WĚMA E È WLÁN SƐ́DÓ HLƆ̌MANU LƐ́ É

1 Nyɛ Pɔ́lu, kannumɔ Klísu Jezu tɔn, ée è ylɔ́ bónú má nyí mɛsɛ́dó, bɔ è ɖe ɖó vo nú wɛn ɖagbe Mawu tɔn é wɛ ɖo nǔ wlán sɛ́dó mi wɛ. 2 Wɛn ɖagbe énɛ́ ɔ, Mawu ko dó akpá tɔn ɖ’ayǐ gbɔn gbeyíɖɔ tɔn lɛ́ jí ɖo Nǔwlánwlán mímɛ́ lɛ́ mɛ. 3 Wɛn ɖagbe ɔ kunkplá Vǐ tɔn, ée è ji ɖo kúnkan* Davídi tɔn mɛ ɖo agbaza lixo é. 4 Amɔ̌, kpó hlɔ̌nhlɔ́n kpó ɔ, è ɖɔ ɖɔ é nyí Vǐ Mawu tɔn; ɖó Mawu zán gbigbɔ mímɛ́ bo fɔ́n ɛ sín mɛkúkú lɛ́ mɛ; mɛ énɛ́ wɛ nyí Aklúnɔ mǐtɔn Jezu Klísu. 5 Jǐ tɔn wɛ mǐ mɔ fɛ́nú yí, bo lɛ́ nyí mɛsɛ́dó gbɔn, bónú mɛ e ɖo akɔta lɛ́ bǐ mɛ lɛ́ é ní dó sixú ɖi nǔ, bo se tónú n’i dó sɔ́ nyǐkɔ tɔn su. 6 Mawu ylɔ́ mi lɔ ɖo akɔta lɛ́ mɛ bónú mi ná nyí Jezu Klísu tɔn. 7 Un ɖo nǔ wlán sɛ́dó mɛ vívɛ́ná Mawu tɔn e ɖo Hlɔ̌ma, bɔ è ylɔ́ bónú yě ná nyí mɛ mímɛ́ lɛ́ é bǐ wɛ ɖɔ:

Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi.

8 Jɛ nukɔn hwɛ̌ ɔ, un dó kú nú Mawu ce dó mi bǐ tamɛ gbɔn Jezu Klísu jí, ɖó è ɖo nǔɖiɖi mitɔn xó ɖɔ wɛ gbɔn gbɛ ɔ bǐ mɛ. 9 Un nɔ wa sinsɛnzɔ́ mímɛ́ nú Mawu kpó ayi bǐ kpó, bo nɔ jlá wɛn ɖagbe e kunkplá Vǐ tɔn é; é sixú ɖe kúnnu dó wǔtu ce ɖɔ un nɔ xo ɖɛ dó ta mitɔn mɛ hwebǐnu. 10 Un nɔ sa vo ɖɔ ényí é nyɔ́ bló hǔn, má kpé wú bo wá gɔ̌n mitɔn lo, ényí é jló Mawu ɔ nɛ́. 11 Ðó é jló mì tawun ɖɔ má mɔ mi, bo ná dó sixú má nǔníná gbigbɔ tɔn ɖé xá mi bónú mi ná lí dǒ; 12 alǒ, è ná ɖɔ ɔ, mi ná ná akɔ́nkpinkpan mì gbɔn nǔɖiɖi mitɔn gblamɛ, bɔ nyɛ ná ná akɔ́nkpinkpan mi gbɔn nǔɖiɖi ce gblamɛ.

13 Amɔ̌ nɔví lɛ́, un ba ɖɔ mi ní tuun ɖɔ azɔn gěgé wɛ un lin ná wá mi gɔ́n, bo ná dó sixú mɔ mawuxó e un ná ɖɔ ɖo tɛ́ntin mitɔn é sín sínsɛ́n ɖé lɛ́, lěe é nyí gbɔn ɖo akɔta e kpo lɛ́ é mɛ é ɖɔhun, loɔ, nǔ ɖo jijɛ mɛ nú mì wɛ káká jɛ din. 14 Un ɖu axɔ́ dó Glɛ̌kinu lɛ́ kpó toɖévomɛnu lɛ́* kpó bǐ, bo lɛ́ ɖu dó nǔnywɛ́tɔ́ lɛ́ kpó xlonɔ lɛ́ kpó bǐ. 15 Énɛ́ wú ɔ, akpakpa ɖo sísɔ́ mì wɛ bónú má jlá wɛn ɖagbe ɔ mi lɔmɔ̌ ɖo Hlɔ̌ma dɔ̌n. 16 Ðó winnyá nɔ hu mì dó wɛn ɖagbe ɔ wú ǎ; nǔgbó ɔ, wɛn ɖagbe ɔ wɛ nyí nǔ e Mawu nɔ zán dó ɖe hlɔ̌nhlɔ́n tɔn xlɛ́, bo ná dó sixú hwlɛ́n mɛ e ɖi nǔ lɛ́ é bǐ gán é, Jwifu lɛ́ jɛ nukɔn bɔ Glɛ̌kinu lɛ́ lɔ gɔ́ ná. 17 Ðó gbɔn wɛn ɖagbe ɔ jíjlá gblamɛ ɔ, è nɔ ɖe nǔjlɔ́jlɔ́wiwa Mawu tɔn xlɛ́. Nǔ nɔ nyí mɔ̌ ɖó nǔɖiɖi ɖíɖó wútu, bɔ é nɔ zɔ́n bɔ nǔɖiɖi nɔ lí dǒ d’é jí, lěe è ko wlán gbɔn é, é wɛ nyí ɖɔ: “Amɔ̌, nǔjlɔ́jlɔ́watɔ́ ná nɔ gbɛ ɖó nǔ e é ɖi é wútu.”

