ZAKALÍI

1 Ðo axɔ́súɖuɖu Daliwúsi tɔn sín xwe wegɔ́ ɔ mɛ, ɖo sun tántɔngɔ́ ɔ mɛ ɔ, Jexóva ɖɔ xó nú gbeyíɖɔ Zakalíi* vǐ súnnu Bɛlɛkíya tɔn, vǐ súnnu Idóo tɔn, bo ɖɔ: 2 “Jexóva sin xomɛ dó tɔ́ mitɔn lɛ́ tawun.

3 “Ðɔ nú yě ɖɔ: ‘Xó e Jexóva ahwankpá lɛ́ tɔn ɖɔ é ɖíe: “‘Mi lɛ́ kɔ wá gɔ̌n ce,’ wɛ Jexóva ahwankpá lɛ́ tɔn ɖɔ, ‘énɛ́ ɔ, un ná lɛ́ kɔ wá mi gɔ́n,’ wɛ Jexóva ahwankpá lɛ́ tɔn ɖɔ.”’

4 “‘Mi ma cí tɔ́ mitɔn ɖěɖěe wú gbeyíɖɔ xóxó lɛ́ ɖɔ xó élɔ́ lɛ́ dó lɛ́ é ɖɔhun ó: “Xó e Jexóva ahwankpá lɛ́ tɔn ɖɔ é ɖíe: ‘Mi kɛnklɛ́n lɛ́ kɔ sín ali nyanya mitɔn lɛ́ jí, sín nǔ nyanya e mi nɔ wa lɛ́ é gúdo.’”’

“‘Amɔ̌, yě ɖótó mì ǎ, yě ka ké ya nú xó ce lɛ́ ǎ,’ wɛ Jexóva ɖɔ.

5 “‘Fítɛ́ tɔ́ mitɔn lɛ́ ka ɖe din? Bɔ gbeyíɖɔ lɛ́ ka lo, yě nɔ gbɛ káká sɔ́yi wɛ a? 6 É ɖo mɔ̌ có, xó ce lɛ́ kpó gbetakɛ́n ce lɛ́ kpó, ée un ɖe gbe nú mɛsɛntɔ́ ce gbeyíɖɔ lɛ́ ɖɔ yě ní jlá tɔ́ mitɔn lɛ́ é jɛnu dó tɔ́ mitɔn lɛ́ wú, mɔ̌ wɛ ǎ cé?’ Énɛ́ ɔ, yě lɛ́ kɔ wá gɔ̌n ce, bo ɖɔ: ‘Jexóva ahwankpá lɛ́ tɔn wa nǔ xá mǐ sɔgbe xá ali mǐtɔn lɛ́ kpó nǔwiwa mǐtɔn lɛ́ kpó, lěe é ko kán ɖ’é jí bá bló gbɔn é.’”

7 Ðo Ceváti* sun, éé nyí sun 11gɔ́ ɔ é sín azǎn 24gɔ́ ɔ gbe, ɖo axɔ́súɖuɖu Daliwúsi tɔn sín xwe wegɔ́ ɔ mɛ ɔ, Jexóva ɖɔ xó nú gbeyíɖɔ Zakalíi vǐ súnnu Bɛlɛkíya tɔn, vǐ súnnu Idóo tɔn. 8 Zakalíi ɖɔ: “Un mɔ nǔmimɔ ɖé ɖo zǎnmɛ. Nya ɖé ɖo sɔ́ vɔvɔ ɖé jí, bo nɔ te xwíí ɖo mǐititín lɛ́ tɛ́ntin ɖo tɔdo ɖé mɛ, bɔ ɖo gǔdo tɔn ɔ, è mɔ sɔ́xátɔ́ ɖé lɛ́ ɖo sɔ́ vɔvɔ lɛ́, ajavɛ lɛ́ kpó wěwé lɛ́ kpó jí.”

9 Énɛ́ ɔ, un ɖɔ: “Mɛ̌ ka nyí énɛ́ lɛ́, aklúnɔ ce?”

Wɛnsagun e ɖo xó ɖɔ xá mì wɛ é yí gbe nú mì, bo ɖɔ: “Un ná xlɛ́ mɛ e yě nyí é we.”

10 Énɛ́ gúdo ɔ, nya e ɖo te xwíí ɖo mǐititín lɛ́ tɛ́ntin é ɖɔ: “Mɛ ɖěɖěe Jexóva sɛ́ dó, bɔ yě ná ɖi zɔnlin gbɔn ayǐkúngban ɔ jí lɛ́ é wɛ.” 11 Bɔ yě ɖɔ nú wɛnsagun Jexóva tɔn e ɖo te ɖo mǐititín lɛ́ tɛ́ntin é ɖɔ: “Mǐ ko ɖi zɔnlin gbɔn ayǐkúngban ɔ jí, bɔ ayǐkúngban ɔ bǐ ɖo tóó, bɔ nǔɖé ɖo ya dó n’i wɛ ǎ.”

12 Énɛ́ ɔ, wɛnsagun Jexóva tɔn ɖɔ: “Jexóva ahwankpá lɛ́ tɔn è, káká jɛ hwetɛ́nu a ka ná gɔn nǔbláwǔ kú nú Jeluzalɛ́mu kpó toxo Judáa tɔn lɛ́ kpó, ɖěɖěe a sin xomɛ dó ɖo xwe 70 élɔ́ lɛ́ mɛ é yi ɖó?”

13 Jexóva zán xógbe xomɛnyínyɔ́ tɔn lɛ́ kpó gbɔdónúmɛ tɔn lɛ́ kpó dó yí gbe nú wɛnsagun e ɖo xó ɖɔ xá mì wɛ é. 14 Énɛ́ gúdo ɔ, wɛnsagun e ɖo xó ɖɔ xá mì wɛ é ɖɔ nú mì ɖɔ: “Sú xó bo ɖɔ: ‘Nǔ e Jexóva ahwankpá lɛ́ tɔn ɖɔ é ɖíe: “Akpakpa nɔ sɔ́ mì dó Jeluzalɛ́mu wú, bo nɔ sɔ́ mì tawun dó Sinyɔ́ɔ wú. 15 Un sin xomɛ tawun dó akɔta e ɖo vivo mɛ lɛ́ é, ɖó xomɛ kpɛɖé jɛ́n un sin dó togun ce, amɔ̌, yě bló bɔ awě e xo è é syɛ́n dín.”’

16 “Énɛ́ wú ɔ, nǔ e Jexóva ɖɔ é ɖíe: ‘“Un ná lɛ́ kɔ yi Jeluzalɛ́mu kpó nǔbláwǔkúnúmɛ kpó, bɔ è ná gbá xwé nyiɖésúnɔ tɔn nyi mɛ,” wɛ Jexóva ahwankpá lɛ́ tɔn ɖɔ, “bɔ è ná sɔ́ nǔjlɛ́kan dó jlɛ́ Jeluzalɛ́mu.”’

17 “Lɛ̌ sú xó bo ɖɔ: ‘Nǔ e Jexóva ahwankpá lɛ́ tɔn ɖɔ é ɖíe: “Ðagbewiwa ce ná lɛ́ túnflá ɖo toxo ce lɛ́ mɛ; Jexóva ná lɛ́ dó gbɔ nú Sinyɔ́ɔ, bo ná lɛ́vɔ́ sɔ́ Jeluzalɛ́mu.”’”

18 Énɛ́ gúdo ɔ, un kpɔ́n aga, bo mɔ zo ɛnɛ. 19 Énɛ́ ɔ, un kanbyɔ́ wɛnsagun e ɖo xó ɖɔ xá mì wɛ é ɖɔ: “Étɛ́ ka nyí énɛ́ lɛ́?” É yí gbe ɖɔ: “Zo ɖěɖěe fúnfún Judáa, Izlayɛ́li kpó Jeluzalɛ́mu kpó kpé lɛ́ é wɛ.”

20 Énɛ́ gúdo ɔ, Jexóva xlɛ́ mì alɔlyɛnzɔ́watɔ́ ɛnɛ. 21 Un kanbyɔ́ ɖɔ: “Étɛ́ wa gbé yě mɛ énɛ́ lɛ́ ka tɔ́n?”

É ɖɔ: “Zo ɖěɖěe fúnfún Judáa kpé sɔmɔ̌, bɔ mɛɖé ma kpé wú bo zé ta ǎ lɛ́ é wɛ. Alɔlyɛnzɔ́watɔ́ énɛ́ lɛ́ ná wá bá dó xɛsi yě, bo ná flɛ́ akɔta ɖěɖěe zé zo yětɔn lɛ́ dó Judáa to ɔ jí, bo ná dó fúnfún i kpé lɛ́ é sín zo lɛ́.”

