OZÉE
1 Jexóva ɖɔ xó nú Ozée* Beéli ví ɔ ɖo axɔ́sú Judáa tɔn Oziyási, Jotámu, Akázi kpó Ezekiyási kpó hwenu, kpó axɔ́sú Izlayɛ́li tɔn Jelobowámu Yoaci ví ɔ hwenu kpó. 2 Hwenu e Jexóva jɛ xó ɖɔ nú Ozée jí é ɔ, Jexóva ɖɔ nú Ozée ɖɔ: “Yi, bo d’asi; nyɔ̌nu e a ná da é ná wá dó afɔ gbě,* bo ná ji agaví lɛ́* nú we, ɖó é sín tonyinya* wú, bɔ to ɔ lɛ́ kɔ sín Jexóva gúdo bǐ gbídígbídí.”
3 Énɛ́ ɔ, é yi, bo da Gomɛ́ɛ, vǐ nyɔ̌nu Diblayímu tɔn; é mɔ xo bo ji vǐ súnnu ɖokpó n’i.
4 Énɛ́ gúdo ɔ, Jexóva ɖɔ nú Ozée ɖɔ: “Sun nyǐ i ɖɔ Izleyɛ́li,* ɖó zaanɖé din ɔ, un ná byɔ́ xwédo Jehu tɔn ɖɔ é ní ɖó hun e è kɔn nyi ayǐ ɖo Izleyɛ́li lɛ́ é sín gbe, bɔ un ná ɖó nǔ akɔta* Izlayɛ́li tɔn sín acɛkpikpa nu. 5 Azǎn énɛ́ gbe ɔ, un ná wɛ́n gǎ Izlayɛ́li tɔn ɖo tɔdo Izleyɛ́li tɔn mɛ.”*
6 É lɛ́ mɔ xo, bo ji nyɔ̌nuví ɖokpó. Bɔ Mawu ɖɔ nú Ozée ɖɔ: “Sun nyǐ i ɖɔ Lo-Hluxáma,* ɖó un sɔ́ ná kú nǔbláwǔ ɖě nú akɔta* Izlayɛ́li tɔn ǎ; un ná nya yě jɛ́n wɛ. 7 Amɔ̌, un ná kú nǔbláwǔ nú akɔta* Judáa tɔn, bɔ nyɛ Jexóva Mawu yětɔn ná hwlɛ́n yě; é nyí gǎ, hwǐ, ahwan, sɔ́ lɛ́, alǒ sɔ́xátɔ́ lɛ́ wɛ un ná zán dó hwlɛ́n yě ǎ.”
8 Ée Gomɛ́ɛ ɖe anɔ̌ nú Lo-Hluxáma gúdo é ɔ, é mɔ xo bo ji vǐ súnnu ɖokpó. 9 Énɛ́ gúdo ɔ, Mawu ɖɔ: “Sun nyǐ i ɖɔ Lo-Ami,* ɖó mi nyí togun ce ǎ, bɔ nyi lɔ ná nyí mitɔn ǎ.
10 “Bɔ togun Izlayɛ́li tɔn* sín kɛ́n ná sukpɔ́ xutanyɛ́kɛ́n ɖɔhun, bɔ è sixú xa ǎ. Bɔ fí e un ɖɔ nú yě ɖe ɖɔ: ‘Mi nyí togun ce ǎ’ ɖe é ɔ, un ná wá ɖɔ nú yě ɖɔ: ‘Mi wɛ nyí vǐ Mawu gbɛɖe ɔ tɔn lɛ́.’ 11 Bɔ togun Judáa kpó Izlayɛ́li kpó tɔn ná xo yěɖée kplé bo ná nɔ bǔ, bo ná sɔ́ nukɔntɔ́ ɖokpó nú yěɖée, lobo ná tɔ́n sín to ɔ mɛ, ɖó azǎn nukúnɖéjí ɖé wɛ é ná nyí nú Izleyɛ́li.
2 “Mi ɖɔ nú nɔví súnnu mitɔn lɛ́ ɖɔ: ‘Togun ce wɛ mi nyí!’*
Bo ɖɔ nú nɔví nyɔ̌nu mitɔn lɛ́ ɖɔ: ‘Nyɔ̌nu e è kú nǔbláwǔ ná lɛ́ é wɛ mi nyí!’*
2 Mi dó hwɛ nɔ mitɔn; mi dó hwɛ ɛ,
ɖó é nyí asi ce ǎ, nyi lɔ ka nyí asú tɔn ǎ.
É ɖó ná jó tonyinya* dó,
bo lɛ́ ɖe afɔdógbě tɔn sín anɔ̌ tɔn lɛ́ vlamɛ,
3 é ma nyí mɔ̌ ǎ ɔ, un ná ɖe è nyi mɛ̌ bo ná bló bɔ é ná cí lěe é ɖe gbe e gbe è ji i é ɖɔhun,
un ná bló bɔ é ná cí gbětótló ɖé ɖɔhun,
un ná sɔ́ ɛ dó ɖó ayǐkúngban e jí sin ma ɖe ǎ é ɖé,
bo ná bló bɔ é ná kú nugblá kú.
4 Un ná kú nǔbláwǔ nú vǐ tɔn lɛ́ ǎ,
ɖó agaví* wɛ yě nyí.
5 Ðó nɔ yětɔn ɔ, to wɛ é nɔ nya.*
Éyɛ́ mɛ e mɔ xo yětɔn é ɔ, winnyánú wɛ é wa, ɖó é ɖɔ:
‘Un ná jɛ xɔnnɔ ce e yí wǎn nú mì ɖésú lɛ́ é gúdo,
yě mɛ e nɔ ná wɔ̌xúxú kpó sin kpó mì,
bo nɔ ná lɛ̌ngbɔ́fún* kpó lɛ̌ɛnkanvɔ kpó, ami kpó ahan kpó mì lɛ́ é.’
6 Énɛ́ wú ɔ, un ná sú ali dó è kpó kpá e è sɔ́ wunkan dó dó é ɖé kpó;
un ná kplé awǐnnya dó jǐ lɛ́ lɛ̌ dó è,
mɔ̌ mɛ ɔ, é ná kpé wú bo mɔ ali bo dín ǎ.
7 É ná kán wezun jɛ xɔnnɔ tɔn e yí wǎn n’i ɖésú lɛ́ é gúdo, amɔ̌, é ná xwedó yě wú ǎ;
é ná ba yě, é ka ná mɔ yě ǎ.
Énɛ́ gúdo ɔ, é ná ɖɔ: ‘Un ná gbɔ bo lɛ́ kɔ yi asú ce* gɔ́n,
ɖó nǔ nyɔ́ nú mì hwenɛ́nu hú lěe un ɖe din é.’
8 É tuun ɖɔ nyi wɛ nɔ ná ɛ jinukún, vɛ̌ɛn yɔ̌yɔ́ kpó ami kpó ɖ’ayǐ ǎ,
é tuun ɖɔ nyi wɛ nɔ ná ɛ kpatágan bɔ é nɔ túnflá,
bo nɔ ná ɛ siká e é nɔ zán dó sɛn Baálu é ɖ’ayǐ ǎ.
9 ‘Énɛ́ wú ɔ, un ná lɛ́ kɔ wá bo ná yí jinukún ce lɛ́ sín así tɔn ɖo nǔkúnyiyahwenu,
bo ná yí vɛ̌ɛn yɔ̌yɔ́ ce ɖo vǐwungbigbɛhwenu,
un ná lɛ́ dɔn lɛ̌ngbɔ́fúnvɔ ce kpó lɛ̌ɛnkanvɔ ce kpó, éé ɖó ná hwlá mɛ̌ tɔn é sín wǔ tɔn.
10 Un ná ɖe è nyi mɛ̌, bɔ xɔnnɔ tɔn e yí wǎn n’i ɖésú lɛ́ é ná mɔ vaan,
bɔ mɛ ɖěbǔ ná hwlɛ́n ɛ sín alɔ ce mɛ ǎ.
11 Un ná ɖó nǔ awǎ e é nɔ jɛ é bǐ,
xwe tɔn lɛ́, sunwájǐxwe tɔn lɛ́, gbɔjɛzán tɔn lɛ́ kpó hwenu e é nɔ ɖu xwe lɛ́ é bǐ kpó nu.
12 Bɔ un ná sú kún dó nú vǐwuntín tɔn lɛ́ kpó fígitín tɔn lɛ́ kpó, éé wú é ɖɔ xó élɔ́ dó lɛ́ é:
“Nǔ e xɔnnɔ ce e yí wǎn nú mì ɖésú lɛ́ é ná mì dó sú axɔ́ mì lɛ́ é nɛ́”;
un ná sɔ́ yě dó húzú zungbó,
bɔ gběkanlin lɛ́ ná vúnvún yě ɖu.
13 Un ná byɔ́ ɛ ɖɔ é ní ɖó azǎn e gbe é xwlé vɔ̌sánú bǒcyɔ Baálu tɔn lɛ́ é sín gbe,
azǎn énɛ́ lɛ́ gbe ɔ, é nɔ sɔ́ alɔkɛ́ tɔn lɛ́ kpó acɔ́ɖónú tɔn lɛ́ kpó dó ba acɔ́ nú éɖée, bo nɔ kán wezun jɛ xɔnnɔ tɔn e yí wǎn n’i ɖésú lɛ́ é gúdo,
bo ka nɔ wɔn nyɛ,’ nǔ e nyɛ Jexóva ɖɔ é nɛ́.
14 ‘Un ná ɖɔ xó n’i, bɔ é ná byɔ́ éɖée mɛ,
un ná kplá ɛ yi gbětótló mɛ,
bo ná ɖɔ xó e ná byɔ́ ayi mɛ n’i lɛ́ é n’i.
