WƐN ÐAGBE MAKI TƆN

1 Bǐbɛ́mɛ wɛn ɖagbe e kunkplá Jezu Klísu, Vǐ Mawu tɔn é tɔn: 2 Gbeyíɖɔ Ezayíi wlán ɖɔ: “(Éɖíe! Un ɖo wɛnsagun ce sɛ́ dó jɛ nukɔn nú we* wɛ, bɔ é ná bló ali towe ɖó.) 3 Gbe ɖé ɖo ɖiɖi wɛ sín gbětótló mɛ bo nɔ ɖɔ: ‘Mi bló ali Jexóva* tɔn ɖó! Mi jlɔ́ ali tɔn lɛ́.’” 4 Lěe è ko wlán gbɔn é ɔ, Jaan Batɛ́mublónúmɛtɔ́ ɔ ɖo gbětótló mɛ, bo nɔ jlá ɖɔ mɛ lɛ́ ɖó ná bló batɛ́mu, bɔ é ná nyí xlɛ̌ hwɛvɛ́númɛ* tɔn, lobonú Mawu ná sɔ́ hwɛ yětɔn lɛ́ kɛ yě. 5 Mɛ e ɖo Judée gbé jí lɛ́ é bǐ kpó mɛ e ɖo Jeluzalɛ́mu lɛ́ é bǐ kpó nɔ yi gɔ̌n tɔn, bɔ é nɔ bló batɛ́mu nú yě* ɖo Judɛ́ɛn tɔ ɔ mɛ. Yě nɔ lɛ́ ɖɔ hwɛ yětɔn lɛ́ ɖo agbawungba. 6 Awu e è sɔ́ lǎkúnmífún dó lɔn ná é wɛ Jaan nɔ dó, bo nɔ sin gǒjíblánú e è sɔ́ anyǔ dó bló é dó alin, lobo nɔ ɖu bɔkle kpó wǐin akú kpó. 7 É nɔ jlá ɖɔ: “Mɛɖé ɖo gǔdo ce jawě bo ɖó acɛ hú mì. Mɛ énɛ́ ɔ, un jɛxá bo ná fɛ yi do bo tún afɔkpakan tɔn lɛ́ ǎ. 8 Un sɔ́ sin dó bló batɛ́mu nú mi, amɔ̌, éyɛ́ ná sɔ́ gbigbɔ mímɛ́ dó bló batɛ́mu nú mi.”

9 Hwenɛ́nu ɔ, Jezu gosín Nazalɛ́ti Galilée tɔn bo wá, bɔ Jaan bló batɛ́mu n’i ɖo Judɛ́ɛn tɔ ɔ mɛ. 10 Ée é tɔ́n sín sin ɔ mɛ tlóló é ɔ, é mɔ bɔ jǐnukúnsin ɖo hunhun wɛ, lobɔ gbigbɔ mímɛ́ ɖo te jɛ wɛ jawě jǐ tɔn ahwannɛ́ ɖɔhun. 11 Bɔ gbe ɖé ɖi sín jǐxwé bo ɖɔ: “Vǐ súnnu ce vívɛ́ná ɔ wɛ a nyí, xomɛ nɔ hun mì dó wǔtu towe.”

12 Tlóló ɔ, gbigbɔ ɔ* sísɛ́ ɛ bɔ é yi gbětótló mɛ. 13 Énɛ́ ɔ, é nɔ gbětótló ɔ mɛ xɔ azǎn 40, bɔ Satáan tɛ́n ɛ kpɔ́n. É nɔ fínɛ́ xá gběkanlin lɛ́, amɔ̌, wɛnsagun lɛ́ nɔ ɖo alɔ dó è wɛ.

14 Din ɔ, ée è wlí Jaan gúdo é ɔ, Jezu yi Galilée bo nɔ ɖo wɛn ɖagbe Mawu tɔn jlá wɛ, 15 lobo nɔ ɖɔ: “Hwenu e è ɖó dó é ko su, bɔ Axɔ́súɖuto Mawu tɔn ko sɛkpɔ́. Hwɛ mitɔn lɛ́ ní vɛ́ nú mi,* mi ɖi nǔ nú wɛn ɖagbe ɔ.”

16 Ée Jezu ɖo zɔnlin ɖi gbɔn Galilée xu ɔ tó wɛ é ɔ, é mɔ Sinmɔ́ɔ kpó Sinmɔ́ɔ sín nɔví Andlé kpó, bɔ yě ɖo ɖɔ yětɔn lɛ́ nyi dó xu ɔ mɛ wɛ, ɖó hwehutɔ́ wɛ nú yě. 17 Énɛ́ ɔ, Jezu ɖɔ nú yě ɖɔ: “Mi xwedó mì, un ná bló bɔ mi ná nɔ wlí gbɛtɔ́ lɛ́ hweví wlí wɛ mi ɖe ɖɔhun.” 18 Bɔ tlóló ɔ, yě jó ɖɔ yětɔn lɛ́ dó bo xwedó è. 19 Ée é yi nukɔn kpɛɖé é ɔ, é mɔ Jaki Zebeɖée ví ɔ kpó nɔví tɔn Jaan kpó, bɔ yě ɖo tɔjíhún yětɔn mɛ lobo ɖo ɖɔ yětɔn lɛ́ blóɖó wɛ. 20 Bɔ tlóló ɔ, é ylɔ́ yě. Énɛ́ wú ɔ, yě jó tɔ́ yětɔn Zebeɖée dó nyi tɔjíhún ɔ mɛ, é kpó azɔ̌watɔ́ lɛ́ kpó bo xwedó è. 21 Lobɔ yě ɖidó Kafaanawúmu.

Ée gbɔjɛzán ɔ bɛ́ tlóló é ɔ, é yi kplɔ́ngbasá ɔ bo jɛ nǔ kplɔ́n mɛ lɛ́ jí. 22 Bɔ lěe é nɔ kplɔ́n nǔ mɛ gbɔn é kpácá yě tawun, ɖó é nɔ kplɔ́n nǔ yě, mɛ e ɖó acɛ é ɖɔhun, é nyí sɛ́nkplɔ́nmɛtɔ́ lɛ́ ɖɔhun ǎ. 23 Hwenɛ́nu ɔ, nya e jí gbigbɔ nyanya ɖe é ɖé ɖo kplɔ́ngbasá ɔ, bo ɖɔ kpó xósúsú kpó ɖɔ: 24 “Jezu Nazalɛ́tinu, étɛ́ mǐ kpó hwi kpó ka kpé dó? A wá bo ná sú kún mǐtɔn dó wɛ a? Un tuun mɛ e a nyí é ganjí: Hwi wɛ nyí Mɛ mímɛ́ Mawu tɔn!” 25 Jezu ka gbɛ́ nǔ nú gbigbɔ nyanya ɔ bo ɖɔ: “N’abwɛ̌, bo gosín jǐ tɔn!” 26 Bɔ ée gbigbɔ nyanya ɔ húnhún nya ɔ bo sú xó tlílí gúdo é ɔ, é gosín jǐ tɔn. 27 Énɛ́ ɔ, é kpácá mɛ lɛ́ bǐ káká bɔ yě jɛ xó ɖɔ jí ɖo yěɖée lɛ́ tɛ́ntin ɖɔ: “Étɛ́ ka ɖíe? Nǔkplɔ́nmɛ yɔ̌yɔ́ ɖé ɖíe mɛ! É tlɛ nɔ ɖe gbe dó gbigbɔ nyanya lɛ́ kpó acɛ kpó bɔ yě nɔ se tónú n’i.” 28 Énɛ́ wú ɔ, xó tɔn yá wǔ gba kpé fí bǐ ɖo Galilée sín xá ɔ bǐ mɛ.

29 Énɛ́ gúdo ɔ, yě gosín kplɔ́ngbasá ɔ bo yi Sinmɔ́ɔ kpó Andlé kpó xwé, yě kpó Jaki kpó, kpódó Jaan kpán. 30 Sinmɔ́ɔ sín asinɔ ɖó zozo bo ɖo ayǐmlɔ́mlɔ́, bɔ yě ɖɔ xó tɔn nú Jezu tlóló. 31 Ée é yi gɔ̌n tɔn é ɔ, é hɛn alɔ tɔn bo fɔ́n ɛ sí te. Zozo ɔ kɔ́n n’i, bɔ é jɛ jǒnɔ yětɔn yí jí.

32 Ée gbadanu su, bɔ hwe ko yi xɔ gúdo é ɔ, mɛ lɛ́ jɛ azinzɔnnɔ lɛ́ kpó mɛ e jí awǒvi ɖe lɛ́ é kpó bǐ kplá wá n’i jí. 33 Bɔ mɛ e ɖo toxo ɔ mɛ lɛ́ é bǐ kplé cí xwé ɔ sín hɔntogbó jí. 34 Énɛ́ ɔ, é gbɔ azɔn nú mɛ e ɖo azɔn tɛnmɛ tɛnmɛ jɛ wɛ lɛ́ é, bo nya awǒvi gěgé. Amɔ̌, é lɔn bónú awǒvi lɛ́ ɖɔ xó ǎ, ɖó yě tuun ɖɔ é wɛ nyí Klísu ɔ.*

35 Zǎnzǎn tɛɛn, hwenu e ablu kpo ɖo te é ɔ, é fɔ́n bo tɔ́n jɛ kɔ́xo lobo yi fí e jɛ zɔ é ɖé. Bɔ ɖo fínɛ́ ɔ, é jɛ ɖɛ xo jí. 36 Amɔ̌, Sinmɔ́ɔ kpó mɛ e ɖo kpɔ́ xá ɛ lɛ́ é kpó jɛ gbě tɔn mɛ. 37 Ée yě mɔ ɛ é ɔ, yě ɖɔ n’i ɖɔ: “Mɛ bǐ wɛ ɖo biba we wɛ.” 38 É ka ɖɔ nú yě ɖɔ: “Mi nú mǐ ní yi fí ɖěvo ɖo toxo e sɛ yá fí lɛ́ é mɛ, bónú má dó sixú ɖɔ mawuxó ɖo fí énɛ́ lɛ́ lɔmɔ̌. Ðó énɛ́ wú wɛ un wá.” 39 Énɛ́ ɔ, é yi bo nɔ jlá mawuxó ɖo kplɔ́ngbasá lɛ́ gbɔn Galilée gbé ɔ bǐ jí, lobo nɔ nya awǒvi lɛ́.

40 Gudunɔ ɖé wá gɔ̌n tɔn ɖo fínɛ́, bo jɛ kpo, lobo sa vo n’i ɖɔ: “Ényí a jló ɔ, a hɛn ɔ, a ná bló bɔ un ná húzú mɛ mímɛ́.” 41 Énɛ́ ɔ, nǔbláwǔkúnúmɛ sísɛ́ ɛ, bɔ é dlɛ́n alɔ bo y’agba wǔtu tɔn, lobo ɖɔ n’i ɖɔ: “Un jló! Hǔzú mɛ mímɛ́.” 42 Tlóló kpowun ɔ, gudu ɔ bú sín wǔtu tɔn, bɔ é húzú mɛ mímɛ́. 43 Énɛ́ gúdo ɔ, ée é ɖo ɖiɖɔ n’i wɛ ɖɔ é ní yi é ɔ, é ɖe gbe n’i syɛ́nsyɛ́n bo ɖɔ: 44 “Ma lɔn bo ɖɔ nǔ ɖěbǔ nú mɛ ɖěbǔ ó. Loɔ, yi sɔ́ hwiɖée xlɛ́ vɔ̌sánúxwlémawutɔ́ ɔ, bo ná nǔ e Mɔyízi zɔ́n lɛ́ é, ɖó mɛ mímɛ́ e a húzú é wú, bónú é ná nyí kúnnuɖiɖe nú yě.” 45 Amɔ̌, ée nya ɔ ɖidó gúdo é ɔ, é jɛ nǔ e jɛ é jlá jí titewungbe tɔn, bo ɖɔ gbɔn fí bǐ. Énɛ́ ɔ, Jezu sɔ́ kpé wú bo byɔ́ toxo ɖé mɛ ɖo agbawungba ǎ. Loɔ, é cí fí e jɛ zɔ lɛ́ é. É ɖo mɔ̌ có, yě kpo ɖo gɔ̌n tɔn wá wɛ sín fí bǐ.

2 Amɔ̌, ɖo azǎn ɖé lɛ́ gúdo ɔ, é lɛ́vɔ́ wá Kafaanawúmu bɔ mɛ lɛ́ se ɖɔ é ɖo xwégbe. 2 Énɛ́ ɔ, ahwan e kplé ɖo fínɛ́ é sukpɔ́ sɔmɔ̌ bɔ tɛn ɖěbǔ sɔ́ ɖe ǎ, ali tlɛ sɔ́ yi xwé ɔ gbe ǎ, bɔ é jɛ xó Mawu tɔn ɖɔ nú yě jí. 3 Súnnu ɛnɛ ɖé lɛ́ hɛn ayǐsónɔ ɖokpó wá n’i. 4 Amɔ̌, yě sixú sɔ́ ɛ yi Jezu gɔ́n ǎ, ɖó ahwan ɔ wútu. Énɛ́ wú ɔ, yě kɔ́n xɔ ɔ ɖo fí e Jezu ɖe é tanu; bɔ ée yě ɖe ali gbɔn fínɛ́ gúdo é ɔ, yě sɔ́ zan e jí ayǐsónɔ ɔ ɖo ayǐmlɔ́mlɔ́ ɖe é jɛ te gbɔn fínɛ́. 5 Ée Jezu mɔ nǔɖiɖi yětɔn é ɔ, é ɖɔ nú ayǐsónɔ ɔ ɖɔ: “Vǐ ce, è sɔ́ hwɛ towe lɛ́ kɛ we.” 6 Sɛ́nkplɔ́nmɛtɔ́ ɖé lɛ́ ka ɖo fínɛ́ bo ɖo ayǐjínjɔ́n, lobo ɖo ɖiɖɔ dó ayi mɛ wɛ ɖɔ: 7 “Étɛ́wú nya élɔ́ ka ɖo xó ɖɔ gbɔn mɔ̌ wɛ? Nu nylá wɛ é ɖe. Mɛ̌ ka sixú sɔ́ hwɛ kɛ mɛ zɛ Mawu ɖokpónɔ wú?” 8 Amɔ̌, tlóló ɔ, Jezu mɔ ɖo éɖée mɛ ɖɔ yě ɖo nǔ mɔ̌hun lin wɛ ɖo yěɖée tɛ́ntin, énɛ́ wú ɔ, é ɖɔ nú yě ɖɔ: “Étɛ́wú mi ka ɖo nǔ énɛ́ lɛ́ lin wɛ ɖo ayi mitɔn lɛ́ mɛ? 9 ‘È sɔ́ hwɛ towe lɛ́ kɛ we’ ɖiɖɔ nú ayǐsónɔ ɔ, alǒ: ‘Sí te bo sɔ́ zan towe lobo ɖi zɔnlin’ ɖiɖɔ ɔ, ɖětɛ́ ka bɔ wǔ hú ɖě? 10 Amɔ̌, bónú mi ná dó tuun ɖɔ Gbɛtɔ́ví ɔ ɖó acɛ bo ná sɔ́ hwɛ kɛ mɛ ɖo ayǐkúngban jí wútu ɔ, . . .” É ɖɔ nú ayǐsónɔ ɔ ɖɔ: 11 “Má ɖɔ nú we: Sí te, sɔ́ zan towe, bo yi xwé.” 12 Énɛ́ ɔ, é sí te bo sɔ́ zan tɔn tlóló, lobo ɖi zɔnlin bo tɔ́n ɖo nukún yě bǐ tɔn mɛ. É kpácá yě bǐ, bɔ yě kpa susu nú Mawu bo nɔ ɖɔ: “Mǐ mɔ nǔ lěhun kpɔ́n gbeɖé ǎ.”

13 É lɛ́vɔ́ tɔ́n bo yi xu ɔ tó, bɔ ahwan ɔ bǐ kpo ɖo gɔ̌n tɔn wá wɛ; énɛ́ ɔ, é jɛ nǔ kplɔ́n yě jí. 14 Ée é ɖo wǐwá yi wɛ é ɔ, é mɔ Levíi, Alufée ví ɔ ɖo ayǐjínjɔ́n ɖo tokwɛ́yítɔ́ lɛ́ sín azɔ̌xɔsá, bo ɖɔ n’i ɖɔ: “Xwedó mì.” Énɛ́ ɔ, é sí te bo xwedó è. 15 Nukɔnmɛ ɔ, Jezu ɖo nǔ ɖu wɛ* ɖo Levíi sín xwégbe, bɔ tokwɛ́yítɔ́ kpó hwɛhutɔ́ kpó gěgé ɖo nǔ ɖu wɛ* xá é kpó ahwanvú tɔn lɛ́ kpó; ɖó yě mɛ gěgé wɛ ɖo xwixwedó è wɛ. 16 Amɔ̌, ée sɛ́nkplɔ́nmɛtɔ́ lɛ́ kpó Falizyɛn lɛ́ kpó mɔ ɖɔ é ɖo nǔ ɖu xá hwɛhutɔ́ lɛ́ kpó tokwɛ́yítɔ́ lɛ́ kpó wɛ é ɔ, yě jɛ ɖiɖɔ nú ahwanvú tɔn lɛ́ jí ɖɔ: “É nɔ ɖu nǔ xá tokwɛ́yítɔ́ lɛ́ kpó hwɛhutɔ́ lɛ́ kpó wɛ a?” 17 Ée Jezu se mɔ̌ é ɔ, é ɖɔ nú yě ɖɔ: “Mɛ e ɖo jógúnjógún lɛ́ é ɖó hudó dotóo tɔn ǎ, amɔ̌, mɛ e ɖo azɔn jɛ wɛ lɛ́ é ɖó hudó tɔn. Nǔjlɔ́jlɔ́watɔ́ lɛ́ ylɔ́ gbé wɛ un tɔ́n bo wá ǎ, loɔ, hwɛhutɔ́ lɛ́ wɛ.”

18 Ahwanvú Jaan tɔn lɛ́ kpó Falizyɛn lɛ́ kpó nɔ ɖo nu blá wɛ. Énɛ́ wú ɔ, yě wá Jezu gɔ́n bo ɖɔ n’i ɖɔ: “Étɛ́wú ahwanvú Jaan tɔn lɛ́ kpó ahwanvú Falizyɛn lɛ́ tɔn lɛ́ kpó nɔ ɖo nu blá wɛ, bɔ ahwanvú towe lɛ́ ma ka nɔ blá nu ǎ?” 19 Bɔ Jezu ɖɔ nú yě ɖɔ: “Ényí asisúnɔ ɔ ɖo kpɔ́ xá xɔ́ntɔn tɔn lɛ́ ɔ, yě ɖó hwɛjijɔ ɖěbǔ bo ná blá nu ǎ, kabǐ? Ényí asisúnɔ ɔ kpo ɖo kpɔ́ xá yě jɛ́n wɛ ɔ, yě sixú blá nu ǎ. 20 Amɔ̌, gbe ɖokpó ná wá su bɔ è ná ɖe asisúnɔ ɔ sín gɔ̌n yětɔn, énɛ́ ɔ, yě ná blá nu gbe nɛ́ gbe. 21 Mɛ ɖěbǔ nɔ sɔ́ avɔxwɛ yɔ̌yɔ́ dó ɖɛ́ awu xóxó ná ǎ. Ényí é wa mɔ̌ ɔ, avɔxwɛ yɔ̌yɔ́ ɔ ná dɔn xóxó ɔ bɔ tlɛ́ntlɛ́nkpa ɔ ná lɛ́ nylá d’é jí. 22 Gɔ́ ná ɔ, mɛ ɖěbǔ nɔ kɔn vɛ̌ɛn yɔ̌yɔ́ dó anyǔgo xóxó mɛ ǎ. Ényí é wa mɔ̌ ɔ, vɛ̌ɛn ɔ ná hɛn anyǔgo ɔ wú, bɔ vɛ̌ɛn ɔ kpó anyǔgo ɔ kpó bǐ ná lá mɛ. Amɔ̌, vɛ̌ɛn yɔ̌yɔ́ ɔ, anyǔgo yɔ̌yɔ́ mɛ wɛ è nɔ kɔn dó.”

23 Din ɔ, ée é ɖo jinukúngle ɖé mɛ gbɔn wɛ ɖo gbɔjɛzángbe é ɔ, ahwanvú tɔn lɛ́ jɛ jinukún lɛ́ ba jí hwenu e yě ɖo yiyi wɛ é. 24 Énɛ́ wú ɔ, Falizyɛn lɛ́ ɖɔ n’i ɖɔ: “Kpɔ́n fí! Étɛ́wú yě ka ɖo nǔ e ma sɔgbe xá sɛ́n ɖo gbɔjɛzángbe ǎ é wa wɛ?” 25 Amɔ̌, é ɖɔ nú yě ɖɔ: “Mi xa nǔ e Davídi wa, hwenu e é ɖo hudó mɛ, bɔ xovɛ́ sin é kpó mɛ e ɖo kpɔ́ xá ɛ lɛ́ é kpó é kpɔ́n ǎ cé? 26 Ðo tan e kunkplá vɔ̌sánúxwlémawutɔ́gán Abiyatáa é mɛ ɔ, é byɔ́ xwé Mawu tɔn gbe bo ɖu wɔ̌xúxú e è xwlé Mawu lɛ́ é, lobo lɛ́vɔ́ ná ɖě mɛ e kpó é kpó ɖo kpɔ́ lɛ́ é. É ka sɔgbe xá sɛ́n bónú mɛ ɖěbǔ ná ɖu zɛ vɔ̌sánúxwlémawutɔ́ lɛ́ wú ǎ. Mi xa mɔ̌ ǎ cé?” 27 Énɛ́ gúdo ɔ, é ɖɔ nú yě ɖɔ: “Gbɛtɔ́ wútu wɛ gbɔjɛzán ɔ dó tíin; ényí gbɔjɛzán ɔ wútu wɛ gbɛtɔ́ dó tíin ǎ. 28 Énɛ́ wú wɛ Gbɛtɔ́ví ɔ tlɛ nyí Aklúnɔ gbɔjɛzán ɔ tɔn.”

3 Jezu lɛ́vɔ́ yi kplɔ́ngbasá ɖé, bɔ nya alɔkúnánɔ ɖé ɖo fínɛ́. 2 Énɛ́ wú ɔ, Falizyɛn lɛ́ ɖo kpínkpɔ́n ɛ wɛ tlítlí bo ná kpɔ́n ɖɔ é ná gbɔ azɔn nú nya ɔ ɖo gbɔjɛzángbe wɛ a jí, bo ná mɔ tɛn dó dó hwɛ ɛ. 3 É ɖɔ nú nya alɔkúnánɔ ɔ ɖɔ: “Sí te bo wá kplɔ́ngbasá ɔ tɛ́ntin.” 4 Énɛ́ gúdo ɔ, é ɖɔ nú yě ɖɔ: “É ka sɔgbe xá sɛ́n ɖo gbɔjɛzángbe ɖɔ è ní wa nǔ ɖagbe alǒ nǔ nyanya a, è ní hwlɛ́n mɛ* alǒ hu mɛ* a?” Amɔ̌, yě kɛ nu ǎ. 5 Wǔ kú i tawun ɖó ayi yětɔn syɛ́n wútu; bɔ ée é kpɔ́n yě kpó xomɛsin kpó gúdo é ɔ, é ɖɔ nú nya ɔ ɖɔ: “Dlɛ̌n alɔ towe.” Bɔ é dlɛ́n alɔ ɔ, bɔ alɔ tɔn jɛ tɛn tɔn mɛ. 6 Énɛ́ wú ɔ, Falizyɛn lɛ́ tɔ́n, bɔ tlóló ɔ, yě jɛ gbě tɔn blá jí xá toxóɖɔgbɛ́ Elódu tɔn, bo ná mɔ tɛn dó hu i.

