jí, alǒ, sixú ɖó gbigbɔ te ǎ gbɔn é ɔ, mɔ̌ ɖokpó ɔ, mɛɖé ɖó hlɔ̌nhlɔ́n dó kú sín azǎn jí ǎ. Lěe è ma nɔ ná gbe mɛ ɖěbǔ bónú é ná gosín ahwangbénu ǎ gbɔn é ɔ, mɔ̌ ɖokpó ɔ, nǔnyanyawiwa ná ná agbɔ̌n mɛ e nɔ wa lɛ́ é bónú yě ná gán ǎ.*

9 Un mɔ nǔ énɛ́ lɛ́ bǐ, bo gbéjé nǔ e è nɔ wa ɖo hwe glɔ́ lɛ́ é bǐ kpɔ́n kpó ayi ce kpó, hwe énɛ́ bǐ nu ɔ, gbɛtɔ́ ɖě nɔ kpa acɛ dó gbɛtɔ́ ɖěvo jí, bo nɔ wa nǔ dó wǔ tɔn.* 10 Un mɔ bɔ è ɖo mɛ nyanya ɖi wɛ, yě mɛ ɖěɖěe nɔ byɔ́ tɛn mímɛ́ ɔ mɛ bo nɔ tɔ́n lɛ́ é. Amɔ̌, è yá wǔ wɔn yě ɖo toxo e mɛ yě nɔ wa mɔ̌ ɖe lɛ́ é. Énɛ́ lɔ ɔ, nǔ yǎyá wɛ.

11 Ðó è ma yá wǔ dɔn nǔ nyanya e gbɛtɔ́ lɛ́ wa é sín tó nú yě ǎ wú ɔ, ayi yětɔn nɔ dó ve ɖo nǔnyanyawiwa mɛ. 12 Hwɛhutɔ́ sixú wa nǔ nyanya azɔn kanweko bo lɛ́ dɔ́ ji có, un tuun ɖɔ nǔ lɛ́ ná wá yi ganjí nú mɛ ɖěɖěe nɔ ɖó sísí e gɔ́ngɔ́n é nú Mawu nǔgbó ɔ lɛ́ é, ɖó yě nɔ ɖó sísí e gɔ́ngɔ́n é n’i. 13 Amɔ̌, nǔ lɛ́ ná yi ganjí nú mɛ nyanya ǎ, mɔ̌ jɛ́n azǎn tɔn lɛ́ e cí yɛtɛn ɖɔhun é ma ná jɛjí ǎ é nɛ́, ɖó é nɔ ɖó sísí e gɔ́ngɔ́n é nú Mawu ǎ.

14 Nǔ yǎyá* ɖé tíin bo nɔ jɛ ɖo ayǐkúngban ɔ jí: nǔjlɔ́jlɔ́watɔ́ ɖé lɛ́ tíin bɔ è nɔ wa nǔ xá cí nǔ ɖɔ nǔ nyanya wɛ yě wa ɖɔhun, bɔ mɛ nyanya ɖé lɛ́ tíin bɔ è nɔ wa nǔ xá cí nǔ ɖɔ nǔ jlɔ́jlɔ́ wɛ yě wa ɖɔhun. Un ɖɔ ɖɔ énɛ́ lɔ ɔ, nǔ yǎyá wɛ.

15 Énɛ́ wú ɔ, un byɔ́ mɛ ɖěvo lɛ́ ɖɔ yě ní nɔ j’awǎ, ɖó nǔ ɖěbǔ sɔ́ nyɔ́ nú gbɛtɔ́ ɖo hwe glɔ́ hú ɖɔ é ní ɖu nǔ, nu ahan, bo j’awǎ ǎ. Nǔ énɛ́ lɛ́ wɛ é ɖó ná wa hwenu e é ná ɖo azɔ̌ syɛ́nsyɛ́n wa wɛ ɖo azǎn e Mawu nǔgbó ɔ ná ɛ, bɔ é ná nɔ gbɛ ná ɖo hwe glɔ́ lɛ́ é jí é.