15 Bɛ́ sín hwenɛ́nu ɔ, un ná sɔ́ vǐwungbo tɔn lɛ́ jó n’i,
bo ná sɔ́ tɔdo* Akɔ́ɔ tɔn jó n’i, bɔ é ná hun nukúnɖíɖó sín ali ɖé n’i;
é ná yí gbe nú mì ɖo fínɛ́, hwenu e é ɖo wǐnnyáwínnyá mɛ é ɖɔhun,
gbe e gbe é tɔ́n sín Ejípu to mɛ é ɖɔhun.
17 ‘Un ná yí bǒcyɔ Baálu tɔn lɛ́ sín nyǐkɔ sín nu n’i,
bɔ é sɔ́ ná flín nyǐkɔ yětɔn lɛ́ ɖě ǎ.
18 Gbe énɛ́ gbe ɔ, un ná jɛ akɔ ɖé xá gběkanlin lɛ́ dó togun ce tamɛ,
bo ná jɛ xá xɛ e nɔ zɔn gbɔn jǐnukúnsin lɛ́ é kpó kanlin e nɔ sá gbɔn kɔ́mɛ lɛ́ é kpó;
un ná ɖe gǎ, hwǐ kpó ahwan kpó sín to ɔ mɛ,
bo ná bló bɔ yě ná nɔ mlɔ́ ayǐ* ɖo ayijayǐ mɛ.
19 Un ná dó alɔwlíwlí sín akpá nú we bónú a ná nyí ce káká sɔ́yi;
un ná dó alɔwlíwlí sín akpá nú we sɔgbe xá nǔjlɔ́jlɔ́wiwa, hwɛjijɔ,
wǎnyíyí e ma nɔ sɛ do ǎ é kpó nǔbláwǔkúnúmɛ kpó.
20 Un ná dó alɔwlíwlí sín akpá nú we kpó gbejíninɔ kpó,
bɔ é ɖo wɛn ɖɔ a ná tuun nyɛ mɛ e nyí Jexóva é.
21 ‘Gbe énɛ́ gbe ɔ, un ná ná xósin,’ wɛ Jexóva ɖɔ,
‘ɛɛn, un ná ná xósin jǐnukúnsin,
bɔ jǐnukúnsin ná ná xósin ayǐkúngban;
22 bɔ xósin e ayǐkúngban ɔ ná ná é* wɛ nyí jinukún, vɛ̌ɛn yɔ̌yɔ́ kpó ami kpó;
bɔ Izleyɛ́li* ná mɔ nǔ énɛ́ lɛ́ e é byɔ́ lɛ́ é.
23 Un ná dó è nǔkún ɖɔhun dó ayǐkúngban ɔ jí, bɔ é ná nyí ce,
lobɔ un ná kú nǔbláwǔ nú éyɛ́ mɛ e è ma kú nǔbláwǔ ná ǎ é;*
un ná ɖɔ nú mɛ ɖěɖěe ma nyí togun ce ǎ lɛ́ é* ɖɔ: “Togun ce wɛ mi nyí,”
bɔ yě ná ɖɔ: “Hwi wɛ nyí Mawu mǐtɔn.”’”
3 Énɛ́ gúdo ɔ, Jexóva ɖɔ nú mì ɖɔ: “Lɛ̌ vɔ́ yi, bo yí wǎn nú nyɔ̌nu e súnnu ɖěvo yí wǎn ná, bɔ é ɖo afɔ dó gbě wɛ é, lěe Jexóva yí wǎn nú togun Izlayɛ́li tɔn, hwenu e é jɛ nǔmɛsɛn lɛ́ gúdo, bo yí wǎn nú vǐwun sínsɛ́n sín gatóo* gbɔn é ɖɔhun.”
2 Énɛ́ wú ɔ, un xɔ Gomɛ́ɛ yí kpatágankwɛ́ 15 kpó ɔ́ji nǔjlɛ́nú homɛ́ɛ* ɖokpó adaɖé kpó. 3 Énɛ́ gúdo ɔ, un ɖɔ n’i ɖɔ: “A ná nyí ce nú azǎn gěgé. A ɖó ná nya to* ǎ, a ka ɖó ná ɖóxó xá súnnu ɖěvo ǎ, bɔ nyi lɔ ná ɖóxó xá we ǎ.”
4 Ðó nú hwenu línlín* ɔ, togun Izlayɛ́li tɔn ná ɖó axɔ́sú ǎ, é ná ɖó axɔ́ví ǎ, é ná sá vɔ̌ ǎ, é ná ɖó dotín ǎ, é ka ná ɖó efódu kpó bǒcyɔ telafímu* lɛ́ kpó ǎ. 5 Énɛ́ gúdo ɔ, togun Izlayɛ́li tɔn ná lɛ́ kɔ bo ná ba Jexóva Mawu tɔn kpó Davídi axɔ́sú tɔn kpó; ɖo azǎn gǔdo gúdo tɔn lɛ́ mɛ ɔ, é ná lɛ́ kɔ wá Jexóva gɔ́n kpó xɛsi kpó, bo ná ba nyɔ̌ná tɔn.
4 Togun Izlayɛ́li tɔn è, mi ɖótó xó e Jexóva ɖɔ é,
ɖó Jexóva ɖó hwɛɖiɖɔxó ɖé xá mɛ e nɔ nɔ to ɔ mɛ lɛ́ é,
ɖó nǔgbóɖiɖɔ ɖě, wǎnyíyí e ma nɔ sɛ do ǎ é ɖě, Mawu tuuntuun ɖě ɖo to ɔ mɛ ǎ.
2 Nǔ xwíxwlé adingban tɔn lɛ́, adingbanɖíɖó, mɛhuhu,
ajojija, afɔdógbě alǒ nyɔ̌nu ɖěvo biba gba kpé,
bɔ mɛ lɛ́ nɔ ɖo hun kɔn nyi ayǐ wɛ magbokɔ.
3 Énɛ́ wú wɛ to ɔ ná nɔ aluwɛ mɛ,
bɔ mɛ e ɖo to ɔ mɛ lɛ́ é bǐ ná xú gǒ;
gběkanlin lɛ́ kpó xɛ e nɔ zɔn gbɔn jǐnukúnsin lɛ́ é kpó,
káká jɛ hweví e ɖo xu mɛ lɛ́ é jí ná kú.
4 “É ɖo mɔ̌ có, mɛ ɖěbǔ ní ma dɔn nǔ xá togun ɔ, alǒ gbɛ́ nǔ n’i ó,
ɖó togun towe cí mɛ ɖěɖěe nɔ dɔn nǔ xá vɔ̌sánúxwlémawutɔ́ ɖé é ɖɔhun.
5 Énɛ́ wú ɔ, a ná klɛ́n afɔ ɖo kéze ɖéɖé,
bɔ gbeyíɖɔ ɔ ná klɛ́n afɔ xá we, cí nǔ ɖɔ zǎn wɛ kú ɖɔhun.
Bɔ un ná xwe nɔ towe sín nu dó xɔ.*
6 È ná xwe togun ce sín nu dó xɔ,* ɖó nǔtuuntuun ɖě ɖe ǎ.
Ðó a gbɛ́ nǔtuuntuun wútu ɔ,
nyi lɔ ná gbɛ́ we, bɔ a sɔ́ ná wa vɔ̌sánúxwlémawutɔ́zɔ́ nú mì ǎ;
bɔ ɖó a wɔn sɛ́n* ce wútu ɔ,
nyi lɔ ná wɔn vǐ súnnu towe lɛ́.
7 Lě do yě ɖo kpɔ́ su d’é jí wɛ sɔ é ɔ, mɔ̌ do wɛ yě nɔ hu hwɛ dó mì sɔ.
Un ná sɔ́ susu yětɔn dó húzú winnyá.*
9 Nǔ e gbo togun ɔ é wɛ ná gbo vɔ̌sánúxwlémawutɔ́ ɔ lɔ;
un ná byɔ́ yě ɖɔ yě ní ɖó nǔ e yě wa lɛ́ é sín gbe.
Bɔ un ná zé nǔ e yě wa lɛ́ é sín awě dó xo yě.
10 Yě ná ɖu nǔ, é ka ná jɛmɛ nú yě ǎ.
Yě ná ɖóxó xá mɛ gěgé,* loɔ, yě ná gba kún ǎ,
ɖó yě se tónú nú Jexóva ǎ wútu.
12 Togun ce nɔ kan nǔ byɔ́ bǒcyɔ tɔn e è sɔ́ atín dó kpa lɛ́ é;
yě nɔ wa nǔ e kpo* yětɔn ɖɔ nú yě é;
ɖó tonyinya* sín jlǒ e yě ɖó é zɔ́n bɔ yě zɛ gbě,
bɔ tonyinya* yětɔn zɔ́n bɔ yě gbɛ́ ɖɔ émí kún ná hwíhwɛ́ émíɖée dó Mawu émítɔn glɔ́ ó.
13 Yě nɔ sá vɔ̌ ɖo só ɖaxó lɛ́ sín ahɔn mɛ,
bo nɔ dó vɔ̌ lɛ́ zo ɖo só kpɛví lɛ́ ta,
ɖo cɛ́nitín lɛ́, sitilásitín lɛ́ kpó atín ɖaxó ɖaxó lɛ́ bǐ kpó sá,
ɖó yě ɖó yɛtɛn ɖagbe wútu.
Énɛ́ wɛ zɔ́n bɔ vǐ nyɔ̌nu mitɔn lɛ́ nya to,*
bɔ vǐ mitɔn lɛ́ sín asi lɛ́ dó afɔ gbě.
14 Un ná byɔ́ vǐ nyɔ̌nu mitɔn lɛ́ ɖɔ yě ní ɖó to e yě nya é* sín gbe ǎ,
un ka ná byɔ́ vǐ mitɔn lɛ́ sín asi lɛ́ ɖɔ yě ní ɖó afɔ e yě dó gbě é sín gbe ǎ.
