AMƆ́SI
1 Amɔ́si* e ɖo lɛ̌ngbɔ́nyitɔ́ Tekówa tɔn lɛ́ mɛ é sín xó lɛ́. È ɖɔ xó énɛ́ lɛ́ n’i ɖo nǔmimɔ e kunkplá Izlayɛ́li é mɛ. Nǔ nyí mɔ̌ ɖo axɔ́sú Judáa tɔn Oziyási hwenu kpó axɔ́sú Izlayɛ́li tɔn Jelobowámu Yoaci ví ɔ hwenu kpó, xwe we jɛ nukɔn nú ayǐkúngban dán wǔ ɔ. 2 É ɖɔ:
“Jexóva ná dó gbe sín Sinyɔ́ɔ,
é ná sú xó sín Jeluzalɛ́mu,
lɛ̌ngbɔ́nyitɔ́ lɛ́ sín amagbo ná yɔ́,
bɔ ama e ɖo Kaamɛ́li sín ta lɛ́ é ná xú.”
3 “Xó e Jexóva ɖɔ é ɖíe:
‘“Ðó Damási fɔ́n gǔ* azɔn atɔn, ɛɛn, azɔn ɛnɛ* wútu ɔ, un ná lɛ́ kɔ wá gbeta e kɔn un wá é jí ǎ,
ɖó yě só Galádi lěe è nɔ zán nǔkúnsónú gannɔ dó só nǔkún gbɔn é ɖɔhun.
4 Énɛ́ wú ɔ, un ná sɛ́ myɔ ɖé dó Hazaɛ́li sín xwé,
bɔ é ná fyɔ́ atɔxwɛ syɛ́nsyɛ́n Bɛni-Hadádi tɔn lɛ́.
5 Un ná gba hɔntogbó Damási tɔn lɛ́ sín kpo lɛ́ hánnyá;
un ná sú kún dó nú mɛ e nɔ nɔ Bikáti-Avɛ́ni lɛ́ é,
kpó mɛ e ɖo acɛ kpa wɛ ɖo Bɛti-Edɛ́ni é* kpó;
bɔ togun Silíi tɔn ná yi kannumɔgbénu ɖo Kíi,” wɛ Jexóva ɖɔ.’
6 Xó e Jexóva ɖɔ é ɖíe:
‘“Ðó Gaza fɔ́n gǔ azɔn atɔn, ɛɛn, azɔn ɛnɛ wútu ɔ, un ná lɛ́ kɔ wá gbeta e kɔn un wá é jí ǎ,
ɖó yě kplá ahwankannumɔ gbɛ̌ta blěbú ɖé tɔn yi jó nú Edɔ́mu wútu.
7 Énɛ́ wú ɔ, un ná sɛ́ myɔ ɖé dó Gaza sín ahohó ɔ,
bɔ é ná fyɔ́ atɔxwɛ syɛ́nsyɛ́n tɔn lɛ́.
8 Un ná sú kún dó nú mɛ e nɔ nɔ Acidɔ́di lɛ́ é,
kpó mɛ e ɖo acɛ kpa wɛ ɖo Acikelɔ́ni é* kpó;
un ná dɔn tó nú Eklɔ́ni,
bɔ Filisitɛ́ɛn e kpo lɛ́ é ná dɔn,” wɛ Aklúnɔ Nǔbǐwúkpétɔ́ Jexóva ɖɔ.’
9 Xó e Jexóva ɖɔ é ɖíe:
‘Ðó Tíi fɔ́n gǔ azɔn atɔn, ɛɛn, azɔn ɛnɛ wútu ɔ, un ná lɛ́ kɔ wá gbeta e kɔn un wá é jí ǎ,
ɖó yě kplá ahwankannumɔ gbɛ̌ta blěbú ɖé tɔn yi jó nú Edɔ́mu,
bo sɔ́ flín akɔ e yě jɛ xá nɔví yětɔn lɛ́ é ǎ wútu.
10 Énɛ́ wú ɔ, un ná sɛ́ myɔ ɖé dó Tíi sín ahohó ɔ,
bɔ é ná fyɔ́ atɔxwɛ syɛ́nsyɛ́n tɔn lɛ́.’
11 Xó e Jexóva ɖɔ é ɖíe:
‘Ðó Edɔ́mu fɔ́n gǔ azɔn atɔn, ɛɛn, azɔn ɛnɛ wútu ɔ, un ná lɛ́ kɔ wá gbeta e kɔn un wá é jí ǎ,
ɖó é nya nɔví éɖésúnɔ tɔn kpó hwǐ kpó,
bo ɖe nǔbláwǔkúnúmɛ xlɛ́ ǎ wútu;
é ɖo xomɛsin jí, bo nɔ ɖo yě vúnvún wɛ magbokɔ,
bo nɔ ɖo xomɛ sin dó yě wɛ syɛ́nsyɛ́n hwebǐnu.
12 Énɛ́ wú ɔ, un ná sɛ́ myɔ ɖé dó Temáni,
bɔ é ná fyɔ́ atɔxwɛ syɛ́nsyɛ́n Bosla tɔn lɛ́.’
13 Xó e Jexóva ɖɔ é ɖíe:
‘“Ðó Amumɔ́ɔ ví lɛ́ fɔ́n gǔ azɔn atɔn, ɛɛn, azɔn ɛnɛ wútu ɔ, un ná lɛ́ kɔ wá gbeta e kɔn un wá é jí ǎ,
ɖó yě zɛ xoxónɔ e ɖo Galádi lɛ́ é sín adɔgo, bo ná dó gbló ada nú ayǐkúngban yěɖésúnɔ tɔn wútu.
14 Énɛ́ wú ɔ, un ná sɛ́ myɔ dó Hlaba sín ahohó ɔ,
bɔ é ná fyɔ́ atɔxwɛ syɛ́nsyɛ́n tɔn lɛ́,
ahwanfunfun sín azǎn ɖé wɛ é ná nyí, bɔ è ná sú ahwanfunfun sín xó,
é ná lɛ́ nyí azǎn e gbe jɔhɔn syɛ́nsyɛ́n ná nyi kpó jǐ kpó é.
15 Axɔ́sú yětɔn ná yi kannumɔgbénu, gɔ́ nú axɔ́ví tɔn lɛ́,” wɛ Jexóva ɖɔ.’
2 “Xó e Jexóva ɖɔ é ɖíe:
‘“Ðó Mɔwábu fɔ́n gǔ* azɔn atɔn, ɛɛn, azɔn ɛnɛ* wútu ɔ, un ná lɛ́ kɔ wá gbeta e kɔn un wá é jí ǎ,
ɖó é dó axɔ́sú Edɔ́mu tɔn sín xú lɛ́ zo, bo ná dó mɔ afín.*
2 Énɛ́ wú ɔ, un ná sɛ́ myɔ ɖé dó Mɔwábu,
bɔ é ná fyɔ́ atɔxwɛ syɛ́nsyɛ́n Keliyɔ́ti tɔn lɛ́;
Mɔwábu ná kú ɖo hunnyahunnya ɖé tɛ́ntin,
hwenu e è ná ɖo ahwanfunfun sín xó sú wɛ, bo ná ɖo lanzo kún wɛ é.
3 Un ná ɖe acɛkpatɔ́* ɔ sín tɛ́ntin tɔn,
bo ná hu axɔ́ví lɛ́ bǐ, gɔ́ nú acɛkpatɔ́ ɔ,” wɛ Jexóva ɖɔ.’
4 Xó e Jexóva ɖɔ é ɖíe:
‘Ðó Judáa fɔ́n gǔ azɔn atɔn, ɛɛn, azɔn ɛnɛ wútu ɔ, un ná lɛ́ kɔ wá gbeta e kɔn un wá é jí ǎ,
ɖó yě xo nyɛ Jexóva sín sɛ́n* nyi kɛ́n,
bo lɛ́ xwedó gbetakɛ́n ce lɛ́ ǎ wútu;
loɔ, adingban e tɔ́gbó yětɔn lɛ́ xwedó lɛ́ é ɖokpó ɔ jɛ́n dɔn yě lɔmɔ̌ bú.