18 Ðó Mawu ɖo ɖiɖexlɛ́ wɛ sín jǐxwé ɖɔ émí sin xomɛ dó mɛ e ma nɔ sí i ǎ, bo nɔ wa nǔ agɔ lobo nɔ zán wlɛnwín masɔgbe dó sú ali dó nǔgbó ɔ lɛ́ é bǐ, 19 ɖó nǔ e è sixú tuun dó Mawu wú é jɛ wě gannaganna ɖo tɛ́ntin yětɔn; Mawu ko ɖe xlɛ́ yě nyi wɛn. 20 Ðó è nɔ mɔ jijɔ tɔn e gbɛtɔ́ ma sixú mɔ ǎ lɛ́ é gannaganna sín hwenu e é dá gbɛ ɔ é, ɖó yě jɛ wě ɖo nǔ e é bló lɛ́ é mɛ; è tlɛ nɔ mɔ hlɔ̌nhlɔ́n tɔn mavɔmavɔ ɔ kpó Mawu e é nyí é kpó; énɛ́ wú ɔ, yě sɔ́ sixú ba hwɛjijɔ ǎ. 21 Ðó yě tuun Mawu có, yě nɔ sɔ́ ɛ su ɖɔ é nyí Mawu ǎ, yě ka nɔ dó kú n’i ǎ, loɔ, nǔ e yě nɔ lin é nɔ ɖó ta ɖé ǎ, bɔ xlonɔyi yětɔn sɔ́ nɔ mɔ nǔ ǎ.* 22 Yě nɔ ɖɔ ɖɔ émí nyí nǔnywɛ́tɔ́, xlonɔ wɛ ka nú yě. 23 Yě nɔ xɔ susu nú Mawu e ma nɔ kú ǎ é ǎ, é nyɔ́ wa ɔ, yě nɔ xɔ susu nú bǒcyɔ gbɛtɔ́ e nɔ kú é tɔn lɛ́, xɛ lɛ́ tɔn lɛ́, kanlin afɔ ɛnɛnɔ lɛ́ tɔn lɛ́ kpó kanlin e nɔ sá lɛ́ é tɔn lɛ́ kpó.

24 Énɛ́ wú ɔ, ɖó yě nɔ wa nǔ sɔgbe xá nǔ e nɔ jló ayi yětɔn lɛ́ é wútu ɔ, Mawu jó yě dó nú nǔblíblíwiwa bónú yě ní dó sixú sɔ́ agbaza yěɖésúnɔ tɔn lɛ́ dó xo kɔ́. 25 Yě jó nǔgbó Mawu tɔn dó bo ɖi nǔ nú adingban, yě nɔ sɛn nǔɖíɖó lɛ́, bo nɔ wa sinsɛnzɔ́ mímɛ́ nú yě, bo jó Gbɛɖótɔ́ ɔ dó; é wɛ è ka ɖó ná kpa susu ná káká sɔ́yi. Amǐ. 26 Énɛ́ wú wɛ Mawu jó yě dó nú jlǒ xóɖóxámɛ tɔn syɛ́nsyɛ́n e hu winnyá é, ɖó nyɔ̌nu e ɖo yě mɛ lɛ́ é nɔ jó xóɖóxámɛ e nyí jɔwámɔ tɔn lɛ́ é dó, bo nɔ tɛ́ dó éé ma nyí jɔwámɔ tɔn ǎ lɛ́ é wú; 27 mɔ̌ ɖokpó ɔ, súnnu lɛ́ nɔ jó nyɔ̌nu lɛ́ dó, bo nɔ ɖó jlǒ xóɖóxámɛ tɔn syɛ́nsyɛ́n nú súnnu yěɖɔhun lɛ́, bo nɔ ɖo nǔ blíblí wa wɛ; yěɖésúnɔ nɔ sún sin nǔ e yě jɛxá é tɔn* mlɛ́mlɛ́ sɔgbe xá nǔwanyido yětɔn.

28 Ðó yě mɔ ɖɔ é kún jɛxá ɖɔ émí ní tuun Mawu ó* wútu ɔ, Mawu jó yě dó nú linlin nyanya yětɔn lɛ́, bɔ yě nɔ ɖo nǔ e ma sɔgbe ǎ lɛ́ é wa wɛ. 29 Nǔagɔwiwa, hwɛhuhu, nukúnkɛndídó* kpó nǔnyanyawiwa kpó alɔkpa bǐ wɛ yě kpo ná, bo lɛ́ kpo nú wǔhwinhwan, mɛhuhu, jlɛɖiɖɔ, mɛblɛ́blɛ́ kpó linlin nǔ hɛn gblé dó mɛ wú tɔn ɖíɖó kpó, yě nɔ húnhún nǔ ɖɔ,* 30 yě nɔ ɖɔ xó nyanya dó mɛ ɖěvo lɛ́ wú, yě nɔ gbɛ́ wǎn nú Mawu, yě nɔ sí mɛ ǎ, yě nɔ yí go, yě nɔ jlá ajɔ̌ nú yěɖée, yě nɔ bló tuto* nǔ e ná hɛn nǔ gblé dó mɛ wú lɛ́ é tɔn, yě nɔ tlí tó nú mɛjitɔ́ yětɔn lɛ́, 31 yě nɔ ɖó nukúnnúmɔjɛnǔmɛ ǎ, yě nɔ ɖe akpá yětɔn lɛ́ ǎ, yě nɔ ɖó wǎnyíyí jɔwámɔ tɔn ɖěbǔ ǎ, yě nɔ kú nǔbláwǔ nú mɛ ǎ. 32 Mɛ énɛ́ lɛ́ tuun gbetakɛ́n jlɔ́jlɔ́ Mawu tɔn ganjí, é wɛ nyí ɖɔ, mɛ e nɔ wa nǔ énɛ́ lɛ́ é ɔ, kú wɛ jɛxá yě; é ɖo mɔ̌ có, yě nɔ ɖo nǔ énɛ́ lɛ́ wa wɛ lobo nɔ lɛ́ yí gbe nú mɛ e nɔ wa lɛ́ é.