2 Bɔ un kpɔ́n aga, bo mɔ nya ɖé bɔ é hɛn nǔjlɛ́kan alɔ mɛ. 2 Énɛ́ wú ɔ, un kanbyɔ́ ɛ ɖɔ: “Fítɛ́ a ka xwe?”

É yí gbe ɖɔ: “Jeluzalɛ́mu jlɛ́ gbé wɛ un xwe, bo ná kpɔ́n gblǒ tɔn kpó ga tɔn kpó.”

3 Kpowun ɔ, wɛnsagun e ɖo xó ɖɔ xá mì wɛ é ɖidó, bɔ wɛnsagun ɖěvo wá kpé è. 4 Énɛ́ gúdo ɔ, é ɖɔ n’i ɖɔ: “Kán wezun yi dɔ̌n, bo ɖɔ nú dɔ̌nkpɛvú énɛ́ ɖɔ: ‘“Gbɛtɔ́ lɛ́ ná nɔ Jeluzalɛ́mu, gletoxo e ɖo nuvo é* mɛ wɛ yě ɖe ɖɔhun, ɖó gbɛtɔ́ kpó kanlin kpó e ɖ’é mɛ lɛ́ é ná wá sukpɔ́. 5 Un ná húzú ahohó myɔnɔ ɖé lɛ́ lɛ̌ dó è, bɔ susu ce ná kpé tɛ́ntin tɔn,” wɛ Jexóva ɖɔ.”’”

6 “Mi wá! Mi wá! Mi hɔn sín ayǐkúngban totaligbé tɔn jí,” wɛ Jexóva ɖɔ.

“Ðó un fúnfún mi kpé wɛ̌kɛ́zo ɛnɛ* lɛ́ mɛ,” wɛ Jexóva ɖɔ.

7 “Sinyɔ́ɔ, wǎ! Hwi mɛ e nɔ nɔ kpɔ́ xá vǐ nyɔ̌nu Babilɔ́nu tɔn é, hɔn. 8 Ðó xó e Jexóva ahwankpá lɛ́ tɔn e sɛ́ mì dó akɔta e ɖo mi vɔ wɛ lɛ́ é gɔ́n, hwenu e è kpa susu n’i gúdo é* ɖɔ é ɖíe: ‘Mɛ ɖěbǔ e ɖ’alɔ mi wú é ɔ, nukúnzin ce wú wɛ é ɖ’alɔ.* 9 Ðó din ɔ, un ná bló bɔ alɔ ce ná jɛ yě wú, bɔ kannumɔ yěɖésúnɔ tɔn lɛ́ wɛ ná vɔ yě.’ Bɔ é ɖo wɛn ɖɔ mi ná wá tuun ɖɔ Jexóva ahwankpá lɛ́ tɔn wɛ sɛ́ mì dó.

10 “Vǐ nyɔ̌nu Sinyɔ́ɔ tɔn è, sú awǎjijɛ sín xó; ɖó un jawě, bo ná nɔ tɛ́ntin towe,” wɛ Jexóva ɖɔ. 11 “Ðo gbe énɛ́ gbe ɔ, akɔta gěgé ná wá gɔ́ nú nyɛ Jexóva, bɔ yě ná húzú togun ce; lobɔ un ná nɔ tɛ́ntin towe.” Énɛ́ ɔ, mi ná wá tuun ɖɔ Jexóva ahwankpá lɛ́ tɔn wɛ sɛ́ mì dó mi gɔ́n. 12 Jexóva ná yí Judáa, bɔ é ná húzú gǔ tɔn ɖo ayǐkúngban mímɛ́ ɔ jí, bɔ é ná sɔ́ Jeluzalɛ́mu azɔn ɖěvo. 13 Gbɛtɔ́* lɛ́ bǐ ní cí xwíí ɖo Jexóva nukɔn, ɖó é jawě sín nɔtɛn mímɛ́ tɔn, bo ná wa nǔ.

3 Bɔ é xlɛ́ mì vɔ̌sánúxwlémawutɔ́ ɖaxó Jozuwée, bɔ é ɖo te ɖo wɛnsagun Jexóva tɔn nukɔn, bɔ Satáan ɖo te ɖo aɖisílɔ tɔn xwé, bo ná klán gbe xá ɛ. 2 Énɛ́ gúdo ɔ, wɛnsagun Jexóva tɔn ɖɔ nú Satáan ɖɔ: “Satáan è, Jexóva ní gbɛ́ nǔ nú we, ɛɛn, Jexóva e sɔ́ Jeluzalɛ́mu é ní gbɛ́ nǔ nú we! Nakíkpo e ɖo jiji wɛ, bɔ è lun sín myɔ mɛ é wɛ nú nya énɛ́ ǎ cé?”

3 Awu e kwíji tawun lɛ́ é wɛ Jozuwée ka dó, bo ɖo te ɖo wɛnsagun ɔ nukɔn. 4 Wɛnsagun ɔ ɖɔ nú mɛ ɖěɖěe ɖo te ɖo nukɔn tɔn lɛ́ é ɖɔ: “Mi ɖe awu kwíjikwíji lɛ́ sín kɔ tɔn.” Énɛ́ gúdo ɔ, é ɖɔ n’i ɖɔ: “Kpɔ́n! Un ko súnsún nǔwanyido* towe, bɔ è ná dó awu ɖagbe ɖagbe lɛ́* nú we.”

5 Énɛ́ ɔ, un ɖɔ: “Mi nú è zé tablá mímɛ́ ɖé xwe n’i.” Bɔ yě zé tablá mímɛ́ ɔ xwe n’i, bo dó awu lɛ́ n’i; bɔ wɛnsagun Jexóva tɔn ɖo te ɖo akpá tɔn. 6 Énɛ́ gúdo ɔ, wɛnsagun Jexóva tɔn ɖɔ nú Jozuwée ɖɔ: 7 “Nǔ e Jexóva ahwankpá lɛ́ tɔn ɖɔ é ɖíe: ‘Ényí a nɔ ɖi zɔnlin gbɔn ali ce lɛ́ jí, bo nɔ wa azɔ̌ towe lɛ́ ɖo nukɔn ce ɔ, a ná nyí hwɛɖɔtɔ́ ɖo xwé ce gbe, bo ná nɔ kpé nukún dó kɔ́xota ce lɛ́ wú;* un ná ná gbe we, bɔ a ná nɔ nɔ te ɖo nukɔn ce, mɛ élɔ́ lɛ́ e ɖo te ɖo fí lɛ́ é ɖɔhun.’

8 “‘Vɔ̌sánúxwlémawutɔ́ ɖaxó Jozuwée è, hwi kpó gbɛ̌ towe e jínjɔ́n ayǐ ɖo nukɔn towe lɛ́ é kpó ní kɛnklɛ́n ɖótó, ɖó wuntun ɖé wɛ mi nyí; éɖíe, un ɖo mɛsɛntɔ́ ce e nyí Kun é ɖe xlɛ́ wɛ! 9 Mi kpɔ́n awǐnnya e un zé ɖó Jozuwée nukɔn é! Nukún tɛ́nwe ɖo awǐnnya ɔ jí; bɔ un ɖo nǔɖé wlán dó awǐnnya ɔ jí wɛ,’ wɛ Jexóva ahwankpá lɛ́ tɔn ɖɔ, ‘bɔ un ná ɖe hwɛhuhu ayǐkúngban énɛ́ tɔn síin ɖo kéze ɖokpó mɛ.’

10 “‘Ðo gbe nɛ́ gbe ɔ,’ wɛ Jexóva ahwankpá lɛ́ tɔn ɖɔ, ‘ɖokpó ɖokpó mitɔn ná ylɔ́ nɔzo tɔn wá vǐwuntín tɔn kpó fígitín tɔn kpó sá.’”

4 Wɛnsagun e ɖo xó ɖɔ xá mì wɛ ɖ’ayǐ é lɛ́ kɔ wá, bo fɔ́n mì lěe è nɔ fɔ́n mɛ sín amlɔ mɛ gbɔn é ɖɔhun. 2 Énɛ́ gúdo ɔ, é kanbyɔ́ mì ɖɔ: “Étɛ́ mɔ wɛ a ka ɖe?”

