WƐN ÐAGBE LUKI TƆN

1 Mɛ gěgé dó gǎn bo ba do nú nǔ e jɛ lɛ́ é bǐ, bo wlán ɖ’ayǐ. Mǐ lɔ ɖi nǔ nú nǔ énɛ́ lɛ́ ma xo nǔ kpɔ́n. 2 Mɛ ɖěvo ɖěɖěe mɔ nǔ e jɛ lɛ́ é kpó nukún kpó sín bǐbɛ́mɛ, bo ka lɛ́ nyí wɛn Mawu tɔn jlátɔ́ lɛ́ é lɔ ɖɔ nǔ énɛ́ lɛ́ nú mǐ. 3 Énɛ́ wú ɔ, sísíjɛxá Teofílu, un ko gbéjé nǔ énɛ́ lɛ́ bǐ kpɔ́n, bɔ nyi lɔ wá gbeta ɔ kɔn bo ná wlán nǔ d’é wú ɖěbɔdóɖěwú sɛ́dó we. 4 Un bló mɔ̌ bónú a ní dó sixú kú d’é jí ɖɔ nǔ ɖěɖěe è kplɔ́n we lɛ́ é nyí nǔgbó.

5 Ðo axɔ́sú Judée tɔn Elódu* hwenu ɔ, vɔ̌sánúxwlémawutɔ́ ɖé tíin bɔ è nɔ ylɔ́ ɛ ɖɔ Zakalíi, bɔ é ɖo vɔ̌sánúxwlémawutɔ́ sín gbɛ̌ta e è nɔ ylɔ́ ɖɔ Abíya é mɛ. Asi tɔn nɔ nyí Elizabɛ́ti, bo jɔ ɖo Aalɔ́ɔn kún mɛ. 6 Yě mɛ we lɛ́ bǐ wɛ nyí nǔjlɔ́jlɔ́watɔ́ ɖo Mawu nukúnmɛ, yě nɔ zán gbɛ sɔgbe xá gbeɖiɖe Jexóva* tɔn lɛ́ bǐ kpó sɛ́n tɔn lɛ́ bǐ kpó, bɔ nǔ bǐ nɔ vɔ ɖ’é wú. 7 Amɔ̌, yě ɖó vǐ ɖě ǎ, ɖó Elizabɛ́ti nyí wɛnsinɔ, bɔ yě mɛ we lɛ́ bǐ sín xwe ka ko lɛ́ sɛ yi tawun.

8 Din ɔ, azɔ̌ jɛ vɔ̌sánúxwlémawutɔ́ lɛ́ sín gbɛ̌ta e mɛ é ɖe é jí, bɔ é ɖo vɔ̌sánúxwlémawutɔ́zɔ́ wa wɛ ɖo Mawu nukɔn. 9 Sɔgbe xá lěe walɔ vɔ̌sánúxwlémawutɔ́ lɛ́ tɔn byɔ́ gbɔn é ɔ, azɔ̌ jɛ jǐ tɔn. Énɛ́ wú ɔ, é byɔ́ tɛ́npli Jexóva* tɔn mɛ, bo ná dó zǎlínkpɔ́n zo. 10 Ahwan ɔ blěbú ka ɖo ɖɛ xo wɛ ɖo kɔ́xota ɖo gan e mɛ è nɔ dó zǎlínkpɔ́n zo é. 11 Wɛnsagun Jexóva* tɔn tɔ́n dó jǐ tɔn, bo ɖo te ɖo fí e è nɔ dó zǎlínkpɔ́n zo ɖe é sín ɖisíxwé. 12 Ée Zakalíi mɔ ɛ é ɔ, ayi tɔn bǐ gba dó, bɔ xɛsi jɛ jǐ tɔn. 13 Amɔ̌, wɛnsagun ɔ ɖɔ n’i ɖɔ: “Zakalíi, ma ɖi xɛsi ó, ɖó Mawu se vosisa towe, asi towe Elizabɛ́ti ná ji vǐ súnnu ɖokpó nú we, bɔ a ná sun nyǐ i ɖɔ Jaan. 14 A ná j’awǎ bɔ xomɛ ná hun we tawun, lobɔ mɛ gěgé ná j’awǎ ɖó jiji tɔn wú, 15 ɖó é ná nyí mɛ nukúnɖéjí ɖo Jexóva* nukúnmɛ. Amɔ̌, é ɖó ná nu vɛ̌ɛn alǒ ahan syɛ́nsyɛ́n ɖěbǔ kpálíkpálí ǎ, Mawu ná ná ɛ gbigbɔ mímɛ́ cóbɔ è tlɛ ná ji i.* 16 É ná lɛ́ kɔ nú Izlayɛ́li ví gěgé wá Jexóva* Mawu yětɔn gɔ́n. 17 Gɔ́ ná ɔ, kpó gbigbɔ Elíi tɔn kpó, kpódó hlɔ̌nhlɔ́n Elíi tɔn kpán ɔ, é ná jɛ nukɔn nú Mawu; é ná bló bɔ ayi tɔ́ lɛ́ tɔn ná cí vǐ lɛ́ tɔn ɖɔhun,* bo ná bló bɔ tótlítɔ́ lɛ́ ná ɖó nǔnywɛ́ nǔjlɔ́jlɔ́watɔ́ lɛ́ tɔn. É ná wa mɔ̌ bo ná mɔ tɛn dó bló bɔ yě ná nyí togun e è sɔ́ nǔ ná nú Jexóva* é.”

18 Zakalíi ɖɔ nú wɛnsagun ɔ ɖɔ: “Nɛ̌ un ka sixú kú dó énɛ́ jí gbɔn? Ðó un ko kpo bɔ asi ce sín xwe ka ko lɛ́ sɛ yi tawun.” 19 Wɛnsagun ɔ ka yí gbe n’i ɖɔ: “Nyɛ wɛ nyí Gabliyɛ́li e nɔ nɔ te ɖo Mawu nukɔn é, è sɛ́ mì dó bónú má ɖɔ xó xá we, lobo jlá wɛn ɖagbe énɛ́ we. 20 Amɔ̌, ɖɛ̌ towe ná kú, bɔ a sɔ́ ná kpé wú bo ná nɔ ɖɔ xó ǎ, káká jɛ gbe e gbe nǔ énɛ́ lɛ́ ná jɛ dó é, ɖó a ɖi nǔ nú xó ce lɛ́, éé ná jɛnu dó hwetɔnnu é ǎ wútu.” 21 Hwenɛ́nu ɔ, mɛ lɛ́ kpo ɖo te kpɔ́n Zakalíi, bɔ é kpácá yě ɖɔ é lín sɔmɔ̌ ɖo tɛn mímɛ́ ɔ mɛ. 22 Ée é tɔ́n é ɔ, é kpé wú bo ɖɔ xó nú yě ǎ, bɔ yě mɔ ɖɔ nǔjíwǔ ɖé wɛ é mɔ* tlóló ɖo tɛn mímɛ́ ɔ mɛ. É nɔ ɖo alɔ bló nú yě wɛ, amɔ̌, é kpé wú bo ɖɔ xó ǎ. 23 Ée azǎn e é ná wa sinsɛnzɔ́ mímɛ́ tɔn ná lɛ́ é wá vivɔnu é ɔ, é ɖidó xwé tɔn gbe.

24 Azǎn ɖé lɛ́ gúdo ɔ, asi tɔn Elizabɛ́ti mɔ xo, bo sɔ́ nɔ tɔ́n sín xwégbe ǎ káká nú sun atɔ́ɔ́n, bo nɔ ɖɔ: 25 “Lěe Jexóva* wa nǔ xá mì gbɔn ɖo azǎnví élɔ́ lɛ́ mɛ é ɖíe: É lɛ́ kɔ kpɔ́n mì, bo ná ɖe winnyá nú mì ɖo gbɛtɔ́ lɛ́ tɛ́ntin.”

26 Ée Elizabɛ́ti sín adɔgo ɖo sun ayizɛ́ngɔ́ ɔ mɛ é ɔ, Mawu sɛ́ wɛnsagun Gabliyɛ́li dó toxo Galilée tɔn, ée è nɔ ylɔ́ ɖɔ Nazalɛ́ti é mɛ. 27 É sɛ́ ɛ dó ɖyɔ̌vǐ ɖo alɔ jí ɖé gɔ́n, bɔ é nyí asixɔ́ntɔn nú nya e gosín xwédo Davídi tɔn mɛ, bo nɔ nyí Jozɛ́fu é. Ðyɔ̌vǐ ɖo alɔ jí ɔ nɔ nyí Mali. 28 Ée wɛnsagun ɔ wá é ɔ, é ɖɔ n’i ɖɔ: “Kú dó lěhwenu, hwi mɛ e è jɔ wǔ titewungbe é, Jexóva* ɖo kpɔ́ xá we.” 29 Amɔ̌, Mali sín ayi gba dó ɖésú, ɖó xó tɔn lɛ́ wú, bɔ é tɛ́n kpɔ́n bo ná mɔ nukúnnú jɛ gbedómɛ alɔkpa e énɛ́ sixú ko nyí é mɛ. 30 Énɛ́ wú ɔ, wɛnsagun ɔ ɖɔ n’i ɖɔ: “Mali, ma ɖi xɛsi ó, ɖó Mawu jɔ wǔ we. 31 Éɖíe! A ná mɔ xo, bo ná ji vǐ súnnu ɖokpó, bo ná sun nyǐ i ɖɔ Jezu. 32 É ná nyí mɛ nukúnɖéjí ɖé, bɔ è ná ylɔ́ ɛ ɖɔ Ajalɔ̌nlɔn sín Vǐ, lobɔ Jexóva* Mawu ná ná ɛ axɔ́súzinkpo tɔ́ tɔn Davídi tɔn. 33 É ná nyí Axɔ́sú ɖo kúnkan Jakɔ́bu tɔn lɛ́ nu káká sɔ́yi, bɔ Axɔ́súɖuto tɔn ná wá vivɔnu gbeɖé ǎ.”

34 Amɔ̌, Mali ɖɔ nú wɛnsagun ɔ ɖɔ: “Nɛ̌ nǔ ka ná nyí mɔ̌ gbɔn? Nyi ɖíe ma tuun súnnu kpɔ́n ǎ è.” 35 Wɛnsagun ɔ ka yí gbe n’i ɖɔ: “Gbigbɔ mímɛ́ ná wá jǐ towe, bɔ hlɔ̌nhlɔ́n Ajalɔ̌nlɔn ɔ tɔn ná nɔ jǐ we. Ðó hwɛjijɔ énɛ́ wú ɔ, è ná ylɔ́ vǐ e è ná ji é ɖɔ mɛ mímɛ́, Vǐ Mawu tɔn. 36 Éɖíe! Hɛ̌nnumɔ towe Elizabɛ́ti e mɛ lɛ́ nɔ ylɔ́ ɖɔ wɛnsinɔ é ko kpo có, é lɔmɔ̌ mɔ xo bo ná ji vǐ súnnu ɖokpó, bɔ adɔgo ɔ ko ɖo sun ayizɛ́n bló wɛ; 37 ɖó xó e Mawu ɖɔ é ɖěbǔ ná gblá ǎ.”* 38 Énɛ́ gúdo ɔ, Mali ɖɔ: “Mɛsɛntɔ́ Jexóva* tɔn wɛ nú mì, nǔ ní nyí mɔ̌ nú mì sɔgbe xá xó e a ɖɔ é.” Énɛ́ ɔ, wɛnsagun ɔ gosín gɔ̌n tɔn.

39 Énɛ́ wú ɔ, ɖo azǎn yɔywɛ ɖé gúdo ɔ, Mali sɔ́ nǔ bo yá wǔ ɖidó to mɛ. É ɖidó toxo Judáa tɔn e ɖo sókan mɛ é ɖé mɛ, 40 bo byɔ́ Zakalíi xwégbe, lobo dó gbe nú Elizabɛ́ti. 41 Ée Elizabɛ́ti se gbedómɛ Mali tɔn é ɔ, vǐ e ɖo xo tɔn mɛ é dán wǔ, bɔ gbigbɔ mímɛ́ sísɛ́ Elizabɛ́ti, 42 bɔ é sú xó tlílí bo ɖɔ: “Nǔ nyɔ́ nú we ɖo nyɔ̌nu lɛ́ tɛ́ntin, nǔ nyɔ́ nú vǐ e a ná ji é! 43 Nɛ̌ è ka ɖɔ gbɔn bo jɔ wǔ mì, bɔ Aklúnɔ ce sín nɔ wá ba mì kpɔ́n? 44 Ée un se gbedómɛ towe lě é ɔ, é víví nú vǐ e ɖo xo ce mɛ é, b’ɛ dán wǔ. 45 Awǎjijɛnɔ wɛ nyí nyɔ̌nu e ɖi nǔ é lɔ, ɖó nǔ énɛ́ lɛ́ e Jexóva* ɖɔ n’i é ná jɛnu bǐ mlɛ́mlɛ́.”

46 Mali ɖɔ: “Lǐndɔ̌n ce* ɖo susu kpa nú Jexóva* wɛ, 47 bɔ ayi ce ɖo awǎjijɛ ɖaxó mɛ ɖó Mawu Mɛhwlɛ́ngántɔ́ ce wú, 48 ɖó é nyi kɔ kpɔ́n mɛsɛntɔ́ tɔn nyɔ̌nu éé ma sɔ atɛ́n ǎ é. Bɛ́sín din ɔ, jijimɛ lɛ́ bǐ ná ɖɔ ɖɔ un nyí awǎjijɛnɔ, 49 ɖó Mɛ hlɔ̌nhlɔ́nnɔ ɔ wa nǔ ɖaxó ɖaxó lɛ́ nú mì, bɔ nyǐkɔ tɔn ɔ, nǔ mímɛ́ wɛ. 50 É nɔ kú nǔbláwǔ nú mɛ ɖěɖěe nɔ ɖó sísí e gɔ́ngɔ́n é n’i lɛ́ é, sín jijimɛ ɖě jɛ ɖěvo jí. 51 É zán hlɔ̌nhlɔ́n tɔn dó bló nǔ ɖaxó ɖaxó lɛ́ ná; é gba mɛ ɖěɖěe ɖó linlin goyíyí tɔn ɖo ayi mɛ lɛ́ é dó. 52 É ɖe súnnu hlɔ̌nhlɔ́nnɔ lɛ́ sín axɔ́súzinkpo lɛ́ jí, bo sɔ́ mɛ e ma sɔ atɛ́n ǎ lɛ́ é dó jǐ; 53 é bló bɔ mɛ e ɖo hudó mɛ lɛ́ é mɔ nǔ ɖagbe lɛ́, b’ɛ jɛmɛ nú yě; é nyi dɔkunnɔ lɛ́ asígbá alɔgbá. 54 É wá dó alɔ mɛsɛntɔ́ tɔn Izlayɛ́li, é kú nǔbláwǔ 55 nú Ablaxámu kpó kúnkan* tɔn kpó káká sɔ́yi, lěe é ko ɖɔ gbɔn nú tɔ́gbó mǐtɔn lɛ́ é.” 56 Mali nɔ gɔ̌n tɔn nú sun atɔn mɔ̌, bɔ énɛ́ gúdo ɔ, é lɛ́ kɔ yi xwé.

57 Hwenu e Elizabɛ́ti ná ji vǐ dó é su lo, bɔ é ji vǐ súnnu ɖokpó. 58 Nɔzo tɔn lɛ́ kpó hɛ̌nnumɔ tɔn lɛ́ kpó se ɖɔ Jexóva* kú nǔbláwǔ ɖaxó n’i, bɔ yě j’awǎ xá ɛ. 59 Azǎn tɔn tántɔngɔ́ ɔ gbe ɔ, yě wá bo jló ná gbo ada nú vǐ ɔ, lobo jló ná sun nyǐ i ɖɔ Zakalíi tɔ́ tɔn ɖɔhun. 60 Nɔ tɔn ka ɖɔ nú yě ɖɔ: “Éǒ! Jaan wɛ è ná nɔ ylɔ́ ɛ ɖɔ.” 61 Yě ka ɖɔ n’i ɖɔ: “Hɛ̌nnumɔ towe lɛ́ ɖě ɖó nyǐkɔ énɛ́ ǎ.” 62 Énɛ́ gúdo ɔ, yě bló alɔ nú vǐtɔ́ ɔ dó kanbyɔ́ ɛ ɖɔ nɛ̌ é ka jló ɖɔ è ní sun nyǐ vǐ ɔ ɖɔ a jí. 63 É byɔ́ awǐnnyatɛ ɖé bo wlán d’é jí ɖɔ: “Jaan wɛ nyǐkɔ tɔn nyí.” Bɔ é kpácá yě bǐ. 64 Tlóló ɔ, ɖɛ̌ tɔn tún kan bɔ é kpé wú bo jɛ xó ɖɔ jí, lobo nɔ kpa susu nú Mawu. 65 Xɛsi jɛ mɛ e nɔ nɔ xá yětɔn mɛ lɛ́ é bǐ jí, bɔ è jɛ nǔ énɛ́ lɛ́ bǐ sín xó ɖɔ jí gbɔn sókan mɛ sín xá Judée tɔn ɔ bǐ mɛ. 66 Mɛ e se lɛ́ é bǐ hɛn dó ayi mɛ bo nɔ ɖɔ: “Étɛ́ nyí gbé vǐ kpɛví élɔ́ ka ja?” Ðó hlɔ̌nhlɔ́n Jexóva* tɔn ɖo kpɔ́ xá ɛ nǔgbó.

67 Énɛ́ gúdo ɔ, Mawu ná gbigbɔ mímɛ́ vǐ ɔ sín tɔ́ Zakalíi bɔ é dó wɛn Mawu tɔn ɖé bo nɔ ɖɔ: 68 “Susu nú Jexóva* Mawu Izlayɛ́li tɔn, ɖó é lɛ́ kɔ kpɔ́n togun tɔn bo hwlɛ́n ɛ gán. 69 É ná mǐ mɛhwlɛ́ngántɔ́ hlɔ̌nhlɔ́nnɔ ɖokpó ɖo mɛsɛntɔ́ tɔn Davídi sín xwégbe, 70 lěe é ko ɖɔ ɖ’ayǐ xóxó gbɔn gbeyíɖɔ mímɛ́ tɔn lɛ́ sín nu mɛ é. 71 É d’akpá bo ná hwlɛ́n mǐ sín kɛntɔ́ mǐtɔn lɛ́ sí, lobo lɛ́ hwlɛ́n mǐ sín mɛ e gbɛ́ wǎn nú mǐ lɛ́ é bǐ sín alɔ mɛ. 72 É ná kú nǔbláwǔ nú mǐ, lěe é ko d’akpá nú tɔ́gbó mǐtɔn lɛ́ gbɔn é, bo ná flín akɔjijɛ tɔn mímɛ́ ɔ; 73 nǔ e é xwlé nú tɔ́gbó mǐtɔn Ablaxámu é nɛ́. 74 Ényí é hwlɛ́n mǐ sín kɛntɔ́ mǐtɔn lɛ́ sín alɔ mɛ gúdo ɔ, é ná jɔ wǔ mǐ bɔ mǐ ná nɔ wa sinsɛnzɔ́ mímɛ́ n’i ma ɖi xɛsi, 75 bo ná dó nɔ gbejí, lobo lɛ́ wa nǔ jlɔ́jlɔ́ ɖo nukɔn tɔn nú gbɛhwenu mǐtɔn bǐ. 76 Amɔ̌, hwɛ vǐ ce ɔ, è ná ylɔ́ we ɖɔ gbeyíɖɔ Ajalɔ̌nlɔn ɔ tɔn, ɖó a ná jɛ nukɔn nú Jexóva* bo ná sɔ́ nǔ nú ali tɔn lɛ́, 77 lobo ná jlá togun tɔn ɖɔ é ná hwlɛ́n yě gán gbɔn hwɛ yětɔn lɛ́ sísɔ́ kɛ yě gblamɛ, 78 ɖó nǔbláwǔkúnúmɛ Mawu mǐtɔn tɔn e gɔ́ngɔ́n é wútu. Nǔbláwǔkúnúmɛ énɛ́ e gosín jǐxwé é ná hɔ́n dó mǐ jí hwe tɔ́n zǎnzǎn ɖɔhun. 79 É ná ná wěziza mɛ ɖěɖěe jínjɔ́n ayǐ ɖo ablu mɛ, bo ɖo kú sín yɛtɛn lɛ́ é, lobo ná xlɛ́ ali afɔ mǐtɔn lɛ́ ɖo fífá sín ali ɔ jí.”

80 Vǐ kpɛví ɔ su ɖo agbaza lixo, bo lɛ́ lí dǒ ɖo gbigbɔ lixo. É nɔ gbětótló mɛ káká jɛ azǎn e gbe é ɖe éɖée xlɛ́ Izlayɛ́li ɖo agbawungba é.

2 Hwenɛ́nu ɔ, Sezáa Ogwísi ɖe gbetakɛ́n ɖé tɔ́n ɖɔ mɛ e ɖo ayǐkúngban ɔ jí lɛ́ é bǐ ní dó nyǐkɔ yětɔn wěma mɛ. 2 (Hwenu e Kiliniwúsi nyí tokpɔngán Silíi tɔn é wɛ è dó nyǐkɔ wěma mɛ azɔn nukɔntɔn ɔ.) 3 Mɛ ɖokpó ɖokpó lɛ́ kɔ yi toxo éɖésúnɔ tɔn mɛ, bo ná yi dó nyǐkɔ wěma mɛ. 4 Nǔgbó ɔ, Jozɛ́fu ɖésú gosín toxo Nazalɛ́ti tɔn mɛ ɖo Galilée bo lɛ́ kɔ yi toxo Davídi tɔn e è nɔ ylɔ́ ɖɔ Bɛteleyɛ́mu é mɛ ɖo Judée, ɖó é ɖo xwédo Davídi tɔn mɛ, bo gosín kúnkan tɔn mɛ wútu. 5 É yi nyǐkɔ dó wěma mɛ gbé, é kpó asi tɔn Mali kpó, vǐjiji Mali tɔn ka ko sɛkpɔ́. 6 Ée yě ɖo dɔ̌n é ɔ, hwenu e é ná ji vǐ dó é su. 7 Bɔ é ji vǐ súnnu tɔn nukɔngbéví ɔ. É bú avɔ dó è bo sɔ́ ɛ mlɔ́ nǔ e mɛ kanlin lɛ́ nɔ ɖu nǔ ɖe é mɛ, ɖó yě mɔ tɛnmɛ ɖo fí e alitanu lɛ́ nɔ yi jɛ é ǎ.

8 Ðo xá ɖokpó ɔ mɛ ɔ, lɛ̌ngbɔ́nyitɔ́ ɖé lɛ́ nɔ nɔ gle lɛ́ mɛ bo nɔ ɖo lɛ̌ngbɔ́hwan yětɔn lɛ́ cɔ́ wɛ ɖo zǎnmɛ. 9 Ajijimɛ ɔ, wɛnsagun Jexóva tɔn tɔ́n dó yě jí, bɔ susu Jexóva* tɔn hɔ́n lɛ́ lɛ̌ dó yě, bɔ xɛsi ɖi yě tawun. 10 Amɔ̌, wɛnsagun ɔ ɖɔ nú yě ɖɔ: “Mi ma ɖi xɛsi ó, wɛn ɖagbe e ná dó awǎjijɛ ɖaxó nú mɛ lɛ́ bǐ é jlá mi wɛ un ɖe. 11 Ðó égbé ɔ, è ji mɛhwlɛ́ngántɔ́ ɖé nú mi ɖo toxo Davídi tɔn mɛ, é wɛ nyí Klísu Aklúnɔ ɔ. 12 Lěe mi ná tuun i gbɔn é ɖíe: Mi ná mɔ yɛ̌yɛ́ví ɖokpó bɔ è bú avɔ dó è, bɔ é ɖo ayǐmlɔ́mlɔ́ ɖo nǔ e mɛ kanlin lɛ́ nɔ ɖu nǔ ɖe é mɛ.” 13 Ajijimɛ ɔ, ahwankpá jǐxwé tɔn wɔ̌búwɔ́bú ɖé wá gɔ́ nú wɛnsagun ɔ, bɔ yě jɛ susu kpa nú Mawu jí, lobo nɔ ɖɔ: 14 “Susu nú Mawu ɖo jǐ aga, fífá ní nɔ kpɔ́ xá mɛ ɖěɖěe sín nǔ nyɔ́ Mawu nukúnmɛ lɛ́ é ɖo ayǐkúngban jí.”

15 Énɛ́ wú ɔ, ée wɛnsagun lɛ́ gosín gɔ̌n yětɔn bo ɖidó jǐxwé gúdo é ɔ, lɛ̌ngbɔ́nyitɔ́ lɛ́ jɛ ɖiɖɔ nú yěɖée lɛ́ jí ɖɔ: “Mi nú mǐ ní yi Bɛteleyɛ́mu din tlóló, bá kpɔ́n nǔ e jɛ bɔ Jexóva* ɖe xlɛ́ mǐ é.” 16 Énɛ́ ɔ, yě yá wǔ yi, bo mɔ Mali kpó Jozɛ́fu kpó, bɔ yɛ̌yɛ́ví ɔ ɖo ayǐmlɔ́mlɔ́ ɖo nǔ e mɛ kanlin lɛ́ nɔ ɖu nǔ ɖe é mɛ. 17 Ée yě mɔ mɔ̌ é ɔ, yě ɖɔ wɛn e è dó yě bɔ é kunkplá vǐ kpɛví ɔ é. 18 Nǔ e lɛ̌ngbɔ́nyitɔ́ lɛ́ ɖɔ é kpácá mɛ e se lɛ́ é bǐ, 19 amɔ̌, Mali jɛ xó énɛ́ lɛ́ bǐ hɛn dó ayi mɛ jí, bo nɔ ɖo tamɛ lin dó tínmɛ yětɔn jí wɛ. 20 Énɛ́ gúdo ɔ, lɛ̌ngbɔ́nyitɔ́ lɛ́ lɛ́ kɔ bo ɖo susu kpa nú Mawu wɛ, lobo ɖo mlǎmlá ɛ wɛ, ɖó nǔ e yě se lɛ́ é kpó nǔ e yě mɔ lɛ́ é kpó sɔgbe xá nǔ e è ko ɖɔ nú yě é.

21 Azǎn tántɔngɔ́ ɔ gbe hwenu e è jló ná gbo ada nú vǐ ɔ é ɔ, è sun nyǐ i ɖɔ Jezu, nyǐkɔ énɛ́ ɔ wɛ wɛnsagun ɔ ɖɔ è ná ylɔ́ ɛ ɖɔ cóbɔ è wá mɔ xo tɔn.

22 Gɔ́ ná ɔ, ée hwe ɔ nu su bɔ è ná slá wǔ nú yě sɔgbe xá Mɔyízisɛ́n ɔ é ɔ, yě kplá ɛ wá Jeluzalɛ́mu, bo ná sɔ́ ɛ xwlé Jexóva,* 23 lěe è ko wlán gbɔn ɖo sɛ́n Jexóva* tɔn mɛ é: “Súnnu nukɔngbéví lɛ́ bǐ ná nyí mɛ mímɛ́* nú Jexóva.”* 24 Yě lɛ́ sá vɔ̌ sɔgbe xá nǔ e è ɖɔ ɖo sɛ́n Jexóva tɔn mɛ é: “Xwelé we alǒ ahwannɛ́ kpɛví kpɛví we.”

25 Nya ɖé ka ɖo Jeluzalɛ́mu bo nɔ nyí Sinmɛnyɔ́ɔ, nya nǔjlɔ́jlɔ́watɔ́ ɖé wɛ bo nɔ tɛ́ dó Mawu wú; é ɖo te kpɔ́n hwenu e Mawu ná dó gbɔ nú Izlayɛ́li dó é, bɔ gbigbɔ mímɛ́ ɖo jǐ tɔn. 26 Gɔ́ ná ɔ, Mawu ɖe xlɛ́ ɛ gbɔn gbigbɔ mímɛ́ gblamɛ ɖɔ é ná to mɔ Klísu, mɛ e Jexóva* sɔ́ é cóbó ná kú. 27 Din ɔ, gbigbɔ mímɛ́ sísɛ́ ɛ bɔ é wá tɛ́npli ɔ mɛ. Ée mɛjitɔ́ Jezu tɔn lɛ́ kplá ɛ wá, bo ná wa nǔ sɔgbe xá nǔ e Sɛ́n ɔ zɔ́n é ɔ, 28 é yí vǐ ɔ dó awa mɛ bo kpa susu nú Mawu lobo ɖɔ: 29 “Din ɔ, Aklúnɔ Nǔbǐwúkpétɔ́, a ɖo mɛsɛntɔ́ towe jó dó wɛ bónú é ná yi ɖo fífá mɛ, sɔgbe xá xó e a ɖɔ é, 30 ɖó nukún ce lɛ́ ko mɔ mɛ e ná hɛn hwlɛngán wá, 31 bɔ a ko sɔ́ nǔ ná ɖo togun lɛ́ bǐ nukɔn é. 32 É nyí wěziza e ná ɖe avɔ sín nukúnmɛ nú akɔta lɛ́ é, bo lɛ́ nyí susu nú togun towe Izlayɛ́li.” 33 Vǐ ɔ sín tɔ́ kpó nɔ kpó nɔ ɖo nǔ kanbyɔ́ yěɖée wɛ dó nǔ e è ɖɔ dó wǔ tɔn lɛ́ é wú. 34 Gɔ́ ná ɔ, Sinmɛnyɔ́ɔ xo ɖɛ dó yě jí, bo ɖɔ nú vǐ ɔ sín nɔ Mali ɖɔ: “Kpɔ́n! È sɔ́ vǐ élɔ́ bɔ é ná zɔ́n bɔ mɛ gěgé ná j’ayǐ ɖo Izlayɛ́li bo ná lɛ́ zɔ́n bɔ mɛ gěgé ná sí te, é ná nyí wuntun e wú è ná mɔ xó ɖɔ dó é. 35 È sɔ́ ɛ bo ná dó sixú ɖe linlin e ɖo mɛ gěgé sín ayi mɛ é xlɛ́, amɔ̌ hwɛ ɔ, hwǐ gaga ɖé ná xo we* zlɛ́.”

36 Gbeyíɖɔ nyɔ̌nu Ana e nyí Fanuwɛ́li ví, bo gosín akɔta Acɛ́ɛ tɔn mɛ é ɖo fínɛ́. Nǎwe énɛ́ sín xwe ko sɛ yi tawun. Alɔjí wɛ é ɖe bo wlí alɔ; xwe tɛ́nwe jɛ́n é ka bló xá asú tɔn. 37 Asúkúsi ɖé wɛ n’i, bɔ é ɖo xwe 84 ɖó wɛ. É nɔ gɔn tɛ́npli mɛ gbeɖé ǎ, bo nɔ ɖo sinsɛnzɔ́ mímɛ́ wa wɛ zǎn kéze kpó nubláblá kpó, kpódó vosisa kpán. 38 Hwenɛ́nu ɔ, é sɛkpɔ́ yě bo jɛ kú dó nú Mawu jí, bo nɔ ɖo vǐ ɔ sín xó ɖɔ nú mɛ ɖěɖěe ɖo te kpɔ́n hwlɛngán Jeluzalɛ́mu tɔn lɛ́ é wɛ.

39 Énɛ́ gúdo ɔ, ée yě wa nǔ e Sɛ́n Jexóva* tɔn ɖɔ lɛ́ é bǐ é ɔ, yě lɛ́ kɔ yi toxo yěɖésúnɔ tɔn Nazalɛ́ti ɔ mɛ ɖo Galilée. 40 Vǐ kpɛví ɔ ɖo susu wɛ, bo ɖo hlɔ̌nhlɔ́n ɖó wɛ, nǔnywɛ́ tɔn ɖo jijɛjí wɛ, bɔ fɛ́nú Mawu tɔn ɖo kpɔ́ xá ɛ.

41 Mɛjitɔ́ tɔn lɛ́ ɖó walɔ bo nɔ yi Jeluzalɛ́mu xwewú xwewú nú Dǐndínwáyixwe ɔ. 42 Hwenu e é ɖo xwe 12 ɖó wɛ é ɔ, yě yi xwe ɔ ɖu gbé lěe é ko nyí walɔ yětɔn gbɔn é. 43 Ée yě ɖu xwe ɔ fó bo ɖo kɔ lɛ́ wɛ é ɔ, Jezu cí Jeluzalɛ́mu bɔ mɛjitɔ́ tɔn lɛ́ ɖ’ayi wú ǎ. 44 Yě lin ɖɔ é ɖo mɛ e ɖo tomɛ yi xá yě wɛ lɛ́ é mɛ, bɔ ée yě ko ɖi zɔnlin nú azǎn ɖokpó gúdo é ɔ, yě jɛ biba ɛ jí ɖo hɛ̌nnumɔ yětɔn lɛ́ kpó mɛtuunmɛ yětɔn lɛ́ kpó tɛ́ntin. 45 Amɔ̌, ée yě ma mɔ ɛ ǎ é ɔ, yě lɛ́ kɔ yi Jeluzalɛ́mu bo ba ɛ gbɔn fí bǐ. 46 Azǎn atɔn gúdo ɔ, yě wá mɔ ɛ ɖo tɛ́npli ɔ mɛ, bɔ é ɖo ayǐjínjɔ́n ɖo nǔkplɔ́nmɛtɔ́ lɛ́ tɛ́ntin bo ɖo tó ɖó yě wɛ, lobo lɛ́ ɖo nǔ kanbyɔ́ yě wɛ. 47 Amɔ̌, nukúnnúmɔjɛnǔmɛ tɔn kpó xósin tɔn lɛ́ kpó nɔ jí wǔ nú mɛ e ɖo tó ɖó è wɛ lɛ́ é. 48 Ée mɛjitɔ́ tɔn lɛ́ mɔ ɛ é ɔ, é kpácá yě tawun, bɔ nɔ tɔn ɖɔ n’i ɖɔ: “Vǐ ce, étɛ́wú a ka wa nǔ xá mǐ gbɔn mɔ̌? Nyi kpó tɔ́ towe kpó ɖo biba we wɛ adohu adohu.” 49 É ka ɖɔ nú yě ɖɔ: “Étɛ́wú mi ka ɖo biba mì wɛ? Mi tuun ɖɔ un ɖó ná ɖo Tɔ́ ce xwé ǎ é?” 50 Amɔ̌, yě mɔ nukúnnú jɛ nǔ e ɖɔ nú yě wɛ é ɖe é wú ǎ.

51 Énɛ́ gúdo ɔ, é xwedó yě lɛ́ kɔ yi Nazalɛ́ti, bo kpo ɖo éɖée hwíhwɛ́ dó glɔ̌ yětɔn wɛ.* Gɔ́ ná ɔ, nɔ tɔn hɛn xó énɛ́ lɛ́ bǐ dó ayi mɛ ganjí. 52 Nǔnywɛ́ Jezu tɔn nɔ ɖo jijɛjí wɛ, bɔ é ɖo susu wɛ, lobɔ nǔ tɔn nɔ ɖo Mawu kpó gbɛtɔ́ lɛ́ kpó nukúnmɛ nyɔ́ wɛ.

3 Ðo axɔ́súɖuɖu Tibɛ́ɛ Sezáa tɔn sín xwe 15gɔ́ ɔ mɛ, hwenu e Pɔ́nsu Pilátu nyí tokpɔngán Judée tɔn é ɔ, Elódu* nyí tokpɔngán* Galilée tɔn, bɔ nɔví tɔn Filípu nyí tokpɔngán Itulée kpó Tlakonitídi kpó tɔn, lobɔ Lisaniyási nyí tokpɔngán Abilɛ́nu tɔn. 2 Hwe énɛ́ nu ɖo vɔ̌sánúxwlémawutɔ́gán Anási kpó Kayífu kpó hwenu ɔ, Mawu ɖɔ xó nú Jaan Zakalíi ví ɔ ɖo gbětótló mɛ.

3 Énɛ́ ɔ, é gbɔn to e lɛ́ lɛ̌ dó Judɛ́ɛn tɔ ɔ lɛ́ é bǐ mɛ, bo nɔ jlá ɖɔ mɛ lɛ́ ɖó ná bló batɛ́mu, bɔ é ná nyí xlɛ̌ hwɛvɛ́númɛ* tɔn, lobonú Mawu ná sɔ́ hwɛ yětɔn lɛ́ kɛ yě. 4 Énɛ́ jɛ, lěe è ko wlán ɖ’ayǐ gbɔn ɖo wěma gbeyíɖɔ Ezayíi tɔn mɛ é: “Gbe ɖé ɖo ɖiɖi wɛ sín gbětótló mɛ bo nɔ ɖɔ: ‘Mi bló ali Jexóva* tɔn ɖó! Mi jlɔ́ ali tɔn lɛ́. 5 È ɖó ná bló bɔ tɔdo lɛ́ bǐ ná gɔ́; è ɖó ná gbígbá só ɖaxó lɛ́ bǐ kpó só kpɛví lɛ́ bǐ kpó; è ɖó ná jlɔ́ ali e gɔ́ndɔ́n lɛ́ é kpó ali e nyí kpóɖědoɖě lɛ́ é kpó; 6 énɛ́ ɔ, gbɛtɔ́ lɛ́ bǐ ná mɔ hwlɛngán Mawu tɔn.’”*

7 Jaan jɛ ɖiɖɔ nú ahwan e ɖo wǐwá wɛ bónú é ná bló batɛ́mu nú yě lɛ́ é jí ɖɔ: “Jakpata kúnkan è mi, mɛ̌ ka gb’akpá nú mi ɖɔ mi ní hɔn nú xomɛsin e ja é? 8 Ényí mɔ̌ hǔn, mi ní ná sínsɛ́n e jɛxá hwɛvɛ́númɛ* lɛ́ é. Mi ma jɛ ɖiɖɔ nú miɖée jí ɖɔ: ‘Ablaxámu wɛ nyí tɔ́ mǐtɔn’ ó. Ðó má ɖɔ nú mi, Mawu kpé wú bo ná sɔ́ awǐnnya énɛ́ lɛ́ dó húzú vǐ nú Ablaxámu. 9 Nǔgbó ɔ, asyɔ́ ko ɖo atín lɛ́ sín ɖɔ wú. Hǔn, atín ɖěbǔ e ma nɔ ná sínsɛ́n ɖagbe ǎ é ɔ, è ná sɛ́n ɛ bo ná sɔ́ nyi myɔ mɛ.”

10 Ahwan ɔ kanbyɔ́ Jaan ɖɔ: “Étɛ́ mǐ ka ɖó ná wa lo?” 11 É ka yí gbe nú yě ɖɔ: “Mɛ e ɖó awu we* é ní má xá mɛ e ma ɖó ɖě ǎ é, bónú mɛ e ɖó nǔɖé bo ná ɖu é ní wa nǔ ɖokpó ɔ.” 12 Tokwɛ́yítɔ́ lɛ́ lɔ tlɛ wá bo ná bló batɛ́mu, bɔ yě ɖɔ n’i ɖɔ: “Mɛ̌si, étɛ́ mǐ ka ɖó ná wa?” 13 É ɖɔ nú yě ɖɔ: “Mi ma byɔ́* takwɛ́ ɖěbǔ zɛ ée è ɖó ná sú é wú ó.” 14 Gɔ́ ná ɔ, sɔ́ja lɛ́ kanbyɔ́ ɛ ɖɔ: “Étɛ́ mǐ ka ɖó ná wa?” Bɔ é ɖɔ nú yě ɖɔ: “Mi ma gbídí kɔ nú mɛ ɖěbǔ* alǒ dó hwɛ agɔ mɛ ɖěbǔ ó, loɔ, nǔ e è nɔ ná mi lɛ́ é* ní nɔ kpé mi.”

15 Din ɔ, mɛ lɛ́ ɖo nukúnɖíɖó mɛ, bɔ yě bǐ nɔ kanbyɔ́ yěɖée dó Jaan wú ɖɔ: “Klísu ɔ wɛ ka n’i vlafo a?” 16 Jaan ná xósin ɔ bo ɖɔ nú yě bǐ ɖɔ: “Nyɛ ɔ, un sɔ́ sin dó ɖo batɛ́mu bló nú mi wɛ, amɔ̌, mɛ e ɖó acɛ hú mì é jawě, mɛ énɛ́ ɔ, un jɛxá bo ná tún afɔkpakan tɔn lɛ́ ǎ. É ná sɔ́ gbigbɔ mímɛ́ kpó myɔ kpó dó bló batɛ́mu nú mi. 17 Pɛ́li tɔn e é nɔ dó fún nǔ ná é ɖo alɔ tɔn mɛ; é ná za nǔkúnsótɛn tɔn bǐ mlɛ́mlɛ́ lobo ná kplé blěe lɛ́ dó agɔ̌ tɔn mɛ, amɔ̌ fló lɛ́ ɔ, é ná sɔ́ myɔ e è ma sixú cí ǎ é dó fyɔ́ yě.”

18 É lɛ́vɔ́ dó wǔsyɛ́n lanmɛ nú yě ɖo ali gěgé ɖěvo lɛ́ nu, bo kpó ɖo wɛn ɖagbe ɔ jlá togun ɔ wɛ. 19 Amɔ̌, é kɛ nu dó nǔ wú nú tokpɔngán Elódu dó nǔ e kunkplá nɔví tɔn sín asi Elodiadi é kpó nǔ nyanya tobutóbú e é wa lɛ́ é kpó wú, 20 énɛ́ wú ɔ, Elódu lɛ́ wa nǔ nyanya ɖěvo: É sú Jaan dó gankpá mɛ.

21 Hwenu e é bló batɛ́mu nú mɛ lɛ́ bǐ é ɔ, é bló batɛ́mu nú Jezu lɔ. Ée Jezu ɖo ɖɛ xo wɛ é ɔ, jǐnukúnsin hun, 22 bɔ gbigbɔ mímɛ́ cí ahwannɛ́ ɖɔhun bo jɛ te dó jǐ tɔn, lobɔ gbe ɖé ɖi sín jǐxwé bo ɖɔ: “Vǐ súnnu ce vívɛ́ná ɔ wɛ a nyí, xomɛ nɔ hun mì dó wǔtu towe.”

4 Énɛ́ gúdo ɔ, Jezu gosín Judɛ́ɛn tɔ ɔ tó, Mawu ná ɛ gbigbɔ mímɛ́, bɔ gbigbɔ énɛ́ kplá ɛ yi gbětótló mɛ. 2 É nɔ fínɛ́ nú azǎn 40, bɔ Awǒvi tɛ́n ɛ kpɔ́n. É ɖu nǔ ɖěbǔ ɖo azǎn énɛ́ lɛ́ jí ǎ, énɛ́ wú ɔ, ɖo azǎn kanɖé lɛ́ sín vivɔnu ɔ, xovɛ́ sin i. 3 Énɛ́ ɔ, Awǒvi ɖɔ n’i ɖɔ: “Ényí vǐ Mawu tɔn jɛ́n a nyí hǔn, ɖɔ nú awǐnnya élɔ́ ɖɔ é ní húzú wɔ̌xúxú.” 4 Amɔ̌, Jezu yí gbe n’i ɖɔ: “È ko wlán ɖɔ: ‘Nǔɖuɖu kɛ́ɖɛ́ wɛ nɔ hɛn mɛ ɖó gbɛ ǎ.’”