2 Énɛ́ wú ɔ, nɔví ce, ényí a nɔ ɖɔ hwɛ xá mɛ hǔn, hwɛ towe jɔ ǎ, nú a ná bo nyí mɛ ɖěbǔ ɔ nɛ́; ɖó hwenu e a ɖo hwɛ ɖɔ xá mɛ ɖěvo wɛ é ɔ, hwiɖésúnɔ ɖó hwɛ ná wɛ a ɖe, ɖó hwi mɛ e ɖo hwɛ ɖɔ xá mɛ wɛ é ɔ, nǔ ɖokpó ɔ lɛ́ wɛ a nɔ wa. 2 Mǐ tuun ɖɔ Mawu nɔ ɖó hwɛ nú mɛ e nɔ wa nǔ mɔ̌hun lɛ́ é, bɔ hwɛɖiɖɔ tɔn ka sɔgbe xá nǔgbó ɔ.

3 Amɔ̌ nɔví ce, a lin ɖɔ ényí émí nɔ ɖɔ hwɛ xá mɛ ɖěɖěe nɔ wa nǔ mɔ̌hun lɛ́ é, bo ka nɔ wa nǔ énɛ́ lɛ́ ɔ, émí ná gló hwɛɖónúmɛ Mawu tɔn wɛ sín a? 4 Alǒ lěe xomɛnyínyɔ́ tɔn, hǔnkúkú tɔn kpó suúlu tɔn kpó d’agba sɔ é dó vɛ̌ ná wɛ a ɖe a? A tuun ɖɔ Mawu ɔ, ɖo xomɛnyínyɔ́ tɔn mɛ ɔ, tíntɛ́nkpɔ́n wɛ é ɖe bo ná d’alɔ we bónú hwɛ towe lɛ́ ná vɛ́ nú we* ǎ cé? 5 Amɔ̌, ɖó ta syɛ́nsyɛ́n towe kpó hwɛ towe lɛ́ e ma nɔ vɛ́ nú we* ǎ é kpó wútu ɔ, xomɛsin Mawu tɔn kplé ɖ’ayǐ nú hwiɖée wɛ a ɖe, nú gbe e gbe é ná ɖe xomɛsin tɔn kpó hwɛ jlɔ́jlɔ́ ɖiɖɔ tɔn kpó xlɛ́ é. 6 É ná sú axɔ́ mɛ ɖokpó ɖokpó sɔgbe xá nǔ e mɛ ɔ wa lɛ́ é: 7 mɛ ɖěɖěe nɔ ɖó kan dó nǔɖagbewiwa wú,* bo ná dó mɔ susu, yɛ̌yi kpó agbaza e ma nɔ gblé ǎ é kpó lɛ́ é ɔ, é ná ná yě gbɛ mavɔmavɔ; 8 amɔ̌, tódɔnnúmɛ kpó xomɛsin Mawu tɔn kpó wɛ ɖo te kpɔ́n mɛ ɖěɖěe nɔ ɖɔ jlɛ, nɔ tlí tó nú nǔgbó ɔ, bo nɔ wa nǔ agɔ lɛ́ é. 9 Wǔvɛ́ kpó adohu adohu kpó wɛ ɖo te kpɔ́n mɛ e nɔ wa nǔ e nɔ hɛn nǔ gblé dó mɛ wú lɛ́ é bǐ; Jwifu lɛ́ jɛ nukɔn, bɔ Glɛ̌kinu lɛ́ lɔ gɔ́ ná. 10 Susu, yɛ̌yi kpó fífá kpó ka ɖo te nú mɛ e nɔ wa nǔ ɖagbe lɛ́ é bǐ; Jwifu lɛ́ jɛ nukɔn, bɔ Glɛ̌kinu lɛ́ lɔ gɔ́ ná. 11 Ðó Mawu nɔ ɖe mɛɖé ɖó vo ɖo mɛɖé mɛ ǎ.

