MALACÍI

1 Wɛn ɖé:

Xó e Jexóva ɖɔ nú Izlayɛ́li gbɔn Malacíi* jí é ɖíe:

2 “Un ɖe wǎnyíyí xlɛ́ mi,” wɛ Jexóva ɖɔ.

Amɔ̌, mi nɔ ɖɔ: “Nɛ̌ a ka ɖe wǎnyíyí xlɛ́ mǐ gbɔn?”

“Jakɔ́bu sín nɔví wɛ nú Esáwu ǎ cé?” wɛ Jexóva ɖɔ. “Amɔ̌, un yí wǎn nú Jakɔ́bu, 3 bɔ Esáwu ɔ, un gbɛ́ wǎn nú éyɛ́; un bló bɔ só tɔn lɛ́ jɛ vɔ̌, bo jó gǔ tɔn nú cukú gbě tɔn gbětótló mɛ tɔn lɛ́.”

4 “Edɔ́mu nɔ ɖɔ: ‘È ko nyínyɛ́ mǐ, amɔ̌, mǐ ná lɛ́ kɔ bo ná vɔ́ dǒglin lɛ́ gbá’ có, nǔ e Jexóva ahwankpá lɛ́ tɔn ɖɔ é ɖíe: ‘Yě ná gbá, amɔ̌, un ná hɔ́, bɔ è ná ylɔ́ yě ɖɔ “ayǐ e jí è nɔ wa nǔ nyanya ɖe é” kpó “togun e Jexóva ɖó hwɛ ná káká sɔ́yi é” kpó. 5 Nukún mitɔn lɛ́ ɖésú ná mɔ, bɔ mi ná ɖɔ: “È ní sɔ́ Jexóva su ɖo ayǐkúngban Izlayɛ́li tɔn ɔ bǐ jí.”’”

6 “‘Vǐ súnnu nɔ wlí yɛ̌yi nú tɔ́ tɔn, bɔ mɛsɛntɔ́ nɔ wlí yɛ̌yi nú gǎn tɔn. Hǔn, ényí tɔ́ ɖé wɛ nú mì ɔ, fítɛ́ yɛ̌yi e un jɛxá é ka ɖe? Bɔ ényí gǎn* ɖé wɛ nú mì ɔ, fítɛ́ sísí* e un jɛxá é ka ɖe?’ wɛ nyɛ Jexóva ahwankpá lɛ́ tɔn ɖo kinkanbyɔ́ mi vɔ̌sánúxwlémawutɔ́ ɖěɖěe ɖo nyǐkɔ ce sɔ́ xo kɔ́ wɛ lɛ́ é wɛ.

“‘Amɔ̌, mi nɔ ɖɔ: “Nɛ̌ mǐ ka sɔ́ nyǐkɔ towe xo kɔ́ gbɔn?”’

7 “‘Mi nɔ xwlé mì nǔɖuɖu* blíblí lɛ́ ɖo vɔ̌sákpe ce jí.’

“‘Bɔ mi nɔ ɖɔ: “Nɛ̌ mǐ ka hɛn we blí gbɔn?”’

“‘Mi nɔ ɖɔ: “Nǔ e è ná sɔ́ xo kɔ́ é wɛ távo Jexóva tɔn nyí.” 8 Bɔ ényí mi hɛn kanlin nukúntɔ́nnɔ wá bo ná dó sá vɔ̌ ná ɔ, mi nɔ ɖɔ: “Nǔ ɖě nylá ɖ’é mɛ ǎ.” Bɔ ényí mi hɛn kanlin afɔkponɔ alǒ azinzɔnnɔ wá ɔ, mi nɔ ɖɔ: “Nǔ ɖě nylá ɖ’é mɛ ǎ.”’”