5 Énɛ́ wú ɔ, un ná sɛ́ myɔ ɖé dó Judáa,
bɔ é ná fyɔ́ atɔxwɛ syɛ́nsyɛ́n Jeluzalɛ́mu tɔn lɛ́.’
6 Xó e Jexóva ɖɔ é ɖíe:
‘Ðó Izlayɛ́li fɔ́n gǔ azɔn atɔn, ɛɛn, azɔn ɛnɛ wútu ɔ, un ná lɛ́ kɔ wá gbeta e kɔn un wá é jí ǎ,
ɖó yě nɔ sa nǔjlɔ́jlɔ́watɔ́, ɖó kpatágan wú,
bo nɔ sa wamamɔnɔ, ɖó afɔkpa* wú.
7 Yě nɔ sɔ́ afɔ dó gbídí lelenɔ lɛ́ sín ta dó afúntúntún mɛ,
bo nɔ sú ali dó mɛɖéesɔ́hwetɔ́ lɛ́.
Vǐ kpó tɔ́ kpó nɔ ɖóxó xá nyɔ̌nuví ɖokpó ɔ,
mɔ̌ mɛ ɔ, yě nɔ kɔn cí dó nyǐkɔ mímɛ́ ce wú.
8 Yě nɔ mlɔ́ awu e yě yí ɖó gbanu lɛ́ é* jí ɖo vɔ̌sákpe lɛ́ bǐ kpá;
vɛ̌ɛn e yě nɔ nu ɖo nǔmɛsɛn yětɔn lɛ́ sín xwégbe* é ɔ, mɛ e yě kán akwɛ́ ná lɛ́ é sí wɛ yě nɔ yí ɖe.’
9 ‘Loɔ, nyɛ wɛ vívá kún nú Amɔlíti* ɔ ɖo nukɔn yětɔn,
éyɛ́ mɛ e yi jǐ sɛ́dlutín lɛ́ ɖɔhun, bo lɛ́ ɖó hlɔ̌nhlɔ́n cɛ́nitín lɛ́ ɖɔhun é;
un sú sínsɛ́n e ɖ’é jí é dó, bo sú kún dó nú ɖɔ tɔn lɛ́ ɖo do.
10 Un kplá mi tɔ́n sín Ejípu yíkúngban jí,
bo bló bɔ mi ɖi zɔnlin gbɔn gbětótló mɛ nú xwe 40,
bónú mi ná yí Amɔlíti* ɔ sín ayǐkúngban ɔ.
11 Un sɔ́ vǐ mitɔn ɖé lɛ́ bɔ yě nyí gbeyíɖɔ lɛ́,
bo sɔ́ mɛ wínnyáwínnyá mitɔn ɖé lɛ́ bɔ yě nyí nazilíi lɛ́.
Togun Izlayɛ́li tɔn è, nǔ nyí mɔ̌ ǎ cé?’ wɛ Jexóva ɖɔ.
12 ‘Amɔ̌, mi nɔ ɖo vɛ̌ɛn ná nazilíi lɛ́ wɛ, bónú yě ná nu,
bo nɔ ɖe gbe nú gbeyíɖɔ lɛ́ ɖɔ: “Mi ɖó ná wa gbeyíɖɔzɔ́ ǎ!”
13 Énɛ́ wú ɔ, un ná nyínyɛ́ mi ɖo fí e mi ɖe é,
lěe agbanhún e è dó nǔkún sín agban ná é ɖé nɔ nyínyɛ́ nǔ e ɖo glɔ̌ tɔn lɛ́ é gbɔn é ɖɔhun.
14 Mɛ e yá afɔ é ná mɔ fí ɖě bo hɔn yi ǎ,
mɛ e ɖó hlɔ̌nhlɔ́n é ná kpé wú bo hɛn hlɔ̌nhlɔ́n tɔn wú ǎ,
bɔ ahwanfuntɔ́ ɖě ná kpé wú bo hɔn dó gbɛ* tɔn jí ǎ.
15 Gǎdatɔ́ ná nɔ te ɖo ahwan nukɔn ǎ,
mɛ e yá afɔ é ná xo gló ǎ,
bɔ sɔ́xátɔ́ ná kpé wú bo hɔn dó gbɛ* tɔn jí ǎ.
16 Mɛ ɖěɖěe tlɛ kpankɔ́n hú gǎn* ɖo ahwanfuntɔ́ lɛ́ mɛ lɛ́ é
ná nɔ mɛ̌ bo hɔn gbe énɛ́ gbe,’ wɛ Jexóva ɖɔ.”
3 “Togun Izlayɛ́li tɔn è mi, mi ɖótó xó élɔ́ e Jexóva ɖɔ dó mi wú é; xó e é ɖɔ dó hɛ̌nnu e é kplá tɔ́n sín Ejípu yíkúngban jí é blěbú wú é. É ɖɔ:
2 ‘Ðo hɛ̌nnu e ɖo ayǐkúngban jí lɛ́ é bǐ mɛ ɔ, midɛɛ lɛ́ ɖokpónɔ wɛ un tuun ganjí.
Énɛ́ wú wɛ un ná byɔ́ mi ɖɔ mi ní ɖó nǔ e mi wa nyi do lɛ́ é bǐ sín gbe.
3 Mɛ we ná ɖi zɔnlin ɖó kpɔ́, ényí yě ma ko bló tuto bá kplé ǎ ɔ a?*
4 Kinnikínní ɖé ná dó gbe ɖo zungbó mɛ, ényí é ma mɔ nǔ e é ná wlí ɖu é ɖě ǎ ɔ a?
Kinnikínní wínnyáwínnyá* ɖé ná húnhún nǔ ɖɔ ɖo fí e é xo do ɖó é, ényí é ma mɔ nǔɖé bo wlí ǎ ɔ wɛ a?
5 Xɛ ɖé ka ná jɛ mɔ mɛ, ényí è ma ɖó mɔ n’i ǎ ɔ a?*
Ényí fɛ́ca ɖé ma wlí nǔ ǎ ɔ, é nɔ fɛ́ wɛ a?
6 Ényí è kún lanzo ɖo toxo ɖé mɛ ɔ, mɛ e ɖo toxo ɔ mɛ lɛ́ é nɔ sísɔ́ ǎ cé?
Ényí awě xo toxo ɖé ɔ, Jexóva wɛ zɔ́n ǎ cé?
7 Nǔgbó ɔ, Aklúnɔ Nǔbǐwúkpétɔ́ Jexóva nɔ wa nǔɖé,
ma ɖɔ kpáxó tɔn nú* mɛsɛntɔ́ tɔn gbeyíɖɔ lɛ́ ǎ.
8 Kinnikínní dó gbe! Mɛ̌ xɛsi ma ka ná ɖi ǎ?
Aklúnɔ Nǔbǐwúkpétɔ́ Jexóva ɖe gbe! Gbeyíɖɔ tɛ́ ka ná nɔ abwɛ̌?’
9 ‘Mi jlá ɖo atɔxwɛ syɛ́nsyɛ́n Acidɔ́di tɔn lɛ́
kpó atɔxwɛ syɛ́nsyɛ́n e ɖo Ejípu to mɛ lɛ́ é kpó jí ɖɔ:
“Mi kplé ɖó kpɔ́ ɖo só Samalíi tɔn lɛ́ kɔn;
mi kpɔ́n hunnyahunnya,
kpó ahizi kpó tobutóbú e gɔ́ fínɛ́ é.
10 Ðó yě tuun lěe yě ná wa nǔ jlɔ́jlɔ́ gbɔn é ǎ,” wɛ Jexóva ɖɔ;
“mɛ énɛ́ lɛ́ nɔ xo dɔkun e yě jɛ gbɔn dǎkaxixo kpó kún súsú dó nú nǔ kpó gblamɛ lɛ́ é kplé dó atɔxwɛ syɛ́nsyɛ́n yětɔn lɛ́ mɛ.”’