12 Mɛ ɖěɖěe hu hwɛ Sɛ́n ɔ mɛvo lɛ́ é bǐ ɔ, Sɛ́n ɔ mɛvo wɛ kún yětɔn ná lɛ́ sú dó; amɔ̌, mɛ ɖěɖěe ɖo Sɛ́n ɔ glɔ́ bo hu hwɛ lɛ́ é bǐ wɛ è ná ɖɔ hwɛ xá sɔgbe xá Sɛ́n ɔ. 13 Ðó mɛ e nɔ ɖótó Sɛ́n ɔ lɛ́ é wɛ nyí nǔjlɔ́jlɔ́watɔ́ ɖo Mawu nukɔn ǎ, loɔ, mɛ ɖěɖěe nɔ bló ɖó Sɛ́n ɔ jí lɛ́ é wɛ è ná ylɔ́ ɖɔ nǔjlɔ́jlɔ́watɔ́. 14 Mɛ e ɖo akɔta ɖě lɛ́ mɛ lɛ́ é tuun Sɛ́n ɔ ǎ có, yě nɔ nɔ yěɖóɖó, bo nɔ wa nǔ e Sɛ́n ɔ zɔ́n lɛ́ é; yě mɛ énɛ́ lɛ́ mɔ do nú Sɛ́n ɔ ǎ có, sɛ́n ɖé ɖo ayi yětɔn mɛ. 15 Nǔ e yě nɔ wa lɛ́ é nɔ ɖe xlɛ́ ɖɔ è wlán nǔ e Sɛ́n ɔ zɔ́n lɛ́ é dó ayi yětɔn mɛ, ɖó ayixa yětɔn nɔ ɖe kúnnu nú yě, bɔ linlin yětɔn lɛ́ nɔ dó hwɛ yě, alǒ tlɛ mɔ hwɛjijɔ nú yě. 16 Nǔ ná nyí mɔ̌ gbe e gbe Mawu ná ɖɔ hwɛ nǔ e gbɛtɔ́ lɛ́ nɔ lin, bo nɔ lɛ́ wa ɖo nǔglɔ́ lɛ́ é tɔn gbɔn Klísu Jezu jí sɔgbe xá wɛn ɖagbe e un nɔ jlá é.

17 Din ɔ, è nɔ ylɔ́ we ɖɔ Jwifu, a ɖeji dó Sɛ́n ɔ wú, bo nɔ lɛ́ gó ɖó Mawu wú, 18 a tuun jlǒ tɔn bo nɔ kpé wú, bo nɔ tuun nǔ e nyí nǔ ɖagbe hú gǎn lɛ́ é, ɖó è kplɔ́n Sɛ́n ɔ we* wútu; 19 a lɛ́ kú d’é jí ɖɔ émí nyí alixlɛ́mɛtɔ́ nú nukúntɔ́nnɔ lɛ́, ɖɔ émí nyí wěziza nú mɛ e ɖo ablu mɛ lɛ́ é, 20 ɖɔ émí nɔ gbɛ́ nǔ nú xlonɔ lɛ́, ɖɔ émí nyí nǔkplɔ́nmɛtɔ́ yɔkpɔ́vú lɛ́ tɔn, bo nɔ lɛ́ mɔ nukúnnú jɛ nǔ nukɔn nukɔntɔn kpó nǔgbó kpó ɖěɖěe ɖo Sɛ́n ɔ mɛ lɛ́ é mɛ. 21 É ɖo mɔ̌ có, hwi mɛ e nɔ kplɔ́n nǔ mɛ ɖěvo lɛ́ é ɔ, étɛ́wú a ma ka nɔ kplɔ́n nǔ hwiɖée ǎ? A nɔ jlá ɖɔ: “Ma j’ajo ó,” bo ka nɔ j’ajo a? 22 A nɔ ɖɔ: “Ma dó afɔ gbě, alǒ ba nyɔ̌nu ɖěvo ó,” bo ka nɔ dó afɔ gbě, alǒ ba nyɔ̌nu ɖěvo a? A gbɛ́ wǎn nú bǒcyɔ lɛ́, bo ka nɔ yi fin nǔ ɖo vodúnxɔ mɛ a? 23 A nɔ gó ɖó Sɛ́n ɔ wú, bo ka nɔ gba Sɛ́n ɔ dó kɔn cí dó Mawu wú a? 24 Ðó è ko wlán ɖɔ: “Mɛ lɛ́ nɔ nylá nu dó nyǐkɔ Mawu tɔn wú ɖo akɔta lɛ́ mɛ, ɖó nǔwalɔ mitɔn lɛ́ wú.”

25 Nǔgbó ɔ, adagbigbo ɖó le, ényí a nɔ nyi Sɛ́n ɔ nɛ́; amɔ̌, ényí a nɔ gba Sɛ́n ɔ, ada e a gbo é cí adamagbo ɖɔhun nɛ́. 26 Hǔn ényí mɛ e ma gbo ada ǎ é nɔ wa nǔ e nyí nǔ jlɔ́jlɔ́ bɔ Mɔyízisɛ́n ɔ byɔ́ lɛ́ é ɔ, è ná kpɔ́n ada e é ma gbo ǎ é dó mɔ adagbigbo nɛ́, kabǐ? 27 Mɛ e ma gbo ada ǎ é ɔ, ɖó é nɔ nyi Sɛ́n ɔ wútu ɔ, é ná ɖɔ hwɛ xá hwi mɛ e sí Sɛ́n ɔ ɖe, bɔ a lɛ́ gbo ada, cóbó ka nɔ gba Sɛ́n ɔ é. 28 Ðó mɛ e nyí Jwifu ɖo wěxo é wɛ nyí Jwifu jɔ Jwifu ǎ, mɔ̌ jɛ́n adagbigbo jɔ adagbigbo ma nyí wěxo tɔn ǎ é nɛ́. 29 É nyɔ́ wa ɔ, Jwifu jɔ Jwifu ɔ, mɛ e nyí ɖo xomɛ é wɛ, bɔ ada e é gbo é ɔ, ayi mɛ tɔn wɛ gbɔn gbigbɔ gblamɛ, é nyí gbɔn Sɛ́n e è wlán é gblamɛ ǎ. Mɛ énɛ́ ɔ, Mawu wɛ nɔ xɔ susu n’i, é nyí gbɛtɔ́ wɛ nɔ xɔ susu n’i ǎ.