16 Un dó gǎn kpó ayi ce kpó, bo ná tɛ́n kpɔ́n bo ná ɖó nǔnywɛ́, bo ná mɔ nǔ* e è nɔ wa ɖo ayǐkúngban jí lɛ́ é bǐ, un tlɛ d’amlɔ kéze kpó zǎnmɛ kpó ǎ.* 17 Énɛ́ gúdo ɔ, un gbéjé Mawu nǔgbó ɔ sín azɔ̌ lɛ́ bǐ kpɔ́n, bɔ un mɔ ɖɔ gbɛtɔ́ kún sixú mɔ nukúnnú jɛ nǔ e nɔ jɛ ɖo hwe glɔ́ lɛ́ é wú ó, gbɛtɔ́ lɛ́ ná bo tɛ́n kpɔ́n gbɔn ɖěbǔ ɔ, yě sixú mɔ nukúnnú jɛ mɛ ǎ. Yě ná bo tlɛ nɔ ɖɔ nǔnywɛ́ émítɔn kpé bónú émí ná tuun ɔ, yě sixú mɔ nukúnnú jɛ mɛ lě tawun ǎ.

9 Énɛ́ wú ɔ, un hɛn nǔ énɛ́ lɛ́ bǐ ayi mɛ, bo wá gbeta ɔ kɔn ɖɔ nǔjlɔ́jlɔ́watɔ́ kpó nǔnywɛ́tɔ́ kpó, gɔ́ nú azɔ̌ yětɔn lɛ́ ɔ, Mawu nǔgbó ɔ sín alɔ mɛ wɛ yě ɖe. Gbɛtɔ́ lɛ́ tuun wǎnyíyí kpó wǎngbɛ́númɛ kpó e tíin jɛ nukɔn nú yě é ǎ. 2 Nǔ* ɖokpó ɔ wɛ ɖo te kpɔ́n mɛ bǐ, nǔjlɔ́jlɔ́watɔ́ kpó mɛ nyanya kpó, mɛ ɖagbe kpó mɛ e mɛ́ é kpó, kpódó mɛ e ma mɛ́ ǎ é kpán, mɛ ɖěɖěe ɖo vɔ̌ sá wɛ lɛ́ é kpó mɛ ɖěɖěe ma ɖo vɔ̌ sá wɛ ǎ lɛ́ é kpó. Nǔ e ɖo te kpɔ́n mɛ ɖagbe é wɛ ɖo te kpɔ́n hwɛhutɔ́ lɔ; nǔ e ɖo te kpɔ́n mɛ e dó akpá bo xwlé nǔ d’é jí é wɛ ɖo te kpɔ́n mɛ e ma nɔ glá dó akpá dídó bo xwlé nǔ d’é jí wú ǎ é lɔ. 3 Nǔ élɔ́ nɔ ɖó linkpɔ́n nú mɛ ɖo hwe glɔ́ fí: ɖó nǔ* ɖokpó ɔ wɛ ɖo te kpɔ́n mɛ bǐ wútu ɔ, nǔ nyanya kɛ́ɖɛ́ wɛ gɔ́ gbɛtɔ́ lɛ́ sín ayi mɛ. Taɖu nɔ ɖo ayi yětɔn mɛ ɖo gbɛhwenu yětɔn, bɔ énɛ́ gúdo ɔ, yě nɔ kú!

4 Nukúnɖíɖó ɖe nú mɛ ɖěbǔ e ɖo gbɛ é, ɖó cukú gbɛɖe kpɔ́n te hú kinnikínní kúkú. 5 Ðó mɛ e ɖo gbɛ lɛ́ é tuun ɖɔ émí ná kú, loɔ, mɛ e kú lɛ́ é sɔ́ tuun nǔ ɖě ǎ, mɔ̌ jɛ́n yě ma sɔ́ ɖó ajɔ ɖě ǎ é nɛ́,* ɖó è ko wɔn nǔ e kan yě lɛ́ é bǐ. 6 Gɔ́ ná ɔ, wǎn e yě nɔ yí nú mɛ é, wǎn e yě nɔ gbɛ́ nú mɛ é kpó wǔ e yě nɔ hwan é kpó sín xó ko fó, bɔ yě sɔ́ ɖó mǐmá ɖě ɖo nǔ e è nɔ wa ɖo hwe glɔ́ lɛ́ é mɛ ǎ.