5 Awǒvi ka kplá ɛ yi fí e yi jǐ é ɖé, bo xlɛ́ ɛ axɔ́súɖuto e ko ɖo ayǐkúngban jí lɛ́ é bǐ ɖo nukúnxwixwe ɖokpó mɛ. 6 Énɛ́ gúdo ɔ, é ɖɔ n’i ɖɔ: “Un ná ná we acɛ énɛ́ lɛ́ bǐ kpó susu yětɔn kpó, ɖó è ko bɛ́ yě dó acɛ ce glɔ́, bɔ un nɔ ná mɛ ɖěbǔ e jló mì é. 7 Énɛ́ wú ɔ, ényí a sɛn mì azɔn ɖokpó kpowun ɔ, bǐ xwíí ná nyí towe.” 8 Jezu ka yí gbe n’i ɖɔ: “È ko wlán ɖɔ: ‘Jexóva* Mawu towe wɛ a ɖó ná sɛn, lobɔ éɖokpónɔ géé wɛ a ɖó ná wa sinsɛnzɔ́ mímɛ́ ná.’”

9 Énɛ́ gúdo ɔ, é kplá ɛ yi Jeluzalɛ́mu, bo sɔ́ ɛ ɖó tɛ́npli ɔ ta,* lobo ɖɔ n’i ɖɔ: “Ényí vǐ Mawu tɔn jɛ́n a nyí hǔn, lɔ̌n jɛ te sín fí, 10 ɖó è ko wlán ɖɔ: ‘É ná ɖe gbe nú wɛnsagun tɔn lɛ́ dó ta towe mɛ ɖɔ yě ní nya xɛ ɖo jǐ towe,’ 11 lobɔ: ‘Yě ná hɛn we dó alɔ yětɔn lɛ́ mɛ, bónú a ní ma klɛ́n afɔ dó awǐnnya ɖěbǔ wú ó.’” 12 Jezu ka yí gbe n’i ɖɔ: “È ko ɖɔ: ‘A ɖó ná tɛ́n Jexóva* Mawu towe kpɔ́n ǎ.’” 13 Ée Awǒvi tɛ́n ɛ kpɔ́n fó gúdo é ɔ, é jó è dó bo yi, káká jɛ hweɖévonu e ná nyɔ́ dó é.

14 Din ɔ, Mawu ná gbigbɔ mímɛ́ Jezu, bɔ é lɛ́ kɔ yi Galilée. Nǔ ɖagbe e wa wɛ é ɖe lɛ́ é sín xó gba kpé to e lɛ́ lɛ̌ dó fínɛ́ lɛ́ é bǐ mɛ. 15 Gɔ́ ná ɔ, é jɛ nǔ kplɔ́n mɛ jí ɖo kplɔ́ngbasá e ɖo fínɛ́ lɛ́ é, bɔ mɛ bǐ ɖo susu kpa n’i wɛ.

16 Énɛ́ gúdo ɔ, é yi Nazalɛ́ti fí e é su ɖe é, bɔ lěe é ko nɔ bló gbɔn ɖo gbɔjɛzángbe lɛ́ é ɔ, é byɔ́ kplɔ́ngbasá ɔ bo sí te bá xa nǔwlánwlán mímɛ́ lɛ́. 17 Énɛ́ wú ɔ, è sɔ́ wěma mlámlá gbeyíɖɔ Ezayíi tɔn n’i, bɔ é hun wěma mlámlá ɔ dó fí e è wlán xó élɔ́ lɛ́ dó é: 18 “Gbigbɔ Jexóva* tɔn ɖo jǐ ce, ɖó é sɔ́ mì, bónú má jlá wɛn ɖagbe wamamɔnɔ lɛ́. É sɛ́ mì dó, bónú má jlá mɛ e ɖo mɛ kannu lɛ́ é ɖɔ yě jɛ yěɖée sí, bo jlá mɛ e tɔ́n nukún lɛ́ é ɖɔ nukún yětɔn lɛ́ hun, bónú má tún kan nú mɛ e gbídí kɔ ná wɛ è ɖe lɛ́ é, 19 lobonú má jlá ɖɔ hwenu su nú Jexóva,* bɔ é ná ná fɛ́nú gbɛtɔ́ lɛ́.” 20 Énɛ́ ɔ, é mlá wěma mlámlá ɔ bo sɔ́ jó nú mɛ e nɔ kpé nukún dó kplɔ́ngbasá ɔ sín nǔ lɛ́ wú é, lobo jínjɔ́n ayǐ; mɛ e ɖo kplɔ́ngbasá ɔ lɛ́ é bǐ bɔ nukún nyi wǔtu tɔn tlítlí. 21 Énɛ́ gúdo ɔ, é jɛ ɖiɖɔ nú yě jí ɖɔ: “Nǔwlánwlán mímɛ́ énɛ́ e un xa bɔ mi se din é jɛnu égbé.”

22 Yě mɛ bǐ jɛ kúnnu ɖagbe ɖe dó wǔ tɔn jí, bɔ xó e dɔn mɛ bo ɖo tíntɔ́n sín nu tɔn mɛ wɛ lɛ́ é jí wǔ nú yě, lobɔ yě nɔ ɖɔ: “Jozɛ́fu ví ɔ nɛ́, kabǐ?” 23 Énɛ́ ɔ, é ɖɔ nú yě ɖɔ: “É ɖo wɛn ɖɔ mi ná ɖɔ xó élɔ́ dó wǔtu ce: ‘Dotóo, gbɔ azɔn nú hwiɖée. Nǔ e a bló ɖo Kafaanawúmu bɔ mǐ se lɛ́ é ɔ, blǒ ɖo to towe mɛ fí ɖésú.’” 24 Énɛ́ wú ɔ, é ɖɔ: “Má ɖɔ nǔgbó nú mi, è nɔ yí gbeyíɖɔ ɖěbǔ ɖo to éɖésúnɔ tɔn mɛ ǎ. 25 Ði kpɔ́ndéwú ɔ, má ɖɔ nǔgbó nú mi, ɖo Elíi hwenu ɔ, asúkúsi gěgé wɛ ɖo Izlayɛ́li hwenu e akú ɖó xɔ xwe atɔn sun ayizɛ́n, bɔ adɔ ɖaxó ɖé tɔ́n ɖo to ɔ bǐ mɛ é. 26 É ɖo mɔ̌ có, è sɛ́ Elíi dó nyɔ̌nu énɛ́ lɛ́ ɖě gɔ́n ǎ, loɔ, asúkúsi e ɖo Salɛpúta ɖo Sidɔ́ɔn yíkúngban jí é ɖé gɔ́n wɛ è sɛ́ ɛ dó. 27 Mɔ̌ ɖokpó ɔ, gudunɔ gěgé wɛ ɖo Izlayɛ́li ɖo gbeyíɖɔ Elizée hwenu; é ɖo mɔ̌ có, è gbɔ azɔn nú yě mɛ ɖě ǎ, Naamáni Silíinu ɔ kɛ́ɖɛ́ wɛ è gbɔ ná.” 28 Xomɛ sin mɛ e ɖo kplɔ́ngbasá ɔ bo ɖo xó énɛ́ lɛ́ se wɛ lɛ́ é bǐ, 29 bɔ yě sí te bo dɔn ɛ yi toxo ɔ gúdo, lobo kplá ɛ yi só e jí toxo yětɔn ɖe é sín ahɔn mɛ, bo ná mɔ tɛn dó sísɛ́ ɛ nyi kɔ́mɛ. 30 Amɔ̌, é gbɔn tɛ́ntin yětɔn dín, bo sɔ́ ali tɔn ɖidó.

31 Énɛ́ gúdo ɔ, é yi toxo Kafaanawúmu tɔn mɛ ɖo Galilée. É ɖo nǔ kplɔ́n mɛ lɛ́ wɛ ɖo gbɔjɛzángbe, 32 bɔ lěe é nɔ kplɔ́n nǔ mɛ gbɔn é kpácá yě tawun, ɖó é nɔ ɖɔ xó kpó acɛ kpó. 33 Nya ɖé ka ɖo kplɔ́ngbasá ɔ, bɔ gbigbɔ nyanya ɖé ɖo jǐ tɔn. É sú xó tlílí bo ɖɔ: 34 “Yége! Jezu Nazalɛ́tinu, étɛ́ mǐ kpó hwi kpó ka kpé dó? A wá bo ná sú kún mǐtɔn dó wɛ a? Un tuun mɛ e a nyí é ganjí: Hwi wɛ nyí Mɛ mímɛ́ Mawu tɔn.” 35 Jezu ka gbɛ́ nǔ nú gbigbɔ nyanya ɔ bo ɖɔ: “N’abwɛ̌, bo gosín jǐ tɔn.” Énɛ́ wú ɔ, awǒvi ɔ sɔ́ nya ɔ sɔ́ zin dɛ́ ɖo tɛ́ntin yětɔn, énɛ́ gúdo ɔ, é gosín jǐ tɔn. É ka gblé wǔ i ǎ. 36 Nǔ énɛ́ kpácá yě mɛ bǐ tawun, bɔ yě jɛ ɖiɖɔ nú yěɖée lɛ́ jí ɖɔ: “Xó alɔkpa tɛ́ ka ɖíe? Ðó é nɔ ɖe gbe dó gbigbɔ nyanya lɛ́ kpó acɛ kpó, kpódó hlɔ̌nhlɔ́n kpán, bɔ yě nɔ tɔ́n.” 37 Énɛ́ wú ɔ, Jezu sín xó fɔ́n bo ɖo gbigba kpé fí bǐ wɛ, gbɔn to e lɛ́ lɛ̌ dó fínɛ́ lɛ́ é mɛ.

38 Ée é gosín kplɔ́ngbasá ɔ é ɔ, é yi Sinmɔ́ɔ sín xwégbe. Sinmɔ́ɔ sín asinɔ ka ɖó zozo tawun, bɔ yě byɔ́ Jezu ɖɔ é ní d’alɔ ɛ. 39 Énɛ́ wú ɔ, é sɛkpɔ́ ɛ bo ɖe gbe dó zozo ɔ, bɔ zozo ɔ kɔ́n n’i. Tlóló ɔ, é sí te bo jɛ jǒnɔ yětɔn yí jí.

40 Amɔ̌, ée hwe ɖo xɔ yi wɛ é ɔ, mɛ ɖěɖěe sín mɛ ɖo azɔn tɛnmɛ tɛnmɛ jɛ wɛ lɛ́ é bǐ kplá yě wá nú Jezu. É ka sɔ́ alɔ ɖó yě mɛ ɖokpó ɖokpó jí, bo gbɔ azɔn nú yě. 41 Gɔ́ ná ɔ, awǒvi lɛ́ gosín mɛ gěgé jí bo nɔ sú xó lobo nɔ ɖɔ: “Hwi wɛ nyí Vǐ Mawu tɔn.” Amɔ̌, é gbɛ́ nǔ nú yě, bo nɔ lɔn nú yě ní ɖɔ xó ǎ, ɖó yě tuun ɖɔ é wɛ nyí Klísu ɔ.

42 Ayǐhɔ́ngbe tɔn zǎnzǎn ɔ, é ka gosín fínɛ́ bo ɖidó fí e jɛ zɔ é. Loɔ, ahwan ɔ jɛ biba ɛ jí* bo wá fí e é ɖe é, lobo tɛ́n kpɔ́n bo ná cí jǐ tɔn bónú é ma gosín yě gɔ́n ó. 43 É ka ɖɔ nú yě ɖɔ: “Un ɖó ná jlá wɛn ɖagbe Axɔ́súɖuto Mawu tɔn tɔn mɛ e ɖo toxo ɖě lɛ́ mɛ lɛ́ é lɔmɔ̌, ɖó énɛ́ wú wɛ è sɛ́ mì dó.” 44 Énɛ́ wú ɔ, é ɖidó mawuxó ɖɔ gbé ɖo kplɔ́ngbasá Judée tɔn lɛ́.

5 Gbe ɖokpó ɔ, Jezu ɖo xó Mawu tɔn kplɔ́n mɛ wɛ ɖo tɔgwede Jenɛzalɛ́ti tɔn* tó, bɔ ahwan ɖé ɖo tó ɖó è wɛ, bo jɛ nyǐnyɛ́ sú i jí. 2 É mɔ tɔjíhún we ɖo glǐnglín ɖo tɔgwede ɔ tó, amɔ̌, hwehutɔ́ lɛ́ ko tɔ́n sín mɛ bo ɖo ɖɔ yětɔn lɛ́ hú wɛ. 3 É byɔ́ tɔjíhún lɛ́ ɖokpó mɛ bo ɖɔ nú Sinmɔ́ɔ, mɛ e tɔn tɔjíhún ɔ nyí é ɖɔ é ní sɛ dó zɔ nú agě ɔ kpɛɖé. Énɛ́ gúdo ɔ, é jínjɔ́n ayǐ, bo jɛ nǔ kplɔ́n ahwan ɔ jí sín tɔjíhún ɔ mɛ. 4 Ée é ɖɔ xó nú ahwan ɔ fó é ɔ, é ɖɔ nú Sinmɔ́ɔ ɖɔ: “Kun tɔjíhún ɔ yi fí e gɔ́ngɔ́n é, bónú mi nyi ɖɔ mitɔn lɛ́ bá wlí hweví.” 5 Amɔ̌, Sinmɔ́ɔ yí gbe n’i ɖɔ: “Mɛ̌si, mǐ ko w’azɔ̌ syɛ́nsyɛ́n ɖo zǎn ɔ bǐ mɛ, mǐ ka wlí nǔ ɖě ǎ, amɔ̌, ɖó xó e a ɖɔ é wú ɔ, un ná nyi ɖɔ lɛ́.” 6 Ée yě wa mɔ̌ é ɔ, yě wlí hweví gěgé. Bɔ ɖɔ yětɔn lɛ́ tlɛ jɛ vǔnvún jí. 7 Énɛ́ wú ɔ, yě bló alɔ nú gbɛ̌ yětɔn e ɖo tɔjíhún ɖě ɔ mɛ lɛ́ é ɖɔ yě ní wá dó alɔ émí, bɔ yě wá bo bɛ́ hweví gɔ́ tɔjíhún we lɛ́ káká bɔ tɔjíhún lɛ́ jɛ syɔ́syɔ́ jí. 8 Ée Sinmɔ́ɔ Piyɛ́ɛ mɔ mɔ̌ é ɔ, é jɛ kpo ɖo Jezu nukɔn bo ɖɔ: “Sɛ yi zɔ nú mì, Aklúnɔ, ɖó hwɛhutɔ́ wɛ nú mì.” 9 Ðó lěe hweví e yě wlí é sukpɔ́ gbɔn é kpácá é kpó mɛ ɖěɖěe ɖo kpɔ́ xá ɛ lɛ́ é kpó tawun. 10 Mɔ̌ wɛ é cí nú Zebeɖée ví Jaki kpó Jaan kpó bǐ, éé nyí azɔ̌gbɛ́ Sinmɔ́ɔ tɔn lɛ́ é lɔmɔ̌. Amɔ̌, Jezu ɖɔ nú Sinmɔ́ɔ ɖɔ: “Ma sɔ́ ɖi xɛsi ɖě ó. Bɛ́sín din ɔ, gbɛtɔ́ lɛ́ wɛ a ná nɔ wlí gbɛɖe.” 11 Énɛ́ ɔ, yě kun tɔjíhún lɛ́ wá agě jí, bó jó nǔ bǐ dó, lobo xwedó è.

12 Hweɖévonu e Jezu ɖo toxo lɛ́ ɖokpó mɛ é ɔ, nya e gudu kpé wǔtu tɔn é ɖé ɖo fínɛ́, bɔ ée é mɔ Jezu é ɔ, é xwe agbɔ̌nnusú do bo sa vo n’i ɖɔ: “Aklúnɔ, ényí a jló ɔ, a hɛn ɔ, a ná bló bɔ un ná húzú mɛ mímɛ́.” 13 Énɛ́ ɔ, é dlɛ́n alɔ tɔn, bo y’agba wǔtu tɔn, lobo ɖɔ: “Un jló! Hǔzú mɛ mímɛ́.” Tlóló kpowun ɔ, gudu ɔ bú sín wǔtu tɔn. 14 Énɛ́ gúdo ɔ, é dó sɛ́n nú nya ɔ ɖɔ é ní ma ɖɔ nú mɛ ɖěbǔ ó. Amɔ̌, é ɖɔ n’i ɖɔ: “Yi, bo sɔ́ hwiɖée xlɛ́ vɔ̌sánúxwlémawutɔ́ ɔ, lobo ná nǔníná ɖé ɖó mɛ mímɛ́ e a húzú é wú lěe Mɔyízi zɔ́n gbɔn é, bónú é ná nyí kúnnuɖiɖe nú yě.” 15 Amɔ̌, xó tɔn fɔ́n bo ɖo gbigba kpé wɛ, bɔ ahwan ɖaxó lɛ́ nɔ kplé ɖó kpɔ́ bo ná ɖótó è, lobonú é ná lɛ́ gbɔ azɔn nú yě. 16 É ɖo mɔ̌ có, é nɔ yi fí e jɛ zɔ lɛ́ é hwɛhwɛ, bo nɔ xo ɖɛ.

17 Ée é ɖo nǔ kplɔ́n mɛ wɛ gbe ɖokpó é ɔ, Falizyɛn lɛ́ kpó sɛ́nkplɔ́nmɛtɔ́ lɛ́ kpó gosín gletoxo Galilée kpó Judée kpó tɔn lɛ́ bǐ mɛ, bo lɛ́ gosín Jeluzalɛ́mu, lobo ɖo ayǐjínjɔ́n ɖo fínɛ́. Hlɔ̌nhlɔ́n Jexóva* tɔn ɖo kpɔ́ xá ɛ, bónú é ná gbɔ azɔn nú mɛ. 18 Mɛ lɛ́ zé nya e xwe ayǐsó é ɖokpó ɖó zan jí wá, bɔ yě ɖo tíntɛ́nkpɔ́n wɛ bo ná zé è byɔ́ xɔ ɔ mɛ, lobo ná sɔ́ ɛ ɖó Jezu nukɔn. 19 Yě mɔ ali e yě ná gbɔn bo sɔ́ ɛ yi xɔ ɔ mɛ é ǎ, ɖó ahwan ɔ wútu. Énɛ́ wú ɔ, yě xá xɔ ɔ ta bo kɔ́n xɔ ɔ ɖo akpá ɖokpó xwé. Nya ɔ ɖo zan ɔ jí bɔ yě sɔ́ ɛ jɛ te gbɔn fínɛ́, bo sɔ́ ɛ ɖó mɛ lɛ́ tɛ́ntin ɖo Jezu nukɔn. 20 Ée é mɔ nǔɖiɖi yětɔn é ɔ, é ɖɔ: “Nya ce, è sɔ́ hwɛ towe lɛ́ kɛ we.” 21 Énɛ́ gúdo ɔ, sɛ́nkplɔ́nmɛtɔ́ lɛ́ kpó Falizyɛn lɛ́ kpó jɛ ɖiɖɔ ɖo yěɖée tɛ́ntin jí ɖɔ: “Mɛ̌ ka nyí mɛ énɛ́ e ɖo nu nylá wɛ é? Mɛ̌ ka sixú sɔ́ hwɛ kɛ mɛ zɛ Mawu ɖokpónɔ wú?” 22 Amɔ̌, ɖó Jezu tuun nǔ e lin wɛ yě ɖe é wútu ɔ, é ná xósin yě ɖɔ: “Étɛ́ lɛ́ lin wɛ mi ka ɖe ɖo ayi mitɔn lɛ́ mɛ? 23 ‘È sɔ́ hwɛ towe lɛ́ kɛ we’ ɖiɖɔ, alǒ: ‘Sí te bo ɖi zɔnlin’ ɖiɖɔ ɔ, ɖětɛ́ ka bɔ wǔ hú ɖě? 24 Amɔ̌, bónú mi ná dó tuun ɖɔ Gbɛtɔ́ví ɔ ɖó acɛ bo ná sɔ́ hwɛ kɛ mɛ ɖo ayǐkúngban jí wútu ɔ, . . .” É ɖɔ nú nya e xwe ayǐsó é ɖɔ: “Má ɖɔ nú we: Sí te, sɔ́ zan towe, bo yi xwé.” 25 Énɛ́ ɔ, é sí te ɖo nukɔn yětɔn, bo sɔ́ nǔ e jí è sɔ́ ɛ mlɔ́ é, lobo ɖidó xwégbe, bo ɖo susu kpa nú Mawu wɛ. 26 É jí wǔ nú yě mɛ bǐ xwíí, bɔ yě jɛ susu kpa nú Mawu jí, lobɔ xɛsi jɛ yě jí, bɔ yě nɔ ɖɔ: “Mǐ mɔ nǔjíwǔ lɛ́ ɖo égbé!”

27 Énɛ́ gúdo ɔ, Jezu ɖidó bo mɔ tokwɛ́yítɔ́ e è nɔ ylɔ́ ɖɔ Levíi é, bɔ é ɖo ayǐjínjɔ́n ɖo tokwɛ́yítɔ́ lɛ́ sín azɔ̌xɔsá, lobo ɖɔ n’i ɖɔ: “Xwedó mì.” 28 Énɛ́ ɔ, é jó nǔ bǐ dó bo sí te lobo jɛ xwixwedó è jí. 29 Énɛ́ gúdo ɔ, Levíi ylɔ́ agɔ̌ ɖaxó ɖé ɖo xwé tɔn gbe dó Jezu tamɛ, bɔ tokwɛ́yítɔ́ lɛ́ kpó mɛ ɖěvo lɛ́ kpó nyi ahwan wá fínɛ́ bo ɖo nǔ ɖu xá yě wɛ.* 30 Énɛ́ ɔ, Falizyɛn lɛ́ kpó sɛ́nkplɔ́nmɛtɔ́ yětɔn lɛ́ kpó jɛ nǔ hlún ɖɔ dó ahwanvú tɔn lɛ́ wú jí bo nɔ ɖɔ: “Étɛ́wú mi ka nɔ ɖu nǔ bo nɔ nu ahan xá tokwɛ́yítɔ́ lɛ́ kpó hwɛhutɔ́ lɛ́ kpó?” 31 Jezu yí gbe nú yě ɖɔ: “Mɛ e sín lanmɛ ɖo ganjí lɛ́ é ɖó hudó dotóo tɔn ǎ, amɔ̌, mɛ e ɖo azɔn jɛ wɛ lɛ́ é ɖó hudó tɔn. 32 Nǔjlɔ́jlɔ́watɔ́ lɛ́ ylɔ́ gbé wɛ un tɔ́n bo wá ǎ, loɔ, hwɛhutɔ́ lɛ́ wɛ, bónú hwɛ yětɔn lɛ́ ní vɛ́ nú yě.”*

33 Yě ɖɔ n’i ɖɔ: “Ahwanvú Jaan tɔn lɛ́ nɔ blá nu hwɛhwɛ, bo nɔ xo vosisa sín ɖɛ lɛ́, bɔ ahwanvú Falizyɛn lɛ́ tɔn lɛ́ lɔ nɔ wa mɔ̌, amɔ̌, towe lɛ́ nɔ ɖu nǔ bo nɔ nu ahan.” 34 Jezu ɖɔ nú yě ɖɔ: “Mi sixú hɛn asisúnɔ ɔ sín xɔ́ntɔn lɛ́ gǎnnugǎnnu bónú yě ná blá nu, hwenu e asisúnɔ ɔ kpo ɖo kpɔ́ xá yě é ǎ, kabǐ? 35 Amɔ̌, gbe ɖokpó ná wá su, bɔ nǔgbó ɔ, è ná ɖe asisúnɔ ɔ sín gɔ̌n yětɔn, énɛ́ ɔ, yě ná blá nu gbe nɛ́ gbe.”

36 É lɛ́ ná nǔjlɛ́dónǔwú élɔ́ yě: “Mɛ ɖěbǔ nɔ sɛ́n avɔxwɛ ɖé sín awu aga tɔn yɔ̌yɔ́ ɖé wú, bo nɔ dó ɖɛ́ awu xóxó ɖé ná ǎ. Ényí é wa mɔ̌ ɔ, avɔxwɛ yɔ̌yɔ́ ɔ ná vún sín awu xóxó ɔ wú, bɔ avɔxwɛ e è sɛ́n sín awu yɔ̌yɔ́ ɔ mɛ é ka ná lɛ́ sɔgbe xá xóxó ɔ ǎ. 37 Gɔ́ ná ɔ, mɛ ɖěbǔ nɔ kɔn vɛ̌ɛn yɔ̌yɔ́ dó anyǔgo xóxó mɛ ǎ. Ényí é wa mɔ̌ ɔ, vɛ̌ɛn yɔ̌yɔ́ ɔ ná hɛn anyǔgo ɔ wú bo ná kɔn nyi gbe, bɔ anyǔgo ɔ ná gblé. 38 Amɔ̌, vɛ̌ɛn yɔ̌yɔ́ ɔ, anyǔgo yɔ̌yɔ́ mɛ wɛ è ɖó ná kɔn dó. 39 Mɛ e nu vɛ̌ɛn xóxó é ɖěbǔ sɔ́ nɔ ba ná nu vɛ̌ɛn yɔ̌yɔ́ ǎ, ɖó é nɔ ɖɔ: ‘Xóxó ɔ nyɔ́.’”

6 Jezu wá ɖo jinukúngle ɖé mɛ gbɔn wɛ ɖo gbɔjɛzángbe, bɔ ahwanvú tɔn lɛ́ ɖo jinukún lɛ́ ba wɛ, bo nɔ gbídí kpó alɔ yětɔn lɛ́ kpó, lobo nɔ ɖu. 2 Énɛ́ ɔ, Falizyɛn ɖé lɛ́ ɖɔ: “Étɛ́wú mi ka ɖo nǔ e ma sɔgbe xá sɛ́n ɖo gbɔjɛzángbe ǎ é wa wɛ?” 3 Amɔ̌, Jezu yí gbe nú yě ɖɔ: “Mi xa nǔ e Davídi wa, hwenu e xovɛ́ sin é kpó mɛ e ɖo kpɔ́ xá ɛ lɛ́ é kpó é kpɔ́n ǎ cé? 4 É byɔ́ xwé Mawu tɔn gbe, bo yí wɔ̌xúxú e è xwlé Mawu lɛ́ é; é ɖu bo lɛ́ ná ɖě mɛ e ɖo kpɔ́ xá ɛ lɛ́ é, é ka sɔgbe xá sɛ́n bónú mɛ ɖěbǔ ná ɖu ǎ, loɔ, vɔ̌sánúxwlémawutɔ́ lɛ́ kɛ́ɖɛ́ wɛ ɖó ná ɖu. Mi xa mɔ̌ ǎ cé?” 5 Énɛ́ gúdo ɔ, é ɖɔ nú yě ɖɔ: “Gbɛtɔ́ví ɔ, Aklúnɔ gbɔjɛzán ɔ tɔn wɛ é nyí.”

6 Ðo gbɔjɛzángbe ɖěvo ɔ, é yi kplɔ́ngbasá ɔ bo jɛ nǔ kplɔ́n mɛ jí. Nya ɖé ɖo fínɛ́ bɔ alɔ tɔn ɖisí ɔ kú. 7 Sɛ́nkplɔ́nmɛtɔ́ lɛ́ kpó Falizyɛn lɛ́ kpó ka ɖo Jezu kpɔ́n wɛ tlítlí, bo ná kpɔ́n ɖɔ é ná gbɔ azɔn nú mɛ ɖo gbɔjɛzángbe wɛ a jí, bo ná mɔ tɛn dó mɔ nǔ e wú yě ná zɔn dó, dó dó hwɛ ɛ é. 8 Amɔ̌, é tuun linlin yětɔn, énɛ́ wú ɔ, é ɖɔ nú nya alɔkúnánɔ ɔ ɖɔ: “Sí te bo nɔ te ɖo kplɔ́ngbasá ɔ tɛ́ntin.” Bɔ é sí te bo nɔ te ɖo fínɛ́. 9 Énɛ́ gúdo ɔ, Jezu ɖɔ nú yě ɖɔ: “Má kan nǔɖé byɔ́ mi, é ka sɔgbe xá sɛ́n ɖo gbɔjɛzángbe ɖɔ è ní wa nǔ ɖagbe alǒ nǔ nyanya a, hwlɛ́n gbɛ* alǒ sú kún dó ná a?” 10 Ée é kpɔ́n yě bǐ gúdo é ɔ, é ɖɔ nú nya ɔ ɖɔ: “Dlɛ̌n alɔ towe.” É wa mɔ̌, bɔ alɔ tɔn jɛ tɛn tɔn mɛ. 11 Amɔ̌, yě jɛ ma bǐ, bo jɛ xó ɖɔ ɖó kpɔ́ dó nǔ e yě sixú wa nú Jezu é wú jí.

12 Ðo azǎn énɛ́ lɛ́ jí ɔ, é yi só jí gbe ɖokpó bo ná xo ɖɛ, é xo ɖɛ sɛ́dó Mawu ɖo zǎn ɔ blěbú mɛ. 13 Ée ayǐ hɔ́n é ɔ, é ylɔ́ ahwanvú tɔn lɛ́ bo cyán mɛ 12 ɖo yě mɛ, yě wɛ é lɛ́ ylɔ́ ɖɔ mɛsɛ́dó lɛ́. 14 Nyǐkɔ yětɔn lɛ́ ɖíe: Sinmɔ́ɔ e é lɛ́ sun nyǐ ɖɔ Piyɛ́ɛ é, nɔví tɔn Andlé, Jaki, Jaan, Filípu, Baatelemíi, 15 Matíe, Tɔmáa, Jaki Alufée ví ɔ, Sinmɔ́ɔ e è nɔ ylɔ́ ɖɔ “mɛ e akpakpa nɔ sɔ́ é” é, 16 Judási Jaki ví ɔ, kpó Judási Isikaliɔ́ti, éé wá húzú mɛsaɖutɔ́ é kpó.

17 É kpó yě kpó jɛ te sín só ɔ jí, bɔ é nɔ te ɖo fí e ɖo wɛnjɛ é ɖé, ahwanvú tɔn lɛ́ sukpɔ́ ɖo fínɛ́, bɔ mɛ wɔ̌búwɔ́bú ɖé gosín Judée gbé ɔ bǐ jí kpó Jeluzalɛ́mu kpó bo lɛ́ gosín Tíi kpó Sidɔ́ɔn kpó sín xá e ɖo xutó lɛ́ é mɛ. Yě wá bo ná ɖótó è, lobonú é ná lɛ́ gbɔ azɔn yětɔn lɛ́ nú yě. 18 É gbɔ azɔn nú mɛ e gbigbɔ nyanya lɛ́ tlɛ ɖo ya dó ná wɛ lɛ́ é. 19 Bɔ ahwan ɔ bǐ ɖo biba wɛ bo ná ɖ’alɔ wǔtu tɔn, ɖó hlɔ̌nhlɔ́n ɖo tíntɔ́n sín lan tɔn mɛ wɛ, bo nɔ gbɔ azɔn nú yě bǐ.

20 É kpɔ́n ahwanvú tɔn lɛ́ bo jɛ ɖiɖɔ jí ɖɔ:

“Awǎjijɛnɔ wɛ nyí mi mɛ e nyí wamamɔnɔ lɛ́ é, ɖó mitɔn wɛ nyí Axɔ́súɖuto Mawu tɔn.

21 “Awǎjijɛnɔ wɛ nyí mi mɛ e xovɛ́ sin din lɛ́ é, ɖó mi ná gɔ́ xo.

“Awǎjijɛnɔ wɛ nyí mi mɛ e ɖo avǐ ya wɛ din lɛ́ é, ɖó mi ná ko nǔ.

22 “Awǎjijɛnɔ wɛ mi nyí hweɖébǔnu e gbɛtɔ́ lɛ́ gbɛ́ wǎn nú mi é, kpó hwenu e yě nya mi dó gbě, zun mi, bo dó ji mi ɖɔ mi nyí mɛ nyanya ɖó Gbɛtɔ́ví ɔ wú é kpó. 23 Mi j’awǎ hwenɛ́nu, bo lɔ́n yi jǐ kpó xomɛhunhun kpó, ɖó ajɔ mitɔn d’agba ɖo jǐxwé, ɖó nǔ énɛ́ lɛ́ ɖokpó ɔ wɛ tɔ́gbó yětɔn lɛ́ ko nɔ wa nú gbeyíɖɔ lɛ́ ɖ’ayǐ.

24 “Amɔ̌, heelú mi mɛ e nyí dɔkunnɔ lɛ́ é, ɖó mi ko mɔ gbɔdónúmɛ mitɔn bǐ mlɛ́mlɛ́.

25 “Heelú mi mɛ e gɔ́ xo din lɛ́ é, ɖó xovɛ́ ná wá sin mi.

“Heelú mi mɛ e ɖo nǔ ko wɛ din lɛ́ é, ɖó mi ná nɔ aluwɛ mɛ bo ná lɛ́ ya avǐ.

26 “Heelú mi hweɖébǔnu e gbɛtɔ́ lɛ́ bǐ nɔ ɖɔ xó ɖagbe dó mi wú é, ɖó nǔ e tɔ́gbó yětɔn lɛ́ wa nú gbeyíɖɔ adingbannɔ lɛ́ é nɛ́.

27 “Amɔ̌, un ɖo ɖiɖɔ nú mi mɛ e ɖo tó ɖó mì wɛ lɛ́ é ɖɔ: Mi ní nɔ yí wǎn nú kɛntɔ́ mitɔn lɛ́, bo nɔ lɛ́ wa ɖagbe nú mɛ e gbɛ́ wǎn nú mi lɛ́ é. 28 Mi ní nɔ lɛ́ byɔ́ nyɔ̌ná nú mɛ e ɖo nu dó mi wɛ lɛ́ é, bo nɔ lɛ́ xo ɖɛ dó mɛ e ɖo mi zun wɛ lɛ́ é tamɛ. 29 Ényí mɛɖé dó nǔ we dó klɛ̌n ɖokpó jí hǔn, lǐlɛ́ ɖě ɔ lɔ n’i; ényí mɛɖé yí awu towe aga tɔn ɔ hǔn, ma hwlɛ́n awu do tɔn ɔ xá ɛ ó. 30 Ényí mɛ ɖěbǔ byɔ́ nǔ we hǔn, nǎ ɛ, ényí mɛɖé yí nǔ towe lɛ́ sín así we hǔn, ma byɔ́ ó.

31 “Gɔ́ ná ɔ, lěe mi ba ɖɔ gbɛtɔ́ lɛ́ ní wa nǔ xá mi gbɔn é ɔ, mi lɔ ní wa nǔ xá yě gbɔn mɔ̌.

32 “Ényí mɛ e yí wǎn nú mi lɛ́ é wɛ mi nɔ yí wǎn ná ɔ, susu tɛ́ é ka nyí nú mi? Ðó hwɛhutɔ́ lɛ́ ɖésú tlɛ nɔ yí wǎn nú mɛ e yí wǎn nú yě lɛ́ é. 33 Bɔ ényí mɛ e nɔ wa ɖagbe nú mi lɛ́ é wɛ mi nɔ wa ɖagbe ná ɔ, susu tɛ́ é ka nyí nú mi? Hwɛhutɔ́ lɛ́ ɖésú tlɛ nɔ wa nǔ ɖokpó ɔ. 34 Gɔ́ ná ɔ, ényí mɛ ɖěɖěe mi ɖó nukún ɖɔ yě ná sú axɔ́ mi lɛ́ é wɛ mi nɔ nya nǔ ná ɔ, susu tɛ́ é ka nyí nú mi? Hwɛhutɔ́ lɛ́ ɖésú tlɛ nɔ nya nǔ nú hwɛhutɔ́ lɛ́ bo nɔ ɖó nukún ɖɔ yě ná sú axɔ́ émí mlɛ́mlɛ́. 35 Amɔ̌, midɛɛ lɛ́ ɔ, mi ní kpo ɖo wǎn yí nú kɛntɔ́ mitɔn lɛ́ wɛ, bo kpo ɖo ɖagbe wa wɛ, lobo lɛ́ kpo ɖo nǔ nya nú mɛ wɛ, ma ɖó nukún nǔ ɖěbǔ; énɛ́ ɔ, ajɔ mitɔn ná d’agba, bɔ mi ná nyí vǐ Ajalɔ̌nlɔn ɔ tɔn lɛ́, ɖó é nɔ nyɔ́ xomɛ dó alɔgúdokpɛ́dónúmɛtɔ́ kpó mɛ nyanya kpó wú. 36 Mi ní kpo ɖo nǔbláwǔkúnúmɛtɔ́ nyí wɛ, lěe Tɔ́ mitɔn nyí nǔbláwǔkúnúmɛtɔ́ gbɔn é.

37 “Gɔ́ ná ɔ, mi ma sɔ́ nɔ ɖɔ hwɛ xá mɛ ɖě ó, énɛ́ ɔ, è ná ɖɔ hwɛ xá mi lɔ gbeɖé ǎ; mi ma sɔ́ nɔ ɖó hwɛ nú mɛ ó, énɛ́ ɔ, è ná ɖó hwɛ nú mi lɔ gbeɖé ǎ. Mi ní nɔ sɔ́ hwɛ kɛ mɛ,* énɛ́ ɔ, è ná sɔ́ hwɛ kɛ mi. 38 Mi ní nɔ ná nǔ mɛ, énɛ́ ɔ, è ná ná nǔ mi. È ná jlɛ́ nǔ ganjí bo kɔn dó akpo* mitɔn lɛ́ mɛ; è ná húnhún, bo ná zín, bɔ é ná lɛ́ túnflá. Ðó nǔjlɛ́nú e mi nɔ dó jlɛ́ nǔ nú mɛ é wɛ è ná dó jlɛ́ nǔ nú mi lɔ.”

39 Énɛ́ gúdo ɔ, é lɛ́ ná nǔjlɛ́dónǔwú ɖé yě: “Nukúntɔ́nnɔ ɖé sixú xlɛ́ ali nukúntɔ́nnɔ ɖěvo ǎ, kabǐ? Yě mɛ we lɛ́ bǐ ná jɛ do mɛ, kabǐ? 40 Nǔkplɔ́ntɔ́* ɖé nɔ hú gǎn mɛ̌si tɔn ǎ, loɔ, mɛ ɖěbǔ e è kplɔ́n nǔ ganjí é ná cí mɛ̌si tɔn ɖɔhun. 41 Bɔ étɛ́wú a ka ɖo nǔywɛ́ e ɖo nukún nɔví towe tɔn jí é kpɔ́n wɛ, bo ma ka ɖó ayi atínkpo e ɖo nukún hwiɖésúnɔ tɔn jí é wú ǎ? 42 Hwiɖésúnɔ ɖo atínkpo e ɖo nukún towe jí é mɔ wɛ ǎ, bɔ nɛ̌ a ka ná ɖɔ nú nɔví towe ɖɔ: ‘Nɔví, gbɔ nú má ɖe nǔywɛ́ e ɖo nukún towe jí é síin’ gbɔn? Yɛmɛnúwatɔ́! To ɖe atínkpo e ɖo nukún hwiɖésúnɔ tɔn jí é síin hwɛ̌, énɛ́ ɔ, a ná mɔ lěe a ná ɖe nǔywɛ́ e ɖo nukún nɔví towe tɔn jí é síin gbɔn é céɖécéɖé.

43 “Ðó atín ɖagbe ɖěbǔ nɔ ná sínsɛ́n nyanya ǎ, atín nyanya ɖěbǔ ka nɔ ná sínsɛ́n ɖagbe ǎ. 44 Ðó sínsɛ́n e atín ɖokpó ɖokpó nɔ ná é wɛ è nɔ dó tuun atín ɔ ná. Ði kpɔ́ndéwú ɔ, è nɔ gbɛ fígi ɖo wunkan mɛ ǎ, mɔ̌ jɛ́n è ma ka nɔ gbɛ vǐwun ɖo wunkan mɛ ǎ é nɛ́. 45 Gbɛtɔ́ ɖagbe nɔ ɖe nǔ ɖagbe tɔ́n sín nǔ ɖagbe e gɔ́ ayi tɔn mɛ lɛ́ é mɛ, amɔ̌, gbɛtɔ́ nyanya nɔ ɖe nǔ e nyí nyanya é tɔ́n sín nǔ nyanya e gɔ́ ayi tɔn mɛ lɛ́ é mɛ; ɖó nǔ e gɔ́ ayi mɛ é wɛ nu nɔ ɖɔ.

46 “Étɛ́wú mi ka nɔ ylɔ́ mì ɖɔ ‘Aklúnɔ! Aklúnɔ!’ bo ma ka nɔ wa nǔ e un nɔ ɖɔ lɛ́ é ǎ lo? 47 Mɛ ɖěbǔ e wá gɔ̌n ce, bo se xó ce lɛ́ lobo bló ɖ’é jí é ɔ, má ɖɔ mɛ e ɖɔhun é cí é nú mi: 48 É cí nya e ɖo xɔ ná mɛ wɛ bo kun do bɔ é yi do ganjí, lobo dó xɔ ɔ do nyi awǐnnya jí é ɖɔhun. Ée tɔ ɖi sin é ɔ, tɔ ɔ xo dó xɔ énɛ́ wú, amɔ̌, é syɛ́n sɔmɔ̌ bo ná húnhún i ǎ, ɖó è mɛ ganjí wútu. 49 Ðo alɔ ɖěvo mɛ ɔ, mɛ ɖěbǔ e se xó ce lɛ́ bo ma wa ɖ’é jí ǎ é cí nya e mɛ xɔ nyi kɔ́ mɛ, bo ma dó do ǎ é ɖɔhun. Tɔsisa xo dó xɔ ɔ wú, bɔ tlóló ɔ é mu, bɔ lěe xɔ énɛ́ hánnyá gbɔn é syɛ́n tawun.”