3 Ðagbe tɛ́ ka ɖo Jwifu nyínyí mɛ lo? Alǒ, le tɛ́ ka ɖo adagbigbo mɛ? 2 Le ɔ d’agba ɖo ali bǐ nu. Jɛ nukɔn hwɛ̌ ɔ, yě wɛ è sɔ́ xó mímɛ́ Mawu tɔn lɛ́ d’así ná. 3 Étɛ́ è ka sixú ɖɔ dó Jwifu ɖěɖěe ma ɖi nǔ ǎ lɛ́ é wú lo? Nǔ e yě ma ɖi ǎ é xlɛ́ ɖɔ Mawu kún nyí gbejínɔtɔ́ ó wɛ a? 4 Ðěbǔ ǎ! É nyɔ́ wa ɔ, Mawu ɔ, nǔgbóɖɔtɔ́ wɛ n’i, ényí mɛ lɛ́ bǐ ná bo tlɛ nyí adingbannɔ ɔ nɛ́, lěe è ko wlán gbɔn é; è ɖɔ: “Bónú xó towe lɛ́ ní dó sixú ɖe xlɛ́ ɖɔ a nyí nǔjlɔ́jlɔ́watɔ́, lobonú a ní dó sixú ɖu ɖ’é jí hwenu e è ɖo hwɛ ɖɔ xá we wɛ é.” 5 É ɖo mɔ̌ có, ényí nǔagɔwiwa mǐtɔn lɛ́ nɔ ɖe nǔjlɔ́jlɔ́wiwa Mawu tɔn xlɛ́ nyi wɛn ɔ, étɛ́ mǐ ka ná ɖɔ? Ényí Mawu dɔn tó nú mǐ ɔ, nǔagɔwatɔ́ wɛ n’i ǎ, kabǐ? (Lěe gbɛtɔ́ nɔ ɖɔ xó gbɔn é ɖɔ gbɔn wɛ un ɖe.) 6 Ðěbǔ ǎ! Ényí Mawu nyí nǔagɔwatɔ́ ɔ, nɛ̌ é ka ná ɖɔ hwɛ xá gbɛ ɔ gbɔn lo?

7 Amɔ̌, ényí gbɔn adingban e un nɔ ɖó é gblamɛ ɔ, nǔgbó Mawu tɔn jɛ wě hú gǎn nú susu tɔn ɔ, étɛ́wú è ka ɖo hwɛ ɖɔ xá nyi lɔ wɛ, hwɛhutɔ́ wɛ un nyí ɖɔhun? 8 Étɛ́wú mǐ ma ka ná ɖɔ: “Mi nú mǐ ní wa nǔ nyanya bónú ɖagbe ní tɔ́n sín mɛ,” lěe mɛɖé lɛ́ nɔ ɖ’adingban ɖɔ mǐ nɔ ɖɔ gbɔn é ǎ? Hwɛ e è ná ɖó nú mɛ énɛ́ lɛ́ é sɔgbe.

9 Din ɔ, ninɔmɛ mǐtɔn nyɔ́ hú mɛ ɖě lɛ́ tɔn wɛ a? Ðěbǔ ǎ! Ðó lěe mǐ ko ɖɔ gbɔn wá yi é ɔ, Jwifu kpó Glɛ̌kinu kpó bǐ wɛ ɖo hwɛhuhu sín acɛ mɛ, 10 lěe è ko wlán ɖ’ayǐ gbɔn é; è ɖɔ: “Nǔjlɔ́jlɔ́watɔ́ ɖě ɖe ǎ, ɖokpó vɔ́vɔ́ tlɛ ɖe ǎ; 11 mɛ ɖě ɖe bo ɖó nukúnnúmɔjɛnǔmɛ ǎ; mɛ ɖě ɖe bo ɖo Mawu ba wɛ ǎ. 12 Mɛ lɛ́ bǐ wɛ zɛ gbě, yě ɖě sɔ́ nyí nǔɖéwanú ǎ; mɛ ɖě ɖe bo nɔ nyɔ́ xomɛ ǎ, mɛ ɖokpó vɔ́vɔ́ nɔ wa mɔ̌ ǎ.” 13 “Vɛ̌go yětɔn ɔ, yɔdo e ɖo nuvo é wɛ; yě zán ɖɛ̌ yětɔn lɛ́ dó blɛ́ mɛ ná.” “Jakpata sín aɖǐvɛ́ wɛ nɔ tɔ́n sín nu yětɔn mɛ.” 14 “Nudómɛ kpó dǎnúɖiɖɔ kpó wɛ gɔ́ nu yětɔn mɛ.” 15 “Afɔ nɔ yá nú yě dó mɛhuhu* wú.” 16 “Nǔhɛngblé kpó wǔvɛ́ kpó wɛ ɖo ali yětɔn lɛ́ jí, 17 bɔ yě tuun fífáli ɔ ǎ.” 18 “Yě nɔ ɖó sísí e gɔ́ngɔ́n é nú Mawu ǎ.”

19 Mǐ tuun ɖɔ nǔ e ɖo Sɛ́n ɔ mɛ lɛ́ é bǐ ɔ, mɛ e ɖo Sɛ́n ɔ glɔ́ lɛ́ é wɛ è ɖɔ yě ná, bónú è ní dó sixú xwe mɛ lɛ́ bǐ sín nu dó xɔ, lobonú gbɛ ɔ bǐ ní jɛxá tódɔnnúmɛ Mawu tɔn. 20 Énɛ́ wú ɔ, Mawu ná ɖɔ ɖɔ mɛ ɖěbǔ nyí nǔjlɔ́jlɔ́watɔ́, ɖó é nɔ nyi Sɛ́n ɔ wútu ǎ, ɖó Sɛ́n ɔ nɔ zɔ́n bɔ è nɔ tuun nǔ e hwɛhuhu nyí tawun é.