11 Énɛ́ wú ɔ, xó e Aklúnɔ Nǔbǐwúkpétɔ́ Jexóva ɖɔ é ɖíe:
‘Kɛntɔ́ ɖé ná ján go dó to ɔ,
é ná yí hlɔ̌nhlɔ́n towe sín así towe,
bɔ yě ná vɔ nǔ e ɖo atɔxwɛ syɛ́nsyɛ́n towe lɛ́ mɛ lɛ́ é bǐ.’
12 Xó e Jexóva ɖɔ é ɖíe:
‘Lěe é nɔ kpo lɛ̌ngbɔ́ ɖé sín afɔ we lɛ́, alǒ tó kánkpo ɖé, bɔ lɛ̌ngbɔ́nyitɔ́ ɔ nɔ yí sín kinnikínní nu mɛ gbɔn é ɔ,
lěe è ná hwlɛ́n togun Izlayɛ́li tɔn gbɔn é nɛ́.
Yědɛɛ lɛ́ mɛ e, din ɔ, yě ɖo ayǐjínjɔ́n ɖo Samalíi ɖo zan ɖɛkpɛ ɖɛkpɛ lɛ́ jí, bo ɖo ayǐjínjɔ́n ɖo zinkpo gǎnjɛmɛ ɖagbe ɖagbe lɛ́* mɛ lɛ́ é.’
13 ‘Mi ɖótó, bo gb’akpá nú kúnkan Jakɔ́bu tɔn lɛ́,’ wɛ Aklúnɔ Nǔbǐwúkpétɔ́ Jexóva, Mawu ahwankpá lɛ́ tɔn ɖɔ.
14 ‘Ðó gbe e gbe un ná byɔ́ Izlayɛ́li ɖɔ é ní ɖó gǔ e é fɔ́n lɛ́ é* bǐ sín gbe é ɔ,
un ná lɛ́ byɔ́ ɖɔ é ní ɖó vɔ̌sákpe e ɖo Betɛ́li lɛ́ é sín gbe;
è ná sɛ́n vɔ̌sákpe ɔ sín zo lɛ́, bɔ yě ná jɛ kɔ́mɛ.
15 Un ná mu avivɔhwenu sín xwé ɔ, gɔ́ nú yǒzohwenu sín xwé ɔ.’
‘Xwé e è sɔ́ ajinakúɖú dó ba acɔ́ ná lɛ́ é ná sú dó,
xwé ɖaxó ɖaxó lɛ́* ná sú dó,’ wɛ Jexóva ɖɔ.”
4 “Nyɔ̌nu e ɖo Samalíi sín só ɔ jí,
bo cí nyibúsi Basáni tɔn lɛ́ ɖɔhun lɛ́ é mi,
mi nyɔ̌nu e nɔ hízí lelenɔ lɛ́, bo nɔ nyínyɛ́ wamamɔnɔ lɛ́,
lobo nɔ ɖɔ nú asú* mitɔn lɛ́ ɖɔ: ‘Sɔ́ nǔɖé wá bónú mǐ ná nu!’ lɛ́ é mi, mi ɖótó xó élɔ́.
2 Aklúnɔ Nǔbǐwúkpétɔ́ Jexóva xwlé mɛ mímɛ́ e é nyí é bo ɖɔ:
‘“Éɖíe! Azǎn ɖé lɛ́ ja, bɔ è ná sɔ́ klɔcée lansatɔ́ tɔn lɛ́ dó dɔn mi ná,
bɔ mɛ e ná kpo lɛ́ é ɔ, è ná sɔ́ mlɛ dó dɔn yě ná.
3 Mi ná tɔ́n gbɔn dǒ gbigba lɛ́ vlamɛ, bɔ mɛ ɖokpó ɖokpó ná ɖidó tlélé;
bɔ è ná nya mi tɔ́n tunta Aamɔ́ɔ,” wɛ Jexóva ɖɔ.’
4 ‘Hǔn din ɔ, mi wá Betɛ́li bo gba sɛ́n,*
mi wá Gilugálu bo gba sɛ́n d’é jí!
Mi hɛn vɔ̌sánú mitɔn lɛ́ wá zǎnzǎn,
bo hɛn mǎɖówǒ mitɔn lɛ́ wá azǎn atɔngɔ́ ɔ gbe.
5 Mi dó wɔ̌xúxú e mɛ tɔ́n ɖe é sín nǔníná zo dó dó kú nú Mawu;
mi sú xó bo jlá vɔ̌ e mi sá kpó jlǒ kpó lɛ́ é!
Ðó, togun Izlayɛ́li tɔn è, nǔ e mi yí wǎn ná bo nɔ wa é nɛ́,’ wɛ Aklúnɔ Nǔbǐwúkpétɔ́ Jexóva ɖɔ.
6 ‘Bɔ nyɛ ɔ, un bló bɔ aɖǔ mitɔn lɛ́ mɛ́, ɖó nǔ ma mɔ ɖu wú, ɖo toxo mitɔn lɛ́ bǐ mɛ,*
bo bló bɔ wɔ̌xúxú hwedó mi ɖo xwé mitɔn lɛ́ bǐ gbe;
é ɖo mɔ̌ có, mi lɛ́ kɔ wá gɔ̌n ce ǎ,’ wɛ Jexóva ɖɔ.
7 ‘Un lɛ́ tɛ jǐ mi, sun atɔn jɛ nukɔn nú nǔkúnyiyahwenu;
un bló bɔ jǐ ja ɖo toxo ɖě mɛ, bo ka gɔn jija ɖo toxo ɖěvo mɛ.
Jǐ nɔ ja dó ayǐkúngban kléwún ɖé jí,
bo ka nɔ gɔn jija dó ayǐkúngban kléwún ɖěvo jí, káká bɔ é nɔ xú.
8 Mɛ e ɖo toxo we, alǒ atɔn mɛ lɛ́ é nɔ ɖo sa fún wɛ xwe toxo ɖokpó ɔ mɛ, bo ná dó nu sin,
loɔ, yě nɔ mɔ nu ɖi kɔ ǎ;
é ɖo mɔ̌ có, mi lɛ́ kɔ wá gɔ̌n ce ǎ,’ wɛ Jexóva ɖɔ.
9 ‘Un sɔ́ yǒzo syɛ́nsyɛ́n kpó hwa funfun kpó dó wa nǔ dó mi wú.
Mi nɔ ɖo jikpá lɛ́ kpó vǐwungbo lɛ́ kpó ɖó d’é jí wɛ,
loɔ, bɔkle lɛ́ nɔ ɖu fígitín mitɔn lɛ́ kpó olívutín mitɔn lɛ́ kpó sú dó;
é ɖo mɔ̌ có, mi lɛ́ kɔ wá gɔ̌n ce ǎ jɛ́n wɛ,’ wɛ Jexóva ɖɔ.
10 ‘Un sɛ́ jɛmɛjí e un sɔ́ dó xo Ejípu é ɖɔhun dó tɛ́ntin mitɔn.
Un sɔ́ hwǐ dó hu dɔ̌nkpɛvú mitɔn lɛ́, bo lɛ́ wlí sɔ́ mitɔn lɛ́ hɛn yi.
Un bló bɔ cyɔ e ɖo fí e mi ɖó gɔnu ɖó lɛ́ é sín wǎn gba kpé fí bǐ;
é ɖo mɔ̌ có, mi lɛ́ kɔ wá gɔ̌n ce ǎ,’ wɛ Jexóva ɖɔ.
11 ‘Un vívá nǔ ɖo tɛ́ntin mitɔn,
lěe un vívá Sodɔ́mu kpó Gomɔ́ɔ kpó gbɔn é ɖɔhun.
Bɔ mɛ e gán ɖo tɛ́ntin mitɔn lɛ́ é cí nakí e è lun sín myɔ mɛ é ɖɔhun;
é ɖo mɔ̌ có, mi lɛ́ kɔ wá gɔ̌n ce ǎ,’ wɛ Jexóva ɖɔ.
12 Énɛ́ wú ɔ, Izlayɛ́li è, nǔ e un ná lɛ́ wa xá we é nɛ́.
