WƐN ÐAGBE MATÍE TƆN

1 Tan* Jezu Klísu,* éé nyí Davídi ví, bo lɛ́ nyí Ablaxámu ví é tɔn sín wěma:

17 Hǔn, jijimɛ lɛ́ bǐ sín kplékplé ɖíe: Bɛ́sín Ablaxámu jí káká wá jɛ Davídi jí bló jijimɛ 14; bɛ́sín Davídi jí káká wá jɛ hwenu e è wlí Jwifu lɛ́ yi Babilɔ́nu é bló jijimɛ 14; bɛ́sín hwenu e è wlí Jwifu lɛ́ yi Babilɔ́nu é káká wá jɛ Klísu jí bló jijimɛ 14.

18 Amɔ̌, lěe è ji Jezu Klísu gbɔn é ɖíe: Hwenu e nɔ tɔn Mali kpo ɖo asixɔ́ntɔn nyí nú Jozɛ́fu wɛ é ɔ, é mɔ xo gbɔn gbigbɔ mímɛ́* sín nǔwiwa gblamɛ, jɛ nukɔn nú alɔwlíwlí yětɔn. 19 É ɖo mɔ̌ có, ɖó asú tɔn Jozɛ́fu nyí nǔjlɔ́jlɔ́watɔ́ bo ma ba ná dó winnyá ɛ ɖo mɛ bǐ nukúnmɛ ǎ wútu ɔ, é lin ná gbɛ́ ɛ ɖo nǔglɔ́. 20 Amɔ̌, ée é lin nǔ énɛ́ lɛ́ gúdo é ɔ, wɛnsagun Jexóva* tɔn xo dlɔ̌ ɛ, bo ɖɔ: “Jozɛ́fu, Davídi ví, xɛsi ní ma ɖi we dó asi towe Mali kpíkplá dó xɔsá wú ó, ɖó xo e é mɔ é ɔ, gbigbɔ mímɛ́ sín nǔwiwa wɛ. 21 É ná ji vǐ súnnu ɖé, bɔ a ná sun nyǐ i ɖɔ Jezu,* ɖó é ná hwlɛ́n togun tɔn sín hwɛ tɔn lɛ́ mɛ.” 22 Nǔ énɛ́ lɛ́ bǐ jɛ bónú xó e Jexóva* ɖɔ gbɔn gbeyíɖɔ tɔn jí é ní dó jɛnu, é ɖɔ: 23 “Éɖíe! Ðyɔ̌vǐ ɖo alɔjí ɔ ná mɔ xo, bo ná ji vǐ súnnu ɖokpó, bɔ yě ná sun nyǐ i ɖɔ Emanuwɛ́li”; tínmɛ tɔn wɛ nyí: “Mawu ɖo kpɔ́ xá mǐ.”

24 Énɛ́ gúdo ɔ, Jozɛ́fu fɔ́n sín amlɔ mɛ, bo wa nǔ e wɛnsagun Jexóva* tɔn ɖɔ n’i é, bo kplá asi tɔn dó xɔsá. 25 Amɔ̌, é ɖóxó xá ɛ káká cóbónú é ji vǐ ɔ ǎ. Gɔ́ ná ɔ, é sun nyǐ vǐ ɔ ɖɔ Jezu.

2 Ée è ji Jezu ɖo Bɛteleyɛ́mu ɖo Judée ɖo axɔ́sú Elódu* hwenu gúdo é ɔ, sunvíkpɔ́ntɔ́* lɛ́ gosín Zǎnzǎnhwe jí bo wá Jeluzalɛ́mu, 2 lobo ɖɔ: “Fítɛ́ axɔ́sú Jwifu lɛ́ tɔn e è ji é ka ɖe? Ðó mǐ mɔ sunví tɔn hwenu e mǐ ɖo Zǎnzǎnhwe jí é, bɔ mǐ wá bo ná ɖe kɔ́* n’i.” 3 Ée axɔ́sú Elódu se mɔ̌ é ɔ, ayi tɔn gba dó, é kpó Jeluzalɛ́mu to ɔ bǐ kpó. 4 É xo vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó bǐ kplé, bo kan fí e è ɖó ná ji Klísu ɔ* ɖe é byɔ́ yě. 5 Yě ɖɔ n’i ɖɔ: “Ðo Bɛteleyɛ́mu ɖo Judée, ɖó nǔ e gbeyíɖɔ ɔ wlán é ɖíe: 6 ‘Hwɛ Bɛteleyɛ́mu e ɖo Judáa yíkúngban jí é, a nyí toxo ɖé ján ɖo tokpɔngán Judáa tɔn lɛ́ nukúnmɛ ǎ. Ðó gɔ̌n towe wɛ gǎn ɖé ná gosín, bo ná nyí lɛ̌ngbɔ́nyitɔ́ nú togun ce Izlayɛ́li.’”

7 Énɛ́ gúdo ɔ, Elódu ylɔ́ sunvíkpɔ́ntɔ́ lɛ́ ɖo nǔglɔ́ bo kan nǔ byɔ́ yě kpó sɔxwixwe kpó dó hwenu e sunví ɔ tɔ́n dó é wú. 8 É sɛ́ yě dó Bɛteleyɛ́mu bo ɖɔ: “Mi yi ba vǐ ɔ kpó sɔxwixwe kpó. Ényí mi mɔ ɛ hǔn, mi lɛ́ kɔ wá ɖó gbe nú mì, bónú nyi lɔ ná yi ɖe kɔ́ n’i.” 9 Ée yě se xó e axɔ́sú ɔ ɖɔ é ɔ, yě wlí ali ɖidó, bɔ sunví e yě mɔ hwenu e yě ɖo Zǎnzǎnhwe jí é nɔ nukɔn nú yě káká bo wá nɔ te ɖo fí e vǐ ɔ ɖe é tanu. 10 Ée yě mɔ sunví ɔ é ɔ, é víví nú yě tawun. 11 Bɔ ée yě byɔ́ xwé ɔ gbe é ɔ, yě mɔ vǐ ɔ kpó nɔ tɔn Mali kpó, bo jɛ kpo, lobo ɖe kɔ́* n’i. Yě lɛ́ hun nǔ e mɛ dɔkun yětɔn lɛ́ ɖe é, bo ná ɛ nǔníná élɔ́ lɛ́: siká, zǎlínkpɔ́n wěwé kpó mǐla* kpó. 12 Amɔ̌, Mawu xo dlɔ̌ yě bo gb’akpá nú yě ɖɔ yě ní ma lɛ́ kɔ yi Elódu gɔ́n ó. Énɛ́ wú ɔ, yě gbɔn ali ɖěvo bo lɛ́ kɔ yi to yětɔn mɛ.

13 Ée yě yi gúdo é ɔ, wɛnsagun Jexóva* tɔn xo dlɔ̌ Jozɛ́fu, bo ɖɔ n’i ɖɔ: “Sí te, bo kplá vǐ ɔ kpó nɔ tɔn kpó, bónú mi hɔn yi Ejípu, bo nɔ fínɛ́ káká jɛ hwenu e un ná ɖɔ nú we ɖɔ mi ní lɛ́ kɔ é, ɖó Elódu ja vǐ ɔ sín gbě nya gbé bo ná hu i.” 14 Énɛ́ ɔ, Jozɛ́fu sí te bo kplá vǐ ɔ kpó nɔ tɔn kpó ɖo zǎn ɔ mɛ, bɔ yě yi Ejípu. 15 É nɔ fínɛ́ káká jɛ hwenu e Elódu kú é. Énɛ́ zɔ́n bɔ xó élɔ́ e Jexóva* ɖɔ gbɔn gbeyíɖɔ tɔn jí é jɛnu: “Un ylɔ́ vǐ ce sín Ejípu.”

16 Énɛ́ gúdo ɔ, ée Elódu mɔ ɖɔ sunvíkpɔ́ntɔ́ lɛ́ blɛ́ émí é ɔ, é jɛ ma bǐ. É kpɔ́n hwenu e sunví ɔ tɔ́n dó bɔ sunvíkpɔ́ntɔ́ lɛ́ ɖɔ céɖécéɖé tɔn n’i é, bo ná gbe ɖɔ è ní hu súnnuví e ko ɖó xwe we lɛ́ é kpó éé ma ko ɖó ǎ lɛ́ é kpó bǐ, ɖo Bɛteleyɛ́mu kpó xá e lɛ́ lɛ̌ dó è lɛ́ é bǐ kpó mɛ. 17 Mɔ̌ mɛ ɔ, xó élɔ́ e Mawu ɖɔ gbɔn gbeyíɖɔ Jelemíi jí é jɛnu: 18 “È se mɛ e ɖo avǐ ya wɛ bo lɛ́ ɖo alě ná wɛ kpó xósúsú ɖaxó kpó é ɖé sín gbe ɖo Hlǎma. Hlacɛ́li wɛ ɖo vǐ tɔn lɛ́ ví wɛ, bo ba ɖɔ è ní dó gbɔ nú émí ǎ, ɖó yě ɖě sɔ́ tíin ǎ.”

19 Ée Elódu kú é ɔ, wɛnsagun Jexóva* tɔn xo dlɔ̌ Jozɛ́fu ɖo Ejípu, 20 bo ɖɔ: “Sí te, kplá vǐ ɔ kpó nɔ tɔn kpó bónú mi yi Izlayɛ́li, ɖó mɛ ɖěɖěe ɖo biba ná hu vǐ ɔ wɛ lɛ́ é ko kú.” 21 Énɛ́ wú ɔ, é sí te bo kplá vǐ ɔ kpó nɔ tɔn kpó, bɔ yě lɛ́ kɔ yi Izlayɛ́li. 22 Amɔ̌, ée é se ɖɔ Akelawúsi wɛ ɖo acɛ kpa dó Judée jí wɛ ɖo tɔ́ tɔn Elódu tɛnmɛ é ɔ, xɛsi ɖi i dó dɔ̌n yiyi wú. Gɔ́ ná ɔ, ɖó Mawu ko xo dlɔ̌ ɛ bo gb’akpá n’i wútu ɔ, é gbɔ bo yi Galilée gbé jí. 23 É wá bo cí toxo e è nɔ ylɔ́ ɖɔ Nazalɛ́ti é mɛ, bónú xó élɔ́ e gbeyíɖɔ lɛ́ ɖɔ é ní dó jɛnu: “È ná ylɔ́ ɛ ɖɔ Nazalɛ́tinu.”*

3 Hwe énɛ́ nu ɔ, Jaan Batɛ́mublónúmɛtɔ́ ɔ wá, bo jlá mawuxó ɖo gbětótló Judée tɔn mɛ. 2 É nɔ ɖɔ: “Hwɛ mitɔn lɛ́ ní vɛ́ nú mi,* ɖó Axɔ́súɖuto jǐxwé tɔn ko sɛkpɔ́.” 3 Nǔgbó ɔ, Jaan énɛ́ xó wɛ gbeyíɖɔ Ezayíi ɖɔ gbɔn xó élɔ́ lɛ́ gblamɛ: “Gbe ɖé ɖo ɖiɖi wɛ sín gbětótló mɛ bo nɔ ɖɔ: ‘Mi bló ali Jexóva* tɔn ɖó! Mi jlɔ́ ali tɔn lɛ́.’” 4 Awu e è sɔ́ lǎkúnmífún dó bló é wɛ Jaan nɔ dó, bo nɔ sin gǒjíblánú e è sɔ́ anyǔ dó bló é dó alin. Bɔkle kpó wǐin akú kpó wɛ é nɔ ɖu. 5 Ðo hwe énɛ́ nu ɔ, mɛ e ɖo Jeluzalɛ́mu kpó Judée kpó lɛ́ é, gɔ́ nú mɛ e ɖo to e lɛ́ lɛ̌ dó Judɛ́ɛn tɔ ɔ lɛ́ é bǐ mɛ lɛ́ é nɔ yi gɔ̌n tɔn, 6 bɔ é nɔ bló batɛ́mu nú yě* ɖo Judɛ́ɛn tɔ ɔ mɛ. Yě nɔ lɛ́ ɖɔ hwɛ yětɔn lɛ́ ɖo agbawungba.

7 Ée é mɔ Falizyɛn lɛ́ kpó Saduseɛn lɛ́ kpó gěgé, bɔ yě wá batɛ́mu bló gbé é ɔ, é ɖɔ nú yě ɖɔ: “Jakpata kúnkan è mi, mɛ̌ ka gb’akpá nú mi ɖɔ mi ní hɔn nú xomɛsin e ja é? 8 Ényí mɔ̌ hǔn, mi ní ná sínsɛ́n e jɛxá hwɛvɛ́númɛ* é. 9 Mi ma jɛ ɖiɖɔ nú miɖée jí ɖɔ: ‘Ablaxámu wɛ nyí tɔ́ mǐtɔn’ ó. Ðó má ɖɔ nú mi, Mawu kpé wú bo ná sɔ́ awǐnnya énɛ́ lɛ́ dó húzú vǐ nú Ablaxámu. 10 Asyɔ́ ko ɖo atín lɛ́ sín ɖɔ wú. Hǔn, atín ɖěbǔ e ma nɔ ná sínsɛ́n ɖagbe ǎ é ɔ, è ná sɛ́n ɛ bo ná sɔ́ nyi myɔ mɛ. 11 Nyɛ ɔ, un sɔ́ sin dó ɖo batɛ́mu bló nú mi wɛ, ɖó hwɛ mitɔn lɛ́ e vɛ́ nú mi é* wú. Amɔ̌, mɛ e jawě ɖo gǔdo ce é ɖó acɛ hú mì. Mɛɖé wɛ bɔ un jɛxá bo ná ɖe afɔkpa tɔn lɛ́ n’i ǎ. Mɛ énɛ́ ná sɔ́ gbigbɔ mímɛ́ kpó myɔ kpó dó bló batɛ́mu nú mi. 12 Pɛ́li tɔn e é nɔ dó fún nǔ ná é ɖo alɔ tɔn mɛ, bɔ é ná za nǔkúnsótɛn tɔn bǐ mlɛ́mlɛ́, lobo ná kplé blěe tɔn lɛ́ dó agɔ̌ mɛ. Amɔ̌, fló lɛ́ ɔ, é ná sɔ́ myɔ e è ma sixú cí ǎ é dó fyɔ́ yě.”

13 Énɛ́ gúdo ɔ, Jezu gosín Galilée bo wá Jaan gɔ́n ɖo Judɛ́ɛn tɔ ɔ nu, bónú é ná bló batɛ́mu n’i. 14 Amɔ̌, Jaan tɛ́n kpɔ́n bo ná gbɛ́ n’i, lobo ɖɔ: “Nyi wɛ ɖó ná wá gɔ̌n towe bɔ a ná bló batɛ́mu nú mì, lobɔ hwɛ ka wá gɔ̌n ce a?” 15 Jezu ka yí gbe n’i ɖɔ: “Vɛ̌ gbɔ ní to nyí mɔ̌ hwɛ̌, ɖó é sɔgbe ɖɔ mǐ ní wa nǔ e nyí nǔ jlɔ́jlɔ́ é bǐ gbɔn mɔ̌.” Énɛ́ ɔ, Jaan yí gbe. 16 Ée Jezu bló batɛ́mu gúdo, bo tɔ́n sín sin ɔ mɛ tlóló é ɔ, jǐnukúnsin hun, bɔ é mɔ gbigbɔ Mawu tɔn ɖo te jɛ wɛ jawě jǐ tɔn ahwannɛ́ ɖɔhun. 17 Lobɔ gbe ɖé ɖi sín jǐxwé bo ɖɔ: “Vǐ súnnu ce vívɛ́ná ɔ ɖíe, xomɛ nɔ hun mì dó wǔtu tɔn.”

4 Énɛ́ gúdo ɔ, gbigbɔ ɔ* kplá Jezu yi gbětótló mɛ, bónú Awǒvi ná tɛ́n ɛ kpɔ́n. 2 Ée é blá nu nú kéze 40 zǎn 40 gúdo é ɔ, xovɛ́ sin i. 3 Bɔ Mɛtɛ́nkpɔ́ntɔ́ ɔ sɛkpɔ́ ɛ bo ɖɔ n’i ɖɔ: “Ényí vǐ Mawu tɔn jɛ́n a nyí hǔn, ɖɔ nú awǐnnya élɔ́ lɛ́ ɖɔ yě ní húzú wɔ̌xúxú.” 4 Amɔ̌, Jezu ɖɔ n’i ɖɔ: “È ko wlán ɖɔ: ‘Nǔɖuɖu kɛ́ɖɛ́ wɛ nɔ hɛn mɛ ɖó gbɛ ǎ, loɔ, xó e nɔ tɔ́n sín Jexóva* nu mɛ é bǐ wɛ nɔ hɛn mɛ ɖó gbɛ.’”

5 Énɛ́ gúdo ɔ, Awǒvi kplá ɛ yi toxo mímɛ́ ɔ mɛ, bo sɔ́ ɛ ɖó tɛ́npli ɔ ta,* 6 lobo ɖɔ n’i ɖɔ: “Ényí vǐ Mawu tɔn jɛ́n a nyí hǔn, lɔ̌n jɛ te, ɖó è ko wlán ɖɔ: ‘É ná ɖe gbe nú wɛnsagun tɔn lɛ́ dó ta towe mɛ,’ lobɔ: ‘Yě ná hɛn we dó alɔ yětɔn lɛ́ mɛ, bónú a ní ma klɛ́n afɔ dó awǐnnya ɖěbǔ wú ó.’” 7 Jezu ɖɔ n’i ɖɔ: “È lɛ́vɔ́ wlán ɖɔ: ‘A ɖó ná tɛ́n Jexóva* Mawu towe kpɔ́n ǎ.’”

8 Awǒvi lɛ́ kplá ɛ yi só ɖaxó e yi jǐ tawun é ɖé jí, bo xlɛ́ ɛ axɔ́súɖuto gbɛ ɔ tɔn lɛ́ bǐ kpó susu yětɔn kpó. 9 Lobo ɖɔ n’i ɖɔ: “Ényí a jɛ kpo bo sɛn mì azɔn ɖokpó kpowun ɔ, un ná ná we nǔ énɛ́ lɛ́ bǐ.” 10 Jezu ka ɖɔ n’i ɖɔ: “Bǔ dó mì, Satáan! Ðó è ko wlán ɖɔ: ‘Jexóva* Mawu towe wɛ a ɖó ná sɛn, lobɔ éɖokpónɔ géé wɛ a ɖó ná wa sinsɛnzɔ́ mímɛ́ ná.’” 11 Énɛ́ gúdo ɔ, Awǒvi jó è dó, bɔ wɛnsagun lɛ́ wá bo jɛ alɔ dó è jí.

12 Din ɔ, ée é se ɖɔ è wlí Jaan é ɔ, é gosín fínɛ́ bo yi Galilée. 13 Gɔ́ ná ɔ, ée é gosín Nazalɛ́ti é ɔ, é wá cí Kafaanawúmu ɖo xu ɔ tó ɖo Zabulɔ́ɔn kpó Nɛfutáli kpó sín xá lɛ́ mɛ, 14 bónú nǔ élɔ́ e gbeyíɖɔ Ezayíi ɖɔ é ná dó jɛnu: 15 “Galilée akɔta lɛ́ tɔn, Zabulɔ́ɔn to kpó Nɛfutáli to kpó, éé ɖo xu sín ali ɔ jí ɖo Judɛ́ɛn tɔ ɔ sín gbadahwe jí lɛ́ mi! 16 Togun e jínjɔ́n ablu mɛ é mɔ wěziza ɖaxó ɖé, bɔ mɛ ɖěɖěe jínjɔ́n xá e mɛ yɛtɛn kú tɔn cyɔ́n lɛ́ é ɔ, wěziza hɔ́n dó yě jí.” 17 Bɛ́sín hwenɛ́nu ɔ, Jezu jɛ mawuxó jlá jí bo nɔ ɖɔ: “Hwɛ mitɔn lɛ́ ní vɛ́ nú mi,* ɖó Axɔ́súɖuto jǐxwé tɔn ko sɛkpɔ́.”

18 Ée é ɖo zɔnlin ɖi gbɔn Galilée xu ɔ tó wɛ é ɔ, é mɔ nɔví nɔví we, Sinmɔ́ɔ, ée è nɔ ylɔ́ ɖɔ Piyɛ́ɛ é, kpó nɔví tɔn Andlé kpó, bɔ yě ɖo ɖɔ nyi dó xu ɔ mɛ wɛ, ɖó hwehutɔ́ wɛ nú yě. 19 É ɖɔ nú yě ɖɔ: “Mi xwedó mì, un ná bló bɔ mi ná nɔ wlí gbɛtɔ́ lɛ́ hweví wlí wɛ mi ɖe ɖɔhun.” 20 Tlóló ɔ, yě jó ɖɔ yětɔn lɛ́ dó bo xwedó è. 21 Ée é gosín fínɛ́ bo ɖidó é ɔ, é mɔ nɔví nɔví we ɖěvo, Jaki Zebeɖée ví ɔ kpó nɔví tɔn Jaan kpó. Tɔjíhún mɛ wɛ yě ɖe kpó tɔ́ yětɔn kpó, bo ɖo ɖɔ yětɔn lɛ́ blóɖó wɛ, bɔ é ylɔ́ yě. 22 Tlóló ɔ, yě jó tɔjíhún ɔ kpó tɔ́ yětɔn kpó dó bo xwedó è.

23 Énɛ́ gúdo ɔ, é yi gbɔn Galilée gbé ɔ bǐ jí, bo nɔ ɖo nǔ kplɔ́n mɛ wɛ ɖo kplɔ́ngbasá lɛ́, nɔ jlá wɛn ɖagbe Axɔ́súɖuto ɔ tɔn, lobo nɔ ɖo azɔn tɛnmɛ tɛnmɛ bǐ kpó wɔ̌nzɔn tɛnmɛ tɛnmɛ bǐ kpó gbɔ wɛ ɖo togun ɔ tɛ́ntin. 24 È se xó tɔn gbɔn Silíi gbé ɔ bǐ jí, bɔ mɛ lɛ́ kplá mɛ e ɖo azɔn tɛnmɛ tɛnmɛ jɛ wɛ, bo ɖo wǔvɛ́ tɛnmɛ tɛnmɛ se wɛ lɛ́ é bǐ wá gɔ̌n tɔn, lobo lɛ́ kplá mɛ e jí awǒvi lɛ́ ɖe lɛ́ é, mɛ e nɔ kú adǐngbe lɛ́ é kpó mɛ e xwe ayǐsó lɛ́ é kpó wá gɔ̌n tɔn, bɔ é gbɔ azɔn nú yě. 25 Énɛ́ ɔ, ahwan ɖaxó ɖé gosín Galilée, Dekapɔ́lu,* Jeluzalɛ́mu, Judée kpó Judɛ́ɛn tɔ ɔ sín akpá ɖě ɔ xwé kpó bo xwedó è.

5 Ée é mɔ ahwan ɔ é ɔ, é xá só jí; bɔ ée é jínjɔ́n ayǐ gúdo é ɔ, ahwanvú tɔn lɛ́ wá gɔ̌n tɔn. 2 Énɛ́ gúdo ɔ, é jɛ nǔ kplɔ́n yě jí, bo ɖɔ:

3 “Awǎjijɛnɔ wɛ nyí mɛ e tuun ɖɔ émí ɖó hudó Mawu tɔn lɛ́ é,* ɖó yětɔn wɛ nyí Axɔ́súɖuto jǐxwé tɔn.

4 “Awǎjijɛnɔ wɛ nyí mɛ e ɖo aluwɛ mɛ lɛ́ é, ɖó è ná dó gbɔ nú yě.

5 “Awǎjijɛnɔ wɛ nyí xomɛfátɔ́* lɛ́, ɖó yě ná ɖu gǔ ayǐkúngban ɔ tɔn.

6 “Awǎjijɛnɔ wɛ nyí mɛ e nǔjlɔ́jlɔ́wiwa sín xovɛ́ nɔ sin, bɔ kɔ tɔn nɔ lɛ́vɔ́ xú lɛ́ é, ɖó è ná sú do tɔn nú yě bǐ mlɛ́mlɛ́.

7 “Awǎjijɛnɔ wɛ nyí nǔbláwǔkúnúmɛtɔ́ lɛ́, ɖó è ná kú nǔbláwǔ nú yě.

8 “Awǎjijɛnɔ wɛ nyí mɛ e mɛ́ ɖo ayi mɛ lɛ́ é, ɖó yě ná mɔ Mawu.

9 “Awǎjijɛnɔ wɛ nyí fífákanxotɔ́* lɛ́, ɖó è ná ylɔ́ yě ɖɔ vǐ* Mawu tɔn.

10 “Awǎjijɛnɔ wɛ nyí mɛ e è dó ya ná ɖó nǔjlɔ́jlɔ́wiwa wú lɛ́ é, ɖó yětɔn wɛ nyí Axɔ́súɖuto jǐxwé tɔn.

11 “Awǎjijɛnɔ wɛ mi nyí hwenu e gbɛtɔ́ lɛ́ ɖo mi zun wɛ, bo ɖo ya dó nú mi wɛ, lobo ɖo adingban baɖabaɖa tɛnmɛ tɛnmɛ bǐ ɖó dó mi nu wɛ, ɖó nyɛ wú é. 12 Mi j’awǎ bónú awǎjijɛ mitɔn ní túnflá, ɖó ajɔ mitɔn d’agba ɖo jǐxwé, ɖó mɔ̌ wɛ è ko dó ya nú gbeyíɖɔ e jɛ nukɔn nú mi lɛ́ é gbɔn.

13 “Jɛ wɛ mi nyí nú gbɛ ɔ, amɔ̌, ényí jɛ ma sɔ́ ɖó tɔ́n ǎ ɔ, nɛ̌ è ka ná bló gbɔn bɔ é ná lɛ́ ɖó tɔ́n? É sɔ́ nyɔ́ nú nǔɖé zɛ è ná sɔ́ kɔn nyi gbě, bo ná sɔ́ afɔ dó gbídí ná wú ǎ.

14 “Wěziza wɛ mi nyí nú gbɛ ɔ. Ényí toxo ɖé ɖo só jí ɔ, é sixú nɔ hwlǎhwlá ǎ. 15 È nɔ tá zogbɛ́n bo nɔ sɔ́ ɖó xasun* glɔ́ ǎ, loɔ, zogbɛ́nhɛnnú jí wɛ è nɔ sɔ́ ɖó, bɔ é nɔ tá wěziza dó mɛ e ɖo xwé ɔ gbe lɛ́ é bǐ jí. 16 Mɔ̌ ɖokpó ɔ, mi nú wěziza mitɔn ní hɔ́n ɖo gbɛtɔ́ lɛ́ nukɔn, bónú yě ní dó sixú mɔ azɔ̌ ɖagbe mitɔn lɛ́, lobo kpa susu nú Tɔ́ mitɔn e ɖo jǐxwé é.

17 “Mi ma lin ɖɔ un wá bo ná sú kún dó nú Sɛ́n ɔ alǒ nǔwlánwlán gbeyíɖɔ lɛ́ tɔn wɛ ó. Un tɔ́n kún sú dó nú yě gbé ǎ, loɔ, un wá bo ná bló bɔ yě ná jɛnu wɛ. 18 Nǔgbó ɔ, má ɖɔ nú mi, ényí jǐnukúnsin kpó ayǐkúngban kpó ná bo tlɛ wá yi ɔ, wěkwín e hwe hú bǐ é ɖokpó alǒ akpáxwé kpɛví wěkwín ɖé tɔn ná wá yi sín Sɛ́n ɔ mɛ, cóbónú nǔ énɛ́ lɛ́ bǐ ná jɛnu ǎ. 19 Énɛ́ wú ɔ, mɛ ɖěbǔ e ma se tónú nú sɛ́n ɖokpó ɖo sɛ́n énɛ́ lɛ́ e hwe hú bǐ é mɛ ǎ, bo nɔ lɛ́ kplɔ́n mɛ ɖěvo lɛ́ ɖɔ yě ní wa nǔ ɖokpó ɔ é ɔ, mɛ e hwe hú bǐ é wɛ è ná ylɔ́ ɛ ɖɔ, nú nǔ e kan Axɔ́súɖuto jǐxwé tɔn é. Amɔ̌, mɛ ɖěbǔ e nɔ bló ɖó sɛ́n énɛ́ lɛ́ jí, bo nɔ lɛ́ kplɔ́n sɛ́n énɛ́ lɛ́ mɛ ɖěvo lɛ́ é ɔ, è ná ylɔ́ ɛ ɖɔ mɛ ɖaxó, nú nǔ e kan Axɔ́súɖuto jǐxwé tɔn é. 20 Ðó má ɖɔ nú mi, ényí nǔjlɔ́jlɔ́wiwa mitɔn ma zɛ sɛ́nkplɔ́nmɛtɔ́ lɛ́ kpó Falizyɛn lɛ́ kpó tɔn wú ǎ ɔ, mi ná byɔ́ Axɔ́súɖuto jǐxwé tɔn mɛ ɖo ali ɖěbǔ nu ǎ.

21 “Mi se ɖɔ è ɖɔ nú tɔ́gbó mitɔn lɛ́ ɖɔ: ‘A ɖó ná hu mɛ ǎ. Ényí mɛ ɖěbǔ hu mɛ ɔ, è ná dɔn ɛ yi hwɛ nukɔn.’ 22 Amɔ̌, má ɖɔ nú mi, mɛ ɖěbǔ e fɔ́n bo ɖo xomɛ sin dó nɔví tɔn wɛ é ɔ, è ná dɔn ɛ yi hwɛ nukɔn. Gɔ́ ná ɔ, mɛ ɖěbǔ e zán xógbe mɛzunzun tɔn e nɔ ɖe mɛ kpo lɛ́ é dó nɔví tɔn wú é ɔ, è ná dɔn ɛ yi hwɛ nukɔn ɖo Hwɛɖɔxɔsá ɖaxó ɔ. Mɛ ɖěbǔ e ka ɖɔ: ‘Hwɛ, taɖunɔ nǔvɔ́nɔ!’ é ɔ, é ná jɛxá Jeyɛ́nu* myɔnɔ ɔ.

23 “Énɛ́ wú ɔ, ényí a sɔ́ nǔníná towe xwe vɔ̌sákpe ɔ kɔn, bɔ ɖo fínɛ́ ɔ, a flín ɖɔ nɔví towe ɖo xomɛ sin dó we wɛ hǔn, 24 jǒ nǔníná towe dó fínɛ́ ɖo vɔ̌sákpe ɔ nukɔn, bo to yi dó hwɛ gbɔ xá nɔví towe hwɛ̌. Énɛ́ gúdo hǔn, lɛ̌ kɔ bo wá xwlé nǔníná towe Mawu.

25 “Yǎ wǔ ɖe ɖɛ tagba lɛ́ xá mɛ e kpó hwi kpó kpé nǔ ɖo sɛ́n lixo é, hwenu e hwi kpó é kpó ná ɖo ali jí xwe hwɛɖɔxɔsá é, bónú mɛ e kpó hwi kpó kpé nǔ é ní ma wá sɔ́ we dó alɔ mɛ nú hwɛɖɔtɔ́, bónú hwɛɖɔtɔ́ ɔ ní sɔ́ we dó alɔ mɛ nú gantɔ́cɔ́tɔ́, lobonú è ní sɔ́ we dó gankpá mɛ ó. 26 Má ɖɔ nǔgbó nú we, é ɖo wɛn ɖɔ ényí a ma sú axɔ́ e a ɖu é káká yi jɛ gankwɛ́ kpɛví* e gbɔn tó é jí ǎ ɔ, a ɖo fínɛ́ ná tɔ́n sín wɛ ǎ.

27 “Mi se ɖɔ è ɖɔ: ‘A ɖó ná dó afɔ gbě alǒ ba nyɔ̌nu ɖěvo ǎ.’ 28 Amɔ̌, má ɖɔ nú mi, mɛ ɖěbǔ e bɔ nukún nyi nyɔ̌nu ɖé wú, bo ɖo kpínkpɔ́n ɛ wɛ káká bo ɖó jlǒ bo ná ɖóxó xá ɛ é ko ba ɛ ɖo ayi mɛ. 29 Din ɔ, ényí nukún towe ɖisí ɔ ɖo afɔklɛ́nnú nyí nú we wɛ hǔn, ɖe síin bo sɔ́ nyi gbě. Ðó é ná kpɔ́n te nú we ɖɔ a ní ba wǔjɔnú towe lɛ́ ɖokpó kpo hú ɖɔ è ní sɔ́ agbaza towe blěbú nyi dó Jeyɛ́nu* mɛ. 30 Gɔ́ ná ɔ, ényí alɔ towe ɖisí ɔ ɖo afɔklɛ́nnú nyí nú we wɛ hǔn, sɛ́n síin bo sɔ́ nyi gbě. Ðó é ná kpɔ́n te nú we ɖɔ a ní ba wǔjɔnú towe lɛ́ ɖokpó kpo hú ɖɔ agbaza towe blěbú ní yi Jeyɛ́nu* mɛ.

31 “Gɔ́ ná ɔ, è ko ɖɔ: ‘Mɛ ɖěbǔ e gbɛ́ asi tɔn é ní sɔ́ mɛgbígbɛ́wéma d’así n’i.’ 32 É ɖo mɔ̌ có, má ɖɔ nú mi, ényí mɛ ɖěbǔ gbɛ́ asi tɔn, nú é ma nyí ɖó agalilɛ* wútu ǎ ɔ, sɔ́ wɛ é sɔ́ ɛ ɖó ninɔmɛ e mɛ é sixú dó afɔ gbě ɖe é mɛ, lobɔ mɛ ɖěbǔ e ná da nyɔ̌nu e asú tɔn gbɛ́ gbɔn mɔ̌ é ɔ, mɛsi wɛ é ba.

33 “Mi ka lɛ́ se ɖɔ è ɖɔ nú tɔ́gbó mitɔn lɛ́ ɖɔ: ‘A ɖó ná xwlé nǔ bo ná gɔn blǒbló ɖ’é jí ǎ, é nyɔ́ wa ɔ, a ɖó ná ɖe akpá e a dó nú Jexóva* lɛ́ é.’ 34 É ɖo mɔ̌ có, má ɖɔ nú mi: Mi ma xwlé nǔ ɖěbǔ ó, mi ma xwlé jǐxwé ó, ɖó axɔ́súzinkpo Mawu tɔn wɛ; 35 mi ma ka xwlé ayǐkúngban ó, ɖó afɔɖótɛn tɔn wɛ; mi ma ka lɛ́ xwlé Jeluzalɛ́mu ó, ɖó toxo Axɔ́sú ɖaxó ɔ tɔn wɛ. 36 Mi ma xwlé ta mitɔn ó, ɖó mi sixú bló bɔ ɖa ɖokpó ná wé alǒ wi ǎ. 37 É nyɔ́ wa ɔ, ‘ɛɛn’ mitɔn ní nyí ɛɛn, bónú ‘éǒ’ mitɔn ní nyí éǒ, ɖó nǔ e nɔ gɔ́ nú énɛ́ lɛ́ é ɔ, mɛ nyanya ɔ gɔ́n wɛ é nɔ gosín.

38 “Mi se ɖɔ è ɖɔ: ‘Ényí mɛɖé tɔ́n nukún mɛ ɔ, è ɖó ná tɔ́n nukún i, bɔ ényí mɛɖé sún aɖǔ mɛ ɔ, è ɖó ná sún aɖǔ é lɔmɔ̌.’ 39 É ɖo mɔ̌ có, má ɖɔ nú mi: Mi ma húzú kpan nukɔn mɛ e nyí mɛ nyanya é ó, é nyɔ́ wa ɔ, mɛ ɖěbǔ xo tómɛ nú we dó klɛ̌n towe ɖisíxwé tɔn jí hǔn, lǐlɛ́ amyɔxwé tɔn ɔ lɔ n’i. 40 Ényí mɛɖé jló ná dɔn we yi hwɛ nukɔn bo ná yí awu towe do tɔn ɔ hǔn, jǒ awu towe aga tɔn ɔ lɔ dó n’i. 41 Ényí mɛ e ɖo tɛn acɛkpikpa tɔn mɛ é ɖé zín jǐ towe ɖɔ hwi ní hɛn agban ɖé yi jɛ kilomɛ́tlu* ɖokpó hǔn, hɛn yi jɛ kilomɛ́tlu we. 42 Nǎ nǔ mɛ e byɔ́ nǔ we é, bo ma ɖe kɔ dó mɛ e jló ná nya akwɛ́* ɖo así towe é ó.

43 “Mi se ɖɔ è ɖɔ: ‘A ɖó ná yí wǎn nú nɔzo towe, bo gbɛ́ wǎn nú kɛntɔ́ towe.’ 44 É ɖo mɔ̌ có, má ɖɔ nú mi: Mi ní nɔ yí wǎn nú kɛntɔ́ mitɔn lɛ́, bo nɔ lɛ́ xo ɖɛ dó mɛ e ɖo ya dó nú mi wɛ lɛ́ é tamɛ. 45 Énɛ́ ɔ, mi ná ɖe xlɛ́ ɖɔ mi nyí Tɔ́ mitɔn e ɖo jǐxwé é sín vǐ* nǔgbó. Ðó é nɔ bló bɔ hwesivɔ́ tɔn nɔ hun dó mɛ nyanya kpó mɛ ɖagbe kpó bǐ jí, bo nɔ bló bɔ jǐ nɔ ja dó nǔjlɔ́jlɔ́watɔ́ kpó nǔagɔwatɔ́ kpó bǐ jí. 46 Ðó ényí mɛ e yí wǎn nú mi lɛ́ é wɛ mi nɔ yí wǎn ná ɔ, le tɛ́ ka ɖ’é mɛ nú mi? Tokwɛ́yítɔ́ lɛ́ lɔ nɔ wa nǔ ɖokpó ɔ ǎ cé? 47 Bɔ ényí nɔví mitɔn lɛ́ kɛ́ɖɛ́ jɛ́n mi nɔ dó gbe ɔ, nǔ bǔnɔ tɛ́ wa wɛ mǐ ka ɖe? Mɛ e ma nyí Jwifu ǎ lɛ́ é lɔ nɔ wa nǔ ɖokpó ɔ ǎ cé? 48 Énɛ́ wú ɔ, mi ɖó ná nyí mɛ maɖóblɔ̌,* lěe Tɔ́ mitɔn jǐxwé tɔn ɔ nyí mɛ maɖóblɔ̌ gbɔn é.

6 “Mi cɔ́ miɖée bo ma nɔ wa nǔ jlɔ́jlɔ́ ɖo gbɛtɔ́ lɛ́ nukɔn, bónú yě ná mɔ tɛn dó ɖ’ayi mi wú ó; é ma nyí mɔ̌ ǎ ɔ, Tɔ́ mitɔn e ɖo jǐxwé é ná d’ajɔ ɖě mi ǎ. 2 Énɛ́ wú ɔ, ényí mi ná nǔ wamamɔnɔ lɛ́* hǔn, mi ma nɔ jɛ kpɛn kún jí lěe yɛmɛnúwatɔ́ lɛ́ nɔ bló gbɔn ɖo kplɔ́ngbasá lɛ́ kpó ali lɛ́ jí kpó, bónú gbɛtɔ́ lɛ́ ná dó kpa susu nú yě é ó. Má ɖɔ nǔgbó nú mi, yě ko mɔ ajɔ yětɔn yí bǐ mlɛ́mlɛ́. 3 Amɔ̌ hwɛ ɔ, ényí a ɖo nǔ ná wamamɔnɔ lɛ́ wɛ hǔn, ma nú alɔ towe amyɔ ɔ tuun nǔ e wa wɛ alɔ towe ɖisí ɔ ɖe é ó, 4 bónú nǔ e a ná wamamɔnɔ é ní dó sixú nɔ nǔglɔ́. Énɛ́ ɔ, Tɔ́ towe e nɔ mɔ nǔ jɛ nǔglɔ́ é ná sú axɔ́ tɔn we.