7 Yi, bo ɖu nǔ kpó awǎjijɛ kpó, lobo nu vɛ̌ɛn kpó xomɛhunhun kpó, ɖó azɔ̌ towe lɛ́ ko dó xomɛhunhun nú Mawu nǔgbó ɔ. 8 Awu towe ní nɔ ɖo wěwé jí hwebǐnu,* ma ka nɔ gɔn ami sá dó ta ó. 9 Ðu gbɛ víví xá asivɛ́ towe ɖo azǎn e a ná nɔ gbɛ ná ɖo gbɛ tófwé towe e Mawu ná we ɖo hwe glɔ́ fí lɛ́ é bǐ mɛ, ɖo gbɛ tófwé towe sín azǎn lɛ́ bǐ jí, ɖó ajɔ* e a ná mɔ ɖo gbɛ mɛ kpó azɔ̌ syɛ́nsyɛ́n e a jɛ tagba bo wa ɖo hwe glɔ́ fí lɛ́ é kpó é nɛ́. 10 Alɔ towe mɔ nǔ ɖěbǔ bo ná wa hǔn, wa kpó hlɔ̌nhlɔ́n towe bǐ kpó, ɖó azɔ̌ ɖě, nǔtito ɖě, nǔtuuntuun ɖě, alǒ nǔnywɛ́ ɖě ɖo Yɔdo* mɛ fí e a xwe é ǎ.

11 Un lɛ́ mɔ nǔ ɖěvo ɖo hwe glɔ́: Mɛ e yá afɔ é nɔ ɖu ɖo wezun kínkán jí hwebǐnu ǎ, mɛ e ɖó hlɔ̌nhlɔ́n é nɔ ɖu ɖo ahwan jí hwebǐnu ǎ, mɛ e nyɔ́nǔi é nɔ ɖó nǔɖuɖu hwebǐnu ǎ, mɛ e bí é nɔ jɛ dɔkun hwebǐnu ǎ, mɔ̌ jɛ́n mɛ e tuun nǔ é ma nɔ ɖó ɖuɖéjí hwebǐnu ǎ é nɛ́, ɖó hwenu kpó nǔmaɖónukún* lɛ́ kpó nɔ wá nú yě bǐ. 12 Ðó gbɛtɔ́ tuun ganmɛ tɔn ǎ. Lěe hweví nɔ jɛ ɖɔ baɖabaɖa mɛ, bɔ xɛ lɛ́ nɔ sɔ́ fɛ́ca gbɔn é ɔ, mɔ̌ ɖokpó ɔ wɛ gbɛtɔ́ lɛ́ nɔ jɛ mɔ mɛ ɖo awěxomɛ hwenu, hwenu e awě ɔ xo yě ajijimɛ é gbɔn é nɛ́.

13 Un lɛ́vɔ́ ɖó ayi nǔ élɔ́ wú dó nǔnywɛ́ wú ɖo hwe glɔ́, bɔ é jí wǔ nú mì: 14 Toxo kpɛví ɖokpó tíin bɔ súnnu kwínwe ɖé ɖ’é mɛ. Axɔ́sú hlɔ̌nhlɔ́nnɔ ɖé wá tɔ́n ahwan toxo ɔ, bo lɛ́ lɛ̌ dó, lobo wa azɔ̌ ɖaxó ɖaxó e è nɔ wa dó ján go dó toxo ɖé lɛ́ é. 15 Nya wamamɔnɔ ɖokpó ɖo toxo ɔ mɛ, bo ka nyí nǔnywɛ́tɔ́, bɔ é hwlɛ́n toxo ɔ gbɔn nǔnywɛ́ tɔn gblamɛ. Amɔ̌, mɛ ɖěbǔ flín nya wamamɔnɔ énɛ́ ǎ. 16 Bɔ un ɖɔ nú nyiɖée ɖɔ: ‘Nǔnywɛ́ kpɔ́n te hú hlɔ̌nhlɔ́n, é ɖo mɔ̌ có, è gbɛ́ wǎn nú nǔnywɛ́ wamamɔnɔ ɖé tɔn, bo xwedó xó tɔn lɛ́ ǎ.’