7 Ée é ɖɔ xó e é ɖó bo ná ɖɔ nú mɛ lɛ́ é fó é ɔ, é byɔ́ Kafaanawúmu toxo mɛ. 2 Din ɔ, sɔ́jakanwekogán ɖé sín mɛsɛntɔ́ e vɛ́ n’i tawun é ɖokpó ɖo azɔn jɛ wɛ syɛ́nsyɛ́n, bo ɖo kúdonu. 3 Ée é se Jezu sín xó é ɔ, é sɛ́ tomɛxó Jwifu lɛ́ tɔn ɖé lɛ́ dó è, bónú yě ná byɔ́ ɛ ɖɔ é ní wá gbɔ azɔn nú mɛsɛntɔ́ émítɔn. 4 Yě wá Jezu gɔ́n, bo jɛ vo sa n’i jí vɛ́návɛ́ná ɖɔ: “É jɛxá alɔdó towe, 5 ɖó é yí wǎn nú akɔta mǐtɔn. É wɛ tlɛ gbá kplɔ́ngbasá mǐtɔn.” 6 Énɛ́ wú ɔ, Jezu xwedó yě. Amɔ̌, ée é sɛkpɔ́ xwé ɔ é ɔ, sɔ́jakanwekogán ɔ ko sɛ́ xɔ́ntɔn tɔn lɛ́ d’è bónú yě ná ɖɔ xó élɔ́ n’i: “Mɛɖaxó, ma jɛ tagba ó, ɖó un jɛxá bo ná yí gbe nú a ná byɔ́ xwé ce gbe ǎ. 7 Énɛ́ wú wɛ un mɔ ɖɔ un kún jɛxá bo ná wá gɔ̌n towe ó. Amɔ̌, ɖe gbe bo bló bónú mɛsɛntɔ́ ce sín azɔn ní gbɔ. 8 Ðó nyi lɔ ɔ, mɛ e ɖo mɛ ɖěvo lɛ́ sín acɛ glɔ́ é wɛ nú mì, bɔ un ɖó sɔ́ja lɛ́ ɖo acɛ ce glɔ́. Nú un ɖɔ nú sɔ́ja élɔ́ ɖɔ: ‘Yi!’ ɔ, é nɔ yi, bɔ un ɖɔ nú mɛ ɖěvo ɖɔ: ‘Wǎ!’ ɔ, é nɔ wá, lobɔ un ɖe gbe nú kannumɔ ce ɖɔ: ‘Wa nǔ lě!’ ɔ, é nɔ wa.” 9 Ée Jezu se xó énɛ́ lɛ́ é ɔ, é jí wǔ n’i, bɔ é lílɛ́ kpan nukɔn ahwan e ɖo xwixwedó è wɛ é bo ɖɔ: “Má ɖɔ nú mi, mɛ ɖěbǔ tlɛ ɖo Izlayɛ́li bo ɖó nǔɖiɖi ɖaxó lěhun nú un mɔ ǎ.” 10 Ée mɛ e è sɛ́ dó lɛ́ é lɛ́ kɔ wá xwé ɔ gbe é ɔ, yě mɔ mɛsɛntɔ́ ɔ, bɔ lanmɛ tɔn ɖo ganjí.

11 Énɛ́ gúdo zaan ɔ, é ɖidó toxo e è nɔ ylɔ́ ɖɔ Nayínu é mɛ, bɔ ahwanvú tɔn lɛ́ kpó ahwan ɖaxó ɖé kpó ɖo xwixwed’è wɛ. 12 Ée é sɛkpɔ́ hɔntogbó toxo ɔ tɔn é ɔ, mɛ lɛ́ sɔ́ dɔ̌nkpɛvú ɖé sín cyɔ wá xweyǐgbe; vǐɖokpónɔ wɛ é nyí nú nɔ tɔn. Gɔ́ ná ɔ, nyɔ̌nu ɔ lɛ́ nyí asúkúsi. Ahwan ɖaxó ɖé gosín toxo ɔ mɛ, bo zɔn xá ɛ. 13 Ée Aklúnɔ mɔ ɛ é ɔ, nǔ tɔn blá wǔ n’i bɔ é ɖɔ n’i ɖɔ: “Ma sɔ́ ya avǐ ɖě ó.” 14 Ée é ɖɔ mɔ̌ é ɔ, é sɛkpɔ́ nǔ e jí cyɔ ɔ ɖe é bo ɖ’alɔ wú, bɔ mɛ e hɛn cyɔ ɔ lɛ́ é nɔ te. Énɛ́ gúdo ɔ, é ɖɔ: “Dɔ̌nkpɛvú, un ɖe gbe nú we, sí te!” 15 Bɔ mɛkúkú ɔ fɔ́n jínjɔ́n ayǐ bo jɛ xó ɖɔ jí, bɔ Jezu kplá ɛ jó nú nɔ tɔn. 16 Xɛsi jɛ mɛ lɛ́ bǐ jí, bɔ yě jɛ susu kpa nú Mawu jí bo nɔ ɖɔ: “Gbeyíɖɔ ɖaxó ɖokpó tɔ́n ɖo tɛ́ntin mǐtɔn.” Yě nɔ lɛ́ ɖɔ: “Mawu lɛ́ kɔ kpɔ́n togun tɔn.” 17 Nǔ énɛ́ e Jezu wa é sín xó gba kpé Judée gbé ɔ bǐ jí, bo lɛ́ gba kpé to e lɛ́ lɛ̌ dó fínɛ́ lɛ́ é bǐ mɛ.

18 Ahwanvú Jaan tɔn lɛ́ wlí nǔ énɛ́ lɛ́ bǐ ɖɔ n’i. 19 Énɛ́ wú ɔ, Jaan ylɔ́ ahwanvú tɔn lɛ́ we, bo sɛ́ yě dó Aklúnɔ gɔ́n, bónú yě ná kanbyɔ́ ɛ ɖɔ: “Hwi wɛ nyí Mɛ e ɖó ná wá é a, abǐ mǐ ɖó ná ɖó nukún mɛ ɖěvo?” 20 Ée yě wá Jezu gɔ́n é ɔ, yě ɖɔ: “Jaan Batɛ́mublónúmɛtɔ́ ɔ sɛ́ mǐ dó gɔ̌n towe bónú mǐ ní kanbyɔ́ we ɖɔ: ‘Hwi wɛ nyí Mɛ e ɖó ná wá é a, abǐ mǐ ɖó ná ɖó nukún mɛ ɖěvo?’” 21 Hwe énɛ́ nu ɔ, Jezu gbɔ azɔn nú mɛ e ɖo azɔn kléwún jɛ wɛ lɛ́ é kpó mɛ e ɖo azɔn syɛ́nsyɛ́n jɛ wɛ lɛ́ é kpó gěgé, bo lɛ́vɔ́ nya awǒvi sín mɛ gěgé jí, é lɛ́vɔ́ hun nukún nú nukúntɔ́nnɔ gěgé bɔ yě kpé wú bo mɔ nǔ. 22 É yí gbe nú ahwanvú Jaan tɔn lɛ́ ɖɔ: “Mi yi bo ɖó nǔ e mi se lɛ́ é kpó nǔ e mi mɔ lɛ́ é kpó sín gbe nú Jaan: Nukúntɔ́nnɔ lɛ́ ko ɖo nǔ mɔ wɛ, afɔkponɔ lɛ́ ɖo zɔnlin ɖi wɛ, è ɖo blǒbló wɛ bɔ gudunɔ lɛ́ ɖo mɛ mímɛ́ húzú wɛ, tókúnɔ lɛ́ ɖo nǔ se wɛ, è ɖo mɛkúkú lɛ́ fɔ́n wɛ, bo ɖo wɛn ɖagbe ɔ jlá wamamɔnɔ lɛ́ wɛ. 23 Awǎjijɛnɔ wɛ nú mɛ e ma klɛ́n afɔ bo j’ayǐ ɖó nyɛ wútu ǎ é.”

24 Ée mɛ e Jaan sɛ́ dó lɛ́ é yi gúdo é ɔ, Jezu jɛ Jaan xó ɖɔ nú ahwan ɔ jí bo ɖɔ: “Étɛ́ kpɔ́n gbé mi ka yi ɖo gbětótló mɛ? Fántín e jɔhɔn ɖo dǐndán wɛ é wɛ a? 25 Étɛ́ mi ka mɔ? Nya ɖé wɛ bo dó awu xɔ akwɛ́ lɛ́ a? Éǒ, mɛ e nɔ dó awu ɖagbe ɖagbe lɛ́, bo nɔ zán dɔkunnɔ gbɛ lɛ́ é ɔ, hɔnmɛ wɛ yě ɖe. 26 Étɛ́ mi ka yi mɔ ɖo dɔ̌n lo? Gbeyíɖɔ ɖé wɛ a? Ɛɛn, má ɖɔ nú mi, é hú gǎn gbeyíɖɔ ɖé flaflá tɔn. 27 Mɛ e wú è wlán nǔ élɔ́ dó é wɛ: ‘Éɖíe! Un ɖo wɛnsagun ce sɛ́ dó jɛ nukɔn nú we* wɛ, bɔ é ná jɛ nukɔn nú we bo ná bló ali towe ɖó.’ 28 Má ɖɔ nú mi, ɖo mɛ e è ji ɖo nyɔ̌nu xomɛ lɛ́ é mɛ ɔ, mɛ ɖěbǔ ɖe bo hú gǎn Jaan ǎ, amɔ̌, mɛ e nyí mɛ kpɛví bǐ ɖo Axɔ́súɖuto Mawu tɔn mɛ é hú gǎn ɛ.” 29 (Ée togun ɔ bǐ kpó tokwɛ́yítɔ́ lɛ́ kpó se énɛ́ é ɔ, yě ɖɔ ɖɔ Mawu nyí nǔjlɔ́jlɔ́watɔ́, ɖó batɛ́mu Jaan tɔn wɛ nyí batɛ́mu e è bló nú yě é. 30 Amɔ̌, Falizyɛn lɛ́ kpó mɛ e tuun sɛ́n ɔ ganjí lɛ́ é kpó gbɛ́ nǔ e Mawu jló nú yě é,* ɖó Jaan bló batɛ́mu nú yě ǎ wútu.)

31 “Énɛ́ wú ɔ, mɛ̌ wú un ka ná jlɛ́ jijimɛ élɔ́ dó? Mɛ̌ yě ka ɖi? 32 Yě cí vǐ kpɛví ɖěɖěe ɖo ayǐjínjɔ́n ɖo axi mɛ, bo ɖo xó sú ylɔ́ yěɖée lɛ́ wɛ é ɖɔhun. Yě ɖɔ: ‘Mǐ kún kpete, mi ka ɖú we ǎ; mǐ ji nǔwamɛhan, mi ka y’avǐ ǎ.’ 33 Mɔ̌ ɖokpó ɔ, Jaan Batɛ́mublónúmɛtɔ́ ɔ wá, bo nɔ ɖu wɔ̌xúxú ǎ, é ka nɔ lɛ́ nu vɛ̌ɛn ǎ, amɔ̌, mi nɔ ɖɔ: ‘Awǒvi ɖé wɛ ɖo jǐ tɔn.’ 34 Gbɛtɔ́ví ɔ ka wá bo nɔ ɖu nǔ lobo nɔ nu vɛ̌ɛn, amɔ̌, mi nɔ ɖɔ: ‘Mi kpɔ́n! Nya énɛ́ ɔ, adɔtɔ́nɔ wɛ bo nɔ nu vɛ̌ɛn zɛ xwé wú, lobo nyí tokwɛ́yítɔ́ lɛ́ kpó hwɛhutɔ́ lɛ́ kpó sín xɔ́ntɔn.’ 35 É ɖo mɔ̌ có, nǔ jlɔ́jlɔ́ e mɛɖé nɔ wa lɛ́ é wɛ nɔ ɖe xlɛ́ ɖɔ é nyɔ́nǔi.”

36 Din ɔ, Falizyɛn ɖé fɔ́n bo ɖo byɔ̌byɔ́ ɛ wɛ ɖɔ é ní wá ɖu nǔ xá émí. Énɛ́ wú ɔ, é byɔ́ Falizyɛn ɔ sín xwégbe bo jínjɔ́n ayǐ ɖo távo tó. 37 Nyɔ̌nu ɖé ka ɖo toxo ɔ mɛ bɔ è tuun ɖɔ é nyí hwɛhutɔ́. É se ɖɔ Jezu ɖo nǔ ɖu wɛ* ɖo Falizyɛn ɔ sín xwégbe. Énɛ́ ɔ, é hɛn alubátlugo e mɛ nǔsáwǔ wǎnɖagbenɔ ɖe é ɖokpó wá. 38 Ée é sɔ́ tɛnmɛ ɖo Jezu gúdo ɖo afɔ tɔn lɛ́ kɔn gúdo é ɔ, é y’avǐ bo jɛ ɖasin kun dó afɔ tɔn lɛ́ jí jí lobo dɔn ɖa tɔn dó súnsún ná. Gɔ́ ná ɔ, é kí si nú afɔ Jezu tɔn lɛ́ kpó wǎnyíyí kpó bo kɔn nǔsáwǔ wǎnɖagbenɔ ɔ d’é wú. 39 Ée Falizyɛn e ylɔ́ Jezu é mɔ mɔ̌ é ɔ, é ɖɔ nú éɖée ɖɔ: “Ényí nya élɔ́ ko nyí gbeyíɖɔ dóó ɔ, é ná ko tuun nǎwe e ɖo alɔ ɖó wǔtu tɔn wɛ é kpó mɛ alɔkpa e é nyí é kpó. É ná ko tuun ɖɔ hwɛhutɔ́ ɖé wɛ n’i.” 40 Jezu ka ɖɔ n’i ɖɔ: “Sinmɔ́ɔ, un ɖó xó ɖé bo ná ɖɔ nú we.” É ɖɔ: “Mɛ̌si, ɖɔ xó ɔ.”

41 “Nya we ɖu axɔ́ dó akwɛ́nyanúmɛtɔ́ ɖé; mɛ ɖě ɖu deníye* 500, loɔ, mɛ ɖě ɔ ɖu 50. 42 Ée yě ma ɖó nǔ ɖěbǔ bo ná dó sú axɔ́ ɛ ná ǎ é ɔ, é sɔ́ axɔ́ yě mɛ we lɛ́ bǐ tɔn kɛ yě. Énɛ́ wú ɔ, yě mɛ we lɛ́ ɖětɛ́ ka ná yí wǎn n’i hú gǎn?” 43 Sinmɔ́ɔ ka yí gbe n’i ɖɔ: “Un ɖi ɖɔ mɛ e é sɔ́ axɔ́ kɛ hú gǎn é wɛ.” É ɖɔ n’i ɖɔ: “A ná xósin ɔ ganjí.” 44 Énɛ́ ɔ, é lílɛ́ kpan nukɔn nǎwe ɔ bo ɖɔ nú Sinmɔ́ɔ ɖɔ: “A mɔ nǎwe élɔ́ a? Un byɔ́ xwé towe gbe, a ka ná sin ɖěbǔ mì nú má klɔ́ afɔ ce lɛ́ ǎ. Amɔ̌, nǎwe élɔ́ kun ɖasin dó afɔ ce lɛ́ jí bo dɔn ɖa tɔn dó súnsún ná. 45 A kí si nú mì ǎ, amɔ̌, nǎwe élɔ́ ɔ, sín hwenu e un wá é ɔ, si kí nú afɔ ce lɛ́ wɛ jɛ́n é ɖe kpó wǎnyíyí kpó. 46 A kɔn ami dó ta nú mì ǎ, amɔ̌, nǎwe élɔ́ kɔn nǔsáwǔ wǎnɖagbenɔ dó afɔ ce lɛ́ wú. 47 Énɛ́ wú ɔ, má ɖɔ nú we, hwɛ tɔn lɛ́ sukpɔ́ có, è ko sɔ́ kɛ ɛ, ɖó é ɖe wǎnyíyí ɖaxó xlɛ́ wútu. Amɔ̌, mɛ e è sɔ́ hwɛ kpɛɖé kɛ é ɔ, wǎn kpɛɖé wɛ é nɔ yí nú mɛ.” 48 Énɛ́ gúdo ɔ, é ɖɔ nú nǎwe ɔ ɖɔ: “È sɔ́ hwɛ towe lɛ́ kɛ we.” 49 Mɛ e kpó é kpó ɖo ayǐjínjɔ́n ɖo távo tó lɛ́ é jɛ ɖiɖɔ ɖo yěɖée tɛ́ntin jí ɖɔ: “Mɛ̌ nya élɔ́ ka nyí bo tlɛ nɔ sɔ́ hwɛ kɛ mɛ?” 50 Amɔ̌, Jezu ɖɔ nú nǎwe ɔ ɖɔ: “Nǔɖiɖi towe hwlɛ́n we; yi ɖo fífá mɛ.”

8 Énɛ́ gúdo tlóló ɔ, Jezu gbɔn toxo lɛ́ kpó gletoxo lɛ́ kpó mɛ bo nɔ ɖo wɛn ɖagbe Axɔ́súɖuto Mawu tɔn tɔn jlá wɛ. Bɔ Mɛsɛ́dó 12 lɛ́ nɔ xwedó è. 2 Nyɔ̌nu e jí è nya gbigbɔ nyanya sín lɛ́ é kpó ée è gbɔ azɔn ná lɛ́ é kpó ɖé lɛ́ lɔ nɔ xwedó è. Yě wɛ nyí: Mali e è nɔ ylɔ́ ɖɔ Magidálanu bɔ awǒvi tɛ́nwe gosín jǐ tɔn é, 3 Jani, asi Cúza e nɔ kpé nukún dó Elódu sín xwé wú é tɔn kpó Suzánu kpó. Nyɔ̌nu gěgé ɖěvo lɛ́ lɛ́vɔ́ gɔ́ nú yě, bɔ yě mɛ bǐ nɔ zán nǔɖókan yětɔn lɛ́ dó d’alɔ é kpó mɛsɛ́dó lɛ́ kpó.

4 Din ɔ, ée ahwan ɖaxó ɖé xo yěɖée kplé ɖó kpɔ́ xá mɛ ɖěɖěe xo kpóɖó n’i sín toxo ɖé mɛ jɛ ɖěvo mɛ lɛ́ é ɔ, é zán nǔjlɛ́dónǔwú ɖé dó ɖɔ xó nú yě bo ɖɔ: 5 “Nǔkúndótɔ́ ɖé tɔ́n bo ná yi dó nǔkún. Ée é ɖo nǔ dó wɛ é ɔ, ɖé lɛ́ ɖ’é mɛ bo jɛ ali tó bɔ è t’afɔ jí, lobɔ xɛ lɛ́ wá bo cyán ɖu. 6 Ðé lɛ́ jɛ awǐnnyakan mɛ, bɔ ée yě tɔ́n kun gúdo é ɔ, yě fyɔ́ ɖó yě mɔ fífá ɖě ǎ wútu. 7 Ðěvo lɛ́ jɛ wunkan mɛ, bɔ wun e su ɖó kpɔ́ xá yě lɛ́ é vun blá yě. 8 Amɔ̌, ɖěvo lɛ́ jɛ ayǐkúngban ɖagbe jí, bɔ ée yě tɔ́n kun gúdo é ɔ, yě ná sínsɛ́n donu 100 d’é jí.” Ée é ɖɔ xó énɛ́ lɛ́ gúdo é ɔ, é sú xó bo ɖɔ: “Mɛ e ɖó tó bo ná dó se nǔ é, ní bo ɖótó.”

9 Amɔ̌, ahwanvú tɔn lɛ́ kan nǔjlɛ́dónǔwú énɛ́ sín tínmɛ byɔ́ ɛ. 10 É ɖɔ: “Midɛɛ lɛ́ ɔ, è yí gbe nú mi bɔ mi ná mɔ nukúnnú jɛ Axɔ́súɖuto Mawu tɔn sín nǔbúdo lɛ́ mɛ, amɔ̌, mɛ e kpo lɛ́ é ɔ, nǔjlɛ́dónǔwú lɛ́ wɛ è nɔ zán dó xwlé nǔbúdo lɛ́ yě, bónú yě ná bo ɖo kpínkpɔ́n wɛ ɔ, yě ní kpɔ́n dó wǔvɔ́, lobonú yě ná bo ɖo sise wɛ ɔ, yě ní ma mɔ nukúnnú jɛ mɛ ó. 11 Din ɔ, nǔjlɛ́dónǔwú ɔ sín tínmɛ ɖíe: Nǔkún ɔ, xó Mawu tɔn wɛ. 12 Ðěɖěe jɛ ali tó lɛ́ é ɔ, mɛ ɖěɖěe se xó ɔ, bɔ énɛ́ gúdo ɔ, Awǒvi wá bo ɖe xó ɔ sín ayi yětɔn mɛ bónú yě ní ma ɖi nǔ, lobonú è ná hwlɛ́n yě gán lɛ́ é ó wɛ. 13 Ðěɖěe jɛ awǐnnyakan mɛ lɛ́ é ɔ, mɛ ɖěɖěe hwenu e yě se xó ɔ é ɔ, yě yí kpó awǎjijɛ kpó lɛ́ é wɛ, amɔ̌, yě dó ɖɔ do ǎ. Yě ɖi nǔ nú hwenu ɖé, loɔ, ée mɛtɛ́nkpɔ́n sín hwenu wá é ɔ, yě j’ayǐ. 14 Nǔkún e jɛ wunkan mɛ lɛ́ é ɔ, mɛ ɖěɖěe se xó ɔ bɔ adohu adohu lɛ́, dɔkun kpó vǐví gbɛ élɔ́ tɔn lɛ́ kpó ka fɛ́ ayi yětɔn lɛ́ é wɛ. Nǔ énɛ́ lɛ́ vun blá yě bɔ yě nɔ ná sínsɛ́n ɖěbǔ b’ɛ nɔ zin ǎ. 15 Nǔkún e jɛ ayǐkúngban ɖagbe jí lɛ́ é ɔ, mɛ ɖěɖěe, ée yě se xó ɔ kpó ayi ɖagbe kpó gúdo é ɔ, yě hɛn, bo dɛ ɖo sínsɛ́n níná hwenu lɛ́ é wɛ.

16 “Mɛ ɖěbǔ nɔ tá zogbɛ́n bo nɔ sɔ́ zɛ̌n xwe dó, alǒ sɔ́ dó zan glɔ́ ǎ, loɔ, zogbɛ́nhɛnnú jí wɛ é nɔ sɔ́ ɖó, bónú mɛ e byɔ́ xwégbe lɛ́ é ní dó sixú mɔ wěziza. 17 Ðó nǔ ɖěbǔ ɖo hwlǎhwlá bo ná wá gɔn wě jɛ ǎ, nǔ ɖěbǔ e è ka lɛ́ sɔ́ sɛ xwe ganjí é ɔ, è ná wá gɔn tuuntuun gbeɖé ǎ, é ka ná lɛ́ wá gɔn agbawungba jɛ ǎ. 18 Énɛ́ wú ɔ, mi nɔ hɛn ayi dó lěe mi nɔ ɖótó nǔ gbɔn é wú, ɖó mɛ ɖěbǔ e ɖó nǔ é ɔ, è ná ná ɛ d’é jí, amɔ̌, mɛ ɖěbǔ e ma ɖó nǔ ǎ é ɔ, nǔ e é lin ɖɔ émí tlɛ ko ɖó é ɔ, è ná yí sín así tɔn.”

19 Din ɔ, nɔ tɔn kpó nɔví tɔn lɛ́ kpó wá gɔ̌n tɔn, amɔ̌, yě kpé wú bo sɛkpɔ́ ɛ ǎ, ɖó ahwan ɔ wútu. 20 Énɛ́ wú ɔ, è wá ɖɔ n’i ɖɔ: “Nɔ towe kpó nɔví towe lɛ́ kpó ɖo te ɖo kɔ́xo, bo jló ná mɔ we.” 21 É yí gbe nú yě ɖɔ: “Mɛ élɔ́ lɛ́ e nɔ se xó ce, bo nɔ bló ɖ’é jí lɛ́ é wɛ nyí nɔ ce kpó nɔví ce lɛ́ kpó.”

22 Jezu kpó ahwanvú tɔn lɛ́ kpó byɔ́ tɔjíhún ɖé mɛ gbe ɖokpó, bɔ é ɖɔ nú yě ɖɔ: “Mi nú mǐ ní yi tɔgwede ɔ sín agě ɖě ɔ jí.” Énɛ́ ɔ, yě sún hǔn. 23 Amɔ̌, ée yě ɖo yiyi wɛ ɖo tɔgwede* ɔ jí é ɔ, Jezu byɔ́ amlɔ mɛ. Jɔhɔn ɖaxó ɖé jɛ nyinyi jí ɖo tɔgwede ɔ jí, bɔ sin jɛ tɔjíhún yětɔn gɔ́ jí, lobɔ é ɖo nǎ syɔ́ wɛ. 24 Énɛ́ wú ɔ, yě yi fɔ́n ɛ, bo ɖɔ: “Mɛ̌si, Mɛ̌si, mǐ ɖo nǎ dɔn wɛ!” Énɛ́ ɔ, é sí te bo ɖe gbe dó jɔhɔn ɔ kpó adǎn e jí sin ɔ ɖe é kpó, bɔ yě nɔ te lobɔ fí bǐ cí tóó. 25 Énɛ́ gúdo ɔ, é ɖɔ nú yě ɖɔ: “Fítɛ́ nǔɖiɖi mitɔn ka ɖe?” Amɔ̌, xɛsi jɛ yě jí bɔ é lɛ́ kpácá yě tawun, lobɔ yě nɔ ɖɔ nú yěɖée lɛ́ ɖɔ: “Mɛ̌ ka ɖíe tawun? Ðó é tlɛ nɔ ɖe gbe dó jɔhɔn kpó sin kpó, bɔ yě nɔ se gbe n’i lá!”

26 Yě wá glín hǔn dó Jelazáanu lɛ́ sín xá mɛ. Jelazáa ɔ kpan nukɔn Galilée. 27 Ée Jezu jɛ te sín tɔjíhún ɔ mɛ é ɔ, nya e jí awǒvi lɛ́ ɖe é ɖé gosín toxo ɔ mɛ bo wá kpé è. É lín tawun din bɔ é sɔ́ nɔ dó awu ǎ. Gɔ́ ná ɔ, é nɔ nɔ xwégbe ǎ, é nyɔ́ wa ɔ, yɔdo lɛ́ tɛ́ntin wɛ é nɔ nɔ. 28 Ée é mɔ Jezu é ɔ, é d’axwá bo jɛ kpo ɖo nukɔn tɔn lobo sú xó syɛ́nsyɛ́n bo ɖɔ: “Jezu, Mawu Ajalɔ̌nlɔn Ví, étɛ́ nyi kpó hwi kpó ka kpé dó? Kɛnklɛ́n, ma dó ya nú mì ó.” 29 (Ðó Jezu ko ɖe gbe dó gbigbɔ nyanya ɔ ɖɔ é ní gosín nya ɔ jí. Gbigbɔ nyanya ɔ ko wá jǐ tɔn ɖo ninɔmɛ gěgé mɛ,* bɔ è ko sɔ́ wlɔ dó blá ɛ ná, bo ko dó gan afɔ n’i azɔn mɔ̌kpán, lobo nɔ cɔ́ ɛ, amɔ̌, é nɔ wɛ́n gɛdɛ lɛ́, bɔ awǒvi ɔ nɔ kplá ɛ yi fí e jɛ zɔ lɛ́ é.) 30 Jezu kanbyɔ́ ɛ ɖɔ: “Nɛ̌ a nɔ nyí?” É ɖɔ: “Ahwankpá,” ɖó awǒvi gěgé wɛ ɖo jǐ tɔn wútu. 31 Bɔ yě nɔ ɖo vo sa nú Jezu wɛ ɖɔ é ní ma ɖe gbe dó émí bónú émí ní yi do ma ɖó azan ɔ mɛ ó. 32 Aglǔzahwan ɖaxó ɖé ka ɖo nǔ ba ɖu wɛ ɖo fínɛ́ ɖo só ɔ jí. Énɛ́ ɔ, yě sa vo n’i ɖɔ é ní ná gbe émí bónú émí ní byɔ́ aglǔza lɛ́ mɛ, bɔ é ná gbe yě. 33 Nǔgbó ɔ, awǒvi lɛ́ gosín nya ɔ jí bo byɔ́ aglǔza lɛ́ mɛ, bɔ aglǔzahwan ɔ nyi agbo sín só ɔ nufɛ́nu kɔn nyi tɔgwede ɔ mɛ, bo kú tɔ. 34 Ée aglǔzanyitɔ́ lɛ́ mɔ nǔ e jɛ é ɔ, yě hɔn, bo yi wlí nǔ lɛ́ bǐ ɖɔ ɖo toxo ɔ kpó gletoxo ɔ kpó mɛ.

35 Énɛ́ gúdo ɔ, mɛ lɛ́ tɔ́n bá kpɔ́n nǔ e jɛ é. Yě wá Jezu gɔ́n bo mɔ nya e jí awǒvi lɛ́ ko gosín é. É dó awu bɔ ayi tɔn wá gbɛ bǐ, bɔ é ɖo ayǐjínjɔ́n ɖo afɔ Jezu tɔn lɛ́ kɔn, lobɔ xɛsi jɛ yě jí. 36 Mɛ ɖěɖěe mɔ lěe nǔ nyí gbɔn bɔ nya e jí awǒvi lɛ́ ɖe é mɔ éɖée mɛ é, wlí bǐ ɖɔ nú mɛ e wá lɛ́ é. 37 Énɛ́ gúdo ɔ, mɛ gěgé gosín Jelazáa to ɔ mɛ bo byɔ́ Jezu ɖɔ é ní gosín to émítɔn mɛ, ɖó xɛsi ɖaxó ɖé jɛ yě jí. Énɛ́ ɔ, Jezu byɔ́ tɔjíhún ɔ mɛ bo ná yi. 38 É ɖo mɔ̌ có, nya e jí awǒvi lɛ́ ko gosín é kpo ɖo vo sa nú Jezu wɛ ɖɔ émí ná xwedó è, amɔ̌, é lɛ́ kɔ nú nya ɔ bo ɖɔ: 39 “Lɛ̌ kɔ yi xwégbe bo nɔ ɖo nǔ e Mawu wa nú we lɛ́ é ɖɔ nú mɛ bǐ wɛ.” Énɛ́ ɔ, é lɛ́ kɔ ɖidó bo nɔ ɖo nǔ e Jezu ko wa n’i lɛ́ é ɖɔ gbɔn toxo ɔ blěbú mɛ wɛ.

40 Hwenu e Jezu lɛ́ kɔ yi Galilée é ɔ, ahwan ɔ yí i kpó xomɛnyínyɔ́ kpó, ɖó yě bǐ wɛ ko ɖo nukún ɖó è wɛ. 41 Nya e nɔ nyí Jayilɔ́si é ka wá; nya énɛ́ ɔ, nukɔntɔ́ kplɔ́ngbasá ɔ tɔn ɖé wɛ. É jɛ kpo ɖo afɔ Jezu tɔn lɛ́ kɔn, bo jɛ vo sa n’i jí ɖɔ é ní wá xwé émítɔn gbe, 42 ɖó vǐ nyɔ̌nu tɔn ɖokpó ɔ, éé ɖo xwe 12 mɔ̌ ɖó wɛ é ɖo kúdonu.

Ée Jezu ɖo yiyi wɛ é ɔ, ahwan ɔ ɖo fyɔ́nfyɔ́n ɛ wɛ. 43 Nǎwe ɖé ɖo fínɛ́ bo ko ɖo hun ɖi wɛ sín xwe 12 ɖíe, mɛ ɖěbǔ ka ko kpé wú bo gbɔ azɔn n’i ǎ. 44 É sɛkpɔ́ Jezu gbɔn gǔdo, bo ɖ’alɔ awu tɔn aga tɔn ɔ sín kɛyɛ wú, bɔ tlóló ɔ, hun e ɖi wɛ é ɖe é nɔ te. 45 Énɛ́ ɔ, Jezu ɖɔ: “Mɛ̌ ka ɖ’alɔ wǔ ce?” Ée yě mɛ bǐ ɖo gbǐgbɛ́ wɛ é ɔ, Piyɛ́ɛ ɖɔ: “Mɛ̌si, ahwan ɔ lɛ́ lɛ̌ dó we bo ɖo fyɔ́nfyɔ́n we wɛ.” 46 Amɔ̌, Jezu ɖɔ: “Mɛɖé ɖó alɔ wǔtu ce ɖó un tuun ɖɔ hlɔ̌nhlɔ́n gosín lan ce mɛ.” 47 Ée nǎwe ɔ mɔ ɖɔ è ko ɖó ayi nǔ e émí wa é wú é ɔ, é jɛ sísɔ́sísɔ́ jí bo jɛ kpo ɖo Jezu nukɔn, lobo ɖɔ nǔ e wú é ɖ’alɔ wǔtu tɔn é kpó lěe azɔn gbɔ n’i gbɔn tlóló é kpó ɖo mɛ lɛ́ bǐ nukɔn. 48 Amɔ̌, Jezu ɖɔ n’i ɖɔ: “Vǐ nyɔ̌nu ce, nǔɖiɖi towe gbɔ azɔn nú we. Yi ɖo fífá mɛ.”

49 Hwenu e é kpo ɖo xó ɖɔ wɛ é ɔ, nukɔntɔ́ kplɔ́ngbasá ɔ tɔn sín afɔsɔ́ɖótetɔ́ ɖé wá bo ɖɔ: “Vǐ nyɔ̌nu towe ko kú; ma sɔ́ dó tagba nú Mɛ̌si ɔ ó.” 50 Ée Jezu se mɔ̌ é ɔ, é ɖɔ nú Jayilɔ́si ɖɔ: “Ma ɖi xɛsi ɖěbǔ ó, vɛ̌ ko ɖi nǔ kpowun, énɛ́ ɔ, è ná hwlɛ́n ɛ gán.” 51 Ée yě byɔ́ xwé ɔ gbe é ɔ, é lɔn bónú mɛɖé byɔ́ xɔ ɔ mɛ xá ɛ zɛ Piyɛ́ɛ, Jaan, Jaki, gɔ́ nú vǐ ɔ sín tɔ́ kpó nɔ kpó wú ǎ. 52 Mɛ lɛ́ bǐ ka ɖo avǐ ya wɛ bo ɖo alě ná wɛ ɖó vǐ ɔ wú. Énɛ́ wú ɔ, é ɖɔ: “Mi ma sɔ́ y’avǐ ɖě ó, ɖó é kú ǎ, loɔ, amlɔ dɔ́ wɛ é ɖe.” 53 Bɔ yě jɛ cícá ɛ ko jí, ɖó yě tuun ɖɔ vǐ ɔ ko kú. 54 Amɔ̌, é hɛn alɔ vǐ ɔ tɔn, bo sɔ́ gbe dó jǐ lobo ɖɔ: “Ðyɔ̌vǐ, sí te!” 55 Bɔ é lɛ́ wá gbɛ, bo sí te tlóló, lobɔ Jezu ɖe gbe ɖɔ è ní ná ɛ nǔɖé bónú é ní ɖu. 56 Awǎjijɛ mɛjitɔ́ tɔn lɛ́ tɔn túnflá, amɔ̌, Jezu ɖe gbe nú yě ɖɔ yě ní ma ɖɔ nǔ e jɛ é nú mɛ ɖěbǔ ó.

9 Énɛ́ gúdo ɔ, é ylɔ́ mɛsɛ́dó 12 lɛ́ kplé, bo ná yě hlɔ̌nhlɔ́n kpó acɛ kpó dó awǒvi lɛ́ bǐ jí, lobɔ yě ná nɔ lɛ́ gbɔ azɔn nú azinzɔnnɔ lɛ́. 2 É lɛ́ sɛ́ yě dó, bónú yě ná jlá Axɔ́súɖuto Mawu tɔn, lobo gbɔ azɔn nú mɛ lɛ́. 3 Gɔ́ ná ɔ, é ɖɔ nú yě ɖɔ: “Mi ma hɛn nǔ ɖěbǔ dó miɖée jí nú tomɛyiyi ɔ ó, mi ma hɛn kpo ó, mi ma hɛn glo ó, mi ma hɛn wɔ̌xúxú ó, mi ma hɛn akwɛ́* ó; mi ma ka lɛ́ hɛn awu we* ó. 4 Amɔ̌, ényí mi byɔ́ xwé ɖé gbe ɖo fí ɖěbǔ hǔn, mi nɔ fínɛ́ káká jɛ hwenu e mi ná gosín fínɛ́ dó é. 5 Fí ɖěbǔ e mɛ lɛ́ ma ná yí mi ɖe ǎ é ɔ, hwenu e mi ná ɖo toxo énɛ́ mɛ gosín wɛ é ɔ, mi xúxú afúntúntún e ɖo afɔ mitɔn lɛ́ é, bónú é ná nyí kúnnuɖiɖe nú yě.” 6 Énɛ́ ɔ, ée yě bɛ́ é ɔ, yě gbɔn gletoxo lɛ́ mɛ gletoxo lɛ́ mɛ, bo nɔ ɖo wɛn ɖagbe ɔ jlá wɛ, lobo nɔ ɖo azɔn gbɔ nú mɛ wɛ gbɔn fí bǐ.

7 Din ɔ, tokpɔngán* Elódu* se nǔ e ɖo jijɛ wɛ lɛ́ é bǐ, bɔ ado hu i tawun, ɖó mɛɖé lɛ́ ɖo ɖiɖɔ wɛ ɖɔ è ko fɔ́n Jaan sín kú. 8 Mɛ ɖěvo lɛ́ ka ɖo ɖiɖɔ wɛ ɖɔ Elíi wɛ lɛ́ kɔ wá, bɔ mɛ ɖěvo lɛ́ ka ɖo ɖiɖɔ wɛ ɖɔ gbeyíɖɔ hwexónu tɔn lɛ́ ɖokpó wɛ fɔ́n sín kú. 9 Elódu ɖɔ: “Un ko gbo ta Jaan. Mɛ̌ wú se nǔ mɔ̌hun lɛ́ dó wɛ un ka ɖe lo?” Énɛ́ wú ɔ, é ɖo tíntɛ́nkpɔ́n wɛ bo ná mɔ ɛ.

10 Ée mɛsɛ́dó lɛ́ lɛ́ kɔ é ɔ, yě ɖó nǔ e yě wa lɛ́ é bǐ sín gbe nú Jezu. Énɛ́ ɔ, é kplá yě yi toxo e è nɔ ylɔ́ ɖɔ Bɛtisayída é mɛ, bónú yě ná dó sixú nɔ yěɖokpó. 11 Amɔ̌, ée ahwan ɔ tuun mɔ̌ é ɔ, yě xwedó è. Bɔ é yí yě kpó xomɛnyínyɔ́ kpó, bo jɛ xó ɖɔ nú yě dó Axɔ́súɖuto Mawu tɔn wú jí, lobo gbɔ azɔ nú mɛ e ɖó hudó azɔngbɔnúmɛ tɔn lɛ́ é. 12 Ée gbadanu ɖo susu wɛ é ɔ, mɛsɛ́dó 12 lɛ́ sɛkpɔ́ ɛ bo ɖɔ n’i ɖɔ: “Nyi ahwan ɔ, bónú yě ná yi gletoxo e sɛ yá fí lɛ́ é mɛ kpó gleta e sɛ yá fí lɛ́ é kpó, bo ná ba fí e yě ná dɔ́ é kpó nǔ e yě ná ɖu é kpó, ɖó fí élɔ́ e mǐ ɖe é jɛ zɔ.” 13 Amɔ̌, é ɖɔ nú yě ɖɔ: “Midɛɛ lɛ́ ní ná nǔɖé yě bónú yě ní ɖu.” Yě ɖɔ: “Wɔ̌xúxú atɔ́ɔ́n kpó hweví we kpó jɛ́n mǐ ɖó, afi nú vlafo ɔ, mǐɖésúnɔ yi xɔ nǔɖuɖu nú mɛ élɔ́ lɛ́ bǐ ɔ nɛ́.” 14 Nǔgbó ɔ, súnnu 5 000 mɔ̌ wɛ ɖo fínɛ́. É ka ɖɔ nú ahwanvú tɔn lɛ́ ɖɔ: “Mi nú yě ní jínjɔ́n ayǐ ɖo gbɛ̌ta mɛ 50 mɔ̌ tɔn lɛ́ mɛ.” 15 Yě bló mɔ̌, bɔ mɛ lɛ́ bǐ jínjɔ́n ayǐ. 16 Din ɔ, ée é zé wɔ̌xúxú atɔ́ɔ́n lɛ́ kpó hweví we lɛ́ kpó é ɔ, é kpɔ́n jǐxwé bo byɔ́ nyɔ̌ná d’é jí. Énɛ́ gúdo ɔ, é fɛ́n yě bo jɛ sísɔ́ nú ahwanvú lɛ́ jí bónú yě ná má nú ahwan ɔ. 17 Énɛ́ ɔ, yě bǐ ɖu nǔ bo gɔ́ xo, bɔ yě bɛ́ éé kpo lɛ́ é, lobɔ wɔ̌xúxú fínfɛ́n gɔ́ xasun 12.

18 Nukɔnmɛ ɔ, é ɖo ɖɛ xo wɛ éɖokpónɔ, bɔ ahwanvú lɛ́ wá gɔ̌n tɔn, bɔ é kanbyɔ́ yě ɖɔ: “Mɛ̌ un ka nyí bɔ ahwan ɔ nɔ ɖɔ?” 19 Yě yí gbe n’i ɖɔ: “Jaan Batɛ́mublónúmɛtɔ́ ɔ. Amɔ̌, mɛ ɖěvo lɛ́ nɔ ɖɔ Elíi, mɛ ɖěvo lɛ́ ka nɔ lɛ́ ɖɔ gbeyíɖɔ hwexónu tɔn lɛ́ ɖokpó wɛ fɔ́n.” 20 Énɛ́ gúdo ɔ, é ɖɔ nú yě ɖɔ: “Midɛɛ lɛ́ ka lo, mɛ̌ un ka nyí bɔ mi nɔ ɖɔ?” Piyɛ́ɛ yí gbe n’i ɖɔ: “Klísu Mawu tɔn.” 21 Énɛ́ ɔ, é gbɛ́ nú yě syɛ́nsyɛ́n ɖɔ yě ní ma ɖɔ xó énɛ́ nú mɛ ɖěbǔ ó. 22 Amɔ̌, é ɖɔ: “Gbɛtɔ́ví ɔ ɖó ná gbɔn wǔvɛ́ gěgé mɛ dín, lobɔ tomɛxó lɛ́, vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó ná gbɛ́ ɛ, bɔ è ná hu i, lobɔ azǎn tɔn atɔngɔ́ ɔ gbe ɔ, è ná fɔ́n ɛ.”