Bɔ un ɖɔ: “Un mɔ zogbɛ́nhɛnnú ɖokpó, bɔ è sɔ́ siká kɛ́ɖɛ́ dó bló, bɔ gannú ɖokpó ɖo ta tɔn. Zogbɛ́n tɛ́nwe wɛ ɖo jǐ tɔn, ɛɛn, tɛ́nwe, bɔ zogbɛ́n e ɖo ta tɔn lɛ́ é ɖó nǔ e mɛ ami nɔ gbɔn é tɛ́nwe. 3 Olívutín we ɖo akpá tɔn, ɖokpó ɖo gannú ɔ sín ɖisíxwé, bɔ ɖokpó ɖo amyɔ tɔn xwé.”

4 Énɛ́ gúdo ɔ, un kanbyɔ́ wɛnsagun e ɖo xó ɖɔ xá mì wɛ é ɖɔ: “Aklúnɔ ce, étɛ́ nǔ énɛ́ lɛ́ ka nɔ te ná?” 5 Bɔ wɛnsagun e ɖo xó ɖɔ xá mì wɛ é kanbyɔ́ mì ɖɔ: “A tuun nǔ e nǔ énɛ́ lɛ́ nɔ te ná é ǎ cé?”

Un yí gbe ɖɔ: “Éǒ, aklúnɔ ce.”

6 Bɔ é ɖɔ nú mì ɖɔ: “Xó e Jexóva ɖɔ nú Zolobabɛ́li é ɖíe: ‘“É nyí gbɔn hlɔ̌nhlɔ́n ahwanfunfun tɔn, alǒ hlɔ̌nhlɔ́n gbɛtɔ́ tɔn gblamɛ wɛ nǔ énɛ́ lɛ́ ná jɛ ǎ, loɔ, gbɔn gbigbɔ ce gblamɛ wɛ,” wɛ Jexóva ahwankpá lɛ́ tɔn ɖɔ. 7 Só ɖaxó è, tɛ́ a ka nyí? A ná húzú ayǐkúngban jlɔ́jlɔ́* ɖo Zolobabɛ́li nukɔn. Bɔ é ná zé awǐnnya e ɖo sinsɛnxɔ ɔ ta é wá, hwenu e togun ɔ ná ɖo xó élɔ́ sú wɛ é: “É jí wǔ ɖésú! É jí wǔ ɖésú!”’”

8 Jexóva lɛ́vɔ́ ɖɔ xó nú mì, bo ɖɔ: 9 “Zolobabɛ́li ɖésúnɔ wɛ dó xwé élɔ́ do, bɔ éɖésúnɔ wɛ ná lɛ́ gbá yi fó. Énɛ́ ɔ, mi ná tuun ɖɔ Jexóva ahwankpá lɛ́ tɔn wɛ sɛ́ mì dó mi gɔ́n. 10 Ðó mɛ̌ ka hu tɛ́ nú azǎn e gbe nǔ lɛ́ bɛ́ kpɛɖé kpɛɖé é*? Nǔgbó ɔ, é ná víví nú yě hwenu e yě ná mɔ nǔjlɛ́kan ɔ* ɖo Zolobabɛ́li sín alɔ mɛ é. Zogbɛ́n* tɛ́nwe énɛ́ lɛ́ ɔ, nukún Jexóva tɔn e ɖo ayǐkúngban ɔ bǐ jí gbɔn wɛ lɛ́ é wɛ.”

11 Énɛ́ gúdo ɔ, un kanbyɔ́ ɛ ɖɔ: “Étɛ́ olívutín we énɛ́ lɛ́ e ɖě ɖo ɖisíxwé bɔ ɖě ɖo amyɔxwé nú zogbɛ́nhɛnnú ɔ lɛ́ é ka nɔ te ná?” 12 Un kanbyɔ́ ɛ azɔn wegɔ́ ɔ ɖɔ: “Étɛ́ olívutín lɛ́ sín ala* we e ɖo ami sikánɔ kɔn wɛ gbɔn nǔ e mɛ ami nɔ gbɔn, bɔ è sɔ́ siká dó bló é mɛ é we lɛ́ ka nɔ te ná?”

13 Énɛ́ ɔ, é kanbyɔ́ mì ɖɔ: “A tuun nǔ e nǔ énɛ́ lɛ́ nɔ te ná é ǎ cé?”

Un yí gbe ɖɔ: “Éǒ, aklúnɔ ce.”

14 É ɖɔ: “Mɛ we e è sɔ́, bɔ yě ɖo te ɖo Aklúnɔ ayǐkúngban ɔ bǐ tɔn kpá lɛ́ é wɛ.”

5 Bɔ un lɛ́ kpɔ́n aga, bo mɔ wěma mlámlá ɖé ɖo jɔ mɛ gbɔn wɛ. 2 Wɛnsagun ɔ kanbyɔ́ mì ɖɔ: “Étɛ́ mɔ wɛ a ka ɖe?”

Un yí gbe ɖɔ: “Un mɔ wěma mlámlá e ɖo jɔ mɛ gbɔn wɛ é ɖé, bɔ ga tɔn nyí awabá* 20 bɔ gblǒ tɔn nyí awabá 10.”

3 Énɛ́ gúdo ɔ, é ɖɔ nú mì ɖɔ: “Nudómɛ e ɖo ayǐkúngban ɔ bǐ nukúnmɛ gba kpé wɛ é wɛ ɖo wěma mlámlá ɔ mɛ. Ðó mɛ ɖěbǔ e ja ajo é ɔ, lěe è wlán gbɔn ɖo akpá ɖokpó xwé é ɔ, è nɔ dɔn tó nú mɛ ɔ ǎ; bɔ mɛ ɖěbǔ e xwlé nǔ é ɔ, lěe è wlán gbɔn ɖo akpá wegɔ́ ɔ xwé é ɔ, è nɔ dɔn tó nú mɛ ɔ ǎ. 4 ‘Un sɛ́ nudómɛ ɔ dó,’ wɛ Jexóva ahwankpá lɛ́ tɔn ɖɔ, ‘bɔ é ná byɔ́ mɛ e nɔ ja ajo é sín xwégbe, bo ná lɛ́ byɔ́ mɛ e nɔ zán nyǐkɔ ce dó ɖó adingban bo xwlé nǔ d’é jí é sín xwégbe. Nudómɛ ɔ ná nɔ xwé énɛ́ lɛ́ jí, bɔ yě ná ji kɔn afín, atín yětɔn lɛ́ kpó awǐnnya yětɔn lɛ́ kpó bǐ.’”

5 Énɛ́ gúdo ɔ, wɛnsagun e ɖo xó ɖɔ xá mì wɛ é sɛ wá nukɔn bo ɖɔ nú mì ɖɔ: “Kɛnklɛ́n, kpɔ́n aga, bo kpɔ́n nǔ e ɖo tíntɔ́n wɛ é.”

6 Bɔ un kanbyɔ́ ɖɔ: “Étɛ́ ka nɛ́?”

É yí gbe ɖɔ: “Nǔjlɛ́nú éfa* wɛ ɖo tíntɔ́n wɛ.” É gbɛ kan d’é nu ɖɔ: “Lěe mɛ énɛ́ lɛ́ cí ɖo ayǐkúngban ɔ bǐ jí é nɛ́.” 7 Bɔ un mɔ bɔ è hun nusú tobotobo e è sɔ́ sunmí dó bló é, bɔ nyɔ̌nu ɖé ɖo ayǐjínjɔ́n ɖo nǔjlɛ́nú ɔ mɛ. 8 Énɛ́ ɔ, é ɖɔ: “Nyɔ̌nu énɛ́ sín nyǐkɔ nɔ nyí Nǔnyanyawiwa.” Bɔ é lɛ́ kpíkpé nyɔ̌nu ɔ dó nǔjlɛ́nú éfa ɔ mɛ, énɛ́ gúdo ɔ, é sɔ́ nusú kpinkpɛn e è sɔ́ sunmí dó bló ná é ɖó nǔjlɛ́nú ɔ nu.

9 Énɛ́ gúdo ɔ, un kpɔ́n aga bo mɔ nyɔ̌nu we ɖo sisɛkpɔ́ wɛ, bɔ yě ɖo zinzɔn wɛ ɖo jɔhɔn mɛ. Yě ɖó awa, aɖɔwé sín awa lɛ́ ɖɔhun. Bɔ yě sɔ́ nǔjlɛ́nú ɔ yi aga, bɔ é ɖo ayǐkúngban kpó jǐnukúnsin kpó tɛ́ntin. 10 Énɛ́ ɔ, un kanbyɔ́ wɛnsagun e ɖo xó ɖɔ xá mì wɛ é ɖɔ: “Fítɛ́ yě ka sɔ́ nǔjlɛ́nú éfa ɔ xwe?”