“Kɛnklɛ́n, tɛ́n kpɔ́n bo yi xwlé yě tokpɔngán towe. Xomɛ ná hun i dó wǔ we, alǒ é ná yí we kpó xomɛnyínyɔ́ kpó a?” wɛ Jexóva ahwankpá lɛ́ tɔn ɖɔ.

9 “Din ɔ, mi kɛnklɛ́n bo sa vo nú Mawu,* bónú é ná nyɔ́ xomɛ dó mǐ wú. Nú mi hɛn nǔníná mɔ̌hun lɛ́ dó alɔ mitɔn lɛ́ mɛ ɔ, é ná yí mi mɛ ɖě kpó xomɛnyínyɔ́ kpó a?” wɛ Jexóva ahwankpá lɛ́ tɔn ɖɔ.

10 “Mɛ̌ ka ɖo mi mɛ bo ɖo gbesisɔmɛ bo ná sú hɔn lɛ́?* Mi tlɛ nɔ flɔ́ myɔ yǎyá ɖó vɔ̌sákpe ce jí ma yí akwɛ́ ǎ. Nǔ mitɔn nyɔ́ nukún ce mɛ ǎ,” wɛ Jexóva ahwankpá lɛ́ tɔn ɖɔ, “bɔ un yí wǎn nú nǔníná e mi nɔ hɛn wá nú mì lɛ́ é ɖě ǎ.”

11 “Sín fí e hwe nɔ tɔ́n sín é káká yi fí e é nɔ yi xɔ dó é* ɔ, nyǐkɔ ce ná nyí nǔɖaxó ɖo akɔta lɛ́ tɛ́ntin. È ná dó vɔ̌ lɛ́ zo gbɔn fí lɛ́ bǐ, bo ná xwlé nǔníná lɛ́ dó sɔ́ nyǐkɔ ce su, bɔ yě ná cí nǔníná mímɛ́ ɖé ɖɔhun; ɖó nyǐkɔ ce ná nyí nǔɖaxó ɖo akɔta lɛ́ tɛ́ntin,” wɛ Jexóva ahwankpá lɛ́ tɔn ɖɔ.

12 “Amɔ̌, mi nɔ kɔn cí d’é wú* bo nɔ ɖɔ: ‘Távo Jexóva tɔn blí, bɔ è ɖó ná sɔ́ nǔníná, énɛ́ wɛ nyí, nǔɖuɖu e ɖ’é jí é xo kɔ́.’ 13 Mi nɔ lɛ́ ɖɔ: ‘Nǔ élɔ́ sín akpɔ ci mǐ mɛ nya!’ bo nɔ nyɛ́ awɔntín dó ta ná,” wɛ Jexóva ahwankpá lɛ́ tɔn ɖɔ. “Bɔ mi nɔ hɛn kanlin finfin, afɔkponɔ, alǒ azinzɔnnɔ lɛ́ wá. Ɛɛn, nǔ mɔ̌hun lɛ́ wɛ mi nɔ hɛn wá bo ná dó ná nǔ! Un ná yí yě ɖo mi sí wɛ a?” wɛ Jexóva ɖɔ.

14 “Heelú mɛblɛ́tɔ́ e ɖó kanlinsú ɖagbe ɖo kanlinkpó tɔn mɛ, bo ka nɔ dó akpá bo nɔ sɔ́ kanlin wɔ̌nɖowǔnánɔ* dó sá vɔ̌ nú Jexóva é. Ðó Axɔ́sú ɖaxó ɖé wɛ nú mì,” wɛ Jexóva ahwankpá lɛ́ tɔn ɖɔ, “bɔ è ná ɖi xɛsi nú nyǐkɔ ce, bo lɛ́ ɖó sísí ná ɖo akɔta lɛ́ tɛ́ntin.”