5 “Gɔ́ ná ɔ, ényí mi ɖo ɖɛ xo wɛ hǔn, mi ma nɔ wa nǔ yɛmɛnúwatɔ́ lɛ́ ɖɔhun ó, ɖó yě nɔ ba ná nɔ te ɖo kplɔ́ngbasá lɛ́ kpó alikpléhɔ̌nkantɛn* lɛ́ kpó hwenu e yě ɖo ɖɛ xo wɛ é, bónú gbɛtɔ́ lɛ́ ní dó mɔ yě. Má ɖɔ nǔgbó nú mi, yě ko mɔ ajɔ yětɔn yí bǐ mlɛ́mlɛ́. 6 Amɔ̌ hwɛ ɔ, a ja ɖɛ xo gbé hǔn, byɔ̌ xɔ towe mɛ, bɔ ényí a sú hɔn towe gúdo hǔn, xo ɖɛ sɛ́dó Tɔ́ towe e mɛ ɖěbǔ ma sixú mɔ ǎ é.* Énɛ́ ɔ, Tɔ́ towe e nɔ mɔ nǔ jɛ nǔglɔ́ é ná sú axɔ́ tɔn we. 7 Ényí mi ɖo ɖɛ xo wɛ hǔn, mi ma nɔ ɖo nǔ ɖokpó ɔ vɔ́ ɖɔ wɛ gbɛmɛ, lěe mɛ e ɖo akɔta ɖě lɛ́ mɛ lɛ́ é nɔ wa gbɔn é ó, ɖó yě nɔ lin ɖɔ xó gěgé ɖiɖɔ ná zɔ́n bɔ Mawu ná ɖótó émí. 8 Hǔn, mi bo ma cí yě ɖɔhun ó, ɖó Tɔ́ mitɔn tlɛ ko tuun nǔ e hudó mi é cóbɔ mi byɔ́ ɛ.

9 “Énɛ́ wú ɔ, lěe mi ɖó ná nɔ xo ɖɛ gbɔn é ɖíe:

“‘Tɔ́ mǐtɔn e ɖo jǐxwé é, nyǐkɔ towe ní nyí nǔ mímɛ́.* 10 Axɔ́súɖuto towe ní wá. Jlǒ towe ní nyí wiwa ɖo ayǐkúngban ɔ lɔmɔ̌ jí, lěe é nɔ nyí wiwa ɖo jǐxwé gbɔn é ɖɔhun.* 11 Nǎ mǐ nǔɖuɖu e sín hudó mǐ ɖó égbé é. 12 Sɔ́ hwɛxɔ́ mǐtɔn lɛ́ kɛ mǐ, lěe mǐ lɔ ko sɔ́ kɛ mɛ e ɖu hwɛxɔ́ dó mǐ lɛ́ é gbɔn é. 13 Ma lɔn nú mǐ ní jɛ* tɛ́nkpɔ́n mɛ ó, loɔ, hwlɛ̌n mǐ ɖo mɛ nyanya ɔ sí.’

14 “Ðó ényí mi sɔ́ nǔwanyido gbɛtɔ́ lɛ́ tɔn lɛ́ kɛ yě ɔ, Tɔ́ mitɔn e ɖo jǐxwé é lɔ ná sɔ́ hwɛ kɛ mi; 15 ényí mi ma ka sɔ́ nǔwanyido gbɛtɔ́ lɛ́ tɔn lɛ́ kɛ yě ǎ ɔ, Tɔ́ mitɔn lɔ ná sɔ́ nǔwanyido mitɔn lɛ́ kɛ mi ǎ.

16 “Ényí mi ɖo nu blá wɛ hǔn, mi ma nɔ blá wǔ yɛmɛnúwatɔ́ lɛ́ ɖɔhun ó, ɖó yědɛɛ lɛ́ nɔ lébe nú nukúnmɛ yětɔn lɛ́ ǎ,* bónú gbɛtɔ́ lɛ́ ná dó sixú mɔ ɖɔ yě ɖo nu blá wɛ. Má ɖɔ nǔgbó nú mi, yě ko mɔ ajɔ yětɔn yí bǐ mlɛ́mlɛ́. 17 Amɔ̌ hwɛ ɔ, ényí a ɖo nu blá wɛ hǔn, sá ami dó ta lobo fún nukúnmɛ, 18 bónú gbɛtɔ́ lɛ́ ní ma mɔ ɖɔ a ɖo nu blá wɛ ó, loɔ, é ní nyí Tɔ́ towe e mɛɖé ma sixú mɔ ǎ é* kɛ́ɖɛ́. Énɛ́ ɔ, Tɔ́ towe e nɔ mɔ nǔ jɛ nǔglɔ́ é ná sú axɔ́ tɔn we.

19 “Mi ma sɔ́ nɔ kplé dɔkun ɖ’ayǐ nú miɖée ɖo ayǐkúngban jí, fí e avɔɖwivɔɖwi kpó ko kpó nɔ hɛn nǔ gblé, bɔ ajotɔ́ lɛ́ nɔ fin nǔ ɖe é ɖě ó. 20 É nyɔ́ wa ɔ, mi ní nɔ kplé dɔkun ɖ’ayǐ nú miɖée ɖó jǐxwé, fí e avɔɖwivɔɖwi kpó ko kpó ɖě ma nɔ hɛn nǔ gblé ɖe, bɔ ajotɔ́ lɛ́ ma sixú yi lobo fin nǔ ǎ é. 21 Ðó fí e dɔkun towe ɖe é ɔ, fínɛ́ wɛ ayi towe lɔmɔ̌ ná nɔ.

22 “Nukún wɛ nyí zogbɛ́n agbaza tɔn. Hǔn, ényí nukún towe lɛ́ ɖo nǔ ɖokpó jí* ɔ, agbaza towe blěbú ná nɔ wěziza nu.* 23 Amɔ̌, ényí nukún towe lɛ́ nɔ xwlé axi* ɔ, agbaza towe blěbú ná dó ablu. Ényí wěziza e ɖo hwɛ mɛ é ka wá dó ablu nǔgbó hǔn, ablu énɛ́ ná gɔ́ngɔ́n tawun.

24 “Mɛ ɖěbǔ sixú nyí kannumɔ nú gǎn we ǎ; ɖó é ná gbɛ́ wǎn nú mɛ ɖě, bo ná yí wǎn nú mɛ ɖě ɔ, alǒ é ná tɛ́ dó mɛ ɖě wú, bo ka ná ké ya nú mɛ ɖě ɔ ǎ. Mi sixú nyí kannumɔ nú Mawu, bo lɛ́ nyí nú dɔkun ǎ.

25 “Énɛ́ wú ɔ, má ɖɔ nú mi: Ado ní ma sɔ́ nɔ hu mi dó gbɛ* mitɔn wú, nú nǔ e kan nǔ e mi ná ɖu, alǒ nǔ e mi ná nu é ɖě ó, abǐ dó agbaza mitɔn wú, nú nǔ e kan nǔ e mi ná dó é ɖě ó. Gbɛ* ma xɔ akwɛ́ hú nǔɖuɖu, bɔ agbaza lɔ ma xɔ akwɛ́ hú nǔzínzán ǎ cé? 26 Mi kpɔ́n xɛ lɛ́ ganjí; yě nɔ dó nǔkún alǒ ya nǔkún abǐ kplé nǔkún dó agɔ̌ mɛ ǎ, có Tɔ́ mitɔn jǐxwé tɔn ɔ nɔ ná nǔɖuɖu yě. Mi ma xɔ akwɛ́ hú yě ǎ cé? 27 Mɛ̌ ka ɖo mi mɛ bɔ é ná sín adohu adohu tɔn wú, bɔ é ná kpé wú bo dó awabá* ɖokpó hwenu e é ná nɔ gbɛ ná é jí? 28 Gɔ́ ná ɔ, étɛ́wú ado ka nɔ hu mi dó nǔ e mi ná dó é wú? Lěe folówa e ɖo gle mɛ lɛ́ é nɔ su gbɔn é ní kplɔ́n nǔ mi; yě nɔ xo kan ɖě ǎ, yě ka nɔ lɔn avɔ ǎ; 29 amɔ̌, má ɖɔ nú mi, Salomɔ́ɔ ɖó susu tawun có, é sɔ́ nǔ ɖokpó yětɔn ɖɔhun ǎ. 30 Ényí mɔ̌ wɛ Mawu nɔ sɔ́ nǔ nú gběhan e ɖo gle mɛ égbé, bɔ sɔ ɔ, è ná bɛ́ nyi myɔ mɛ lɛ́ é gbɔn ɔ, é ná ná nǔzínzán midɛɛ lɛ́ hú mɔ̌ ǎ cé, nǔɖiɖi kpɛvínɔ è mi? 31 Hǔn, ado ní ma hu mi gbeɖé bónú mi ɖɔ: ‘Étɛ́ mǐ ka ná ɖu?’ alǒ: ‘Étɛ́ mǐ ka ná nu?’ abǐ: ‘Étɛ́ mǐ ka ná dó?’ ó. 32 Ðó nǔ énɛ́ lɛ́ bǐ ɔ, nǔ e gúdo mɛ e ɖo akɔta ɖě lɛ́ mɛ lɛ́ é* nɔ ɖo wezun kán ɖe wɛ nukún myámyá lɛ́ é wɛ. Tɔ́ mitɔn jǐxwé tɔn ɔ tuun ɖɔ mi ɖó nǔ énɛ́ lɛ́ bǐ sín hudó.

33 “Énɛ́ wú ɔ, Axɔ́súɖuto ɔ kpó nǔjlɔ́jlɔ́wiwa Mawu tɔn kpó ní nɔ myá nukún nú mi jɛ nukɔn, énɛ́ ɔ, è ná gɔ́ nǔ ɖě lɛ́ bǐ nú mi. 34 Ado ní bo ma hu mi gbeɖé dó sɔ e ja é wú ó, ɖó sɔ e ja é ná ɖó adohu adohu éɖésúnɔ tɔn lɛ́. Azǎn ɖokpó ɖokpó wɛ ɖó tagba éɖésúnɔ tɔn lɛ́.

7 “Mi ma sɔ́ nɔ ɖɔ hwɛ xá mɛ ɖě ó, énɛ́ ɔ, è ná ɖɔ hwɛ xá mi lɔ ǎ; 2 ɖó lěe mi nɔ ɖɔ hwɛ xá mɛ gbɔn é wɛ è ná ɖɔ hwɛ xá mi lɔ gbɔn, bɔ nǔjlɛ́nú e mi nɔ dó jlɛ́ nǔ nú mɛ é wɛ è ná dó jlɛ́ nǔ nú mi lɔ. 3 Bɔ étɛ́wú a ka ɖo nǔywɛ́ e ɖo nukún nɔví towe tɔn jí é kpɔ́n wɛ, bo ma ka ɖó ayi atínkpo e ɖo nukún hwiɖésúnɔ tɔn jí é wú ǎ? 4 Alǒ, nɛ̌ atínkpo ka ná ɖo nukún hwiɖésúnɔ tɔn jí, bɔ a ka ná ɖɔ nú nɔví towe ɖɔ: ‘Gbɔ nú má ɖe nǔywɛ́ sín nukún towe jí’ gbɔn? 5 Yɛmɛnúwatɔ́! To ɖe atínkpo e ɖo nukún hwiɖésúnɔ tɔn jí é síin hwɛ̌, énɛ́ ɔ, a ná mɔ lěe a ná ɖe nǔywɛ́ e ɖo nukún nɔví towe tɔn jí é síin gbɔn é céɖécéɖé.

6 “Mi ma sɔ́ nǔ e nyí nǔ mímɛ́ lɛ́ é nú cukú lɛ́ ó, mi ma ka nyi jɛ̌ xɔ akwɛ́ mitɔn lɛ́ dó nukɔn nú aglǔza lɛ́ ó. É ma nyí mɔ̌ ǎ ɔ, yě sixú sɔ́ afɔ dó gbídí ná, bo ná lɛ́ kɔ wá tlɛ́n mi ɖu.

7 “Mi ní nɔ ɖo byɔ̌byɔ́ wɛ, énɛ́ ɔ, è ná ná mi; mi ní nɔ ɖo biba wɛ, énɛ́ ɔ, mi ná mɔ; mi ní nɔ ɖo hɔn xúxú wɛ, énɛ́ ɔ, è ná hun nú mi; 8 ɖó mɛ ɖěbǔ e ɖo byɔ̌byɔ́ wɛ é ná mɔ yí, bɔ mɛ ɖěbǔ e ɖo biba wɛ é ná mɔ, lobɔ mɛ ɖěbǔ e ɖo hɔn xúxú wɛ é ɔ, è ná hun n’i. 9 Nǔgbó ɔ, mɛ̌ ka ɖo mi mɛ, bɔ ényí vǐ tɔn byɔ́ ɛ wɔ̌xúxú ɔ, é ná ná ɛ awǐnnya? 10 Alǒ, ényí é byɔ́ ɛ hweví ɔ, é ná ná ɛ dan? 11 Énɛ́ wú ɔ, ényí midɛɛ lɛ́ mɛ e nyí hwɛhutɔ́ lɛ́ é tuun lěe mi ná ná nǔ ɖagbe lɛ́ vǐ mitɔn lɛ́ gbɔn é ɔ, Tɔ́ mitɔn e ɖo jǐxwé é tɔn zun kwínkwín má kwín! É ɖo wɛn ɖɔ é ná ná nǔ ɖagbe lɛ́ mɛ e nɔ ɖo byɔ̌byɔ́ ɛ wɛ lɛ́ é.

12 “Énɛ́ wútu ɔ, nǔ ɖěbǔ e mi ba ɖɔ gbɛtɔ́ lɛ́ ní wa nú mi é ɔ, mi lɔ ɖó ná wa nú yě lɔ. Nǔgbó ɔ, nǔ e ɖɔ wɛ Sɛ́n ɔ kpó nǔwlánwlán gbeyíɖɔ lɛ́ tɔn lɛ́ kpó ɖe ɔ nɛ́.

13 “Mi gbɔn hɔntogbó kpɛví ɔ nu, ɖó hɔntogbó e nu è nɔ gbɔn bo nɔ yi dɔn ɔ d’agba, bɔ ali e è nɔ gbɔn yi é gbló, lobɔ mɛ gěgé wɛ ɖo gbingbɔn nu wɛ; 14 amɔ̌, hɔntogbó e nu è nɔ gbɔn bo nɔ yi gbɛ mɛ ɔ hwe, bɔ ali e è nɔ gbɔn yi é sóbwé, lobɔ mɛ kpɛɖé jɛ́n ɖo mimɔ wɛ.

15 “Mi cɔ́ miɖée dó gbeyíɖɔ adingbannɔ e nɔ wá mi gɔ́n bo nɔ ɖɔ ɖɔ émí nyí lɛ̌ngbɔ́ lɛ́ é wú. Hla e jló ná tlɛ́n mi ɖu lɛ́ é wɛ yě nyí. 16 Sínsɛ́n yětɔn lɛ́ wɛ ná zɔ́n bɔ mi ná tuun yě. È nɔ gbɛ vǐwun alǒ fígi ɖo wunkan mɛ ǎ, kabǐ? 17 Mɔ̌ ɖokpó ɔ, atín ɖagbe bǐ wɛ nɔ ná sínsɛ́n ɖagbe, bɔ atín nyanya bǐ nɔ ná sínsɛ́n nyanya. 18 Atín ɖagbe ɖé sixú ná sínsɛ́n nyanya ǎ, mɔ̌ jɛ́n atín nyanya ɖé ma sixú ná sínsɛ́n ɖagbe ǎ é nɛ́. 19 Atín ɖěbǔ e ma nɔ ná sínsɛ́n ɖagbe ǎ é ɔ, è nɔ sɛ́n bo nɔ sɔ́ nyi myɔ mɛ. 20 Nǔgbó ɔ, sínsɛ́n gbeyíɖɔ adingbannɔ énɛ́ lɛ́ tɔn lɛ́ wɛ ná zɔ́n bɔ mi ná tuun yě.

21 Mɛ ɖěɖěe nɔ ɖɔ nú mì ɖɔ: ‘Aklúnɔ, Aklúnɔ’ lɛ́ é bǐ wɛ ná byɔ́ Axɔ́súɖuto jǐxwé tɔn mɛ ǎ, é nyɔ́ wa ɔ, mɛ e nɔ wa jlǒ Tɔ́ ce e ɖo jǐxwé é tɔn é kɛ́ɖɛ́ wɛ ná byɔ́ mɛ. 22 Mɛ gěgé ka ná ɖɔ nú mì gbe nɛ́ gbe ɖɔ: ‘Aklúnɔ, Aklúnɔ, é ma nyí nyǐkɔ towe mɛ wɛ mǐ nyí gbeyíɖɔ ɖe, bo nya awǒvi lɛ́ ɖe, lobo lɛ́ bló nǔjíwǔ gěgé ɖe ǎ cé?’ 23 Bɔ un ná ɖɔ nú yě ɖɔ: ‘Un tuun mi kpɔ́n gbeɖé ǎ! Mi bú dó mi, sɛ́ngbatɔ́ è mi!’

24 “Énɛ́ wú ɔ, mɛ ɖěbǔ e se xó ce énɛ́ lɛ́ bo bló ɖ’é jí é ná cí nya ayiɖotenánɔ e mɛ xɔ tɔn nyi awǐnnya jí é ɖɔhun.

25 Jǐ ja, bɔ tɔ ɖi sin, lobɔ jɔhɔn syɛ́nsyɛ́n nyi dó xɔ énɛ́, loɔ, é mu ǎ, ɖó awǐnnya jí wɛ è dó do nyi. 26 Mɛ ɖěbǔ e ka se xó ce énɛ́ lɛ́ bo ma bló ɖ’é jí ǎ é ná cí nya xlonɔ e mɛ xɔ tɔn nyi kɔ́gúdu mɛ é ɖɔhun. 27 Jǐ ja, bɔ tɔ ɖi sin, lobɔ jɔhɔn syɛ́nsyɛ́n nyi dó xɔ énɛ́, b’ɛ mu, lobo gba hánnyá.”

28 Ée Jezu ɖɔ xó énɛ́ lɛ́ kpé é ɔ, nǔ e jɛ é wɛ nyí ɖɔ lěe é nɔ kplɔ́n nǔ mɛ gbɔn é jí wǔ nú ahwan ɔ tawun, 29 ɖó é kplɔ́n nǔ yě, mɛ e ɖó acɛ é ɖɔhun, é nyí sɛ́nkplɔ́nmɛtɔ́ yětɔn lɛ́ ɖɔhun ǎ.

8 Ée é jɛ te sín só ɔ jí gúdo é ɔ, ahwan ɖaxó ɖé xwedó è. 2 Gudunɔ ɖé ka wá gɔ̌n tɔn, bo ɖe kɔ́* n’i, bo ɖɔ: “Aklúnɔ, ényí a jló ɔ, a hɛn ɔ, a ná bló bɔ un ná húzú mɛ mímɛ́.” 3 Énɛ́ ɔ, é dlɛ́n alɔ tɔn, bo y’agba wǔtu tɔn, lobo ɖɔ: “Un jló! Hǔzú mɛ mímɛ́.” Tlóló kpowun ɔ, gudu tɔn gbɔ n’i. 4 Énɛ́ gúdo ɔ, Jezu ɖɔ n’i ɖɔ: “Ma lɔn bo ɖɔ nú mɛ ɖěbǔ ó, loɔ, yi sɔ́ hwiɖée xlɛ́ vɔ̌sánúxwlémawutɔ́ ɔ, bo xwlé nǔníná e xó Mɔyízi ɖɔ é, bónú é ná nyí kúnnuɖiɖe nú yě.”

5 Ée é byɔ́ Kafaanawúmu toxo mɛ é ɔ, sɔ́jakanwekogán ɖé sɛkpɔ́ ɛ, bo jɛ vo sa n’i jí, 6 lobo ɖɔ: “Mɛɖaxó, mɛsɛntɔ́ ce xwe ayǐsó bo ɖo zan jí ɖo xwégbe, lobo ɖo wǔvɛ́ se wɛ baɖabaɖa.” 7 É ɖɔ n’i ɖɔ: “Nú un jɛ dɔ̌n ɔ, un ná gbɔ azɔn n’i.” 8 Sɔ́jakanwekogán ɔ ka yí gbe n’i ɖɔ: “Mɛɖaxó, un jɛxá bo ná yí gbe nú a ná byɔ́ xwé ce gbe ǎ, vɛ̌ ko ɖe gbe kpowun, énɛ́ ɔ, mɛsɛntɔ́ ce sín azɔn ná gbɔ. 9 Ðó nyi lɔ ɔ, mɛ e ɖo mɛ ɖěvo lɛ́ sín acɛ glɔ́ é wɛ nú mì, bɔ un ɖó sɔ́ja lɛ́ ɖo acɛ ce glɔ́. Nú un ɖɔ nú sɔ́ja élɔ́ ɖɔ: ‘Yi!’ ɔ, é nɔ yi, bɔ un ɖɔ nú mɛ ɖěvo ɖɔ: ‘Wǎ!’ ɔ, é nɔ wá, lobɔ un ɖe gbe nú kannumɔ ce ɖɔ: ‘Wa nǔ lě!’ ɔ, é nɔ wa.” 10 Ée Jezu se mɔ̌ é ɔ, é jí wǔ n’i bɔ é ɖɔ nú mɛ e ɖo xwixwedó è wɛ lɛ́ é ɖɔ: “Má ɖɔ nǔgbó nú mi, mɛ ɖěbǔ ɖo Izlayɛ́li bo ɖó nǔɖiɖi ɖaxó lěhun nú un mɔ ǎ. 11 Amɔ̌, má ɖɔ nú mi, mɛ gěgé ná gosín zǎnzǎnhwe jí kpó gbadahwe jí kpó bo ná wá jínjɔ́n távo tó xá Ablaxámu, Izáki kpó Jakɔ́bu kpó ɖo Axɔ́súɖuto jǐxwé tɔn mɛ; 12 bɔ è ka ná bɛ́ Axɔ́súɖuto ɔ sín vǐ lɛ́ nyi dó ablu mɛ ɖo kɔ́xo. Fínɛ́ wɛ yě ná ya avǐ bo ná ɖu aɖǔkún ɖe.” 13 Énɛ́ gúdo ɔ, Jezu ɖɔ nú sɔ́jakanwekogán ɔ ɖɔ: “Yi. Nǔ e a byɔ́ kpó nǔɖiɖi kpó é ní bo nyí mɔ̌ nú we.” Bɔ azɔn gbɔ nú mɛsɛntɔ́ ɔ tlóló.

14 Ée Jezu wá Piyɛ́ɛ sín xwégbe é ɔ, é mɔ Piyɛ́ɛ sín asinɔ, bɔ é ɖó zozo bo ɖo ayǐmlɔ́mlɔ́. 15 Énɛ́ ɔ, é y’agba alɔ tɔn wú, bɔ zozo ɔ kɔ́n n’i, lobɔ é sí te bo jɛ jǒnɔ tɔn yí jí. 16 Amɔ̌, ée gbadanu su é ɔ, mɛ lɛ́ kplá mɛ e jí awǒvi lɛ́ ɖe é gěgé wá n’i; bɔ é ɖe gbe dó gbigbɔ nyanya lɛ́ bɔ yě tɔ́n, lobɔ é lɛ́ gbɔ azɔn nú mɛ e ɖo wǔvɛ́ se wɛ lɛ́ é bǐ, 17 bónú xó élɔ́ e è ɖɔ gbɔn gbeyíɖɔ Ezayíi jí é ní dó jɛnu: “Éɖésúnɔ ɖíɖá azɔn mǐtɔn lɛ́, bo dó kɔ wǔvɛ́ mǐtɔn lɛ́ mɛ.”

18 Ée Jezu mɔ ahwan e lɛ́ lɛ̌ dó è é ɔ, é ɖɔ nú ahwanvú tɔn lɛ́ ɖɔ: “Mǐ ní yi agě ɖě ɔ jí.” 19 Bɔ sɛ́nkplɔ́nmɛtɔ́ ɖé wá bo ɖɔ n’i ɖɔ: “Mɛ̌si, un ná xwedó we yi fí ɖěbǔ e a ná yi é.” 20 Jezu ka ɖɔ n’i ɖɔ: “Ayǐsájɛ lɛ́ ɖó nu e mɛ yě nɔ nɔ é, bɔ xɛ lɛ́ ɖó adɔ̌, amɔ̌, Gbɛtɔ́ví ɔ ɖó fí ɖěbǔ bo ná sɔ́ ta ɖó ǎ.” 21 Énɛ́ gúdo ɔ, ahwanvú ɖěvo ɖɔ n’i ɖɔ: “Aklúnɔ, gbɔ nú má to yi ɖi tɔ́ ce hwɛ̌.” 22 Jezu ɖɔ n’i ɖɔ: “Kpo ɖo xwixwedó mì wɛ, bo jó mɛkúkú lɛ́ dó bónú yě ní ɖi mɛkúkú yětɔn lɛ́.”

23 Énɛ́ gúdo ɔ, é byɔ́ tɔjíhún mɛ, bɔ ahwanvú tɔn lɛ́ xwedó è. 24 Din ɔ, jɔhɔn ɖaxó ɖé sí te ɖo xu ɔ jí, káká bɔ aslɔkɛ́ lɛ́ nɔ xo sin dó tɔjíhún ɔ mɛ; amɔ̌, é ɖo amlɔ dɔ́ wɛ. 25 Yě wá fɔ́n ɛ, bo ɖɔ: “Aklúnɔ, hwlɛ̌n mǐ, mǐ ɖo nǎ dɔn wɛ!” 26 Amɔ̌, é ɖɔ nú yě ɖɔ: “Étɛ́wú mi ka ɖo xɛsi ɖi wɛ sɔmɔ̌,* nǔɖiɖi kpɛvínɔ è mi?” Énɛ́ gúdo ɔ, é sí te bo ɖe gbe dó jɔhɔn ɔ kpó xu ɔ kpó, bɔ fí bǐ cí tóó. 27 É jí wǔ nú ahwanvú lɛ́ káká bɔ yě ɖɔ: “Mɛ alɔkpa tɛ́ ka ɖíe? Jɔhɔn kpó xu kpó tlɛ nɔ se gbe n’i lá!”

28 Ée é jɛ agě ɖě ɔ jí ɖo Gadaláanu lɛ́ sín xá mɛ é ɔ, nya e jí awǒvi lɛ́ ɖe é we tɔ́n sín yɔdo lɛ́ tɛ́ntin bo wá kpé è. Yě nɔ xo dǎka tawun. É sín énɛ́ wú bɔ mɛ ɖěbǔ nɔ glá bo nɔ gbɔn ali énɛ́ ǎ. 29 Yě jɛ xó sú jí tlílí, bo ɖɔ: “Vǐ Mawu tɔn, étɛ́ mǐ kpó hwi kpó ka kpé dó? A wá fí bo ná dó ya nú mǐ jɛ nukɔn nú hwenu e è ɖó dó é wɛ a?” 30 Aglǔzahwan ɖaxó ɖé ɖo zɔ zaan dó yě, bo ɖo nǔ ba ɖu wɛ. 31 Énɛ́ ɔ, awǒvi lɛ́ jɛ vo sa n’i jí ɖɔ: “Ényí a nya mǐ tɔ́n hǔn, sɛ́ mǐ dó aglǔzahwan ɔ mɛ.” 32 Bɔ é ɖɔ nú yě ɖɔ: “Mi yi!” Énɛ́ ɔ, yě tɔ́n bo byɔ́ aglǔza lɛ́ mɛ. Bɔ aglǔzahwan ɔ blěbú nyi agbo sín só ɔ nufɛ́nu kɔn nyi xu ɔ mɛ bo kú tɔ. 33 Aglǔzanyitɔ́ lɛ́ ka hɔn, bɔ ée yě yi toxo ɔ mɛ é ɔ, yě wlí nǔ lɛ́ bǐ ɖɔ, káká jɛ tan e kunkplá nya e jí awǒvi lɛ́ ɖe lɛ́ é jí. 34 Bɔ mɛ e ɖo toxo ɔ mɛ lɛ́ é bǐ tɔ́n bo wá kpé Jezu, lobɔ ée yě mɔ ɛ é ɔ, yě sa vo n’i ɖɔ é ní gosín xá émítɔn mɛ.

9 Énɛ́ wútu ɔ, ée é byɔ́ tɔjíhún ɔ mɛ é ɔ, é d’asá xu ɔ bo yi toxo éɖésúnɔ tɔn mɛ. 2 Mɛ lɛ́ sɔ́ nya ayǐsónɔ ɖé wá n’i, bɔ é ɖo ayǐmlɔ́mlɔ́ ɖo zan jí. Ée Jezu mɔ nǔɖiɖi yětɔn é ɔ, é ɖɔ nú ayǐsónɔ ɔ ɖɔ: “Vǐ ce, kpankɔ́n! È sɔ́ hwɛ towe lɛ́ kɛ we.” 3 Sɛ́nkplɔ́nmɛtɔ́ ɖé lɛ́ ɖɔ nú yěɖée ɖɔ: “Nya élɔ́ ɖo nu nylá wɛ.” 4 Ðó Jezu tuun linlin yětɔn lɛ́ wútu ɔ, é ɖɔ: “Étɛ́wú mi ka ɖo nǔ nyanya lɛ́ lin wɛ ɖo ayi mitɔn lɛ́ mɛ? 5 ‘È sɔ́ hwɛ towe lɛ́ kɛ we’ ɖiɖɔ, alǒ: ‘Sí te bo ɖi zɔnlin’ ɖiɖɔ ɔ, ɖětɛ́ ka bɔ wǔ hú ɖě? 6 É ɖo mɔ̌ có, bónú mi ná dó tuun ɖɔ Gbɛtɔ́ví ɔ ɖó acɛ bo ná sɔ́ hwɛ kɛ mɛ ɖo ayǐkúngban jí wútu ɔ, . . .” Énɛ́ gúdo ɔ, é ɖɔ nú ayǐsónɔ ɔ ɖɔ: “Sí te, sɔ́ zan towe, bo yi xwé.” 7 Énɛ́ ɔ, é sí te bo ɖidó xwégbe. 8 Ée ahwan ɔ mɔ mɔ̌ é ɔ, xɛsi jɛ yě jí, bɔ yě kpa susu nú Mawu, éé ná acɛ mɔ̌hun gbɛtɔ́ lɛ́ é.

9 Ée Jezu gosín fínɛ́ é ɔ, é mɔ nya e è nɔ ylɔ́ ɖɔ Matíe é ɖo ayǐjínjɔ́n ɖo tokwɛ́yítɔ́ lɛ́ sín azɔ̌xɔsá, bo ɖɔ n’i ɖɔ: “Xwedó mì.” Énɛ́ ɔ, é sí te bo xwedó è. 10 Nukɔnmɛ ɔ, ée Jezu ɖo nǔ ɖu wɛ* ɖo Matíe sín xwégbe é ɔ, tokwɛ́yítɔ́ kpó hwɛhutɔ́ kpó gěgé wá, bo jɛ nǔ ɖu xá é kpó ahwanvú tɔn lɛ́ kpó jí.* 11 Amɔ̌, ée Falizyɛn lɛ́ mɔ mɔ̌ é ɔ, yě ɖɔ nú ahwanvú tɔn lɛ́ ɖɔ: “Étɛ́wú mɛ̌si mitɔn ka nɔ ɖu nǔ xá tokwɛ́yítɔ́ lɛ́ kpó hwɛhutɔ́ lɛ́ kpó?” 12 Ée Jezu se xó e ɖɔ wɛ yě ɖe é ɔ, é ɖɔ: “Mɛ e sín lanmɛ ɖo ganjí lɛ́ é ɖó hudó dotóo tɔn ǎ, amɔ̌, mɛ e ɖo azɔn jɛ wɛ lɛ́ é ɖó hudó tɔn. 13 Mi bo yi kplɔ́n tínmɛ xó élɔ́ lɛ́ tɔn: ‘Nǔbláwǔkúnúmɛ ba wɛ un ɖe, é nyí vɔ̌sísá ǎ.’ Ðó nǔjlɔ́jlɔ́watɔ́ lɛ́ ylɔ́ gbé wɛ un tɔ́n bo wá ǎ, loɔ, hwɛhutɔ́ lɛ́ wɛ.”

14 Énɛ́ gúdo ɔ, ahwanvú Jaan tɔn lɛ́ wá gɔ̌n tɔn bo kanbyɔ́ ɛ ɖɔ: “Étɛ́wú mǐdɛɛ lɛ́ kpó Falizyɛn lɛ́ kpó nɔ ɖo nu blá wɛ, bɔ ahwanvú towe lɛ́ ma ka nɔ blá nu ǎ?” 15 Jezu ka ɖɔ nú yě ɖɔ: “Asisúnɔ ɔ sín xɔ́ntɔn lɛ́ ɔ, ényí asisúnɔ ɔ kpo ɖo kpɔ́ xá yě jɛ́n wɛ ɔ, yě ɖó hwɛjijɔ ɖěbǔ bo ná nɔ aluwɛ mɛ ǎ, kabǐ? Amɔ̌, gbe ɖokpó ná wá su bɔ è ná ɖe asisúnɔ ɔ sín gɔ̌n yětɔn, énɛ́ ɔ, yě ná blá nu. 16 Mɛ ɖěbǔ nɔ sɔ́ avɔxwɛ yɔ̌yɔ́ dó ɖɛ́ awu xóxó ná ǎ, ɖó avɔxwɛ yɔ̌yɔ́ ɔ nɔ dɔn awu ɔ, bɔ tlɛ́ntlɛ́nkpa ɔ nɔ lɛ́ nylá d’é jí. 17 Mɔ̌ jɛ́n è ma nɔ kɔn vɛ̌ɛn yɔ̌yɔ́ dó anyǔgo xóxó mɛ ǎ é nɛ́. Ényí è wa mɔ̌ ɔ, anyǔgo ɔ nɔ wú bɔ vɛ̌ɛn ɔ nɔ kɔn nyi gbě, bɔ anyǔgo ɔ nɔ gblé. Amɔ̌, vɛ̌ɛn yɔ̌yɔ́ ɔ, anyǔgo yɔ̌yɔ́ mɛ wɛ è nɔ kɔn dó, bɔ nǔ we lɛ́ bǐ nɔ nɔ ganjí.”

18 Ée é ɖo xó énɛ́ lɛ́ ɖɔ nú yě wɛ é ɔ, gǎn ɖokpó sɛkpɔ́ ɛ bo ɖe kɔ́* n’i, lobo ɖɔ: “Vǐ nyɔ̌nu ce ɖó ná ko kú din, amɔ̌, wǎ ɖó alɔ jǐ tɔn, énɛ́ ɔ, é ná fɔ́n wá gbɛ.”

19 Jezu sí te, bɔ é kpó ahwanvú tɔn lɛ́ kpó xwedó è. 20 Nǎwe ɖé ka ɖo hun ɖi wɛ sín xwe 12 ɖíe, bo sɛkpɔ́ Jezu gbɔn gǔdo, bo ɖ’alɔ awu tɔn aga tɔn ɔ sín kɛyɛ wú, 21 ɖó é nɔ ɖɔ nú éɖée ɖɔ: “Ényí un vɛ́ ko ɖ’alɔ awu tɔn aga tɔn ɔ wú ɔ, azɔn ce ná gbɔ.” 22 Ée Jezu lílɛ́ bo ɖ’ayi wǔtu tɔn é ɔ, é ɖɔ: “Kpankɔ́n, vǐ nyɔ̌nu ce! Nǔɖiɖi towe gbɔ azɔn nú we.” Tlóló ɔ, nǎwe ɔ sín azɔn gbɔ.

23 Din ɔ, ée Jezu wá gǎn ɔ sín xwégbe, bo mɔ kpetekúntɔ́ lɛ́ kpó ahwan ɔ kpó ɖo alě ná wɛ kpó xósúsú kpó é ɔ, 24 é ɖɔ nú yě ɖɔ: “Mi tɔ́n sín fí, ɖó nyɔ̌nuví ɔ kú ǎ, loɔ, amlɔ dɔ́ wɛ é ɖe.” Bɔ yě jɛ cícá ɛ ko jí. 25 Ée ahwan ɔ tɔ́n tlóló é ɔ, é byɔ́ xɔ e mɛ nyɔ̌nuví ɔ ɖe é, bo hɛn alɔ tɔn, bɔ é sí te. 26 Nǔgbó ɔ, xó énɛ́ ɔ gba kpé xá ɔ bǐ mɛ.

27 Ée Jezu gosín fínɛ́ é ɔ, nukúntɔ́nnɔ we xwedó è, bo nɔ sú xó ɖɔ: “Davídi Ví, kú nǔbláwǔ nú mǐ.” 28 Ée Jezu byɔ́ xwé ɖé gbe gúdo é ɔ, nukúntɔ́nnɔ lɛ́ wá gɔ̌n tɔn, bɔ é kanbyɔ́ yě ɖɔ: “Mi ka ɖi nǔ ɖɔ un sixú hun nukún nú mi a?” Yě yí gbe n’i ɖɔ: “Ɛɛn, Aklúnɔ.” 29 Énɛ́ ɔ, é ɖ’alɔ nukún yětɔn lɛ́ wú, bo ɖɔ: “Ðó nǔ e mi ɖi é wútu ɔ, ní bo nyí mɔ̌ nú mi.” 30 Bɔ nukún yětɔn lɛ́ hun. Gɔ́ ná ɔ, Jezu dó sɛ́n nú yě syɛ́nsyɛ́n ɖɔ: “Mi ma lɔn nú mɛɖé se ó.” 31 Amɔ̌, ée yě tɔ́n gúdo é ɔ, yě ɖɔ xó tɔn gbɔn xá ɔ bǐ mɛ.

32 Ée yě ɖo fínɛ́ gosín wɛ é ɔ, mɛ lɛ́ kplá nya ɖɛ̌kúnánɔ e jí awǒvi ɖe é ɖé wá n’i; 33 bɔ ée é nya awǒvi ɔ sín ɖɛ̌kúnánɔ ɔ jí gúdo é ɔ, é ɖɔ xó. É jí wǔ nú ahwan ɔ, bɔ yě ɖɔ: “È ko mɔ nǔ lěhun kpɔ́n gbeɖé ɖo Izlayɛ́li ǎ.” 34 Amɔ̌, Falizyɛn lɛ́ ɖo ɖiɖɔ wɛ ɖɔ: “Awǒvi lɛ́ sín gǎn wɛ nɔ ná ɛ hlɔ̌nhlɔ́n bɔ é nɔ dó nya awǒvi lɛ́ ná.”