Izlayɛ́li è, ɖó nǔ énɛ́ e un ná wa xá we é wú ɔ,
ɖo gbesisɔmɛ bá kpé Mawu towe.
13 Nǔgbó ɔ, é wɛ nyí Mɛ e bló só lɛ́, bo lɛ́ bló jɔhɔn é;
é nɔ ɖɔ linlin tɔn lɛ́ nú gbɛtɔ́,
é nɔ sɔ́ ayǐtéhɔ̌nnu dó húzú zǐnflú,
lobo nɔ zun zɔnlin gbɔn fí e yi jǐ hú gǎn ɖo ayǐkúngban ɔ jí lɛ́ é;
Jexóva Mawu ahwankpá lɛ́ tɔn wɛ é nɔ nyí.”
5 “Togun Izlayɛ́li tɔn è, mi ɖótó xó élɔ́ e ɖɔ dó mi wú wɛ un ɖe gbɛvíhan* ɖé ɖɔhun é:
2 ‘Ðyɔ̌vǐ ɖo alɔjí Izlayɛ́li j’ayǐ ɖo ayǐkúngban éɖésúnɔ tɔn jí;
é sɔ́ sixú sí te ǎ.
Mɛ bǐ jó è dó;
mɛ ɖě ɖe bo ná sɔ́ ɛ sí te ǎ.’
3 “Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe:
‘Toxo e hɛn sɔ́ja 1 000 yi ahwan é ɔ, 100 jɛ́n ná kpo n’i;
bɔ éé hɛn 100 yi é ɔ, 10 jɛ́n ná kpo n’i; mɔ̌ wɛ é ná nyí gbɔn nú togun Izlayɛ́li tɔn.’
4 “Ðó nǔ e Jexóva ɖɔ nú togun Izlayɛ́li tɔn é ɖíe:
‘Mi ba mì, bo ná nɔ gbɛ.
5 Mi ma yi ba alɔdó ɖo Betɛ́li ó,
mi ma yi Gilugálu, alǒ d’asá dogbó yi Beɛ́ɛ-Ceba ó,
ɖó é ɖo wɛn ɖɔ Gilugálu ná yi kannumɔgbénu,
bɔ Betɛ́li sɔ́ ná nyí nǔɖéwanú ǎ.*
6 Mi ba Jexóva bo ná nɔ gbɛ,
bónú é ní ma wá wú kɔn nyi xwé Jozɛ́fu tɔn jí myɔ ɖɔhun,
lobo dó Betɛ́li zo bónú mɛ e ná xo cí é hán ó.
7 Mi nɔ sɔ́ hwɛjijɔ dó húzú vǐvɛ́,*
bo nɔ sɔ́ nǔjlɔ́jlɔ́wiwa dó xo kɔ́.
8 Mɛ e bló sunvísɛkplé Kimáa* kpó sunvísɛkplé Kesílu* kpó é ɔ,
mɛ e nɔ sɔ́ zǐnflú gɔngɔn dó húzú wěziza zǎnzǎn tɔn é ɔ,
mɛ e nɔ bló bɔ ablu nɔ dó kéze zǎnmɛ ɖɔhun é ɔ,
mɛ e nɔ xo sin e ɖo xu mɛ lɛ́ é kplé,
bo ná dó gba kɔn nyi ayǐkúngban nukúnmɛ é ɔ,
Jexóva wɛ é nɔ nyí.
9 É ná sú kún dó nú hlɔ̌nhlɔ́nnɔ ɔ bléwún,
bo ná sú fí e è mɛ ahohó lɛ́ lɛ̌ dó lɛ́ é dó.
10 Yě gbɛ́ wǎn nú mɛ e nɔ kɛ nu dó nǔ wú nú mɛ ɖo toxo ɔ sín hɔntogbó ta lɛ́ é,
bo gbɛ́ wǎn nú mɛ e nɔ ɖɔ nǔgbó lɛ́ é.
11 Ðó mi nɔ yí gle xáya kwɛ́* ɖo wamamɔnɔ sí,
bo nɔ yí nǔkún ɖo así tɔn ɖó kuzú tɛnmɛ wútu ɔ,
mi sɔ́ ná nɔ xwé e mi kpa awǐnnya dó gbá lɛ́ é gbe ǎ,
mi ka ná lɛ́ nu vǐwungbo ɖagbe ɖagbe e mi ɖó lɛ́ é sín vɛ̌ɛn ǎ.
12 Ðó un tuun lě do mi fɔ́n gǔ* sɔ é,
bo lɛ́ tuun lě do hwɛ mitɔn lɛ́ sukpɔ́ sɔ é:
mi nɔ gbídí kɔ nú hwɛjijɔnɔ,
mi nɔ ɖu nǔ ɖo nǔ mɛ,*
gɔ́ ná ɔ, mi nɔ ɖɔ hwɛ jlɔ́jlɔ́ nú wamamɔnɔ ɖo toxo ɔ sín hɔntogbó ta ǎ.
13 Énɛ́ wú ɔ, mɛ ɖěɖěe ɖó nukúnnúmɔjɛnǔmɛ lɛ́ é ná cí xwíí ɖo hwe énɛ́ nu,
ɖó awěxomɛ sín hwenu ɖé wɛ é ná nyí.
14 Mi ba nǔ e nyí nǔ ɖagbe é, é ní ma nyí nǔ e nyí nǔ nyanya é ó,
bo ná dó sixú nɔ gbɛ.
Énɛ́ ɔ, Jexóva Mawu ahwankpá lɛ́ tɔn ná nɔ kpɔ́ xá mi,
lěe mi nɔ ɖɔ gbɔn é.
15 Mi ní gbɛ́ wǎn nú nǔ e nyí nǔ nyanya é, bo yí wǎn nú nǔ e nyí nǔ ɖagbe é,
mi nú hwɛjijɔ ní ɖu ɖ’é jí ɖo toxo ɔ sín hɔntogbó ta,
bóyá Jexóva Mawu ahwankpá lɛ́ tɔn,
ná nyɔ́ xomɛ dó kúnkan Jozɛ́fu tɔn sín mɛ e kpo lɛ́ é wú.’
16 “Énɛ́ wú ɔ, nǔ e Jexóva, ɛɛn, Jexóva Mawu ahwankpá lɛ́ tɔn ɖɔ é ɖíe:
‘È ná nɔ ná alě ɖo tokplétɛn lɛ́ bǐ,
bo ná nɔ ɖɔ: “Áo! Áo!” gbɔn ali lɛ́ bǐ jí,
yě ná byɔ́ glesi lɛ́ ɖɔ yě ní dó gbɛvíhan,
bo ná byɔ́ mɛ ɖěɖěe è nɔ da bónú yě ná dó gbɛvíhan lɛ́ é ɖɔ yě ní ná alě.’
17 ‘È ná nɔ ná alě gbɔn vǐwungbo lɛ́ bǐ mɛ,
ɖó un ná gbɔn tɛ́ntin mitɔn,’ wɛ Jexóva ɖɔ.
18 ‘Heelú mɛ ɖěɖěe ɖo te kpɔ́n azǎn Jexóva tɔn vɛ́návɛ́ná lɛ́ é!
Étɛ́ mi ka sixú ɖó nukún ɖɔ é ná jɛ ɖo azǎn Jexóva tɔn gbe?
É ná dó ablu, é ná ɖó wěziza ǎ.
19 Gbe énɛ́ gbe ɔ, mi ná cí nya e ɖo hinhɔn nú kinnikínní wɛ, bo yi kpé lɔnmɔ,
bɔ hwenu e é byɔ́ xwé tɔn gbe bo sɔ́ alɔ ɖó dǒ wú é ɔ, dan ɖu i é ɖɔhun.
20 Azǎn Jexóva tɔn ná dó ablu, é ná ɖó wěziza ǎ, mɔ̌ wɛ ǎ cé?
Azǎn énɛ́ gbe ɔ, zǐnflú ná dó, gbɛ mɛ ná hɔ́n ǎ, mɔ̌ wɛ ǎ cé?
21 Un gbɛ́ wǎn nú xwe mitɔn lɛ́, un nɔ ké ya nú yě ǎ,
kplé bǔnɔ mitɔn lɛ́ sín wǎn nɔ jɛjí nú mì ɖěbǔ ǎ.