Ðó súnnu lɛ́ nɔ kplá tonyatɔ́ lɛ́ jɛ vo,
bo nɔ sá vɔ̌ ɖó kpɔ́ xá tonyatɔ́ sinsɛnxɔ mɛ tɔn lɛ́;
togun mɔ̌hun e ma ɖó nukúnnúmɔjɛnǔmɛ ǎ é ná dɔn.
15 Izlayɛ́li è, a ɖo to nya wɛ,*
amɔ̌, ma dɔn Judáa dó hwɛ ɖokpó ɔ mɛ ó.
Mi ma wá Gilugálu, alǒ Bɛti-Awɛ́ni ó,
Mi ma ka xwlé nǔ gbɔn lě ó: ‘Jexóva ɖo gbɛ jɛ́n wɛ ɔ!’
16 Ðó Izlayɛ́li húzú tasyɛ́ntɔ́ nyibúsú tasyɛ́ntɔ́ ɖé ɖɔhun.
Din ɔ, nyɛ Jexóva ɔ, un ná nyi yě agbo wínnyáwínnyá e ɖo amagbo e ɖo faɖaɖa é mɛ é* ɖé ɖɔhun wɛ a?
17 Eflayímu tɛ́ dó bǒcyɔ lɛ́ wú.
Ní nɔ gbɛ tɔn mɛ!
Bɔ acɛkpatɔ́* tɔn lɛ́ yí wǎn nú winnyánú lɛ́ wiwa titewungbe tɔn.
19 Jɔhɔn ná dó alɔ awa tɔn lɛ́ mɛ bo dɔn ɛ ɖidó,*
bɔ winnyá ná hu yě dó vɔ̌sísá yětɔn lɛ́ wú.”
5 Vɔ̌sánúxwlémawutɔ́ lɛ́ è mi, mi ɖótó,
togun Izlayɛ́li tɔn è mi, mi ɖó tó te,
mɛ e ɖo axɔ́sú sín hɔnmɛ lɛ́ è mi, mi ɖótó,
ɖó hwɛɖiɖɔ ɔ kan mi;
ɖó fɛ́ca ɖé wɛ mi nyí nú Misípa
bo nyí ɖɔ e cyɔ́n Tabɔ́ɔ jí é ɖé.
3 Un tuun Eflayímu,
Izlayɛ́li ɖo hwlǎhwlá dó mì ǎ.
Din ɔ, Eflayímu è, a ɖóxó xá mɛ gěgé;*
Izlayɛ́li hɛn éɖée blí.
4 Nǔwiwa yětɔn lɛ́ lɔn nǔ nú yě, bónú yě ná lɛ́ kɔ wá Mawu yětɔn gɔ́n ǎ,
ɖó yě jó jlǒ to nyinya* tɔn yětɔn dó bɔ é ɖu ɖo yě jí;
bɔ yě tuun Jexóva ǎ.
5 Goyíyí Izlayɛ́li ɖésúnɔ tɔn wɛ ɖe nǔ e é nyí é xlɛ́;*
Izlayɛ́li kpó Eflayímu kpó bǐ wɛ klɛ́n afɔ, ɖó nǔwanyido yětɔn wú,
bɔ Judáa lɔmɔ̌ klɛ́n afɔ xá yě.
6 Yě kplá kanlinhwan yětɔn lɛ́ bo yi ba Jexóva,
yě ka kpé wú bo mɔ ɛ ǎ.
É sɛ dó zɔ nú yě.
7 Yě nɔ gbejí nú Jexóva ǎ,
ɖó yě ji vǐ súnnu e ma nyí étɔn ǎ lɛ́ é.
Din ɔ, è ná vúnvún yě kpó nǔɖókan* yětɔn lɛ́ kpó ɖo sun ɖokpó mɛ.
8 Mi kún lanzo ɖo Gibéya, bo kún kpɛn ɖo Hlama!
Mi sú ahwanfunfun sín xó ɖo Bɛti-Awɛ́ni ɖɔ: Bɛnjamɛ́ɛ è, jɛ nukɔn ɖidó!
9 Eflayímu è, a ná húzú nǔ e xyɔ́ wǔ é ɖé ɖo tódɔnnúmɛ sín azǎn gbe.
Un ko ɖe nǔ e ná jɛ nǔgbó ɖo akɔta Izlayɛ́li tɔn lɛ́ tɛ́ntin é xlɛ́.
10 Axɔ́ví Judáa tɔn lɛ́ cí mɛ ɖěɖěe nɔ sɛ tɛn nú dogbó ayǐkúngban tɔn é ɖɔhun.
Un ná gba xomɛsin ce kɔn nyi yě jí sin ɖɔhun.
11 È gbídí kɔ nú Eflayímu, hwɛɖiɖɔ nyínyɛ́ ɛ,
ɖó é kán ɖ’é jí bo xwedó kɛntɔ́ tɔn lɛ́.
12 Énɛ́ wú ɔ, un cí avɔɖwivɔɖwi ɖɔhun nú Eflayímu,
bo cí nǔ nyinyɔ ɖɔhun nú togun Judáa tɔn.
13 Hwenu e Eflayímu mɔ ɖɔ émí ɖo azɔn jɛ wɛ, bɔ Judáa mɔ ɖɔ émí jɛ agadá é ɔ,
Eflayímu yi Asilíi, é sɛ́ mɛ dó axɔ́sú hlɔ̌nhlɔ́nnɔ ɖé gɔ́n.
Amɔ̌, axɔ́sú énɛ́ kpé wú bo gbɔ azɔn nú mi ǎ,
é ka lɛ́ kpé wú bo bló bɔ agadá mitɔn kú ǎ.
14 Un ná cí kinnikínní wínnyáwínnyá ɖé ɖɔhun nú Eflayímu,
bo ná cí kinnikínní hlɔ̌nhlɔ́nnɔ* ɖé ɖɔhun nú togun Judáa tɔn.
Nyiɖésúnɔ mɛtún ɔ ná vúnvún nǔ, bo ná ɖidó;
un ná wlí yě ɖidó, bɔ mɛ ɖěbǔ ná hwlɛ́n yě ǎ.
15 Un ná ɖidó bo ná lɛ́ kɔ yi tɛn ce mɛ, káká jɛ hwenu e yě ná sún sin nǔwanyido yětɔn lɛ́ tɔn fó dó é,
bɔ énɛ́ gúdo ɔ, yě ná ba fɛ́nú ce.
Hwenu e yě ná ɖo wǔvɛ́ mɛ é ɔ, yě ná ba mì.
6 “Mi wá bónú mǐ ní lɛ́ kɔ yi Jexóva gɔ́n,
ɖó é vúnvún mǐ, amɔ̌, é ná gbɔ azɔn nú mǐ.
É dó nǔ mǐ, amɔ̌, é ná blá akpa mǐtɔn lɛ́.
2 É ná bló bɔ gbɛ ná lɛ́ wá mǐ wú ɖo azǎn we gúdo.
Ðo azǎn atɔngɔ́ ɔ gbe ɔ, é ná sɔ́ mǐ sí te,
bɔ mǐ ná nɔ gbɛ ɖo nukɔn tɔn.
3 Mǐ ná tuun Jexóva, ɛɛn, mǐ ná ba vɛ́návɛ́ná bo ná tuun i.
Ayǐtéhɔ̌nnu ɖɔhun ɔ, wǐwá tɔn ná gblá ǎ;
é ná wá mǐ gɔ́n jǐ ɖaxó ɖé ɖɔhun,
xwejí e nɔ fá ayǐkúngban ɔ bǐ é ɖɔhun.”
4 “Eflayímu è, étɛ́ un ka ná sɔ́ we dó wa?
Judáa è, étɛ́ un ka ná sɔ́ we dó wa?
Ðó gbejíninɔ* mitɔn cí akpɔ́kpɔ́ zǎnzǎn tɔn lɛ́ ɖɔhun,
é cí ahǔn e nɔ yá wǔ xú é ɖɔhun.
5 Énɛ́ wú wɛ un ná gbo mi zin dɛ́ gbɔn gbeyíɖɔ lɛ́ gblamɛ;
un ná sɔ́ xó e nɔ tɔ́n sín nu ce mɛ lɛ́ é dó hu mi.
Bɔ hwɛ e è ɖɔ xá mi lɛ́ é ná kɔ́n wěziza ɖɔhun.
6 Ðó wǎnyíyí e ma nɔ sɛ do ǎ é* wɛ nɔ dó xomɛhunhun nú mì, é nyí vɔ̌sísá ǎ,
bɔ Mawu tuuntuun nɔ dó xomɛhunhun nú mì hú nǔníná e è nɔ dó blěbú tɔn zo lɛ́ é.
7 Amɔ̌, gbɛtɔ́ yǎyá ɖɔhun ɔ, togun ce gba akɔjijɛ ɔ.
Ðo fínɛ́ ɔ, yě nɔ gbejí nú mì ǎ.
8 Galádi nyí toxo nǔnyanyawatɔ́ lɛ́ tɔn,
è kɔn hun kɔn nyi ayǐ gbɔn toxo ɔ bǐ mɛ.
9 Kplékplé vɔ̌sánúxwlémawutɔ́ lɛ́ tɔn cí gbɛ̌ta ajotɔ́ axánsúnxó lɛ́ tɔn e tɔ wu nú mɛɖé é ɖɔhun.
Yě nɔ hu mɛ ɖo ali jí ɖo Sikɛ́mu,
ɖó winnyánú wɛ yě nɔ wa.
10 Un mɔ nǔ baɖabaɖa ɖé ɖo akɔta Izlayɛ́li tɔn mɛ.
Eflayímu nɔ fɔ́n bo nɔ ɖo to nya wɛ ɖo fínɛ́;
Izlayɛ́li hɛn éɖée blí.
11 Gɔ́ ná ɔ, togun Judáa tɔn è mi, è ko sɔ́ hwenu ɖé ɖó te bo ná xo mi kplé nǔkúnyiyahwenu ɖɔhun,
hwenɛ́nu ɔ, un ná kplá togun ce sín mɛ e ɖo kannumɔgbénu lɛ́ é lɛ́ kɔ wá.”