7 Amɔ̌, Jezu gosín fínɛ́ bo ɖidó xutó, é kpó ahwanvú tɔn lɛ́ kpó. Bɔ ahwan ɖaxó ɖé gosín Galilée kpó Judée kpó bo xwedó è. 8 Ahwan ɖaxó ɖé tlɛ gosín Jeluzalɛ́mu, Idumɛ́ɛ, zǎnzǎnhwe jí Judɛ́ɛn tɔ ɔ tɔn, kpó fí e lɛ́ lɛ̌ dó Tíi kpó Sidɔ́ɔn kpó lɛ́ é kpó, bo wá gɔ̌n tɔn, ɖó yě se nǔ tobutóbú e bló wɛ é ɖe lɛ́ é. 9 É ɖɔ nú ahwanvú tɔn lɛ́ ɖɔ yě ní sɔ́ tɔjíhún kpɛví ɖokpó ɖó alɔ jí nú émí bónú ahwan ɔ ní ma wá nyɛ́ sú émí ó. 10 Ðó é ko gbɔ azɔn nú mɛ gěgé wútu ɔ, mɛ ɖěɖěe ɖo azɔn syɛ́nsyɛ́n jɛ wɛ lɛ́ é bǐ nyi ahwan lɛ́ lɛ̌ dó è, bo ná ɖ’alɔ wǔ tɔn. 11 Ényí gbigbɔ nyanya lɛ́ ɖésú tlɛ mɔ ɛ hweɖébǔnu ɔ, yě nɔ ɖe kɔ́ n’i, bo nɔ sú xó lobo nɔ ɖɔ: “Hwi wɛ nyí Vǐ Mawu tɔn ɔ.” 12 Amɔ̌, é gbɛ́ nú yě syɛ́nsyɛ́n azɔn mɔ̌kpán ɖɔ yě ní ma ɖɔ xó émítɔn nú mɛ ɖěvo lɛ́ ó.

13 É xá só ɖé jí bo ylɔ́ mɛ e jló è lɛ́ é, bɔ yě wá gɔ̌n tɔn, 14 lobɔ é cyán* mɛ 12, bo ylɔ́ gbɛ̌ta énɛ́ ɖɔ mɛsɛ́dó lɛ́: yě wɛ ná nɔ xwedó è, bɔ é ná nɔ sɛ́ yě dó wɛn jlá gbé, 15 lobɔ yě ná ɖó acɛ bo ná nɔ nya awǒvi lɛ́.

16 Mɛ 12 e é cyán* lɛ́ é ɖíe: Sinmɔ́ɔ e é lɛ́vɔ́ sun nyǐ ɖɔ Piyɛ́ɛ é, 17 Jaki Zebeɖée ví ɔ kpó Jaan, Jaki nɔví ɔ kpó (é lɛ́vɔ́ sun nyǐ yědɛɛ lɛ́ ɖɔ Boanɛɛgɛ́si, tínmɛ tɔn wɛ nyí “Xɛbyosoví lɛ́”), 18 Andlé, Filípu, Baatelemíi, Matíe, Tɔmáa, Jaki Alufée ví ɔ, Tadée, Sinmɔ́ɔ, mɛ e akpakpa nɔ sɔ́ é, 19 kpó Judási Isikaliɔ́ti, éé wá sa Jezu ɖo nukɔnmɛ é kpó.

Énɛ́ gúdo ɔ, é byɔ́ xwé ɖé gbe. 20 Ahwan ɔ lɛ́vɔ́ kplé ɖěvo, bɔ yě tlɛ kpé wú bo ɖu nǔ vɔ́vɔ́ ǎ. 21 Amɔ̌, ée hɛ̌nnumɔ tɔn lɛ́ se mɔ̌ é ɔ, yě ɖidó bo ná yi wlí i, ɖó yě ɖo ɖiɖɔ wɛ ɖɔ: “Ta tɔn mɛ sɔ́ sɔgbe ǎ.” 22 Gɔ́ ná ɔ, sɛ́nkplɔ́nmɛtɔ́ e gosín Jeluzalɛ́mu lɛ́ é ɖo ɖiɖɔ wɛ ɖɔ: “Bɛluzebúlu* wɛ ɖo jǐ tɔn, bɔ awǒvi lɛ́ sín gǎn wɛ nɔ ná ɛ hlɔ̌nhlɔ́n bɔ é nɔ dó nya awǒvi lɛ́ ná.” 23 Énɛ́ wú ɔ, ée é ylɔ́ yě gúdo é ɔ, é zán nǔjlɛ́dónǔwú lɛ́ dó ɖɔ xó nú yě bo ɖɔ: “Nɛ̌ Satáan ka sixú nya Satáan gbɔn? 24 Ényí kínklán byɔ́ axɔ́súɖuto ɖé mɛ ɔ, axɔ́súɖuto énɛ́ sixú nɔ te ǎ. 25 Ényí kínklán byɔ́ xwé ɖé gbe ɔ, xwé énɛ́ ná kpé wú bo nɔ te ǎ. 26 Gɔ́ ná ɔ, ényí Satáan sí te dó éɖée jí bɔ kínklán byɔ́ mɛ tɔn lɛ́ mɛ ɔ, é sixú nɔ te ǎ, loɔ, xó tɔn ná fó. 27 Nǔgbó ɔ, mɛ ɖěbǔ e byɔ́ nya hlɔ̌nhlɔ́nnɔ ɖé sín xwégbe é ná kpé wú bo ná fin nǔɖókan tɔn lɛ́, ényí é to blá nya hlɔ̌nhlɔ́nnɔ ɔ jɛ nukɔn hwɛ̌ ɔ nɛ́. Mɔ̌ jɛ́n é ná to bló hwɛ̌ cóbó ná sixú vɔ xwé tɔn. 28 Má ɖɔ nǔgbó nú mi, è ná sɔ́ nǔ lɛ́ bǐ kɛ gbɛtɔ́ lɛ́, ényí yě ná bo hu hwɛ ɖěbǔ, alǒ nylá nu ɖěbǔ ɔ nɛ́. 29 Amɔ̌, mɛ ɖěbǔ e nylá nu dó gbigbɔ mímɛ́ ɔ wú é ɔ, è ná sɔ́ kɛ ɛ gbeɖé ǎ, loɔ, hwɛ mavɔmavɔ wɛ é hu.” 30 É ɖɔ mɔ̌, ɖó yě ɖo ɖiɖɔ wɛ ɖɔ: “Gbigbɔ nyanya ɖo jǐ tɔn.”

31 Din ɔ, nɔ tɔn kpó nɔví tɔn lɛ́ kpó wá, bo ɖo te ɖo kɔ́xo, lobo sɛ́ mɛɖé dó ɖɔ é ní yi ylɔ́ ɛ. 32 Ðó ahwan ɖé jínjɔ́n ayǐ lɛ́ lɛ̌ dó è wútu ɔ, yě ɖɔ n’i ɖɔ: “Nɔ towe kpó nɔví towe lɛ́ kpó ɖo kɔ́xo bo ɖo kinkan we byɔ́ wɛ.” 33 É ka yí gbe nú yě ɖɔ: “Mɛ̌ mɛ̌ e ka nyí nɔ ce kpó nɔví ce lɛ́ kpó?” 34 Énɛ́ gúdo ɔ, é kpɔ́n mɛ ɖěɖěe jínjɔ́n ayǐ lɛ́ lɛ̌ dó è lɛ́ é bo ɖɔ: “Mi kpɔ́n! Nɔ ce kpó nɔví ce lɛ́ kpó ɖíe! 35 Mɛ ɖěbǔ e nɔ wa jlǒ Mawu tɔn é ɔ, mɛ énɛ́ wɛ nyí nɔví ce súnnu, nɔví ce nyɔ̌nu kpó nɔ ce kpó.”

4 É lɛ́vɔ́ jɛ nǔ kplɔ́n mɛ jí ɖo xu ɔ tó, bɔ ahwan wɔ̌búwɔ́bú ɖé sɛ kplé dó wǔ tɔn. Énɛ́ wú ɔ, é byɔ́ tɔjíhún ɖé mɛ, bo jínjɔ́n mɛ ɖo zɔ dó agě ɔ jí, amɔ̌, ahwan ɔ blěbú ɖo xu ɔ tó, bo kpé agě ɔ jí. 2 É jɛ nǔjlɛ́dónǔwú lɛ́ zán dó kplɔ́n nǔ gěgé yě jí, bɔ ée é ɖo nǔ kplɔ́n yě wɛ é ɔ, é ɖɔ nú yě ɖɔ: 3 “Mi ɖótó. Nǔkúndótɔ́ ɖé tɔ́n bo ná yi dó nǔ. 4 Ée é ɖo nǔ dó wɛ é ɔ, nǔkún ɖé lɛ́ jɛ ali tó, bɔ xɛ lɛ́ wá bo cyán ɖu. 5 Ðěvo lɛ́ jɛ awǐnnyakan mɛ fí e kɔ́ gěgé ma ɖe ǎ é. Yě yá wǔ tɔ́n kun, ɖó kɔ́ sukpɔ́ ɖo fínɛ́ ǎ wútu. 6 Amɔ̌, ée hwesivɔ́ wá hun é ɔ, yǒzo hú gǎn yě bɔ yě fyɔ́, ɖó yě dó ɖɔ do ǎ wútu. 7 Nǔkún ɖěvo lɛ́ jɛ wunkan mɛ, bɔ wun lɛ́ su bo vun blá yě, lobɔ yě ná sínsɛ́n ɖěbǔ ǎ. 8 Amɔ̌, ɖěvo lɛ́ jɛ ayǐkúngban ɖagbe jí, bɔ ée yě wú bo su é ɔ, yě jɛ sínsɛ́n ná jí, bɔ ɖě ná donu 30, ɖěvo ná 60, lobɔ ɖěvo ná 100.” 9 Énɛ́ gúdo ɔ, é ɖɔ gɔ́ ná ɖɔ: “Mɛ e ɖó tó bo ná dó se nǔ é, ní bo ɖótó.”

10 Hwenu e é wá ɖo éɖokpónɔ é ɔ, ahwanvú ɖé lɛ́ kpó mɛsɛ́dó 12 lɛ́ kpó jɛ nǔ kanbyɔ́ ɛ dó nǔjlɛ́dónǔwú lɛ́ wú jí. 11 É ɖɔ nú yě ɖɔ: “Midɛɛ lɛ́ ɔ, è ko hun Axɔ́súɖuto Mawu tɔn sín nǔbúdo xlɛ́ mi, amɔ̌, mɛ ɖě lɛ́ ɔ, nǔjlɛ́dónǔwú lɛ́ wɛ è nɔ zán dó xwlé nǔ lɛ́ bǐ yě, 12 bónú yě ná bo ɖo kpínkpɔ́n wɛ ɔ, yě ná kpɔ́n cóbó ka ná mɔ ǎ, yě ná bo ɖo sise wɛ ɔ, yě ná se cóbó ka ná mɔ nukúnnú jɛ mɛ ǎ; yě ní ma ka lɛ́ kɔ gbeɖé bónú è sɔ́ hwɛ yětɔn lɛ́ kɛ yě ó.” 13 É ɖɔ nú yě gɔ́ ná ɖɔ: “Mi mɔ nukúnnú jɛ nǔjlɛ́dónǔwú énɛ́ mɛ ǎ, bɔ nɛ̌ mi ka ná mɔ nukúnnú jɛ nǔjlɛ́dónǔwú ɖě lɛ́ bǐ mɛ gbɔn lo?

14 “Mawuxó ɔ wɛ nyí nǔ e nǔkúndótɔ́ ɔ dó é. 15 Mɛɖé lɛ́ cí nǔkún e jɛ ali tó lɛ́ é ɖɔhun: Ée yě se xó ɔ tlóló é ɔ, Satáan wá bo ɖe xó e è dó dó ayi yětɔn mɛ é síin. 16 Mɛ ɖěvo lɛ́ cí nǔkún e jɛ awǐnnyakan mɛ lɛ́ é ɖɔhun: Ée yě se xó ɔ tlóló é ɔ, yě yí gbe ná kpó awǎjijɛ kpó. 17 É ɖo mɔ̌ có, xó ɔ dó ɖɔ do ɖo ayi yětɔn mɛ ǎ, amɔ̌, yě ɖi nǔ nú hwenu ɖé. Énɛ́ gúdo ɔ, ée wǔvɛ́ alǒ yadónúmɛ wá xwetɔ́n ɖó xó ɔ wútu tlóló é ɔ, yě klɛ́n afɔ. 18 É lɛ́ kpo ɖěvo lɛ́, bɔ yě jɛ wunkan mɛ. Yědɛɛ lɛ́ ɔ, mɛ ɖěɖěe se xó ɔ, 19 loɔ, adohu adohu gbɛ* élɔ́ tɔn lɛ́, hlɔ̌nhlɔ́n mɛblɛ́blɛ́ tɔn dɔkun tɔn kpó jlǒ ɖíɖó nú nǔ tɛnmɛ tɛnmɛ ɖěvo lɛ́ kpó byɔ́ ayi mɛ ná, bo vun blá xó ɔ, b’ɛ ma ná sínsɛ́n ǎ lɛ́ é wɛ. 20 Gǔdo mɛ ɔ, ée jɛ ayǐkúngban ɖagbe jí lɛ́ é ɔ, mɛ e ɖótó xó ɔ bo yí gbe ná, lobo ná sínsɛ́n donu 30, 60 kpó 100 kpó d’é jí lɛ́ é wɛ.”

21 É lɛ́ ɖɔ nú yě ɖɔ: “È nɔ zé zogbɛ́n bo nɔ sɔ́ ɖó xasun* glɔ́ alǒ zan glɔ́ ǎ, kabǐ? Zogbɛ́nhɛnnú jí wɛ è nɔ sɔ́ ɖó ǎ cé? 22 Ðó nǔ ɖěbǔ ɖo hwlǎhwlá bónú è ná wá gɔn sɛ kɔ́n sín jí ǎ; nǔ ɖěbǔ e è sɔ́ sɛ xwe ganjí é ná wá gɔn agbawungba jɛ ǎ. 23 Mɛ ɖěbǔ e ɖó tó bo ná dó se nǔ é, ní bo ɖótó.”

24 É lɛ́ ɖɔ nú yě gɔ́ ná ɖɔ: “Mi hɛn ayi dó nǔ e se wɛ mi ɖe é wú. Nǔjlɛ́nú e mi nɔ sɔ́ dó jlɛ́ nǔ ná é wɛ è ná sɔ́ dó jlɛ́ nǔ ná nú mi; ɛɛn, è ná lɛ́ ná mi d’é jí. 25 Ðó mɛ ɖěbǔ e ɖó nǔ é ɔ, è ná ná ɛ d’é jí, amɔ̌, mɛ ɖěbǔ e ma ɖó nǔ ǎ é ɔ, nǔ e é tlɛ ko ɖó é ɔ, è ná yí sín así tɔn.”

26 Énɛ́ wú ɔ, é gbɛ kan d’é nu bo ɖɔ: “Ali énɛ́ nu ɔ, Axɔ́súɖuto Mawu tɔn cí hwenu e nya ɖé fúnfún jinukún dó kɔ́mɛ é ɖɔhun. 27 É nɔ d’amlɔ zǎnmɛ bo nɔ fɔ́n zǎnzǎn, nǔkún lɛ́ tɔ́n kun, bo su; lěe nǔ ka nyí mɔ̌ gbɔn é ɔ, é tuun ǎ. 28 Ayǐkúngban ɔ ɖésúnɔ nɔ ná sínsɛ́n kpɛɖé kpɛɖé: Ama ɔ nɔ zɔ́n jɛ nukɔn, énɛ́ gúdo ɔ, é nɔ fɔ vǐ, bɔ vǐ ɔ nɔ wá ɖó kwín gbɔn gǔdo. 29 Amɔ̌, ényí sínsɛ́n ɔ nyɔ́ tlóló ɔ, é nɔ bɔ nǔkúnyanú nyi mɛ, ɖó nǔkúnyiyahwenu ɔ wɛ ko su.”

30 É lɛ́ gbɛ kan d’é nu bo ɖɔ: “Étɛ́ wú mǐ ka sixú sɔ́ Axɔ́súɖuto Mawu tɔn jlɛ́ dó? Alǒ, nǔjlɛ́dónǔwú tɛ́ mǐ ka sixú zán dó tínmɛ? 31 É cí mutádi sín kwín* ɖɔhun. Hwenu e è dó dó kɔ́mɛ é ɔ, é wɛ nyí atínkwín e wínní hú atínkwín lɛ́ bǐ ɖo ayǐkúngban jí é. 32 Amɔ̌, ée è dó é ɔ, é su bo gbló hú mǎ ɖě lɛ́ bǐ lobo zɛ ala ɖaxó ɖaxó lɛ́. Énɛ́ ɔ, xɛ lɛ́ kpé wú bo mɔ fí e yě ná nɔ é ɖo yɛtɛn tɔn.”

33 É zán nǔjlɛ́dónǔwú mɔ̌hunkɔtɔn lɛ́ gěgé dó ɖɔ mawuxó nú yě, sɔgbe xá nǔwúkpíkpé e yě ɖó bo ná mɔ nukúnnú jɛ mɛ é. 34 Nǔgbó ɔ, é nɔ ɖɔ xó nú yě ma gɔn nǔjlɛ́dónǔwú ná ǎ, amɔ̌, é nɔ tínmɛ nǔ lɛ́ bǐ nú ahwanvú tɔn lɛ́ ɖo nǔglɔ́.

35 Gbe énɛ́ gbe ɔ, ée gbadanu su é ɔ, é ɖɔ nú yě ɖɔ: “Mi nú mǐ ní yi agě ɖě ɔ jí.” 36 Énɛ́ wú ɔ, ée yě nyi ahwan ɔ gúdo é ɔ, é nɔ lěe é ɖe é, bɔ yě sɔ́ tɔjíhún ɔ dó zé è ɖidó; tɔjíhún ɖěvo lɛ́ zɔn xá ɛ. 37 Din ɔ, jɔhɔn ɖaxó ɖé jɛ nyinyi jí, bɔ aslɔkɛ́ lɛ́ nɔ ɖo xixo byɔ́ tɔjíhún ɔ mɛ wɛ, káká bɔ tɔjíhún ɔ ko ɖibla syɔ́. 38 Amɔ̌, é ɖo tɔjíhún ɔ mɛ ɖo gǔdo, bo ɖo amlɔ dɔ́ wɛ, bɔ ta tɔn ɖo kɔɖónú ɖé jí. Énɛ́ wú ɔ, yě fɔ́n ɛ bo ɖɔ n’i ɖɔ: “Mɛ̌si, mǐ ɖo nǎ dɔn wɛ, é ɖɔ nǔɖé nú we ǎ cé?” 39 Énɛ́ ɔ, é sí te bo ɖe gbe dó jɔhɔn ɔ lobo ɖɔ nú xu ɔ ɖɔ: “Má se tónú! Nɔ xwíí!” Bɔ jɔhɔn ɔ cí xwíí, lobɔ fí bǐ cí tóó. 40 É wá ɖɔ nú yě ɖɔ: “Étɛ́wú mi ka ɖo xɛsi ɖi wɛ* sɔmɔ̌? Mi ko ɖó nǔɖiɖi ɖěbǔ ǎ wɛ a?” 41 Amɔ̌, xɛsi ɖaxó ɖé ɖo yě jí, bɔ yě ɖɔ nú yěɖée lɛ́ ɖɔ: “Mɛ̌ ka ɖíe tawun? Jɔhɔn kpó xu kpó tlɛ nɔ se gbe n’i lá!”

5 Énɛ́ gúdo ɔ, yě wá xu ɔ sín agě ɖě ɔ jí ɖo Jelazáanu lɛ́ sín xá mɛ. 2 Ée Jezu jɛ te sín tɔjíhún ɔ mɛ tlóló é ɔ, nya e jí gbigbɔ nyanya ɖe é ɖé tɔ́n sín yɔdo lɛ́ tɛ́ntin bo wá kpé è. 3 Yɔdo lɛ́ tɛ́ntin wɛ é yí wǎn ná bo nɔ nɔ, bɔ káká jɛ hwenɛ́nu ɔ, mɛ ɖěbǔ nɔ kpé wú bo nɔ blá ɛ bɔ é nɔ nɔ blǎblá jí ǎ, é ná bo tlɛ nyí kpó wlɔ kpó ɔ nɛ́. 4 Azɔn mɔ̌kpán wɛ è ko dó gan afɔ n’i, bo ko sɔ́ wlɔ dó blá ɛ ná, amɔ̌, é nɔ wɛ́n wlɔ lɛ́ ɖó vovo, bo nɔ gba gan lɛ́ ɖó yɔywɛ, lobɔ mɛ ɖěbǔ ɖó hlɔ̌nhlɔ́n bo kpé wǔ tɔn ǎ. 5 Zǎn kpó kéze kpó ɔ, é nɔ fɔ́n bo nɔ ɖo xó sú wɛ ɖo yɔdo lɛ́ kpó só lɛ́ kpó tɛ́ntin, lobo nɔ sɔ́ awǐnnya dó ɖo wǔtu já nú éɖée wɛ. 6 Amɔ̌, ée é mɔ Jezu sɛ́dó é ɔ, é kán wezun bo yi ɖe kɔ́ n’i. 7 Énɛ́ gúdo ɔ, é sú xó syɛ́nsyɛ́n bo ɖɔ: “Jezu, Mawu Ajalɔ̌nlɔn Ví, étɛ́ nyi kpó hwi kpó ka kpé dó? Xwlé nǔ nú mì ɖo Mawu nukɔn ɖɔ émí kún ná dó ya nú mì ó.” 8 Ðó Jezu ɖɔ nú gbigbɔ nyanya ɔ ɖɔ: “Hwi gbigbɔ nyanya élɔ́, gosín nya ɔ jí.” 9 Amɔ̌, Jezu kanbyɔ́ ɛ ɖɔ: “Nɛ̌ a nɔ nyí?” Bɔ é yí gbe n’i ɖɔ: “Nyǐkɔ ce nɔ nyí Ahwankpá, ɖó mǐ mɛ gěgé wɛ.” 10 Énɛ́ ɔ, gbigbɔ nyanya ɔ sa vo nú Jezu azɔn gěgé ɖɔ é ní ma nya émí sín to ɔ mɛ ó.

11 Aglǔzahwan ɖaxó ɖé ka ɖo nǔ ba ɖu wɛ ɖo fínɛ́ ɖo só ɔ jí. 12 Gbigbɔ nyanya lɛ́ sa vo n’i ɖɔ: “Sɛ́ mǐ dó aglǔza lɛ́ mɛ bónú mǐ ná byɔ́ yě mɛ.” 13 Bɔ é ná gbe yě. Énɛ́ ɔ, gbigbɔ nyanya lɛ́ tɔ́n bo byɔ́ aglǔza lɛ́ mɛ, bɔ aglǔzahwan ɔ nyi agbo sín só ɔ nufɛ́nu kɔn nyi xu ɔ mɛ, bo kú tɔ. Aglǔza 2 000 mɔ̌ wɛ. 14 Amɔ̌, aglǔzanyitɔ́ lɛ́ hɔn, bo yi wlí nǔ lɛ́ bǐ ɖɔ ɖo toxo ɔ kpó gletoxo ɔ kpó mɛ, lobɔ mɛ lɛ́ wá bo ná kpɔ́n nǔ e jɛ é. 15 Yě wá Jezu gɔ́n, bo mɔ nya e jí gbigbɔ nyanya e nɔ nyí Ahwankpá é ɖe ɖ’ayǐ é, bɔ é ɖo ayǐjínjɔ́n bo dó awu bɔ ayi tɔn wá gbɛ bǐ, lobɔ xɛsi jɛ yě jí. 16 Gɔ́ ná ɔ, mɛ ɖěɖěe mɔ lěe nǔ lɛ́ yi gbɔn nú nya e jí awǒvi ɖe é, kpó nǔ e jɛ dó aglǔza lɛ́ wú é kpó lɛ́ é wlí bǐ ɖɔ nú yě. 17 Énɛ́ wú ɔ, yě jɛ vo sa nú Jezu jí ɖɔ é ní gosín xá émítɔn mɛ.

18 Din ɔ, ée é ɖo tɔjíhún ɔ mɛ byɔ́ wɛ é ɔ, nya e jí awǒvi ɖe ɖ’ayǐ é sa vo n’i ɖɔ émí ná xwedó è. 19 Amɔ̌, é lɔn n’i ǎ. Loɔ, é ɖɔ n’i ɖɔ: “Yi xwé, hɛ̌nnumɔ towe lɛ́ gɔ́n, bo wlí nǔ e Jexóva* ko wa nú we lɛ́ é bǐ, kpó nǔbláwǔ e é kú nú we é kpó ɖɔ nú yě.” 20 Nya ɔ ɖidó bo jɛ nǔ e Jezu ko wa n’i lɛ́ é bǐ jlá gbɔn Dekapɔ́lu* jí, bɔ é jí wǔ nú mɛ lɛ́ bǐ.