2 “Din ɔ, vɔ̌sánúxwlémawutɔ́ lɛ́ mi, gbeɖiɖe élɔ́ ɔ, mitɔn wɛ. 2 Ényí mi gbɛ́ tó ɖó, bo ma lɛ́ hɛn dó ayi mɛ ɖɔ émí ná sɔ́ nyǐkɔ ce su ǎ ɔ,” wɛ Jexóva ahwankpá lɛ́ tɔn ɖɔ, “un ná sɛ́ nudómɛ ɔ dó mi, bo ná sɔ́ nyɔ̌ná mitɔn lɛ́ dó húzú nudómɛ. Ɛɛn, un sɔ́ nyɔ̌ná lɛ́ dó húzú nudómɛ, ɖó mi nɔ hɛn dó ayi mɛ ǎ wútu.”

3 “Éɖíe! Nǔkún e mi dó lɛ́ é ɔ, un ná hɛn yě gblé,* ɖó mi wú, bo ná fúnfún mǐ kɔn nyi nukún mitɔn lɛ́ mɛ, ɛɛn, kanlin e mi sɔ́ dó sá vɔ̌ ná ɖo xwe mitɔn lɛ́ hwenu lɛ́ é sín mǐ; bɔ è ná kplá mi yi kɔn.* 4 Énɛ́ ɔ, mi ná tuun ɖɔ un ɖe gbe énɛ́ nú mi, bónú akɔ e un jɛ xá Levíi é ní kpo ɖo te,” wɛ Jexóva ahwankpá lɛ́ tɔn ɖɔ.

5 “Gbɛ kpó fífá kpó sín akɔ wɛ un jɛ xá ɛ, un ná ɛ nǔ énɛ́ lɛ́ bónú é ná dó sixú ɖi xɛsi* nú mì. É ɖi xɛsi nú mì, ɛɛn, é ɖó sísí e gɔ́ngɔ́n é nú nyǐkɔ ce. 6 Sɛ́n* nǔgbó tɔn ɖo nu tɔn, lobɔ nǔagɔwiwa sín xó ɖě ɖo nu tɔn ǎ. É ɖi zɔnlin xá mì ɖo fífá kpó nǔjlɔ́jlɔ́wiwa kpó mɛ, bo lɛ́ kɔ nú mɛ gěgé sín ali nyanya jí. 7 Ðó vɔ̌sánúxwlémawutɔ́ ɖé sín nu ɖó ná nɔ nya xɛ ɖo nǔtuuntuun jí, bɔ mɛ lɛ́ ɖó ná nɔ ba sɛ́n* ɖo nu tɔn mɛ, ɖó Jexóva ahwankpá lɛ́ tɔn sín wɛndótɔ́ wɛ é nyí.

8 “Amɔ̌, miɖésúnɔ ko lɛ́ kɔ sín ali ɔ jí. Mi bló bɔ mɛ gěgé klɛ́n afɔ ɖó sɛ́n ɔ wú.* Mi gba akɔjijɛ Levíi tɔn ɔ,” wɛ Jexóva ahwankpá lɛ́ tɔn ɖɔ. 9 “Énɛ́ wú ɔ, un ná bló bɔ mi sɔ́ ná hwɛ́n nǔɖé ǎ, bo ná lɛ́ ɖu winnyá ɖo togun ɔ bǐ nukɔn, ɖó mi nɔ xwedó ali ce lɛ́ ǎ, loɔ, mi nɔ ɖe mɛɖé ɖó vo ɖo mɛɖé mɛ ɖo sɛ́n ɔ nyinyi mɛ.”