7 “Hweɖébǔnu e un ba ná gbɔ azɔn nú Izlayɛ́li é ɔ,
nǔwanyido Eflayímu tɔn nɔ jɛ wě,
bɔ nǔ nyanya e Samalíi wa é nɔ jɛ wě.
Ðó yě nɔ fɔ́n bo nɔ ɖo mɛ blɛ́ wɛ;
ajotɔ́ lɛ́ nɔ byɔ́ xwé lɛ́ gbe, bɔ gbɛ̌ta ajotɔ́ axánsúnxó lɛ́ tɔn nɔ gba mɛ ɖo agbawungba.
2 Amɔ̌, é tlɛ nɔ wá ayi yětɔn mɛ ɖɔ un ná flín nǔ nyanya e yě wa lɛ́ é bǐ ǎ.
Din ɔ, nǔwiwa yětɔn lɛ́ lɛ́ lɛ̌ dó yě;
nǔwiwa yětɔn lɛ́ ɖo nukɔn ce cɔɔ.
3 Yě nɔ dó xomɛhunhun nú axɔ́sú ɔ kpó nǔ nyanya e yě nɔ wa lɛ́ é kpó,
bo nɔ dó xomɛhunhun nú axɔ́ví lɛ́ kpó mɛblɛ́blɛ́ yětɔn kpó.
4 Yě bǐ wɛ nyí gbejímanɔtɔ́,*
bo nɔ ɖo jiji wɛ myɔkpó e wɔ̌xúxúɖatɔ́ ɖé flɔ́ é ɖɔhun;
wɔ̌xúxúɖatɔ́ ɔ nɔ ɖó myɔ ɔ fúnfún te hwenu e é nya linfín ɔ fó bo jó dó bónú é ná fɔ́n é.
5 Axɔ́sú mǐtɔn hwenu ɔ, axɔ́ví lɛ́ bɛ́ azɔn;
vɛ̌ɛn zɔ́n bɔ yě jɛ ma.
Axɔ́sú ɔ dó xɔ́ntɔn mɛcákotɔ́ lɛ́.
6 Ðó yě nɔ sɛkpɔ́ ɛ kpó ayi e ɖo jiji wɛ myɔkpó ɖɔhun é kpó.*
Wɔ̌xúxúɖatɔ́ ɔ nɔ dɔ́ amlɔ ɖo zǎn ɔ bǐ mɛ;
zǎnzǎn ɔ, myɔkpó ɔ nɔ ji myɔ hɛhɛ ɖɔhun.
7 Yě bǐ nɔ hun myɔ myɔkpó ɖé ɖɔhun,
bo nɔ vúnvún acɛkpatɔ́* yětɔn lɛ́.
Axɔ́sú yětɔn lɛ́ bǐ wɛ j’ayǐ;
mɛ ɖě ɖo yě mɛ bo byɔ́ alɔdó ce ǎ.
8 Eflayímu wlú éɖée ɖó kpɔ́ xá akɔta lɛ́.
Eflayímu cí gatóo e è ma lílɛ́ ɖo myɔkpó mɛ ǎ é ɖɔhun.
9 Jǒnɔ lɛ́ vɔ hlɔ̌nhlɔ́n tɔn, loɔ, é tuun ǎ.
Ða tɔn lɛ́ húzú hwa, é ka ɖ’ayi wú ǎ.
10 Goyíyí Izlayɛ́li ɖésúnɔ tɔn wɛ ɖe nǔ e é nyí é xlɛ́,
yě ka lɛ́ kɔ wá Jexóva Mawu yětɔn gɔ́n ǎ,
nǔ énɛ́ lɛ́ bǐ jɛ dó yě jí có, yě ba ɛ mɔ ǎ.
11 Eflayímu cí ahwannɛ́ xlonɔ, ée ayivɔ vún é* ɖɔhun.
Yě* byɔ́ alɔdó Ejípu tɔn; yě ba alɔdó ɖo Asilíi gɔ́n.
12 Yě ná bo yi fí ɖěbǔ ɔ, un ná nyi ɖɔ ce dó cyɔ́n yě.
Un ná bló bɔ yě ná j’ayǐ xɛ e nɔ zɔn gbɔn jǐnukúnsin lɛ́ é ɖɔhun.
Un ná dɔn tó nú yě sɔgbe xá akpá e un gba nú yě é.
13 Heelú yě, ɖó yě hɔn jɛ zɔ nú mì!
Kún yětɔn ná sú dó, ɖó yě hu hwɛ dó mì!
Un ɖo gbesisɔmɛ bo ná vɔ́ yě xɔ, loɔ, yě ɖó adingban dó wǔ ce.
14 Yě nɔ ɖo azɔn wɛn wɛ ɖo zan yětɔn lɛ́ jí có,
xó e yě nɔ sú bo nɔ byɔ́ alɔdó mì é nɔ gosín ayi yětɔn mɛ ǎ.
Ðó jinukún kpó vɛ̌ɛn yɔ̌yɔ́ kpó wútu ɔ, yě nɔ já wǔtu nú yěɖée;
yě nɔ húzú kpan nukɔn mì.
15 Un dɔn tó nú yě bo ná hlɔ̌nhlɔ́n awa yětɔn lɛ́ có,
yě fɔ́n gǔ dó jǐ ce, bo ɖo nǔ nyanya sín tuto bló wɛ.
16 Yě húzú, é ka nyí ɖo ali ɖagbe nu* ǎ;
è sixú ɖeji dó yě wú ǎ, daswé* e ma sɔ́ sixú da gǎ ǎ é ɖɔhun.
È ná sɔ́ hwǐ dó hu axɔ́ví yětɔn lɛ́, ɖó mɛmasíxó yětɔn lɛ́ wú.
Énɛ́ wú wɛ yě ná húzú nǔkiko ɖo Ejípu to mɛ.”
8 “Sɔ́ lanzo ɖó nu!
Mɛɖé ja hɔ̌n ɖɔhun, bo ná tɔ́n ahwan xwé Jexóva tɔn,
ɖó yě gba akɔjijɛ ce, bo t’afɔ sɛ́n ce jí.
2 Yě nɔ sú xó bo nɔ ɖɔ nú mì ɖɔ: ‘Mawu mǐtɔn, mǐ, Izlayɛ́li ví lɛ́, tuun we!’
3 Izlayɛ́li gbɛ́ nǔ e nyí nǔ ɖagbe é.
Kɛntɔ́ ɖé ní jɛ gbě tɔn mɛ.
4 Yě sɔ́ axɔ́sú lɛ́, é ka nyí kpó jlǒ ce kpó ǎ.
Yě sɔ́ axɔ́ví lɛ́, un ka tuun do tɔn ǎ.
Yě zán kpatágan yětɔn lɛ́ kpó siká yětɔn lɛ́ kpó dó bló bǒcyɔ lɛ́ ná,
bɔ énɛ́ ná sú kún yětɔn dó.
5 Samalíi è, un gbɛ́ nyibúví sín bǒcyɔ towe.
Xomɛ yětɔn sin mì tawun.
Káká hwetɛ́nu yě ma ka ná kpé wú bo nyí xomɛvɔ́nɔ* ǎ yi jɛ?
6 Ðó nǔ énɛ́ ɔ, Izlayɛ́li sín alɔ núwiwa wɛ.
Alɔlyɛnzɔ́watɔ́* wɛ bló, é nyí Mawu nǔgbó ɔ ǎ;
nyibúví sín bǒcyɔ Samalíi tɔn ɔ, è ná gba ɛ hánnyá.
7 Ðó jɔhɔn dó wɛ yě ɖe,
bo ka ná wá ya jɔhɔn syɛ́nsyɛ́n.
Jinukún sín atín* ɖě nɔ ná jinukún e nyɔ́ é ǎ;
nǔ ɖěbǔ tɔ́n kun ɔ, é nɔ ná linfín ɖě ǎ.
Ényí ɖě ná bo ná nǔ ɔ, toɖévomɛnu* lɛ́ ná sɔ́ mì.
8 È ná mì Izlayɛ́li.
Din ɔ, yě ná cí zɛ̌n e mɛɖé ma sɔ́ ba ǎ é ɖɔhun,
ɖo akɔta lɛ́ tɛ́ntin.
9 Ðó yě hun káká yi Asilíi, tócí gbě tɔn e ɖo éɖokpó é ɖɔhun.
Eflayímu yí nyɔ̌nu ɖé lɛ́ bónú yě ná nyí xɔnnɔ tɔn lɛ́.
10 Yě yí nyɔ̌nu énɛ́ lɛ́ ɖo akɔta lɛ́ mɛ có,
un ná xo yě kplé din;
yě ná jɛ wǔvɛ́ se jí ɖó agban e axɔ́sú ɔ kpó axɔ́ví lɛ́ kpó ná ɖó kɔ jí nú yě é wú.
11 Ðó Eflayímu bló vɔ̌sákpe gěgé, bɔ énɛ́ dɔn ɛ dó hwɛhuhu mɛ.
Yě húzú vɔ̌sákpe e é nɔ dó hu hwɛ ná lɛ́ é.
12 Un wlán nǔ e ɖo sɛ́n* ce mɛ lɛ́ é gěgé n’i,
amɔ̌, é nɔ kpɔ́n yě dó mɔ nǔkpácámɛ.
13 Yě nɔ xwlé nǔníná vɔ̌sísá tɔn lɛ́ mì, bo nɔ ɖu lan ɔ,
amɔ̌, nyɛ Jexóva ɔ, é nɔ nyɔ́ nukún ce mɛ kwín ɖokpó ǎ.
Din ɔ, un ná flín nǔwanyido yětɔn bo ná dɔn tó nú yě ɖó hwɛhuhu yětɔn lɛ́ wú.