17 È xwedó xó e nǔnywɛ́tɔ́ sɔ́ gbe fífá dó ɖɔ lɛ́ é ɔ, é kpɔ́n te hú è ní xwedó xósúsú mɛ e ɖo acɛ kpa wɛ ɖo xlonɔ lɛ́ tɛ́ntin é tɔn.

18 Nǔnywɛ́ kpɔ́n te hú ahwanlyánnú lɛ́, amɔ̌, hwɛhutɔ́ ɖokpó kpowun sixú sú kún dó nú nǔ ɖagbe gěgé.

10 Lěe sukpɔ kúkú nɔ bló bɔ ami nǔnyɔ́wǎnsatɔ́ tɔn nɔ lun wǎn bo nɔ nyɛ fún gbɔn é ɔ, mɔ̌ ɖokpó ɔ wɛ xlonɔnúwiwa kpɛví ɖé nɔ cyɔ́n yɛ nǔnywɛ́ kpó susu kpó jí gbɔn.

2 Ayi nǔnywɛ́tɔ́ tɔn nɔ kplá ɛ yi ali jlɔ́jlɔ́ jí,* amɔ̌, ayi xlonɔ tɔn nɔ kplá ɛ yi ali nyanya jí.* 3 Xlonɔ na bo ɖi zɔnlin gbɔn fí ɖěbǔ ɔ, ayivɔ nɔ vún i, bɔ é nɔ lɛ́ bló bɔ mɛ bǐ nɔ tuun ɖɔ xlonɔ wɛ n’i.

4 Nú acɛkpatɔ́ sin xomɛ dó we hǔn, ma sɛ tɛn sín fí e a ɖe é ó, ɖó xwíí cící nɔ cí asɔ nú hwɛhuhu ɖaxó lɛ́.

5 Nǔɖé tíin bo nɔ ɖó linkpɔ́n nú mɛ, bɔ un mɔ ɖo hwe glɔ́. Mɛ e ɖo tɛn acɛkpikpa tɔn mɛ lɛ́ é sín nǔwanyido alɔkpa élɔ́ wɛ: 6 è nɔ sɔ́ xlonɔ lɛ́ ɖó tɛn e yi aga lɛ́ é mɛ, amɔ̌, mɛ e kpé nǔ wú lɛ́ é* nɔ nɔ tɛn e yi do lɛ́ é mɛ.

7 Un mɔ mɛsɛntɔ́ lɛ́ ɖo sɔ́ jí, amɔ̌, axɔ́ví lɛ́ ɖo afɔ zɔn wɛ mɛsɛntɔ́ ɖɔhun.

8 Mɛ e kun do é sixú jɛ mɛ; mɛ e tɔ́n ali gbɔn dǒ e è sɔ́ awǐnnya dó mɛ ná é mɛ é ɔ, dan sixú xú aɖǔ i.

9 Mɛ e ɖo awǐnnya kun wɛ é ɔ, awǐnnya sixú gblé wǔ i, bɔ mɛ e ɖo nakí zɛ wɛ é ɔ, nakí sixú sɔ́ gbɛ tɔn ɖó axɔ́ nu.*

10 Ényí azɔ̌wanú e è sɔ́ gan dó bló é ɖé lin bónú è ma gan ǎ ɔ, é ná byɔ́ ɖɔ è ní zán hlɔ̌nhlɔ́n gěgé, amɔ̌, nǔnywɛ́ nɔ d’alɔ bɔ è nɔ ɖó ɖuɖéjí.

11 Ényí dan ɖu mɛ cóbónú è hu acɛ n’i ɔ, le ɖé ɖ’é mɛ nú acɛhunúnǔtɔ́ alɔsekpɛ́nnánɔ ɔ ǎ.