10 “Tɔ́ ɖokpó wɛ mǐ bǐ ɖó ǎ cé? Mawu ɖokpó wɛ dá mǐ bǐ ǎ cé? Bɔ étɛ́wú mǐ ka nɔ ɖo nǔ wa xá mǐɖée lɛ́ wɛ kpó gbejímanɔ kpó, bo nɔ ɖo tɔ́gbó mǐtɔn lɛ́ sín akɔjijɛ sɔ́ xo kɔ́ wɛ? 11 Judáa wa nǔ kpó gbejímanɔ kpó, bɔ è wa nǔ e xyɔ́ wǔ é ɖé ɖo Izlayɛ́li kpó Jeluzalɛ́mu kpó; ɖó Judáa ɖu su nú mǐmɛ́ nyínyí* Jexóva tɔn, ée é yí wǎn ná é, lobo da nǔmɛsɛn toɖévomɛ tɔn sín vǐ nyɔ̌nu. 12 Jexóva ná sú kún dó nú mɛ ɖěbǔ e nɔ wa mɔ̌ é sín goxɔ Jakɔ́bu tɔn lɛ́ mɛ, é sixú nyí mɛ ɖěbǔ,* é ná bo nɔ xwlé nǔníná Jexóva ahwankpá lɛ́ tɔn ɔ nɛ́.”

13 “Nǔ ɖěvo* tíin bɔ mi nɔ wa bɔ é sín énɛ́ wú bɔ ɖasin, avǐ kpó azɔnwinwɛn kpó kpé vɔ̌sákpe Jexóva tɔn jí, sɔmɔ̌ bɔ é sɔ́ nɔ kpɔ́n nǔ e mi nɔ xwlé è lɛ́ é sín jɛ jí ǎ, alǒ nǔ ɖěbǔ e mi hɛn wá é sɔ́ nɔ nyɔ́ nukún tɔn mɛ ǎ. 14 Bɔ mi nɔ ɖɔ: ‘Ðó hwɛjijɔ tɛ́ wú?’ Ðó Jexóva ɖésúnɔ ɖe kúnnu dó wǔ we, ɖó a wa nǔ kpó gbejímanɔ kpó xá asi e a da ɖo wǐnnyáwínnyá mɛ é, xɔ́ntɔn towe wɛ é ka nyí bo lɛ́ nyí asi towe gbɔn akɔjijɛ gblamɛ.* 15 Amɔ̌, mɛɖé tíin bɔ éyɛ́ wa nǔ gbɔn mɔ̌ ǎ, ɖó gbigbɔ Mawu tɔn kpo ɖo jǐ tɔn. Bɔ étɛ́ ba wɛ mɛ énɛ́ ka ɖe? Kúnkan* Mawu tɔn wɛ. Énɛ́ wú ɔ, mi cɔ́ miɖée dó nǔ e nɔ sísɛ́ mi bɔ mi nɔ wa nǔ é* wú, bo ma nɔ wa nǔ kpó gbejímanɔ kpó xá asi e mi da ɖo wǐnnyáwínnyá mɛ é ó. 16 Ðó un* gbɛ́ wǎn nú asúgbígbɛ́ alǒ asigbígbɛ́,” wɛ Jexóva Mawu Izlayɛ́li tɔn ɖɔ, “kpó mɛ e nɔ sɔ́ dǎkaxixo núwiwa lɛ́ dó awu ɖɔhun é kpó,”* wɛ Jexóva ahwankpá lɛ́ tɔn ɖɔ. “Mi cɔ́ miɖée dó nǔ e nɔ sísɛ́ mi bɔ mi nɔ wa nǔ é* wú; mi ɖó ná nɔ wa nǔ kpó gbejímanɔ kpó ǎ.

17 “Mi bló bɔ xó mitɔn kpé agbɔ̌n nú Jexóva. Amɔ̌, mi nɔ ɖɔ: ‘Nɛ̌ mǐ ka bló bɔ agbɔ̌n kpé è gbɔn?’ Ðó mi nɔ ɖɔ: ‘Mɛ ɖěbǔ e nɔ wa nǔ nyanya é nyí mɛ ɖagbe ɖo Jexóva nukúnmɛ, bɔ nǔ tɔn nɔ nyɔ́ nukún tɔn mɛ,’ alǒ nɔ ɖɔ: ‘Fítɛ́ Mawu hwɛjijɔnɔ ɔ ka ɖe?’”

