WƐN ÐAGBE JAAN TƆN

1 Ðo bǐbɛ́mɛ ɔ, Xó ɔ ko tíin, Xó ɔ ɖe kpó Mawu kpó, bɔ Xó ɔ nyí mawu ɖé.* 2 É ko ɖe kpó Mawu kpó ɖo bǐbɛ́mɛ. 3 Jǐ tɔn wɛ è dá nǔ lɛ́ bǐ gbɔn.

È dá nǔtí é mɛvo ǎ. 4 Nǔ e è dá gbɔn jǐ tɔn é wɛ nyí gbɛ, bɔ gbɛ ɔ nyí wěziza nú gbɛtɔ́ lɛ́. 5 Bɔ wěziza ɖo kínkɔ́n wɛ ɖo zǐnflú mɛ, amɔ̌, zǐnflú ɔ kpé wú bo kpa acɛ dó wěziza ɔ jí ǎ.

6 Nya e Mawu sɛ́ dó b’ɛ ná nyí afɔsɔ́ɖótetɔ́ tɔn é ka wá; nyǐkɔ tɔn nɔ nyí Jaan. 7 É wá bo ná nyí kúnnuɖetɔ́ ɖé, bo ná ɖe kúnnu nú wěziza ɔ, bónú gbɛtɔ́ alɔkpa lɛ́ bǐ ní dó sixú ɖi nǔ gbɔn jǐ tɔn. 8 É wɛ nyí wěziza énɛ́ ǎ, loɔ, bo ná dó ɖe kúnnu nú wěziza énɛ́ wú wɛ é wá.

9 Wěziza adodwé, éé nɔ ná wěziza gbɛtɔ́ alɔkpa lɛ́ bǐ é ɖo gbɛ ɔ mɛ ná wá wɛ. 10 É ko ɖo gbɛ ɔ mɛ, bɔ jǐ tɔn wɛ è dá gbɛ ɔ gbɔn, loɔ, gbɛ ɔ tuun i ǎ. 11 É wá to éɖésúnɔ tɔn mɛ, mɛ tɔn lɛ́ ka yí i ǎ. 12 Amɔ̌, é ná acɛ mɛ ɖěɖěe yí i lɛ́ é bǐ, bónú yě ná húzú vǐ Mawu tɔn, ɖó yě ɖe xlɛ́ ɖɔ émí ɖi nǔ nú nyǐkɔ tɔn wútu. 13 È ji yě, é ka nyí gbɔn hun, alǒ jlǒ agbaza tɔn, abǐ jlǒ gbɛtɔ́ tɔn gblamɛ ǎ, loɔ, jlǒ Mawu tɔn gblamɛ wɛ.

14 Xó ɔ húzú gbɛtɔ́ bo wá nɔ mǐ mɛ, bɔ mǐ mɔ susu tɔn; susu alɔkpa e vǐɖokpónɔ ɖé nɔ mɔ yí sín tɔ́ tɔn gɔ́n é. É ɖe fɛ́nú Mawu tɔn kpó nǔgbó tɔn kpó xlɛ́, bɔ é túnflá. 15 (Jaan ɖe kúnnu dó wǔtu tɔn, ɛɛn, é sú xó bo ɖɔ: “Mɛ e xó un ɖɔ nú mi bo ɖɔ xó élɔ́ é wɛ: ‘Mɛ e ɖo gǔdo ce jawě é ko jɛ nukɔn nú mì, ɖó é ko tíin jɛ nukɔn nú mì.’”) 16 Ðó fɛ́nú tɔn túnflá wútu ɔ, mǐ bǐ nɔ mɔ fɛ́nú yí ɖě ɖo ɖě jí tɔn. 17 Mɔyízi jí wɛ è ná Sɛ́n ɔ gbɔn, loɔ, Jezu Klísu jí wɛ fɛ́nú kpó nǔgbó ɔ kpó wá gbɔn. 18 Mɛ ɖěbǔ mɔ Mawu kpɔ́n gbeɖé ǎ, vǐɖokpónɔ e nyí mawu ɖé bo ɖo Tɔ́ ɔ kpá* é wɛ ɖe mɛ alɔkpa e é nyí é xlɛ́.

19 Hwenu e Jwifu lɛ́ sɛ́ vɔ̌sánúxwlémawutɔ́ lɛ́ kpó Levíi ví lɛ́ kpó dó sín Jeluzalɛ́mu, bónú yě ná kanbyɔ́ Jaan ɖɔ: “Mɛ̌ a ka nyí?” é ɔ, 20 é ná xósin ɔ nyi wɛn, bo yí gbe ɖɔ: “Nyi wɛ nyí Klísu ɔ ǎ.” 21 Bɔ yě kanbyɔ́ ɛ ɖɔ: “Mɛ̌ a ka nyí lo? Hwi wɛ nyí Elíi a?” É yí gbe ɖɔ: “Nyi wɛ ǎ.” Énɛ́ ɔ, yě kanbyɔ́ ɖɔ: “Hwi wɛ nyí Gbeyíɖɔ ɔ a?” Bɔ é ɖɔ: “Éǒ!” 22 Énɛ́ wú ɔ, yě ɖɔ n’i ɖɔ: “Mɛ̌ a ka nyí? Ðɔ nú mǐ, bónú mǐ ná tuun xósin e mǐ ná ná mɛ e sɛ́ mǐ dó lɛ́ é. Mɛ̌ hwiɖésúnɔ ka nyí bo nɔ ɖɔ?” 23 É ɖɔ: “Lěe gbeyíɖɔ Ezayíi ɖɔ gbɔn é ɔ, nyi wɛ nyí gbe e ɖo ɖiɖi wɛ sín gbětótló mɛ bo nɔ ɖɔ: ‘Mi jlɔ́ ali Jexóva* tɔn’ é.” 24 Falizyɛn lɛ́ sín gbɛ̌ta mɛ wɛ mɛ e è sɛ́ dó lɛ́ é ka gosín. 25 Bɔ yě kanbyɔ́ ɛ ɖɔ: “Ényí a ma nyí Klísu ɔ, alǒ Elíi, alǒ Gbeyíɖɔ ɔ ǎ ɔ, étɛ́wú a ka nɔ bló batɛ́mu nú mɛ lo?” 26 Jaan yí gbe nú yě ɖɔ: “Sin wɛ nyɛ nɔ sɔ́ dó bló batɛ́mu nú mɛ. Mɛ ɖokpó ɖo tɛ́ntin mitɔn, bɔ mi tuun i ǎ, 27 mɛ e ɖo gǔdo ce jawě é wɛ; mɛ énɛ́ ɔ, un jɛxá bo ná tún afɔkpakan tɔn lɛ́ ǎ.” 28 Nǔ énɛ́ lɛ́ jɛ ɖo Betaníi ɖo Judɛ́ɛn tɔ ɔ gúdo, fí e Jaan nɔ bló batɛ́mu nú mɛ ɖe é.

29 Ayǐhɔ́ngbe tɔn ɔ, é mɔ Jezu bɔ é ja gɔ̌n tɔn, énɛ́ ɔ, é ɖɔ: “Mi kpɔ́n! Lɛ̌ngbɔ́ví Mawu tɔn e ná ɖe hwɛ gbɛ ɔ tɔn síin é ɖíe! 30 Mɛ e wú un ɖɔ xó élɔ́ dó é wɛ: ‘Nya ɖé ɖo gǔdo ce jawě bo ko jɛ nukɔn nú mì, ɖó é ko tíin jɛ nukɔn nú mì.’ 31 Nyi lɔ tlɛ tuun i ɖ’ayǐ ǎ, amɔ̌, nǔ e wú un wá, bo nɔ sɔ́ sin dó bló batɛ́mu nú mɛ lɛ́ é wɛ nyí ɖɔ Izlayɛ́li ní dó sixú wá tuun i.” 32 Jaan lɛ́ ɖe kúnnu bo ɖɔ: “Un mɔ gbigbɔ mímɛ́ ɖo te jɛ wɛ jawě sín jǐxwé ahwannɛ́ ɖɔhun, bɔ gbigbɔ énɛ́ cí jǐ tɔn. 33 Nyi lɔ tlɛ tuun i ɖ’ayǐ ǎ, amɔ̌, Mɛ e sɛ́ mì dó ɖɔ má sɔ́ sin dó bló batɛ́mu nú mɛ lɛ́ é ɖésúnɔ wɛ ɖɔ nú mì ɖɔ: ‘Mɛ ɖěbǔ e a ná mɔ, bɔ gbigbɔ mímɛ́ ná jɛ te dó jǐ tɔn, bo cí jǐ tɔn é ɔ, mɛ énɛ́ wɛ nɔ sɔ́ gbigbɔ mímɛ́ dó bló batɛ́mu nú mɛ.’ 34 Bɔ un mɔ nǔ énɛ́, bo ɖe kúnnu ɖɔ mɛ énɛ́ ɔ wɛ nyí Vǐ Mawu tɔn.”

35 Ayǐhɔ́ngbe tɔn ɔ, Jaan ko lɛ́ ɖo fínɛ́ kpó ahwanvú tɔn we kpó, 36 bɔ ée é mɔ Jezu wá xweyǐgbe é ɔ, é ɖɔ: “Mi kpɔ́n! Lɛ̌ngbɔ́ví Mawu tɔn ɖíe!” 37 Ée ahwanvú we lɛ́ se xó énɛ́ é ɔ, yě xwedó Jezu. 38 Énɛ́ gúdo ɔ, ée Jezu lílɛ́ bo mɔ ɖɔ yě ɖo xwixwedó émí wɛ é ɔ, é ɖɔ nú yě ɖɔ: “Étɛ́ ba wɛ mi ka ɖe?” Bɔ yě ɖɔ n’i ɖɔ: “Hlabi, fítɛ́ a ka nɔ nɔ?” (Xókwín Hlabi ɔ sín tínmɛ wɛ nyí Mɛ̌si.) 39 É ɖɔ nú yě ɖɔ: “Mi xwedó mì, énɛ́ ɔ, mi ná mɔ.” Bɔ yě xwedó è bo mɔ fí e é nɔ nɔ é, bɔ yě nɔ gɔ̌n tɔn gbe nɛ́ gbe. Hwelɛ́kɔ gan ɛnɛ mɛ* mɔ̌ wɛ nǔ ɔ ɖo jijɛ wɛ. 40 Sinmɔ́ɔ Piyɛ́ɛ sín nɔví Andlé ɖo ahwanvú we e se nǔ e Jaan ɖɔ é, bo xwedó Jezu lɛ́ é mɛ. 41 É to yi mɔ nɔví éɖésúnɔ tɔn Sinmɔ́ɔ hwɛ̌, bo ɖɔ n’i ɖɔ: “Mǐ mɔ Mɛsíya ɔ” (tínmɛ tɔn dó Glɛ̌kigbe mɛ wɛ nyí “Klísu”). 42 Bɔ é kplá ɛ yi Jezu gɔ́n. Ée Jezu mɔ ɛ é ɔ, é ɖɔ: “Sinmɔ́ɔ wɛ a nɔ nyí, vǐ súnnu Jaan tɔn wɛ nú we; è ná nɔ ylɔ́ we ɖɔ Sefási” (tínmɛ tɔn dó Glɛ̌kigbe mɛ wɛ nyí “Piyɛ́ɛ”).

43 Ayǐhɔ́ngbe tɔn ɔ, Jezu jló ná yi Galilée. Bɔ ée é mɔ Filípu é ɔ, é ɖɔ n’i ɖɔ: “Xwedó mì.” 44 Filípu ɔ, Bɛtisayídanu wɛ, Andlé kpó Piyɛ́ɛ kpó ɖɔhun. 45 Filípu mɔ Natanayɛ́li bo ɖɔ n’i ɖɔ: “Mǐ mɔ mɛ e wú è wlán nǔ dó ɖo Mɔyízisɛ́n ɔ kpó nǔwlánwlán gbeyíɖɔ lɛ́ tɔn kpó mɛ é: Jezu, Jozɛ́fu ví, Nazalɛ́tinu ɔ wɛ.” 46 Amɔ̌, Natanayɛ́li ɖɔ n’i ɖɔ: “Nǔ ɖagbe ɖé ka sixú tɔ́n sín Nazalɛ́ti a?” Filípu ɖɔ n’i ɖɔ: “Wǎ mǐ yi bónú a ná kpɔ́n.” 47 Ée Jezu mɔ Natanayɛ́li ja gɔ̌n tɔn é ɔ, é ɖɔ dó wǔtu tɔn ɖɔ: “Mi kpɔ́n, Izlayɛ́li ví nǔgbó ɖokpó ɖíe, é nɔ wa mɛblɛ́blɛ́nú ɖěbǔ ǎ.” 48 Natanayɛ́li ɖɔ n’i ɖɔ: “Nɛ̌ a ka wa gbɔn bo tuun mì?” Jezu yí gbe n’i ɖɔ: “Cóbónú Filípu ná ylɔ́ we hwenu e a ɖo fígitín ɔ sá é ɔ, un ko mɔ we.” 49 Natanayɛ́li ɖɔ: “Mɛ̌si,* hwi wɛ nyí Vǐ Mawu tɔn, hwi wɛ nyí Axɔ́sú Izlayɛ́li tɔn.” 50 Jezu yí gbe n’i ɖɔ: “Ée un ɖɔ nú we ɖɔ un mɔ we ɖo fígitín sá é wɛ zɔ́n bɔ a ɖi nǔ nú mì a? A ná lɛ́ wá mɔ nǔ e jí wǔ hú mɔ̌ lɛ́ é.” 51 Énɛ́ gúdo ɔ, é ɖɔ n’i ɖɔ: “Má ɖɔ nǔgbó nú mi, mi ná mɔ bɔ jǐnukúnsin ná hun, bɔ wɛnsagun Mawu tɔn lɛ́ ná ɖo te jɛ wá Gbɛtɔ́ví ɔ gɔ́n wɛ, bo ná ɖo jǐ yi wɛ.”

2 Azǎn tɔn atɔngɔ́ ɔ gbe ɔ, è ɖo alɔwlíwlígɔ́ ɖé ɖu wɛ ɖo Kana ɖo Galilée, bɔ Jezu sín nɔ ɖo tɛn tɔn mɛ. 2 È ylɔ́ Jezu kpó ahwanvú tɔn lɛ́ kpó lɔmɔ̌ dó alɔwlíwlígɔ́ ɔ domɛ.

3 Ée vɛ̌ɛn ja vivɔ gbé é ɔ, Jezu sín nɔ ɖɔ n’i ɖɔ: “Yě sɔ́ ɖó vɛ̌ɛn ɖě ǎ.” 4 Jezu ka ɖɔ n’i ɖɔ: “Nyɔ̌nu, étɛ́ ka ɖu nyi kpó hwi kpó ɖ’é mɛ?* Gan ce ko xo ǎ.” 5 Nɔ tɔn ka ɖɔ nú mɛsɛntɔ́ lɛ́ ɖɔ: “Mi bló nǔ ɖěbǔ e é ná ɖɔ nú mi é.” 6 Sinzɛ́n e è sɔ́ awǐnnya dó bló é ayizɛ́n ka ɖo fínɛ́, lěe sɛ́n wǔsláslá tɔn Jwifu lɛ́ tɔn byɔ́ gbɔn é, bɔ ɖokpó ɖokpó sixú hɛn sinjlɛ́nú* we alǒ atɔn. 7 Jezu ɖɔ nú yě ɖɔ: “Mi dun sin dó zɛ̌n lɛ́ mɛ bónú yě ní gɔ́.” Énɛ́ ɔ, yě dun sin dó zɛ̌n lɛ́ mɛ, bɔ yě gɔ́ flélé. 8 Énɛ́ gúdo ɔ, é ɖɔ nú yě ɖɔ: “Mi wún kpɛɖé bo sɔ́ yi jó nú mɛ e ɖo nukún kpé dó alɔwlíwlígɔ́ ɔ wú wɛ é.” Bɔ yě wún yi jó n’i. 9 Mɛ e ɖo nukún kpé dó alɔwlíwlígɔ́ ɔ wú wɛ é dó sin e è ko sɔ́ dó húzú vɛ̌ɛn é ɖɛ̌. É tuun fí e vɛ̌ɛn ɔ gosín é ǎ (mɛsɛntɔ́ e wún sin ɔ lɛ́ é ka tuun). Énɛ́ wú ɔ, é ylɔ́ asisúnɔ ɔ, 10 bo ɖɔ n’i ɖɔ: “Vɛ̌ɛn ɖagbe ɔ wɛ mɛ bǐ nɔ ɖe tɔ́n jɛ nukɔn, bɔ ényí mɛ lɛ́ nu ahan mú ɔ, yě nɔ wá ɖe éé ma nyɔ́ sɔmɔ̌ ǎ é tɔ́n. Hwɛ ka sɛ vɛ̌ɛn ɖagbe ɔ xwe káká jɛ din.” 11 Kana wɛ Jezu wa mɔ̌ ɖe ɖo Galilée. Nǔjíwǔ nukɔntɔn e é bló é nɛ́. É ɖe susu tɔn xlɛ́, bɔ ahwanvú tɔn lɛ́ ɖi nǔ n’i.

12 Énɛ́ gúdo ɔ, éyɛ́, nɔ tɔn, nɔví tɔn lɛ́ kpó ahwanvú tɔn lɛ́ kpó yi Kafaanawúmu. Amɔ̌, yě nɔ fínɛ́ nú azǎn gěgé ǎ.

13 Din ɔ, Dǐndínwáyixwe Jwifu lɛ́ tɔn sɛkpɔ́, bɔ Jezu yi Jeluzalɛ́mu. 14 É mɔ nyibúsatɔ́ lɛ́, lɛ̌ngbɔ́satɔ́ lɛ́ kpó ahwannɛ́satɔ́ lɛ́ kpó ɖo tɛ́npli ɔ mɛ, bo lɛ́ mɔ akwɛ́cɛ́tɔ́ lɛ́ ɖo ayǐjínjɔ́n ɖo zinkpo yětɔn lɛ́ jí. 15 Énɛ́ ɔ, ée é sɔ́ kan dó bló bǎ ná gúdo é ɔ, é nya lɛ̌ngbɔ́ lɛ́ kpó nyibú lɛ́ kpó tɔ́n sín tɛ́npli ɔ mɛ, gɔ́ nú mɛ e ɖo yě sa wɛ lɛ́ é bǐ. É kɔn akwɛ́ akwɛ́ɖyɔ́tɔ́ lɛ́ tɔn nyi gbě, bo flí távo yětɔn lɛ́ xwe. 16 Bo ɖɔ nú ahwannɛ́satɔ́ lɛ́ ɖɔ: “Mi ɖe nǔ élɔ́ lɛ́ sín fí! Mi ma sɔ́ sɔ́ Tɔ́ ce xwé dó ɖó ajɔ̌xwé* ɖě ó.” 17 Ahwanvú tɔn lɛ́ flín ɖɔ è ko wlán ɖɔ: “Wǎnyíyí e un ɖó nú xwé towe é ná cí myɔ e ɖo jiji wɛ é ɖɔhun ɖo ayi ce mɛ.”

18 Jwifu lɛ́ ka ɖɔ n’i ɖɔ: “Wuntun tɛ́ a ka sixú ɖe xlɛ́ mǐ, dó xlɛ́ ɖɔ émí ɖó acɛ bo ná wa nǔ énɛ́ lɛ́?” 19 Jezu yí gbe nú yě ɖɔ: “Mi mu tɛ́npli élɔ́. Un ná vɔ́ gbá ɖo azǎn atɔn vlamɛ.” 20 Énɛ́ ɔ, Jwifu lɛ́ ɖɔ: “Xwe 46 wɛ è sɔ́ ɖó te bo gbá tɛ́npli élɔ́, bɔ hwɛ ka ná vɔ́ gbá ɖo azǎn atɔn vlamɛ a?” 21 Amɔ̌, agbaza tɔn wɛ nyí tɛ́npli e xó ɖɔ wɛ é ɖe é. 22 Énɛ́ ɔ, hwenu e è fɔ́n Jezu sín kú é ɔ, ahwanvú tɔn lɛ́ flín ɖɔ é ko nɔ ɖɔ mɔ̌ ɖ’ayǐ, bɔ yě ɖi nǔ nú nǔwlánwlán mímɛ́ ɔ kpó nǔ e Jezu ko ɖɔ é kpó.

23 É ɖo mɔ̌ có, hwenu e é ɖo Jeluzalɛ́mu é ɔ, é bló nǔjíwǔ gěgé ɖo Dǐndínwáyixwe ɔ hwenu. Ée mɛ lɛ́ mɔ mɔ̌ é ɔ, yě mɛ gěgé ɖi nǔ n’i. 24 Jezu ka ɖeji dó yě wú mlɛ́mlɛ́ ǎ, ɖó é tuun yě bǐ. 25 Gɔ́ ná ɔ, é ɖó hudó mɛɖé tɔn bónú é ná tínmɛ nǔɖé n’i dó gbɛtɔ́ wú ǎ, ɖó é mɔ nǔ jɛ nǔ e ɖo gbɛtɔ́ xomɛ é wú.

3 Falizyɛn ɖé ka tíin bo nɔ nyí Nikodɛ́mu. Nukɔntɔ́ Jwifu lɛ́ tɔn ɖokpó wɛ n’i. 2 Nya énɛ́ wá Jezu gɔ́n zǎnmɛ bo ɖɔ n’i ɖɔ: “Mɛ̌si, mǐ tuun ɖɔ Mawu wɛ sɛ́ we dó bónú a ná nyí nǔkplɔ́nmɛtɔ́, ɖó ényí Mawu ma ɖo kpɔ́ xá mɛɖé ǎ ɔ, é sixú bló nǔjíwǔ énɛ́ lɛ́ e a nɔ bló é ǎ.” 3 Jezu ka yí gbe n’i ɖɔ: “Má ɖɔ nǔgbó nú we, ényí è ma vɔ́ mɛɖé ji ǎ ɔ,* é sixú byɔ́ Axɔ́súɖuto Mawu tɔn mɛ ǎ.” 4 Nikodɛ́mu ɖɔ n’i ɖɔ: “Nɛ̌ mɛɖé ná ko nyí mɛxó, bɔ è ka sixú lɛ́ ji i gbɔn? É ma sixú lɛ́ byɔ́ nɔ tɔn xomɛ, bɔ è ná lɛ́ ji i azɔn wegɔ́ ɔ nɛ́, kabǐ?” 5 Jezu yí gbe n’i ɖɔ: “Má ɖɔ nǔgbó nú we, ényí è ma ji mɛɖé gbɔn sin kpó gbigbɔ kpó gblamɛ ǎ ɔ, é sixú byɔ́ Axɔ́súɖuto Mawu tɔn mɛ ǎ. 6 Nǔ e è ji gbɔn agbaza gblamɛ é ɔ, agbaza wɛ, bɔ nǔ e è ji gbɔn gbigbɔ mímɛ́ gblamɛ é nyí gbigbɔ. 7 Ðɔ e un ɖɔ nú we ɖɔ: È ɖó ná vɔ́ mi ji é ní ma kpácá we ó. 8 Jɔhɔn nɔ nyi dó fí e jló è é, bɔ a nɔ se gbe tɔn. Amɔ̌, a nɔ tuun fí e é gosín é kpó fí e é xwe é kpó ǎ. Nǔ ɖokpó ɔ wɛ é nyí nú mɛ ɖěɖěe è ji gbɔn gbigbɔ mímɛ́ gblamɛ lɛ́ é bǐ.”

9 Nikodɛ́mu ka yí gbe n’i ɖɔ: “Nɛ̌ nǔ énɛ́ lɛ́ ka sixú jɛ gbɔn?” 10 Jezu yí gbe n’i ɖɔ: “Mɛ̌si wɛ a nyí ɖo Izlayɛ́li, nɛ̌ é ka nyí gbɔn bɔ a ma tuun nǔ énɛ́ lɛ́ ǎ? 11 Má ɖɔ nǔgbó nú we, nǔ e mǐ tuun é ɔ, mǐ nɔ ɖɔ xó tɔn, bɔ nǔ e mǐ mɔ é ɔ, mǐ nɔ ɖe kúnnu ná. Amɔ̌, mi yí gbe nú kúnnu e ɖe wɛ mǐ ɖe é ǎ. 12 Un ɖɔ nǔ e nɔ jɛ ɖo ayǐkúngban jí lɛ́ é nú mi, mi ka ko ɖi nǔ ǎ. Ényí un ka wá ɖɔ nǔ e nɔ jɛ ɖo jǐxwé lɛ́ é nú mi ɔ, nɛ̌ mi ka ná ɖi nǔ gbɔn? 13 Gɔ́ ná ɔ, mɛ ɖěbǔ yi jǐxwé kpɔ́n, zɛ Gbɛtɔ́ví ɔ, éé jɛ te sín jǐxwé é wú ǎ. 14 Lěe Mɔyízi sɔ́ dan ɔ ɖó jǐ ɖo gbětótló mɛ gbɔn é ɔ, mɔ̌ ɖokpó ɔ, è ɖó ná sɔ́ Gbɛtɔ́ví ɔ ɖó jǐ, 15 bónú mɛ e ná ɖi nǔ n’i lɛ́ é bǐ ní dó sixú mɔ gbɛ mavɔmavɔ.

16 “Ðó Mawu yí wǎn nú gbɛ ɔ sɔmɔ̌, bo ná Vǐɖokpónɔ tɔn, bónú mɛ ɖěbǔ e ná ɖe xlɛ́ ɖɔ émí ɖi nǔ n’i é ní ma dɔn ó, loɔ, é ní mɔ gbɛ mavɔmavɔ. 17 Ðó Mawu sɛ́ Vǐ tɔn dó gbɛ ɔ mɛ bónú é ná ɖɔ hwɛ xá gbɛ ɔ ǎ, loɔ, bónú è ná hwlɛ́n gbɛ ɔ gán gbɔn gbla tɔn mɛ wú wɛ. 18 È ná ɖɔ hwɛ xá mɛ e ɖe xlɛ́ ɖɔ émí ɖi nǔ n’i é ɖěbǔ ǎ. Mɛ ɖěbǔ e ma ɖe xlɛ́ ɖɔ émí ɖi nǔ ǎ é ɔ, è ko ɖɔ hwɛ tɔn, ɖó é ɖe xlɛ́ ɖɔ émí ɖi nǔ nú Vǐɖokpónɔ Mawu tɔn sín nyǐkɔ ǎ. 19 Nǔ e wú hwɛɖiɖɔ ɔ sín é ɖíe: Wěziza ɔ wá gbɛ ɔ mɛ, amɔ̌, gbɛtɔ́ lɛ́ yí wǎn nú ablu hú wěziza, ɖó nǔwiwa yětɔn lɛ́ nylá wútu. 20 Ðó mɛ ɖěbǔ e nɔ wa nǔ nyanya é gbɛ́ wǎn nú wěziza, bo nɔ wá wěziza nu ǎ, bónú è ma wá ɖe nǔwiwa tɔn lɛ́ gba ó. 21 Amɔ̌, mɛ ɖěbǔ e nɔ wa nǔ ɖagbe é nɔ wá wěziza nu, bónú è ná dó sixú ɖe xlɛ́ ɖɔ nǔwiwa tɔn lɛ́ sɔgbe xá jlǒ Mawu tɔn.”

22 Énɛ́ gúdo ɔ, Jezu kpó ahwanvú tɔn lɛ́ kpó yi gletoxo Judée tɔn lɛ́ mɛ. É nɔ fínɛ́ xá yě nú hwenu ɖé, bo nɔ ɖo batɛ́mu bló nú mɛ wɛ. 23 Amɔ̌, Jaan lɔ nɔ ɖo batɛ́mu bló nú mɛ wɛ ɖo Ayinɔ́ni ɖo Salímu kpá, ɖó sin sukpɔ́ ɖo fínɛ́ wútu. Mɛ lɛ́ nɔ ɖo wǐwá wɛ, bɔ é nɔ ɖo batɛ́mu bló nú yě wɛ. 24 È ko wlí Jaan dó gan mɛ hwenɛ́nu ǎ.

25 Ahwanvú Jaan tɔn lɛ́ dɔn nǔ xá Jwifu ɖokpó dó wǔsláslá wú. 26 Énɛ́ gúdo ɔ, yě wá Jaan gɔ́n bo ɖɔ n’i ɖɔ: “A tuun a Mɛ̌si,* nya e wá gɔ̌n towe ɖo Judɛ́ɛn tɔ ɔ gúdo é ɔ, nya énɛ́ e wú a ɖe kúnnu dó é ɔ, é ɖo batɛ́mu bló nú mɛ wɛ, bɔ mɛ lɛ́ bǐ ɖo gɔ̌n tɔn yi wɛ.” 27 Jaan ka yí gbe nú yě ɖɔ: “Ényí Mawu ma ná nǔ mɛɖé ǎ ɔ, mɛ ɔ sixú mɔ nǔ kwín ɖokpó yí ǎ. 28 Miɖésúnɔ ɖe kúnnu nú mì ɖɔ un ɖɔ: ‘Nyi wɛ nyí Klísu ɔ ǎ, é nyɔ́ wa ɔ, è sɛ́ mì dó jɛ nukɔn n’i wɛ.’ 29 Asisúnɔ ɔ tɔn wɛ nyí yawó ɔ. Amɔ̌, ényí asisúnɔ ɔ sín xɔ́ntɔn ɖo te bo se bɔ é ɖo xó ɖɔ wɛ ɔ, é nɔ j’awǎ tawun, ɖó asisúnɔ ɔ sín gbe wú. Énɛ́ wú ɔ, awǎjijɛ ce ko túnflá. 30 Azɔ̌ mɛ énɛ́ tɔn ɖó ná fɔ́n bo ná ɖo jijɛjí wɛ, bɔ nyɛtɔn ka ná fɔ́n bo ná ɖo ɖiɖekpo wɛ.”

31 Mɛ e gosín aga é hú gǎn mɛ ɖě lɛ́ bǐ. Mɛ e gosín ayǐkúngban jí é ɔ, ayǐkúngban jí tɔn wɛ é nyí bo nɔ ɖɔ nǔ e ɖo ayǐkúngban jí lɛ́ é xó. Mɛ e gosín jǐxwé é hú gǎn mɛ ɖě lɛ́ bǐ. 32 É ɖe kúnnu dó nǔ e é mɔ bo se é wú. Amɔ̌, mɛ ɖěbǔ ɖi nǔ nú kúnnuɖiɖe tɔn ǎ. 33 Mɛ ɖěbǔ e ɖi nǔ nú kúnnuɖiɖe tɔn é dó zǒgbe jí ɖɔ Mawu nɔ ɖɔ nǔgbó. 34 Mɛ e Mawu sɛ́ dó é nɔ ɖɔ xó Mawu tɔn lɛ́, ɖó Mawu nɔ hun alɔ bo nɔ ná gbigbɔ tɔn.* 35 Tɔ́ ɔ yí wǎn nú Vǐ ɔ, bo ko sɔ́ nǔ lɛ́ bǐ dó alɔ tɔn mɛ. 36 Mɛ e ɖe xlɛ́ ɖɔ émí ɖi nǔ nú Vǐ ɔ é ná mɔ gbɛ mavɔmavɔ; mɛ e ma nɔ se tónú nú Vǐ ɔ ǎ é ná mɔ gbɛ ǎ, é nyɔ́ wa ɔ, xomɛsin Mawu tɔn ɖo mɛ énɛ́ jí.