22 Ényí mi tlɛ xwlé vɔ̌ e è nɔ dó blěbú tɔn zo lɛ́ é kpó nǔníná lɛ́ kpó mì ɔ,
yě ná nyɔ́ nukún ce mɛ kwín ɖokpó ǎ;
kɔnɖókpɔ́vɔ́ e mi ná sɔ́ kanlin dó jǒ lɛ́ dó sá lɛ́ é ná nyɔ́ nukún ce mɛ ǎ.
23 Mi sɛ han mitɔn lɛ́ sín zǐngídi dó zɔ nú mì;
un jló ná se nǔɖiɖɔ kanhún mitɔn lɛ́ tɔn ǎ.
24 Mi nú hwɛjijɔ ní sa sin ɖɔhun,
bónú nǔjlɔ́jlɔ́wiwa ní cí tɔsisa e ma nɔ mɛ gbeɖé ǎ é ɖɔhun.
25 Togun Izlayɛ́li tɔn è, ɖo xwe 40 e mi bló ɖo gbětótló mɛ lɛ́ é vlamɛ ɔ,
mi hɛn vɔ̌sánú lɛ́ kpó nǔníná lɛ́ kpó wá nú mì wɛ a?
26 Din ɔ, bǒcyɔ nǔmɛsɛn mitɔn e nyí sunví é tɔn, ée mi kpa nú miɖésúnɔ lɛ́ é ɔ,
é ná byɔ́ ɖɔ mi ní bɛ́ yě ɖidó, yě wɛ nyí Sakúti kpó Kewáni kpó.*
27 Gɔ́ ná ɔ, un ná sɛ́ mi dó kannumɔgbénu yi fí e zɛ Damási wú é,’ wɛ mɛ e nɔ nyí Jexóva Mawu ahwankpá lɛ́ tɔn é ɖɔ.”
6 “Heelú mɛ e nɔ gán jɛ yěɖée wú zɛ xwé wú ɖo Sinyɔ́ɔ lɛ́ é,
mɛ e nɔ mɔ ɖɔ émí ɖo ayijayǐ mɛ ɖo só Samalíi tɔn jí lɛ́ é,
akɔta e ɖo tají hú gǎn ɖo akɔta lɛ́ mɛ é sín súnnu nukúnɖéjí lɛ́,
yě mɛ e gɔ́n togun Izlayɛ́li tɔn nɔ wá lɛ́ é!
2 Mi yi Kalunɛ́ɛ bo kpɔ́n.
Mi gosín fínɛ́ bo yi Hamáti Ðaxó ɔ,
énɛ́ gúdo hǔn, mi jɛ te yi Gati Filisitɛ́ɛn lɛ́ tɔn bo kpɔ́n.
Yě kpɔ́n te hú gǎn axɔ́súɖuto énɛ́ lɛ́* wɛ a?
Alǒ ayǐkúngban yětɔn d’agba hú mitɔn lɛ́ wɛ a?
3 Awěxomɛ sín azǎn ɔ jí ɖe ayi mitɔn sín wɛ mi ɖe a?
Dǎkaxixo sɔ́ ɖó ajo* wɛ mi ɖe a?
4 Yě nɔ mlɔ́ zan e è sɔ́ ajinakúɖú dó bló lɛ́ é jí, bo nɔ dlɛ́n ɖo zinkpo gǎnjɛmɛ ɖagbe ɖagbe lɛ́ mɛ,
bo nɔ ɖo lɛ̌ngbɔ́ ɖagbe hú gǎn lɛ́ kpó nyibú* e dó jǒ lɛ́ é kpó sín lan ɖu wɛ.
5 Agǐdigbo* ɖo nǔ ɖɔ wɛ ɔ, yě nɔ kpa han lɛ́ d’é mɛ,
bɔ Davídi ɖɔhun ɔ, yě nɔ dó nǔxonú lɛ́ wá.
6 Yě nɔ sɔ́ gannú dó nu vɛ̌ɛn
bo nɔ sá ami ɖagbe hú gǎn lɛ́.
Amɔ̌, xwé Jozɛ́fu tɔn sín ninɔmɛ baɖabaɖa ɔ ɖu ayi mɛ nú* yě ǎ.
7 Énɛ́ wú ɔ, yě wɛ ná nyí mɛ nukɔntɔn e ná yi kannumɔgbénu lɛ́ é,
bɔ agɔ̌ gɛnnyigɛnnyi e mɛ ɖěɖěe nɔ dlɛ́n ɖo zinkpo gǎnjɛmɛ mɛ lɛ́ é nɔ ɖu é ná wá vivɔnu.
8 ‘Nyɛ Aklúnɔ Nǔbǐwúkpétɔ́ Jexóva xwlé nyiɖée,’* wɛ Jexóva Mawu ahwankpá lɛ́ tɔn ɖɔ:
‘“Un gbɛ́ wǎn nú goyíyí Jakɔ́bu tɔn,
un gbɛ́ wǎn nú atɔxwɛ tɔn syɛ́nsyɛ́n lɛ́,
bɔ un ná jó toxo ɔ kpó nǔ e gɔ́ mɛ lɛ́ é kpó nú kɛntɔ́ tɔn lɛ́.
9 “‘“Bɔ ényí é kpo súnnu wǒ ɖo xwé ɖokpó ɔ gbe ɔ, yě lɔ ná kú. 10 Mɛ e ɖo yě mɛ lɛ́ é ɖokpó sín hɛ̌nnumɔ* ɖé ná wá bɛ́ yě tɔ́n, bo ná dó yě zo ɖějɛɖěgúdo. É ná bɛ́ xú yětɔn lɛ́ tɔ́n sín xwé ɔ gbe; énɛ́ gúdo ɔ, é ná ɖɔ nú mɛ ɖěbǔ e ná ɖo xɔnɔnɔ xwé ɔ gbe tɔn lɛ́ mɛ é ɖɔ: ‘É lɛ́ kpo mɛ ɖě ɖo gɔ̌n towe dɔ̌n a?’ Bɔ mɛ ɔ ná yí gbe ɖɔ: ‘Mɛtí!’ Énɛ́ ɔ, é ná ɖɔ: ‘Cí xwíí! Ðó hwe ɔ nu ɖíe bɔ è ná ylɔ́ nyǐkɔ Jexóva tɔn ǎ.’”
11 Ðó Jexóva wɛ ɖo gbe ɔ ɖe wɛ,
é ná gba xwé ɖaxó ɔ bɔ é ná húzú aglingbigba,
bo ná gba xwé kpɛví ɔ hánnyá.
12 Sɔ́ nɔ kán wezun gbɔn só jí wɛ a?
Alǒ è ná sɔ́ nyibú dó lɛ ayǐkúngban ɖo fínɛ́ wɛ a?
Ðó mi sɔ́ hwɛjijɔ dó húzú ama aɖǐvɛ́nɔ,
bo sɔ́ sínsɛ́n nǔjlɔ́jlɔ́wiwa tɔn dó húzú vǐvɛ́.*
13 Mi nɔ jɛ awǎ ɖó nǔ e ma hwɛ́n nǔɖé ǎ é wú,
bo nɔ ɖɔ: “Mǐ húzú agbɔ̌nnɔ gbɔn hlɔ̌nhlɔ́n mǐɖésúnɔ tɔn gblamɛ ǎ cé?”
14 Énɛ́ wú ɔ, togun Izlayɛ́li tɔn è mi, un ná fɔ́n akɔta ɖé dó mi jí,’ wɛ Jexóva Mawu ahwankpá lɛ́ tɔn ɖɔ,
‘bɔ yě ná dó ya nú mi sín Lebo-Hamáti* káká yi tɔsisa Alába tɔn tó.’”