3 “Éɖíe! Un ɖo wɛnsagun ce sɛ́dó wɛ, bɔ é ná bló ali ɖé ɖó* ɖo nukɔn ce. Bɔ ɖo ajijimɛ ɔ, Aklúnɔ nǔgbó ɔ, ée mi ɖo biba wɛ é ná wá sinsɛnxɔ tɔn mɛ; bɔ wɛnsagun akɔjijɛ ɔ tɔn ná wá, éyɛ́ mɛ e mi ɖo te kpɔ́n kpó xomɛhunhun kpó é. Éɖíe! É ná wá jɛ́n wɛ,” wɛ Jexóva ahwankpá lɛ́ tɔn ɖɔ.

2 “Amɔ̌, mɛ̌ ka ná dɛ ɖo wǐwá tɔn sín azǎn gbe? Mɛ̌ ka ná kpé wú bo nɔ te hwenu e é ná jɛ wě é? Ðó é ná cí gankɔntɔ́ sín myɔ ɖɔhun, bo lɛ́ cí avɔnyatɔ́ lɛ́ sín aɖǐ ɖɔhun. 3 É ná jínjɔ́n ayǐ, mɛ e nɔ kɔn kpatágan bo nɔ ɖe nǔ kwíji sín mɛ é ɖɔhun, bo ná ɖe nǔ kwíji sín vǐ súnnu Levíi tɔn lɛ́ wú; é ná bló bɔ yě ná mɛ́* siká kpó kpatágan kpó ɖɔhun, bɔ é ɖo wɛn ɖɔ yě ná húzú togun e nɔ xwlé nǔníná ɖo ali jlɔ́jlɔ́ nu é nú Jexóva. 4 Bɔ nǔníná Judáa kpó Jeluzalɛ́mu kpó tɔn ná nyɔ́ Jexóva nukúnmɛ* nǔgbó nǔgbó, lěe é nɔ nyí gbɔn ɖ’ayǐ xóxó, ɛɛn, ɖo hwexónu é.

5 “Un ná sɛkpɔ́ mi bo ná ɖɔ hwɛ xá mi, un ná yá wǔ ɖó hwɛ nú azětɔ́ lɛ́, afɔdógbětɔ́ lɛ́ alǒ nyɔ̌nuɖěvobatɔ́ lɛ́, mɛ ɖěɖěe nɔ ɖó adingban bo nɔ xwlé nǔ d’é jí lɛ́ é, mɛ ɖěɖěe nɔ xo jokóxotɔ́, asúkúsi kpó tɔ́cyɔvǐ kpó ɖu lɛ́ é, kpó mɛ ɖěɖěe nɔ gbɛ́ alɔ dó toɖévomɛnu é* kpó. Mɛ énɛ́ lɛ́ ɖó sísí e gɔ́ngɔ́n é nú mì ǎ,” wɛ Jexóva ahwankpá lɛ́ tɔn ɖɔ.

6 “Ðó Jexóva wɛ un nyí; un nɔ húzú ǎ.* Bɔ midɛɛ lɛ́ nyí vǐ súnnu Jakɔ́bu tɔn lɛ́; è ko sú kún mitɔn dó ǎ. 7 Sín tɔ́gbó mitɔn lɛ́ hwenu ɔ, mi lɛ́ kɔ sín gbetakɛ́n ce lɛ́ gúdo, bo sɔ́ nɔ xwedó yě ǎ. Mi lɛ́ kɔ wá gɔ̌n ce, énɛ́ ɔ, un ná lɛ́ kɔ wá mi gɔ́n,” wɛ Jexóva ahwankpá lɛ́ tɔn ɖɔ.

Amɔ̌, mi nɔ ɖɔ: “Ali tɛ́ nu é ka byɔ́ ɖɔ mǐ ní lɛ́ kɔ wá ɖe?”

8 “Gbɛtɔ́ yǎyá ɖé ná j’ajo dó Mawu a? Mi ka ɖo ajo ja dó mì wɛ.”