Yě ba alɔdó Ejípu tɔn.*
14 Izlayɛ́li wɔn Mɛ e bló è é, bo gbá sinsɛnxɔ lɛ́ nú nǔmɛsɛn lɛ́,
bɔ Judáa gbá toxo e è mɛ ahohó lɛ́ lɛ̌ dó é gěgé.
Amɔ̌, un ná sɛ́ myɔ dó toxo tɔn lɛ́ mɛ,
bɔ é ná fyɔ́ atɔxwɛ toxo énɛ́ lɛ́ ɖokpó ɖokpó tɔn.”
9 “Izlayɛ́li è, ma j’awǎ ó,
ma ɖe awǎjijɛ xlɛ́ togun lɛ́ ɖɔhun ó.
Ðó é sín tonyinya* wú, bɔ a zɛ gbě sín Mawu towe gúdo.
A yí wǎn nú axɔ́ e è nɔ sú we, ɖó tonyinya wú ɖo jinukúnsótɛn lɛ́ bǐ lɛ́ é.
2 Amɔ̌, jinukúnsótɛn kpó vǐwunto kpó ná ná nǔɖuɖu we ǎ,
bɔ a ná lɛ́ ba vɛ̌ɛn yɔ̌yɔ́ kpo.
3 Togun Izlayɛ́li tɔn sɔ́ ná nɔ ayǐkúngban Jexóva tɔn jí ǎ;
é nyɔ́ wa ɔ, Eflayímu ná lɛ́ kɔ yi Ejípu,
bɔ é ná ɖu nǔ kwíji ɖo Asilíi.
4 Yě sɔ́ ná kɔn nǔníná vɛ̌ɛn tɔn ɖě nyi ayǐ nú Jexóva ǎ;
vɔ̌ e yě nɔ sá lɛ́ é ná hun xomɛ n’i ǎ.
Yě cí aluwɛ sín wɔ̌xúxú ɖɔhun;
mɛ ɖěɖěe ná ɖu lɛ́ é bǐ wɛ ná hɛn yěɖée blí.
Ðó wɔ̌xúxú yětɔn ɔ, adɔ yětɔn kɛ́ɖɛ́ jɛ́n é nɔ gbɔ;*
é ná byɔ́ xwé Jexóva tɔn gbe ǎ.
5 Étɛ́ mi ka ná wa ɖo kplézán gbe,*
azǎn e gbe è nɔ ɖu xwe nú Jexóva é?
6 Ðó mi kpɔ́n! É ná byɔ́ ɖɔ yě ní hɔn ɖó kún súsú dó nú nǔ wútu.
Ejípu ná xo yě kplé, bɔ Mɛfísi ná ɖi yě.
Wunkan lɛ́ ná vun blá nǔ xɔ akwɛ́ kpatágan tɔn yětɔn lɛ́,
wunkan lɛ́ ná nɔ goxɔ yětɔn lɛ́ mɛ.
7 Azǎn e gbe yě ná ɖó nǔ e yě wa lɛ́ é sín gbe lɛ́ é ná wá,
azǎn e gbe è ná dɔn tó nú yě lɛ́ é ná wá,
bɔ Izlayɛ́li ná mɔ nǔ jɛ mɛ.
Gbeyíɖɔ yětɔn ná hun taɖu, bɔ gbeyíɖɔ-nyíjɛtɔ́ ɔ ná hun alɛ;
ɖó nǔwanyido towe lɛ́ sukpɔ́ wútu ɔ, wǎn e è gbɛ́ nú we é d’agba.”
8 Mɛcɔ́tɔ́ Eflayímu tɔn ɖo kpɔ́ xá Mawu ce ɖ’ayǐ,
amɔ̌ din ɔ, gbeyíɖɔ tɔn lɛ́ sín nǔwiwa lɛ́ bǐ wɛ cí xɛwlítɔ́ sín mɔ lɛ́ ɖɔhun;
wǎngbɛ́númɛ ɖo Mawu tɔn sín xwégbe.
9 Yě dó ve ɖo nǔnyanyawiwa mɛ, lěe Gibéyanu lɛ́ wa gbɔn hweɖénu é ɖɔhun.
Mawu ná flín nǔwanyido yětɔn, bo dɔn hwɛ yětɔn lɛ́ sín tó nú yě.
10 “Hwenu e un mɔ Izlayɛ́li é ɔ, é cí lěe è nɔ mɔ vǐwun ɖo gbětótló mɛ é ɖɔhun.
Hwenu e un mɔ tɔ́gbó towe lɛ́ é ɔ, é cí lěe è nɔ mɔ fígi nukɔntɔn lɛ́ ɖo fígitín jí é ɖɔhun.
Amɔ̌, yě jɛ Baálu Peɔ́ɔ tɔn gúdo;
yě zé yěɖée jó nú winnyánú,*
bɔ yě húzú nǔ e xyɔ́ wǔ é, nǔ e yě yí wǎn ná é ɖɔhun.
11 Susu Eflayímu tɔn zɔn yi xɛ ɖɔhun;
nyɔ̌nu ɖě ná ji vǐ, hɛn xo, alǒ tlɛ ná mɔ xo ǎ.
12 Yě ná bo tlɛ ɖó vǐ bo hɛn ɔ,
un ná yí yě sín yě sí, káká bɔ é sɔ́ ná kpo ɖě ǎ;
ɛɛn, heelú yě hwenu e un ná jó yě dó é!
13 Eflayímu ɔ, è dó è nyi amagbo mɛ, bɔ Tíi ɖɔhun wɛ é cí nú mì ɖ’ayǐ;
din ɔ, Eflayímu ɖó ná kplá vǐ súnnu tɔn lɛ́ yi mɛhutɛn.”
14 Jexóva è, nǎ yě, ɛɛn, nǎ yě nǔ e a ɖó ná ná yě é;
adɔgo e nɔ gblé xo é kpó anɔ̌ e ma ɖó sin ǎ* lɛ́ é kpó.
15 “Nǔ nyanya e yě wa lɛ́ é bǐ ɔ, Gilugálu wɛ yě wa ɖe, bɔ fínɛ́ wɛ un gbɛ́ wǎn nú yě ɖe.
Un ná nya yě sín xwé ce gbe, ɖó nǔ nyanya e yě wa lɛ́ é wú.
Un sɔ́ ná yí wǎn ɖě nú yě ǎ;
axɔ́ví yětɔn lɛ́ bǐ wɛ nɔ syɛ́n ta.
16 È ná gbo Eflayímu zin dɛ́ atín ɖɔhun.
Ðɔ yětɔn ná xú, bɔ yě ná ná sínsɛ́n ɖě ǎ.
Ényí yě ná bo tlɛ ji vǐ ɔ, un ná hu vǐ énɛ́ lɛ́ e yě yí wǎn ná lɛ́ é.”
17 Mawu ce ná gbɛ́ yě,
ɖó yě ɖótó è ǎ wútu,
bɔ yě ná húzú mɛ e ɖo hinhɔn gbɔn gbějǎgbějǎ wɛ lɛ́ é ɖo akɔta lɛ́ tɛ́ntin.
10 “Izlayɛ́li cí vǐwuntín nyinyɔ* e jí sínsɛ́n ɖe é ɖɔhun.
Lě do sínsɛ́n tɔn lɛ́ ɖo jijɛjí wɛ sɔ é ɔ, mɔ̌ do wɛ é nɔ gbá vɔ̌sákpe gěgé sɔ;
lě do jinukún e ayǐkúngban tɔn ná é nyɔ́ sɔ é ɔ, mɔ̌ do wɛ dotín tɔn e é nɔ zán nú nǔmɛsɛn lɛ́ é nɔ nyɔ́ ɖɛkpɛ sɔ.
2 Ayi yětɔn nɔ wa yɛmɛnú;*
din ɔ, è ná mɔ ɖɔ yě kú hwɛ.
Mɛɖé ná gba vɔ̌sákpe yětɔn lɛ́, lobo ná gba dotín yětɔn lɛ́.
3 Din ɔ, yě ná ɖɔ: ‘Mǐ ɖó axɔ́sú ɖě ǎ, ɖó mǐ ɖó sísí e gɔ́ngɔ́n é nú Jexóva ǎ.
Bɔ nú mǐ ná bo ɖó axɔ́sú ɖé wɛ nyí ɔ, étɛ́ é ka sixú wa nú mǐ?’
4 Yě nɔ ɖɔ xó vɔ̌tɔ́ lɛ́, nɔ xwlé nǔvú, bo nɔ jɛ akɔ lɛ́;
énɛ́ wú wɛ hwɛɖónúmɛ e fɔ́n ajijimɛ é cí ama aɖǐvɛ́nɔ e ɖo hwɛnxlo mɛ ɖo gle mɛ lɛ́ é ɖɔhun.
5 Mɛ e nɔ nɔ Samalíi lɛ́ é ná ɖi xɛsi nú nyibúví sín bǒcyɔ e ɖo Bɛti-Awɛ́ni é.
Togun ɔ ná nɔ aluwɛ mɛ dó takún tɔn mɛ,
nǔ ɖokpó ɔ wɛ é ná nyí nú nǔmɛsɛn toɖévomɛ tɔn sín hunnɔ lɛ́, éé jɛ awǎ ɖó bǒcyɔ ɔ kpó susu tɔn kpó wú lɛ́ é lɔ.
Ðó è ná sɔ́ ɛ sín yě gɔ́n yi kannumɔgbénu.
6 È ná sɔ́ ɛ yi Asilíi, bɔ é ná nyí nǔníná nú axɔ́sú ɖaxó ɖé.
È ná dó winnyá Eflayímu,
bɔ Izlayɛ́li ná ɖu winnyá ɖó wěɖexámɛ e é xwedó é wú.
7 É ɖo wɛn ɖɔ, Samalíi kpó axɔ́sú tɔn kpó ná bú,*
atínla e wɛ́n jɛ sin nukúnmɛ é ɖé ɖɔhun.