21 Ée Jezu lɛ́vɔ́ dó tɔjíhún jɛ agě ɖě ɔ jí gúdo é ɔ, ahwan ɖaxó ɖé sɛ kplé dó wǔ tɔn hwenu e é kpo ɖo xu ɔ tó é. 22 Nukɔntɔ́ kplɔ́ngbasá ɔ tɔn lɛ́ ɖokpó wá; è nɔ ylɔ́ ɛ ɖɔ Jayilɔ́si. Ée é mɔ Jezu é ɔ, é jɛ kpo ɖo afɔ tɔn lɛ́ kɔn. 23 É sa vo n’i azɔn gěgé bo nɔ ɖɔ: “Vǐ nyɔ̌nu ce kpɛví ɔ ɖo azɔn jɛ wɛ b’ɛ syɛ́n tawun.* Kɛnklɛ́n bo wá ɖ’alɔ jǐ tɔn bónú lanmɛ tɔn ná dó sixú kpɔ́n te, bɔ é ná nɔ gbɛ.” 24 Énɛ́ ɔ, Jezu xwedó è ɖidó. Ahwan ɖaxó ɖé ɖo xwixwedó è wɛ, bo ɖo fyɔ́nfyɔ́n ɛ wɛ.

25 Din ɔ, nǎwe ɖé ɖo fínɛ́ bo ko ɖo hun ɖi wɛ sín xwe 12 ɖíe. 26 É ko se wǔvɛ́ tawun* ɖo dotóo gěgé sín alɔ mɛ, lobo ko zán nǔ e é ɖó lɛ́ é bǐ. É ka kpɔ́n te n’i ǎ; é nyɔ́ wa ɔ, é lɛ́ nylá d’é jí. 27 Ée é se nǔ e mɛ lɛ́ ɖɔ dó Jezu wú lɛ́ é ɔ, é gbɔn gǔdo tɔn ɖo ahwan ɔ mɛ, bo ɖ’alɔ awu tɔn aga tɔn ɔ wú, 28 ɖó é nɔ ɖɔ: “Ényí un ɖ’alɔ awu tɔn aga tɔn lɛ́ wú kpowun ɔ, azɔn ce ná gbɔ.” 29 Tlóló ɔ, hun e ɖi wɛ é ɖe é nɔ te, bɔ é mɔ ɖo agbaza mɛ ɖɔ azɔn syɛ́nsyɛ́n e jɛ wɛ émí ɖe é gbɔ.

30 Jezu mɔ ɖo éɖée mɛ tlóló ɖɔ hlɔ̌nhlɔ́n gosín lan émítɔn mɛ, bɔ é lílɛ́ ɖo ahwan ɔ mɛ bo kanbyɔ́ ɖɔ: “Mɛ̌ ka ɖ’alɔ awu ce aga tɔn lɛ́ wú?” 31 Ahwanvú tɔn lɛ́ ka ɖɔ n’i ɖɔ: “A mɔ ɖɔ ahwan ɔ ɖo fyɔ́nfyɔ́n we wɛ bo ka kanbyɔ́ ɖɔ: ‘Mɛ̌ ka ɖ’alɔ wǔ ce?’” 32 É ɖo mɔ̌ có, é ɖo fí lɛ́ bǐ kpɔ́n wɛ bá mɔ mɛ e wa mɔ̌ é. 33 Xɛsi jɛ nǎwe ɔ jí bɔ é jɛ sísɔ́sísɔ́ jí. Ðó é tuun nǔ e jɛ dó jǐ tɔn é wútu ɔ, é wá bo jɛ kpo ɖo Jezu nukɔn, lobo ɖɔ nǔ lɛ́ bǐ n’i. 34 Jezu ɖɔ n’i ɖɔ: “Vǐ nyɔ̌nu ce, nǔɖiɖi towe gbɔ azɔn nú we. Yi ɖo fífá mɛ, bónú azɔn syɛ́nsyɛ́n e jɛ wɛ a ɖe é ní gbɔ nú we.”

35 Hwenu e é kpo ɖo xó ɖɔ wɛ é ɔ, súnnu ɖé lɛ́ gosín nukɔntɔ́ kplɔ́ngbasá ɔ tɔn sín xwégbe bo wá lobo ɖɔ: “Vǐ nyɔ̌nu towe ko kú! Étɛ́wú a ka ná lɛ́ dó tagba nú Mɛ̌si ɔ?” 36 Jezu ka se xó e ɖɔ wɛ yě ɖe é, lobo ɖɔ nú nukɔntɔ́ kplɔ́ngbasá tɔn ɔ ɖɔ: “Ma ɖi xɛsi ó.* Vɛ̌ ko ɖe xlɛ́ ɖɔ émí ɖi nǔ kpowun.” 37 Din ɔ, é lɔn bónú mɛ ɖěbǔ xwedó è zɛ Piyɛ́ɛ, Jaki kpó Jaan, Jaki nɔví ɔ kpó wú ǎ.

38 Yě wá nukɔntɔ́ kplɔ́ngbasá ɔ tɔn sín xwégbe, bɔ é mɔ hunnyahunnya ɔ kpó mɛ ɖěɖěe ɖo avǐ ya wɛ, bo ɖo alě ná wɛ kpó xósúsú ɖaxó kpó lɛ́ é kpó. 39 Ée é byɔ́ xwé ɔ gbe é ɔ, é ɖɔ nú yě ɖɔ: “Étɛ́wú mi ka ɖo avǐ ya wɛ bo ɖo alě ná wɛ kpó xósúsú kpó lě? Vǐ ɔ kú ǎ, loɔ, amlɔ dɔ́ wɛ é ɖe.” 40 Bɔ yě jɛ cícá ɛ ko jí. Amɔ̌, ée é ɖe yě mɛ bǐ tɔ́n jɛ kɔ́xo gúdo é ɔ, é kplá vǐ ɔ sín tɔ́ kpó nɔ kpó, kpódó mɛ e zɔn xá ɛ lɛ́ é kpó, bo byɔ́ fí e vǐ ɔ ɖe é. 41 Énɛ́ gúdo ɔ, é hɛn alɔ vǐ ɔ tɔn bo ɖɔ n’i ɖɔ: “Talita kúmi,” tínmɛ tɔn wɛ nyí: “Ðyɔ̌vǐ, má ɖɔ nú we, sí te!” 42 Bɔ tlóló ɔ, nyɔ̌nuví ɔ sí te bo jɛ zɔnlin ɖi jí. (Xwe 12 ɖó wɛ é ɖe.) Bɔ ée yě mɔ mɔ̌ é ɔ, xomɛ hun yě tawun. 43 Amɔ̌, é ɖe gbe nú yě azɔn mɔ̌kpán* ɖɔ yě ní ma ɖɔ bónú mɛɖé ní se ó, lobo ɖɔ ɖɔ è ní ná nǔɖé vǐ ɔ bónú é ní ɖu.

6 É gosín fínɛ́ bo yi to éɖésúnɔ tɔn mɛ bɔ ahwanvú tɔn lɛ́ xwedó è. 2 Ée é jɛ gbɔjɛzángbe é ɔ, é jɛ nǔ kplɔ́n mɛ lɛ́ jí ɖo kplɔ́ngbasá. É kpácá mɛ ɖěɖěe ɖótó è lɛ́ é gěgé bɔ yě ɖɔ: “Fítɛ́ nya élɔ́ ka ba nǔ énɛ́ lɛ́ sín? Mɛ̌ é ka nyí bɔ è ná ɛ nǔnywɛ́ énɛ́ kpó nǔwúkpíkpé ɔ kpó bɔ é nɔ bló nǔjíwǔ mɔ̌hun lɛ́? 3 Atínkpatɔ́ ɔ nɛ́ ǎ cé? Nɔ tɔn wɛ nɔ nyí Mali, bɔ nɔví tɔn súnnu lɛ́ wɛ nyí Jaki, Jozɛ́fu, Judási kpó Sinmɔ́ɔ kpó ǎ cé? Bɔ nɔví tɔn nyɔ̌nu lɛ́ ɖo fí xá mǐ, kabǐ?” Énɛ́ wú ɔ, yě gbɛ́ ɖɔ émí kún ná ɖi nǔ n’i ó. 4 Amɔ̌, Jezu ɖɔ nú yě ɖɔ: “È nɔ wlí yɛ̌yi nú gbeyíɖɔ ɖé ɖo fí bǐ. To éɖésúnɔ tɔn mɛ, hɛ̌nnumɔ tɔn lɛ́ tɛ́ntin kpó xwé éɖésúnɔ tɔn gbe kpó jɛ́n nǔ ma nɔ nyí mɔ̌ ɖe ǎ.” 5 Énɛ́ wú ɔ, é ɖó alɔ azinzɔnnɔ kpɛɖé jí bo gbɔ azɔn nú yě, amɔ̌, é bló nǔjíwǔ ɖěvo ɖěbǔ ɖo fínɛ́ ǎ. 6 Nǔgbó ɔ, nǔ e yě ma ɖi ǎ é kpácá ɛ. Bɔ é gbɔn gletoxo e ɖo xá énɛ́ mɛ lɛ́ é mɛ bo nɔ ɖo nǔ kplɔ́n mɛ wɛ.

7 Din ɔ, é ylɔ́ mɛsɛ́dó 12 lɛ́ kplé bo jɛ yě sɛ́ dó jí webɔwebɔ lobo ná yě acɛ dó gbigbɔ nyanya lɛ́ jí. 8 Gɔ́ ná ɔ, Jezu ɖe gbe nú yě ɖɔ yě ní ma hɛn nǔ ɖěbǔ dó yěɖée jí nú tomɛyiyi ɔ zɛ kpo wú ó; yě ní ma hɛn wɔ̌xúxú ɖěbǔ ó, yě ní ma hɛn glo ɖěbǔ ó, yě ní ma hɛn akwɛ́* ɖěbǔ dó akwɛ́kpo yětɔn lɛ́ mɛ ó, 9 loɔ, ɖɔ yě ní dó afɔkpa bo ma ka hɛn awu ɖěvo dó yěɖée jí* ó. 10 É lɛ́vɔ́ ɖɔ nú yě ɖɔ: “Ényí mi byɔ́ xwé ɖé gbe ɖo fí ɖěbǔ hǔn, mi nɔ fínɛ́ káká jɛ hwenu e mi ná gosín toxo ɔ mɛ dó é. 11 Fí ɖěbǔ e è ma ná yí mi alǒ ɖótó mi ɖe ǎ é ɔ, hwenu e mi ná ɖo fínɛ́ gosín wɛ é ɔ, mi xúxú afúntúntún e ɖo afɔ mitɔn lɛ́ é, bónú é ná nyí kúnnuɖiɖe nú yě.” 12 Énɛ́ gúdo ɔ, yě yi bo yi jlá ɖɔ hwɛ mɛ lɛ́ tɔn ɖó ná vɛ́ nú yě.* 13 Yě nya awǒvi gěgé bo sá ami nú azinzɔnnɔ gěgé lobo gbɔ azɔn nú yě.

14 Din ɔ, axɔ́sú Elódu se nǔ e wa wɛ Jezu ɖe lɛ́ é, ɖó nyǐkɔ tɔn wá gba kpé fí bǐ bɔ mɛ lɛ́ nɔ ɖo ɖiɖɔ wɛ ɖɔ: “È ko fɔ́n Jaan Batɛ́mublónúmɛtɔ́ ɔ sín kú; énɛ́ wú wɛ é ɖó hlɔ̌nhlɔ́n bo nɔ wa nǔ énɛ́ lɛ́.” 15 Amɔ̌, mɛ ɖěvo lɛ́ nɔ ɖo ɖiɖɔ wɛ ɖɔ: “Elíi wɛ.” Bɔ mɛ ɖěvo lɛ́ nɔ ɖo ɖiɖɔ wɛ ɖɔ: “Gbeyíɖɔ wɛ n’i gbeyíɖɔ hwexónu tɔn lɛ́ ɖɔhun.” 16 Amɔ̌, hwenu e Elódu se xó dó Jezu wú é ɔ, é ɖɔ: “Jaan e un gbo ta é wɛ è fɔ́n sín kú.” 17 Ðó Elódu ɖésúnɔ ko sɛ́ mɛ dó, bɔ è wlí Jaan bo dó wlɔ ɛ, lobo sɔ́ ɛ dó gankpá mɛ, ɖó Elodiadi, nɔví tɔn Filípu sín asi e é yí é wútu. 18 Ðó Jaan ko nɔ ɖo ɖiɖɔ nú Elódu wɛ ɖɔ: “É sɔgbe xá sɛ́n ɖɔ a ní da nɔví towe sín asi ǎ.” 19 Énɛ́ wú ɔ, Elodiadi hɛn ɛ dó xomɛ bo ba ná hu i, amɔ̌, é kpé wú ǎ, 20 ɖó Elódu nɔ ɖo xɛsi ɖi nú Jaan wɛ, bo nɔ ɖo xɛ nya ɖo jǐ tɔn wɛ, ɖó é tuun ɖɔ nǔjlɔ́jlɔ́watɔ́ wɛ n’i bɔ é lɛ́ nyí mɛ mímɛ́. Ényí é ɖótó Jaan fó hweɖébǔnu ɔ, é nɔ tuun nǔ bǔ e é ná wa é ǎ. É ɖo mɔ̌ có, é nɔ kpo ɖo tó ɖó è wɛ kpó xomɛhunhun kpó.

21 Amɔ̌, ali ɖé hun nú Elodiadi hwenu e Elódu ylɔ́ agɔ̌ ɖé ɖo jijizánxwe tɔn hwenu é. É ylɔ́ agɔ̌ ɔ nú axɔ́súzɔ́watɔ́ tɔn nukúnɖéjí lɛ́, sɔ́ja afatɔ́ngán lɛ́ kpó mɛ nukúnɖéjí hú gǎn Galilée tɔn lɛ́ kpó. 22 Vǐ nyɔ̌nu Elodiadi tɔn wá bo ɖú we, bɔ é nyɔ́ Elódu kpó mɛ ɖěɖěe ɖo nǔ ɖu xá ɛ wɛ* lɛ́ é kpó nukúnmɛ. Axɔ́sú ɔ ɖɔ nú ɖyɔ̌vǐ ɔ ɖɔ: “Byɔ̌ mì nǔ ɖěbǔ e a ba é, un ná ná we.” 23 Ɛɛn, é xwlé nǔ n’i bo ɖɔ: “A byɔ́ mì nǔ ɖěbǔ ɔ, un ná ná we, káká jɛ axɔ́súɖuto ce sín vlɔ̌ɖówe jí.” 24 Énɛ́ wú ɔ, é tɔ́n bo yi ɖɔ nú nɔ tɔn ɖɔ: “Étɛ́ un ka ɖó ná byɔ́?” É yí gbe n’i ɖɔ: “Jaan Batɛ́mublónúmɛtɔ́ ɔ sín ta.” 25 Tlóló ɔ, é fyá yi axɔ́sú ɔ gɔ́n, bo byɔ́ nǔ e ba wɛ é ɖe é. É ɖɔ: “Un jló ɖɔ a ní ná mì Jaan Batɛ́mublónúmɛtɔ́ ɔ sín ta dó gannúgbɛ́jɛ́ mɛ din tlóló.” 26 Nǔ énɛ́ kú wǔ nú axɔ́sú ɔ tawun có, é jló ná gbɛ́ nǔ e é byɔ́ é ǎ, ɖó nǔ e é xwlé ɖo jǒnɔ tɔn lɛ́* nukɔn é wútu. 27 Énɛ́ wú ɔ, axɔ́sú ɔ sɛ́ sɔ́ja mɛcɔ́tɔ́ ɖokpó dó tlóló, bo ɖe gbe n’i ɖɔ é ní hɛn ta Jaan tɔn wá. Énɛ́ ɔ, é ɖidó bo yi gbo ta Jaan ɖo gankpá ɔ mɛ, 28 bo hɛn ta tɔn dó gannúgbɛ́jɛ́ mɛ wá. É sɔ́ jó nú ɖyɔ̌vǐ ɔ, bɔ ɖyɔ̌vǐ ɔ yi sɔ́ jó nú nɔ tɔn. 29 Ée ahwanvú tɔn lɛ́ se mɔ̌ é ɔ, yě wá bo zé cyɔ tɔn lobo yi ɖi dó yɔdo mɛ.

30 Mɛsɛ́dó lɛ́ kplé lɛ́ lɛ̌ dó Jezu, bo ɖó nǔ e yě ko wa lɛ́ é kpó nǔ e yě ko kplɔ́n mɛ lɛ́ é kpó bǐ sín gbe n’i. 31 Bɔ é ɖɔ nú yě ɖɔ: “Mi wá nú mǐ ná jɛ vo ɖo fí e jɛ zɔ é, bá gbɔjɛ kpɛɖé.” Ðó mɛ gěgé ɖo wǐwá wɛ bo ɖo yiyi wɛ wútu ɔ, yě tlɛ mɔ hwenu kpɛví ɖé vɔ́vɔ́ bo ɖu nǔ ǎ. 32 Énɛ́ wú ɔ, yě byɔ́ tɔjíhún mɛ bo ɖidó fí e jɛ zɔ é bá dó nɔ yěɖokpó. 33 Amɔ̌, mɛ lɛ́ mɔ yě ɖo yiyi wɛ, bɔ mɛ gěgé wá se. Énɛ́ ɔ, mɛ lɛ́ nyi ahwan sín toxo lɛ́ bǐ mɛ, bo kán wezun lobo jɛ dɔ̌n jɛ nukɔn nú yě. 34 Ée é jɛ te sín tɔjíhún ɔ mɛ é ɔ, é mɔ ahwan ɖaxó ɖé, bɔ nǔ yětɔn blá wǔ n’i, ɖó yě cí lɛ̌ngbɔ́ e ma ɖó lɛ̌ngbɔ́nyitɔ́ ǎ lɛ́ é ɖɔhun. Bɔ é jɛ nǔ gěgé kplɔ́n yě jí.

35 Bɔ ée ganmɛ ko yi é ɔ, ahwanvú tɔn lɛ́ wá gɔ̌n tɔn bo ɖɔ: “Fí élɔ́ jɛ zɔ, bɔ ganmɛ ka ko yi tawun. 36 Nyi yě bónú yě ná yi gle e sɛ yá fí lɛ́ é ta kpó gletoxo e sɛ yá fí lɛ́ é kpó mɛ, bo yi xɔ nǔɖé ɖu yěɖésúnɔ.” 37 É yí gbe nú yě ɖɔ: “Midɛɛ lɛ́ ní ná nǔɖé yě bónú yě ní ɖu.” Énɛ́ ɔ, yě ɖɔ n’i ɖɔ: “A ba ɖɔ mǐ ní yi bo xɔ wɔ̌xúxú deníye* 200 nu bo wá ná mɛ lɛ́ bɔ yě ná ɖu wɛ a?” 38 É ɖɔ nú yě ɖɔ: “Wɔ̌xúxú nabí wɛ ɖo mi sí? Mi yi kpɔ́n.” Ée yě kpɔ́n gúdo é ɔ, yě ɖɔ: “Atɔ́ɔ́n wɛ, gɔ́ nú hweví we.” 39 Bɔ é byɔ́ mɛ lɛ́ bǐ ɖɔ yě ní jínjɔ́n gběhan mǔ lɛ́ jí sonu sonu. 40 Énɛ́ ɔ, yě jínjɔ́n ayǐ. Mɛ 100 nɔ ɖo gɔnu ɖě mɛ, bɔ mɛ 50 nɔ ɖo ɖěvo mɛ. 41 Din ɔ, ée é zé wɔ̌xúxú atɔ́ɔ́n lɛ́ kpó hweví we lɛ́ kpó é ɔ, é kpɔ́n jǐxwé bo byɔ́ nyɔ̌ná d’é jí. Énɛ́ gúdo ɔ, é fɛ́n wɔ̌xúxú lɛ́ bo jɛ sísɔ́ nú ahwanvú lɛ́ jí bónú yě ná má nú mɛ lɛ́. É lɛ́ má hweví we lɛ́ gbɔn mɔ̌. 42 Énɛ́ ɔ, yě bǐ ɖu nǔ bo gɔ́ xo, 43 bɔ yě bɛ́ wɔ̌xúxú fínfɛ́n lɛ́, lobɔ xasun 12 gɔ́; hweví lɛ́ ka ɖ’é mɛ ǎ. 44 Súnnu 5 000 wɛ ɖu wɔ̌xúxú lɛ́.

45 Énɛ́ gúdo tlóló ɔ, é ɖɔ nú ahwanvú tɔn lɛ́ ɖɔ yě ní byɔ́ tɔjíhún ɔ mɛ, bo jɛ nukɔn ɖidó agě ɖě ɔ jí gbɔn Bɛtisayída kpá, hwenu e éɖésúnɔ ná ɖo ahwan ɔ nyi wɛ é. 46 Amɔ̌, ée é dó éɖabɔ nú yě gúdo é ɔ, é xá só ɖé jí bo ná xo ɖɛ. 47 Ée gbadanu su é ɔ, tɔjíhún ɔ ko ɖo xu ɔ tɛ́ntin. Amɔ̌, éɖokpónɔ jɛ́n kpo ɖo agě jí. 48 Énɛ́ ɔ, ée é mɔ ɖɔ hǔn ɔ kunkun ɖo wǔ vɛ́ nú yě wɛ, ɖó yě ɖo jɔhɔn kpé wɛ wútu é ɔ, ɖo ayǐtéhɔ̌nnu mɔ̌* ɔ, é sɛ yá yě bo ɖo zɔnlin ɖi wɛ gbɔn xu ɔ jí. Amɔ̌, é bló nǔ mɛ ná zɛ yě wú ɖɔhun.* 49 Ée yě mɔ ɛ ɖo zɔnlin ɖi gbɔn xu ɔ jí wɛ é ɔ, yě ɖɔ: “Dlɔ̌ kú wɛ mǐ ɖe a?” Bɔ yě sú xó. 50 Ðó yě mɛ bǐ mɔ ɛ bɔ ayi yětɔn gba dó. Amɔ̌ tlóló ɔ, é ɖɔ nú yě ɖɔ: “Mi kpankɔ́n! Nyɛ wɛ; mi ma ɖi xɛsi ó.” 51 Énɛ́ gúdo ɔ, é byɔ́ tɔjíhún ɔ mɛ xá yě, bɔ jɔhɔn ɔ cí xwíí. Énɛ́ ɔ, é jí wǔ nú yě tawun, 52 ɖó yě ko mɔ nukúnnú jɛ nǔjíwǔ wɔ̌xúxú lɛ́ tɔn ɔ sín tínmɛ mɛ ǎ. Ayi yětɔn ko wlí nǔ ǎ.

53 Ée yě d’asá xu ɔ é ɔ, yě wá agě jí ɖo Jenɛzalɛ́ti bo glín tɔjíhún ɔ sɛkpɔ́ fínɛ́. 54 Amɔ̌, tlóló e yě jɛ te sín tɔjíhún ɔ mɛ é ɔ, mɛ lɛ́ tuun i. 55 Yě kán wezun gbɔn xá énɛ́ bǐ mɛ, bo jɛ mɛ e ɖo azɔn jɛ wɛ lɛ́ é kplá wá fí e yě se ɖɔ é ɖe é jí, bɔ mɛ lɛ́ ɖo zan jí. 56 Bɔ ényí é byɔ́ fí ɖěbǔ ɔ, é ná bo nyí gletoxo lɛ́ alǒ toxo lɛ́ mɛ, kabǐ yi gle lɛ́ ta ɔ, yě nɔ kplá azinzɔnnɔ lɛ́ wá axi lɛ́ mɛ, bo nɔ sa vo n’i ɖɔ émí ní vɛ́ ko sixú ɖ’alɔ awu tɔn aga tɔn ɔ sín kɛyɛ wú kpowun. Énɛ́ ɔ, yě mɛ e ɖ’alɔ wú lɛ́ é bǐ sín azɔn gbɔ.