11 É yí gbe ɖɔ: “Cináa* sín to mɛ, bo ná gbá xwé ɖokpó nú nyɔ̌nu ɔ ɖo dɔ̌n. Bɔ ényí è sɔ́ nǔ ná fó ɔ, è ná sɔ́ nyɔ̌nu ɔ ɖó fínɛ́, ɖo tɛn e jɛxá ɛ é mɛ.”

6 Énɛ́ gúdo ɔ, un lɛ́ kpɔ́n aga bo mɔ ahwankɛkɛ́ ɛnɛ, bɔ yě tɔ́n sín só we tɛ́ntin jawě, ganvɔsó wɛ nyí só lɛ́. 2 Ahwankɛkɛ́ nukɔntɔn ɔ, sɔ́ vɔvɔ lɛ́ wɛ ɖo dindɔn wɛ, bɔ ahwankɛkɛ́ wegɔ́ ɔ, sɔ́ wiwi lɛ́ wɛ ɖo dindɔn wɛ. 3 Ahwankɛkɛ́ atɔngɔ́ ɔ, sɔ́ wěwé lɛ́ wɛ ɖo dindɔn wɛ, bɔ ahwankɛkɛ́ ɛnɛgɔ́ ɔ, sɔ́ wlanwlan lɛ́ kpó éé ɖó sinmɛ tɛnmɛ tɛnmɛ lɛ́ é kpó wɛ ɖo dindɔn wɛ.

4 Un kanbyɔ́ wɛnsagun e ɖo xó ɖɔ xá mì wɛ é ɖɔ: “Ahwankɛkɛ́ tɛ́ ka nyí énɛ́ lɛ́, aklúnɔ ce?”

5 Wɛnsagun ɔ yí gbe nú mì ɖɔ: “Jǐxwé sín gbigbɔ ɛnɛ e tɔ́n hwenu e yě ko sɔ́ yěɖée xlɛ́ Aklúnɔ ayǐkúngban ɔ bǐ tɔn gúdo lɛ́ é wɛ. 6 Ahwankɛkɛ́ e sɔ́ wiwi lɛ́ dɔn é tɔ́n, bo ɖidó to totaligbé tɔn mɛ; sɔ́ wěwé lɛ́ tɔ́n bo ɖidó xu ɔ gúdo, bɔ sɔ́ wlanwlan lɛ́ tɔ́n bo ɖidó to tofɔligbé tɔn mɛ. 7 Lobɔ sɔ́ e ɖó sinmɛ tɛnmɛ tɛnmɛ lɛ́ é ɔ, akpakpa ɖo yě sɔ́ wɛ bónú yě ná tɔ́n bo gbɔn ayǐkúngban ɔ jí.” Énɛ́ gúdo ɔ, é ɖɔ: “Mi yi, bo gbɔn ayǐkúngban ɔ jí.” Bɔ yě jɛ ayǐkúngban ɔ jí gbɔn jí.

8 Énɛ́ gúdo ɔ, é sú xó ylɔ́ mì, bo ɖɔ: “Kpɔ́n, sɔ́ ɖěɖěe tɔ́n bo ɖidó to totaligbé tɔn mɛ lɛ́ é xo hwihwɛ́ gbigbɔ Jexóva tɔn ɖo to totaligbé tɔn ɔ mɛ.”

7 Ðo kisiléwu* sun, éé nyí sun tɛ́nnɛgɔ́ ɔ é sín azǎn ɛnɛgɔ́ ɔ gbe, ɖo axɔ́súɖuɖu axɔ́sú Daliwúsi tɔn sín xwe ɛnɛgɔ́ ɔ mɛ ɔ, Jexóva ɖɔ xó nú Zakalíi. 2 Mɛ e ɖo Betɛ́li lɛ́ é sɛ́ Salɛsɛ́ɛ, gɔ́ nú Hlɛgɛ́mu-Mɛlɛ́ki kpó mɛ tɔn lɛ́ kpó dó ɖɔ yě ní sa vo dó byɔ́ fɛ́nú* Jexóva tɔn, 3 lobo ɖɔ nú vɔ̌sánúxwlémawutɔ́ e ɖo Jexóva ahwankpá lɛ́ tɔn sín xwégbe* lɛ́ é kpó gbeyíɖɔ lɛ́ kpó ɖɔ: “Un ɖó ná y’avǐ ɖo sun atɔ́ɔ́ngɔ́ ɔ mɛ, bo ná gbɔ nǔ ɖu lěe un ko nɔ bló gbɔn sín xwe mɔ̌kpán ɖíe é wɛ a?”

4 Jexóva ahwankpá lɛ́ tɔn lɛ́vɔ́ ɖɔ xó nú mì, bo ɖɔ: 5 “Ðɔ nú mɛ e ɖo to ɔ mɛ lɛ́ é bǐ kpó vɔ̌sánúxwlémawutɔ́ lɛ́ kpó ɖɔ: ‘Ée mi blá nu, bo ná alě ɖo sun atɔ́ɔ́ngɔ́ ɔ kpó sun tɛ́nwegɔ́ ɔ kpó mɛ nú xwe 70 é ɔ, nyɛ wú jɛ́n mi blá nu ɔ dóó a? 6 Bɔ ée mi nɔ ɖo ɖuɖu wɛ, bo nɔ ɖo nunu wɛ é ɔ, ɖagbe miɖésúnɔ tɔn kɛ́ɖɛ́ wú wɛ mi nɔ ɖu bo nɔ nu ǎ cé? 7 Mi ɖó ná se tónú nú xó e Jexóva ɖɔ gbɔn gbeyíɖɔ tɔn xóxó lɛ́ jí, hwenu e gbɛtɔ́ ɖo Jeluzalɛ́mu kpó toxo e lɛ́ lɛ̌ dó è lɛ́ é kpó mɛ, bɔ yě ɖo fífá mɛ é kpó hwenu e gbɛtɔ́ ɖo Nɛgɛ́bu kpó Ceféla kpó é ǎ cé?’”

8 Jexóva lɛ́ ɖɔ xó nú Zakalíi, bo ɖɔ: 9 “Nǔ e Jexóva ahwankpá lɛ́ tɔn ɖɔ é ɖíe: ‘Mi ní nɔ ɖɔ hwɛ ɖó sɛ́nxwi jí, bo nɔ wa nǔ xá miɖée lɛ́ kpó wǎnyíyí e ma nɔ sɛ do ǎ é kpó, kpódó nǔbláwǔkúnúmɛ kpán. 10 Mi ma nɔ xo asúkúsi, alǒ tɔ́cyɔvǐ, toɖévomɛnu, alǒ wamamɔnɔ ɖu ó; mi ma nɔ bló tuto nǔnyanyawiwa dó miɖée lɛ́ wú tɔn ɖo ayi mitɔn lɛ́ mɛ ó.’ 11 Amɔ̌, yě nɔ gbɛ́ ɖɔ émí kún ná wlí tó wú ó, yě ci tamɛ bo dó gǔdo mì, bo sú tó yětɔn lɛ́ bo ná dó gɔn nǔ se. 12 Yě bló bɔ ayi yětɔn syɛ́n diamáa* ɖɔhun, bo nɔ se tónú nú sɛ́n* kpó xó kpó e Jexóva ahwankpá lɛ́ tɔn sísɛ́ gbeyíɖɔ xóxó lɛ́ gbɔn gbigbɔ tɔn gblamɛ bɔ yě jlá lɛ́ é ǎ. Énɛ́ ɔ, Jexóva ahwankpá lɛ́ tɔn sin xomɛ tawun.”

13 “‘Hwenu e un* ylɔ́ yě é ɔ, yě ɖótó mì ǎ, mɔ̌ jɛ́n hwenu e yě lɔ ylɔ́ mì é ɔ, un ma ɖótó yě ǎ é nɛ́,’ wɛ Jexóva ahwankpá lɛ́ tɔn ɖɔ. 14 ‘Bɔ un sɔ́ jɔhɔn syɛ́nsyɛ́n dó fúnfún yě gbɔn akɔta e yě ma tuun ǎ lɛ́ é bǐ mɛ, bɔ to e mɛ yě gosín é jɛ vɔ̌, bɔ mɛɖé sɔ́ nɔ dín gbɔn fínɛ́, alǒ lɛ́ kɔ gbɔn fínɛ́ ǎ; ɖó yě bló bɔ to e nyɔ́ ɖɛkpɛ káká é wá húzú nǔ e xyɔ́ wǔ é.’”