Bɔ mi nɔ ɖɔ: “Nɛ̌ mǐ ka j’ajo dó we gbɔn?”

“Mǎɖówǒ kpó nǔníná lɛ́ kpó e mi ma nɔ hɛn wá ǎ é wɛ. 9 É ɖo wɛn ɖɔ è dó nu mi,* ɖó mi ɖo ajo ja dó mì wɛ, ɛɛn, akɔta ɔ blěbú wɛ ɖo mɔ̌ wa wɛ. 10 Mi hɛn mǎɖówǒ ɔ blěbú tɔn* wá agbanxɔ ɔ mɛ, bónú nǔɖuɖu ní dó sixú tíin ɖo xwé ce gbe; mi kɛnklɛ́n bo tɛ́n mì kpɔ́n ɖo ali énɛ́ nu,” wɛ Jexóva ahwankpá lɛ́ tɔn ɖɔ, “bá kpɔ́n ɖɔ un ma ná hun jǐxwé sín hɔntogbó lɛ́ ɖó nuvo nú mi bo ná kɔn* nyɔ̌ná dó mi jí, káká bɔ é ná túnflá* a jí.”

11 “Un ná gbɛ́ nǔ nú nǔvúnɖutɔ́ ɔ* ɖó mi wú, bɔ é ná hɛn sínsɛ́n ayǐkúngban mitɔn tɔn gblé ǎ, mɔ̌ jɛ́n vǐwuntín e ɖo gle mitɔn mɛ lɛ́ é ma ná gɔn sínsɛ́n ná ǎ é nɛ́,” wɛ Jexóva ahwankpá lɛ́ tɔn ɖɔ.

12 “Akɔta lɛ́ bǐ ná ɖɔ ɖɔ mi nyí awǎjijɛnɔ, ɖó mi ná nyí to e nɔ dó xomɛhunhun nú mɛ é,” wɛ Jexóva ahwankpá lɛ́ tɔn ɖɔ.

13 “Xó e mi ɖɔ dó wǔ ce lɛ́ é syɛ́n,” wɛ Jexóva ɖɔ.

Bɔ mi nɔ ɖɔ: “Nɛ̌ mǐ ka ɖɔ xó ɖo mǐɖée lɛ́ tɛ́ntin dó wǔ we gbɔn?”

14 “Mi nɔ ɖɔ: ‘Nǔ yǎyá wɛ Mawu sinsɛn nyí. Ée mǐ xwedó nǔ e é byɔ́ ɖo mǐ sí lɛ́ é bo lɛ́ ɖi zɔnlin wǔbláwúblá ɖo Jexóva ahwankpá lɛ́ tɔn nukɔn é ɔ, le tɛ́ mǐ ka mɔ ɖ’é mɛ? 15 Din ɔ, mǐ nɔ kpɔ́n mɛ e nɔ yí go lɛ́ é dó mɔ awǎjijɛnɔ. Gɔ́ ná ɔ, nǔ nɔ nyɔ́ nú mɛ ɖěɖěe nɔ fɔ́n bo nɔ ɖo nǔ nyanya wa wɛ lɛ́ é. Yě glá káká bo tɛ́n Mawu kpɔ́n bo tlɛ sún sin tɔn ǎ.’”

16 Ðo hwe énɛ́ nu ɔ, mɛ ɖěɖěe nɔ ɖó sísí e gɔ́ngɔ́n é nú Jexóva lɛ́ é nɔ ɖo xó ɖɔ xá yěɖée lɛ́ wɛ, mɛ ɖokpó ɖokpó kpó hǎgbɛ́ tɔn kpó, bɔ Jexóva nɔ ɖo ayi ɖ’é wú wɛ, bo nɔ ɖo tó ɖó wɛ. Bɔ è wlán wěma mɛ flínflín tɔn ɖé ɖo nukɔn tɔn, dó mɛ ɖěɖěe nɔ ɖó sísí e gɔ́ngɔ́n é nú Jexóva lɛ́ é kpó mɛ ɖěɖěe nɔ lin tamɛ dó nyǐkɔ tɔn jí lɛ́ é kpó* tamɛ.

