JOWƐ́LI
1 Jexóva ɖɔ nú Jowɛ́li,* Petuɛ́li ví ɔ ɖɔ é ní ɖɔ xó élɔ́:
2 “Tomɛxó lɛ́ è mi, mi ɖótó xó élɔ́,
mi mɛ e nɔ nɔ to ɔ mɛ* lɛ́ é bǐ è mi, mi wlí tó wú.
Nǔ lěhun ɖě ko jɛ ɖo hwe mitɔn nu,
alǒ ɖo tɔ́gbó mitɔn lɛ́ sín hwenu a?
3 Mi ɖɔ xó tɔn nú vǐ mitɔn lɛ́,
bónú vǐ mitɔn lɛ́ ní ɖɔ xó tɔn nú vǐ yětɔn lɛ́,
lobonú vǐ yětɔn lɛ́ ní ɖɔ nú jijimɛ e ná bɔ d’é wú é.
4 Nǔ e bɔkle nǔhɛngblétɔ́ lɛ́ jó dó é ɔ, wɛn lɛ́ ɖu;
nǔ e wɛn lɛ́ jó dó é ɔ, bɔkle e ma ɖó awa ǎ lɛ́ é ɖu;
bɔ nǔ e bɔkle e ma ɖó awa ǎ lɛ́ é jó dó é ɔ, bɔkle e ma nɔ gɔ́ xo ǎ lɛ́ é ɖu.
5 Ahannumúnɔ lɛ́ è mi, mi fɔ́n bo y’avǐ!
Vɛ̌ɛnnutɔ́ lɛ́ bǐ, mi dó gbɛvíhan,
ɖó è ɖe vɛ̌ɛn víví ɔ sín nu mitɔn.
6 Ðó ahwankpá hlɔ̌nhlɔ́nnɔ e è ma sixú xa ǎ é ɖé wá vun blá to ce.
Aɖǔ tɔn lɛ́ cí kinnikínní sín aɖǔ lɛ́ ɖɔhun, bɔ aglan tɔn lɛ́ cí kinnikínní sín aglan lɛ́ ɖɔhun.
7 É sú kún dó nú vǐwuntín ce, bo bló bɔ fígitín ce húzú atínta,
é kɔ́n goto yětɔn bǐ mlɛ́mlɛ́, bo bɛ́ yě nyi kɛ́n ɖokpó,
bo bló bɔ alaví yětɔn lɛ́ wé.
8 Dǒ gbɛvíhan lěe nyɔ̌nu* ɖo alɔ jí ɖé nɔ dó ati,
bo nɔ dó gbɛvíhan dó asisúnɔ* tɔn wǐnnyáwínnyá mɛ tɔn ɔ jí gbɔn é.
9 È sɔ́ nɔ hɛn nǔníná jinukún tɔn kpó nǔníná vɛ̌ɛn tɔn kpó wá xwé Jexóva tɔn gbe ǎ;
vɔ̌sánúxwlémawutɔ́ lɛ́, sinsɛnzɔ́watɔ́ Jexóva tɔn lɛ́ ɖo aluwɛ mɛ.
10 È ɖu gle ɔ sú dó, bɔ ayǐkúngban ɔ byɔ́ aluwɛ mɛ;
ɖó è ɖu jinukún lɛ́ sú dó, vɛ̌ɛn yɔ̌yɔ́ ɔ mɛ bǐ, ami ɔ vɔ.
11 É sín blěe kpó ɔ́ji kpó wú,
bɔ glesi lɛ́ byɔ́ aluwɛ ɖaxó mɛ bɔ vǐwungbowúkpénukúndótɔ́ lɛ́ dó gbɛvíhan,
ɖó gle ɔ sín jinukún lɛ́ sú dó.
12 Vǐwuntín ɔ xú,
fígitín ɔ mlú ɖa.
Glenáditín oo, dětín oo, pɔ́mutín oo,
atín e ɖo gle mɛ lɛ́ é bǐ wɛ xú;
ɛɛn, awǎjijɛ wá húzú winnyá ɖo togun ɔ mɛ.
13 Vɔ̌sánúxwlémawutɔ́ lɛ́ è mi, mi dó ati* bo nɔ aluwɛ mɛ;*
mi mɛ e nɔ wa sinsɛnzɔ́ ɖo vɔ̌sákpe ɔ kɔn lɛ́ è mi, mi dó gbɛvíhan.