12 Xó e nɔ tɔ́n sín nǔnywɛ́tɔ́ sín nu mɛ é nɔ hɛn fɛ́nú wá, amɔ̌, nufló xlonɔ tɔn lɛ́ wɛ nɔ sú kún tɔn dó. 13 Xó nukɔntɔn e nɔ tɔ́n sín nu tɔn mɛ lɛ́ é nyí xlonɔxó, bɔ xó tɔn gǔdo tɔn lɛ́ nyí taɖunɔxó e nɔ hɛn nǔ gblé tawun lɛ́ é. 14 Amɔ̌, xlonɔ nɔ ɖo xó ɖɔ wɛ magbokɔ.

Gbɛtɔ́ tuun nǔ e ná wá jɛ é ǎ. Mɛ̌ ka sixú ɖɔ nǔ e ná wá jɛ hwenu e é ma sɔ́ ná tíin ǎ é n’i?

15 Azɔ̌ syɛ́nsyɛ́n e xlonɔ nɔ wa é nɔ zɔ́n bɔ agbɔ̌n nɔ kpé è, ɖó é tlɛ nɔ tuun ali e é ná gbɔn bo yi toxo ɔ mɛ é ǎ.

16 Nú to ɖé sín axɔ́sú nyí yɔkpɔ́vú, bɔ axɔ́ví tɔn lɛ́ nɔ jɛ agɔ̌ ɖu jí sín zǎnzǎn ɔ, é nylá tawun. 17 Ényí axɔ́sú ɔ nyí mɛ nukúnɖéjí lɛ́ sín vǐ súnnu, bónú axɔ́ví lɛ́ nɔ ɖu nǔ dó hwetɔnnu bo ná dó mɔ hlɔ̌nhlɔ́n bɔ é ma nyí bo ná dó nu ahan mú ǎ ɔ, awǎjijɛnú wɛ é nɔ nyí nú to ɔ!

18 Fɔnlín ɖiɖi zɛ xwé wú nɔ zɔ́n bɔ xɔ sín aza nɔ wán zɔn mɛ; alɔ e ma nɔ wa nǔɖé ǎ é nɔ zɔ́n bɔ xɔ nɔ kun sin.

19 È nɔ bló wɔ̌xúxú* bo ná dó dó nǔkiko nú mɛ, bɔ vɛ̌ɛn nɔ bló bɔ gbɛ nɔ víví, amɔ̌, akwɛ́ nɔ sú nǔ e hudó mɛ lɛ́ é bǐ sín do.

20 Ma tlɛ dó nu axɔ́sú ɖo linlin towe mɛ* vɔ́vɔ́ ó, ma dó nu dɔkunnɔ ɖo xɔnɔnɔ towe mɛ ó, ɖó xɛ* ɖé sixú yi dó wɛn, alǒ nǔɖíɖó e ɖó awa é ɖé sixú vɔ́ nǔ e a ɖɔ é ɖɔ.

11 Nyi wɔ̌xúxú towe dó sin mɛ, ɖó ɖo azǎn gěgé gúdo ɔ, a ná lɛ́ mɔ. 2 Mǎ nǔ e a ɖó lɛ́ é ɖě nú mɛ tɛ́nwe alǒ mɛ tántɔn, ɖó a tuun awě e ná xo mɛ ɖo ayǐkúngban ɔ jí é ǎ.

3 Ényí sin gɔ́ akpɔ́kpɔ́ mɛ ɔ, jǐ ná ja dó ayǐkúngban ɔ jí; ényí atín ɖé mu jɛ tofɔligbé alǒ totaligbé ɔ, fí e atín ɔ mu jɛ é wɛ é ná cí.