8 Jexóva ahwankpá lɛ́ tɔn lɛ́ ɖɔ xó nú mì bo ɖɔ: 2 “Nǔ e Jexóva ahwankpá lɛ́ tɔn ɖɔ é ɖíe: ‘Akpakpa ɖaxó ɖé ná sɔ́ mì dó Sinyɔ́ɔ wú, xomɛ ná sin mì tawun, bɔ un ná jɛ hun dó jǐ tɔn’”

3 “Nǔ e Jexóva ɖɔ é ɖíe: ‘Un ná lɛ́ kɔ yi Sinyɔ́ɔ, bo ná nɔ Jeluzalɛ́mu; bɔ è ná ylɔ́ Jeluzalɛ́mu ɖɔ toxo nǔgbó* tɔn, bo ná ylɔ́ Jexóva ahwankpá lɛ́ tɔn sín só ɖɔ só mímɛ́.’”

4 “Nǔ e Jexóva ahwankpá lɛ́ tɔn ɖɔ é ɖíe: ‘Súnnu mɛxómɔ lɛ́ kpó nyɔ̌nu mɛxómɔ lɛ́ kpó ná lɛ́ jínjɔ́n ayǐ ɖo tokplétɛn Jeluzalɛ́mu tɔn lɛ́, bɔ yě mɛ ɖokpó ɖokpó ná hɛn kpogɛ yětɔn yětɔn alɔ mɛ ɖó xwe yětɔn e sɛ yi é wútu.* 5 Bɔ súnnuví lɛ́ kpó nyɔ̌nuví lɛ́ kpó ná gɔ́ tokplétɛn e ɖo toxo ɔ mɛ lɛ́ é, bo ná nɔ da ayihún ɖo fí énɛ́ lɛ́.’”

6 “Nǔ e Jexóva ahwankpá lɛ́ tɔn ɖɔ é ɖíe: ‘É sixú cí nǔ e ná vɛ́ wǔ tawun é ɖɔhun nú mɛ ɖěɖěe ná kpo ɖo toxo ɔ mɛ lɛ́ é ɖo hwe énɛ́ nu, amɔ̌, é ná cí nǔ e vɛ́ wǔ tawun é ɖɔhun nú nyi lɔ wɛ a?’ wɛ Jexóva ahwankpá lɛ́ tɔn ɖɔ.”

7 “Nǔ e Jexóva ahwankpá lɛ́ tɔn ɖɔ é ɖíe: ‘Un ná hwlɛ́n togun ce sín to ɖěɖěe ɖo zǎnzǎnhwe jí kpó gbadahwe jí kpó* lɛ́ é sí. 8 Un ná kplá yě wá Jeluzalɛ́mu, bɔ yě ná nɔ fínɛ́; yě ná húzú togun ce, bɔ un ná húzú Mawu yětɔn gbejínɔtɔ́ ɔ kpó nǔjlɔ́jlɔ́watɔ́ ɔ kpó.’”

9 “Xó e Jexóva ahwankpá lɛ́ tɔn ɖɔ é ɖíe: ‘Mi kpan akɔ́n,* mi mɛ ɖěɖěe ɖo xó énɛ́ lɛ́ se wɛ ɖo gbeyíɖɔ lɛ́ sín nu din lɛ́ é. Xó ɖokpó ɔ lɛ́ wɛ è ɖɔ gbe e gbe è dó Jexóva ahwankpá lɛ́ tɔn sín xwé do, bo ná gbá sinsɛnxɔ ɔ é. 10 Ðó jɛ nukɔn nú hwe énɛ́ nu ɔ, è nɔ sú axɔ́ ɖě gbɛtɔ́ alǒ kanlin ǎ; bɔ mɛ ɖěbǔ sɔ́ nɔ sixú tɔ́n bo nɔ lɛ́ kɔ ɖo ayijayǐ mɛ ǎ, ɖó kɛntɔ́ wútu, ɖó un bló bɔ mɛ lɛ́ bǐ nɔ sí te dó yěɖée lɛ́ jí.’

11 “‘Amɔ̌ din ɔ, un sɔ́ ná wa nǔ xá mɛ e kpo ɖo togun élɔ́ mɛ lɛ́ é lěe un wa gbɔn ɖ’ayǐ é ǎ,’ wɛ Jexóva ahwankpá lɛ́ tɔn ɖɔ. 12 ‘Ðó è ná dó fífá sín kún; vǐwuntín ná ná sínsɛ́n tɔn, bɔ ayǐkúngban ɔ ná ná jinukún tɔn, lobɔ jǐnukúnsin ná ná ahǔn tɔn; gɔ́ ná ɔ, un ná bló bɔ mɛ e kpo ɖo togun élɔ́ mɛ lɛ́ é ná ɖu nǔ énɛ́ lɛ́ bǐ sín gǔ. 13 Togun Judáa tɔn kpó togun Izlayɛ́li tɔn kpó è mi, lěe mi húzú nudó ɖo nu nú akɔta lɛ́ gbɔn é ɔ, mɔ̌ wɛ mi ná húzú nyɔ̌ná ɖo nu yětɔn gbɔn é nɛ́, ɖó un ná hwlɛ́n mi gán. Mi ma ɖi xɛsi ó! Mi kpan akɔ́n.’*

14 “Ðó nǔ e Jexóva ahwankpá lɛ́ tɔn ɖɔ é ɖíe: ‘“Lěe un kán ɖ’é jí bo ná dɔn awě wá mi jí ɖó tɔ́gbó mitɔn lɛ́ dó xomɛsin nú mì,” wɛ Jexóva ahwankpá lɛ́ tɔn ɖɔ, “bɔ é ma vɛ́ nú mì ǎ gbɔn é ɔ, 15 mɔ̌ ɖokpó ɔ, gayɛnu ɔ, un kán ɖ’é jí bo ná wa ɖagbe nú Jeluzalɛ́mu kpó togun Judáa tɔn kpó. Mi ma ɖi xɛsi ó!”’

16 “‘Nǔ e mi ɖó ná wa lɛ́ é ɖíe: Mi nɔ ɖɔ nǔgbó nú miɖée lɛ́, bónú hwɛ e mi nɔ ɖɔ ɖo hɔntogbó mitɔn lɛ́ jí lɛ́ é ní nɔ jɛ hun dó nǔgbó kpó fífá kpó jí. 17 Mi ma nɔ bló tuto awě dindɔn dó miɖée lɛ́ jí tɔn ɖo ayi mitɔn lɛ́ mɛ ó, mi ma lɛ́ yí wǎn nú adingban ɖíɖó bo xwlé nǔ d’é jí ɖěbǔ ó; ɖó nǔ énɛ́ lɛ́ bǐ wɛ un gbɛ́ wǎn ná ɖésú,’ wɛ Jexóva ɖɔ.”

18 Jexóva ahwankpá lɛ́ tɔn lɛ́ ɖɔ xó nú mì, bo ɖɔ: 19 “Nǔ e Jexóva ahwankpá lɛ́ tɔn ɖɔ é ɖíe: ‘Nubláblá sun ɛnɛgɔ́ ɔ tɔn, nubláblá sun atɔ́ɔ́ngɔ́ ɔ tɔn, nubláblá sun tɛ́nwegɔ́ ɔ tɔn kpó nubláblá sun wǒgɔ́ ɔ tɔn kpó ná nyí hwenu xomɛhunhun kpó awǎjijɛ kpó tɔn lɛ́ nú togun Judáa tɔn, ɛɛn, xweɖuɖu awǎjijɛ tɔn lɛ́. Énɛ́ wú ɔ, mi ní yí wǎn nú nǔgbó kpó fífá kpó.’

20 “Nǔ e Jexóva ahwankpá lɛ́ tɔn ɖɔ é ɖíe: ‘É ná wá jɛ bɔ togun lɛ́ kpó mɛ e nɔ nɔ toxo gěgé mɛ lɛ́ é kpó ná wá; 21 bɔ mɛ e nɔ nɔ toxo ɖé mɛ lɛ́ é ná yi mɛ ɖěɖěe nɔ nɔ toxo ɖěvo mɛ lɛ́ é gɔ́n, bo ná ɖɔ: “É yá, mi nú mǐ ní yi, bo sa vo dó byɔ́ fɛ́nú* Jexóva tɔn, lobo ba Jexóva ahwankpá lɛ́ tɔn. Mǐ lɔ ná yi.” 22 Togun gěgé kpó akɔta hlɔ̌nhlɔ́nnɔ ɖé lɛ́ kpó ná wá ba Jexóva ahwankpá lɛ́ tɔn ɖo Jeluzalɛ́mu, bo ná sa vo dó byɔ́ fɛ́nú* Jexóva tɔn.’