23 Énɛ́ gúdo ɔ, é lɛ́ ɖɔ nú yě bǐ ɖɔ: “Ényí mɛɖé jló ná xwedó mì hǔn, é ní gbɛ́ éɖée bo sɔ́ yatín* tɔn ayǐhɔ́ngbe ayǐhɔ́ngbe, lobo nɔ xwedó mì. 24 Ðó mɛ ɖěbǔ e jló ná hwlɛ́n gbɛ* tɔn é ná hɛn bú, amɔ̌, mɛ ɖěbǔ e hɛn gbɛ* tɔn bú ɖó nyɛ wú é wɛ ná hwlɛ́n gbɛ* tɔn. 25 Nǔgbó ɔ, ényí mɛɖé jɛ tagba bo ɖó nǔ e ɖo gbɛ ɔ mɛ lɛ́ é bǐ, bo ka sɔ́ éɖée nyi gbě, alǒ hɛn nǔ bǐ bú ɔ, le tɛ́ ka ɖ’é mɛ n’i? 26 Ðó mɛ ɖěbǔ e nyi kpó xó ce lɛ́ kpó ná nyí winnyánú ná é ɔ, mɛ énɛ́ lɔmɔ̌ ná nyí winnyánú nú Gbɛtɔ́ví ɔ, hwenu e é ná wá ɖo susu tɔn, Tɔ́ ɔ tɔn kpó wɛnsagun mímɛ́ lɛ́ tɔn kpó mɛ é. 27 Amɔ̌, má ɖɔ nǔgbó nú mi, mɛɖé lɛ́ ɖo mɛ e ɖo fí lɛ́ é mɛ, bo ná to mɔ Axɔ́súɖuto Mawu tɔn hwɛ̌ cóbó ná kú.”

28 Nǔgbó ɔ, é ɖɔ xó énɛ́ lɛ́ nú yě bɔ é bló azǎn tántɔn gúdo é ɔ, é kplá Piyɛ́ɛ, Jaan kpó Jaki kpó dó éɖée jí, bo xá só ɖé jí bo ná xo ɖɛ. 29 Ée é ɖo ɖɛ xo wɛ é ɔ, nukúnmɛ tɔn ɖyɔ́, bɔ awu tɔn húzú wěwé pépé, bo nɔ kɔ́n. 30 Énɛ́ ɔ, kpɔ́n! Súnnu we ɖo xó ɖɔ ɖó kpɔ́ xá ɛ wɛ; yě wɛ nyí Mɔyízi kpó Elíi kpó. 31 Yě wá kpó susu kpó, bo jɛ xó ɖɔ dó yiyi tɔn wú jí. Jeluzalɛ́mu wɛ nǔ ɖó ná nyí mɔ̌ ɖe. 32 Amlɔ ka ɖo ya dó nú Piyɛ́ɛ kpó ahwanvú we ɖě lɛ́ kpó wɛ. Amɔ̌, ée amlɔ ɔ hɔ́n nú yě mlɛ́mlɛ́ é ɔ, yě mɔ susu Jezu tɔn kpó súnnu we e ɖo fínɛ́ xá ɛ lɛ́ é kpó. 33 Bɔ ée mɛ énɛ́ lɛ́ ɖo Jezu gɔ́n gosín wɛ é ɔ, Piyɛ́ɛ ɖɔ n’i ɖɔ: “Mɛ̌si, fí élɔ́ e mǐ ɖe é nyɔ́ mɛ! Énɛ́ wú ɔ, mǐ ní gbá goxɔ atɔn, ɖokpó ná nyí towe, ɖokpó ná nyí Mɔyízi tɔn, ɖokpó ná nyí Elíi tɔn.” É tuun nǔ e ɖɔ wɛ é ɖe é ǎ. 34 Amɔ̌, ée é ɖo nǔ énɛ́ lɛ́ ɖɔ wɛ é ɔ, akpɔ́kpɔ́ ɖé dó bo jɛ cyɔ́ncyɔ́n yě jí. Ée akpɔ́kpɔ́ ɔ cyɔ́n yě é ɔ, xɛsi jɛ yě jí. 35 Énɛ́ gúdo ɔ, gbe ɖé ɖi sín akpɔ́kpɔ́ ɔ mɛ bo ɖɔ: “Vǐ súnnu ce e un sɔ́ é ɖíe. Mi ɖótó è.” 36 Hwenu e yě se gbe ɔ é ɔ, yě mɔ ɖɔ Jezu ɖo éɖokpónɔ. Amɔ̌, yě ɖɔ xó ɖě ǎ, bɔ nú hwenu ɖé ɔ, yě ɖɔ nǔ e yě mɔ lɛ́ é nú mɛ ɖěbǔ ǎ.

37 Ayǐhɔ́ngbe tɔn e yě jɛ te sín só ɔ jí é ɔ, ahwan ɖaxó ɖé wá kpé Jezu. 38 Nya ɖé sú xó ɖo ahwan ɔ mɛ bo ɖɔ: “Mɛ̌si, kɛnklɛ́n bo nyi kɔ kpɔ́n vǐ súnnu ce, ɖó vǐ ɖokpó e un ɖó é nɛ́. 39 Gbigbɔ nyanya ɖé nɔ wá jǐ tɔn, bɔ ajijimɛ kpowun ɔ, é nɔ sú xó. Gbigbɔ ɔ nɔ húnhún i, bɔ é nɔ tún afúntúnkplɔ̌, lobɔ ényí é tlɛ gblé wǔ i gúdo ɔ, é nɔ fá cóbónú é nɔ jó è dó ǎ. 40 Un sa vo nú ahwanvú towe lɛ́ ɖɔ yě ní nya gbigbɔ ɔ sín jǐ tɔn, yě ka kpé wú ǎ.” 41 Jezu ka yí gbe ɖɔ: “Jijimɛ gblégblé nǔmaɖitɔ́ è mi, káká jɛ hwetɛ́nu un ka ɖó ná nɔ kpɔ́ xá mi, bo lɛ́ xwe nǔ mitɔn ɖɔ yi jɛ? Kplá vǐ súnnu towe wá fí.” 42 Amɔ̌, ée vǐ ɔ tlɛ ɖo sisɛkpɔ́ wɛ é ɔ, awǒvi ɔ sɔ́ ɛ zin dó kɔ́mɛ, bo húnhún i syɛ́nsyɛ́n. É ɖo mɔ̌ có, Jezu ɖe gbe dó gbigbɔ nyanya ɔ, bo gbɔ azɔn nú nyaví ɔ, lobo kplá ɛ jó nú tɔ́ tɔn. 43 Bɔ lěe hlɔ̌nhlɔ́n Mawu tɔn d’agba sɔ é jí wǔ nú yě bǐ.

Hwenu e nǔ e wa wɛ é ɖe lɛ́ é jí wǔ nú yě bǐ é ɔ, é ɖɔ nú ahwanvú tɔn lɛ́ ɖɔ: 44 “Mi tɛ́ tó ganjí bo flín xó élɔ́ lɛ́, ɖó è ɖo Gbɛtɔ́ví ɔ ná sa wɛ, bo ná jó è nyi gbɛtɔ́ lɛ́ sín alɔ mɛ.” 45 Amɔ̌, yě mɔ nukúnnú jɛ nǔ e ɖɔ wɛ é ɖe é mɛ ǎ. Nǔgbó ɔ, è hwlá xó énɛ́ dó yě, bónú yě ní ma mɔ nukúnnú jɛ mɛ ó, bɔ xɛsi lɛ́ ɖo yě ɖi wɛ bónú yě ná kan nǔ byɔ́ ɛ d’é wú.

46 Énɛ́ gúdo ɔ, yě jɛ nǔ dɔn ɖo yěɖée tɛ́ntin dó mɛ e hú gǎn mɛ bǐ ɖo yě mɛ é wú jí. 47 Ðó Jezu tuun nǔ e lin wɛ yě ɖe ɖo ayi yětɔn lɛ́ mɛ é wútu ɔ, é kplá vǐ kpɛví ɖokpó wá, bo sɔ́ ɛ ɖó te ɖo akpá, 48 lobo ɖɔ nú yě ɖɔ: “Mɛ ɖěbǔ e yí vǐ kpɛví élɔ́ ɖó nyǐkɔ ce wú é, yí nyi lɔmɔ̌; bɔ mɛ ɖěbǔ e yí mì é, yí Mɛ e sɛ́ mì dó é lɔ. Ðó mɛ e nɔ wa nǔ mɛ kpɛví ɖɔhun ɖo tɛ́ntin mi bǐ tɔn é wɛ nyí mɛ ɖaxó.”

49 Jaan yí gbe ɖɔ: “Mɛ̌si, mǐ mɔ mɛɖé bɔ é ɖo nyǐkɔ towe zán dó nya awǒvi lɛ́ ná wɛ, bɔ mǐ tɛ́n kpɔ́n bo ná gbɛ́ n’i, ɖó é ɖo mǐ xwedó wɛ ǎ wútu.” 50 Amɔ̌, Jezu ɖɔ n’i ɖɔ: “Mi ma tɛ́n kpɔ́n bo ná gbɛ́ n’i ó, ɖó mɛ ɖěbǔ e ma klán gbe xá mi ǎ é ɖo jǐ mitɔn.”

51 Ée hwenu e è ná sɔ́ ɛ yi jǐxwé é ɖo susu wɛ é ɔ, é kán ɖ’é jí syɛ́nsyɛ́n bo ná yi Jeluzalɛ́mu. 52 Énɛ́ wú ɔ, é sɛ́ ahwanvú tɔn ɖé lɛ́ dó, bɔ yě ná jɛ nukɔn n’i. Yě yi, bo byɔ́ Samalíinu lɛ́ sín gletoxo ɖé mɛ bo ná sɔ́ nǔ nú nǔɖé lɛ́ ɖ’ayǐ nú wǐwá tɔn. 53 Amɔ̌, yě yí i ǎ, ɖó é kán ɖ’é jí bo ná yi Jeluzalɛ́mu wútu. 54 Ée ahwanvú Jaki kpó Jaan kpó mɔ mɔ̌ é ɔ, yě ɖɔ: “Aklúnɔ, a jló ɖɔ mǐ ní ɖɔ bónú myɔ ní jɛ te sín jǐxwé bo sú kún dó nú yě a?” 55 Amɔ̌, é lílɛ́ kpan nukɔn yě bo gbɛ́ nǔ nú yě. 56 Bɔ yě yi gletoxo ɖěvo mɛ.

57 Din ɔ, ée yě ɖo ali jí bo ɖo yiyi wɛ é ɔ, mɛɖé ɖɔ n’i ɖɔ: “Un ná xwedó we yi fí ɖěbǔ e a ná yi é.” 58 Jezu ka ɖɔ n’i ɖɔ: “Ayǐsájɛ lɛ́ ɖó nu e mɛ yě nɔ nɔ é, bɔ xɛ lɛ́ ɖó adɔ̌, amɔ̌, Gbɛtɔ́ví ɔ ɖó fí ɖěbǔ bo ná sɔ́ ta ɖó ǎ.” 59 Énɛ́ gúdo ɔ, é ɖɔ nú mɛ ɖěvo ɖɔ: “Xwedó mì.” Nya ɔ ka ɖɔ: “Aklúnɔ, gbɔ nú má to yi ɖi tɔ́ ce hwɛ̌.” 60 Amɔ̌, é ɖɔ n’i ɖɔ: “Jǒ mɛkúkú lɛ́ dó bónú yě ní ɖi mɛkúkú yětɔn lɛ́, amɔ̌ hwɛ ɔ, yi bo jlá Axɔ́súɖuto Mawu tɔn gbɔn fí bǐ.” 61 Bɔ mɛ ɖěvo lɛ́vɔ́ ɖɔ: “Un ná xwedó we, Aklúnɔ, amɔ̌, nǎ gbe mì bónú má to yi dó éɖabɔ nú mɛ ce lɛ́ hwɛ̌.” 62 Jezu ɖɔ n’i ɖɔ: “Mɛ e ɖ’alɔ glelɛmɔ wú, bo lɛ́ ɖo nǔ e ɖo gǔdo lɛ́ é kpɔ́n wɛ é ɖě jɛxá Axɔ́súɖuto Mawu tɔn ǎ.”

10 Ée nǔ énɛ́ lɛ́ jɛ gúdo é ɔ, Aklúnɔ ɖe mɛ 70 ɖěvo lɛ́ bo sɛ́ yě dó webɔwebɔ, bónú yě ná jɛ nukɔn n’i yi toxo e mɛ éɖésúnɔ ná wá yi lɛ́ é bǐ mɛ kpó fí e éɖésúnɔ ná wá yi lɛ́ é bǐ kpó. 2 Énɛ́ gúdo ɔ, é ɖɔ nú yě ɖɔ: “Nǔgbó ɔ, jinukún ɖo kpɔ́ gégé, azɔ̌watɔ́ lɛ́ ka nyí kpɛɖé. Énɛ́ wú ɔ, mi sa vo nú Gǎn nǔkúnyiya tɔn ɔ bónú é ní sɛ́ azɔ̌watɔ́ dó jinukúngbo tɔn mɛ. 3 Mi yi! Éɖíe un ɖo mi sɛ́ dó wɛ, bɔ mi ná cí lɛ̌ngbɔ́ví lɛ́ ɖo hla lɛ́ tɛ́ntin ɖɔhun è! 4 Mi ma hɛn akwɛ́kpo alǒ glo alǒ afɔkpa ó, mi ma ka dó gbe* mɛ ɖěbǔ ɖo ali jí ó. 5 Ényí mi byɔ́ xwé ɖé gbe ɖo fí ɖěbǔ hǔn, mi ɖɔ jɛ nukɔn ɖɔ: ‘Fífá ní nɔ xwé élɔ́ gbe.’ 6 Ényí fífágbɛtɔ́ ɖě ma tíin ǎ ɔ, fífá mitɔn ná lɛ́ kɔ wá gɔ̌n mitɔn. Amɔ̌, ényí fífágbɛtɔ́ ɖé ɖo fínɛ́ ɔ, fífá mitɔn ná nɔ jǐ tɔn. 7 Énɛ́ wú ɔ, mi cí xwé énɛ́ gbe, bo nɔ ɖu nǔ e yě ná ná mi lɛ́ é, lobo nɔ nu nǔ e yě ná ná mi lɛ́ é, ɖó azɔ̌watɔ́ jɛxá azɔ̌kwɛ́ tɔn. Mi ma nɔ ɖo nɔtɛn ɖyɔ́ wɛ sín xwé ɖé gbe jɛ xwé ɖé gbe ó.

8 “Gɔ́ ná ɔ, toxo ɖěbǔ e mɛ mi ná byɔ́, bɔ yě ná yí mi é ɔ, mi ɖu nǔ e è nǎ ná mi é, 9 bo gbɔ azɔn nú azinzɔnnɔ e ɖo toxo ɔ mɛ lɛ́ é, lobo ɖɔ nú mɛ lɛ́ ɖɔ: ‘Axɔ́súɖuto Mawu tɔn ko sɛkpɔ́.’ 10 Amɔ̌, toxo ɖěbǔ e mɛ mi ná byɔ́, bɔ yě ma ná yí mi ǎ é ɔ, mi ɖidó toxo ɔ sín ali ɖaxó lɛ́ jí, bo ɖɔ: 11 ‘Mǐ xúxú afúntúntún e tlɛ vun dó afɔ mǐtɔn lɛ́ wú ɖo toxo mitɔn mɛ é, bónú é ná nyí kúnnuɖiɖe nú mi. Amɔ̌, mi ní tuun ɖɔ Axɔ́súɖuto Mawu tɔn ko sɛkpɔ́.’ 12 Má ɖɔ nú mi, Hwɛɖɔzán ɔ ná bɔ wǔ nú Sodɔ́mu hú toxo énɛ́.

13 “Heelú we, Kolazíin toxo! Heelú we, Bɛtisayída toxo! Ðó ényí Tíi kpó Sidɔ́ɔn kpó wɛ è ko bló nǔjíwǔ e è bló ɖo gɔ̌n mitɔn lɛ́ é ɖe ɔ, hwɛ yětɔn lɛ́ ná ko vɛ́ nú yě,* bɔ yě ná ko dó ati bo jínjɔ́n afín mɛ xóxó. 14 Énɛ́ wú ɔ, hwɛɖiɖɔ ɔ hwenu ná bɔ wǔ nú Tíi kpó Sidɔ́ɔn kpó hú mi. 15 Kafaanawúmu è, hwɛ ɔ, è ná sɔ́ we dó jǐ káká yi jǐxwé vlafo wɛ a? Éǒ! Káká Yɔdo* mɛ wɛ a ná jɛ te dó!

16 “Mɛ ɖěbǔ e ɖótó mi é ɖótó nyi lɔ. Bɔ mɛ ɖěbǔ e gbɛ́ mi é gbɛ́ nyi lɔ. Gɔ́ ná ɔ, mɛ ɖěbǔ e gbɛ́ mì é gbɛ́ Mɛ e sɛ́ mì dó é lɔ.”

17 Énɛ́ gúdo ɔ, mɛ 70 lɛ́ lɛ́ kɔ wá kpó awǎjijɛ kpó, bo ɖɔ: “Aklúnɔ, ényí mǐ zán nyǐkɔ towe ɔ, awǒvi lɛ́ tlɛ nɔ hwíhwɛ́ dó glɔ̌ mǐtɔn.” 18 Énɛ́ ɔ, é ɖɔ nú yě ɖɔ: “Un mɔ Satáan bɔ é ko j’ayǐ sín jǐxwé jǐkɛwun ɖɔhun. 19 Un ná acɛ mi bónú mi ná sɔ́ afɔ dó gbídí dan lɛ́ kpó hɔnkéklě lɛ́ kpó ná, bo lɛ́ ná acɛ mi bónú mi ná ɖu ɖo hlɔ̌nhlɔ́n kɛntɔ́ ɔ tɔn lɛ́ bǐ jí, bɔ nǔ ɖěbǔ ná wa nǔ dó mi wú ǎ. 20 É ɖo mɔ̌ có, mi ma j’awǎ ɖó è hwíhwɛ́ gbigbɔ nyanya lɛ́ dó glɔ̌ mitɔn wútu ó, loɔ, mi j’awǎ ɖó è wlán nyǐkɔ mitɔn lɛ́ ɖó jǐxwé wútu.” 21 Hwe énɛ́ nu pɛ́ɛ́ ɔ, gbigbɔ mímɛ́ bló bɔ awǎjijɛ tɔn túnflá, bɔ é ɖɔ: “Tɔ́, Aklúnɔ jǐxwé kpó ayǐkúngban kpó tɔn, un ɖo susu kpa nú we wɛ ɖo agbawungba, ɖó a xwe sɔ bo sɔ́ nǔ énɛ́ lɛ́ hwlá dó nǔnywɛ́tɔ́ lɛ́ kpó wěmasetɔ́ lɛ́ kpó, bo ka ɖe yě xlɛ́ vǐ kpɛví lɛ́. Ɛɛn, Tɔ́ ce, ɖó lěe é nyɔ́ nukún towe mɛ gbɔn é nɛ́. 22 Tɔ́ ce sɔ́ nǔ lɛ́ bǐ dó alɔ ce mɛ, bɔ mɛ ɖěbǔ tuun mɛ e Vǐ ɔ nyí é zɛ Tɔ́ ɔ wú ǎ, lobɔ mɛ ɖěbǔ tuun mɛ e Tɔ́ ɔ nyí é zɛ Vǐ ɔ kpó mɛ ɖěbǔ e Vǐ ɔ jló ná ɖe Tɔ́ ɔ xlɛ́ é kpó wú ǎ.”

23 Énɛ́ gúdo ɔ, é lílɛ́ kpan nukɔn ahwanvú lɛ́, bo ɖɔ nú yědɛɛ lɛ́ kɛ́ɖɛ́ ɖɔ: “Awǎjijɛnɔ wɛ nyí mɛ ɖěɖěe sín nukún mɔ nǔ e mɔ wɛ mi ɖe lɛ́ é é. 24 Ðó má ɖɔ nú mi, gbeyíɖɔ gěgé kpó axɔ́sú gěgé kpó jló ná mɔ nǔ e mɔ wɛ mi ɖe lɛ́ é, yě ka mɔ ǎ, yě lɛ́ jló ná se nǔ e se wɛ mi ɖe lɛ́ é, yě ka se ǎ.”

25 Din ɔ, nya e tuun Sɛ́n ɔ ganjí é ɖé sí te bo ná tɛ́n ɛ kpɔ́n, lobo ɖɔ: “Mɛ̌si, étɛ́ un ka ɖó ná wa bo ná ɖu gbɛ mavɔmavɔ sín gǔ?” 26 É ɖɔ n’i ɖɔ: “Étɛ́ è ka wlán dó Sɛ́n ɔ mɛ? Nɛ̌ a ka mɔ nukúnnú jɛ mɛ gbɔn?” 27 Nya ɔ yí gbe ɖɔ: “‘A ɖó ná yí wǎn nú Jexóva* Mawu towe kpó ayi towe bǐ kpó, kpó lǐndɔ̌n* towe bǐ kpó, kpó hlɔ̌nhlɔ́n towe bǐ kpó, kpó linlin towe bǐ kpó,’ bo ‘ɖó ná yí wǎn nú nɔzo towe hwiɖésúnɔ ɖɔhun.’” 28 É ɖɔ n’i ɖɔ: “A ná xósin ɖó ganjí; kpo ɖo mɔ̌ wa wɛ, énɛ́ ɔ, a ná mɔ gbɛ.”

29 Amɔ̌, ɖó nya ɔ jló ná ɖe xlɛ́ ɖɔ émí nyí nǔjlɔ́jlɔ́watɔ́ wútu ɔ, é ɖɔ nú Jezu ɖɔ: “Mɛ̌ ka nyí nɔzo ce tawun?” 30 Jezu ka yí gbe ɖɔ: “Nya ɖé gosín Jeluzalɛ́mu wá xwe Jelíko, bo jɛ ajotɔ́ lɛ́ sín alɔ mɛ. Yě yí nǔ tɔn lɛ́ bǐ, bo xo è, lobo jó è dó nyi beɖebeɖe, bo yi. 31 Hwenɛ́nu pɛ́ɛ́ ɔ, vɔ̌sánúxwlémawutɔ́ ɖé gbɔn ali énɛ́ wá xweyǐgbe. Amɔ̌, hwenu e é mɔ nya ɔ é ɔ, é gbɔn ali ɔ sín akpá ɖě ɔ xwé bo dín. 32 Mɔ̌ ɖokpó ɔ, hwenu e Levíi ví ɖé jɛ fí ɔ bo mɔ ɛ é ɔ, é gbɔn ali ɔ sín akpá ɖě ɔ xwé bo dín. 33 Amɔ̌, Samalíinu ɖé xwe tomɛ bo gbɔn ali ɔ, lobo jɛ fínɛ́. Ée é mɔ ɛ é ɔ, nǔ tɔn blá wǔ n’i. 34 Énɛ́ wú ɔ, é sɛkpɔ́ ɛ bo kɔn ami kpó vɛ̌ɛn kpó dó akpa tɔn lɛ́ mɛ, lobo blá. Énɛ́ gúdo ɔ, é sɔ́ ɛ ɖó kanlin éɖésúnɔ tɔn jí, bo kplá ɛ yi fí e alitanu lɛ́ nɔ yi jɛ é, lobo kpé nukún dó wǔtu tɔn. 35 Ayǐhɔ́ngbe tɔn ɔ, é sɔ́ deníye* we jó nú mɛ e nɔ kpé nukún dó fí e alitanu lɛ́ nɔ yi jɛ é wú é, bo ɖɔ: ‘Kpé nukún dó wǔtu tɔn. Ényí a zán akwɛ́ ɖěbǔ zɛ élɔ́ wú ɔ, un ná sú we, hwenu e un ná lɛ́ kɔ wá é.’ 36 Ðo mɛ atɔn énɛ́ lɛ́ mɛ ɔ, mɛ̌ ka ɖe xlɛ́ ɖɔ émí nyí nya e jɛ ajotɔ́ lɛ́ sín alɔ mɛ é sín nɔzo bɔ a lin?” 37 É ɖɔ: “Mɛ e kú nǔbláwǔ n’i é wɛ.” Énɛ́ ɔ, Jezu ɖɔ n’i ɖɔ: “Yi, bónú hwi lɔ ní nɔ wa nǔ ɖokpó ɔ.”

38 Din ɔ, ée yě ɖo ali jí bo ɖo yiyi wɛ é ɔ, é byɔ́ gletoxo ɖé mɛ. Ðo fínɛ́ ɔ, nǎwe ɖé nɔ nyí Mata bo yí jǒnɔ tɔn dó xwégbe. 39 É ɖó nɔví nyɔ̌nu ɖé, bɔ è nɔ ylɔ́ ɛ ɖɔ Mali. Mali ɔ jínjɔ́n Aklúnɔ sín afɔ lɛ́ kɔn, bo ɖo tó ɖó nǔ e ɖɔ wɛ é ɖe lɛ́ é* wɛ. 40 Azɔ̌ gěgé wiwa ka fɛ́ Mata sín ayi. Énɛ́ wú ɔ, é wá Jezu gɔ́n bo ɖɔ: “Aklúnɔ, ée nɔví nyɔ̌nu ce jó mì dó bɔ nyiɖokpónɔ ɖo nǔ lɛ́ bǐ wa wɛ é cí ɖě nú we ǎ é? Ðɔ n’i ɖɔ é ní wá d’alɔ mì.” 41 Aklúnɔ ka yí gbe n’i ɖɔ: “Mata, Mata, ado ɖo huhu we wɛ tawun dó nǔ gěgé wú. 42 Nǔ kpɛɖé, alǒ ɖokpó kpowun, wɛ ka ɖo dandan. Mali ɔ, éyɛ́ ka sɔ́ akpá ɖagbe* ɔ, bɔ è ná yí sín así tɔn ǎ.”

11 Din ɔ, é ɖo fí ɖé bo ɖo ɖɛ xo wɛ, bɔ ée é xo ɖɛ fó é ɔ, ahwanvú tɔn lɛ́ ɖokpó ɖɔ n’i ɖɔ: “Aklúnɔ, kplɔ́n mǐ lěe mǐ ná nɔ xo ɖɛ gbɔn é, lěe Jaan lɔ kplɔ́n ahwanvú tɔn lɛ́ gbɔn é.”

2 Énɛ́ ɔ, é ɖɔ nú yě ɖɔ: “Mi ɖo ɖɛ xo wɛ hǔn, mi nɔ ɖɔ: ‘Tɔ́, nyǐkɔ towe ní nyí nǔ mímɛ́.* Axɔ́súɖuto towe ní wá. 3 Nǎ mǐ nǔɖuɖu gbe bǐ gbe, sɔgbe xá hudó mǐtɔn azǎn ɖokpó ɖokpó tɔn. 4 Sɔ́ hwɛ mǐtɔn lɛ́ kɛ mǐ, ɖó mǐ lɔ nɔ sɔ́ kɛ mɛ e ɖu hwɛxɔ́ dó mǐ lɛ́ é bǐ; ma lɔn nú mǐ ní jɛ* tɛ́nkpɔ́n mɛ ó.’”

5 Énɛ́ gúdo ɔ, é ɖɔ nú yě ɖɔ: “Mǐ ní ɖɔ ɖɔ mɛ ɖokpó ɖo mi mɛ bo ɖó xɔ́ntɔn ɖé, bo yi gɔ̌n tɔn zǎnxwete, lobo ɖɔ n’i ɖɔ: ‘Xɔ́ntɔn, nya wɔ̌xúxú atɔn nú mì, 6 ɖó xɔ́ntɔn ce lɛ́ ɖokpó xwe to mɛ bo wá gɔ̌n ce din tlóló, un ka ɖó nǔtí bo ná ná ɛ ǎ.’ 7 Amɔ̌, é yí gbe n’i sín xɔ ɔ mɛ ɖɔ: ‘Ma sɔ́ dó ya nú mì ɖě ó. Hɔn ɔ ko ɖo súsú, bɔ vǐ ce lɛ́ kpó nyi kpó ko ɖo zan jí. Un sixú sí te, bo sɔ́ nǔtí nú we ǎ.’ 8 Má ɖɔ nú mi, ényí é ma tlɛ sí te, bo sɔ́ nǔɖé n’i ɖó xɔ́ntɔn tɔn e é nyí é wútu ǎ ɔ, é ɖo wɛn ɖɔ, ɖó é ɖo tagba dó n’i wɛ wútu ɔ, é ná sí te, bo sɔ́ nǔ ɖěbǔ e sín hudó é ɖó é n’i. 9 Énɛ́ wú ɔ, má ɖɔ nú mi, mi ní nɔ ɖo byɔ́byɔ́ wɛ, énɛ́ ɔ, è ná ná mi; mi ní nɔ ɖo biba wɛ, énɛ́ ɔ, mi ná mɔ; mi ní nɔ ɖo hɔn xúxú wɛ, énɛ́ ɔ, è ná hun nú mi. 10 Ðó mɛ ɖěbǔ e ɖo byɔ́byɔ́ wɛ é ná mɔ yí, bɔ mɛ ɖěbǔ e ɖo biba wɛ é ná mɔ, lobɔ mɛ ɖěbǔ e ɖo hɔn xúxú wɛ é ɔ, è ná hun n’i. 11 Nǔgbó ɔ, vǐtɔ́ tɛ́ ka ɖo mi mɛ, bɔ ényí vǐ tɔn byɔ́ ɛ hweví ɔ, é ná sɔ́ dan dó alɔ mɛ n’i? 12 Alǒ, ényí é lɛ́ byɔ́ ɛ azin ɔ, é ná sɔ́ hɔnkéklě d’alɔ mɛ n’i? 13 Énɛ́ wú ɔ, ényí midɛɛ lɛ́ mɛ e nyí hwɛhutɔ́ lɛ́ é tuun lěe mi ná ná nǔníná ɖagbe lɛ́ vǐ mitɔn lɛ́ gbɔn é ɔ, Tɔ́ e ɖo jǐxwé é tɔn zun kwínkwín má kwín! É ɖo wɛn ɖɔ é ná ná gbigbɔ mímɛ́ mɛ e nɔ ɖo byɔ̌byɔ́ ɛ wɛ lɛ́ é.”

14 Nukɔnmɛ ɔ, é nya awǒvi e hu ɖɛ̌ nú nya ɖé é sín jǐ tɔn. Ée awǒvi ɔ tɔ́n gúdo é ɔ, nya ɖɛ̌kúnánɔ ɔ ɖɔ xó, bɔ é jí wǔ nú ahwan ɔ. 15 Amɔ̌, yě mɛ ɖé lɛ́ ɖɔ: “Bɛluzebúlu,* awǒvi lɛ́ sín gǎn ɔ, wɛ nɔ ná ɛ hlɔ̌nhlɔ́n bɔ é nɔ dó nya awǒvi lɛ́ ná.” 16 Bɔ mɛ ɖěvo lɛ́ jɛ wuntun e ná gosín jǐxwé é ɖé byɔ́ ɛ jí, bo ná dó tɛ́n ɛ kpɔ́n. 17 Ðó é tuun linlin yětɔn wútu ɔ, é ɖɔ nú yě ɖɔ: “Axɔ́súɖuto e mɛ kínklán ɖe é bǐ sín kún wɛ ná sú dó, bɔ xwé e gbe kínklán ɖe é ná gba. 18 Ðo ali ɖokpó ɔ nu ɔ, ényí Satáan húzú kpan nukɔn éɖée ɔ, nɛ̌ axɔ́súɖuto tɔn ka ná nɔ te gbɔn? Ðó mi ɖɔ ɖɔ Bɛluzebúlu wɛ nɔ ná hlɔ̌nhlɔ́n mì, bɔ un nɔ dó nya awǒvi lɛ́ ná. 19 Ényí Bɛluzebúlu wɛ nɔ ná hlɔ̌nhlɔ́n mì bɔ un nɔ dó nya awǒvi lɛ́ ná ɔ, mɛ̌ ka nɔ ná hlɔ̌nhlɔ́n ahwanvú mitɔn lɛ́ bɔ yědɛɛ lɛ́ nɔ dó nya yě ná lo? Nǔ e wú yě wɛ ná wá ɖɔ hwɛ xá mi é nɛ́. 20 Amɔ̌, ényí alɔví Mawu tɔn wɛ nɔ ná hlɔ̌nhlɔ́n mì, bɔ un nɔ dó nya awǒvi lɛ́ ná hǔn, Axɔ́súɖuto Mawu tɔn ko fyán mi nǔgbó. 21 Ényí nya hlɔ̌nhlɔ́nnɔ e sɔ́ ahwannú ganjí é ɖé ɖo xwé tɔn cɔ́ wɛ ɔ, nǔɖé nɔ wa nǔɖókan tɔn lɛ́ ǎ. 22 Amɔ̌, ényí mɛ e ɖó hlɔ̌nhlɔ́n hú i é ɖé tɔ́n ahwan ɛ, bo ɖu ɖo jǐ tɔn ɔ, mɛ énɛ́ nɔ yí ahwanfunnú tɔn e wú ɖeji dó wɛ é ɖe lɛ́ é bǐ, bo nɔ má nǔ e é yí ɖo así tɔn lɛ́ é nú mɛ ɖěvo lɛ́. 23 Mɛ ɖěbǔ e ma ɖo jǐ ce ǎ é klán gbe xá mì, bɔ mɛ ɖěbǔ e ma ɖo mɛ lɛ́ xo kplé xá mì wɛ ǎ é ɖo yě gba dó wɛ.

24 “Ényí gbigbɔ nyanya ɖé tɔ́n sín mɛɖé jí ɔ, é nɔ gbɔn fí e sin ma ɖe ǎ lɛ́ é, bo nɔ ɖo fí e é ná nɔ é ba wɛ, bɔ ényí é ma mɔ fí ɖěbǔ ǎ ɔ, é nɔ ɖɔ: ‘Un ná lɛ́ kɔ yi xwé ce gbe fí e un gosín é.’ 25 Bɔ nú é wá ɔ, é nɔ mɔ xwé ɔ, bɔ è ko za b’ɛ mɛ́, lobo lɛ́ b’acɔ́ ná bǐ. 26 Énɛ́ ɔ, é nɔ yi bo nɔ kplá gbigbɔ e nylá hú éɖésúnɔ é tɛ́nwe ɖěvo, bɔ ényí yě byɔ́ xwé ɔ gbe ɔ, yě nɔ nɔ fínɛ́. Bɔ ninɔmɛ e mɛ nya énɛ́ nɔ wá nɔ ɖo gǔdo mɛ é nɔ nylá hú bǐbɛ́mɛ tɔn ɔ.”

27 Ée Jezu ɖo xó énɛ́ lɛ́ ɖɔ wɛ é ɔ, nǎwe ɖé ɖo ahwan ɔ mɛ, bo sú xó ɖɔ: “Awǎjijɛnɔ wɛ nyí nyɔ̌nu e hɛn xo towe, bo dó anɔ̌ nú we é!” 28 Amɔ̌, é ɖɔ: “Éǒ, é nyɔ́ wa ɔ, awǎjijɛnɔ wɛ nyí mɛ e nɔ se xó Mawu tɔn, bo nɔ bló ɖ’é jí lɛ́ é!”

29 Ée ahwan ɔ ɖo kplékplé ɖó kpɔ́ wɛ é ɔ, é jɛ ɖiɖɔ jí ɖɔ: “Jijimɛ nyanya ɖé wɛ nyí jijimɛ élɔ́; é ɖo wuntun ɖé ba wɛ, amɔ̌, è ná ɖe wuntun ɖěbǔ xlɛ́ ɛ zɛ wuntun e kunkplá Jonási é wú ǎ. 30 Ðó lěe Jonási húzú wuntun ɖé nú Ninívunu lɛ́ gbɔn é ɔ, mɔ̌ wɛ Gbɛtɔ́ví ɔ ná nyí nú jijimɛ élɔ́. 31 Axɔ́sú nyɔ̌nu tofɔligbé tɔn ɔ ná fɔ́n sín kú ɖo hwɛɖiɖɔ ɔ hwenu xá mɛ e ɖo jijimɛ élɔ́ mɛ lɛ́ é, bo ná ɖó hwɛ nú yě, ɖó é gosín káká fí e ayǐkúngban ɔ kponu ɖó é bo ná dó ɖótó nǔnywɛ́ Salomɔ́ɔ tɔn. Amɔ̌, mɛ e hú gǎn Salomɔ́ɔ é ɖé wɛ ɖo fí. 32 Ninívunu lɛ́ ná fɔ́n sín kú ɖo hwɛɖiɖɔ ɔ hwenu xá jijimɛ élɔ́ bo ná ɖó hwɛ n’i, ɖó hwɛ yědɛɛ lɛ́ tɔn lɛ́ vɛ́ nú yě,* hwenu e Jonási jlá mawuxó yě é. Amɔ̌, mɛ e hú gǎn Jonási é ɖé wɛ ɖo fí. 33 Ényí mɛɖé tá zogbɛ́n ɔ, é nɔ sɔ́ ɖó fí e hwlá é ǎ, mɔ̌ jɛ́n é ma nɔ lɛ́ sɔ́ ɖó xasun* glɔ́ ǎ é nɛ́, loɔ, zogbɛ́nhɛnnú jí wɛ é nɔ sɔ́ ɖó, bónú mɛ e byɔ́ xwégbe lɛ́ é ní dó sixú mɔ wěziza. 34 Nukún towe wɛ nyí zogbɛ́n agbaza towe tɔn. Ényí nukún towe ɖo nǔ ɖokpó jí* ɔ, agbaza towe blěbú lɔ ná nɔ wěziza nu.* Amɔ̌, ényí é nɔ xwlé axi* ɔ, agbaza towe ɖésú ná dó ablu. 35 Hǔn, bo nɔ acéjí, bónú wěziza e ɖo hwɛ mɛ é ní ma dó ablu ó. 36 Énɛ́ wú ɔ, ényí agbaza towe bǐ ɖo wěziza nu, bɔ akpáxwé tɔn ɖě ma ɖo ablu mɛ ǎ ɔ, éɖésú blěbú ná za wě lěe zogbɛ́n nɔ ná we wěziza gbɔn é ɖɔhun.”

37 Ée é ɖɔ mɔ̌ gúdo é ɔ, Falizyɛn ɖé byɔ́ ɛ ɖɔ é ní wá ɖu nǔ xá émí. Énɛ́ wú ɔ, é yi xwé tɔn gbe, bo jínjɔ́n ayǐ ɖo távo tó. 38 Amɔ̌, ée Falizyɛn ɔ mɔ ɖɔ é kún klɔ́ alɔ* tɔn lɛ́ hwɛ̌ cóbó ɖu nǔ ó é ɔ, é kpácá ɛ. 39 Aklúnɔ ka ɖɔ n’i ɖɔ: “Mi Falizyɛn lɛ́ ɔ, mi nɔ klɔ́ kɔ́fu kpó agbǎn kpó gúdo bɔ yě nɔ mɛ́, loɔ, nukúnkɛndídó kpó nǔnyanyawiwa kpó wɛ gɔ́ xo mitɔn mɛ. 40 Yɛyinɔ è mi! Mɛ e bló nǔ e mǐ nyí ɖo wěxo é jɛ́n lɛ́ bló nǔ e mǐ nyí ɖo xomɛ é ǎ cé? 41 Amɔ̌, ényí mi ná nǔ wamamɔnɔ lɛ́* hǔn, ní nyí nǔ e gosín ayi mɛ lɛ́ é, énɛ́ ɔ, nǔ e kunkplá mi lɛ́ é bǐ ná mɛ́. 42 Heelú mi, Falizyɛn lɛ́, ɖó mi nɔ ná mǎɖówǒ nǔhwɛ́nkún mǎti kpó hlǔu kpó tɔn, gɔ́ nú mǎɖówǒ mǎ ɖěvo lɛ́ bǐ tɔn, loɔ, mi nɔ dó vɛ̌ nú hwɛjijɔ Mawu tɔn kpó wǎn yí nú Mawu kpó! É ɖo dandan ɖɔ mi ní wa nǔ énɛ́ lɛ́, loɔ, mi ɖó ná dó vɛ̌ nú nǔ ɖě lɛ́ lɔ ǎ. 43 Heelú mi, Falizyɛn lɛ́, ɖó mi nɔ yí wǎn nú zinkpo nukɔntɔn* e ɖo kplɔ́ngbasá lɛ́ é, bo nɔ ba ɖɔ mɛ ɖěvo lɛ́ ní dó gbe émí kpó sísí kpó ɖo axi lɛ́ mɛ! 44 Heelú mi, ɖó mi cí yɔdo ɖěɖěe ma jɛ wě ganjí ǎ,* bɔ mɛ lɛ́ nɔ ɖi zɔnlin gbɔn yě jí, bo ma nɔ tuun ǎ lɛ́ é ɖɔhun!”

45 Mɛ e tuun Sɛ́n ɔ ganjí lɛ́ é ɖokpó ka yí gbe n’i ɖɔ: “Mɛ̌si, nǔ énɛ́ lɛ́ e a ɖɔ é ɔ, mǐ lɔ zun wɛ a ɖe nɛ́ mɛ.” 46 Énɛ́ ɔ, é ɖɔ: “Heelú mi, mi mɛ e tuun Sɛ́n ɔ ganjí lɛ́ é lɔ, ɖó mi nɔ ɖó agban kpinkpɛn lɛ́ kɔ jí nú mɛ lɛ́, loɔ, miɖésúnɔ nɔ y’agba agban lɛ́ wú kpó alɔví mitɔn lɛ́ ɖokpó kpó ǎ!

47 “Heelú mi, ɖó mi nɔ jlá yɔdo gbeyíɖɔ lɛ́ tɔn ɖó, tɔ́gbó mitɔn lɛ́ wɛ ka hu yě! 48 É ɖo wɛn ɖɔ mi tuun nǔ e tɔ́gbó mitɔn lɛ́ wa lɛ́ é. É ɖo mɔ̌ có, mi yí gbe nú nǔ énɛ́ lɛ́, ɖó yě hu gbeyíɖɔ lɛ́, bɔ midɛɛ lɛ́ ka ɖo yɔdo gbeyíɖɔ lɛ́ tɔn jlá ɖó wɛ. 49 Énɛ́ wú wɛ Mawu ɔ, ɖo nǔnywɛ́ tɔn mɛ ɔ, é lɛ́ ɖɔ: ‘Un ná sɛ́ gbeyíɖɔ lɛ́ kpó mɛsɛ́dó lɛ́ kpó dó yě, bɔ yě ná hu yě mɛ ɖé lɛ́, bo ná dó ya nú yě mɛ ɖé lɛ́, 50 bónú hun gbeyíɖɔ lɛ́ bǐ tɔn, ée è kɔn nyi ayǐ sín hwenu e è ɖó gbɛ ɔ ayǐ é* ní dó sixú nɔ kɔ nú jijimɛ élɔ́, 51 bɛ́sín hun Abɛ́li tɔn jí káká jɛ Zakalíi, ée è hu ɖo vɔ̌sákpe ɔ kpó tɛ́npli ɔ kpó tɛ́ntin é sín hun jí.’ Ɛɛn, má ɖɔ nú mi, é ná nɔ kɔ nú* jijimɛ élɔ́.