7 Nǔ e Aklúnɔ Nǔbǐwúkpétɔ́ Jexóva ɖe xlɛ́ mì é ɖíe: Un mɔ bɔ é sɛ́ bɔklehwan ɖé dó hwenu e nǔkún e è dó gbɔn gǔdo lɛ́ é* jɛ susu jí é. Énɛ́ wɛ nyí, nǔkún e è dó gbɔn gǔdo hwenu e è ba gběhan nú kanlin axɔ́sú ɔ tɔn lɛ́ gúdo é. 2 Hwenu e bɔklehwan ɔ ɖu gběhan e ɖo to ɔ mɛ lɛ́ é fó é ɔ, un ɖɔ: “Aklúnɔ Nǔbǐwúkpétɔ́ Jexóva è, kɛnklɛ́n sɔ́ hwɛ kɛ togun towe! Nɛ̌ kúnkan Jakɔ́bu tɔn ka sixú gán ɖ’é mɛ* gbɔn? Ðó yě ɖó gǎn ǎ!”
3 Énɛ́ wú ɔ, Jexóva húzú linlin.* “É ná jɛ ǎ,” wɛ Jexóva ɖɔ.
4 Nǔ e Aklúnɔ Nǔbǐwúkpétɔ́ Jexóva ɖe xlɛ́ mì é ɖíe: Aklúnɔ Nǔbǐwúkpétɔ́ Jexóva ɖe gbe bɔ è sɔ́ myɔ dó dɔn tó nú togun ɔ. Myɔ ɔ fyɔ́ xu ɔ, bo lɛ́ fyɔ́ to ɔ sín akpáxwé ɖé. 5 Énɛ́ ɔ, un ɖɔ: “Aklúnɔ Nǔbǐwúkpétɔ́ Jexóva è, kɛnklɛ́n ɖó alɔ te ná. Nɛ̌ kúnkan Jakɔ́bu tɔn ka sixú gán ɖ’é mɛ* gbɔn? Ðó yě ɖó gǎn ǎ!”
6 Énɛ́ wú ɔ, Jexóva húzú linlin.* “Nǔ énɛ́ lɔ ná jɛ ǎ,” wɛ Aklúnɔ Nǔbǐwúkpétɔ́ Jexóva ɖɔ.
7 Nǔ e é ɖe xlɛ́ mì é ɖíe: Jexóva ɖo te ɖo dǒ e è zán nǔjlɛ́kan dó mɛ bɔ é jlɔ́ é ɖé jí, bɔ nǔjlɛ́kan ɖé ɖo alɔ tɔn mɛ. 8 Énɛ́ ɔ, Jexóva ɖɔ nú mì ɖɔ: “Amɔ́si, étɛ́ mɔ wɛ a ka ɖe?” Bɔ un ɖɔ: “Nǔjlɛ́kan ɖé.” Énɛ́ gúdo ɔ, Jexóva ɖɔ: “Un ná sɔ́ nǔjlɛ́kan ɖé dó togun ce Izlayɛ́li tɛ́ntin. Un sɔ́ ná sɔ́ hwɛ kɛ yě ɖě ǎ. 9 Izáki sín tɛn mímɛ́ lɛ́ ná jɛ vɔ̌, bɔ è ná vívá Izlayɛ́li sín tɛn mímɛ́ lɛ́; bɔ un ná sí te dó xwé Jelobowámu tɔn jí kpó hwǐ kpó.”
10 Vɔ̌sánúxwlémawutɔ́ Betɛ́li tɔn Amazíya sɛ́ wɛn élɔ́ dó axɔ́sú Izlayɛ́li tɔn Jelobowámu: “Amɔ́si ɖo gbě towe blá wɛ ɖo togun Izlayɛ́li tɔn tɛ́ntin. Xó tɔn lɛ́ bǐ kpé agbɔ̌n togun ɔ. 11 Ðó xó e Amɔ́si ɖɔ é ɖíe: ‘Jelobowámu ná kú hwǐ kú, bɔ è ná kplá Izlayɛ́li sín to tɔn mɛ yi kannumɔgbénu jɛ́n wɛ.’”
12 Énɛ́ ɔ, Amazíya ɖɔ nú Amɔ́si ɖɔ: “Nǔmɔtɔ́ è, yi, kán wezun yi Judáa to mɛ, ba wɔ̌xúxú* towe ɖo dɔ̌n, bo wa gbeyíɖɔzɔ́ ɖo dɔ̌n. 13 Amɔ̌, a sɔ́ ɖó ná wa gbeyíɖɔzɔ́ ɖě ɖo Betɛ́li ǎ, ɖó fínɛ́ nyí tɛn mímɛ́ axɔ́sú ɖé tɔn, bo lɛ́ nyí azinkan axɔ́súɖuto ɖé tɔn.”
14 Énɛ́ gúdo ɔ, Amɔ́si yí gbe nú Amazíya ɖɔ: “Un nyí gbeyíɖɔ ɖ’ayǐ ǎ, un ka lɛ́ nyí gbeyíɖɔví ǎ; loɔ, kanlinnyitɔ́ wɛ nú mì, bɔ un nɔ lɛ́ kpé nukún dó fígitín sikomɔ́ɔ lɛ́ wú.* 15 Amɔ̌, Jexóva ɖe mì sín kanlinhwan e wú kpé nukún dó wɛ un ɖe é gúdo. Bɔ Jexóva ɖɔ nú mì ɖɔ: ‘Yi, bo yi dó wɛn ce togun ce Izlayɛ́li.’ 16 Hǔn din ɔ, ɖǒtó xó e Jexóva ɖɔ é: ‘A nɔ ɖɔ: “Ma ɖɔ nǔ nyanya ná jɛ dó Izlayɛ́li wú ó, ma ka lɛ́ dó wɛn hwɛɖónúmɛ tɔn kúnkan Izáki tɔn ó.” 17 Énɛ́ wú ɔ, xó e Jexóva ɖɔ é ɖíe: “Asi towe ná húzú tonyatɔ́ ɖo toxo ɔ mɛ, vǐ súnnu towe lɛ́ kpó vǐ nyɔ̌nu towe lɛ́ kpó ná kú hwǐ kú. È ná zán nǔjlɛ́kan ɖé dó má ayǐkúngban towe, bɔ hwiɖésúnɔ ná kú ɖo ayǐkúngban blíblí ɖé jí. Bɔ é ɖo wɛn ɖɔ, è ná kplá Izlayɛ́li sín to tɔn mɛ yi kannumɔgbénu.”’”
8 Nǔ e Aklúnɔ Nǔbǐwúkpétɔ́ Jexóva ɖe xlɛ́ mì é ɖíe: Un mɔ alǔun mɛ sín atínsínsɛ́n xasun ɖokpó. 2 Énɛ́ gúdo ɔ, é ɖɔ: “Amɔ́si, étɛ́ mɔ wɛ a ka ɖe?” Bɔ un ɖɔ: “Alǔun mɛ sín atínsínsɛ́n xasun ɖokpó.” Énɛ́ gúdo ɔ, Jexóva ɖɔ nú mì ɖɔ: “Hwe ɔ nu su, bɔ è ná dɔn tó nú togun ce Izlayɛ́li. Un sɔ́ ná sɔ́ hwɛ kɛ yě ɖě ǎ. 3 ‘Gbe énɛ́ gbe ɔ, han e è nɔ ji ɖo sinsɛnxɔ mɛ lɛ́ é ná húzú gbɛvíhan,’ wɛ Aklúnɔ Nǔbǐwúkpétɔ́ Jexóva ɖɔ. ‘Cyɔ lɛ́ ná sukpɔ́, bɔ è ná bɛ́ yě nyi gbě, bɔ yě ná kpé fí bǐ. Fí bǐ ní nyí tóó!’
4 Mi ɖótó, mi mɛ e nɔ gbídí wamamɔnɔ lɛ́ ɖó afɔ wú,
bo nɔ wa nǔ dó zin xomɛfátɔ́ e ɖo to ɔ mɛ lɛ́ é dɛ́ lɛ́ é,
5 mi mɛ e nɔ ɖɔ xó élɔ́ lɛ́ é: ‘Hwetɛ́nu sunwájǐxwe ɔ ka ná fó, bónú mǐ ná sixú sa jinukún mǐtɔn lɛ́?