7 Din ɔ, Falizyɛn lɛ́ kpó sɛ́nkplɔ́nmɛtɔ́ ɖé lɛ́ kpó gosín Jeluzalɛ́mu, bo xo yěɖée kplé lɛ́ lɛ̌ dó è. 2 Yě mɔ ahwanvú tɔn ɖé lɛ́ bɔ yě sɔ́ alɔ kwíjikwíji dó ɖo nǔ ɖu ná wɛ, énɛ́ wɛ nyí alɔ e è ma klɔ́ ǎ lɛ́ é.* 3 (Ðó ényí Falizyɛn lɛ́ kpó Jwifu lɛ́ bǐ kpó ma klɔ́ alɔ yětɔn lɛ́ káká wá yi ɖó awagóli ǎ ɔ, yě nɔ ɖu nǔ ǎ, bo nɔ tɛ́ dó tɔ́gbó yětɔn lɛ́ sín hwɛndonúwiwa lɛ́ wú. 4 Lobɔ ényí yě gosín axi mɛ bo ma lɛ wǔ ǎ ɔ, yě nɔ ɖu nǔ ǎ. Hwɛndonúwiwa gěgé ɖěvo lɛ́ tíin bɔ è sɔ́ d’así nú yě bɔ yě nɔ tɛ́ d’é wú, ɖi kɔ́fu lɛ́, tɔyizɛ́n lɛ́, kpó ganvɔzɛ́n lɛ́ kpó nyínylɔ́ dó sin mɛ.) 5 Énɛ́ wú ɔ, Falizyɛn énɛ́ lɛ́ kpó sɛ́nkplɔ́nmɛtɔ́ énɛ́ lɛ́ kpó kanbyɔ́ ɛ ɖɔ: “Étɛ́wú ahwanvú towe lɛ́ ma ka nɔ xwedó hwɛndonúwiwa tɔ́gbó lɛ́ tɔn lɛ́ ǎ, bo nɔ sɔ́ alɔ kwíjikwíji dó ɖu nǔ ná?” 6 É ɖɔ nú yě ɖɔ: “Yɛmɛnúwatɔ́ è mi, lěe è ko wlán ɖ’ayǐ gbɔn é ɔ, Ezayíi sín hwɛ jɔ hwenu e é ɖɔ xó élɔ́ ɖ’ayǐ dó mi wú é: ‘Togun élɔ́ nɔ wlí yɛ̌yi nú mì ɖo nu, amɔ̌, ayi yětɔn lín dó mì tawun. 7 Yě ɖo sinsɛn mì wɛ dó wǔvɔ́, ɖó sɛ́n gbɛtɔ́ lɛ́ tɔn lɛ́ wɛ yě nɔ kplɔ́n mɛ.’ 8 Mi nɔ wɔn ya nú gbeɖiɖe Mawu tɔn, bo nɔ tɛ́ dó hwɛndonúwiwa gbɛtɔ́ lɛ́ tɔn lɛ́ wú.”

9 Gɔ́ ná ɔ, é ɖɔ nú yě ɖɔ: “Mi nɔ zán ayi wínníwínní dó gbɛ́ gbeɖiɖe Mawu tɔn, bo ná dó xwedó hwɛndonúwiwa mitɔn lɛ́. 10 Ði kpɔ́ndéwú ɔ, Mɔyízi ɖɔ: ‘Wlǐ yɛ̌yi nú tɔ́ towe kpó nɔ towe kpó,’ é lɛ́ ɖɔ: ‘Mɛ e ná zun* tɔ́ tɔn alǒ nɔ tɔn é ɔ, è ní hu i.’ 11 Amɔ̌, midɛɛ lɛ́ ɖɔ: ‘Ényí mɛɖé ɖɔ nú tɔ́ tɔn alǒ nɔ tɔn ɖɔ: “Nǔ ɖěbǔ e un ɖó bɔ é sixú hɛn le wá nú we é ɔ, kɔbáan (énɛ́ wɛ nyí, nǔníná e è ko sɔ́ ɖó vo nú Mawu é) wɛ” ɔ, é nyɔ́.’ 12 Énɛ́ ɔ, mi sɔ́ nɔ lɔn bónú é ní wa nǔ kwín ɖokpó nú tɔ́ tɔn alǒ nɔ tɔn ǎ. 13 Énɛ́ wú ɔ, mi xo xó Mawu tɔn nyi kɛ́n gbɔn hwɛndonúwiwa mitɔn e mi jó nyi ayǐ nú mɛ ɖěvo lɛ́ é gblamɛ. Mi nɔ lɛ́ wa nǔ gěgé gbɔn mɔ̌.” 14 Énɛ́ ɔ, é lɛ́vɔ́ ylɔ́ ahwan ɔ bo ɖɔ nú yě ɖɔ: “Mi bǐ, mi ɖótó mì, bo mɔ nukúnnú jɛ tínmɛ xó ce lɛ́ tɔn wú. 15 Nǔ e nɔ byɔ́ gbɛtɔ́ xomɛ é ɖěbǔ sixú hɛn ɛ blí ǎ. Loɔ, nǔ e nɔ tɔ́n sín gbɛtɔ́ xomɛ lɛ́ é wɛ nyí nǔ e nɔ hɛn ɛ blí lɛ́ é.” 16* ——

17 Din ɔ, ée é ko jó ahwan ɔ dó bo byɔ́ xwé ɖé gbe é ɔ, ahwanvú tɔn lɛ́ jɛ nǔ kanbyɔ́ ɛ dó nǔjlɛ́dónǔwú ɔ wú jí. 18 Énɛ́ wú ɔ, é ɖɔ nú yě ɖɔ: “Mi lɔ ɖó nukúnnúmɔjɛnǔmɛ ǎ, yě ɖɔhun wɛ a? Mi tuun ɖɔ nǔ e gosín kɔ́xo bo byɔ́ gbɛtɔ́ nu mɛ é ɖěbǔ kún sixú hɛn ɛ blí ó ǎ cé? 19 Ðó ayi tɔn mɛ wɛ é nɔ byɔ́ ǎ, loɔ, adɔgo tɔn mɛ wɛ é nɔ byɔ́, bo nɔ dín byɔ́ adado mɛ.” Mɔ̌ mɛ ɔ, é ɖe xlɛ́ ɖɔ nǔɖuɖu lɛ́ bǐ wɛ mɛ́. 20 É lɛ́ ɖɔ gɔ́ ná ɖɔ: “Nǔ e nɔ tɔ́n sín gbɛtɔ́ xomɛ é wɛ nyí nǔ e nɔ hɛn ɛ blí é. 21 Ðó gbɛtɔ́ xomɛ, énɛ́ wɛ nyí ayi mɛ, wɛ linlin nyanya lɛ́ nɔ gosín: agalilɛ,* ajojija, mɛhuhu, 22 afɔdógbě alǒ nyɔ̌nu ɖěvo biba, nukúnkɛndídó, nǔnyanyawiwa, mɛblɛ́blɛ́, wunhínhɔ́nnúwiwa,* mɛnújlójló, nunylánylá, goyíyí kpó jlɛ̌jímanɔ kpó. 23 Nǔ nyanya énɛ́ lɛ́ bǐ ɔ, xomɛ wɛ yě nɔ tɔ́n sín bo nɔ hɛn gbɛtɔ́ blí.”

24 É sí te sín fínɛ́ bo ɖidó Tíi kpó Sidɔ́ɔn kpó sín xá mɛ. Ðo dɔ̌n ɔ, é byɔ́ xwé ɖé gbe, bo ka ba ɖɔ mɛ ɖěbǔ ní tuun ǎ. Loɔ, è sixú gɔn ayi ɖó wǔ tɔn ǎ. 25 Tlóló ɔ, nǎwe e sín vǐ nyɔ̌nu kpɛví jí gbigbɔ nyanya ɖe é ɖé se xó dó Jezu wú, bo wá lobo jɛ kpo ɖo afɔ tɔn lɛ́ kɔn. 26 Glɛ̌kinu wɛ nyí nǎwe ɔ, bɔ é nɔ nɔ* Silíi-Fenisíi. É sa vo nú Jezu azɔn mɔ̌kpán ɖɔ é ní nya awǒvi ɔ sín vǐ émítɔn jí. 27 Amɔ̌, Jezu ɖɔ n’i ɖɔ: “Vǐ lɛ́ ní to gɔ́ xo jɛ nukɔn hwɛ̌, ɖó é sɔgbe ɖɔ è ní sɔ́ nǔɖuɖu vǐ lɛ́ tɔn bo nyi dó cukúví lɛ́ ǎ.” 28 Nyɔ̌nu ɔ ka yí gbe n’i ɖɔ: “Ɛɛn, mɛɖaxó, é ka tlɛ ɖo mɔ̌ có, cukúví e ɖo távo glɔ́ lɛ́ é nɔ ɖu nǔɖuɖu vǐ kpɛví lɛ́ tɔn e hlɛ́n kɔn nyi ayǐ lɛ́ é.” 29 Énɛ́ ɔ, Jezu ɖɔ n’i ɖɔ: “Ðó mɔ̌ e a ɖɔ é wútu ɔ, yi; awǒvi ɔ ko gosín vǐ nyɔ̌nu towe jí.” 30 Énɛ́ wú ɔ, é ɖidó xwé tɔn gbe bo yi mɔ vǐ kpɛví ɔ ɖo ayǐmlɔ́mlɔ́ ɖo zan jí, lobɔ awǒvi ɔ ko gosín jǐ tɔn.

31 Ée Jezu lɛ́ kɔ sín Tíi sín xá mɛ é ɔ, é gbɔn Sidɔ́ɔn kpó Dekapɔ́lu* kpó bo ɖidó Galilée xu ɔ sín awa jí. 32 È kplá nya tókúnɔ e xó ɖiɖɔ nɔ vɛ́ wǔ ná é ɖokpó wá n’i ɖo fínɛ́, bo sa vo n’i ɖɔ é ní ɖ’alɔ jǐ tɔn. 33 É kplá nya ɔ sín ahwan ɔ mɛ jɛ vo. Énɛ́ gúdo ɔ, é zé alɔví tɔn lɛ́ dó tó nya ɔ tɔn lɛ́ mɛ, bɔ ée é tún atán gúdo é ɔ, é y’agba ɖɛ̌ tɔn wú. 34 É lɛ́ kpɔ́n jǐxwé bo gbɔ́ syɛ́nsyɛ́n, lobo ɖɔ: “Efata,” énɛ́ wɛ nyí: “Hun.” 35 Énɛ́ ɔ, tó nya ɔ tɔn lɛ́ hun, bɔ é kpé wú bo zán ɖɛ̌ tɔn lobo jɛ xó ɖɔ jí ganjí. 36 Énɛ́ gúdo ɔ, é ɖe gbe nú yě ɖɔ yě ní ma ɖɔ nú mɛ ɖěbǔ ó. Amɔ̌, bǎ e mɛ é gbɛ́ nú yě yi ɖó é ɔ, bǎ énɛ́ mɛ wɛ yě nɔ jlá yi ɖó. 37 Nǔgbó ɔ, é jí wǔ nú yě zɛ jlɛ̌ wú bɔ yě ɖɔ: “Nǔ e é nɔ wa lɛ́ é bǐ wɛ jí wǔ tawun! É tlɛ nɔ bló bɔ tókúnɔ lɛ́ nɔ se nǔ bɔ ɖɛ̌kúnánɔ lɛ́ nɔ ɖɔ xó.”

8 Hwenɛ́nu ɔ, ahwan ɖaxó ɖé lɛ́vɔ́ kplé, bɔ yě ɖó nǔ ɖěbǔ bo ná ɖu ǎ. Énɛ́ wú ɔ, é ylɔ́ ahwanvú lɛ́ bo ɖɔ nú yě ɖɔ: 2 “Ahwan ɔ sín nǔ blá wǔ nú mì, ɖó é ko bló azǎn atɔn din bɔ yě ɖo fí xá mì, yě ka ɖó nǔ ɖě bo ná ɖu ǎ. 3 Ényí yě ɖo xovɛ́ bónú un nyi yě sɛ́dó xwé yětɔn lɛ́ gbe ɔ, yě ná ba yěɖée mɛ kpo ɖo alixo. Gɔ́ ná ɔ, fí e yě mɛ ɖé lɛ́ gosín é lín dó fí tawun.” 4 Amɔ̌, ahwanvú tɔn lɛ́ yí gbe n’i ɖɔ: “Fítɛ́ è ka ná ba wɔ̌xúxú e ná kpé é sín ɖo fí élɔ́ e jɛ gblǒlǒ é, bónú mɛ élɔ́ lɛ́ ná ɖu bo gɔ́ xo?” 5 Énɛ́ ɔ, é kanbyɔ́ yě ɖɔ: “Wɔ̌xúxú nabí ka ɖo mi sí?” Yě ɖɔ: “Tɛ́nwe.” 6 Énɛ́ ɔ, é byɔ́ ahwan ɔ ɖɔ yě ní jínjɔ́n kɔ́mɛ. Énɛ́ gúdo ɔ, é zé wɔ̌xúxú tɛ́nwe lɛ́ bo dó kú nú Mawu, lobo fɛ́n bo jɛ sísɔ́ nú ahwanvú tɔn lɛ́ jí bónú yě ná má; bɔ yě má nú ahwan ɔ. 7 Yě lɛ́ ɖó hweví kpɛví kpɛví kléwún ɖé. Bɔ ée é byɔ́ nyɔ̌ná d’é jí gúdo é ɔ, é ɖɔ nú yě ɖɔ yě ní má énɛ́ lɛ́ lɔmɔ̌. 8 Énɛ́ ɔ, yě ɖu nǔ bo gɔ́ xo, bɔ ahwanvú lɛ́ xo wɔ̌xúxú fínfɛ́n e kpo lɛ́ é kplé, bɔ xasun ɖaxó tɛ́nwe gɔ́. 9 Súnnu e ɖu nǔ lɛ́ é yi 4 000 mɔ̌. Énɛ́ gúdo ɔ, é nyi yě.

10 Tlóló ɔ, é byɔ́ tɔjíhún mɛ xá ahwanvú tɔn lɛ́ bo wá Dalumanúta sín xá mɛ. 11 Falizyɛn lɛ́ wá fínɛ́, bo jɛ nǔ dɔn xá ɛ jí, lobo byɔ́ ɛ wuntun ɖé sín jǐxwé bo ná dó tɛ́n ɛ kpɔ́n. 12 Énɛ́ wú ɔ, é gbɔ́ syɛ́nsyɛ́n bo ɖɔ: “Étɛ́wú jijimɛ élɔ́ ka ɖo wuntun ɖé ba wɛ? Má ɖɔ nǔgbó nú mi, è ná ɖe wuntun ɖěbǔ xlɛ́ jijimɛ élɔ́ ǎ.” 13 Énɛ́ ɔ, é jó yě dó bo lɛ́ byɔ́ tɔjíhún mɛ, lobo yi agě ɖě ɔ jǐ.

14 Amɔ̌, yě flín bo hɛn wɔ̌xúxú ǎ. Wɔ̌xúxú ɖokpó jɛ́n ɖo yě sí ɖo tɔjíhún ɔ mɛ. 15 É gb’akpá nú yě nyi wɛn ɖɔ: “Nukún mitɔn lɛ́ ní ɖo te; mi cɔ́ miɖée dó Falizyɛn lɛ́ sín tɔ́n kpó Elódu sín tɔ́n kpó wú.” 16 Yě ka jɛ nǔ dɔn xá yěɖée lɛ́ jí, ɖó wɔ̌xúxú e yě ma ɖó ǎ é wú. 17 Ðó Jezu ɖ’ayi énɛ́ wú wútu ɔ, é ɖɔ nú yě ɖɔ: “Étɛ́wú mi ka ɖo nǔ dɔn wɛ, ɖó wɔ̌xúxú e mi ma ɖó ǎ é wú? É ko za wě nú mi ǎ jɛ́n wɛ a? Mi ko mɔ nukúnnú jɛ mɛ ǎ cé? Ayi mitɔn kpo ɖo súsú, bɔ mi ko mɔ nukúnnú jɛ nǔ mɛ ǎ jɛ́n wɛ a? 18 ‘Mi ɖó nukún, có mi ka mɔ ǎ wɛ a? Mi ɖó tó, có mi ka se ǎ wɛ a?’ Mi sɔ́ flín ǎ cé? 19 Hwenu e un fɛ́n wɔ̌xúxú atɔ́ɔ́n lɛ́ nú súnnu 5 000 lɛ́ é ɔ, fínfɛ́n tɔn xasun nabí mi ka xo kplé?” Yě ɖɔ n’i ɖɔ: “Wěwe.” 20 “Hwenu e un fɛ́n wɔ̌xúxú tɛ́nwe lɛ́ nú súnnu 4 000 lɛ́ é ɔ, fínfɛ́n tɔn xasun nabí mi ka xo kplé?” Bɔ yě ɖɔ n’i ɖɔ: “Tɛ́nwe.” 21 Énɛ́ ɔ, é ɖɔ nú yě ɖɔ: “Mi ko mɔ nukúnnú jɛ mɛ lo ǎ cé?”

22 Din ɔ, yě yi Bɛtisayída. Mɛ lɛ́ kplá nya nukúntɔ́nnɔ ɖokpó wá n’i ɖo fínɛ́, bo sa vo n’i ɖɔ é ní ɖ’alɔ wǔtu tɔn. 23 Énɛ́ ɔ, é hɛn nya nukúntɔ́nnɔ ɔ sín alɔ, bo kplá ɛ sín gletoxo ɔ mɛ. Ée é ɖó atán nukún tɔn lɛ́ jí gúdo é ɔ, é ɖó alɔ jǐ tɔn bo kanbyɔ́ ɛ ɖɔ: “A mɔ nǔɖé a?” 24 Nya ɔ hun nukún bo ɖɔ: “Un mɔ gbɛtɔ́ lɛ́, amɔ̌, yě cí atín lɛ́ ɖɔhun bo ɖo zɔnlin ɖi wɛ.” 25 É lɛ́vɔ́ ɖó alɔ nya ɔ sín nukún jí, bɔ nya ɔ mɔ nǔ ganjí. Azɔn tɔn gbɔ, bɔ é sixú mɔ nǔ bǐ céɖécéɖé. 26 Énɛ́ ɔ, é sɛ́ ɛ dó xwé bo ka ɖɔ n’i ɖɔ: “Ma byɔ́ gletoxo ɔ mɛ ó.”

27 Din ɔ, Jezu kpó ahwanvú tɔn lɛ́ kpó ɖidó Sezalée Filípu tɔn sín gletoxo lɛ́ mɛ. Ée yě ɖo ali jí é ɔ, é jɛ kinkanbyɔ́ ahwanvú tɔn lɛ́ jí ɖɔ: “Mɛ̌ un ka nyí bɔ mɛ lɛ́ nɔ ɖɔ?” 28 Yě ɖɔ n’i ɖɔ: “Jaan Batɛ́mublónúmɛtɔ́ ɔ. Amɔ̌, mɛ ɖěvo lɛ́ nɔ ɖɔ Elíi, mɛ ɖěvo lɛ́ ka nɔ lɛ́ ɖɔ gbeyíɖɔ lɛ́ ɖokpó wɛ.” 29 É kanbyɔ́ yě ɖɔ: “Midɛɛ lɛ́ ka lo, mɛ̌ un ka nyí bɔ mi nɔ ɖɔ?” Piyɛ́ɛ yí xó bo ɖɔ: “Hwi wɛ nyí Klísu ɔ.” 30 Énɛ́ ɔ, é ɖe gbe nú yě syɛ́nsyɛ́n ɖɔ yě ní ma ɖɔ mɛ e émí nyí é nú mɛ ɖěbǔ ó. 31 Gɔ́ ná ɔ, é jɛ kpínkplɔ́n yě jí ɖɔ Gbɛtɔ́ví ɔ ɖó ná gbɔn wǔvɛ́ gěgé mɛ dín, lobɔ tomɛxó lɛ́, vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó ná gbɛ́ ɛ, bɔ è ná hu i, lobɔ azǎn atɔn gúdo ɔ, é ná fɔ́n. 32 Nǔgbó ɔ, é ɖɔ xó énɛ́ lɛ́ nyi wɛn nú yě. Amɔ̌, Piyɛ́ɛ kplá ɛ jɛ kɛ́n ɖokpó bo jɛ nǔ gbɛ́ n’i jí. 33 Énɛ́ ɔ, é lílɛ́ bo kpɔ́n ahwanvú tɔn lɛ́, lobo gbɛ́ nǔ nú Piyɛ́ɛ bo ɖɔ: “Wǎ yi gǔdo ce, Satáan! Ðó linlin towe lɛ́ sɔgbe xá Mawu tɔn lɛ́ ǎ, loɔ, gbɛtɔ́ lɛ́ tɔn wɛ.”

34 Din ɔ, é ylɔ́ ahwan ɔ kpó ahwanvú tɔn lɛ́ kpó bo ɖɔ nú yě ɖɔ: “Ényí mɛɖé jló ná xwedó mì hǔn, é ní gbɛ́ éɖée bo sɔ́ yatín* tɔn, lobo nɔ xwedó mì. 35 Ðó mɛ ɖěbǔ e jló ná hwlɛ́n gbɛ* tɔn é ná hɛn bú, amɔ̌, mɛ ɖěbǔ e hɛn gbɛ* tɔn bú ɖó nyɛ kpó wɛn ɖagbe ɔ kpó wú é ná hwlɛ́n gbɛ* tɔn. 36 Nǔgbó ɔ, ényí mɛɖé jɛ tagba bo ɖó nǔ e ɖo gbɛ ɔ mɛ lɛ́ é bǐ, bo ka hɛn gbɛ* éɖésúnɔ tɔn bú ɔ, le tɛ́ ka ɖ’é mɛ n’i? 37 Étɛ́ mɛɖé ka sixú ná dó xɔ gbɛ* éɖésúnɔ tɔn tawun? 38 Ðó mɛ ɖěbǔ e nyi kpó xó ce lɛ́ kpó ná nyí winnyánú ná ɖo jijimɛ afɔdógbětɔ́* kpó hwɛhutɔ́ kpó élɔ́ tɛ́ntin é ɔ, mɛ ɔ lɔmɔ̌ ná nyí winnyánú nú Gbɛtɔ́ví ɔ, hwenu e é ná wá ɖo Tɔ́ tɔn sín susu mɛ kpó wɛnsagun mímɛ́ lɛ́ kpó é.”

9 Gɔ́ ná ɔ, é ɖɔ nú yě ɖɔ: “Má ɖɔ nǔgbó nú mi, mɛɖé lɛ́ ɖo mɛ e ɖo fí lɛ́ é mɛ, bo ná tó mɔ Axɔ́súɖuto Mawu tɔn b’ɛ ná wá kpó hlɔ̌nhlɔ́n tɔn kpó hwɛ̌ cóbó ná kú.” 2 Azǎn ayizɛ́n gúdo ɔ, Jezu kplá Piyɛ́ɛ, Jaki kpó Jaan kpó, bɔ yě xá só ɖaxó ɖé jí yěɖokpónɔ. Bɔ é húzú ninɔmɛ ɖo nukɔn yětɔn; 3 awu tɔn aga tɔn lɛ́ jɛ kínkɔ́n jí, bo wé hú lěe avɔnyatɔ́ e ɖo ayǐkúngban jí é ɖěbǔ sixú bló bɔ avɔ ɖé wé gbɔn é flaflá tɔn. 4 Gɔ́ ná ɔ, Elíi kpó Mɔyízi kpó tɔ́n dó yě jí, bɔ yě ɖo xó ɖɔ ɖó kpɔ́ xá Jezu wɛ. 5 Bɔ Piyɛ́ɛ ɖɔ nú Jezu ɖɔ: “Mɛ̌si,* fí élɔ́ e mǐ ɖe é nyɔ́ mɛ! Énɛ́ wú ɔ, mǐ ní gbá goxɔ atɔn, ɖokpó ná nyí towe, ɖokpó ná nyí Mɔyízi tɔn, ɖokpó ná nyí Elíi tɔn.” 6 Nǔgbó ɔ, Piyɛ́ɛ tuun lěe é ná wa nǔ gbɔn é ǎ, ɖó xɛsi ɖi yě tawun. 7 Bɔ akpɔ́kpɔ́ ɖé dó bo cyɔ́n yě, lobɔ gbe ɖé ɖi sín akpɔ́kpɔ́ ɔ mɛ bo ɖɔ: “Vǐ súnnu ce vívɛ́ná ɔ ɖíe. Mi ɖótó è.” 8 Énɛ́ gúdo ɖo ajijimɛ ɔ, ée yě kpɔ́n fí e yě ɖe é lɛ́ lɛ̌ dó é ɔ, yě sɔ́ mɔ mɛ ɖěbǔ ɖo fínɛ́ xá yě zɛ Jezu wú ǎ.

9 Ée yě ɖo te jɛ sín só ɔ jí wɛ é ɔ, é gbɛ́ nú yě syɛ́nsyɛ́n ɖɔ yě ní ma ɖɔ nǔ e yě mɔ é nú mɛ ɖěbǔ hwɛ̌ cóbónú è ní fɔ́n Gbɛtɔ́ví ɔ sín kú ó. 10 Yě hɛn xó énɛ́ dó ayi mɛ,* bo ka ɖɔ ɖo yěɖée tɛ́ntin ɖɔ, étɛ́ ka nyí tínmɛ fínfɔ́n sín kú énɛ́ tɔn a jí. 11 Bɔ yě jɛ nǔ kanbyɔ́ ɛ jí ɖɔ: “Étɛ́wú sɛ́nkplɔ́nmɛtɔ́ lɛ́ ka nɔ ɖɔ ɖɔ Elíi ɖó ná to wá hwɛ̌?” 12 É ɖɔ nú yě ɖɔ: “Elíi ɖó ná to wá hwɛ̌ bo ná jlá nǔ lɛ́ bǐ ɖó. Amɔ̌, étɛ́wú è ka wlán dó Gbɛtɔ́ví ɔ wú ɖɔ é ɖó ná se wǔvɛ́ gěgé bɔ è kún ná sɔ́ ɛ dó ylɔ́ nǔɖé ó lo? 13 Má ɖɔ nú mi, Elíi wá nǔgbó, bɔ yě wa nǔ e jló yě lɛ́ é bǐ xá ɛ lěe è ko wlán ɖ’ayǐ dó wǔ tɔn gbɔn é.”

