HANVÍVÍ
1 Han e víví hú han lɛ́ bǐ,* bɔ Salomɔ́ɔ ji é:
2 “Kí si nú mì, sɔ́ nu towe dó kí si nú mì,
ɖó wǎnyíyínúwiwa towe lɛ́ nyɔ́ hú vɛ̌ɛn.
3 Wǎn e ami towe lɛ́ ɖó é nɔ nyɔ́ se tawun.
Nyǐkɔ towe cí ami wǎnɖagbenɔ e è kɔn é ɖɔhun.
Nǔ e wú ɖyɔ̌vǐ lɛ́ yí wǎn nú we é nɛ́.
4 Kplá mì; nǔ mǐ ní hɔn.
Ðó axɔ́sú ɔ kplá mì byɔ́ xɔ tɔn lɛ́ mɛ!
Nǔ mǐ ní j’awǎ, mǐ ní j’awǎ ɖó kpɔ́.
Nǔ mǐ ní kpa susu nú wǎnyíyínúwiwa towe lɛ́ hú vɛ̌ɛn.
Hwɛ yětɔn jɔ ɖɔ yě* yí wǎn nú we.
5 Ðyɔ̌vǐ Jeluzalɛ́mu tɔn lɛ́ mi, un wi, amɔ̌, un nyɔ́ ɖɛkpɛ tawun
goxɔ Kedáa tɔn lɛ́ ɖɔhun, goxɔ Salomɔ́ɔ tɔn sín avɔ lɛ́ ɖɔhun.
6 Mi ma kpɔ́n mì tlítlí ɖó wi e un wi é wú ó,
ɖó hwesivɔ́ wɛ hun dó jǐ ce.
Nɔ ce sín vǐ súnnu lɛ́ sin xomɛ dó mì;
yě sɔ́ mì vǐwungbocɔ́tɔ́,
amɔ̌, vǐwungbo nyiɖésúnɔ tɔn ɔ, un kpé nukún d’é wú ǎ.
7 Ðɔ nú mì, hwi mɛ e un* yí wǎn ná tawun é,
ɖɔ fí e a kplá lɛ̌ngbɔ́hwan towe bɔ yě ɖo ama ɖu ɖe wɛ é nú mì,
ɖɔ fí e a kplá yě bɔ yě mlɔ́ hwemɛ é nú mì.
Étɛ́wú un ka ɖó ná cí nyɔ̌nu e bú avɔ* dó nukúnmɛ é ɖɔhun
ɖo gbɛ̌ towe lɛ́ sín lɛ̌ngbɔ́hwan lɛ́ tɛ́ntin?”
8 “Hwi mɛ e nyɔ́ ɖɛkpɛ hú nyɔ̌nu lɛ́ bǐ é, ényí a ma tuun fí ɔ ǎ hǔn,
xwedó lɛ̌ngbɔ́hwan ɔ sín afɔdomɛ lɛ́,
bo kplá gbɔ̌ towe lɛ́ yi amagbo mɛ ɖo lɛ̌ngbɔ́nyitɔ́ lɛ́ sín goxɔ lɛ́ kpá.”
9 “Wǎnyínámɔ ce, a cí sɔ́ asi ɖɛkpɛ ɖɛkpɛ e ɖo kɛkɛ́ví Falawɔ́ɔn tɔn lɛ́ ɖokpó dɔn wɛ é ɖɔhun.
10 Acɔ́banú lɛ́ bló bɔ klɛ̌n towe lɛ́ nyɔ́ ɖɛkpɛ,*
kɔjɛ́ lɛ́ bló bɔ kɔ towe nyɔ́ ɖɛkpɛ.
11 Mǐ ná sɔ́ siká dó bló acɔ́banú lɛ́* ná nú we,
bɔ kpatágan ná gbɔn yě wú.”
12 “Hwenu e axɔ́sú ɔ ɖo ayǐjínjɔ́n ɖo távo tɔn tobotobo ɔ tó é ɔ,
célu* ce sín wǎn gba kpé.
13 Mɛvívɛ́ ce cí mǐla sín sáki wǎnɖagbenɔ
e un hɛn ɖó anɔ̌ ce lɛ́ tɛ́ntin zǎnmɛ é ɖɔhun nú mì.
14 Mɛvívɛ́ ce cí hɛnnɛ́ɛ sín hwǐn ɖɔhun nú mì,
ɖo vǐwungbo Eyínu-Gɛdi tɔn lɛ́ tɛ́ntin.”
15 “Wǎnyínámɔ ce, a nyɔ́ ɖɛkpɛ mɛ nya!
A nyɔ́ ɖɛkpɛ tawun. Nukún towe lɛ́ cí ahwannɛ́ sín nukún lɛ́ ɖɔhun.”
16 “Mɛvívɛ́ ce, a nyɔ́ ɖɛkpɛ mɛ nya, bo lɛ́ dɔn mɛ!
Gběhan lɛ́ wɛ nyí zan mǐtɔn.
17 Sɛ́dlutín lɛ́ wɛ nyí azakpo xwé mǐtɔn* tɔn lɛ́,
jenɛvliyéetín wɛ nyí aza mǐtɔn.
2 “Nyɛ ɔ, folówa zunkan mɛ tɔn* e ɖo ayǐkúngban wɛnjɛ jí é ɖé kpowun wɛ un nyí,
folówa tɔdo mɛ tɔn ɖé kpowun wɛ un nyí.”