23 “Nǔ e Jexóva ahwankpá lɛ́ tɔn ɖɔ é ɖíe: ‘Ðo azǎn énɛ́ lɛ́ gbe ɔ, súnnu wǒ ná gosín akɔta lɛ́ sín gbe lɛ́ bǐ mɛ, bo ná hɛn, ɛɛn, yě ná hɛn Jwifu ɖokpó* sín awu* gbánwúngbánwún, bo ná ɖɔ: “Mǐ jló ná xwedó mi, ɖó mǐ se ɖɔ Mawu ɖo kpɔ́ xá mi.”’”

9 Xó e Mawu ɖɔ é ɖíe:

 3 Tíi mɛ ahohó ɖé nú éɖée.

 9 Vǐ nyɔ̌nu Sinyɔ́ɔ tɔn è, awǎjijɛ towe ní túnflá.

Vǐ nyɔ̌nu Jeluzalɛ́mu tɔn è, sú ɖuɖéjí sín xó.

Kpɔ́n! Axɔ́sú towe ja gɔ̌n towe.

Daswé* e è nɔ sɔ́ dó fun ahwan lɛ́ é ɖě sɔ́ ná ɖe ǎ.

12 Mi gantɔ́ e ɖo nukúnɖíɖó mɛ lɛ́ é mi, mi lɛ́ kɔ yi ahohó ɔ kɔn.

13 Ðó un ná dlɛ́n* Judáa daswé* ce ɖɔhun.

10 “Mi byɔ́ jǐ Jexóva ɖo xwejíhwenu.

Nǔ e wú yě ná flú lɛ̌ngbɔ́ lɛ́ ɖɔhun é nɛ́.

Yě ná se wǔvɛ́, ɖó lɛ̌ngbɔ́nyitɔ́ ɖě ɖe ǎ.

4 “Nǔ e Jexóva Mawu ce ɖɔ é ɖíe: ‘Kpé nukún dó lɛ̌ngbɔ́ ɖěɖěe è sɔ́ ɖó vo, bo ná hu lɛ́ é wú. 5 Mɛ ɖěɖěe nɔ xɔ yě lɛ́ é nɔ hu yě, bɔ è ka nɔ dó hwɛ tɔn yě ǎ. Mɛ ɖěɖěe nɔ sa yě lɛ́ é nɔ ɖɔ: “È ní kpa susu nú Jexóva, ɖó un ná húzú dɔkunnɔ.” Bɔ lɛ̌ngbɔ́nyitɔ́ yětɔn lɛ́ nɔ se wǔvɛ́ ɖěbǔ xá yě ǎ.’

6 “‘Ðó un sɔ́ ná se wǔvɛ́ ɖěbǔ xá mɛ e nɔ nɔ to ɔ mɛ lɛ́ é ǎ,’ wɛ Jexóva ɖɔ. ‘Énɛ́ ɔ, un ná bló bɔ mɛ ɖokpó ɖokpó ná jɛ nɔzo tɔn sín alɔ mɛ, bo ná lɛ́ jɛ axɔ́sú tɔn sín alɔ mɛ; yě ná gba to ɔ, bɔ un ka ná hwlɛ́n yě sín alɔ yětɔn mɛ ǎ.’”

7 Bɔ un jɛ nukún kpé dó lɛ̌ngbɔ́ e è sɔ́ ɖó vo bo ná hu lɛ́ é wú jí. Lɛ̌ngbɔ́ e ɖo wǔvɛ́ se wɛ lɛ́ é mi, mi wú wɛ un wa mɔ̌. Énɛ́ ɔ, un sɔ́ kpo we, bo ylɔ́ ɖokpó ɖɔ Ðɛkpɛ, bo ylɔ́ wegɔ́ ɔ ɖɔ Bǔninɔ. Bɔ un jɛ nukún kpé dó lɛ̌ngbɔ́ lɛ́ wú jí. 8 Un nya lɛ̌ngbɔ́nyitɔ́ atɔn ɖo sun ɖokpó mɛ, ɖó agbɔ̌n yětɔn kpé mì,* bɔ yě* lɔmɔ̌ gbɛ́ wǎn nú mì. 9 Bɔ un ɖɔ: “Un sɔ́ ná kpé nukún dó mi wú ɖě ǎ. Éé ɖo kúkú wɛ é ní kú, bónú éé ɖo dindɔn wɛ é ní dɔn. Bɔ éé kpo lɛ́ é ɔ, yě ní vún yěɖée lɛ́ sín lan ɖu.” 10 Énɛ́ ɔ, un sɔ́ kpo ce Ðɛkpɛ ɔ bo já, bɔ mɔ̌ mɛ ɔ, un gba akɔ e un jɛ xá togun ɔ bǐ é. 11 Hǔn, akɔjijɛ ɔ gba gbe énɛ́ gbé, bɔ lɛ̌ngbɔ́ ɖěɖěe ɖo wǔvɛ́ se wɛ ɖo lɛ̌ngbɔ́kpó ɔ mɛ, bo ɖo kpínkpɔ́n mì wɛ lɛ́ é wá mɔ nǔ jɛ wú ɖɔ wɛn ɖé wɛ bo gosín Jexóva gɔ́n.

12 Énɛ́ gúdo ɔ, un ɖɔ nú yě ɖɔ: “Ényí é jló mi hǔn, mi sú azɔ̌kwɛ́ ce mì; ényí é ma ka jló mi ǎ hǔn, mi hɛn.” Bɔ yě sú azɔ̌kwɛ́ ce mì, énɛ́ wɛ nyí kpatágankwɛ́ 30.

13 Énɛ́ gúdo ɔ, Jexóva ɖɔ nú mì ɖɔ: “Nabí e yě lin ɖɔ un xɔ é nɛ́ a? Bɛ̌ akwɛ́ ɔ nyi dó dɔkunsɛxwetɛn ɔ.” Énɛ́ ɔ, un bɛ́ kpatágankwɛ́ 30 lɛ́ bo nyi yě dó dɔkunsɛxwetɛn ɔ ɖo xwé Jexóva tɔn gbe.

14 Énɛ́ gúdo ɔ, un já kpo ce wegɔ́ ɔ, énɛ́ wɛ nyí Bǔninɔ ɔ, mɔ̌ mɛ ɔ, un hɛn nɔví nɔví e Judáa kpó Izlayɛ́li kpó nyí é gblé.

15 Bɔ Jexóva ɖɔ nú mì ɖɔ: “Din ɔ, sɔ́ azɔ̌wanú lɛ̌ngbɔ́nyitɔ́ nǔvɔ́nɔ ɖé tɔn. 16 Ðó un ná yí gbe bɔ lɛ̌ngbɔ́nyitɔ́ ɖokpó ná sí te ɖo to ɔ mɛ. É ná kpé nukún dó lɛ̌ngbɔ́ e ɖo dindɔn wɛ lɛ́ é wú ǎ; é ná ba wǐnnyáwínnyá e bú lɛ́ é mɔ ǎ, é ná blá akpa nú éé gblé wǔ lɛ́ é ǎ, é ná ná nǔɖuɖu éé kpé wú bo kpo ɖo te lɛ́ é ǎ. É nyɔ́ wa ɔ, é ná vúnvún éé dó jǒ lɛ́ é sín lan, lobo sún lɛ̌ngbɔ́ lɛ́ sín hwɛ̌ lɛ́.

17 Heelú lɛ̌ngbɔ́nyitɔ́ ce maɖótaɖé, éé ɖo lɛ̌ngbɔ́hwan ɔ jó dó wɛ é!

Hwǐ ɖé ná xo awa tɔn kpó nukún tɔn aɖisíxwé tɔn kpó.