4 Jezu* wá mɔ nǔ jɛ wú ɖɔ Falizyɛn lɛ́ se ɖɔ ahwanvú émítɔn lɛ́ sukpɔ́ hú Jaan tɔn lɛ́, bɔ mɛ e bló batɛ́mu ná wɛ émí ɖe lɛ́ é lɛ́vɔ́ sukpɔ́ hú Jaan tɔn lɛ́. 2 (Jezu ɖésúnɔ ka bló batɛ́mu nú mɛ ɖě ǎ, loɔ, ahwanvú tɔn lɛ́ wɛ nɔ bló nú mɛ.) 3 Ée Jezu mɔ nǔ jɛ wú ɖɔ Falizyɛn lɛ́ se mɔ̌ é ɔ, é gosín Judée bo lɛ́vɔ́ ɖidó Galilée. 4 Amɔ̌, é ɖo dandan ɖɔ é ní gbɔn Samalíi dín. 5 É wá jɛ toxo Samalíi tɔn e è nɔ ylɔ́ ɖɔ Sicáa é mɛ; toxo énɛ́ ɖo malínmálín dó gle e Jakɔ́bu ná vǐ tɔn Jozɛ́fu é. 6 Fínɛ́ wɛ sɛ́tɔ Jakɔ́bu tɔn ɖe. Nǔ ci kɔ nú Jezu tawun ɖó ali e é zɔn é wú, bɔ é jínjɔ́n tɔ* ɔ kpá. Gan 12 hwemɛ tɔn* mɛ mɔ̌ wɛ.

7 Nyɔ̌nu Samalíinu ɖé wá sin dun gbé. Jezu ɖɔ n’i ɖɔ: “Nǎ sin mì má nu.” 8 (Ahwanvú tɔn lɛ́ ko yi nǔɖuɖu xɔ gbé ɖo toxo ɔ mɛ nɛ́.) 9 Nyɔ̌nu Samalíinu ɔ ka ɖɔ n’i ɖɔ: “Nɛ̌ ka gbɔn bɔ hwɛ mɛ e nyí Jwifu é ka byɔ́ sin nunu nyɛ mɛ e nyí nyɔ̌nu Samalíinu é?” (Ðó Jwifu lɛ́ nɔ kpé nǔɖé xá Samalíinu lɛ́ ǎ.) 10 Jezu yí gbe n’i ɖɔ: “Ényí a ko tuun nǔ e Mawu nɔ ná mɛ vɔ̌nu é kpó mɛ e ɖɔ nú we ɖɔ: ‘Nǎ sin mì má nu’ é kpó wɛ ɔ, hwi wɛ ná ko byɔ́ sin i, bɔ é ná ná we sin e nɔ ná gbɛ mɛ é.” 11 Nyɔ̌nu ɔ ɖɔ n’i ɖɔ: “Mɛɖaxó, a tlɛ ɖó tɔká bo ná dó dun sin ná ǎ, bɔ tɔ ɔ ka lɛ́ gɔ́ngɔ́n. Fítɛ́ a ka ná ba sin énɛ́ e nɔ ná gbɛ mɛ é sín lo? 12 A hú gǎn tɔ́gbó mǐtɔn Jakɔ́bu, éé ná tɔ ɔ mǐ, bɔ é kpó vǐ tɔn lɛ́ kpó, kpódó kanlin tɔn lɛ́ kpó nu é ǎ, kabǐ?” 13 Jezu yí gbe n’i ɖɔ: “Mɛ e nu sin élɔ́ lɛ́ é bǐ wɛ kɔ ná lɛ́vɔ́ xú. 14 Mɛ ɖěbǔ e ná nu sin e nyɛ ná ná ɛ é ɔ, kɔ sɔ́ ná xú i kpɔ́n ǎ, é nyɔ́ wa ɔ, sin e un ná ná ɛ é ná húzú tɔjɔtɛn ɖo xo tɔn mɛ, bo ná ná ɛ gbɛ mavɔmavɔ.” 15 Nyɔ̌nu ɔ ɖɔ n’i ɖɔ: “Mɛɖaxó, nǎ sin énɛ́ mì bónú kɔ ní ma sɔ́ xú mì ɖě ó, lobonú un ma sɔ́ nɔ lɛ́ tɔ́n sin dun gbé wá fí ɖě ó.”

16 Jezu ɖɔ n’i ɖɔ: “Yi ylɔ́ asú towe wá fí.” 17 Nyɔ̌nu ɔ ɖɔ: “Un ɖó asú ǎ.” Jezu ɖɔ n’i ɖɔ: “‘Un ɖó asú ǎ’ e a ɖɔ é ɔ, xójɔxó wɛ a ɖɔ. 18 Ðó asú atɔ́ɔ́n sí wɛ a ko nɔ kpɔ́n, bɔ súnnu e sí a ka ɖe din é nyí asú towe ǎ. Hǔn, xójɔxó wɛ a ɖɔ.” 19 Nyɔ̌nu ɔ ɖɔ n’i ɖɔ: “Mɛɖaxó, un mɔ ɖɔ gbeyíɖɔ wɛ nú we. 20 Só élɔ́ jí wɛ tɔ́gbó mǐtɔn lɛ́ sɛn Mawu ɖe, amɔ̌, midɛɛ lɛ́ nɔ ɖɔ ɖɔ Jeluzalɛ́mu wɛ fí e è ɖó ná sɛn Mawu ɖe é ɖe.” 21 Jezu ɖɔ n’i ɖɔ: “Nǎwe, ɖi xó ce, hwe ɔ nu ɖo nǎ su wɛ, bɔ é nyí só élɔ́ jí, alǒ Jeluzalɛ́mu wɛ mi ná sɛn Tɔ́ ɔ ɖe ǎ. 22 Mi nɔ sɛn nǔ e mi ma tuun ǎ é, mǐdɛɛ lɛ́ ka nɔ sɛn nǔ e mǐ tuun é, ɖó Jwifu lɛ́ jí wɛ hwlɛngán ɔ bɛ́sín. 23 Amɔ̌, hwe ɔ nu ɖo nǎ su wɛ, é ka tlɛ ko su, bɔ mawusɛntɔ́ nǔgbó lɛ́ ná sɛn Tɔ́ ɔ ɖo gbigbɔ kpó nǔgbó kpó mɛ. Nǔgbó ɔ, mɛ mɔ̌hunkɔtɔn lɛ́ ba wɛ Tɔ́ ɔ ɖe bónú yě ná sɛn ɛ. 24 Mawu ɔ, gbigbɔ wɛ, bɔ mɛ ɖěɖěe ɖo sinsɛn ɛ wɛ lɛ́ é ɖó ná sɛn ɛ ɖo gbigbɔ kpó nǔgbó kpó mɛ.” 25 Nyɔ̌nu ɔ ɖɔ n’i ɖɔ: “Un tuun ɖɔ Mɛsíya ɔ, ée è nɔ ylɔ́ ɖɔ Klísu é jawě. Hwenu e éyɛ́ ná wá é ɔ, é ná ɖɔ nǔ lɛ́ bǐ nú mǐ nyi wɛn.” 26 Jezu ɖɔ n’i ɖɔ: “Nyi mɛ e ɖo xó ɖɔ nú we wɛ din é wɛ nyí mɛ énɛ́.”

27 Hwenɛ́nu pɛ́ɛ́ ɔ, ahwanvú tɔn lɛ́ wá, bɔ é kpácá yě ɖɔ é ɖo xó ɖɔ xá nyɔ̌nu wɛ. Yě mɛ ɖěbǔ ka ɖɔ: “Étɛ́ ba wɛ a ka ɖe?” alǒ: “Étɛ́wú a ka ɖo xó ɖɔ xá ɛ wɛ?” ǎ. 28 Énɛ́ ɔ, nyɔ̌nu ɔ jó tɔyizɛ́n tɔn dó, bo ɖidó toxo ɔ mɛ, lobo ɖɔ nú mɛ lɛ́ ɖɔ: 29 “Mi wá kpɔ́n, nya ɖé tíin bo ɖɔ nǔ e un wa lɛ́ é bǐ nú mì. Klísu ɔ ná ko wɛ vlafo ǎ cé?” 30 Yě gosín toxo ɔ mɛ bo ɖidó Jezu gɔ́n.

31 Hwenɛ́nu ɔ, ahwanvú lɛ́ ɖo vo sa n’i wɛ bo nɔ ɖɔ: “Mɛ̌si, ɖu nǔ.” 32 Amɔ̌, é ɖɔ nú yě ɖɔ: “Un ko ɖó nǔ bo ná ɖu; mi ka tuun nǔɖuɖu e wɛ é ǎ.” 33 Énɛ́ wú ɔ, ahwanvú lɛ́ jɛ ɖiɖɔ nú yěɖée lɛ́ jí ɖɔ: “Mɛ ɖěbǔ ma ka hɛn nǔɖé wá n’i bónú é ná ɖu nɛ́.” 34 Jezu ɖɔ nú yě ɖɔ: “Nǔɖuɖu ce wɛ nyí ɖɔ má wa jlǒ mɛ e sɛ́ mì dó é tɔ́n, bo lɛ́ wa azɔ̌ tɔn yi fó. 35 Sun ɛnɛ wɛ kpo cóbɔ nǔkúnyiyahwenu ná wá bɔ mi nɔ ɖɔ ǎ é? Éɖíe! Má ɖɔ nú mi: Mi jlɔ́ kɔ, bo kpɔ́n gle lɛ́, jinukún lɛ́ ko nyɔ́, bo ko su yiya. 36 È ko ɖo axɔ́ sú nǔkúnyatɔ́ wɛ, bɔ é ko ɖo nǔkún lɛ́ xo kplé nú gbɛ mavɔmavɔ wɛ, bónú nǔkúndótɔ́ kpó nǔkúnyatɔ́ kpó ní dó sixú j’awǎ ɖó kpɔ́. 37 Xó e lǒ élɔ́ ɖɔ ɖo ali énɛ́ nu é nyí nǔgbó: Mɛ̌ ɖě nɔ dó, bɔ mɛ ɖěvo nɔ ya. 38 Un sɛ́ mi dó bónú mi ná ya nǔ e mi ma dó ǎ é. Mɛ ɖěvo lɛ́ jɛ tagba, bɔ midɛɛ lɛ́ ɖu tagba e yě jɛ é sín le.”

39 Samalíinu gěgé ɖi nǔ n’i ɖo toxo énɛ́ mɛ, ɖó kúnnu élɔ́ e nyɔ̌nu ɔ ɖe é wútu: “É ɖɔ nǔ e un wa lɛ́ é bǐ nú mì.” 40 Énɛ́ wú ɔ, ée Samalíinu lɛ́ wá Jezu gɔ́n é ɔ, yě byɔ́ ɛ ɖɔ é ní nɔ gɔ̌n émítɔn, bɔ é nɔ fínɛ́ nú azǎn we. 41 Wǎgbɔ tɔn ɔ, mɛ gěgé ɖěvo lɛ́ ɖi nǔ, ɖó xó e Jezu ɖɔ lɛ́ é wú. 42 Yě ɖɔ nú nyɔ̌nu ɔ ɖɔ: “É sɔ́ nyí xó e a ɖɔ lɛ́ é kɛ́ɖɛ́ wɛ zɔ́n bɔ mǐ ɖó nǔɖiɖi ǎ, ɖó mǐɖésúnɔ se xó e nya énɛ́ ɖɔ lɛ́ é bo tuun ɖɔ é wɛ nyí hwlɛngántɔ́ gbɛ ɔ tɔn nǔgbó.”

43 Azǎn we lɛ́ gúdo ɔ, é gosín fínɛ́ bo ɖidó Galilée. 44 Amɔ̌, Jezu ɖésúnɔ ko ɖe kúnnu ɖɔ è kún nɔ wlí yɛ̌yi nú gbeyíɖɔ ɖé ɖo to éɖésúnɔ tɔn mɛ ó. 45 Énɛ́ wú ɔ, ée é wá Galilée é ɔ, Galiléenu lɛ́ yí i, ɖó yě mɔ nǔ e é wa ɖo Jeluzalɛ́mu ɖo xwe ɔ hwenu lɛ́ é bǐ, ɖó yě lɔ yi xwe ɔ tɛnmɛ.

46 Énɛ́ gúdo ɔ, é lɛ́vɔ́ wá Kana ɖo Galilée, fí e é sɔ́ sin dó húzú vɛ̌ɛn ná ɖe ɖ’ayǐ é. Axɔ́súzɔ́watɔ́ hɔnmɛ tɔn ɖokpó ka ɖo Kafaanawúmu, bɔ vǐ súnnu tɔn ɖo azɔn jɛ wɛ. 47 Ée nya énɛ́ se ɖɔ Jezu ko gosín Judée bo wá Galilée é ɔ, é yi gɔ̌n tɔn, bo byɔ́ ɛ ɖɔ é ní wá Kafaanawúmu bá gbɔ azɔn nú vǐ súnnu émítɔn, ɖó é ɖo kúdonu. 48 Jezu ka ɖɔ n’i ɖɔ: “Ényí mi ma mɔ wuntun lɛ́ kpó nǔjíwǔ lɛ́ kpó ǎ ɔ, mi ná ɖi nǔ gbeɖé ǎ.” 49 Axɔ́súzɔ́watɔ́ hɔnmɛ tɔn ɔ ɖɔ n’i ɖɔ: “Aklúnɔ, xwedó mì, bónú vǐ ce ní ma kú ó.” 50 Jezu ɖɔ n’i ɖɔ: “Lɛ̌ kɔ yi xwé, vǐ súnnu towe ɖo gbɛ.” Nya ɔ ɖi nǔ nú xó e Jezu ɖɔ n’i é, bo lɛ́ kɔ. 51 Amɔ̌, ée é ɖo ali jí xwe xwé é ɔ, mɛsɛntɔ́ tɔn lɛ́ wá kpé è, bo ɖɔ n’i ɖɔ vǐ súnnu tɔn ɖo gbɛ.* 52 É kanbyɔ́ yě ɖɔ gan nabí mɛ lanmɛ vǐ ɔ tɔn ka kpɔ́n te a jí. Yě yí gbe n’i ɖɔ: “Zozo ɔ kɔ́n n’i sɔ e wá yi é, ɖo gan ɖokpó mɛ hwemɛ mɔ̌.”* 53 Vǐtɔ́ ɔ mɔ nǔ jɛ wú ɖɔ gan énɛ́ mɛ pɛ́ɛ́ wɛ Jezu ɖɔ: “Vǐ súnnu towe ɖo gbɛ.” Énɛ́ wú ɔ, é kpó xwédo tɔn blěbú kpó ɖi nǔ. 54 Nǔjíwǔ wegɔ́ e Jezu bló hwenu e é gosín Judée wá Galilée é nɛ́.

5 Énɛ́ gúdo ɔ, Jwifu lɛ́ sín xwe hwenu su, bɔ Jezu yi Jeluzalɛ́mu. 2 Sindo ɖé ka ɖo Jeluzalɛ́mu ɖo Lɛ̌ngbɔ́ lɛ́ sín hɔntogbó kpá, bɔ è nɔ ylɔ́ ɖɔ Bɛtizáta ɖo Ebléegbe mɛ, bɔ agba* atɔ́ɔ́n lɛ́ lɛ̌ dó. 3 Azinzɔnnɔ lɛ́, nukúntɔ́nnɔ lɛ́, afɔkponɔ lɛ́ kpó mɛ ɖěɖěe alɔ alǒ afɔ kú ná lɛ́ é kpó wɔ̌búwɔ́bú ɖé nɔ ɖo ayǐmlɔ́mlɔ́ ɖo agba énɛ́ lɛ́ sá. 4* —— 5 Nya ɖé ka ɖo fínɛ́ bo ɖo azɔn jɛ wɛ sín xwe 38 ɖíe. 6 Ée Jezu mɔ nya énɛ́ ɖo ayǐmlɔ́mlɔ́ ɖo fínɛ́, bo lɛ́ tuun ɖɔ é ko ɖo azɔn jɛ wɛ sín hwenu línlín ɖíe é ɔ, é ɖɔ n’i ɖɔ: “A jló ɖɔ azɔn towe ní gbɔ a?” 7 Nya azinzɔnnɔ ɔ yí gbe n’i ɖɔ: “Mɛɖaxó, un ɖó mɛ ɖěbǔ nú é ná d’alɔ mì bónú má byɔ́ sindo ɔ mɛ, hwenu e sin ɔ ɖo xixo wɛ é ǎ. Cóbónú un ná yi dɔ̌n ɔ, mɛ ɖěvo ko nɔ jɛ mɛ jɛ nukɔn nú mì.” 8 Jezu ɖɔ n’i ɖɔ: “Sí te! Sɔ́ zan towe, bo ɖi zɔnlin.” 9 Énɛ́ ɔ, azɔn gbɔ nú nya ɔ tlóló, bɔ é sɔ́ zan tɔn, bo jɛ zɔnlin ɖi jí.

Gbe énɛ́ gbe ɔ, gbɔjɛzángbe ka wɛ. 10 Énɛ́ wú ɔ, Jwifu lɛ́ jɛ ɖiɖɔ nú nya e azɔn gbɔ ná é jí ɖɔ: “Gbɔjɛzángbe wɛ mǐ ɖe, é sɔgbe xá sɛ́n ɖɔ a ní sɔ́ zan hɛn ǎ.” 11 É ka yí gbe nú yě ɖɔ: “Mɛ e gbɔ azɔn nú mì é wɛ lɛ́ ɖɔ nú mì ɖɔ: ‘Sɔ́ zan towe, bo ɖi zɔnlin.’” 12 Yě kanbyɔ́ ɛ ɖɔ: “Mɛ̌ ka nyí nya e ɖɔ nú we ɖɔ: ‘Sɔ́ zan towe, bo ɖi zɔnlin’ é?” 13 Nya e azɔn gbɔ ná é ka tuun mɛ e wɛ é ǎ, ɖó Jezu ko lun byɔ́ ahwan e ɖo fínɛ́ é mɛ.

14 Énɛ́ gúdo ɔ, Jezu mɔ nya ɔ ɖo tɛ́npli ɔ mɛ, bo ɖɔ n’i ɖɔ: “Din e azɔn towe ko gbɔ é ɔ, ma sɔ́ hu hwɛ ɖě ó, bónú nǔ e nylá hú mɔ̌ é ní ma wá gbo we ó.” 15 Nya ɔ ɖidó, bo yi ɖɔ nú Jwifu lɛ́ ɖɔ Jezu wɛ nyí mɛ e gbɔ azɔn nú émí é. 16 Hwɛjijɔ énɛ́ wú wɛ Jwifu lɛ́ nɔ ɖo ya dó nú Jezu wɛ, ɖó nǔ énɛ́ lɛ́ e é nɔ ɖo wiwa wɛ ɖo gbɔjɛzángbe é wútu. 17 Amɔ̌, é ɖɔ nú yě ɖɔ: “Tɔ́ ce kpo ɖo azɔ̌ wa wɛ káká jɛ din, bɔ nyi lɔ kpo ɖo azɔ̌ wa wɛ.” 18 Nǔ énɛ́ wú wɛ ba e ba wɛ Jwifu lɛ́ ɖe bo ná hu i é lɛ́ syɛ́n d’é jí. É nyí é ɖo gbɔjɛzánsɛ́n gba wɛ kɛ́ɖɛ́ wú wɛ ǎ, loɔ, é nɔ ylɔ́ Mawu ɖɔ Tɔ́, bo nɔ sɔ́ éɖée ɖó Mawu há jí.

19 Énɛ́ wú ɔ, Jezu ɖɔ nú yě ɖɔ: “Má ɖɔ nǔgbó nú mi, Vǐ ɔ sixú sɔ́ jlǒ éɖésúnɔ tɔn dó wa nǔ kwín ɖokpó ná ǎ. Loɔ, nǔ e é mɔ bɔ Tɔ́ ɔ ɖo wiwa wɛ é kɛ́ɖɛ́ wɛ é nɔ wa. Ðó nǔ ɖěbǔ e Mɛ énɛ́ wa é ɔ, Vǐ ɔ lɔ nɔ wa gbɔn mɔ̌. 20 Tɔ́ ɔ yí wǎn nú Vǐ ɔ, bo nɔ ɖe nǔ e éɖésúnɔ nɔ wa lɛ́ é bǐ xlɛ́ ɛ. É ka ná lɛ́ ɖe nǔ e hú gǎn nǔ énɛ́ lɛ́ é xlɛ́ ɛ, bónú é ná jí wǔ nú mi. 21 Ðó lěe Tɔ́ ɔ nɔ fɔ́n mɛkúkú lɛ́ bo nɔ ná yě gbɛ gbɔn é ɔ, mɔ̌ wɛ Vǐ ɔ lɔ nɔ ná gbɛ mɛ ɖěbǔ e é ba é gbɔn. 22 Ðó Tɔ́ ɔ nɔ ɖɔ hwɛ xá mɛ ɖěbǔ ǎ, loɔ, Vǐ ɔ wɛ é sɔ́ acɛ lɛ́ bǐ d’así ná, bónú é ná ɖɔ hwɛ xá mɛ. 23 Énɛ́ ɔ, mɛ lɛ́ bǐ ná sixú wlí yɛ̌yi nú Vǐ ɔ, lěe yě nɔ wlí yɛ̌yi nú Tɔ́ ɔ gbɔn é. Mɛ ɖěbǔ e ma nɔ wlí yɛ̌yi nú Vǐ ɔ ǎ é nɔ wlí yɛ̌yi nú Tɔ́ e sɛ́ ɛ dó é ǎ. 24 Má ɖɔ nǔgbó nú mi, mɛ ɖěbǔ e se xó ce bo ɖi nǔ nú Mɛ e sɛ́ mì dó é ná mɔ gbɛ mavɔmavɔ, bɔ è ná ɖɔ hwɛ xá ɛ ǎ, loɔ, é ko fɔ́n sín kú wá gbɛ.

25 “Má ɖɔ nǔgbó nú mi, hwe ɔ nu ɖo nǎ su wɛ, é ka ko su, bɔ mɛkúkú lɛ́ ná se Vǐ Mawu tɔn sín gbe, bɔ mɛ e tɛ́ tó lɛ́ é ná nɔ gbɛ. 26 Ðó lěe Tɔ́ ɔ ɖó acɛ bo nɔ ná gbɛ mɛ gbɔn é ɔ, mɔ̌ wɛ é ná acɛ Vǐ ɔ bónú é lɔ ná ná gbɛ mɛ gbɔn. 27 Bɔ é ná ɛ acɛ nú é ná ɖɔ hwɛ xá mɛ, ɖó é wɛ nyí Gbɛtɔ́ví ɔ. 28 Mi ma nú énɛ́ kpácá mi ó, ɖó hwe ɔ nu ɖo nǎ su wɛ, bɔ mɛ e ɖo yɔdo* mɛ lɛ́ é bǐ ná se gbe tɔn, 29 bo ná tɔ́n. Mɛ e wa nǔ ɖagbe lɛ́ é ɔ, è ná fɔ́n yě bónú yě ná nɔ gbɛ, bɔ mɛ e wa nǔ nyanya lɛ́ é ɔ, è ná fɔ́n yě bo ná ɖɔ hwɛ xá yě. 30 Un sixú sɔ́ jlǒ nyiɖésúnɔ tɔn dó wa nǔ kwín ɖokpó ná ǎ. Nǔ e un se ɖo Tɔ́ ɔ gɔ́n é* jí wɛ un nɔ zɔn dó, dó ɖɔ hwɛ; hwɛ jlɔ́jlɔ́ wɛ un ka nɔ ɖɔ, ɖó jlǒ nyiɖésúnɔ tɔn wɛ un nɔ ba ná wa ǎ, loɔ, jlǒ mɛ e sɛ́ mì dó é tɔn wɛ un nɔ wa.

31 “Ényí nyiɖokpónɔ ɖe kúnnu nú nyiɖée ɔ, kúnnuɖiɖe ce nyí nǔgbó ǎ. 32 Mɛ ɖěvo tíin bo nɔ ɖe kúnnu dó wǔ ce, bɔ un tuun ɖɔ kúnnu e é nɔ ɖe dó wǔ ce é nyí nǔgbó. 33 Mi sɛ́ mɛ dó Jaan, bɔ é ɖe kúnnu nú nǔgbó ɔ. 34 É ɖo mɔ̌ có, un nɔ yí gbe nú kúnnuɖiɖe gbɛtɔ́ tɔn ǎ, amɔ̌, mi ní gán wú wɛ un ɖɔ xó énɛ́ lɛ́. 35 Nya énɛ́ cí zogbɛ́n e ɖo títá bo ɖo kínkɔ́n wɛ é ɖɔhun, bɔ nú hwenu kpɛɖé ɔ, mi ɖo gbesisɔmɛ bo ná j’awǎ ɖaxó ɖo wěziza tɔn nu. 36 Amɔ̌, nǔ e ɖo kúnnu ɖe nú mì wɛ é hú gǎn kúnnu e Jaan ɖe é, ɖó azɔ̌ e Tɔ́ ce zɔ́n mì ɖɔ má wa, bɔ un ɖo wiwa wɛ lɛ́ é ɖésúnɔ wɛ ɖo kúnnu ɖe nú mì wɛ ɖɔ Tɔ́ ɔ wɛ sɛ́ mì dó. 37 Bɔ Tɔ́ e sɛ́ mì dó é ɖésúnɔ ko ɖe kúnnu dó wǔtu ce. Mi se gbe tɔn kpɔ́n ǎ, mi ka lɛ́ mɔ ɛ kpɔ́n ǎ. 38 Xó tɔn ka lɛ́ ɖo ayi mɛ nú mi ǎ, ɖó mi ɖi nǔ nú mɛ e é sɛ́ dó é ǎ.

39 “Mi nɔ ɖo Nǔwlánwlán mímɛ́ lɛ́ kíjé wɛ, ɖó mi lin ɖɔ yě ná zɔ́n bɔ mi ná mɔ gbɛ mavɔmavɔ. Nǔwlánwlán mímɛ́ énɛ́ lɛ́ ɖésúnɔ wɛ ka ɖo kúnnu ɖe dó wǔtu ce wɛ. 40 Nǔ ɖo mɔ̌ có, mi ba ná wá gɔ̌n ce, bo ná dó mɔ gbɛ ǎ. 41 Un nɔ yí gbe nú susu e nɔ gosín gbɛtɔ́ lɛ́ gɔ́n é ǎ. 42 Amɔ̌, midɛɛ lɛ́ ɔ, un tuun ganjí ɖɔ wǎn yí nú Mawu kún ɖo ayi mitɔn mɛ ó. 43 Tɔ́ ce nyíkɔ mɛ wɛ un wá dó, loɔ, mi yí mì ǎ. Ényí mɛ ɖěvo wɛ ka wá ɖo nyǐkɔ éɖésúnɔ tɔn mɛ ɔ, mi ná yí mɛ énɛ́. 44 Ðó mi nɔ yí gbe nú susu e mi nɔ xɔ nú miɖée lɛ́ é, bo ma nɔ ba susu e nɔ gosín Mawu ɖokpó géé ɔ gɔ́n ǎ é wútu ɔ, nɛ̌ mi ka sixú ɖi nǔ gbɔn? 45 Mi ma lin ɖɔ un ná dó hwɛ mi ɖo Tɔ́ ɔ gɔ́n ó; mɛɖé tíin bo ɖo hwɛ dó mi wɛ. Mɔyízi, mɛ e jí mi sɔ́ nukúnɖíɖó mitɔn jínjɔ́n é wɛ. 46 Nǔgbó ɔ, ényí mi ko ɖi nǔ nú Mɔyízi wɛ ɔ, mi ná ko ɖi nǔ nú mì, ɖó é wlán nǔ dó wǔ ce. 47 Amɔ̌, ényí mi ma ɖi nǔ nú nǔwlánwlán tɔn lɛ́ ǎ ɔ, nɛ̌ mi ka ná ɖi nǔ nú xó e un nɔ ɖɔ lɛ́ é gbɔn?”

6 Énɛ́ gúdo ɔ, Jezu d’asá Galilée xu ɔ, ée è nɔ lɛ́ ylɔ́ ɖɔ Tibɛliadi xu é, bo jɛ akpá ɖě ɔ xwé. 2 Ahwan ɖaxó ɖé nɔ ɖo xwixwedó è wɛ, ɖó yě mɔ nǔjíwǔ e bló wɛ é ɖe bo ɖo azɔn gbɔ nú mɛ lɛ́ wɛ é. 3 Énɛ́ ɔ, Jezu xá só ɖé jí bo jínjɔ́n fínɛ́, é kpó ahwanvú tɔn lɛ́ kpó. 4 Dǐndínwáyixwe Jwifu lɛ́ tɔn ka ko sɛkpɔ́. 5 Ée Jezu jlɔ́ kɔ bo mɔ ɖɔ ahwan ɖaxó ɖé ja gɔ̌n émítɔn é ɔ, é ɖɔ nú Filípu ɖɔ: “Fítɛ́ mǐ ka ná xɔ wɔ̌xúxú ɖe nú mɛ élɔ́ lɛ́ bónú yě ná ɖu?” 6 Amɔ̌, Jezu ɖɔ mɔ̌ bo ná dó tɛ́n ɛ kpɔ́n wɛ, ɖó é tuun nǔ e bló gbé é ja é. 7 Filípu ka yí gbe n’i ɖɔ: “Ényí mǐ ná bo xɔ wɔ̌xúxú deníye* 200 nu, bo tlɛ má fínfɛ́n tɔn nú yě mɛ ɖokpó ɖokpó ɔ, é ná kpé ǎ.” 8 Ahwanvú ɖěvo e nɔ nyí Andlé, bo nyí Sinmɔ́ɔ Piyɛ́ɛ sín nɔví é ɖɔ nú Jezu ɖɔ: 9 “Nyaví ɖokpó ɖo fí, bo ɖó wɔ̌xúxú e è sɔ́ ɔ́ji dó ɖa ná é atɔ́ɔ́n kpó hweví kpɛví kpɛví we kpó. Amɔ̌, fítɛ́ é ka ná jɛ nú mɛ tobutóbú énɛ́ lɛ́?”

10 Jezu ɖɔ: “Mi ɖɔ nú mɛ lɛ́ ɖɔ yě ní jínjɔ́n ayǐ.” Ðó gběhan wlɛ́wlɛ́ sukpɔ́ ɖo fínɛ́ wútu ɔ, yě jǐnjɔ́n fínɛ́. Súnnu 5 000 mɔ̌ wɛ ɖo ahwan ɔ mɛ. 11 Jezu sɔ́ wɔ̌xúxú lɛ́, bɔ ée é dó kú nú Mawu gúdo é ɔ, é má nú mɛ ɖěɖěe ɖo ayǐjínjɔ́n ɖo fínɛ́ lɛ́ é; é wa nǔ ɖokpó ɔ nú hweví kpɛví kpɛví lɛ́, bɔ yě ɖu nǔ b’ɛ jɛmɛ nú yě. 12 Amɔ̌, ée yě ɖu nǔ bo gɔ́ xo gúdo é ɔ, é ɖɔ nú ahwanvú tɔn lɛ́ ɖɔ: “Mi xo wɔ̌xúxú fínfɛ́n e kpo lɛ́ é kplé, bónú ɖěbǔ ní ma gú mɛ ó.” 13 Énɛ́ ɔ, wɔ̌xúxú atɔ́ɔ́n e è sɔ́ ɔ́ji dó ɖa ná bɔ mɛ lɛ́ ɖu é ɔ, yě xo fínfɛ́n tɔn e kpo ɖ’é jí lɛ́ é kplé, bɔ xasun 12 gɔ́.