14 Hwenu e yě sɛkpɔ́ ahwanvú e kpo lɛ́ é ɔ, yě ɖ’ayi wú ɖɔ ahwan ɖaxó ɖé lɛ́ lɛ̌ dó yě, bɔ sɛ́nkplɔ́nmɛtɔ́ lɛ́ ɖo nǔ dɔn xá yě wɛ ɖo fínɛ́. 15 Amɔ̌, tlóló e ahwan ɔ bǐ mɔ ɛ é ɔ, é kpácá yě tawun bɔ yě kán wezun yi gɔ̌n tɔn, bo ná dó gbe n’i. 16 Énɛ́ ɔ, é kanbyɔ́ yě ɖɔ: “Étɛ́ dɔn xá yě wɛ mi ka ɖe?” 17 Mɛ ɖokpó ɖo ahwan ɔ mɛ, bo yí gbe n’i ɖɔ: “Mɛ̌si, un kplá vǐ súnnu ce wá nú we ɖó gbigbɔ ɖɛ̌hunúmɛtɔ́ ɖé ɖo jǐ tɔn. 18 Ényí gbigbɔ ɔ wá jǐ tɔn ɖo fí ɖěbǔ ɔ, é nɔ sɔ́ ɛ zin dó kɔ́mɛ bɔ é nɔ jɛ afúntúnkplɔ̌ tún jí, lobo nɔ jɛ aɖǔkún ɖu jí, bo nɔ ba hlɔ̌nhlɔ́n kpo. Un byɔ́ ahwanvú towe lɛ́ ɖɔ yě ní nya gbigbɔ ɔ sín jǐ tɔn, amɔ̌, yě ka kpé wú bo wa mɔ̌ ǎ.” 19 É yí gbe nú yě ɖɔ: “Jijimɛ nǔmaɖitɔ́ è mi, káká jɛ hwetɛ́nu un ka ɖó ná nɔ kpɔ́ xá mi yi jɛ? Káká jɛ hwetɛ́nu un ka ɖó ná xwe nǔ mitɔn ɖɔ yi jɛ? Mi kplá ɛ wá nú mì.” 20 Énɛ́ ɔ, yě kplá vǐ ɔ wá n’i. Amɔ̌, ée gbigbɔ ɔ mɔ Jezu é ɔ, tlóló ɔ, é húnhún vǐ ɔ syɛ́nsyɛ́n. Ée é j’ayǐ gúdo é ɔ, é jɛ gbo blí jí bo jɛ afúntúnkplɔ̌ tún jí. 21 Énɛ́ ɔ, Jezu kanbyɔ́ tɔ́ ɔ ɖɔ: “Sín hwetɛ́nu nǔ énɛ́ ka nɔ wa ɛ?” É ɖɔ: “Sín hwenu e é ɖo vǔ é. 22 Bɔ hwɛhwɛ ɔ, é nɔ sɔ́ ɛ zin dó myɔ mɛ, bo nɔ lɛ́ sɔ́ ɛ zin dó sin mɛ, bá mɔ tɛn dó hu i. Amɔ̌, ényí a sixú wa nǔ ɖěbǔ hǔn, kú nǔbláwǔ nú mǐ bo d’alɔ mǐ.” 23 Jezu ɖɔ n’i ɖɔ: “Étɛ́wú a ka ɖɔ: ‘Ényí a sixú’ ɔ? Mɛ e ɖó nǔɖiɖi é nɔ kpé nǔ bǐ wú.” 24 Tlóló ɔ, vǐ ɔ sín tɔ́ sú xó bo ɖɔ: “Un ɖó nǔɖiɖi! D’alɔ mì ɖo fí e un ɖó hudó nǔɖiɖi tɔn ɖe é.”

25 Din ɔ, ée Jezu ɖ’ayi wú ɖɔ ahwan ɖé ɖo wezun jí ja gɔ̌n yětɔn é ɔ, é ɖe gbe dó gbigbɔ nyanya ɔ bo ɖɔ n’i ɖɔ: “Gbigbɔ ɖɛ̌hunúmɛtɔ́ kpó tóhunúmɛtɔ́ kpó è, un ɖe gbe nú we ɖɔ a ní gosín jǐ tɔn bo ma sɔ́ lɛ́ wá jǐ tɔn ɖě ó.” 26 Ée gbigbɔ ɔ sú xó bo húnhún vǐ ɔ syɛ́nsyɛ́n gúdo é ɔ, é gosín jǐ tɔn, bɔ vǐ ɔ cí mɛ e kú é ɖɔhun. Énɛ́ ɔ, mɛ lɛ́ gěgé ɖo ɖiɖɔ wɛ ɖɔ: “É kú!” 27 Amɔ̌, Jezu hɛn alɔ tɔn bo fɔ́n ɛ sí te, bɔ é nɔ te. 28 Ée é wá byɔ́ xwé ɖé gbe gúdo é ɔ, ahwanvú tɔn lɛ́ kanbyɔ́ ɛ ɖo nǔglɔ́ ɖɔ: “Étɛ́wú mǐ ma ka kpé wú bo nya gbigbɔ nyanya ɔ ǎ?” 29 É ɖɔ nú yě ɖɔ: “Ðɛxixo kɛ́ɖɛ́ jɛ́n sixú nya awǒvi alɔkpa énɛ́ sín mɛ jí.”

30 Yě gosín fínɛ́ bo gbɔn Galilée, amɔ̌, é ba ɖɔ mɛ ɖěbǔ ní tuun ǎ, 31 ɖó é ɖo nǔ kplɔ́n ahwanvú tɔn lɛ́ wɛ bo ɖo ɖiɖɔ nú yě wɛ ɖɔ: “È ɖo Gbɛtɔ́ví ɔ ná sa wɛ, bo ná jó è nyi gbɛtɔ́ lɛ́ sín alɔ mɛ, bɔ yě ná hu i. Amɔ̌, è ná hu i có, azǎn atɔn gúdo ɔ, é ná fɔ́n.” 32 É ɖo mɔ̌ có, yě mɔ nukúnnú jɛ nǔ e ɖɔ wɛ é ɖe é mɛ ǎ, bɔ xɛsi lɛ́ ɖo yě ɖi wɛ bónú yě ná kan nǔ byɔ́ ɛ.

33 Din ɔ, yě wá Kafaanawúmu. Bɔ ée yě ɖo xwégbe é ɔ, Jezu kanbyɔ́ yě ɖɔ: “Étɛ́ dɔn wɛ mi ka ɖe ɖo ali jí?” 34 Yě cí xwíí, ɖó hwenu e yě ɖo ali jí é ɔ, yě ɖo nǔ dɔn wɛ ɖo yěɖée tɛ́ntin, dó mɛ e hú gǎn mɛ bǐ é wú. 35 Énɛ́ ɔ, é jínjɔ́n ayǐ bo ylɔ́ mɛsɛ́dó 12 lɛ́, lobo ɖɔ nú yě ɖɔ: “Ényí mɛ ɖěbǔ ba ná nyí mɛ nukɔntɔn ɔ, é ɖó ná nyí mɛ gǔdo tɔn ɖo mi mɛ bǐ mɛ, bo ná nyí mɛsɛntɔ́ mi bǐ tɔn.” 36 É kplá vǐ kpɛví ɖokpó wá, bo sɔ́ ɛ ɖó te ɖo tɛ́ntin yětɔn, lobo kpl’así kɔ n’i bo ɖɔ nú yě ɖɔ: 37 “Mɛ ɖěbǔ e yí vǐ kpɛví lěhun ɖokpó ɖó nyǐkɔ ce wú é, yí nyi lɔmɔ̌; bɔ mɛ ɖěbǔ e yí mì é, yí nyiɖokpónɔ ǎ, amɔ̌, é lɛ́ yí Mɛ e sɛ́ mì dó é.”

38 Jaan ɖɔ n’i ɖɔ: “Mɛ̌si, mǐ mɔ mɛɖé bɔ é ɖo nyǐkɔ towe zán dó ɖo awǒvi lɛ́ nya ná wɛ, bɔ mǐ tɛ́n kpɔ́n bo ná gbɛ́ n’i, ɖó é ɖo mǐ xwedó wɛ ǎ wútu.” 39 Amɔ̌ Jezu ɖɔ: “Mi ma tɛ́n kpɔ́n bo ná gbɛ́ n’i ó, ɖó mɛ ɖěbǔ sixú bló nǔjíwǔ ɖo nyǐkɔ ce mɛ, bɔ énɛ́ gúdo tlóló ɔ, é ná ɖɔ xó nyanya dó wǔtu ce ǎ. 40 Ðó mɛ ɖěbǔ e ma klán gbe xá mǐ ǎ é ɖo jǐ mǐtɔn. 41 Bɔ mɛ ɖěbǔ e ná ná mi sin kɔ́fu ɖokpó, bónú mi ná nu, ɖó mi nyí Klísu tɔn wútu é ɔ, má ɖɔ nǔgbó nú mi, é ná ba ajɔ tɔn kpo ɖo ali ɖěbǔ nu ǎ. 42 Amɔ̌, mɛ ɖěbǔ e ná nyí afɔklɛ́nnú nú mɛ ɖokpó ɖo mɛ kpɛví élɔ́ lɛ́ e ɖi nǔ é mɛ é ɔ, é ná kpɔ́n te n’i hú ɖɔ è ní sɔ́ sé ɖaxó e tócí nɔ lílɛ́ é kplá kɔ n’i, bo sɔ́ ɛ nyi dó xu mɛ.

43 “Ényí alɔ towe nyí afɔklɛ́nnú nú we gbeɖé hǔn, sɛ́n síin. É ná kpɔ́n te nú we ɖɔ a ní nyí alɔkponɔ bo mɔ gbɛ hú ɖɔ a ní ɖó alɔ we bo ka yi Jeyɛ́nu* mɛ, é wɛ nyí myɔ e è ma sixú cí ǎ é mɛ. 44* —— 45 Ényí afɔ towe nyí afɔklɛ́nnú nú we hǔn, sɛ́n síin. É ná kpɔ́n te nú we ɖɔ a ní nyí afɔkponɔ bo mɔ gbɛ hú ɖɔ a ní ɖó afɔ we, bɔ è ka ná sɔ́ we nyi dó Jeyɛ́nu* mɛ. 46* —— 47 Ényí nukún towe nyí afɔklɛ́nnú nú we hǔn, sɔ́ nyi gbě. É ná kpɔ́n te nú we ɖɔ a ní ɖó nukún ɖokpó bo byɔ́ Axɔ́súɖuto Mawu tɔn mɛ hú ɖɔ a ní ɖó nukún we, bɔ è ka ná sɔ́ we nyi dó Jeyɛ́nu* mɛ, 48 fí e wě lɛ́ ma nɔ kú ɖe ǎ, bɔ myɔ ma nɔ cí ɖe ǎ é.

49 “Ðó zo wɛ nyí jɛ e è ná dó mɛ bǐ é. 50 Jɛ ɔ, nǔ ɖagbe wɛ, amɔ̌, ényí jɛ ma sɔ́ wá ɖó tɔ́n ǎ ɔ, étɛ́ mi ka ná zán dó bló bɔ é ná lɛ́ ɖó tɔ́n? Mi ní cí jɛ ɖɔhun, mi nɔ nɔ fífá mɛ xá miɖée lɛ́.”

10 É gosín fínɛ́ bo d’asá Judɛ́ɛn tɔ ɔ lobo wá Judée sín dogbó lɛ́ jí, bɔ mɛ lɛ́ lɛ́vɔ́ nyi ahwan wá gɔ̌n tɔn. Lěe é ko nyí walɔ tɔn gbɔn é ɔ, é lɛ́vɔ́ jɛ nǔ kplɔ́n yě jí. 2 Falizyɛn lɛ́ sɛ yá ɛ, bo ɖo linlin wɛ bo ná tɛn ɛ kpɔ́n, énɛ́ ɔ, yě kanbyɔ́ ɛ ɖɔ é ka sɔgbe xá sɛ́n ɖɔ súnnu ní gbɛ́ asi tɔn a jí. 3 É yí gbe nú yě ɖɔ: “Étɛ́ Mɔyízi ka ɖɔ mi ní bló?” 4 Yě ɖɔ: “Mɔyízi ná gbe ɖɔ è ní wlán mɛgbígbɛ́wéma d’así n’i bo gbɛ́ ɛ.” 5 Jezu ka ɖɔ nú yě ɖɔ: “Ayi mitɔn e syɛ́n é wú wɛ é wlán sɛ́n énɛ́ nú mi. 6 É ɖo mɔ̌ có, sín bǐbɛ́mɛ nǔɖíɖó lɛ́ tɔn ɔ, ‘Mawu* bló yě súnnu kpó nyɔ̌nu kpó. 7 Ðó hwɛjijɔ énɛ́ wú ɔ, súnnu ná jó tɔ́ tɔn kpó nɔ tɔn kpó dó, 8 bɔ yě mɛ we lɛ́ ná nyí agbaza ɖokpó.’ Énɛ́ wú ɔ, yě sɔ́ ɖo mɛ we nyí wɛ ǎ, loɔ, agbaza ɖokpó wɛ yě nyí. 9 Hǔn, nǔ e Mawu dɔn cá é* ɔ, mɛ ɖěbǔ ní ma klán ó.” 10 Ée yě lɛ́vɔ́ wá xwégbe é ɔ, ahwanvú lɛ́ jɛ nǔ kanbyɔ́ ɛ dó énɛ́ wú jí. 11 É ɖɔ nú yě ɖɔ: “Mɛ ɖěbǔ e gbɛ́ asi tɔn bo da nyɔ̌nu ɖěvo é ɔ, aga wɛ é lɛ bo gba acɛ nyɔ̌nu nukɔntɔn ɔ wú. 12 Mɔ̌ ɖokpó ɔ, ényí nyɔ̌nu ɖé gbɛ́ asú tɔn gbeɖé, bo da súnnu ɖěvo ɔ, afɔ wɛ é dó gbě.”

13 Din ɔ, mɛ lɛ́ jɛ vǐ kpɛví lɛ́ kplá wá n’i jí bónú é ná ɖó alɔ yě wú, amɔ̌, ahwanvú lɛ́ gbɛ́ nǔ nú yě. 14 Ée Jezu mɔ mɔ̌ é ɔ, xomɛ sin i bɔ é ɖɔ nú yě ɖɔ: “Mi jó vǐ kpɛví lɛ́ dó bónú yě ní wá gɔ̌n ce; mi ma tɛ́n kpɔ́n bo sú ali dó yě ó, ɖó mɛ e cí yě ɖɔhun lɛ́ é tɔn wɛ nyí Axɔ́súɖuto Mawu tɔn. 15 Má ɖɔ nǔgbó nú mi, mɛ ɖěbǔ e ma ná yí Axɔ́súɖuto Mawu tɔn vǐ kpɛví ɖɔhun ǎ é, ná byɔ́ mɛ gbeɖé ǎ.” 16 Énɛ́ ɔ, é zé vǐ lɛ́ dó awa tɔn lɛ́ mɛ bo ɖó alɔ yě jí, lobo jɛ nyɔ̌ná byɔ́ dó yě jí jí.

17 Ée é ɖo ali jí bo ɖo yiyi wɛ é ɔ, nya ɖé kán wezun bo wá jɛ kpo ɖo nukɔn tɔn, lobo kanbyɔ́ ɛ ɖɔ: “Mɛ̌si ɖagbe, étɛ́ un ka ɖó ná wa bo ná ɖu gbɛ mavɔmavɔ sín gǔ?” 18 Jezu ɖɔ n’i ɖɔ: “Étɛ́wú a ka ylɔ́ mì ɖɔ mɛ ɖagbe? Mɛ ɖěbǔ nyí mɛ ɖagbe zɛ Mawu ɖokpónɔ wú ǎ. 19 A tuun sɛ́n lɛ́: ‘Ma hu mɛ ó, ma dó afɔ gbě alǒ ba nyɔ̌nu ɖěvo ó, ma ja ajo ó, ma ɖe kúnnu agɔ ó, ma hízí nǔ ó, wlǐ yɛ̌yi nú tɔ́ towe kpó nɔ towe kpó.’” 20 Nya ɔ ka ɖɔ n’i ɖɔ: “Sín vǔ ce wɛ un ko nɔ nyi sɛ́n énɛ́ lɛ́ bǐ.” 21 Jezu kpɔ́n ɛ, bɔ ɖó é yí wǎn n’i wútu ɔ, é ɖɔ: “Nǔ ɖokpó wɛ hwe dó we: Yi, bo sa nǔ e a ɖó lɛ́ é bo ná akwɛ́ ɔ wamamɔnɔ lɛ́, énɛ́ ɔ, a ná ɖó dɔkun ɖo jǐxwé; énɛ́ gúdo hǔn, wǎ bo xwedó mì.” 22 Amɔ̌, wǔ kú i ɖó xósin ɔ wú bɔ é ɖidó wǔbláwúblá, ɖó é ɖó nǔɖókan gěgé wútu.

23 Ée Jezu kpɔ́n mɛ e lɛ́ lɛ̌ dó è lɛ́ é gúdo é ɔ, é ɖɔ nú ahwanvú tɔn lɛ́ ɖɔ: “É ná vɛ́ wǔ nú akwɛ́nɔ lɛ́ tawun bónú yě ná byɔ́ Axɔ́súɖuto Mawu tɔn mɛ.” 24 Amɔ̌, xó tɔn kpácá ahwanvú lɛ́. Énɛ́ ɔ, Jezu ɖɔ: “Vǐ ce lɛ́ mi, é vɛ́ wǔ tawun ɖɔ è ní byɔ́ Axɔ́súɖuto Mawu tɔn mɛ. 25 É ná bɔ wǔ nú lǎkúnmí bɔ é ná gbɔn nyɛ̌ví sín ali nu hú ɖɔ dɔkunnɔ ní byɔ́ Axɔ́súɖuto Mawu tɔn mɛ.” 26 É lɛ́ kpácá yě tawun bɔ yě ɖɔ n’i* ɖɔ: “Mɛ̌ è ka sixú hwlɛ́n gán lo?” 27 Jezu ɖo yě kpɔ́n wɛ dáán bo ɖɔ: “É gló gbɛtɔ́ lɛ́, amɔ̌, é ka ɖo mɔ̌ nú Mawu ǎ, ɖó nǔ ɖěbǔ gló Mawu ǎ.” 28 Piyɛ́ɛ jɛ ɖiɖɔ n’i jí ɖɔ: “Mǐ ɖíe jó nǔ bǐ dó bo xwedó we è.” 29 Jezu ɖɔ: “Má ɖɔ nǔgbó nú mi, mɛ ɖěbǔ e jó xwé, alǒ nɔví súnnu, alǒ nɔví nyɔ̌nu, alǒ nɔ, alǒ tɔ́, alǒ vǐ, alǒ gle dó, ɖó nyɛ kpó wɛn ɖagbe ɔ kpó wútu é, 30 ná mɔ xwé, nɔví súnnu, nɔví nyɔ̌nu, nɔ, vǐ kpó gle kpó donu 100 ɖo hwe élɔ́ nu din, gɔ́ nú yadónúmɛ lɛ́; bɔ ɖo gbɛ* e ja é mɛ ɔ, é ná mɔ gbɛ mavɔmavɔ. 31 Amɔ̌, mɛ e ɖo nukɔn din lɛ́ é gěgé ná wá gbɔn gǔdo, bɔ mɛ e ɖo gǔdo din lɛ́ é gěgé ná wá jɛ nukɔn.”

32 Din ɔ, yě ɖo ali jí xwe Jeluzalɛ́mu, bɔ Jezu ɖo yiyi wɛ ɖo nukɔn yětɔn, lobɔ é kpácá yě tawun, amɔ̌, mɛ ɖěɖěe xwedó yě lɛ́ é jɛ xɛsi ɖi jí. É lɛ́ kplá mɛsɛ́dó 12 lɛ́ jɛ vo, bo jɛ nǔ e ɖo nǎ jɛ dó wǔ tɔn wɛ lɛ́ é ɖɔ nú yě jí. É ɖɔ: 33 “Mǐ ɖíe xwe Jeluzalɛ́mu è, bɔ è ná jó Gbɛtɔ́ví ɔ nú vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó. Yě ná ɖó kúhwɛ n’i; yě ná jó è nyi mɛ e ɖo akɔta ɖě lɛ́ mɛ lɛ́ é sín alɔ mɛ, 34 bɔ yě mɛ énɛ́ lɛ́ ná cá ɛ ko, tún atán dó wǔ tɔn, sɔ́ lanbá dó xo è ná, bo hu i, amɔ̌, azǎn atɔn gúdo ɔ, é ná fɔ́n.”

35 Jaki kpó Jaan kpó, éé nyí vǐ súnnu Zebeɖée tɔn lɛ́ é sɛkpɔ́ ɛ, bo ɖɔ n’i ɖɔ: “Mɛ̌si, nǔ ɖěbǔ e mǐ ná byɔ́ we é ɔ, mǐ jló ɖɔ a ní wa nú mǐ.” 36 É ɖɔ nú yě ɖɔ: “Étɛ́ mi ka ba ɖɔ má wa nú mi?” 37 Yě yí gbe ɖɔ: “Nǎ gbe mǐ bónú mɛ ɖokpó ná jínjɔ́n ɖisí towe xwé, bɔ mɛ wegɔ́ ɔ ná jínjɔ́n amyɔ towe xwé, hwenu e a ná ɖo susu towe mɛ é.” 38 Amɔ̌, Jezu yí gbe nú yě ɖɔ: “Mi tuun nǔ e byɔ́ wɛ mi ɖe é ǎ. Mi ka sixú nu kɔ́fu e nu wɛ un ɖe é, alǒ bló batɛ́mu e bló nú mì wɛ è ɖe é a?” 39 Yě ɖɔ n’i ɖɔ: “Mǐ ná kpé wú.” Énɛ́ ɔ, Jezu ɖɔ nú yě ɖɔ: “Kɔ́fu e nu wɛ un ɖe é ɔ, mi ná nu, bɔ batɛ́mu e bló nú mì wɛ è ɖe é ɔ, è ná bló nú mi. 40 É ɖo mɔ̌ có, nú è ná jínjɔ́n ɖisí ce xwé, alǒ amyɔ ce xwé ɔ, nyi wɛ ná ɖɔ ǎ; mɛ ɖěɖěe è ko sɔ́ nǔ tɔn ɖ’ayǐ ná lɛ́ é tɔn wɛ.”

41 Hwenu e yě mɛ wǒ ɖě lɛ́ se xó ɔ é ɔ, xomɛ sin yě dó Jaki kpó Jaan kpó wú. 42 Amɔ̌, Jezu ylɔ́ yě bo ɖɔ nú yě ɖɔ: “Mi tuun ɖɔ mɛ ɖěɖěe è nɔ kpɔ́n dó mɔ* acɛkpatɔ́ akɔta lɛ́ tɔn lɛ́ é nɔ bló gǎn nú yě, bɔ mɛ e ɖo tɛn ɖaxó mɛ lɛ́ é nɔ sɔ́ yě ɖó acɛ yětɔn glɔ́. 43 Nǔ ɖó ná nyí mɔ̌ ɖo tɛ́ntin mitɔn ǎ; é nyɔ́ wa ɔ, mɛ ɖěbǔ e ba ná ɖó acɛ hú mɛ bǐ ɖo tɛ́ntin mitɔn é ɖó ná nyí mɛsɛntɔ́ mitɔn, 44 bɔ mɛ ɖěbǔ e ba bo ná nyí mɛ nukɔntɔn ɖo tɛ́ntin mitɔn é ɖó ná nyí mɛsɛntɔ́ mi bǐ tɔn. 45 Ðó Gbɛtɔ́ví ɔ ɖésú tlɛ wá, bónú è ná sɛn ɛ ǎ, loɔ, bónú é ná sɛn mɛ, lobo sɔ́ gbɛ* tɔn jó dó xɔ gbɛ nú mɛ gěgé.”