Sinsɛnzɔ́watɔ́ Mawu ce tɔn lɛ́ è mi, mi wá bo nɔ atiwu mɛ ɖo zǎn ɔ bǐ mɛ;
ɖó è sɔ́ nɔ hɛn nǔníná jinukún tɔn kpó nǔníná vɛ̌ɛn tɔn kpó wá Mawu mitɔn sín xwégbe ǎ.
14 Mi jlá ɖɔ è ní blá nu;* mi ylɔ́ kplé bǔnɔ ɖé.
Mi xo tomɛxó lɛ́, gɔ́ nú mɛ e nɔ nɔ to ɔ mɛ lɛ́ é bǐ kplé,
dó Jexóva Mawu mitɔn sín xwégbe, bo sú xó ylɔ́ Jexóva dó byɔ́ alɔdó.
15 Heelú ɖó azǎn ɔ wú!
Ðó azǎn Jexóva tɔn sɛkpɔ́;
azǎn énɛ́ gbe ɔ, Nǔbǐwúkpétɔ́ ɔ ná sú kún dó nú nǔ.
16 È ko ɖe nǔɖuɖu síin ɖo nukún mǐtɔn mɛ ǎ cé?
È ko ɖe xomɛhunhun kpó awǎjijɛ kpó sín Mawu mǐtɔn xwégbe ǎ cé?
17 Nǔkún* lɛ́ dɛ go ɖo pɛ́li yětɔn lɛ́ glɔ́.
Agɔ̌ lɛ́ jɛ vɔ̌.
È mu kɔ́zún lɛ́, ɖó jinukún lɛ́ fyɔ́.
18 Kanlin lɛ́ ɖésú tlɛ ɖo azɔn wɛn wɛ!
Nyibúhwan lɛ́ ɖo lele sa wɛ, bo dán ɖěwagbɛn, ɖó yě mɔ amagbo ɖě ǎ!
Lɛ̌ngbɔ́hwan lɛ́ ɖo tódɔnnúmɛ ɔ sín sin sún wɛ.
19 Jexóva è, hwi wɛ un ná ylɔ́;
ɖó myɔ ko fyɔ́ amagbo e ɖo gbětótló* mɛ lɛ́ é,
bɔ myɔ ɖé ko fyɔ́ atín e ɖo gle mɛ lɛ́ é bǐ.
20 Gběkanlin lɛ́ lɔ ɖo nukún ɖó we wɛ vɛ́návɛ́ná,
ɖó tɔsisa lɛ́ mɛ,
bɔ myɔ fyɔ́ amagbo e ɖo gbětótló* mɛ lɛ́ é.”
2 “Mi kún lanzo ɖo Sinyɔ́ɔ!
Mi sú ahwanfunfun sín xó ɖo só mímɛ́ ce jí!
Mɛ e nɔ nɔ to ɔ mɛ* lɛ́ é bǐ ní sísɔ́,
ɖó azǎn Jexóva tɔn jawě! É ko sɛkpɔ́!
2 Ablu kpó zǐnflú kpó sín azǎn ɖé wɛ,
akpɔ́kpɔ́ kpó zǐnflú gɔngɔn kpó sín azǎn ɖé wɛ,
é cí wěziza zǎnzǎn tɛɛn tɔn e nɔ hɔ́n dó só ɖaxó lɛ́ jí é ɖɔhun.
Togun ɖé sukpɔ́ bo ɖó hlɔ̌nhlɔ́n;
togun énɛ́ ɖɔhun ɖě ko tíin kpɔ́n ǎ,
étɔn ɖɔhun ɖě ka sɔ́ ná lɛ́ wá tíin,
ɖo jijimɛ e ja lɛ́ é ɖě mɛ kpɔ́n ǎ.
3 Myɔ ɖé ɖo nukɔn yětɔn bo ɖo nǔ hɛn gblé wɛ,
bɔ myɔ ɖé ɖo gǔdo yětɔn bo ɖo nǔ fyɔ́ wɛ.
To e ɖo nukɔn yětɔn é cí jikpá Edɛ́ni tɔn ɖɔhun,
amɔ̌, gbětótló e jɛ vɔ̌ é wɛ ɖo gǔdo yětɔn,
bɔ nǔ ɖě sixú xo gló yě ǎ.
4 Yě cí lěe sɔ́ lɛ́ nɔ cí é ɖɔhun,
bɔ yě nɔ kán wezun sɔ́ e nɔ fun ahwan lɛ́ é ɖɔhun.