35 Jezu nɔ ɖo toxo lɛ́ kpó gletoxo lɛ́ kpó bǐ mɛ gbɔn wɛ, bo nɔ ɖo nǔ kplɔ́n mɛ wɛ ɖo kplɔ́ngbasá yětɔn lɛ́, lobo nɔ ɖo wɛn ɖagbe Axɔ́súɖuto ɔ tɔn jlá wɛ; é nɔ lɛ́ ɖo azɔn tɛnmɛ tɛnmɛ kpó wɔ̌nzɔn tɛnmɛ tɛnmɛ kpó gbɔ wɛ. 36 Ée é mɔ ahwan ɔ é ɔ, nǔ yětɔn blá wǔ n’i, ɖó é mɔ ɖɔ è gbídí kɔ nú yě bo lɛ́ dó vɛ̌ nú yě* lɛ̌ngbɔ́ e ma ɖó lɛ̌ngbɔ́nyitɔ́ ǎ lɛ́ é ɖɔhun. 37 Énɛ́ gúdo ɔ, é ɖɔ nú ahwanvú tɔn lɛ́ ɖɔ: “Nǔgbó ɔ, jinukún ɖo kpɔ́ gégé, azɔ̌watɔ́ lɛ́ ka nyí kpɛɖé. 38 Énɛ́ wú ɔ, mi sa vo nú Gǎn nǔkúnyiya tɔn ɔ bónú é ní sɛ́ azɔ̌watɔ́ dó jinukúngbo tɔn mɛ.”

10 Énɛ́ ɔ, é ylɔ́ ahwanvú tɔn 12 lɛ́ bo ná acɛ yě dó gbigbɔ nyanya* lɛ́ jí, bónú yě ná dó sixú nɔ nya gbigbɔ énɛ́ lɛ́ sín mɛ lɛ́ jí, lobo ná nɔ gbɔ azɔn tɛnmɛ tɛnmɛ kpó wɔ̌nzɔn tɛnmɛ tɛnmɛ kpó.

2 Mɛsɛ́dó 12 lɛ́ sín nyǐkɔ ɖíe: Sinmɔ́ɔ, ée è nɔ ylɔ́ ɖɔ Piyɛ́ɛ é kpó nɔví tɔn Andlé kpó; Jaki Zebeɖée ví ɔ kpó nɔví tɔn Jaan kpó; 3 Filípu kpó Baatelemíi kpó; Tɔmáa kpó Matíe tokwɛ́yítɔ́ ɔ kpó; Jaki Alufée ví ɔ kpó Tadée kpó; 4 Sinmɔ́ɔ, mɛ e akpakpa nɔ sɔ́ é kpó Judási Isikaliɔ́ti, éé wá sa Jezu ɖo nukɔnmɛ é kpó.

5 Hwenu e Jezu sɛ́ yě mɛ 12 lɛ́ dó é ɔ, é ɖe gbe élɔ́ lɛ́ nú yě: “Mi ma gbɔn mɛ e ɖo akɔta ɖě lɛ́ mɛ lɛ́ é sín ali ó, mi ma ka byɔ́ toxo Samalíinu lɛ́ tɔn ɖěbǔ mɛ ó; 6 é nyɔ́ wa ɔ, mi ní nɔ ɖo akɔta Izlayɛ́li tɔn sín lɛ̌ngbɔ́ e bú lɛ́ é gɔ́n yi wɛ. 7 Ée mi ná ɖo yiyi wɛ é ɔ, mi nɔ ɖo jlǎjlá wɛ ɖɔ: ‘Axɔ́súɖuto jǐxwé tɔn ko sɛkpɔ́.’ 8 Mi gbɔ azɔn nú azinzɔnnɔ lɛ́, mi fɔ́n mɛkúkú lɛ́, mi bló bónú gudunɔ lɛ́ ní húzú mɛ mímɛ́, mi nya awǒvi lɛ́ sín mɛ lɛ́ jí. Vɔ̌nu wɛ è ná mi, mi lɔ ní ná mɛ vɔ̌nu. 9 Mi ma hɛn siká, kpatágan, alǒ ganvɔ dó akwɛ́kpo mitɔn lɛ́ mɛ ó. 10 Mi ma hɛn glo nú tomɛyiyi ɔ ó, mi ma hɛn awu we,* afɔkpa, alǒ kpo ó, ɖó azɔ̌watɔ́ jɛxá nǔɖuɖu e nyí étɔn é.

11 “Ényí mi byɔ́ toxo alǒ gletoxo ɖěbǔ mɛ hǔn, mi ba mɛ e ɖ’é mɛ bo jɛxá é, lobo nɔ fínɛ́ káká jɛ hwenu e mi ná gosín fínɛ́ dó é. 12 Ényí mi byɔ́ xwé ɖé gbe hǔn, mi dó gbe xwé ɔ gbe nu lɛ́. 13 Ényí xwé ɔ jɛxá hǔn, fífá mitɔn ní nɔ kpɔ́ xá ɛ; amɔ̌, ényí é ma jɛxá ǎ hǔn, fífá mitɔn ní lɛ́ kɔ xwedó mi. 14 Fí ɖěbǔ e è ma ná yí mi alǒ ɖótó xó mitɔn lɛ́ ɖe ǎ é ɔ, hwenu e mi ná ɖo xwé énɛ́ gbe alǒ toxo énɛ́ mɛ gosín wɛ é ɔ, mi xúxú afúntúntún e ɖo afɔ mitɔn lɛ́ é. 15 Má ɖɔ nǔgbó nú mi, Hwɛɖɔzán ɔ ná bɔ wǔ nú Sodɔ́mu kpó Gomɔ́ɔ kpó hú toxo énɛ́.

16 “Éɖíe! Un ɖo mi sɛ́ dó wɛ, bɔ mi ná cí lɛ̌ngbɔ́ lɛ́ ɖo hla lɛ́ tɛ́ntin ɖɔhun. Énɛ́ wú ɔ, mi nɔ acéjí dan ɖɔhun, bo ka nyí xomɛvɔ́nɔ ahwannɛ́ ɖɔhun. 17 Mi nɔ acéjí dó gbɛtɔ́ lɛ́ wú, ɖó yě ná jó mi nú hwɛɖɔxɔsá ayǐ ɔ jí tɔn lɛ́, bɔ yě ná sɔ́ lanbá dó xo mi ná ɖo kplɔ́ngbasá yětɔn lɛ́. 18 Yě ná kplá mi yi tokpɔngán lɛ́ kpó axɔ́sú lɛ́ kpó nukɔn ɖó nyɛ wú, bónú é ná nyí kúnnuɖiɖe nú yě kpó akɔta ɖě lɛ́ kpó. 19 É ɖo mɔ̌ có, hwenu e è ná wlí mi jó é ɔ, ado ní ma hu mi dó lěe mi ɖó ná ɖɔ xó gbɔn é, alǒ dó nǔ e mi ɖó ná ɖɔ é wú ó, ɖó nǔ e mi ɖó ná ɖɔ é ɔ, è ná sɔ́ dó ayi mɛ nú mi ɖo hwenɛ́nu; 20 ɖó é nyí miɖokpónɔ wɛ ɖo xó ɖɔ wɛ ǎ, loɔ, gbigbɔ Tɔ́ mitɔn tɔn wɛ ɖo xó ɖɔ wɛ gbɔn jǐ mitɔn. 21 Gɔ́ ná ɔ, nɔví ná jó nɔví tɔn bɔ è ná hu, tɔ́ ná jó vǐ tɔn, vǐ lɛ́ ná fɔ́n gǔ dó mɛjitɔ́ yětɔn lɛ́ jí bo ná zɔ́n bɔ è ná hu yě. 22 Bɔ mɛ lɛ́ bǐ ná gbɛ́ wǎn nú mi ɖó nyǐkɔ ce wú, amɔ̌, mɛ e dɛ* káká jɛ vivɔnu é ɔ, è ná hwlɛ́n ɛ gán. 23 Nú è dó ya nú mi ɖo toxo ɖé mɛ hǔn, mi hɔn yi ɖěvo mɛ; ɖó má ɖɔ nǔgbó nú mi, mi ná ko gbɔn toxo Izlayɛ́li tɔn lɛ́ bǐ mɛ fó cóbɔ Gbɛtɔ́ví ɔ ná wá ǎ.

24 “Nǔkplɔ́ntɔ́* ɖé nɔ hú gǎn mɛ̌si tɔn ǎ, mɔ̌ jɛ́n kannumɔ ɖé ma nɔ hú gǎn gǎn tɔn ǎ é nɛ́. 25 Ényí nǔkplɔ́ntɔ́ ɔ wá cí mɛ̌si tɔn ɖɔhun, bɔ kannumɔ ɔ wá cí gǎn tɔn ɖɔhun ɔ, é ko kpé. Ényí mɛ lɛ́ ylɔ́ xwénɔ ɔ ɖɔ Bɛluzebúlu* ɔ, ani ka sɔ́ nyí mɛ e ɖo xwé tɔn gbe lɛ́ é tɔn? 26 Énɛ́ wú ɔ, mi ma ɖi xɛsi nú yě ó, ɖó nǔ ɖěbǔ ɖo hwlǎhwlá bónú è ná wá gɔn sɛ kɔ́n sín jí ǎ, nǔ ɖěbǔ ka ɖo nǔglɔ́ bónú è ná wá gɔn tuuntuun ǎ. 27 Nǔ e un ɖɔ nú mi ɖo zǐnflú mɛ é ɔ, mi ɖɔ ɖo wěziza nu; nǔ e è ɖe kpá tɔn mi é ɔ, mi nɔ xɔ ta bo jlá. 28 Xɛsi ní ma ɖi mi dó mɛ e nɔ hu agbaza bo ma ka sixú hu lǐndɔ̌n* ǎ lɛ́ é wú ó; é nyɔ́ wa ɔ, mi ɖi xɛsi nú mɛ e sixú sú kún dó nú lǐndɔ̌n kpó agbaza kpó bǐ ɖo Jeyɛ́nu* mɛ é. 29 È nɔ sa gboli we yí gankwɛ́ kpɛví* ɖokpó, kabǐ? É ɖo mɔ̌ có, ɖokpó yětɔn ná flɛ́ jɛ kɔ́mɛ bónú Tɔ́ mitɔn ná gɔn tuuntuun ǎ. 30 Midɛɛ lɛ́ ɔ, ɖa nabí e ɖo ta nú mi é bǐ sín kɛ́n wɛ è tlɛ sɔ́. 31 Mi bo ma ɖi xɛsi ɖěbǔ ó; mi xɔ akwɛ́ hú gboli gěgé.

32 “Mɛ ɖěbǔ e yí gbe ɖo gbɛtɔ́ lɛ́ nukɔn ɖɔ émí tuun mì é ɔ, nyi lɔ ná yí gbe ɖo Tɔ́ ce e ɖo jǐxwé é nukɔn ɖɔ un tuun i. 33 Amɔ̌, mɛ ɖěbǔ e ná gbɛ́ mì ɖo gbɛtɔ́ lɛ́ nukɔn é ɔ, nyi lɔ ná gbɛ́ ɛ ɖo Tɔ́ ce e ɖo jǐxwé é nukɔn. 34 Mi ma lin ɖɔ fífá hɛn wá ayǐkúngban ɔ jí gbé wɛ un tɔ́n ó; un tɔ́n fífá hɛn wá gbé ǎ, loɔ, hwǐ wɛ. 35 Ðó kínklán dɔn wá gbé wɛ un tɔ́n bo wá, bɔ vǐ súnnu ná sí te dó tɔ́ tɔn jí, vǐ nyɔ̌nu ná sí te dó nɔ tɔn jí, lobɔ vǐsi ná sí te dó asú tɔn nɔ jí. 36 Nǔgbó ɔ, xwé mɛtɔn gbe nu lɛ́ ɖésú wɛ ná nyí kɛntɔ́ mɛtɔn lɛ́. 37 Mɛ ɖěbǔ e yí wǎn nú tɔ́ tɔn alǒ nɔ tɔn hú mì é jɛxá bo ná nyí ahwanvú ce ǎ; bɔ mɛ ɖěbǔ e yí wǎn nú vǐ súnnu tɔn, alǒ vǐ nyɔ̌nu tɔn hú mì é jɛxá bo ná nyí ahwanvú ce ǎ. 38 Mɛ ɖěbǔ e ma yí gbe nú yatín* tɔn bo xwedó mì ǎ é jɛxá bo ná nyí ahwanvú ce ǎ. 39 Mɛ ɖěbǔ e tɛ́n kpɔ́n bo ná hwlɛ́n lǐndɔ̌n* tɔn gán é ná hɛn bú, bɔ mɛ ɖěbǔ e hɛn lǐndɔ̌n* tɔn bú ɖó nyɛ wú é ná lɛ́ mɔ.

40 “Mɛ ɖěbǔ e yí mi é yí nyi lɔ, bɔ mɛ ɖěbǔ e yí mì é yí Mɛ e sɛ́ mì dó é lɔ. 41 Mɛ ɖěbǔ e yí gbeyíɖɔ ɖé ɖó gbeyíɖɔ e é nyí é wútu é ná mɔ ajɔ e è nɔ dó gbeyíɖɔ é yí, bɔ mɛ ɖěbǔ e yí nǔjlɔ́jlɔ́watɔ́ ɖé ɖó nǔjlɔ́jlɔ́watɔ́ e é nyí é wútu é ná mɔ ajɔ e è nɔ dó nǔjlɔ́jlɔ́watɔ́ é yí. 42 Lobɔ mɛ ɖěbǔ e ná ná sin fífá kɔ́fu ɖokpó yǎyá mɛ kpɛví élɔ́ lɛ́ ɖokpó bónú é ná nu ɖó ahwanvú e é nyí é wútu é ɔ, má ɖɔ nǔgbó nú mi, é ná ba ajɔ tɔn kpo ɖo ali ɖěbǔ nu ǎ.”

11 Ée Jezu ɖɔ nǔ e ahwanvú tɔn 12 lɛ́ ɖó ná wa lɛ́ é nú yě fó é ɔ, é gosín fínɛ́ bo ná yi kplɔ́n nǔ mɛ lobo ɖɔ mawuxó ɖo toxo ɖěvo lɛ́ mɛ.

2 Amɔ̌, Jaan ɖo gankpá mɛ bo se azɔ̌ e wa wɛ Klísu ɔ ɖe lɛ́ é sín xó; énɛ́ ɔ, é sɛ́ ahwanvú tɔn lɛ́ dó, 3 bónú yě ní kanbyɔ́ ɛ ɖɔ: “Hwi wɛ nyí Mɛ e ɖó ná wá é a, abǐ mǐ ɖó ná ɖó nukún mɛ ɖěvo?” 4 Jezu ka yí gbe nú yě ɖɔ: “Mi yi bo ɖó nǔ e se wɛ mi ɖe lɛ́ é kpó nǔ e mɔ wɛ mi ɖe lɛ́ é kpó sín gbe nú Jaan: 5 Nukúntɔ́nnɔ lɛ́ ko ɖo nǔ mɔ wɛ, afɔkponɔ lɛ́ ɖo zɔnlin ɖi wɛ, è ɖo blǒbló wɛ bɔ gudunɔ lɛ́ ɖo mɛ mímɛ́ húzú wɛ, tókúnɔ lɛ́ ɖo nǔ se wɛ, è ɖo mɛkúkú lɛ́ fɔ́n wɛ, bo ɖo wɛn ɖagbe ɔ jlá wamamɔnɔ lɛ́ wɛ. 6 Awǎjijɛnɔ wɛ nú mɛ e ma klɛ́n afɔ bo j’ayǐ ɖó nyɛ wútu ǎ é.”

7 Ée ahwanvú Jaan tɔn lɛ́ wlí ali ɖidó é ɔ, Jezu jɛ Jaan xó ɖɔ nú ahwan ɔ jí bo ɖɔ: “Étɛ́ kpɔ́n gbé mi ka yi ɖo gbětótló mɛ? Fántín e jɔhɔn ɖo dǐndán wɛ é wɛ a? 8 Étɛ́ mi ka mɔ? Nya ɖé wɛ bo dó awu xɔ akwɛ́* lɛ́ a? Éǒ, mɛ e nɔ dó awu xɔ akwɛ́ lɛ́ é ɔ, axɔ́sú lɛ́ xwégbe wɛ yě ɖe. 9 Étɛ́wú mi ka yi dɔ̌n lo? Bo ná dó mɔ gbeyíɖɔ ɖé wú wɛ a? Ɛɛn, má ɖɔ nú mi, é hú gǎn gbeyíɖɔ ɖé flaflá tɔn. 10 Mɛ e wú è wlán nǔ élɔ́ dó é wɛ: ‘Éɖíe! Un ɖo wɛnsagun ce sɛ́ dó jɛ nukɔn nú we* wɛ, bɔ é ná jɛ nukɔn nú we bo ná bló ali towe ɖó!’ 11 Má ɖɔ nǔgbó nú mi, ɖo mɛ e è ji ɖo nyɔ̌nu xomɛ lɛ́ é mɛ ɔ, è ko mɔ mɛ ɖěbǔ ɖo yě mɛ bónú é hú gǎn Jaan Batɛ́mublónúmɛtɔ́ ɔ ǎ, amɔ̌, mɛ e nyí mɛ kpɛví bǐ ɖo Axɔ́súɖuto jǐxwé tɔn mɛ é hú gǎn ɛ. 12 Sín hwenu e Jaan Batɛ́mublónúmɛtɔ́ ɔ bɛ́ azɔ̌ tɔn é káká jɛ din ɔ, Axɔ́súɖuto jǐxwé tɔn wɛ nyí nǔ e gbé mɛ lɛ́ nɔ nya majómájó é, bɔ yě mɛ e ɖo gbě tɔn nya wɛ majómájó lɛ́ é ka ɖo kpíkpéwú wɛ. 13 Ðó nǔwlánwlán gbeyíɖɔ lɛ́ tɔn lɛ́ kpó Sɛ́n ɔ kpó bǐ wɛ ɖɔ nǔ e ná jɛ lɛ́ é ɖ’ayǐ káká jɛ Jaan hwenu; 14 bɔ ényí mi gbɛ́ oo, mi lɔn oo, é wɛ nyí ‘Elíi e ɖó ná wá é.’ 15 Mɛ e ɖó tó é ní bo ɖótó.

16 “Mɛ̌ wú un ka ná jlɛ́ jijimɛ élɔ́ dó? É cí vǐ kpɛví ɖěɖěe ɖo ayǐjínjɔ́n ɖo axi mɛ, bo sú xó ylɔ́ gbɛ̌ yětɔn lɛ́ é ɖɔhun. 17 Yě ɖɔ: ‘Mǐ kún kpete, mi ka ɖú we ǎ; mǐ ji nǔwamɛhan, mi ka ná alě ǎ.’* 18 Mɔ̌ ɖokpó ɔ, Jaan wá bo nɔ ɖu nǔ ǎ, é ka nɔ lɛ́ nu vɛ̌ɛn ǎ; amɔ̌, mɛ lɛ́ nɔ ɖɔ: ‘Awǒvi ɖé wɛ ɖo jǐ tɔn.’ 19 Gbɛtɔ́ví ɔ ka wá bo nɔ ɖu nǔ lobo nɔ nu vɛ̌ɛn, amɔ̌, mɛ lɛ́ nɔ ɖɔ: ‘Mi kpɔ́n! Nya énɛ́ ɔ, adɔtɔ́nɔ wɛ bo nɔ nu vɛ̌ɛn zɛ xwé wú, lobo nyí tokwɛ́yítɔ́ lɛ́ kpó hwɛhutɔ́ lɛ́ kpó sín xɔ́ntɔn.’ É ɖo mɔ̌ có, nǔ jlɔ́jlɔ́ e mɛɖé nɔ wa lɛ́ é wɛ nɔ ɖe xlɛ́ ɖɔ é nyɔ́nǔi.”

20 Énɛ́ gúdo ɔ, é jɛ hwɛ ɖó nú toxo e mɛ é bló nǔjíwǔ ɖe hú gǎn lɛ́ é jí, ɖó hwɛ yětɔn lɛ́ vɛ́ nú yě* ǎ: 21 “Heelú we, Kolazíin toxo! Heelú we, Bɛtisayída toxo! Ðó ényí Tíi kpó Sidɔ́ɔn kpó wɛ è ko bló nǔjíwǔ e è bló ɖo gɔ̌n mitɔn lɛ́ é ɖe ɔ, hwɛ yětɔn lɛ́ ná ko vɛ́ nú yě,* bɔ yě ná ko dó ati bo lɛ afín xóxó. 22 Amɔ̌, má ɖɔ nú mi, Hwɛɖɔzán ɔ ná bɔ wǔ nú Tíi kpó Sidɔ́ɔn kpó hú mi. 23 Kafaanawúmu è, hwɛ ɔ, è ná sɔ́ we dó jǐ káká yi jǐxwé vlafo wɛ a? Éǒ! Káká Yɔdo* mɛ wɛ a ná jɛ te dó; ɖó ényí Sodɔ́mu wɛ è ko bló nǔjíwǔ e è bló ɖo gɔ̌n towe lɛ́ é ɖe ɔ, é ná kpo ɖo te káká jɛ égbé. 24 Amɔ̌, má ɖɔ nú we, Hwɛɖɔzán ɔ ná bɔ wǔ nú Sodɔ́mu hú we.”

25 Hwe énɛ́ nu ɔ, Jezu ɖɔ: “Tɔ́, Aklúnɔ jǐxwé kpó ayǐkúngban kpó tɔn, un ɖo susu kpa nú we wɛ ɖo agbawungba, ɖó a sɔ́ nǔ énɛ́ lɛ́ hwlá dó nǔnywɛ́tɔ́ lɛ́ kpó wěmasetɔ́ lɛ́ kpó, bo ka ɖe yě xlɛ́ vǐ kpɛví lɛ́. 26 Ɛɛn, Tɔ́ ce, ɖó lěe é nyɔ́ nukún towe mɛ gbɔn é nɛ́. 27 Tɔ́ ce sɔ́ nǔ lɛ́ bǐ dó alɔ ce mɛ, bɔ mɛ ɖěbǔ tuun Vǐ ɔ mlɛ́mlɛ́ zɛ Tɔ́ ɔ wú ǎ; mɔ̌ jɛ́n mɛ ɖěbǔ ma tuun Tɔ́ ɔ mlɛ́mlɛ́ zɛ Vǐ ɔ kpó mɛ ɖěbǔ e Vǐ ɔ jló ná ɖe Tɔ́ ɔ xlɛ́ é kpó wú ǎ é nɛ́. 28 Mi wá gɔ̌n ce, mi mɛ e nǔ ci kɔ ná, bɔ agban kpinkpɛn ɖo kɔ jí ná lɛ́ é bǐ, bónú má fá kɔ nú mi. 29 Mi sɔ́ agbanhɛnkpo ce ɖó kɔ bo kplɔ́n nǔ ɖo gɔ̌n ce, ɖó mɛfífá wɛ un nyí bo nyí mɛɖéesɔ́hwetɔ́ ɖo ayi mɛ, énɛ́ ɔ, mi* ná mɔ kɔ dó sa fún. 30 Ðó agbanhɛnkpo ce vɛ́ hɛn ǎ, bɔ agban ce fúɖá.”

12 Hwe énɛ́ nu ɔ, Jezu ɖo jinukúngle ɖé mɛ gbɔn wɛ ɖo gbɔjɛzángbe. Xovɛ́ sin ahwanvú tɔn lɛ́ bɔ yě jɛ jinukún lɛ́ ba jí, bo jɛ ɖuɖu jí. 2 Ée Falizyɛn lɛ́ mɔ mɔ̌ é ɔ, yě ɖɔ n’i ɖɔ: “Kpɔ́n! Ahwanvú towe lɛ́ ɖo nǔ e ma sɔgbe xá sɛ́n ɖo gbɔjɛzángbe ǎ é wa wɛ.” 3 É ɖɔ nú yě ɖɔ: “Mi xa nǔ e Davídi wa, hwenu e xovɛ́ sin é kpó mɛ e ɖo kpɔ́ xá ɛ lɛ́ é kpó é ǎ cé? 4 É byɔ́ xwé Mawu tɔn gbe, bɔ yě ɖu wɔ̌xúxú e è xwlé Mawu lɛ́ é, é ka sɔgbe xá sɛ́n bónú éyɛ́ alǒ mɛ e ɖo kpɔ́ xá ɛ lɛ́ é ná ɖu ǎ, loɔ, vɔ̌sánúxwlémawutɔ́ lɛ́ kɛ́ɖɛ́ wɛ ɖó ná ɖu. Mi xa mɔ̌ ǎ cé? 5 Alǒ mi xa ɖo Sɛ́n ɔ mɛ ɖɔ vɔ̌sánúxwlémawutɔ́ lɛ́ nɔ gba gbɔjɛzán sín sɛ́n ɔ ɖo tɛ́npli ɔ mɛ ɖo gbɔjɛzángbe lɛ́, có è ka nɔ mɔ hwɛ ɖé nú yě ǎ ǎ cé? 6 Amɔ̌, má ɖɔ nú mi, mɛ e hú gǎn tɛ́npli ɔ é wɛ ɖo fí. 7 É ɖo mɔ̌ có, nú mi ko mɔ nukúnnú jɛ tínmɛ: ‘Nǔbláwǔkúnúmɛ ba wɛ un ɖe, é nyí vɔ̌sísá ǎ’ tɔn mɛ wɛ ɔ, mi ná ɖó hwɛ nú xomɛvɔ́nɔ lɛ́ ǎ. 8 Ðó Gbɛtɔ́ví ɔ, Aklúnɔ gbɔjɛzán ɔ tɔn wɛ é nyí.”

9 Ée é gosín fínɛ́ gúdo é ɔ, é yi kplɔ́ngbasá yětɔn. 10 Nya alɔkúnánɔ ɖé ka ɖo fínɛ́! Yě kanbyɔ́ Jezu ɖɔ: “É ka sɔgbe xá sɛ́n ɖɔ è ní gbɔ azɔn nú mɛ ɖo gbɔjɛzángbe a?” Yě kan mɔ̌ byɔ́ ɛ bo ná mɔ tɛn dó dó hwɛ ɛ. 11 É ɖɔ nú yě ɖɔ: “Ényí mi ɖó lɛ̌ngbɔ́ ɖokpó bɔ lɛ̌ngbɔ́ énɛ́ jɛ do mɛ ɖo gbɔjɛzángbe ɔ, mɛ̌ ka ɖo mi mɛ bo ma ná yi ɖe tɔ́n ǎ? 12 Gbɛtɔ́ ka xɔ akwɛ́ tawun hú lɛ̌ngbɔ́. Hǔn, é sɔgbe xá sɛ́n ɖɔ è ní wa nǔ ɖagbe ɖo gbɔjɛzángbe.” 13 Énɛ́ gúdo ɔ, é ɖɔ nú nya ɔ ɖɔ: “Dlɛ̌n alɔ towe.” Bɔ é dlɛ́n alɔ ɔ, bɔ alɔ jɛ alɔ tɛnmɛ, bo cí ɖě ɔ ɖɔhun. 14 Amɔ̌, Falizyɛn lɛ́ tɔ́n, bo blá gbě tɔn bo ná hu i. 15 Ée Jezu wá tuun mɔ̌ é ɔ, é gosín fínɛ́. Mɛ gěgé ɖěvo lɛ́ xwedó è, bɔ é gbɔ azɔn nú yě bǐ. 16 Amɔ̌, é gbɛ́ nú yě syɛ́nsyɛ́n ɖɔ yě ní ma ɖɔ xó émítɔn nú mɛ ɖěvo lɛ́ ó. 17 Nǔ nyí mɔ̌, bónú nǔ e è ɖɔ gbɔn gbeyíɖɔ Ezayíi jí é ná dó jɛnu. É ɖɔ:

18 “Mi kpɔ́n! Mɛsɛntɔ́ ce e un sɔ́ é ɖíe, mɛ vívɛ́ná ce, éé wú xomɛ nɔ hun mì* dó é! Un ná sɔ́ gbigbɔ ce ɖó jǐ tɔn, bɔ nǔ e hwɛjijɔ nyí é ɔ, é ná bló b’ɛ ná za wě nú akɔta lɛ́. 19 É ná ɖɔ jlɛ ǎ, é ka ná sú xó ǎ, mɔ̌ jɛ́n mɛ ɖěbǔ ma ná se gbe tɔn ɖo ali ɖaxó lɛ́ jí ǎ é nɛ́. 20 É ná nyínyɛ́ fántín e ko tɔ é ɖěbǔ ǎ, é ka ná cí zogbɛ́nkan e ko ɖo azɔ si wɛ é ɖěbǔ ǎ, káká jɛ hwenu e é ná ɖó hwɛjijɔ ayǐ gbɔn fí bǐ é. 21 Nǔgbó ɔ, éyɛ́* wɛ akɔta lɛ́ ná ɖó nukún.”

22 Énɛ́ gúdo ɔ, è kplá nya e jí awǒvi ɖé ɖe, bɔ é tɔ́n nukún bo lɛ́ nyí ɖɛ̌kúnánɔ é ɖé wá n’i, bɔ é gbɔ azɔn n’i. Énɛ́ ɔ, nya ɖɛ̌kúnánɔ ɔ kpé wú bo ɖɔ xó lobo lɛ́ mɔ nǔ. 23 É jí wǔ tawun nú ahwan ɔ bǐ, bɔ yě jɛ ɖiɖɔ jí ɖɔ: “Davídi Ví ɔ nɛ́ vlafo ǎ cé?” 24 Ée Falizyɛn lɛ́ se mɔ̌ é ɔ, yě ɖɔ: “Nya énɛ́ ɔ, Bɛluzebúlu,* awǒvi lɛ́ sín gǎn ɔ, wɛ nɔ ná ɛ hlɔ̌nhlɔ́n bɔ é nɔ dó nya awǒvi lɛ́ ná.” 25 Ðó é tuun linlin yětɔn lɛ́ wútu ɔ, é ɖɔ nú yě ɖɔ: “Axɔ́súɖuto e mɛ kínklán ɖe é bǐ sín kún wɛ ná sú dó, bɔ toxo e mɛ, alǒ xwé e gbe kínklán ɖe é ɖěbǔ ná nɔ te ǎ. 26 Ðo ali ɖokpó ɔ nu ɔ, ényí Satáan nya Satáan hǔn, é húzú kpan nukɔn éɖée nɛ́; nɛ̌ axɔ́súɖuto tɔn ka ná nɔ te gbɔn lo? 27 Gɔ́ ná ɔ, ényí Bɛluzebúlu wɛ nɔ ná hlɔ̌nhlɔ́n mì bɔ un nɔ dó nya awǒvi lɛ́ ná ɔ, mɛ̌ ka nɔ ná hlɔ̌nhlɔ́n ahwanvú mitɔn lɛ́ bɔ yědɛɛ lɛ́ nɔ dó nya yě ná lo? Nǔ e wú yě wɛ ná wá ɖɔ hwɛ xá mi é nɛ́. 28 Amɔ̌, ényí gbigbɔ Mawu tɔn wɛ nɔ ná hlɔ̌nhlɔ́n mì, bɔ un nɔ dó nya awǒvi lɛ́ ná hǔn, Axɔ́súɖuto Mawu tɔn ko fyán mi nǔgbó. 29 Alǒ, nɛ̌ mɛɖé ka sixú byɔ́ nya hlɔ̌nhlɔ́nnɔ ɖé sín xwégbe gǎnnugǎnnu bo ná bɛ́ nǔɖókan tɔn lɛ́, ényí é ma to blá nya hlɔ̌nhlɔ́nnɔ ɔ jɛ nukɔn hwɛ̌ ǎ ɔ gbɔn? Mɔ̌ jɛ́n é ná to bló hwɛ̌ cóbó ná sixú vɔ xwé tɔn. 30 Mɛ ɖěbǔ e ma ɖo jǐ ce ǎ é klán gbe xá mì, bɔ mɛ ɖěbǔ e ma ɖo mɛ lɛ́ xo kplé xá mì wɛ ǎ é ɖo yě gba dó wɛ.

31 “Ðó hwɛjijɔ énɛ́ wú ɔ, má ɖɔ nú mi, è ná sɔ́ hwɛhuhu kpó nu nylánylá kpó alɔkpa bǐ kɛ gbɛtɔ́ lɛ́, amɔ̌, è ná sɔ́ nu nylánylá dó gbigbɔ ɔ wú kɛ mɛ ǎ. 32 Ði kpɔ́ndéwú ɔ, mɛ ɖěbǔ e ná ɖɔ xó nyanya ɖé dó Gbɛtɔ́ví ɔ wú é ɔ, è ná sɔ́ kɛ ɛ; amɔ̌, mɛ ɖěbǔ e ná ɖɔ xó nyanya dó gbigbɔ mímɛ́ ɔ wú é ɔ, è ná sɔ́ kɛ ɛ ǎ, nǔ ná nyí mɔ̌ gbeɖé ɖo gbɛ* élɔ́ mɛ ǎ, mɔ̌ jɛ́n é ma ka ná lɛ́ nyí mɔ̌ ɖo gbɛ* e ja é mɛ ǎ é nɛ́.

33 “Ényí mi kpé nukún dó atín ɖé wú ɔ, é ná ná sínsɛ́n ɖagbe, amɔ̌, ényí mi ma kpé nukún dó atín ɖé wú ǎ ɔ, é ná ná sínsɛ́n ɖagbe ǎ. Sínsɛ́n e atín ɖé ná é wɛ nɔ ɖe xlɛ́ nyi wɛn ɖɔ atín ɔ nyí ɖagbe alǒ nyanya. 34 Jakpata kúnkan è mi, nɛ̌ mi ná nyí mɛ nyanya bo ka ná sixú ɖɔ nǔ ɖagbe lɛ́ gbɔn? Ðó nǔ e gɔ́ ayi mɛ é wɛ nu nɔ ɖɔ tɔ́n. 35 Gbɛtɔ́ ɖagbe ɔ, nǔ ɖagbe lɛ́ wɛ é nɔ ɖɔ, ɖó nǔ ɖagbe lɛ́ wɛ gɔ́ ayi tɔn mɛ. Amɔ̌, gbɛtɔ́ nyanya ɔ, nǔ nyanya lɛ́ wɛ é nɔ ɖɔ, ɖó nǔ nyanya lɛ́ wɛ gɔ́ ayi tɔn mɛ. 36 Má ɖɔ nú mi, gbɛtɔ́ lɛ́ ná ɖó xó e ma ɖó le ǎ, bɔ yě ɖɔ lɛ́ é bǐ sín gbe ɖo Hwɛɖɔzángbe; 37 ɖó xó e a ɖɔ lɛ́ é wɛ ná zɔ́n bɔ è ná ɖɔ ɖɔ a nyí nǔjlɔ́jlɔ́watɔ́, alǒ ɖó hwɛ nú we.”

38 Énɛ́ ɔ, sɛ́nkplɔ́nmɛtɔ́ ɖé lɛ́ kpó Falizyɛn ɖé lɛ́ kpó yí gbe n’i ɖɔ: “Mɛ̌si, mǐ jló ná mɔ wuntun ɖé sín gɔ̌n towe.” 39 É ka yí gbe nú yě ɖɔ: “Jijimɛ nyanya afɔdógbětɔ́* ɖé kpo ɖo wuntun ɖé ba wɛ, amɔ̌, è ná ɖe wuntun ɖěbǔ xlɛ́ ɛ zɛ wuntun e kunkplá gbeyíɖɔ Jonási é wú ǎ. 40 Ðó lěe Jonási nɔ hweví ɖaxó ɔ xomɛ xɔ kéze atɔn zǎn atɔn gbɔn é ɔ, mɔ̌ ɖokpó ɔ wɛ Gbɛtɔ́ví ɔ ná nɔ ayǐkúngban xomɛ xɔ kéze atɔn zǎn atɔn gbɔn é nɛ́. 41 Ninívunu lɛ́ ná fɔ́n sín kú ɖo hwɛɖiɖɔ ɔ hwenu xá jijimɛ élɔ́ bo ná ɖó hwɛ n’i, ɖó hwɛ yědɛɛ lɛ́ tɔn lɛ́ vɛ́ nú yě,* hwenu e Jonási jlá mawuxó yě é. Amɔ̌, mɛ e hú gǎn Jonási é ɖé wɛ ɖo fí. 42 Axɔ́sú nyɔ̌nu tofɔligbé tɔn ɔ ná fɔ́n sín kú ɖo hwɛɖiɖɔ ɔ hwenu xá jijimɛ élɔ́ bo ná ɖó hwɛ n’i, ɖó é gosín káká fí e ayǐkúngban ɔ kponu ɖó é bo ná dó ɖótó nǔnywɛ́ Salomɔ́ɔ tɔn. Amɔ̌, mɛ e hú gǎn Salomɔ́ɔ é ɖé wɛ ɖo fí.

43 “Ényí gbigbɔ nyanya ɖé tɔ́n sín mɛɖé jí ɔ, é nɔ gbɔn fí e sin ma ɖe ǎ lɛ́ é, bo nɔ ɖo fí e é ná nɔ é ba wɛ, lobo ka nɔ mɔ fí ɖěbǔ ǎ. 44 Énɛ́ gúdo ɔ, é nɔ ɖɔ: ‘Un ná lɛ́ kɔ yi xwé ce gbe fí e un gosín é.’ Bɔ nú é wá ɔ, é nɔ mɔ xwé ɔ ɖo vɔ̌, bɔ è ko za b’ɛ mɛ́, lobo lɛ́ b’acɔ́ ná bǐ. 45 Énɛ́ ɔ, é nɔ yi bo nɔ kplá gbigbɔ e nylá hú éɖésúnɔ é vovo tɛ́nwe dó éɖée jí, bɔ ényí yě byɔ́ xwé ɔ gbe gúdo ɔ, yě nɔ nɔ fínɛ́; lobɔ ninɔmɛ e mɛ nya énɛ́ nɔ wá nɔ ɖo gúdo mɛ é nɔ nylá hú bǐbɛ́mɛ tɔn ɔ. Lěe é ná nyí gbɔn nú jijimɛ nyanya élɔ́ lɔ é nɛ́.”

46 Hwenu e é kpo ɖo xó ɖɔ nú ahwan ɔ wɛ é ɔ, nɔ tɔn kpó nɔví tɔn lɛ́ kpó ɖo te ɖo kɔ́xo, bo ɖo biba ná ɖɔ xó n’i wɛ. 47 Énɛ́ wú ɔ, mɛɖé ɖɔ n’i ɖɔ: “Nɔ towe kpó nɔví towe lɛ́ kpó ɖo te ɖo kɔ́xo, bo ɖo biba ná ɖɔ xó nú we wɛ.” 48 É ka yí gbe nú mɛ e ɖɔ xó n’i é ɖɔ: “Mɛ̌ ka nyí nɔ ce? Mɛ̌ ka nyí nɔví ce lɛ́?” 49 Bɔ é dlɛ́n alɔ tɔn dó ahwanvú tɔn lɛ́, lobo ɖɔ: “Kpɔ́n! Nɔ ce kpó nɔví ce lɛ́ kpó ɖíe! 50 Ðó mɛ ɖěbǔ e nɔ wa jlǒ Tɔ́ ce e ɖo jǐxwé é tɔn é ɔ, mɛ énɛ́ wɛ nyí nɔví ce súnnu, nɔví ce nyɔ̌nu kpó nɔ ce kpó.”