46 Énɛ́ gúdo ɔ, yě wá Jelíko. Amɔ̌, ée é kpó ahwanvú tɔn lɛ́ kpó, gɔ́ nú ahwan ɖaxó ɖé ɖo tíntɔ́n sín Jelíko wɛ é ɔ, Baatimɛ́ɛ (vǐ súnnu Timɛ́ɛ tɔn), éé nyí nukúntɔ́nnɔ nǔbyɔ́ɖutɔ́ é ɖo ayǐjínjɔ́n ɖo ali ɔ kpá. 47 Ée é se ɖɔ Jezu Nazalɛ́tinu ɔ wɛ é ɔ, é jɛ xó sú jí bo nɔ ɖɔ: “Jezu Davídi ví, kú nǔbláwǔ nú mì!” 48 Énɛ́ ɔ, mɛ gěgé jɛ nǔ gbɛ́ n’i jí, bo nɔ ɖɔ n’i ɖɔ é ní cí xwíí, amɔ̌, é nɔ lɛ́ sú xó d’é jí ɖɔ: “Davídi Ví, kú nǔbláwǔ nú mì!” 49 Énɛ́ wú ɔ, Jezu nɔ te bo ɖɔ: “Mi ylɔ́ ɛ wá nú mì.” Yě ylɔ́ nya nukúntɔ́nnɔ ɔ bo ɖɔ n’i ɖɔ: “Kpan akɔ́n! Sí te; é ɖo yǐylɔ́ we wɛ.” 50 É ɖe awu tɔn aga tɔn ɔ nyi gbě, bo lɔ́n sí te lobo ɖidó Jezu gɔ́n. 51 Énɛ́ ɔ, Jezu ɖɔ n’i ɖɔ: “Étɛ́ a ka jló ɖɔ má wa nú we?” Nya nukúntɔ́nnɔ ɔ ɖɔ n’i ɖɔ: “Mɛ̌si,* blǒ bónú má lɛ́ mɔ nǔ.” 52 Bɔ Jezu ɖɔ n’i ɖɔ: “Yi. Nǔɖiɖi towe gbɔ azɔn nú we.” Tlóló ɔ, é lɛ́vɔ́ mɔ nǔ bo jɛ xwixwedó è jí.

11 Din ɔ, ée yě ɖo Jeluzalɛ́mu, Bɛtifajée kpó Betaníi kpó sɛkpɔ́ wɛ, bo jɛ Olívutín só ɔ kɔn é ɔ, é sɛ́ ahwanvú tɔn lɛ́ we dó, 2 bo ɖɔ nú yě ɖɔ: “Mi yi gletoxo e mɔ sɛ́dó wɛ mi ɖe nɛ́ é mɛ; ényí mi byɔ́ mɛ tlóló ɔ, mi ná mɔ tócíví ɖé ɖo sinsin bɔ mɛ ɖěbǔ ko jínjɔ́n jí kpɔ́n ǎ. Mi tún i bo kplá ɛ wá fí. 3 Ényí mɛ ɖěbǔ ɖɔ nú mi ɖɔ: ‘Étɛ́wú mi ka ɖo mɔ̌ wa wɛ?’ hǔn, mi ɖɔ: ‘Aklúnɔ ɖó hudó tɔn, é ka ná lɛ́ kɔ ná sɛ́dó fí dó yǐyá mɛ.’” 4 Énɛ́ ɔ, yě yi, bo mɔ tócíví ɔ ɖo sinsin ɖo hɔn ɖé to ɖo toxomɛli ɔ jí, lobo tún i. 5 Amɔ̌, mɛ e ɖo te ɖo fínɛ́ é ɖé lɛ́ ɖɔ nú yě ɖɔ: “Étɛ́wú mi ka ɖo tócíví ɔ tún wɛ?” 6 Yě ɖɔ nǔ e Jezu ɖɔ é pɛ́ɛ́ nú yě, bɔ mɛ lɛ́ jó yě dó.

7 Yě kplá tócíví ɔ wá nú Jezu, bo tɛ́ awu aga tɔn yětɔn lɛ́ d’é jí, bɔ é jínjɔ́n jí. 8 Gɔ́ ná ɔ, mɛ gěgé tɛ́ awu aga tɔn yětɔn lɛ́ dó ali ɔ jí, amɔ̌, mɛ ɖěvo lɛ́ gbo ama sín gle lɛ́ mɛ, bo tɛ́ kɔn nyi ali ɔ jí. 9 Mɛ ɖěɖěe ɖo yiyi wɛ ɖo nukɔn lɛ́ é kpó mɛ ɖěɖěe jawě ɖo gǔdo lɛ́ é kpó ɖo xó sú wɛ bo nɔ ɖɔ: “Mawu, mǐ ɖo vo sa nú we wɛ, hwlɛ̌n ɛ! Nǔ nyɔ́ nú mɛ e wá ɖo Jexóva* nyíkɔ mɛ é! 10 Nǔ nyɔ́ nú tɔ́ mǐtɔn Davídi sín axɔ́súɖuto e jawě é! Hwlɛ̌n ɛ, mǐ ɖo vo sa nú we wɛ, hwi mɛ e ɖo jǐ aga é!” 11 É byɔ́ Jeluzalɛ́mu bo yi tɛ́npli ɔ mɛ, lobo kpɔ́n nǔ lɛ́ bǐ lɛ́ lɛ̌ dó, amɔ̌, ée ganmɛ ko yi é ɔ, é tɔ́n bo yi Betaníi, é kpó mɛsɛ́dó 12 lɛ́ kpó.

12 Ayǐhɔ́ngbe tɔn e yě ɖo Betaníi gosín wɛ é ɔ, xovɛ́ sin i. 13 É ɖo zɔ bo mɔ fígitín e jí ama ɖe é ɖé sɛ́dó. Énɛ́ ɔ, é ɖidó atín ɔ sá, bo ná kpɔ́n ɖɔ émí ná mɔ nǔɖé ɖ’é jí a jí. Amɔ̌, ée é wá atín ɔ sá é ɔ, é mɔ nǔɖé zɛ ama lɛ́ wú ǎ, ɖó hwenu e fígi nɔ sɛ́n é wɛ ǎ. 14 Énɛ́ ɔ, é ɖɔ nú fígitín ɔ ɖɔ: “Sínsɛ́n ɖě ní ma sɔ́ nyɔ́ ɖo jǐ towe gbeɖé bónú mɛ ɖěbǔ ná ɖu ó.” Ahwanvú tɔn lɛ́ ka ɖo tó ɖó è wɛ.

15 Din ɔ, yě wá Jeluzalɛ́mu. Ðo fínɛ́ ɔ, é byɔ́ tɛ́npli ɔ mɛ bo jɛ mɛ e ɖo nǔ sa wɛ ɖo tɛ́npli ɔ mɛ lɛ́ é, kpó mɛ e ɖo nǔ xɔ ɖ’é mɛ wɛ lɛ́ é kpó nya tɔ́n jí, lobo flí akwɛ́ɖyɔ́tɔ́ lɛ́ sín távo kpó mɛ e ɖo ahwannɛ́ sa wɛ lɛ́ é sín zinkpo kpó xwe. 16 É lɔn bónú mɛ ɖěbǔ hɛn nǔtí gbɔn tɛ́npli ɔ mɛ ǎ. 17 É ɖo nǔ kplɔ́n yě wɛ bo nɔ ɖɔ nú yě ɖɔ: “È ko wlán ɖɔ: ‘Xwé ce ɔ, ɖɛxwé wɛ é ná nyí nú akɔta lɛ́ bǐ’ ǎ cé? Bɔ midɛɛ lɛ́ ka sɔ́ dó ɖó ajotɔ́ lɛ́ sín avatɛn ná.” 18 Vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó se xó énɛ́ bo jɛ lěe yě ná hu i gbɔn é ba jí; yě ɖo xɛsi ɖi n’i wɛ, ɖó nǔkplɔ́nmɛ tɔn nɔ jí wǔ nú ahwan ɔ bǐ.

19 Ée é su gbadanu cawun é ɔ, yě tɔ́n sín toxo ɔ mɛ. 20 Amɔ̌, ayǐhɔ́ngbe tɔn e yě ɖo dǐndín wɛ zǎnzǎn tɛɛn é ɔ, yě mɔ fígitín ɔ bɔ é ko xú bǐ káká yi dó ɖɔ. 21 Piyɛ́ɛ flín atín ɔ, bo ɖɔ nú Jezu ɖɔ: “Mɛ̌si,* kpɔ́n! Fígitín e a dó nu é xú.” 22 Jezu yí gbe nú yě ɖɔ: “Mi ɖi nǔ nú Mawu. 23 Má ɖɔ nǔgbó nú mi, mɛ ɖěbǔ e ɖɔ nú só élɔ́ ɖɔ: ‘Hɔn hwiɖée sín fí bo yi jɛ xu mɛ,’ bo ma xo nǔ kpɔ́n ɖo ayi tɔn mɛ ǎ, lobo ɖi nǔ ɖɔ nǔ e émí ɖɔ é ná jɛ é ɔ, é ná jɛ. 24 Énɛ́ wú wɛ un ɖɔ nú mi ɖɔ, nǔ e mi ná xo ɖɛ bo ná byɔ́ lɛ́ é bǐ ɔ, mi ní ɖi nǔ ɖɔ émí ná mɔ yí, mi ka ná mɔ yí nǔgbó. 25 Ényí mi ɖo te bo ɖo ɖɛ xo wɛ hǔn, mi sɔ́ nǔ ɖěbǔ e mɛ ɖěbǔ wa nyi do nú mi é kɛ ɛ, énɛ́ ɔ, Tɔ́ mitɔn e ɖo jǐxwé é lɔ ná sɔ́ nǔwanyido mitɔn lɛ́ kɛ mi.” 26* ——

27 Yě lɛ́vɔ́ wá Jeluzalɛ́mu. Bɔ ée é ɖo zɔnlin ɖi wɛ ɖo tɛ́npli ɔ mɛ é ɔ, vɔ̌sánúxwlémawutɔ́gán lɛ́, sɛ́nkplɔ́nmɛtɔ́ lɛ́ kpó tomɛxó lɛ́ kpó wá, 28 bo ɖɔ n’i ɖɔ: “Acɛ tɛ́ a ka sɔ́ dó ɖo nǔ énɛ́ lɛ́ bló ná wɛ? Alǒ mɛ̌ ka ná acɛ énɛ́ ɔ we ɖɔ a ní wa nǔ énɛ́ lɛ́?” 29 Jezu ɖɔ nú yě ɖɔ: “Un ná kan nǔ ɖokpó byɔ́ mi. Mi ná sin tɔn mì, énɛ́ ɔ, un ná ɖɔ acɛ e un sɔ́ dó ɖo nǔ énɛ́ lɛ́ wa ná wɛ é nú mi. 30 Mawu e ɖo jǐxwé é wɛ sɛ́ Jaan dó ɖɔ é ní bló batɛ́mu nú mɛ lɛ́ a alǒ gbɛtɔ́ lɛ́? Mi ná sin tɔn mì.” 31 Énɛ́ ɔ, yě jɛ ɖiɖɔ jí ɖo yěɖée lɛ́ tɛ́ntin ɖɔ: “Ényí mǐ ɖɔ: ‘Mawu e ɖo jǐxwé é wɛ’ ɔ, é ná ɖɔ: ‘Étɛ́wú mi ma ka ɖi nǔ n’i ǎ lo?’ 32 Amɔ̌, ényí mǐ glá bo ɖɔ: ‘Gbɛtɔ́ lɛ́ wɛ’ ɔ, étɛ́ ka ná jɛ dó mǐ wú?” Yě ɖo xɛsi ɖi nú ahwan ɔ wɛ, ɖó yě bǐ wɛ nɔ kpɔ́n Jaan dó mɔ gbeyíɖɔ jɔ gbeyíɖɔ. 33 Énɛ́ wú ɔ, yě yí gbe nú Jezu ɖɔ: “Mǐ tuun ǎ.” Jezu ɖɔ nú yě ɖɔ: “Nyi lɔ ɖo acɛ e un sɔ́ dó ɖo nǔ énɛ́ lɛ́ wa ná wɛ é ná ɖɔ nú mi wɛ ǎ.”

12 Énɛ́ gúdo ɔ, Jezu zán nǔjlɛ́dónǔwú lɛ́ dó jɛ xó ɖɔ nú yě jí: “Nya ɖé ɖó vǐwungbo bo dó kpá lɛ́ lɛ̌ dó. É lɛ́ kun vǐwunto ɖokpó nyi gle ɔ mɛ, lobo lɛ́ mɛ atɔxwɛ ɖokpó nyi gle ɔ mɛ; énɛ́ gúdo ɔ, é xáya gle ɔ nú glesi lɛ́ bo yi tomɛ. 2 Ée vǐwun gbigbɛ hwenu su é ɔ, é sɛ́ mɛsɛntɔ́ ɖokpó dó glesi lɛ́, bónú é ná yi yí sínsɛ́n vǐwungbo ɔ tɔn lɛ́ ɖě wá ɖo yě sí. 3 Amɔ̌, yě wlí i, bo xo è lobo lɛ́ kɔ n’i asígbá alɔgbá. 4 É lɛ́vɔ́ sɛ́ mɛsɛntɔ́ ɖěvo dó yě, bɔ yě zin nǔ dó ta nú éyɛ́ bo kɔ́n wi tɔn. 5 É sɛ́ mɛ ɖěvo dó bɔ yě hu éyɛ́; é sɛ́ mɛ gěgé ɖěvo lɛ́ dó bɔ yě xo yě mɛ ɖé lɛ́, bo hu yě mɛ ɖé lɛ́. 6 Énɛ́ gúdo ɔ, vǐwunglenɔ ɔ sɛ́ vǐ vívɛ́ná tɔn dó yě bo ɖɔ: ‘Yě ná ɖó sísí nú vǐ súnnu ce.’ 7 Amɔ̌, glesi énɛ́ lɛ́ ɖɔ ɖo yěɖée lɛ́ tɛ́ntin ɖɔ: ‘Gǔɖutɔ́ ɔ ɖíe. Mi wá bónú mǐ ní hu i, énɛ́ ɔ, gǔ ɔ ná nyí mǐtɔn.’ 8 Énɛ́ ɔ, yě wlí i bo hu i, lobo dɔn ɛ sín vǐwungbo ɔ mɛ. 9 Étɛ́ vǐwunglenɔ ɔ ka ná wa? É ná wá bo ná hu glesi lɛ́, lobo ná sɔ́ vǐwungbo ɔ dó alɔ mɛ nú mɛ ɖěvo lɛ́. 10 Mi xa nǔwlánwlán mímɛ́ élɔ́ kpɔ́n ǎ cé? É wɛ nyí ɖɔ: ‘Awǐnnya e xɔmɛtɔ́ lɛ́ xo nyi kɛ́n é, wɛ wá húzú awǐnnya zwe jí tɔn tají ɔ. 11 Jexóva* gɔ́n wɛ awǐnnya énɛ́ gosín bo jí wǔ ɖo nukún mǐtɔn mɛ.’”

12 Ée é ɖɔ mɔ̌ é ɔ, yě jló ná wlí i* ɖó yě mɔ nǔ jɛ wú ɖɔ xó émítɔn ɖɔ wɛ é ɖe ɖo nǔjlɛ́dónǔwú ɔ mɛ, amɔ̌, yě ɖi xɛsi nú ahwan ɔ. Énɛ́ wú ɔ, yě jó è dó bo ɖidó.

13 Énɛ́ gúdo ɔ, yě sɛ́ Falizyɛn ɖé lɛ́ kpó mɛ e ɖo toxóɖɔgbɛ́ Elódu tɔn mɛ é ɖé lɛ́ kpó dó è, bónú yě ná mɔ tɛn dó wlí i ɖo xó tɔn lɛ́ mɛ. 14 Ée yě wá é ɔ, yě ɖɔ n’i ɖɔ: “Mɛ̌si, mǐ tuun ɖɔ a nɔ ɖɔ nǔgbó, a nɔ ba ná nyɔ́ ɖo gbɛtɔ́ sí ǎ, ɖó a nɔ kpɔ́n lěe mɛ lɛ́ ɖe ɖo wěxo é ǎ wútu, é nyɔ́ wa ɔ, a nɔ kplɔ́n ali Mawu tɔn mɛ sɔgbe xá nǔgbó ɔ. É sɔgbe xá sɛ́n ɖɔ* è ní sú takwɛ́ Sezáa wɛ a, alǒ é sɔgbe ǎ? 15 Mǐ ɖó ná sú wɛ a, alǒ mǐ ɖó ná sú ǎ?” Ée Jezu ɖó ayi yɛmɛnúwiwa yětɔn wú é ɔ, é ɖɔ nú yě ɖɔ: “Étɛ́wú mi ka ɖo tíntɛ́n mì kpɔ́n wɛ? Mi sɔ́ deníye* ɖokpó wá nú mì bónú má kpɔ́n.” 16 Yě sɔ́ ɖokpó wá, bɔ é ɖɔ nú yě ɖɔ: “Ðiɖe mɛ̌ tɔn kpó nyǐkɔ mɛ̌ tɔn kpó ka ɖíe?” Yě ɖɔ n’i ɖɔ: “Sezáa tɔn wɛ.” 17 Énɛ́ ɔ, Jezu ɖɔ: “Mi sɔ́ nǔ e nyí Sezáa tɔn lɛ́ é jó nú Sezáa, bo sɔ́ nǔ e nyí Mawu tɔn lɛ́ é jó nú Mawu.” Xó tɔn jí wǔ nú yě.

18 Din ɔ, Saduseɛn lɛ́ wá gɔ̌n tɔn. (Saduseɛn lɛ́ ɖi nǔ nú fínfɔ́n sín kú ǎ.) Yě kanbyɔ́ ɛ ɖɔ: 19 “Mɛ̌si, Mɔyízi ko wlán ɖ’ayǐ nú mǐ ɖɔ ényí mɛɖé kú jó asi tɔn dó, lobo ma ka ɖó vǐ ɖě ǎ ɔ, nɔví tɔn ɖó ná sɔ́ asúkúsi ɔ da bo ɖó vǐ donu n’i. 20 Nɔví nɔví tɛ́nwe ɖé lɛ́ ka tíin ɖ’ayǐ. Mɛ nukɔntɔn ɔ da asi, amɔ̌, é ka ɖó vǐ ɖě cóbó kú ǎ. 21 Mɛ wegɔ́ ɔ sɔ́ nyɔ̌nu ɔ da, amɔ̌, élɔ́ ɖó vǐ ɖě donu cóbó kú ǎ, bɔ mɛ atɔngɔ́ ɔ lɔ wa nǔ ɖokpó ɔ. 22 Bɔ yě mɛ tɛ́nwe lɛ́ ɖěbǔ ɖó vǐ donu cóbó kú ǎ. Gǔdo mɛ ɔ, nyɔ̌nu ɔ lɔ wá kú. 23 Ðo fínfɔ́n sín kú hwenu ɔ, mɛ̌ tɔn nyɔ̌nu ɔ ka ná nyí? É ɖíe ko nyí asi nú yě mɛ tɛ́nwe lɛ́ kpɔ́n è.” 24 Jezu ɖɔ nú yě ɖɔ: “É ma nyí Nǔwlánwlán mímɛ́ lɛ́ e mi ma tuun ǎ é, gɔ́ nú hlɔ̌nhlɔ́n Mawu tɔn e mi ma tuun ǎ é wútu wɛ mi ɖo ali bú wɛ ǎ cé? 25 Ðó hwenu e mɛ lɛ́ ná fɔ́n sín kú é ɔ, súnnu lɛ́ ná da asi ǎ, è ka ná ná nyɔ̌nu lɛ́ asú ǎ, loɔ, yě ná cí wɛnsagun e ɖo jǐxwé lɛ́ é ɖɔhun. 26 Amɔ̌, nú nǔ e kan fínfɔ́n sín kú mɛkúkú lɛ́ tɔn é ɔ, mi xa xó e Mawu ɖɔ nú Mɔyízi é ɖo wěma Mɔyízi tɔn mɛ, ɖo tan e kunkplá wunkan ɔ é mɛ ǎ cé? É ɖɔ: ‘Un nyí Mawu Ablaxámu tɔn, Mawu Izáki tɔn, Mawu Jakɔ́bu tɔn.’ 27 É nyí Mawu mɛkúkú lɛ́ tɔn ǎ, loɔ, mɛ e ɖo gbɛ lɛ́ é tɔn wɛ. Ali bú wɛ mi ɖe ɖaxó.”

28 Sɛ́nkplɔ́nmɛtɔ́ lɛ́ ɖokpó wá bo se bɔ yě ɖo nǔ dɔn wɛ, bɔ ɖó é tuun ɖɔ Jezu ko ná xósin e sɔgbe é yě wútu ɔ, é kanbyɔ́ ɛ ɖɔ: “Sɛ́n tɛ́ ka nyí nukɔntɔn* ɔ ɖo sɛ́n lɛ́ bǐ mɛ?” 29 Jezu yí gbe n’i ɖɔ: “Sɛ́n nukɔntɔn ɔ ɖíe: ‘Izlayɛ́li è, ɖǒtó, Jexóva* Mawu mǐtɔn ɔ, Jexóva* ɖokpó wɛ, 30 bɔ a ɖó ná yí wǎn nú Jexóva* Mawu towe kpó ayi towe bǐ kpó, kpó lǐndɔ̌n* towe bǐ kpó, kpó linlin towe bǐ kpó, kpó hlɔ̌nhlɔ́n towe bǐ kpó.’ 31 Wegɔ́ ɔ ɖíe: ‘A ɖó ná yí wǎn nú nɔzo towe hwiɖésúnɔ ɖɔhun.’ Sɛ́n ɖěvo ɖěbǔ ɖe bo hú gǎn sɛ́n énɛ́ lɛ́ ǎ.” 32 Sɛ́nkplɔ́nmɛtɔ́ ɔ ɖɔ n’i ɖɔ: “Mɛ̌si, a ɖɔ xó ɖó ganjí, bɔ é sɔgbe xá nǔgbó ɔ: ‘Mawu ɖokpó wɛ tíin, bɔ ɖěvo sɔ́ ɖe zɛ éyɛ́ wú ǎ.’ 33 Bɔ ényí è yí wǎn n’i kpó ayi mɛtɔn bǐ kpó, kpó nukúnnúmɔjɛnǔmɛ mɛtɔn bǐ kpó, kpó hlɔ̌nhlɔ́n mɛtɔn bǐ kpó, bo yí wǎn nú nɔzo mɛtɔn mɛɖésúnɔ ɖɔhun ɔ, é xɔ akwɛ́ hú nǔníná e è nɔ dó blěbú tɔn zo lɛ́ é kpó vɔ̌sísá lɛ́ kpó bǐ flaflá tɔn.” 34 Jezu mɔ ɖɔ é ná xósin e nǔnywɛ́ kpé é, énɛ́ wú ɔ, é ɖɔ n’i ɖɔ: “A lín dó Axɔ́súɖuto Mawu tɔn ǎ.” Mɛ ɖěbǔ ka sɔ́ glá bo kan nǔɖé byɔ́ ɛ ǎ.

35 É ɖo mɔ̌ có, ée Jezu kpo ɖo nǔ kplɔ́n mɛ wɛ ɖo tɛ́npli ɔ mɛ é ɔ, é kanbyɔ́ ɖɔ: “Nɛ̌ ka gbɔn bɔ sɛ́nkplɔ́nmɛtɔ́ lɛ́ nɔ ɖɔ ɖɔ Klísu ɔ nyí Davídi ví? 36 Gbɔn gbigbɔ mímɛ́ gblamɛ ɔ, Davídi ɖésúnɔ ɖɔ: ‘Jexóva* ɖɔ nú Aklúnɔ ce ɖɔ: “Jǐnjɔ́n ɖisí ce xwé káká jɛ hwenu e un ná bɛ́ kɛntɔ́ towe lɛ́ dó afɔ towe lɛ́ glɔ́ é.”’ 37 Davídi ɖésúnɔ ylɔ́ ɛ ɖɔ Aklúnɔ, énɛ́ wú ɔ, nɛ̌ é ka sixú lɛ́ nyí vǐ tɔn gbɔn?”

Ahwan ɖaxó ɔ ka ɖo tó ɖó è wɛ kpó xomɛhunhun kpó. 38 É yi nukɔn ɖo nǔ e kplɔ́n mɛ wɛ é ɖe é mɛ bo ɖɔ: “Mi cɔ́ miɖée dó sɛ́nkplɔ́nmɛtɔ́ lɛ́ wú. Yě nɔ ɖo yiyi kpé wɛ ɖo awu gaga lɛ́ mɛ, bo nɔ ba ɖɔ mɛ ɖěvo lɛ́ ní dó gbe émí kpó sísí kpó ɖo axi lɛ́ mɛ. 39 Yě nɔ ba zinkpo nukɔntɔn* e ɖo kplɔ́ngbasá lɛ́ é, bo nɔ ba tɛn nukúnɖéjí hú gǎn lɛ́ ɖo agɔ̌ lɛ́ jí. 40 Yě nɔ klá jɛ asúkúsi lɛ́ sín nǔɖókan lɛ́ nu,* bo nɔ xo ɖɛ gaga lɛ́ bónú è ná dó ɖó ayi yě wú. Hwɛ e è ná ɖó nú yě é ná syɛ́n tawun.”