5 Ényí yě ɖo só ɖaxó lɛ́ sín ahɔnmɛ gbɔn wɛ ɔ, zǐngídi yětɔn nɔ cí ahwankɛkɛ́ lɛ́ tɔn ɖɔhun,
lěe myɔ e ɖo jiji wɛ hɛhɛ é nɔ ɖo hankán fyɔ́ wɛ gbɔn é ɖɔhun.
Yě cí togun hlɔ̌nhlɔ́nnɔ e ɖo tito jí bo ná fun ahwan é ɖɔhun.
6 Togun lɛ́ sín ayi ná gba dó ɖó yě wú.
Nukún lɛ́ bǐ wɛ ná myá ɖo ta wú.
7 Yě nɔ tɔ́n ahwan mɛ ahwanfuntɔ́ lɛ́ ɖɔhun,
yě nɔ fán dǒ sɔ́ja lɛ́ ɖɔhun,
yě mɛ ɖokpó ɖokpó nɔ ɖo yiyi wɛ tlélé,
bɔ yě nɔ zɛ gbě sín ali yětɔn lɛ́ jí ǎ.
8 Yě nɔ gblá gǒ yěɖée lɛ́ ǎ,
yě mɛ ɖokpó ɖokpó nɔ ɖo yiyi wɛ ɖo ali yětɔn yětɔn jí.
9 Yě nɔ hwlɛndó byɔ́ toxo ɔ mɛ, bo nɔ kán wezun gbɔn dǒ ɔ jí.
Yě nɔ fán xwé lɛ́ sín dǒ, bo nɔ gbɔn flɛtɛ́li lɛ́ nu ajotɔ́ ɖɔhun.
10 Ayǐkúngban nɔ sísɔ́ ɖo nukɔn yětɔn, bɔ jǐnukúnsin nɔ húnhún ɖo nukɔn yětɔn.
Hwe kpó sun kpó d’ablu,
bɔ sunví lɛ́ sɔ́ kɔ́n ǎ.
11 Jexóva ná sɔ́ gbe dó jǐ ɖo ahwankpá tɔn nukɔn, ɖó ahwangɔnu tɔn lɛ́ sukpɔ́ tawun.
Gɔ́ ná ɔ, mɛ e nɔ bló bɔ xó tɔn nɔ jɛnu é ɖó hlɔ̌nhlɔ́n;
ɛɛn, azǎn Jexóva tɔn ɔ, azǎn ɖaxó ɖé wɛ, bo d’abaɖa tawun.
Mɛ̌ ka sixú dɛ ɖ’é nu?”
12 “Énɛ́ wú ɔ, din ɔ,” wɛ Jexóva ɖɔ, “mi lɛ́ kɔ wá gɔ̌n ce kpó ayi mitɔn bǐ kpó,
kpó nubláblá kpó, kpó avǐ kpó, kpódó gbɛvíhan kpán.
13 Mi ma vún awu mitɔn lɛ́ kpowun ó, é nyɔ́ wa ɔ, mi vún ayi mitɔn lɛ́,*
bónú mi ní lɛ́ kɔ wá Jexóva Mawu mitɔn gɔ́n,
ɖó é nɔ se wǔvɛ́ xá mɛ,* nɔ kú nǔbláwǔ nú mɛ, nɔ yá wǔ sin xomɛ ǎ, bɔ wǎnyíyí tɔn e ma nɔ sɛ do ǎ é túnflá,
é ná húzú linlin dó awě e é lin ná dɔn wá é wú.*
14 Bóyá é ná lɛ́ kɔ, bo ná húzú linlin,*
bo ná kɔn nyɔ̌ná dó mi jí,
mɔ̌ mɛ ɔ, mi ná xwlé nǔníná jinukún tɔn kpó nǔníná vɛ̌ɛn tɔn kpó Jexóva Mawu mitɔn.
15 Mi kún lanzo ɖo Sinyɔ́ɔ!
Mi jlá ɖɔ è ní blá nu,* mi ylɔ́ kplé bǔnɔ ɖé.
16 Mi xo togun ɔ kplé; mi bló bónú agun ɔ ní mɛ́.
Mi xo mɛxómɔ lɛ́ kplé; mi xo yɔkpɔ́vú lɛ́ kpó vǐ ɖo anɔ̌nu lɛ́ kpó kplé.