2 “Lěe folówa nɔ cí ɖo wunkan lɛ́ tɛ́ntin é
ɖɔhun wɛ wǎnyínámɔ ce cí ɖo ɖyɔ̌vǐ lɛ́ tɛ́ntin.”
3 “Lěe pɔ́mutín nɔ cí ɖo atín e ɖo zungbó mɛ lɛ́ é tɛ́ntin é ɔ,
mɔ̌ wɛ mɛvívɛ́ ce cí ɖo dɔ̌nkpɛvú lɛ́ tɛ́ntin.
É jló mì tawun ɖɔ má jínjɔ́n yɛtɛn tɔn,
sínsɛ́n tɔn nɔ víví ɖo ɖɛ̌ ce ta.
4 É kplá mì yi xwé e gbe è ɖo agɔ̌ ɖu ɖe wɛ é,*
wǎnyíyí wɛ nyí hwexɔ́ e é kɛ́ nú mì é.
5 Mi sɔ́ wɔ̌xúxú e è sɔ́ vǐwun sín sínsɛ́n dó bló lɛ́ é dó fá kɔ nú mì;
mi sɔ́ pɔ́mu dó hɛn mì ɖó te,
ɖó wǎnyíyí d’azɔn mì.
6 É sɔ́ amyɔlɔ tɔn ɖó kɔ nú mì,
bo zunfán mì kpó ɖisílɔ tɔn kpó.
7 Ðyɔ̌vǐ Jeluzalɛ́mu tɔn lɛ́ mi, mi xwlé nǔ nú mì
ɖo tɛ́ lɛ́ kpó agbanlín asi gle mɛ tɔn lɛ́ kpó nukɔn:
Mi ma tɛ́n kpɔ́n bo fɔ́n wǎnyíyí dó lanmɛ nú mì, cóbónú éɖésúnɔ ɖó jlǒ tɔn ó.
8 Un ɖo mɛvívɛ́ ce sín gbe se wɛ!
Éyɛ́ nɛ́ ja nɛ́!
É ɖo só ɖaxó lɛ́ fán wɛ, bo ɖo só kpɛví lɛ́ lɔ́n d’asá wɛ.
9 Mɛvívɛ́ ce cí tɛ́ ɖɔhun, é cí zungbɔ́ wínnyáwínnyá ɖɔhun.
Éyɛ́ nɛ́, é ɖo te ɖo dǒ mǐtɔn gúdo,
é ɖo nǔ kpɔ́n sɛ́ dó wɛ gbɔn flɛtɛ́ lɛ́ nu,
é ɖo nǔ kpɔ́n gbɔn flɛtɛ́li lɛ́ nu wɛ.
10 Mɛvívɛ́ ce ɖo xó ɖɔ wɛ, é ɖɔ nú mì ɖɔ:
‘Wǎnyínámɔ ce, sí te,
sinsinmilinsin ce, xwedó mì.
11 Éɖíe! Avivɔhwenu* ko wá yi.
Jǐ ɖě sɔ́ ɖo jija wɛ ǎ.
12 Folówa lɛ́ ko tɔ́n ɖo to ɔ mɛ,
hwenu e è nɔ ɖe ala nú vǐwuntín lɛ́ é ko su,
bɔ è ɖo xwelé sín gbe se wɛ ɖo to mǐtɔn mɛ.
13 Fígitín lɛ́ ko ná sínsɛ́n nukɔntɔn lɛ́;
vǐwuntín lɛ́ gba sɛ́, bɔ wǎn yětɔn gba kpé.
Wǎnyínámɔ ce, sí te bo wá.
Sinsinmilinsin ce, xwedó mì.
14 Ahwannɛ́ ce, hwi mɛ e yi cí sónu mɛ é,
hwi mɛ e ɖo fí e è ma sixú yi ǎ ɖo só ɔ jí é,
nǔ má mɔ we bo se gbe towe,
ɖó gbe towe nɔ dɔn mɛ, bɔ a lɛ́ nyɔ́ ɖɛkpɛ tawun.’”
15 “Wlǐ ayǐsájɛ lɛ́ nú mǐ,
ayǐsájɛ kpɛví kpɛví e ɖo vǐwungbo lɛ́ hɛn gblé wɛ lɛ́ é,
ɖó vǐwuntín mǐtɔn lɛ́ ko wlí sɛ́.”
16 “Mɛvívɛ́ ce nyí nyɛtɔn, bɔ nyɛ nyí éyɛ́tɔn.
É ɖo lɛ̌ngbɔ́ nyi wɛ ɖo folówa lɛ́ tɛ́ntin.
17 Cóbónú jɔhɔn flɛ́flɛ́ kéze tɔn ná jɛ nyinyi jí,* bɔ yɛ ná fá hǔn,
yǎ wǔ lɛ́ kɔ, mɛvívɛ́ ce,
d’asá só e gbo tɛ́ntin mǐtɔn lɛ́ é* tɛ́ alǒ zungbɔ́ wínnyáwínnyá ɖɔhun.
3 “Ðo zan ce jí ɖo zǎn lɛ́ mɛ ɔ,
un ba mɛ e un* yí wǎn ná é.
Un ba ɛ, un ka mɔ ɛ ǎ.
2 Un ná sí te, bo ná gbɔn toxo ɔ mɛ;
un ná ba mɛ e un* yí wǎn ná é
ɖo ali lɛ́ jí kpó tokplétɛn lɛ́ kpó.