13 Gbe nɛ́ gbe ɔ, Jezu gosín xwégbe, bo yi jínjɔ́n xutó. 2 Ahwan ɖaxó ɖé sɛ kplé dó wǔ tɔn. Énɛ́ wú ɔ, é byɔ́ tɔjíhún ɖé mɛ, bo jínjɔ́n ayǐ hwenu e ahwan ɔ ɖo te ɖo xu ɔ tó é. 3 Énɛ́ gúdo ɔ, é zán nǔjlɛ́dónǔwú lɛ́ dó kplɔ́n nǔ gěgé yě; é ɖɔ: “Nǔkúndótɔ́ ɖé tɔ́n bo ná yi dó nǔ. 4 Ée é ɖo nǔ dó wɛ é ɔ, nǔkún ɖé lɛ́ jɛ ali tó, bɔ xɛ lɛ́ wá bo cyán ɖu. 5 Ðěvo lɛ́ jɛ awǐnnyakan mɛ fí e kɔ́ gěgé ma ɖe ǎ é. Yě yá wǔ tɔ́n kun, ɖó kɔ́ sukpɔ́ ɖo fínɛ́ ǎ wútu. 6 Amɔ̌, ée hwesivɔ́ wá hun é ɔ, yǒzo hú gǎn yě bɔ yě fyɔ́, ɖó yě dó ɖɔ dó ǎ wútu. 7 Ðěvo lɛ́ jɛ wunkan mɛ, bɔ wun lɛ́ su bo vun blá yě. 8 É ɖo mɔ̌ có, ɖěvo lɛ́ jɛ ayǐkúngban ɖagbe jí, bɔ yě jɛ sínsɛ́n ná jí; ɖě ná donu 100, ɖěvo ná donu 60, bɔ ɖěvo lɛ́ ná donu 30. 9 Mɛ e ɖó tó é ní bo ɖótó.”

10 Énɛ́ wú ɔ, ahwanvú lɛ́ wá bo ɖɔ n’i ɖɔ: “Étɛ́wú a ka nɔ zán nǔjlɛ́dónǔwú lɛ́ dó ɖɔ xó nú yě?” 11 É ka yí gbe nú yě ɖɔ: “Midɛɛ lɛ́ ɔ, è yí gbe nú mi bɔ mi ná mɔ nukúnnú jɛ Axɔ́súɖuto jǐxwé tɔn sín nǔbúdo lɛ́ mɛ, loɔ, è yí gbe tɔn nú yědɛɛ lɛ́ ǎ. 12 Ðó mɛ ɖěbǔ e ɖó nǔ é ɔ, è ná ná ɛ d’é jí, bɔ nǔ e é ɖó é ná túnflá; amɔ̌, mɛ ɖěbǔ e ma ɖó nǔ ǎ é ɔ, è ná yí nǔ e é tlɛ ko ɖó é sín así tɔn. 13 Énɛ́ wú wɛ un nɔ zán nǔjlɛ́dónǔwú lɛ́ dó ɖɔ xó nú yě; ɖó yě ɖo kpínkpɔ́n wɛ có, yě nɔ kpɔ́n dó wǔvɔ́, yě ɖo sise wɛ có, yě nɔ se dó wǔvɔ́, mɔ̌ jɛ́n yě ma nɔ mɔ nukúnnú jɛ mɛ ǎ é nɛ́. 14 Nǔ e Ezayíi ɖɔ ɖ’ayǐ é wɛ ɖo jijɛnu wɛ dó yě wú. É ɖɔ: ‘Mi ná se nǔgbó, mi ka ná mɔ nukúnnú jɛ mɛ ɖo ali ɖěbǔ nu ǎ; mi ná kpɔ́n nǔgbó, mi ka ná mɔ ɖo ali ɖěbǔ nu ǎ. 15 Ðó togun élɔ́ sín ayi kú atli. Yě se, é ka ɖɔ nǔtí nú yě ǎ. Yě myɔ́ nukún yětɔn lɛ́ bo sú tó yětɔn lɛ́, bo ma wá kpé wú bo mɔ nǔ ɖó nukún yětɔn lɛ́ wú, lobo se nǔ ɖó tó yětɔn lɛ́ wú gbeɖé ó. Mɔ̌ mɛ ɔ, ayi yětɔn mɔ nukúnnú jɛ nǔ e byɔ́ ɖo yě sí wɛ è ɖe é mɛ ǎ, yě ka sɔ́ lɛ́ kɔ wá gɔ̌n ce bónú má gbɔ azɔn nú yě ǎ.’

16 “Amɔ̌ midɛɛ lɛ́ ɔ, awǎjijɛnɔ wɛ nú mi, ɖó nukún mitɔn lɛ́ nɔ mɔ nǔ, bɔ tó mitɔn lɛ́ nɔ se nǔ. 17 Ðó má ɖɔ nǔgbó nú mi, gbeyíɖɔ gěgé kpó nǔjlɔ́jlɔ́watɔ́ gěgé kpó jló ná mɔ nǔ e mɔ wɛ mi ɖe lɛ́ é, yě ka mɔ ǎ, yě lɛ́ jló ná se nǔ e se wɛ mi ɖe lɛ́ é, yě ka se ǎ.

18 “Din ɔ, mi ɖótó nǔjlɛ́dónǔwú nya e dó nǔ é tɔn sín tínmɛ. 19 Nǔkún e jɛ ali tó é ɔ, mɛ e se Axɔ́súɖuto ɔ sín xó bo ma ka mɔ nukúnnú jɛ mɛ ǎ é wɛ. Énɛ́ ɔ, mɛ nyanya ɔ wá, bo hɔn nǔ e è dó dó ayi tɔn mɛ é síin. 20 Nǔkún e jɛ awǐnnyakan mɛ é ɔ, mɛ e se xó ɔ bo yí gbe ná tlóló kpó awǎjijɛ kpó é wɛ. 21 É ɖo mɔ̌ có, xó ɔ dó ɖɔ do ɖo ayi tɔn mɛ ǎ, amɔ̌, é ɖi nǔ ná nú hwenu ɖé, bɔ ée wǔvɛ́ alǒ yadónúmɛ xwetɔ́n ɖó xó ɔ wútu gúdo é ɔ, é j’ayǐ tlóló. 22 Nǔkún e jɛ wunkan mɛ é ɔ, mɛ e se xó ɔ, bɔ adohu adohu gbɛ* élɔ́ tɔn kpó hlɔ̌nhlɔ́n mɛblɛ́blɛ́ tɔn dɔkun tɔn kpó ka vun blá xó ɔ, b’ɛ ma ná sínsɛ́n ǎ é wɛ. 23 Nǔkún e jɛ ayǐkúngban ɖagbe jí é ɔ, mɛ e se xó ɔ bo mɔ nukúnnú jɛ mɛ é wɛ. Éyɛ́ jɛ sínsɛ́n ná jí, ɖě ná donu 100, ɖěvo ná donu 60, bɔ ɖěvo lɛ́ ná donu 30.”

24 É lɛ́ ná nǔjlɛ́dónǔwú ɖěvo yě: “È sixú jlɛ́ Axɔ́súɖuto jǐxwé tɔn dó nya e dó nǔkún ɖagbe dó gle tɔn mɛ é wú. 25 Hwenu e mɛ bǐ ɖo amlɔ dɔ́ wɛ é ɔ, kɛntɔ́ tɔn wá bo dó gběhan nyanya gbɔn blěe lɛ́ tɛ́ntin bo yi. 26 Ée blěe lɛ́ su bo ná sínsɛ́n gúdo é ɔ, gběhan nyanya lɛ́ lɔmɔ̌ jɛ wě. 27 Énɛ́ wú ɔ, glenɔ ɔ sín mɛsɛntɔ́ lɛ́ wá bo ɖɔ n’i ɖɔ: ‘Gǎn, nǔkún ɖagbe wɛ a dó dó gle towe mɛ ǎ cé? Nɛ̌ ka gbɔn bɔ gběhan nyanya lɛ́ ɖ’é mɛ lo?’ 28 É ɖɔ nú yě ɖɔ: ‘Nya ɖé wɛ wa mɔ̌, kɛntɔ́ ɖé wɛ.’ Mɛsɛntɔ́ lɛ́ ɖɔ n’i ɖɔ: ‘Ényí mɔ̌ hǔn, a jló ɖɔ mǐ ní yi bo hɔn yě síin a?’ 29 É ɖɔ: ‘Éǒ, mi táá wá yi ɖo gběhan nyanya lɛ́ hɔn wɛ, bo hɔn ɖɔ nú blěe lɛ́ lɔ. 30 Mi jó yě mɛ we lɛ́ bǐ dó bónú yě ní su ɖó kpɔ́ káká jɛ nǔkúnyiyahwenu. Énɛ́ ɔ, ɖo nǔkúnyiyahwenu ɔ, un ná ɖɔ nú nǔkúnyatɔ́ lɛ́ ɖɔ: Mi hɔn gběhan nyanya lɛ́ jɛ nukɔn bo blá yě ɖó sonu sonu bo dó zo; énɛ́ gúdo hǔn, mi xo blěe lɛ́ kplé dó agɔ̌ ce mɛ.’”

31 É lɛ́ ná nǔjlɛ́dónǔwú ɖěvo yě: “Axɔ́súɖuto jǐxwé tɔn cí mutádi sín kwín* e nya ɖé sɔ́ bo dó ɖó gle tɔn mɛ é ɖɔhun. 32 Atínkwín e wínní hú atínkwín lɛ́ bǐ é wɛ. Amɔ̌, hwenu e é su é ɔ, é gbló hú mǎ lɛ́ bǐ bo húzú atín. Énɛ́ ɔ, xɛ lɛ́ wá bo mɔ fí e yě ná nɔ é ɖo ala tɔn lɛ́ mɛ.”

33 É lɛ́ ná nǔjlɛ́dónǔwú ɖěvo yě: “Axɔ́súɖuto jǐxwé tɔn cí tɔ́n e nǎwe ɖé sɔ́ dó nya linfín nǔjlɛ́nú ɖaxó atɔn ná, bɔ linfín nyinya ɔ bǐ fɔ́n é ɖɔhun.”

34 Nǔjlɛ́dónǔwú lɛ́ wɛ Jezu zán dó ɖɔ nǔ énɛ́ lɛ́ bǐ nú ahwan ɔ. Nǔgbó ɔ, é nɔ ɖɔ xó nú yě ma gɔn nǔjlɛ́dónǔwú ná ǎ, 35 bónú nǔ élɔ́ e è ɖɔ gbɔn gbeyíɖɔ ɔ jí é ní dó jɛnu: “Un ná hun nu ce bo ná zán nǔjlɛ́dónǔwú lɛ́ dó ɖɔ xó; un ná jlá nǔ ɖěɖěe ɖo hwlǎhwlá sín bǐbɛ́mɛ é.”*

36 Énɛ́ gúdo ɔ, é nyi ahwan ɔ, bo yi xwégbe. Ahwanvú tɔn lɛ́ wá gɔ̌n tɔn bo ɖɔ: “Tínmɛ nǔjlɛ́dónǔwú gběhan nyanya e ɖo blěe gle mɛ lɛ́ é tɔn nú mǐ.” 37 É ka yí gbe nú yě ɖɔ: “Mɛ e dó nǔkún ɖagbe ɔ é ɔ, Gbɛtɔ́ví ɔ wɛ; 38 gle ɔ, gbɛ ɔ wɛ. Nǔkún ɖagbe lɛ́ ɔ, Axɔ́súɖuto ɔ sín vǐ lɛ́ wɛ, amɔ̌, gběhan nyanya lɛ́ ɔ, mɛ nyanya ɔ sín vǐ lɛ́ wɛ, 39 bɔ kɛntɔ́ e dó yě é ɔ, Awǒvi wɛ. Nǔkúnyiyahwenu ɔ, azǎn gǔdo gúdo tɔn gbɛ élɔ́ tɔn lɛ́* wɛ, bɔ nǔkúnyatɔ́ lɛ́ nyí wɛnsagun lɛ́. 40 Hǔn, lěe è hɔn gběhan nyanya lɛ́ bo sɔ́ myɔ dó fyɔ́ yě ná gbɔn é ɔ, mɔ̌ wɛ é ná nyí gbɔn ɖo azǎn gǔdo gúdo tɔn gbɛ élɔ́ tɔn lɛ́* mɛ. 41 Gbɛtɔ́ví ɔ ná sɛ́ wɛnsagun tɔn lɛ́ dó, bɔ yě ná ɖe nǔ e nɔ nyí afɔklɛ́nnú nú mɛ lɛ́ é bǐ kpó mɛ e nɔ fɔ́n bo nɔ ɖo sɛ́n gba wɛ lɛ́ é bǐ kpó sín Axɔ́súɖuto tɔn mɛ, 42 bo ná bɛ́ yě dó myɔkpó e ɖo jiji wɛ hɛhɛ é mɛ. Fínɛ́ wɛ yě ná ya avǐ bo ná ɖu aɖǔkún ɖe. 43 Ðo hwenɛ́nu ɔ, nǔjlɔ́jlɔ́watɔ́ lɛ́ ná kɔ́n lánlán hwesivɔ́ ɖɔhun ɖo Axɔ́súɖuto Tɔ́ yětɔn tɔn mɛ. Mɛ e ɖó tó é ní bo ɖótó.

44 “Axɔ́súɖuto jǐxwé tɔn cí dɔkun e ɖo hwlǎhwlá ɖo gle ɖé mɛ, bɔ nya ɖé mɔ bo lɛ́vɔ́ sɔ́ hwlá é ɖɔhun. É víví n’i káká bɔ é yi bo sa nǔ e é ɖó lɛ́ é bǐ, bo xɔ gle énɛ́.

45 “Axɔ́súɖuto jǐxwé tɔn lɛ́ cí ajɔ̌tɔ́ tomɛyitɔ́ e ɖo jɛ̌ e xɔ akwɛ́ tawun lɛ́ é ba wɛ é ɖɔhun. 46 Ée é mɔ jɛ̌ e xɔ akwɛ́ tawun é ɖokpó é ɔ, é yi bo yá wǔ sa nǔ e é ɖó lɛ́ é bǐ, bo xɔ jɛ̌ énɛ́.

47 “Axɔ́súɖuto jǐxwé tɔn lɛ́ cí ɖɔ ɖaxó e è nyi dó xu mɛ, bɔ é wlí hweví tɛnmɛ tɛnmɛ é ɖɔhun. 48 Ée é gɔ́ é ɔ, hwehutɔ́ lɛ́ dɔn wá xu ɔ tó, bo jínjɔ́n ayǐ, lobo xo hweví e nyɔ́ lɛ́ é kplé dó xasun mɛ; amɔ̌, ée è ma sixú ɖu ǎ lɛ́ é ɔ, yě bɛ́ nyi gbě. 49 Lěe é ná nyí gbɔn ɖo azǎn gǔdo gúdo tɔn gbɛ élɔ́ tɔn lɛ́* mɛ é nɛ́. È ná sɛ́ wɛnsagun lɛ́ dó bɔ yě ná ɖe mɛ nyanya lɛ́ ɖó vo nú nǔjlɔ́jlɔ́watɔ́ lɛ́, 50 bo ná bɛ́ mɛ nyanya lɛ́ kɔn nyi myɔkpó e ɖo jiji wɛ hɛhɛ é mɛ. Fínɛ́ wɛ yě ná ya avǐ bo ná ɖu aɖǔkún ɖe.”

51 É kanbyɔ́ yě ɖɔ: “Mi ka mɔ nukúnnú jɛ nǔ énɛ́ lɛ́ bǐ mɛ a?” Yě yí gbe n’i ɖɔ: “Ɛɛn.” 52 Énɛ́ gúdo ɔ, é ɖɔ nú yě ɖɔ: “Ðó mi mɔ nukúnnú jɛ mɛ wútu ɔ, mɛ̌si ɖěbǔ e è kplɔ́n nǔ dó Axɔ́súɖuto jǐxwé tɔn wú é cí xwénɔ e ɖe nǔ yɔ̌yɔ́ lɛ́ kpó nǔ xóxó lɛ́ kpó tɔ́n sín dɔkun tɔn lɛ́ mɛ é ɖɔhun.”

53 Ée Jezu ná nǔjlɛ́dónǔwú énɛ́ lɛ́ fó gúdo é ɔ, é gosín fínɛ́. 54 Ée é wá to éɖésúnɔ tɔn mɛ é ɔ, é jɛ nǔ kplɔ́n mɛ lɛ́ jí ɖo kplɔ́ngbasá yětɔn. É kpácá yě tawun bɔ yě ɖɔ: “Fítɛ́ nya élɔ́ ka ba nǔnywɛ́ énɛ́ sín? Mɛ̌ ka ná ɛ hlɔ̌nhlɔ́n bɔ é bló nǔjíwǔ élɔ́ lɛ́? 55 Atínkpatɔ́ ɔ sín vǐ nɛ́ ǎ cé? Nɔ tɔn wɛ è nɔ ylɔ́ ɖɔ Mali ǎ cé? Nɔví tɔn súnnu lɛ́ wɛ nyí Jaki, Jozɛ́fu, Sinmɔ́ɔ kpó Judási kpó ǎ cé? 56 Nɔví tɔn nyɔ̌nu lɛ́ bǐ kpó mǐ kpó jɛ́n ɖo fí ǎ cé? Bɔ fítɛ́ é ka ba nǔwúkpíkpé énɛ́ lɛ́ bǐ sín lo?” 57 Énɛ́ wú ɔ, yě gbɛ́ ɖɔ émí kún ná ɖi nǔ n’i ó.* Amɔ̌, Jezu ɖɔ nú yě ɖɔ: “È nɔ wlí yɛ̌yi nú gbeyíɖɔ ɖé ɖo fí bǐ. To éɖésúnɔ tɔn mɛ kpó xwé éɖésúnɔ tɔn gbe kpó jɛ́n nǔ ma nɔ nyí mɔ̌ ɖe ǎ.” 58 Énɛ́ wú ɔ, é bló nǔjíwǔ gěgé ɖo fínɛ́ ǎ, ɖó nǔ e yě ma ɖi ǎ é wú.

14 Hwe énɛ́ nu ɔ, tokpɔngán* Elódu* se nǔ e Jezu wa lɛ́ é, 2 bo ɖɔ nú mɛsɛntɔ́ tɔn lɛ́ ɖɔ: “Jaan Batɛ́mublónúmɛtɔ́ ɔ wɛ. È fɔ́n ɛ sín kú, énɛ́ wú wɛ é ɖó hlɔ̌nhlɔ́n bo nɔ wa nǔ énɛ́ lɛ́.” 3 Elódu ko wlí Jaan ɖ’ayǐ bo dó wlɔ ɛ, lobo sɔ́ ɛ dó gan mɛ, ɖó Elodiadi, nɔví tɔn Filípu sín asi ɔ wú. 4 Ðó Jaan nɔ ɖo ɖiɖɔ n’i wɛ ɖɔ: “É sɔgbe xá sɛ́n ɖɔ a ní da ɛ ǎ.” 5 É ba ná hu i có, é ɖo xɛsi ɖi nú ahwan ɔ wɛ, ɖó yě nɔ mɔ Jaan dó mɔ gbeyíɖɔ. 6 Amɔ̌, hwenu e è ɖo jijizánxwe Elódu tɔn ɖu wɛ é ɔ, vǐ nyɔ̌nu Elodiadi tɔn ɖú we ɖo jǒnɔ lɛ́ nukɔn. We tɔn nyɔ́ Elódu nukúnmɛ káká 7 bɔ é d’akpá bo xwlé nǔ d’é jí ɖɔ émí ná ná ɛ nǔ ɖěbǔ e é ná byɔ́ émí é. 8 Énɛ́ ɔ, nɔ tɔn kplɔ́n nǔ i, bɔ é ɖɔ: “Nǎ mì Jaan Batɛ́mublónúmɛtɔ́ ɔ sín ta dó gannúgbɛ́jɛ́ mɛ.” 9 Nǔ énɛ́ dɔn axɔ́sú ɔ dó aluwɛ mɛ có, ɖó nǔ e é xwlé lɛ́ é kpó mɛ e ɖo nǔ ɖu xá ɛ wɛ lɛ́ é kpó* wútu ɔ, é ɖe gbe ɖɔ è ní ná ɛ Jaan sín ta. 10 Énɛ́ wú ɔ, é sɛ́ mɛ dó bɔ è yi gbo ta Jaan ɖo gankpá mɛ. 11 È sɔ́ ta tɔn dó gannúgbɛ́jɛ́ mɛ, bo zé nú ɖyɔ̌vǐ ɔ, bɔ é sɔ́ yi jó nú nɔ tɔn. 12 Nukɔnmɛ ɔ, ahwanvú Jaan tɔn lɛ́ wá, bo sɔ́ cyɔ tɔn, bo yi ɖi; énɛ́ gúdo ɔ, yě wá bo wlí nǔ e jɛ lɛ́ é ɖɔ nú Jezu. 13 Ée Jezu se mɔ̌ é ɔ, é byɔ́ tɔjíhún mɛ, bo gosín fínɛ́ ɖidó fí e jɛ zɔ é, bo ná dó nɔ éɖokpónɔ. Amɔ̌, ée ahwan ɔ se mɔ̌ é ɔ, yě gosín toxo lɛ́ mɛ, bo zɔn afɔ xwedó è.

14 Ée é wá agě jí é ɔ, é mɔ ahwan ɖaxó ɖé, bɔ nǔ yětɔn blá wǔ n’i, lobɔ é gbɔ azɔn nú azinzɔnnɔ e ɖo yě mɛ lɛ́ é. 15 Amɔ̌, ée gbadanu su é ɔ, ahwanvú tɔn lɛ́ wá gɔ̌n tɔn bo ɖɔ: “Fí élɔ́ jɛ zɔ, bɔ ganmɛ ka ko yi tawun; nyi ahwan ɔ bónú yě ná yi gletoxo lɛ́ mɛ, bo yi xɔ nǔ ɖu yěɖésúnɔ.” 16 Jezu ka ɖɔ nú yě ɖɔ: “É byɔ́ ɖɔ yě ní yi ǎ; midɛɛ lɛ́ ní ná nǔɖé yě bónú yě ní ɖu.” 17 Yě ka ɖɔ n’i ɖɔ: “Mǐ ɖó nǔɖé ɖo fí zɛ wɔ̌xúxú atɔ́ɔ́n kpó hweví we kpó wú ǎ.” 18 É ɖɔ: “Mi bɛ́ yě wá fí nú mì.” 19 Bɔ é byɔ́ ahwan ɔ ɖɔ yě ní jínjɔ́n gběhan lɛ́ jí. Énɛ́ gúdo ɔ, é sɔ́ wɔ̌xúxú atɔ́ɔ́n lɛ́ kpó hweví we lɛ́ kpó, bo kpɔ́n jǐxwé, bo byɔ́ nyɔ̌ná d’é jí, bɔ ée é fɛ́n wɔ̌xúxú lɛ́ gúdo é ɔ, é bɛ́ nú ahwanvú lɛ́, bɔ yě má nú ahwan ɔ. 20 Énɛ́ ɔ, yě bǐ ɖu nǔ bo gɔ́ xo, bɔ yě bɛ́ wɔ̌xúxú fínfɛ́n e kpo lɛ́ é, bɔ xasun 12 gɔ́. 21 Súnnu 5 000 mɔ̌ wɛ ɖu nǔ; è ka xa nyɔ̌nu lɛ́ kpó vǐ kpɛví lɛ́ kpó ǎ. 22 Énɛ́ gúdo tlóló ɔ, é ɖɔ nú ahwanvú tɔn lɛ́ ɖɔ yě ní byɔ́ tɔjíhún ɔ mɛ, bo jɛ nukɔn nú émí ɖidó agě ɖě ɔ jí, hwenu e émí ná ɖo ahwan ɔ nyi wɛ é.

23 Ée é nyi ahwan ɔ gúdo é ɔ, é xá só jí, bo ná nɔ éɖokpónɔ lobo xo ɖɛ. Hwenu e ablu dó é ɔ, é kpo ɖo fínɛ́ éɖokpónɔ. 24 Din ɔ, tɔjíhún ɔ ko ɖo mɛ̌tlu kanweko mɔ̌kpán* dó agě, bo ɖo xwi ɖí xá aslɔkɛ́ lɛ́ wɛ, ɖó yě ɖo jɔhɔn kpé wɛ wútu. 25 Amɔ̌, ayǐtéhɔ̌nnu mɔ̌* ɔ, é ɖi zɔnlin gbɔn xu ɔ jí ja gɔ̌n yětɔn. 26 Hwenu e ahwanvú lɛ́ mɔ ɛ ɖo zɔnlin ɖi gbɔn xu ɔ jí wɛ é ɔ, ayi yětɔn gba dó, bɔ yě ɖɔ: “Dlɔ̌ kú wɛ mǐ ɖe a?” Bɔ xɛsi jɛ yě jí, bɔ yě sú xó. 27 Jezu ka ɖɔ nú yě tlóló ɖɔ: “Mi kpankɔ́n! Nyɛ wɛ; mi ma ɖi xɛsi ó.” 28 Piyɛ́ɛ yí gbe n’i ɖɔ: “Aklúnɔ, ényí hwi wɛ hǔn, ɖe gbe nú mì bónú má ɖi zɔnlin gbɔn sin ɔ jí wá gɔ̌n towe.” 29 Jezu ɖɔ: “Wǎ!” Énɛ́ wú ɔ, Piyɛ́ɛ jɛ te sín tɔjíhún ɔ mɛ, bo ɖi zɔnlin gbɔn sin ɔ jí ɖidó Jezu gɔ́n. 30 Amɔ̌, ée é mɔ bɔ jɔhɔn ɔ ɖo nyinyi wɛ syɛ́nsyɛ́n é ɔ, xɛsi jɛ jǐ tɔn. Bɔ ée é jɛ syɔ́syɔ́ jí é ɔ, é sú xó bo ɖɔ: “Aklúnɔ, hwlɛ̌n mì!” 31 Tlóló ɔ, Jezu dlɛ́n alɔ bo nya ɛ wlí, lobo ɖɔ n’i ɖɔ: “Nǔɖiɖi kpɛvínɔ, étɛ́wú a ka xo nǔ kpɔ́n?” 32 Ée yě byɔ́ tɔjíhún ɔ mɛ gúdo é ɔ, jɔhɔn ɔ hwíhwɛ́. 33 Énɛ́ gúdo ɔ, mɛ e ɖo tɔjíhún ɔ mɛ lɛ́ é ɖe kɔ́* n’i bo ɖɔ: “Vǐ Mawu tɔn wɛ a nyí nǔgbó.” 34 Bɔ yě d’asá xu ɔ, bo wá Jenɛzalɛ́ti yíkúngban jí.

35 Ðó mɛ e ɖo fínɛ́ lɛ́ é tuun i céɖécéɖé wútu ɔ, yě sɛ́ wɛn dó to e lɛ́ lɛ̌ dó fínɛ́ lɛ́ é bǐ mɛ, bɔ mɛ lɛ́ kplá mɛ e ɖo azɔn jɛ wɛ lɛ́ é bǐ wá n’i. 36 Bɔ yě sa vo n’i ɖɔ émí ní vɛ́ ɖ’alɔ awu tɔn aga tɔn ɔ sín kɛyɛ wú kpowun. Énɛ́ ɔ, yě mɛ e ɖ’alɔ wú lɛ́ é bǐ sín azɔn gbɔ mlɛ́mlɛ́.

15 Énɛ́ gúdo ɔ, Falizyɛn lɛ́ kpó sɛ́nkplɔ́nmɛtɔ́ lɛ́ kpó gosín Jeluzalɛ́mu wá Jezu gɔ́n, bo ɖɔ: 2 “Étɛ́wú ahwanvú towe lɛ́ ma ka nɔ xwedó hwɛndonúwiwa tɔ́gbó lɛ́ tɔn lɛ́ ǎ? Ði kpɔ́ndéwú ɔ, yě nɔ klɔ́ alɔ* yětɔn lɛ́ hwenu e yě ja nǔ ɖu gbé é ǎ.”

3 É ka yí gbe nú yě ɖɔ: “Étɛ́wú mi ka nɔ ɖó dó hwɛndonúwiwa mitɔn lɛ́ wú, bo ma nɔ xwedó sɛ́n Mawu tɔn ǎ? 4 Ði kpɔ́ndéwú ɔ, Mawu ɖɔ: ‘Wlǐ yɛ̌yi nú tɔ́ towe kpó nɔ towe kpó,’ é lɛ́ ɖɔ: ‘Mɛ e ná zun tɔ́ tɔn alǒ nɔ tɔn* é ɔ, è ní hu i.’ 5 Amɔ̌, midɛɛ lɛ́ ɖɔ: ‘Mɛ ɖěbǔ e ná ɖɔ nú tɔ́ tɔn alǒ nɔ tɔn ɖɔ: “Nǔ ɖěbǔ e un ɖó bɔ é sixú hɛn le wá nú we é ɔ, nǔníná wɛ bɔ un ko sɔ́ ɖó vo nú Mawu” é ɔ, 6 é sɔ́ byɔ́ dandan ɖɔ é ní wlí yɛ̌yi nú tɔ́ tɔn ǎ.’ Énɛ́ wú ɔ, mi xo xó Mawu tɔn ɔ nyi kɛ́n ɖó hwɛndonúwiwa mitɔn lɛ́ wú. 7 Yɛmɛnúwatɔ́ è mi, Ezayíi sín hwɛ jɔ hwenu e é ɖɔ xó élɔ́ ɖ’ayǐ dó mi wú é: 8 ‘Togun élɔ́ nɔ wlí yɛ̌yi nú mì ɖo nu, amɔ̌, ayi yětɔn lín dó mì tawun. 9 Yě ɖo sinsɛn mì wɛ dó wǔvɔ́, ɖó sɛ́n gbɛtɔ́ lɛ́ tɔn lɛ́ wɛ yě nɔ kplɔ́n mɛ.’” 10 Énɛ́ gúdo ɔ, é ylɔ́ ahwan ɔ ɖɔ yě ní sɛkpɔ́ émí, bo ɖɔ: “Mi ɖótó bo mɔ nukúnnú jɛ mɛ: 11 É nyí nǔ e byɔ́ gbɛtɔ́ nu mɛ é wɛ nɔ hɛn gbɛtɔ́ blí ǎ, loɔ, nǔ e tɔ́n sín gbɛtɔ́ nu mɛ é wɛ nɔ hɛn gbɛtɔ́ blí.”

12 Énɛ́ gúdo ɔ, ahwanvú lɛ́ wá bo ɖɔ n’i ɖɔ: “A ka tuun ɖɔ ée Falizyɛn lɛ́ se nǔ e a ɖɔ é ɔ, é nyí afɔklɛ́nnú* nú yě a?” 13 É yí gbe nú yě ɖɔ: “Atín ɖěbǔ e Tɔ́ ce jǐxwé tɔn ɔ ma tun ǎ é ɔ, è ná hɔn ɖɔ ná. 14 Mi wɔn ya nú yě. Alixlɛ́mɛtɔ́ nukúntɔ́nnɔ lɛ́ wɛ nú yě. Ényí nukúntɔ́nnɔ ɖé wá yi ɖo ali xlɛ́ nukúntɔ́nnɔ ɖěvo wɛ hǔn, yě mɛ we lɛ́ bǐ wɛ ɖo do mɛ ná jɛ wɛ nɛ́.” 15 Piyɛ́ɛ ɖɔ n’i ɖɔ: “Tínmɛ nǔjlɛ́dónǔwú ɔ nú mǐ.” 16 Bɔ é ɖɔ: “Mi lɔ ko mɔ nukúnnú jɛ mɛ ǎ wɛ a? 17 Mi tuun ɖɔ nǔ ɖěbǔ e byɔ́ nu mɛ é nɔ gbɔn adɔgo mɛ, bɔ è nɔ wá yi ɖe kɔn nyi adado mɛ ǎ cé? 18 É ɖo mɔ̌ có, nǔ ɖěbǔ e tɔ́n sín nu mɛ é ɔ, ayi mɛ wɛ é nɔ gosín, bɔ nǔ énɛ́ lɛ́ wɛ nɔ hɛn gbɛtɔ́ blí. 19 Ði kpɔ́ndéwú ɔ, ayi mɛ wɛ linlin nyanya lɛ́ nɔ gosín: mɛhuhu, afɔdógbě alǒ nyɔ̌nu ɖěvo biba, agalilɛ,* ajojija, kúnnuagɔɖiɖe, nunylánylá. 20 Nǔ e nɔ hɛn gbɛtɔ́ blí lɛ́ é nɛ́; alɔ ma klɔ́* cóbó ɖu nǔ wɛ nɔ hɛn gbɛtɔ́ blí ǎ.”

21 Ée Jezu gosín fínɛ́ é ɔ, é yi Tíi kpó Sidɔ́ɔn kpó sín xá mɛ. 22 Énɛ́ ɔ, nyɔ̌nu Fenisíinu ɖé gosín xá énɛ́ mɛ bo wá, bo sú xó ɖɔ: “Aklúnɔ, Davídi Ví, kú nǔbláwǔ nú mì. Vǐ nyɔ̌nu ce ɖo wǔvɛ́ se wɛ tawun ɖó awǒvi ɖé ɖo jǐ tɔn.” 23 Amɔ̌, é kɛ nu d’é mɛ n’i ǎ. Énɛ́ wú ɔ, ahwanvú tɔn lɛ́ sɛkpɔ́ ɛ, bo byɔ́ ɛ ɖɔ: “Ðɔ n’i ɖɔ é ní yi, ɖó é ɖo xó sú wɛ kpowun ɖo gǔdo mǐtɔn.” 24 É yí gbe nú yě ɖɔ: “Togun Izlayɛ́li tɔn e cí lɛ̌ngbɔ́ búbú ɖɔhun é kɛ́ɖɛ́ gɔ́n wɛ Mawu sɛ́ mì dó.” 25 Amɔ̌, nyɔ̌nu ɔ wá bo ɖe kɔ́* n’i lobo ɖɔ: “Aklúnɔ, d’alɔ mì!” 26 É ka yí gbe n’i ɖɔ: “É sɔgbe ɖɔ è ní sɔ́ nǔɖuɖu vǐ lɛ́ tɔn bo nyi dó cukúví lɛ́ ǎ.” 27 Nyɔ̌nu ɔ ɖɔ: “Nǔgbó wɛ Aklúnɔ, amɔ̌, cukúví lɛ́ nɔ ɖu nǔɖuɖu e hlɛ́n kɔn nyi ayǐ sín távo mɛ e ɖó yě lɛ́ é tɔn jí lɛ́ é.” 28 Jezu ka yí gbe n’i ɖɔ: “Nyɔ̌nu, nǔɖiɖi towe d’agba tawun mɛ! Lěe a jló gbɔn é ɔ, ní bo nyí gbɔn mɔ̌ nú we.” Bɔ vǐ nyɔ̌nu tɔn sín azɔn gbɔ tlóló.

29 Ée Jezu gosín fínɛ́ é ɔ, é wá Galilée xu ɔ kpá, bɔ ée é xá só jí gúdo é ɔ, é jínjɔ́n fínɛ́. 30 Énɛ́ ɔ, ahwan ɖaxó ɖé sɛkpɔ́ ɛ, bo kplá afɔkponɔ lɛ́, alɔkponɔ lɛ́, nukúntɔ́nnɔ lɛ́, ɖɛ̌kúnánɔ lɛ́, kpó azinzɔnnɔ gěgé ɖěvo lɛ́ kpó wá, lobo zé yě ɖó afɔ tɔn lɛ́ kɔn, bɔ é gbɔ azɔn nú yě. 31 Ée ahwan ɔ mɔ bɔ ɖɛ̌kúnánɔ lɛ́ ɖo xó ɖɔ wɛ, alɔkponɔ lɛ́ ɖo ganjí jɛ wɛ, afɔkponɔ lɛ́ ɖo zɔnlin ɖi wɛ, bɔ nukúntɔ́nnɔ lɛ́ ɖo nǔ mɔ wɛ é ɔ, é jí wǔ nú yě, bɔ yě kpa susu nú Mawu Izlayɛ́li tɔn.

32 Amɔ̌, Jezu ylɔ́ ahwanvú tɔn lɛ́ bo ɖɔ: “Ahwan ɔ sín nǔ blá wǔ nú mì, ɖó é ko bló azǎn atɔn din bɔ yě ɖo fí xá mì, yě ka ɖó nǔ ɖě bo ná ɖu ǎ. Un ba ɖɔ yě ní ɖo xovɛ́ bónú má nyi yě ǎ, ɖó yě sixú ba yěɖée mɛ kpo ɖo alixo.” 33 Ahwanvú lɛ́ ka ɖɔ n’i ɖɔ: “Ðo fí élɔ́ e jɛ zɔ é ɔ, fítɛ́ mǐ ka ná mɔ wɔ̌xúxú e ná kpé bɔ ahwan ɖaxó élɔ́ ná sixú ɖu nǔ bo gɔ́ xo é ɖe?” 34 Énɛ́ ɔ, Jezu ɖɔ nú yě ɖɔ: “Wɔ̌xúxú nabí ka ɖo mi sí?” Yě ɖɔ: “Tɛ́nwe, kpó hweví kpɛví kpɛví kléwún ɖé kpó.” 35 Énɛ́ ɔ, ée é byɔ́ ahwan ɔ ɖɔ yě ní jínjɔ́n kɔ́mɛ gúdo é ɔ, 36 é zé wɔ̌xúxú tɛ́nwe lɛ́ kpó hweví lɛ́ kpó, bɔ ée é dó kú nú Mawu gúdo é ɔ, é fɛ́n bo jɛ sísɔ́ nú ahwanvú lɛ́ jí, bɔ ahwanvú lɛ́ má nú ahwan ɔ. 37 Yě bǐ ɖu nǔ bo gɔ́ xo, bɔ ahwanvú lɛ́ xo wɔ̌xúxú fínfɛ́n e kpo lɛ́ é kplé bɔ xasun ɖaxó tɛ́nwe gɔ́. 38 Súnnu 4 000 wɛ ɖu nǔ, è ka xa nyɔ̌nu lɛ́ kpó vǐ kpɛví lɛ́ kpó ǎ. 39 Gǔdo mɛ ɔ, ée é nyi ahwan ɔ gúdo é ɔ, é byɔ́ tɔjíhún mɛ bo wá Magadán sín xá mɛ.

16 Ðo fínɛ́ ɔ, Falizyɛn lɛ́ kpó Saduseɛn lɛ́ kpó sɛkpɔ́ ɛ. Bo ná dó tɛ́n ɛ kpɔ́n ɔ, yě byɔ́ ɛ ɖɔ é ní ɖe wuntun ɖé xlɛ́ émí ɖo Mawu nyíkɔ mɛ. 2 Jezu ka ɖɔ nú yě ɖɔ: “Ényí gbadanu su ɔ, mi nɔ ɖɔ: ‘Gbɛ mɛ ná hɔ́n sɔ, ɖó hwe gba amizɛ́n.’ 3 Ényí é jɛ zǎnzǎn ɔ, mi nɔ ɖɔ: ‘Gbɛ mɛ ná fá bɔ jǐ ná ja égbé, ɖó jǐnukúnsin myá bɔ akpɔ́kpɔ́ lɛ́vɔ́ dó.’ Mi nɔ tuun tínmɛ e mi ná ná dó lěe jǐnukúnsin cí é wú é, amɔ̌, mi mɔ nukúnnú jɛ tínmɛ nǔ e ɖo jijɛ wɛ din lɛ́ é tɔn wú ǎ. 4 Jijimɛ nyanya afɔdógbětɔ́* ɖé kpo ɖo wuntun ɖé ba wɛ, amɔ̌, è ná ɖe wuntun ɖěbǔ xlɛ́ ɛ zɛ wuntun e kunkplá Jonási é wú ǎ.” Énɛ́ ɔ, é jó yě dó nyi fínɛ́, bo ɖidó.