52 “Heelú mi, mi mɛ e tuun Sɛ́n ɔ ganjí lɛ́ é, ɖó mi sɔ́ nǔtuuntuun sín cávi ɔ. Miɖésúnɔ ɔ, mi byɔ́ mɛ* ǎ, bɔ mi lɛ́ sú ali dó mɛ e ɖo tíntɛ́nkpɔ́n wɛ bo ná byɔ́ mɛ lɛ́ é!”

53 Ée é gosín fínɛ́ é ɔ, sɛ́nkplɔ́nmɛtɔ́ lɛ́ kpó Falizyɛn lɛ́ kpó jɛ gǒ mɛ n’i syɛ́nsyɛ́n, bo jɛ nǔ kanbyɔ́ ɛ jí magbokɔ, 54 lobo ɖo cícɔ́ ɛ wɛ, bo ná wlí i ɖo xó e é ná ɖɔ lɛ́ é mɛ.

12 Hwenɛ́nu ɔ, ahwan ɖé kplé ɖó kpɔ́ bɔ gbɛtɔ́ afatɔ́n mɔ̌kpán ɖ’é mɛ. Yě sukpɔ́ sɔmɔ̌ bo ɖo afɔ tɛ yěɖée lɛ́ jí wɛ. É ɖɔ nú ahwanvú tɔn lɛ́ hwɛ̌ ɖɔ: “Mi cɔ́ miɖée dó Falizyɛn lɛ́ sín tɔ́n, éé nyí yɛmɛnúwiwa é wú. 2 Ðó nǔ ɖěbǔ e è sɔ́ sɛ xwe ganjí é ɔ, è ná wá gɔn ɖiɖexlɛ́ ǎ, nǔ ɖěbǔ ka ɖo nǔglɔ́ bónú è ná wá gɔn tuuntuun ǎ. 3 Énɛ́ wú ɔ, nǔ ɖěbǔ e mi ɖɔ ɖo zǐnflú mɛ é ɔ, è ná wá se ɖo wěziza nu, bɔ nǔ e mi ɖe kpá mɛ ɖo xɔnɔnɔ mɛ bo ɖɔ é ɔ, è ná wá nɔ xɔ ta bo jlá. 4 Gɔ́ ná ɔ, xɔ́ntɔn ce lɛ́ è mi, má ɖɔ nú mi, mi ma nɔ ɖi xɛsi nú mɛ e nɔ hu agbaza, bɔ énɛ́ gúdo ɔ, yě ma nɔ kpé wú bo nɔ wa nǔ ɖěbǔ hú mɔ̌ ǎ lɛ́ é ó. 5 Amɔ̌, un ná ɖɔ mɛ e mi ná ɖi xɛsi ná é nú mi: Mi ɖi xɛsi nú Mɛ e, ényí é hu mɛ gúdo ɔ, é ɖó acɛ bo ná sɔ́ mɛ nyi Jeyɛ́nu* mɛ é. Ɛɛn, má ɖɔ nú mi, mi ɖi xɛsi nú Mɛ énɛ́. 6 È nɔ sa gboli atɔ́ɔ́n yí gankwɛ́ kpɛví* we, kabǐ? É ɖo mɔ̌ có, Mawu ka nɔ wɔn* ɖokpó yětɔn ǎ. 7 Midɛɛ lɛ́ ɔ, ɖa nabí e ɖo ta nú mi é bǐ sín kɛ́n wɛ è tlɛ sɔ́. Mi ma ɖi xɛsi ɖěbǔ ó; mi xɔ akwɛ́ hú gboli gěgé.

8 “Má ɖɔ nú mi, mɛ ɖěbǔ e yí gbe ɖo gbɛtɔ́ lɛ́ nukɔn ɖɔ émí tuun mì é ɔ, Gbɛtɔ́ví ɔ lɔ ná yí gbe ɖo wɛnsagun Mawu tɔn lɛ́ nukɔn ɖɔ émí tuun i. 9 Amɔ̌, mɛ ɖěbǔ e ná gbɛ́ mì ɖo gbɛtɔ́ lɛ́ nukɔn é ɔ, è ná gbɛ́ ɛ ɖo wɛnsagun Mawu tɔn lɛ́ nukɔn. 10 Bɔ mɛ ɖěbǔ e ná ɖɔ xó nyanya ɖé dó Gbɛtɔ́ví ɔ wú é ɔ, è ná sɔ́ kɛ ɛ; amɔ̌, mɛ ɖěbǔ e ná nylá nu dó gbigbɔ mímɛ́ ɔ wú é ɔ, è ná sɔ́ kɛ ɛ ǎ. 11 Hwenu e è ná kplá mi yi togun ɔ nukɔn,* alǒ yi axɔ́súzɔ́watɔ́ lɛ́ kpó acɛkpikpa lɛ́ kpó nukɔn é ɔ, ado ní ma hu mi dó lěe mi ná jɛ hun dó miɖée jí gbɔn é alǒ dó nǔ e mi ná ɖɔ é wú ó, 12 ɖó gbigbɔ mímɛ́ ná kplɔ́n nǔ e mi ɖó ná ɖɔ lɛ́ é mi ɖo ganxixo énɛ́ mɛ.”

13 Mɛ ɖokpó ɖo ahwan ɔ mɛ bo ɖɔ n’i ɖɔ: “Mɛ̌si, ɖɔ nú nɔví súnnu ce ɖɔ ní má gǔ ɔ xá mì.” 14 É ɖɔ n’i ɖɔ: “Nya ɛ, mɛ̌ ka sɔ́ mì hwɛɖɔtɔ́ alǒ hwɛgbotɔ́ nú mi mɛ we lɛ́?” 15 É ka ɖɔ nú ahwan ɔ ɖɔ: “Mi nɔ wunzɛn bo cɔ́ miɖée dó nukúnkɛndídó* alɔkpa bǐ wú, ɖó ényí mɛɖé tlɛ ɖó nǔ bɔ é túnflá ɔ, nǔ e é ɖó lɛ́ é wɛ nɔ ná ɛ gbɛ ǎ.” 16 Énɛ́ ɔ, é ná nǔjlɛ́dónǔwú ɖokpó yě bo ɖɔ: “Nya dɔkunnɔ ɖé tíin, bɔ gle tɔn ná nǔkún gěgé. 17 Énɛ́ wú ɔ, é jɛ ɖiɖɔ dó ayi mɛ jí ɖɔ: ‘Ée un ma sɔ́ ɖó fí ɖěbǔ bo ná xo nǔkún ce lɛ́ kplé dó din ǎ é ɔ, étɛ́ un ka ɖó ná wa?’ 18 Énɛ́ gúdo ɔ, é ɖɔ: ‘Nǔ e un ná wa é ɖíe: Un ná kíjá agɔ̌ ce lɛ́* bo ná bló ɖaxó ɖěvo lɛ́, lobo ná xo nǔkún ce lɛ́ bǐ kpó nǔɖókan ce lɛ́ bǐ kpó kplé dó yě mɛ. 19 Énɛ́ gúdo ɔ, un ná ɖɔ nú nyiɖée* ɖɔ: “A* ɖó nǔ ɖagbe gěgé ɖo sɛxwetɛn bo ná ɖu vǐví tɔn nú xwe gěgé; gbɔjɛ, ɖu, bo nu, lobo ɖu gbɛ towe sín vǐví.”’ 20 Amɔ̌, Mawu ɖɔ n’i ɖɔ: ‘Xlonɔ, zǎn élɔ́ mɛ ɔ, è ɖo gbɛ* towe byɔ́ we wɛ. Mɛ̌ tɔn nǔ ɖěɖěe a xo kplé lɛ́ é ka ná nyí lo?’ 21 Nǔ ɖokpó ɔ wɛ ná xá mɛ e xo dɔkun kplé nú éɖée, bo ma ka nyí dɔkunnɔ ɖo Mawu nukúnmɛ ǎ é.”

22 Énɛ́ gúdo ɔ, é ɖɔ nú ahwanvú tɔn lɛ́ ɖɔ: “Énɛ́ wútu wɛ un ɖo ɖiɖɔ nú mi wɛ ɖɔ ado ní ma sɔ́ nɔ hu mi dó gbɛ* mitɔn wú, nú nǔ e kan nǔ e mi ná ɖu é ɖě ó, abǐ dó agbaza mitɔn wú, nú nǔ e kan nǔ e mi ná dó é ɖě ó. 23 Ðó gbɛ* xɔ akwɛ́ hú nǔɖuɖu, bɔ agbaza xɔ akwɛ́ hú nǔzínzán. 24 Mi kpɔ́n avǔnsákɔwó lɛ́: Yě nɔ dó nǔkún ǎ, yě ka nɔ lɛ́ ya nǔkún ǎ; yě ɖó kɔ́zun ǎ, yě ka lɛ́ ɖó agɔ̌ ǎ; é ɖo mɔ̌ có, Mawu nɔ ná nǔɖuɖu yě. Mi ma xɔ akwɛ́ hú xɛ lɛ́ flaflá tɔn ǎ cé? 25 Mɛ̌ ka ɖo mi mɛ bɔ é ná sín adohu adohu wú, bɔ é ná kpé wú bo dó awabá* ɖokpó hwenu e é ná nɔ gbɛ ná é jí? 26 Ðó mi ma tlɛ sixú wa mɔ̌ ǎ wútu ɔ, étɛ́wú ado ka ná hu mi dó nǔ e kpo lɛ́ é wú lo? 27 Mi kpɔ́n lěe folówa lɛ́ nɔ su gbɔn é: Yě nɔ xo kan ǎ, yě ka nɔ lɔn avɔ ǎ; amɔ̌, má ɖɔ nú mi, Salomɔ́ɔ ɖó susu tawun có, é sɔ́ nǔ ɖokpó yětɔn ɖɔhun ǎ. 28 Ényí mɔ̌ wɛ Mawu nɔ sɔ́ nǔ nú gběhan e ɖo gle mɛ égbé, bɔ sɔ ɔ, è ná bɛ́ nyi myɔ mɛ lɛ́ é gbɔn ɔ, nɛ̌ é ma ka ná ná nǔzínzán midɛɛ lɛ́ hú mɔ̌ ǎ gbɔn, nǔɖiɖi kpɛvínɔ è mi? 29 Hǔn, ado ní ma sɔ́ nɔ hu mi dó nǔ e mi ná ɖu é kpó nǔ e mi ná nu é kpó wú ɖě ó. Ado ní ma sɔ́ nɔ hu mi zɛ xwé wú ɖě ó. 30 Ðó nǔ énɛ́ lɛ́ bǐ ɔ, nǔ e gúdo akɔta e ɖo gbɛ ɔ mɛ lɛ́ é nɔ ɖo wezun kán ɖe wɛ nukún myámyá lɛ́ é wɛ. Amɔ̌, Tɔ́ mitɔn tuun ɖɔ mi ɖó nǔ énɛ́ lɛ́ sín hudó. 31 Mi ní kpo ɖo Axɔ́súɖuto tɔn ba wɛ, énɛ́ ɔ, è ná gɔ́ nǔ énɛ́ lɛ́ nú mi.

32 “Lɛ̌ngbɔ́hwan kpɛví, mi ma ɖi xɛsi ó, ɖó Tɔ́ mitɔn hun xomɛ bo ná ná mi Axɔ́súɖuto ɔ. 33 Mi sa nǔɖókan mitɔn lɛ́, bo ná nǔ wamamɔnɔ lɛ́. Mi bló akwɛ́kpo e ma nɔ gbi ǎ lɛ́ é. Mi kplé dɔkun e ma nɔ gblé ǎ é ɖó jǐxwé, fí e ajotɔ́ ɖě ma nɔ sɛkpɔ́ ǎ, bɔ avɔɖwivɔɖwi ɖě ma nɔ hɛn nǔ gblé ɖe ǎ é. 34 Ðó fí e dɔkun mitɔn ɖe é ɔ, fínɛ́ wɛ ayi mitɔn lɔmɔ̌ ná nɔ.

35 “Mi sin gǒjíblánú,* lobonú zogbɛ́n mitɔn lɛ́ ní ɖo títá. 36 Mi ɖó ná cí mɛsɛntɔ́ ɖěɖěe ɖo te kpɔ́n gǎn yětɔn bónú é ná lɛ́ kɔ sín alɔwlíwlí domɛ, bɔ hwenu e é ná wá bo ná xúxú hɔn é ɔ, yě ná sixú hun n’i tlóló lɛ́ é ɖɔhun. 37 Awǎjijɛnɔ wɛ nyí mɛsɛntɔ́ énɛ́ lɛ́ e gǎn yětɔn ná wá, bo ná mɔ ɖɔ yě ɖo acéjí é! Má ɖɔ nǔgbó nú mi, é ná sɔ́ gǒjíblánú sin, bo ná ɖɔ ɖɔ yě ní jínjɔ́n távo tó, lobo ná sɛkpɔ́ yě bo ná sɛn ká nú yě. 38 Awǎjijɛnɔ wɛ nú yě, ényí é wá ɖo zǎnxwete,* alǒ é ná bo tlɛ nyí ɖo zǎnvlɔ́ɖówe gúdo,* bo mɔ yě ɖo gbesisɔmɛ ɔ nɛ́! 39 Nǔ ɖokpó ka ɖíe: Ényí xwétɔ́ ɖé tuun gan e mɛ ajotɔ́ ná wá dó é wɛ ɔ, é ná lɔn nú è ná gba xwé tɔn ǎ. 40 Midɛɛ lɛ́ lɔmɔ̌ ɔ, mi ɖo gbesisɔmɛ, ɖó gan e mɛ mi ma lin dó ɖěbǔ ǎ é wɛ Gbɛtɔ́ví ɔ ná wá.”

41 Énɛ́ gúdo ɔ, Piyɛ́ɛ ɖɔ: “Aklúnɔ, mǐdɛɛ lɛ́ ɖokpónɔ wɛ a ná nǔjlɛ́dónǔwú énɛ́ a, alǒ mɛ bǐ?” 42 Bɔ Aklúnɔ ɖɔ: “Mɛ̌ ka nyí nǔjíkpɔ́ntɔ́* gbejínɔtɔ́ ayiɖotenánɔ* e gǎn tɔn ná sɔ́ ɖó mɛsɛntɔ́ tɔn lɛ́ bǐ nu, bónú é ná nɔ ná nǔɖuɖu e sín hudó yě ɖó é yě hwebǐnu dó hwetɔnnu é tawun? 43 Awǎjijɛnɔ wɛ nyí mɛsɛntɔ́ énɛ́, ényí gǎn tɔn wá bo mɔ ɛ bɔ é ɖo mɔ̌ wa wɛ ɔ nɛ́! 44 Má ɖɔ nǔgbó nú mi, é ná sɔ́ ɛ ɖó nǔɖókan tɔn lɛ́ bǐ nu. 45 Amɔ̌, ényí mɛsɛntɔ́ énɛ́ ɖɔ dó ayi tɔn mɛ gbeɖé ɖɔ: ‘Gǎn ce sín wǐwá ɖo lǐnlín wɛ,’ bo jɛ mɛsɛntɔ́ súnnu lɛ́ kpó nyɔ̌nu lɛ́ kpó xo jí, jɛ nǔ ɖu jí, jɛ ahan nu jí, lobo húzú ahannumúnɔ ɔ, 46 mɛsɛntɔ́ énɛ́ sín gǎn ná wá gbe e gbe é ma ɖo nukún ɖó è wɛ ǎ é kpó gan e mɛ é ma tuun ǎ é kpó, bo ná sɔ́ tódɔnnúmɛ e syɛ́n hú bǐ é dó dɔn tó n’i, lobo ná xwe è dó gbejímanɔtɔ́ lɛ́ sín ahwan mɛ. 47 Énɛ́ gúdo ɔ, mɛsɛntɔ́ énɛ́ e mɔ nukúnnú jɛ nǔ e gǎn tɔn jló é mɛ, bo ma ka ɖo gbesisɔmɛ ǎ, alǒ ma bló nǔ e é byɔ́ ɛ é* ǎ é ná ɖu bǎ gěgé. 48 Amɔ̌, mɛ e wa nǔ e jɛ xá bǎ lɛ́ é, ɖó é ɖo manywɛ́ mɛ wútu é ɔ, bǎ kpɛɖé wɛ é ná ɖu. Nǔgbó ɔ, mɛ ɖěbǔ e è ná nǔ gěgé é ɔ, è ná byɔ́ nǔ gěgé ɖo así tɔn, bɔ mɛ e è sɔ́ ɖó nǔ gěgé nu é ɔ, è ná ɖó nukún ɖɔ é ní wa nǔ énɛ́ lɛ́ bǐ ganjí.

49 “Un wá bo ná flɔ́ myɔ dó ayǐkúngban ɔ jí. Myɔ ɔ ɖíe è ka ko flɔ́ è, bɔ étɛ́ un ka ná lɛ́ jló hú mɔ̌? 50 Nǔgbó ɔ, batɛ́mu ɖé tíin bɔ è ɖó ná bló nú mì. Ado ná kpo ɖo huhu mì wɛ káká bɔ é ná wá vivɔnu! 51 Fífá hɛn wá ayǐkúngban ɔ jí gbé wɛ un tɔ́n bɔ mi lin a? Éǒ, má ɖɔ nú mi, é nyɔ́ wa ɔ, kínklán wɛ un hɛn wá. 52 Ðó bɛ́sín din ɔ, kínklán ná tíin ɖo xwédo mɛ. Ényí mɛ atɔ́ɔ́n wɛ ɖ’é mɛ ɔ, mɛ atɔn ná sí te dó mɛ we jí, bɔ mɛ we ná sí te dó mɛ atɔn jí. 53 Yě ná klán, tɔ́ ná sí te dó vǐ súnnu tɔn jí, bɔ vǐ súnnu ná sí te dó tɔ́ tɔn jí, nɔ ná sí te dó vǐ nyɔ̌nu tɔn jí, bɔ vǐ nyɔ̌nu ná sí te dó nɔ tɔn jí, asúnɔ ná sí te dó vǐ tɔn si jí, bɔ vǐsi ná sí te dó asú tɔn nɔ jí.”

54 Énɛ́ gúdo ɔ, é lɛ́ ɖɔ nú ahwan ɔ ɖɔ: “Ényí mi mɔ bɔ akpɔ́kpɔ́ dó ɖo gbadahwe jí ɔ, mi nɔ ɖɔ tlóló ɖɔ: ‘Jǐ ɖaxó ɖé ɖo nǎ ja wɛ,’ bɔ é ka nɔ nyí mɔ̌ nǔgbó. 55 Ényí mi mɔ bɔ jɔhɔn jɛ nyinyi jí sín tofɔligbé ɔ, mi nɔ ɖɔ: ‘Yǒzo syɛ́nsyɛ́n ná gbɛ́,’ bɔ é ka nɔ nyí mɔ̌ nǔgbó. 56 Yɛmɛnúwatɔ́ è mi, mi tuun lěe è nɔ gbéjé lěe ayǐkúngban ɔ kpó jǐnukúnsin kpó cí é kpɔ́n gbɔn é, amɔ̌, étɛ́wú mi ma ka tuun lěe è ná gbějé hwenu bǔnɔ élɔ́ kpɔ́n gbɔn é ǎ? 57 Étɛ́wú mi ma ka mɔ nukúnnú jɛ nǔ e sɔgbe bɔ mi ɖó ná wa é wú ǎ? 58 Ði kpɔ́ndéwú ɔ, ényí hwi kpó mɛ e kpó kpé nǔ ɖo sɛ́n lixo é xwe acɛkpatɔ́ ɖé gɔ́n ɔ, tɛ́n kpɔ́n bo ɖe ɖɛ tagba ɔ xá ɛ hwenu e mi ɖo ali jí é, bónú é ní ma ylɔ́ we dó hwɛɖɔtɔ́ nukɔn, bónú hwɛɖɔtɔ́ ɔ ní sɔ́ we dó alɔ mɛ nú gantɔ́cɔ́tɔ́, lobonú gantɔ́cɔ́tɔ́ ɔ ní sɔ́ we dó gankpá mɛ ó. 59 Má ɖɔ nú we, é ɖo wɛn ɖɔ ényí a ma sú axɔ́ e a ɖu é káká yi jɛ gankwɛ́ kpɛví* e gbɔn tó é jí ǎ ɔ, a ɖo fínɛ́ ná tɔ́n sín wɛ ǎ.”

13 Hwenɛ́nu ɔ, mɛɖé lɛ́ ɖo mɛ e ɖo fínɛ́ lɛ́ é mɛ bo ɖɔ Galiléenu, éé sín hun Pilátu cáká kpó vɔ̌sísá yětɔn lɛ́ kpó lɛ́ é xó nú Jezu. 2 É yí gbe nú yě ɖɔ: “Galiléenu énɛ́ lɛ́ nyí hwɛhutɔ́ hú Galiléenu ɖě lɛ́ bǐ wú wɛ yě se wǔvɛ́ énɛ́ lɛ́ wɛ mi vɛdó a? 3 Ðěbǔ lɔ ǎ! Amɔ̌, ényí hwɛ mitɔn lɛ́ ma vɛ́ nú mi ǎ* ɔ, mɔ̌ wɛ è ná sú kún dó nú mi mɛ bǐ gbɔn. 4 Mɛ 18 ɖěɖěe jí atɔxwɛ Silowée tɔn mu jɛ, bo hu lɛ́ é ka lo? Yě hu hwɛ hú mɛ ɖěvo e nɔ nɔ Jeluzalɛ́mu lɛ́ é bǐ wɛ mi vɛdó a? 5 Ðěbǔ lɔ ǎ! Amɔ̌, ényí hwɛ mitɔn lɛ́ ma vɛ́ nú mi ǎ* ɔ, è ná sú kún dó nú mi mɛ bǐ lěe é nyí gbɔn nú yě é.”

6 Énɛ́ gúdo ɔ, é gbɛ kan d’é nu bo ná nǔjlɛ́dónǔwú élɔ́: “Nya ɖé tun fígitín dó vǐwungbo tɔn mɛ. É wá sínsɛ́n tɔn gbɛ gbé bo ka mɔ ɖěbǔ ǎ. 7 Énɛ́ ɔ, é ɖɔ nú vǐwunzɔ́watɔ́ ɔ ɖɔ: “Sín xwe atɔn ɖíe wɛ un nɔ tɔ́n fígi gbɛ gbé ɖo fígitín élɔ́ jí, bo ka nɔ mɔ ɖě ǎ. Gbo è zin dɛ́! Aniwú é ka ɖó ná kpo ɖo ayǐkúngban ɔ hɛn gú wɛ?” 8 É yí gbe n’i ɖɔ: “Gǎn ce, lɛ̌ jó è dó nú xwe ɖokpó bónú má kun do lɛ́ lɛ̌ dó è, lobo kɔn lanmí d’é mɛ. 9 Ényí é ná sínsɛ́n ɖo nukɔnmɛ hǔn, é nyɔ́ nɛ́, é ma ka nyí mɔ̌ ǎ ɔ, a ná ɖɔ bɔ è ná gbo è zin dɛ́.”

10 Din ɔ, é ɖo nǔ kplɔ́n mɛ wɛ ɖo kplɔ́ngbasá lɛ́ ɖokpó ɖo gbɔjɛzángbe. 11 Nǎwe ɖé ka ɖo fínɛ́ bɔ gbigbɔ nyanya* ɖo jǐ tɔn, bo ko d’azɔn ɛ káká nú xwe 18. É nɔ zɔn tɔ́tɔ́ bo nɔ kpé wú bo nɔ jlɔ́ ɖěbǔ ǎ. 12 Ée Jezu mɔ ɛ é ɔ, é ɖɔ n’i ɖɔ: “Nǎwe, è ko gbɔ azɔn towe nú we.” 13 Énɛ́ ɔ, é ɖó alɔ jǐ tɔn, bɔ tlóló ɔ, é jlɔ́ bo jɛ susu kpa nú Mawu jí. 14 Amɔ̌, ɖó Jezu gbɔ azɔn nú mɛ ɖo gbɔjɛzángbe wútu ɔ, xomɛ sin nukɔntɔ́ kplɔ́ngbasá ɔ tɔn, bɔ é ɖɔ nú ahwan ɔ ɖɔ: “Azǎn ayizɛ́n wɛ è ɖó ná nɔ wa azɔ̌ ná. Énɛ́ wú ɔ, mi ní nɔ wá bónú è ná gbɔ azɔn nú mi ɖo azǎn énɛ́ lɛ́ jí, é ní ma nyí ɖo gbɔjɛzángbe ó.” 15 Amɔ̌, Aklúnɔ yí gbe n’i ɖɔ: “Yɛmɛnúwatɔ́ è mi! Mi mɛ ɖokpó ɖokpó nɔ tún nyibú* tɔn, alǒ tócí tɔn sín kpó mɛ, lobo nɔ kplá ɛ tɔ́n, bo ná dó ná ɛ sin ɖo gbɔjɛzángbe ǎ cé? 16 Nǎwe élɔ́ e nyí vǐ nyɔ̌nu Ablaxámu tɔn, bɔ Satáan ko dó gɛdɛ káká nú xwe 18 é ɔ, è ɖó ná tún kan n’i sín gɛdɛ énɛ́ mɛ ɖo gbɔjɛzángbe ǎ cé?” 17 Ée é ɖɔ nǔ énɛ́ lɛ́ é ɔ, winnyá jɛ gbeklánxámɛtɔ́ tɔn lɛ́ bǐ hu jí. Amɔ̌, ahwan ɔ blěbú jɛ awǎ jɛ jí ɖó nǔjíwǔ e é wa lɛ́ é bǐ wú.

18 Énɛ́ wú ɔ, é gbɛ kan d’é nu bo ɖɔ: “Étɛ́ ɖɔhun Axɔ́súɖuto Mawu tɔn ka cí? Étɛ́ wú un ka sixú sɔ́ jlɛ́ dó? 19 É cí mutádi sín kwín* e nya ɖé sɔ́ bo dó ɖó jikpá tɔn mɛ é ɖɔhun. É su bo húzú atín, bɔ xɛ lɛ́ xo adɔ̌ nyi ala tɔn lɛ́ mɛ.”

20 É lɛ́ ɖɔ: “Étɛ́ wú un ka sixú sɔ́ Axɔ́súɖuto Mawu tɔn jlɛ́ dó? 21 É cí tɔ́n e nǎwe ɖé sɔ́ dó nya linfín nǔjlɛ́nú ɖaxó atɔn* ná, bɔ linfín nyinya ɔ bǐ fɔ́n é ɖɔhun.”

22 Ée Jezu ɖo ali jí xwe Jeluzalɛ́mu é ɔ, é nɔ ɖo nǔ kplɔ́n mɛ wɛ sín toxo ɖé mɛ jɛ ɖěvo mɛ, bo nɔ lɛ́ ɖo mɔ̌ wa wɛ sín gletoxo ɖé mɛ jɛ ɖěvo mɛ. 23 Din ɔ, nya ɖé kanbyɔ́ ɛ ɖɔ: “Aklúnɔ, mɛ kpɛɖé jɛ́n è ná hwlɛ́n gán nǔgbó a?” É ɖɔ nú yě ɖɔ: 24 “Mi dó gǎn tawun bo gbɔn hɔn kpɛví ɔ nu; ɖó má ɖɔ nú mi, mɛ gěgé ná ba bo ná gbɔn nu, amɔ̌, yě ná kpé wú ǎ. 25 Ényí xwétɔ́ ɔ sí te bo sú hɔn ɔ, mi ná cí kɔ́xota, bo ná nɔ ɖo hɔn ɔ xúxú wɛ lobo ná nɔ ɖɔ: ‘Aklúnɔ, hun hɔn nú mǐ.’ Amɔ̌, é ná yí gbe nú mi ɖɔ: ‘Un tuun fí e mi gosín é ǎ.’ 26 Énɛ́ ɔ, mi ná jɛ ɖiɖɔ jí ɖɔ: ‘Mǐ ɖu nǔ bo nu ahan xá we, bɔ a lɛ́ kplɔ́n nǔ mɛ ɖo ali mǐtɔn ɖaxó lɛ́ jí.’ 27 Amɔ̌, é ná ɖɔ nú mi ɖɔ: ‘Un tuun fí e mi gosín é ǎ. Mi bǐ ní bú dó mì, nǔagɔwatɔ́ è mi!’ 28 Fínɛ́ wɛ mi ná ya avǐ, bo ná ɖu aɖǔkún ɖe, hwenu e mi ná mɔ Ablaxámu, Izáki, Jakɔ́bu kpó gbeyíɖɔ lɛ́ bǐ kpó ɖo Axɔ́súɖuto Mawu tɔn mɛ, bɔ midɛɛ lɛ́ ka ná ɖo kɔ́xota é. 29 Gɔ́ ná ɔ, mɛ lɛ́ ná gosín zǎnzǎnhwe jí kpó gbadahwe jí kpó, bo ná lɛ́ gosín totaligbé kpó tofɔligbé kpó, lobo ná jínjɔ́n távo tó ɖo Axɔ́súɖuto Mawu tɔn mɛ. 30 Énɛ́ ɔ, mɛ e ɖo gǔdo din lɛ́ é ɖé lɛ́ ná wá jɛ nukɔn, bɔ mɛ e ɖo nukɔn din lɛ́ é ɖé lɛ́ ná wá gbɔn gǔdo.”

31 Hwe énɛ́ nu ɔ, Falizyɛn ɖé lɛ́ wá bo ɖɔ n’i ɖɔ: “Sí te bo gosín fí ɖó Elódu jló ná hu we.” 32 Bɔ é ɖɔ nú yě ɖɔ: “Mi yi ɖɔ nú ayǐsájɛ énɛ́ ɖɔ: ‘Un ná ɖo awǒvi lɛ́ nya wɛ, bo ná ɖo azɔn gbɔ nú mɛ lɛ́ wɛ égbé kpó sɔ kpó, bɔ azǎn atɔn gbe ɔ, un ná fó.’ 33 É ɖo mɔ̌ có, un ɖó ná kpo ɖo yiyi wɛ égbé, sɔ kpó azǎn e ná bɔ d’é wú é gbe kpó, ɖó é sɔgbe ɖɔ è ní hu gbeyíɖɔ ɖé ɖo fí ɖěvo zɛ Jeluzalɛ́mu wú ǎ. 34 Jeluzalɛ́mu, Jeluzalɛ́mu, hwi mɛ e nɔ hu gbeyíɖɔ lɛ́, bo nɔ nyi awǐnnyaglo dó mɛ e è sɛ́ dó we lɛ́ é! Azɔn nabí un ko jló ná xo vǐ towe lɛ́ kplé, lěe kokló nɔ xo vǐ tɔn lɛ́ kplé dó awa tɔn lɛ́ glɔ́ gbɔn é? Loɔ, mi jló mɔ̌ ǎ. 35 Éɖíe! È ko jó xwé mitɔn dó nú mi. Má ɖɔ nú mi, mi sɔ́ ná mɔ mì ɖě gbeɖé ǎ káká jɛ hwenu e mi ná ɖɔ xó élɔ́ é: ‘Nǔ nyɔ́ nú mɛ e wá ɖo Jexóva* nyíkɔ mɛ é!’”

14 Jezu ka wá yi nǔ ɖu gbé ɖo nukɔntɔ́ Falizyɛn lɛ́ tɔn ɖokpó sín xwégbe ɖo gbɔjɛzángbe, bɔ mɛ lɛ́ ɖo kpínkpɔ́n ɛ wɛ tlítlí. 2 Nya ɖokpó ka ɖo nukɔn tɔn bo nɔ jɛ jǐjízɔn.* 3 Énɛ́ wú ɔ, Jezu kanbyɔ́ mɛ e tuun Sɛ́n ɔ ganjí lɛ́ é kpó Falizyɛn lɛ́ kpó ɖɔ: “É ka sɔgbe xá sɛ́n ɖɔ è ní gbɔ azɔn nú mɛ ɖo gbɔjɛzángbe a alǒ é sɔgbe ǎ?” 4 Amɔ̌, yě cí xwíí. Énɛ́ ɔ, é ɖó alɔ nya ɔ wú, bo gbɔ azɔn n’i lobo nyi i. 5 Énɛ́ gúdo ɔ, é ɖɔ nú yě ɖɔ: “Mɛ̌ ka ɖo mi mɛ bɔ ényí vǐ* tɔn alǒ nyibú* tɔn jɛ dotɔ mɛ ɖo gbɔjɛzángbe ɔ, é ma ná yá wǔ ɖe tɔ́n ǎ?” 6 Yě kpé wú bo ná ɛ xósin ǎ.

7 Ée é ɖ’ayi wú ɖɔ mɛ e è ylɔ́ wá nǔ ɔ ɖu gbé lɛ́ é ɖo tɛn nukúnɖéjí lɛ́ sɔ́ wɛ é ɔ, é ná nǔjlɛ́dónǔwú ɖé yě. É ɖɔ nú yě ɖɔ: 8 “Ényí mɛɖé ylɔ́ we dó alɔwlíwlígɔ́ domɛ hǔn, ma jínjɔ́n tɛn nukúnɖéjí hú gǎn ɔ mɛ ó. Bóyá é sixú ko lɛ́ ylɔ́ mɛ e nyí mɛ nukúnɖéjí hú gǎn we é ɖé. 9 Énɛ́ ɔ, mɛ e ylɔ́ mi mɛ we lɛ́ bǐ é ná wá bo ná ɖɔ nú we ɖɔ: ‘Gbɔ nú nya élɔ́ ní jínjɔ́n tɛn towe mɛ.’ Énɛ́ ɔ, a ná sí te kpó winnyá kpó bo ná yi jínjɔ́n tɛn gǔdo gúdo tɔn ɔ mɛ. 10 Amɔ̌, ényí è ylɔ́ we dó alɔwlíwlígɔ́ domɛ hǔn, yi jínjɔ́n tɛn gǔdo gúdo tɔn ɔ mɛ, énɛ́ ɔ, ényí mɛ e ylɔ́ we é wá ɔ, é ná ɖɔ nú we ɖɔ: ‘Xɔ́ntɔn, wǎ jínjɔ́n tɛn nukɔntɔn ɔ mɛ.’ Énɛ́ ɔ, è ná wlí yɛ̌yi nú we ɖo jǒnɔ gbɛ̌ towe lɛ́ bǐ sín nukɔn. 11 Ðó mɛ ɖěbǔ e sɔ́ éɖée su é ɔ, è ná zé è hwe, bɔ mɛ ɖěbǔ e zé éɖée hwe é ɔ, è ná sɔ́ ɛ su.”

12 Énɛ́ gúdo ɔ, é ɖɔ nú nya e ylɔ́ ɛ dó nǔɖuɖu ɔ domɛ é lɔ ɖɔ: “Ényí a ja gbada núɖuɖu ná mɛ gbé alǒ a ja agɔ̌ ylɔ́ gbé hǔn, ma ylɔ́ xɔ́ntɔn towe lɛ́ alǒ nɔví towe lɛ́ alǒ hɛ̌nnumɔ towe lɛ́ alǒ nɔzo towe dɔkunnɔ lɛ́ ó. É ma nyí mɔ̌ ǎ ɔ, yě lɔ sixú wá ylɔ́ we, bɔ énɛ́ ná nyí axɔ́ bɔ yě sú we. 13 Amɔ̌, ényí a ja agɔ̌ ylɔ́ gbé hǔn, ylɔ̌ wamamɔnɔ lɛ́, sékúnɔ lɛ́, afɔkponɔ lɛ́, nukúntɔ́nnɔ lɛ́; 14 énɛ́ ɔ, a ná ɖó awǎjijɛ, ɖó yě ɖó nǔ ɖěbǔ bo ná dó sú axɔ́ tɔn we ǎ. È ná sú axɔ́ tɔn we ɖo fínfɔ́n sín kú nǔjlɔ́jlɔ́watɔ́ lɛ́ tɔn hwenu.”

15 Ée jǒnɔ gbɛ̌ tɔn lɛ́ ɖokpó se xó énɛ́ lɛ́ é ɔ, é ɖɔ n’i ɖɔ: “Awǎjijɛnɔ wɛ nyí mɛ e ná ɖu nǔ* ɖo Axɔ́súɖuto Mawu tɔn mɛ é.”

16 Jezu ɖɔ n’i ɖɔ: “Nya ɖé ylɔ́ agɔ̌ ɖaxó ɖokpó, bo ylɔ́ mɛ gěgé. 17 Ée agɔ̌ ɔ sín gan xo é ɔ, é sɛ́ mɛsɛntɔ́ tɔn dó bónú é ná yi ɖɔ nú mɛ ɖěɖěe è ylɔ́ lɛ́ é ɖɔ: ‘Mi wá, ɖó nǔ bǐ ko ɖo gbesisɔmɛ din.’ 18 Amɔ̌, yě bǐ jɛ hwɛjijɔ ba jí. Mɛ nukɔntɔn ɔ ɖɔ n’i ɖɔ: ‘Un xɔ gle ɖé bo ɖó ná yi kpɔ́n; ma sin xomɛ ó, nǎ sixú wá ǎ.’ 19 Bɔ mɛ ɖěvo ɖɔ: ‘Un xɔ nyibú wǒ bo xwe gbǐgbéjé kpɔ́n gbé; ma sin xomɛ ó, nǎ sixú wá ǎ.’ 20 Mɛ ɖěvo lɛ́ ɖɔ: ‘Asi wɛ un kplá tlóló, bɔ ɖó hwɛjijɔ énɛ́ wú ɔ, un sixú wá ǎ.’ 21 Énɛ́ ɔ, mɛsɛntɔ́ ɔ wá bo ɖó gbe nú gǎn tɔn. Xomɛ sin gǎn ɔ bɔ é ɖɔ nú mɛsɛntɔ́ tɔn ɖɔ: ‘Yǎ wǔ yi toxo ɔ sín ali ɖaxó lɛ́ kpó ali kpɛví lɛ́ kpó jí, bo kplá wamamɔnɔ lɛ́, sékúnɔ lɛ́, nukúntɔ́nnɔ lɛ́ kpó afɔkponɔ lɛ́ kpó wá fí.’ 22 Ée mɛsɛntɔ́ ɔ lɛ́ kɔ wá é ɔ, é ɖɔ: ‘Gǎn ce, un ko wa nǔ e a zɔ́n é, é ɖo mɔ̌ có, tɛnmɛ lɛ́ kpo.’ 23 Énɛ́ ɔ, gǎn ɔ ɖɔ nú mɛsɛntɔ́ ɔ ɖɔ: ‘Yi ali ɖěvo e ɖo toxo ɔ gúdo lɛ́ é jí bo ylɔ́ yě wá, bónú xwé ce ná mɔ tɛn dó gɔ́. 24 Ðó má ɖɔ nú mi, mɛ énɛ́ lɛ́ e è ylɔ́ ɖ’ayǐ lɛ́ é ɖěbǔ ná dó nǔ e dó yí jǒnɔ wɛ un ɖe lɛ́ é ɖɛ̌ ǎ.’”

25 Din ɔ, ahwan ɖaxó ɖé ɖo xwixwedó è wɛ, bɔ é lílɛ́ bo ɖɔ nú yě ɖɔ: 26 “Ényí mɛ ɖěbǔ wá gɔ̌n ce bo ma gbɛ́ wǎn nú* tɔ́ tɔn, nɔ tɔn, asi tɔn, vǐ tɔn lɛ́, nɔví tɔn súnnu lɛ́, nɔví tɔn nyɔ̌nu lɛ́, káká jɛ gbɛ* éɖésúnɔ tɔn jí ǎ ɔ, é sixú nyí ahwanvú ce ǎ. 27 Mɛ ɖěbǔ e ma sɔ́ yatín* tɔn bo xwedó mì ǎ é sixú nyí ahwanvú ce ǎ. 28 Ði kpɔ́ndéwú ɔ, mɛ̌ ka ɖo mi mɛ bo ná jló ná gbá atɔxwɛ ɖokpó, bo ma ná to jínjɔ́n ayǐ hwɛ̌, bo lɛ́n akwɛ́ e é ná byɔ́ é, bo ná kpɔ́n ɖɔ émí ɖó akwɛ́ e ná kpé bɔ é ná fó é ǎ? 29 É ma nyí mɔ̌ ǎ ɔ, é sixú dó atɔxwɛ ɔ do, bo ka sɔ́ ná kpé wú bo fó ǎ, bɔ nǔkpɔ́ntɔ́ lɛ́ bǐ ná jɛ kiko è jí, 30 bo ná nɔ ɖɔ: ‘Nya élɔ́ jɛ atɔxwɛ gbá jí, amɔ̌, é kpé wú bo fó ǎ.’ 31 Alǒ, ényí axɔ́sú ɖé kpó ahwanfuntɔ́ 10 000 kpó jló ná yi fun ahwan xá axɔ́sú ɖěvo e ɖó ahwanfuntɔ́ 20 000 é ɔ, é ná to jínjɔ́n ayǐ hwɛ̌ bo ba wěɖexámɛ lobo kpɔ́n ɖɔ é ná kpa émí a jí, kabǐ? 32 Ényí é mɔ ɖɔ é kún ná kpa émí ó ɔ, hwenu e mɛ ɖě ɔ kpo ɖo zɔ dó è tawun é ɔ, é ná sɛ́ afɔsɔ́ɖótetɔ́ tɔn lɛ́ dó bo ná byɔ́ fífá. 33 Ðo ali ɖokpó ɔ nu ɔ, mi ma blɛ́ miɖée ó, ényí mɛɖé ɖo mi mɛ bo ma dó gǔdo nǔɖókan tɔn lɛ́ bǐ* ǎ ɔ, é sixú nyí ahwanvú ce ǎ.

34 “Nǔgbó ɔ, jɛ ɔ, nǔ ɖagbe wɛ. Amɔ̌, ényí jɛ ma sɔ́ ɖó tɔ́n ǎ ɔ, étɛ́ è ka ná zán bɔ é ná lɛ́ ɖó tɔ́n? 35 É sɔ́ nyɔ́ nú ayǐkúngban ǎ, é ka sɔ́ lɛ́ nyɔ́ nú è ná cáká kpó lanmí kpó ǎ. Gbě wɛ è nɔ sɔ́ kɔn nyi. Mɛ e ɖó tó bo ná dó se nǔ é, ní bo ɖótó.”