Un ba ɛ, un ka mɔ ɛ ǎ.
3 Mɛcɔ́tɔ́ e ɖo yiyi wɛ bo ɖo wǐwá wɛ ɖo toxo ɔ mɛ lɛ́ é mɔ mì.
‘Mi mɔ mɛ e un yí wǎn ná é a?’
4 Ée un zɛ yě wú zaan é
jɛ́n un mɔ mɛ e un* yí wǎn ná é.
Un zunfán ɛ, un ná jó è dó bónú é ná yi ǎ,
un ná jó è dó káká cóbó ná kplá ɛ yi nɔ ce sín xwégbe ǎ,
un ná kplá ɛ yi mɛ e ji mì é sín xɔnɔnɔ mɛ.
5 Ðyɔ̌vǐ Jeluzalɛ́mu tɔn lɛ́ mi, mi xwlé nǔ nú mì
ɖo tɛ́ lɛ́ kpó agbanlín asi gle mɛ tɔn lɛ́ kpó nukɔn:
Mi ma tɛ́n kpɔ́n bo fɔ́n wǎnyíyí dó lanmɛ nú mì, cóbónú éɖésúnɔ ɖó jlǒ tɔn ó.”
6 “Étɛ́ ka nyí nǔ énɛ́ e jawě sín gbětótló mɛ, bo cí azizɔ e mlí é ɖɔhun,
bo ɖo mǐla kpó zǎlínkpɔ́n wěwé kpó hwɛ́n wɛ,
gɔ́ nú ajɔ̌tɔ́ sín nǔhwɛ́nkún lili wǎnɖagbenɔ lɛ́ bǐ é?”
7 “Kpɔ́n! Salomɔ́ɔ sín kpɔn wɛ.
Súnnu hlɔ̌nhlɔ́nnɔ 60 wɛ lɛ́ lɛ̌ dó,
è cyán yě ɖo súnnu hlɔ̌nhlɔ́nnɔ Izlayɛ́li tɔn lɛ́ mɛ,
8 yě mɛ bǐ wɛ hɛn hwǐ,
è kplɔ́n ahwanfunfun yě mɛ bǐ,
mɛ ɖokpó ɖokpó hɛn hwǐ tɔn dó akpá,
bo ná dó húzú kpan nukɔn nǔ e nɔ ɖó adohu adohu nú mɛ zǎnmɛ lɛ́ é.”
9 “Axɔ́sú Salomɔ́ɔ sín kpɔn* wɛ,
Libáan sín atín lɛ́ wɛ é sɔ́ dó bló ná.
10 Nǔ e jí kpɔn ɔ jínjɔ́n lɛ́ é ɔ, kpatágan wɛ é sɔ́ dó bló ná,
nǔ e wú è nɔ gán jɛ lɛ́ é ɔ, siká wɛ é sɔ́ dó bló ná.
Azinkpo tɔn ɔ, lɛ̌ngbɔ́fún vɔvɔ e wi d’é mɛ é wɛ é sɔ́ dó bló ná;
ɖyɔ̌vǐ Jeluzalɛ́mu tɔn lɛ́
ba acɔ́ nú xo tɔn mɛ kpó wǎnyíyí kpó.”
11 “Ðyɔ̌vǐ Sinyɔ́ɔ tɔn lɛ́ mi, mi tɔ́n,
mi wá kpɔ́n axɔ́sú Salomɔ́ɔ,
é xwe alɔwlíwlígbákún* e nɔ tɔn bló n’i
ɖo alɔwlíwlízán tɔn gbe é,
ɖo azǎn e dó xomɛhunhun n’i é gbe é.”
4 “Wǎnyínámɔ ce, a nyɔ́ ɖɛkpɛ mɛ nya!
A nyɔ́ ɖɛkpɛ tawun.
Nukún towe lɛ́ cí ahwannɛ́ sín nukún lɛ́ ɖɔhun ɖo avɔ e cyɔ́n nukúnmɛ towe é glɔ́.
Ða towe cí gbɔ̌hwan
e ɖo te jɛ sín Galádi só lɛ́ jí wɛ é ɖɔhun.
2 Aɖǔ towe lɛ́ cí lɛ̌ngbɔ́hwan e è kpa fún ná yɔ̌yɔ́,
bo lɛ wǔ ná bɔ yě ɖo tíntɔ́n sín sin mɛ wɛ é ɖɔhun,
yě mɛ bǐ wɛ ɖó hǒxo,
yě mɛ ɖě sín vǐ bú ǎ.
3 Nufló towe lɛ́ cí kan vɔvɔ cɛ́cɛ́ ɖɔhun,
bɔ xó towe lɛ́ nɔ nyɔ́ se.
Glenádi e è zɛ é ɖɔhun
wɛ klɛ̌n* towe lɛ́ cí ɖo avɔ e cyɔ́n nukúnmɛ towe é glɔ́.
4 Kɔ towe cí atɔxwɛ Davídi tɔn
e è to awǐnnya ɖě ɖó ɖě jí dó mɛ é ɖɔhun;
è sɔ́ gǎglónú afatɔ́n kplá kɔ,
gǎglónú tobotobo súnnu hlɔ̌nhlɔ́nnɔ lɛ́ tɔn lɛ́ bǐ.