5 Din ɔ, ahwanvú lɛ́ d’asá xu ɔ bo yi akpá ɖě ɔ xwé, amɔ̌, yě flín bo hɛn wɔ̌xúxú ǎ. 6 Jezu ɖɔ nú yě ɖɔ: “Nukún mitɔn lɛ́ ní ɖo te, bónú mi ní cɔ́ miɖée dó Falizyɛn lɛ́ kpó Saduseɛn lɛ́ kpó sín tɔ́n wú.” 7 Énɛ́ wú ɔ, yě jɛ xó ɖɔ jí ɖo yěɖée tɛ́ntin, bo ɖɔ: “Mǐ hɛn wɔ̌xúxú ɖěbǔ ǎ.” 8 Ðó Jezu tuun ɖɔ yě ɖo xó ɖɔ wɛ ɖo yěɖée lɛ́ tɛ́ntin wútu ɔ, é ɖɔ: “Étɛ́wú mi ka ɖo xó ɖɔ wɛ ɖo miɖée lɛ́ tɛ́ntin ɖɔ émí kún ɖó wɔ̌xúxú ɖěbǔ ó, nǔɖiɖi kpɛvínɔ è mi? 9 Mi ko mɔ nǔ jɛ mɛ ǎ jɛ́n wɛ a? Mi sɔ́ flín lěe un sɔ́ wɔ̌xúxú atɔ́ɔ́n dó ná nǔɖuɖu súnnu 5 000 gbɔn é kpó xasun nabí e kpo ɖ’é jí, bɔ mi bɛ́ é kpó ǎ wɛ a? 10 Alǒ, mi sɔ́ flín lěe un sɔ́ wɔ̌xúxú tɛ́nwe lɛ́ dó ná nǔɖuɖu súnnu 4 000 gbɔn é kpó xasun ɖaxó nabí e kpo ɖ’é jí, bɔ mi bɛ́ é kpó ǎ wɛ a? 11 Étɛ́wú mi ma ka mɔ nǔ jɛ wú ɖɔ é kún nyí wɔ̌xúxú wú ɖɔ xó nú mi dó wɛ un ɖe ó ǎ? Nǔ e ɖɔ nú mi wɛ un ɖe é wɛ nyí ɖɔ mi ní cɔ́ miɖée dó Falizyɛn lɛ́ kpó Saduseɛn lɛ́ kpó sín tɔ́n wú.” 12 Énɛ́ ɔ, yě mɔ nǔ jɛ wú ɖɔ ɖiɖɔ nú émí wɛ é ɖe ɖɔ émí ní cɔ́ émíɖée dó nǔkplɔ́nmɛ Falizyɛn lɛ́ kpó Saduseɛn lɛ́ kpó tɔn wú, é kún nyí dó wɔ̌xúxú sín tɔ́n wú ó.

13 Ée Jezu wá Sezalée Filípu tɔn sín xá mɛ é ɔ, é kanbyɔ́ ahwanvú tɔn lɛ́ ɖɔ: “Mɛ̌ Gbɛtɔ́ví ɔ ka nyí bɔ mɛ lɛ́ nɔ ɖɔ?” 14 Yě ɖɔ: “Mɛɖé lɛ́ nɔ ɖɔ Jaan Batɛ́mublónúmɛtɔ́ ɔ, mɛ ɖěvo lɛ́ nɔ ɖɔ Elíi, mɛ ɖěvo lɛ́ ka nɔ lɛ́ ɖɔ Jelemíi alǒ gbeyíɖɔ lɛ́ ɖě.” 15 É ɖɔ nú yě ɖɔ: “Midɛɛ lɛ́ ka lo, mɛ̌ un ka nyí bɔ mi nɔ ɖɔ?” 16 Sinmɔ́ɔ Piyɛ́ɛ yí gbe n’i ɖɔ: “Hwi wɛ nyí Klísu ɔ, Mawu gbɛɖe ɔ sín Vǐ.” 17 Jezu ɖɔ n’i ɖɔ: “Awǎjijɛnɔ wɛ nú we, Sinmɔ́ɔ Jonási ví, ɖó é nyí agbaza kpó hun kpó* wɛ ɖe énɛ́ xlɛ́ we ǎ, loɔ, Tɔ́ ce e ɖo jǐxwé é wɛ ɖe xlɛ́ we. 18 Gɔ́ ná ɔ, má ɖɔ nú we: Piyɛ́ɛ wɛ a nɔ nyí. Un ná sɔ́ agun ce jínjɔ́n awǐnnya jí, bɔ Yɔdo* sín hɔntogbó lɛ́ ná ɖó acɛ dó jǐ tɔn ǎ. 19 Un ná fɔ Axɔ́súɖuto jǐxwé tɔn sín cávi lɛ́ nú we, bɔ nǔ ɖěbǔ e a blá ɖo ayǐkúngban jí é ɔ, è ná ko blá ɖo jǐxwé, lobɔ nǔ ɖěbǔ e a tún ɖo ayǐkúngban jí é ɔ, è ná ko tún ɖo jǐxwé.” 20 Énɛ́ gúdo ɔ, é gbɛ́ nú ahwanvú tɔn lɛ́ syɛ́nsyɛ́n ɖɔ yě ní ma ɖɔ nú mɛ ɖěbǔ ɖɔ émí wɛ nyí Klísu ɔ ó.

21 Sín hwenɛ́nu ɖidó ɔ, Jezu jɛ tíntínmɛ nú ahwanvú tɔn lɛ́ jí ɖɔ émí ɖó ná yi Jeluzalɛ́mu bo ná se wǔvɛ́ tawun ɖo tomɛxó lɛ́, vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó sín alɔ mɛ, bɔ è ná hu émí, lobɔ azǎn tɔn atɔngɔ́ ɔ gbe ɔ, è ná fɔ́n émí. 22 Ée Piyɛ́ɛ se mɔ̌ é ɔ, é kplá ɛ jɛ kɛ́n ɖokpó bo jɛ nǔ gbɛ́ n’i jí, bo ɖɔ: “Mawu ma lɔn ó, Aklúnɔ; nǔ mɔ̌hun ná jɛ dó jǐ towe gbeɖé ǎ.” 23 Amɔ̌, é dó gǔdo Piyɛ́ɛ, bo ɖɔ n’i ɖɔ: “Wǎ yi gǔdo ce, Satáan! Afɔklɛ́nnú wɛ a nyí nú mì, ɖó linlin towe lɛ́ sɔgbe xá Mawu tɔn lɛ́ ǎ, loɔ, gbɛtɔ́ lɛ́ tɔn wɛ.”

24 Énɛ́ ɔ, Jezu ɖɔ nú ahwanvú tɔn lɛ́ ɖɔ: “Ényí mɛɖé jló ná xwedó mì hǔn, é ní gbɛ́ éɖée* bo sɔ́ yatín* tɔn, lobo nɔ xwedó mì. 25 Ðó mɛ ɖěbǔ e jló ná hwlɛ́n gbɛ* tɔn é ná hɛn bú, amɔ̌, mɛ ɖěbǔ e hɛn gbɛ* tɔn bú ɖó nyɛ wú é ná lɛ́ mɔ. 26 Nǔgbó ɔ, ényí mɛɖé jɛ tagba bo ɖó nǔ e ɖo gbɛ ɔ mɛ lɛ́ é bǐ, bo ka hɛn gbɛ* éɖésúnɔ tɔn bú ɔ, le tɛ́ ka ɖ’é mɛ n’i? Alǒ, étɛ́ mɛɖé ka sixú ná dó xɔ gbɛ* éɖésúnɔ tɔn? 27 Ðó Gbɛtɔ́ví ɔ ɖó ná wá ɖo Tɔ́ tɔn sín susu mɛ kpó wɛnsagun tɔn lɛ́ kpó, bɔ énɛ́ gúdo ɔ, é ná sú axɔ́ mɛ ɖokpó ɖokpó sɔgbe xá walɔ tɔn. 28 Má ɖɔ nǔgbó nú mi, mɛɖé lɛ́ ɖo mɛ e ɖo fí lɛ́ é mɛ, bo ná to mɔ Gbɛtɔ́ví ɔ sín wǐwá ɖo Axɔ́súɖuto tɔn mɛ hwɛ̌ cóbó ná kú.”

17 Azǎn ayizɛ́n gúdo ɔ, Jezu kplá Piyɛ́ɛ, Jaki kpó nɔví tɔn Jaan kpó, bɔ yě xá só ɖaxó ɖé jí yěɖokpónɔ. 2 Bɔ é húzú ninɔmɛ ɖo nukɔn yětɔn; nukúnmɛ tɔn nɔ kɔ́n hwesivɔ́ ɖɔhun, bɔ awu tɔn aga tɔn lɛ́ nɔ kɔ́n* wěziza ɖɔhun. 3 Mɔyízi kpó Elíi kpó tɔ́n dó yě jí ɖo fínɛ́ bo ɖo xó ɖɔ ɖó kpɔ́ xá ɛ wɛ. 4 Bɔ Piyɛ́ɛ ɖɔ nú Jezu ɖɔ: “Aklúnɔ, fí élɔ́ e mǐ ɖe é nyɔ́ mɛ! Ényí a jló ɔ, nǎ gbá goxɔ atɔn ɖó fí, ɖokpó ná nyí towe, ɖokpó ná nyí Mɔyízi tɔn, bɔ ɖokpó ná nyí Elíi tɔn.” 5 Hwenu e é kpo ɖo xó ɖɔ wɛ é ɔ, akpɔ́kpɔ́ e ɖo kínkɔ́n wɛ é ɖé cyɔ́n yě, bɔ gbe ɖé ɖi sín akpɔ́kpɔ́ ɔ mɛ bo ɖɔ: “Vǐ súnnu ce vívɛ́ná ɔ ɖíe, xomɛ nɔ hun mì dó wǔtu tɔn. Mi ɖótó è.” 6 Ée ahwanvú lɛ́ se mɔ̌ é ɔ, xɛsi ɖaxó ɖé jɛ yě jí, bɔ yě xwe agbɔ̌nnusú do. 7 Énɛ́ ɔ, Jezu sɛkpɔ́ yě bo ɖó alɔ yě wú lobo ɖɔ: “Mi sí te. Mi ma ɖi xɛsi ó.” 8 Ée yě zé ta dó jǐ é ɔ, yě sɔ́ mɔ mɛ ɖěbǔ zɛ Jezu ɖokpónɔ wú ǎ. 9 Ée yě ɖo te jɛ sín só ɔ jí wɛ é ɔ, Jezu dó sɛ́n nú yě ɖɔ: “Mi ma ɖɔ nǔmimɔ ɔ sín xó nú mɛ ɖěbǔ cóbónú è ní fɔ́n Gbɛtɔ́ví ɔ sín kú ó.”

10 Amɔ̌, ahwanvú lɛ́ kanbyɔ́ ɛ ɖɔ: “Étɛ́wú sɛ́nkplɔ́nmɛtɔ́ lɛ́ ka nɔ ɖɔ ɖɔ Elíi ɖó ná to wá hwɛ̌ lo?” 11 É ka ɖɔ nú yě ɖɔ: “Elíi ja nǔgbó bo ná jlá nǔ lɛ́ bǐ ɖó. 12 É ɖo mɔ̌ có, má ɖɔ nú mi, Elíi ko wá, yě ka tuun ɖɔ é wɛ ǎ, bo wa nǔ e jló yě lɛ́ é bǐ xá ɛ. Mɔ̌ ɖokpó ɔ, Gbɛtɔ́ví ɔ lɔ ná se wǔvɛ́ ɖo alɔ yětɔn mɛ.” 13 Énɛ́ ɔ, ahwanvú lɛ́ mɔ nǔ jɛ wú ɖɔ Jaan Batɛ́mublónúmɛtɔ́ ɔ sín xó ɖɔ nú émí wɛ é ɖe.

14 Hwenu e yě wá fí e ahwan ɔ ɖe é ɔ, nya ɖé sɛkpɔ́ ɛ, bo jɛ kpo ɖo nukɔn tɔn lobo ɖɔ: 15 “Aklúnɔ, kú nǔbláwǔ nú vǐ súnnu ce, ɖó é nɔ kú adǐngbe bɔ lěe é ɖe é nyɔ́ ɖěbǔ ǎ. É nɔ jɛ myɔ mɛ hwɛhwɛ bo nɔ lɛ́ jɛ sin mɛ hwɛhwɛ. 16 Un kplá ɛ wá nú ahwanvú towe lɛ́, yě ka kpé wú bo gbɔ azɔn n’i ǎ.” 17 Jezu ka yí gbe ɖɔ: “Jijimɛ gblégblé nǔmaɖitɔ́ è mi, káká jɛ hwetɛ́nu un ka ɖó ná nɔ kpɔ́ xá mi yi jɛ? Káká jɛ hwetɛ́nu un ka ɖó ná xwe nǔ mitɔn ɖɔ yi jɛ? Mi kplá ɛ wá fí nú mì.” 18 Énɛ́ gúdo ɔ, Jezu ɖe gbe dó awǒvi ɔ, bɔ é gosín nyaví ɔ jí, lobɔ azɔn tɔn gbɔ n’i tlóló. 19 Ahwanvú lɛ́ ka wá mɔ Jezu ɖo nǔglɔ́ bo ɖɔ: “Étɛ́wú mǐ ma ka kpé wú bo nya awǒvi ɔ ǎ?” 20 É ɖɔ nú yě ɖɔ: “Nǔɖiɖi kpɛví e mi ɖó é wú wɛ. Ðó, má ɖɔ nǔgbó nú mi, ényí mi ɖó nǔɖiɖi bɔ é sɔ mutádi sín kwín* ɔ, mi ná ɖɔ nú só élɔ́ ɖɔ: ‘Sɛ tɛn sín fí bo jɛ dɔ̌n,’ bɔ é ná sɛ tɛn, lobɔ nǔ ɖěbǔ ná gló mi ǎ.” 21* ——

22 Hwenu e yě kplé ɖó kpɔ́ ɖo Galilée é wɛ Jezu ɖɔ nú yě ɖɔ: “È ɖo Gbɛtɔ́ví ɔ ná sa wɛ, bo ná jó è nyi gbɛtɔ́ lɛ́ sín alɔ mɛ, 23 bɔ yě ná hu i, lobɔ azǎn tɔn atɔngɔ́ ɔ gbe ɔ, è ná fɔ́n ɛ.” Énɛ́ ɔ, yě byɔ́ aluwɛ ɖaxó ɖé mɛ.

24 Ée yě wá Kafaanawúmu gúdo é ɔ, mɛ e nɔ cyán dlǎkumu* we* sín takwɛ́ lɛ́ é sɛkpɔ́ Piyɛ́ɛ bo ɖɔ: “Mɛ̌si mitɔn nɔ sú dlǎkumu we sin takwɛ́ ɔ ɖě ǎ wɛ a?” 25 É ɖɔ: “Ɛɛn.” Amɔ̌, ée é byɔ́ xwé ɔ gbe é ɔ, Jezu jɛ nukɔn bo ɖɔ xó n’i bo ɖɔ: “Sinmɔ́ɔ, étɛ́ a ka lin? Mɛ ɖětɛ́ lɛ́ sí axɔ́sú ayǐkúngban ɔ jí tɔn lɛ́ ka nɔ yí dekwɛ́ lɛ́ alǒ takwɛ́ lɛ́ ɖe? Vǐ yětɔn lɛ́ sí wɛ a? Alǒ, jǒnɔ lɛ́ sí?” 26 Ée é ɖɔ: “Jǒnɔ lɛ́ sí wɛ” é ɔ, Jezu ɖɔ n’i ɖɔ: “Hǔn, énɛ́ xlɛ́ ɖɔ vǐ lɛ́ kún ɖó ná sú takwɛ́ ó. 27 Amɔ̌, bónú mǐ ma wá nyí afɔklɛ́nnú nú yě ó wútu ɔ, yi xu jí, bo ɖó mlɛ, lobo sɔ́ hweví nukɔntɔn e a ná wlí é. Ényí a hun nu tɔn ɔ, a ná mɔ kpatágankwɛ́* ɖokpó ɖ’é mɛ. Sɔ́ bo yi sú takwɛ́ nyi kpó hwi kpó tɔn ná.”

18 Hwe énɛ́ nu ɔ, ahwanvú lɛ́ sɛkpɔ́ Jezu bo kanbyɔ́ ɛ ɖɔ: “Mɛ̌ ka nyí mɛ e hú gǎn mɛ bǐ ɖo Axɔ́súɖuto jǐxwé tɔn mɛ é?” 2 É ka ylɔ́ vǐ kpɛví ɖokpó, bo sɔ́ ɛ ɖó te ɖo tɛ́ntin yětɔn, 3 lobo ɖɔ: “Má ɖɔ nǔgbó nú mi, ényí mi ma húzú jijɔ bǐ mlɛ́mlɛ́* bo cí vǐ kpɛví lɛ́ ɖɔhun ǎ ɔ, mi ná byɔ́ Axɔ́súɖuto jǐxwé tɔn mɛ gbeɖé ǎ. 4 Énɛ́ wú ɔ, mɛ ɖěbǔ e ná sɔ́ éɖée hwe vǐ kpɛví élɔ́ ɖɔhun é wɛ ná nyí mɛ e hú gǎn mɛ bǐ ɖo Axɔ́súɖuto jǐxwé tɔn mɛ é; 5 bɔ mɛ ɖěbǔ e yí vǐ kpɛví lěhun ɖó nyǐkɔ ce wútu é, yí nyi lɔmɔ̌. 6 Amɔ̌, mɛ ɖěbǔ e ná nyí afɔklɛ́nnú nú mɛ ɖokpó ɖo mɛ kpɛví élɔ́ lɛ́ e ɖi nǔ nú mì é mɛ é ɔ, é ná kpɔ́n te n’i hú ɖɔ è ní sin sé ɖaxó* e tócí nɔ lílɛ́ é dó kɔ n’i, bo yi syɔ́ ɛ dó xuzan mɛ.

7 “Heelú gbɛ ɔ, ɖó afɔklɛ́nnú tɔn lɛ́ wútu! Nǔgbó ɔ, afɔklɛ́nnú lɛ́ ná wá jɛ́n wɛ, amɔ̌, heelú mɛ e jí afɔklɛ́nnú ná gbɔn bo wá é! 8 Énɛ́ wú ɔ, ényí alɔ towe alǒ afɔ towe nyí afɔklɛ́nnú nú we hǔn, sɛ́n síin bo sɔ́ nyi gbě. É ná kpɔ́n te nú we ɖɔ a ní nyí alɔkponɔ alǒ afɔkponɔ bo mɔ gbɛ hú ɖɔ a ní ɖó alɔ we alǒ afɔ we, bɔ è ka ná sɔ́ we nyi dó zo mavɔmavɔ* mɛ. 9 Gɔ́ ná ɔ, ényí nukún towe nyí afɔklɛ́nnú nú we hǔn, ɖe síin bo sɔ́ nyi gbě. É ná kpɔ́n te nú we ɖɔ a ní ɖó nukún ɖokpó bo mɔ gbɛ hú ɖɔ a ní ɖó nukún we, bɔ è ka ná sɔ́ we nyi dó Jeyɛ́nu* myɔnɔ ɔ mɛ. 10 Mi cɔ́ miɖée bo ma gɔn ya ké nú mɛ kpɛví élɔ́ lɛ́ ɖokpó ó, ɖó má ɖɔ nú mi, wɛnsagun yětɔn e ɖo jǐxwé lɛ́ é ɖo Tɔ́ ce e ɖo jǐxwé é nukɔn tɛgbɛ. 11* ——

12 “Étɛ́ mi ka lin? Ényí nya ɖé ɖó lɛ̌ngbɔ́ 100 bɔ ɖokpó bú ɔ, é ná jó 99 lɛ́ dó nyi só lɛ́ jí, bo yi ba ɖokpó e bú é ǎ cé? 13 Bɔ ényí é mɔ ɛ ɔ, má ɖɔ nǔgbó nú mi, é nɔ dó xomɛhunhun n’i hú 99 e ma bú ǎ lɛ́ é. 14 Mɔ̌ ɖokpó ɔ, Tɔ́ ce* e ɖo jǐxwé é ba ɖěbǔ ɖɔ mɛ kpɛví élɔ́ lɛ́ ɖokpó vɔ́vɔ́ ní dɔn ǎ.

15 “Gɔ́ ná ɔ, ényí nɔví towe hu hwɛ dó we hǔn, yi mɔ ɛ bo ɖɔ nǔwanyido tɔn* n’i ɖo hwi kpó é kpó kɛ́ɖɛ́ tɛ́ntin. Ényí é se xó towe hǔn, a lɛ́ kɔ nú nɔví towe wá ali ɖagbe ɔ jí nɛ́. 16 Amɔ̌, ényí é ma ɖótó we ǎ hǔn, kplá mɛ ɖokpó alǒ mɛ we dó hwiɖée jí, bónú è ná dó sixú kú dó nǔ lɛ́ bǐ jí, ɖó kúnnuɖiɖe mɛ we alǒ mɛ atɔn tɔn wú. 17 Ényí é ma ɖótó yě ǎ hǔn, ɖɔ nú agun ɔ. Ényí é ma ɖótó agun ɔ lɔ ǎ hǔn, nɔ kpɔ́n ɛ dó mɔ nǔmaɖitɔ́* kpó tokwɛ́yítɔ́ kpó.

18 “Má ɖɔ nǔgbó nú mi, nǔ ɖěbǔ e mi ná blá ɖo ayǐkúngban jí é ɔ, è ná ko blá ɖo jǐxwé, bɔ nǔ ɖěbǔ e mi ná tún ɖo ayǐkúngban jí é ɔ, è ná ko tún ɖo jǐxwé. 19 Gɔ́ ná ɔ, má ɖɔ nǔgbó nú mi, ényí mi mɛ e ɖo ayǐkúngban jí lɛ́ é we ɖó gbe kpɔ́ bo byɔ́ nǔ tají ɖěbǔ ɔ, Tɔ́ ce e ɖo jǐxwé é ná bló nú mi. 20 Ðó fí e mɛ we alǒ atɔn kplé ɖó kpɔ́ ɖe ɖo nyǐkɔ ce mɛ é ɔ, un ɖo fínɛ́ ɖo tɛ́ntin yětɔn.”

21 Énɛ́ gúdo ɔ, Piyɛ́ɛ wá bo kanbyɔ́ ɛ ɖɔ: “Aklúnɔ, azɔn nabí nɔví ce ka ná hu hwɛ dó mì bɔ un ná sɔ́ kɛ ɛ? Azɔn tɛ́nwe wɛ a?” 22 Jezu ka ɖɔ n’i ɖɔ: “Má ɖɔ nú we, é nyí azɔn tɛ́nwe wɛ ǎ, loɔ, azɔn 77.

23 “Énɛ́ ɔ wú wɛ Axɔ́súɖuto jǐxwé tɔn ɔ, è sixú sɔ́ jlɛ́ dó axɔ́sú ɖé wú. É ba ɖɔ kannumɔ émítɔn lɛ́ ní sú axɔ́ e yě ɖu dó émí lɛ́ é. 24 Ée é jɛ akwɛ́ tɔn lɛ́ cyán jí é ɔ, è kplá nya ɖé wá n’i bɔ éyɛ́ ɖu taláan 10 000* dó è. 25 Amɔ̌, ɖó é ma sixú kpé wú bo sú axɔ́ e é ɖu é ǎ wútu ɔ, gǎn tɔn ɖe gbe ɖɔ è ní sa éyɛ́, asi tɔn, vǐ tɔn lɛ́ kpó nǔ e é ɖó lɛ́ é bǐ kpó, bo wá sú axɔ́ émí. 26 Énɛ́ ɔ, kannumɔ ɔ jɛ kpo bo ɖe kɔ́* n’i, lobo ɖɔ: ‘Ðǒ suúlu kpɛɖé kpɔ́n mì, un ná sú axɔ́ e un ɖu dó we é bǐ we.’ 27 Kannumɔ énɛ́ sín nǔ blá wǔ nú gǎn ɔ, bɔ é sɔ́ axɔ́ e é ɖu dó è é kɛ ɛ, lobo jó è dó bɔ é yi. 28 Amɔ̌, kannumɔ énɛ́ tɔ́n bo mɔ kannumɔ gbɛ̌ tɔn e ɖu deníye* 100 dó è é. É wlí i bo jɛ vɛ̌go tɔn fyɔ́n jí, bo nɔ ɖɔ: ‘Sú axɔ́ e a ɖu dó mì é bǐ mì.’ 29 Énɛ́ ɔ, kannumɔ gbɛ̌ tɔn ɔ jɛ kpo, bo jɛ vo sa n’i jí, bo nɔ ɖɔ: ‘Ðǒ suúlu kpɛɖé kpɔ́n mì, un ná sú axɔ́ e un ɖu dó we é we.’ 30 Amɔ̌, é jló ná ɖótó è ǎ, é nyɔ́ wa ɔ, é yi, bo ɖɔ bɔ è sɔ́ ɛ dó gankpá mɛ, bónú é ná nɔ fínɛ́ káká jɛ hwenu e é ná sú axɔ́ e é ɖu dó è é fó é. 31 Ée kannumɔ gbɛ̌ tɔn lɛ́ mɔ nǔ e jɛ é ɔ, é kú wǔ nú yě tawun, bɔ yě yi wlí nǔ e jɛ lɛ́ é bǐ ɖɔ nú gǎn yětɔn. 32 Gǎn tɔn zɔ́n ɖɔ è ní ylɔ́ ɛ wá. Ée é wá é ɔ, é ɖɔ n’i ɖɔ: ‘Kannumɔ nyanya, un dɔn nǔ gbɔn axɔ́ e a ɖu dó mì é bǐ jí hwenu e a sa vo nú mì é. 33 Hwi lɔ ɖó ná ko kú nǔbláwǔ nú kannumɔ gbɛ̌ towe, lěe un kú nǔbláwǔ nú we gbɔn é ǎ cé?’ 34 Énɛ́ ɔ, xomɛ sin gǎn tɔn ɖésú, bɔ é sɔ́ ɛ dó alɔ mɛ nú gantɔ́cɔ́tɔ́ lɛ́ káká jɛ hwenu e é ná sú axɔ́ e é ɖu é bǐ fó dó é. 35 Ényí mi mɛ ɖokpó ɖokpó ma nɔ sɔ́ hwɛ kɛ nɔví tɔn kpó ayi bǐ kpó ǎ ɔ, mɔ̌ pɛ́ɛ́ wɛ Tɔ́ ce jǐxwé tɔn ɔ lɔ ná wa nǔ xá mi gbɔn.”

19 Ée Jezu ɖɔ xó énɛ́ lɛ́ fó é ɔ, é gosín Galilée bo d’asá Judɛ́ɛn tɔ ɔ lobo wá Judée sín dogbó lɛ́ jí. 2 Gɔ́ ná ɔ, ahwan ɖaxó ɖé xwedó è, bɔ é gbɔ azɔn nú yě ɖo fínɛ́.

3 Falizyɛn lɛ́ wá gɔ̌n tɔn, bo ɖo linlin wɛ bo ná tɛ́n ɛ kpɔ́n, énɛ́ ɔ, yě kanbyɔ́ ɛ ɖɔ: “É ka sɔgbe xá sɛ́n ɖɔ súnnu ní gbɛ́ asi tɔn ɖó hwɛjijɔ ɖěbǔ wú a?” 4 É ka yí gbe nú yě ɖɔ: “Mi xa ɖɔ mɛ e dá yě sín bǐbɛ́mɛ é bló yě súnnu kpó nyɔ̌nu kpó, 5 lobo ɖɔ: ‘Ðó hwɛjijɔ énɛ́ wú ɔ, súnnu ná jó tɔ́ tɔn kpó nɔ tɔn kpó dó bo ná tɛ́ dó asi tɔn wú, bɔ yě mɛ we lɛ́ ná nyí agbaza ɖokpó’ ǎ cé? 6 Énɛ́ wú ɔ, yě sɔ́ ɖo mɛ we nyí wɛ ǎ, loɔ, agbaza ɖokpó wɛ yě nyí. Hǔn, nǔ e Mawu dɔn cá é* ɔ, mɛ ɖěbǔ ní ma klán ó.” 7 Yě ka ɖɔ n’i ɖɔ: “Étɛ́wú Mɔyízi ka ɖe gbe ɖɔ è ní zé mɛgbígbɛ́wéma d’así n’i bo gbɛ́ ɛ lo?” 8 É ɖɔ nú yě ɖɔ: “Ayi mitɔn e syɛ́n é wú wɛ Mɔyízi yí gbe ɖɔ mi ní nɔ gbɛ́ asi mitɔn lɛ́, amɔ̌, ɖo bǐbɛ́mɛ ɔ, nǔ lɛ́ ɖo mɔ̌ ǎ. 9 Má ɖɔ nú mi, mɛ ɖěbǔ e gbɛ́ asi tɔn, bɔ é ma nyí ɖó agalilɛ* wú ǎ, bo da nyɔ̌nu ɖěvo é ɔ, aga wɛ é lɛ.”*

10 Ahwanvú lɛ́ ɖɔ n’i ɖɔ: “Ényí mɔ̌ wɛ nǔ lɛ́ ná yi gbɔn ɖo súnnu ɖé kpó asi tɔn kpó tɛ́ntin hǔn, è gbɔ bo gɔn asi da ɔ, é kpɔ́n te hú.” 11 É ɖɔ nú yě ɖɔ: “Súnnu lɛ́ bǐ nɔ yí gbe nú xó énɛ́ lɛ́ ǎ, loɔ, mɛ e ɖó nǔníná ɔ lɛ́ é kɛ́ɖɛ́ wɛ nɔ yí gbe ná. 12 Ðó agooɖojǐe* ɖé lɛ́ tíin bɔ è ji yě ɖó mɔ̌, agooɖojǐe ɖěvo lɛ́ tíin bɔ gbɛtɔ́ lɛ́ wɛ sɔ́ yě ɖó mɔ̌, agooɖojǐe ɖěvo lɛ́ ka lɛ́ tíin bɔ yěɖésúnɔ wɛ sɔ́ yěɖée dó ɖó agooɖojǐe ɖó Axɔ́súɖuto jǐxwé tɔn wútu. Mɛ e sixú yí gbe ná é ní bo yí gbe ná.”

13 Énɛ́ gúdo ɔ, mɛ lɛ́ kplá vǐ kpɛví lɛ́ wá n’i bónú é ná ɖó alɔ yě jí lobo xo ɖɛ nú yě, amɔ̌, ahwanvú lɛ́ gbɛ́ nǔ nú yě. 14 Jezu ka ɖɔ: “Mi jó vǐ kpɛví lɛ́ dó, mi ma tɛ́n kpɔ́n bo sú ali dó yě bónú yě ní gɔn gɔ̌n ce wá ó, ɖó mɛ e cí yě ɖɔhun lɛ́ é tɔn wɛ nyí Axɔ́súɖuto jǐxwé tɔn.” 15 Bɔ é ɖó alɔ yě jí, bo gosín fínɛ́.

16 Din ɔ, dɔ̌nkpɛvú ɖé sɛkpɔ́ ɛ bo ɖɔ: “Mɛ̌si, nǔ ɖagbe tɛ́ un ka ɖó ná wa bo ná mɔ gbɛ mavɔmavɔ?” 17 É ɖɔ n’i ɖɔ: “Étɛ́wú a ka ɖo nǔ kanbyɔ́ mì wɛ dó nǔ e nyí nǔ ɖagbe é wú? Mɛ ɖokpó géé wɛ nyí mɛ ɖagbe. Amɔ̌, ényí a jló ná mɔ gbɛ hǔn, nɔ nyi sɛ́n lɛ́ hwebǐnu.” 18 É kanbyɔ́ Jezu ɖɔ: “Sɛ́n ɖětɛ́ lɛ́?” Jezu ɖɔ: “A ɖó ná hu mɛ ǎ, a ɖó ná dó afɔ gbě alǒ ba nyɔ̌nu ɖěvo ǎ, a ɖó ná ja ajo ǎ, a ɖó ná ɖe kúnnu agɔ ǎ, 19 wlǐ yɛ̌yi nú tɔ́ towe kpó nɔ towe kpó, kpódó a ɖó ná yí wǎn nú nɔzo towe hwiɖésúnɔ ɖɔhun kpán.” 20 Dɔ̌nkpɛvú ɔ ɖɔ n’i ɖɔ: “Un ko ɖo sɛ́n énɛ́ lɛ́ bǐ nyi wɛ; étɛ́ ka lɛ́ hwedó mì?” 21 Jezu ɖɔ n’i ɖɔ: “Ényí a jló ná nyí mɛ maɖóblɔ̌* hǔn, yi sa nǔɖókan towe lɛ́ bo ná akwɛ́ ɔ wamamɔnɔ lɛ́, énɛ́ ɔ, a ná ɖó dɔkun ɖo jǐxwé; énɛ́ gúdo hǔn, wǎ bo xwedó mì.” 22 Ée dɔ̌nkpɛvú ɔ se mɔ̌ é ɔ, é ɖidó wǔbláwúblá, ɖó é ɖó nǔɖókan gěgé wútu. 23 Énɛ́ ɔ, Jezu ɖɔ nú ahwanvú tɔn lɛ́ ɖɔ: “Má ɖɔ nǔgbó nú mi, é ná vɛ́ wǔ nú dɔkunnɔ ɖé bónú é ná byɔ́ Axɔ́súɖuto jǐxwé tɔn mɛ. 24 Gɔ́ ná ɔ, má ɖɔ nú mi, é ná bɔ wǔ nú lǎkúnmí bɔ é ná gbɔn nyɛ̌ví sín ali nu hú ɖɔ dɔkunnɔ ní byɔ́ Axɔ́súɖuto Mawu tɔn mɛ.”

25 Ée ahwanvú lɛ́ se mɔ̌ é ɔ, é kpácá yě tawun bɔ yě ɖɔ: “Mɛ̌ è ka sixú hwlɛ́n gán tawun lo?” 26 Jezu kpɔ́n yě tlítlí bo ɖɔ nú yě ɖɔ: “Énɛ́ gló gbɛtɔ́ lɛ́, amɔ̌, nǔ ɖěbǔ gló Mawu ǎ.”

27 Énɛ́ ɔ, Piyɛ́ɛ ɖɔ: “Mǐ ɖíe jó nǔ bǐ dó bo xwedó we è; étɛ́ mǐ ka ná mɔ ɖ’é mɛ lo?” 28 Jezu ɖɔ nú yě ɖɔ: “Má ɖɔ nǔgbó nú mi, ɖo nǔ lɛ́ vívɔ́ dá hwenu, ée Gbɛtɔ́ví ɔ ná jínjɔ́n axɔ́súzinkpo tɔn susunɔ ɔ jí é ɔ, mi mɛ e xwedó mì lɛ́ é ná jínjɔ́n axɔ́súzinkpo 12 jí, bo ná ɖɔ hwɛ xá akɔta 12 Izlayɛ́li tɔn lɛ́. 29 Bɔ mɛ ɖěbǔ e ná jó xwé, alǒ nɔví súnnu, alǒ nɔví nyɔ̌nu, alǒ tɔ́, alǒ nɔ, alǒ vǐ, alǒ ayǐkúngban dó, ɖó nyǐkɔ ce wútu é ná mɔ mɔ̌hunkɔtɔn donu 100, bo ná lɛ́ ɖu gbɛ mavɔmavɔ sín gǔ.

30 “Amɔ̌, mɛ e ɖo nukɔn din lɛ́ é gěgé ná wá gbɔn gǔdo, bɔ mɛ e ɖo gǔdo din lɛ́ é gěgé ná wá jɛ nukɔn.

20 “Ðó Axɔ́súɖuto jǐxwé tɔn cí glenɔ e tɔ́n zǎnzǎn tɛɛn bo ná yi ba azɔ̌watɔ́ dó vǐwungle tɔn mɛ é ɖɔhun. 2 Ée é kpó azɔ̌watɔ́ lɛ́ kpó yí gbe dó deníye* ɖokpó jí nú azɔ̌kwɛ́ gbe ɖokpó tɔn gúdo é ɔ, é sɛ́ yě dó vǐwungbo tɔn mɛ. 3 Ée é lɛ́ tɔ́n gan tɛ́nnɛ mɛ zǎnzǎn* mɔ̌ é ɔ, é mɔ mɛ ɖěvo e ma ɖó azɔ̌ ɖé ná wa ǎ lɛ́ é ɖo te ɖo axi mɛ. 4 É ɖɔ nú mɛ énɛ́ lɛ́ ɖɔ: ‘Mi lɔmɔ̌ mi yi vǐwungbo ce mɛ, énɛ́ ɔ, un ná ná mi nǔ ɖěbǔ e sɔgbe é.’ 5 Bɔ yě ɖidó. É lɛ́ tɔ́n gan 12* mɛ mɔ̌ bo lɛ́ tɔ́n gan atɔn mɛ hwelɛ́kɔ* mɔ̌ lobo wa nǔ ɖokpó ɔ. 6 Gǔdo mɛ ɖo gan atɔ́ɔ́n mɛ hwelɛ́kɔ* mɔ̌ ɔ, é tɔ́n bo mɔ mɛ ɖěvo lɛ́ ɖo te bo ɖɔ nú yě ɖɔ: ‘Étɛ́wú mi ka ɖo te ɖo fí ɖo kéze ɔ bǐ mɛ nǔɖémawa?’ 7 Yě yí gbe n’i ɖɔ: ‘Ðó mɛ ɖěbǔ yí mǐ dó azɔ̌mɛ ǎ.’ É ɖɔ nú yě ɖɔ: ‘Mi lɔmɔ̌ ní bo yi vǐwungbo ce mɛ.’

8 “Ée gbadanu su é ɔ, vǐwunglenɔ ɔ ɖɔ nú nǔjíkpɔ́ntɔ́ tɔn ɖɔ: ‘Ylɔ̌ azɔ̌watɔ́ lɛ́ bo sú azɔ̌kwɛ́ yětɔn lɛ́ yě; bɛ̌ sín mɛ gǔdo tɔn lɛ́ jí bo yi fó ɖó mɛ nukɔntɔn lɛ́ jí.’ 9 Hwenu e mɛ e è yí dó azɔ̌mɛ ɖo gan atɔ́ɔ́n mɛ hwelɛ́kɔ lɛ́ é wá é ɔ, è ná deníye* ɖokpó yě mɛ ɖokpó ɖokpó. 10 Énɛ́ wú ɔ, hwenu e mɛ nukɔntɔn lɛ́ wá é ɔ, yě lin ɖɔ émí ná yí hú mɔ̌, loɔ, deníye* ɖokpó sín axɔ́ wɛ è sú yě lɔ. 11 Énɛ́ ɔ, yě jɛ nǔ hlún ɖɔ dó glenɔ ɔ wú jí, 12 bo ɖɔ: ‘Yě mɛ énɛ́ lɛ́ e gbɔn gǔdo é ɔ, ganxixo ɖokpó jɛ́n yě w’azɔ̌ ná; é ɖo mɔ̌ có, mǐdɛɛ lɛ́ e wa azɔ̌ syɛ́nsyɛ́n ɖo azǎn ɔ bǐ jí bo xú hwesivɔ́ é ɔ, a sɔ́ mǐ ɖó hǎ yětɔn jí!’ 13 Amɔ̌, glenɔ ɔ yí gbe nú mɛ ɖokpó ɖo yě mɛ ɖɔ: ‘Xɔ́ntɔn, un jɛ agɔ ɖě dó we ǎ. Deníye* ɖokpó jí wɛ nyi kpó hwi kpó ɖó gbe kpɔ́ dó ǎ cé? 14 Yǐ nǔ e nyí towe é bo yi. Un jló ná ná nǔ e un ná we é pɛ́ɛ́ mɛ élɔ́ lɛ́ e gbɔn gǔdo é. 15 Un ɖó acɛ bo ná sɔ́ nǔ nyiɖésúnɔ tɔn lɛ́ dó wa nǔ e jló mì é ná ǎ cé? Alǒ nǔ jló wɛ nukún towe ɖe,* ɖó ɖagbe e un wa é* wú a?’ 16 Lěe mɛ e ɖo gǔdo lɛ́ é ná jɛ nukɔn bɔ mɛ e ɖo nukɔn lɛ́ é ná gbɔn gǔdo gbɔn é nɛ́.”