15 Din ɔ, tokwɛ́yítɔ́ lɛ́ kpó hwɛhutɔ́ lɛ́ kpó nɔ xo yěɖée kplé lɛ́ lɛ̌ dó è bo ná ɖótó è. 2 Bɔ Falizyɛn lɛ́ kpó sɛ́nkplɔ́nmɛtɔ́ lɛ́ kpó nɔ ɖo nǔ húnhún ɖɔ wɛ, bo nɔ ɖɔ: “Nya élɔ́ nɔ yí hwɛhutɔ́ lɛ́ bo nɔ ɖu nǔ xá yě.” 3 Énɛ́ wú ɔ, é ná nǔjlɛ́dónǔwú élɔ́ yě: 4 “Mɛ̌ ka ɖo mi mɛ bo ná ɖó lɛ̌ngbɔ́ 100, bɔ ényí é hɛn ɖokpó bú ɔ, é ma ná jó 99 e kpo lɛ́ é dó nyi amagbo* mɛ, bo ná yi ba ɖokpó e bú é káká bo ná mɔ ɛ ǎ? 5 Ée é mɔ ɛ é ɔ, é sɔ́ ɛ dó kɔlivla mɛ bo j’awǎ. 6 Bɔ hwenu e é wá xwégbe é ɔ, é ylɔ́ xɔ́ntɔn tɔn lɛ́ kpó nɔzo tɔn lɛ́ kpó kplé bo ɖɔ nú yě ɖɔ: ‘Mi j’awǎ xá mì, ɖó un ko mɔ lɛ̌ngbɔ́ ce e bú é.’ 7 Má ɖɔ nú mi, ɖo ali ɖokpó ɔ nu ɔ, awǎ e è ná jɛ ɖo jǐxwé dó hwɛhutɔ́ ɖokpó e hwɛ tɔn lɛ́ vɛ́ ná* é tamɛ é, ná hú ée è ná jɛ dó nǔjlɔ́jlɔ́watɔ́ 99 e ma ɖó hudó hwɛvɛ́númɛ* tɔn ǎ lɛ́ é tamɛ é.

8 “Alǒ nyɔ̌nu tɛ́ ka ná ɖó dlǎkumu* wǒ, bɔ ényí é hɛn dlǎkumu* lɛ́ ɖokpó bú ɔ, é ma ná tá zogbɛ́n bo za xwé tɔn gbe, lobo ba kpó sɔxwixwe kpó káká bo ná mɔ ǎ? 9 Ée é mɔ é ɔ, é ylɔ́ xɔ́ntɔn tɔn lɛ́* kpó nɔzo tɔn lɛ́ kpó kplé bo ɖɔ: ‘Mi j’awǎ xá mì, ɖó un ko mɔ dlǎkumu* e un hɛn bú é.’ 10 Má ɖɔ nú mi, ɖo ali ɖokpó ɔ nu ɔ, wɛnsagun Mawu tɔn lɛ́ nɔ j’awǎ dó hwɛhutɔ́ ɖokpó, ée hwɛ tɔn lɛ́ vɛ́ ná* é tamɛ.”

11 Énɛ́ gúdo ɔ, é ɖɔ: “Nya ɖé ɖó vǐ súnnu we. 12 Mɛ kpɛví ɔ ɖɔ nú tɔ́ tɔn ɖɔ: ‘Tɔ́ ce, nǎ gǔ e ɖó ná nyí ce é mì.’ Énɛ́ ɔ, é má nǔɖókan tɔn lɛ́ nú yě. 13 Azǎn yɔywɛ ɖé gúdo ɔ, mɛ kpɛví ɔ xo nǔ e nyí étɔn lɛ́ é bǐ kplé bo yi to línlín ɖé mɛ. Ðo fínɛ́ ɔ, é zán gǔ tɔn dó akpa mɛ, gbɔn gbɛ hannyahannya zínzán gblamɛ. 14 Ée é ko zán nǔ lɛ́ bǐ gúdo é ɔ, adɔ ɖaxó ɖé tɔ́n gbɔn to ɔ bǐ mɛ, bɔ é sɔ́ ɖó nǔtí ǎ. 15 É tlɛ yi jɛ kɔ nú toví to ɔ tɔn lɛ́ ɖokpó, bɔ é sɛ́ ɛ dó gle tɔn mɛ bónú é ná nyi aglǔza n’i. 16 É nɔ jló tawun bo ná ɖu nǔ e aglǔza lɛ́ nɔ ɖu é, amɔ̌, mɛ ɖěbǔ nɔ ná ɛ nǔɖé ǎ.

17 “Hwenu e é byɔ́ éɖée mɛ é ɔ, é ɖɔ: ‘Azɔ̌watɔ́ tɔ́ ce tɔn lɛ́ ɖó nǔɖuɖu kɔn nyi kpɔ́, bɔ nyɛ ka ɖo fí bo ɖo adɔ kú wɛ. 18 Un ná sí te bo yi tɔ́ ce gɔ́n lobo ɖɔ n’i ɖɔ: “Tɔ́ ce, un hu hwɛ dó Mawu e ɖo jǐxwé é, bo hu hwɛ dó we. 19 Un sɔ́ jɛxá bónú è ná ylɔ́ mì ɖɔ vǐ* towe ǎ. Sɔ́ mì dó ɖó azɔ̌watɔ́ towe.”’ 20 Énɛ́ wú ɔ, é sí te bo yi tɔ́ tɔn gɔ́n. Hwenu e é kpo ɖo zɔ dó xwé ɔ é ɔ, tɔ́ tɔn mɔ ɛ sɛ́dó, bɔ nǔ tɔn blá wǔ n’i. É kán wezun bo yi kpl’así kɔ n’i, lobo kí si n’i kpó wǎnyíyí kpó. 21 Énɛ́ gúdo ɔ, vǐ ɔ ɖɔ n’i ɖɔ: ‘Tɔ́ ce, un hu hwɛ dó Mawu e ɖo jǐxwé é, bo hu hwɛ dó we. Un sɔ́ jɛxá bónú è ná ylɔ́ mì ɖɔ vǐ towe ǎ.’ 22 Amɔ̌, tɔ́ ɔ ɖɔ nú mɛsɛntɔ́ tɔn lɛ́ ɖɔ: ‘Mi yá wǔ sɔ́ awu gaga e nyɔ́ hú gǎn é bo dó n’i, mi dó alɔkɛ́ n’i, bo dó afɔkpa n’i. 23 Gɔ́ ná ɔ, mi yi sɔ́ nyibúsú wínnyáwínnyá e dó jǒ é wá bo hu, lobonú mǐ ní ɖu nǔ bo j’awǎ, 24 ɖó vǐ súnnu ce élɔ́ ko kú, amɔ̌, é lɛ́ wá gbɛ; é ko bú bɔ è ko lɛ́ mɔ ɛ.’ Énɛ́ ɔ, yě jɛ awǎ jɛ jí.

25 “Hwenɛ́nu ɔ, vǐ súnnu mɛxó ɔ ɖo gle mɛ, bɔ ée é lɛ́ kɔ bo sɛkpɔ́ xwé ɔ é ɔ, é se bɔ è ɖo nǔ xo wɛ bo ɖo we ɖú wɛ. 26 Énɛ́ wú ɔ, é ylɔ́ mɛsɛntɔ́ lɛ́ ɖokpó bo kan nǔ e ɖo jijɛ wɛ é byɔ́ ɛ. 27 Mɛsɛntɔ́ ɔ ɖɔ n’i ɖɔ: ‘Nɔví towe wɛ lɛ́ kɔ wá, bɔ tɔ́ towe hu nyibúsú wínnyáwínnyá e dó jǒ é, ɖó é mɔ ɛ ɖo ganjí ɖo agbaza mɛ* wútu.’ 28 Amɔ̌, xomɛ sin i bɔ é gbɛ́ ɖɔ émí kún ná byɔ́ xwégbe ó. Énɛ́ wú ɔ, tɔ́ tɔn tɔ́n bo jɛ vo sa n’i jí. 29 É yí gbe nú tɔ́ tɔn ɖɔ: ‘Un ko sɛn we nú xwe mɔ̌kpán, bo ka tlí tó nú we kpɔ́n gbeɖé ǎ, loɔ, a ka ná mì gbɔ̌ ɖokpó kpɔ́n gbeɖé, bónú nyi kpó xɔ́ntɔn ce lɛ́ kpó ná ɖu dó j’awǎ ǎ. 30 Amɔ̌, tlóló e vǐ súnnu towe énɛ́, éé zán nǔɖókan towe lɛ́ dó akpa mɛ xá tonyatɔ́ lɛ́ é wá é ɔ, a hu nyibúsú wínnyáwínnyá e dó jǒ é dó ta tɔn mɛ.’ 31 Tɔ́ ɔ ka ɖɔ n’i ɖɔ: ‘Vǐ súnnu ce, a ɖo kpɔ́ xá mì hwebǐnu, bɔ nǔ e nyí ce lɛ́ é bǐ wɛ nyí towe. 32 Amɔ̌, é ɖo dandan ɖɔ mǐ ní ɖu agɔ̌ bo j’awǎ, ɖó nɔví súnnu towe ko kú, é ka lɛ́ wá gbɛ; é ko bú bɔ è ko lɛ́ mɔ ɛ.’”

16 Énɛ́ gúdo ɔ, é lɛ́ ɖɔ nú ahwanvú lɛ́ ɖɔ: “Nya dɔkunnɔ ɖé ɖó nǔjíkpɔ́ntɔ́* ɖé, bɔ è dó hwɛ ɛ ɖɔ é nɔ hɛn nǔɖókan tɔn lɛ́ gú. 2 Énɛ́ wú ɔ, é ylɔ́ ɛ bo ɖɔ: ‘Étɛ́ ka nyí énɛ́ bɔ un se dó wǔ we? Jǒ akɔ́nwúnta nǔjíkpɔ́ntɔ́zɔ́ e a wa é tɔn, ɖó a sɔ́ sixú kpé nukún dó xwé ɔ wú ǎ.’ 3 Énɛ́ ɔ, nǔjíkpɔ́ntɔ́ ɔ ɖɔ nú éɖée ɖɔ: ‘Gǎn ce ɖíe ɖo nǔjíkpɔ́ntɔ́zɔ́ ɔ ná yí sín así ce wɛ è. Étɛ́ un ka ɖó ná wa? Un ɖó hlɔ̌nhlɔ́n sɔmɔ̌ bá wa glezɔ́ ǎ, bɔ winnyá ná lɛ́ hu mì dó nǔbyɔ́byɔ́ wú. 4 Áan! Un tuun nǔ e un ná wa, bónú hwenu e è ná yí nǔjíkpɔ́ntɔ́zɔ́ ɔ sín así ce é ɔ, mɛ lɛ́ ná yí mì dó xwé yětɔn lɛ́ gbe é.’ 5 Énɛ́ ɔ, ée é ylɔ́ mɛ e ɖu axɔ́ dó gǎn tɔn lɛ́ é ɖokpó ɖokpó é ɔ, é ɖɔ nú mɛ nukɔntɔn ɔ ɖɔ: ‘Axɔ́ nabí a ɖu dó gǎn ce?’ 6 É yí gbe ɖɔ: ‘Olívumi lǐtli 2 200.’* É ɖɔ n’i ɖɔ: ‘Wěma e mɛ a d’alɔ é ɖíe, jǐnjɔ́n ayǐ bo yá wǔ wlán 1 100.’ 7 Énɛ́ gúdo ɔ, é ɖɔ nú mɛ ɖěvo ɖɔ: ‘Hwɛ ka lo, axɔ́ nabí a ɖu?’ É ɖɔ: ‘Blěe nǔjlɛ́nú ɖaxó 100.’* É ɖɔ n’i ɖɔ: ‘Wěma e mɛ a d’alɔ é ɖíe, wlǎn 80.’ 8 Nǔjíkpɔ́ntɔ́ ɔ wa nǔ jlɔ́jlɔ́ ǎ có, gǎn tɔn kpa ɛ, ɖó é zán bǐbí sín ayi* dó wa nǔ wútu. Ðó gbɛ* élɔ́ sín vǐ lɛ́ nyɔ́ bǐbí sín ayi zán dó wa nǔ xá mɛ e kpó yě kpó ɖo jijimɛ ɖokpó ɔ mɛ lɛ́ é hú wěziza sín vǐ lɛ́.

9 “Gɔ́ ná ɔ, má ɖɔ nú mi: Mi sɔ́ dɔkun gbɛ élɔ́ tɔn lɛ́ dó zun xɔ́ntɔn ná. Énɛ́ ɔ, hwenu e dɔkun mɔ̌hun lɛ́ ná sú dó é ɔ, xɔ́ntɔn énɛ́ lɛ́ ná yí mi dó nɔtɛn mavɔmavɔ lɛ́. 10 Mɛ e nɔ nɔ gbejí ɖo nǔ kpɛɖé mɛ é nɔ lɛ́ nɔ gbejí ɖo nǔ gěgé mɛ, bɔ mɛ e nɔ wa nǔ agɔ ɖo nǔ kpɛɖé mɛ é nɔ lɛ́ wa nǔ agɔ ɖo nǔ gěgé mɛ. 11 Énɛ́ wú ɔ, ényí mi ma nɔ gbejí ɖo nǔ e kan dɔkun gbɛ élɔ́ tɔn lɛ́ é mɛ ǎ ɔ, mɛ̌ ka ná sɔ́ dɔkun jɔ dɔkun d’así nú mi? 12 Gɔ́ ná ɔ, ényí mi ma nɔ gbejí ɖo nǔ e mi nɔ sɔ́ mɛɖévonú dó wa ná é kɔn ǎ ɔ, mɛ̌ ka ná ná mi nǔ e è sɔ́ ɖ’ayǐ nú mi é? 13 Mɛsɛntɔ́ ɖěbǔ sixú nyí kannumɔ nú gǎn we ǎ, ɖó é ná gbɛ́ wǎn nú mɛ ɖě bo ná yí wǎn nú mɛ ɖě ɔ, alǒ é ná tɛ́ dó mɛ ɖě wú bo ka ná ké ya nú mɛ ɖě ɔ ǎ. Mi sixú nyí kannumɔ nú Mawu, bo lɛ́ nyí nú dɔkun ǎ.”

14 Falizyɛn lɛ́ nyí mɛɖé bo yí wǎn nú akwɛ́. Yě ɖo xó énɛ́ lɛ́ bǐ ɖótó wɛ, bo jɛ cícá ɛ ko jí. 15 Énɛ́ wú ɔ, é ɖɔ nú yě ɖɔ: “Mɛ ɖěɖěe nɔ ɖɔ ɖo gbɛtɔ́ lɛ́ nukɔn ɖɔ émí nyí nǔjlɔ́jlɔ́watɔ́ lɛ́ é wɛ mi nyí, amɔ̌, Mawu tuun ayi mitɔn lɛ́. Ðó nǔ e gbɛtɔ́ lɛ́ nɔ kpɔ́n dó mɔ nǔgɛ́n é ɔ, nǔ e xyɔ́ wǔ é wɛ é nyí ɖo Mawu nukúnmɛ.

16 “Sɛ́n ɔ kpó nǔ e gbeyíɖɔ lɛ́ wlán lɛ́ é kpó ɖo te káká jɛ Jaan hwenu. Sín hwenɛ́nu ɔ, è ɖo Axɔ́súɖuto Mawu tɔn jlá wɛ wɛn ɖagbe ɖé ɖɔhun, bɔ mɛ alɔkpa lɛ́ bǐ ɖo gǎn dó wɛ tawun bá byɔ́ mɛ. 17 Nǔgbó ɔ, é bɔ wǔ ɖɔ jǐnukúnsin kpó ayǐkúngban kpó ní wá yi hú ɖɔ wěkwín Sɛ́n ɔ tɔn ɖé sín akpáxwé kpɛví ɖokpó ní ma jɛnu ó.

18 “Mɛ ɖěbǔ e gbɛ́ asi tɔn bo da nyɔ̌nu ɖěvo é ɔ, aga wɛ é lɛ. Bɔ mɛ ɖěbǔ e da nyɔ̌nu e asú tɔn gbɛ́ é ɔ, mɛsi wɛ é ba.

19 “Nya dɔkunnɔ ɖé tíin bo nɔ dó avɔ ɖagbe ɖagbe vɔvɔ e wi d’é mɛ é kpó lɛ̌ɛnkanvɔ kpó. Ayǐhɔ́ngbe ayǐhɔ́ngbe ɔ, é nɔ ɖo gbɛ ɖu wɛ lobo nɔ ɖo dɔkunnɔ gbɛ zán wɛ. 20 Amɔ̌, è nɔ sɔ́ nǔbyɔ́ɖutɔ́ e è nɔ ylɔ́ ɖɔ Lazáa, bɔ agadá kpé wǔtu tɔn é ɖó hɔntogbó tɔn ta. 21 É nɔ ba ná ɖu nǔ ɖěɖěe nɔ flɛ́ sín távo nya dɔkunnɔ ɔ tɔn jí lɛ́ é. Ɛɛn, cukú lɛ́ tlɛ nɔ wá bo nɔ ɖíɖɔ́ agadá tɔn lɛ́. 22 Din ɔ, ée é wá yá é ɔ, nǔbyɔ́ɖutɔ́ ɔ kú bɔ wɛnsagun lɛ́ sɔ́ ɛ yi ɖó Ablaxámu kpá.*

“Nya dɔkunnɔ ɔ lɔ kú bɔ è ɖi i. 23 Ée é ɖo Yɔdo* mɛ é ɔ, é kpɔ́n jǐ, hwenu e é ɖo wǔvɛ́ syɛ́nsyɛ́n se wɛ é, bo mɔ Ablaxámu sɛ́dó ɖo zɔ tawun, bɔ Lazáa ɖo akpá* tɔn. 24 Énɛ́ wú ɔ, é sú xó bo ɖɔ: ‘Tɔ́ ce Ablaxámu, kú nǔbláwǔ nú mì, bo sɛ́ Lazáa dó bónú é ná nylɔ́ alɔvínu tɔn dó sin mɛ bo fá ɖɛ̌ ce ta, ɖó un ɖo wǔvɛ́ se wɛ tawun ɖo myɔ hɛhɛ élɔ́ mɛ.’ 25 Amɔ̌, Ablaxámu ɖɔ: ‘Vǐ ce, flín ɖɔ hwenu e a ɖo gbɛ é ɔ, a ko mɔ nǔ ɖagbe lɛ́ bɔ é kpé we. Lazáa ɔ, nǔ nyanya lɛ́ wɛ éyɛ́ ka mɔ. Amɔ̌ din ɔ, è ɖo gbɔ dó n’i wɛ ɖo fí, bɔ hwɛ ka ɖo wǔvɛ́ ɖaxó mɛ. 26 Gbɔn vo nú nǔ énɛ́ lɛ́ bǐ ɔ, do gɔngɔn ɖé ɖo mǐ kpó mi kpó tɛ́ntin. Énɛ́ wú ɔ, mɛ e ná ba ná gosín fí bo wá gɔ̌n mitɔn lɛ́ é sixú kpé wú ǎ. Mɔ̌ jɛ́n è ma sixú gosín gɔ̌n mitɔn bo wá fí ǎ é nɛ́.’ 27 Énɛ́ ɔ, é ɖɔ: ‘Ényí mɔ̌ wɛ hǔn, tɔ́, kɛnklɛ́n bo sɛ́ ɛ dó tɔ́ ce xwé, 28 ɖó un ɖó nɔví súnnu atɔ́ɔ́n. É ní yi ɖe kúnnu nú yě mlɛ́mlɛ́, bónú yě lɔ ní ma wá fí élɔ́ e è nɔ se wǔvɛ́ syɛ́nsyɛ́n ɖe é ó.’ 29 Amɔ̌, Ablaxámu ɖɔ: ‘Nǔ e Mɔyízi kpó gbeyíɖɔ lɛ́ kpó wlán lɛ́ é ɖo gɔ̌n yětɔn; yě ní ɖótó.’ 30 Énɛ́ ɔ, é ɖɔ: ‘Éǒ, tɔ́ ce Ablaxámu! É nyɔ́ wa ɔ, ényí mɛ e è fɔ́n sín mɛkúkú lɛ́ mɛ é ɖé yi gɔ̌n yětɔn ɔ, hwɛ yětɔn lɛ́ ná vɛ́ nú yě.’* 31 Amɔ̌, é ɖɔ n’i ɖɔ: ‘Ényí yě ma ɖótó nǔ e Mɔyízi kpó gbeyíɖɔ lɛ́ kpó wlán lɛ́ é ǎ ɔ, mɔ̌ jɛ́n ényí è fɔ́n mɛɖé sín mɛkúkú lɛ́ mɛ ɔ, yě ma ná ɖi xó tɔn ǎ é nɛ́.’”

17 Énɛ́ gúdo ɔ, é ɖɔ nú ahwanvú tɔn lɛ́ ɖɔ: “Nǔ e ná nyí afɔklɛ́nnú nú mɛ lɛ́ é ná wá jɛ́n wɛ. É ɖo mɔ̌ có, heelú mɛ e jí nǔ énɛ́ lɛ́ ná gbɔn bo wá é! 2 Ényí è sin se ɖaxó dó kɔ n’i bo kpíkpé è nyi xu mɛ ɔ, é ná ɖó le n’i hú é ní nyí afɔklɛ́nnú nú mɛ kpɛví élɔ́ lɛ́ ɖokpó. 3 Mi cɔ́ miɖée. Ényí nɔví towe hu hwɛ hǔn, gbɛ̌ nǔ n’i, ényí hwɛ tɔn lɛ́ vɛ́ n’i* hǔn, sɔ́ kɛ ɛ. 4 Ényí é tlɛ hu hwɛ dó we azɔn tɛ́nwe gbe ɖokpó, bo lɛ́ kɔ wá gɔ̌n towe azɔn tɛ́nwe, bo ɖɔ: ‘Hwɛ ce lɛ́ vɛ́ nú mì* ɔ, a ɖó ná sɔ́ hwɛ kɛ ɛ.”

5 Din ɔ, mɛsɛ́dó lɛ́ ɖɔ nú Aklúnɔ ɖɔ: “Dǒ nǔɖiɖi nǔɖiɖi jí nú mǐ.” 6 Énɛ́ ɔ, Aklúnɔ ɖɔ: “Ényí mi ɖó nǔɖiɖi bɔ é sɔ mutádi sín kwín* ɔ, mi ná ɖɔ nú atín* élɔ́ ɖɔ: ‘Hɔn hwiɖée bo yi tun te ɖo xu mɛ!’ Bɔ é ná se tónú nú mi.

7 “Mɛ̌ ka ɖo mi mɛ, bo ná ɖó mɛsɛntɔ́ ɖé, bɔ é nɔ lɛ gle n’i, alǒ nyi kanlin n’i, lobɔ ényí é gosín gle mɛ bo wá ɔ, é ná ɖɔ n’i ɖɔ: ‘Wǎ fí azɔn ɖokpó bá ɖu nǔ ɖo távo tó’? 8 Éǒ, é nyɔ́ wa ɔ, é ná ɖɔ n’i ɖɔ: ‘Ðyɔ̌ nǔ bo bló nǔɖuɖu nú mì, lobo sɛn ká nú mì káká bónú má ɖu nǔ bo nu ahan fó; énɛ́ gúdo ɔ, hwi lɔ sixú ɖu nǔ bo nu ahan.’ 9 Bɔ ɖó mɛsɛntɔ́ ɔ wa azɔ̌ e è ɖe n’i lɛ́ é wútu ɔ, é ná dó kú n’i wɛ a? Éǒ. 10 Mɔ̌ ɖokpó ɔ, ényí mi wa azɔ̌ e è ɖe nú mi lɛ́ é bǐ hǔn, mi ɖɔ: ‘Mɛsɛntɔ́ kpowun wɛ mǐ nyí, mǐ jɛ xá nǔ ɖě ǎ. Nǔ e mǐ ɖó ná wa é wɛ mǐ wa.’”

11 Ée é xwe Jeluzalɛ́mu é ɔ, é gbɔn fí e Samalíi kpó Galilée kpó kpé dogbó ɖe é. 12 Bɔ ée é byɔ́ gletoxo ɖé mɛ é ɔ, gudunɔ wǒ mɔ ɛ sɛ́dó; yě sí te bo ɖo zɔ zaan dó è. 13 Yě sú xó bo ɖɔ: “Mɛ̌si, Jezu, kú nǔbláwǔ nú mǐ.” 14 Ée é mɔ yě é ɔ, é ɖɔ nú yě ɖɔ: “Mi yi, bo sɔ́ miɖée xlɛ́ vɔ̌sánúxwlémawutɔ́ lɛ́.” Énɛ́ ɔ, ée yě ɖidó é ɔ, yě húzú mɛ mímɛ́. 15 Mɛ ɖokpó ɖo yě mɛ, bɔ ée é mɔ ɖɔ azɔn gbɔ nú émí é ɔ, é lɛ́ kɔ, bo ɖo susu kpa nú Mawu wɛ kpó xósúsú kpó. 16 É xwe agbɔ̌nnusú do ɖo afɔ Jezu tɔn lɛ́ kɔn lobo dó kú n’i. Samalíinu wɛ ka n’i. 17 Jezu yí gbe bo ɖɔ: “Yě mɛ wǒ lɛ́ bǐ wɛ húzú mɛ mímɛ́ ǎ cé? Fítɛ́ mɛ tɛ́nnɛ ɖě lɛ́ ka ɖe lo? 18 Mɛ ɖěvo ɖěbǔ sɔ́ lɛ́ kɔ bo wá kpa susu nú Mawu zɛ nya élɔ́ e gosín akɔta ɖěvo mɛ é wú ǎ wɛ a?” 19 Énɛ́ gúdo ɔ, é ɖɔ nú nya ɔ ɖɔ: “Sí te bo yi; nǔɖiɖi towe gbɔ azɔn nú we.”

20 Ée Falizyɛn lɛ́ kanbyɔ́ ɛ ɖɔ hwetɛ́nu Axɔ́súɖuto Mawu tɔn ka ja a jí é ɔ, é ná xósin yě ɖɔ: “Axɔ́súɖuto Mawu tɔn sín wǐwá ná ɖo vaan nú mɛ bǐ ǎ; 21 mɔ̌ jɛ́n mɛ lɛ́ ma ná ɖɔ: ‘Éɖíe ɖo fí è,’ alǒ: ‘Énɛ́ ɖo dɔ̌n nɛ́,’ ǎ é nɛ́. Ðó Axɔ́súɖuto Mawu tɔn ɖo tɛ́ntin mitɔn.”

22 Énɛ́ gúdo ɔ, é ɖɔ nú ahwanvú lɛ́ ɖɔ: “Azǎn ɖé lɛ́ ná wá bɔ mi ná ɖó nukún hwenu e Gbɛtɔ́ví ɔ ná ɖo kpɔ́ xá mi é, mi ka ná mɔ ǎ. 23 Mɛ lɛ́ ná ɖɔ nú mi ɖɔ: ‘Énɛ́ ɖo dɔ̌n nɛ́,’ alǒ: ‘Éɖíe ɖo fí è.’ Mi ma tɔ́n jɛ kɔ́xo ó, mi ma ka lɛ́ jɛ gǔdo yětɔn ó. 24 Ðó lěe jǐ nɔ kɛwun sín akpáxwé jǐnukúnsin tɔn ɖé káká yi akpáxwé jǐnukúnsin tɔn ɖěvo gbɔn é ɔ, mɔ̌ wɛ fí ɖiɖe Gbɛtɔ́ví ɔ tɔn ná cí. 25 Amɔ̌, jɛ nukɔn hwɛ̌ ɔ, é ná gbɔn wǔvɛ́ gěgé mɛ dín, bɔ jijimɛ élɔ́ ná lɛ́ gbɛ́ ɛ. 26 Gɔ́ ná ɔ, lěe é nyí gbɔn ɖo Nɔwée hwenu é ɔ, mɔ̌ wɛ é ná nyí gbɔn ɖo fí ɖiɖe Gbɛtɔ́ví ɔ tɔn hwenu: 27 mɛ lɛ́ ɖo nǔ ɖu wɛ, bo ɖo ahan nu wɛ, súnnu lɛ́ ɖo asi da wɛ, è ɖo nyɔ̌nu lɛ́ ná asú wɛ káká jɛ gbe e gbe Nɔwée byɔ́ tɔjíhún ɔ mɛ, bɔ sin vɔ gbɛ ɔ, bo sú kún yě mɛ bǐ tɔn dó é. 28 Mɔ̌ ɖokpó ɔ, ninɔmɛ ɔ ná cí Lɔti hwenu tɔn ɖɔhun: mɛ lɛ́ ɖo nǔ ɖu wɛ, bo ɖo ahan nu wɛ, yě ɖo nǔ xɔ wɛ, bo ɖo nǔ sa wɛ, yě ɖo nǔkún dó wɛ, bo ɖo xɔ gbá wɛ. 29 Amɔ̌, gbe e gbe Lɔti tɔ́n sín Sodɔ́mu é ɔ, myɔ kpó hwemí kpó ja sín jǐxwé bo sú kún dó nú yě bǐ. 30 Mɔ̌ ɖokpó ɔ wɛ é ná nyí ɖo gbe énɛ́ gbe hwenu e è ná ɖe Gbɛtɔ́ví ɔ xlɛ́ é.

31 “Hwenɛ́nu ɔ, mɛ e ná ɖo xɔ ta bɔ nǔɖókan tɔn lɛ́ ka ná ɖo xɔ ɔ mɛ é ní ma ɖɔ émí ná jɛ te bo yi bɛ́ nǔ énɛ́ lɛ́ ó. Mɔ̌ ɖokpó ɔ, mɛ e ɖo gle mɛ é ɖó ná lɛ́ kɔ yi nǔ e ɖo gǔdo lɛ́ é kɔn ǎ. 32 Mi flín asi Lɔti tɔn. 33 Mɛ ɖěbǔ e ná tɛ́n kpɔ́n bo ná hwlɛ́n gbɛ* tɔn gán é ná hɛn bú, amɔ̌, mɛ ɖěbǔ e hɛn gbɛ* tɔn bú é ná nya xɛ ɖ’é jí. 34 Má ɖɔ nú mi, ɖo zǎn énɛ́ mɛ ɔ, mɛ we ná ɖo zan ɖokpó ɔ jí, bɔ è ná sɔ́ mɛ ɖokpó bo ka ná jó mɛ ɖě ɔ dó. 35 Nyɔ̌nu we ná ɖo nǔ li wɛ ɖo sé ɖokpó ɔ kɔn, bɔ è ná sɔ́ mɛ ɖokpó bo ka ná jó mɛ ɖě ɔ dó.” 36* —— 37 Énɛ́ ɔ, yě yí gbe n’i ɖɔ: “Aklúnɔ, fítɛ́ nǔ ka ná nyí mɔ̌ ɖe?” É ɖɔ nú yě ɖɔ: “Fí e nǔkúkú ɖe é ɔ, fínɛ́ wɛ hɔ̌n lɛ́ ná kplé ɖe.”

18 Énɛ́ gúdo ɔ, é ná nǔjlɛ́dónǔwú ɖokpó yě dó xlɛ́ ɖɔ é ɖo dandan ɖɔ yě ní nɔ xo ɖɛ hwebǐnu, bo ma jó gbe ó. 2 É ɖɔ: “Toxo ɖokpó tíin, bɔ hwɛɖɔtɔ́ e ma nɔ ɖó sísí e gɔ́ngɔ́n é nú Mawu ǎ, bo ma nɔ lɛ́ sí mɛ ǎ é ɖé ɖ’é mɛ. 3 Asúkúsi ɖokpó lɛ́ ɖo toxo énɛ́ mɛ, bo nɔ fɔ́n bo nɔ ɖo gɔ̌n tɔn yi wɛ, lobo nɔ ɖɔ: ‘Tɛ́n kpɔ́n bo ɖɔ hwɛ jlɔ́jlɔ́ nú nyi kpó mɛ e kpó kpé nǔ ɖo sɛ́n lixo é.’ 4 Nú hwenu ɖé ɔ, hwɛɖɔtɔ́ ɔ ba bo ná bló mɔ̌ ǎ, amɔ̌, é wá ɖɔ nú éɖée ɖɔ: ‘Nǔgbó wɛ ɖɔ un nɔ ɖó sísí e gɔ́ngɔ́n é nú Mawu ǎ, un ka nɔ lɛ́ sí mɛ ɖěbǔ ǎ. 5 Amɔ̌, ɖó asúkúsi élɔ́ fɔ́n bo ɖo tagba dó nú mì wɛ wútu ɔ, un ná tɛ́n kpɔ́n bo ná ɖɔ hwɛ jlɔ́jlɔ́ n’i. Énɛ́ ɔ, é sɔ́ ná kpo ɖo gɔ̌n ce wá wɛ káká bónú agbɔ̌n ná wá kpé mì bǐ mlɛ́mlɛ́, ɖó nǔbyɔ́byɔ́ tɔn wú ǎ.’” 6 Énɛ́ gúdo ɔ, Aklúnɔ ɖɔ: “Hwɛɖɔtɔ́ ɔ nɔ wa nǔ jlɔ́jlɔ́ ǎ có, mi ka se xó e é ɖɔ é a? 7 Hǔn, é ɖo wɛn ɖɔ Mawu ná bló bɔ è ná ɖɔ hwɛ jlɔ́jlɔ́ nú mɛ e é sɔ́, bɔ yě nyí étɔn, bo nɔ ɖo xó sú ylɔ́ ɛ wɛ zǎn kéze lɛ́ é ǎ cé? É ná lɛ́ ɖó suúlu dó yě wú ǎ cé? 8 Má ɖɔ nú mi, é ná bló bɔ è ná ɖɔ hwɛ jlɔ́jlɔ́ nú yě dó yǐyá mɛ. Amɔ̌, ényí Gbɛtɔ́ví ɔ wá ɔ, é ka ná mɔ nǔɖiɖi énɛ́* ɖo ayǐkúngban jí dóó a?”

9 É lɛ́ ná nǔjlɛ́dónǔwú élɔ́ mɛ ɖěɖěe nɔ ɖeji dó nǔjlɔ́jlɔ́wiwa yěɖésúnɔ tɔn wú, bo nɔ mɔ ɖɔ mɛ ɖěvo lɛ́ kún nyí nǔtí ó lɛ́ é: 10 “Mɛ we yi ɖɛ xo gbé ɖo tɛ́npli mɛ, mɛ ɖokpó nyí Falizyɛn, bɔ mɛ ɖě ɔ nyí tokwɛ́yítɔ́. 11 Falizyɛn ɔ ɖo te bo jɛ ɖɛ xo dó ayi mɛ jí ɖɔ: ‘Mawu è, un dó kú nú we, ɖó un cí mɛ ɖě lɛ́, éé nyí mɛwlóɖutɔ́, nǔagɔwatɔ́, nyɔ̌nuɖěvobatɔ́ lɛ́ é ɖɔhun ǎ; un tlɛ cí tokwɛ́yítɔ́ énɛ́ ɖɔhun ǎ. 12 Un nɔ blá nu azɔn we ɖo aklúnɔzángbla ɖokpó mɛ; un nɔ ná mǎɖówǒ nǔ e un nɔ mɔ lɛ́ é bǐ tɔn.’ 13 Amɔ̌, tokwɛ́yítɔ́ ɔ ɖo te ɖo zɔ, bo tlɛ ba ná sɔ́ kɔ dó jǐ vɔ́vɔ́ ǎ; é nyɔ́ wa ɔ, é ɖo nǔ zin dó akɔ́n ta wɛ bo nɔ ɖɔ: ‘Mawu è, kú nǔbláwǔ nú mì, hwɛhutɔ́ wɛ nú mì.’ 14 Má ɖɔ nú mi, nya énɛ́ lɛ́ kɔ yi xwé tɔn gbe bo nyí nǔjlɔ́jlɔ́watɔ́ hú Falizyɛn énɛ́. Ðó mɛ ɖěbǔ e sɔ́ éɖée su é ɔ, è ná zé è hwe, amɔ̌, mɛ ɖěbǔ e zé éɖée hwe é ɔ, è ná sɔ́ ɛ su.”

15 Din ɔ, mɛ lɛ́ lɛ́vɔ́ ɖo vǐ yětɔn kpɛví lɛ́ kplá wá n’i wɛ bónú é ná ɖó alɔ yě wú. Amɔ̌, ée ahwanvú lɛ́ mɔ mɔ̌ é ɔ, yě jɛ nǔ gbɛ́ nú mɛ lɛ́ jí. 16 Jezu ka ylɔ́ vǐ kpɛví lɛ́ ɖɔ yě ní wá gɔ̌n émítɔn bo ɖɔ: “Mi jó vǐ kpɛví lɛ́ dó bónú yě ní wá gɔ̌n ce, mi ma tɛ́n kpɔ́n bo sú ali dó yě ó, ɖó mɛ e cí yě ɖɔhun lɛ́ é tɔn wɛ nyí Axɔ́súɖuto Mawu tɔn. 17 Má ɖɔ nǔgbó nú mi, mɛ ɖěbǔ e ma ná yí Axɔ́súɖuto Mawu tɔn vǐ kpɛví ɖɔhun ǎ é ná byɔ́ mɛ gbeɖé ǎ.”

18 Nukɔntɔ́ Jwifu lɛ́ tɔn ɖokpó kanbyɔ́ ɛ ɖɔ: “Mɛ̌si ɖagbe, étɛ́ un ka ɖó ná wa bo ná ɖu gbɛ mavɔmavɔ sín gǔ?” 19 Jezu ɖɔ n’i ɖɔ: “Étɛ́wú a ka ylɔ́ mì ɖɔ mɛ ɖagbe? Mɛ ɖěbǔ nyí mɛ ɖagbe zɛ Mawu ɖokpónɔ wú ǎ. 20 A tuun sɛ́n lɛ́: ‘Ma dó afɔ gbě alǒ ba nyɔ̌nu ɖěvo ó, ma hu mɛ ó, ma ja ajo ó, ma ɖe kúnnu agɔ ó, wlǐ yɛ̌yi nú tɔ́ towe kpó nɔ towe kpó.’” 21 Énɛ́ ɔ, é ɖɔ: “Sín vǔ wɛ un ko nɔ nyi sɛ́n énɛ́ lɛ́ bǐ.” 22 Ée Jezu se mɔ̌ gúdo é ɔ, é ɖɔ n’i ɖɔ: “Nǔ ɖokpó kpo ɖo hwihwedó we wɛ: Sa nǔ e a ɖó lɛ́ é bǐ bo má akwɛ́ tɔn nú wamamɔnɔ lɛ́, énɛ́ ɔ, a ná ɖó dɔkun ɖo jǐxwé; énɛ́ gúdo hǔn, wǎ bo xwedó mì.” 23 Ée é se mɔ̌ é ɔ, wǔ kú i tawun, ɖó é jɛ dɔkun titewungbe tɔn.

24 Jezu kpɔ́n ɛ bo ɖɔ: “É ná vɛ́ wǔ nú mɛ e ɖó akwɛ́ lɛ́ é tawun bónú yě ná byɔ́ Axɔ́súɖuto Mawu tɔn mɛ. 25 Nǔgbó ɔ, é ná bɔ wǔ nú lǎkúnmí bɔ é ná gbɔn nyɛ̌ví e nɔ tɔ nǔ é sín ali nu hú ɖɔ dɔkunnɔ ní byɔ́ Axɔ́súɖuto Mawu tɔn mɛ.” 26 Mɛ e se xó énɛ́ lɛ́ é ɖɔ: “Mɛ̌ è ka sixú hwlɛ́n gán lo?” 27 É ɖɔ: “Nǔ e gló gbɛtɔ́ é gló Mawu ǎ.” 28 Amɔ̌, Piyɛ́ɛ ɖɔ: “Mǐ ɖíe jó nǔ e mǐ ɖó lɛ́ é dó bo xwedó we è.” 29 É ɖɔ nú yě ɖɔ: “Má ɖɔ nǔgbó nú mi, mɛ ɖěbǔ e jó xwé, alǒ asi, alǒ nɔví súnnu, alǒ mɛjitɔ́, alǒ vǐ dó, ɖó Axɔ́súɖuto Mawu tɔn wútu é, 30 ná mɔ nǔ énɛ́ lɛ́ donu gěgé ɖo hwe élɔ́ nu din, bɔ ɖo gbɛ* e ja é mɛ ɔ, é ná mɔ gbɛ mavɔmavɔ.”

31 Énɛ́ gúdo ɔ, é kplá mɛsɛ́dó 12 lɛ́ jɛ vo bo ɖɔ nú yě ɖɔ: “Mǐ ɖíe xwe Jeluzalɛ́mu è, bɔ nǔ e è ko wlán ɖ’ayǐ dó Gbɛtɔ́ví ɔ wú, gbɔn gbeyíɖɔ lɛ́ jí lɛ́ é bǐ ná jɛnu. 32 Ði kpɔ́ndéwú ɔ, è ná jó è nyi mɛ e ɖo akɔta ɖě lɛ́ mɛ lɛ́ é sín alɔ mɛ, è ná cá ɛ ko, è ná zun i, è ná tún atán dó wǔtu tɔn. 33 Bɔ ényí yě sɔ́ lanbá dó xo è ná gúdo ɔ, yě ná hu i, amɔ̌, azǎn tɔn atɔngɔ́ ɔ gbe ɔ, é ná fɔ́n.” 34 Yě ka mɔ nukúnnú jɛ nǔ énɛ́ lɛ́ ɖě mɛ ǎ, ɖó è hwlá tínmɛ xó énɛ́ lɛ́ tɔn dó yě, bɔ yě mɔ nukúnnú jɛ xó e é ɖɔ lɛ́ é mɛ ǎ.

35 Din ɔ, ée Jezu ɖo sisɛkpɔ́ Jelíko wɛ é ɔ, nya nukúntɔ́nnɔ ɖé ɖo ayǐjínjɔ́n ɖo ali ɔ kpá, bo ɖo nǔ byɔ́ ɖu wɛ. 36 Ðó é se ahwan e ɖo wǐwá yi wɛ é sín zǐngídi wútu ɔ, é jɛ nǔ e ɖo jijɛ wɛ é kanbyɔ́ jí. 37 Yě ɖɔ n’i ɖɔ: “Jezu Nazalɛ́tinu ɔ wɛ ɖo wǐwá yi wɛ.” 38 Énɛ́ ɔ, é sú xó ɖɔ: “Jezu, Davídi Ví, kú nǔbláwǔ nú mì!” 39 Mɛ e ɖo nukɔn ɖo ahwan ɔ mɛ lɛ́ é jɛ nǔ gbɛ́ n’i jí, bo nɔ ɖɔ n’i ɖɔ é ní cí xwíí, amɔ̌, é nɔ lɛ́ sú xó d’é jí ɖɔ: “Davídi Ví, kú nǔbláwǔ nú mì!” 40 Bɔ Jezu nɔ te bo ɖɔ ɖɔ è ní kplá nya ɔ wá nú émí. Ée é sɛkpɔ́ é ɔ, Jezu kanbyɔ́ ɛ ɖɔ: 41 “Étɛ́ a ka jló ɖɔ má wa nú we?” Bɔ nya ɔ ɖɔ: “Aklúnɔ, blǒ bónú má lɛ́ mɔ nǔ.” 42 Énɛ́ wú ɔ, Jezu ɖɔ n’i ɖɔ: “Lɛ̌vɔ́ mɔ nǔ. Nǔɖiɖi towe gbɔ azɔn nú we.” 43 Tlóló ɔ, é lɛ́vɔ́ mɔ nǔ, bo jɛ xwixwedó è jí, lobo ɖo susu kpa nú Mawu wɛ. Gɔ́ ná ɔ, ée mɛ lɛ́ mɔ mɔ̌ é ɔ, yě bǐ kpa susu nú Mawu.