5 Anɔ̌ towe we lɛ́ cí tɛ́ví we ɖɔhun,
yě cí tɛ́ sín vǐ hǒxo
e ɖo nǔ ɖu wɛ ɖo folówa lɛ́ tɛ́ntin lɛ́ é ɖɔhun.”
6 “Cóbónú jɔhɔn flɛ́flɛ́ kéze tɔn ná jɛ nyinyi jí,* bɔ yɛ ná fá ɔ,
un ná yi só ɖaxó mǐla tɔn jí,
bo ná yi só kpɛví zǎlínkpɔ́n wěwé tɔn jí.”
7 “Wǎnyínámɔ ce, a nyɔ́ ɖɛkpɛ bɔ fínɛ́ jɛ́n ɖó,
blɔ̌ ɖěbǔ ɖo wǔ towe ǎ.
8 Asixɔ́ntɔn ce, mǐ ní gosín Libáan,
mǐ ní gosín Libáan.
Jɛ te sín Amána só ɔ sín ahɔn mɛ,
sín Seníi só ɔ sín ahɔn mɛ, sín Ɛmɔ́ɔ só ɔ sín ahɔn mɛ,
jɛ te sín adɔ̌tɛn kinnikínní lɛ́ tɔn lɛ́, sín só ɖaxó kpɔ lɛ́ tɔn lɛ́ jí.
9 A ɖu ɖo ayi ce jí, nɔví nyɔ̌nu ce, yawó ce,
ɖokpó jɛ́n a kpɔ́n mì kpowun bo ɖu ɖo ayi ce jí.
Nǔ xɔ akwɛ́ e ɖo kɔjɛ́ towe wú é ɖokpó jɛ́n ɖu ɖo ayi ce jí.
10 Nɔví nyɔ̌nu ce, yawó ce, wǎnyíyínúwiwa towe lɛ́ nyɔ́ lóóo!
Wǎnyíyínúwiwa towe lɛ́ nyɔ́ hú vɛ̌ɛn flaflá tɔn,
célu towe sín wǎn nyɔ́ hú nǔhwɛ́nkún lɛ́ bǐ tɔn!
11 Yawó ce, wǐinjá ɖo sisa sín nufló towe lɛ́ mɛ wɛ.
Wǐin kpó anɔ̌sin kpó ɖo ɖɛ̌ towe glɔ́,
wǎn e awu towe lɛ́ nɔ hwɛ́n é cí wǎn ɖagbe e Libáan nɔ hwɛ́n é ɖɔhun.
12 Nɔví nyɔ̌nu ce, yawó ce, a cí jikpá e ɖo súsú é ɖɔhun,
ɛɛn, jikpá e ɖo súsú é, tɔjɔtɛn e è sú gbánwúngbánwún é.
13 Ala towe lɛ́* ɔ, glenádi sín palaɖísi* ɖé wɛ,
bɔ atínsínsɛ́n e nyɔ́ hú gǎn lɛ́ é ɖ’é mɛ, gɔ́ nú hɛnnɛ́ɛ kpó nǎa* kpó,
14 nǎa kpó saflán kpó, fántín wǎnɖagbenɔ kpó kanɛ́lu kpó,
gɔ́ nú zǎlínkpɔ́n wěwé sín atín alɔkpa lɛ́ bǐ, mǐla, alowɛ́si
kpó célu e nyɔ́ hú gǎn lɛ́ é bǐ kpó.
15 Tɔjɔtɛn e ɖo jikpá mɛ é ɖé wɛ a nyí, dotɔ e mɛ sin fífá ɖe é,
bo nyí tɔsisa e ɖo sisa sín Libáan wɛ lɛ́ é.
16 Jɔhɔn totaligbé tɔn è, fɔ́n!
Jɔhɔn tofɔligbé tɔn è, wǎ!
Mi nyi* dó jikpá ce mɛ.
Mi nú wǎn tɔn ní gba kpé.”
“Mɛvívɛ́ ce ní byɔ́ jikpá tɔn mɛ,
bo ɖu atínsínsɛ́n e nyɔ́ hú gǎn ɖ’é mɛ lɛ́ é.”
5 “Nɔví nyɔ̌nu ce è, yawó ce,
un byɔ́ jikpá ce mɛ.
Un ba mǐla ce kpó nǔhwɛ́nkún ce kpó.
Un ɖu wǐinkpa ce kpó wǐin ce kpó;
un nu vɛ̌ɛn ce kpó anɔ̌sin ce kpó.”
“Xɔ́ntɔn vívɛ́ lɛ́ mi, mi ɖu nǔ!
Mi nu vɛ̌ɛn, mi nú wǎnyíyínúwiwa lɛ́ ní mú mi!”
2 “Un ɖo amlɔ mɛ, amɔ̌, ayi ce ɖo wunzɛn.
Un se mɛvívɛ́ ce sín gbe, bɔ é ɖo hɔn xúxú wɛ.
‘Hun hɔn nú mì, nɔví nyɔ̌nu ce, wǎnyínámɔ ce,
ahwannɛ́ ce, blɔ̌maɖowǔnánɔ ce!
Ðó ahǔn ko fá ta ce,
ahǔn zǎnmɛ tɔn ko fá ɖa ce.’
3 Un ko ɖe awu ce gaga ɔ,
má lɛ́ sɔ́ dó wɛ a?
Un ko klɔ́ afɔ ce lɛ́,
má lɛ́ sɔ́ yě tɛ kɔ́mɛ wɛ a?