14 Hwenu e mɛ lɛ́ mɔ nǔjíwǔ e é bló é ɔ, yě jɛ ɖiɖɔ jí ɖɔ: “Gbeyíɖɔ e ɖó ná wá gbɛ ɔ mɛ é ɖíe nǔgbó nǔgbó.” 15 Énɛ́ ɔ, ɖó Jezu tuun ɖɔ yě ná wá sɔ́ émí gǎnnugǎnnu dó ɖó axɔ́sú wútu ɔ, é gosín fínɛ́ bo tunta sókan ɔ mɛ éɖokpónɔ.

16 Ée é jɛ gbadanu é ɔ, ahwanvú tɔn lɛ́ jɛ te yi xu ɔ tó. 17 Yě byɔ́ tɔjíhún mɛ bo tunta Kafaanawúmu. Din ɔ, zǎn ko kú bɔ Jezu ka ko wá gɔ̌n yětɔn ǎ. 18 Gɔ́ ná ɔ, xu ɔ ɖo adǎn jí, ɖó jɔhɔn ɖaxó ɖo nyinyi wɛ wútu. 19 É ɖo mɔ̌ có, ée yě ko kun hǔn nú kilomɛ́tlu atɔ́ɔ́n alǒ ayizɛ́n* mɔ̌ é ɔ, yě mɔ Jezu bɔ é ɖo zɔnlin ɖi wɛ ɖo xu ɔ jí, bo ɖo tɔjíhún ɔ sɛkpɔ́ wɛ, bɔ xɛsi jɛ yě jí. 20 Amɔ̌, é ɖɔ nú yě ɖɔ: “Nyɛ wɛ; mi ma ɖi xɛsi ó!” 21 Énɛ́ ɔ, yě jló ná sɔ́ ɛ dó tɔjíhún ɔ mɛ; tlóló ɔ, tɔjíhún ɔ wá xu ɔ tó, ɖo to e mɛ yě tunta é.

22 Ayǐhɔ́ngbe tɔn ɔ, ahwan e cí xu ɔ sín agě ɖě ɔ jí é mɔ ɖɔ tɔjíhún ɖěvo kún sɔ́ ɖo fínɛ́ zɛ kpɛví ɖokpó wú ó, yě lɛ́vɔ́ mɔ ɖɔ Jezu kún byɔ́ tɔjíhún mɛ kpó ahwanvú tɔn lɛ́ kpó ó, é nyɔ́ wa ɔ, ahwanvú tɔn lɛ́ ɖokpónɔ wɛ yi. 23 É ɖo mɔ̌ có, tɔjíhún e gosín Tibɛliadi lɛ́ é wá fí e Aklúnɔ zé wɔ̌xúxú bo dó kú nú Mawu bɔ ye ɖu ɖe é kpá. 24 Ée ahwan ɔ mɔ ɖɔ Jezu kpó ahwanvú tɔn lɛ́ kpó ɖě kún ɖo fínɛ́ ó é ɔ, yě byɔ́ tɔjíhún yětɔn lɛ́ mɛ, bo wá Kafaanawúmu Jezu ba gbé.

25 Ée yě mɔ ɛ ɖo xu ɔ gúdo é ɔ, yě ɖɔ n’i ɖɔ: “Mɛ̌si,* hwetɛ́nu a ka wá fí?” 26 Jezu yí gbe nú yě ɖɔ: “Má ɖɔ nǔgbó nú mi, nǔjíwǔ e mi mɔ lɛ́ é wɛ zɔ́n bɔ mi ɖo biba mì wɛ ǎ, é nyɔ́ wa ɔ, wɔ̌xúxú e mi ɖu b’ɛ jɛmɛ nú mi é wɛ zɔ́n. 27 Mi ma jɛ tagba dó nǔɖuɖu e nɔ gblé é tamɛ ó, loɔ, mi jɛ tagba dó nǔɖuɖu e nɔ nɔ ayǐ bo nɔ kplá mɛ yi gbɛ mavɔmavɔ mɛ é tamɛ, nǔɖuɖu énɛ́ wɛ Gbɛtɔ́ví ɔ ná ná mi; ɖó éyɛ́ wɛ Tɔ́ ɔ, Mawu ɖésúnɔ ko dó zǒgbe jí ɖɔ émí yí gbe ná.”

28 Énɛ́ ɔ, yě ɖɔ n’i ɖɔ: “Étɛ́ mǐ ka ná wa b’ɛ ná nyí ɖɔ mǐ wa Mawu sín azɔ̌ lɛ́?” 29 Jezu yí gbe nú yě ɖɔ: “Mawu sín azɔ̌ ɔ wɛ nyí ɖɔ, mi ní ɖe xlɛ́ ɖɔ émí ɖi nǔ nú mɛ e é sɛ́ dó é.” 30 Bɔ yě ɖɔ n’i ɖɔ: “Nǔjíwǔ tɛ́ a ka ná bló bɔ mǐ ná mɔ bo ɖi nǔ nú we? Étɛ́ a ka ná wa? 31 Tɔ́gbó mǐtɔn lɛ́ ɖu mǎna ɖo gbětótló mɛ, lěe è ko wlán gbɔn é. É wɛ nyí ɖɔ: ‘É ná yě wɔ̌xúxú e gosín jǐxwé é, bɔ yě ɖu.’” 32 Jezu ka ɖɔ nú yě ɖɔ: “Má ɖɔ nǔgbó nú mi, Mɔyízi wɛ ná mi wɔ̌xúxú e gosín jǐxwé é ǎ, loɔ, Tɔ́ ce wɛ ná mi wɔ̌xúxú jɔ wɔ̌xúxú e gosín jǐxwé é. 33 Ðó wɔ̌xúxú Mawu tɔn ɔ wɛ nyí éé gosín jǐxwé bo nɔ ná gbɛ gbɛtɔ́ lɛ́* é.” 34 Énɛ́ ɔ, yě ɖɔ n’i ɖɔ: “Aklúnɔ, nɔ ná mǐ wɔ̌xúxú énɛ́ hwebǐnu.”

35 Jezu ɖɔ nú yě ɖɔ: “Nyɛ wɛ nyí wɔ̌xúxú e nɔ ná gbɛ mɛ é. Mɛ ɖěbǔ e wá gɔ̌n ce é ɔ, xovɛ́ ná sin i kpɔ́n ǎ; mɛ ɖěbǔ e ɖe xlɛ́ ɖɔ émí ɖi nǔ nú mì é ɔ, kɔ ná xú i kpɔ́n ǎ. 36 Amɔ̌, lěe un ko ɖɔ nú mi gbɔn é ɔ, mi tlɛ mɔ mì có, mi ɖi nǔ ǎ. 37 Mɛ e Tɔ́ ɔ ná mì lɛ́ é bǐ ná wá gɔ̌n ce, un ka ná nya mɛ e wá gɔ̌n ce é gbeɖé ǎ; 38 ɖó un jɛ te sín jǐxwé bo ná wa jlǒ nyiɖésúnɔ tɔn ǎ, loɔ, bo ná wa jlǒ mɛ e sɛ́ mì dó é tɔn. 39 Jlǒ mɛ e sɛ́ mì dó é tɔn wɛ nyí ɖɔ nyi ní ma hɛn mɛ e é ná mì lɛ́ é ɖě bú ó, loɔ, nyi ní fɔ́n yě sín kú ɖo azǎn gǔdo gúdo tɔn ɔ gbe. 40 Ðó jlǒ Tɔ́ ce tɔn wɛ nyí ɖɔ mɛ ɖěbǔ e mɔ nǔ jɛ Vǐ ɔ wú bo ɖe xlɛ́ ɖɔ émí ɖi nǔ n’i é ní mɔ gbɛ mavɔmavɔ, bɔ un ná fɔ́n ɛ sín kú ɖo azǎn gǔdo gúdo tɔn ɔ gbe.”

41 Énɛ́ gúdo ɔ, Jwifu lɛ́ jɛ nǔ húnhún ɖɔ dó wǔtu tɔn jí, ɖó é ɖɔ: “Nyɛ wɛ nyí wɔ̌xúxú e jɛ te sín jǐxwé é.” 42 Yě jɛ ɖiɖɔ jí ɖɔ: “Jezu e nyí Jozɛ́fu ví, bɔ mǐ tuun tɔ́ tɔn kpó nɔ tɔn kpó é nɛ́ ǎ cé? Nɛ̌ é ka nyí gbɔn bɔ é ɖɔ din ɖɔ: ‘Un jɛ te sín jǐxwé’?” 43 Jezu yí gbe nú yě ɖɔ: “Mi ma sɔ́ húnhún nǔ ɖɔ ɖo miɖée tɛ́ntin ɖě ó. 44 Ényí Tɔ́ e sɛ́ mì dó é ma dɔn mɛɖé ǎ ɔ, mɛ ɔ sixú wá gɔ̌n ce ǎ; bɔ un ná fɔ́n mɛ ɔ sín kú ɖo azǎn gǔdo gúdo tɔn ɔ gbe. 45 Gbeyíɖɔ lɛ́ wlán ɖɔ: ‘Jexóva* ná kplɔ́n nǔ yě bǐ.’ Mɛ ɖěbǔ e ɖótó Tɔ́ ɔ bo kplɔ́n nǔ é nɔ wá gɔ̌n ce. 46 É nyí ɖɔ mɛɖé ko mɔ Tɔ́ ɔ kpɔ́n wɛ ǎ; mɛ e gosín Mawu gɔ́n é kɛ́ɖɛ́ wɛ nyí mɛ e mɔ Tɔ́ ɔ kpɔ́n é. 47 Má ɖɔ nǔgbó nú mi, mɛ ɖěbǔ e ɖi nǔ é ná mɔ gbɛ mavɔmavɔ.

48 “Nyɛ wɛ nyí wɔ̌xúxú e nɔ ná gbɛ mɛ é. 49 Tɔ́gbó mitɔn lɛ́ ɖu mǎna ɖo gbětótló mɛ có, yě kú. 50 Amɔ̌, mɛ ɖěbǔ e ɖu wɔ̌xúxú e jɛ te sín jǐxwé é ná kú ǎ. 51 Nyɛ wɛ nyí wɔ̌xúxú énɛ́ e nɔ ná gbɛ mɛ bo gosín jǐxwé é. Ényí mɛ ɖěbǔ ɖu wɔ̌xúxú énɛ́ ɔ, é ná nɔ gbɛ káká sɔ́yi. Gɔ́ ná ɔ, wɔ̌xúxú e un ná ná é wɛ nyí agbaza ce, ée un ná sɔ́ jó dó gbɛ gbɛtɔ́ lɛ́* tɔn tamɛ é.”

52 Jwifu lɛ́ ka jɛ nǔ dɔn xá yěɖée lɛ́ jí, bo nɔ ɖɔ: “Nɛ̌ nya élɔ́ ka sixú ná mǐ agbaza tɔn, bónú mǐ ná ɖu gbɔn?” 53 Énɛ́ wú ɔ, Jezu ɖɔ nú yě ɖɔ: “Má ɖɔ nǔgbó nú mi, ényí mi ma ɖu Gbɛtɔ́ví ɔ sín agbaza bo nu hun tɔn ǎ ɔ, mi ná mɔ gbɛ ǎ.* 54 Mɛ ɖěbǔ e ɖu agbaza ce bo nu hun ce é ná mɔ gbɛ mavɔmavɔ, bɔ un ná fɔ́n ɛ sín kú ɖo azǎn gǔdo gúdo tɔn ɔ gbe; 55 ɖó agbaza ce wɛ nyí nǔɖuɖu adodwé ɔ, bɔ hun ce nyí nǔ nunu adodwé ɔ. 56 Mɛ ɖěbǔ e ɖu agbaza ce bo nu hun ce é ɖo bǔ xá mì, bɔ nyi lɔ ɖo bǔ xá ɛ. 57 Un ɖo gbɛ, ɖó Tɔ́ e ɖo gbɛ tɛgbɛ bo sɛ́ mì dó é wú. Mɔ̌ ɖokpó ɔ, mɛ e ɖu agbaza ce é lɔ ná nɔ gbɛ, ɖó nyɛ wú. 58 Wɔ̌xúxú e gosín jǐxwé é ɖíe. É cí wɔ̌xúxú e tɔ́gbó mitɔn lɛ́ ɖu, cóbó ka kú é ɖɔhun ǎ. Mɛ ɖěbǔ e ɖu wɔ̌xúxú élɔ́ é ná nɔ gbɛ káká sɔ́yi.” 59 Hwenu e é ɖo nǔ kplɔ́n mɛ wɛ ɖo kplɔ́ngbasá ɖé* ɖo Kafaanawúmu é wɛ é ɖɔ xó énɛ́ lɛ́.

60 Ée ahwanvú tɔn lɛ́ se xó énɛ́ é ɔ, yě mɛ gěgé ɖɔ: “Xó énɛ́ syɛ́n dódó; mɛ̌ ka sixú ɖótó?” 61 Amɔ̌, ɖó Jezu tuun ɖɔ ahwanvú émítɔn lɛ́ ɖo nǔ húnhún ɖɔ dó xó énɛ́ wú wɛ wútu ɔ, é ɖɔ nú yě ɖɔ: “Xó énɛ́ nyí afɔklɛ́nnú nú mi wɛ a? 62 Ényí mi ka wá mɔ Gbɛtɔ́ví ɔ, bɔ é ɖo jǐ yi wɛ xwe fí e é ɖe ɖ’ayǐ é ɔ, étɛ́ ka ná jɛ lo? 63 Gbigbɔ mímɛ́ wɛ nɔ ná gbɛ; gǎndídó gbɛtɔ́ tɔn* ka nyí nǔɖéwanú ǎ. Gbigbɔ mímɛ́ wɛ nyí xó e un ɖɔ nú mi lɛ́ é sín jɔtɛn, bɔ xó énɛ́ lɛ́ nɔ ná gbɛ mɛ. 64 Amɔ̌, mɛɖé lɛ́ ɖo mi mɛ bo ɖi nǔ ǎ.” Jezu ɖɔ mɔ̌, ɖó sín bǐbɛ́mɛ wɛ é ko tuun mɛ e ma ɖi nǔ ǎ lɛ́ é kpó mɛ e ná sa ɛ é kpó. 65 É lɛ́ ɖɔ: “Énɛ́ wɛ zɔ́n bɔ un ɖɔ nú mi ɖɔ, ényí Tɔ́ ɔ ma ná gbe mɛɖé ǎ ɔ, é kún sixú wá gɔ̌n cé ó.”

66 É sín énɛ́ wú bɔ ahwanvú tɔn lɛ́ gěgé lɛ́ kɔ yi nǔ e ɖo gǔdo lɛ́ é kɔn, bo sɔ́ nɔ zɔn xá ɛ ɖě ǎ. 67 Énɛ́ wú ɔ, Jezu ɖɔ nú mɛsɛ́dó 12 lɛ́ ɖɔ: “Mi lɔ jló ná yi ǎ cé?” 68 Sinmɔ́ɔ Piyɛ́ɛ yí gbe n’i ɖɔ: “Aklúnɔ, mɛ̌ gɔ́n mǐ ka ná yi? Xó e nɔ ná gbɛ mavɔmavɔ mɛ é wɛ ɖo nu towe mɛ. 69 Mǐ ɖi nǔ bo wá tuun ɖɔ hwi wɛ nyí Mɛ mímɛ́ Mawu tɔn ɔ.” 70 Jezu yí gbe nú yě ɖɔ: “Nyɛ wɛ cyán mi mɛ 12 lɛ́, kabǐ? É ɖo mɔ̌ có, mɛ ɖokpó ɖo mi mɛ bo nyí jidómɛtɔ́.”* 71 Nǔgbó ɔ, Judási, éé nyí Sinmɔ́ɔ Isikaliɔ́ti ví é xó ɖɔ wɛ é ɖe, ɖó é ɖo mɛsɛ́dó 12 lɛ́ mɛ có, é wɛ ɖo nǎ sa ɛ wɛ.

7 Énɛ́ gúdo ɔ, Jezu nɔ ɖo Galilée gbɔn wɛ.* É jló ná wa mɔ̌ ɖo Judée ǎ, ɖó Jwifugán lɛ́ ɖo biba wɛ bo ná hu i. 2 Amɔ̌, Azavaxwe Jwifu lɛ́ tɔn ko sɛkpɔ́. 3 Énɛ́ wú ɔ, nɔví tɔn súnnu lɛ́ ɖɔ n’i ɖɔ: “Gosín fí bo yi Judée, bónú ahwanvú towe lɛ́ lɔmɔ̌ ní dó sixú mɔ nǔ e wa wɛ a ɖe lɛ́ é. 4 Ðó mɛ e ba ɖɔ è ní tuun émí ɖo agbawungba é ɖě nɔ wa nǔ ɖěbǔ ɖo nǔglɔ́ ǎ. Ðó a ɖo nǔ énɛ́ lɛ́ wa wɛ wútu ɔ, ɖe hwiɖée xlɛ́ gbɛ ɔ.” 5 Nǔgbó ɔ, nɔví tɔn lɛ́ ɖe xlɛ́ ɖɔ émí ɖi nǔ n’i ǎ. 6 Jezu ka ɖɔ nú yě ɖɔ: “Hwe ɔ nu ko su nú mì ǎ, amɔ̌ midɛɛ lɛ́ ɔ, hwelɛ́bǐnu wɛ nyɔ́ nú mi. 7 Gbɛ ɔ ɖó hwɛjijɔ ɖěbǔ bo ná gbɛ́ wǎn nú midɛɛ lɛ́ ǎ, amɔ̌, é gbɛ́ wǎn nú nyɛ, ɖó un nɔ ɖe kúnnu dó wǔ tɔn ɖɔ nǔwiwa tɔn lɛ́ nylá. 8 Midɛɛ lɛ́ ní yi xwe ɔ domɛ; nyɛ ko xweyǐgbe do tɔn mɛ ǎ, ɖó hwe ɔ nu ko su nú mì bǐ mlɛ́mlɛ́ ǎ.” 9 Bɔ ée é ɖɔ xó énɛ́ lɛ́ nú yě gúdo é ɔ, é cí Galilée.

10 Amɔ̌, ée nɔví tɔn lɛ́ ɖidó xwe ɔ domɛ gúdo é ɔ, é lɔmɔ̌ ɖidó do tɔn mɛ, ɖo nǔglɔ́. 11 Énɛ́ wú ɔ, Jwifu lɛ́ jɛ biba ɛ jí ɖo xwe ɔ tɛnmɛ, bo nɔ ɖɔ: “Fítɛ́ nya énɛ́ ka ɖe?” 12 Bɔ mɛ gěgé sɔ́ gbe dó do, bo nɔ ɖo xó ɖɔ dó wǔ tɔn wɛ ɖo ahwan ɔ mɛ. Mɛɖé lɛ́ nɔ ɖɔ: “Mɛ ɖagbe wɛ n’i.” Mɛ ɖěvo lɛ́ nɔ ɖɔ: “É nyí mɛ ɖagbe ɖě ǎ. Ahwan ɔ flú wɛ é ɖe.” 13 Mɛ ɖěbǔ ka nɔ ɖɔ xó tɔn ɖo agbawungba ǎ, ɖó yě ɖo xɛsi ɖi nú Jwifugán lɛ́ wɛ.

14 Ée è ko ɖu xwe ɔ nú azǎn ɛnɛ mɔ̌ gúdo é ɔ, Jezu byɔ́ tɛ́npli ɔ mɛ bo jɛ nǔ kplɔ́n mɛ jí. 15 É kpácá Jwifugán lɛ́, bɔ yě ɖɔ: “Nya élɔ́ yi wěmaxɔmɛ* ǎ, bɔ nɛ̌ é ka wa gbɔn bo tuun Nǔwlánwlán mímɛ́ lɛ́* sɔmɔ̌?” 16 Jezu ka yí gbe nú yě ɖɔ: “Nǔ e un nɔ kplɔ́n mɛ lɛ́ é nyí nyiɖésúnɔ tɔn ǎ, loɔ, mɛ e sɛ́ mì dó é tɔn wɛ. 17 Ényí mɛ ɖěbǔ ba ná wa jlǒ Mawu tɔn ɔ, nú Mawu gɔ́n wɛ nǔkplɔ́nmɛ ce lɛ́ gosín, alǒ nú linlin nyiɖésúnɔ tɔn lɛ́ wɛ un nɔ ɖɔ ɔ, mɛ ɔ ná tuun. 18 Mɛ ɖěbǔ e nɔ ɖɔ linlin éɖésúnɔ tɔn lɛ́ é ɔ, susu éɖésúnɔ tɔn ba wɛ é ɖe; amɔ̌, mɛ ɖěbǔ e nɔ ba susu mɛ e sɛ́ ɛ dó é tɔn é ɔ, nǔgbó wɛ mɛ énɛ́ nɔ ɖɔ, bo ka nɔ lɛ́ wa nǔ agɔ ɖěbǔ ǎ. 19 Mɔyízi ná mi Sɛ́n ɔ, kabǐ? Mi mɛ ɖěbǔ ka nɔ se tónú nú Sɛ́n ɔ ǎ. Étɛ́wú mi ka ɖo biba ná hu mì wɛ?” 20 Ahwan ɔ yí gbe ɖɔ: “Awǒvi ɖé wɛ ɖo jǐ towe. Mɛ̌ ka ɖo biba ná hu we wɛ?” 21 Jezu ka yí gbe nú yě ɖɔ: “Nǔ ɖokpó jɛ́n un wa, bɔ é kpácá mi bǐ. 22 Mi bo lin tamɛ dó nǔ élɔ́ jí: Mɔyízi ná mi adagbigbosɛ́n ɔ (é ka nyí ɖɔ Mɔyízi gɔ́n wɛ é gosín ǎ, loɔ, tɔ́gbó mitɔn lɛ́ gɔ́n wɛ é gosín) bɔ mi tlɛ nɔ gbo ada nú mɛ ɖo gbɔjɛzángbe. 23 Ényí mi nɔ gbo ada nú mɛ, é tlɛ nyí ɖo gbɔjɛzángbe, bo ná dó nyi Mɔyízisɛ́n ɔ ɔ, aniwú mi ka sin xomɛ dó mì sɔmɔ̌, ɖó azɔn e un gbɔ nú nya ɖé bǐ mlɛ́mlɛ́ ɖo gbɔjɛzángbe é wú? 24 Mi ma sɔ́ nɔ kpɔ́n dó lěe è ɖe ɖo wěxo é wú dó ɖɔ hwɛ xá mɛ ɖě ó, loɔ, mi ní nɔ ɖɔ hwɛ jlɔ́jlɔ́.”

25 Énɛ́ gúdo ɔ, mɛ e nɔ nɔ Jeluzalɛ́mu é ɖé lɛ́ jɛ ɖiɖɔ jí ɖɔ: “Nya e ba wɛ yě ɖe bo ná hu é nɛ́ ǎ cé? 26 Mi kpɔ́n! É ɖo xó ɖɔ wɛ ɖo agbawungba, yě ka ɖo nǔ ɖě ɖɔ n’i wɛ ǎ. Kabǐ gǎn lɛ́ wá mɔ nǔ jɛ wú céɖécéɖé ɖɔ nya énɛ́ wɛ nyí Klísu ɔ ka wɛ a? 27 É ɖo mɔ̌ có, mǐ tuun fí e nu nya énɛ́ nyí é; mɛ ɖěbǔ ma ka ná tuun fí e nu Klísu ɔ nyí é, hwenu e é ná wá é nɛ́.” 28 Énɛ́ gúdo ɔ, ée Jezu ɖo nǔ kplɔ́n mɛ wɛ ɖo tɛ́npli ɔ mɛ é ɔ, é sú xó bo ɖɔ: “Mi tuun mì, bo lɛ́ tuun fí e nu un nyí é. Un wá gbeta ɔ kɔn bo wá nyiɖésúnɔ ǎ, loɔ, mɛ e sɛ́ mì dó é tíin nǔgbó; mi ka tuun i ǎ. 29 Un tuun i, ɖó afɔsɔ́ɖótetɔ́ tɔn wɛ nú mì, bɔ Éyɛ́ wɛ sɛ́ mì dó.” 30 Énɛ́ ɔ, yě jɛ biba jí bo ná wlí i, amɔ̌, alɔ yě ɖě tɔn jɛ wǔtu tɔn ǎ, ɖó gan tɔn ko xo ǎ. 31 Mɛ e ɖo ahwan ɔ mɛ lɛ́ é gěgé ka ɖi nǔ n’i, bo nɔ ɖɔ: “Klísu ɔ wá ɔ, é ná bló nǔjíwǔ gěgé. Nǔ e nya élɔ́ wa é pɛ́ɛ́ nɛ́ ǎ cé?”

32 Falizyɛn lɛ́ se bɔ ahwan ɔ sɔ́ gbe dó do, bo ɖo xó énɛ́ lɛ́ ɖɔ dó Jezu wú wɛ. Énɛ́ ɔ, vɔ̌sánúxwlémawutɔ́gán lɛ́ kpó Falizyɛn lɛ́ kpó sɛ́ sɔ́ja lɛ́ dó, bónú yě ná wlí i.* 33 Jezu ɖɔ nú togun ɔ ɖɔ: “Un ná lɛ́ nɔ kpɔ́ xá mi nú hwenu kpɛɖé cóbó ná yi Mɛ e sɛ́ mì dó é gɔ́n. 34 Mi ná ba mì, loɔ, mi ná mɔ mì ǎ, bɔ fí e un ná ɖe é ɔ, mi ná sixú wá ǎ.” 35 Énɛ́ wú ɔ, Jwifugán lɛ́ ɖɔ ɖo yěɖée lɛ́ tɛ́ntin ɖɔ: “Fítɛ́ lin ná yi wɛ nya énɛ́ ka ɖe, bɔ mǐ ma sɔ́ ná mɔ ɛ ǎ? Jwifu e gba kpé Glɛ̌kinu lɛ́ mɛ lɛ́ é gɔ́n lin ná yi wɛ é ka ɖe, bo ná kplɔ́n nǔ Glɛ̌kinu lɛ́ a? 36 Étɛ́ ɖɔ gbé é ka ja bo ɖɔ: ‘Mi ná ba mì, loɔ, mi ná mɔ mì ǎ, bɔ fí e un ná ɖe é ɔ, mi ná sixú wá ǎ’?”

37 Ðo azǎn gǔdo tɔn xwe ɔ tɔn, éé nyí azǎn tají hú gǎn ɔ é gbe ɔ, Jezu sí te bo sú xó ɖɔ: “Ényí kɔ xú mɛ ɖěbǔ hǔn, ní wá gɔ̌n ce, bo ná nu sin. 38 Mɛ ɖěbǔ e ɖi nǔ nú mì é ɔ, lěe nǔwlánwlán mímɛ́ ɔ ɖɔ gbɔn é ɔ, ‘sin e nɔ ná gbɛ mɛ é ná nɔ sa tɔ sín ayi gɔngɔn tɔn mɛ.’” 39 Gbigbɔ mímɛ́ ɔ, ée mɛ e ɖi nǔ n’i lɛ́ é ɖo nǎ mɔ yí wɛ é wú ɖɔ xó dó wɛ é ɖe bo ɖɔ mɔ̌. Yě ko mɔ yí ǎ, ɖó è ko sɔ́ Jezu su ǎ. 40 Mɛ e ɖo ahwan ɔ mɛ bo se xó énɛ́ lɛ́ é ɖé lɛ́ jɛ ɖiɖɔ jí ɖɔ: “Nya élɔ́ wɛ nyí Gbeyíɖɔ ɔ nǔgbó.” 41 Mɛ ɖěvo lɛ́ nɔ ɖɔ: “Nya élɔ́ wɛ nyí Klísu ɔ.” Mɛɖé lɛ́ ka nɔ ɖɔ: “Klísu ɔ ɖo Galilée ná tɔ́n sín wɛ ǎ, kabǐ? 42 Nǔwlánwlán mímɛ́ ɔ ɖɔ ɖɔ Klísu ɔ ná gosín kúnkan Davídi tɔn mɛ, bo ná nyí Bɛteleyɛ́mu, gletoxo Davídi tɔn mɛ nu ǎ cé?” 43 Énɛ́ wú ɔ, ahwan ɔ ɖó linlin vovo lɛ́ dó wǔtu tɔn. 44 Yě mɛ ɖé lɛ́ ka jló ná wlí i,* amɔ̌, yě mɛ ɖě sín alɔ jɛ wǔ tɔn ǎ.

45 Énɛ́ ɔ, sɔ́ja lɛ́ lɛ́ kɔ yi vɔ̌sánúxwlémawutɔ́gán lɛ́ kpó Falizyɛn lɛ́ kpó gɔ́n. Yě kanbyɔ́ sɔ́ja lɛ́ ɖɔ: “Étɛ́wú mi ma ka kplá ɛ wá ǎ?” 46 Sɔ́ja lɛ́ yí gbe ɖɔ: “Mɛ ɖěbǔ ko ɖɔ xó gbɔn mɔ̌ kpɔ́n ǎ.” 47 Falizyɛn lɛ́ ka yí gbe nú yě ɖɔ: “É ko flú mi lɔmɔ̌ wɛ a? 48 Gǎn lɛ́ alǒ Falizyɛn lɛ́ ɖě ɖi nǔ n’i ǎ, kabǐ? 49 Amɔ̌, ahwan énɛ́ e ma tuun Sɛ́n ɔ ǎ é ɔ, mɛ ɖěɖěe è dónu lɛ́ é wɛ nú yě.” 50 Nikodɛ́mu e ko wá Jezu gɔ́n ɖ’ayǐ, bo ɖo Falizyɛn lɛ́ mɛ é ka ɖɔ nú yě ɖɔ: 51 “Sɔgbe xá Sɛ́n mǐtɔn ɔ, ényí è ma to ɖótó mɛɖé hwɛ̌, bo tuun nǔ e wa wɛ é ɖe é ǎ ɔ, è ɖó ná ɖó hwɛ n’i ǎ, kabǐ?” 52 Yě ka yí gbe n’i ɖɔ: “Galiléenu wɛ hwi lɔmɔ̌ nyí a? Kíjé Nǔwlánwlán mímɛ́ lɛ́. A ná mɔ ɖɔ gbeyíɖɔ ɖě kún ɖo Galilée ná tɔ́n sín wɛ ó.”*

8 12 Énɛ́ gúdo ɔ, Jezu lɛ́ ɖɔ nú yě ɖɔ: “Nyɛ wɛ nyí wěziza nú gbɛ ɔ. Mɛ ɖěbǔ e xwedó mì é ná ɖi zɔnlin ɖo ablu mɛ ɖo ali ɖěbǔ nu ǎ, loɔ, é ná nɔ wěziza e nɔ ná gbɛ mɛ é nu.” 13 Falizyɛn lɛ́ ɖɔ n’i ɖɔ: “A nɔ ɖe kúnnu nú hwiɖée; kúnnuɖiɖe towe nyí nǔgbó ǎ.” 14 Jezu ka yí gbe nú yě ɖɔ: “Ényí un na bo tlɛ nɔ ɖe kúnnu nú nyiɖée ɔ, kúnnuɖiɖe ce nyí nǔgbó, ɖó un tuun fí e un gosín é kpó fí e un xwe é kpó. Amɔ̌, midɛɛ lɛ́ tuun fí e un gosín é kpó fí e un xwe é kpó ǎ. 15 Midɛɛ lɛ́ ɔ, nǔ e ɖo wěxo ɔ wɛ mi nɔ kpɔ́n* dó ɖɔ hwɛ; nyɛ ka nɔ ɖɔ hwɛ xá mɛ ɖěbǔ ǎ. 16 Ényí un na bo tlɛ ɖɔ hwɛ ɔ, hwɛ jlɔ́jlɔ́ wɛ é nɔ nyí, ɖó un ɖo nyiɖokpó ǎ, loɔ, Tɔ́ e sɛ́ mì dó é ɖo kpɔ́ xá mì. 17 Gɔ́ ná ɔ, ɖo Sɛ́n miɖésúnɔ tɔn mɛ ɔ, è wlán ɖɔ: ‘Ényí mɛ we ɖe kúnnu nú nǔɖé hǔn, nǔgbó wɛ kúnnuɖiɖe yětɔn nyí.’ 18 Un nɔ ɖe kúnnu nú nyiɖée, bɔ Tɔ́ e sɛ́ mì dó é lɔ nɔ ɖe kúnnu nú mì.” 19 Énɛ́ ɔ, yě ɖɔ n’i ɖɔ: “Fítɛ́ Tɔ́ towe ka ɖe?” Jezu yí gbe ɖɔ: “Mi tuun mì ǎ, mi ka lɛ́ tuun Tɔ́ ce ǎ. Ényí mi tuun mì wɛ ɔ, mi ná ko tuun Tɔ́ ce lɔ.” 20 Fí e akwɛ́gbá lɛ́ ɖe é wɛ é ɖɔ xó énɛ́ lɛ́ ɖe, hwenu e é ɖo nǔ kplɔ́n mɛ wɛ ɖo tɛ́npli ɔ mɛ é. Mɛ ɖěbǔ ka wlí i ǎ, ɖó gan tɔn ko xo ǎ.