12 Xó e Mawu ɖɔ é ɖíe:

2 “Un ná sɔ́ Jeluzalɛ́mu dó húzú kɔ́fu* e ná zɔ́n bɔ togun e lɛ́ lɛ̌ dó è lɛ́ é bǐ ná fún sa é ɖé. Bɔ è ná ján go dó Judáa kpó Jeluzalɛ́mu kpó. 3 Ðo gbe énɛ́ gbe ɔ, un ná sɔ́ Jeluzalɛ́mu dó húzú awǐnnya kpinkpɛn ɖé nú togun lɛ́ bǐ. É ɖo wɛn ɖɔ, mɛ ɖěɖěe ná tɛ́n kpɔ́n bo ná sɔ́ ɛ dó jǐ lɛ́ é bǐ ná gblé wǔ ɖésú; bɔ akɔta e ɖo ayǐkúngban ɔ jí lɛ́ é bǐ ná xo yěɖée lɛ́ kplé bá tɔ́n ahwan ɛ. 4 Ðo gbe énɛ́ gbe ɔ,” wɛ Jexóva ɖɔ, “un ná bló bɔ xɛsi ná jɛ sɔ́ lɛ́ bǐ jí, bo ná bló bɔ sɔ́xátɔ́ lɛ́ ná hun taɖu. Nukún ce lɛ́ ná ɖo togun Judáa tɔn jí, amɔ̌, un ná bló bɔ togun ɖě lɛ́ sín sɔ́ lɛ́ bǐ ná va nukún. 5 Bɔ hɛ̌nnugán Judáa tɔn lɛ́ ná ɖɔ dó ayi mɛ ɖɔ: ‘Mɛ e nɔ nɔ Jeluzalɛ́mu lɛ́ é nyí hlɔ̌nhlɔ́n nú mì gbɔn Jexóva ahwankpá lɛ́ tɔn, Mawu yětɔn gblamɛ.’ 6 Ðo gbe énɛ́ gbe ɔ, un ná bló bɔ hɛ̌nnugán Judáa tɔn lɛ́ ná cí zɛ̌n e mɛ myɔkán ɖe ɖo nakí lɛ́ tɛ́ntin é ɖɔhun, bo ná lɛ́ bló bɔ yě ná cí zohwín e ɖo jiji wɛ ɖo jinukún e è sɛ́n, bo bɛ́ ɖó sonu sonu lɛ́ é tɛ́ntin é ɖɔhun, bɔ yě ná fyɔ́ togun e lɛ́ lɛ̌ dó yě lɛ́ é bǐ gbɔn ɖisí amyɔ. Bɔ è ná lɛ́ wá nɔ Jeluzalɛ́mu ɖo tɛn tɔn mɛ,* ɛɛn, ɖo Jeluzalɛ́mu.

7 “Jexóva ná hwlɛ́n goxɔ Judáa tɔn lɛ́ jɛ nukɔn hwɛ̌, énɛ́ ɔ, kúnkan Davídi tɔn sín ɖɛkpɛ* kpó mɛ e nɔ nɔ Jeluzalɛ́mu lɛ́ é sín ɖɛkpɛ* kpó ná zɛ Judáa tɔn wú dín ǎ. 8 Ðo gbe énɛ́ gbe ɔ, Jexóva ná nyí gǎglónú nú mɛ e nɔ nɔ Jeluzalɛ́mu lɛ́ é. Ðo gbe énɛ́ gbe ɔ, mɛ e nɔ klɛ́n afɔ ɖo yě mɛ é* ná cí Davídi ɖɔhun, bɔ kúnkan Davídi tɔn ná cí Mawu ɖɔhun, ɛɛn, wɛnsagun Jexóva tɔn e nɔ nɔ nukɔn nú yě é ɖɔhun. 9 Bɔ ɖo gbe énɛ́ gbe ɔ, un ná kán ɖ’é jí bo ná sú kún dó nú akɔta e ná wá tɔ́n ahwan Jeluzalɛ́mu lɛ́ é bǐ mlɛ́mlɛ́.

10 “Un ná gba gbigbɔ fɛ́nú tɔn kpó vosisa tɔn kpó kɔn nyi kúnkan* Davídi tɔn kpó mɛ e nɔ nɔ Jeluzalɛ́mu lɛ́ é kpó jí. Bɔ yě ná kpɔ́n mɛ e yě sɔ́ hwǎn é, lobɔ yě ná dó gbɛvíhan dó jǐ tɔn lěe yě nɔ dó gbɛvíhan dó vǐɖokpónɔ ɖé jí gbɔn é ɖɔhun, bɔ yě ná nɔ aluwɛ ɖaxó ɖé mɛ dó ta tɔn mɛ, lěe yě nɔ nɔ aluwɛ mɛ dó nukɔngbéví súnnu é kú é tamɛ gbɔn é ɖɔhun. 11 Ðo gbe énɛ́ gbe ɔ, è ná se gbɛvíhan ɖaxó ɖo Jeluzalɛ́mu, gbɛvíhan e è dó ɖo Hadádi-Hlimumɔ́ni, ɖo ayǐkúngban wɛnjɛ Mɛgído tɔn jí é ɖɔhun. 12 To ɔ ná dó gbɛvíhan, xwédo ɖokpó ɖokpó ná ɖo étɔn wú; kúnkan Davídi tɔn ná ɖo étɔn wú, bɔ nyɔ̌nu yětɔn lɛ́ lɔ ná ɖo yětɔn wú; kúnkan Natáan tɔn ná ɖo étɔn wú, bɔ nyɔ̌nu yětɔn lɛ́ lɔ ná ɖo yětɔn wú; 13 kúnkan Levíi tɔn ná ɖo étɔn wú, bɔ nyɔ̌nu yětɔn lɛ́ lɔ ná ɖo yětɔn wú; xwédo Cimɛ́yi ví lɛ́ tɔn ná ɖo étɔn wú, bɔ nyɔ̌nu yětɔn lɛ́ lɔ ná ɖo yětɔn wú; 14 bɔ xwédo e kpo lɛ́ é bǐ ɔ, xwédo ɖokpó ɖokpó ná ɖo étɔn wú, bɔ nyɔ̌nu yětɔn lɛ́ lɔ ná ɖo yětɔn wú.

13 “Ðo azǎn énɛ́ gbe ɔ, è ná kun dotɔ ɖé dó kúnkan Davídi tɔn kpó mɛ e nɔ nɔ Jeluzalɛ́mu lɛ́ é kpó tamɛ, bo ná dó slá wǔ nú yě sín hwɛhuhu kpó nǔ blíblí kpó sí.

2 “Ðo azǎn énɛ́ gbe ɔ,” wɛ Jexóva ahwankpá lɛ́ tɔn ɖɔ, “un ná súnsún bǒcyɔ lɛ́ sín nyǐkɔ lɛ́ síin, bɔ è sɔ́ ná flín yě ɖě ǎ. Un ná ɖe gbeyíɖɔ lɛ́ kpó gbigbɔ nǔblíblíwiwa tɔn kpó sín to ɔ mɛ. 3 Ényí mɛɖé ná lɛ́ wa gbeyíɖɔzɔ́ ɔ, tɔ́ e ji i é kpó nɔ e ji i é kpó ná ɖɔ n’i ɖɔ: ‘A ná nɔ gbɛ ǎ, ɖó a ɖó adingban ɖo Jexóva nyíkɔ mɛ.’ Tɔ́ e ji i é kpó nɔ e ji i é kpó ná sɔ́ nǔ i ɖó gbeyíɖɔzɔ́ e é wa é wú.

4 “Ðo azǎn énɛ́ gbe ɔ, winnyá ná hu gbeyíɖɔ ɖokpó ɖokpó ɖó nǔmimɔ tɔn wú, hwenu e é ná ɖo gbeyíɖɔzɔ́ tɔn wa wɛ é; yě ná dó awu fúnnɔ e gbeyíɖɔ lɛ́ nɔ dó é dó blɛ́ mɛ ǎ. 5 Yě mɛ ɖokpó ɖokpó ná ɖɔ: ‘Un nyí gbeyíɖɔ ɖě ǎ. Gle wɛ un nɔ lɛ, ɖó hwenu e un ɖo wǐnnyáwínnyá mɛ é wɛ nya ɖé xɔ mì.’ 6 Bɔ ényí mɛɖé kanbyɔ́ yě ɖě ɖɔ: ‘Akpa tɛ́ ka nyí énɛ́ lɛ́ bo ɖo abɔ̌ towe lɛ́ mɛ ɔ?,’* é ná ná xósin ɖɔ: ‘Xɔ́ntɔn ce lɛ́* sín xwégbe wɛ è gblé wǔ mì ɖe.’”

Un ná ɖɔ: ‘Togun ce wɛ yě nyí,’

bɔ yě ná ɖɔ: ‘Jexóva wɛ nyí Mawu mǐtɔn.’”

14 “Éɖíe! Azǎn ɖé ja, azǎn Jexóva tɔn, bɔ è ná má nǔ e è yí sín así towe* ɖo ahwangbénu é ɖo tɛ́ntin towe. 2 Un ná xo akɔta lɛ́ bǐ kplé bɔ yě ná sí te dó Jeluzalɛ́mu jí, bo ná fun ahwan xá ɛ. È ná yí toxo ɔ, vɔ xwé lɛ́, bo lɛ́ hwlɛ́n kan xá nyɔ̌nu lɛ́. Wevlɔ́ɖó toxo ɔ tɔn ná yi kannumɔgbénu, amɔ̌, è ná ɖe mɛ e kpo ɖo togun ɔ mɛ lɛ́ é sín toxo ɔ mɛ ǎ.