41 É jínjɔ́n ayǐ bo kpan nukɔn akwɛ́gbá lɛ́, bo jɛ lěe ahwan ɔ ɖo akwɛ́ bɛ́ dó akwɛ́gbá lɛ́ mɛ wɛ gbɔn é kpɔ́n jí, bɔ dɔkunnɔ gěgé ɖo gankwɛ́ gěgé bɛ́ dó yě mɛ wɛ. 42 Din ɔ, asúkúsi wamamɔnɔ ɖé wá bo sɔ́ gankwɛ́ kpɛví kpɛví e ma xɔ akwɛ́ sɔmɔ̌ ǎ é we* dó akwɛ́gbá ɔ mɛ. 43 Énɛ́ wú ɔ, Jezu ylɔ́ ahwanvú tɔn lɛ́ bo ɖɔ nú yě ɖɔ: “Má ɖɔ nǔgbó nú mi, asúkúsi wamamɔnɔ élɔ́ sɔ́ akwɛ́ dó akwɛ́gbá ɔ mɛ hú mɛ ɖě lɛ́ bǐ. 44 Ðó yědɛɛ lɛ́ ɔ, nǔ e yě ɖó bɔ é kpo ɖ’é jí lɛ́ é mɛ wɛ yě kpɔ́n dó ná nǔ, amɔ̌, éyɛ́ mɛ e nyí wamamɔnɔ tawun é ɔ, nǔ e é ɖó bo ná dó nɔ gbɛ é bǐ wɛ é ná.”

13 Ée é ɖo tíntɔ́n sín tɛ́npli ɔ mɛ wɛ é ɔ, ahwanvú tɔn lɛ́ ɖokpó ɖɔ n’i ɖɔ: “Mɛ̌si, kpɔ́n! Awǐnnya lɛ́ kpó xɔ tɛ́npli ɔ tɔn lɛ́ kpó jí wǔ mɛ!” 2 Jezu ka ɖɔ n’i ɖɔ: “A mɔ xɔ ɖaxó énɛ́ lɛ́ a? É ɖo wɛn ɖɔ awǐnnya e ɖo fí lɛ́ é ɖě tlɛ ná kpo ɖo ɖě jí ǎ, bǐ wɛ è ná mu.”

3 Ée é ɖo ayǐjínjɔ́n ɖo Olívutín só ɔ jí bo kpan nukɔn tɛ́npli ɔ é ɔ, Piyɛ́ɛ, Jaki, Jaan kpó Andlé kpó kanbyɔ́ ɛ ɖo nǔglɔ́ ɖɔ: 4 “Ðɔ nú mǐ, hwetɛ́nu nǔ énɛ́ lɛ́ ka ná jɛ? Étɛ́ ka ná nyí wuntun hwenu e nǔ énɛ́ lɛ́ bǐ ná wá vivɔnu é tɔn?” 5 Énɛ́ wú ɔ, Jezu jɛ ɖiɖɔ nú yě jí ɖɔ: “Mi cɔ́ miɖée bónú mɛ ɖěbǔ ní ma flú mi ó. 6 Mɛ gěgé ná sɔ́ nyǐkɔ ce bo ná xwetɔ́n, bo ná ɖɔ: ‘Nyi wɛ n’i,’ lobo ná flú mɛ gěgé. 7 Gɔ́ ná ɔ, ényí mi se ahwanfunfun sín zǐngídi ɖo fí e sɛkpɔ́ mi lɛ́ é, bo se ahwanfunfunxó ɖo fí e lín dó mi lɛ́ é hǔn, ayi mitɔn ní ma gba dó ó; nǔ énɛ́ lɛ́ ɖó ná jɛ, amɔ̌, vivɔnu ɔ ko nɛ́ ǎ.

8 “Ðó akɔta ɖě ná tɔ́n ahwan ɖě, bɔ axɔ́súɖuto ɖě ná tɔ́n ahwan ɖě; ayǐkúngban ná dán wǔ sín fí ɖé jɛ fí ɖěvo; nǔɖuɖu lɔ ná hwe dó mɛ. Bǐbɛ́ wǔvɛ́ lɛ́ tɔn wɛ nyí énɛ́ lɛ́.

9 “Midɛɛ lɛ́ ɔ, mi cɔ́ miɖée. Mɛ lɛ́ ná jó mi nú hwɛɖɔxɔsá ayǐ ɔ jí tɔn lɛ́, bɔ è ná xo mi ɖo kplɔ́ngbasá lɛ́, bo ná kplá mi yi tokpɔngán lɛ́ kpó axɔ́sú lɛ́ kpó nukɔn ɖó nyɛ wú, bónú é ná nyí kúnnuɖiɖe nú yě. 10 Gɔ́ ná ɔ, è ɖó ná jlá wɛn ɖagbe ɔ akɔta lɛ́ bǐ hwɛ̌. 11 Ényí yě kplá mi, bo ná yi jó mi hǔn, ado ní ma hu mi dó nǔ e mi ná ɖɔ é wú ó; amɔ̌, nǔ ɖěbǔ e è ná sɔ́ dó ayi mɛ nú mi ɖo ganxixo énɛ́ mɛ é ɔ, mi ní ɖɔ nǔ énɛ́, ɖó midɛɛ lɛ́ wɛ ɖo xó ɖɔ wɛ ǎ, loɔ, gbigbɔ mímɛ́ wɛ. 12 Gɔ́ ná ɔ, nɔví ná jó nɔví tɔn bɔ è ná hu, bɔ tɔ́ ná jó vǐ tɔn, lobɔ vǐ lɛ́ ná fɔ́n gǔ dó mɛjitɔ́ yětɔn lɛ́ jí, bo ná zɔ́n ɖɔ è ní hu yě. 13 Bɔ mɛ bǐ ná gbɛ́ wǎn nú mi ɖó nyǐkɔ ce wú. Amɔ̌, mɛ e dɛ* káká jɛ vivɔnu é ɔ, è ná hwlɛ́n ɛ gán.

14 “É ɖo mɔ̌ có, hwenu e mi ná mɔ nǔ e xyɔ́ wǔ bo nɔ vívá nǔ é, ɖo fí e é ma ɖó ná nɔ ǎ é ɔ, (nǔxatɔ́ ɔ ní ɖó ayi te), mɛ e ɖo Judée lɛ́ é ní jɛ hinhɔn yi sókan mɛ jí. 15 Mɛ e ɖo xɔ ta é ní ma ɖɔ émí ná jɛ te ó, ní ma ka ɖɔ émí ná byɔ́ xɔ émítɔn mɛ bo ná bɛ́ nǔ ɖěbǔ sín xɔ ɔ mɛ ó. 16 Mɛ e ɖo gle mɛ é ní ma ɖɔ émí ná lɛ́ kɔ yi nǔ e ɖo gǔdo lɛ́ é kɔn, bo ná yi sɔ́ awu émítɔn aga tɔn ɔ ó. 17 Heelú nyɔ̌nu e ná ɖo xo lɛ́ é kpó éé ná ɖo anɔ̌ ná vǐ wɛ hwenɛ́nu lɛ́ é kpó! 18 Mi ní nɔ ɖo ɖɛ xo wɛ bónú é ní ma jɛ dó avivɔhwenu* ó; 19 ɖó azǎn énɛ́ lɛ́ ná nyí wǔvɛ́ sín azǎn, bɔ mɔ̌hunkɔtɔn ko tíin kpɔ́n sín bǐbɛ́mɛ nǔ e Mawu dá lɛ́ é tɔn káká jɛ din ǎ, bɔ mɔ̌hunkɔtɔn ka sɔ́ ná lɛ́ tíin gbeɖé ǎ. 20 Nǔgbó ɔ, nú Jexóva* ma ɖe azǎn lɛ́ kpo ǎ ɔ, mɛ ɖěbǔ ná gán ɖ’é mɛ ǎ. Amɔ̌, ɖó mɛ e é cyán lɛ́ é wútu ɔ, é ɖe azǎn lɛ́ kpo.

21 “Gɔ́ ná ɔ, ényí mɛ ɖěbǔ ɖɔ nú mi ɖɔ: ‘Mi kpɔ́n! Klísu ɔ ɖíe ɖo fí è,’ alǒ: ‘É ɖíe ɖo dě è’ hǔn, mi ma ɖi nǔ ná ó. 22 Ðó Klísu-nyíjɛtɔ́ lɛ́ kpó gbeyíɖɔ-nyíjɛtɔ́ lɛ́ kpó ná xwetɔ́n bo ná bló nǔjíwǔ alɔkpa alɔkpa gěgé, bo ná dó dɔn mɛ e è cyán lɛ́ é bú, ényí é nyɔ́ bló ɔ nɛ́. 23 Midɛɛ lɛ́ ɔ, mi bo nɔ acéjí. Un ko ɖɔ nǔ lɛ́ bǐ ɖ’ayǐ nú mi.

24 “Amɔ̌, ɖo azǎn énɛ́ lɛ́ jí, ɖo wǔvɛ́ énɛ́ gúdo ɔ, hwesivɔ́ ná d’ablu, sun sɔ́ ná ná wěziza tɔn ǎ, 25 sunví lɛ́ ná ɖo fíflɛ́ sín jǐxwé wɛ, bɔ hlɔ̌nhlɔ́n e ɖo jǐnukúnsin lɛ́ é ná húnhún. 26 Bɔ énɛ́ gúdo ɔ, yě ná mɔ Gbɛtɔ́ví ɔ jawě ɖo akpɔ́kpɔ́ mɛ kpó hlɔ̌nhlɔ́n ɖaxó kpó, kpódó susu kpán. 27 Énɛ́ ɔ, é ná sɛ́ wɛnsagun lɛ́ dó, bo ná xo mɛ tɔn e è cyán lɛ́ é kplé sín wɛ̌kɛ́zo ɛnɛ lɛ́ bǐ mɛ, bɛ́sín fí e ayǐkúngban kponu ɖó é káká yi fí e jǐnukúnsin kponu ɖó é.

28 “Din ɔ, nǔjlɛ́dónǔwú fígitín tɔn élɔ́ ní kplɔ́n nǔ mi: Ényí ala tɔn yɔ̌yɔ́ lɛ́ jɛ susu jí bo zɔ́n ama ɔ, mi nɔ tuun ɖɔ alǔun* ko sɛkpɔ́. 29 Mɔ̌ ɖokpó ɔ, mi lɔmɔ̌ ɔ, ényí mi mɔ bɔ nǔ énɛ́ lɛ́ ɖo jijɛ wɛ hǔn, mi tuun ɖɔ é ko sɛkpɔ́ bo ɖo hɔn jí. 30 Má ɖɔ nǔgbó nú mi, jijimɛ élɔ́ ná wá yi gbeɖé cóbónú nǔ énɛ́ lɛ́ bǐ ná jɛ ǎ. 31 Jǐnukúnsin kpó ayǐkúngban kpó ná wá yi, amɔ̌, xó ce lɛ́ ná wá yi gbeɖé ǎ.

32 “Mɛ ɖěbǔ tuun azǎn ɔ alǒ gan ɔ mɛ ǎ, wɛnsagun e ɖo jǐxwé lɛ́ é tuun ǎ, Vǐ ɔ lɔ tuun ǎ, loɔ, Tɔ́ ɔ wɛ tuun. 33 Ayi mitɔn ní ɖo te, mi nɔ wunzɛn, ɖó mi tuun hwenu e Mawu sɔ́ é ǎ. 34 É cí nya e xwe to mɛ bo jó xwé tɔn dó, lobo ná acɛ mɛsɛntɔ́ tɔn lɛ́ dó xwé ɔ jí é ɖɔhun. É sɔ́ azɔ̌ d’así nú yě mɛ ɖokpó ɖokpó, lobo zɔ́n hɔnjínɔtɔ́ ɔ ɖɔ é ní nɔ wunzɛn. 35 Hǔn, mi nɔ acéjí, ɖó mi tuun hwenu e xwénɔ ɔ ná wá dó é ǎ; é to nyí gbadanu cawun, alǒ zǎnxwete, alǒ ayǐtéhɔ̌nnu,* alǒ zǎnzǎn tɛɛn wɛ ɔ, mi tuun ǎ. 36 Énɛ́ ɔ, hwenu e é ná wá ɖo ajijimɛ é ɔ, é ná mɔ mi ɖo amlɔ dɔ́ wɛ ǎ. 37 Amɔ̌, nǔ e ɖɔ nú mi wɛ un ɖe é ɔ, mɛ bǐ ɖɔ ná wɛ un ɖe: Mi nɔ wunzɛn.”

14 Din ɔ, Dǐndínwáyixwe ɔ kpó wɔ̌xúxú e mɛ è ma dó tɔ́n ǎ é sín xwe kpó kpo sɔ. Bɔ vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó ɖo lěe yě ná wa gbɔn, bo ná sɔ́ sísɛ́ ɖó nukɔn* dó wlí i,* lobo hu i é ba wɛ. 2 Ðó yě nɔ ɖɔ: “É ná nyí ɖo xwe ɔ hwenu ǎ; bóyá togun ɔ sixú dɔn hunnyahunnya wá.”

3 Hwenu e é ɖo Betaníi, bo ɖo nǔ ɖu wɛ* ɖo Sinmɔ́ɔ e ko jɛ gudu kpɔ́n é sín xwégbe é ɔ, nyɔ̌nu ɖé wá bo hɛn nǔsáwǔ wǎnɖagbenɔ dó alubátlugo mɛ, nǎa akú wɛ è dó bló ná, bɔ é v’axi tawun. É hun alubátlugo ɔ, bo jɛ nǔsáwǔ ɔ kɔn dó ta n’i jí. 4 Énɛ́ ɔ, mɛ e ɖo fínɛ́ é ɖé lɛ́ jɛ ɖiɖɔ nú yěɖée jí kpó xomɛsin kpó ɖɔ: “Étɛ́wú è ka ɖo nǔsáwǔ axivɛ́nú élɔ́ hɛn gú wɛ mɔ̌? 5 È hɛn ɔ, è ná ko sa nǔsáwǔ énɛ́ yí deníye* 300 jɛjí, bo ná akwɛ́ ɔ wamamɔnɔ lɛ́!” Xomɛ sin yě dó nyɔ̌nu ɔ wú tawun.* 6 Amɔ̌, Jezu ɖɔ: “Mi jó è dó. Étɛ́wú mi ka ɖo tíntɛ́nkpɔ́n wɛ bo ná dó ayimɛya n’i? Nǔ ɖagbe wɛ é wa nú mì. 7 Ðó midɛɛ lɛ́ ɔ, wamamɔnɔ lɛ́ ɖo kpɔ́ xá mi tɛgbɛ, bɔ mi sixú wa nǔ ɖagbe nú yě hweɖébǔnu e é jló mi é, amɔ̌, nyɛ ná ɖo kpɔ́ xá mi tɛgbɛ ǎ. 8 Nǔ e wú é kpé é wɛ é wa; é sá nǔsáwǔ wǎnɖagbenɔ dó agbaza ce ɖ’ayǐ nú hwenu e è ná ɖi mì é. 9 Má ɖɔ nǔgbó nú mi, fí ɖěbǔ e è ná jlá wɛn ɖagbe ɔ ɖe gbɔn gbɛ ɔ bǐ mɛ é ɔ, è ná ɖɔ nǔ e nyɔ̌nu élɔ́ wa é lɔ, bo ná dó flín i.”

10 Judási Isikaliɔ́ti e ɖo mɛsɛ́dó 12 lɛ́ mɛ é yi mɔ vɔ̌sánúxwlémawutɔ́gán lɛ́, bo ná mɔ tɛn dó sa Jezu nú yě. 11 Ée yě se mɔ̌ é ɔ, xomɛ hun yě, bɔ yě d’akpá ɖɔ émí ná ná ɛ kpatágankwɛ́. Énɛ́ ɔ, é jɛ ali e ná hun n’i, bɔ é ná sa ɛ é ba jí.

12 Din ɔ, ɖo wɔ̌xúxú e mɛ è ma dó tɔ́n ǎ é sín xwezán nukɔntɔn ɔ gbe, gbe e gbe è nɔ sá Dǐndínwáyixwe sín vɔ̌ ɔ é ɔ, ahwanvú tɔn lɛ́ ɖɔ n’i ɖɔ: “Fítɛ́ a ka jló ɖɔ mǐ ní yi sɔ́ nǔ ná bónú a ná ɖu Dǐndínwáyixwe sín nǔɖuɖu ɔ ɖe?” 13 Énɛ́ ɔ, é sɛ́ ahwanvú tɔn lɛ́ we dó, bo ɖɔ nú yě ɖɔ: “Mi yi toxo ɔ mɛ. Nya e hɛn tɔyizɛ́n é ɖé ná wá kpé mi. Mi xwedó è. 14 Ényí é byɔ́ xwé ɖěbǔ gbe hǔn, mi ɖɔ nú xwénɔ ɔ ɖɔ: ‘Mɛ̌si ɖɔ: “Fítɛ́ xɔ jǒnɔyíyí tɔn e mɛ un sixú ɖu Dǐndínwáyixwe sín nǔɖuɖu ɔ xá ahwanvú ce lɛ́ ɖe é ka ɖe?”’ 15 Énɛ́ ɔ, é ná xlɛ́ xɔ ɖaxó ɖé mi ɖo síngbó jí, bɔ nǔ bǐ ko sɔgbe ɖ’é mɛ. Mi sɔ́ nǔ nú Dǐndínwáyixwe sín nǔɖuɖu ɔ nú mǐ ɖo fínɛ́.” 16 Énɛ́ ɔ, ahwanvú lɛ́ yi bo byɔ́ toxo ɔ mɛ, bo mɔ nǔ lɛ́ lěe é ko ɖɔ gbɔn nú yě é, lobo sɔ́ nǔ nú Dǐndínwáyixwe sín nǔɖuɖu ɔ.

17 Ée gbadanu su é ɔ, é kpó mɛsɛ́dó 12 lɛ́ kpó wá. 18 Bɔ ée yě ɖo ayǐjínjɔ́n ɖo távo tó, bo ɖo nǔ ɖu wɛ é ɔ, Jezu ɖɔ: “Má ɖɔ nǔgbó nú mi, mɛ ɖokpó ɖo mi mɛ e ɖo nǔ ɖu xá mì wɛ lɛ́ é mɛ bo ná sa mì.” 19 Yě byɔ́ aluwɛ mɛ, bɔ yě mɛ ɖokpó ɖokpó jɛ kinkanbyɔ́ ɛ jí ɖɔ: “Nyɛ wɛ a?” 20 É ɖɔ nú yě ɖɔ: “Mɛsɛ́dó 12 lɛ́ ɖokpó wɛ, mɛ e ɖo alɔ dó agbǎn ɖokpó ɔ mɛ xá mì wɛ é. 21 Nǔgbó wɛ ɖɔ Gbɛtɔ́ví ɔ ná kú lěe è ko wlán gbɔn ɖ’ayǐ dó wǔtu tɔn é. Amɔ̌, heelú mɛ e ná sa Gbɛtɔ́ví ɔ é! É ná ko nyɔ́ nú mɛ énɛ́ hú ɖɔ é ní gɔn gbɛ wá.”

22 Hwenu e yě kpo ɖo nǔ ɖu wɛ é ɔ, é zé wɔ̌xúxú ɖokpó. É byɔ́ nyɔ̌ná d’é jí, bo fɛ́n, lobo sɔ́ jó nú yě, bo ɖɔ: “Mi yí; élɔ́ nɔ te nú agbaza ce.” 23 É lɛ́ zé kɔ́fu ɖokpó, bo dó kú lobo zé jó nú yě, bɔ yě bǐ nu. 24 É ɖɔ nú yě ɖɔ: “Élɔ́ nɔ te nú ‘akɔjijɛ ɔ sín hun’ ce, ée è ná kɔn nyi ayǐ dó mɛ gěgé tamɛ é. 25 Má ɖɔ nǔgbó nú mi, un sɔ́ ná nu vɛ̌ɛn ɖě gbeɖé ǎ, káká jɛ hwenu e un ná lɛ́ nu xá mi ɖo Axɔ́súɖuto Mawu tɔn mɛ é.” 26 Yě ji han dó kpa susu nú Mawu,* bɔ énɛ́ gúdo ɔ, yě wá tɔ́n bo yi Olívutín só ɔ jí.

27 Bɔ Jezu ɖɔ nú yě ɖɔ: “Mi mɛ bǐ ná klɛ́n afɔ, ɖó è ko wlán ɖɔ: ‘Un ná xú nǔ lɛ̌ngbɔ́nyitɔ́ ɔ, bɔ lɛ̌ngbɔ́ lɛ́ ná gba dó.’ 28 Amɔ̌, ée è ná fɔ́n mì sín kú gúdo é ɔ, un ná jɛ nukɔn nú mi yi Galilée.” 29 Piyɛ́ɛ ka ɖɔ n’i ɖɔ: “Ényí mɛ ɖě lɛ́ bǐ ná bo tlɛ klɛ́n afɔ ɔ, nyɛ ná klɛ́n afɔ ǎ.” 30 Énɛ́ ɔ, Jezu ɖɔ n’i ɖɔ: “Má ɖɔ nǔgbó nú we, égbé ɔ, ɛɛn, ɖo zǎn élɔ́ mɛ ɔ, cóbónú kokló ná kɔ́ así azɔn we ɔ, a ná ko gbɛ́ mì azɔn atɔn.” 31 Amɔ̌, é lɛ́ tɛ ɖɛ̌ jí syɛ́nsyɛ́n bo ɖɔ: “Ényí é ná bo byɔ́ ɖɔ má kú xá we ɔ, un ná gbɛ́ we gbeɖé ǎ.” Mɛ ɖě lɛ́ lɔ bǐ jɛ nǔ ɖokpó ɔ ɖɔ jí.

32 Yě wá fí e è nɔ ylɔ́ ɖɔ Jɛtisemaníi é, bɔ é ɖɔ nú ahwanvú tɔn lɛ́ ɖɔ: “Mi jínjɔ́n fí hwenu e un ná ɖo ɖɛ xo wɛ é.” 33 É kplá Piyɛ́ɛ, Jaki kpó Jaan kpó; ado ɖaxó ɖé jɛ huhu i jí,* bɔ ayi tɔn bǐ gba dó. 34 É ɖɔ nú yě ɖɔ: “Un* ɖo aluwɛ ɖaxó e nɔ kplá mɛ yi kú é mɛ. Mi nɔ fí bo nɔ wunzɛn.” 35 Bɔ ée é sɛ yi nukɔn kpɛɖé é ɔ, é xwe agbɔ̌nnusú do bo jɛ ɖɛ xo sɛ́ dó Mawu jí ɖɔ, ényí é nyɔ́ bló hǔn, ninɔmɛ vɛ̌ wú e ja é ní sɛ dó zɔ nú émí. 36 É ɖɔ: “Abba,* Tɔ́, nǔ ɖěbǔ gló we ǎ; sɛ kɔ́fu élɔ́ dó zɔ nú mì. Amɔ̌, é ní ma nyí jlǒ ce ó, loɔ, é ní nyí jlǒ towe.” 37 É lɛ́ kɔ bo mɔ yě ɖo amlɔ dɔ́ wɛ, lobo ɖɔ nú Piyɛ́ɛ ɖɔ: “Sinmɔ́ɔ, amlɔ dɔ́ wɛ a ɖe a? A ɖó hlɔ̌nhlɔ́n bo ná nɔ wunzɛn nú ganxixo ɖokpó ǎ wɛ a? 38 Mi nɔ wunzɛn bo nɔ ɖo ɖɛ xo wɛ, lobo ma wá jɛ tɛ́nkpɔ́n mɛ ó. Nǔgbó ɔ, ayi gbɛtɔ́ tɔn ɖó jlǒ syɛ́nsyɛ́n, amɔ̌, agbaza ɖó gǎn ɖé ǎ.” 39 É lɛ́vɔ́ sɛ yi zɔ bo xo ɖɛ, lobo ɖɔ nǔ ɖokpó ɔ. 40 É lɛ́ wá bo mɔ yě ɖo amlɔ dɔ́ wɛ, ɖó nukún yětɔn lɛ́ kpɛn. Énɛ́ wú ɔ, yě tuun nǔ e yě ná ɖɔ n’i é ǎ. 41 É lɛ́ kɔ azɔn atɔngɔ́ ɔ bo ɖɔ nú yě ɖɔ: “Étɛ́wú mi ka ɖo amlɔ dɔ́ wɛ bo ɖo gbigbɔjɛ wɛ, ɖo gan lěhun ɖé mɛ? É kpé mɔ̌ lo! Gan ɔ ko xo! È ɖo Gbɛtɔ́ví ɔ sa wɛ, bo ɖo jǐjó è nyi hwɛhutɔ́ lɛ́ sín alɔ mɛ wɛ. 42 Mi sí te bónú mǐ ní yi. Mi kpɔ́n! Mɛ e ná sa mì é ko sɛkpɔ́.”