21 Jezu lɛ́ ɖɔ nú yě ɖɔ: “Un ɖo yiyi wɛ, bɔ mi ná ba mì. É ɖo mɔ̌ có, mi ná kú dó hwɛ mitɔn lɛ́ mɛ. Fí e yi wɛ un ɖe é ɔ, mi sixú wá ǎ.” 22 Énɛ́ ɔ, Jwifu lɛ́ jɛ ɖiɖɔ jí ɖɔ: “É ma ka ɖo éɖée ná hu wɛ nɛ́, kabǐ? Ðó é ɖɔ: ‘Fí e yi wɛ un ɖe é ɔ, mi sixú wá ǎ.’” 23 Jezu lɛ́ ɖɔ nú yě ɖɔ: “Midɛɛ lɛ́ ɔ, ayǐkúngban jí tɔn wɛ mi nyí; bɔ nyɛ ka nyí jǐxwé tɔn. Gbɛ élɔ́ tɔn wɛ mi nyí; nyɛ ka nyí gbɛ élɔ́ tɔn ǎ. 24 Énɛ́ wú wɛ un ɖɔ nú mi ɖɔ: Mi ná kú dó hwɛ mitɔn lɛ́ mɛ. Ðó ényí mi ma ɖi nǔ ɖɔ un nyí mɛ e un ɖɔ un nyí é ǎ ɔ, hwɛ mitɔn lɛ́ ná kpo ɖo kɔ nú mi bɔ mi ná kú.” 25 Énɛ́ wú ɔ, yě jɛ ɖiɖɔ n’i jí ɖɔ: “Mɛ̌ a ka nyí?” Jezu yí gbe nú yě ɖɔ: “Étɛ́wú un ka tlɛ ɖo xó ɖɔ nú mi wɛ lɔ? 26 Un ɖó nǔ gěgé bo ná ɖɔ dó mi wú, bɔ hwɛ gěgé ɖe bɔ un ná ɖɔ. Nǔgbó ɔ, Mɛ e sɛ́ mì dó é ɔ, nǔgbóɖɔtɔ́ wɛ, bɔ nǔ e un se ɖo gɔ̌n tɔn lɛ́ é ɖɔ wɛ un ɖe ɖo gbɛ ɔ mɛ.” 27 Yě mɔ nǔ jɛ wú ɖɔ Tɔ́ ɔ sín xó ɖɔ nú émí wɛ é ɖe ǎ. 28 Énɛ́ gúdo ɔ, Jezu ɖɔ: “Ényí mi ko sɔ́ Gbɛtɔ́ví ɔ ɖó jǐ gúdo ɔ, mi ná tuun ɖɔ un nyí mɛ e un ɖɔ un nyí é, bo kún nɔ sɔ́ jlǒ nyiɖésúnɔ tɔn dó wa nǔ ɖěbǔ ó; é nyɔ́ wa ɔ, nǔ e Tɔ́ ɔ kplɔ́n mì lɛ́ é wɛ un nɔ ɖɔ. 29 Mɛ e sɛ́ mì dó é ɖo kpɔ́ xá mì; é jó mì dó nyiɖokpónɔ ǎ, ɖó un nɔ wa nǔ e nɔ nyɔ́ nukún tɔn mɛ lɛ́ é hwebǐnu.” 30 Ée é ɖo xó énɛ́ lɛ́ ɖɔ wɛ é ɔ, mɛ gěgé ɖi nǔ n’i.

31 Énɛ́ gúdo ɔ, Jezu lɛ́ ɖɔ nú Jwifu e ɖi nǔ n’i lɛ́ é ɖɔ: “Ényí mi nɔ se tónú nú xó ce lɛ́ hǔn, mi nyí ahwanvú ce lɛ́ nǔgbó, 32 bɔ mi ná tuun nǔgbó ɔ, bɔ nǔgbó ɔ ná tún kan nú mi.” 33 Yě yí gbe n’i ɖɔ: “Ablaxámu ví wɛ mǐ nyí; mǐ nyí kannumɔ nú mɛ ɖěbǔ kpɔ́n ǎ. Nɛ̌ ka gbɔn lo bɔ a ɖɔ: ‘Mi ná jɛ miɖée sí’?” 34 Jezu yí gbe nú yě ɖɔ: “Má ɖɔ nǔgbó nú mi, mɛ e nɔ hu hwɛ é bǐ wɛ nyí kannumɔ nú hwɛhuhu. 35 Gɔ́ ná ɔ, kannumɔ nɔ nɔ xwégbe káká sɔ́yi ǎ; vǐ wɛ nɔ nɔ xwégbe káká sɔ́yi. 36 Énɛ́ wú ɔ, ényí Vǐ ɔ tún kan nú mi ɔ, mi ná jɛ miɖée sí nǔgbó. 37 Un tuun ɖɔ Ablaxámu ví wɛ mi nyí. Amɔ̌, mi ɖo biba ná hu mì wɛ, ɖó mi yí nǔkplɔ́nmɛ ce lɛ́ ǎ. 38 Nǔ e un mɔ hwenu e un ɖo Tɔ́ ce gɔ́n lɛ́ é wɛ un nɔ ɖɔ, amɔ̌ midɛɛ lɛ́ ɔ, nǔ e mi se ɖo tɔ́ mitɔn gɔ́n lɛ́ é wɛ mi nɔ wa.” 39 Yě yí gbe n’i ɖɔ: “Ablaxámu wɛ nyí tɔ́ mǐtɔn.” Jezu ɖɔ nú yě ɖɔ: “Ényí Ablaxámu ví jɛ́n mi nyí ɔ, mi ná ko nɔ wa nǔ Ablaxámu ɖɔhun. 40 Amɔ̌ din ɔ, nyɛ mɛ e ɖɔ nǔgbó e un se ɖo Mawu gɔ́n é nú mi é ɔ, mi ɖo biba ná hu mì wɛ. Ablaxámu ka wa nǔ gbɔn mɔ̌ ǎ. 41 Lěe tɔ́ mitɔn nɔ wa nǔ gbɔn é wa gbɔn wɛ mi ɖe.” Yě ɖɔ n’i ɖɔ: “Mǐ nyí agaví* ǎ; Tɔ́ ɖokpó wɛ mǐ ɖó, é wɛ nyí Mawu.”

42 Jezu ɖɔ nú yě ɖɔ: “Ényí Mawu jɛ́n nyí Tɔ́ mitɔn ɔ, mi ná ko yí wǎn nú mì, ɖó Mawu gɔ́n wɛ un gosín bo ɖo fí. Nyiɖésúnɔ wɛ wá gbeta ɔ kɔn bo wá ǎ, loɔ, Éyɛ́ wɛ sɛ́ mì dó. 43 Étɛ́wú mi ma ka mɔ nukúnnú jɛ nǔ e ɖɔ wɛ un ɖe é mɛ ǎ? Ðó mi nɔ ba ná ɖótó xó ce ǎ. 44 Awǒvi wɛ nyí tɔ́ mitɔn, bɔ mi nɔ ba ná wa jlǒ tɔ́ mitɔn tɔn lɛ́. Mɛhutɔ́ wɛ é nyí sín do, bɔ é lí dǒ ɖo nǔgbó ɔ mɛ ǎ, ɖó nǔgbó ɖo ayi tɔn mɛ ǎ. Ényí é ɖó adingban ɔ, é nɔ ɖó sɔgbe xá mɛ e é nyí é, ɖó adingbannɔ wɛ n’i, bɔ é wɛ lɛ́ dó adingban wá. 45 Amɔ̌ nyɛ ɔ, ɖó un ɖɔ nǔgbó nú mi wútu ɔ, mi ɖi nǔ nú mì ǎ. 46 Mɛ̌ ka ɖo mi mɛ bo sixú ɖe xlɛ́ ɖɔ un hu hwɛ? Ényí nǔgbó wɛ un nɔ ɖɔ ɔ, étɛ́wú mi ma ka ɖi nǔ nú mì ǎ lo? 47 Mɛ e nyí Mawu tɔn é nɔ ɖótó xó Mawu tɔn lɛ́. Énɛ́ wú wɛ mi ma nɔ ɖótó mì ǎ, ɖó mi nyí Mawu tɔn ǎ.”

48 Jwifu lɛ́ ka yí gbe n’i ɖɔ: “Ðɔ e mǐ ɖɔ ɖɔ: ‘Samalíinu wɛ nú we, bɔ awǒvi ɖé ɖo jǐ towe’ é ɔ, hwɛ mǐtɔn ma jɔ a?” 49 Jezu yí gbe ɖɔ: “Awǒvi ɖě ɖo jǐ ce ǎ, é nyɔ́ wa ɔ, Tɔ́ ce wɛ un nɔ wlí yɛ̌yi ná, bɔ midɛɛ lɛ́ ka nɔ dó hɛ̌n mì. 50 Amɔ̌, un ɖo susu ba nú nyiɖée wɛ ǎ; Mɛ ɖokpó wɛ ɖo biba nú mì wɛ, bo ɖo hwɛ ɖɔ wɛ. 51 Má ɖɔ nǔgbó nú mi, ényí mɛ ɖěbǔ xwedó xó ce ɔ, mɛ ɔ ná kú gbeɖé ǎ.” 52 Jwifu lɛ́ ɖɔ n’i ɖɔ: “Mǐ tuun din ɖɔ awǒvi ɖé ɖo jǐ towe. Ablaxámu ko kú, gbeyíɖɔ lɛ́ lɔ ko kú, bɔ a ka ɖɔ: ‘Ényí mɛ ɖěbǔ xwedó xó ce ɔ, mɛ ɔ ná kú gbeɖé ǎ.’ 53 A hú gǎn tɔ́ mǐtɔn Ablaxámu e kú é wɛ a? Gbeyíɖɔ lɛ́ lɔmɔ̌ kú. Mɛ̌ a ka lin ɖɔ émí nyí?” 54 Jezu yí gbe ɖɔ: “Ényí un xɔ susu nú nyiɖée ɔ, susu ce ná nyí nǔtí ǎ. Tɔ́ ce e mi nɔ ɖɔ ɖɔ é nyí Mawu mitɔn é wɛ nɔ xɔ susu nú mì. 55 É ɖo mɔ̌ có, mi tuun i ǎ, loɔ, nyɛ tuun i, bɔ ényí un ɖɔ ɖɔ un kún tuun i ó ɔ, un ná nyí adingbannɔ mi ɖɔhun. Amɔ̌, un tuun i bo ɖo xó tɔn xwedó wɛ. 56 Kpó awǎjijɛ ɖaxó kpó wɛ tɔ́ mitɔn Ablaxámu ɖó nukún, bo ná mɔ azǎn e gbe un ná wá é. É mɔ azǎn énɛ́ bo j’awǎ.” 57 Énɛ́ ɔ, Jwifu lɛ́ ɖɔ n’i ɖɔ: “A ko ɖó xwe 50 vɔ́vɔ́ ǎ, bo ka mɔ Ablaxámu a?” 58 Jezu ɖɔ nú yě ɖɔ: “Má ɖɔ nǔgbó nú mi, cóbónú Ablaxámu ná wá gbɛ ɔ, un ko tíin.” 59 Énɛ́ wú ɔ, yě fɔ awǐnnya bo ná nyi dó Jezu, amɔ̌, é hɔn bú, bo tɔ́n sín tɛ́npli ɔ mɛ.

9 Jezu wá xweyǐgbe, bo mɔ nya e è ji nukúntɔ́nnɔ tɔn é ɖé. 2 Ahwanvú tɔn lɛ́ kanbyɔ́ ɛ ɖɔ: “Mɛ̌si,* ɖo nya élɔ́ kpó mɛjitɔ́ tɔn lɛ́ kpó mɛ ɔ, mɛ̌ ka hu hwɛ bɔ è ji nukúntɔ́nnɔ tɔn?” 3 Jezu yí gbe ɖɔ: “Nya élɔ́ hu hwɛ ǎ, mɛjitɔ́ tɔn lɛ́ lɔ ka hu hwɛ ǎ, loɔ, nǔ nyí mɔ̌, bónú gbɛtɔ́ lɛ́ ní dó sixú mɔ nǔwiwa Mawu tɔn lɛ́ ɖo ninɔmɛ tɔn mɛ. 4 Mǐ ɖó ná wa azɔ̌ Mɛ e sɛ́ mì dó é tɔn lɛ́ hwenu e kéze kpo ɖo te é; zǎn ko ɖo nǎ kú wɛ bɔ mɛ ɖěbǔ ná sixú wa azɔ̌ ǎ. 5 Ényí un ɖo gbɛ ɔ mɛ jɛ́n wɛ ɔ, nyi wɛ nyí wěziza gbɛ ɔ tɔn.” 6 Ée é ɖɔ xó énɛ́ lɛ́ gúdo é ɔ, é tún atán dó kɔ́mɛ dó bló babá ná, bo sá dó nya ɔ sín nukún jí, 7 lobo ɖɔ n’i ɖɔ: “Yi fún nukúnmɛ ɖo sindo Silowée tɔn nu” (Silowée sín tínmɛ wɛ nyí “è sɛ́ dó”). Nya ɔ yi fún nukúnmɛ nǔgbó, bɔ ée é lɛ́ kɔ wá é ɔ, é ɖo nǔ mɔ wɛ.

8 Nɔzo tɔn lɛ́ kpó mɛ ɖěɖěe nɔ mɔ ɛ ɖ’ayǐ, bɔ é nɔ ɖo nǔ byɔ́ ɖu wɛ lɛ́ é kpó jɛ ɖiɖɔ jí ɖɔ: “Nya e nɔ ɖo ayǐjínjɔ́n bo nɔ ɖo nǔ byɔ́ ɖu wɛ é ɖíe ǎ cé?” 9 Mɛɖé lɛ́ ɖɔ: “Nya ɔ wɛ.” Mɛ ɖěvo lɛ́ ɖɔ: “Éǒ, mɛɖimɛ wɛ.” Nya ɔ ka nɔ ɖɔ: “Nyɛ wɛ.” 10 Énɛ́ ɔ, yě kanbyɔ́ ɛ ɖɔ: “Nɛ̌ é ka nyí gbɔn lo bɔ nukún towe lɛ́ hun?” 11 É yí gbe ɖɔ: “Nya e nɔ nyí Jezu é wɛ bló babá bo sá dó nukún jí nú mì, lobo ɖɔ nú mì ɖɔ: ‘Yi Silowée tɔ nu, bo fún nukúnmɛ.’ Énɛ́ ɔ, un yi bo fún nukúnmɛ, bɔ nukún ce lɛ́ hun.” 12 Ée é ɖɔ mɔ̌ é ɔ, yě ɖɔ n’i ɖɔ: “Fítɛ́ nya énɛ́ ka ɖe?” É ɖɔ: “Un tuun ǎ.”

13 Yě kplá nya e nyí nukúntɔ́nnɔ ɖ’ayǐ é yi Falizyɛn lɛ́ gɔ́n. 14 Azǎn e gbe Jezu ka bló babá ɔ, bo hun nukún tɔn lɛ́ n’i é ɔ, gbɔjɛzángbe wɛ. 15 Énɛ́ wú ɔ, Falizyɛn lɛ́ lɔ jɛ lěe nya ɔ sín nukún lɛ́ hun gbɔn é kanbyɔ́ ɛ jí. É ɖɔ nú yě ɖɔ: “É sá babá dó nukún ce lɛ́, bɔ un fún nukúnmɛ bo ka jɛ nǔ mɔ jí.” 16 Énɛ́ ɔ, Falizyɛn ɖé lɛ́ jɛ ɖiɖɔ jí ɖɔ: “Nya énɛ́ gosín Mawu gɔ́n ǎ, ɖó é nɔ nyi gbɔjɛzán ɔ ǎ.” Mɛ ɖěvo lɛ́ ɖɔ: “Nɛ̌ mɛ e nyí hwɛhutɔ́ é ka sixú bló nǔjíwǔ mɔ̌hun lɛ́ gbɔn?” Énɛ́ ɔ, gbe yětɔn sɔ́ ɖo kpɔ́ ǎ. 17 Bɔ yě lɛ́vɔ́ ɖɔ nú nya nukúntɔ́nnɔ ɔ ɖɔ: “Ðó nukún towe lɛ́ wɛ é hun wútu ɔ, étɛ́ a ka lin dó wǔ tɔn?” Nya ɔ ɖɔ: “Gbeyíɖɔ wɛ n’i.”

18 É ɖo mɔ̌ có, nya e ɖo nǔ mɔ wɛ din é ɔ, Jwifugán lɛ́ ɖi nǔ ɖɔ é ko nyí nukúntɔ́nnɔ ɖ’ayǐ cóbó wá ɖo nǔ mɔ wɛ ǎ, káká bo ylɔ́ mɛjitɔ́ tɔn lɛ́, 19 bo kanbyɔ́ yě ɖɔ: “Vǐ mitɔn ɖíe a? Nukúntɔ́nnɔ tɔn wɛ mi ji nǔgbó a? Nɛ̌ é ka nyí gbɔn lo bɔ é ɖo nǔ mɔ wɛ din?” 20 Mɛjitɔ́ tɔn lɛ́ yí gbe ɖɔ: “Ɛɛn, vǐ mǐtɔn wɛ, bɔ mǐ ji nukúntɔ́nnɔ tɔn. 21 Amɔ̌, lěe é nyí gbɔn bɔ é ɖo nǔ mɔ wɛ din é ɔ, mǐ tuun ǎ. Mǐ ka lɛ́ tuun mɛ e hun nukún n’i é ǎ. Mi kanbyɔ́ ɛ. É ko ɖó xwe ɖo ta. É wɛ ɖó ná ɖɔ xó dó éɖée nu.” 22 Mɛjitɔ́ tɔn lɛ́ ɖɔ mɔ̌, ɖó yě ɖo xɛsi ɖi nú Jwifugán lɛ́ wɛ, ɖó Jwifugán lɛ́ ko wá gbeta ɔ kɔn ɖɔ ényí mɛ ɖěbǔ yí gbe ɖɔ Jezu nyí Klísu ɔ, è ná nya mɛ énɛ́ sín kplɔ́ngbasá ɔ. 23 Énɛ́ wú wɛ mɛjitɔ́ tɔn lɛ́ ɖɔ: “É ko ɖó xwe ɖo ta. Mi kan nǔ byɔ́ ɛ.”

24 Énɛ́ ɔ, yě lɛ́vɔ́ ylɔ́ nya e ko nyí nukúntɔ́nnɔ ɖ’ayǐ é bo ɖɔ n’i ɖɔ: “Kpa susu nú Mawu; mǐ tuun ɖɔ hwɛhutɔ́ wɛ nú nya énɛ́.” 25 É ɖɔ: “É tó nyí hwɛhutɔ́ kpó é gbɔ kpó ɔ, un tuun ǎ. Nǔ ɖokpó e un tuun é wɛ nyí ɖɔ un nyí nukúntɔ́nnɔ ɖ’ayǐ, amɔ̌ din ɔ, un ɖo nǔ mɔ wɛ.” 26 Yě ka ɖɔ n’i ɖɔ: “Étɛ́ é ka wa nú we? Nɛ̌ é ka hun nukún nú we gbɔn?” 27 É yí gbe nú yě ɖɔ: “Un ko ɖɔ nú mi ɖ’ayǐ, bɔ mi ka ɖótó ǎ. Étɛ́wú mi ka jló ná lɛ́vɔ́ se? Mi lɔ jló ná húzú ahwanvú tɔn lɛ́ wɛ a?” 28 Ée é ɖɔ mɔ̌ é ɔ, yě cá n’i bo ɖɔ: “Hwɛ wɛ nyí ahwanvú nya énɛ́ tɔn, amɔ̌ mǐdɛɛ lɛ́ ɔ, ahwanvú Mɔyízi tɔn wɛ nú mǐ. 29 Mǐ tuun ɖɔ Mawu ɖɔ xó nú Mɔyízi, amɔ̌, nya énɛ́ ɔ, mǐ tuun fí e é gosín é ǎ.” 30 Nya ɔ yí gbe nú yě ɖɔ: “É kpácá mì ɖɔ mi kún tuun fí e é gosín é ó, có é ka hun nukún nú mì. 31 Mǐ tuun ɖɔ Mawu kún nɔ ɖótó hwɛhutɔ́ lɛ́ ó, amɔ̌, ényí mɛɖé nɔ ɖó sísí e gɔ́ngɔ́n é nú Mawu, bo nɔ wa jlǒ tɔn ɔ, é nɔ ɖótó mɛ énɛ́. 32 Sín hwexónu ɔ, è se gbeɖé ɖɔ mɛ ɖěbǔ hun nukún nú mɛ e è ji nukúntɔ́nnɔ tɔn é ɖé kpɔ́n ǎ. 33 Nú nya énɛ́ ma gosín Mawu gɔ́n ǎ ɔ, é sixú wa nǔ ɖěbǔ ǎ.” 34 Yě ka yí gbe n’i ɖɔ: “Hwiɖésúnɔ bǐ wɛ è ji dó hwɛ mɛ, bɔ a ka wá ɖo nǔ kplɔ́n mǐdɛɛ lɛ́ wɛ a?” Bɔ yě nya ɛ tɔ́n!

35 Jezu se ɖɔ yě nya ɛ tɔ́n, bɔ ée é mɔ ɛ é ɔ, é ɖɔ: “A ɖi nǔ nú Gbɛtɔ́ví ɔ a?” 36 Nya ɔ yí gbe ɖɔ: “Mɛɖaxó, mɛ̌ ka nyí Gbɛtɔ́ví ɔ? Ðɔ nú mì bónú má ɖi nǔ n’i.” 37 Jezu ɖɔ n’i ɖɔ: “A ko mɔ ɛ; nǔgbó ɔ, é wɛ nyí mɛ e ɖo xó ɖɔ xá we wɛ é.” 38 É ɖɔ: “Aklúnɔ, un ɖi nǔ nú we.” Lobo ɖe kɔ́* n’i. 39 Énɛ́ gúdo ɔ, Jezu ɖɔ: “Un wá gbɛ élɔ́ mɛ nú è ná ɖɔ hwɛ xá gbɛtɔ́ lɛ́, bónú mɛ e ma ɖo nǔ mɔ wɛ ǎ lɛ́ é ní mɔ nǔ, lobonú mɛ e ɖo nǔ mɔ wɛ lɛ́ é ní tɔ́n nukún.” 40 Falizyɛn e ɖo fínɛ́ lɛ́ é se xó énɛ́ lɛ́, bo ɖɔ n’i ɖɔ: “Mǐ lɔ nyí nukúntɔ́nnɔ wɛ a?” 41 Jezu ɖɔ nú yě ɖɔ: “Ényí mi nyí nukúntɔ́nnɔ wɛ ɔ, hwɛ ɖěbǔ ná ɖo kɔ nú mi ǎ, amɔ̌ din ɔ, mi ɖɔ: ‘Mǐ ɖo nǔ mɔ wɛ.’ Énɛ́ wú ɔ, hwɛ mitɔn lɛ́ kpo ɖo kɔ nú mi.”

10 “Má ɖɔ nǔgbó nú mi, mɛ e ma gbɔn hɔnlinu, bo byɔ́ lɛ̌ngbɔ́kpó ɔ mɛ ǎ, bo fán nǔ byɔ́ mɛ gbɔn fí ɖěvo é ɔ, ajotɔ́ wɛ nú mɛ énɛ́, bo lɛ́ nyí jaguda. 2 Amɔ̌, mɛ e gbɔn hɔnlinu byɔ́ mɛ é wɛ nyí lɛ̌ngbɔ́nyitɔ́ ɔ. 3 Hɔnjínɔtɔ́ nɔ hun hɔn nú mɛ énɛ́, bɔ lɛ̌ngbɔ́ lɛ́ nɔ ɖótó gbe tɔn. É nɔ ylɔ́ lɛ̌ngbɔ́ éɖésúnɔ tɔn lɛ́ sín nyǐkɔ, bo nɔ ɖe yě tɔ́n. 4 Ényí é ɖe lɛ̌ngbɔ́ e nyí étɔn lɛ́ é bǐ tɔ́n ɔ, é nɔ jɛ nukɔn nú yě, bɔ yě nɔ xwedó è, ɖó yě tuun gbe tɔn wútu. 5 Yě ná xwedó jǒnɔ ɖo ali ɖěbǔ nu ǎ, é nyɔ́ wa ɔ, hɔn wɛ yě ná hɔn n’i, ɖó yě tuun jǒnɔ lɛ́ sín gbe ǎ wútu.” 6 Jezu ná nǔjlɛ́dónǔwú énɛ́ yě, amɔ̌, yě mɔ nǔ jɛ nǔ e ɖɔ nú yě wɛ é ɖe é mɛ ǎ.

7 Énɛ́ wú ɔ, Jezu lɛ́ ɖɔ: “Má ɖɔ nǔgbó nú mi, nyɛ wɛ nyí hɔn nú lɛ̌ngbɔ́ lɛ́. 8 Mɛ e sɔ́ nyǐkɔ ce ɖó nu bo wá lɛ́ é bǐ wɛ nyí ajotɔ́, bo lɛ́ nyí jaguda. Amɔ̌, lɛ̌ngbɔ́ lɛ́ ɖótó yě ǎ. 9 Nyɛ wɛ nyí hɔn ɔ; è ná hwlɛ́n mɛ ɖěbǔ e ná gbɔn jǐ ce, bo ná byɔ́ lɛ̌ngbɔ́kpó ɔ mɛ é. Mɛ énɛ́ ná nɔ byɔ́ mɛ, bo ná nɔ tɔ́n. É ná mɔ nǔɖuɖu. 10 Ajotɔ́ nɔ tɔ́n nǔ ɖěvo gbé zɛ é ná fin nǔ, hu nǔ, bo sú kún dó nú nǔ wú ǎ. Amɔ̌, nyɛ wá bónú lɛ̌ngbɔ́ lɛ́ ní dó sixú mɔ gbɛ; yě ní mɔ bónú é ní túnflá. 11 Nyɛ wɛ nyí lɛ̌ngbɔ́nyitɔ́ ɖagbe ɔ; lɛ̌ngbɔ́nyitɔ́ ɖagbe nɔ sɔ́ gbɛ* tɔn jó dó lɛ̌ngbɔ́ lɛ́ tamɛ. 12 Jokóxotɔ́ e ma nyí lɛ̌ngbɔ́nyitɔ́ ǎ, lobɔ lɛ̌ngbɔ́ lɛ́ ma nyí étɔn ǎ é mɔ hla ja ɔ, é nɔ jó lɛ̌ngbɔ́ lɛ́ dó bo nɔ hɔn, bɔ hla nɔ wlí ɖě, bɔ éé kpo lɛ́ é nɔ gba dó. 13 Ðó jokóxotɔ́ wɛ n’i, bɔ lɛ̌ngbɔ́ lɛ́ sín nǔ nɔ ɖu ayi mɛ n’i ǎ wútu. 14 Nyɛ wɛ nyí lɛ̌ngbɔ́nyitɔ́ ɖagbe ɔ. Un tuun lɛ̌ngbɔ́ ce lɛ́, bɔ lɛ̌ngbɔ́ ce lɛ́ tuun mì, 15 lěe Tɔ́ ɔ tuun mì, bɔ nyi lɔ tuun Tɔ́ ɔ gbɔn é ɖɔhun. Un sɔ́ gbɛ* ce jó dó lɛ̌ngbɔ́ lɛ́ tamɛ.

16 “Un lɛ́ ɖó lɛ̌ngbɔ́ ɖěvo lɛ́ bɔ yě ɖo lɛ̌ngbɔ́kpó élɔ́ mɛ ǎ; un ɖó ná kplá yě lɔ wá lɛ̌ngbɔ́kpó ɔ mɛ, bɔ yě ná ɖótó gbe ce, lobɔ yě ná húzú lɛ̌ngbɔ́hwan ɖokpó, bo ná ɖó lɛ̌ngbɔ́nyitɔ́ ɖokpó. 17 Tɔ́ ɔ yí wǎn nú mì, ɖó un sɔ́ gbɛ* ce jó, bo ná dó sixú lɛ́ wá mɔ yí. 18 Mɛ ɖěbǔ xo gbɛ ce yí sín así ce ǎ, é nyɔ́ wa ɔ, nyiɖésúnɔ wɛ jló bo sɔ́ jó. Un ɖó acɛ bo ná sɔ́ jó, bo ɖó acɛ bo ná lɛ́ wá mɔ yí. Tɔ́ ce wɛ ɖe gbe nú mì ɖɔ nyi ní wa mɔ̌.”

19 Xó énɛ́ e é ɖɔ lɛ́ é zɔ́n bɔ gbemanɔkpɔ́ lɛ́vɔ́ fɔ́n ɖo Jwifugán lɛ́ tɛ́ntin. 20 Mɛ gěgé ɖo yě mɛ bo nɔ ɖɔ: “Awǒvi ɖé wɛ ɖo jǐ tɔn, ta tɔn mɛ sɔgbe ǎ. Étɛ́wú mi ka ɖo tó ɖó è wɛ?” 21 Mɛ ɖěvo lɛ́ nɔ ɖɔ: “Mɛ e jí awǒvi ɖé ɖe é nɔ ɖɔ xó gbɔn mɔ̌ ǎ. Awǒvi ɖé sixú hun nukún nú nukúntɔ́nnɔ lɛ́ ǎ, kabǐ?”