Hwetɛ́nu gbɔjɛzán ɔ ka ná fó, bónú mǐ ná sixú ɖó jinukún mǐtɔn lɛ́ sín agban, bá sa?
Énɛ́ ɔ, mǐ sixú ɖe nǔjlɛ́nú éfa* sín agbadídó kpo,
bo ná bló bɔ síklu* ɔ sín kpinkpɛn ná jɛjí,
lobo ná sɔ́ nǔdagan mǐtɔn lɛ́ ɖó alɔ ɖé jí, bá dó xo mɛ ɖu.
6 Mɔ̌ mɛ ɔ, mǐ sixú sɔ́ kpatágan dó xɔ gbɛ̌dónánɔ,
lobo sɔ́ afɔkpa* dó xɔ wamamɔnɔ,
bo lɛ́ sa jinukún gblégblé lɛ́.’
7 Jexóva xwlé nǔ gbɔn Susu Jakɔ́bu tɔn gblamɛ ɖɔ:
‘Un ná wɔn nǔ e yě wa lɛ́ é ɖě gbeɖé ǎ.
8 É ná sín énɛ́ wú bɔ to* ɔ ná sísɔ́,
bɔ mɛ e ɖ’é mɛ lɛ́ é bǐ ná nɔ aluwɛ mɛ.
To ɔ bǐ ma ná fɔ́n lěe Nilu nɔ cí hwenu e é gɔ́ é ɖɔhun a?
É ná wa adǎn bo lɛ́ hwíhwɛ́ Nilu Ejípu tɔn ɖɔhun.’
9 ‘Ðo gbe énɛ́ gbe ɔ,’ wɛ Aklúnɔ Nǔbǐwúkpétɔ́ Jexóva ɖɔ,
‘un ná bló bɔ hwe ná yi xɔ hwemɛ cíɖíɖí,
bo ná bló bɔ to ɔ ná d’ablu kéze ɖéɖé.
10 Un ná sɔ́ xwe e mi nɔ ɖu lɛ́ é dó húzú aluwɛ,
bo ná sɔ́ han mitɔn lɛ́ bǐ dó húzú gbɛvíhan.*
Un ná dó ati alin nú mɛ bǐ, bo ná bló bɔ mɛ bǐ ná sún ahɔn;
nǔ e un ná wa xá mi é ná cí aluwɛ e mɛ è nɔ nɔ hwenu e vǐ súnnu ɖokpó e è ɖó é kú dó mɛ é ɖɔhun;
azǎn énɛ́ sín vivɔnu ná vlɛ́ nu.’
11 ‘Éɖíe! Azǎn lɛ́ ja,’ wɛ Aklúnɔ Nǔbǐwúkpétɔ́ Jexóva ɖɔ,
‘bɔ un ná sɛ́ adɔ ɖé dó to ɔ mɛ,
é nyí nǔɖuɖu sín adɔ ǎ, é ka lɛ́ nyí sin sín kɔxúmɛ ǎ,
loɔ, xó Jexóva tɔn sise sín adɔ wɛ.
12 Yě ná nɔ fún sa sín xu ɖé kɔn yi ɖěvo kɔn,
sín totaligbé yi zǎnzǎnhwe jí.*
Yě ná ba xó Jexóva tɔn gbɔn fí bǐ, bo ka ná mɔ ǎ.
13 Azǎn énɛ́ gbe ɔ, nyɔ̌nu ɖo alɔjí ɖɛkpɛ ɖɛkpɛ lɛ́ ná ba yěɖée kpo,
dɔ̌nkpɛvú lɛ́ lɔ ná ba yěɖée kpo, ɖó kɔxúmɛ wú;
14 mɛ ɖěɖěe nɔ xwlé nǔ gbɔn hwɛhuhu Samalíi tɔn gblamɛ, bo nɔ ɖɔ:
“Dan è, ényí nǔmɛsɛn towe ɖo gbɛ jɛ́n nyí ɔ!”
Bo nɔ lɛ́ ɖɔ: “Ényí ali e yi Beɛ́ɛ-Ceba é ɖo te jɛ́n nyí ɔ!” lɛ́ é ɔ,
yě ná j’ayǐ, bo sɔ́ ná sixú sí te ǎ.’”
9 Un mɔ Jexóva ɖo vɔ̌sákpe ɔ tanu, bɔ é ɖɔ: “Zin nǔ dó dotín lɛ́ wú ɖo aga, énɛ́ ɔ, dodónu lɛ́ ná húnhún. Sɛ́n ta yětɔn, énɛ́ ɔ, nyɛ ná hu éé kpo lɛ́ é ɖó hwǐ wú. Mɛ ɖěbǔ hɔn ɔ, é ná tɔ́n sín mɛ ǎ, mɛ ɖěbǔ ka tɛ́n kpɔ́n bo ná gán ɖ’é mɛ ɔ, é ná kpa ɛ ǎ.
2 Ényí yě kun Yɔdo,* bo hwlá cí mɛ ɔ,
un ná sɔ́ alɔ ce dó dɔn yě tɔ́n sín fínɛ́;
ényí yě yi jǐxwé ɔ,
un ná dɔn yě sín dɔ̌n wá do.
3 Ényí yě yi hwlá yěɖée lɛ́ dó Kaamɛ́li só ta ɔ,
un ná yi ba yě mɔ, bo wlí yě ɖo fínɛ́.
Ényí yě yi hwlá yěɖée lɛ́ dó xuzan mɛ, bónú nukún ce lɛ́ ma mɔ yě ó ɔ,
un ná ɖe gbe bɔ dan ná xú aɖǔ yě ɖo dɔ̌n.
4 Ényí kɛntɔ́ yětɔn lɛ́ kplá yě yi kannumɔgbénu ɔ,
un ná ɖe gbe nú hwǐ, bɔ é ná hu yě ɖo dɔ̌n;
un ná sɔ́ nukún ɖó yě jí dó nyanya jí, é ná nyí dó ɖagbe jí ǎ.
5 Ðó Aklúnɔ Nǔbǐwúkpétɔ́, Jexóva ahwankpá lɛ́ tɔn wɛ nyí Mɛ e sín alɔ ná jɛ to* ɔ wú é,
bɔ é ná sínsín, bɔ mɛ e ɖ’é mɛ lɛ́ é bǐ ná nɔ aluwɛ mɛ;
to ɔ bǐ ná fɔ́n lěe Nilu nɔ cí hwenu e é gɔ́ é ɖɔhun,
bo ná hwíhwɛ́ Nilu Ejípu tɔn ɖɔhun.
6 ‘Mɛ e bló kpekán tɔn lɛ́ ɖo jǐxwé,
bo vlɔ́n jǐnukúnsin tɔn ɖó ayǐkúngban ɔ tanu é ɔ;
mɛ e nɔ xo sin e ɖo xu mɛ lɛ́ é kplé,
bo ná dó gba kɔn nyi ayǐkúngban nukúnmɛ é ɔ:
Jexóva wɛ é nɔ nyí.’
7 ‘Togun Izlayɛ́li tɔn è mi, é ma nyí Kúcinu lɛ́ sín vǐ lɛ́ ɖɔhun wɛ mi cí nú mì ǎ cé?’ wɛ Jexóva ɖɔ.
‘Un ma ɖe Izlayɛ́li tɔ́n sín Ejípu to ɔ mɛ,
bo ɖe Filisitɛ́ɛn lɛ́ tɔ́n sín Klɛ́ti, lobo ɖe Silíinu lɛ́ tɔ́n sín Kíi ǎ cé?’
8 ‘Éɖíe! Nukún Aklúnɔ Nǔbǐwúkpétɔ́ Jexóva tɔn lɛ́ ɖo axɔ́súɖuto hwɛhutɔ́ ɔ jí,
bɔ é ná sú kún tɔn dó sín to ɔ mɛ.
Amɔ̌, un ná sú kún dó nú kúnkan Jakɔ́bu tɔn ɔ bǐ mlɛ́mlɛ́ ǎ,’ wɛ Jexóva ɖɔ.