4 Mɛvívɛ́ ce ɖe alɔ tɔn sín hɔnli ɔ nu,
bɔ un sɔ́ tuun nǔ e ɖo wiwa mì wɛ ɖo xomɛ lɛ́ é bǐ ǎ.
5 Un sí te, bo ná hun hɔn nú mɛvívɛ́ ce;
mǐla ɖo kunkun sín alɔ ce lɛ́ wú wɛ,
bɔ mǐla sín ami ɖo kunkun sín alɔví ce lɛ́ wú wɛ
kɔn nyi fí e è nɔ hɛn bo nɔ hun hɔn ɔ é.
6 Un hun hɔn ɔ nú mɛvívɛ́ ce,
amɔ̌, mɛvívɛ́ ce ko lɛ́ kɔ, é ko yi.
Wǔ kú mì hwenu e é yi é.*
Un ba ɛ, un ka mɔ ɛ ǎ.
Un ylɔ́ ɛ, é ka sɔ nú mì ǎ.
7 Mɛcɔ́tɔ́ e ɖo yiyi wɛ bo ɖo wǐwá wɛ ɖo toxo ɔ mɛ lɛ́ é mɔ mì.
Yě xo mì, yě gblé wǔ mì.
Mɛ e ɖo ahohó lɛ́ cɔ́ wɛ lɛ́ é yí avɔ e un cyɔ́n nukúnmɛ é sín así ce.
8 Ðyɔ̌vǐ Jeluzalɛ́mu tɔn lɛ́ mi, mi xwlé nǔ nú mì:
Ényí mi mɔ mɛvívɛ́ ce hǔn,
mi ɖɔ n’i ɖɔ wǎnyíyí d’azɔn mì.”
9 “Étɛ́ mɛvívɛ́ towe ka ɖó hú mɛvívɛ́ ɖěvo ɖěbǔ,
hwi mɛ e nyɔ́ ɖɛkpɛ hú nyɔ̌nu lɛ́ bǐ é?
Étɛ́ mɛvívɛ́ towe ka ɖó hú mɛvívɛ́ ɖěvo ɖěbǔ,
bɔ a byɔ́ mǐ ɖɔ mǐ ní xwlé nǔ mɔ̌hun nú émí?”
10 “Mɛvívɛ́ ce nyɔ́ ɖɛkpɛ tawun, bo ɖo kpɔnnɔɔ;
è na bo sɔ́ súnnu afatɔ́n donu wǒ ɖó te ɔ, è ná mɔ éɖɔhun we ɖ’é mɛ ǎ.
11 Ta tɔn ɔ, siká wɛ, ɛɛn, siká akú wɛ.
Ða tɔn lɛ́ cí děma e ɖo dǐndán wɛ é* ɖɔhun,
bo wi avǔnsákɔwó ɖɔhun.
12 Nukún tɔn lɛ́ cí ahwannɛ́ lɛ́ ɖo tɔsisa lɛ́ tó,
bo ɖo wǔ lɛ wɛ ɖo anɔ̌sin mɛ,
lobo jínjɔ́n sindo e sin gɔ́ é ɖé mɛ* ɖɔhun.
13 Klɛ̌n tɔn lɛ́ cí zan e è sɔ́ nǔhwɛ́nkún lɛ́ dó bló ná,
bɔ gběhan wǎnɖagbenɔ lɛ́ ɖ’é jí kpɔ́ gégé é ɖɔhun
nufló tɔn lɛ́ ɔ, folówa wɛ bɔ mǐla sín ami ɖo kunkun sín mɛ wɛ.
14 Alɔ tɔn lɛ́ ɔ, siká tobotobo lɛ́ wɛ bɔ klizolíti ɖo yě wú.
Adɔgo tɔn ɔ, ajinakúɖú e ɖíɖí bɔ è bú safíi dó é wɛ.
15 Afɔ tɔn lɛ́ ɔ, mǎblu dotín ɖěɖěe è sɔ́ siká akú dó bló dodónu yětɔn ná lɛ́ é wɛ.
É cí Libáan ɖɔhun, bɔ ɖɛkpɛ tɔn kpé we ǎ sɛ́dlutín lɛ́ tɔn ɖɔhun.
16 Nu* tɔn nɔ víví kpɔ́n!
Nǔ e ɖo wǔtu tɔn lɛ́ é bǐ wɛ nɔ dɔn mɛ.
Ðyɔ̌vǐ Jeluzalɛ́mu tɔn lɛ́ mi, mɛvívɛ́ ce nɛ́, wǎnyínámɔ ce nɛ́.”
6 “Hwi mɛ e nyɔ́ ɖɛkpɛ hú nyɔ̌nu lɛ́ bǐ é,
fítɛ́ mɛvívɛ́ towe ka yi?
Ali tɛ́ mɛvívɛ́ towe ka mlɛ́?
Nǔ mǐ ní ba ɛ xá we.”
2 “Mɛvívɛ́ ce jɛ te yi jikpá tɔn mɛ,
é jɛ te yi fí e nǔhwɛ́nkún sín gle lɛ́ ɖe é,
bo ná dó nyi lɛ̌ngbɔ́ gbɔn jikpá lɛ́ mɛ,
lobo ba folówa lɛ́.
3 Mɛvívɛ́ ce ɔ, un nyí étɔn,
bɔ mɛvívɛ́ ce nyí nyɛtɔn.