43 Bɔ tlóló ɔ, ée é kpo ɖo xó ɖɔ wɛ é ɔ, Judási e ɖo mɛsɛ́dó 12 lɛ́ mɛ é wá, bɔ ahwan e hɛn hwǐ kpó kpo kpó, bɔ vɔ̌sánúxwlémawutɔ́gán lɛ́, sɛ́nkplɔ́nmɛtɔ́ lɛ́ kpó tomɛxó lɛ́ kpó sɛ́ dó é xwedó è. 44 Din ɔ, mɛ e jló ná sa ɛ é ko ná wuntun ɖé yě, bo ɖɔ: “Mɛ ɖěbǔ e un ná kí si ná é ɔ, mɛ ɔ nɛ́; mi wlí i bo kplá ɛ yi, mi ma ka nú é sún gló mi ó.” 45 Énɛ́ ɔ, é wá bo yi gɔ̌n tɔn tlɔlɔ bo ɖɔ: “Mɛ̌si!”* Lobo kí si n’i. 46 Énɛ́ wú ɔ, yě wlí i, bá kplá ɛ yi. 47 Mɛ e ɖo fínɛ́ lɛ́ é ɖokpó ka dlɛ́n alɔ, bo sún hwǐ, lobo xú mɛsɛntɔ́ vɔ̌sánúxwlémawutɔ́ ɖaxó ɔ tɔn, bo kpa tó è. 48 Amɔ̌, Jezu ɖɔ nú yě ɖɔ: “Ajotɔ́ wɛ nú mì bɔ mi hɛn hwǐ kpó kpo kpó bo wá wlǐwlí mì gbé a? 49 Ayǐhɔ́ngbe ayǐhɔ́ngbe wɛ un nɔ ɖo kpɔ́ xá mi ɖo tɛ́npli ɔ mɛ bo nɔ ɖo nǔ kplɔ́n mɛ wɛ, có mi ka wlí mì ǎ. Amɔ̌, nǔ nyí mɔ̌, bónú nǔ e Nǔwlánwlán mímɛ́ lɛ́ ɖɔ é ná dó jɛnu.”

50 Bɔ ahwanvú lɛ́ bǐ jó è dó bo hɔn. 51 É ɖo mɔ̌ có, nyaví dɔ̌nkpɛvú ɖé ɖo awu e è sɔ́ lɛ̌ɛnkanvɔ fɛ́ɖɛ́fɛ́ɖɛ́ dó bló é kɛ́ɖɛ́ mɛ, bo jɛ xwixwedó è jí, bo ɖo zaan dó è. Yě tɛ́n kpɔ́n bo ná wlí i, 52 amɔ̌, é jó awu tɔn e è sɔ́ lɛ̌ɛnkanvɔ dó bló é dó, bo ɖo mɛ̌* bo hɔn.

53 Din ɔ, yě kplá Jezu yi vɔ̌sánúxwlémawutɔ́ ɖaxó ɔ gɔ́n, bɔ vɔ̌sánúxwlémawutɔ́gán lɛ́, tomɛxó lɛ́ kpó sɛ́nkplɔ́nmɛtɔ́ lɛ́ kpó bǐ kplé. 54 Amɔ̌, Piyɛ́ɛ ɖo zɔ dó è ganjí, bo xwedó è káká jɛ vɔ̌sánúxwlémawutɔ́ ɖaxó ɔ sín kɔ́xota. É jínjɔ́n mɛsɛntɔ́ xwé ɔ gbe tɔn lɛ́ kpá, bo ɖo myɔ xú wɛ. 55 Din ɔ, vɔ̌sánúxwlémawutɔ́gán lɛ́ kpó Hwɛɖɔxɔsá ɖaxó Jwifu lɛ́ tɔn blěbú kpó ɖo hwɛ e yě ná dó Jezu é ba wɛ, bo ná mɔ tɛn dó hu i. Amɔ̌, yě ɖo ɖě mɔ wɛ ǎ. 56 Nǔgbó ɔ, mɛ gěgé ɖo kúnnu agɔ ɖe dó wǔtu tɔn wɛ, amɔ̌, kúnnuɖiɖe yětɔn lɛ́ nyita fí ɖokpó ɔ ǎ. 57 Gɔ́ ná ɔ, mɛɖé lɛ́ nɔ sí te bo nɔ ɖe kúnnu agɔ dó wǔtu tɔn ɖɔ: 58 “Mǐ se bɔ é ɖɔ: ‘Un ná mu tɛ́npli élɔ́ e è sɔ́ alɔ dó gbá é, bɔ ɖo azǎn atɔn vlamɛ ɔ, un ná gbá ɖěvo e è ma sɔ́ alɔ dó gbá ǎ é.’” 59 É ɖo mɔ̌ có, kúnnuɖiɖe yětɔn nyita fí ɖokpó ɔ dó xó énɛ́ wú ǎ.

60 Énɛ́ gúdo ɔ, vɔ̌sánúxwlémawutɔ́ ɖaxó ɔ sí te ɖo tɛ́ntin yětɔn bo kanbyɔ́ Jezu ɖɔ: “A ɖó xó ɖé bo ná ɖɔ ǎ cé? A se hwɛ e dó we wɛ mɛ élɔ́ lɛ́ ɖe é ǎ cé?” 61 É ka cí xwíí, bo ná xósin ɖěbǔ ǎ. Vɔ̌sánúxwlémawutɔ́ ɖaxó ɔ lɛ́vɔ́ jɛ nǔ kanbyɔ́ ɛ jí, bo ɖɔ n’i ɖɔ: “Hwi wɛ nyí Klísu, Nyɔ̌nánɔ ɔ sín Vǐ a?” 62 Énɛ́ ɔ, Jezu ɖɔ: “Nyɛ wɛ; bɔ mi ná mɔ Gbɛtɔ́ví ɔ ɖo ayǐjínjɔ́n ɖo ɖisíxwé nú Mɛ hlɔ̌nhlɔ́nnɔ ɔ, bo ná lɛ́vɔ́ mɔ ɛ jawě kpó akpɔ́kpɔ́ jǐnukúnsin tɔn lɛ́ kpó.” 63 Vɔ̌sánúxwlémawutɔ́ ɖaxó ɔ vún awu dó kɔ nú éɖée bo ɖɔ: “Mǐ lɛ́ ɖó hudó kúnnuɖetɔ́ tɔn wɛ a? 64 Miɖésú se nu e é nylá é. Gbeta tɛ́ kɔn mi ka wá?”* Yě bǐ ɖó hwɛ n’i ɖɔ é jɛxá kú. 65 Bɔ mɛɖé lɛ́ jɛ atán tún kɔn nyi wǔ tɔn jí. Yě cyɔ́n nǔ nukúnmɛ n’i, bo jɛ akpotokwín dó è jí, lobo ɖɔ n’i ɖɔ: “Ðe xlɛ́ mǐ ɖɔ émí nyí gbeyíɖɔ ɖé!” Ée sɔ́ja lɛ́ gba nukúnmɛ n’i gúdo é ɔ, yě kplá ɛ ɖidó.

66 Din ɔ, ée Piyɛ́ɛ ɖo do ɖo kɔ́xo ɔ ta é ɔ, mɛsɛntɔ́ nyɔ̌nu vɔ̌sánúxwlémawutɔ́ ɖaxó ɔ tɔn lɛ́ ɖokpó wá. 67 Ée é mɔ Piyɛ́ɛ ɖo myɔ xú wɛ é ɔ, é kpɔ́n ɛ dáán bo ɖɔ n’i ɖɔ: “Hwi lɔ nɔ zɔn xá Jezu Nazalɛ́tinu ɔ.” 68 Amɔ̌, é gbɛ́, bo ɖɔ: “Un tuun i ǎ, un ka lɛ́vɔ́ mɔ nukúnnú jɛ nǔ e xó ɖɔ wɛ a ɖe é mɛ ǎ.” Énɛ́ ɔ, é ɖidó hɔnnúwa ɔ sá.* 69 Mɛsɛntɔ́ nyɔ̌nu ɔ mɔ ɛ ɖo fínɛ́, bo lɛ́vɔ́ jɛ ɖiɖɔ nú mɛ e ɖo te ɖo fínɛ́ lɛ́ é jí ɖɔ: “Mɛ élɔ́ ɖo yě mɛ.” 70 É lɛ́vɔ́ jɛ gbǐgbɛ́ jí. Hwenu kpɛɖé gúdo ɔ, mɛ e ɖo te ɖo fínɛ́ lɛ́ é lɛ́vɔ́ jɛ ɖiɖɔ nú Piyɛ́ɛ jí ɖɔ: “É ɖo wɛn ɖɔ hwi lɔ ɖo yě mɛ, ɖó nú è ná ɖɔ xójɔxó ɔ, Galiléenu wɛ a nyí.” 71 Amɔ̌, é jɛ nu dó éɖée jí bo xwlé nǔ ɖɔ: “Un tuun nya énɛ́ e xó ɖɔ wɛ mi ɖe é ǎ!” 72 Tlóló ɔ, kokló kɔ́ así azɔn wegɔ́ ɔ, bɔ Piyɛ́ɛ flín nǔ e Jezu ko ɖɔ n’i é: “Cóbónú kokló ná kɔ́ así azɔn we ɔ, a ná ko gbɛ́ mì azɔn atɔn.” Énɛ́ ɔ, é byɔ́ aluwɛ mɛ bo jɛ avǐ ya jí.

15 Tlóló e ayǐ hɔ́n é ɔ, vɔ̌sánúxwlémawutɔ́gán lɛ́, tomɛxó lɛ́ kpó sɛ́nkplɔ́nmɛtɔ́ lɛ́ kpó, énɛ́ wɛ nyí Hwɛɖɔxɔsá ɖaxó Jwifu lɛ́ tɔn ɔ blěbú, ɖe wě ɖó kpɔ́, bo blá Jezu lobo kplá ɛ yi jó nú Pilátu. 2 Énɛ́ wú ɔ, Pilátu kanbyɔ́ ɛ ɖɔ: “Hwi wɛ nyí Axɔ́sú Jwifu lɛ́ tɔn ɔ a?” É yí gbe n’i ɖɔ: “É nɛ́ a ɖɔ pɛ́ɛ́ nɛ́.” 3 Vɔ̌sánúxwlémawutɔ́gán lɛ́ ka ɖo nǔ gěgé sín hwɛ dó è wɛ. 4 Din ɔ, Pilátu lɛ́ jɛ nǔ kanbyɔ́ ɛ jí, bo ɖɔ: “A ɖó xó ɖé ná ɖɔ ǎ cé? Kpɔ́n hwɛ tobutóbú e dó we wɛ yě ɖe é.” 5 Amɔ̌, Jezu sɔ́ ná xósin ɖě ǎ, bɔ énɛ́ jí wǔ nú Pilátu.

6 Ðo Dǐndínwáyixwe ɖokpó ɖokpó hwenu ɔ, é ko ɖó walɔ bo nɔ ɖe gantɔ́ e yě byɔ́ é ɖokpó nyi te nú yě. 7 Hwenɛ́nu ɔ, nya e è nɔ ylɔ́ ɖɔ Balabási é ɖo gan mɛ, é kpó gǔfɔ́ntɔ́ lɛ́ kpó. Ðo gǔfínfɔ́n yětɔn mɛ ɔ, yě ko hu mɛ. 8 Énɛ́ ɔ, ahwan ɔ wá, bo jɛ nǔ e ba wɛ yě ɖe é byɔ́ Pilátu jí, sɔgbe xá nǔ e é ko nɔ bló nú yě é. 9 É yí gbe nú yě ɖɔ: “Mi ba ɖɔ má ɖe Axɔ́sú Jwifu lɛ́ tɔn nyi te nú mi a?” 10 Ðó Pilátu mɔ ɖɔ wǔhwinhwan* wɛ zɔ́n bɔ vɔ̌sánúxwlémawutɔ́gán lɛ́ jó è. 11 Amɔ̌, vɔ̌sánúxwlémawutɔ́gán lɛ́ sísɛ́ ahwan ɔ ɖɔ yě ní byɔ́ ɖɔ é ní ɖe Balabási nyi te nú émí ɖó tɛn tɔn mɛ. 12 Pilátu lɛ́ yí gbe nú yě ɖɔ: “Bɔ étɛ́ un ka ɖó ná wa nú mɛ e mi nɔ ylɔ́ ɖɔ Axɔ́sú Jwifu lɛ́ tɔn é?” 13 Yě lɛ́vɔ́ sú xó bo ɖɔ: “Xwe è nyi atín wú!” 14 Amɔ̌, Pilátu lɛ́ ɖɔ nú yě ɖɔ: “Étɛ́wú? Nǔ nyanya tɛ́ é ka wa?” É ɖo mɔ̌ có, yě lɛ́ sú xó syɛ́nsyɛ́n d’é jí bo ɖɔ: “Xwe è nyi atín wú!” 15 Énɛ́ ɔ, ɖó Pilátu jló ná hɛn xomɛ hun ahwan ɔ wútu ɔ, é ɖe Balabási nyi te nú yě; bɔ ée é ɖɔ bɔ è sɔ́ lanbá dó xo Jezu ná gúdo é ɔ, é sɔ́ ɛ dó alɔ mɛ nú yě bónú yě ní xwe è nyi atín wú.

16 Din ɔ, sɔ́ja lɛ́ kplá Jezu yi kɔ́xota; énɛ́ wɛ nyí ɖo tokpɔngán ɔ sín hɔnmɛ, bɔ yě ylɔ́ ahwankpá ɔ blěbú kplé. 17 Yě dó awu vɔvɔ e wi d’é mɛ é n’i, bo sɔ́ wun dó lɔn axɔ́súgbákún ná, bo sɔ́ xwe n’i. 18 Bɔ yě jɛ gbe dó è jí ɖɔ: “Kú dó lěhwenu,* Axɔ́sú Jwifu lɛ́ tɔn!” 19 Gɔ́ ná ɔ, yě nɔ zin fántín dó ta n’i, bo nɔ tún atán kɔn nyi wǔ tɔn; yě lɛ́ jɛ kpo bo ɖe kɔ́* n’i. 20 Ée yě cá n’i gúdo é ɔ, yě wá ɖe awu vɔvɔ e wi d’é mɛ ɔ n’i, bo sɔ́ awu tɔn aga tɔn lɛ́ dó n’i. Énɛ́ gúdo ɔ, yě kplá ɛ tɔ́n, bo ná yi xwe è nyi atín wú. 21 Gɔ́ ná ɔ, yě hɛn aligbɔntɔ́ e gosín gletoxo ɔ mɛ wá xweyǐgbe é ɖé gǎnnugǎnnu bónú é ná hɛn yatín* Jezu tɔn. Silenɛ́ɛnu e nɔ nyí Sinmɔ́ɔ, bo nyí tɔ́ nú Alɛsándlu kpó Hlufúsi kpó é wɛ.

22 Énɛ́ ɔ, yě kplá ɛ yi fí e è nɔ ylɔ́ ɖɔ Gɔlugɔ́ta é; tínmɛ tɔn wɛ nyí “Takágo tɛnmɛ.” 23 Ðo fínɛ́ ɔ, yě tɛ́n kpɔ́n bo ná ná ɛ vɛ̌ɛn e è cáká kpó mǐla kpó é,* amɔ̌, é ba ná nu ǎ. 24 Bɔ yě xwe è nyi atín ɔ wú, bo nyi akɔ dó awu tɔn aga tɔn lɛ́, bo ná dó tuun ée mɛ ɖokpó ɖokpó ná yí é lobo má. 25 Din ɔ, gan tɛ́nnɛ zǎnzǎn tɔn mɔ̌ wɛ ɖo xixo wɛ* hwenu e è xwe è nyi atín wú é. 26 Hwɛ e è dó è é sín nǔwlánwlán ɔ ɖɔ: “Axɔ́sú Jwifu lɛ́ tɔn.” 27 Gɔ́ ná ɔ, yě xwe ajotɔ́ we nyi atín wú ɖo akpá tɔn; mɛ ɖokpó ɖo ɖisí tɔn xwé, mɛ ɖokpó ɖo amyɔ tɔn xwé. 28* —— 29 Bɔ mɛ ɖěɖěe ɖo wǐwá yi wɛ lɛ́ é nɔ zun i, bo nɔ húnhún ta, lobo nɔ ɖɔ: “Wǒó nú we! Hwi mɛ e ɖɔ émí ná mu tɛ́npli ɔ, bɔ ɖo azǎn atɔn vlamɛ ɔ, émí ná gbá é ɔ, 30 jɛ te sín yatín* ɔ jí dó hwlɛ́n hwiɖée gán.” 31 Mɔ̌ ɖokpó ɔ, vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó lɔ ɖo cícá n’i wɛ ɖo yěɖée tɛ́ntin, bo nɔ ɖɔ: “É hwlɛ́n mɛ ɖěvo lɛ́, é ka sixú hwlɛ́n éɖée ǎ! 32 Klísu, Axɔ́sú Izlayɛ́li tɔn ɔ, ní jɛ te din sín yatín* ɔ jí, énɛ́ ɔ, mǐ ná mɔ, bo ɖi nǔ.” Mɛ e è xwe nyi atín wú ɖo akpá tɔn lɛ́ é lɔmɔ̌ tlɛ ɖo zunzun i wɛ.

33 Hwenu e é xo gan 12 hwemɛ tɔn mɔ̌ é ɔ,* ablu dó ɖo ayǐ ɔ bǐ jí, káká jɛ gan atɔn mɛ hwemɛ mɔ̌.* 34 Ðo gan atɔn mɛ hwemɛ mɔ̌ ɔ, Jezu sú xó tlílí bo ɖɔ: “Eli, Eli, lama sabakitani?” Tínmɛ tɔn wɛ nyí: “Mawu ce, Mawu ce, étɛ́wú a ka jó mì dó?” 35 Ée mɛ e ɖo te sɛkpɔ́ fínɛ́ lɛ́ é ɖé lɛ́ se mɔ̌ é ɔ, yě jɛ ɖiɖɔ jí ɖɔ: “Mi kpɔ́n! É ɖo Elíi ylɔ́ wɛ.” 36 Énɛ́ ɔ, mɛɖé dó wezun, bo nylɔ́ xumɛtekan dó vɛ̌ɛn sinvɛ́sinvɛ́ mɛ, lobo zé slɔ́ fántín nu, bo ná ɛ bónú é ní nu, lobo ɖɔ: “Mi jó è dó! Mǐ ní kpɔ́n ɖɔ Elíi ná wá hwlɛ́n ɛ a jí.” 37 Amɔ̌, Jezu sú xó syɛ́nsyɛ́n, bɔ gbɔjɛ tɔn xwɛ.* 38 Bɔ xɔmɛgbovɔ tɛ́npli ɔ tɔn* vún ɖó we, sín aga wá do. 39 Din ɔ, ée sɔ́jakanwekogán e ɖo te ɖo nukɔn tɔn é mɔ ninɔmɛ e mɛ gbɔjɛ tɔn xwɛ ɖe lɛ́ é ɔ, é ɖɔ: “Vǐ Mawu tɔn wɛ nya élɔ́ nyí nǔgbó.”

40 Nyɔ̌nu lɛ́ lɔmɔ̌ ɖo zɔ, bo ɖo nǔ e ɖo jijɛ wɛ lɛ́ é kpɔ́n sɛ́dó wɛ. Mali Magidálanu ɔ, Mali e nyí Jaki Kpɛví* ɔ kpó Jozée kpó sín nɔ é, kpó Salomɛ́ɛ kpó ɖo yě mɛ. 41 Nyɔ̌nu énɛ́ lɛ́ nɔ xwedó è, lobo nɔ d’alɔ ɛ hwenu e é ɖo Galilée é. Nyɔ̌nu gěgé ɖěvo e zɔn kpɔ́ xá ɛ sín Jeluzalɛ́mu wá lɛ́ é lɔ ɖo yě mɛ.

42 Din ɔ, ɖó hwe ko lɛ́ kɔ bǐ, bɔ é lɛ́ nyí Nǔsísɔ́ sín azǎn gbe, énɛ́ wɛ nyí gbɔjɛzán kpo sɔ wútu ɔ, 43 Jozɛ́fu Alimatéenu, éé nyí Hwɛɖɔxɔsá ɖaxó Jwifu lɛ́ tɔn sín hǎgbɛ́ nukúnɖéjí ɖokpó, bɔ é lɔ ko ɖo te kpɔ́n Axɔ́súɖuto Mawu tɔn é wá. É kpankɔ́n bo yi Pilátu gɔ́n, bo byɔ́ cyɔ Jezu tɔn. 44 Amɔ̌, Pilátu kanbyɔ́ éɖée ɖɔ Jezu ka ná ko kú dóó a jí. Énɛ́ ɔ, é ylɔ́ sɔ́jakanwekogán ɔ, bo kanbyɔ́ ɛ ɖɔ Jezu ko kú wɛ a jí. 45 Ée sɔ́jakanwekogán ɔ ná ɛ gǎnjɛwú ɔ gúdo é ɔ, é ná gbe Jozɛ́fu ɖɔ é ní yi sɔ́ cyɔ ɔ. 46 Ée é xɔ lɛ̌ɛnkanvɔ fɛ́ɖɛ́fɛ́ɖɛ́, bo ɖe Jezu jɛ te gúdo é ɔ, é bú lɛ̌ɛnkanvɔ fɛ́ɖɛ́fɛ́ɖɛ́ ɔ dó è, bo sɔ́ ɛ ɖó yɔdo e è ko kun dó só xomɛ é mɛ. Énɛ́ gúdo ɔ, é blí awǐnnya dó yɔdo ɔ nu. 47 Amɔ̌, Mali Magidálanu ɔ kpó Mali e nyí nɔ Jozée tɔn é kpó kpo ɖo fí e è sɔ́ ɛ ɖó é kpɔ́n wɛ.

16 Énɛ́ ɔ, ée gbɔjɛzán ɔ ko wá yi gúdo é ɔ, Mali Magidálanu ɔ, Mali e nyí Jaki sín nɔ é, kpó Salomɛ́ɛ kpó xɔ nǔhwɛ́nkún lɛ́, bo ná yi sá nú cyɔ tɔn. 2 Bɔ zǎnzǎn tɛɛn ɖo azǎn nukɔntɔn aklúnɔzángbla ɔ tɔn jí, hwenu e hwesivɔ́ ko tɔ́n é ɔ, yě wá yɔdo ɔ kɔn. 3 Yě ko ɖo ɖiɖɔ nú yěɖée lɛ́ wɛ ɖɔ: “Mɛ̌ ka ná blí awǐnnya ɔ sín yɔdo ɔ nu nú mǐ?” 4 Amɔ̌, hwenu e yě kpɔ́n sɛ́dó é ɔ, yě mɔ ɖɔ è ko blí awǐnnya ɔ síin, có é ka d’agba tawun. 5 Ée yě byɔ́ yɔdo ɔ mɛ é ɔ, yě mɔ dɔ̌nkpɛvú ɖé ɖo awu gaga wěwé mɛ, bo ɖo ayǐjínjɔ́n ɖo ɖisíxwé, bɔ é kpácá yě tawun. 6 É ɖɔ nú yě ɖɔ: “Mi ma nú é kpácá mi ó. Un tuun ɖɔ Jezu Nazalɛ́tinu e è xwe nyi atín wú é ba wɛ mi ɖe. È ko fɔ́n ɛ sín kú. É sɔ́ ɖo fí ǎ. Mi kpɔ́n, fí élɔ́ wɛ è sɔ́ ɛ ɖó ɖ’ayǐ. 7 Amɔ̌, mi yi, bo ɖɔ nú ahwanvú tɔn lɛ́ kpó Piyɛ́ɛ kpó ɖɔ: ‘É ko jɛ nukɔn nú mi xwe Galilée. Mi ná mɔ ɛ ɖo dɔ̌n lěe é ko ɖɔ nú mi gbɔn é.’” 8 Énɛ́ ɔ, ée yě tɔ́n é ɔ, yě hɔn sín yɔdo ɔ kɔn, bo ɖo sísɔ́sísɔ́ wɛ, bɔ ahwi xo yě. Yě ɖɔ xó tí nú mɛ ɖěbǔ ǎ, ɖó yě ɖo xɛsi ɖi wɛ.*