3 “Jexóva ná tɔ́n bo ná fun ahwan xá akɔta énɛ́ lɛ́, lěe é nɔ fun gbɔn ɖo ahwanfunfunzán gbe é. 4 Ðo gbe énɛ́ gbe ɔ, afɔ tɔn lɛ́ ná nɔ te ɖo Olívutín só, éé kpan nukɔn Jeluzalɛ́mu ɖo zǎnzǎnhwe jí é jí. Olívutín só ɔ ná má ɖó we, sín zǎnzǎnhwe jí* yi gbadahwe jí,* bo ná bló tɔdo ɖaxó ɖé. Só ɔ sín wevlɔ́ɖó ná sɛ tɛn yi totaligbé, bɔ wevlɔ́ɖó ná sɛ tɛn yi tofɔligbé. 5 Mi ná hɔn yi tɔdo e ɖo só ce lɛ́ tɛ́ntin é mɛ, ɖó tɔdo e ɖo só lɛ́ tɛ́ntin é ná gbló ada káká yi Asɛ́lu. É ná byɔ́ ɖɔ mi ní hɔn, lěe é sín ayǐkúngban e dán wǔ ɖo axɔ́sú Judáa tɔn Oziyási hwenu é wú, bɔ mi hɔn é ɖɔhun. Jexóva Mawu ce ná wá, bɔ mɛ mímɛ́ lɛ́ bǐ ná ɖo kpɔ́ xá ɛ.

6 “Ðo gbe énɛ́ gbe ɔ, wěziza xɔ akwɛ́ ɖě ná ɖe ǎ, nǔ lɛ́ ná syɛ́n laglási ɖɔhun.* 7 Azǎn énɛ́ ná nyí azǎn bǔnɔ ɖé, bɔ è ná tuun ɖɔ azǎn Jexóva tɔn wɛ. Kéze ná ɖe ǎ, zǎn lɔ ka ná ɖe ǎ; bɔ gbadanu na bo su ɔ, wěziza ná tíin. 8 Ðo azǎn énɛ́ gbe ɔ, sin e nɔ ná gbɛ mɛ lɛ́ é ná sa sín Jeluzalɛ́mu: wevlɔ́ɖó ná sa yi xu e ɖo zǎnzǎnhwe jí é* mɛ, bɔ wevlɔ́ɖó ná sa yi xu e ɖo gbadahwe jí é* mɛ. Nǔ ná nyí mɔ̌ ɖo yǒzohwenu kpó avivɔhwenu kpó. 9 Bɔ Jexóva ná nyí Axɔ́sú dó ayǐkúngban ɔ bǐ jí. Ðo gbe énɛ́ gbe ɔ, Jexóva ɖokpónɔ ná nyí Mawu, bɔ nyǐkɔ tɔn ɖokpónɔ wɛ è ná nɔ ylɔ́.

10 “To ɔ bǐ ná wá cí tɔdo Alába tɔn ɖɔhun, sín Geba yi Hlimumɔ́ni ɖo tofɔligbé Jeluzalɛ́mu tɔn. È ná sɔ́ Jeluzalɛ́mu sí te ɖó tɛn tɔn xóxó ɔ mɛ, bɔ mɛ lɛ́ ná nɔ mɛ, sín Bɛnjamɛ́ɛ hɔntogbó ɔ jí káká yi fí e Hɔntogbó Nukɔntɔn ɔ ɖe é, káká yi Zwemɛhɔntogbó ɔ jí, sín atɔxwɛ Hananɛ́li tɔn kɔn káká yi axɔ́sú ɔ sín vǐwunto lɛ́* kɔn. 11 Bɔ mɛ lɛ́ ná nɔ Jeluzalɛ́mu. È sɔ́ ná dó nu i gbeɖé ɖɔ è ná sú kún tɔn dó ǎ, bɔ mɛ lɛ́ ná nɔ mɛ ɖo ayijayǐ mɛ.

12 “Awě e Jexóva ná sɔ́ dó xo togun e nɔ fun ahwan xá Jeluzalɛ́mu lɛ́ é bǐ é ɖíe: yě ná ɖo te ɖo afɔ yětɔn lɛ́ jí bɔ agbaza yětɔn ka ná nyɔ, nukún yětɔn lɛ́ ná nyɔ ɖo akpa mɛ, bɔ ɖɛ̌ yětɔn lɛ́ ná nyɔ ɖo nu yětɔn lɛ́ mɛ.

13 “Ðo gbe énɛ́ gbe ɔ, xɛsi e Jexóva ná dɔn wá é ná gba kpé ɖo tɛ́ntin yětɔn; mɛ ɖokpó ɖokpó ná tɔ́ dó nɔzo tɔn sín alɔ wú, bɔ yě ná tɔ́n ahwan yěɖée lɛ́.* 14 Judáa lɔ ná ɖó alɔ ɖo ahwan ɔ mɛ ɖo Jeluzalɛ́mu; bɔ è ná xo akɔta e lɛ́ lɛ̌ dó yě lɛ́ é bǐ sín dɔkun lɛ́ kplé, énɛ́ wɛ nyí siká, kpatágan kpó awu kpó kpɔ́ gégé.

15 “Awě mɔ̌hun ná lɛ́ xo sɔ́ lɛ́, sɔ́tócí lɛ́, lǎkúnmí lɛ́, tócí lɛ́ kpó kanlin ɖěɖěe ɖo kɛntɔ́ lɛ́ sín ahwankpá lɛ́ mɛ lɛ́ é bǐ kpó.

16 “Xwewú xwewú ɔ, mɛ ɖěɖěe kpo ɖo akɔta ɖěɖěe wá tɔ́n ahwan Jeluzalɛ́mu lɛ́ é bǐ mɛ lɛ́ é bǐ ná nɔ fán kpó yi Jeluzalɛ́mu bo ná ɖe kɔ́ nú* Axɔ́sú ɔ, Jexóva ahwankpá lɛ́ tɔn, lobo ná ɖu Azavaxwe* ɔ. 17 Amɔ̌, ényí mɛ e ɖo akɔta e ɖo ayǐkúngban ɔ jí lɛ́ é mɛ é ɖě ma fán kpó bo yi Jeluzalɛ́mu bo ɖe kɔ́ nú Axɔ́sú ɔ, Jexóva ahwankpá lɛ́ tɔn ǎ ɔ, jǐ ɖě ná ja dó jǐ tɔn ǎ. 18 Ényí togun* Ejípu tɔn ma fán kpó bo byɔ́ toxo ɔ mɛ ǎ ɔ, yě ná mɔ jǐ ɖě ǎ. É nyɔ́ wa ɔ, awě e Jexóva nɔ sɔ́ dó xo akɔta ɖěɖěe ma nɔ fán kpó bo nɔ yi ɖu Azavaxwe ɔ ǎ é wɛ è ná sɔ́ dó xo yě. 19 Tó e è ná dɔn nú Ejípu, bo ná lɛ́ dɔn nú akɔta ɖěɖěe ma nɔ fán kpó bo ná yi ɖu Azavaxwe ɔ ǎ lɛ́ é bǐ é nɛ́, ɖó hwɛhuhu wɛ nǔ wiwa gbɔn mɔ̌ nyí.

20 “Ðo gbe énɛ́ gbe ɔ, è ná wlán xógbe ‘Jexóva wɛ nyí Mɛ mímɛ́!’ dó sɔ́ lɛ́ sín gankwékwé wú. Bɔ nǔɖazɛ́n* e ɖo xwé Jexóva tɔn gbe lɛ́ é ná cí gannú lɛ́ ɖɔhun ɖo vɔ̌sákpe ɔ nukɔn. 21 Bɔ nǔɖazɛ́n* e ɖo Jeluzalɛ́mu lɛ́ é kpó éé ɖo Judáa lɛ́ é kpó bǐ ná nyí nǔ mímɛ́, bɔ yě ná nyí Jexóva ahwankpá lɛ́ tɔn tɔn; bɔ mɛ ɖěɖěe wá bo ná xwlé vɔ̌sánú lɛ́ é bǐ ná byɔ́ sinsɛnxɔ ɔ mɛ, bo ná zán ɖé lɛ́ dó ɖa nǔ. Ðo gbe énɛ́ gbe ɔ, è sɔ́ ná mɔ Kanáanu* ɖě ɖo Jexóva ahwankpá lɛ́ tɔn sín xwégbe ǎ.”