Asisúnɔ ɔ ní zɛ hwɛ sín xɔnɔnɔ tɔn mɛ, bónú yawó ɔ ní zɛ hwɛ sín xɔ tɔn mɛ.
17 Ðo hɔnnúwa ɔ kpó vɔ̌sákpe ɔ kpó tɛ́ntin ɔ,
vɔ̌sánúxwlémawutɔ́ lɛ́, éé nyí sinsɛnzɔ́watɔ́ Jexóva tɔn lɛ́ é ní ya avǐ lobo ɖɔ:
‘Jexóva è, kú nǔbláwǔ nú togun towe,
ma jó akɔta lɛ́ dó bónú yě ní kp’acɛ dó togun* towe jí
dó bló bónú yě húzú nǔkiko ó.
Étɛ́wú akɔta lɛ́ ka ná ɖɔ: “Fítɛ́ Mawu yětɔn ka ɖe?”’
18 Énɛ́ gúdo ɔ, akpakpa ná sɔ́ Jexóva dó to tɔn wú,
bɔ é ná se wǔvɛ́ xá togun tɔn.
19 Jexóva ná yí gbe nú togun tɔn ɖɔ:
‘Éɖíe! Un ɖo jinukún, vɛ̌ɛn yɔ̌yɔ́ kpó ami kpó ná mi wɛ,
bɔ é ná jɛmɛ nú mi bǐ mlɛ́mlɛ́;
un sɔ́ ná lɔn bɔ wi mitɔn ná kɔ́n ɖo akɔta lɛ́ mɛ ɖě ǎ.
20 Un ná sɛ mɛ e nɔ nɔ totaligbé é dó zɔ nú mi tawun;
un ná nya ɛ yi ayǐkúngban e sá, bo xú bo lɛ́ jɛ vɔ̌ é jí,
un ná nya mɛ ɖěɖěe ɖo nukɔn ɖo ahwankpá tɔn mɛ lɛ́ é* tun ta xu e ɖo zǎnzǎnhwe jí é,*
bo ná nya mɛ ɖěɖěe ɖo gǔdo ɖo ahwankpá tɔn mɛ lɛ́ é tun ta xu e ɖo gbadahwe jí é.*
Wǎn kwíjikwíji e gosín gɔ̌n tɔn é ná yi jǐ,
Wǎn gblégblé e gosín gɔ̌n tɔn é ná kpo ɖo jǐ yi wɛ;
ɖó Mawu ná bló nǔ ɖaxó ɖaxó lɛ́.’
21 Ayǐkúngban è, ma ɖi xɛsi ó.
J’awǎ bónú nǔ ní víví nú we, ɖó Jexóva ná bló nǔ ɖaxó ɖaxó lɛ́.
22 Kanlin e ɖo zunkan mɛ lɛ́ è mi, mi ma ɖi xɛsi ó,
ɖó amagbo e ɖo gbětótló mɛ lɛ́ é ná dó amamú,
bɔ atín lɛ́ ná ná sínsɛ́n;
fígitín kpó vǐwuntín kpó ná ná sínsɛ́n yětɔn lɛ́ bǐ mlɛ́mlɛ́.
23 Vǐ súnnu Sinyɔ́ɔ tɔn lɛ́ è mi, mi j’awǎ bónú nǔ ní víví nú mi ɖó nǔ e Jexóva Mawu mitɔn ná wa é wú;
ɖó é ná ná zǒjí e ná kpé ayǐkúngban é mi,
é ná sɛ́ jǐ ɖaxó,
zǒjí kpó xwejí kpó dó mi, lěe é ko nɔ nyí gbɔn ɖ’ayǐ é.
24 Nǔkún ná gɔ́ nǔkúnsótɛn lɛ́,
vɛ̌ɛn yɔ̌yɔ́ ná túnflá ɖo vǐwunto lɛ́ mɛ, bɔ ami ná túnflá ɖo nǔ e mɛ è nɔ li olívu ɖe lɛ́ é mɛ.
25 Nǔ e ahwankpá ce ɖaxó e un sɛ́ dó mi é,
énɛ́ wɛ nyí wɛn lɛ́, bɔkle e ma ɖó awa ǎ lɛ́ é, bɔkle e ma nɔ gɔ́ xo ǎ lɛ́ é kpó bɔkle e nɔ hɛn nǔ gblé lɛ́ é kpó ɖu nú xwe mɔ̌kpán lɛ́ é ɔ,
un ná sú axɔ́ tɔn mi.