22 Hwenɛ́nu ɔ, è ɖo tɛ́npli ɔ sísɔ́ d’alɔ mɛ nú Mawu sín xwe ɖu wɛ ɖo Jeluzalɛ́mu. Avivɔhwenu* wɛ, 23 bɔ Jezu ɖo zɔnlin ɖi wɛ ɖo tɛ́npli ɔ mɛ, ɖo Salomɔ́ɔ sín agba jí. 24 Bɔ Jwifu lɛ́ xísí dó è bo jɛ ɖiɖɔ n’i jí ɖɔ: “Hwetɛ́nu a ka ná ɖɔ xójɔxó nú mǐ,* bɔ mǐ* ná gɔn nǔ xo kpɔ́n? Ényí hwi wɛ nyí Klísu ɔ hǔn, ɖɔ nyi wɛn nú mǐ.” 25 Jezu yí gbe nú yě ɖɔ: “Un ko ɖɔ nú mi, bɔ mi ka ɖi ǎ. Azɔ̌ e wa wɛ un ɖe ɖo Tɔ́ ce nyíkɔ mɛ lɛ́ é wɛ ɖo kúnnu ɖe nú mì wɛ. 26 Amɔ̌, mi ɖi nǔ ǎ, ɖó mi nyí lɛ̌ngbɔ́ ce lɛ́ ǎ wútu. 27 Lɛ̌ngbɔ́ ce lɛ́ nɔ ɖótó gbe ce; un tuun yě, bɔ yě nɔ xwedó mì. 28 Un nɔ ná yě gbɛ mavɔmavɔ, bɔ è ná sú kún dó nú yě gbeɖé ɖo ali ɖěbǔ nu ǎ, lobɔ mɛ ɖěbǔ ná xo yě yí sín alɔ ce mɛ ǎ. 29 Lɛ̌ngbɔ́ ɖěɖěe Tɔ́ ce ná mì lɛ́ é xɔ akwɛ́ hú nǔ ɖěvo lɛ́ bǐ, bɔ mɛ ɖěbǔ sixú xo yě yí sín Tɔ́ ɔ sín alɔ mɛ ǎ. 30 Nyi kpó Tɔ́ ɔ kpó nyí ɖokpó.”*

31 Jwifu lɛ́ lɛ́vɔ́ fɔ awǐnnya, bo ná nyi dó hu i. 32 Jezu ka ɖɔ nú yě ɖɔ: “Un ɖe azɔ̌ ɖagbe gěgé xlɛ́ mi ɖo Tɔ́ ɔ nyíkɔ mɛ. Azɔ̌ énɛ́ lɛ́ ɖětɛ́ wú wɛ mi ka jló ná nyi awǐnnya dó hu mì?” 33 Jwifu lɛ́ yí gbe n’i ɖɔ: “Mǐ jló ná nyi awǐnnya dó hu we, é nyí ɖó azɔ̌ ɖagbe ɖé wú ǎ, loɔ, nu e a nylá é wú wɛ; ɖó hwɛ mɛ e nyí gbɛtɔ́ é nɔ sɔ́ hwiɖée dó ɖó mawu ɖé.” 34 Jezu ka yí gbe nú yě ɖɔ: “È wlán xó élɔ́ dó Sɛ́n mitɔn mɛ ǎ cé? É wɛ nyí ɖɔ: ‘Un ɖɔ: “Mawu lɛ́* wɛ mi nyí.”’ 35 Mǐ ka tuun ɖɔ è kún sixú dɔn nǔ gbɔn Nǔwlánwlán mímɛ́ lɛ́ jí ó. Ényí Mawu ylɔ́ mɛ ɖěɖěe xó tɔn ɖó hwɛ ná lɛ́ é ɖɔ ‘mawu lɛ́’ ɔ, 36 é ka sɔgbe ɖɔ mi ní ɖɔ nú nyɛ mɛ e Tɔ́ ɔ ɖe ɖó vo, bo sɛ́ dó gbɛ ɔ mɛ é ɖɔ: ‘A nylá nu,’ ɖó un ɖɔ: ‘Un nyí Vǐ Mawu tɔn’ wútu a? 37 Ényí un ma ɖo Tɔ́ ce sín azɔ̌ wa wɛ ǎ hǔn, mi ma ɖi nǔ nú mì ó. 38 Amɔ̌, ényí un ɖo azɔ̌ tɔn lɛ́ wa wɛ ɔ, mi na bo ma ɖi nǔ nú mì ǎ hǔn, mi ɖi nǔ ɖó azɔ̌ lɛ́ wú, bo ná mɔ tɛn dó tuun, bo lɛ́ kpo ɖo tuuntuun wɛ ɖɔ Tɔ́ ɔ ɖo bǔ xá mì, bɔ nyi lɔ ɖo bǔ xá Tɔ́ ɔ.” 39 Énɛ́ wú ɔ, yě lɛ́vɔ́ tɛ́n kpɔ́n bo ná wlí i, amɔ̌, é sún gló yě.

40 É lɛ́vɔ́ yi Judɛ́ɛn tɔ ɔ gúdo, fí e Jaan bló batɛ́mu nú mɛ ɖe jɛ nukɔn é, bo cí fínɛ́. 41 Bɔ mɛ gěgé wá gɔ̌n tɔn bo jɛ ɖiɖɔ jí ɖɔ: “Jaan bló nǔjíwǔ ɖokpó vɔ́vɔ́ ǎ, amɔ̌, nǔ e é ɖɔ dó nya élɔ́ wú lɛ́ é bǐ wɛ nyí nǔgbó.” 42 Bɔ mɛ gěgé ɖi nǔ nú Jezu ɖo fínɛ́.

11 Din ɔ, nya e nɔ nyí Lazáa é ɖo azɔn jɛ wɛ; Betaníinu wɛ. Fínɛ́ wɛ nyí gletoxo Mali kpó nɔví nyɔ̌nu tɔn Mata kpó tɔn. 2 Mali énɛ́ wɛ kɔn nǔsáwǔ wǎnɖagbenɔ dó afɔ Aklúnɔ tɔn lɛ́ jí, bo dɔn ɖa tɔn dó súnsún ná; nɔví súnnu tɔn Lazáa wɛ ɖo azɔn jɛ wɛ. 3 Énɛ́ wú ɔ, nɔví nyɔ̌nu Lazáa tɔn lɛ́ sɛ́ wɛn dó Jezu, bo ɖɔ: “Aklúnɔ, xɔ́ntɔn towe vívɛ́ná ɔ ɖo azɔn jɛ wɛ.” 4 Amɔ̌, ée Jezu se xó énɛ́ é ɔ, é ɖɔ: “Azɔn élɔ́ ɔ, é nyí kú jí wɛ é ná fó dó ǎ, loɔ, susu wɛ é ná nyí nú Mawu, bónú è ná dó sixú kpa susu nú Vǐ Mawu tɔn gbɔn yɛkan tɔn mɛ.”

5 Jezu ka yí wǎn nú Mata kpó nɔví nyɔ̌nu tɔn kpó, kpódó Lazáa kpán. 6 É ɖo mɔ̌ có, hwenu e é se ɖɔ Lazáa ɖo azɔn jɛ wɛ é ɔ, é lɛ́ nɔ fí e é ɖe é xɔ azǎn we gɔ́ ná. 7 Énɛ́ gúdo ɔ, é ɖɔ nú ahwanvú lɛ́ ɖɔ: “Mi nú mǐ ní lɛ́ yi Judée.” 8 Ahwanvú lɛ́ ɖɔ n’i ɖɔ: “Mɛ̌si,* agaɖanu din jɛ́n Judéenu lɛ́ jló ná nyi awǐnnya dó hu we, bɔ dɔ̌n wɛ a ko lɛ́ xwe din a?” 9 Jezu ka yí gbe ɖɔ: “Ganxixo 12 wɛ ɖo kéze ɖokpó mɛ, kabǐ? Ényí mɛ ɖěbǔ ɖo zɔnlin ɖi wɛ kéze ɔ, é nɔ klɛ́n afɔ dó nǔ ɖě wú ǎ, ɖó wěziza nɔ zɔ́n bɔ é nɔ mɔ nǔ. 10 Amɔ̌, ényí mɛ ɖěbǔ ɖo zɔnlin ɖi wɛ zǎnmɛ ɔ, é nɔ klɛ́n afɔ, ɖó wěziza ɖo mɛ énɛ́ mɛ ǎ.”

11 Ée é ɖɔ xó énɛ́ lɛ́ gúdo é ɔ, é ɖɔ gɔ́ ná ɖɔ: “Xɔ́ntɔn mǐtɔn Lazáa ɖo amlɔ dɔ́ wɛ, bɔ un xwe dɔ̌n bo ná yi fɔ́n ɛ.” 12 Ahwanvú lɛ́ ka ɖɔ n’i ɖɔ: “Aklúnɔ, ényí amlɔ dɔ́ wɛ é ɖe hǔn, azɔn tɔn ná gbɔ.” 13 Amɔ̌, é kú ɖɔ wɛ Jezu ɖe. Yědɛɛ lɛ́ ka vɛdó ɖɔ é d’amlɔ bo ɖo gbigbɔjɛ wɛ ɖɔ wɛ é ɖe sín. 14 Énɛ́ wú ɔ, Jezu ɖɔ nyi wɛn nú yě ɖɔ: “Lazáa kú, 15 bɔ xomɛ hun mì ɖɔ un kún ɖo fínɛ́ ó, ɖó mi wú, bónú mi ná dó sixú ɖi nǔ. Amɔ̌, mi nú mǐ ní yi gɔ̌n tɔn.” 16 Énɛ́ wú ɔ, Tɔmáa e è nɔ ylɔ́ ɖɔ Hǒxo é ɖɔ nú ahwanvú gbɛ̌ tɔn lɛ́ ɖɔ: “Mi nú mǐ lɔ ní yi, bo ná kú xá ɛ.”

17 Hwenu e Jezu wá é ɔ, é mɔ ɖɔ Lazáa ko ɖo yɔdo mɛ sín azǎn ɛnɛ ɖíe. 18 Betaníi ka lín dó Jeluzalɛ́mu ǎ, kilomɛ́tlu atɔn* mɔ̌ wɛ é ɖó dó è. 19 Bɔ Jwifu gěgé ko wá Mata kpó Mali kpó gɔ́n, bo ná dó gbɔ nú yě, ɖó nɔví súnnu yětɔn wú. 20 Hwenu e Mata se ɖɔ Jezu ja é ɔ, é ɖidó kpíkpé è gbé; amɔ̌, Mali ɖo ayǐjínjɔ́n ɖo xwégbe. 21 Mata ɖɔ nú Jezu ɖɔ: “Aklúnɔ, ényí fí wɛ a ko ɖe ɔ, nɔví súnnu ce ná kú ǎ. 22 Có din ɖésú ɔ, un tuun ɖɔ a byɔ́ nǔ ɖěbǔ Mawu ɔ, é ná ná we.” 23 Jezu ɖɔ n’i ɖɔ: “Nɔví súnnu towe ná fɔ́n.” 24 Mata ɖɔ n’i ɖɔ: “Un tuun ɖɔ é ná fɔ́n ɖo fínfɔ́n sín kú hwenu, ɖo azǎn gǔdo gúdo tɔn ɔ gbe.” 25 Jezu ka ɖɔ n’i ɖɔ: “Nyɛ wɛ nyí fínfɔ́n sín kú kpó gbɛ kpó. Mɛ e ɖe xlɛ́ ɖɔ émí ɖi nǔ nú mì é ná bo tlɛ kú ɔ, é ná fɔ́n wá gbɛ; 26 bɔ mɛ ɖěbǔ e ɖo gbɛ bo ɖe xlɛ́ ɖɔ émí ɖi nǔ nú mì é ná kú gbeɖé ǎ. A ɖi nǔ nú xó énɛ́ a?” 27 É ɖɔ n’i ɖɔ: “Ɛɛn, Aklúnɔ, un ɖi nǔ ɖɔ hwi wɛ nyí Klísu, Vǐ Mawu tɔn ɔ; hwi wɛ nyí mɛ e ɖó ná wá gbɛ ɔ mɛ é.” 28 Ée é ɖɔ xó énɛ́ gúdo é ɔ, é lɛ́ kɔ, bo ylɔ́ nɔví nyɔ̌nu tɔn Mali, bo ɖe kpá ɛ ɖɔ: “Mɛ̌si ɖo fí bo ɖo ylɔ̌ylɔ́ we wɛ.” 29 Ée Mali se mɔ̌ é ɔ, é yá wǔ sí te bo ɖidó gɔ̌n tɔn.

30 Jezu ko byɔ́ gletoxo ɔ mɛ ǎ; é kpo ɖo fí e Mata wá kpé è ɖe é. 31 Hwenu e Jwifu e ɖo kpɔ́ xá Mali ɖo xwé ɔ gbe, bo ɖo gbɔ dó n’i wɛ lɛ́ é mɔ bɔ é yá wǔ sí te bo tɔ́n é ɔ, yě xwedó è, bo vɛdó ɖɔ é xwe yɔdo ɔ kɔn, bo ná yi y’avǐ ɖo dɔ̌n wɛ sín. 32 Ée Mali wá fí e Jezu ɖe é, bo mɔ ɛ é ɔ, é jɛ kpo ɖo afɔ tɔn lɛ́ kɔn, bo ɖɔ n’i ɖɔ: “Aklúnɔ, ényí fí wɛ a ko ɖe ɔ, nɔví súnnu ce ná kú ǎ.” 33 Ée Jezu mɔ bɔ é ɖo avǐ ya wɛ, bɔ Jwifu e xwedó è wá lɛ́ é lɔ ɖo avǐ ya wɛ é ɔ, é wɛn azɔn, bɔ ayi tɔn gba dó. 34 É ɖɔ: “Fítɛ́ mi ka sɔ́ ɛ ɖó?” Yě ɖɔ n’i ɖɔ: “Aklúnɔ, wǎ kpɔ́n.” 35 Ðasin wá yi dó Jezu. 36 Ée Jwifu lɛ́ mɔ mɔ̌ é ɔ, yě jɛ ɖiɖɔ jí ɖɔ: “Mi kpɔ́n, é yí wǎn n’i tawun wɛ mɛ!” 37 Amɔ̌, yě mɛ ɖé lɛ́ ɖɔ: “Nya élɔ́ e hun nukún nú nya nukúntɔ́nnɔ ɔ é sixú bló bónú Lazáa gɔn kúkú ǎ cé?”

38 Ée Jezu lɛ́vɔ́ wɛn azɔn gúdo é ɔ, é wá yɔdo ɔ kɔn. Yɔdo ɖé wɛ bo ɖo só xomɛ, bɔ è blí awǐnnya nyi nu. 39 Jezu ɖɔ: “Mi blí awǐnnya ɔ síin.” Mata e nyí nɔví nyɔ̌nu mɛ e kú é tɔn é ɖɔ n’i ɖɔ: “Aklúnɔ, é ná ko ɖo wǎn lun wɛ din, ɖó sín azǎn ɛnɛ ɖíe wɛ é ko kú.” 40 Jezu ɖɔ n’i ɖɔ: “Un ma ɖɔ nú we ɖɔ ényí a ɖi nǔ ɔ, a ná mɔ susu Mawu tɔn ǎ cé?” 41 Énɛ́ ɔ, yě blí awǐnnya ɔ síin. Bɔ Jezu kpɔ́n jǐ bo ɖɔ: “Tɔ́ ce, un dó kú nú we ɖɔ a se ɖɛ ce. 42 Nǔgbó ɔ, un tuun ɖɔ a nɔ se ɖɛ ce hwebǐnu; amɔ̌, ahwan e lɛ́ lɛ̌ dó mì ɖo fí é wú wɛ un ɖɔ mɔ̌, bónú yě ní dó sixú ɖi nǔ ɖɔ hwi wɛ sɛ́ mì dó.” 43 Ée é ɖɔ xó énɛ́ lɛ́ gúdo é ɔ, é sú xó syɛ́nsyɛ́n bo ɖɔ: “Lazáa, tɔ́n!” 44 Mɛkúkú ɔ tɔ́n nǔgbó, bɔ avɔ e è lɛ́ dó afɔ tɔn lɛ́ kpó alɔ tɔn lɛ́ kpó é ɖo mɔ̌, bɔ ée è dó blá nukúnmɛ n’i ná é lɔ ɖo mɔ̌. Jezu ɖɔ nú yě ɖɔ: “Mi tún avɔ lɛ́ sín wǔ tɔn, bo jó è dó nú é ní yi.”

45 Énɛ́ wú ɔ, Jwifu ɖěɖěe wá Mali gɔ́n, bo mɔ nǔ e Jezu wa lɛ́ é gěgé ɖi nǔ n’i. 46 Yě mɛ ɖé lɛ́ ka yi mɔ Falizyɛn lɛ́, bo ɖɔ nǔ e Jezu wa é nú yě. 47 Énɛ́ wú ɔ, vɔ̌sánúxwlémawutɔ́gán lɛ́ kpó Falizyɛn lɛ́ kpó kplé Hwɛɖɔxɔsá ɖaxó Jwifu lɛ́ tɔn sín hǎgbɛ́ lɛ́, bo ɖɔ: “Étɛ́ mǐ ka ná wa din? Ðó nya élɔ́ ɖo nǔjíwǔ gěgé bló wɛ. 48 Ényí mǐ jó è dó bónú é ɖ’é wú mɔ̌ ɔ, yě bǐ ná ɖi nǔ n’i, bɔ Hlɔ̌manu lɛ́ ná wá bo ná yí nɔtɛn mímɛ́* mǐtɔn kpó akɔta mǐtɔn kpó.” 49 Mɛ ɖokpó ka ɖo yě mɛ, bo nɔ nyí Kayífu. É wɛ nyí vɔ̌sánúxwlémawutɔ́ ɖaxó xwe énɛ́ xwe. É ɖɔ nú yě ɖɔ: “Mi tuun nǔtí ǎ. 50 Mi mɔ din ɖɔ ényí mɛ ɖokpó kú dó togun ɔ tamɛ ɔ, é ná ɖó le nú mi hú ɖɔ è ní sú kún dó nú akɔta ɔ blěbú ǎ cé?” 51 É ka nyí linlin éɖésúnɔ tɔn lɛ́ wɛ zɔ́n bɔ é ɖɔ mɔ̌ ǎ, é nyɔ́ wa ɔ, ɖó é nyí vɔ̌sánúxwlémawutɔ́ ɖaxó xwe énɛ́ xwe wútu ɔ, é ɖɔ ɖ’ayǐ ɖɔ Jezu ná kú dó akɔta ɔ tamɛ. 52 É ka nyí ɖɔ é ná kú dó akɔta ɔ tamɛ kɛ́ɖɛ́ wɛ ǎ, loɔ, bo ná dó lɛ́ xo vǐ Mawu tɔn e fúnfún kpé lɛ́ é kplé, bɔ yě ná nyí ɖokpó. 53 Énɛ́ wú ɔ, bɛ́sín gbe énɛ́ gbe ɔ, yě blá gbě tɔn bo ná hu i.

54 É sín énɛ́ wú bɔ Jezu sɔ́ nɔ gbɔn agbawungba ɖo Jwifu lɛ́ tɛ́ntin ɖě ǎ. Loɔ, é gosín fínɛ́ bo ɖidó xá e sɛkpɔ́ gbětótló ɔ é mɛ, ɖo toxo e è nɔ ylɔ́ ɖɔ Eflayímu é mɛ, lobo cí fínɛ́, é kpó ahwanvú lɛ́ kpó. 55 Din ɔ, Dǐndínwáyixwe Jwifu lɛ́ tɔn sɛkpɔ́, bɔ mɛ gěgé gosín gletoxo lɛ́ mɛ, bo yi Jeluzalɛ́mu jɛ nukɔn nú Dǐndínwáyixwe ɔ, bo ná mɔ tɛn dó slá wǔ, lěe Sɛ́n ɔ byɔ́ gbɔn é. 56 Yě ɖo Jezu ba wɛ, bɔ hwenu e yě ɖo te ɖo tɛ́npli ɔ mɛ é ɔ, yě nɔ ɖɔ nú yěɖée lɛ́ ɖɔ: “Étɛ́ mi ka lin? É ja xwe ɔ tɛnmɛ ǎ ka wɛ a?” 57 Amɔ̌, vɔ̌sánúxwlémawutɔ́gán lɛ́ kpó Falizyɛn lɛ́ kpó ko ɖe gbeta ɔ tɔ́n ɖɔ, ényí mɛ ɖěbǔ tuun fí e Jezu ɖe é hǔn, é ní wá ɖɔ, bónú yě ná dó sixú wlí i.*

12 Dǐndínwáyixwe ɔ kpo azǎn ayizɛ́n é ɔ, Jezu wá Betaníi, fí e Lazáa e é fɔ́n sín kú é nɔ nɔ é. 2 Yě ɖa gbadanu núɖuɖu n’i ɖo fínɛ́, bɔ Mata ɖo ká sɛn wɛ; Lazáa ɖo mɛ e ɖo nǔ ɖu xá ɛ wɛ* lɛ́ é mɛ. 3 Mali ka sɔ́ nǔsáwǔ wǎnɖagbenɔ e è sɔ́ nǎa akú dó bló ná, bɔ é v’axi tawun é lǐtli vlɔ̌ mɔ̌, bo kɔn dó afɔ Jezu tɔn lɛ́ jí, lobo dɔn ɖa tɔn dó súnsún ná. Nǔsáwǔ ɔ sín wǎn gba kpé xɔ ɔ mɛ. 4 Amɔ̌, ahwanvú tɔn e nɔ nyí Judási Isikaliɔ́ti, bo ɖo nǎ sa ɛ wɛ é ɖɔ: 5 “Étɛ́wú è ma ka sa nǔsáwǔ énɛ́ yí deníye* 300, bo ná akwɛ́ ɔ wamamɔnɔ lɛ́ ǎ?” 6 Amɔ̌, é nyí wamamɔnɔ lɛ́ sín nǔ wɛ ɖu ayi mɛ n’i wɛ zɔ́n bɔ é ɖɔ mɔ̌ ǎ, loɔ, ajotɔ́ wɛ n’i; é wɛ nɔ hɛn akwɛ́gbá ɔ, bo nɔ ɖo akwɛ́ e è nɔ bɛ́ d’é mɛ lɛ́ é fin wɛ. 7 Jezu ka ɖɔ: “Mi jó è dó, bónú é ní wa mɔ̌ dó sɔ́ nǔ nú mì ɖ’ayǐ, nú gbe e gbe è ná ɖi mì é. 8 Ðó midɛɛ lɛ́ ɔ, wamamɔnɔ lɛ́ ɖo kpɔ́ xá mi tɛgbɛ, amɔ̌, nyɛ ná ɖo kpɔ́ xá mi tɛgbɛ ǎ.”

9 Hwenɛ́nu ɔ, Jwifu lɛ́ sín ahwan ɖaxó ɖé se ɖɔ Jezu ɖo fínɛ́, bo wá. É ka nyí ɖó éyɛ́ kɛ́ɖɛ́ wú ǎ, loɔ, yě lɛ́ jló ná mɔ Lazáa e é fɔ́n sín kú é. 10 Vɔ̌sánúxwlémawutɔ́gán lɛ́ blá sé bo ná hu Lazáa lɔmɔ̌, 11 ɖó éyɛ́ wú wɛ Jwifu gěgé nɔ yi Betaníi, bo nɔ ɖi nǔ nú Jezu.

12 Ayǐhɔ́ngbe tɔn ɔ, ahwan ɖaxó e wá xwe ɔ tɛnmɛ é se ɖɔ Jezu ja Jeluzalɛ́mu. 13 Énɛ́ wú ɔ, yě fɔ děma, bo tɔ́n bo ná yi kpé è, lobo jɛ xó sú jí ɖɔ: “Mawu, mǐ ɖo vo sa nú we wɛ, hwlɛ̌n ɛ! Nǔ nyɔ́ nú mɛ e wá ɖo Jexóva* nyíkɔ mɛ é! Nǔ nyɔ́ nú Izlayɛ́li xɔ́sú ɔ!” 14 Jezu mɔ tócí wínnyáwínnyá ɖé bo jínjɔ́n jí, lěe è ko wlán gbɔn ɖ’ayǐ é. É wɛ nyí ɖɔ: 15 “Vǐ nyɔ̌nu Sinyɔ́ɔ tɔn, ma ɖi xɛsi ó. Axɔ́sú towe ɖíe jínjɔ́n tócíví ɖé jí bo ja è!” 16 Ahwanvú tɔn lɛ́ mɔ nǔ jɛ nǔ énɛ́ lɛ́ mɛ tlóló ǎ. Amɔ̌, ée è sɔ́ Jezu su gúdo é ɔ, yě flín ɖɔ nǔ énɛ́ lɛ́ e è wa n’i é ɔ, è ko wlán ɖ’ayǐ dó wǔ tɔn.

17 Ahwan e ka ɖo kpɔ́ xá Jezu hwenu e é ylɔ́ Lazáa sín yɔdo ɔ mɛ, bo fɔ́n ɛ sín mɛkúkú lɛ́ mɛ é nɔ ɖo kúnnu ɖe n’i wɛ. 18 Énɛ́ lɔ wú wɛ ahwan ɔ tɔ́n bo ná yi kpé è, ɖó yě se ɖɔ é bló nǔjíwǔ énɛ́. 19 Énɛ́ wú ɔ, Falizyɛn lɛ́ ɖɔ ɖo yěɖée tɛ́ntin ɖɔ: “Mi ma mɔ ɖɔ mǐ kún ɖo nǔtí wú kpé wɛ ó a? Gbɛ ɔ bǐ nɛ́ ɖo xwixwedó è wɛ nɛ́.”

20 Glɛ̌kinu ɖé lɛ́ ka ɖo mɛ e tɔ́n Mawu sɛn gbé bo wá xwe ɔ tɛnmɛ lɛ́ é mɛ. 21 Yě sɛkpɔ́ Filípu e nyí Bɛtisayída Galilée tɔn nu é, bo ɖɔ n’i ɖɔ: “Mɛɖaxó, mǐ jló ná mɔ Jezu.” 22 Filípu yi mɔ Andlé bo ɖɔ n’i. Bɔ Andlé kpó Filípu kpó yi mɔ Jezu bo ɖɔ n’i.

23 Jezu ka yí gbe nú yě ɖɔ: “Gan ɔ xo bɔ è ná sɔ́ Gbɛtɔ́ví ɔ su. 24 Má ɖɔ nǔgbó nú mi, ényí blěe sín kwín ɖé ma jɛ kɔ́mɛ bo kú ǎ ɔ, blěe sín kwín ɖokpó nyí wɛ jɛ́n é ná kpo ɖe; loɔ, ényí é kú ɔ, é ná ná sínsɛ́n gěgé. 25 Mɛ ɖěbǔ e yí wǎn nú gbɛ* tɔn é ná sú kún dó ná. Mɛ ɖěbǔ e ka gbɛ́ wǎn nú gbɛ* tɔn ɖo gbɛ élɔ́ mɛ é ná nya xɛ ɖ’é jí, bo ná dó mɔ gbɛ mavɔmavɔ. 26 Mɛ ɖěbǔ e jló ná nyí mɛsɛntɔ́ ce é ní xwedó mì, bɔ fí e un ɖe é ɔ, mɛsɛntɔ́ ce lɔ ná ɖo fínɛ́. Mɛ ɖěbǔ e jló ná nyí mɛsɛntɔ́ ce é ɔ, Tɔ́ ɔ ná wlí yɛ̌yi n’i. 27 Din ɔ, ayi ce gba dó. Étɛ́ un ka ná ɖɔ din? Tɔ́, hwlɛ̌n mì sín ninɔmɛ* élɔ́ mɛ. É ɖo mɔ̌ có, ninɔmɛ* élɔ́ wú wɛ un wá. 28 Tɔ́, sɔ́ nyǐkɔ towe su.” Bɔ gbe ɖé ɖi sín jǐxwé bo ɖɔ: “Un ko sɔ́ su, bo ka ná lɛ́ sɔ́ su.”

29 Ahwan e ɖo te ɖo fínɛ́ é se gbe ɔ, bo jɛ ɖiɖɔ jí ɖɔ jǐ wɛ dó gbe. Mɛ ɖěvo lɛ́ ɖɔ: “Wɛnsagun ɖé ɖɔ xó n’i.” 30 Jezu ka yí gbe ɖɔ: “Nyi wú wɛ gbe énɛ́ ɖi ǎ, loɔ, mi wú wɛ é ɖi. 31 È ɖo hwɛ ɖɔ xá gbɛ élɔ́ wɛ din, bɔ axɔ́sú gbɛ élɔ́ tɔn ɔ, è ná nya ɛ tɔ́n. 32 É ɖo mɔ̌ có, ényí è sɔ́ mì ɖó jǐ gúdo ɔ, un ná dɔn gbɛtɔ́ alɔkpa lɛ́ bǐ wá gɔ̌n ce.” 33 É ɖo mɔ̌ ɖɔ wɛ bo ná dó xlɛ́ kú alɔkpa e ná kú wɛ é ɖe é. 34 Ahwan ɔ ka yí gbe n’i ɖɔ: “Mǐ se ɖo Sɛ́n ɔ mɛ ɖɔ Klísu ɔ ná nɔ gbɛ káká sɔ́yi. Nɛ̌ ka gbɔn bɔ a ná ɖɔ ɖɔ è ɖó ná sɔ́ Gbɛtɔ́ví ɔ ɖó jǐ? Mɛ̌ ka nyí Gbɛtɔ́ví énɛ́?” 35 Jezu ɖɔ nú yě ɖɔ: “Wěziza ɔ ná nɔ tɛ́ntin mitɔn nú hwenu kpɛɖé gɔ́ ná. Mi ɖi zɔnlin hwenu e wěziza ɔ kpo ɖo tɛ́ntin mitɔn é, bónú ablu ma wá ɖó acɛ dó mi jí ó; mɛ ɖěbǔ e ɖo zɔnlin ɖi wɛ ɖo ablu mɛ é tuun fí e é xwe é ǎ. 36 Din e wěziza ɔ ɖo tɛ́ntin mǐtɔn é ɔ, mi ɖe xlɛ́ ɖɔ émí ɖi nǔ nú wěziza ɔ, bo ná dó sixú húzú vǐ wěziza tɔn lɛ́.”