4 Mɛ e ɖo jɔhɔn kpɔ́n wɛ é ná dó nǔkún ǎ, bɔ mɛ e ɖo akpɔ́kpɔ́ kpɔ́n wɛ é ná ya nǔkún ǎ.

5 A tuun lěe gbigbɔ ɔ nɔ w’azɔ̌ gbɔn ɖo vǐ e ɖo nyɔ̌nu xoxónɔ ɖé xomɛ é sín xú lɛ́* mɛ gbɔn é ǎ, mɔ̌ ɖokpó ɔ, a tuun Mawu nǔgbó ɔ, éé bló nǔ lɛ́ bǐ é sín azɔ̌ ǎ.

6 Dǒ nǔkún towe zǎnzǎn, ma ka gɔn azɔ̌ wa káká jɛ gbadanu ó; ɖó a tuun éé ná nyɔ́ é ǎ, é to nyí élɔ́ wɛ oo, alǒ ɖě ɔ wɛ oo, alǒ we lɛ́ bǐ wɛ to ná nyɔ́ hǔn, a tuun ǎ.

7 Wěziza nɔ dɔn mɛ, bɔ é nyɔ́ ɖɔ nukún ní mɔ hwe. 8 Ðó ényí mɛɖé ɖó ná nɔ gbɛ nú xwe gěgé hǔn, mi nú é ní ɖu vǐví bǐ tɔn. Amɔ̌, é ɖó ná flín ɖɔ zǐnflú sín azǎn lɛ́ sixú sukpɔ́; nǔ e ná wá bɔ d’é wú lɛ́ é bǐ wɛ nyí nǔ yǎyá.

9 Mɛ wínnyáwínnyá, j’awǎ hwenu e a ɖo wǐnnyáwínnyá mɛ é, awǎjijɛ ní gɔ́ ayi towe mɛ ɖo wǐnnyáwínnyámɛ towe. Xwedó ali e ayi towe mlɛ́ lɛ́ é, bo yi fí e nukún towe lɛ́ kplá we yi é; amɔ̌, tuun ɖɔ Mawu nǔgbó ɔ ná ɖɔ hwɛ xá we* ɖo nǔ énɛ́ lɛ́ bǐ mɛ. 10 Énɛ́ wú ɔ, ɖe nǔ e nɔ dɔn mɛ dó hɔzɔ mɛ lɛ́ é sín ayi towe mɛ, bo sɛ nǔ e nɔ hɛn nǔ gblé dó mɛ wú lɛ́ é dó zɔ nú agbaza towe, ɖó wǐnnyáwínnyá hwenu kpó hwenu e è ɖo anyǔ mɛ ɖo gbɛ mɛ é kpó ɔ, nǔ yǎyá wɛ.

12 Énɛ́ wú ɔ, flín Gbɛɖótɔ́ Ðaxó towe hwenu e a ɖo wǐnnyáwínnyá mɛ é, cóbónú azǎn wǔvɛ́ tɔn lɛ́ ní wá, cóbónú xwe lɛ́ ná wá bɔ a ná ɖɔ: “Un sɔ́ nɔ mɔ gbɛ ɔ sín vǐví ɖě ǎ”; 2 cóbónú hwe, wěziza, sun kpó sunví lɛ́ kpó ná byɔ́ zǐnflú mɛ, lobɔ akpɔ́kpɔ́ lɛ́ ná lɛ́ kɔ ɖo jǐ gúdo;* 3 hwenɛ́nu ɔ, zǎncɔ́tɔ́* xwé ɔ tɔn lɛ́ ná jɛ sísɔ́sísɔ́ jí, súnnu hlɔ̌nhlɔ́nnɔ lɛ́ ná nɔ zɔn tɔ́tɔ́, nyɔ̌nu lɛ́ ná ɖó nǔlili te ɖó yě sɔ́ sukpɔ́ ǎ wútu, zǐnflú ná dó dó nyɔ̌nu e ɖo nǔ kpɔ́n gbɔn flɛtɛ́li nu wɛ lɛ́ é; 4 hɔn e tɔ́n jɛ ali ɔ jí lɛ́ é nɔ ko sú, sé e ɖo nǔ li wɛ é sín gbe nɔ yi do, xɛ sín gbe nɔ fɔ́n mɛ, bɔ nyɔ̌nuví lɛ́ bǐ nɔ ɖo han ji wɛ kpó gbe dɛ̌dɛ̌ kpó. 5 Gɔ́ ná ɔ, xɛsi nɔ ɖi mɛ dó fí e yi aga lɛ́ é wú, bɔ adohu adohu nɔ ɖo ali jí. Amáditín nɔ gba sɛ́, bɔkle nɔ ɖo éɖée dɔn dɛ́ wɛ, nǔɖuɖu sɔ́ nɔ jló mɛ ǎ, ɖó è ko nɔ ɖo zɔnlin ɖi wɛ xwe xwé e gbe è ná nɔ nú hwenu gěgé é, bɔ avǐyatɔ́ lɛ́ nɔ ɖo zɔnlin ɖi wɛ ɖo ali ɔ jí; 6 flín i cóbónú kan e è sɔ́ kpatágan dó bló é ní wɛ́n, bónú sikágannú ɔ ní gba, lobonú zɛ̌n e ɖo tɔ ɔ nu é ní gba, bónú kpululúi sitɛ́nu ɔ tɔn ní hánnyá. 7 Énɛ́ gúdo ɔ, kɔ́ ɔ nɔ lɛ́ kɔ yi ayǐkúngban lanmɛ, lěe é ko ɖe gbɔn ɖ’ayǐ é, bɔ gbigbɔ ɔ* nɔ lɛ́ kɔ yi Mawu nǔgbó e ná é gɔ́n.