26 É ɖo wɛn ɖɔ mi ná ɖu nǔ bɔ é ná jɛmɛ nú mi,
bo ná kpa susu nú Jexóva Mawu mitɔn sín nyǐkɔ,
éyɛ́ mɛ e bló nǔjíwǔ lɛ́ dó ta mitɔn mɛ é;
è sɔ́ ná lɛ́ dó winnyá togun ce kpɔ́n gbeɖé ǎ.
27 Mi ná wá tuun ɖɔ un ɖo togun Izlayɛ́li tɔn tɛ́ntin,
bo lɛ́ tuun ɖɔ nyɛ wɛ nyí Jexóva Mawu mitɔn, ɖěvo ɖě sɔ́ ɖe ǎ!
È sɔ́ ná lɛ́ dó winnyá togun ce kpɔ́n gbeɖé ǎ.
28 Énɛ́ gúdo ɔ, un ná gba gbigbɔ ce kɔn nyi gbɛtɔ́ alɔkpa bǐ jí,
bɔ vǐ súnnu mitɔn lɛ́ kpó vǐ nyɔ̌nu mitɔn lɛ́ kpó ná nɔ wa gbeyíɖɔzɔ́,
un ná nɔ xo dlɔ̌ degénɔ mitɔn lɛ́,
bɔ dɔ̌nkpɛvú mitɔn lɛ́ ná nɔ mɔ nǔ.
29 Un tlɛ ná gba gbigbɔ ce dó
mɛsɛntɔ́ ce súnnu lɛ́ kpó mɛsɛntɔ́ ce nyɔ̌nu lɛ́ kpó jí ɖo azǎn énɛ́ lɛ́ gbe.
30 Un ná ɖe nǔdabaɖa* lɛ́ xlɛ́ ɖo jǐnukúnsin kpó ayǐkúngban jí kpó,
yě wɛ nyí: hun kpó myɔ kpó, gɔ́ nú azizɔ e ná ɖo mlǐmlí yi jǐ wɛ é.
31 Hwesivɔ́ ná dó ablu, bɔ sun ná húzú hun,
cóbɔ azǎn Jexóva tɔn, éé nyí azǎn ɖaxó bo lɛ́ d’abaɖa é ná wá.
32 Bɔ mɛ ɖěbǔ e ylɔ́ nyǐkɔ Jexóva tɔn é ɔ, è ná hwlɛ́n ɛ gán;
ɖó lěe Jexóva ko ɖɔ gbɔn é ɔ, mɛ ɖěɖěe xo gló lɛ́ é ná ɖo Sinyɔ́ɔ só ɔ jí, bo ná lɛ́ ɖo Jeluzalɛ́mu,
bɔ mɛ ɖěɖěe ná gán bɔ Jexóva ɖo yě ylɔ́ wɛ lɛ́ é ná ɖo yě mɛ.”
3 “Mi ɖótó! Ðo azǎn énɛ́ lɛ́ gbe kpó hwe énɛ́ nu kpó,
hwenu e un ná kplá kannumɔ Judáa kpó Jeluzalɛ́mu kpó tɔn lɛ́ lɛ́ kɔ é ɔ,
2 un ná lɛ́ xo akɔta lɛ́ bǐ kplé,
Un ná ɖɔ hwɛ xá yě ɖo fínɛ́,
ɖó nǔ e yě wa xá togun ce kpó Izlayɛ́li e nyí gǔ ce é kpó é wú;
ɖó yě fúnfún yě gbɔn akɔta lɛ́ tɛ́ntin,
bo má to ce ɖo yěɖée lɛ́ tɛ́ntin.
3 Yě nyi akɔ dó togun ce bo ná dó má ɛ;
yě nɔ sa súnnuví bo nɔ dó xáya tonyatɔ́,
bo nɔ sa nyɔ̌nuví bo ná dó nu vɛ̌ɛn.
4 Gɔ́ ná ɔ, Tíi kpó Sidɔ́ɔn kpó, kpódó Filisitíi sín xá lɛ́ bǐ kpó è mi,
étɛ́wú mi ka glá káká bo wa mɔ̌ xá mì?
Nǔ nyanya ɖé wɛ un wa nú mi bɔ mi ɖo hlɔn tɔn ba wɛ a?