8 È ná vívá tɛn mímɛ́ Bɛti-Awɛ́ni tɔn, éé zɔ́n bɔ Izlayɛ́li hu hwɛ lɛ́ é bǐ mlɛ́mlɛ́.
Wun kpó gběhan nyanya lɛ́ kpó ná wú ɖo vɔ̌sákpe yětɔn lɛ́ jí.
Mɛ lɛ́ ná ɖɔ nú só ɖaxó lɛ́ ɖɔ: ‘Mi cyɔ́n mǐ jí!’
Bo ná ɖɔ nú só kpɛví lɛ́ ɖɔ: ‘Mi mu jɛ mǐ jí!’
9 Izlayɛ́li è, sín nǔ e jɛ ɖo Gibéya é hwenu wɛ a hu hwɛ.
Fínɛ́ ɔ, yě ɖó kan dó hwɛ ɖokpó ɔ huhu wú.
Ahwan sú kún dó nú nǔagɔwatɔ́ lɛ́ sín vǐ lɛ́ mlɛ́mlɛ́ ɖo Gibéya ǎ.
10 Un ná dɔn tó nú yě hweɖébǔnu e é jló mì é.
Togun lɛ́ ná xo yěɖée kplé bo húzú kpan nukɔn yě,
hwenu e è sin hwɛ yětɔn we lɛ́ dó yě wú é.*
11 Nyibú asixwɛ e è kplɔ́n bɔ é yí wǎn nú nǔkún sísó é wɛ Eflayímu nyí ɖ’ayǐ,
énɛ́ wú ɔ, un wa nǔɖé nú kɔ tɔn ɖɛkpɛ ɖɛkpɛ ɔ ǎ.
Din ɔ, un ná bló bɔ mɛɖé ná kun* Eflayímu.
Judáa ná zán glelɛmɔ dó lɛ gle; Jakɔ́bu ná gba hwɛn sín kɔ́gó nú mɛ énɛ́.
12 Mi dó nǔjlɔ́jlɔ́wiwa, bá ya wǎnyíyí e ma nɔ sɛ do ǎ é.
Mi lɛ ayǐkúngban e sixú nyɔ́ jinukún é,
hwenu e hwenu kpo bɔ è sixú ba Jexóva é,
káká jɛ hwenu e é ná wá bo kplɔ́n nǔjlɔ́jlɔ́wiwa mi dó é.
13 Amɔ̌, mi dó nǔnyanyawiwa,
mi ya nǔagɔwiwa,
bo ɖu mɛblɛ́blɛ́ sín sínsɛ́n;
ɖó mi ɖeji dó miɖée wú,
mi ɖeji dó ahwanfuntɔ́ wɔ̌búwɔ́bú mitɔn lɛ́ wú.
14 Zǐngídi ɖé ná fɔ́n dó togun mitɔn jí,
bɔ è ná sú kún dó nú toxo syɛ́nsyɛ́n mitɔn lɛ́ bǐ,
lěe Calumáni sú kún dó nú Bɛti-Aabɛ́li gbɔn,
ɖo gbe e gbe è hu nɔ lɛ́ kpó vǐ yětɔn lɛ́ kpó dó dǎka mɛ ɖo ahwan hwenu é ɖɔhun.
15 Betɛ́li è, nǔ e ná gbo we ɖó nǔ nyanya e a wa zɛ xwé wú é wú é nɛ́.
É ɖo wɛn ɖɔ, zǎnzǎn tɛɛn ɔ, axɔ́sú Izlayɛ́li tɔn ná bú.”*
11 “Hwenu e Izlayɛ́li nyí vǐ súnnu ɖé é ɔ, un yí wǎn n’i,
bɔ un ylɔ́ vǐ súnnu ce tɔ́n sín Ejípu.
2 Lě do yě* ylɔ́ yě sɔ é ɔ,
mɔ̌ do wɛ yě jɛ zɔ nú yě sɔ.
Yě nɔ xwlé vɔ̌sánú bǒcyɔ Baálu tɔn lɛ́,
yě nɔ dó vɔ̌ zo nú bǒcyɔ kpikpa lɛ́.
3 É ɖo mɔ̌ có, nyi wɛ kplɔ́n zɔnlin ɖiɖi Eflayímu, nyi wɛ sɔ́ yě ɖó awa ce lɛ́ mɛ.
Loɔ, yě yí gbe ɖɔ nyi wɛ gbɔ azɔn nú yě ǎ.
4 Un kpo ɖo yě dɔn wɛ kpó kan gbɛtɔ́ tɔn lɛ́* kpó, ɛɛn, kpó wǎnyíyí sín kan lɛ́ kpó.
Un cí mɛ e ɖe agbanhɛnkpo sín kɔ yětɔn lɛ́ jí é ɖɔhun nú yě ɖ’ayǐ,
bɔ un nɔ hɛn nǔɖuɖu yi jó nú yě mɛ ɖokpó ɖokpó kpó xomɛnyínyɔ́ kpó.
5 Yě ná lɛ́ kɔ yi Ejípu to mɛ ǎ, loɔ, Asilíi ná nyí axɔ́sú yětɔn,
ɖó yě gbɛ́ ɖɔ émí kún ná lɛ́ kɔ wá gɔ̌n ce ó.
6 Hwǐ ná za nǔ gbɔn toxo yětɔn lɛ́ mɛ,
bo ná gba hɔntogbó yětɔn lɛ́ sín gankpotín lɛ́, lobo vúnvún yě, ɖó tuto baɖabaɖa yětɔn lɛ́ wú.
7 Togun ce kán ɖ’é jí bo ná gɔn gbejí nɔ nú mì.
Yě ylɔ́ yě ɖɔ yě ní kpɔ́n jǐ aga* có, yě ɖě wa mɔ̌ ǎ.
8 Eflayímu è, nɛ̌ un ka sixú jó we dó gbɔn?
Izlayɛ́li è, nɛ̌ un ka sixú jó we dó nyi alɔ mɛ nú kɛntɔ́ towe lɛ́ gbɔn?
Nɛ̌ un ka sixú wa nǔ xá we Adíma ɖɔhun gbɔn?
Nɛ̌ un ka sixú bló bɔ a ná cí Seboyímu ɖɔhun gbɔn?
Un ko húzú linlin;
hwe ɖokpó ɔ nu ɔ, nǔ towe blá wǔ nú mì ɖésú.*
9 Un ná ɖe xomɛsin ɖaxó e jí un ɖe é xlɛ́ ǎ.
Un ná sú kún dó nú Eflayímu azɔn ɖěvo ǎ,
ɖó Mawu wɛ un nyí, un nyí gbɛtɔ́ ǎ,
nyi wɛ nyí Mɛ mímɛ́ e ɖo kpɔ́ xá we é;
un ná wa nǔ xá we kpó xomɛsin kpó ǎ.
10 Yě ná ɖi zɔnlin ɖo Jexóva gúdo, bɔ é ná dó gbe kinnikínní ɖé ɖɔhun;
hwenu e é ná dó gbe é ɔ, vǐ tɔn lɛ́ ná ɖo sísɔ́sísɔ́ wɛ, bo ná wá sín gbadahwe jí.
11 Yě ná sísɔ́ xɛ ɖɔhun hwenu e yě ná tɔ́n sín Ejípu é,
bo ná sísɔ́ ahwannɛ́ ɖɔhun hwenu e yě ná tɔ́n sín Asilíi to mɛ é,
bɔ un ná bló bɔ yě ná nɔ xwé yětɔn lɛ́ gbe,” wɛ Jexóva ɖɔ.
12 “Adingban kɛ́ɖɛ́ wɛ Eflayímu nɔ ɖó nú mì,
bɔ togun Izlayɛ́li tɔn nɔ blɛ́ mì.
Amɔ̌, Judáa kpo ɖo yiyi xá Mawu wɛ,
bo ɖo gbejí nú Mɛ mímɛ́ bǐ ɔ.”
12 “Eflayímu nɔ ɖu jɔhɔn.
É nɔ ɖo wezun kán ɖo jɔhɔn zǎnzǎnhwe jí tɔn ɔ gúdo wɛ ɖo kéze ɔ bǐ mɛ.
É nɔ bló bɔ adingban tɔn kpó dǎkaxixo tɔn kpó nɔ ɖo kpɔ́ su d’é jí wɛ.
Yě nɔ jɛ akɔ xá Asilíi, bo nɔ hɛn ami yi Ejípu.
2 Jexóva ɖó hwɛɖiɖɔxó ɖé xá Judáa,
é ná byɔ́ Jakɔ́bu ɖɔ é ní ɖó nǔ e é wa lɛ́ é sín gbe,
é ná sú nǔ e é wa lɛ́ é sín axɔ́ ɛ.
3 É hɛn nɔví tɔn sín afɔgbɛnnu hwenu e é ɖo nɔ tɔn xomɛ é,
é dó alɔ xá Mawu kpó hlɔ̌nhlɔ́n tɔn bǐ kpó.
4 É dó alɔ xá wɛnsagun ɖé káká bo ɖu ɖ’é jí.
É y’avǐ, bo sa vo bónú é ní ná fɛ́nú tɔn ɛ.”
Mawu mɔ ɛ ɖo Betɛ́li, bɔ ɖo fínɛ́ ɔ, É ɖɔ xó xá mǐ,
5 Jexóva Mawu ahwankpá lɛ́ tɔn,
Jexóva wɛ nyí nyǐkɔ e gbɛtɔ́ lɛ́ ná nɔ dó flín i ná é.
6 “Énɛ́ wú ɔ, lɛ̌ kɔ wá Mawu towe gɔ́n,
kpo ɖo wǎnyíyí e ma nɔ sɛ do ǎ é ɖó wɛ, bo kpo ɖo nǔ jlɔ́jlɔ́ wa wɛ,
lobo nɔ ɖó nukún Mawu towe hwebǐnu.