19 Énɛ́ gúdo ɔ, é wá Jelíko, bo ɖo toxo ɔ mɛ gbɔn dín wɛ. 2 Nya e nɔ nyí Zacée é ɖo fínɛ́; tokwɛ́yítɔ́gán wɛ n’i bɔ é lɛ́ jɛ dɔkun. 3 É ɖo tíntɛ́nkpɔ́n wɛ bo ná mɔ mɛ e nyí Jezu é, amɔ̌, é kpa ɛ ǎ ɖó ahwan ɔ wútu, bɔ é ka lɛ́ nyí mɛɖé bo hwe gli. 4 Énɛ́ wú ɔ, é kán wezun jɛ nukɔn bo xá sikomɔ́ɔtín* ɖé jí, bo ná mɔ tɛn dó mɔ ɛ, ɖó é ja fínɛ́ gbɔn gbé wútu. 5 Ée Jezu jɛ fínɛ́ é ɔ, é kpɔ́n aga bo ɖɔ n’i ɖɔ: “Zacée, yǎ wǔ jɛ te, ɖó égbé ɔ, a ná yí jǒnɔ ce ɖo xwé towe gbe.” 6 Énɛ́ ɔ, é yá wǔ jɛ te bo yí i kpó xomɛhunhun kpó. 7 Ée ahwan ɔ mɔ mɔ̌ é ɔ, yě mɛ bǐ jɛ nǔ húnhún ɖɔ jí ɖɔ: “É yi nya e nyí hwɛhutɔ́ é ɖé sín xwégbe bɔ é yí jǒnɔ tɔn.” 8 Amɔ̌, Zacée sí te bo ɖɔ nú Aklúnɔ ɖɔ: “Aklúnɔ, un ná ná nǔɖókan ce lɛ́ sín vlɔ̌ɖówe wamamɔnɔ lɛ́, bɔ nǔ mɛ ɖěbǔ tɔn e un wló ɖu* é ɔ, un ná sú mɔ̌hunkɔtɔn donu ɛnɛ mɛ ɔ.” 9 Bɔ Jezu ɖɔ n’i ɖɔ: “Égbé ɔ, hwlɛngán wá xwé élɔ́ gbe, ɖó Ablaxámu ví wɛ é lɔmɔ̌ nyí. 10 Nǔgbó ɔ, Gbɛtɔ́ví ɔ wá bo ná ba mɛ e bú lɛ́ é lobo hwlɛ́n yě.”

11 Hwenu e yě ɖo xó énɛ́ lɛ́ ɖótó wɛ é ɔ, é ná nǔjlɛ́dónǔwú ɖěvo yě, ɖó é ko sɛkpɔ́ Jeluzalɛ́mu bɔ yě vɛdó ɖɔ Axɔ́súɖuto Mawu tɔn ná wá tlóló tlóló wɛ sín. 12 Énɛ́ wú ɔ, é ɖɔ: “Nya e jɔ ɖo axɔ́sú kún mɛ é ɖé xweyǐgbe to línlín mɛ bónú è ná sɔ́ ɛ axɔ́sú,* bɔ énɛ́ gúdo ɔ, é ná lɛ́ kɔ wá. 13 É ylɔ́ mɛsɛntɔ́ tɔn lɛ́ wǒ, bo fɔ mǐnu* wǒ nú yě lobo ɖɔ nú yě ɖɔ: ‘Mi sɔ́ mǐnu lɛ́ dó ɖo ajɔ̌ wa ná wɛ káká bónú má lɛ́ kɔ wá.’ 14 Amɔ̌, to tɔn mɛ nu lɛ́ gbɛ́ wǎn n’i, bo sɛ́ afɔsɔ́ɖótetɔ́ lɛ́ sín kplékplé ɖé dó dɔ̌n, bónú yě ná yi ɖɔ xó élɔ́: ‘Mǐ ba bónú nya élɔ́ ní nyí axɔ́sú nú mǐ ǎ.’

15 “Ée è sɔ́ ɛ axɔ́sú bɔ é lɛ́ kɔ wá gúdo é ɔ, é ylɔ́ mɛsɛntɔ́ ɖěɖěe é sɔ́ akwɛ́* ná lɛ́ é, bo ná mɔ tɛn dó mɔ do nú le e yě mɔ ɖo ajɔ̌ e yě wa é mɛ lɛ́ é. 16 Mɛ nukɔntɔn ɔ wá bo ɖɔ: ‘Aklúnɔ, un ɖu mǐnu wǒ sín le dó mǐnu towe jí.’ 17 É ɖɔ n’i ɖɔ: ‘A bló ɖó ganjí, mɛsɛntɔ́ ɖagbe! Ðó a nɔ gbejí ɖo nǔ e nyí nǔ kpɛví tawun é mɛ wútu ɔ, kpa acɛ dó toxo wǒ jí.’ 18 Din ɔ, mɛ wegɔ́ ɔ wá bo ɖɔ: ‘Aklúnɔ, un ɖu mǐnu atɔ́ɔ́n sín le dó mǐnu towe jí.’ 19 É ɖɔ nú mɛ énɛ́ ɖɔ: ‘Hwɛ ɔ, kpa acɛ dó toxo atɔ́ɔ́n jí.’ 20 Mɛ ɖěvo ka wá bo ɖɔ: ‘Aklúnɔ, mǐnu towe e un sɔ́ hwlá dó avɔ mɛ é ɖíe. 21 A mɔ a, un ɖo xɛsi ɖi nú we wɛ, ɖó mɛ syɛ́nsyɛ́n wɛ nú we; nǔ e a ma sɔ́ ɖ’ayǐ ǎ é wɛ a nɔ sɔ́, bo nɔ ya nǔ e a ma dó ǎ é.’ 22 É ɖɔ n’i ɖɔ: ‘Mɛsɛntɔ́ nyanya, xó e hwiɖésúnɔ ɖɔ lɛ́ é wɛ un sɔ́ dó ɖɔ hwɛ dó we. A tuun ɖɔ mɛ syɛ́nsyɛ́n wɛ nú mì, bɔ un nɔ sɔ́ nǔ e un ma sɔ́ ɖ’ayǐ ǎ é, bo nɔ ya nǔ e un ma dó ǎ é, kabǐ? 23 Bɔ étɛ́wú a ma ka sɔ́ akwɛ́* ce ɖó akwɛ́sɛxwetɛn, bónú un lɛ́ kɔ wá ɔ, un ná yí kpó akwɛ́ví kpó ǎ?’

24 “Énɛ́ wú ɔ, é ɖɔ nú mɛ e ɖo te ɖo fínɛ́ lɛ́ é ɖɔ: ‘Mi yí mǐnu ɔ sín así tɔn bo sɔ́ nú mɛ e ɖó mǐnu wǒ é.’ 25 Amɔ̌, yě ɖɔ n’i ɖɔ: ‘Aklúnɔ, mǐnu wǒ wɛ ko ɖo éyɛ́ sí mɛ!’ 26 É yí gbe nú yě ɖɔ: ‘Má ɖɔ nú mi, mɛ ɖěbǔ e ɖó nǔ é ɔ, è ná ná ɛ d’é jí, amɔ̌, mɛ e ma ɖó nǔ ǎ é ɔ, è ná yí nǔ e é tlɛ ko ɖó é sín así tɔn. 27 Gɔ́ ná ɔ, mi kplá kɛntɔ́ ce ɖěɖěe ma ba ɖɔ má nyí axɔ́sú nú yě ǎ lɛ́ é wá fí bo hu yě ɖo nukún ce mɛ.’”

28 Ée Jezu ɖɔ xó énɛ́ lɛ́ gúdo é ɔ, é lɛ́ sɔ́ ali tɔn, bo ɖidó Jeluzalɛ́mu. 29 Ée é sɛkpɔ́ Bɛtifajée kpó Betaníi kpó bo jɛ só e è nɔ ylɔ́ ɖɔ Olívutín só é kɔn é ɔ, é sɛ́ ahwanvú we dó, 30 bo ɖɔ: “Mi yi gletoxo e mɔ sɛ́dó wɛ mi ɖe nɛ́ é mɛ; ényí mi byɔ́ mɛ gúdo ɔ, mi ná mɔ tócíví ɖé ɖo sinsin, bɔ mɛ ɖěbǔ ko jínjɔ́n jí kpɔ́n ǎ. Mi tún i bo kplá ɛ wá fí. 31 Ényí mɛ ɖěbǔ ka kanbyɔ́ mi ɖɔ: ‘Étɛ́wú mi ka ɖo túntún i wɛ’ hǔn, mi ɖɔ: ‘Aklúnɔ ɖó hudó tɔn.’” 32 Mɛ ɖěɖěe é sɛ́ dó lɛ́ é yi, bo mɔ nǔ lɛ́ lěe é ɖɔ gbɔn nú yě é pɛ́ɛ́. 33 Ée yě ɖo tócíví ɔ tún wɛ é ɔ, mɛ e tɔn wɛ lɛ́ é ɖɔ nú yě ɖɔ: “Étɛ́wú mi ka ɖo tócíví ɔ tún wɛ?” 34 Yě ɖɔ: “Aklúnɔ ɖó hudó tɔn.” 35 Énɛ́ ɔ, yě kplá tócíví ɔ wá nú Jezu, bo tɛ́ awu aga tɔn yětɔn lɛ́ d’é jí bɔ Jezu jínjɔ́n jí.

36 Ée é ɖo yiyi wɛ é ɔ, mɛ lɛ́ nɔ tɛ́ awu aga tɔn yětɔn lɛ́ dó ali ɔ jí. 37 Hwenu e é sɛkpɔ́ ali e jɛ te sín Olívutín só ɔ jí é tlóló é ɔ, ahwanvú wɔ̌búwɔ́bú e xwedó è lɛ́ é bǐ jɛ awǎ jɛ jí, bo jɛ susu kpa nú Mawu jí kpó xósúsú kpó, ɖó nǔjíwǔ e yě ko mɔ lɛ́ é bǐ wútu. 38 Yě nɔ ɖɔ: “Nǔ nyɔ́ nú Axɔ́sú e jawě ɖo Jexóva* nyíkɔ mɛ é! Fífá ní nɔ gbɛtɔ́ kpó Mawu kpó tɛ́ntin, susu nú Mawu ɖo jǐ aga!” 39 É ɖo mɔ̌ có, Falizyɛn e ɖo ahwan ɔ mɛ lɛ́ é ɖé lɛ́ ɖɔ n’i ɖɔ: “Mɛ̌si, gbɛ̌ nǔ nú ahwanvú towe lɛ́.” 40 Amɔ̌, é yí gbe nú yě ɖɔ: “Má ɖɔ nú mi, ényí mɛ élɔ́ lɛ́ ná bo cí xwíí ɔ, awǐnnya lɛ́ ná sú xó.”

41 Ée é sɛkpɔ́ Jeluzalɛ́mu é ɔ, é kpɔ́n toxo ɔ bo ya avǐ dó ta tɔn mɛ, 42 lobo ɖɔ: “Ényí hwiɖésú ɔ ko ɖó ayi nǔ e nɔ hɛn fífá wá lɛ́ é wú égbé wɛ ɔ . . . Amɔ̌, din ɔ, è hwlá nǔ énɛ́ lɛ́ dó we. 43 Ðó azǎn ɖé lɛ́ ná wá, bɔ kɛntɔ́ towe lɛ́ ná sɔ́ kpo nu xwíɖíxwíɖí lɛ́ dó dó kpá lɛ́ lɛ̌ dó we ahohó ɖɔhun, yě ná lɛ́ lɛ̌ dó we bo ná ján go dó we* gbɔn fí bǐ. 44 Yě ná sú kún dó nú hwi kpó vǐ towe lɛ́ kpó mlɛ́mlɛ́, yě ná jó awǐnnya ɖě dó ɖě jí ǎ, ɖó a ɖ’ayi hwenu e è gbéjé we kpɔ́n é wú ǎ wútu.”

45 Énɛ́ gúdo ɔ, é byɔ́ tɛ́npli ɔ mɛ bo jɛ mɛ e ɖo nǔ sa ɖ’é mɛ wɛ lɛ́ é nya tɔ́n jí, 46 lobo nɔ ɖɔ nú yě ɖɔ: “È ko wlán ɖɔ: ‘Xwé ce ɔ, ɖɛxwé wɛ é ná nyí,’ bɔ midɛɛ lɛ́ ka sɔ́ dó ɖó ajotɔ́ lɛ́ sín avatɛn ná.”

47 É nɔ ɖo nǔ kplɔ́n mɛ wɛ ayǐhɔ́ngbe ayǐhɔ́ngbe ɖo tɛ́npli ɔ mɛ. Amɔ̌, vɔ̌sánúxwlémawutɔ́gán lɛ́, sɛ́nkplɔ́nmɛtɔ́ lɛ́ kpó nukɔntɔ́ togun ɔ tɔn lɛ́ kpó ɖo biba ná hu i wɛ; 48 yě ka mɔ ali tɔn ɖěbǔ ǎ, ɖó togun ɔ bǐ nɔ xísí d’è, bo ná ɖótó è.

20 Ée é ɖo nǔ kplɔ́n mɛ lɛ́ wɛ gbe ɖokpó ɖo tɛ́npli ɔ mɛ, bo lɛ́ ɖo wɛn ɖagbe ɔ jlá wɛ é ɔ, vɔ̌sánúxwlémawutɔ́gán lɛ́, sɛ́nkplɔ́nmɛtɔ́ lɛ́ kpó tomɛxó lɛ́ kpó wá, 2 bo ɖɔ n’i ɖɔ: “Ðɔ nú mǐ, acɛ tɛ́ a ka sɔ́ dó ɖo nǔ énɛ́ lɛ́ bló ná wɛ? Alǒ mɛ̌ ka ná acɛ énɛ́ ɔ we?” 3 É yí gbe nú yě ɖɔ: “Nyi lɔ ná kan nǔɖé byɔ́ mi; mi ɖɔ nú mì: 4 Mawu e ɖo jǐxwé é wɛ sɛ́ Jaan dó ɖɔ é ní bló batɛ́mu nú mɛ lɛ́ a alǒ gbɛtɔ́ lɛ́?” 5 Énɛ́ ɔ, yě wá gbeta ɔ kɔn ɖo yěɖée lɛ́ tɛ́ntin bo ɖɔ: “Ényí mǐ ɖɔ: ‘Mawu e ɖo jǐxwé é wɛ’ ɔ, é ná ɖɔ: ‘Étɛ́wú mi ma ka ɖi nǔ n’i ǎ?’ 6 Amɔ̌, ényí mǐ ɖɔ: ‘Gbɛtɔ́ lɛ́ wɛ’ ɔ, togun ɔ bǐ ná nyi awǐnnya dó mǐ, ɖó yě kú d’é jí ɖɔ Jaan nyí gbeyíɖɔ.” 7 Énɛ́ wú ɔ, yě yí gbe ɖɔ émí kún tuun mɛ e sɛ́ ɛ dó é ó. 8 Jezu ɖɔ nú yě ɖɔ: “Nyi lɔ ɖo acɛ e un sɔ́ dó ɖo nǔ énɛ́ lɛ́ wa ná wɛ é ná ɖɔ nú mi wɛ ǎ.”

9 Énɛ́ gúdo ɔ, é ná nǔjlɛ́dónǔwú élɔ́ togun ɔ: “Nya ɖé ɖó vǐwungbo bo xáya nú glesi lɛ́, lobo yi tomɛ bo ná nɔ nú hwenu gěgé. 10 Ée vǐwun gbigbɛ hwenu su é ɔ, é sɛ́ mɛsɛntɔ́ ɖokpó dó glesi lɛ́, bónú yě ná ná ɛ sínsɛ́n vǐwungbo ɔ tɔn lɛ́ ɖě. Amɔ̌, ée glesi lɛ́ xo è gúdo é ɔ, yě lɛ́ kɔ n’i asígbá alɔgbá. 11 Nya ɔ ka lɛ́ sɛ́ mɛsɛntɔ́ ɖěvo dó. Yě xo mɛ énɛ́ lɔ, bo kɔ́n wi tɔn, lobo lɛ́ kɔ n’i asígbá alɔgbá. 12 É ɖo mɔ̌ có, é lɛ́ sɛ́ mɛ atɔngɔ́ ɔ dó; yě gblé wǔ mɛ énɛ́ lɔ bo nya ɛ. 13 Énɛ́ ɔ, vǐwunglenɔ ɔ ɖɔ: ‘Étɛ́ un ka ɖó ná wa? Un ná sɛ́ vǐ súnnu ce vívɛ́ná ɔ dó. Yě ná ɖó sísí nú éyɛ́.’ 14 Ée glesi lɛ́ mɔ ɛ sɛ́dó é ɔ, yě ɖɔ nú yěɖée lɛ́ ɖɔ: ‘Gǔɖutɔ́ ɔ ɖíe. Mi nú mǐ ní hu i bónú gǔ ɔ ná húzú mǐtɔn.’ 15 Énɛ́ ɔ, yě dɔn ɛ sín vǐwungbo ɔ mɛ bo hu i. Étɛ́ vǐwunglenɔ ɔ ka ná wa nú yě lo? 16 É ná wá bo ná hu glesi énɛ́ lɛ́, lobo ná sɔ́ vǐwungbo ɔ dó alɔ mɛ nú mɛ ɖěvo lɛ́.”

Ée yě se mɔ̌ é ɔ, yě ɖɔ: “Nǔ énɛ́ ní ma jɛ gbeɖé ó!” 17 Amɔ̌, é kpɔ́n yě dáán bo ɖɔ: “Étɛ́ ka nyí tínmɛ xó élɔ́ e è wlán é tɔn lo: ‘Awǐnnya e xɔmɛtɔ́ lɛ́ xo nyi kɛ́n é, wɛ wá húzú awǐnnya zwe jí tɔn tají ɔ’? 18 Mɛ ɖěbǔ e ná jɛ awǐnnya énɛ́ jí é ná gba hánnyá. Bɔ mɛ ɖěbǔ e jí é ná jɛ é ɔ, é ná vó mɛ ɔ.”

19 Énɛ́ ɔ, sɛ́nkplɔ́nmɛtɔ́ lɛ́ kpó vɔ̌sánúxwlémawutɔ́gán lɛ́ kpó ba ná ɖó alɔ jǐ tɔn azɔn ɖokpó, ɖó yě ɖ’ayi wú ɖɔ xó émítɔn ɖɔ wɛ é ɖe ɖo nǔjlɛ́dónǔwú énɛ́ mɛ, amɔ̌, yě ɖi xɛsi nú togun ɔ. 20 Ée yě kpɔ́n ɛ tlítlí gúdo é ɔ, yě sɛ́ mɛ e yě ko xɔ ɖo nǔglɔ́ lɛ́ é dó, bónú yě ná wa nǔ nǔjlɔ́jlɔ́watɔ́ ɖɔhun, bo ná mɔ tɛn dó wlí i ɖo xó tɔn lɛ́ mɛ. Mɔ̌ mɛ ɔ, yě ná jó è nú acɛkpatɔ́ lɛ́ kpó tokpɔngán ɔ kpó. 21 Mɛ lɛ́ kanbyɔ́ ɛ ɖɔ: “Mɛ̌si, mǐ tuun ɖɔ a nɔ ɖɔ xó e sɔgbe lɛ́ é, a nɔ kplɔ́n nǔ mɛ ganjí, a nɔ ɖe mɛɖé ɖó vo ɖo mɛɖé mɛ ǎ, é nyɔ́ wa ɔ, a nɔ kplɔ́n ali Mawu tɔn mɛ sɔgbe xá nǔgbó ɔ: 22 É sɔgbe xá sɛ́n ɖɔ* mǐ ní sú takwɛ́ Sezáa wɛ a, alǒ é sɔgbe ǎ?” 23 Amɔ̌, é mɔ nǔ jɛ ayi wínníwínní yětɔn wú bo ɖɔ nú yě ɖɔ: 24 “Mi xlɛ́ mì deníye* ɖokpó. Ðiɖe mɛ̌ tɔn kpó nyǐkɔ mɛ̌ tɔn kpó ka ɖ’é jí?” Yě ɖɔ: “Sezáa tɔn wɛ.” 25 É ɖɔ nú yě ɖɔ: “Ényí mɔ̌ hǔn, mi wa nǔ bǐ bo sɔ́ nǔ e nyí Sezáa tɔn lɛ́ é jó nú Sezáa, lobo sɔ́ nǔ e nyí Mawu tɔn lɛ́ é jó nú Mawu.” 26 Yě kpé wú bo wlí i ɖo xó tɔn lɛ́ mɛ ɖo togun ɔ nukɔn ǎ, é nyɔ́ wa ɔ, xósin e é ná é jí wǔ nú yě, bɔ yě cí xwíí.

27 É ɖo mɔ̌ có, Saduseɛn ɖé lɛ́ wá gɔ̌n tɔn (Saduseɛn lɛ́ ɖi nǔ nú fínfɔ́n sín kú ǎ). Yě kanbyɔ́ ɛ ɖɔ: 28 “Mɛ̌si, Mɔyízi ko wlán ɖ’ayǐ nú mǐ ɖɔ: ‘Ényí súnnu ɖé kú jó asi tɔn dó bo ma ka ɖó vǐ ɖě ǎ ɔ, nɔví tɔn ɖó ná sɔ́ asúkúsi ɔ da bo ɖó vǐ donu n’i.’ 29 Din ɔ, nɔví nɔví tɛ́nwe ɖé lɛ́ tíin ɖ’ayǐ. Mɛ nukɔntɔn ɔ da asi, amɔ̌, é ɖó vǐ ɖě cóbó kú ǎ. 30 Énɛ́ ɔ, mɛ wegɔ́ ɔ sɔ́ asúkúsi ɔ da, bɔ é lɔmɔ̌ wá kú. 31 Nǔ ɖokpó ɔ xá mɛ atɔngɔ́ ɔ. Yě mɛ tɛ́nwe lɛ́ bǐ da nyɔ̌nu ɔ; yě ɖě ka ɖó vǐ cóbó kú ǎ. 32 Gǔdo mɛ ɔ, nyɔ̌nu ɔ lɔ wá kú. 33 Ðo fínfɔ́n sín kú hwenu ɔ, mɛ̌ tɔn nyɔ̌nu ɔ ka ná húzú lo? É ɖíe ko nyí asi nú yě mɛ tɛ́nwe lɛ́ kpɔ́n è.”

34 Jezu ɖɔ nú yě ɖɔ: “Gbɛ* élɔ́ sín vǐ súnnu lɛ́ nɔ da asi, bɔ è nɔ ná vǐ tɔn nyɔ̌nu lɛ́ asú, 35 amɔ̌, mɛ ɖěɖěe jɛxá bo ná mɔ gbɛ e ja é, bo lɛ́ jɛxá bɔ è ná fɔ́n yě sín kú lɛ́ é ɔ, súnnu lɛ́ ná da asi ǎ, è ka ná ná nyɔ̌nu lɛ́ asú ǎ. 36 Nǔgbó ɔ, yě sɔ́ sixú kú gbeɖé ǎ, ɖó yě ná cí wɛnsagun lɛ́ ɖɔhun, bo ná nyí vǐ Mawu tɔn lɛ́ gbɔn fínfɔ́n sín kú gblamɛ. 37 Amɔ̌, ɖo tan e kunkplá wunkan ɔ é mɛ ɔ, Mɔyízi tlɛ ɖe fínfɔ́n sín kú mɛkúkú lɛ́ tɔn xó ɔ xlɛ́, hwenu e é ylɔ́ Jexóva* ɖɔ Mawu Ablaxámu tɔn, Mawu Izáki tɔn, Mawu Jakɔ́bu tɔn é. 38 É nyí Mawu mɛkúkú lɛ́ tɔn ǎ, loɔ, mɛ e ɖo gbɛ lɛ́ é tɔn wɛ, ɖó yě bǐ wɛ ɖo gbɛ ɖo nukún tɔn mɛ.” 39 Sɛ́nkplɔ́nmɛtɔ́ ɖé lɛ́ yí gbe n’i ɖɔ: “Mɛ̌si, xó towe lɛ́ sɔgbe.” 40 Bɛ́sín hwenɛ́nu ɔ, yě sɔ́ glá bo kan nǔ ɖě byɔ́ ɛ ǎ.

41 Énɛ́ gúdo ɔ, é kanbyɔ́ ɖɔ: “Nɛ̌ ka gbɔn bɔ è nɔ ɖɔ ɖɔ Klísu ɔ nyí Davídi ví? 42 Ðó Davídi ɖésúnɔ ɖɔ ɖo wěma Ðɛhan tɔn mɛ ɖɔ: ‘Jexóva* ɖɔ nú Aklúnɔ ce ɖɔ: “Jǐnjɔ́n ɖisí ce xwé 43 káká jɛ hwenu e un ná sɔ́ kɛntɔ́ towe lɛ́ dó bló afɔɖótɛn towe é.”’ 44 Davídi nɛ́ ylɔ́ ɛ ɖɔ Aklúnɔ nɛ́; bɔ nɛ̌ é ka sixú lɛ́ nyí vǐ tɔn gbɔn lo?”

45 Énɛ́ gúdo ɔ, hwenu e mɛ lɛ́ bǐ ɖo tó ɖó è wɛ é ɔ, é ɖɔ nú ahwanvú tɔn lɛ́ ɖɔ: 46 “Mi cɔ́ miɖée dó sɛ́nkplɔ́nmɛtɔ́ lɛ́ wú. Yě nɔ ɖo yiyi kpé wɛ ɖo awu gaga lɛ́ mɛ, bo nɔ ba ɖɔ mɛ ɖěvo lɛ́ ní dó gbe émí kpó sísí kpó ɖo axi lɛ́ mɛ. Yě nɔ yí wǎn nú zinkpo nukɔntɔn* e ɖo kplɔ́ngbasá lɛ́ é, bo nɔ yí wǎn nú tɛn nukúnɖéjí hú gǎn lɛ́ ɖo agɔ̌ lɛ́ jí. 47 Gɔ́ ná ɔ, yě nɔ klá jɛ asúkúsi lɛ́ sín nǔɖókan lɛ́ nu,* bo nɔ xo ɖɛ gaga lɛ́ bónú è ná dó ɖó ayi yě wú. Hwɛ e è ná ɖó nú yě é ná syɛ́n tawun.”

21 Din ɔ, ée Jezu sɔ́ kɔ dó jǐ é ɔ, é mɔ dɔkunnɔ lɛ́ bɔ yě ɖo nǔníná yětɔn lɛ́ bɛ́ dó akwɛ́gbá lɛ́ mɛ wɛ. 2 Énɛ́ gúdo ɔ, é mɔ asúkúsi wamamɔnɔ ɖé, bɔ é sɔ́ gankwɛ́ kpɛví kpɛví e ma xɔ akwɛ́ sɔmɔ̌ ǎ é we* dó akwɛ́gbá ɔ mɛ. 3 Énɛ́ ɔ, é ɖɔ: “Má ɖɔ nǔgbó nú mi, asúkúsi wamamɔnɔ élɔ́ sɔ́ akwɛ́ dó akwɛ́gbá ɔ mɛ hú yě mɛ bǐ. 4 Ðó yě mɛ énɛ́ lɛ́ bǐ ɔ, nǔ e yě ɖó bɔ é kpo ɖ’é jí lɛ́ é mɛ wɛ yě kpɔ́n dó ná nǔ, amɔ̌, éyɛ́ mɛ e nyí wamamɔnɔ tawun é ɔ, nǔ e é ɖó bo ná dó nɔ gbɛ é bǐ wɛ é ná.”

5 Nukɔnmɛ, hwenu e mɛɖé lɛ́ ɖo xó ɖɔ dó lěe è sɔ́ awǐnnya ɖagbe ɖagbe lɛ́ kpó nǔníná e è xwlé Mawu lɛ́ é kpó dó ba acɔ́ nú tɛ́npli ɔ gbɔn é wú wɛ é ɔ, 6 é ɖɔ: “Nǔ e mɔ wɛ mi ɖe nɛ́ lɛ́ é ɔ, ayǐ ɖé lɛ́ ná wá hɔ́n, bɔ awǐnnya ɖě tlɛ ná kpo ɖo ɖě jí ǎ, bǐ wɛ è ná mu.” 7 Énɛ́ ɔ, yě kanbyɔ́ ɛ ɖɔ: “Mɛ̌si, hwetɛ́nu nǔ énɛ́ lɛ́ ka ná jɛ tawun? Étɛ́ ka ná nyí wuntun hwenu e nǔ énɛ́ lɛ́ ná jɛ dó é tɔn?” 8 É ɖɔ: “Mi cɔ́ miɖée bónú è ma flú mi ó, ɖó mɛ gěgé ná sɔ́ nyǐkɔ ce bo ná xwetɔ́n, bo ná ɖɔ: ‘Nyi wɛ n’i’, lobo ná lɛ́ ɖɔ: ‘Hwe ɔ nu ko sɛkpɔ́.’ Mi ma xwedó yě ó. 9 Gɔ́ ná ɔ, ényí mi se ahwanfunfun kpó hunnyahunnya* kpó sín xó hǔn, xɛsi ní ma ɖi mi ó. Ðó nǔ énɛ́ lɛ́ ɖó ná jɛ hwɛ̌, amɔ̌, vivɔnu ɔ ná wá tlóló ǎ.”

10 Énɛ́ gúdo ɔ, é ɖɔ nú yě ɖɔ: “Akɔta ɖě ná tɔ́n ahwan ɖě, bɔ axɔ́súɖuto ɖě ná tɔ́n ahwan ɖě. 11 Ayǐkúngban ná dán wǔ syɛ́nsyɛ́n, lobɔ sín fí ɖé jɛ fí ɖěvo ɔ, nǔɖuɖu ná hwe dó mɛ, bɔ jɛmɛjí ná ɖe; gbɛtɔ́ lɛ́ ná mɔ nǔ e ná dó xɛsi yě lɛ́ é, yě ná mɔ wuntun ɖaxó ɖaxó e gosín jǐxwé lɛ́ é.

12 “Amɔ̌, cóbónú nǔ énɛ́ lɛ́ bǐ ná jɛ ɔ, mɛ lɛ́ ná wlí mi lobo dó ya nú mi, yě ná jó mi nú kplɔ́ngbasá lɛ́, lobo wlí mi sú dó gan mɛ. Yě ná kplá mi yi axɔ́sú lɛ́ kpó tokpɔngán lɛ́ kpó nukɔn ɖó nyǐkɔ ce wú. 13 Énɛ́ ná hun ali nú mi bɔ mi ná ɖe kúnnu. 14 Énɛ́ wú ɔ, mi kán ɖ’é jí bo ma kplɔ́n lěe mi ná jɛ hun dó miɖée jí gbɔn é d’ayi mɛ jɛ nukɔn ó, 15 ɖó un ná ná mi nǔnywɛ́ bo ná d’alɔ mi, bɔ mi ná tuun xó e mi ná ɖɔ é, bɔ ényí è xo gbeklánxámɛtɔ́ mitɔn lɛ́ bǐ kplé ɔ, yě ná kpé wú bo mɔ xó ɖě ɖɔ d’é wú, alǒ flí xwe ǎ. 16 Gɔ́ ná ɔ, mɛ e tlɛ nyí mɛjitɔ́, nɔví, hɛ̌nnumɔ alǒ xɔ́ntɔn mitɔn lɛ́ é ná jó* mi, bɔ è ná hu mi mɛ ɖé lɛ́, 17 bɔ mɛ lɛ́ bǐ ná gbɛ́ wǎn nú mi ɖó nyǐkɔ ce wú. 18 Amɔ̌, ɖa e ɖo ta nú mi lɛ́ é ɖokpó vɔ́vɔ́ tlɛ ná j’ayǐ ǎ. 19 Ényí mi dɛ ɔ, mi ná hwlɛ́n gbɛ* mitɔn gán.

20 “É ɖo mɔ̌ có, hwenu e mi ná mɔ bɔ ahwankpá lɛ́ ná ɖó gɔnu lɛ́ lɛ̌ dó Jeluzalɛ́mu é ɔ, mi ní tuun ɖɔ hwenu e è ná sú kún tɔn dó é ko sɛkpɔ́. 21 Énɛ́ ɔ, mɛ e ɖo Judée lɛ́ é ní jɛ hinhɔn yi sókan mɛ jí, mɛ e ɖo Jeluzalɛ́mu lɛ́ é ní tɔ́n, bónú mɛ e ɖo gleta lɛ́ é ní ma byɔ́ toxo ɔ mɛ ó, 22 ɖó è ná ɖɔ hwɛ jlɔ́jlɔ́* ɖo azǎn énɛ́ lɛ́ gbe, bónú nǔ e è ko wlán ɖ’ayǐ lɛ́ é bǐ ní dó sixú jɛnu. 23 Heelú nyɔ̌nu e ná ɖo xo lɛ́ é kpó éé ná ɖo anɔ̌ ná vǐ wɛ hwenɛ́nu lɛ́ é kpó! Ðó wǔvɛ́ ɖaxó ná tíin ɖo to ɔ mɛ, bɔ è ná dɔn tó nú togun élɔ́. 24 Yě mɛ ɖé lɛ́ ná kú hwǐ kú, bɔ è ná kplá mɛ e kpo lɛ́ é yi kannumɔgbénu ɖo akɔta lɛ́ bǐ mɛ; bɔ akɔta lɛ́* ná sɔ́ afɔ dó gbídí Jeluzalɛ́mu ná, káká jɛ hwenu e ganmɛ yětɔn ná vɔ dó é.

25 “Gɔ́ ná ɔ, wuntun lɛ́ ná tíin ɖo hwesivɔ́, sun kpó sunví lɛ́ kpó mɛ, ado ɖaxó ɖé ná hu akɔta e ɖo ayǐkúngban jí lɛ́ é, bɔ yě ná tuun lěe yě ná wa nǔ gbɔn é ǎ, ɖó adǎn e jí xu ɖe é kpó lěe xo gbɔn wɛ é ɖe é kpó wú. 26 Gbɛtɔ́ lɛ́ ná kú dó te, ɖó xɛsi kpó nǔ e ɖo nǎ jɛ wɛ ɖo ayǐkúngban ɔ jí, bɔ yě ɖo nukún ɖó wɛ lɛ́ é kpó wú, ɖó hlɔ̌nhlɔ́n e ɖo jǐnukúnsin lɛ́ é ná húnhún. 27 Bɔ énɛ́ gúdo ɔ, yě ná mɔ Gbɛtɔ́ví ɔ jawě ɖo akpɔ́kpɔ́ mɛ kpó hlɔ̌nhlɔ́n kpó, kpódó susu ɖaxó kpán. 28 Amɔ̌, ényí nǔ énɛ́ lɛ́ jɛ jijɛ jí hǔn, mi sí te bo jlɔ́, lobo sɔ́ ta dó jǐ, ɖó hwlɛngán mitɔn ɖo sisɛkpɔ́ wɛ.”

29 Énɛ́ ɔ, é ná nǔjlɛ́dónǔwú ɖokpó yě bo ɖɔ: “Mi kpɔ́n fígitín kpó atín ɖěvo lɛ́ bǐ kpó. 30 Ényí yě zɔ́n ama ɔ, mi nɔ mɔ bo nɔ tuun ɖɔ alǔun* ko sɛkpɔ́. 31 Mɔ̌ ɖokpó ɔ, mi lɔmɔ̌ ɔ, ényí mi mɔ bɔ nǔ énɛ́ lɛ́ ɖo jijɛ wɛ hǔn, mi tuun ɖɔ Axɔ́súɖuto Mawu tɔn ko sɛkpɔ́. 32 Má ɖɔ nǔgbó nú mi, jijimɛ élɔ́ ná wá yi gbeɖé cóbónú nǔ lɛ́ bǐ ná jɛ ǎ. 33 Jǐnukúnsin kpó ayǐkúngban kpó ná wá yi, amɔ̌, xó ce lɛ́ ná wá yi gbeɖé ǎ.

34 “Amɔ̌, mi cɔ́ miɖée bo ma sɔ́ nǔ ɖu díngan, ahan nu díngan kpó adohu adohu gbɛ ɔ tɔn kpó dó dó agban kpinkpɛn nú ayi mitɔn lɛ́, bónú azǎn énɛ́ ní wá fyán mi ɖo ajijimɛ, 35 lěe mɔ nɔ wlí kanlin gbɔn é ɖɔhun ó. Ðó mɛ e nɔ nɔ ayǐkúngban ɔ jí lɛ́ é ɖě ná kpé wú bo xo gló azǎn énɛ́ ǎ. 36 Énɛ́ wú ɔ, mi nɔ wunzɛn, bo nɔ ɖo vo sa nú Mawu wɛ hwebǐnu, bo ná dó sixú kpé wú bo xo gló nǔ énɛ́ lɛ́ e ɖó ná jɛ é bǐ, lobo nɔ te ɖo Gbɛtɔ́ví ɔ nukɔn.”

37 Jezu nɔ kplɔ́n nǔ mɛ ɖo tɛ́npli ɔ mɛ ɖo kéze, amɔ̌, nú é jɛ zǎnmɛ ɔ, é nɔ tɔ́n bo nɔ yi nɔ só e è nɔ ylɔ́ ɖɔ Olívutín só é jí. 38 Mɛ lɛ́ bǐ nɔ wá gɔ̌n tɔn zǎnzǎn tɛɛn ɖo tɛ́npli ɔ mɛ, bo ná dó se xó tɔn.

22 Din ɔ, wɔ̌xúxú e mɛ è ma dó tɔ́n ǎ é sín xwe, ée è nɔ ylɔ́ ɖɔ Dǐndínwáyixwe é ɖo sisɛkpɔ́ wɛ. 2 Bɔ vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó ɖo hwenu e yě ná hu Jezu dó bɔ é ná nyɔ́ hú gǎn é ba wɛ, ɖó yě ɖo xɛsi ɖi nú togun ɔ wɛ. 3 Satáan ka byɔ́ ayi mɛ nú Judási, ée è nɔ ylɔ́ ɖɔ Isikaliɔ́ti é; é ɖo mɛsɛ́dó 12 lɛ́ mɛ. 4 É yi mɔ vɔ̌sánúxwlémawutɔ́gán lɛ́ kpó tɛ́nplicɔ́tɔ́ lɛ́ sín gǎn lɛ́ kpó, bo ɖɔ xó xá yě dó lěe é ná sa Jezu nú yě gbɔn é wú. 5 Xomɛ hun yě dó nǔ énɛ́ wú, bɔ yě yí gbe bo ná ná ɛ kpatágankwɛ́. 6 Énɛ́ wú ɔ, é yí gbe bo jɛ ali ɖagbe e ná hun n’i bɔ é ná sa ɛ nú yě é ba jí. Amɔ̌, é jló ná wa mɔ̌ ɖo mɛ lɛ́ nukɔn ǎ.

7 Wɔ̌xúxú e mɛ è ma dó tɔ́n ǎ é sín xwezán sɔgbe lo. Azǎn énɛ́ gbe wɛ è ɖó ná xwlé vɔ̌sísá Dǐndínwáyixwe tɔn ɔ. 8 Énɛ́ ɔ, Jezu sɛ́ Piyɛ́ɛ kpó Jaan kpó dó, bo ɖɔ: “Mi yi sɔ́ nǔ nú Dǐndínwáyixwe sín nǔɖuɖu ɔ bónú mǐ ná ɖu.” 9 Yě ɖɔ n’i ɖɔ: “Fítɛ́ a ka jló ɖɔ mǐ ní sɔ́ nǔ tɔn ɖ’ayǐ ɖe?” 10 É ɖɔ nú yě ɖɔ: “Ényí mi byɔ́ toxo ɔ mɛ ɔ, nya e hɛn tɔyizɛ́n é ɖé ná wá kpé mi. Mi xwedó è yi xwé e gbe é ná byɔ́ é, 11 bo ɖɔ nú xwénɔ ɔ ɖɔ: ‘Mɛ̌si ɖɔ: “Fítɛ́ xɔ jǒnɔyíyí tɔn e mɛ un sixú ɖu Dǐndínwáyixwe sín nǔɖuɖu ɔ xá ahwanvú ce lɛ́ ɖe é ka ɖe?”’ 12 Nya énɛ́ ná xlɛ́ xɔ ɖaxó ɖé mi ɖo síngbó jí, bɔ nǔ bǐ ko sɔgbe ɖ’é mɛ. Mi sɔ́ nǔ nú Dǐndínwáyixwe sín nǔɖuɖu ɔ ɖo fínɛ́.” 13 Énɛ́ ɔ, yě yi, bo mɔ nǔ lɛ́ lěe é ko ɖɔ gbɔn nú yě é, bɔ yě sɔ́ nǔ nú Dǐndínwáyixwe sín nǔɖuɖu ɔ.

14 Ée gan ɔ xo é ɔ, é jínjɔ́n távo tó xá mɛsɛ́dó lɛ́. 15 É ɖɔ nú yě ɖɔ: “É jló mì tawun ɖɔ má ɖu Dǐndínwáyixwe sín nǔɖuɖu élɔ́ xá mi cóbónú hwenu e un ná se wǔvɛ́ dó é ná su; 16 ɖó má ɖɔ nú mi, un sɔ́ ná ɖu ɖě káká jɛ hwenu e nǔ lɛ́ bǐ ná jɛnu ɖo Axɔ́súɖuto Mawu tɔn mɛ dó é ǎ.” 17 Énɛ́ ɔ, é yí kɔ́fu ɖokpó, bo dó kú nú Mawu lobo ɖɔ: “Mi mɛ ɖokpó ɖokpó ní yí bo nu, 18 ɖó má ɖɔ nú mi, bɛ́sín din ɔ, un sɔ́ ná nu vɛ̌ɛn ɖě káká jɛ hwenu e Axɔ́súɖuto Mawu tɔn ná wá é ǎ.”

19 É lɛ́ zé wɔ̌xúxú ɖokpó, bo dó kú nú Mawu; é fɛ́n wɔ̌xúxú ɔ, lobo sɔ́ jó nú yě, bo ɖɔ: “Élɔ́ nɔ te nú agbaza ce e è ná sɔ́ jó dó ta mitɔn mɛ é. Mi nɔ bló lě dó flín mì ná.” 20 Ée yě ɖu nǔ ɔ fó é ɔ, é lɛ́ wa nǔ ɖokpó ɔ nú kɔ́fu ɔ bo ɖɔ: “Kɔ́fu élɔ́ nɔ te nú akɔjijɛ yɔ̌yɔ́ e hun ce ná bló bɔ é ná bɛ́ azɔ̌ é; hun énɛ́ wɛ un ná kɔn nyi ayǐ dó ta mitɔn mɛ.