Ényí hlɔn ba wɛ mi ɖe ɔ,
un ná bló bɔ hlɔn e ba wɛ mi ɖe é ná flí jɛ ta mitɔn bléwún.
5 Ðó mi sɔ́ kpatágan ce kpó siká ce kpó,
bo bɛ́ nǔ xɔ akwɛ́ ce e nyɔ́ hú gǎn lɛ́ é yi ɖó nǔmɛsɛn mitɔn lɛ́ sín xwégbe;
6 bɔ mi sa mɛ e nɔ nɔ Judáa kpó Jeluzalɛ́mu kpó lɛ́ é nú Glɛ̌kinu lɛ́,
bo ná dó sɛ yě dó zɔ tawun nú to yětɔn;
7 din ɔ, un ná fɔ́n yě bónú yě ná lɛ́ kɔ sín fí e mi sa yě dó é,
bɔ un ná bló bɔ hlɔn e ba wɛ mi ɖe é ná flí jɛ ta mitɔn.
8 Un ná sa vǐ súnnu mitɔn lɛ́ kpó vǐ nyɔ̌nu mitɔn lɛ́ kpó nú Judáanu lɛ́,
bɔ yědɛɛ lɛ́ ná sa yě nú Cɛbanu lɛ́, akɔta e lín tawun é ɖé;
ɖó nyɛ Jexóva ɖésúnɔ wɛ ɖɔ mɔ̌.
9 Mi jlá nǔ élɔ́ gbɔn akɔta lɛ́ mɛ:
‘Mi sɔ́ ahwannú!* Mi dó wǔsyɛ́n lanmɛ nú súnnu hlɔ̌nhlɔ́nnɔ lɛ́!
Mi nú sɔ́ja lɛ́ bǐ ní sɛ wá, mi nú yě ní ɖidó!
10 Mi sɔ́ glelɛmɔlín* mitɔn lɛ́ dó tun hwǐ lɛ́, bo sɔ́ nǔkúnyanú mitɔn lɛ́ dó tun hwǎn lɛ́.
Mi nú mɛ e ma ɖó gǎn ǎ é ní ɖɔ: “Un ɖó hlɔ̌nhlɔ́n.”
11 Akɔta e ɖo xáɖéxaɖe mɛ lɛ́ é bǐ è mi, mi xo miɖée kplé bo wá bá d’alɔ!’”
Jexóva è, kplá hlɔ̌nhlɔ́nnɔ* towe lɛ́ jɛ te ɖó fínɛ́.
12 “Mi nú akɔta lɛ́ ní fɔ́n bo wá tɔdo Jozafáti tɔn mɛ;*
ɖó fínɛ́ wɛ un ná jínjɔ́n bo ná ɖɔ hwɛ xá akɔta e gosín xáɖéxaɖe mɛ lɛ́ é bǐ.
13 Mi dlɛ́n nǔkúnyanú, ɖó nǔkún lɛ́ ko nyɔ́.
Mi wá bo li vǐwun lɛ́, ɖó vǐwunto ɔ gɔ́.
Vǐwunto lɛ́ gɔ́ bo túnflá, ɖó nǔnyanyawiwa akɔta lɛ́ tɔn lɛ́ gbélǔ.
14 Ahwan wɔ̌búwɔ́bú, ɛɛn, ahwan wɔ̌búwɔ́bú ɖo tɔdo hwɛɖiɖɔ tɔn* ɔ mɛ,*
ɖó azǎn Jexóva tɔn ná wá ɖo malínmálín mɛ ɖo tɔdo hwɛɖiɖɔ tɔn* ɔ mɛ.*
15 Hwesivɔ́ kpó sun kpó ná d’ablu,
bɔ sunví lɛ́ sɔ́ ná kɔ́n ǎ.
16 Jexóva ná dó gbe sín Sinyɔ́ɔ,
é ná sú xó sín Jeluzalɛ́mu.
Bɔ jǐnukúnsin kpó ayǐkúngban kpó ná húnhún;
amɔ̌, Jexóva ná nyí bibɛtɛn ɖé nú togun tɔn,
ɛɛn, ahohó ɖé nú togun Izlayɛ́li tɔn.
17 Bɔ mi ná wá tuun ɖɔ nyɛ mɛ e nɔ nɔ Sinyɔ́ɔ, só mímɛ́ ce jí é wɛ nyí Jexóva Mawu mitɔn.
Jeluzalɛ́mu ná húzú nɔtɛn mímɛ́ ɖé,
bɔ jǒnɔ* lɛ́ sɔ́ ná nɔ gbɔn fínɛ́ dín ɖě ǎ.