17 “Bɔ yě ná nyí ce,” wɛ Jexóva ahwankpá lɛ́ tɔn ɖɔ, “ɖo azǎn e gbe un ná bló bɔ yě ná nyí nǔɖókan bǔnɔ* ce é. Un ná se wǔvɛ́ xá yě, lěe tɔ́ ɖé nɔ se wǔvɛ́ xá vǐ súnnu tɔn, éé nɔ sɛn ɛ é gbɔn é. 18 Bɔ mi ná lɛ́ mɔ vogbingbɔn e ɖo nǔjlɔ́jlɔ́watɔ́ ɖé kpó nǔnyanyawatɔ́ ɖé kpó tɛ́ntin é; éé ɖo mɛ e nɔ sɛn Mawu é kpó mɛ e ma nɔ sɛn ɛ ǎ é kpó tɛ́ntin é.”

4 “Ðó éɖíe! Azǎn ɔ ja, bo ɖo jiji wɛ myɔkpó ɖɔhun, bɔ goyítɔ́ lɛ́ bǐ kpó mɛ e nɔ wa nǔ nyanya lɛ́ é bǐ kpó ná wá cí nǔywɛ́ ɖɔhun. Azǎn e ja é ná vúnvún yě jɛ́n wɛ,” wɛ Jexóva ahwankpá lɛ́ tɔn ɖɔ, “bɔ é ná jó ɖɔ ɖě, alǒ ala ɖě dó nú yě ǎ. 2 Amɔ̌, mi mɛ e nɔ ɖó sísí* nú nyǐkɔ ce lɛ́ é ɔ, hwesivɔ́ nǔjlɔ́jlɔ́wiwa tɔn ná hun dó mi jí, bɔ gǎ* tɔn lɛ́ ná gbɔ azɔn nú mi, bɔ mi ná nɔ lɔ́n yi jǐ nyibúví e dó jǒ lɛ́ é ɖɔhun.”

3 “Bɔ mi ná gbídí nǔnyanyawatɔ́ lɛ́ ɖó afɔ wú, ɖó yě ná cí afúntúntún ɖɔhun ɖo afɔ mitɔn lɛ́ glɔ́ ɖo azǎn e gbe un ná bló bɔ nǔ énɛ́ ná jɛ é,” wɛ Jexóva ahwankpá lɛ́ tɔn ɖɔ.

4 “Mi flín Sɛ́n mɛsɛntɔ́ ce Mɔyízi tɔn ɔ, gbetakɛ́n lɛ́ kpó hwɛɖiɖɔ sín gbeta lɛ́ kpó, ée un ɖe gbe nú Izlayɛ́li ɔ blěbú ɖo Holɛ́bu ɖɔ é ní se tónú ná é.

5 “Éɖíe! Un ɖo gbeyíɖɔ Elíi sɛ́ dó mi wɛ cóbɔ azǎn Jexóva tɔn e nyí azǎn ɖaxó bo lɛ́ d’abaɖa é ná wá. 6 Bɔ é ná lílɛ́ ayi tɔ́ lɛ́ tɔn wá vǐ lɛ́ jí, bo ná lílɛ́ ayi vǐ lɛ́ tɔn wá tɔ́ lɛ́ jí, bónú un ma wá xo ayǐkúngban ɔ bo sú kún tɔn dó ó.”

(Nǔwlánwlán mímɛ́ ebléegbe kpó alámugbe kpó tɔn lɛ́ wá vivɔnu, bɔ Nǔwlánwlán mímɛ́ glɛ̌kigbe tɔn lɛ́ bɔ d’é wú)