É ɖo lɛ̌ngbɔ́ nyi wɛ ɖo folówa lɛ́ tɛ́ntin.”
4 “Wǎnyínámɔ ce, a nyɔ́ ɖɛkpɛ Tíisa* ɖɔhun,
a nyɔ́ ɖɛkpɛ tawun Jeluzalɛ́mu ɖɔhun,
ɖɛkpɛ towe jí wǔ ahwankpá ɖěɖěe lɛ́ lɛ̌ dó asyá yětɔn lɛ́ é ɖɔhun.
5 Ðe nukún towe lɛ́ sín jǐ ce,
ɖó yě ɖo ayi gba dó nú mì wɛ.
Ða towe cí gbɔ̌hwan
e ɖo te jɛ sín Galádi só jí wɛ é ɖɔhun.
6 Aɖǔ towe lɛ́ cí lɛ̌ngbɔ́hwan e è lɛ wǔ ná,
bɔ yě ɖo tíntɔ́n sín sin mɛ wɛ é ɖɔhun,
yě mɛ bǐ wɛ ɖó hǒxo,
yě mɛ ɖě sín vǐ bú ǎ.
7 Glenádi e è zɛ é ɖɔhun
wɛ klɛ̌n* towe lɛ́ cí ɖo avɔ e cyɔ́n nukúnmɛ towe é glɔ́.
8 Axɔ́si 60 sixú ɖo fínɛ́,
xɔnnɔ 80 sixú ɖo fínɛ́,
gɔ́ nú ɖyɔ̌vǐ maxamaxa.
9 Amɔ̌, mɛ ɖokpó géé wɛ nyí ahwannɛ́ ce, blɔ̌maɖowǔnánɔ ce.
Éɖokpónɔ wɛ nyí vǐ nú nɔ tɔn.
É wɛ mɛ e ji i é yí wǎn ná hú gǎn.*
Vǐ nyɔ̌nu lɛ́ mɔ ɛ, bo ylɔ́ ɛ ɖɔ awǎjijɛnɔ;
axɔ́si lɛ́ kpó xɔnnɔ lɛ́ kpó mɔ ɛ, bo kpa susu n’i.
10 ‘Mɛ̌ ka nɛ́, bo nɔ kɔ́n* hwe tɔ́n ɖɔhun,
bo nyɔ́ ɖɛkpɛ sunkpéká ɖɔhun,
bo za wě wěziza hwe tɔn ɖɔhun,
bɔ ɖɛkpɛ tɔn jí wǔ ahwankpá ɖěɖěe lɛ́ lɛ̌ dó asyá yětɔn lɛ́ é ɖɔhun mɔ̌ nɛ́?’ ”
11 “Un jɛ te yi atín e nɔ ná sínsɛ́n lɛ́ é sín jikpá mɛ
bo ná dó kpɔ́n atín e wú ɖo tɔdo* ɔ mɛ yɔ̌yɔ́ lɛ́ é,
bo ná dó kpɔ́n ɖɔ vǐwuntín ko tɔ́n kun wɛ a jí,
lobo kpɔ́n ɖɔ glenáditín lɛ́ ko gba sɛ́ wɛ a jí.
12 Cóbónú un ná ɖó ayi nǔ e ɖo jijɛ wɛ é wú ɔ,
jlǒ* ce ko kplá mì yi
kɛkɛ́ví mɛjɔmɛ* ce lɛ́ tɔn lɛ́ kɔn.”
13 “Lɛ̌ kɔ, lɛ̌ kɔ, Sulámunu è!
Lɛ̌ kɔ, lɛ̌ kɔ,
bónú mǐ ní dó sixú kpɔ́n we!”
“Étɛ́wú mi ka ɖo Sulámunu ɔ kpɔ́n sɛ́ dó wɛ?”
“É cí gbɛ̌ta we sín weɖúɖú* ɖɔhun!”
7 “Vǐ nyɔ̌nu mɛjɔmɛ è,
afɔ towe lɛ́ nyɔ́ ɖɛkpɛ ɖo afɔkpa towe lɛ́ mɛ mɛ nya!
Asá towe lɛ́ nyɔ́ ɖɛkpɛ acɔ́banú lɛ́ ɖɔhun,
alɔlyɛnzɔ́watɔ́ sín azɔ̌ wɛ.
2 Hɔ̌nví towe ɔ, gannú tobotobo wɛ.
Vɛ̌ɛn e è cáká é ní ma hán ɖ’é mɛ gbeɖé ó.
Adɔgo towe ɔ, blěe e
è kplé bɔ folówa lɛ́ lɛ́ lɛ̌ dó é wɛ.
3 Anɔ̌ towe we lɛ́ cí tɛ́ví we ɖɔhun,
yě cí tɛ́ sín vǐ hǒxo ɖɔhun.
4 Kɔ towe cí atɔxwɛ e è sɔ́ ajinakúɖú dó bló ná é ɖɔhun.
Nukún towe lɛ́ cí sindo Hɛcibɔ́ni tɔn
e ɖo hɔntogbó Bati-Hlabímu tɔn kpá lɛ́ é ɖɔhun.
Awɔntín towe cí atɔxwɛ Libáan tɔn
e kpan nukɔn Damási é ɖɔhun.
5 Ta towe cí Kaamɛ́li ɖɔhun,
bɔ ɖa* towe cí lɛ̌ngbɔ́fún vɔvɔ e wi d’é mɛ é ɖɔhun.