Jezu ɖɔ xó énɛ́ lɛ́ bo gosín fínɛ́, lobo sɔ́ éɖée hwlá dó yě. 37 É bló nǔjíwǔ gěgé ɖo nukɔn yětɔn có, yě ka ɖi nǔ n’i ǎ, 38 bónú xó e gbeyíɖɔ Ezayíi ɖɔ é ní dó sixú jɛnu. É ɖɔ: “Jexóva,* mɛ̌ ka ɖi nǔ nú xó e è se ɖo mǐ nu é? Mɛ̌ Jexóva* ka ɖe hlɔ̌nhlɔ́n* tɔn xlɛ́?” 39 Ezayíi lɛ́ ɖɔ hwɛjijɔ e wú yě ma kpé wú bo ɖi nǔ ǎ é. É ɖɔ: 40 “É va nukún yě, bo bló bɔ ayi yětɔn syɛ́n, bónú yě ní ma mɔ nǔ ɖó nukún yětɔn lɛ́ wú, lobonú ayi yětɔn mɔ nukúnnú jɛ nǔ mɛ ó. Mɔ̌ mɛ ɔ, yě ná lɛ́ kɔ wá gɔ̌n ce bónú má gbɔ azɔn nú yě ǎ.” 41 Ezayíi ɖɔ nǔ énɛ́ lɛ́, ɖó é mɔ susu Jezu tɔn, bo ɖɔ xó dó wǔtu tɔn. 42 É ɖo mɔ̌ có, mɛ gěgé ɖi nǔ n’i, káká jɛ acɛkpatɔ́ lɛ́ jí. Yě ka nɔ yí gbe ɖɔ émí ɖi nǔ n’i ǎ, ɖó Falizyɛn lɛ́ wútu, bónú è ma wá nya yě sín kplɔ́ngbasá ɔ ó; 43 ɖó yě yí wǎn nú susu e gbɛtɔ́ nɔ xɔ nú mɛ é hú susu e Mawu nɔ xɔ nú mɛ é.

44 Amɔ̌, Jezu sú xó bo ɖɔ: “Mɛ ɖěbǔ e ɖi nǔ nú mì é ɖi nǔ nú nyiɖokpónɔ ǎ, loɔ, é lɛ́ ɖi nǔ nú Mɛ e sɛ́ mì dó é; 45 bɔ mɛ ɖěbǔ e mɔ mì é mɔ Mɛ e sɛ́ mì dó é lɔ. 46 Un wá gbɛ ɔ mɛ bo cí wěziza ɖɔhun, bónú mɛ ɖěbǔ e ná ɖi nǔ nú mì é ní ma nɔ ablu mɛ ó. 47 Amɔ̌, ényí mɛ ɖěbǔ se xó ce lɛ́ bo ma bló ɖ’é jí ǎ ɔ, un nɔ ɖɔ hwɛ xá ɛ ǎ; ɖó un wá, bo ná ɖɔ hwɛ xá gbɛ ɔ ǎ, loɔ, bo ná dó hwlɛ́n gbɛ ɔ gán wú wɛ. 48 Mɛ ɖěbǔ e gbɛ́ mì bo ma yí xó ce lɛ́ ǎ é ɔ, nǔɖé ɖe bo ná ɖɔ hwɛ xá ɛ. Xó e un ɖɔ é wɛ ná ɖɔ hwɛ xá ɛ ɖo azǎn gǔdo gúdo tɔn ɔ gbe. 49 Ðó nǔ e jló nyiɖésúnɔ lɛ́ é wɛ un nɔ ɖɔ ǎ, é nyɔ́ wa ɔ, Tɔ́ e sɛ́ mì dó é ɖésúnɔ wɛ zɔ́n nǔ e un ɖó ná ɖɔ é kpó nǔ e un ɖó ná kplɔ́n mɛ é kpó mì. 50 Bɔ un tuun ɖɔ nǔ e é zɔ́n é nɔ ná mɛ gbɛ mavɔmavɔ. Énɛ́ wú ɔ, nǔ ɖěbǔ e un nɔ ɖɔ é ɔ, lěe Tɔ́ ɔ ɖɔ nú mì gbɔn é wɛ un nɔ ɖɔ.”

13 Jezu tuun jɛ nukɔn nú Dǐndínwáyixwe ɔ ɖɔ hwenu e émí ná gosín gbɛ élɔ́ mɛ, bo ná yi Tɔ́ ɔ gɔ́n é ko su, bɔ ɖó é yí wǎn nú mɛ e nyí étɔn ɖo gbɛ ɔ mɛ lɛ́ é wútu ɔ, é yí wǎn nú yě káká yi vivɔnu. 2 Yě ɖo gbadanu núɖuɖu ɖu wɛ. Awǒvi ka ko sɔ́ dó ayi mɛ nú Judási Isikaliɔ́ti, éé nyí Sinmɔ́ɔ ví é ɖɔ é ní sa Jezu. 3 Énɛ́ ɔ, ɖó Jezu tuun ɖɔ Tɔ́ ɔ ko sɔ́ nǔ lɛ́ bǐ dó alɔ mɛ nú émí, bɔ émí gosín Mawu gɔ́n, bo lɛ́ xweyǐgbe Mawu gɔ́n wútu ɔ, 4 é sí te sín nǔɖuɖu ɔ kɔn, bo ɖe awu tɔn aga tɔn lɛ́ ɖó kɛ́n ɖokpó. É sɔ́ wǔsúnsúnnú bo sin dó alin. 5 Énɛ́ gúdo ɔ, é wún sin dó gannú mɛ, bo jɛ afɔ klɔ́ nú ahwanvú lɛ́ jí, bo nɔ dɔn wǔsúnsúnnú e ɖo sinsin ɖo alin tɔn é dó súnsún afɔ nú yě. 6 É wá jɛ Sinmɔ́ɔ Piyɛ́ɛ jí. Piyɛ́ɛ ɖɔ n’i ɖɔ: “Aklúnɔ, afɔ ná klɔ́ nú mì wɛ a ɖe a?” 7 Jezu yí gbe n’i ɖɔ: “Nǔ e bló wɛ un ɖe é ɔ, a mɔ nukúnnú jɛ mɛ din ǎ, amɔ̌, a ná wá mɔ nukúnnú jɛ mɛ.” 8 Piyɛ́ɛ ɖɔ n’i ɖɔ: “A ná klɔ́ afɔ nú mì gbeɖé ǎ.” Jezu yí gbe n’i ɖɔ: “Ényí un ma klɔ́ afɔ nú we ǎ hǔn, nyi kpó hwi kpó kpé dó nǔ ɖě ǎ.” 9 Sinmɔ́ɔ Piyɛ́ɛ ɖɔ n’i ɖɔ: “Aklúnɔ, é nyí afɔ ce lɛ́ kɛ́ɖɛ́ wɛ a ná klɔ́ ǎ, lɛ̌ klɔ́ alɔ ce lɛ́ kpó ta ce kpó.” 10 Jezu ɖɔ n’i ɖɔ: “Mɛ ɖěbǔ e ko lɛ wǔ é sɔ́ ɖó nǔ ɖě sín hudó zɛ afɔ klɔ́klɔ́ wú ǎ, ɖó éɖésúnɔ bǐ ko mɛ́. Midɛɛ lɛ́ ɔ, mi ko mɛ́, loɔ, mi bǐ wɛ ǎ.” 11 É tuun mɛ e ja sisa ɛ gbé é. Énɛ́ wú wɛ é ɖɔ: “Mi bǐ wɛ mɛ́ ǎ.”

12 Din ɔ, ée é klɔ́ afɔ nú yě fó, bo sɔ́ awu tɔn aga tɔn lɛ́ dó é ɔ, é lɛ́ jínjɔ́n ayǐ ɖo távo tó, bo ɖɔ nú yě ɖɔ: “Mi ka mɔ nukúnnú jɛ nǔ e un bló nú mi é mɛ a? 13 Mi nɔ ylɔ́ mì ɖɔ ‘Mɛ̌si,’ bo nɔ lɛ́ ylɔ́ mì ɖɔ ‘Aklúnɔ’; hwɛ mitɔn ka jɔ, ɖó mɔ̌ wɛ un nyí. 14 Hǔn, ényí nyɛ mɛ e nyí Aklúnɔ, bo lɛ́ nyí Mɛ̌si é klɔ́ afɔ nú mi ɔ, mi lɔ ɖó ná* nɔ klɔ́ afɔ nú miɖée lɛ́. 15 Ðó un sɔ́ kpɔ́ndéwú ɔ ɖ’ayǐ nú mi, bónú lěe un bló gbɔn nú mi é ɔ, mi lɔ ní nɔ bló gbɔn mɔ̌. 16 Má ɖɔ nǔgbó nú mi, mɛsɛntɔ́ ɖé nɔ hú gǎn gǎn tɔn ǎ, mɔ̌ jɛ́n mɛ e è sɛ́ dó é ma nɔ hú gǎn mɛ e sɛ́ ɛ dó é ǎ é nɛ́. 17 Ðó mi tuun nǔ énɛ́ lɛ́ wútu ɔ, awǎjijɛnɔ wɛ nú mi, ényí mi bló ɖ’é jí ɔ nɛ́. 18 Mi bǐ xó ɖɔ wɛ un ɖe ǎ; un tuun mɛ e un cyán lɛ́ é. Amɔ̌ nǔ nyí mɔ̌, bónú nǔwlánwlán mímɛ́ ɔ ní dó sixú jɛnu, é wɛ nyí ɖɔ: ‘Mɛ e ɖo nǔ ɖu xá mì wɛ é húzú kpan nukɔn mì.’ 19 Bɛ́sín din ɔ, un ɖo ɖiɖɔ nú mi wɛ cóbɔ é ná jɛ, bónú hwenu e é ná jɛ é ɔ, mi ní dó sixú ɖi nǔ ɖɔ un nyí mɛ e un ɖɔ un nyí é. 20 Má ɖɔ nǔgbó nú mi, mɛ ɖěbǔ e yí mɛ e un sɛ́ dó é ɖěbǔ é yí nyi lɔ, bɔ mɛ ɖěbǔ e yí mì é yí Mɛ e sɛ́ mì dó é lɔ.”

21 Ée Jezu ɖɔ xó énɛ́ lɛ́ gúdo é ɔ, ayi tɔn gba dó ɖésú, bɔ é ɖɔ nyi wɛn ɖɔ: “Má ɖɔ nǔgbó nú mi, mɛ ɖokpó ɖo mi mɛ bo ná sa mì.” 22 Ahwanvú lɛ́ jɛ yěɖée lɛ́ kpɔ́n jí, ɖó mɛ e xó ɖɔ wɛ é ɖe é bú vo dó yě. 23 Ahwanvú lɛ́ ɖokpó ka ɖo ayǐjínjɔ́n ɖo Jezu kpá tútútú;* mɛ e Jezu yí wǎn ná é wɛ. 24 Énɛ́ wú ɔ, Sinmɔ́ɔ Piyɛ́ɛ sɔ́ ta dó ylɔ́ ɛ, bo ɖɔ n’i ɖɔ: “Ðɔ mɛ e xó ɖɔ wɛ é ɖe é nú mǐ.” 25 Énɛ́ ɔ, ahwanvú ɔ nya dó Jezu sín akɔ́nnú, bo ɖɔ n’i ɖɔ: “Aklúnɔ, mɛ̌ ka wɛ?” 26 Jezu yí gbe ɖɔ: “Mɛ e un ná sɔ́ wɔ̌xúxú fínfɛ́n, bo sún nǔsúnnú, bo ná sɔ́ ná é wɛ.” Énɛ́ ɔ, ée é sɔ́ wɔ̌xúxú ɔ, bo sún nǔsúnnú gúdo é ɔ, é zé jó nú Judási, Sinmɔ́ɔ Isikaliɔ́ti ví ɔ. 27 Ée Judási yí wɔ̌xúxú fínfɛ́n ɔ gúdo é ɔ, Satáan byɔ́ ayi mɛ n’i. Bɔ Jezu ɖɔ n’i ɖɔ: “Yǎ wǔ wa nǔ e wa wɛ a ɖe é.” 28 É ɖo mɔ̌ có, mɛ e ɖo ayǐjínjɔ́n ɖo távo ɔ tó lɛ́ é ɖě tuun nǔ e wú é ɖɔ mɔ̌ n’i é ǎ. 29 Nǔgbó ɔ, yě mɛ ɖé lɛ́ ɖo linlin wɛ ɖɔ ɖó Judási wɛ nɔ hɛn akwɛ́gbá ɔ wútu ɔ, Jezu ɖo ɖiɖɔ n’i wɛ ɖɔ: “Yi xɔ nǔ e sín hudó mǐ ɖó nú xwe ɔ é,” alǒ é ní ná nǔɖé wamamɔnɔ lɛ́. 30 Énɛ́ ɔ, ée é yí wɔ̌xúxú fínfɛ́n ɔ gúdo é ɔ, é tɔ́n tlóló. Zǎn ko kú nɛ́.

31 Ée é tɔ́n gúdo é ɔ, Jezu ɖɔ: “Din ɔ, è sɔ́ Gbɛtɔ́ví ɔ su, bo sɔ́ Mawu su gbɔn jǐ tɔn. 32 Mawu ɖésúnɔ ná sɔ́ ɛ su, bo ná sɔ́ ɛ su tlóló din. 33 Vǐ ce vívɛ́ná lɛ́ è mi, hwenu kpɛɖé jɛ́n kpo bɔ un ná nɔ kpɔ́ xá mi ná. Mi ná ba mì, bɔ lěe un ko ɖɔ nú Jwifu lɛ́ gbɔn ɖ’ayǐ é ɔ, un ɖo ɖiɖɔ nú mi lɔmɔ̌ wɛ din ɖɔ: ‘Fí e un xwe é ɔ, mi sixú wá ǎ.’ 34 Un ɖo sɛ́n yɔ̌yɔ́ ɖokpó ná mi wɛ, é wɛ nyí ɖɔ mi ní yí wǎn nú miɖée lɛ́; lěe un yí wǎn nú mi gbɔn é ɔ, mi lɔ ní yí wǎn nú miɖée lɛ́ gbɔn mɔ̌. 35 Ényí mi yí wǎn nú miɖée lɛ́ ɔ, mɛ lɛ́ bǐ ná tuun ɖɔ mi nyí ahwanvú ce lɛ́.”

36 Sinmɔ́ɔ Piyɛ́ɛ ɖɔ n’i ɖɔ: “Aklúnɔ, fítɛ́ a ka xwe?” Jezu yí gbe ɖɔ: “Fí e un xwe é ɔ, a sixú xwedó mì yi din ǎ, amɔ̌, a ná wá wá ɖo nukɔnmɛ.” 37 Piyɛ́ɛ ɖɔ n’i ɖɔ: “Aklúnɔ, étɛ́wú un ma ka sixú xwedó we yi din ǎ? Un ná sɔ́ gbɛ* ce jó dó ta towe mɛ.” 38 Jezu yí gbe ɖɔ: “A ná sɔ́ gbɛ* towe jó dó ta ce mɛ nǔgbó a? Má ɖɔ nǔgbó nú we, cóbónú kokló ná kɔ́ así ɔ, a ná ko gbɛ́ mì azɔn atɔn.”

14 “Ayi mitɔn ní ma gba dó ó. Mi ɖe xlɛ́ ɖɔ émí ɖi nǔ nú Mawu; mi ɖe xlɛ́ ɖɔ émí ɖi nǔ nú nyi lɔ. 2 Nɔtɛn gěgé wɛ ɖo Tɔ́ ce xwé. Nú é ma nyí mɔ̌ ǎ ɔ, un ná ko ɖɔ nú mi, ɖó un xweyǐgbe, bo ná yi sɔ́ nǔ nú nɔtɛn ɖé nú mi. 3 Gɔ́ ná ɔ, ényí un yi, bo sɔ́ nǔ nú nɔtɛn ɖé nú mi gúdo ɔ, un ná lɛ́vɔ́ wá, bo ná yí mi dó fí e un ɖe é, bónú fí e un ɖe é ɔ, mi lɔmɔ̌ ná nɔ fínɛ́. 4 Fí e un ka xwe é ɔ, mi tuun ali tɔn.”

5 Tɔmáa ɖɔ n’i ɖɔ: “Aklúnɔ, mǐ tuun fí e a xwe é ǎ. Nɛ̌ mǐ ka sixú tuun ali tɔn gbɔn lo?”

6 Jezu ɖɔ n’i ɖɔ: “Nyɛ wɛ nyí ali ɔ, nǔgbó ɔ, kpó gbɛ kpó. Mɛ ɖěbǔ sixú wá Tɔ́ ɔ gɔ́n nyɛ mɛvo ǎ. 7 Ényí mi ko tuun mì wɛ ɔ, mi ná ko tuun Tɔ́ ce lɔmɔ̌. Bɛ́sín din ɔ, mi tuun i, bo mɔ ɛ.”

8 Filípu ɖɔ n’i ɖɔ: “Aklúnɔ, xlɛ́ Tɔ́ ɔ mǐ, énɛ́ ko kpé mǐ.”

9 Jezu ɖɔ n’i ɖɔ: “Filípu, un ɖo kpɔ́ xá mi din é ɔ, é sɔ́ hwe ǎ, bɔ a ko tuun mì ǎ jɛ́n wɛ a? Mɛ ɖěbǔ e mɔ mì é ko mɔ Tɔ́ ɔ lɔ. Nɛ̌ ka gbɔn lo, bɔ a ɖɔ: ‘Xlɛ́ Tɔ́ ɔ mǐ’? 10 A ɖi nǔ ɖɔ un ɖo bǔ xá Tɔ́ ɔ, bɔ Tɔ́ ɔ ɖo bǔ xá mì ǎ cé? Nǔ e un nɔ ɖɔ nú mi lɛ́ é ɔ, linlin nyiɖésúnɔ tɔn lɛ́ wɛ un nɔ ɖɔ ǎ, é nyɔ́ wa ɔ, Tɔ́ ɔ e ɖo bǔ xá mì é wɛ ɖo azɔ̌ tɔn wa wɛ. 11 Ðɔ e un ɖɔ ɖɔ un ɖo bǔ xá Tɔ́ ɔ, bɔ Tɔ́ ɔ ɖo bǔ xá mì é ɔ, mi ɖi nǔ ná. É ma nyí mɔ̌ ǎ hǔn, mi ɖi nǔ ɖó azɔ̌ ce lɛ́ wú. 12 Má ɖɔ nǔgbó nú mi, ényí mɛ ɖěbǔ ɖe xlɛ́ ɖɔ émí ɖi nǔ nú mì ɔ, mɛ ɔ lɔ ná wa azɔ̌ e un nɔ wa lɛ́ é; é tlɛ ná wa azɔ̌ e hú gǎn énɛ́ lɛ́ é, ɖó un xweyǐgbe Tɔ́ ɔ gɔ́n. 13 Gɔ́ ná ɔ, nǔ ɖěbǔ e mi ná byɔ́ ɖo nyǐkɔ ce mɛ é ɔ, un ná bló, bónú è ní dó sixú kpa susu nú Tɔ́ ɔ gbɔn Vǐ ɔ jí. 14 Ényí mi byɔ́ nǔ ɖěbǔ ɖo nyǐkɔ ce mɛ ɔ, un ná bló.

15 “Ényí mi yí wǎn nú mì ɔ, mi ná nyi sɛ́n ce lɛ́. 16 Bɔ un ná byɔ́ Tɔ́ ɔ, bɔ é ná sɛ́ alɔdómɛtɔ́* ɖěvo dó mi, bónú é ná nɔ kpɔ́ xá mi káká sɔ́yi; 17 gbigbɔ e nɔ ɖe nǔgbó ɔ xlɛ́ é wɛ, gbɛ ɔ ka sixú mɔ yí ǎ, ɖó gbɛ ɔ nɔ mɔ ɛ ǎ, é ka lɛ́ tuun i ǎ. Midɛɛ lɛ́ tuun i, ɖó é ɖo kpɔ́ xá mi, bo lɛ́ ɖo mi mɛ. 18 Un ná jó mi dó nyi miɖokpó* ǎ. Un ná lɛ́ kɔ wá mi gɔ́n. 19 É kpo kpɛɖé bɔ gbɛ ɔ sɔ́ ná mɔ mì ɖě ǎ, amɔ̌, midɛɛ lɛ́ ná mɔ mì, ɖó un ɖo gbɛ, bɔ mi lɔ ná nɔ gbɛ. 20 Hwenɛ́nu ɔ, mi ná tuun ɖɔ un ɖo bǔ xá Tɔ́ ce, bɔ mi ɖo bǔ xá mì, bɔ nyɛ ɖo bǔ xá mi. 21 Mɛ ɖěbǔ e yí gbe nú sɛ́n ce lɛ́ bo nɔ nyi é wɛ nyí mɛ e yí wǎn nú mì é. Mɛ ɖěbǔ e ka yí wǎn nú mì é ɔ, Tɔ́ ce ná yí wǎn n’i, bɔ un ná yí wǎn n’i, bo ná ɖe nyiɖée xlɛ́ ɛ céɖécéɖé.”

22 Judási (é nyí Judási Isikaliɔ́ti ǎ) ɖɔ n’i ɖɔ: “Aklúnɔ, nɛ̌ ka gbɔn bɔ a lin ná ɖe hwiɖée xlɛ́ mǐdɛɛ lɛ́ céɖécéɖé, bo ma ka ná ɖe hwiɖée xlɛ́ gbɛ ɔ ǎ?”

23 Jezu ka yí gbe n’i ɖɔ: “Ényí mɛ ɖěbǔ yí wǎn nú mì ɔ, é ná xwedó xó ce, bɔ Tɔ́ ce ná yí wǎn n’i, lobɔ mǐ ná wá gɔ̌n tɔn, bo ná nɔ kpɔ́ xá ɛ. 24 Mɛ ɖěbǔ e ma yí wǎn nú mì ǎ é nɔ xwedó xó ce lɛ́ ǎ. Xó e se wɛ mi ɖe é nyí ce ǎ, loɔ, Tɔ́ e sɛ́ mì dó é tɔn wɛ.

25 “Un ko ɖɔ nǔ énɛ́ lɛ́ nú mi din e un kpo ɖo kpɔ́ xá mi é. 26 Amɔ̌, alɔdómɛtɔ́ ɔ, énɛ́ wɛ nyí, gbigbɔ mímɛ́ ɔ, ée Tɔ́ ɔ ná sɛ́ dó ɖo nyǐkɔ ce mɛ é, ná kplɔ́n nǔ lɛ́ bǐ mi, bo ná flín nǔ e un ko ɖɔ nú mi lɛ́ é bǐ mi. 27 Fífá wɛ un jó dó nú mi; fífá ce wɛ un ná mi. Un ná mi lěe gbɛ ɔ nɔ ná mɛ gbɔn é ǎ. Mi ma nú ayi mitɔn gba dó ó, mi ma ɖi xɛsi ó. 28 Mi se bɔ un ɖɔ nú mi ɖɔ: ‘Un xweyǐgbe, bo ka ná lɛ́ lɛ́ kɔ wá mi gɔ́n.’ Ényí mi yí wǎn nú mì ɔ, xomɛ ná hun mi ɖɔ un xwe Tɔ́ ɔ gɔ́n, ɖó Tɔ́ ɔ hú gǎn mì. 29 Hǔn, un ko ɖɔ nú mi din, cóbɔ nǔ ná nyí mɔ̌, bónú mi ní dó sixú ɖi nǔ hwenu e nǔ ná nyí mɔ̌ é. 30 Un sɔ́ ná ɖɔ xó gěgé xá mi ǎ, ɖó axɔ́sú gbɛ ɔ tɔn ko jawě, é ka ɖó acɛ* ɖě dó jǐ ce ǎ. 31 Amɔ̌, bónú gbɛ ɔ ná dó tuun ɖɔ un yí wǎn nú Tɔ́ ɔ ɔ, un ɖo nǔ wa wɛ lěe Tɔ́ ɔ ɖe gbe tɔn nú mì ɖɔ nyi ní wa gbɔn é. Mi sí te bónú mǐ ní gosín fí.

15 “Nyi wɛ nyí vǐwuntín adodwé ɔ, bɔ Tɔ́ ce nyí glesi ɔ. 2 É nɔ sɛ́n ala e ɖo wǔ ce, bo ma nɔ ná sínsɛ́n ǎ lɛ́ é bǐ síin, bo nɔ jlá ala nú éé nɔ ná sínsɛ́n lɛ́ é bǐ, bónú yě ní dó sixú lɛ́ ná sínsɛ́n d’é jí. 3 Mi ko mɛ́, ɖó xó e un ɖɔ nú mi lɛ́ é wú. 4 Mi nɔ bǔ xá mì, énɛ́ ɔ, nyi lɔ ná nɔ bǔ xá mi. Vǐwuntín sín ala ɖé sixú nɔ éɖóɖó bo ná sínsɛ́n ǎ, vǐwuntín ɔ wú jɛ́n é ná nɔ. Mɔ̌ ɖokpó ɔ, ényí mi ma nɔ bǔ xá mì ǎ ɔ, mi sixú ná sínsɛ́n ǎ. 5 Nyɛ wɛ nyí vǐwuntín ɔ, bɔ midɛɛ lɛ́ nyí ala lɛ́. Mɛ ɖěbǔ e nɔ bǔ xá mì, bɔ nyi lɔ nɔ bǔ xá ɛ é nɔ ná sínsɛ́n gěgé; ɖó nyɛ mɛvo ɔ, mi sixú wa nǔtí ǎ. 6 Ényí mɛ ɖěbǔ ma nɔ bǔ xá mì ǎ ɔ, é nɔ cí atínla e è sɛ́n nyi gbě, bɔ é xú é ɖɔhun. Ala énɛ́ lɛ́ ɔ, xo wɛ è nɔ xo yě kplé bo nɔ bɛ́ dó myɔ́ mɛ bɔ yě nɔ ji. 7 Ényí mi nɔ bǔ xá mì, bónú xó ce lɛ́ nɔ ayi mitɔn mɛ ɔ, mi byɔ́ nǔ ɖěbǔ e ba wɛ mi ɖe é ɔ, mi ná mɔ yí. 8 Ényí mi nɔ ná sínsɛ́n gěgé, bo nɔ ɖe xlɛ́ ɖɔ émí nyí ahwanvú ce ɔ, é nɔ sɔ́ Tɔ́ ce su. 9 Lěe Tɔ́ ɔ yí wǎn nú mì gbɔn é ɔ, mɔ̌ wɛ nyi lɔ yí wǎn nú mi gbɔn; mi bo nɔ wǎnyíyí ce mɛ. 10 Nú mi nyi sɛ́n ce lɛ́ ɔ, mi ná nɔ wǎnyíyí ce mɛ, lěe nyi lɔ nyi Tɔ́ ɔ sín sɛ́n lɛ́, bo ɖo wǎnyíyí tɔn mɛ gbɔn é.

11 “Un ɖɔ nǔ énɛ́ lɛ́ nú mi, bónú mi ní dó sixú ɖó awǎjijɛ nyiɖɔhun, lobonú awǎjijɛ mitɔn ní dó sixú nyí awǎjijɛ kpíkpé. 12 Sɛ́n e un ná mi é ɖíe: mi ní yí wǎn nú miɖée lɛ́ lěe un yí wǎn nú mi gbɔn é. 13 Wǎn yí nú mɛ ɖě sɔ́ hú è ní sɔ́ gbɛ* mɛtɔn jó dó xɔ́ntɔn mɛtɔn lɛ́ tamɛ ǎ. 14 Ényí mi bló nǔ e zɔ́n mi wɛ un ɖe lɛ́ é ɔ, xɔ́ntɔn ce lɛ́ wɛ mi nyí. 15 Un sɔ́ nɔ ylɔ́ mi ɖɔ mɛsɛntɔ́ ɖě ǎ, ɖó mɛsɛntɔ́ nɔ tuun nǔ e wa wɛ gǎn tɔn ɖe é ǎ. É nyɔ́ wa ɔ, un ylɔ́ mi ɖɔ xɔ́ntɔn, ɖó un ɖɔ nǔ e un se ɖo Tɔ́ ce nu lɛ́ é bǐ nú mi. 16 Midɛɛ lɛ́ wɛ sɔ́ mì ǎ, loɔ, nyɛ wɛ cyán mi, bónú mi ní nɔ ɖo sínsɛ́n ná wɛ, lobonú sínsɛ́n mitɔn ní nɔ ayǐ. Mɔ̌ mɛ ɔ, nǔ ɖěbǔ e mi ná byɔ́ Tɔ́ ɔ ɖo nyǐkɔ ce mɛ é ɔ, é ná ná mi.

17 “Un zɔ́n nǔ énɛ́ lɛ́ mi, bónú mi ní dó sixú yí wǎn nú miɖée lɛ́. 18 Ényí gbɛ ɔ gbɛ́ wǎn nú mi hǔn, mi ní tuun ɖɔ é ko gbɛ́ wǎn nú nyɛ hwɛ̌ cóbó wá gbɛ́ wǎn nú mi. 19 Ényí mi ko nyí gbɛ ɔ tɔn wɛ ɔ, gbɛ ɔ ná ko yí wǎn nú mi, amɔ̌, ɖó un ko cyán mi sín gbɛ ɔ mɛ, bɔ mi ma nyí gbɛ ɔ tɔn ǎ wútu ɔ, gbɛ ɔ gbɛ́ wǎn nú mi. 20 Mi hɛn xó élɔ́ e un ɖɔ nú mi é ayi mɛ: Mɛsɛntɔ́ ɖé nɔ hú gǎn gǎn tɔn ǎ. Nú yě dó ya nú mì ɔ, yě ná dó ya nú mi lɔmɔ̌; ényí yě xwedó xó ce ɔ, yě ná xwedó mi lɔmɔ̌ tɔn. 21 Amɔ̌, yě ná wa nǔ énɛ́ lɛ́ bǐ nú mi ɖó nyǐkɔ ce wútu, ɖó yě tuun Mɛ e sɛ́ mì dó é ǎ. 22 Ényí un ma ko wá, bo ɖɔ xó ɖěbǔ nú yě ǎ wɛ ɔ, hwɛ ɖě ná ɖo kɔ nú yě ǎ. Amɔ̌ din ɔ, yě sɔ́ sixú ba hwɛjijɔ ɖě nú hwɛ yětɔn ǎ. 23 Mɛ ɖěbǔ e gbɛ́ wǎn nú mì é gbɛ́ wǎn nú Tɔ́ ce lɔ. 24 Ényí un ma ko wa azɔ̌ e mɛ ɖěbǔ ma wa kpɔ́n ǎ lɛ́ é ɖo tɛ́ntin yětɔn ǎ wɛ ɔ, hwɛ ɖě ná ɖo kɔ nú yě ǎ; amɔ̌ din ɔ, yě mɔ mì, bo lɛ́ gbɛ́ wǎn nú nyi kpó Tɔ́ ce kpó bǐ. 25 Nǔ nyí mɔ̌, bónú nǔ élɔ́ e è wlán dó Sɛ́n yětɔn mɛ é ní dó jɛnu: ‘Yě gbɛ́ wǎn nú mì ma sín nǔɖé wú.’ 26 Un ná sɛ́ alɔdómɛtɔ́ ɔ dó mi sín Tɔ́ ɔ gɔ́n, gbigbɔ e nɔ ɖe nǔgbó ɔ xlɛ́, bo nɔ gosín Tɔ́ ɔ gɔ́n é wɛ. Hwenu e é ná wá é ɔ, é ná ɖe kúnnu nú mì. 27 Mɔ̌ ɖokpó ɔ, mi lɔ ɖó ná ɖe kúnnu nú mì, ɖó mi ko ɖo kpɔ́ xá mì sín bǐbɛ́mɛ.