9 ‘Éɖíe! Un ɖo gbe ɖe wɛ,
bɔ un ná húnhún akɔta Izlayɛ́li tɔn ɖo akɔta lɛ́ bǐ tɛ́ntin,
lěe è nɔ húnhún nǔtanú,
bɔ kɛ́n ɖě ma nɔ j’ayǐ sín mɛ ǎ é ɖɔhun.
10 Hwɛhutɔ́ e ɖo togun ce mɛ lɛ́ é bǐ ná kú hwǐ kú,
yě mɛ ɖěɖěe nɔ ɖɔ: “Awě ná sɛkpɔ́ mǐ ǎ alǒ ná xo mǐ ǎ lɛ́ é.”’
11 ‘Ðo azǎn énɛ́ gbe ɔ, un ná gbá azava* Davídi tɔn e ko mu é,
un ná jlá fí e wɔ lɛ́ é ɖó,
bo ná vɔ́ dǒglin tɔn lɛ́ mɛ;
un ná vɔ́ gbá bɔ é ná cí lěe é ɖe gbɔn ɖ’ayǐ xóxó é.
12 Énɛ́ ɔ, yě sixú yí nǔ e kpo nú Edɔ́mu lɛ́ é,
kpó éé kpo nú akɔta ɖěɖěe wú è ylɔ́ nyǐkɔ ce dó lɛ́ é bǐ kpó lɛ́ é,’ wɛ Jexóva e ná wa nǔ énɛ́ é ɖɔ.
13 ‘Éɖíe! Azǎn lɛ́ ja,’ wɛ Jexóva ɖɔ,
‘bɔ cóbónú nǔkúnyatɔ́ ná fó nǔkúnyiya ɔ, glelilɛ ná ko lɛ́ bɛ́,
bɔ cóbónú vǐwunsótɔ́ ná só vǐwun kpé ɔ, nǔkúndídó ná ko lɛ́ bɛ́;
vɛ̌ɛn víví ná nɔ kun ɖo só ɖaxó lɛ́ jí,
lobo ná nɔ sa tɔ ɖo só kpɛví lɛ́ bǐ jí.*
14 Un ná lɛ́ kɔ nú togun ce Izlayɛ́li sín kannumɔgbénu,
bɔ yě ná vɔ́ toxo e jɛ vɔ̌ lɛ́ é gbá, bo ná nɔ yě mɛ;
yě ná tun vǐwuntín lɛ́, bo ná nu vɛ̌ɛn yětɔn,
yě ná bló jikpá lɛ́, bo ná ɖu sínsɛ́n yětɔn.’
15 ‘Un ná tun yě nyi ayǐkúngban yětɔn jí,
bɔ è sɔ́ ná hɔn ɖɔ nú yě gbeɖé
sín ayǐkúngban e un ná yě é jí ǎ,’ wɛ Jexóva Mawu towe ɖɔ.”
Tínmɛ tɔn wɛ nyí “Nyí agban ɖé” alǒ “Hɛn agban ɖé.”
Alǒ “gba sɛ́n.”
Xógbe “azɔn atɔn, ɛɛn, azɔn ɛnɛ” ɔ sixú dó gesí nǔ e è wa azɔn mɔ̌kpán é.
Blǔju tɔn, “mɛ e hɛn gǎnkpo ɖo Bɛti-Edɛ́ni é.”
Blǔju tɔn, “mɛ e hɛn gǎnkpo ɖo Acikelɔ́ni é.”
Alǒ “gba sɛ́n.”
Xógbe “azɔn atɔn, ɛɛn, azɔn ɛnɛ” ɔ sixú dó gesí nǔ e è wa azɔn mɔ̌kpán é.
Alǒ “adakpɛ́n; hwě.”
Blǔju tɔn, “hwɛɖɔtɔ́.”
Alǒ “nǔkplɔ́nmɛ, wěɖexámɛ.”
Alǒ “afɔkpa afɔ we tɔn.”
Alǒ “è dó akpá bo sɔ́ jó nú yě lɛ́ é.”
Alǒ “vodúnxwé yětɔn lɛ́”
Kpɔ́n Xógbe ɖé lɛ́ sín tínmɛ.
Kpɔ́n Xógbe ɖé lɛ́ sín tínmɛ.
Alǒ “lǐndɔ̌n.”
Alǒ “lǐndɔ̌n.”
Alǒ “sín ayi tlɛ syɛ́n.”
Alǒ “ɖɔ ɖó kpɔ́ ɖ’ayǐ ǎ ɔ a?”
Alǒ “Kinnikínní wínnyáwínnyá e ko ɖó kɔjafún é.”
Alǒ vlafo, “ényí è ma sɔ́ nǔɖé d’é jí ǎ ɔ a?”
Alǒ “ɖe nǔbúdo tɔn xlɛ́.”
Alǒ “zinkpo Damási tɔn lɛ́.”
Alǒ “sɛ́n e é gba lɛ́ é.”
Alǒ vlafo, “gěgé.”
Alǒ “gǎn.”
Alǒ “fɔ́n gǔ.”
Alǒ “un ná nǔɖuɖu ɖě mi nú mi ná ɖu ɖo toxo mitɔn lɛ́ ɖě mɛ ǎ.”
Alǒ “nǔwamɛhan.”
Alǒ vlafo, “ná húzú nǔkpácámɛ.”
Kpɔ́n Xógbe ɖé lɛ́ sín tínmɛ.
Kplékplé sunví lɛ́ tɔn e ényí è kpɔ́n sín ayǐkúngban jí ɔ, é nɔ cí kanlin alǒ nǔ ɖěvo lɛ́ ɖɔhun é sín nyǐkɔ wɛ.
Kplékplé sunví lɛ́ tɔn e ényí è kpɔ́n sín ayǐkúngban jí ɔ, é nɔ cí kanlin alǒ nǔ ɖěvo lɛ́ ɖɔhun é sín nyǐkɔ wɛ.
Alǒ “ayǐkúngban sín takwɛ́.”
Alǒ “gba sɛ́n.”
Alǒ “yí akwɛ́ e è nɔ dó nu nú mi lɛ́ é.”
Nǔmɛsɛn we énɛ́ lɛ́ bǐ sixú ɖo gesí dó planɛ́ti Saturne, ée mɛ lɛ́ nɔ sɛn nǔmɛsɛn ɖé ɖɔhun é wɛ.
É cí ɖɔ axɔ́súɖuto Judáa tɔn kpó Izlayɛ́li tɔn kpó dó gesí wɛ é ɖe.
Blǔju tɔn, “zinkpo jí.”
Alǒ “nyibú wínnyáwínnyá.”
Alǒ “Kanhún.”
Blǔju tɔn, “dó azɔn.”
Alǒ “lǐndɔ̌n ce.”
Blǔju tɔn, “sín tɔ́ nɔví súnnu.”
Kpɔ́n Xógbe ɖé lɛ́ sín tínmɛ.
Alǒ “fí e è nɔ gbɔn byɔ́ Hamáti é.”
Énɛ́ wɛ nyí, ɖo alǔunsun kpó zofínkplɔ́sun kpó mɛ.
Blǔju tɔn, “fɔ́n sí te.”
Alǒ “nǔ e Jexóva lin ná wa é vɛ́ n’i.”
Blǔju tɔn, “fɔ́n sí te.”
Alǒ “nǔ e Jexóva lin ná wa é vɛ́ n’i.”
Blǔju tɔn, “ɖu wɔ̌xúxú.”
Alǒ “nɔ lɛ́ tɔ́n fígi sikomɔ́ɔ lɛ́.”
Kpɔ́n Mɔj. B14.
Kpɔ́n Mɔj. B14.
Alǒ “afɔkpa afɔ we tɔn.”
Alǒ “ayǐkúngban.”
Alǒ “nǔwamɛhan.”
Alǒ “hwetɔ́nhwe jí.”
Kpɔ́n Xógbe ɖé lɛ́ sín tínmɛ.
Alǒ “ayǐkúngban.”
Alǒ “goxɔ; xwé.”
Blǔju tɔn, “lobɔ só kpɛ́ví kpɛví lɛ́ bǐ ná sínsín.”