18 Gbe nɛ́ gbe ɔ, vɛ̌ɛn víví ná kun sín só ɖaxó ɖaxó lɛ́ jí,
anɔ̌sin ná sa sín só kpɛví kpɛví lɛ́ jí,
bɔ sin ná gɔ́ tɔsisa Judáa tɔn lɛ́ bǐ mɛ.
Tɔsisa ɖé ná sa sín xwé Jexóva tɔn gbe,
bo ná hú sin nú tɔdo* Kasyatín lɛ́ tɔn ɔ.
19 Amɔ̌, Ejípu ná jɛ vɔ̌,
bɔ Edɔ́mu ná nyí gbětótló e jɛ vɔ̌ é ɖé,
ɖó dǎka e yě xo Judáanu lɛ́ wú,
bo lɛ́ kɔn xomɛvɔ́nɔ lɛ́ sín hun kɔn nyi ayǐ ɖo to ɔ mɛ é wú.
20 Amɔ̌, è ná nɔ Judáa hwebǐnu,
bo ná nɔ Jeluzalɛ́mu sín jijimɛ ɖé jí jɛ ɖěvo jí.
21 Un ná kpɔ́n yě* dó mɔ xomɛvɔ́nɔ, có ɖ’ayǐ ɔ, un nɔ kpɔ́n yě dó mɔ xomɛvɔ́nɔ ǎ;
bɔ nyɛ Jexóva ɔ, un ná nɔ Sinyɔ́ɔ.”
Tínmɛ tɔn wɛ nyí “Jexóva wɛ nyí Mawu.”
Alǒ “ayǐkúngban ɔ jí.”
Alǒ “ɖyɔ̌vǐ.”
Alǒ “asú.”
Blǔju tɔn, “mi sɔ́ nǔ ɖ’ayǐ nú miɖée.”
Alǒ “xo akɔ́nnu.”
Blǔju tɔn, “Mi ɖe nubláblá ɖé ɖó vo.”
Alǒ vlafo, “Fígi xúxú.”
“Kpɔ́n Xógbe ɖé lɛ́ sín tínmɛ.”
“Kpɔ́n Xógbe ɖé lɛ́ sín tínmɛ.”
Alǒ “ayǐkúngban ɔ jí.”
Alǒ “ahwanfunnú e nɔ vívá nǔ lɛ́ é.”
Énɛ́ wɛ nyí, gblé wǔ bo j’ayǐ, alǒ kú.
Alǒ “ayi mitɔn lɛ́ e gba dó é ní ɖe hwɛvɛ́númɛ xlɛ́.”
Alǒ “nɔ nyɔ́ xomɛ.”
Alǒ “awě e é lin ná dɔn wá é ná vɛ́ n’i.”
Alǒ “bɔ linlin tɔn ná vɛ́ n’i.”
Blǔju tɔn, “mi ɖe nubláblá ɖé ɖó vo.”
Blǔju tɔn, “gǔ.”
Blǔju tɔn, “nukúnmɛ tɔn.”
Énɛ́ wɛ nyí, Xu kúkú ɔ.
Énɛ́ wɛ nyí, Mɛditɛlanɛ́ɛ xu ɔ.
Alǒ “wuntun.”
Tínmɛ tɔn wɛ nyí “Jexóva wɛ nyí hwɛɖɔtɔ́.”
Alǒ “ayǐkúngban wɛnjɛ Jexozafáti tɔn jí.”
Alǒ “Mi ɖe miɖée ɖó vo nú ahwan!”
Alǐn e nɔ nɔ glelɛmɔ nu é wɛ.
Alǒ “ahwanfuntɔ́.”
Alǒ “ayǐkúngban wɛnjɛ Jexozafáti tɔn jí.”
Alǒ “gbeta kɔn wiwa tɔn.”
Alǒ “ayǐkúngban wɛnjɛ hwɛɖiɖɔ tɔn ɔ jí.”
Alǒ “gbeta kɔn wiwa tɔn.”
Alǒ “ayǐkúngban wɛnjɛ hwɛɖiɖɔ tɔn ɔ jí.”
Alǒ “toɖévomɛnu.”
Alǒ “tɔsisa.”
Blǔju tɔn, “hun yětɔn.”