21 Amɔ̌ din ɔ, è ɖe nǔjlɔ́jlɔ́wiwa Mawu tɔn xlɛ́ Sɛ́n ɔ mɛvo, lěe Sɛ́n ɔ kpó nǔwlánwlán gbeyíɖɔ lɛ́ tɔn lɛ́ kpó ɖe kúnnu ná gbɔn é, 22 ɛɛn, è ɖe nǔjlɔ́jlɔ́wiwa Mawu tɔn xlɛ́ gbɔn nǔɖiɖi ɖíɖó nú Jezu Klísu gblamɛ, nú mɛ e ɖi nǔ lɛ́ é bǐ. Ðó vogbingbɔn ɖě ɖo yě mɛ ǎ. 23 Ðó mɛ bǐ wɛ hu hwɛ, bo nɔ hwedó susu Mawu tɔn wú. 24 Amɔ̌, nǔníná vɔ̌nu ɖé ɖɔhun ɔ, Mawu gbɔn fɛ́nú tɔn gblamɛ, bo ɖɔ ɖɔ yě nyí nǔjlɔ́jlɔ́watɔ́ gbɔn gbɛ e Klísu Jezu xɔ nú yě dó ɖe yě nyi te é gblamɛ. 25 Mawu sɔ́ ɛ jó vɔ̌sísá hwɛsúnsúnsínkɔnúmɛ* tɔn ɖé ɖɔhun; nǔ ɖi nú vɔ̌sísá tɔn wɛ ná hun hwɛsúnsúnsínkɔnúmɛ énɛ́ sín ali. Mawu wa mɔ̌ dó ɖe nǔjlɔ́jlɔ́wiwa éɖésúnɔ tɔn xlɛ́; ɖó ɖ’ayǐ ɔ, ɖo suúlu tɔn mɛ ɔ, é nɔ ɖo hwɛ e mɛ lɛ́ hu lɛ́ é sɔ́ kɛ yě wɛ. 26 É wa mɔ̌ dó ɖe nǔjlɔ́jlɔ́wiwa éɖésúnɔ tɔn xlɛ́ ɖo hwe mǐ lɔ tɔn nu, bo ná dó sixú nyí nǔjlɔ́jlɔ́watɔ́, ényí é ná bo tlɛ ɖɔ ɖɔ mɛ e ɖi nǔ nú Jezu é nyí nǔjlɔ́jlɔ́watɔ́ ɔ nɛ́.

27 Ényí mɔ̌ wɛ ɔ, hwɛjijɔ e wú è ná yí nugo é ɖě ɖe wɛ a? Hwɛjijɔ ɖě ɖe ǎ. Sɛ́n tɛ́ ka gbɛ́ ɖɔ è ní ma yí nugo ó? Sɛ́n e nɔ ɖɔ ɖɔ nǔ e è nɔ wa lɛ́ é ɖo tají é wɛ a? Éǒ, sɛ́n e ɖɔ ɖɔ è ɖó ná ɖi nǔ é wɛ. 28 Ðó mǐ tuun ɖɔ nǔ e mɛɖé ɖi é wɛ nɔ zɔ́n bɔ è nɔ ɖɔ ɖɔ é nyí nǔjlɔ́jlɔ́watɔ́, é nyí ɖó é nɔ nyi Sɛ́n ɔ wútu wɛ ǎ. 29 Alǒ Mawu ɔ, Mawu Jwifu lɛ́ tɔn kɛ́ɖɛ́ wɛ é nyí a? É nyí Mawu mɛ e ɖo akɔta ɖě lɛ́ mɛ lɛ́ é lɔ tɔn ǎ cé? Ɛɛn, é nyí Mawu mɛ e ɖo akɔta ɖě lɛ́ mɛ lɛ́ é lɔ tɔn. 30 Ðó Mawu ɖokpó wɛ tíin wútu ɔ, é ná ɖɔ ɖɔ mɛ e gbo ada lɛ́ é nyí nǔjlɔ́jlɔ́watɔ́ ɖó nǔ e yě ɖi é wútu, bo ná lɛ́ ɖɔ ɖɔ mɛ e ma gbo ada ǎ lɛ́ é nyí nǔjlɔ́jlɔ́watɔ́ gbɔn nǔɖiɖi yětɔn gblamɛ. 31 Ényí mɔ̌ wɛ ɔ, nǔ e mǐ ɖi é dɔn nǔ gbɔn Sɛ́n ɔ jí wɛ a? Ðěbǔ lɔ ǎ! É nyɔ́ wa ɔ, mǐ dó zǒgbe Sɛ́n ɔ jí wɛ.