8 “Nǔ yǎyá* tɛ́ ɖíe!” wɛ nǔkplɔ́nmɛtɔ́ ɔ ɖɔ. “Nǔ bǐ wɛ nyí nǔ yǎyá.”

9 Nǔkplɔ́nmɛtɔ́ ɔ húzú nǔnywɛ́tɔ́, énɛ́ kɛ́ɖɛ́ ka wɛ ǎ, é nɔ lɛ́ ɖo nǔ e é tuun é kplɔ́n mɛ lɛ́ wɛ; é nɔ lin tamɛ kpɔ́n, bo nɔ ba do nú nǔ lɛ́ tɛ́nwín lɛnwín, bo ná dó xo nǔnywɛ́xó gěgé kplé.* 10 Nǔkplɔ́nmɛtɔ́ ɔ tɛ́n kpɔ́n bo mɔ xó e dɔn mɛ lɛ́ é, lobo wlán xó e sɔgbe bo nyí nǔgbó lɛ́ é.

11 Xó nǔnywɛ́tɔ́ ɔ tɔn lɛ́ cí kpo nu xwíɖíxwíɖí lɛ́ ɖɔhun, bɔ xó e é xo kplé lɛ́ é cí hǔnjɛ́n e è xwe dó nǔ mɛ gbánwúngbánwún lɛ́ é ɖɔhun; lɛ̌ngbɔ́nyitɔ́ ɖokpó wɛ ɖɔ xó énɛ́ lɛ́ bǐ. 12 Vǐ ce, gbɔn vo nú nǔ énɛ́ lɛ́ ɔ, nɔ acéjí dó nǔ élɔ́ wú: wěma gěgé wínwlán nɔ ɖó vivɔnu ǎ, bɔ nú è zé mɛɖée jó ná dín ɔ, agbaza wɛ è nɔ zán vún.

13 Ðó è ko ɖɔ nǔ lɛ́ bǐ wútu ɔ, tasúná xó ɔ tɔn ɖíe: ɖǒ sísí e gɔ́ngɔ́n é nú Mawu nǔgbó ɔ bo xwedó gbeɖiɖe tɔn lɛ́, ɖó nǔ e gbɛtɔ́ ɖó ná wa é bǐ jɛ́n nɛ́. 14 Ðó Mawu nǔgbó ɔ ná ɖɔ nǔ e è wa lɛ́ é bǐ sín hwɛ, káká jɛ nǔ e ɖo hwlǎhwlá lɛ́ é bǐ jí, yě nyí ɖagbe alǒ nyanya ɔ nɛ́.