16 “Un ɖɔ nǔ énɛ́ lɛ́ nú mi, bónú nǔ ɖěbǔ ní ma wá nyí afɔklɛ́nnú nú mi ó. 2 Mɛ lɛ́ ná nya mi sín kplɔ́ngbasá lɛ́. Nǔgbó ɔ, hwe ɔ nu ɖo nǎ su wɛ, bɔ mɛ ɖěbǔ e ná hu mi é, ná vɛdó ɖɔ Mawu wɛ émí sɛn gbɔn mɔ̌ sín. 3 Amɔ̌, yě ná wa nǔ énɛ́ lɛ́, ɖó yě tuun Tɔ́ ɔ ǎ, yě ka lɛ́ tuun nyi lɔ ǎ. 4 É ɖo mɔ̌ có, un ɖɔ nǔ énɛ́ lɛ́ nú mi, bónú gan e mɛ nǔ ná nyí mɔ̌ dó é wá xo ɔ, mi ná flín ɖɔ un ko ɖɔ yě nú mi.

“Un ɖɔ nǔ énɛ́ lɛ́ nú mi ɖ’ayǐ ǎ, ɖó un ɖo kpɔ́ xá mi. 5 Amɔ̌ din ɔ, un xwe mɛ e sɛ́ mì dó é gɔ́n; mi mɛ ɖě ka kanbyɔ́ mì ɖɔ: ‘Fítɛ́ a ka xwe?’ a jí ǎ. 6 Xó énɛ́ lɛ́ e un ka ɖɔ nú mi é zɔ́n bɔ mi byɔ́ aluwɛ ɖaxó mɛ. 7 É ɖo mɔ̌ có, nǔgbó ɖɔ nú mi wɛ un ɖe, ɖagbe mitɔn wú wɛ un xweyǐgbe. Ðó ényí un ma yi ǎ ɔ, alɔdómɛtɔ́ ɔ ná wá gɔ̌n mitɔn ǎ; ényí un ka yi ɔ, un ná sɛ́ ɛ dó mi. 8 Bɔ hwenu e é ná wá é ɔ, é ná ɖe nǔ e hwɛhuhu, nǔjlɔ́jlɔ́wiwa kpó hwɛɖiɖɔ kpó nyí é xlɛ́ gbɛ ɔ nyi wɛn. 9 Jɛ nukɔn hwɛ̌ ɔ, é ná ɖe nǔ e hwɛhuhu nyí é xlɛ́, ɖó yě nɔ ɖe xlɛ́ ɖɔ émí ɖi nǔ nú mì ǎ. 10 Énɛ́ gúdo ɔ, é ná ɖe nǔ e nǔjlɔ́jlɔ́wiwa nyí é xlɛ́, ɖó un xwe Tɔ́ ɔ gɔ́n, bɔ mi sɔ́ ná mɔ mì ɖě ǎ. 11 Gǔdo mɛ ɔ, é ná ɖe nǔ e hwɛɖiɖɔ nyí é xlɛ́, ɖó è ko ɖɔ hwɛ xá gǎn gbɛ élɔ́ tɔn.

12 “É kpo nǔ gěgé bɔ un ná ɖɔ nú mi, loɔ, mi sixú mɔ nǔ jɛ yě mɛ din ǎ. 13 Amɔ̌, hwenu e alɔdómɛtɔ́* ɔ, énɛ́ wɛ nyí gbigbɔ e nɔ ɖe nǔgbó ɔ xlɛ́ é ná wá é ɔ, é ná xlɛ́ ali mi, bɔ mi ná mɔ nukúnnú jɛ nǔgbó ɔ mɛ mlɛ́mlɛ́, ɖó linlin éɖésúnɔ tɔn lɛ́ wɛ é ná ɖɔ ǎ, é nyɔ́ wa ɔ, nǔ e é se é wɛ é ná ɖɔ. Gɔ́ ná ɔ, é ná ɖɔ nǔ e ɖó ná wá jɛ lɛ́ é nú mi. 14 É ná sɔ́ mì su, ɖó é ná ɖɔ nǔ e é se ɖo nu ce lɛ́ é nú mi. 15 Nǔ e Tɔ́ ce ɖó lɛ́ é bǐ wɛ nyí ce. Énɛ́ wú wɛ un ɖɔ ɖɔ é ná ɖɔ nǔ e é se ɖo nu ce lɛ́ é nú mi. 16 É kpo kpɛɖé bɔ mi sɔ́ ná mɔ mì ɖě ǎ; é lɛ́ kpo kpɛɖé bɔ mi ná mɔ mì.”

17 Ée é ɖɔ mɔ̌ é ɔ, ahwanvú tɔn ɖé lɛ́ ɖɔ nú yěɖée lɛ́ ɖɔ: “Étɛ́ ɖɔ gbé é ka ja bo ɖɔ nú mǐ ɖɔ: ‘É kpo kpɛɖé bɔ mi sɔ́ ná mɔ mì ǎ; é lɛ́ kpo kpɛɖé bɔ mi ná mɔ mì,’ bo lɛ́ ɖɔ: ‘Ðó un xwe Tɔ́ ɔ gɔ́n’?” 18 Bɔ yě nɔ ɖo ɖiɖɔ wɛ ɖɔ: “Étɛ́ ɖɔ gbé é ka ja bo ɖɔ: ‘É kpo kpɛɖé’? Mǐ tuun nǔ e xó ɖɔ wɛ é ɖe é ǎ.” 19 Jezu tuun ɖɔ yě jló ná kan nǔ byɔ́ émí, énɛ́ wú ɔ, é ɖɔ nú yě ɖɔ: “Ðɔ e un ɖɔ: ‘É kpo kpɛɖé bɔ mi sɔ́ ná mɔ mì ǎ; é lɛ́ kpo kpɛɖé bɔ mi ná mɔ mì’ é wɛ zɔ́n bɔ mi ɖo nǔ énɛ́ kanbyɔ́ miɖée lɛ́ wɛ a? 20 Má ɖɔ nǔgbó nú mi, mi ná ya avǐ, bo ná ná alě, gbɛ ɔ ka ná j’awǎ; mi ná byɔ́ aluwɛ mɛ, amɔ̌, aluwɛ mitɔn ná wá húzú awǎjijɛ. 21 Ényí nyɔ̌nu ɖé ɖo ajidonu ɔ, é nɔ se wǔvɛ́, ɖó hwenu e é ná mɔ wǔvɛ́ dó é wɛ su, amɔ̌, ényí é ji vǐ ɔ gúdo ɔ, é sɔ́ nɔ flín wǔvɛ́ lɛ́ ɖě ǎ, ɖó gbɛtɔ́ e wá gbɛ é zɔ́n bɔ é ɖó awǎjijɛ. 22 Mɔ̌ ɖokpó ɔ, mi lɔ ɖo aluwɛ mɛ din; amɔ̌ un ná lɛ́ wá mɔ mi, énɛ́ ɔ, awǎjijɛ mitɔn ná túnflá, bɔ mɛ ɖěbǔ ná yí awǎjijɛ mitɔn sín mi sí ǎ. 23 Hwe énɛ́ nu ɔ, mi sɔ́ ná kan nǔ ɖěbǔ byɔ́ mì ǎ. Má ɖɔ nǔgbó nú mi, ényí mi byɔ́ nǔ ɖěbǔ Tɔ́ ɔ ɖo nyǐkɔ ce mɛ ɔ, é ná ná mi. 24 Káká jɛ din ɔ, mi ko byɔ́ nǔ ɖěbǔ ɖo nyǐkɔ ce mɛ ǎ. Mi ní byɔ́, énɛ́ ɔ, mi ná mɔ yí, bónú awǎjijɛ mitɔn ní dó sixú nyí awǎjijɛ kpíkpé.

25 “Nǔjlɛ́dónǔwú lɛ́ wɛ un zán dó ɖɔ xó énɛ́ lɛ́ nú mi. Hwe ɔ nu ɖo nǎ su wɛ, bɔ un sɔ́ ná zán nǔjlɛ́dónǔwú dó ɖɔ xó nú mi ǎ, loɔ, un ná ɖɔ xó nú mi dó Tɔ́ ɔ wú nyi wɛn. 26 Hwe énɛ́ nu ɔ, mi ná byɔ́ nǔ Tɔ́ ɔ ɖo nyǐkɔ ce mɛ; é ka nyí ɖiɖɔ wɛ un ɖe ɖɔ un ná byɔ́ nǔ dó ta mitɔn mɛ ǎ. 27 Ðó Tɔ́ ɔ ɖésúnɔ yí wǎn nú mi, ɖó mi yí wǎn nú mì, bo lɛ́ ɖi nǔ ɖɔ afɔsɔ́ɖótetɔ́ Mawu tɔn wɛ un nyí bo wá. 28 Afɔsɔ́ɖótetɔ́ Tɔ́ ɔ tɔn wɛ un nyí bo wá gbɛ ɔ mɛ. Din ɔ, un ɖo gbɛ ɔ mɛ gosín wɛ, bo xwe Tɔ́ ɔ gɔ́n.”

29 Ahwanvú tɔn lɛ́ ɖɔ: “Din wɛ a ɖo xó ɖɔ nú mǐ wɛ nyi wɛn, ma zán nǔjlɛ́dónǔwú lɛ́ nɛ́ sín! 30 Din ɔ, mǐ mɔ nǔ jɛ wú ɖɔ a tuun nǔ lɛ́ bǐ, bɔ é byɔ́ ɖɔ mɛ ɖě ní to kan nǔ byɔ́ we hwɛ̌ ǎ. Énɛ́ wú ɔ, mǐ ɖi nǔ ɖɔ Mawu gɔ́n wɛ a gosín.” 31 Jezu yí gbe nú yě ɖɔ: “Mi ɖi nǔ din a? 32 Éɖíe! Gan ɔ ɖo nǎ xo wɛ, xo wɛ é tlɛ ko xo lɔ, bɔ è ná gba mi dó, bɔ mi mɛ ɖokpó ɖokpó ná ɖidó xwé miɖésúnɔ tɔn gbe, lobɔ mi ná jó mì dó nyi nyiɖokpó. Amɔ̌, un ɖo nyiɖokpó ǎ, ɖó Tɔ́ ɔ ɖo kpɔ́ xá mì. 33 Un ɖɔ nǔ énɛ́ nú mi, bónú mi ní dó sixú ɖó fífá gbɔn nyɛ gblamɛ. Mi ná mɔ wǔvɛ́ ɖo gbɛ ɔ mɛ, amɔ̌, mi kpankɔ́n! Un ko ɖu ɖo gbɛ ɔ jí.”

17 Ée Jezu ɖɔ xó énɛ́ lɛ́ gúdo é ɔ, é kpɔ́n jǐ bo ɖɔ: “Tɔ́, gan ɔ ko xo. Sɔ́ vǐ towe su, bónú vǐ towe ní dó sixú sɔ́ we su. 2 Sɔ́ ɛ su, lěe a ko ná ɛ acɛ dó gbɛtɔ́ lɛ́ bǐ jí, bónú é ní dó sixú ná gbɛ mavɔmavɔ mɛ ɖěɖěe a ná ɛ lɛ́ é bǐ gbɔn é. 3 Gbɛ mavɔmavɔ ɔ wɛ nyí ɖɔ yě ní kplɔ́n bo tuun* hwi Mawu nǔgbó ɖokpó ɔ, kpó Jezu Klísu e a sɛ́ dó é kpó. 4 Un sɔ́ we su ɖo ayǐkúngban jí, bo wa azɔ̌ e a sɔ́ d’así nú mì é yi fó. 5 Hǔn din ɔ, Tɔ́, vɔ̌ susu e un ko ɖó ɖ’ayǐ ɖo akpá towe, cóbɔ gbɛ ɔ tíin é ná mì ɖo akpá towe, dó sɔ́ mì su.

6 “Un ɖe nyǐkɔ towe xlɛ́ mɛ ɖěɖěe a ná mì ɖo gbɛ ɔ mɛ lɛ́ é.* Towe wɛ yě nyí, bɔ a ná yě mì, lobɔ yě xwedó* xó towe. 7 Din ɔ, yě tuun ɖɔ nǔ e a ná mì lɛ́ é bǐ ɔ, gɔ̌n towe wɛ yě gosín; 8 ɖó un ɖɔ xó e a ɖɔ nú mì lɛ́ é nú yě, bɔ yě yí gbe ná, lobo wá tuun nǔgbó nǔgbó ɖɔ afɔsɔ́ɖótetɔ́ towe wɛ un nyí bo wá, bɔ yě ɖi nǔ ɖɔ hwi wɛ sɛ́ mì dó. 9 Ta yětɔn mɛ byɔ́ nǔ dó wɛ un ɖe; gbɛ ɔ tamɛ byɔ́ nǔ dó wɛ un ɖe ǎ, loɔ, mɛ e a ná mì lɛ́ é tamɛ byɔ́ nǔ dó wɛ un ɖe, ɖó towe wɛ yě nyí; 10 Nǔ e un ɖó lɛ́ é bǐ wɛ nyí towe, bɔ towe lɛ́ nyí ce, lobɔ un xɔ susu ɖo tɛ́ntin yětɔn.

11 “Un sɔ́ ɖo gbɛ ɔ mɛ ǎ, ɖó un ja gɔ̌n towe, amɔ̌, yědɛɛ lɛ́ ɖo gbɛ ɔ mɛ. Tɔ́ mímɛ́, kpɔ́n dó nyǐkɔ towe e a ná mì é* wú, bo kpɔ́n yě jí, bónú yě ní dó sixú nyí ɖokpó,* lěe nyi kpó hwi kpó nyí ɖokpó* gbɔn é. 12 Hwenu e un ɖo kpɔ́ xá yě é ɔ, un nɔ kpɔ́n yě jí, ɖó nyǐkɔ towe e a ná mì é wútu; un nya xɛ ɖo yě jí, bɔ è sú kún dó nú yě mɛ ɖěbǔ zɛ mɛ e è ná sú kún dó ná é wú ǎ, bónú nǔwlánwlán mímɛ́ ɔ ní dó sixú jɛnu. 13 Amɔ̌ din ɔ, un ja gɔ̌n towe, bɔ un ɖo nǔ énɛ́ lɛ́ ɖɔ wɛ ɖo gbɛ ɔ mɛ, bónú yě ní dó sixú ɖó awǎjijɛ e un ɖó é kpíkpé tɔn. 14 Un sɔ́ xó towe d’así nú yě, amɔ̌, gbɛ ɔ gbɛ́ wǎn nú yě, ɖó yě nyí gbɛ ɔ tɔn ǎ, lěe nyi lɔ ma nyí gbɛ ɔ tɔn ǎ gbɔn é.

15 “Un byɔ́ ɖɔ a ní ɖe yě sín gbɛ ɔ mɛ ǎ, loɔ, ɖɔ a ní kpɔ́n yě jí, ɖó mɛ nyanya ɔ wú. 16 Yě nyí gbɛ ɔ tɔn ǎ, lěe nyi lɔ ma nyí gbɛ ɔ tɔn ǎ gbɔn é. 17 Blǒ bónú yě ní nyí mɛ mímɛ́,* gbɔn nǔgbó ɔ gblamɛ; xó towe nyí nǔgbó. 18 Lěe a sɛ́ mì dó gbɛ ɔ mɛ gbɔn é ɔ, nyi lɔ sɛ́ yě dó gbɛ ɔ mɛ. 19 Un hɛn nyiɖée ɖó mǐmɛ́ jí dó ta yětɔn mɛ, bónú yě lɔ ní dó sixú nyí mɛ mímɛ́, gbɔn nǔgbó ɔ gblamɛ.

20 “Yědɛɛ lɛ́ kɛ́ɖɛ́ tamɛ byɔ́ nǔ dó wɛ un ɖe ǎ, loɔ, un lɛ́ ɖo nǔ byɔ́ dó mɛ ɖěɖěe ná wá ɖi nǔ nú mì, gbɔn xó yětɔn gblamɛ lɛ́ é tamɛ wɛ, 21 bónú yě mɛ bǐ ní nyí ɖokpó, lěe hwɛ Tɔ́ ɔ ɖo bǔ xá mì bɔ nyi lɔ ɖo bǔ xá we gbɔn é, bónú yě lɔ ní dó sixú nɔ bǔ xá mǐ, lobonú gbɛ ɔ ní dó sixú ɖi nǔ ɖɔ a sɛ́ mì dó. 22 Un ná yě susu e a ná mì é, bónú yě ní dó sixú nyí ɖokpó, lěe nyi kpó hwi kpó nyí ɖokpó gbɔn é. 23 Un ɖo bǔ xá yě, bɔ a ɖo bǔ xá mì, bónú yě ní dó sixú nyí ɖokpó bɔ nǔ bǐ ná vɔ ɖ’é wú,* lobonú gbɛ ɔ ní dó sixú tuun ɖɔ hwi wɛ sɛ́ mì dó, bɔ a yí wǎn nú yě, lěe a yí wǎn nú mì gbɔn é. 24 Tɔ́, un jló ɖɔ mɛ e a ná mì lɛ́ é ní nɔ fí e un ɖe é xá mì, bónú yě ní dó sixú mɔ susu e a ná mì é, ɖó a yí wǎn nú mì jɛ nukɔn nú hwenu e è ɖó gbɛ ɔ ayǐ é.* 25 Tɔ́ nǔjlɔ́jlɔ́watɔ́, nǔgbó ɔ, gbɛ ɔ tuun we ǎ, amɔ̌, nyɛ tuun we, bɔ mɛ élɔ́ lɛ́ tuun ɖɔ hwi wɛ sɛ́ mì dó. 26 Un bló bɔ yě tuun nyǐkɔ towe, bo ka ná lɛ́ kpo ɖo mɔ̌ wa wɛ, bónú yě ní dó sixú yí wǎn nú mɛ, lěe a yí wǎn nú mì gbɔn é, lobonú má nɔ bǔ xá yě.”

18 Ée Jezu ɖɔ xó énɛ́ lɛ́ gúdo é ɔ, é kpó ahwanvú tɔn lɛ́ kpó d’asá tɔdo Sedlɔ́n tɔn, bo ɖidó jikpá ɖé mɛ. 2 Judási e ɖo nǎ sa ɛ wɛ é lɔ tuun fínɛ́, ɖó hwɛhwɛ wɛ Jezu kpó ahwanvú tɔn lɛ́ kpó ko nɔ kplé ɖo fínɛ́. 3 Judási kplá sɔ́jagbɛ́ta ɖé gɔ́ nú tɛ́nplicɔ́tɔ́ e vɔ̌sánúxwlémawutɔ́gán lɛ́ kpó Falizyɛn lɛ́ kpó sɛ́ dó lɛ́ é wá; yě hɛn zohwín, zogbɛ́n kpó alyánnú kpó. 4 Ðó Jezu tuun nǔ e ɖo nǎ gbo è wɛ lɛ́ é bǐ wútu ɔ, é sɛ yi nukɔn bo ɖɔ nú yě ɖɔ: “Mɛ̌ ba wɛ mi ka ɖe?” 5 Yě yí gbe n’i ɖɔ: “Jezu Nazalɛ́tinu ɔ.” É ɖɔ nú yě ɖɔ: “Nyɛ wɛ.” Judási e ɖo nǎ sa ɛ wɛ é lɔ ka ɖo yě mɛ.

6 Amɔ̌, ée Jezu ɖɔ nú yě ɖɔ: “Nyɛ wɛ” é ɔ, yě jó agɔ yi gǔdo bo j’ayǐ. 7 É lɛ́vɔ́ kanbyɔ́ yě ɖɔ: “Mɛ̌ ba wɛ mi ka ɖe?” Yě ɖɔ: “Jezu Nazalɛ́tinu ɔ.” 8 Jezu yí gbe ɖɔ: “Un ɖɔ nú mi ɖɔ nyɛ wɛ. Énɛ́ wú ɔ, ényí nyɛ ba wɛ mi ɖe hǔn, mi jó mɛ élɔ́ lɛ́ dó bónú yě ní yi.” 9 Nǔ nyí mɔ̌ bónú xó e é ɖɔ é ní dó jɛnu, é wɛ nyí ɖɔ: “Un hɛn mɛ e a ná mì lɛ́ é ɖokpó vɔ́vɔ́ bú ǎ.”

10 Sinmɔ́ɔ Piyɛ́ɛ ka ɖó hwǐ ɖokpó. É sún hwǐ ɔ, bo xú mɛsɛntɔ́ vɔ̌sánúxwlémawutɔ́ ɖaxó ɔ tɔn, lobo kpa tó tɔn ɖisíxwé tɔn ɔ. Malukúsi wɛ mɛsɛntɔ́ ɔ nɔ nyí. 11 Amɔ̌, Jezu ɖɔ nú Piyɛ́ɛ ɖɔ: “Sɔ́ hwǐ ɔ dó akún mɛ. Un ɖó ná nu kɔ́fu e Tɔ́ ɔ ná mì é ǎ cé?”

12 Énɛ́ ɔ, sɔ́ja lɛ́, sɔ́ja afatɔ́ngán ɔ kpó tɛ́nplicɔ́tɔ́ e Jwifugán lɛ́ sɛ́ dó é kpó wlí Jezu* bo blá ɛ. 13 Yě kplá ɛ yi Anási gɔ́n jɛ nukɔn, ɖó é wɛ nyí asitɔ́ nú Kayífu, éé nyí vɔ̌sánúxwlémawutɔ́ ɖaxó xwe énɛ́ xwe é. 14 Kayífu wɛ nyí mɛ e kplɔ́n nǔ Jwifugán lɛ́ ɖɔ, ényí mɛ ɖokpó kú dó togun ɔ tamɛ ɔ, é ná ɖó le nú yě hú gǎn é.

15 Sinmɔ́ɔ Piyɛ́ɛ kpó ahwanvú ɖěvo kpó ka ɖo Jezu xwedó wɛ. Vɔ̌sánúxwlémawutɔ́ ɖaxó ɔ tuun ahwanvú énɛ́, bɔ é kpó Jezu kpó yi vɔ̌sánúxwlémawutɔ́ ɖaxó ɔ sín kɔ́xota, 16 amɔ̌, Piyɛ́ɛ ɖo te ɖo hɔntogbó ɔ jí* ɖo kɔ́xo. Énɛ́ ɔ, ahwanvú ɖě ɔ e vɔ̌sánúxwlémawutɔ́ ɖaxó ɔ tuun é tɔ́n, bo yi ɖɔ xó nú mɛsɛntɔ́ nyɔ̌nu hɔnjínɔtɔ́ ɔ, lobo kplá Piyɛ́ɛ byɔ́ xwé ɔ gbe. 17 Énɛ́ gúdo ɔ, mɛsɛntɔ́ nyɔ̌nu ɔ ɖɔ nú Piyɛ́ɛ ɖɔ: “Hwi lɔ ɖo nya énɛ́ sín ahwanvú lɛ́ mɛ ǎ cé?” É ɖɔ: “Un ɖo yě mɛ ǎ.” 18 Ðó jɔhɔn gbɛ́ wútu ɔ, mɛsɛntɔ́ lɛ́ kpó tɛ́nplicɔ́tɔ́ lɛ́ kpó flɔ́ akán bo ɖo te lɛ́ lɛ̌ dó, lobo ɖo myɔ xú wɛ. Piyɛ́ɛ lɔ ɖo te xá yě bo ɖo myɔ xú wɛ.

19 Vɔ̌sánúxwlémawutɔ́gán ɔ kan nǔ byɔ́ Jezu dó ahwanvú tɔn lɛ́ kpó nǔkplɔ́nmɛ tɔn kpó wú. 20 Jezu yí gbe n’i ɖɔ: “Un ɖɔ xó nú gbɛ ɔ ɖo agbawungba. Hwebǐnu wɛ un kplɔ́n nǔ mɛ ɖo kplɔ́ngbasá kpó tɛ́npli mɛ kpó, fí e Jwifu lɛ́ nɔ kplé ɖe é; un ɖɔ nǔ ɖěbǔ ɖo nǔglɔ́ ǎ. 21 Étɛ́wú a ka ɖo nǔ kanbyɔ́ mì wɛ? Kan nǔ byɔ́ mɛ ɖěɖěe se xó e un ɖɔ nú yě lɛ́ é. Yě mɛ énɛ́ lɛ́ tuun xó e un ɖɔ lɛ́ é.” 22 Ée Jezu ɖɔ xó énɛ́ lɛ́ gúdo é ɔ, tɛ́nplicɔ́tɔ́ e ɖo te ɖo fínɛ́ lɛ́ é ɖokpó gba nukúnmɛ n’i, bo ɖɔ: “Mɔ̌ wɛ a ná yí gbe nú vɔ̌sánúxwlémawutɔ́gán ɔ gbɔn a?” 23 Jezu yí gbe n’i ɖɔ: “Ényí nǔɖé wɛ un ɖɔ nyi do hǔn, ɖɔ nǔ e un ɖɔ nyi do é nú mì; amɔ̌, ényí xójɔxó wɛ nyí xó e un ɖɔ é hǔn, étɛ́wú a ka xo mì?” 24 Jezu kpo ɖo blǎblá jí mɔ̌, bɔ Anási nyi i sɛ́dó vɔ̌sánúxwlémawutɔ́ ɖaxó Kayífu gɔ́n.

25 Sinmɔ́ɔ Piyɛ́ɛ ka ɖo te fínɛ́ bo ɖo myɔ xú wɛ. Bɔ yě ɖɔ n’i ɖɔ: “Hwi lɔ ɖo ahwanvú tɔn lɛ́ mɛ ǎ cé?” É ka gbɛ́ bo ɖɔ: “Un ɖo yě mɛ ǎ.” 26 Vɔ̌sánúxwlémawutɔ́ ɖaxó ɔ sín mɛsɛntɔ́, éé nyí hɛ̌nnumɔ nya e Piyɛ́ɛ kpa tó ná é tɔn é ɖɔ: “Un mɔ hwi kpó é kpó ɖo jikpá ɔ mɛ ǎ cé?” 27 É ɖo mɔ̌ có, Piyɛ́ɛ lɛ́vɔ́ gbɛ́, bɔ tlóló ɔ, kokló kɔ́ así.

28 Énɛ́ gúdo ɔ, yě kplá Jezu sín Kayífu gɔ́n yi tokpɔngán ɔ sín hɔnmɛ zǎnzǎn tɛɛn. Amɔ̌, yěɖésúnɔ byɔ́ tokpɔngán ɔ sín hɔnmɛ ǎ, ɖó yě jló ná hɛn yěɖée blí bónú Dǐndínwáyixwe ɔ ɖuɖu ná gló yě ǎ. 29 Énɛ́ wú ɔ, Pilátu wá gɔ̌n yětɔn ɖo kɔ́xo ɔ ta bo ɖɔ: “Hwɛ tɛ́ dó nya élɔ́ wɛ mi ka ɖe?” 30 Yě yí gbe n’i ɖɔ: “Ényí nya élɔ́ ma nyí nǔwanyidotɔ́* ǎ ɔ, mǐ ná kplá ɛ wá jó nú we ǎ.” 31 Énɛ́ ɔ, Pilátu ɖɔ nú yě ɖɔ: “Miɖésúnɔ ní kplá ɛ bo yi ɖɔ hwɛ xá ɛ sɔgbe xá sɛ́n mitɔn.” Jwifugán lɛ́ ka ɖɔ n’i ɖɔ: “É sɔgbe xá sɛ́n ɖɔ mǐ ní hu mɛ ɖěbǔ ǎ.” 32 Nǔ nyí mɔ̌ bónú xó e Jezu ɖɔ dó kú alɔkpa e kú gbé é ja é wú é ní dó jɛnu.

33 Pilátu ka lɛ́ kɔ yi hɔn ɔ mɛ bo ylɔ́ Jezu, lobo ɖɔ n’i ɖɔ: “Hwi wɛ nyí Axɔ́sú Jwifu lɛ́ tɔn ɔ a?” 34 Jezu yí gbe ɖɔ: “Linlin hwiɖésúnɔ tɔn lɛ́ wɛ zɔ́n bɔ a ɖo mɔ̌ kanbyɔ́ mì wɛ a, alǒ mɛ ɖěvo lɛ́ wɛ ɖɔ xó ce nú we?” 35 Pilátu yí gbe ɖɔ: “A tuun ɖɔ un kún nyí Jwifu ó. Akɔta hwiɖésúnɔ tɔn kpó vɔ̌sánúxwlémawutɔ́gán lɛ́ kpó wɛ jó we nú mì. Étɛ́ a ka wa?” 36 Jezu yí gbe ɖɔ: “Axɔ́súɖuto ce nyí gbɛ élɔ́ tɔn ǎ. Ényí Axɔ́súɖuto ce ko nyí gbɛ élɔ́ tɔn wɛ ɔ, ahwanvú ce lɛ́ ná ko fun ahwan bónú è ma jó mì nú Jwifu lɛ́ ó. Amɔ̌, Axɔ́súɖuto ce nyí gbɛ élɔ́ tɔn ǎ.” 37 Énɛ́ ɔ, Pilátu ɖɔ n’i ɖɔ: “Hǔn, axɔ́sú wɛ a nyí nɛ́ hǔn?” Jezu yí gbe ɖɔ: “É nɛ́ ɖɔ wɛ a ɖe pɛ́ɛ́ nɛ́. Nǔ e wú è ji mì bɔ un wá gbɛ ɔ mɛ é wɛ nyí ɖɔ, má ɖe kúnnu nú nǔgbó ɔ. Mɛ e nyí nǔgbó ɔ tɔn é bǐ nɔ ɖótó gbe ce.” 38 Pilátu ɖɔ n’i ɖɔ: “Étɛ́ ka nyí nǔgbó ɔ?”

Ée é ɖɔ mɔ̌ é ɔ, é lɛ́vɔ́ tɔ́n bo wá yi mɔ Jwifugán lɛ́ bo ɖɔ nú yě ɖɔ: “Un mɔ hwɛ ɖě ɖo kɔ n’i ǎ. 39 Gɔ́ ná ɔ, sɔgbe xá walɔ mitɔn ɔ, un ɖó ná ɖe mɛ ɖokpó nyi te nú mi ɖo Dǐndínwáyixwe ɔ hwenu. Énɛ́ wú ɔ, mi ba ɖɔ má ɖe Axɔ́sú Jwifu lɛ́ tɔn nyi te nú mi a?” 40 Yě lɛ́vɔ́ sú xó bo ɖɔ: “Ma ɖe nya énɛ́ nyi te ó, ɖe Balabási nyi te.” Ajotɔ́ axánsúnxó wɛ Balabási ka nyí.

19 Énɛ́ gúdo ɔ, Pilátu ɖɔ ɖɔ è ní kplá Jezu, bo sɔ́ lanbá dó xo è ná. 2 Sɔ́ja lɛ́ sɔ́ wun dó lɔn axɔ́súgbákún ná, bo sɔ́ xwe n’i lobo dó awu vɔvɔ e wi d’é mɛ é n’i. 3 Yě nɔ sɛkpɔ́ ɛ, bo nɔ ɖɔ: “Kú dó lěhwenu,* Axɔ́sú Jwifu lɛ́ tɔn!” Yě nɔ lɛ́ gba nukúnmɛ n’i. 4 Pilátu lɛ́vɔ́ tɔ́n, bo ɖɔ nú yě ɖɔ: “Mi ɖótó! Un ná kplá ɛ tɔ́n nú mi, bónú mi ní dó sixú tuun ɖɔ un kún mɔ hwɛ ɖě ɖo kɔ n’i ó.” 5 Énɛ́ ɔ, Jezu tɔ́n; axɔ́súgbákún e è sɔ́ wun dó lɔn ná é ɖo ta tɔn, bɔ awu vɔvɔ e wi d’é mɛ é ɖo kɔ n’i. Pilátu ɖɔ nú yě ɖɔ: “Mi kpɔ́n! Nya ɔ ɖíe!” 6 Amɔ̌, ée vɔ̌sánúxwlémawutɔ́gán lɛ́ kpó tɛ́nplicɔ́tɔ́ lɛ́ kpó mɔ ɛ é ɔ, yě sú xó ɖɔ: “Xwe è nyi atín wú! Xwe è nyi atín wú!” Pilátu ka ɖɔ nú yě ɖɔ: “Miɖésúnɔ ní kplá ɛ, bo xwe è nyi atín wú, ɖó un mɔ hwɛ ɖě ɖo kɔ n’i ǎ.” 7 Jwifu lɛ́ yí gbe n’i ɖɔ: “Mǐ ɖó sɛ́n ɖokpó, bɔ sɔgbe xá sɛ́n énɛ́ ɔ, é jɛxá kú, ɖó é ɖɔ ɖɔ émí nyí vǐ Mawu tɔn.”