4 Ényí nǔ nyí mɔ̌ ɔ, étɛ́ tɔ́gbó mǐtɔn Ablaxámu ka mɔ yí bɔ mǐ ná ɖɔ? 2 Ði kpɔ́ndéwú ɔ, ényí è ɖɔ ɖɔ Ablaxámu nyí nǔjlɔ́jlɔ́watɔ́ ɖó nǔ e é wa lɛ́ é wútu ɔ, é ɖó hwɛjijɔ bo ná yí nugo, amɔ̌, é ná nyí ɖo Mawu nukɔn ǎ. 3 Ðó étɛ́ nǔwlánwlán mímɛ́ ɔ ka ɖɔ? É ɖɔ: “Ablaxámu ɖi nǔ nú Jexóva,* bɔ è kpɔ́n ɛ dó mɔ nǔjlɔ́jlɔ́watɔ́.” 4 È nɔ kpɔ́n axɔ́ e è sú mɛ e w’azɔ̌ é dó mɔ fɛ́nú ǎ, é nyɔ́ wa ɔ, axɔ́ e è ɖu dó è é wɛ. 5 Ðo alɔ ɖěvo mɛ ɔ, mɛ e ma gán jɛ nǔwiwa éɖésúnɔ tɔn lɛ́ wú ǎ, bo ka ɖi nǔ nú Mɛ e nɔ ɖɔ ɖɔ mɛ e ma nɔ sí Mawu ǎ lɛ́ é nyí nǔjlɔ́jlɔ́watɔ́ é ɔ, nǔɖiɖi tɔn ná zɔ́n bɔ è ná kpɔ́n ɛ dó mɔ nǔjlɔ́jlɔ́watɔ́. 6 Davídi lɔ ɖɔ xó dó awǎjijɛ mɛ e é ma sín nǔwiwa tɔn lɛ́ wú ǎ, bɔ Mawu kpɔ́n ɛ dó mɔ nǔjlɔ́jlɔ́watɔ́ é tɔn wú. É ɖɔ: 7 “Awǎjijɛnɔ wɛ nyí mɛ e è sɔ́ nǔ nyanya e yě wa lɛ́ é kɛ yě, bo cyɔ́n nǔ dó hwɛ yětɔn* lɛ́ é; 8 awǎjijɛnɔ wɛ nyí mɛ e Jexóva* ma ná xa hwɛ dó kɔ ná gbeɖé ǎ é.”

9 Awǎjijɛ énɛ́ ɔ, mɛ e gbo ada lɛ́ é kɛ́ɖɛ́ tɔn wɛ é nyí a, alǒ é lɛ́ nyí mɛ e ma gbo ada ǎ lɛ́ é lɔ tɔn? Ðó mǐ ɖɔ: “Nǔɖiɖi Ablaxámu tɔn zɔ́n bɔ è kpɔ́n ɛ dó mɔ nǔjlɔ́jlɔ́watɔ́.” 10 Ninɔmɛ tɛ́ mɛ é ka ɖe hwenu e è kpɔ́n ɛ dó mɔ nǔjlɔ́jlɔ́watɔ́ é? É ko gbo ada hwenɛ́nu wɛ a, alǒ é ko gbo ada ǎ? É ko gbo ada hwenɛ́nu ǎ. 11 Mawu ɖɔ n’i ɖɔ é ní gbo ada, bɔ énɛ́ nyí wuntun ɖé. Adagbigbo énɛ́ nyí gǎnjɛwú ɖé* ɖɔ é nyí nǔjlɔ́jlɔ́watɔ́ gbɔn nǔ e é ɖi hwenu e é ma ko gbo ada ǎ é gblamɛ. Nǔ nyí mɔ̌, bónú é ná dó sixú nyí tɔ́ nú mɛ ɖěɖěe ɖi nǔ hwenu e yě ma ko gbo ada ǎ lɛ́ é bǐ, bónú è ná dó sixú kpɔ́n yě dó mɔ nǔjlɔ́jlɔ́watɔ́. 12 Nǔ lɛ́ nyí mɔ̌, bónú é ní dó sixú nyí tɔ́ nú mɛ e ko gbo ada lɛ́ é. É ka nyí mɛ e gbo ada lɛ́ é kɛ́ɖɛ́ wɛ é nyí tɔ́ ná ǎ, loɔ, é lɛ́ nyí tɔ́ nú mɛ ɖěɖěe nɔ xwedó nǔɖiɖi e tɔ́ mǐtɔn Ablaxámu ɖó hwenu e é ma ko gbo ada ǎ é sín kpɔ́ndéwú tlélé lɛ́ é.

13 Ðó é nyí sɛ́n lɛ́ nyinyi wɛ zɔ́n bɔ è dó akpá nú Ablaxámu alǒ kúnkan* tɔn ɖɔ é ná ɖu gbɛ ɖé* sín gǔ ǎ, é nyɔ́ wa ɔ, nǔjlɔ́jlɔ́watɔ́ e é nyí ɖó nǔɖiɖi tɔn wútu é wɛ zɔ́n. 14 Ðó ényí mɛ e nɔ tɛ́ dó Sɛ́n ɔ wú lɛ́ é wɛ ná nyí gǔɖutɔ́ ɔ, nǔɖiɖi sɔ́ nyí nǔɖéwanú ǎ, bɔ è dɔn nǔ gbɔn akpá ɔ jí nɛ́. 15 Nǔgbó ɔ, Sɛ́n ɔ nɔ dɔn xomɛsin Mawu tɔn wá, amɔ̌, fí e sɛ́n ɖě ma ɖe ǎ é ɔ, sɛ́ngbigba ɖěbǔ ɖo fínɛ́ ǎ.