21 “Amɔ̌, mɛ e ɖo nǎ sa mì wɛ é ɖo kpɔ́ xá mì ɖo távo ɔ tó. 22 Ðó Gbɛtɔ́ví ɔ ná kú lěe è ko ɖɔ ɖ’ayǐ gbɔn é nǔgbó; amɔ̌, heelú mɛ e ná sa ɛ é!” 23 Énɛ́ wú ɔ, yě jɛ nǔ kanbyɔ́ yěɖée lɛ́ jí ɖɔ mɛ̌ ka ɖo tɛ́ntin émítɔn bo jló ná wa mɔ̌ tawun a jí.

24 É ɖo mɔ̌ có, yě lɛ́ jɛ nǔ dɔn ɖo yěɖée lɛ́ tɛ́ntin jí syɛ́nsyɛ́n dó mɛ e hú gǎn mɛ bǐ ɖo yě mɛ é jí. 25 É ka ɖɔ nú yě ɖɔ: “Axɔ́sú akɔta lɛ́ tɔn lɛ́ nɔ bló gǎn nú yě, bɔ è nɔ ylɔ́ mɛ e ɖó acɛ dó yě jí lɛ́ é ɖɔ Ðagbewatɔ́. 26 Amɔ̌, midɛɛ lɛ́ ɔ, mi ɖó ná cí mɔ̌ ǎ. É nyɔ́ wa ɔ, mɛ e hú gǎn mɛ bǐ ɖo tɛ́ntin mitɔn é ní cí mɛ kpɛví bǐ ɔ ɖɔhun, bónú mɛ e ɖo ali xlɛ́ mɛ wɛ é ní cí mɛsɛntɔ́ ɖɔhun. 27 Ðó, ɖo mɛ e ɖo nǔ ɖu wɛ* é kpó mɛ e ɖo ká sɛn wɛ* é kpó tɛ́ntin ɔ, mɛ̌ ka hú gǎn mɛɖé? Mɛ e ɖo nǔ ɖu wɛ* é wɛ ǎ cé? Amɔ̌, un ɖo tɛ́ntin mitɔn mɛsɛntɔ́ ɖɔhun.

28 “É ɖo mɔ̌ có, midɛɛ lɛ́ wɛ nɔ kpɔ́ xá mì ɖo mɛtɛ́nkpɔ́n ce lɛ́ mɛ; 29 un jɛ akɔ xá mi nú axɔ́súɖuto ɖé, lěe Tɔ́ ce jɛ akɔ xá mì nú axɔ́súɖuto ɖé gbɔn é, 30 bónú mi ná ɖu nǔ, bo nu ahan ɖo távo ce tó ɖo Axɔ́súɖuto ce mɛ, lobo jínjɔ́n axɔ́súzinkpo jí bá ɖɔ hwɛ xá akɔta Izlayɛ́li tɔn 12 lɛ́.

31 “Sinmɔ́ɔ, Sinmɔ́ɔ, Satáan byɔ́ mi, bo ná fún mi bǐ lěe è nɔ fún blěe gbɔn é ɖɔhun. 32 Amɔ̌, un sa vo dó ta towe mɛ bónú nǔɖiɖi towe ní ma vɔ́ da ó; hwenu e a ka ná lɛ́ kɔ wá é ɔ, dǒ wǔsyɛ́n lanmɛ nú nɔví towe lɛ́.” 33 Énɛ́ ɔ, Piyɛ́ɛ ɖɔ n’i ɖɔ: “Aklúnɔ, un ɖo gbesisɔmɛ bo ná yi gan mɛ xá we, bo ná lɛ́ kú xá we.” 34 Amɔ̌, é ɖɔ: “Piyɛ́ɛ, má ɖɔ nú we, égbé ɔ, kokló ná kɔ́ así cóbónú a ná ko gbɛ́ azɔn atɔn ɖɔ émí kún tuun mì ó ǎ.”

35 É lɛ́ ɖɔ nú yě ɖɔ: “Hwenu e un sɛ́ mi dó bɔ mi ma hɛn akwɛ́kpo, glo kpó afɔkpa kpó ǎ é ɔ, nǔɖé hwedó mi ǎ, kabǐ?” Yě ɖɔ: “Éǒ!” 36 Énɛ́ gúdo ɔ, é ɖɔ nú yě ɖɔ: “Amɔ̌ din ɔ, mi nú mɛ e ɖó akwɛ́kpo é ní sɔ́ hɛn, mɛ e ɖó glo é lɔ ní wa nǔ ɖokpó ɔ. Mi nú mɛ e ma ɖó hwǐ ǎ é ní sa awu tɔn aga tɔn ɔ bo xɔ ɖokpó. 37 Ðó má ɖɔ nú mi, nǔ e è wlán ɖ’ayǐ é ɖó ná jɛnu dó wǔtu ce, é wɛ nyí: ‘È lɛ́n ɛ dó sɛ́ngbatɔ́ lɛ́ mɛ.’ Nǔ énɛ́ e è wlán dó wǔ ce é ɖo jijɛnu wɛ.” 38 Énɛ́ ɔ, yě ɖɔ: “Aklúnɔ, kpɔ́n! Hwǐ we ɖíe.” É ɖɔ nú yě ɖɔ: “É ko kpé.”

39 Ée é gosín fínɛ́ é ɔ, é ɖidó Olívutín só ɔ jí lěe é ko nyí walɔ tɔn gbɔn é, bɔ ahwanvú lɛ́ lɔ xwedó è. 40 Ée é jɛ fínɛ́ é ɔ, é ɖɔ nú yě ɖɔ: “Mi ní ɖo ɖɛ xo wɛ lobo ma wá jɛ tɛ́nkpɔ́n mɛ ó.” 41 É sɛ yi zɔ nú yě kpɛɖé bo jɛ kpo lobo jɛ ɖɛ xo jí, 42 bo nɔ ɖɔ: “Tɔ́, ényí é jló we hǔn, sɛ kɔ́fu élɔ́ dó zɔ nú mì. É ɖo mɔ̌ có, jlǒ ce ní ma nyí wiwa ó, loɔ, é ní nyí jlǒ towe.” 43 Énɛ́ gúdo ɔ, wɛnsagun ɖokpó gosín jǐxwé bo tɔ́n dó jǐ tɔn lobo dó wǔsyɛ́n lanmɛ n’i. 44 Amɔ̌, wǔvɛ́ e se wɛ é ɖe é syɛ́n sɔmɔ̌ bɔ é kpo ɖo ɖɛ xo wɛ vívɛ́ vívɛ́; bɔ dɛ̌n tɔn wá cí hun ɖɔhun bo nɔ ɖo kunkun kɔn nyi kɔ́mɛ wɛ. 45 Hwenu e é xo ɖɛ fó, bo sí te lobo yi ahwanvú lɛ́ gɔ́n é ɔ, é mɔ yě ɖo amlɔ dɔ́ wɛ, ɖó é sín aluwɛ wú bɔ nǔ ci kɔ nú yě. 46 É ɖɔ nú yě ɖɔ: “Étɛ́wú mi ka ɖo amlɔ dɔ́ wɛ? Mi fɔ́n. Mi ní nɔ ɖo ɖɛ xo wɛ lobo ma wá jɛ tɛ́nkpɔ́n mɛ ó.”

47 Ée é kpo ɖo xó ɖɔ wɛ é ɔ, ahwan ɖé wá, bɔ nya e è nɔ ylɔ́ ɖɔ Judási, bɔ é ɖo mɛsɛ́dó 12 lɛ́ mɛ é ɖo yě nu. É sɛkpɔ́ Jezu bo kí si n’i. 48 Amɔ̌, Jezu ɖɔ n’i ɖɔ: “Judási, si wɛ a kí nú Gbɛtɔ́ví ɔ dó sa ɛ a?” 49 Hwenu e mɛ e lɛ́ lɛ̌ d’è lɛ́ é mɔ nǔ e ɖo nǎ jɛ wɛ é ɔ, yě ɖɔ: “Aklúnɔ, mǐ ní xú hwǐ mɛ wɛ a?” 50 Mɛ ɖokpó ɖo yě mɛ bo tlɛ xú hwǐ mɛsɛntɔ́ vɔ̌sánúxwlémawutɔ́ ɖaxó ɔ tɔn, bo kpa tó tɔn ɖisíxwé tɔn ɔ. 51 Amɔ̌, Jezu ɖɔ: “É kpé mɔ̌!” É ɖ’alɔ tó ɔ wú bɔ mɛsɛntɔ́ ɔ jɛ ganjí. 52 Énɛ́ gúdo ɔ, Jezu ɖɔ nú vɔ̌sánúxwlémawutɔ́gán lɛ́, tɛ́nplicɔ́tɔ́ lɛ́ sín gǎn lɛ́ kpó tomɛxó lɛ́ kpó, éé tɔ́n gbě tɔn bo wá fínɛ́ lɛ́ é ɖɔ: “Ajotɔ́ wɛ nú mì bɔ mi hɛn hwǐ kpó kpo kpó bo wá a? 53 Hwenu e un nɔ ɖo kpɔ́ xá mi ɖo tɛ́npli ɔ mɛ ayǐhɔ́ngbe ayǐhɔ́ngbe é ɔ, mi wlí mì ǎ. Amɔ̌, gan mitɔn wɛ xo. Mɔ̌ ɖokpó ɔ, gan e mɛ mɛ e ɖo zǐnflú mɛ lɛ́ é ná kp’acɛ dó é wɛ xo.”

54 Énɛ́ ɔ, yě wlí i bo kplá ɛ ɖidó, yě kplá ɛ wá vɔ̌sánúxwlémawutɔ́ ɖaxó ɔ sín xwégbe; amɔ̌, Piyɛ́ɛ ɖo xwixwedó yě wɛ bo ɖo zɔ zaan dó yě. 55 Hwenu e mɛ lɛ́ flɔ́ myɔ ɖo kɔ́xo ɔ ta sín tɛ́ntin bo jínjɔ́n kpɔ́ é ɔ, Piyɛ́ɛ ɖo ayǐjínjɔ́n ɖo yě mɛ. 56 Amɔ̌, ée mɛsɛntɔ́ nyɔ̌nu ɖé mɔ ɛ ɖo ayǐjínjɔ́n ɖo myɔ ɔ sín wěziza nu é ɔ, é kpɔ́n ɛ tlítlí bo ɖɔ: “Nya élɔ́ lɔ nɔ zɔn xá ɛ.” 57 Amɔ̌, é gbɛ́, bo ɖɔ: “Nǎwe ɛ, un tuun i ǎ.” 58 É ná nɔ zaan é ɔ, mɛ ɖěvo mɔ ɛ bo ɖɔ: “Hwi lɔ ɖo yě mɛ.” Amɔ̌, Piyɛ́ɛ ɖɔ: “Nya ɛ, un ɖo yě mɛ ǎ.” 59 Ganxixo ɖokpó mɔ̌ gúdo ɔ, nya ɖěvo tɛ ɖɛ̌ jí syɛ́nsyɛ́n ɖɔ: “É ɖo wɛn ɖɔ nya élɔ́ lɔ nɔ zɔn xá ɛ, ɖó nú è ná ɖɔ xójɔxó ɔ, Galiléenu wɛ n’i!” 60 Amɔ̌, Piyɛ́ɛ ɖɔ: “Nya ɛ, un tuun nǔ e xó ɖɔ wɛ a ɖe é ǎ.” Tlóló ɔ, ée é kpo ɖo xó ɖɔ wɛ é ɔ, kokló kɔ́ así. 61 Énɛ́ ɔ, Aklúnɔ lílɛ́ bo kpɔ́n Piyɛ́ɛ tlɔlɔ, bɔ Piyɛ́ɛ flín xó élɔ́ e Aklúnɔ ɖɔ n’i é: “Cóbónú kokló ná kɔ́ así égbé ɔ, a ná ko gbɛ́ mì azɔn atɔn.” 62 Énɛ́ ɔ, é tɔ́n bo y’avǐ vívɛ́ vívɛ́.

63 Din ɔ, mɛ e ɖo Jezu cɔ́ wɛ lɛ́ é jɛ cícá ɛ ko jí, lobo nɔ xo è. 64 Yě cyɔ́n nǔ nukúnmɛ n’i, bo nɔ kanbyɔ́ ɖɔ: “Ðe xlɛ́ ɖɔ émí nyí gbeyíɖɔ ɖé! Mɛ̌ ka dó nǔ we?” 65 Yě lɛ́ nylá nu dó wǔ tɔn ɖo ali gěgé ɖěvo lɛ́ nu.

66 Ée ayǐ hɔ́n é ɔ, tomɛxó akɔta ɔ tɔn lɛ́ xo yěɖée kplé, yě wɛ nyí vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó. Yě kplá ɛ yi Hwɛɖɔxɔsá ɖaxó Jwifu lɛ́ tɔn bo ɖɔ: 67 “Ényí hwi wɛ nyí Klísu ɔ hǔn, ɖɔ nú mǐ.” Amɔ̌, é ɖɔ nú yě ɖɔ: “Un na bo tlɛ ɖɔ nú mi ɔ, mi ɖo nǎ ɖi wɛ ǎ. 68 Gɔ́ ná ɔ, ényí un kan nǔ byɔ́ mi ɔ, mi ná ná sin tɔn mì ǎ. 69 É ɖo mɔ̌ có, bɛ́sín din ɔ, Gbɛtɔ́ví ɔ ná jínjɔ́n ɖisíxwé nú Mawu hlɔ̌nhlɔ́nnɔ ɔ.” 70 Ée é ɖɔ mɔ̌ é ɔ, yě bǐ ɖɔ: “Hǔn, hwi wɛ nyí Vǐ Mawu tɔn a?” É ɖɔ nú yě ɖɔ: “É nɛ́ ɖɔ wɛ miɖésúnɔ ɖe pɛ́ɛ́ nɛ́.” 71 Yě ɖɔ: “Étɛ́wú mǐ ka lɛ́ ɖo kúnnuɖenú ɖěvo ba wɛ? Ðó éɖésúnɔ ko sɔ́ nu tɔn dó ɖɔ ná bɔ mǐ se.”

23 Énɛ́ ɔ, ahwan ɔ bǐ sí te bo kplá ɛ yi Pilátu gɔ́n. 2 Yě jɛ hwɛ dó è jí bo nɔ ɖɔ: “Mǐ mɔ nya élɔ́ b’ɛ ɖo akɔta mǐtɔn dɔn bú wɛ, bo nɔ gbɛ́ ɖɔ è ní ma sú takwɛ́ Sezáa ó, lobo nɔ ɖɔ ɖɔ émí wɛ nyí Klísu axɔ́sú.” 3 Énɛ́ ɔ, Pilátu kanbyɔ́ ɛ ɖɔ: “Hwi wɛ nyí Axɔ́sú Jwifu lɛ́ tɔn ɔ a?” É yí gbe ɖɔ: “É nɛ́ ɖɔ wɛ a ɖe pɛ́ɛ́ nɛ́.” 4 Pilátu ka ɖɔ nú vɔ̌sánúxwlémawutɔ́gán lɛ́ kpó ahwan ɔ kpó ɖɔ: “Un mɔ hwɛ ɖé ɖo kɔ nú nya élɔ́ ǎ.” 5 Amɔ̌, yě tɛ ɖɛ̌ jí ɖɔ: “Nǔ e kplɔ́n mɛ wɛ é ɖe gbɔn Judée gbé ɔ bǐ jí é nɔ fɔ́n togun ɔ dó jǐ. Galilée wɛ é bɛ́sín káká bo tlɛ wá fí.” 6 Pilátu se mɔ̌ é ɔ, é kanbyɔ́ ɖɔ Galiléenu wɛ nú nya ɔ a jí. 7 Ée é mɔ nǔ jɛ wú ɖɔ xá e mɛ Elódu kpa acɛ ɖe é wɛ Jezu gosín é ɔ, é sɛ́ ɛ dó Elódu gɔ́n. Elódu lɔ ɖo Jeluzalɛ́mu hwenɛ́nu.

8 Hwenu e Elódu mɔ Jezu é ɔ, xomɛ hun i tlala. É ko lín tawun bɔ é ɖo biba wɛ bo ná mɔ Jezu, ɖó é se xó gěgé dó wǔ tɔn, lobo ɖo nukún ɖó wɛ ɖɔ é ná bló nǔjíwǔ bɔ émí ná mɔ. 9 Énɛ́ wú ɔ, é jɛ nǔ gěgé kanbyɔ́ Jezu jí. Jezu ka ná ɛ xósin ɖě ǎ. 10 É ɖo mɔ̌ có, vɔ̌sánúxwlémawutɔ́gán lɛ́ kpó sɛ́nkplɔ́nmɛtɔ́ lɛ́ kpó nɔ ɖo te sí wɛ, bo nɔ ɖo hwɛ dó è wɛ kpó xomɛsin kpó. 11 Elódu kpó sɔ́ja tɔn lɛ́ kpó wa wǎngbɛ́númɛ sín nǔ xá ɛ. É dó awu aga tɔn ɖɛkpɛ ɖɛkpɛ ɖé nú Jezu dó cá ɛ ko, lobo wá lɛ́ kɔ n’i sɛ́dó Pilátu gɔ́n. 12 Elódu kpó Pilátu kpó gbɔ kɛn e yě ɖe ɖ’ayǐ é, bo húzú xɔ́ntɔn gbe nɛ́ gbe.

13 Pilátu wá ylɔ́ vɔ̌sánúxwlémawutɔ́gán lɛ́, acɛkpatɔ́ lɛ́ kpó togun ɔ kpó kplé, 14 bo ɖɔ nú yě ɖɔ: “Mi kplá nya élɔ́ wá nú mì, bo ɖɔ ɖɔ é ɖo togun ɔ sísɛ́ wɛ, bónú yě ná fɔ́n gǔ. Mi bo kpɔ́n, un kan nǔ byɔ́ ɛ ɖo nukɔn mitɔn, amɔ̌, un mɔ kúnnuɖenú hwɛ e dó è wɛ mi ɖe lɛ́ é tɔn ɖěbǔ ǎ. 15 Elódu lɔ tlɛ mɔ ǎ, ɖó é lɛ́ kɔ n’i sɛ́dó mǐ. É wa nǔ e jɛxá kú é ɖěbǔ ǎ. 16 Énɛ́ wú ɔ, un ná dɔn tó n’i bo ná ɖe è nyi te.” 17* —— 18 Amɔ̌, ahwan ɔ bǐ ɖɔ kpó xósúsú kpó ɖɔ: “Hu nya élɔ́, bo ɖe Balabási nyi te nú mǐ.” 19 (È wlí Balabási énɛ́ ɔ dó gan mɛ, ɖó é ɖ’alɔ ɖo hunnyahunnya e fɔ́n ɖo toxo ɔ mɛ é mɛ, bo lɛ́ hu mɛ wútu.) 20 Pilátu lɛ́vɔ́ ɖɔ xó nú yě, ɖó é jló bo ná ɖe Jezu nyi te wútu. 21 Yě jɛ xó sú jí syɛ́nsyɛ́n bo nɔ ɖɔ: “Xwe è nyi atín wú! Xwe è nyi atín wú!” 22 É ɖɔ nú yě azɔn atɔngɔ́ ɔ ɖɔ: “Étɛ́wú? Nǔ nyanya tɛ́ nya élɔ́ ka wa? É wa nǔ e jɛxá kú é ɖěbǔ bónú un mɔ ǎ; énɛ́ wú ɔ, un ná dɔn tó n’i bo ɖe è nyi te.” 23 Ée é ɖɔ mɔ̌ é ɔ, yě byɔ́ ɛ kpó xósúsú kpó ɖɔ é ní hu i* dandan. Xósúsú yětɔn syɛ́n sɔmɔ̌ bɔ é jó gbe. 24 Pilátu wá gbeta ɔ kɔn ɖɔ è ní wa nǔ e yě byɔ́ é. 25 Nya e ɖ’alɔ ɖo hunnyahunnya mɛ, bo lɛ́ hu mɛ bɔ è wlí i dó gan mɛ é ɔ, é ɖe è nyi te lěe yě ɖo byɔ̌byɔ́ wɛ gbɔn é, lobo ka jó Jezu nú yě bónú yě ná wa nǔ xá ɛ sɔgbe xá jlǒ yětɔn.

26 Hwenu e yě kplá ɛ ɖidó é ɔ, yě ɖó Silenɛ́ɛnu e nɔ nyí Sinmɔ́ɔ, bo gosín gletoxo ɔ mɛ wá xweyǐgbe é te, lobo ɖe gbe n’i ɖɔ é ní ɖíɖá yatín* ɔ jɛ Jezu gúdo. 27 Ahwan wɔ̌búwɔ́bú ɖé xwedó è, bɔ nyɔ̌nu lɛ́ ɖ’é mɛ bo ɖo alě ná wɛ, lobo ɖo gbɛvíhan dó wɛ dó ta tɔn mɛ. 28 Jezu lílɛ́ kpan nukɔn nyɔ̌nu lɛ́ bo ɖɔ: “Vǐ nyɔ̌nu Jeluzalɛ́mu tɔn lɛ́ è mi, mi ma sɔ́ y’avǐ dó ta ce mɛ ɖě ó. É nyɔ́ wa ɔ, mi y’avǐ dó miɖésúnɔ kpó vǐ mitɔn lɛ́ kpó tamɛ; 29 ɖó azǎn ɖé lɛ́ ná wá bɔ mɛ lɛ́ ná ɖɔ: ‘Awǎjijɛnɔ wɛ nyí wɛnsinɔ lɛ́, nyɔ̌nu e ma ji vǐ ǎ lɛ́ é kpó nyɔ̌nu e ma dó anɔ̌ nú vǐ ǎ lɛ́ é kpó.’ 30 Énɛ́ ɔ, yě ná jɛ ɖiɖɔ nú só ɖaxó ɖaxó lɛ́ jí ɖɔ: ‘Mi mu jɛ mǐ jí!’ Bo ná ɖɔ nú só kpɛví kpɛví lɛ́ ɖɔ: ‘Mi cyɔ́n yɛ mǐ jí!’ 31 Ényí yě wa nǔ gbɔn mɔ̌ hwenu e atín ɔ ɖo mǔ é ɔ, nɛ̌ yě ka ná wa nǔ gbɔn hwenu e é ná xú é lo?”

32 Yě lɛ́ kplá súnnu dǎnúwatɔ́ we ɖěvo lɛ́, bo ná hu yě gɔ́ n’i. 33 Ée yě wá jɛ tɛn e è nɔ ylɔ́ ɖɔ Takágo é mɛ é ɔ, yě xwe é kpó dǎnúwatɔ́ lɛ́ kpó nyi atín wú. Dǎnúwatɔ́ lɛ́ ɖokpó ɖo ɖisí tɔn xwé, bɔ ɖokpó ɖo amyɔ tɔn xwé. 34 Amɔ̌, Jezu ɖɔ: “Tɔ́, sɔ́ kɛ yě, ɖó yě tuun nǔ e wa wɛ yě ɖe é ǎ.” Gɔ́ ná ɔ, yě nyi akɔ bo má awu tɔn lɛ́. 35 Mɛ lɛ́ cí te bo ɖo nǔ kpɔ́n wɛ. Amɔ̌, nukɔntɔ́ lɛ́ ɖo kiko è wɛ, bo nɔ ɖɔ: “É hwlɛ́n mɛ ɖěvo lɛ́; ényí Klísu Mawu tɔn, Mɛ e è sɔ́ é jɛ́n é nyí hǔn, ní bo hwlɛ́n éɖée.” 36 Sɔ́ja lɛ́ tlɛ cá n’i. Yě sɛkpɔ́ ɛ, bo xwlé vɛ̌ɛn sinvɛ́sínvɛ́ ɛ, 37 lobo ɖɔ: “Ényí hwi wɛ nyí Axɔ́sú Jwifu lɛ́ tɔn ɔ hǔn, hwlɛ̌n hwiɖée.” 38 Nǔwlánwlán ɖokpó lɛ́ ɖo ta tɔn nu, bo ɖɔ: “Axɔ́sú Jwifu lɛ́ tɔn ɔ ɖíe.”

39 Dǎnúwatɔ́ e è xwe nyi atín wú ɖo fínɛ́ lɛ́ é ɖokpó jɛ zunzun i jí, bo nɔ ɖɔ: “Hwi wɛ nyí Klísu ɔ ǎ cé? Hwlɛ̌n hwiɖée, bo hwlɛ́n mǐ lɔmɔ̌!” 40 Dǎnúwatɔ́ ɖě ɔ ka gbɛ́ nǔ nú wegɔ́ tɔn, bo ɖɔ: “Hwɛ nɔ ɖi xɛsi nú Mawu ɖěbǔ ǎ wɛ a? Hwɛ ɖokpó ɔ wɛ è ɖó nú hwi lɔmɔ̌ sín? 41 Hwɛ e è ɖó nú mǐdɛɛ lɛ́ é sɔgbe, ɖó nǔ e mǐ wa lɛ́ é ɔ, nǔ e jɛxá lɛ́ é sín sin sún wɛ mǐ ɖe. Amɔ̌, nya élɔ́ wa nǔ nyanya ɖěbǔ ǎ.” 42 Énɛ́ gúdo ɔ, é ɖɔ: “Jezu, flín mì hwenu e a ná byɔ́ Axɔ́súɖuto towe mɛ é.” 43 Jezu ka ɖɔ n’i ɖɔ: “Má ɖɔ nǔgbó nú we égbé, a ná nɔ kpɔ́ xá mì ɖo palaɖísi mɛ.”

44 Gan 12 hwemɛ tɔn mɔ̌ wɛ ɖo xixo wɛ din.* É ɖo mɔ̌ có, ablu dó ɖo ayǐ ɔ bǐ jí, káká jɛ gan atɔn mɛ hwemɛ mɔ̌,* 45 ɖó hwesivɔ́ cí. Énɛ́ gúdo ɔ, xɔmɛgbovɔ tɛ́npli ɔ tɔn* vún ɖó we. 46 Jezu sú xó syɛ́nsyɛ́n bo ɖɔ: “Tɔ́ ce, un sɔ́ gbɛ ce dó alɔ towe mɛ.” Ée é ɖɔ mɔ̌ gúdo é ɔ, é bɔnu.* 47 Ðó sɔ́jakanwekogán ɔ mɔ nǔ e jɛ é wútu ɔ, é jɛ susu kpa nú Mawu jí, bo nɔ ɖɔ: “Nǔjlɔ́jlɔ́watɔ́ wɛ nú nya élɔ́ nǔgbó.” 48 Hwenu e ahwan e kplé ɖo fínɛ́, bo ná kpɔ́n lěe è ná hu i gbɔn é bǐ mɔ nǔ e jɛ lɛ́ é ɔ, yě ɖidó xwé, bo ɖo nǔ zin dó akɔ́nnu wɛ. 49 Gɔ́ ná ɔ, mɛ e tuun i lɛ́ é bǐ ɖo te ɖo zɔ. Nyɔ̌nu ɖěɖěe xwedó è sín Galilée lɛ́ é lɔ ɖo fínɛ́, bo mɔ nǔ énɛ́ lɛ́.

50 Hwenɛ́nu ɔ, nya ɖé tíin bo nɔ nyí Jozɛ́fu, lobo nyí Hwɛɖɔxɔsá ɖaxó Jwifu lɛ́ tɔn sín hǎgbɛ́. Nya ɖagbe ɖé wɛ n’i, bo nɔ wa nǔ jlɔ́jlɔ́. 51 (Nya énɛ́ yí gbe bo nɔ gǔdo nú tuto yětɔn kpó nǔwiwa yětɔn kpó ǎ.) Toxo Judée tɔn e nɔ nyí Alimatée é mɛ nu wɛ n’i, bɔ é ɖo te kpɔ́n Axɔ́súɖuto Mawu tɔn. 52 Nya énɛ́ yi Pilátu gɔ́n, bo byɔ́ ɛ cyɔ Jezu tɔn. 53 É ɖe cyɔ ɔ jɛ te, bo bú lɛ̌ɛnkanvɔ fɛ́ɖɛ́fɛ́ɖɛ́ dó, lobo sɔ́ ɖó yɔdo e è kun dó só xomɛ, bo ma ko sɔ́ mɛɖé d’é mɛ kpɔ́n ǎ é mɛ. 54 Nǔsísɔ́ sín azǎn gbe wɛ, bɔ gbɔjɛzán ɔ ko ɖo nǎ bɛ́ wɛ. 55 Nyɔ̌nu ɖěɖěe xwedó Jezu sín Galilée lɛ́ é lɔ ka yi, bo yi kpɔ́n yɔdo ɔ, lobo mɔ lěe è sɔ́ cyɔ tɔn ɖó é. 56 Yě lɛ́ kɔ bo yi sɔ́ nǔ nú nǔhwɛ́nkún kpó nǔsáwǔ wǎnɖagbenɔ lɛ́ kpó. Amɔ̌, yě gbɔjɛ ɖo gbɔjɛzángbe, lěe sɛ́n ɔ byɔ́ gbɔn é.

24 Ðo azǎn nukɔntɔn aklúnɔzángbla ɔ tɔn jí ɔ, nyɔ̌nu lɛ́ hɛn nǔhwɛ́nkún e yě ko sɔ́ nǔ ná lɛ́ é, bo wá yɔdo ɔ kɔn zǎnzǎn tɛɛn. 2 Amɔ̌, yě mɔ ɖɔ è ko blí awǐnnya e ɖo yɔdo ɔ nu é síin, 3 bɔ ée yě byɔ́ yɔdo ɔ mɛ é ɔ, yě sɔ́ mɔ cyɔ Aklúnɔ Jezu tɔn ǎ. 4 Nǔ énɛ́ bú vo dó yě, bɔ ɖo hwe ɔ nu ɔ, súnnu we ɖo awu e ɖo kínkɔ́n wɛ lɛ́ é mɛ, bo wá nɔ te ɖo yě kpá. 5 Xɛsi jɛ nyɔ̌nu lɛ́ jí, bɔ yě dó kɔ do. Énɛ́ ɔ, súnnu lɛ́ ɖɔ nú yě ɖɔ: “Étɛ́wú mi ka ɖo mɛ e ɖo gbɛ é ba wɛ ɖo mɛkúkú lɛ́ mɛ? 6 É ɖo fí ǎ, è ko fɔ́n ɛ. Mi flín nǔ e é ɖɔ nú mi hwenu e é kpo ɖo Galilée é. 7 É ɖɔ ɖɔ è ɖó ná jó Gbɛtɔ́ví ɔ nú hwɛhutɔ́ lɛ́, bɔ yě ná xwe è nyi atín wú, lobɔ ɖo azǎn tɔn atɔngɔ́ ɔ gbe ɔ, é ná fɔ́n.” 8 Énɛ́ ɔ, yě flín xó tɔn lɛ́, 9 bo lɛ́ kɔ sín yɔdo ɔ kɔn, lobo yi ɖó nǔ énɛ́ lɛ́ bǐ sín gbe nú mɛsɛ́dó 11 lɛ́ kpó ahwanvú ɖě lɛ́ bǐ kpó. 10 Nyɔ̌nu énɛ́ lɛ́ wɛ nyí Mali Magidálanu ɔ, Jani, kpó Mali, Jaki sín nɔ kpó. Nyɔ̌nu ɖěvo e zɔn xá yě lɛ́ é lɔmɔ̌ ɖɔ nǔ énɛ́ lɛ́ nú mɛsɛ́dó lɛ́. 11 É ɖo mɔ̌ có, xó énɛ́ lɛ́ cí xlonɔxó ɖɔhun nú yě, bɔ yě ba ná ɖi nǔ nú nyɔ̌nu lɛ́ ǎ.

12 Amɔ̌, Piyɛ́ɛ sí te, bo kán wezun yi yɔdo ɔ kɔn. É fɛ bo kpɔ́n mɛ, loɔ, lɛ̌ɛnkanvɔ lɛ́ kɛ́ɖɛ́ jɛ́n é mɔ. Énɛ́ wú ɔ, é lɛ́ kɔ, bo ɖo nǔ e sixú ko jɛ é kanbyɔ́ éɖée wɛ.

13 Ðo azǎn énɛ́ ɖokpó ɔ jí ɔ, ahwanvú we ɖo ali jí xwe gletoxo e è nɔ ylɔ́ ɖɔ Emawúsi, bo ɖo kilomɛ́tlu 11* mɔ̌ dó Jeluzalɛ́mu é mɛ. 14 Yě ɖo xó ɖɔ ɖó kpɔ́ dó nǔ énɛ́ lɛ́ e jɛ é bǐ wú wɛ.

15 Ée yě ɖo xó ɖɔ ɖó kpɔ́ dó nǔ énɛ́ lɛ́ jí wɛ é ɔ, Jezu sɛkpɔ́ yě bo jɛ zinzɔn xá yě jí. 16 Amɔ̌, yě kpé wú bo tuun ɖɔ é wɛ ǎ. 17 É ɖɔ nú yě ɖɔ: “Étɛ́ lɛ́ jí dɔn nǔ dó wɛ mi ka ɖe dó ali?” Bɔ yě nɔ te wǔbláwúblá. 18 Mɛ e è nɔ ylɔ́ ɖɔ Kleopási é yí gbe n’i ɖɔ: “Jǒnɔ wɛ a nyí bo nɔ nɔ fí e jɛ zɔ é ɖo Jeluzalɛ́mu,* bo dán nǔ e jɛ ɖo azǎnví élɔ́ lɛ́ mɛ lɛ́ é a?” 19 É kanbyɔ́ yě ɖɔ: “Étɛ́ lɛ́ ka wɛ?” Yě ɖɔ n’i ɖɔ: “Nǔ e jɛ dó Jezu Nazalɛ́tinu ɔ wú lɛ́ é wɛ. É ɖe xlɛ́ ɖo Mawu kpó gbɛtɔ́ lɛ́ bǐ kpó nukɔn ɖɔ émí nyí gbeyíɖɔ hlɔ̌nhlɔ́nnɔ ɖé, ɖo xó kpó nǔwiwa kpó mɛ. 20 Vɔ̌sánúxwlémawutɔ́gán mǐtɔn lɛ́ kpó nukɔntɔ́ mǐtɔn lɛ́ kpó jó è, bónú è ná ɖó kúhwɛ n’i, bɔ è xwe è nyi atín wú. 21 Mǐ ka ko ɖo nukún ɖó wɛ ɖ’ayǐ ɖɔ nya énɛ́ wɛ nyí mɛ e ná hwlɛ́n Izlayɛ́li é. Nǔ énɛ́ lɛ́ jɛ din é ɔ, é ko bló azǎn atɔn ɖo égbé. 22 Gɔ́ ná ɔ, xó e nyɔ̌nu e ɖo mǐ mɛ é ɖé lɛ́ ɖɔ lɛ́ é kpácá mǐ tawun, ɖó yě yi yɔdo ɔ kɔn zǎnzǎn tɛɛn, 23 bɔ ée yě ma mɔ cyɔ Jezu tɔn ǎ é ɔ, yě wá bo ɖɔ ɖɔ wɛnsagun lɛ́ tɔ́n dó émí jí, bo ɖɔ ɖɔ é ɖo gbɛ. 24 Bɔ mɛ e ɖo mǐ mɛ é ɖé lɛ́ yi yɔdo ɔ kɔn, bo mɔ ɖó lěe nyɔ̌nu lɛ́ ɖɔ ɖó é. Yě ka mɔ Jezu ǎ.”

25 Énɛ́ ɔ, Jezu ɖɔ nú yě ɖɔ: “Xlonɔ è mi, nǔ ɖi nú nǔ e gbeyíɖɔ lɛ́ ko ɖɔ ɖ’ayǐ lɛ́ é bǐ nɔ vɛ́ wǔ nú mi* tawun mɛ! 26 É ɖo dandan ɖɔ Klísu ní se nǔ énɛ́ lɛ́ sín wǔvɛ́ cóbónú è ná kpa susu n’i ǎ cé?” 27 Énɛ́ ɔ, é tínmɛ nǔ e Nǔwlánwlán mímɛ́ lɛ́ ɖɔ dó wǔtu tɔn lɛ́ é bǐ nú yě, bɛ́sín nǔwlánwlán Mɔyízi kpó gbeyíɖɔ lɛ́ bǐ kpó tɔn jí.

28 Yě wá sɛkpɔ́ gletoxo e mɛ yě xwe é, bɔ Jezu bló nǔ mɛ e xwe nukɔn hú mɔ̌ é ɖɔhun. 29 Amɔ̌, yě byɔ́ ɛ vɛ́návɛ́ná ɖɔ é ní cí ayǐ. Yě ɖɔ: “Nɔ kpɔ́ xá mǐ, ɖó ganmɛ ko yi, bɔ zaanɖé din ɔ, ablu ná dó.” Énɛ́ ɔ, é byɔ́ xwégbe, bo ná nɔ fínɛ́ xá yě. 30 Bɔ hwenu e é ɖo nǔ ɖu xá yě wɛ* é ɔ, é sɔ́ wɔ̌xúxú, bo byɔ́ nyɔ̌ná d’é jí, lobo fɛ́n, bo jɛ sísɔ́ nú yě jí. 31 Ée é bló mɔ̌ é ɔ, nukún yětɔn lɛ́ hun, bɔ yě wá mɔ nǔ jɛ wú ɖɔ Jezu wɛ. Amɔ̌, é bú sín tɛ́ntin yětɔn. 32 Bɔ yě ɖɔ nú yěɖée lɛ́ ɖɔ: “Hwenu e é ɖo xó ɖɔ nú mǐ wɛ ɖo ali ɔ jí, bo ɖo Nǔwlánwlán mímɛ́ lɛ́ tínmɛ nú mǐ wɛ* é ɔ, akpakpa sɔ́ mǐ tawun ǎ cé?” 33 Énɛ́ ɔ, yě sí te tlóló, bo lɛ́ kɔ yi Jeluzalɛ́mu. Yě mɔ mɛsɛ́dó 11 lɛ́ kpó mɛ ɖěɖěe kplé ɖó kpɔ́ xá yě lɛ́ é kpó. 34 Mɛsɛ́dó 11 lɛ́ kpó mɛ ɖěɖěe kplé ɖó kpɔ́ xá yě lɛ́ é kpó ɖɔ: “È fɔ́n Aklúnɔ sín kú nǔgbó, bɔ é sɔ́ éɖée xlɛ́ Sinmɔ́ɔ!” 35 Énɛ́ ɔ, yě wlí nǔ e jɛ ɖo ali ɔ jí lɛ́ é kpó lěe é fɛ́n wɔ̌xúxú, bɔ yě wá tuun ɖɔ é wɛ gbɔn é kpó ɖɔ.

36 Hwenu e yě ɖo xó énɛ́ lɛ́ ɖɔ wɛ é ɔ, Jezu wá tɔ́n ɖo tɛ́ntin yětɔn, bo ɖɔ nú yě ɖɔ: “Fífá ní nɔ kpɔ́ xá mi.” 37 Amɔ̌, xɛsi ɖaxó e jɛ yě jí é kpó ayi yětɔn e gba dó é kpó zɔ́n bɔ yě vɛdó ɖɔ nǔɖíɖó gbigbɔ tɔn ɖé mɔ wɛ émí ɖe sín. 38 Énɛ́ wú ɔ, é ɖɔ nú yě ɖɔ: “Étɛ́wú ayi mitɔn ka gba dó? Étɛ́wú mi ka ɖo nǔ xo kpɔ́n wɛ? 39 Mi kpɔ́n alɔ ce lɛ́ kpó afɔ ce lɛ́ kpó; nyiɖésúnɔ wɛ. Mi ɖ’alɔ wǔtu ce bo kpɔ́n, ɖó nǔɖíɖó gbigbɔ tɔn ɖě nɔ ɖó lanti kpó xú kpó, lěe nyɛ ɖó gbɔn bɔ mi ɖo mimɔ wɛ é ǎ.” 40 Hwenu e é ɖo mɔ̌ ɖɔ wɛ é ɔ, é xlɛ́ alɔ tɔn lɛ́ kpó afɔ tɔn lɛ́ kpó yě. 41 Amɔ̌, yě ko ɖi ǎ, ɖó awǎjijɛ yětɔn túnflá, bɔ é lɛ́ jí wǔ nú yě wútu. Énɛ́ ɔ, é ɖɔ nú yě ɖɔ: “Mi ɖó nǔɖuɖu ɖé ɖo fí a?” 42 Yě ka sɔ́ hweví hihi sínsɛ́n ɖokpó n’i, 43 bɔ é yí bo ɖu ɖo nukún yětɔn mɛ.

44 Énɛ́ gúdo ɔ, é ɖɔ nú yě ɖɔ: “Hwenu e un kpo ɖo kpɔ́ xá mi é ɔ, un ɖɔ nú mi ɖɔ nǔ e è wlán dó wǔtu ce ɖo Mɔyízisɛ́n ɔ, wěma gbeyíɖɔ lɛ́ tɔn lɛ́ kpó Ðɛhanwéma* kpó mɛ lɛ́ é bǐ ɖó ná jɛnu.” 45 Énɛ́ ɔ, é hun ayi yětɔn, bónú yě ná mɔ nukúnnú jɛ tínmɛ Nǔwlánwlán mímɛ́ lɛ́ tɔn mɛ bǐ mlɛ́mlɛ́. 46 É ɖɔ nú yě ɖɔ: “Nǔ e è wlán é ɖíe: Klísu ɔ ná se wǔvɛ́ bo ná fɔ́n sín kú ɖo azǎn tɔn atɔngɔ́ ɔ gbe, 47 bɔ ɖo nyǐkɔ tɔn mɛ ɔ, è ná jlá ɖo akɔta lɛ́ bǐ mɛ ɖɔ hwɛ mɛ lɛ́ tɔn ɖó ná vɛ́ nú yě,* bónú è ná sɔ́ hwɛ kɛ yě; Jeluzalɛ́mu wɛ è ka ná bɛ́sín. 48 Mi ɖó ná nyí kúnnuɖetɔ́ nǔ énɛ́ lɛ́ tɔn. 49 Éɖíe! Un ná sɛ́ nǔ e sín akpá Tɔ́ ce dó é dó mi. Mi bo nɔ toxo ɔ mɛ káká jɛ hwenu e mi ná mɔ hlɔ̌nhlɔ́n yí sín jǐxwé é.”

50 Énɛ́ gúdo ɔ, é kplá yě yi káká Betaníi. É bɛ́ alɔ dó jǐ bo xo ɖɛ dó yě jí. 51 Ée é ɖo ɖɛ xo dó yě jí wɛ é ɔ, é jó yě dó bɔ Mawu sɔ́ ɛ yi jǐxwé. 52 Yě ɖe kɔ́* n’i bo lɛ́ kɔ yi Jeluzalɛ́mu kpó awǎjijɛ ɖaxó kpó. 53 Yě nɔ ɖo tɛ́npli mɛ hwebǐnu, bo nɔ ɖo susu kpa nú Mawu wɛ.