8 Hwenu e Pilátu se xó e ɖɔ wɛ yě ɖe é ɔ, xɛsi lɛ́ ɖi i d’é jí, 9 bɔ é lɛ́vɔ́ lɛ́ kɔ yi hɔn ɔ mɛ, bo ɖɔ nú Jezu ɖɔ: “Fítɛ́ a ka gosín?” Jezu ka ná ɛ xósin ɖě ǎ. 10 Énɛ́ ɔ, Pilátu ɖɔ n’i ɖɔ: “Tin wɛ a tin d’é mɛ nú mì a? A tuun ɖɔ un ɖó acɛ bo ná ɖe we nyi te, alǒ bo ná xwe we nyi atín wú ǎ cé?” 11 Jezu yí gbe n’i ɖɔ: “Ényí Mawu ma ko ná acɛ we wɛ ǎ ɔ, a ná ɖó acɛ kwín ɖokpó dó jǐ ce ǎ. Énɛ́ wú wɛ mɛ e jó mì nú we é ɔ, hwɛ ɖo kɔ n’i hú gǎn.”

12 Ðó hwɛjijɔ énɛ́ wú ɔ, Pilátu kpo ɖo lěe é ná bló gbɔn, bo ɖe è nyi te é ba wɛ, amɔ̌, Jwifu lɛ́ sú xó ɖɔ: “Ényí a ɖe nya énɛ́ nyi te hǔn, a nyí xɔ́ntɔn Sezáa tɔn ǎ. Mɛ ɖěbǔ e ɖɔ ɖɔ émí nyí axɔ́sú é ɔ, Sezáa wɛ é klán gbe xá.” 13 Ée Pilátu se xó énɛ́ lɛ́ gúdo é ɔ, é kplá Jezu tɔ́n, bo jínjɔ́n hwɛɖiɖɔzinkpo* jí ɖo fí e è nɔ ylɔ́ ɖɔ Awǐnnyatítɛ́, bo ka nɔ ylɔ́ ɖɔ Gabáta ɖo Ebléegbe mɛ é. 14 Nǔsísɔ́ nú Dǐndínwáyixwe ɔ sín azǎn gbe ka wɛ; bɔ gan 12 hwemɛ tɔn mɔ̌ ɖo xixo* wɛ. Énɛ́ ɔ, Pilátu ɖɔ nú Jwifu lɛ́ ɖɔ: “Mi kpɔ́n! Axɔ́sú mitɔn ɖíe!” 15 Amɔ̌, yě sú xó ɖɔ: “Hu i! Hu i! Xwe è nyi atín wú!” Pilátu ɖɔ nú yě ɖɔ: “Má xwe axɔ́sú mitɔn nyi atín wú wɛ a?” Vɔ̌sánúxwlémawutɔ́gán lɛ́ yí gbe ɖɔ: “Mǐ ɖó axɔ́sú ɖě zɛ Sezáa wú ǎ.” 16 Énɛ́ ɔ, é sɔ́ ɛ dó alɔ mɛ nú yě bónú yě ní xwe è nyi atín wú.

Bɔ yě kplá Jezu ɖidó. 17 Jezu ɖíɖá yatín* tɔn, bo tɔ́n, bo ɖidó fí e è nɔ ylɔ́ ɖɔ Takágo tɛnmɛ, bo nɔ ylɔ́ ɖɔ Gɔlugɔ́ta ɖo Ebléegbe mɛ é. 18 Yě xwe Jezu nyi atín wú ɖo fínɛ́, gɔ́ nú súnnu we ɖěvo lɛ́; mɛ ɖě ɖo ɖisí tɔn xwé, mɛ ɖě ɖo amyɔ tɔn xwé, bɔ éyɛ́ ɖo tɛ́ntinmɛ. 19 Pilátu lɛ́vɔ́ wlán nǔ ɖokpó, bo sɔ́ ɖó yatín* ɔ tanu. Nǔwlánwlán ɔ ɖɔ: “Jezu Nazalɛ́tinu, Axɔ́sú Jwifu lɛ́ tɔn.” 20 Jwifu gěgé wɛ xa nǔwlánwlán énɛ́, ɖó fí e è xwe Jezu nyi atín wú ɖe é sɛkpɔ́ toxo ɔ, bɔ è ka lɛ́ wlán dó Ebléegbe, Latɛ́ɛngbe kpó Glɛ̌kigbe kpó mɛ. 21 Jwifu lɛ́ sín vɔ̌sánúxwlémawutɔ́gán lɛ́ ka ɖɔ nú Pilátu ɖɔ: “Ma wlán: ‘Axɔ́sú Jwifu lɛ́ tɔn’ ó, loɔ, wlǎn ɖɔ é ɖɔ: ‘Un nyí Axɔ́sú Jwifu lɛ́ tɔn.’” 22 Pilátu yí gbe ɖɔ: “Nǔ e un ko wlán é ɔ, un wlán wɛ.”

23 Din ɔ, ée sɔ́ja lɛ́ xwe Jezu nyi atín wú gúdo é ɔ, yě zé awu tɔn aga tɔn lɛ́, bo má ɖó ɛnɛ, bɔ sɔ́ja ɖokpó ɖokpó yí, lobɔ yě lɛ́ sɔ́ awu tɔn do tɔn ɔ. Amɔ̌, awu do tɔn ɔ ɖó titɔkpa ǎ, lɔn wɛ è lɔn sín aga wá do. 24 Énɛ́ wú ɔ, yě ɖɔ nú yěɖée lɛ́ ɖɔ: “Mǐ ní ma vún ó, é nyɔ́ wa ɔ, mǐ ní nyi akɔ dó, bo ná dó tuun mɛ e tɔn é ná nyí é.” Nǔ nyí mɔ̌, bónú nǔwlánwlán mímɛ́ élɔ́ ní dó jɛnu: “Yě má awu ce lɛ́ ɖo yěɖée lɛ́ tɛ́ntin, bo nyi akɔ dó nǔzínzán ce lɛ́.” Sɔ́ja lɛ́ ka wa nǔ énɛ́ lɛ́ nǔgbó.

25 Jezu sín nɔ kpó nɔ tɔn nɔví nyɔ̌nu kpó ɖo te ɖo yatín* Jezu tɔn kpá; Mali éé nyí asi Klopási tɔn é kpó Mali Magidálanu ɔ kpó lɔ ɖo fínɛ́. 26 Énɛ́ ɔ, ée Jezu mɔ nɔ tɔn kpó ahwanvú e é yí wǎn ná é kpó ɖo te sɛkpɔ́ fínɛ́ é ɔ, é ɖɔ nú nɔ tɔn ɖɔ: “Nyɔ̌nu, vǐ towe ɖíe!” 27 Énɛ́ gúdo ɔ, é ɖɔ nú ahwanvú ɔ ɖɔ: “Nɔ towe ɖíe!” Bɔ bɛ́sín hwenɛ́nu ɔ, ahwanvú ɔ yí i dó xwé éɖésúnɔ tɔn gbe.

28 Énɛ́ gúdo ɔ, ée Jezu tuun ɖɔ nǔ lɛ́ bǐ ko fó din é ɔ, é ɖɔ: “Kɔ xú mì,” bónú nǔwlánwlán mímɛ́ ɔ ní dó jɛnu. 29 Zɛ̌n ɖokpó ka ɖo fínɛ́, bɔ vɛ̌ɛn sinvɛ́sinvɛ́ gɔ́. Énɛ́ ɔ, mɛ e ɖo te ɖo fínɛ́ lɛ́ é ɖé lɛ́ nylɔ́ xumɛtekan dó vɛ̌ɛn sinvɛ́sinvɛ́ ɔ mɛ, bo sɔ́ ɖó izɔ́pu* sín kpo ɖé nu, lobo dlɛ́n dó nu tɔn. 30 Ée Jezu dó vɛ̌ɛn sinvɛ́sinvɛ́ ɔ nu é ɔ, é ɖɔ: “Nǔ bǐ fó!” Bo dó kɔ do, lobɔ gbɔjɛ tɔn xwɛ.*

31 Ðó Nǔsísɔ́ sín azǎn gbe wɛ wútu ɔ, bónú cyɔ lɛ́ ní ma nɔ yatín lɛ́ wú ɖo gbɔjɛzángbe ó, ɖó gbɔjɛzángbe énɛ́ nyí gbɔjɛzán ɖaxó ɖé wútu ɔ, Jwifu lɛ́ byɔ́ Pilátu ɖɔ è ní gba afɔxú nú mɛ e è xwe nyi atín wú lɛ́ é, bo ɖe cyɔ yětɔn lɛ́ síin. 32 Énɛ́ ɔ, sɔ́ja lɛ́ wá, bo gba afɔxú nya nukɔntɔn e è xwe nyi atín wú ɖo Jezu kpá é tɔn lɛ́, lobo lɛ́ gba nya wegɔ́ ɔ lɔ tɔn lɛ́. 33 Amɔ̌, ée yě wá Jezu gɔ́n é ɔ, yě mɔ ɖɔ é ko kú, énɛ́ wú ɔ, yě gba afɔxú tɔn lɛ́ ǎ. 34 Sɔ́ja lɛ́ ɖokpó ka sɔ́ hwǎn adaja mɛ n’i, bɔ tlóló ɔ, hun kpó sin kpó wá yi. 35 Ahwanvú e mɔ nǔ énɛ́ lɛ́ é ɖe kúnnu ná, bɔ kúnnuɖiɖe tɔn ka nyí nǔgbó. É tuun ɖɔ nǔ e émí ɖɔ lɛ́ é nyí nǔgbó, bónú mi lɔmɔ̌ ní dó sixú ɖi nǔ. 36 Nǔgbó ɔ, nǔ énɛ́ lɛ́ jɛ, bónú nǔwlánwlán mímɛ́ ɔ ní dó jɛnu. É wɛ nyí ɖɔ: “È ná gba* xú tɔn lɛ́ ɖokpó vɔ́vɔ́ ǎ.” 37 Gɔ́ ná ɔ, nǔwlánwlán mímɛ́ ɖěvo ɖɔ: “Yě ná kpɔ́n mɛ e yě sɔ́ hwǎn é.”

38 Ée nǔ énɛ́ lɛ́ jɛ gúdo é ɔ, Jozɛ́fu Alimatéenu, éé nyí ahwanvú Jezu tɔn, bo ma ka ɖe mɔ̌ xlɛ́ ǎ, ɖó é ɖo xɛsi ɖi nú Jwifugán lɛ́ wɛ wútu é yi kanbyɔ́ Pilátu ɖɔ émí sixú ɖe cyɔ Jezu tɔn síin a jí, bɔ Pilátu ná gbe è. Énɛ́ ɔ, é wá, bo ɖe cyɔ ɔ síin. 39 Nya e wá gɔ̌n tɔn azɔn nukɔntɔn ɔ zǎnmɛ, bo nɔ nyí Nikodɛ́mu é lɔ wá, bo hɛn mǐla kpó alowɛ́si kpó e è cáká* é, b’ɛ da kilóo 30 mɔ̌. 40 Énɛ́ ɔ, yě sɔ́ cyɔ Jezu tɔn, bo bú lɛ̌ɛnkanvɔ e mɛ nǔhwɛ́nkún ɖe é dó, sɔgbe xá cyɔɖiɖi sín walɔ Jwifu lɛ́ tɔn. 41 Jikpá ɖé ka ɖo fí e è xwe è nyi atín wú ɖe é. Yɔdo yɔ̌yɔ́ ɖokpó ɖo jikpá ɔ mɛ, bɔ è ko sɔ́ mɛɖé d’é mɛ kpɔ́n ǎ. 42 Ðó Nǔsísɔ́ sín azǎn Jwifu lɛ́ tɔn wɛ, bɔ yɔdo ɔ sɛkpɔ́ fínɛ́ wútu ɔ, yě sɔ́ Jezu ɖó fínɛ́.

20 Ðo azǎn nukɔntɔn aklúnɔzángbla ɔ tɔn jí ɔ, Mali Magidálanu ɔ wá yɔdo ɔ kɔn zǎnzǎn hwenu e ablu kpo ɖo te é, bo mɔ bɔ è ko ɖe awǐnnya sín yɔdo ɔ nu. 2 Énɛ́ wú ɔ, é kán wezun yi Sinmɔ́ɔ Piyɛ́ɛ kpó ahwanvú ɖě ɔ e Jezu yí wǎn ná é kpó gɔ́n, bo ɖɔ nú yě ɖɔ: “È ɖe Aklúnɔ sín yɔdo ɔ mɛ, mǐ ka tuun fí e è sɔ́ ɛ ɖó é ǎ.”

3 Énɛ́ ɔ, Piyɛ́ɛ kpó ahwanvú ɖě ɔ kpó ɖidó yɔdo ɔ kɔn. 4 Yě mɛ we lɛ́ bɛ́ wezun ɖó kpɔ́, amɔ̌, ahwanvú ɖě ɔ dó wezun hú Piyɛ́ɛ, bo jɛ yɔdo ɔ kɔn dó nukɔn. 5 Ée é fɛ bo kpɔ́n mɛ é ɔ, é mɔ lɛ̌ɛnkanvɔ lɛ́ ɖo fínɛ́, é ka byɔ́ yɔdo ɔ mɛ ǎ. 6 Sinmɔ́ɔ Piyɛ́ɛ lɔ wá wá, bo byɔ́ yɔdo ɔ mɛ. É mɔ lɛ̌ɛnkanvɔ lɛ́ ɖo fínɛ́. 7 Avɔ e è bú dó ta nú Jezu ɖ’ayǐ é sɔ́ ɖo fí ɖokpó ɔ kpó avɔ e è bú dó wǔtu tɔn é kpó ǎ, é nyɔ́ wa ɔ, é ɖo mlǎmlá ɖo vo. 8 Énɛ́ gúdo ɔ, ahwanvú ɖě ɔ e wá yɔdo ɔ kɔn dó nukɔn é lɔ byɔ́ mɛ, bo mɔ, lobo ɖi nǔ. 9 Yě ka ko mɔ nukúnnú jɛ nǔwlánwlán mímɛ́ e ɖɔ ɖɔ é ɖó ná fɔ́n sín kú é mɛ ǎ. 10 Énɛ́ ɔ, ahwanvú lɛ́ lɛ́ kɔ yi xwé yětɔn lɛ́ gbe.

11 É ɖo mɔ̌ có, Mali kpo ɖo te ɖo kɔ́xo ɖo yɔdo ɔ kpá, bo ɖo avǐ ya wɛ. Hwenu e é ɖo avǐ ya wɛ é ɔ, é fɛ bo kpɔ́n yɔdo ɔ mɛ, 12 énɛ́ ɔ, é mɔ wɛnsagun we ɖo awu wěwé mɛ, bo ɖo ayǐjínjɔ́n ɖo fí e è sɔ́ cyɔ Jezu tɔn mlɔ́ ɖ’ayǐ é; mɛ ɖě ɖo taligbé, bɔ mɛ ɖě ɖo afɔligbé. 13 Bɔ yě ɖɔ n’i ɖɔ: “Nyɔ̌nu, étɛ́wú a ka ɖo avǐ ya wɛ?” É ɖɔ nú yě ɖɔ: “È ɖe Aklúnɔ ce síin, un ka tuun fí e è sɔ́ ɛ ɖó é ǎ.” 14 Ée é ɖɔ mɔ̌ gúdo é ɔ, é lílɛ́, bo mɔ Jezu ɖo te ɖo fínɛ́, amɔ̌, é tuun ɖɔ Jezu wɛ ǎ. 15 Jezu ɖɔ n’i ɖɔ: “Nyɔ̌nu, étɛ́wú a ka ɖo avǐ ya wɛ? Mɛ̌ ba wɛ a ka ɖe?” É vɛdó ɖɔ jikpájíkpɔ́ntɔ́ ɔ wɛ sín, bo ɖɔ n’i ɖɔ: “Mɛɖaxó, ényí hwi wɛ sɔ́ ɛ sín fí hǔn, ɖɔ fí e a sɔ́ ɛ ɖó é nú mì, bónú má yi sɔ́ ɛ.” 16 Jezu ɖɔ n’i ɖɔ: “Mali!” Mali lílɛ́, bo ɖɔ n’i dó Ebléegbe mɛ ɖɔ: “Hlabúni!” (tínmɛ tɔn wɛ nyí “Mɛ̌si!”) 17 Jezu ɖɔ n’i ɖɔ: “Ma tɛ́ dó wǔtu ce ó, ɖó un ko yi Tɔ́ ɔ gɔ́n ǎ. Amɔ̌, yi nɔví ce lɛ́ gɔ́n, bo ɖɔ nú yě ɖɔ: ‘Un xwe Tɔ́ ce, éé nyí Tɔ́ mi lɔ tɔn é gɔ́n; un xwe Mawu ce, éé nyí Mawu mi lɔ tɔn é gɔ́n.’” 18 Mali Magidálanu ɔ yi, bo dó wɛn ɔ ahwanvú lɛ́. É ɖɔ: “Un mɔ Aklúnɔ!” Lobɔ é ɖɔ nǔ e Jezu ɖɔ n’i é nú yě.

19 Hwenu e ganmɛ ko yi tawun ɖo azǎn nukɔntɔn aklúnɔzángbla ɔ tɔn énɛ́ jí é ɔ, ahwanvú lɛ́ kplé ɖó kpɔ́ ɖo xɔ ɖé mɛ, bo sú hɔn dó ta, ɖó yě ɖo xɛsi ɖi nú Jwifu lɛ́ wɛ; Jezu wá nɔ te ɖo tɛ́ntin yětɔn, bo ɖɔ nú yě ɖɔ: “Fífá ní nɔ kpɔ́ xá mi.” 20 Ée é ɖɔ mɔ̌ gúdo é ɔ, é xlɛ́ alɔ tɔn lɛ́ kpó adaja tɔn kpó yě. Énɛ́ ɔ, xomɛ hun ahwanvú lɛ́ ɖɔ yě mɔ Aklúnɔ. 21 Jezu lɛ́ ɖɔ nú yě ɖɔ: “Fífá ní nɔ kpɔ́ xá mi. Lěe Tɔ́ ɔ sɛ́ mì dó gbɔn é ɔ, nyi lɔ ɖo mi sɛ́ dó wɛ.” 22 Ée é ɖɔ xó énɛ́ é ɔ, é fún funfún dó yě, bo ɖɔ nú yě ɖɔ: “Mi yí gbigbɔ mímɛ́. 23 Ényí mi sɔ́ hwɛ kɛ mɛɖé hǔn, Mawu ko sɔ́ kɛ ɛ nɛ́; ényí mi ma sɔ́ hwɛ kɛ mɛɖé ǎ hǔn, Mawu sɔ́ kɛ ɛ ǎ nɛ́.”

24 Amɔ̌, Tɔmáa, éé ɖo mɛsɛ́dó 12 lɛ́ mɛ, bɔ è nɔ ylɔ́ ɖɔ Hǒxo é ɖo kpɔ́ xá yě hwenu e Jezu wá é ǎ. 25 Énɛ́ wú ɔ, ahwanvú ɖě lɛ́ ɖɔ n’i ɖɔ: “Mǐ mɔ Aklúnɔ!” É ka ɖɔ nú yě ɖɔ: “Ényí un ma mɔ hǔnjɛ́n sín wuntun* lɛ́ ɖo alɔ tɔn lɛ́ mɛ, bo sɔ́ alɔví ce dó hǔnjɛ́n sín wuntun lɛ́ mɛ, lobo sɔ́ alɔ ce dó adaja tɔn mɛ ǎ ɔ, un ná ɖi kpɔ́n ǎ.”

26 Azǎn tántɔn gúdo ɔ, ahwanvú Jezu tɔn lɛ́ lɛ́ ɖo xɔ mɛ, bɔ Tɔmáa ɖo kpɔ́ xá yě. È dó gan hɔn lɛ́ mɛ có, Jezu wá, bo nɔ te ɖo tɛ́ntin yětɔn, lobo ɖɔ: “Fífá ní nɔ kpɔ́ xá mi.” 27 Énɛ́ gúdo ɔ, é ɖɔ nú Tɔmáa ɖɔ: “Sɔ́ alɔví towe dó fí, bo kpɔ́n alɔ ce lɛ́; sɔ́ alɔ towe dó adaja ce mɛ, bo gɔn nǔ xo kpɔ́n,* lobo ɖi nǔ.” 28 Tɔmáa yí gbe n’i ɖɔ: “Aklúnɔ ce, Mawu ce!” 29 Jezu ɖɔ n’i ɖɔ: “Mɔ e a mɔ mì é wɛ zɔ́n bɔ a ɖi nǔ a? Awǎjijɛnɔ wɛ nú mɛ e ma mɔ ǎ, bo ka ɖi nǔ lɛ́ é.”

30 Nǔxokpɔ́n ɖ’é mɛ ǎ, Jezu lɛ́ bló nǔjíwǔ gěgé ɖěvo lɛ́ ɖo ahwanvú lɛ́ nukɔn, bɔ è wlán dó wěma mlámlá élɔ́ mɛ ǎ. 31 Amɔ̌, è wlán nǔ élɔ́ lɛ́ ɖ’ayǐ, bónú mi ní dó sixú ɖi nǔ ɖɔ Jezu wɛ nyí Klísu, Vǐ Mawu tɔn, lobonú gbɔn nǔ e mi ɖi é gblamɛ ɔ, mi ní dó sixú mɔ gbɛ gbɔn nyǐkɔ tɔn gblamɛ.

21 Énɛ́ gúdo ɔ, Jezu lɛ́ sɔ́ éɖée xlɛ́ ahwanvú lɛ́* ɖo Tibɛliadi xu ɔ tó. Lěe é sɔ́ éɖée xlɛ́ yě gbɔn é ɖíe: 2 Sinmɔ́ɔ Piyɛ́ɛ, Tɔmáa (ée è nɔ ylɔ́ ɖɔ Hǒxo é), Natanayɛ́li Kána Galilée tɔn nu ɔ, vǐ súnnu Zebeɖée tɔn lɛ́ kpó ahwanvú Jezu tɔn we ɖěvo lɛ́ kpó ɖo kpɔ́. 3 Sinmɔ́ɔ Piyɛ́ɛ ɖɔ nú yě ɖɔ: “Un xwe hwe hu gbé.” Yě ɖɔ n’i ɖɔ: “Mǐ ná xwedó we.” Yě tɔ́n bo byɔ́ tɔjíhún mɛ, amɔ̌, yě wlí nǔ ɖě zǎn énɛ́ mɛ ǎ.

4 É ɖo mɔ̌ có, ée ayǐ ɖo hǐnhɔ́n wɛ é ɔ, Jezu wá nɔ te ɖo agě ɔ jí, amɔ̌, ahwanvú lɛ́ tuun ɖɔ Jezu wɛ ǎ. 5 Jezu ɖɔ nú yě ɖɔ: “Vǐ ce lɛ́ mi, mi ɖó nǔɖuɖu ɖé* a?” Yě yí gbe ɖɔ: “Éǒ!” 6 É ɖɔ nú yě ɖɔ: “Mi nyi ɖɔ ɔ dó ɖisíxwé nú tɔjíhún ɔ, énɛ́ ɔ, mi ná mɔ hweví wlí.” Énɛ́ wú ɔ, yě nyi ɖɔ ɔ, amɔ̌, yě kpé wú bo dɔn byɔ́ tɔjíhún ɔ mɛ ǎ, ɖó hweví lɛ́ sukpɔ́. 7 Énɛ́ ɔ, ahwanvú e Jezu yí wǎn ná é ɖɔ nú Piyɛ́ɛ ɖɔ: “Aklúnɔ wɛ!” Ée Sinmɔ́ɔ Piyɛ́ɛ se ɖɔ Aklúnɔ wɛ é ɔ, é sɔ́ awu tɔn aga tɔn ɔ dó, bo lɔ́n byɔ́ xu ɔ mɛ, ɖó é ɖo awu kléwún ɖé mɛ.* 8 Amɔ̌, ahwanvú ɖě lɛ́ zɔn tɔjíhún ɔ mɛ, bo dɔn ɖɔ e hweví gɔ́ é wá, ɖó yě lín dó agě ǎ; mɛ̌tlu 90* mɔ̌ jɛ́n yě ɖe dó.

9 Ée yě wá agě jí é ɔ, yě mɔ myɔkán ɖo fínɛ́ bɔ hweví ɖ’é jí, yě lɛ́ mɔ wɔ̌xúxú ɖo fínɛ́. 10 Jezu ɖɔ nú yě ɖɔ: “Mi fɔ hweví e mi wlí din lɛ́ é ɖě wá.” 11 Énɛ́ ɔ, Sinmɔ́ɔ Piyɛ́ɛ byɔ́ tɔjíhún ɔ mɛ, bo dɔn ɖɔ ɔ tɔ́n, bɔ hweví kloklo 153 ɖ’é mɛ. Yě sukpɔ́ mɔ̌ có, ɖɔ ɔ vún ǎ. 12 Jezu ɖɔ nú yě ɖɔ: “Mi wá ɖu nǔ.” Ahwanvú lɛ́ ɖě ka glá bo kanbyɔ́ ɛ ɖɔ: “Mɛ̌ a ka nyí?” a jí ǎ, ɖó yě tuun ɖɔ Aklúnɔ wɛ. 13 Jezu sɔ́ wɔ̌xúxú bo ná yě; é lɛ́ wa nǔ ɖokpó ɔ nú hweví lɛ́. 14 Ée è fɔ́n Jezu sín kú gúdo é ɔ, azɔn atɔngɔ́ ɔ nɛ́ é tɔ́n dó ahwanvú lɛ́ jí nɛ́.

15 Ée yě ɖu nǔ ɔ fó é ɔ, Jezu ɖɔ nú Sinmɔ́ɔ Piyɛ́ɛ ɖɔ: “Sinmɔ́ɔ Jaan ví, a yí wǎn nú mì hú nǔ élɔ́ lɛ́ a?” É yí gbe n’i ɖɔ: “Ɛɛn, Aklúnɔ, a tuun ɖɔ un yí wǎn nú we.” Jezu ɖɔ n’i ɖɔ: “Nǎ nǔɖuɖu lɛ̌ngbɔ́ví ce lɛ́.” 16 É lɛ́ ɖɔ n’i azɔn wegɔ́ ɔ ɖɔ: “Sinmɔ́ɔ Jaan ví, a yí wǎn nú mì a?” É yí gbe ɖɔ: “Ɛɛn, Aklúnɔ, a tuun ɖɔ un yí wǎn nú we.” Jezu ɖɔ n’i ɖɔ: “Kpé nukún dó lɛ̌ngbɔ́ví ce lɛ́ wú.” 17 É ɖɔ n’i azɔn atɔngɔ́ ɔ ɖɔ: “Sinmɔ́ɔ Jaan ví, a yí wǎn nú mì a?” Piyɛ́ɛ byɔ́ aluwɛ mɛ, ɖó Jezu kanbyɔ́ ɛ azɔn atɔngɔ́ ɔ ɖɔ: “A yí wǎn nú mì a?” Énɛ́ wú ɔ, é ɖɔ nú Jezu ɖɔ: “Aklúnɔ, a tuun nǔ bǐ; a tuun ɖɔ un yí wǎn nú we.” Jezu ɖɔ n’i ɖɔ: “Nǎ nǔɖuɖu lɛ̌ngbɔ́ví ce lɛ́. 18 Má ɖɔ nǔgbó nú we, hwenu e a ɖo wǐnnyáwínnyá mɛ é ɔ, hwiɖésúnɔ wɛ nɔ dó awu, bo nɔ ɖi zɔnlin yi fí e jló we é. Amɔ̌, hwenu e a ná kpo é ɔ, a ná dlɛ́n alɔ towe lɛ́, bɔ mɛ ɖěvo wɛ ná dó awu nú we, bo ná sɔ́ we yi fí e a ma ba ǎ é.” 19 É ɖɔ mɔ̌ dó dó gesí kú alɔkpa e Piyɛ́ɛ ná kú dó kpa susu nú Mawu é. Ée é ɖɔ mɔ̌ gúdo é ɔ, é ɖɔ nú Piyɛ́ɛ ɖɔ: “Kpo ɖo xwixwedó mì wɛ.”

20 Piyɛ́ɛ lílɛ́ bo mɔ ahwanvú e Jezu yí wǎn ná é ɖo gǔdo yětɔn; ahwanvú énɛ́ wɛ nya dó Jezu sín akɔ́nnú ɖo gbadanu núɖuɖu ɔ hwenu bo ɖɔ: “Aklúnɔ, mɛ̌ ka ɖo nǎ sa we wɛ?” 21 Énɛ́ ɔ, ée Piyɛ́ɛ mɔ ɛ é ɔ, é ɖɔ nú Jezu ɖɔ: “Aklúnɔ, étɛ́ ka ná jɛ dó mɛ élɔ́ jí?” 22 Jezu ɖɔ n’i ɖɔ: “Ényí jlǒ ce wɛ nyí ɖɔ é ní kpo ɖo fí, káká jɛ hwenu e un ná wá é ɔ, étɛ́ ka kan we ɖ’é mɛ? Hwɛ ɔ, kpo ɖo xwixwedó mì wɛ.” 23 Énɛ́ ɔ, xó ɔ gba kpé nɔví lɛ́ tɛ́ntin ɖɔ ahwanvú énɛ́ kún ná kú ó. Jezu ka ɖɔ n’i ɖɔ ahwanvú énɛ́ kún ná kú ó ǎ, é nyɔ́ wa ɔ, é ɖɔ: “Ényí jlǒ ce wɛ nyí ɖɔ é ní kpo ɖo fí, káká jɛ hwenu e un ná wá é ɔ, étɛ́ ka kan we ɖ’é mɛ?”

24 Ahwanvú e ɖe kúnnu nú nǔ énɛ́ lɛ́ é wɛ; é wɛ wlán nǔ énɛ́ lɛ́, bɔ mǐ tuun ɖɔ kúnnuɖiɖe tɔn nyí nǔgbó.

25 Nǔgbó ɔ, Jezu lɛ́ wa nǔ gěgé ɖěvo lɛ́, bɔ ényí è ko wlán bǐ tɛ́nwín lɛnwín wɛ ɔ, un ɖi ɖɔ gbɛ ɔ ɖésúnɔ kún ná sixú hɛn wěma mlámlá lɛ́ ó.