17 Ée Jezu ɖo Jeluzalɛ́mu yi wɛ é ɔ, é kplá ahwanvú 12 lɛ́ jɛ vo, bo ɖɔ nú yě ɖo ali ɔ xo ɖɔ: 18 “Mǐ ɖíe xwe Jeluzalɛ́mu è, bɔ è ná jó Gbɛtɔ́ví ɔ nú vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó. Yě ná ɖó kúhwɛ n’i; 19 yě ná jó è nyi mɛ e ɖo akɔta ɖě lɛ́ mɛ lɛ́ é sín alɔ mɛ, bónú yě ná cá ɛ ko, sɔ́ lanbá dó xo è, lobo xwe è nyi atín wú;* bɔ azǎn tɔn atɔngɔ́ ɔ gbe ɔ, è ná fɔ́n ɛ.”

20 Énɛ́ gúdo ɔ, vǐ súnnu Zebeɖée tɔn lɛ́ sín nɔ sɛkpɔ́ ɛ, é kpó vǐ súnnu tɔn lɛ́ kpó, bo ɖe kɔ́* n’i, lobo ɖo nǔɖé ná byɔ́ ɛ wɛ. 21 Jezu ɖɔ n’i ɖɔ: “Étɛ́ ba wɛ a ɖe?” É yí gbe n’i ɖɔ: “Ðɔ bónú vǐ súnnu ce we élɔ́ lɛ́ ɖokpó ná jínjɔ́n ɖisí towe xwé, bɔ wegɔ́ ɔ ná jínjɔ́n amyɔ towe xwé, ɖo Axɔ́súɖuto towe mɛ.” 22 Jezu yí gbe ɖɔ: “Mi tuun nǔ e byɔ́ wɛ mi ɖe é ǎ. Mi ka sixú nu kɔ́fu e nu gbé un ja é a?” Yě ɖɔ n’i ɖɔ: “Mǐ ná kpé wú.” 23 É ɖɔ nú yě ɖɔ: “Mi ná nu kɔ́fu ce nǔgbó, amɔ̌, nú è ná jínjɔ́n ɖisí ce xwé kpó amyɔ ce xwé kpó ɔ, nyi wɛ ná ɖɔ ǎ; mɛ ɖěɖěe Tɔ́ ce ko sɔ́ nǔ tɔn ɖ’ayǐ ná lɛ́ é tɔn wɛ.”

24 Hwenu e yě mɛ wǒ ɖě lɛ́ se xó ɔ é ɔ, xomɛ sin yě dó nɔví nɔví we lɛ́ wú. 25 Amɔ̌, Jezu ylɔ́ yě bo ɖɔ nú yě ɖɔ: “Mi tuun ɖɔ acɛkpatɔ́ akɔta lɛ́ tɔn lɛ́ nɔ bló gǎn nú yě, bɔ mɛ e ɖo tɛn ɖaxó mɛ lɛ́ é nɔ sɔ́ yě ɖó acɛ yětɔn glɔ́. 26 Nǔ ɖó ná nyí mɔ̌ ɖo tɛ́ntin mitɔn ǎ; é nyɔ́ wa ɔ, mɛ ɖěbǔ e ba ná ɖó acɛ hú mɛ bǐ ɖo tɛ́ntin mitɔn é ɖó ná nyí mɛsɛntɔ́ mitɔn, 27 bɔ mɛ ɖěbǔ e ba bo ná nyí mɛ nukɔntɔn ɖo tɛ́ntin mitɔn é ɖó ná nyí mɛsɛntɔ́ mitɔn. 28 Lěe Gbɛtɔ́ví ɔ wá, bɔ é ma nyí bónú è ná sɛn ɛ wútu ǎ, loɔ, bónú é ná sɛn mɛ, lobo sɔ́ gbɛ* tɔn jó dó xɔ gbɛ nú mɛ gěgé gbɔn é ɖɔhun.”

29 Ée Jezu kpó ahwanvú tɔn lɛ́ kpó ɖo Jelíko tɔ́n sín wɛ é ɔ, ahwan ɖaxó ɖé xwedó è. 30 Nukúntɔ́nnɔ we ka ɖo ayǐjínjɔ́n ɖo ali ɔ kpá bo se ɖɔ Jezu ɖo wǐwá yi wɛ, lobo sú xó bo ɖɔ: “Aklúnɔ, Davídi Ví, kú nǔbláwǔ nú mǐ!” 31 Amɔ̌, ahwan ɔ gbɛ́ nǔ nú yě bo ɖɔ yě ní cí xwíí; yě ka lɛ́ sú xó d’é jí syɛ́nsyɛ́n bo ɖɔ: “Aklúnɔ, Davídi Ví, kú nǔbláwǔ nú mǐ!” 32 Énɛ́ wú ɔ, Jezu nɔ te, bo ylɔ́ yě, lobo ɖɔ: “Étɛ́ mi ka jló ɖɔ má wa nú mi?” 33 Yě ɖɔ n’i ɖɔ: “Aklúnɔ, hun nukún mǐtɔn lɛ́ nú mǐ.” 34 Nǔ yětɔn blá wǔ nú Jezu, bɔ é ɖ’alɔ nukún yětɔn lɛ́ wú. Tlóló ɔ, yě lɛ́vɔ́ mɔ nǔ, bo xwedó è.

21 Ée yě sɛkpɔ́ Jeluzalɛ́mu bo wá Bɛtifajée ɖo Olívutín só ɔ jí gúdo é ɔ, Jezu sɛ́ ahwanvú we dó, 2 bo ɖɔ nú yě ɖɔ: “Mi yi gletoxo e mɔ sɛ́dó wɛ mi ɖe nɛ́ é mɛ, ényí mi jɛ dɔ̌n ɔ, mi ná mɔ tócí ɖé kpó tócíví ɖé kpó ɖo sinsin. Mi tún yě bo kplá yě wá nú mì. 3 Ényí mɛɖé ɖɔ xó ɖěbǔ nú mi hǔn, mi ɖɔ: ‘Aklúnɔ ɖó hudó yětɔn.’ Énɛ́ ɔ, é ná jó yě dó tlóló.”

4 Nǔ cí mɔ̌ bónú nǔ e è ɖɔ gbɔn gbeyíɖɔ ɔ jí é ní dó jɛnu, é wɛ nyí ɖɔ: 5 “Ðɔ nú vǐ nyɔ̌nu Sinyɔ́ɔ tɔn ɖɔ: ‘Axɔ́sú towe ɖíe ja gɔ̌n towe è! Xomɛfátɔ́ wɛ é nyí, é xá tócí ɖé jí, ɛɛn, tócíví ɖé jí.’”

6 Énɛ́ ɔ, ahwanvú lɛ́ yi bo bló lěe Jezu ɖɔ gbɔn nú yě é. 7 Yě kplá tócí ɔ kpó vǐ tɔn kpó wá, bo tɛ́ awu aga tɔn yětɔn lɛ́ dó yě jí bɔ é jínjɔ́n jí. 8 Mɛ gěgé ɖo ahwan ɔ mɛ bo tɛ́ awu aga tɔn yětɔn lɛ́ dó ali ɔ jí, bɔ mɛ ɖěvo lɛ́ ɖo atínla lɛ́ sɛ́n wɛ bo ɖo títɛ́ dó ali ɔ jí wɛ. 9 Gɔ́ ná ɔ, ahwan e ɖo yiyi wɛ ɖo nukɔn tɔn é kpó mɛ ɖěɖěe xwedó è lɛ́ é kpó ɖo xó sú wɛ bo nɔ ɖɔ: “Mawu, mǐ ɖo vo sa nú we wɛ, hwlɛ̌n Davídi Ví ɔ. Nǔ nyɔ́ nú mɛ e wá ɖo Jexóva* nyíkɔ mɛ é! Hwlɛ̌n ɛ, mǐ ɖo vo sa nú we wɛ, hwi mɛ e ɖo jǐ aga é!”

10 Ée é byɔ́ Jeluzalɛ́mu é ɔ, toxo ɔ blěbú ɖo xó sú wɛ bo nɔ ɖɔ: “Mɛ̌ ka nyí mɛ élɔ́?” 11 Ahwan ɔ nɔ ɖɔ: “Gbeyíɖɔ Jezu, éé gosín Nazalɛ́ti Galilée tɔn é wɛ.”

12 Jezu byɔ́ tɛ́npli ɔ mɛ bo nya mɛ e ɖo nǔ sa wɛ ɖo tɛ́npli ɔ mɛ lɛ́ é kpó mɛ e ɖo nǔ xɔ ɖ’é mɛ wɛ lɛ́ é kpó bǐ tɔ́n, lobo flí akwɛ́ɖyɔ́tɔ́ lɛ́ sín távo kpó mɛ e ɖo ahwannɛ́ sa wɛ lɛ́ é sín zinkpo kpó xwe. 13 É ɖɔ nú yě ɖɔ: “È ko wlán ɖɔ: ‘Xwé ce ɔ, ɖɛxwé wɛ è ná nɔ ylɔ́ ɖɔ,’ bɔ midɛɛ lɛ́ ka ɖo sísɔ́ dó ɖó ajotɔ́ lɛ́ sín avatɛn ná wɛ.” 14 Gɔ́ ná ɔ, nukúntɔ́nnɔ lɛ́ kpó afɔkponɔ lɛ́ kpó wá gɔ̌n tɔn ɖo tɛ́npli ɔ mɛ bɔ é gbɔ azɔn nú yě.

15 Ée vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó mɔ nǔjíwǔ e é bló lɛ́ é, bɔ súnnuví lɛ́ ɖo xó sú wɛ ɖo tɛ́npli ɔ mɛ bo nɔ ɖɔ: “Mawu, mǐ ɖo vo sa nú we wɛ, hwlɛ̌n Davídi Ví ɔ” é ɔ, xomɛ sin yě 16 bɔ yě ɖɔ n’i ɖɔ: “A se nǔ e ɖɔ wɛ yě ɖe é a?” Jezu ɖɔ nú yě ɖɔ: “Ganjí. Mi xa xó élɔ́ kpɔ́n ǎ cé? É wɛ nyí ɖɔ: ‘A bló bɔ yɔkpɔ́vú lɛ́ kpó vǐ yɛ̌yɛ́ lɛ́ kpó kpa susu nú we.’” 17 Énɛ́ gúdo ɔ, é gosín toxo ɔ mɛ bo yi gletoxo Betaníi tɔn mɛ lobo dɔ́ fínɛ́.

18 Ayǐhɔ́ngbe tɔn zǎnzǎn tɛɛn e é lɛ́ kɔ ja toxo ɔ mɛ é ɔ, xovɛ́ sin i. 19 É mɔ fígitín ɖé sɛ́dó ɖo ali ɔ jí bo yi asá tɔn mɛ, amɔ̌, é mɔ nǔɖé ɖ’é jí zɛ ama lɛ́ wú ǎ, énɛ́ ɔ, é ɖɔ nú fígitín ɔ ɖɔ: “Sínsɛ́n ɖě ní ma sɔ́ nyɔ́ ɖo jǐ towe gbeɖé ó.” Bɔ fígitín ɔ mlú ɖa tlóló. 20 Ée ahwanvú lɛ́ mɔ mɔ̌ é ɔ, é kpácá yě bɔ yě ɖɔ: “Nɛ̌ nǔ ɔ ka nyí gbɔn bɔ fígitín ɔ mlú ɖa tlóló mɔ̌?” 21 Jezu ka yí gbe nú yě ɖɔ: “Má ɖɔ nǔgbó nú mi, ényí mi ɖó nǔɖiɖi bo ma xo nǔ kpɔ́n ǎ ɔ, nǔ e un bló nú fígitín ɔ é kɛ́ɖɛ́ wɛ mi ná bló ǎ, loɔ, ényí mi tlɛ ɖɔ nú só élɔ́ ɖɔ: ‘Hɔn hwiɖée sín fí bo yi jɛ xu mɛ’ ɔ, nǔ ná nyí mɔ̌. 22 Bɔ nǔ e mi ná xo ɖɛ bo byɔ́ lɛ́ é bǐ ɔ, ényí mi ɖó nǔɖiɖi ɔ, mi ná mɔ yí.”

23 Ée é wá tɛ́npli ɔ mɛ gúdo é ɔ, vɔ̌sánúxwlémawutɔ́gán lɛ́ kpó tomɛxó lɛ́ kpó wá gɔ̌n tɔn hwenu e é ɖo nǔ kplɔ́n mɛ wɛ é bo ɖɔ: “Acɛ tɛ́ a ka sɔ́ dó ɖo nǔ énɛ́ lɛ́ bló ná wɛ? Mɛ̌ ka ná acɛ énɛ́ ɔ we?” 24 Jezu ka yí gbe nú yě ɖɔ: “Nyi lɔ ná kan nǔ ɖokpó byɔ́ mi. Ényí mi ɖɔ nú mì ɔ, énɛ́ ɔ, nyi lɔ ná ɖɔ acɛ e un sɔ́ dó ɖo nǔ énɛ́ lɛ́ wa ná wɛ é nú mi: 25 Mɛ̌ ka sɛ́ Jaan dó ɖɔ é ní bló batɛ́mu nú mɛ? Mawu e ɖo jǐxwé é wɛ a alǒ gbɛtɔ́ lɛ́?” Yě jɛ ɖiɖɔ jí ɖo yěɖée tɛ́ntin ɖɔ: “Ényí mǐ ɖɔ: ‘Mawu e ɖo jǐxwé é wɛ’ ɔ, é ná ɖɔ nú mǐ ɖɔ: ‘Étɛ́wú mi ma ka ɖi nǔ n’i ǎ lo?’ 26 Amɔ̌, ényí mǐ ɖɔ: ‘Gbɛtɔ́ lɛ́ wɛ’ ɔ, mǐ ɖó ná ɖi xɛsi nú ahwan ɔ, ɖó yě bǐ wɛ nɔ kpɔ́n Jaan dó mɔ gbeyíɖɔ.” 27 Énɛ́ wú ɔ, yě yí gbe nú Jezu ɖɔ: “Mǐ tuun ǎ.” É ka ɖɔ nú yě ɖɔ: “Nyi lɔ ɖo acɛ e un sɔ́ dó ɖo nǔ énɛ́ lɛ́ wa ná wɛ é ná ɖɔ nú mi wɛ ǎ.

28 “Étɛ́ mi ka lin? Nya ɖé ɖó vǐ we. É yi mɛ nukɔntɔn ɔ gɔ́n bo ɖɔ: ‘Vǐ ce, yi w’azɔ̌ ɖo vǐwungbo ɔ mɛ égbé.’ 29 É yí gbe n’i ɖɔ: ‘Un xweyǐgbe ǎ,’ amɔ̌, é yá é ɔ, é vɛ́ n’i bɔ é yi vǐwungbo ɔ mɛ. 30 É sɛkpɔ́ vǐ wegɔ́ ɔ bo ɖɔ xó ɖokpó ɔ n’i. Éyɛ́ ɖɔ: ‘Daá,* un ná yi,’ amɔ̌, é sɔ́ yi ǎ. 31 Ðo vǐ we lɛ́ mɛ ɔ, mɛ̌ ka wa jlǒ tɔ́ tɔn tɔn?” Yě ɖɔ: “Mɛ nukɔntɔn ɔ.” Jezu ɖɔ nú yě ɖɔ: “Má ɖɔ nǔgbó nú mi, tokwɛ́yítɔ́ lɛ́ kpó tonyatɔ́ lɛ́ kpó ná byɔ́ Axɔ́súɖuto Mawu tɔn mɛ jɛ nukɔn nú mi. 32 Ðó Jaan wá mi gɔ́n bo xlɛ́ nǔjlɔ́jlɔ́wiwa sín ali ɔ mi, mi ka ɖi nǔ n’i ǎ. É ɖo mɔ̌ có, tokwɛ́yítɔ́ lɛ́ kpó tonyatɔ́ lɛ́ kpó ɖi nǔ n’i. Mi tlɛ mɔ mɔ̌ có, nǔ e mi wa é vɛ́ nú mi bónú mi ɖi nǔ n’i ǎ.

33 “Mi ɖótó nǔjlɛ́dónǔwú ɖěvo: Nya ɖé tíin, glenɔ ɖé wɛ, bo ɖó vǐwungbo bo dó kpá lɛ́ lɛ̌ dó. É lɛ́ kun vǐwunto ɖokpó nyi gle ɔ mɛ lobo lɛ́ mɛ atɔxwɛ ɖokpó nyi gle ɔ mɛ; énɛ́ gúdo ɔ, é xáya gle ɔ nú glesi lɛ́ bo yi tomɛ. 34 Ée hwenu e vǐwungbo ɔ ná sɛ́n dó é su é ɔ, é sɛ́ mɛsɛntɔ́ tɔn lɛ́ dó glesi lɛ́, bónú yě ná yi yí sínsɛ́n éyɛ́tɔn lɛ́ wá n’i. 35 Amɔ̌, glesi lɛ́ wlí mɛsɛntɔ́ tɔn lɛ́, yě xo mɛ ɖě, bo hu mɛ ɖě, lobo nyi awǐnnya dó mɛ ɖě. 36 É lɛ́ sɛ́ mɛsɛntɔ́ ɖěvo lɛ́ dó, yědɛɛ lɛ́ sukpɔ́ hú gbɛ̌ta nukɔntɔn ɔ, amɔ̌, glesi lɛ́ lɛ́vɔ́ wa nǔ ɖokpó ɔ xá yě lɔ. 37 É wá sɛ́ vǐ súnnu tɔn dó yě gbɔn gǔdo bo ɖɔ: ‘Yě ná ɖó sísí nú vǐ súnnu ce.’ 38 Ée glesi lɛ́ mɔ vǐ súnnu ɔ é ɔ, yě ɖɔ ɖo yěɖée lɛ́ tɛ́ntin ɖɔ: ‘Gǔɖutɔ́ ɔ ɖíe. Mi wá bónú mǐ ní hu i bo ná yí gǔ tɔn.’ 39 Énɛ́ ɔ, yě wlí i bo dɔn ɛ sín vǐwungbo ɔ mɛ lobo hu i. 40 Énɛ́ wú ɔ, ényí vǐwunglenɔ ɔ wá ɔ, étɛ́ é ka ná wa nú glesi énɛ́ lɛ́?” 41 Yě ɖɔ n’i ɖɔ: “Ðó yě nyí mɛ nyanya wútu ɔ, é ná sú kún yětɔn dó bǐ mlɛ́mlɛ́, bo ná xáya vǐwungbo ɔ nú glesi ɖěvo ɖěɖěe ná ná ɛ sínsɛ́n e nyí étɔn lɛ́ é dó hwetɔnnu é.”

42 Jezu ɖɔ nú yě ɖɔ: “Mi xa xó élɔ́ ɖo Nǔwlánwlán mímɛ́ lɛ́ mɛ kpɔ́n ǎ cé? É wɛ nyí ɖɔ: ‘Awǐnnya e xɔmɛtɔ́ lɛ́ xo nyi kɛ́n é, wɛ wá húzú awǐnnya zwe jí tɔn tají ɔ. Jexóva* gɔ́n wɛ awǐnnya énɛ́ gosín, bo jí wǔ ɖo nukún mǐtɔn mɛ.’ 43 Énɛ́ wú wɛ un ɖo ɖiɖɔ nú mi wɛ ɖɔ, è ná yí Axɔ́súɖuto Mawu tɔn sín mi sí, bo ná sɔ́ nú akɔta e ná ná sínsɛ́n tɔn lɛ́ é ɖé. 44 Gɔ́ ná ɔ, mɛ e ná jɛ awǐnnya énɛ́ jí é ná gba hánnyá. Bɔ mɛ ɖěbǔ e jí é ná jɛ é ɔ, é ná vó mɛ ɔ.”

45 Ée vɔ̌sánúxwlémawutɔ́gán lɛ́ kpó Falizyɛn lɛ́ kpó se nǔjlɛ́dónǔwú tɔn lɛ́ é ɔ, yě mɔ nǔ jɛ wú ɖɔ émí wú ɖɔ xó dó wɛ é ɖe. 46 Yě jló ná wlí i* có, yě ɖi xɛsi nú ahwan ɔ, ɖó ahwan ɔ nɔ kpɔ́n ɛ dó mɔ gbeyíɖɔ.

22 Jezu lɛ́ zán nǔjlɛ́dónǔwú lɛ́ dó ɖɔ xó nú yě, bo ɖɔ: 2 “È sixú jlɛ́ Axɔ́súɖuto jǐxwé tɔn ɔ dó axɔ́sú e ylɔ́ alɔwlíwlígɔ́ nú vǐ súnnu tɔn é wú. 3 É sɛ́ mɛsɛntɔ́ tɔn lɛ́ dó bónú yě ná yi ylɔ́ mɛ e è ylɔ́ nú alɔwlíwlígɔ́ ɔ lɛ́ é, amɔ̌, yě ba bo ná wá ǎ. 4 É lɛ́ sɛ́ mɛsɛntɔ́ ɖěvo lɛ́ dó, bo ɖɔ: ‘Mi ɖɔ nú mɛ e è ylɔ́ lɛ́ é ɖɔ: “Un ko ɖa nǔɖuɖu ce, è ko hu nyibúsú ce kpó kanlin ce e dó jǒ lɛ́ é kpó, bɔ nǔ bǐ ko sɔgbe. Mi wá alɔwlíwlígɔ́ ɔ tɛnmɛ.”’ 5 Amɔ̌, yě ké ya ná ǎ, bo tɔ́n yi nǔ ɖěvo lɛ́ wa gbé: mɛ ɖě ɖidó gle tɔn ta, bɔ mɛ ɖěvo ɖidó ajɔ̌ tɔn kɔn. 6 Amɔ̌, mɛ e kpo lɛ́ é wlí mɛsɛntɔ́ tɔn lɛ́, bo xo dǎka yě wú, lobo hu yě.

7 “Xomɛ sin axɔ́sú ɔ ɖésú, bɔ é sɛ́ ahwankpá tɔn lɛ́ dó, bɔ yě hu mɛhutɔ́ énɛ́ lɛ́ bo dó toxo yětɔn zo. 8 Énɛ́ gúdo ɔ, é ɖɔ nú mɛsɛntɔ́ tɔn lɛ́ ɖɔ: ‘Alɔwlíwlígɔ́ ɔ ko sɔgbe, amɔ̌, mɛ e è ylɔ́ lɛ́ é ka jɛxá ǎ. 9 Énɛ́ wú ɔ, mi yi ali e tɔ́n sín toxo ɔ mɛ lɛ́ é jí, bo ylɔ́ mɛ ɖěbǔ e mi ná mɔ é wá alɔwlíwlígɔ́ ɔ tɛnmɛ. 10 Mɛsɛntɔ́ énɛ́ lɛ́ wa mɔ̌ nǔgbó bo tɔ́n yi ali lɛ́ jí, lobo xo mɛ e yě mɔ lɛ́ é bǐ kplé, mɛ nyanya kpó mɛ ɖagbe kpó bǐ; bɔ mɛ e ɖo nǔ ɖu wɛ* lɛ́ é gɔ́ xɔ e mɛ è ɖo alɔwlíwlí sín nǔwiwa lɛ́ bló ɖe wɛ é.

11 “Hwenu e axɔ́sú ɔ wá jǒnɔ lɛ́ kpɔ́n gbé é ɔ, nukún tɔn jɛ nya ɖokpó jí bɔ é dó alɔwlíwlíwu ǎ. 12 Énɛ́ wú ɔ, é ɖɔ n’i ɖɔ: ‘Xɔ́ntɔn, nɛ̌ a ka wa gbɔn bo ma dó alɔwlíwlíwu ǎ bo wá xwetɔ́n ɖo fí?’ É sɔ́ tuun nǔ e é ná ɖɔ é ǎ. 13 Énɛ́ ɔ, axɔ́sú ɔ ɖɔ nú mɛsɛntɔ́ tɔn lɛ́ ɖɔ: ‘Mi blá alɔ tɔn lɛ́ kpó afɔ tɔn lɛ́ kpó, bo sɔ́ ɛ nyi dó ablu mɛ ɖo kɔ́xo. Fínɛ́ wɛ é ná ya avǐ bo ná ɖu aɖǔkún ɖe.’

14 “Ðó mɛ gěgé wɛ è ylɔ́, amɔ̌, mɛ kpɛɖé jɛ́n è ka sɔ́.”

15 Énɛ́ gúdo ɔ, Falizyɛn lɛ́ yi, bo blá gbě ɖó kpɔ́ bo ná mɔ tɛn dó ɖó mɔ bo wlí i ɖo xó tɔn lɛ́ mɛ. 16 Énɛ́ wútu ɔ, yě sɛ́ ahwanvú yětɔn lɛ́ kpó mɛ e ɖo toxóɖɔgbɛ́ Elódu tɔn mɛ lɛ́ é kpó dó è, bɔ yě ɖɔ: “Mɛ̌si, mǐ tuun ɖɔ a nɔ ɖɔ nǔgbó, bo nɔ kplɔ́n nǔgbó ɔ mɛ dó ali Mawu tɔn wú. A nɔ ba bo ná nyɔ́ ɖo gbɛtɔ́ sí ǎ, ɖó a nɔ kpɔ́n lěe mɛ lɛ́ ɖe ɖo wěxo é ǎ wútu. 17 Énɛ́ wú ɔ, ɖɔ nú mǐ, étɛ́ a ka lin? É sɔgbe xá sɛ́n ɖɔ* è ní sú takwɛ́ Sezáa wɛ a, alǒ é sɔgbe ǎ?” 18 Amɔ̌, ɖó Jezu tuun lěe ayi yětɔn báɖá sɔ é wútu ɔ, é ɖɔ: “Yɛmɛnúwatɔ́ è mi, étɛ́wú mi ka ɖo tíntɛ́n mì kpɔ́n wɛ? 19 Mi xlɛ́ gankwɛ́ e è nɔ dó sú takwɛ́ é ɖokpó mì.” Yě sɔ́ deníye* ɖokpó wá n’i. 20 É ɖɔ nú yě ɖɔ: “Ðiɖe mɛ̌ tɔn kpó nyǐkɔ mɛ̌ tɔn kpó ka ɖíe?” 21 Yě ɖɔ: “Sezáa tɔn wɛ.” Énɛ́ ɔ, é ɖɔ nú yě ɖɔ: “Ényí mɔ̌ hǔn, mi sɔ́ nǔ e nyí Sezáa tɔn lɛ́ é jó nú Sezáa, bo sɔ́ nǔ e nyí Mawu tɔn lɛ́ é jó nú Mawu.” 22 Ée yě se mɔ̌ é ɔ, é jí wǔ nú yě, bɔ yě jó è dó bo ɖidó.

23 Ðo azǎn énɛ́ jí ɔ, Saduseɛn lɛ́ wá gɔ̌n tɔn. (Saduseɛn lɛ́ ɖi nǔ nú fínfɔ́n sín kú ǎ.) Yě kanbyɔ́ ɛ ɖɔ: 24 “Mɛ̌si, Mɔyízi ɖɔ: ‘Ényí súnnu ɖé ma ɖó vǐ cóbó kú ǎ ɔ, nɔví tɔn ɖó ná sɔ́ asúkúsi ɔ da bo ɖó vǐ donu n’i. 25 Din ɔ, nɔví nɔví tɛ́nwe ɖé lɛ́ nɔ kpɔ́ xá mǐ ɖ’ayǐ. Mɛ nukɔntɔn ɔ da asi bo wá kú, é ka ɖó vǐ ɖě ǎ. Énɛ́ wútu ɔ, nɔví tɔn sɔ́ asúkúsi ɔ da. 26 Nǔ ɖokpó ɔ jɛ dó mɛ wegɔ́ ɔ kpó mɛ atɔngɔ́ ɔ kpó wú, káká jɛ mɛ tɛ́nwegɔ́ ɔ jí. 27 Gǔdo mɛ ɔ, nyɔ̌nu ɔ lɔ wá kú. 28 Ðo fínfɔ́n sín kú hwenu ɔ, mɛ̌ tɔn nyɔ̌nu ɔ ka ná nyí ɖo yě mɛ tɛ́nwe lɛ́ mɛ? É ɖíe ko nyí asi nú yě mɛ bǐ kpɔ́n è.”

29 Jezu ɖɔ nú yě ɖɔ: “Ali bú wɛ mi ɖe, ɖó mi tuun Nǔwlánwlán mímɛ́ lɛ́ ǎ, mi ka lɛ́ tuun hlɔ̌nhlɔ́n Mawu tɔn ǎ. 30 Ðó ɖo fínfɔ́n sín kú hwenu ɔ, súnnu lɛ́ ná da asi ǎ, è ka ná ná nyɔ̌nu lɛ́ asú ǎ, loɔ, yě ná cí wɛnsagun e ɖo jǐxwé lɛ́ é ɖɔhun. 31 Nú nǔ e kan fínfɔ́n sín kú mɛkúkú lɛ́ tɔn é ɔ, mi xa nǔ e Mawu ɖɔ nú mi é ǎ cé? É ɖɔ: 32 ‘Un nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’ É nyí Mawu mɛkúkú lɛ́ tɔn ǎ, loɔ, mɛ e ɖo gbɛ lɛ́ é tɔn wɛ.” 33 Ée ahwan ɔ se énɛ́ é ɔ, nǔkplɔ́nmɛ tɔn jí wǔ nú yě.

34 Ée Falizyɛn lɛ́ se ɖɔ é xwe Saduseɛn lɛ́ sín nu dó xɔ gúdo é ɔ, yě zɔn kpɔ́ bo wá gɔ̌n tɔn. 35 Bo ná dó tɛ́n ɛ kpɔ́n ɔ, mɛ ɖokpó ɖo yě mɛ bo tuun Sɛ́n ɔ ganjí, bo kanbyɔ́ ɛ ɖɔ: 36 “Mɛ̌si, sɛ́n tɛ́ ka hú gǎn sɛ́n lɛ́ bǐ ɖo Mɔyízisɛ́n ɔ mɛ?” 37 É ɖɔ n’i ɖɔ: “‘A ɖó ná yí wǎn nú Jexóva* Mawu towe kpó ayi towe bǐ kpó, kpó lǐndɔ̌n* towe bǐ kpó, kpó linlin towe bǐ kpó.’ 38 Sɛ́n e hú gǎn sɛ́n lɛ́ bǐ bo lɛ́ nyí nukɔntɔn ɔ é nɛ́. 39 Wegɔ́ ɔ ɖi nukɔntɔn ɔ, é ɖíe: ‘A ɖó ná yí wǎn nú nɔzo towe hwiɖésúnɔ ɖɔhun.’ 40 Sɛ́n we énɛ́ lɛ́ jí wɛ Sɛ́n ɔ blěbú kpó nǔ e gbeyíɖɔ lɛ́ wlán lɛ́ é kpó jínjɔ́n.”

41 Ðó Falizyɛn lɛ́ kplé ɖó kpɔ́ ɖo fínɛ́ wútu ɔ, Jezu kanbyɔ́ yě ɖɔ: 42 “Étɛ́ mi ka nɔ lin dó Klísu ɔ wú? Mɛ̌ ví é ka nyí?” Yě yí gbe n’i ɖɔ: “Davídi ví wɛ.” 43 É kanbyɔ́ yě ɖɔ: “Nɛ̌ ka gbɔn lo bɔ Davídi ylɔ́ ɛ ɖɔ Aklúnɔ, gbɔn gbigbɔ mímɛ́ gblamɛ, bo ɖɔ: 44 ‘Jexóva* ɖɔ nú Aklúnɔ ce ɖɔ: “Jǐnjɔ́n ɖisí ce xwé káká jɛ hwenu e un ná bɛ́ kɛntɔ́ towe lɛ́ dó afɔ towe lɛ́ glɔ́ é”’? 45 Ényí Davídi ylɔ́ ɛ ɖɔ Aklúnɔ ɔ, nɛ̌ é ka sixú lɛ́ nyí vǐ tɔn gbɔn?” 46 Bɔ mɛ ɖěbǔ kpé wú bo ɖɔ xó ɖé dó yí gbe n’i ǎ. Bɛ́sín gbe énɛ́ gbe ɖidó ɔ, mɛ ɖěbǔ sɔ́ glá bo kan nǔ byɔ́ ɛ ǎ.

23 Énɛ́ gúdo ɔ, Jezu ɖɔ xó nú ahwan ɔ kpó ahwanvú tɔn lɛ́ kpó, bo ɖɔ: 2 “Sɛ́nkplɔ́nmɛtɔ́ lɛ́ kpó Falizyɛn lɛ́ kpó sɔ́ yěɖée ɖó zinkpo Mɔyízi tɔn jí. 3 Énɛ́ wú ɔ, mi ní nɔ bló nǔ e yě nɔ ɖɔ nú mi lɛ́ é bǐ, amɔ̌, mi ma nɔ wa nǔ sɔgbe xá nǔ e yě nɔ wa lɛ́ é ó, ɖó yě nɔ ɖɔ, yě ka nɔ wa nǔ e yě nɔ ɖɔ lɛ́ é ǎ. 4 Yě nɔ dó agban kpinkpɛn lɛ́ bo nɔ bɛ́ ɖó abɔ̌ta nú mɛ lɛ́, yěɖésúnɔ ka nɔ jló bo ná sɛ tɛn ná kpó alɔví yětɔn kpó ǎ. 5 Azɔ̌ e yě nɔ wa lɛ́ é bǐ ɔ, yě nɔ wa bónú gbɛtɔ́ lɛ́ ná dó mɔ yě. Ðó gbǎví e mɛ nǔwlánwlán mímɛ́ lɛ́ nɔ ɖe bɔ yě nɔ sin bo ná dó nya xɛ ɖo yěɖée jí lɛ́ é* ɔ, yě nɔ bló gbajagbaja tɔn lɛ́, bo nɔ lɛ́ xo kɛyɛ gaga lɛ́ nyi awu yětɔn aga tɔn lɛ́ tó. 6 Yě nɔ yí wǎn nú tɛn nukúnɖéjí hú gǎn lɛ́ ɖo agɔ̌ lɛ́ jí kpó zinkpo nukɔntɔn* e ɖo kplɔ́ngbasá lɛ́ é kpó. 7 Yě nɔ ba ɖɔ mɛ ɖěvo lɛ́ ní dó gbe émí kpó sísí kpó ɖo axi lɛ́ mɛ, bo nɔ lɛ́ ba ɖɔ gbɛtɔ́ lɛ́ ní ylɔ́ émí ɖɔ Mɛ̌si.* 8 Amɔ̌ midɛɛ lɛ́ ɔ, mi ma nú è ylɔ́ mi ɖɔ Mɛ̌si ó, ɖó mɛ ɖokpó wɛ nyí Mɛ̌si mitɔn, bɔ mi mɛ bǐ nyí nɔví nɔví. 9 Gɔ́ ná ɔ, mi ma ylɔ́ mɛ ɖěbǔ ɖɔ tɔ́ mitɔn ɖo ayǐkúngban jí ó, ɖó mɛ ɖokpó wɛ nyí Tɔ́ mitɔn, é wɛ ɖo jǐxwé. 10 Mi ma nú è lɛ́ ylɔ́ mi ɖɔ nukɔntɔ́ ó, ɖó Nukɔntɔ́ ɖokpó wɛ mi ɖó, é wɛ nyí Klísu. 11 Amɔ̌, mɛ ɖěbǔ e ɖó acɛ hú mɛ bǐ ɖo tɛ́ntin mitɔn é ɖó ná nyí mɛsɛntɔ́ mitɔn. 12 Mɛ ɖěbǔ e sɔ́ éɖée su é ɔ, è ná zé è hwe, bɔ mɛ ɖěbǔ e zé éɖée hwe é ɔ, è ná sɔ́ ɛ su.

13 “Heelú mi, sɛ́nkplɔ́nmɛtɔ́ lɛ́ kpó Falizyɛn lɛ́ kpó! Yɛmɛnúwatɔ́ è mi! Ðó mi nɔ sú Axɔ́súɖuto jǐxwé tɔn sín ali dó gbɛtɔ́ lɛ́; ɖó miɖésú byɔ́ mɛ ǎ, mi ka nɔ lɛ́ lɔn nǔ nú mɛ e jló ná byɔ́ mɛ lɛ́ é ǎ. 14* ——

15 “Heelú mi, sɛ́nkplɔ́nmɛtɔ́ lɛ́ kpó Falizyɛn lɛ́ kpó! Yɛmɛnúwatɔ́ è mi! Ðó mi nɔ gbɔn agě kpó tɔ kpó bo ná dó mɔ mɛ e ná húzú Jwifu* é ɖokpó, bɔ ényí é wá húzú Jwifu ɔ, mi nɔ bló bɔ é nɔ jɛxá Jeyɛ́nu* azɔn we hú miɖésúnɔ.

16 “Heelú mi, alixlɛ́mɛtɔ́ nukúntɔ́nnɔ è mi! Mi nɔ ɖɔ: ‘Ényí mɛ ɖěbǔ xwlé tɛ́npli ɔ ɔ, é nyí nǔtí ǎ; amɔ̌, ényí mɛ ɖěbǔ xwlé siká tɛ́npli ɔ tɔn ɔ, é ɖó ná ɖe akpá ɔ dandan.’ 17 Taɖunɔ nukúntɔ́nnɔ è mi! Ðětɛ́ ka ɖo tají hú ɖě? Siká ɔ wɛ a alǒ tɛ́npli ɔ, éé bló bɔ siká ɔ nyí nǔ mímɛ́ é? 18 Gɔ́ ná ɔ, mi nɔ ɖɔ: ‘Ényí mɛ ɖěbǔ xwlé vɔ̌sákpe ɔ ɔ, é nyí nǔtí ǎ; amɔ̌, ényí mɛ ɖěbǔ xwlé nǔníná e ɖ’é jí é ɔ, é ɖó ná ɖe akpá ɔ dandan.’ 19 Nukúntɔ́nnɔ è mi! Ðětɛ́ ka ɖo tají hú ɖě? Nǔníná ɔ wɛ a alǒ vɔ̌sákpe ɔ, éé bló bɔ nǔníná ɔ nyí nǔ mímɛ́ é? 20 Hǔn, mɛ ɖěbǔ e xwlé vɔ̌sákpe ɔ é ɖo vɔ̌sákpe ɔ kpó nǔ e ɖ’é jí lɛ́ é bǐ kpó xwlé wɛ; 21 bɔ mɛ ɖěbǔ e xwlé tɛ́npli ɔ é ɖo tɛ́npli ɔ kpó Mɛ e nɔ nɔ mɛ é kpó xwlé wɛ; 22 lobɔ mɛ ɖěbǔ e xwlé jǐxwé é ɖo axɔ́súzinkpo Mawu tɔn kpó Mɛ e jínjɔ́n jí é kpó xwlé wɛ.