7 Amɔ̌, nǔdagan mɛblɛ́blɛ́ tɔn lɛ́ ɖo ajɔ̌watɔ́ ɔ sín alɔ mɛ;
é yí wǎn nú mɛxoɖu.
8 Eflayímu nɔ ɖo ɖiɖɔ wɛ ɖɔ: ‘Nǔgbó ɔ, un húzú dɔkunnɔ;
un jɛ dɔkun.
È ná mɔ nǔ nyanya, alǒ hwɛhuhu sín nǔ ɖě ɖo azɔ̌ ce lɛ́ mɛ ǎ.’
9 Amɔ̌, nyɛ wɛ nyí Jexóva Mawu towe sín Ejípu to mɛ.
Un ná bló bɔ a ná lɛ́ nɔ goxɔ lɛ́ mɛ,
hwenu e è sɔ́ é* sín azǎn lɛ́ gbe ɖɔhun.
10 Un ɖɔ xó nú gbeyíɖɔ lɛ́,
un bló bɔ yě mɔ nǔmimɔ gěgé,
bɔ un dó lǒ gbɔn gbeyíɖɔ lɛ́ jí.
11 Mɛblɛ́blɛ́ kpó adingban kpó wɛ ɖo Galádi.
Yě sɔ́ nyibúsú lɛ́ dó sá vɔ̌ ɖo Gilugálu,
vɔ̌sákpe yětɔn lɛ́ cí awǐnnya e è to kplé b’ɛ yi jǐ ɖo hwɛn lɛ́ tɛ́ntin ɖo gle mɛ é ɖɔhun.
12 Jakɔ́bu hɔn yi Alámu* yíkúngban jí,*
Izlayɛ́li sɛn nya ɖé ɖo fínɛ́, bo ná dó da asi,
é kpé nukún dó lɛ̌ngbɔ́ lɛ́ wú, bo ná dó da asi.
13 Jexóva gbɔn gbeyíɖɔ ɖé jí bo ɖe Izlayɛ́li tɔ́n sín Ejípu,
bo nya xɛ ɖo yě jí gbɔn gbeyíɖɔ ɖé jí.
14 Eflayímu dó xomɛsin nú Mawu syɛ́nsyɛ́n,
hunxɔ́ e é ɖu é kpo ɖo kɔ n’i;
Aklúnɔ tɔn ná sú wi tɔn e é kɔ́n é sín axɔ́ ɛ.”
13 “Nú Eflayímu ɖɔ xó ɔ, mɛ lɛ́ nɔ sísɔ́;
mɛ nukúnɖéjí ɖé wɛ é nyí ɖ’ayǐ ɖo Izlayɛ́li.
Amɔ̌, é húzú hwɛhutɔ́, ɖó é sɛn Baálu wútu, bo kú.
2 Din ɔ, yě hu hwɛ dó hwɛ jí,
bo nɔ sɔ́ kpatágan yětɔn dó bló ganbócyɔ lɛ́* ná;
yě nɔ bló bǒcyɔ lɛ́ kpó azɔ̌tuuntuun kpó, azɔ̌ e alɔlyɛnzɔ́watɔ́ lɛ́ nɔ wa lɛ́ é bǐ.
Yě ɖɔ nú yě ɖɔ: ‘Mi nú mɛ e nɔ sá vɔ̌ lɛ́ é ní kí si nú nyibúsú lɛ́.’
3 Énɛ́ wú ɔ, yě ná cí akpɔ́kpɔ́ zǎnzǎn tɔn lɛ́ ɖɔhun,
ahǔn e nɔ yá wǔ xú zǎnzǎn tɛɛn é ɖɔhun,
wɔn e mɛ jɔhɔn d’alɔ ɖo nǔkúnsótɛn bo sɔ́ yi é ɖɔhun,
kpó azizɔ e nɔ tɔ́n gbɔn xɔ sín azata é ɖɔhun kpó.
4 Amɔ̌, nyɛ wɛ nyí Jexóva Mawu towe sín Ejípu to mɛ;
a sɔ́ tuun mawu ɖěvo zɛ nyɛ wú ǎ,
bɔ gbɔn vo nú nyɛ ɔ, mɛhwlɛ́ngántɔ́ ɖě sɔ́ ɖe ǎ.
5 Un tuun we ɖo gbětótló mɛ, ɖo ayǐkúngban xúxú jí.
6 Nǔ e yě ná ɖu bɔ é ná jɛmɛ nú yě lɛ́ é ɖo yě sí,
yě gɔ́ xo bo húzú goyítɔ́.
Mɔ̌ mɛ ɔ, yě wɔn mì.
7 Un ná húzú kpan nukɔn yě kinnikínní wínnyáwínnyá ɖé ɖɔhun,
kpɔ e tɔ wu ɖo ali jí é ɖé ɖɔhun.
8 Un ná zɔn yě jí lɔnmɔ e ba vǐ tɔn lɛ́ kpo é ɖé ɖɔhun,
un ná vún akɔ́nnu yětɔn.*
Un ná vúnvún yě ɖo fínɛ́ kinnikínní ɖé ɖɔhun;
gběkanlin ɖé ná tlɛ́n yě ɖó yɔywɛ.
9 Izlayɛ́li è, é ná sú kún towe dó,
ɖó a fɔ́n gǔ dó nyɛ mɛ e sixú d’alɔ we é jí wútu.
10 Énɛ́ wú ɔ, fítɛ́ axɔ́sú towe e sixú hwlɛ́n we ɖo toxo towe lɛ́ bǐ mɛ é,
kpó acɛkpatɔ́* towe lɛ́ kpó, éé wú a ɖɔ nú mì ɖɔ:
‘Nǎ mì axɔ́sú ɖé kpó axɔ́ví lɛ́ kpó’ é ka ɖe?
11 Un ná we axɔ́sú ɖokpó hwenu e un ɖo xomɛsin jí é,
bo ná lɛ́ ɖo xomɛsin jí bo yí sín así towe.
12 È sú nǔ dó* hwɛ Eflayímu tɔn gbánwúngbánwún;
è sɛ hwɛ tɔn xwe.
13 É ná se wǔvɛ́ nyɔ̌nu e ɖo ajidonu é ɖɔhun.
Amɔ̌, vǐ e ma ɖó nǔnywɛ́ ǎ é wɛ n’i;
jiji tɔn sín hwenu su é ɔ, é gbɛ́ ɖɔ émí kún ná tɔ́n ó.
14 Un ná vɔ́ yě xɔ ɖo hlɔ̌nhlɔ́n Yɔdo* tɔn sí;
un ná yí yě sín kú sí.
Kú è, fítɛ́ aɖǐvɛ́ towe ka ɖe?
Yɔdo è, fítɛ́ acɛ e a nɔ dó sú kún dó nú nǔ é ka ɖe?
È ná mɔ nǔbláwǔkúnúmɛ ɖo nukún ce lɛ́ ta ǎ.
15 Ényí é ná bo vun ɖo fántín lɛ́ tɛ́ntin ɔ,
jɔhɔn zǎnzǎnhwe jí tɔn ɖé ná wá, ɛɛn, jɔhɔn Jexóva tɔn,
éé gosín gbětótló mɛ é ná xú dotɔ tɔn bo lɛ́ mɛ tɔsisa tɔn.
Mɛ énɛ́ ná vɔ nǔ xɔ akwɛ́ e ɖo dɔkunsɛxwetɛn tɔn lɛ́ é bǐ.
16 Samalíi ná hɛn hwɛ e é hu é sín agban, ɖó é fɔ́n gǔ dó Mawu tɔn jí wútu.
Yě ná kú hwǐ kú,
è ná já vǐ yětɔn lɛ́ ɖó yɔywɛ,
bɔ è ná vún adɔ nú nyɔ̌nu yětɔn e ɖo xo lɛ́ é.”
14 “Izlayɛ́li è, lɛ̌ kɔ wá Jexóva Mawu towe gɔ́n,
ɖó a klɛ́n afɔ ɖó nǔwanyido towe wú.
2 Mi lɛ́ kɔ wá Jexóva gɔ́n kpó xógbe élɔ́ lɛ́ kpó:
‘Kɛnklɛ́n bo sɔ́ nǔwanyido mǐtɔn lɛ́ kɛ mǐ, bo yí gbe nú nǔ ɖagbe e mǐ wa lɛ́ é,
bɔ mǐ ná kpa susu nú we kpó nu mǐtɔn kpó, lěe mǐ nɔ zé nyibúsú wínnyáwínnyá lɛ́ dó sá vɔ̌ nú we gbɔn é ɖɔhun.*
3 Asilíi sixú hwlɛ́n mǐ gán ǎ.
Mǐ ná xá sɔ́ jí ǎ,
mǐ ka sɔ́ ná ɖɔ: “Mawu mǐtɔn è!” nú nǔ e mǐ sɔ́ alɔ mǐtɔn lɛ́ dó bló é ɖě ǎ,
ɖó hwi wɛ nɔ kú nǔbláwǔ nú tɔ́cyɔvǐ.’
4 Un ná gbɔ azɔn nú yě, bɔ yě sɔ́ ná gɔn gbejí nɔ ɖě ǎ.
Un ná yí wǎn nú yě kpó jlǒ kpó,
ɖó xomɛsin ce ko gosín yě jí wútu.
5 Un ná cí ahǔn ɖɔhun nú Izlayɛ́li;
é ná gba sɛ́ folówa ɖɔhun,
é ná dó ɖɔ do Libáan sín atín lɛ́ ɖɔhun.
6 Alaví tɔn lɛ́ ná vun,
é ná nyɔ́ ɖɛkpɛ olívutín ɖɔhun,
bo ná nyɔ́ wǎn libáantín ɖɔhun.
7 Yě ná lɛ́ wá nɔ yɛtɛn ce.
Yě ná dó jinukún bo ná lɛ́ tɔ́n kun vǐwuntín ɖɔhun.