Axɔ́sú ɔ kú temi nú ɖa towe gaga ɔ.*
6 Wǎnyínámɔ ce, a nyɔ́ ɖɛkpɛ mɛ nya!
A nyɔ́ kpɔ́n mɛ nya! A hú gǎn nǔ e nɔ dó xomɛhunhun nú mɛ lɛ́ é bǐ!
7 A ɖi ga dětín ɖɔhun,
bɔ anɔ̌ towe lɛ́ cí dǎti sín hwǐn lɛ́ ɖɔhun.
8 Un ɖɔ: ‘Un ná xá dětín ɔ jí,
bo ná sin děhwín lɛ́.’
Anɔ̌ towe lɛ́ ní cí vǐwun sín hwǐn lɛ́ ɖɔhun,
gbɔjɛ towe ní nyɔ́ wǎn pɔ́mu ɖɔhun,
9 bónú nu* towe ní cí vɛ̌ɛn e nyɔ́ hú gǎn é ɖɔhun.”
“É ní ɖíɖí yi do nú mɛvívɛ́ ce,
é ní sa dɛ̌dɛ̌ gbɔn nufló mɛ e ɖo amlɔ dɔ́ wɛ lɛ́ é tɔn lɛ́ jí.
10 Mɛvívɛ́ ce ɔ, un nyí étɔn,
bɔ nyi wɛ nɔ jló è.
11 Mɛvívɛ́ ce, wǎ,
mǐ ní yi gle lɛ́ mɛ;
mǐ ní yi nɔ hɛnnɛ́ɛtín lɛ́ tɛ́ntin.
12 Mǐ ní fɔ́n zǎn bo yi vǐwungbo lɛ́ mɛ
bo ná kpɔ́n ɖɔ vǐwun lɛ́ ko tɔ́n kun,
bɔ sɛ́ lɛ́ ko kɛ,
lobɔ glenáditín lɛ́ ko gba sɛ́ a jí.
Un ná ɖe wǎnyíyí ce xlɛ́ we ɖo fínɛ́.
13 Wǎnyíyí sín atínsínsɛ́n* lɛ́ ɖo wǎn ɖe wɛ;
atínsínsɛ́n ɖagbe ɖagbe alɔkpa lɛ́ bǐ ɖo hɔn mǐtɔn lɛ́ ta.
Atínsínsɛ́n yɔ̌yɔ́ kpó xóxó kpó bǐ
wɛ un fɔ ɖ’ayǐ nú we, mɛvívɛ́ ce.
8 “É ló ko nyí nɔví súnnu ce
e nɔ́ anɔ̌ ɖo nɔ ce kɔ́n mɛ é wɛ a nyí!
Énɛ́ ɔ, nú un mɔ we ɖo kɔ́xo ɔ, un ná kí si nú we,
bɔ mɛ ɖěbǔ ná dó hwɛ mì ǎ.
2 Un ná xlɛ́ ali we;
un ná kplá we yi nɔ ce xɔ mɛ,
éyɛ́ mɛ e kplɔ́n mì é.
Un ná ná vɛ̌ɛn wǎnɖagbenɔ we bɔ a ná nu
kpó glenádi sín sin e è fyɔ́n tlóló é kpó.
3 É ná sɔ́ amyɔlɔ tɔn ɖó kɔ nú mì,
bo ná zunfán mì kpó ɖisílɔ tɔn kpó.
4 Ðyɔ̌vǐ Jeluzalɛ́mu tɔn lɛ́ mi, mi xwlé nǔ nú mì:
Mi ma tɛ́n kpɔ́n bo fɔ́n wǎnyíyí dó lanmɛ nú mì, cóbónú éɖésúnɔ ɖó jlǒ tɔn ó.”
5 “Mɛ̌ ka jawě sín gbětótló mɛ,
bo ɖo mɛvívɛ́ tɔn sín awa mɛ nɛ́?”
“Pɔ́mutín sá wɛ un fɔ́n we ɖe.
Fínɛ́ wɛ nɔ towe se wǔvɛ́ ajidonu tɔn ɖe, hwenu e é ɖo xo towe é.
Fínɛ́ wɛ mɛ e ji we é se wǔvɛ́ ajidonu tɔn ɖe.
6 Sɔ́ mì ɖó hǔn towe jí wuntun ɖé ɖɔhun,
sɔ́ mì ɖó awa towe wú wuntun ɖé ɖɔhun,
ɖó wǎnyíyí ɖó hlɔ̌nhlɔ́n kú ɖɔhun,
Myɔ tɔn ɔ, zo hɛhɛ wɛ, myɔ Jǎa* tɔn.
7 Sin wǒkógo sixú xo wǎnyíyí sín myɔ cí ǎ,
mɔ̌ jɛ́n tɔsisa lɛ́ ma sixú kplɔ́ ɛ yi ǎ é nɛ́.
Ényí mɛɖé ná bo bɛ́ dɔkun e ɖo xwé tɔn gbe é bǐ jó bo ná dó xɔ wǎnyíyí ná ɔ,
è ná gbɛ́ wǎn ná* jɛ́n wɛ.”
8 “Mǐ ɖó nɔví nyɔ̌nu ɖokpó bɔ é kpo ɖo vǔ,
é ko tɔ́n anɔ̌ ǎ.