23 “Heelú mi, sɛ́nkplɔ́nmɛtɔ́ lɛ́ kpó Falizyɛn lɛ́ kpó! Yɛmɛnúwatɔ́ è mi! Ðó mi nɔ ná mǎɖówǒ nǔhwɛ́nkún mǎti, anɛ́ti kpó kumɛ́ɛ kpó tɔn, loɔ, mi dó vɛ̌ nú nǔ e nyí nǔ tají ɖo Sɛ́n ɔ mɛ lɛ́ é, yě wɛ nyí hwɛjijɔ, nǔbláwǔkúnúmɛ kpó gbejíninɔ kpó. É ɖo tají ɖɔ è ní wa nǔ énɛ́ lɛ́, è ka ɖó ná dó vɛ̌ nú nǔ ɖě lɛ́ lɔ ǎ. 24 Alixlɛ́mɛtɔ́ nukúntɔ́nnɔ è mi! Mi nɔ xwí jɛxlí, bo ka nɔ mi lǎkúnmí.

25 “Heelú mi, sɛ́nkplɔ́nmɛtɔ́ lɛ́ kpó Falizyɛn lɛ́ kpó! Yɛmɛnúwatɔ́ è mi! Ðó mi nɔ klɔ́ kɔ́fu kpó agbǎn kpó gúdo bɔ yě nɔ mɛ́, loɔ, nukúnkɛndídó* kpó mɛɖéejimaɖuɖe kpó wɛ gɔ́ xo yětɔn mɛ. 26 Falizyɛn nukúntɔ́nnɔ è, to klɔ́ kɔ́fu ɔ kpó agbǎn ɔ kpó xomɛ bónú yě ní mɛ́ hwɛ̌, énɛ́ ɔ, gǔdo yětɔn lɔ ná mɛ́.

27 “Heelú mi, sɛ́nkplɔ́nmɛtɔ́ lɛ́ kpó Falizyɛn lɛ́ kpó! Yɛmɛnúwatɔ́ è mi! Ðó mi cí yɔdo e è sá nǔ wěwé dó lɛ́ é ɖɔhun. Nǔgbó ɔ, yě nɔ nyɔ́ ɖɛkpɛ ɖo wěxo, loɔ, mɛkúkú sín xú lɛ́ kpó nǔ blíblí tɛnmɛ tɛnmɛ bǐ kpó wɛ nɔ gɔ́ xo yětɔn mɛ. 28 Mɔ̌ ɖokpó ɔ, mi cí nǔjlɔ́jlɔ́watɔ́ lɛ́ ɖɔhun nú gbɛtɔ́ lɛ́ ɖo wěxo, loɔ, yɛmɛnúwiwa kpó sɛ́ngbigba kpó wɛ gɔ́ xo mitɔn mɛ.

29 “Heelú mi, sɛ́nkplɔ́nmɛtɔ́ lɛ́ kpó Falizyɛn lɛ́ kpó! Yɛmɛnúwatɔ́ è mi! Ðó mi nɔ jlá yɔdo gbeyíɖɔ lɛ́ tɔn ɖó, bo nɔ lɛ́ ba acɔ́ nú yɔdo nǔjlɔ́jlɔ́watɔ́ lɛ́ tɔn, 30 lobo nɔ ɖɔ: ‘Ényí mǐ ko nɔ gbɛ ɖo tɔ́gbó mǐtɔn lɛ́ hwenu wɛ ɔ, mǐ ná ɖ’alɔ ɖo gbeyíɖɔ lɛ́ sín hun kinkɔn nyi ayǐ mɛ xá yě ǎ.’ 31 Énɛ́ wú ɔ, kúnnu ɖe dó miɖée wú wɛ mi ɖe ɖɔ émí nyí mɛ e hu gbeyíɖɔ lɛ́ é sín vǐ. 32 Mi bo wa azɔ̌ e tɔ́gbó mitɔn lɛ́ bɛ́ é yi fó.

33 “Dan jɔmɔ è mi! Jakpata kúnkan è mi! Nɛ̌ mi ka ná hɔn nú hwɛ e è ná ɖó nú mi bo ná bɛ́ mi nyi Jeyɛ́nu* mɛ é gbɔn? 34 Ðó hwɛjijɔ énɛ́ wú ɔ, un ɖo gbeyíɖɔ lɛ́, nǔnywɛ́tɔ́ lɛ́ kpó nǔkplɔ́nmɛtɔ́ lɛ́ kpó sɛ́ dó mi wɛ. Mi ná hu yě mɛ ɖé lɛ́ bo ná xwe yě nyi atín wú, mi ná sɔ́ lanbá dó xo yě mɛ ɖé lɛ́ ná ɖo kplɔ́ngbasá mitɔn lɛ́, bo ná lɛ́ dó ya nú yě sín toxo ɖé mɛ jɛ ɖěvo mɛ, 35 bónú nǔjlɔ́jlɔ́watɔ́ lɛ́ sín hun e è kɔn nyi ayǐ ɖo ayǐkúngban ɔ jí lɛ́ é bǐ ní nɔ kɔ nú mi, bɛ́sín nǔjlɔ́jlɔ́watɔ́ Abɛ́li sín hun jí káká jɛ Zakalíi Bɛlɛkíya ví, ée mi hu ɖo tɛn mímɛ́ ɔ kpó vɔ̌sákpe ɔ kpó tɛ́ntin é sín hun jí. 36 Má ɖɔ nǔgbó nú mi, nǔ énɛ́ lɛ́ bǐ sín agban ná nɔ ta nú jijimɛ élɔ́.

37 “Jeluzalɛ́mu, Jeluzalɛ́mu, hwi mɛ e nɔ hu gbeyíɖɔ lɛ́, bo nɔ nyi awǐnnyaglo dó mɛ e è sɛ́ dó we lɛ́ é! Azɔn nabí un ko jló ná xo vǐ towe lɛ́ kplé, lěe kokló nɔ xo vǐ tɔn lɛ́ kplé dó awa tɔn lɛ́ glɔ́ gbɔn é? Loɔ, mi jló mɔ̌ ǎ. 38 Éɖíe! È ko jó xwé mitɔn dó* nú mi. 39 Ðó má ɖɔ nú mi, bɛ́sín din ɔ, mi sɔ́ ná mɔ mì ɖě gbeɖé ǎ, káká jɛ hwenu e mi ná ɖɔ xó élɔ́ é: ‘Nǔ nyɔ́ nú mɛ e wá ɖo Jexóva* nyíkɔ mɛ é!’”

24 Ée Jezu ɖo tɛ́npli ɔ mɛ gosín wɛ é ɔ, ahwanvú tɔn lɛ́ sɛkpɔ́ ɛ bo ɖɔ n’i ɖɔ é ní kpɔ́n tɛ́npli ɔ blěbú. 2 É ka yí gbe nú yě ɖɔ: “Mi mɔ nǔ énɛ́ lɛ́ bǐ a? Má ɖɔ nǔgbó nú mi, é ɖo wɛn ɖɔ awǐnnya e ɖo fí lɛ́ é ɖě tlɛ ná kpo ɖo ɖě jí ǎ, bǐ wɛ è ná mu.”

3 Hwenu e é ɖo ayǐjínjɔ́n ɖo Olívutín só ɔ jí é ɔ, ahwanvú lɛ́ sɛkpɔ́ ɛ ɖo nǔglɔ́ bo ɖɔ: “Ðɔ nú mǐ, hwetɛ́nu nǔ énɛ́ lɛ́ ka ná jɛ? Étɛ́ ka ná nyí wuntun fí ɖiɖe* towe kpó azǎn gǔdo gúdo tɔn gbɛ élɔ́ tɔn lɛ́* kpó tɔn?”

4 Jezu ka yí gbe nú yě ɖɔ: “Mi cɔ́ miɖée bónú mɛ ɖěbǔ ní ma flú mi ó, 5 ɖó mɛ gěgé ná sɔ́ nyǐkɔ ce bo ná xwetɔ́n, bo ná ɖɔ: ‘Nyi wɛ nyí Klísu ɔ,’ lobo ná flú mɛ gěgé. 6 Mi ná se ahwanfunfun sín zǐngídi ɖo fí e sɛkpɔ́ mi lɛ́ é, bo ná se ahwanfunfunxó ɖo fí e lín dó mi lɛ́ é. Mi ma nú ayi mitɔn gba dó ó, ɖó nǔ énɛ́ lɛ́ ɖó ná jɛ, amɔ̌, vivɔnu ɔ ko nɛ́ ǎ.

7 “Ðó akɔta ɖě ná tɔ́n ahwan ɖě, bɔ axɔ́súɖuto ɖě ná tɔ́n ahwan ɖě, nǔɖuɖu ná hwe dó mɛ, bɔ ayǐkúngban ná dán wǔ sín fí ɖé jɛ fí ɖěvo. 8 Nǔ énɛ́ lɛ́ bǐ ɔ, bǐbɛ́ wǔvɛ́* lɛ́ tɔn wɛ.

9 “Mɛ lɛ́ ná jó mi bónú è ní dó ya nú mi, yě ná hu mi, akɔta lɛ́ bǐ ná gbɛ́ wǎn nú mi ɖó nyǐkɔ ce wú. 10 Gɔ́ ná ɔ, mɛ gěgé ná jó nǔɖiɖi yětɔn dó bo ná sa yěɖée lɛ́, lobo ná gbɛ́ wǎn nú yěɖée lɛ́. 11 Gbeyíɖɔ-nyíjɛtɔ́ gěgé ná wá xwetɔ́n bo ná flú mɛ gěgé; 12 bɔ ɖó sɛ́ngbigba ná ɖo jijɛjí wɛ wútu ɔ, wǎnyíyí mɛ gěgé tɔn ná fá. 13 Amɔ̌, mɛ e dɛ* káká jɛ vivɔnu é ɔ, è ná hwlɛ́n ɛ gán. 14 È ná jlá wɛn ɖagbe Axɔ́súɖuto ɔ tɔn gbɔn ayǐkúngban ɔ bǐ jí, bónú é ná nyí kúnnuɖiɖe nú akɔta lɛ́ bǐ, bɔ énɛ́ ɔ gúdo ɔ, vivɔnu ɔ ná wá.

15 “Énɛ́ wú ɔ, hwenu e mi ná mɔ nǔ e xyɔ́ wǔ bo nɔ vívá nǔ é, lěe gbeyíɖɔ Daniyɛ́li ko ɖɔ xó tɔn gbɔn é, ɖo fí mímɛ́ ɔ é ɔ, (nǔxatɔ́ ɔ ní ɖó ayi te), 16 mɛ e ɖo Judée lɛ́ é ní jɛ hinhɔn yi sókan mɛ jí. 17 Mɛ e ɖo xɔ ta é ní ma ɖɔ émí ná jɛ te bo bɛ́ nǔɖókan émítɔn lɛ́ sín xɔ ɔ mɛ ó. 18 Mɛ e ɖo gle mɛ é ní ma ɖɔ émí ná lɛ́ kɔ bo yi sɔ́ awu émítɔn aga tɔn ɔ ó. 19 Heelú nyɔ̌nu e ná ɖo xo lɛ́ é kpó éé ná ɖo anɔ̌ ná vǐ wɛ hwenɛ́nu lɛ́ é kpó! 20 Mi ní nɔ ɖo ɖɛ xo wɛ, bónú hwenu e mi ná hɔn dó é ní ma jɛ dó avivɔhwenu* alǒ gbɔjɛzángbe ó; 21 ɖó hwenɛ́nu ɔ, wǔvɛ́ ɖaxó ɖé ná tíin, bɔ mɔ̌hunkɔtɔn ko tíin kpɔ́n sín hwenu e gbɛ ɔ jɔ dó káká jɛ din é ǎ, mɔ̌hunkɔtɔn ɖě ka sɔ́ ná lɛ́ tíin gbeɖé ǎ. 22 Nǔgbó ɔ, nú è ma ɖe azǎn énɛ́ lɛ́ kpo ǎ ɔ, mɛ ɖěbǔ ná gán ɖ’é mɛ ǎ; amɔ̌, ɖó mɛ e è cyán lɛ́ é wútu ɔ, è ná ɖe azǎn énɛ́ lɛ́ kpo.

23 “Gɔ́ ná ɔ, ényí mɛ ɖěbǔ ɖɔ nú mi ɖɔ: ‘Mi kpɔ́n! Klísu ɔ ɖíe ɖo fí è,’ alǒ: ‘É ɖíe ɖo dě è’ hǔn, mi ma ɖi nǔ ná ó. 24 Ðó Klísu-nyíjɛtɔ́ lɛ́ kpó gbeyíɖɔ-nyíjɛtɔ́ lɛ́ kpó ná xwetɔ́n bo ná bló nǔjíwǔ ɖaxó ɖaxó alɔkpa gěgé, bo ná dó sixú flú mɛ e è tlɛ cyán lɛ́ é, ényí é nyɔ́ bló ɔ nɛ́. 25 Éɖíe! Akpá wɛ un gba nú mi. 26 Énɛ́ wú ɔ, ényí mɛɖé ɖɔ nú mi ɖɔ: ‘Mi kpɔ́n! É ɖo gbětótló mɛ’ hǔn, mi ma yi ó; ényí yě ɖɔ: ‘Mi kpɔ́n! É ɖo xɔnɔnɔ mɛ’ hǔn, mi ma ɖi ó. 27 Ðó lěe jǐ nɔ kɛwun sín zǎnzǎnhwe jí bo nɔ hɔ́n káká yi gbadahwe jí gbɔn é ɔ, mɔ̌ wɛ fí ɖiɖe* Gbɛtɔ́ví ɔ tɔn ná cí. 28 Fí ɖěbǔ e nǔkúkú ɖe é ɔ, fínɛ́ wɛ hɔ̌n* lɛ́ ná kplé ɖe.

29 “Ðo wǔvɛ́ azǎn énɛ́ lɛ́ tɔn gúdo tlóló ɔ, hwesivɔ́ ná d’ablu, sun sɔ́ ná ná wěziza tɔn ǎ, sunví lɛ́ ná flɛ́ sín jǐxwé, bɔ hlɔ̌nhlɔ́n e ɖo jǐnukúnsin lɛ́ é ná húnhún. 30 Énɛ́ ɔ, wuntun Gbɛtɔ́ví ɔ tɔn ná tɔ́n ɖo jǐnukúnsin, bɔ akɔta e ɖo ayǐkúngban jí lɛ́ é bǐ ná nɔ ná alě. Yě ná mɔ Gbɛtɔ́ví ɔ jawě ɖo akpɔ́kpɔ́ mɛ kpó hlɔ̌nhlɔ́n kpó, kpódó susu ɖaxó kpán. 31 Kpɛn ná ɖɔ nǔ kpó xósúsú kpó, bɔ é ná sɛ́ wɛnsagun tɔn lɛ́ dó, bónú yě ná xo mɛ tɔn e è cyán lɛ́ é kplé sín wɛ̌kɛ́zo ɛnɛ lɛ́ bǐ mɛ, sín fí e jǐnukúnsin bɛ́sín é káká yi fí e é kponu ɖó é.

32 “Din ɔ, nǔjlɛ́dónǔwú fígitín tɔn élɔ́ ní kplɔ́n nǔ mi: Ényí ala tɔn yɔ̌yɔ́ lɛ́ jɛ susu jí bo zɔ́n ama ɔ, mi nɔ tuun ɖɔ alǔun* ko sɛkpɔ́. 33 Mɔ̌ ɖokpó ɔ, mi lɔmɔ̌ ɔ, ényí mi mɔ nǔ énɛ́ lɛ́ bǐ hǔn, mi tuun ɖɔ é ko sɛkpɔ́ bo ɖo hɔn jí. 34 Má ɖɔ nǔgbó nú mi, jijimɛ élɔ́ ná wá yi gbeɖé cóbónú nǔ énɛ́ lɛ́ bǐ ná jɛ ǎ. 35 Jǐnukúnsin kpó ayǐkúngban kpó ná wá yi, amɔ̌, xó ce lɛ́ ná wá yi gbeɖé ǎ.

36 “Mɛ ɖěbǔ tuun azǎn ɔ kpó gan ɔ mɛ kpó ǎ, wɛnsagun e ɖo jǐxwé lɛ́ é tuun ǎ, Vǐ ɔ lɔ tuun ǎ, loɔ, Tɔ́ ɔ kɛ́ɖɛ́ wɛ tuun. 37 Ðó lěe é nyí gbɔn ɖo Nɔwée hwenu é ɔ, mɔ̌ wɛ fí ɖiɖe* Gbɛtɔ́ví ɔ tɔn lɔ ná cí. 38 Ðo hwe énɛ́ nu, jɛ nukɔn nú Sinvɔgbɛ ɔ ɔ, mɛ lɛ́ ɖo nǔ ɖu wɛ bo ɖo ahan nu wɛ, súnnu lɛ́ ɖo asi da wɛ, bɔ è ɖo nyɔ̌nu lɛ́ ná asú wɛ, káká jɛ gbe e gbe Nɔwée byɔ́ tɔjíhún ɔ mɛ é, 39 bɔ yě ɖó ayi ɖěbǔ nǔ e ɖo jijɛ wɛ é wú ǎ, káká bɔ Sinvɔgbɛ ɔ wá bo kplɔ́ yě bǐ yi. Lěe fí ɖiɖe Gbɛtɔ́ví ɔ tɔn ná cí é nɛ́. 40 Ðo hwenɛ́nu ɔ, súnnu we ná ɖo gle mɛ, bɔ è ná sɔ́ mɛ ɖokpó bo jó mɛ ɖě ɔ dó. 41 Nyɔ̌nu we ná ɖo nǔ li wɛ ɖo sé kɔn, bɔ è ná sɔ́ mɛ ɖokpó bo jó mɛ ɖě ɔ dó. 42 Énɛ́ wú ɔ, mi nɔ acéjí, ɖó mi tuun gbe e gbe Aklúnɔ mitɔn ná wá dó é ǎ.

43 “Nǔ ɖokpó ka ɖíe: Ényí xwétɔ́ ɖé tuun gan e mɛ ajotɔ́ ná wá dó é* wɛ ɔ, wunzɛn wɛ é ná nɔ bo ná lɔn nú è ná gba xwé tɔn ǎ. 44 Ényí mɔ̌ hǔn, mi lɔmɔ̌ ɔ, mi ní bo ɖo gbesisɔmɛ, ɖó gan e mɛ mi ma lin dó ǎ é wɛ Gbɛtɔ́ví ɔ ná wá.

45 “Mɛ̌ ka nyí mɛsɛntɔ́ gbejínɔtɔ́ ayiɖotenánɔ* e gǎn tɔn sɔ́ ɖó mɛsɛntɔ́ xwé ɔ gbe tɔn lɛ́ nu, bónú é ná nɔ ná nǔɖuɖu yětɔn yě dó hwetɔnnu é tawun? 46 Awǎjijɛnɔ wɛ nyí mɛsɛntɔ́ énɛ́, ényí gǎn tɔn wá bo mɔ ɛ bɔ é ɖo mɔ̌ wa wɛ ɔ nɛ́! 47 Má ɖɔ nǔgbó nú mi, é ná sɔ́ ɛ ɖó nǔɖókan tɔn lɛ́ bǐ nu.

48 “Amɔ̌, ényí mɛsɛntɔ́ énɛ́ nyí mɛsɛntɔ́ nyanya, bo ɖɔ dó ayi tɔn mɛ gbeɖé ɖɔ: ‘Gǎn ce ɖo hwenu gbɔ wɛ,’ 49 bo jɛ mɛsɛntɔ́ gbɛ̌ tɔn lɛ́ xo jí, jɛ nǔ ɖu xá ahannumúnɔ e dó ve lɛ́ é jí, lobo lɛ́ jɛ ahan nu xá yě jí ɔ, 50 mɛsɛntɔ́ énɛ́ sín gǎn ná wá gbe e gbe é ma ɖó nukún tɔn ǎ é kpó gan e mɛ é ma tuun ǎ é kpó, 51 bo ná sɔ́ tódɔnnúmɛ e syɛ́n hú bǐ é dó dɔn tó n’i, lobo ná xwe è dó yɛmɛnúwatɔ́ lɛ́ sín ahwan mɛ. Fínɛ́ wɛ é ná ya avǐ, bo ná ɖu aɖǔkún ɖe.

25 “Gɔ́ ná ɔ, è sixú jlɛ́ Axɔ́súɖuto jǐxwé tɔn ɔ dó ɖyɔ̌vǐ ɖo alɔjí wǒ, éé zé zogbɛ́n yětɔn lɛ́ bo tɔ́n, lobo xwe asisúnɔ ɔ kpé gbé lɛ́ é wú. 2 Mɛ atɔ́ɔ́n ɖo yě mɛ bo nyí xlonɔ, bɔ mɛ atɔ́ɔ́n nyí ayiɖotenánɔ.* 3 Xlonɔ lɛ́ zé zogbɛ́n yětɔn lɛ́ bo ka hɛn ami dó yěɖée jí ǎ, 4 loɔ, ayiɖotenánɔ lɛ́ zé zogbɛ́n yětɔn lɛ́ bo lɛ́ hɛn ami dó go yětɔn lɛ́ mɛ. 5 Ðó asisúnɔ ɔ ɖo lǐnlín wɛ wútu ɔ, yě bǐ jɛ kɔmlɔgɔ́ sa jí bo d’amlɔ. 6 Ðo zǎnxwete ɔ, è se xósúsú ɖé: ‘Asisúnɔ ɔ ɖíe ja è! Mi tɔ́n bo yi kpé è.’ 7 Énɛ́ ɔ, ɖyɔ̌vǐ ɖo alɔjí lɛ́ bǐ fɔ́n bo bló zogbɛ́n yětɔn lɛ́ ɖó. 8 Xlonɔ lɛ́ ɖɔ nú ayiɖotenánɔ lɛ́ ɖɔ: ‘Mi ná mǐ ami mitɔn kpɛɖé, ɖó zogbɛ́n mǐtɔn lɛ́ ko ɖo nǎ cí wɛ.’ 9 Ayiɖotenánɔ lɛ́ yí gbe nú yě bo ɖɔ: ‘Ényí mǐ ná mi ɔ, bóyá é sixú nɔ ma kpé mǐ mɛ bǐ. É nyɔ́ wa hǔn, mi yi mɛ e nɔ sa lɛ́ é gɔ́n, bo jɛ miɖésúnɔ tɔn.’ 10 Ée yě tɔ́n bo yi jijɛ gbé é ɔ, asisúnɔ ɔ wá. Ðyɔ̌vǐ ɖo alɔjí e ko ɖo gbesisɔmɛ lɛ́ é xwedó asisúnɔ ɔ byɔ́ xɔ e mɛ è ɖo alɔwlíwlígɔ́ ɔ ɖu ɖe wɛ é, bɔ è sú hɔn ɔ. 11 Énɛ́ gúdo ɔ, ɖyɔ̌vǐ ɖo alɔjí e kpo lɛ́ é lɔ wá, bo nɔ ɖɔ: ‘Aklúnɔ, aklúnɔ, hun hɔn nú mǐ!’ 12 É yí gbe nú yě ɖɔ: ‘Má ɖɔ nǔgbó nú mi, un tuun mi ǎ.’

13 “Énɛ́ wú ɔ, mi nɔ acéjí, ɖó mi tuun azǎn ɔ ǎ, mi ka lɛ́ tuun gan ɔ mɛ ǎ.

14 “È sixú lɛ́ jlɛ́ Axɔ́súɖuto ɔ dó nya e jló ná yi to ɖěvo mɛ, bo ylɔ́ mɛsɛntɔ́ tɔn lɛ́, lobo sɔ́ nǔɖókan tɔn lɛ́ dó así nú yě é wú. 15 É zé taláan* atɔ́ɔ́n nú mɛ nukɔntɔn ɔ, we nú mɛ wegɔ́ ɔ, bo zé ɖokpó nú mɛ atɔngɔ́ ɔ. É zé nú mɛ ɖokpó ɖokpó sɔgbe xá nǔwúkpíkpé tɔn, lobo ɖidó tomɛ. 16 Tlóló ɔ, mɛ e è zé taláan atɔ́ɔ́n ná é ɖidó, bo sɔ́ dó wa ajɔ̌ ná, lobo ɖu atɔ́ɔ́n ɖěvo sín le. 17 Mɔ̌ ɖokpó ɔ, mɛ e è zé we ná é ɖu we ɖěvo sín le. 18 Amɔ̌, mɛsɛntɔ́ e è zé ɖokpó géé ná é yi bo kun do, lobo sɔ́ gǎn tɔn sín akwɛ́* hwlá d’é mɛ.

19 “Hwenu gěgé gúdo ɔ, mɛsɛntɔ́ énɛ́ lɛ́ sín gǎn ɔ wá, bo jló ná gbéjé nǔ e yě sɔ́ akwɛ́ tɔn dó wa ná lɛ́ é kpɔ́n. 20 Énɛ́ ɔ, mɛ e è zé taláan atɔ́ɔ́n ná é wá, bo hɛn taláan atɔ́ɔ́n ɖěvo lɛ́ wá gɔ́ ná, lobo ɖɔ: ‘Gǎn ce, taláan atɔ́ɔ́n wɛ a sɔ́ d’así nú mì. Kpɔ́n! Un ɖu atɔ́ɔ́n sín le d’é jí.’ 21 Gǎn tɔn ɖɔ n’i ɖɔ: ‘A bló ɖó ganjí, mɛsɛntɔ́ ɖagbe gbejínɔtɔ́! A nɔ gbejí ɖo nǔ kpɛɖé kɔn. Un ná sɔ́ we ɖó nǔ gěgé nu. Bo j’awǎ xá mì.’ 22 Énɛ́ gúdo ɔ, mɛ e è zé taláan we ná é wá, bo ɖɔ: ‘Gǎn ce, taláan we wɛ a sɔ́ d’así nú mì. Kpɔ́n! Un ɖu we sín le d’é jí.’ 23 Gǎn tɔn ɖɔ n’i ɖɔ: ‘A bló ɖó ganjí, mɛsɛntɔ́ ɖagbe gbejínɔtɔ́! A nɔ gbejí ɖo nǔ kpɛɖé kɔn. Un ná sɔ́ we ɖó nǔ gěgé nu. Bo j’awǎ xá mì.’

24 “Gǔdo mɛ ɔ, mɛsɛntɔ́ e è zé taláan ɖokpó ná é wá bo ɖɔ: ‘Gǎn ce, un tuun ɖɔ mɛ syɛ́nsyɛ́n wɛ a nyí, bo nɔ ya nǔ ɖo fí e a ma dó nǔ ɖe ǎ é, lobo nɔ xo nǔkún kplé ɖo fí e a ma fún ɖe ǎ é. 25 Énɛ́ wú ɔ, xɛsi ɖi mì, bɔ un yi hwlá taláan towe dó kɔ́ glɔ́. Kpɔ́n! Nǔ towe ɖíe.’ 26 Gǎn tɔn yí gbe n’i ɖɔ: ‘Mɛsɛntɔ́ nyanya fɔnlínnɔ, a tuun ɖɔ un nɔ ya nǔ ɖo fí e un ma dó nǔ ɖe ǎ é, bo nɔ xo nǔkún kplé ɖo fí e un ma fún ɖe ǎ é, kabǐ? 27 É nyɔ́, ényí nǔ nyí mɔ̌ ɔ, a ɖó ná ko sɔ́ akwɛ́* ce ɖó akwɛ́sɛxwetɛn, bɔ ényí un wá ɔ, un ná yí akwɛ́ ce kpó akwɛ́ví kpó.

28 “‘Énɛ́ wútu ɔ, mi yí taláan ɔ sín así tɔn, bo sɔ́ jó nú mɛ e ɖó taláan wǒ é. 29 Ðó mɛ ɖěbǔ e ɖó nǔ é ɔ, è ná ná ɛ d’é jí, bɔ é ná túnflá ɖo así tɔn. Amɔ̌, mɛ e ma ɖó nǔ ǎ é ɔ, è ná yí nǔ e é tlɛ ko ɖó é sín así tɔn. 30 Mi nyi mɛsɛntɔ́ nǔvɔ́nɔ ɔ dó ablu mɛ ɖo kɔ́xo. Fínɛ́ wɛ é ná ya avǐ bo ná ɖu aɖǔkún ɖe.’

31 “Hwenu e Gbɛtɔ́ví ɔ ná wá ɖo susu tɔn mɛ, é kpó wɛnsagun lɛ́ bǐ kpó é ɔ, hwenɛ́nu ɔ, é ná jínjɔ́n axɔ́súzinkpo tɔn susunɔ ɔ jí. 32 È ná xo akɔta lɛ́ bǐ kplé ɖó nukɔn tɔn, bɔ é ná ɖe gbɛtɔ́ lɛ́ ɖě ɖó vo nú ɖě, lěe lɛ̌ngbɔ́nyitɔ́ nɔ ɖe lɛ̌ngbɔ́ lɛ́ ɖó vo nú gbɔ̌ lɛ́ gbɔn é ɖɔhun. 33 É ná bɛ́ lɛ̌ngbɔ́ lɛ́ ɖó ɖisí tɔn xwé, bo ná bɛ́ gbɔ̌ lɛ́ ɖó amyɔ tɔn xwé.

34 “Énɛ́ gúdo ɔ, Axɔ́sú ɔ ná ɖɔ nú mɛ ɖěɖěe ɖo ɖisí tɔn xwé lɛ́ é ɖɔ: ‘Mi wá, mi mɛ e jí Tɔ́ ce ko kɔn nyɔ̌ná dó lɛ́ é, bo ɖu gǔ Axɔ́súɖuto e è ko sɔ́ nǔ ná ɖ’ayǐ nú mi sín hwenu e è ɖó gbɛ ɔ ayǐ é* tɔn. 35 Ðó xovɛ́ sin mì, bɔ mi ná mì nǔɖuɖu. Kɔ xú mì, bɔ mi ná mì sin. Un nyí jǒnɔ, bɔ mi yí mì. 36 Un ɖo mɛ̌,* bɔ mi ná avɔ mì. Un jɛ azɔn, bɔ mi kpé nukún dó wǔ ce. Un ɖo ganxó, bɔ mi wá ba mì kpɔ́n.’ 37 Énɛ́ ɔ, nǔjlɔ́jlɔ́watɔ́ lɛ́ ná yí gbe n’i ɖɔ: ‘Aklúnɔ, hwetɛ́nu mǐ ka mɔ we ɖo xovɛ́ bo ná we nǔɖuɖu? Alǒ, hwetɛ́nu kɔ ka xú we, bɔ mǐ mɔ bo ná we sin? 38 Hwetɛ́nu mǐ ka mɔ we bɔ a nyí jǒnɔ, bɔ mǐ yí we? Alǒ, hwetɛ́nu mǐ ka mɔ we ɖo mɛ̌ bo ná avɔ we? 39 Hwetɛ́nu mǐ ka mɔ we ɖo azɔn jɛ wɛ alǒ ɖo gan mɛ, bɔ mǐ ba we kpɔ́n?’ 40 Axɔ́sú ɔ ná yí gbe nú yě ɖɔ: ‘Má ɖɔ nǔgbó nú mi, nǔ ɖěbǔ e mi wa nú mɛ e hwe hú gǎn ɖo nɔví ce élɔ́ lɛ́ mɛ é ɖokpó é ɔ, nyɛ wɛ mi wá ná.’

41 “Énɛ́ gúdo ɔ, é ná ɖɔ nú mɛ ɖěɖěe ɖo amyɔ tɔn xwé lɛ́ é ɖɔ: ‘Mi sɛ yi zɔ nú mì, mi mɛ e è ko dónu lɛ́ é, bo yi jɛ myɔ mavɔmavɔ e è sɔ́ nǔ ná nú Awǒvi kpó wɛnsagun tɔn lɛ́ kpó é mɛ. 42 Ðó xovɛ́ sin mì, mi ka ná nǔɖuɖu mì ǎ. Kɔ xú mì, mi ka ná sin mì ǎ. 43 Un nyí jǒnɔ, mi ka yí mì ǎ. Un ɖo mɛ̌, mi ka ná avɔ mì ǎ. Un jɛ azɔn bo lɛ́ nɔ gan mɛ, mi ka kpé nukún dó wǔtu ce ǎ.’ 44 Énɛ́ ɔ, yě lɔ ná ɖɔ n’i ɖɔ: ‘Aklúnɔ, hwetɛ́nu mǐ ka mɔ we bɔ a ɖo xovɛ́, alǒ kɔ xú we, alǒ a nyí jǒnɔ, alǒ a ɖo mɛ̌, alǒ a jɛ azɔn, alǒ a ɖo ganxó, bɔ mǐ ma dó alɔ we ǎ?’ 45 Bɔ é ná ɖɔ nú yě ɖɔ: ‘Má ɖɔ nǔgbó nú mi, nǔ ɖěbǔ e mi gɔn wiwa nú mɛ e hwe hú gǎn ɖo mɛ élɔ́ lɛ́ mɛ é ɖokpó é ɔ, nyɛ wɛ mi gɔn wiwa ná.’ 46 È ná sú mɛ énɛ́ lɛ́ sín kún dó* káká sɔ́yi, amɔ̌, nǔjlɔ́jlɔ́watɔ́ lɛ́ ná mɔ gbɛ mavɔmavɔ.”

26 Din ɔ, ée Jezu ɖɔ xó énɛ́ lɛ́ bǐ kpé é ɔ, é ɖɔ nú ahwanvú tɔn lɛ́ ɖɔ: 2 “Mi tuun ɖɔ ɖo azǎn atɔn gbe ɔ, è ná ɖu Dǐndínwáyixwe ɔ, bɔ è ná jó Gbɛtɔ́ví ɔ, bónú è ní xwe è nyi atín wú.”

3 Hwe énɛ́ nu ɔ, vɔ̌sánúxwlémawutɔ́gán lɛ́ kpó tomɛxó lɛ́ kpó kplé ɖo vɔ̌sánúxwlémawutɔ́ ɖaxó Kayífu sín kɔ́xota, 4 bɔ yě nɔ kpɔ́ bo blá gbě, bo ná sɔ́ sísɛ́ ɖó nukɔn* dó wlí Jezu* lobo hu i. 5 Amɔ̌, yě nɔ ɖɔ: “É ná nyí ɖo xwe ɔ hwenu ǎ, bónú hunnyahunnya ní ma wá tíin ɖo togun ɔ mɛ ó.”

6 Hwenu e Jezu ɖo Betaníi, ɖo Sinmɔ́ɔ e ko jɛ gudu kpɔ́n é sín xwégbe é ɔ, 7 nyɔ̌nu ɖé hɛn nǔsáwǔ wǎnɖagbenɔ axivɛ́nú dó alubátlugo mɛ, bo sɛkpɔ́ ɛ, lobo jɛ nǔsáwǔ ɔ kɔn dó ta n’i jí, hwenu e é ɖo nǔ ɖu wɛ* é. 8 Ée ahwanvú lɛ́ mɔ mɔ̌ é ɔ, xomɛ sin yě, bɔ yě ɖɔ: “Nǔhɛngú tɛ́ ka nɛ́? 9 È hɛn ɔ, è ná ko sa axivɛ́nú tɔn, bo ná akwɛ́ ɔ wamamɔnɔ lɛ́.” 10 Ðó Jezu tuun xó e ɖɔ wɛ yě ɖe é wútu ɔ, é ɖɔ nú yě ɖɔ: “Étɛ́wú mi ka ɖo tíntɛ́nkpɔ́n wɛ bo ná dó ayimɛya nú nǎwe ɔ? Nǔ ɖagbe wɛ é wa nú mì. 11 Ðó midɛɛ lɛ́ ɔ, wamamɔnɔ lɛ́ ɖo kpɔ́ xá mi tɛgbɛ, amɔ̌, nyɛ ná ɖo kpɔ́ xá mi tɛgbɛ ǎ. 12 Nǔsáwǔ wǎnɖagbenɔ énɛ́ e é sá dó agbaza ce é ɔ, nǔ wɛ é sɔ́ nú mì ɖ’ayǐ nú hwenu e è ná ɖi mì é. 13 Má ɖɔ nǔgbó nú mi, fí ɖěbǔ e è ná jlá wɛn ɖagbe élɔ́ ɖe ɖo gbɛ ɔ bǐ mɛ é ɔ, è ná nɔ ɖɔ nǔ e nyɔ̌nu élɔ́ wa é lɔ, bo ná dó flín i.”

14 Énɛ́ gúdo ɔ, mɛ e è nɔ ylɔ́ ɖɔ Judási Isikaliɔ́ti, bɔ é ɖo mɛsɛ́dó 12 lɛ́ mɛ é yi vɔ̌sánúxwlémawutɔ́gán lɛ́ gɔ́n, 15 bo ɖɔ: “Étɛ́ mi ka ná ná mì bónú má sa ɛ nú mi?” Yě d’akpá ɖɔ émí ná ná ɛ kpatágankwɛ́ 30. 16 Énɛ́ wú ɔ, sín hwenɛ́nu ɖidó ɔ, é nɔ ɖo ali ɖagbe e ná hun n’i, bɔ é ná sa ɛ é ba wɛ.

17 Ðo Wɔ̌xúxú e mɛ è ma dó tɔ́n ǎ é sín xwezán nukɔntɔn ɔ gbe ɔ, ahwanvú lɛ́ wá Jezu gɔ́n bo ɖɔ: “Fítɛ́ a ka jló ɖɔ mǐ ní sɔ́ nǔ ná bónú a ná ɖu Dǐndínwáyixwe sín nǔɖuɖu ɔ ɖe?” 18 É ɖɔ: “Mi yi mɛ lě gɔn ɖo toxo ɔ mɛ, bo ɖɔ n’i ɖɔ: ‘Mɛ̌si ɖɔ: “Hwenu e è ɖó nú mì é ko sɛkpɔ́; un ná ɖu Dǐndínwáyixwe ɔ xá ahwanvú ce lɛ́ ɖo xwé towe gbe.”’” 19 Énɛ́ ɔ, ahwanvú lɛ́ wa nǔ e Jezu ɖɔ nú yě lɛ́ é, bo sɔ́ nǔ nú Dǐndínwáyixwe ɔ.