É ná xɔ susu* Libáan sín vɛ̌ɛn ɖɔhun.
8 Eflayímu ná ɖɔ: ‘Étɛ́ nyɛ kpó bǒcyɔ lɛ́ kpó ka lɛ́ kpé dó?’
Un ná ná xósin, bo ná nya xɛ ɖo jǐ tɔn.
Un ná cí jenɛvliyéetín e vun é ɖɔhun.
Nyɛ wɛ ná ná yě atínsínsɛ́n.”
9 Mɛ̌ ka nyí nǔnywɛ́tɔ́? Mɛ ɔ ní mɔ nukúnnú jɛ nǔ énɛ́ lɛ́ mɛ.
Mɛ̌ ka nyí ayiɖotenánɔ? Mɛ ɔ ní tuun yě.
Ðó ali Jexóva tɔn lɛ́ jlɔ́,
bɔ hwɛjijɔnɔ lɛ́ ná ɖi zɔnlin gbɔn yě jí;
amɔ̌, sɛ́ngbatɔ́ lɛ́ ná klɛ́n afɔ ɖo yě jí.
Sɛ́nkpo Hocayíya tɔn wɛ bɔ tínmɛ tɔn nyí “Jǎa hwlɛ́n.”
Alǒ “wa nǔ blíblí; nyí tonyatɔ́.”
Alǒ, “vǐ e tɔ́n sín nǔblíblíwiwa mɛ lɛ́ é; vǐ e tɔ́n sín xó ɖíɖó xá mɛ gěgé mɛ lɛ́ é.”
Alǒ “nǔblíblíwiwa; xó ɖíɖó xá mɛ gěgé.”
Tínmɛ tɔn wɛ nyí “Mawu ná dó nǔkún.”
Blǔju tɔn, “xwé.”
Alǒ “ ɖo ayǐkúngban wɛnjɛ Izleyɛ́li tɔn jí.”
Tínmɛ tɔn wɛ nyí “È kú nǔbláwǔ n’i ǎ.”
Blǔju tɔn, “xwé.”
Blǔju tɔn, “xwé.”
Tínmɛ tɔn wɛ nyí “Nyí togun ce ǎ.”
Blǔju tɔn, “vǐ súnnu Izlayɛ́li tɔn lɛ́.”
Kpɔ́n Oz 1:9, tínmɛ e ɖo do é.
Kpɔ́n Oz 1:6, tínmɛ e ɖo do é.
Alǒ “nǔblíblíwiwa; xó ɖíɖó xá mɛ gěgé.”
Alǒ “vǐ e tɔ́n sín nǔblíblíwiwa mɛ lɛ́ é; vǐ e tɔ́n sín xó ɖídó xá mɛ gěgé mɛ lɛ́ é.”
Alǒ “nǔ blíblí wɛ é nɔ wa (xó wɛ é nɔ ɖó xá mɛ gěgé).”
Énɛ́ wɛ nyí, avɔ e è sɔ́ lɛ̌ngbɔ́fún dó bló é.
Alǒ “asú ce nukɔntɔn ɔ.”
Alǒ “ayǐkúngban wɛnjɛ.”
“Baálu.”
Alǒ “ná jó yě dó bɔ yě ná nɔ gbɛ.”
Alǒ “nǔ e ayǐkúngban ɔ ná ná lɛ́ é.”
Tínmɛ tɔn wɛ nyí “Mawu ná dó nǔkún.”
Kpɔ́n Oz 1:6, tínmɛ e ɖo do é.
Kpɔ́n Oz 1:9, tínmɛ e ɖo do é.
Énɛ́ wɛ nyí, ɖěɖěe è nɔ zán ɖo vodún sinsɛn mɛ lɛ́ é.
Homɛ́ɛ ɖokpó nɔ ná lǐtli 220. Kpɔ́n Mɔj. B14.
Alǒ “wa nǔ blíblí (ɖóxó xá mɛ gěgé).”
Blǔju tɔn, “azǎn gěgé.”
Alǒ “nǔmɛsɛn xwégbe tɔn; bǒcyɔ.”
Alǒ “sú nɔ towe sín kún dó.”
Alǒ “sú togun ce sín kún dó.”
Alǒ “wěɖexámɛ.”
Alǒ vlafo, “Yě sɔ́ winnyá dó ɖyɔ́ susu ce.”
Énɛ́ wɛ nyí, “vɔ̌sánúxwlémawutɔ́ lɛ́.”
Énɛ́ wɛ nyí ɖɔ yě nɔ sɔ́ vɔ̌ e togun ce nɔ sá dó hwɛ tɔn lɛ́ tamɛ é dó dó jǒ.
Alǒ “lǐndɔ̌n yětɔn nɔ ɖo biba wɛ ɖɔ.” Kpɔ́n Xógbe ɖé lɛ́ sín tínmɛ: “Lǐndɔ̌n.”
Alǒ “wa nǔ blíblí ɔ hǒhi tɔn; ná nya to.”
Alǒ “nǔblíblíwiwa; xó ɖíɖó xá mɛ gěgé.”
Blǔju tɔn, “nɔ vɔ́ da nú ayi.”
Alǒ “nǔkantɔ́ sín kpo.”
Alǒ “nǔblíblíwiwa; xó ɖíɖó xá mɛ gěgé.”
Alǒ “nǔblíblíwiwa; xó ɖíɖó xá mɛ gěgé.”
Alǒ “wa nǔ blíblí; ɖóxó xá mɛ gěgé.”
Alǒ “nǔ blíblí e yě wa é; xó e yě ɖó xá mɛ gěgé é.”
Alǒ “nǔ blíblí wa wɛ; xó ɖó xá mɛ gěgé wɛ.”
Blǔju tɔn, “fí e d’agba é.”
Alǒ “bǐya yětɔn e è sɔ́ blěe dó ɖa ná é.”
Alǒ “jɛ nǔ blíblí ɔ hǒhi tɔn wa jí; jɛ to nya jí.”
Blǔju tɔn, “xɛnyaɖomɛjítɔ́.”
Alǒ “za ɛ síin.”
Alǒ “j’ayǐ.”
Alǒ “ɖ’alɔ ɖo mɛhuhu mɛ titewungbe tɔn.”
Alǒ “un ná gbɛ́ nǔ nú yě mɛ bǐ.”
Alǒ “wa nǔ blíblí; nya to.”
Alǒ “nǔ blíblí wiwa, xó ɖíɖó xá mɛ gěgé.”
Alǒ “ɖe kúnnu ɖo nukún tɔn mɛ.”
Alǒ “gle.”
Alǒ “kinnikínní wínnyáwínnyá e ko ɖó kɔjafún é.”
Alǒ “wǎnyíyí e ma nɔ sɛ do ǎ é.”
Alǒ “nǔbláwǔkúnúmɛ.”
Alǒ “wɛ nɔ dó afɔ gbě, alǒ nɔ ba nyɔ̌nu ɖěvo.”
Alǒ vlafo, “Ðó myɔkpó ɖɔhun wɛ ayi yětɔn lɛ́ cí hwenu e yě sɛkpɔ́ ɛ kpó awo yětɔn lɛ́ kpó é.”
Blǔju tɔn, “hwɛɖɔtɔ́.”
Blǔju tɔn, “éé ma ɖó ayi ǎ é.”
Blǔju tɔn, “togun yětɔn.”
Énɛ́ wɛ nyí, mawusinsɛn alɔkpa e nyɔ́ hú gǎn é linu.
Alǒ “gǎdanú.”
Alǒ “nɔ mǐmɛ́ jí.”
Alǒ “Aɖawunzɔ́watɔ́.”
Alǒ “jinukún e ɖo atín wú é.”
Alǒ “jǒnɔ.”
Alǒ “nǔkplɔ́nmɛ.”
Alǒ vlafo, “Yě ná lɛ́ kɔ yi Ejípu.”
Alǒ “nǔblíblíwiwa; xó ɖíɖó xá mɛ gěgé.”
Alǒ “yěɖésúnɔ sín lǐndɔ̌n tɔn wɛ é nɔ nyí.”
Alǒ “xwezán mitɔn jí.”
Alǒ “nǔmɛsɛn e hu winnyá é.”
Alǒ “anɔ̌ e xú.”
Alǒ vlafo, “vunvun.”
Alǒ “ɖó adingban; ɖíɖí.”
Blǔju tɔn, “nɔ abwɛ̌.”
Énɛ́ wɛ nyí, hwenu e yě hɛn tódɔnnúmɛ yětɔn agbanhɛnkpo ɖé ɖɔhun é.
Alǒ “un ná blá akpa nú.”
Blǔju tɔn, “nɔ abwɛ̌.”
Énɛ́ wɛ nyí, gbeyíɖɔ lɛ́ kpó mɛ ɖěvo lɛ́ kpó e è sɛ́ dó Izlayɛ́li ví lɛ́ bónú yě ná kplɔ́n yě é.
Alǒ “xomɛnyínyɔ́ sín kan lɛ́,” ée mɛjitɔ́ ɖé nɔ zán é ɖɔhun.
Énɛ́ wɛ nyí, mawusinsɛn alɔkpa e nyɔ́ hú gǎn é.
Blǔju tɔn, “nǔbláwǔkúnúmɛ ce hunzo.”
Alǒ vlafo, “xwe ɖé.”
Alǒ “Silíi.”
Blǔju tɔn, “gle mɛ.”
Alǒ “bǒcyɔ e è xo zo dó lɛ́ é.”
Blǔju tɔn, “nǔ e bú nǔ dó ayi yětɔn é.”
Blǔju tɔn, “hwɛɖɔtɔ́.”
Alǒ “hɛn.”
Kpɔ́n Xógbe ɖé lɛ́ sín tínmɛ.
Blǔju tɔn, “xwlé nyibúsú wínnyáwínnyá nufló mǐtɔn tɔn lɛ́ we gbɔn gǔdo.”
Blǔju tɔn, “È ná flín i.”