Étɛ́ mǐ ka ná wa nú nɔví nyɔ̌nu mǐtɔn,
ɖo gbe e gbe è ná wá byɔ́ ɛ bá da é?”
9 “Ényí ahohó wɛ é nyí ɔ,
mǐ ná zé kpatágan dó ɖó ata ná dó ba acɔ́ n’i,
amɔ̌, ényí hɔn wɛ é nyí ɔ,
mǐ ná xwe sɛ́dlutín sín xwlɛ nyi jí.”
10 “Nyɛ ɔ, ahohó wɛ un nyí,
bɔ anɔ̌ ce lɛ́ cí atɔxwɛ ɖɔhun.
Énɛ́ wú ɔ, ɖo nukún tɔn mɛ ɔ,
un cí mɛ e mɔ fífá é ɖɔhun.
11 Salomɔ́ɔ ɖó vǐwungbo ɖokpó ɖo Baálu-Hamɔ́ni.
É sɔ́ vǐwungbo ɔ dó alɔ mɛ nú mɛ e nɔ kpé nukún dó vǐwungbo wú lɛ́ é.
Yě mɛ ɖokpó ɖokpó ná nɔ sú kpatágankwɛ́ 1 000 nú sínsɛ́n e é nɔ ná é.
12 Un ɖó vǐwungbo nyiɖésúnɔ tɔn.
Salomɔ́ɔ è, towe wɛ nyí kpatágankwɛ́ 1 000 lɛ́,*
bɔ kpatágankwɛ́ 200 nyí mɛ ɖěɖěe nɔ kpé nukún dó sínsɛ́n tɔn wú lɛ́ é tɔn.”
13 “Hwi mɛ e nɔ nɔ jikpá lɛ́ mɛ é,
hǎgbɛ́ towe lɛ́ ɖo gbe towe ba ná se wɛ.
Nǔ má se gbe towe.”
14 “Mɛvívɛ́ ce, yǎ wǔ,
yǎ afɔ tɛ́,
alǒ zungbɔ́ wínnyáwínnyá
e ɖo wezun kán wɛ gbɔn nǔhwɛ́nkún sín só lɛ́ jí é ɖɔhun.”
Alǒ “Han e ɖo nukɔn nú han lɛ́ bǐ.”
Énɛ́ wɛ nyí, ɖyɔ̌vǐ lɛ́.
Alǒ “lǐndɔ̌n ce.”
Alǒ “aluwɛmɛvɔ.”
Alǒ vlafo, “Ða e a blá é zɔ́n bɔ klɛ̌n towe lɛ́ nyɔ́ ɖɛkpɛ.”
Alǒ “acɔ́banú tobotobo lɛ́.”
Blǔju tɔn, “nǎa.”
Alǒ “xwé mǐtɔn ɖaxó ɔ.”
Blǔju tɔn, “saflán.”
Blǔju tɔn, “vɛ̌ɛn xwégbe.”
Alǒ “Jǐhwenu.”
Blǔju tɔn, “Cóbónú kéze ná gbɔjɛ.”
Alǒ vlafo, “só e ɖó zizɛ lɛ́ é.” Alǒ “só Betɛ́ɛ tɔn lɛ́.”
Alǒ “lǐndɔ̌n ce.”
Alǒ “lǐndɔ̌n ce.”
Alǒ “lǐndɔ̌n ce.”
Akánma e ɖó xɔ ɖo ta bɔ è nɔ zán dó sɔ́ mɛ nukúnɖéjí ɖé é wɛ.
É sixú ɖo gesí dó gbǎkún e è sɔ́ folówa, alǒ ama dó bló é ɖé wɛ.
Alǒ “tókpánu.”
Blǔju tɔn, “Cóbónú kéze ná gbɔjɛ.”
Alǒ vlafo, “Anyǔ towe.”
Alǒ “jikpá.”
Atín kpɛví ɖé wɛ bo nɔ ɖó wǎn ɖagbe.
Alǒ “nyi flɛ́flɛ́.”
Alǒ vlafo, “Un ɖibla ba nyiɖée kpo hwenu e é ɖɔ xó é.”
Alǒ vlafo, “dǎti sín hwǐn.”
Alǒ vlafo, “tɔjɔtɛn tó.”
Blǔju tɔn, “Ðɛ̌xwɛ.”
Alǒ “Toxo e dɔn mɛ é.”
Alǒ “tókpánu.”
Blǔju tɔn, “Mɛ mímɛ́ wɛ é nyí nú mɛ e ji i é.”
Blǔju tɔn, “kpɔ́n do.”
Alǒ “tɔsisa.”
Alǒ “lǐndɔ̌n.”
Alǒ “jlǒ ɖagbenɔ.”
Alǒ “weɖúɖú Maanayímu tɔn.”
Blǔju tɔn, “ta.”
Alǒ “Ða towe gaga ɔ dó gɛdɛ axɔ́sú ɔ.”
Blǔju tɔn, “ɖɛ̌xwɛ.”
Alǒ “Madlagɔ́ɔ.”
Alǒ “gbejíninɔ.”
Kpɔ́n Xógbe ɖé lɛ́ sín tínmɛ.
“Jǎa” ɔ, sɛ́nkpo nyǐkɔ Jexóva ɔ tɔn wɛ.
Alǒ vlafo, “n’i.”
Blǔju tɔn, “towe wɛ nyí afatɔ́n ɔ.”