20 Ée gbadanu su é ɔ, é jínjɔ́n távo tó xá ahwanvú 12 lɛ́. 21 Hwenu e yě ɖo nǔ ɖu wɛ é ɔ, é ɖɔ: “Má ɖɔ nǔgbó nú mi, mɛ ɖokpó ɖo mi mɛ bo ná sa mì.” 22 Ée yě se mɔ̌ é ɔ, yě byɔ́ aluwɛ ɖaxó ɖé mɛ, bɔ yě mɛ ɖokpó ɖokpó jɛ kinkanbyɔ́ ɛ jí ɖɔ: “Aklúnɔ, nyɛ wɛ a?” 23 É ka yí gbe nú yě ɖɔ: “Mɛ e dó alɔ agbǎn ɖokpó ɔ mɛ xá mì é wɛ nyí mɛ e ná sa mì é. 24 Nǔgbó wɛ, Gbɛtɔ́ví ɔ ná kú lěe è ko wlán gbɔn ɖ’ayǐ dó wǔtu tɔn é. Amɔ̌, heelú mɛ e ná sa Gbɛtɔ́ví ɔ é! É ná ko nyɔ́ nú mɛ énɛ́ hú ɖɔ é ní gɔn gbɛ wá.” 25 Judási e ɖo nǎ sa ɛ wɛ é ɖɔ n’i ɖɔ: “Mɛ̌si,* nyɛ wɛ a?” Jezu ɖɔ n’i ɖɔ: “É nɛ́ a ɖɔ pɛ́ɛ́ nɛ́.”

26 Hwenu e yě kpo ɖo nǔ ɖu wɛ é ɔ, Jezu zé wɔ̌xúxú ɖokpó, bɔ ée é byɔ́ nyɔ̌ná d’é jí gúdo é ɔ, é fɛ́n, bo sɔ́ jó nú ahwanvú lɛ́ lobo ɖɔ: “Mi yí, bo ɖu. Élɔ́ nɔ te nú agbaza ce.” 27 É lɛ́ zé kɔ́fu ɖokpó, bo dó kú lobo zé jó nú yě, bo ɖɔ: “Mi mɛ bǐ mi nu, 28 ɖó élɔ́ nɔ te nú ‘akɔjijɛ ɔ sín hun’ ce, ée è ná kɔn nyi ayǐ dó mɛ gěgé tamɛ nú hwɛsɔ́kɛmɛ é. 29 Amɔ̌, má ɖɔ nú mi: Un sɔ́ ná nu vɛ̌ɛn élɔ́ ɖě gbeɖé ǎ, káká jɛ hwenu e un ná lɛ́ nu xá mi ɖo Axɔ́súɖuto Tɔ́ ce tɔn mɛ é.” 30 Yě ji han dó kpa susu nú Mawu,* bɔ énɛ́ gúdo ɔ, yě wá tɔ́n bo yi Olívutín só ɔ jí.

31 Énɛ́ gúdo ɔ, Jezu ɖɔ nú yě ɖɔ: “Ðó nǔ e ná jɛ dó wǔtu ce é wú ɔ, mi mɛ bǐ wɛ ná klɛ́n afɔ ɖo zǎn élɔ́ mɛ, ɖó è ko wlán ɖɔ: ‘Un ná xú nǔ lɛ̌ngbɔ́nyitɔ́ ɔ, bɔ lɛ̌ngbɔ́ e ɖo lɛ̌ngbɔ́hwan ɔ mɛ lɛ́ é ná gba dó.’ 32 Amɔ̌, ée è ná fɔ́n mì sín kú gúdo é ɔ, un ná jɛ nukɔn nú mi yi Galilée.” 33 Piyɛ́ɛ ka yí gbe n’i bo ɖɔ: “Ényí mɛ ɖě lɛ́ bǐ ná bo tlɛ klɛ́n afɔ, ɖó nǔ e ná jɛ dó wǔ we é wú ɔ, nyɛ ná klɛ́n afɔ gbeɖé ǎ!” 34 Jezu ɖɔ n’i ɖɔ: “Má ɖɔ nǔgbó nú we, ɖo zǎn élɔ́ mɛ ɔ, cóbónú kokló ná kɔ́ así ɔ, a ná ko gbɛ́ mì azɔn atɔn.” 35 Piyɛ́ɛ ɖɔ n’i ɖɔ: “Ényí é ná bo tlɛ byɔ́ ɖɔ má kú xá we ɔ, un ná gbɛ́ we gbeɖé ǎ.” Ahwanvú ɖě lɛ́ lɔ bǐ ɖɔ nǔ ɖokpó ɔ.

36 Énɛ́ gúdo ɔ, Jezu kpó ahwanvú lɛ́ kpó wá fí e è nɔ ylɔ́ ɖɔ Jɛtisemaníi é, bɔ é ɖɔ nú yě ɖɔ: “Mi jínjɔ́n fí bónú má yi dɔ̌n bo xo ɖɛ.” 37 É kplá Piyɛ́ɛ kpó vǐ súnnu Zebeɖée tɔn we lɛ́ kpó. Hwenɛ́nu ɔ, é byɔ́ aluwɛ mɛ, bɔ ayi tɔn bǐ gba dó. 38 Énɛ́ ɔ, é ɖɔ nú yě ɖɔ: “Un* ɖo aluwɛ ɖaxó e nɔ kplá mɛ yi kú é mɛ. Mi nɔ fí bo nɔ wunzɛn xá mì.” 39 Bɔ ée é sɛ yi nukɔn kpɛɖé é ɔ, é xwe agbɔ̌nnusú do, bo xo ɖɛ ɖɔ: “Tɔ́ ce, ényí é nyɔ́ bló hǔn, kɛnklɛ́n bo sɛ kɔ́fu élɔ́ dó zɔ nú mì. É ní ma ka nyí lěe nyɛ jló gbɔn é ó, loɔ, lěe hwɛ jló gbɔn é.”

40 É lɛ́ kɔ yi ahwanvú lɛ́ gɔ́n, bo mɔ yě ɖo amlɔ dɔ́ wɛ, lobo ɖɔ nú Piyɛ́ɛ ɖɔ: “Mi tlɛ sixú nɔ wunzɛn xá mì nú ganxixo ɖokpó vɔ́vɔ́ ǎ wɛ a? 41 Mi nɔ wunzɛn bo nɔ ɖo ɖɛ xo wɛ, lobo ma wá jɛ tɛ́nkpɔ́n mɛ ó. Nǔgbó ɔ, ayi gbɛtɔ́ tɔn ɖó jlǒ syɛ́nsyɛ́n, amɔ̌, agbaza ɖó gǎn ɖé ǎ.” 42 É lɛ́ ɖidó azɔn wegɔ́ ɔ, bo xo ɖɛ ɖɔ: “Tɔ́ ce, ényí é ma sixú nyɔ́ bló ɖɔ kɔ́fu élɔ́ ní sɛ dó zɔ nú mì bónú un ná gɔn nunu ǎ hǔn, jlǒ towe ní bo nyí wiwa.” 43 É lɛ́ wá bo mɔ yě ɖo amlɔ dɔ́ wɛ, ɖó nukún yětɔn lɛ́ kpɛn. 44 Énɛ́ ɔ, é jó yě dó, bo lɛ́ yi, bo xo ɖɛ azɔn atɔngɔ́ ɔ, lobo lɛ́ ɖɔ nǔ ɖokpó ɔ. 45 Énɛ́ gúdo ɔ, é lɛ́ kɔ wá ahwanvú lɛ́ gɔ́n, bo ɖɔ nú yě ɖɔ: “Étɛ́wú mi ka ɖo amlɔ dɔ́ wɛ bo ɖo gbigbɔjɛ wɛ, ɖo gan lěhun mɛ? Mi kpɔ́n! Gan e mɛ è ná sa Gbɛtɔ́ví ɔ bo jó è nyi hwɛhutɔ́ lɛ́ sín alɔ mɛ é ko sɛkpɔ́. 46 Mi sí te bónú mǐ ní yi. Mi kpɔ́n! Mɛ e ná sa mì é ko sɛkpɔ́.” 47 Ée é kpo ɖo xó ɖɔ wɛ é ɔ, Judási e ɖo mɛsɛ́dó 12 lɛ́ mɛ é wá, bɔ ahwan ɖaxó e hɛn hwǐ kpó kpo kpó, bɔ vɔ̌sánúxwlémawutɔ́gán lɛ́ kpó tomɛxó lɛ́ kpó sɛ́ dó é xwedó è.

48 Din ɔ, mɛ e jló ná sa ɛ é ko ná wuntun ɖé yě, bo ɖɔ: “Mɛ ɖěbǔ e un ná kí si ná é ɔ, mɛ ɔ nɛ́; mi wlí i.” 49 É yi Jezu gɔ́n tlɔlɔ, bo ɖɔ: “Mɛ̌si,* kú dó gbada!” Lobo kí si n’i. 50 Amɔ̌, Jezu ɖɔ n’i ɖɔ: “Nya ɛ, étɛ́ gbé a ka tɔ́n bo wá?” Énɛ́ ɔ, yě sɛkpɔ́ Jezu, bo wlí i, bá kplá ɛ yi. 51 Amɔ̌, mɛ e ɖo kpɔ́ xá Jezu lɛ́ é ɖokpó dlɛ́n alɔ, bo sún hwǐ, lobo xú mɛsɛntɔ́ vɔ̌sánúxwlémawutɔ́ ɖaxó ɔ tɔn, bo kpa tó è. 52 Jezu ka ɖɔ n’i ɖɔ: “Lɛ̌ sɔ́ hwǐ towe ɖó tɛn tɔn mɛ, ɖó mɛ e sɔ́ hwǐ dó mɛ jí lɛ́ é bǐ wɛ ná kú hwǐ kú. 53 Alǒ, un sixú byɔ́ Tɔ́ ce ɖɔ é ní ná mì ahwankpá wɛnsagun lɛ́ tɔn 12 jɛjí ɖo tɛndo élɔ́ mɛ ǎ wɛ a vɛdó a? 54 É nyí mɔ̌ wɛ ɔ, nɛ̌ Nǔwlánwlán mímɛ́ e ɖɔ ɖɔ nǔ élɔ́ lɛ́ ɖó ná jɛ é ka ná jɛnu gbɔn?” 55 Ðo hwenɛ́nu ɔ, Jezu ɖɔ nú ahwan ɔ ɖɔ: “Ajotɔ́ wɛ nú mì bɔ mi hɛn hwǐ kpó kpo kpó bo wá wlǐwlí mì gbé a? Ayǐhɔ́ngbe ayǐhɔ́ngbe wɛ un nɔ jínjɔ́n tɛ́npli ɔ mɛ bo nɔ ɖo nǔ kplɔ́n mɛ wɛ, có mi ka wlí mì ǎ. 56 Amɔ̌, nǔ énɛ́ lɛ́ bǐ jɛ, bónú nǔwlánwlán* gbeyíɖɔ lɛ́ tɔn ní dó jɛnu.” Hwenɛ́nu ɔ, ahwanvú lɛ́ bǐ jó è dó bo hɔn.

57 Mɛ ɖěɖěe wlí Jezu lɛ́ é kplá ɛ yi vɔ̌sánúxwlémawutɔ́ ɖaxó Kayífu gɔ́n, fí e sɛ́nkplɔ́nmɛtɔ́ lɛ́ kpó tomɛxó lɛ́ kpó ko xo yěɖée kplé ɖó é. 58 Amɔ̌, Piyɛ́ɛ kpo ɖo xwixwedó è wɛ, bo ka ɖo zɔ dó è ganjí, káká jɛ vɔ̌sánúxwlémawutɔ́ ɖaxó ɔ sín kɔ́xota. Bɔ ée é byɔ́ xwé ɔ gbe gúdo é ɔ, é jínjɔ́n mɛsɛntɔ́ xwé ɔ gbe tɔn lɛ́ kpá, bo ná kpɔ́n lěe nǔ lɛ́ ná yi gbɔn é.

59 Din ɔ, vɔ̌sánúxwlémawutɔ́gán lɛ́ kpó Hwɛɖɔxɔsá ɖaxó Jwifu lɛ́ tɔn blěbú kpó ɖo kúnnu agɔ e yě ná ɖe dó Jezu wú lɛ́ é ba wɛ, bo ná mɔ tɛn dó hu i. 60 Kúnnuagɔɖetɔ́ gěgé wá có, yě ka mɔ ɖě ǎ. Nukɔnmɛ ɔ, mɛ we wá 61 bo ɖɔ: “Nya élɔ́ ɖɔ: ‘Un kpé wú bo ná mu tɛ́npli Mawu tɔn ɔ, bɔ azǎn atɔn vlamɛ ɔ, un ná vɔ́ gbá.’” 62 Énɛ́ ɔ, vɔ̌sánúxwlémawutɔ́ ɖaxó ɔ sí te, bo ɖɔ n’i ɖɔ: “A ɖó xó ɖé bo ná ɖɔ ǎ cé? A se hwɛ e dó we wɛ mɛ élɔ́ lɛ́ ɖe é ǎ cé?” 63 Jezu ka cí xwíí. Énɛ́ wú ɔ, vɔ̌sánúxwlémawutɔ́ ɖaxó ɔ ɖɔ n’i ɖɔ: “Un ɖe gbe nú we ɖɔ ényí hwi wɛ nyí Klísu, Vǐ Mawu tɔn ɔ hǔn, ɖɔ nú mǐ, bo xwlé nǔ ɖo Mawu gbɛɖe ɔ nukɔn!” 64 Jezu ɖɔ n’i ɖɔ: “É nɛ́ a ɖɔ pɛ́ɛ́ nɛ́. Amɔ̌, má ɖɔ nú mi: Bɛ́sín din ɔ, mi ná mɔ Gbɛtɔ́ví ɔ ɖo ayǐjínjɔ́n ɖo ɖisíxwé nú Mɛ hlɔ̌nhlɔ́nnɔ* ɔ, bo ná lɛ́ mɔ ɛ jawě ɖo akpɔ́kpɔ́ lɛ́ mɛ ɖo jǐnukúnsin.” 65 Énɛ́ ɔ, vɔ̌sánúxwlémawutɔ́ ɖaxó ɔ vún awu dó kɔ nú éɖée, bo ɖɔ: “É nylá nu! Mǐ lɛ́ ɖó hudó kúnnuɖetɔ́ tɔn wɛ a? Mi kpɔ́n! Miɖésú se nu e é nylá é. 66 Étɛ́ mi ka lin?” Yě yí gbe ɖɔ: “Kú wɛ jɛxá ɛ.” 67 Énɛ́ ɔ, yě tún atán dó nukúnmɛ n’i, bo dó akpotokwín i. Mɛ ɖěvo lɛ́ gba nukúnmɛ n’i, 68 bo nɔ ɖɔ: “Klísu, ɖe xlɛ́ mǐ ɖɔ émí nyí gbeyíɖɔ ɖé. Mɛ̌ ka dó nǔ we?”

69 Din ɔ, Piyɛ́ɛ ɖo ayǐjínjɔ́n ɖo kɔ́xo ɔ ta, bɔ mɛsɛntɔ́ nyɔ̌nu ɖé wá gɔ̌n tɔn bo ɖɔ: “Hwi lɔ nɔ zɔn xá Jezu Galiléenu ɔ, kabǐ?” 70 Amɔ̌, é gbɛ́ ɖo yě bǐ nukɔn, bo ɖɔ: “Un tuun nǔ e xó ɖɔ wɛ a ɖe é ǎ.” 71 Ée é ɖidó hɔnnúwa ɔ sá é ɔ, nyɔ̌nuví ɖěvo ɖó ayi wǔtu tɔn, bo ɖɔ nú mɛ e ɖo fínɛ́ lɛ́ é ɖɔ: “Nya élɔ́ nɔ zɔn xá Jezu Nazalɛ́tinu ɔ.” 72 É lɛ́ gbɛ́, bo xwlé nǔ ɖɔ: “Un tuun nya énɛ́ ǎ!” 73 Hwenu kpɛɖé gúdo ɔ, mɛ e ɖo te ɖo fínɛ́ lɛ́ é wá, bo ɖɔ nú Piyɛ́ɛ ɖɔ: “É ɖo wɛn ɖɔ hwi lɔ ɖo yě mɛ, ɖó nú è ná ɖɔ xójɔxó ɔ, lěe a nɔ ɖɔ xó* gbɔn é ɖe we gba.” 74 Énɛ́ ɔ, é jɛ nu dó éɖée jí bo xwlé nǔ ɖɔ: “Un tuun nya énɛ́ ǎ!” Bɔ tlóló ɔ, kokló kɔ́ así. 75 Piyɛ́ɛ flín nǔ e Jezu ko ɖɔ n’i é, énɛ́ wɛ nyí: “Cóbónú kokló ná kɔ́ así ɔ, a ná ko gbɛ́ mì azɔn atɔn.” Énɛ́ ɔ, é tɔ́n bo y’avǐ vívɛ́ vívɛ́.

27 Ée é jɛ zǎnzǎn é ɔ, vɔ̌sánúxwlémawutɔ́gán lɛ́ kpó tomɛxó lɛ́ kpó bǐ kplé, bo ná ɖe wě dó Jezu wú lobo ná hu i. 2 Ée yě blá ɛ gúdo é ɔ, yě kplá ɛ yi jó nú tokpɔngán Pilátu.

3 Énɛ́ gúdo ɔ, ée Judási e sa Jezu é mɔ ɖɔ è ɖó kú hwɛ n’i é ɔ, é vɛ́ n’i, bɔ é lɛ́ kɔ nú kpatágankwɛ́ 30 lɛ́ nú vɔ̌sánúxwlémawutɔ́gán lɛ́ kpó tomɛxó lɛ́ kpó, 4 lobo ɖɔ: “Xomɛvɔ́nɔ* e un sa é ɔ, hwɛ wɛ un hu.” Yě ɖɔ: “Étɛ́ ka kan mǐdɛɛ lɛ́ ɖ’é mɛ? Hwi wɛ énɛ́ kan!” 5 Énɛ́ wú ɔ, é nyi kpatágankwɛ́ lɛ́ dó tɛ́npli ɔ mɛ bo ɖidó. Énɛ́ gúdo ɔ, é yi dó kan kɔ nú éɖée. 6 Amɔ̌, vɔ̌sánúxwlémawutɔ́gán lɛ́ bɛ́ kpatágankwɛ́ lɛ́ bo ɖɔ: “É sɔgbe xá sɛ́n ɖɔ è ní bɛ́ ɖó fí e è nɔ kplé akwɛ́ lɛ́ ɖó ɖo tɛ́npli ɔ mɛ é ǎ, ɖó hun e è kɔn nyi ayǐ é sín akwɛ́ wɛ.” 7 Ée yě ɖe wě ɖó kpɔ́ gúdo é ɔ, yě sɔ́ akwɛ́ ɔ dó xɔ zɛ̌nmɛtɔ́ ɖé sín gle ná bo ná nɔ ɖi jǒnɔ lɛ́ dó fínɛ́. 8 Énɛ́ wɛ zɔ́n bɔ è nɔ ylɔ́ gle énɛ́ ɖɔ Kanjɔgle káká jɛ égbé. 9 Mɔ̌ mɛ ɔ, xó élɔ́ e è ɖɔ gbɔn gbeyíɖɔ Jelemíi jí é jɛnu: “Yě bɛ́ kpatágankwɛ́ 30 lɛ́, énɛ́ wɛ nyí, akwɛ́ e Izlayɛ́li ví ɖé lɛ́ yí gbe bo ná xɔ nya ɔ yí é, 10 bo sɔ́ dó xɔ zɛ̌nmɛtɔ́ ɔ sín gle ná, sɔgbe xá nǔ e Jexóva* ko zɔ́n mì é.”

11 Din ɔ, Jezu ɖo tokpɔngán ɔ nukɔn, bɔ tokpɔngán ɔ kanbyɔ́ ɛ ɖɔ: “Hwi wɛ nyí axɔ́sú Jwifu lɛ́ tɔn ɔ a? Jezu yí gbe ɖɔ: “É nɛ́ a ɖɔ pɛ́ɛ́ nɛ́.” 12 Amɔ̌, hwenu e vɔ̌sánúxwlémawutɔ́gán lɛ́ kpó tomɛxó lɛ́ kpó ɖo hwɛ dó è wɛ é ɔ, é kɛ nu ǎ. 13 Énɛ́ ɔ, Pilátu ɖɔ n’i ɖɔ: “A se hwɛ tobutóbú e dó we wɛ yě ɖe é ǎ cé?” 14 Amɔ̌, é gbɔ d’é mɛ n’i ǎ, bɔ é kpácá tokpɔngán ɔ tawun.

15 Ðo Dǐndínwáyixwe ɖokpó ɖokpó hwenu ɔ, tokpɔngán ɔ ko ɖó walɔ bo nɔ ɖe gantɔ́ ɖěbǔ e ahwan ɔ ba é nyi te. 16 Ðo hwenɛ́nu ɔ, gantɔ́ ɖokpó ɖo gankpá ɔ mɛ bɔ mɛ bǐ tuun i, bɔ è nɔ ylɔ́ ɛ ɖɔ Balabási. 17 Énɛ́ wú ɔ, ée ahwan ɔ kplé é ɔ, Pilátu ɖɔ nú yě ɖɔ: “Mɛ ɖětɛ́ mi ba ɖɔ má ɖe nyi te nú mi, Balabási alǒ Jezu e è nɔ ylɔ́ ɖɔ Klísu é?” 18 Ðó Pilátu mɔ ɖɔ wǔhwinhwan* wɛ zɔ́n bɔ yě jó è. 19 Gɔ́ ná ɔ, hwenu e é ɖo ayǐjínjɔ́n ɖo fí e ɖɔ hwɛ ɔ ɖe wɛ yě ɖe* é ɔ, asi tɔn sɛ́ wɛn d’è bo ɖɔ: “Ma ɖó nu ɖěbǔ ɖo nya nǔjlɔ́jlɔ́watɔ́ énɛ́ sín xó mɛ ó, ɖó un se wǔvɛ́ tawun ɖo dlɔ̌ mɛ égbé ɖó éyɛ́ wú.” 20 Amɔ̌, vɔ̌sánúxwlémawutɔ́gán lɛ́ kpó tomɛxó lɛ́ kpó sísɛ́ ahwan ɔ bónú é ní byɔ́ ɖɔ è ní ɖe Balabási nyi te bo hu Jezu. 21 Tokpɔngán ɔ yí gbe nú yě ɖɔ: “Mɛ ɖětɛ́ mi ba ɖɔ má ɖe nyi te nú mi ɖo yě mɛ we lɛ́ mɛ? Yě ɖɔ: “Balabási.” 22 Pilátu ɖɔ nú yě ɖɔ: “Bɔ étɛ́ un ka ɖó ná wa nú Jezu e è nɔ ylɔ́ ɖɔ Klísu é?” Yě mɛ bǐ ɖɔ: “Xwe è nyi atín wú!” 23 É ɖɔ: “Étɛ́wú? Nǔ nyanya tɛ́ é ka wa?” É ɖɔ mɔ̌ có, yě lɛ́ sú xó syɛ́nsyɛ́n d’é jí bo nɔ ɖɔ: “Xwe è nyi atín wú!”

24 Ée Pilátu mɔ ɖɔ gǎndídó émítɔn lɛ́ kún ɖo nǔ ɖagbe ɖě ná wɛ ó, bɔ hunnyahunnya ɖo fínfɔ́n wɛ é ɔ, é sɔ́ sin bo klɔ́ alɔ tɔn lɛ́ ɖo ahwan ɔ nukɔn, lobo ɖɔ: “Un mɛ́ ɖo hun nya élɔ́ tɔn mɛ. Midɛɛ lɛ́ wɛ é kan.” 25 Ée é ɖɔ mɔ̌ é ɔ, togun ɔ bǐ yí gbe n’i ɖɔ: “Hun tɔn ní nɔ kɔ nú mǐ, bo nɔ kɔ nú vǐ mǐtɔn lɛ́.” 26 Énɛ́ ɔ, é ɖe Balabási nyi te nú yě, amɔ̌, é ɖɔ bɔ è sɔ́ lanbá dó xo Jezu ná, lobo sɔ́ ɛ dó alɔ mɛ nú yě bónú yě ní xwe è nyi atín wú.

27 Sɔ́ja tokpɔngán ɔ tɔn lɛ́ kplá Jezu yi tokpɔngán ɔ sín hɔnmɛ, bo kplé ahwankpá ɔ blěbú lɛ́ lɛ̌ dó è. 28 Bɔ ée yě ɖe awu n’i gúdo é ɔ, yě dó awu ɖaxó vɔvɔ cɛ́cɛ́ ɖé n’i. 29 Yě sɔ́ wun dó lɔn axɔ́súgbákún ná, bo sɔ́ xwe n’i, lobo sɔ́ fántín dó alɔ tɔn ɖisí ɔ mɛ. Yě jɛ kpo ɖo nukɔn tɔn bo cá n’i, bo nɔ ɖɔ: “Kú dó lěhwenu,* Axɔ́sú Jwifu lɛ́ tɔn!” 30 Yě tún atán dó wǔ tɔn, bo yí fántín ɔ lobo jɛ zinzin dó ta n’i jí. 31 Ée yě cá n’i gúdo é ɔ, yě wá ɖe awu ɖaxó ɔ n’i bo sɔ́ awu tɔn lɛ́* dó n’i. Énɛ́ gúdo ɔ, yě kplá ɛ ɖidó bo ná yi xwe è nyi atín wú.

32 Ée yě ɖo yiyi wɛ é ɔ, yě mɔ nya Silenɛ́ɛnu ɖé bɔ é nɔ nyí Sinmɔ́ɔ. Yě hɛn nya énɛ́ gǎnnugǎnnu bónú é ná hɛn yatín* Jezu tɔn. 33 Ée yě wá fí e è nɔ ylɔ́ ɖɔ Gɔlugɔ́ta (tínmɛ tɔn wɛ nyí Takágo tɛnmɛ) é ɔ, 34 yě ná ɛ vɛ̌ɛn e è cáká kpó nǔ vǐvɛ́ ɖé kpó é bo ɖɔ é ní nu, amɔ̌, ée é dó ɖɛ̌ gúdo é ɔ, é gbɛ́ ɖɔ émí kún ná nu ó. 35 Ée yě xwe è nyi atín ɔ wú é ɔ, yě nyi akɔ dó awu tɔn aga tɔn lɛ́ bo má, 36 lobo jínjɔ́n fínɛ́ bo ɖo cícɔ́ ɛ wɛ. 37 Yě lɛ́vɔ́ wlán hwɛ e è dó è é ɖó ta tɔn nu, bo ɖɔ: “Jezu Axɔ́sú Jwifu lɛ́ tɔn ɔ ɖíe.”

38 Gɔ́ ná ɔ, è xwe ajotɔ́ we nyi atín wú ɖo akpá tɔn; mɛ ɖokpó ɖo ɖisí tɔn xwé, bɔ mɛ ɖokpó ɖo amyɔ tɔn xwé. 39 Bɔ mɛ ɖěɖěe ɖo wǐwá yi wɛ lɛ́ é nɔ zun i, bo nɔ húnhún ta, 40 lobo nɔ ɖɔ: “Hwi mɛ e ɖɔ émí ná mu tɛ́npli ɔ, bɔ ɖo azǎn atɔn vlamɛ ɔ, émí ná gbá é ɔ, hwlɛ̌n hwiɖée gán bó! Ényí vǐ Mawu tɔn jɛ́n a nyí hǔn, jɛ te sín yatín* ɔ jí!” 41 Mɔ̌ ɖokpó ɔ, vɔ̌sánúxwlémawutɔ́gán lɛ́, sɛ́nkplɔ́nmɛtɔ́ lɛ́ kpó tomɛxó lɛ́ kpó lɔmɔ̌ jɛ cícá n’i jí, bo nɔ ɖɔ: 42 “É hwlɛ́n mɛ ɖěvo lɛ́; é ka sixú hwlɛ́n éɖée ǎ! Ényí Axɔ́sú Izlayɛ́li tɔn jɛ́n é nyí hǔn, ní bo jɛ te din sín yatín* ɔ jí, énɛ́ ɔ, mǐ ná ɖi nǔ n’i. 43 É gán jɛ Mawu wú; Mawu ní bo hwlɛ́n ɛ din, ényí nǔ tɔn nyɔ́ nukún Tɔn mɛ ɔ nɛ́; ɖó é ɖɔ: ‘Un nyí Vǐ Mawu tɔn.’” 44 Mɔ̌ ɖokpó ɔ, ajotɔ́ e è xwe nyi atín wú ɖo akpá tɔn lɛ́ é lɔmɔ̌ tlɛ ɖo zunzun i wɛ.

45 Sín gan 12 mɛ hwemɛ mɔ̌* ɔ, ablu dó ɖo ayǐ ɔ bǐ jí, káká jɛ gan atɔn mɛ hwemɛ mɔ̌.* 46 Ðo gan atɔn mɛ hwemɛ mɔ̌ ɔ, Jezu sú xó tlílí bo ɖɔ: “Eli, Eli, lama sabakitani?” Tínmɛ tɔn wɛ nyí: “Mawu ce, Mawu ce, étɛ́wú a ka jó mì dó?” 47 Ée mɛ e ɖo te ɖo fínɛ́ lɛ́ é ɖé lɛ́ se mɔ̌ é ɔ, yě jɛ ɖiɖɔ jí ɖɔ: “Nya élɔ́ ɖo Elíi ylɔ́ wɛ.” 48 Bɔ tlóló ɔ, mɛ ɖokpó ɖo yě mɛ, bo dó wezun yi zé xumɛtekan, lobo nylɔ́ dó vɛ̌ɛn sinvɛ́sinvɛ́ mɛ, bo zé slɔ́ fántín nu, lobo ná ɛ bónú é ní nu. 49 Loɔ, mɛ e kpo lɛ́ é ɖɔ: “Jǒ è dó! Mǐ ní kpɔ́n ɖɔ Elíi ná wá hwlɛ́n ɛ a jí.” 50 Jezu lɛ́vɔ́ sú xó syɛ́nsyɛ́n, bɔ gbɔjɛ tɔn xwɛ.*

51 Énɛ́ ɔ, xɔmɛgbovɔ tɛ́npli ɔ tɔn* vún ɖó we, sín aga wá do, bɔ ayǐkúngban dán wǔ, lobɔ awǐnnya lɛ́ zɛ. 52 Yɔdo lɛ́ hun, bɔ mɛ mímɛ́ e ko kú* lɛ́ é gěgé sín cyɔ tɔ́n, 53 (bɔ hwenu e è fɔ́n Jezu gúdo é ɔ, mɛ e gosín yɔdo lɛ́ tɛ́ntin lɛ́ é byɔ́ toxo mímɛ́ ɔ mɛ), bɔ mɛ gěgé mɔ. 54 Amɔ̌, ée sɔ́jakanwekogán ɔ kpó mɛ e kpó é kpó ɖo Jezu cɔ́ wɛ lɛ́ é kpó mɔ ayǐkúngban dán wǔ ɔ kpó nǔ e ɖo jijɛ wɛ lɛ́ é kpó é ɔ, xɛsi ɖaxó ɖé jɛ yě jí bɔ yě ɖɔ: “Vǐ Mawu tɔn wɛ é nyí nǔgbó.”

55 Gɔ́ ná ɔ, nyɔ̌nu e ko xwedó Jezu sín Galilée bo ná d’alɔ ɛ lɛ́ é gěgé ɖo fínɛ́, bo ɖo nǔ e ɖo jijɛ wɛ lɛ́ é kpɔ́n sɛ́dó wɛ; 56 Mali Magidálanu ɔ, Mali e nyí Jaki kpó Jozée kpó sín nɔ é, kpó vǐ súnnu Zebeɖée tɔn lɛ́ sín nɔ kpó ɖo yě mɛ.

57 Din ɔ, ɖo hwelɛ́kɔ bǐ ɔ, nya dɔkunnɔ Alimatée tɔn ɖé wá, è nɔ ylɔ́ ɛ ɖɔ Jozɛ́fu, bɔ éɖésú ko húzú ahwanvú Jezu tɔn. 58 Nya énɛ́ yi Pilátu gɔ́n bo byɔ́ ɛ cyɔ Jezu tɔn. Énɛ́ ɔ, Pilátu ɖe gbe ɖɔ è ní sɔ́ n’i. 59 Jozɛ́fu zé cyɔ ɔ, bo bú lɛ̌ɛnkanvɔ fɛ́ɖɛ́fɛ́ɖɛ́ mímɛ́ ɖé dó, 60 lobo sɔ́ yi ɖó yɔdo tɔn yɔ̌yɔ́ e é kún dó só xomɛ é mɛ. É blí awǐnnya ɖaxó ɖokpó dó yɔdo ɔ nu, bɔ énɛ́ gúdo ɔ, é ɖidó. 61 Amɔ̌, Mali Magidálanu ɔ kpó Mali ɖě ɔ kpó kpo ɖo fínɛ́, bo jínjɔ́n ayǐ ɖo yɔdo ɔ nukɔn.

62 Ayǐhɔ́ngbe tɔn, ɖo gbɔjɛzángbe* ɔ, vɔ̌sánúxwlémawutɔ́gán lɛ́ kpó Falizyɛn lɛ́ kpó kplé ɖó kpɔ́ ɖo Pilátu nukɔn, 63 bo ɖɔ: “Mɛɖaxó, mǐ flín nǔ e mɛblɛ́ɖutɔ́ énɛ́ ɖɔ hwenu e é kpo ɖo gbɛ é, é ɖɔ: ‘Azǎn atɔn gúdo ɔ, un ná fɔ́n.’ 64 Énɛ́ wú ɔ, ɖe gbe ɖɔ è ní cɔ́ yɔdo ɔ káká jɛ azǎn atɔngɔ́ ɔ gbe, bónú ahwanvú tɔn lɛ́ ní ma wá bo fin i sɔ́, lobo ɖɔ nú togun ɔ ɖɔ: ‘È ko fɔ́n ɛ sín mɛkúkú lɛ́ mɛ!’ ó. É ma nyí mɔ̌ ǎ ɔ, mɛblɛ́blɛ́ gǔdo tɔn énɛ́ ná nylá hú nukɔntɔn ɔ.” 65 Pilátu ɖɔ nú yě ɖɔ: “Mi kplá sɔ́ja élɔ́ lɛ́ yi, bo cɔ́ yɔdo ɔ ganjí lěe mi kpé wú gbɔn é.” 66 Énɛ́ wú ɔ, yě sɔ́ awǐnnya dó sú yɔdo ɔ gbánwúngbánwún, bo fɔ sɔ́ja lɛ́ ɖ’é kɔn bo ná dó cɔ́.

28 Ðo gbɔjɛzán ɔ gúdo, ɖo azǎn nukɔntɔn aklúnɔzángbla ɔ tɔn sín ayǐtéhɔ̌nnu ɔ, Mali Magidálanu ɔ kpó Mali ɖě ɔ kpó wá, bo ná kpɔ́n yɔdo ɔ.

2 Ayǐkúngban ka ko dán wǔ syɛ́nsyɛ́n, ɖó wɛnsagun Jexóva* tɔn ko jɛ te sín jǐxwé, bo wá blí awǐnnya ɔ síin, lobo ɖo ayǐjínjɔ́n ɖ’é jí. 3 Wɛnsagun ɔ nɔ kɔ́n jǐkɛwun ɖɔhun, bɔ awu tɔn wé laglási linfín ɖɔhun. 4 Xɛsi jɛ mɛ e ɖo yɔdo ɔ cɔ́ wɛ lɛ́ é jí dó wǔtu tɔn, bɔ yě sísɔ́ lobo cí mɛkúkú ɖɔhun.

5 Amɔ̌, wɛnsagun ɔ ɖɔ nú nyɔ̌nu lɛ́ ɖɔ: “Mi ma ɖi xɛsi ó, un tuun ɖɔ Jezu e è xwe nyi atín wú é ba wɛ mi ɖe. 6 É ɖo fí ǎ, ɖó è ko fɔ́n ɛ sín kú, lěe é ko ɖɔ gbɔn é. Mi wá kpɔ́n fí e è sɔ́ ɛ ɖó ɖ’ayǐ é. 7 Mi bo yá wǔ yi ɖɔ nú ahwanvú tɔn lɛ́ ɖɔ è ko fɔ́n ɛ sín mɛkúkú lɛ́ mɛ. É ko jɛ nukɔn nú mi xwe Galilée. Mi ná mɔ ɛ ɖo dɔ̌n. Wɛn e un ɖó nú mi é nɛ́.”

8 Énɛ́ wú ɔ, yě yá wǔ gosín yɔdo ɔ kɔn, kpó xɛsi kpó, kpódó awǎjijɛ ɖaxó kpán, lobo kán wezun, bo ná yi ɖó gbe nú ahwanvú tɔn lɛ́. 9 Ajijimɛ kpowun ɔ, Jezu kpé yě bo ɖɔ: “Mi kú d’é wú!” Yě sɛkpɔ́ ɛ, bo ɖe kɔ́* n’i, lobo hɛn afɔ tɔn lɛ́. 10 Énɛ́ gúdo ɔ, Jezu ɖɔ nú yě ɖɔ: “Mi ma ɖi xɛsi ó! Mi yi bo yi ɖó gbe nú nɔví ce lɛ́, bónú yě ní yi Galilée. Fínɛ́ wɛ yě ná mɔ mì ɖe.”

11 Ée nyɔ̌nu lɛ́ ɖo ali jí xweyǐgbe é ɔ, sɔ́ja lɛ́ hǎbǔ byɔ́ toxo ɔ mɛ, bo ɖó nǔ e jɛ lɛ́ é bǐ sín gbe nú vɔ̌sánúxwlémawutɔ́gán lɛ́. 12 Ée vɔ̌sánúxwlémawutɔ́gán lɛ́ kplé ɖó kpɔ́ xá tomɛxó lɛ́ bɔ yě ɖe wě ɖó kpɔ́ gúdo é ɔ, yě ná kpatágankwɛ́ wǒsúwósú sɔ́ja lɛ́ 13 bo ɖɔ: “Mi ɖɔ: ‘Ahwanvú tɔn lɛ́ wá zǎnmɛ, bo fin cyɔ tɔn sɔ́ hwenu e mǐ ɖo amlɔ dɔ́ wɛ é.’ 14 Bɔ ényí énɛ́ jɛ tokpɔngán ɔ sín tó mɛ ɔ, mǐ ná tín xó ɔ mɛ n’i,* bo ná hwlɛ́n mi gán sín tagba mɛ.” 15 Énɛ́ ɔ, yě yí kpatágankwɛ́ lɛ́, bo bló ɖó nǔ e è zɔ́n yě é jí, lobɔ tan énɛ́ fúnfún kpé gbɔn Jwifu lɛ́ tɛ́ntin káká jɛ égbé.

16 Amɔ̌, ahwanvú 11 lɛ́ yi Galilée ɖo só e jí Jezu ko ɖɔ ɖɔ yě ná kpé ɖe é jí. 17 Ée yě mɔ ɛ é ɔ, yě ɖe kɔ́* n’i, mɛɖé lɛ́ ka xo nǔ kpɔ́n. 18 Jezu sɛkpɔ́ yě, bo ɖɔ nú yě ɖɔ: “È ko ná mì acɛ lɛ́ bǐ ɖo jǐxwé kpó ayǐkúngban jí kpó. 19 Énɛ́ wú ɔ, mi yi, bo bló bónú mɛ lɛ́ ní húzú ahwanvú ɖo akɔta lɛ́ bǐ mɛ, lobo bló batɛ́mu nú yě ɖo nyǐkɔ Tɔ́ ɔ, Vǐ ɔ kpó gbigbɔ mímɛ́ ɔ kpó tɔn mɛ. 20 Mi kplɔ́n nǔ yě bónú yě ní se tónú nú nǔ e un zɔ́n mi lɛ́ é bǐ. Mi ní ka tuun ɖɔ un ɖo kpɔ́ xá mi ɖo azǎn lɛ́ bǐ jí, káká jɛ azǎn gǔdo gúdo tɔn gbɛ élɔ́ tɔn lɛ́* mɛ.”