16 Nǔɖiɖi Ablaxámu tɔn zɔ́n bɔ è dó akpá ɖé n’i, bɔ énɛ́ lɛ́ ɖe fɛ́nú Mawu tɔn xlɛ́, mɔ̌ mɛ ɔ, kúnkan* tɔn bǐ ná ɖu akpá énɛ́ sín le nǔgbó nǔgbó. É ka nyí yě mɛ e tɛ́ dó Sɛ́n ɔ wú lɛ́ é kɛ́ɖɛ́ ǎ, loɔ, yě mɛ e ɖi nǔ Ablaxámu ɖɔhun lɛ́ é lɔmɔ̌. É wɛ nyí tɔ́ nú mǐ bǐ. 17 (È ko wlán ɖɔ: “Un sɔ́ we dó ɖó tɔ́ nú akɔta gěgé.”) Ablaxámu ɖe nǔɖiɖi énɛ́ xlɛ́ ɖo Mawu nukɔn; éyɛ́ wɛ nɔ fɔ́n mɛkúkú lɛ́ wá gbɛ, bo nɔ ɖɔ nǔ e ma ko tíin ǎ lɛ́ é sín xó, cí nǔ ɖɔ yě tíin wɛ ɖɔhun.* 18 É ɖó nukún nǔ, bo ɖi nǔ ɖɔ émí ná wá nyí tɔ́ nú akɔta gěgé, có nǔ énɛ́ ka zɛ nǔ e è sixú ɖó nukún é wú. É ɖi nǔ, ɖó xó élɔ́ e è ɖɔ n’i é wú: “Lěe kúnkan* towe ná sukpɔ́ gbɔn é nɛ́.” 19 Nǔɖiɖi Ablaxámu tɔn vɔ́ da ǎ có, é mɔ ɖɔ agbaza émítɔn kún sɔ́ kpo nú nǔɖé zɛ kú wú ó (ɖó é ko ɖó xwe 100 mɔ̌), é lɛ́ mɔ ɖɔ Sala kún sɔ́ sixú ji vǐ ó.* 20 Amɔ̌, ɖó akpá e Mawu dó é wútu ɔ, nǔɖiɖi hwedó è bónú é xo nǔ kpɔ́n ǎ, loɔ, nǔɖiɖi tɔn ná ɛ hlɔ̌nhlɔ́n bɔ é nɔ kpa susu nú Mawu. 21 É kú d’é jí mlɛ́mlɛ́ ɖɔ nǔ e sín akpá Mawu dó é ɔ, É kpé wú bo ná bló. 22 Énɛ́ wú ɔ, “è kpɔ́n ɛ dó mɔ nǔjlɔ́jlɔ́watɔ́.”

23 É ɖo mɔ̌ có, é nyí éyɛ́ kɛ́ɖɛ́ wútu wɛ è wlán xógbe “è kpɔ́n ɛ dó mɔ” ɔ ǎ, 24 loɔ, ɖó mǐ lɔmɔ̌ wútu. È ná kpɔ́n mǐ dó mɔ nǔjlɔ́jlɔ́watɔ́, ɖó mǐ ɖi nǔ nú Éyɛ́ mɛ e fɔ́n Aklúnɔ mǐtɔn Jezu sín mɛkúkú lɛ́ mɛ é. 25 È jó è ɖó hwɛ mǐtɔn lɛ́ wútu, bɔ è ka fɔ́n ɛ, bónú è ná dó ɖɔ ɖɔ mǐ nyí nǔjlɔ́jlɔ́watɔ́.

5 Énɛ́ wú ɔ, din e è ko ɖɔ ɖɔ mǐ nyí nǔjlɔ́jlɔ́watɔ́ ɖó nǔ e mǐ ɖi é wú é ɔ, mi nú mǐ ní nɔ fífá mɛ* xá Mawu gbɔn Aklúnɔ mǐtɔn Jezu Klísu gblamɛ. 2 Nǔ e mǐ ɖi é zɔ́n bɔ è hun ali ɔ nú mǐ bónú mǐ ná mɔ fɛ́nú Mawu tɔn; mǐ ɖo fɛ́nú énɛ́ sín vǐví ɖu wɛ din. Mi bo nú mǐ ní j’awǎ* ɖó susu Mawu tɔn e ɖó nukún wɛ mǐ ɖe é wú. 3 É ní ma ka nyí ɖó énɛ́ kɛ́ɖɛ́ wú ó, é nyɔ́ wa ɔ, mǐ ní j’awǎ* hwenu e mǐ ɖo wǔvɛ́ lɛ́ mɛ é, ɖó mǐ tuun ɖɔ wǔvɛ́ nɔ zɔ́n bɔ è nɔ dɛ; 4 didɛ ka nɔ zɔ́n bɔ è nɔ ɖó ninɔmɛ e nyɔ́ Mawu nukúnmɛ é; ninɔmɛ e nyɔ́ Mawu nukúnmɛ é ka nɔ zɔ́n bɔ è nɔ ɖó nukúnɖíɖó, 5 nukúnɖíɖó ka nɔ flú mɛ ǎ; ɖó è kɔn wǎnyíyí Mawu tɔn dó ayi mǐtɔn lɛ́ mɛ gbɔn gbigbɔ mímɛ́ e è ná mǐ é gblamɛ.

6 Ðó nǔgbó ɔ, hwenu e gǎn ma ɖo mǐ wú ǎ é wɛ Klísu kú dó mɛ e ma nɔ ɖó sísí nú Mawu ǎ lɛ́ é tamɛ, ɖo hwenu e è ɖó dó é. 7 É ná vɛ́ wǔ ɖɔ mɛɖé ní kú dó nǔjlɔ́jlɔ́watɔ́ ɖé tamɛ; amɔ̌ vlafo, mɛɖé sixú glá bo kú dó mɛ ɖagbe ɖé tamɛ. 8 Lěe Mawu ɖe wǎnyíyí tɔn xlɛ́ mǐ gbɔn é ɖíe: hwenu e mǐ kpo ɖo hwɛhutɔ́ nyí wɛ é ɔ, Klísu kú dó ta mǐtɔn mɛ. 9 Hǔn, ɖó è ko ɖɔ din ɖɔ mǐ nyí nǔjlɔ́jlɔ́watɔ́ gbɔn hun tɔn gblamɛ wútu ɔ, é ɖo wɛn ɖɔ è ná hwlɛ́n mǐ sín xomɛsin Mawu tɔn sí gbɔn gbla tɔn mɛ. 10 Ðó ényí hwenu e mǐ nyí kɛntɔ́ é ɔ, kú e Vǐ Mawu tɔn kú é zɔ́n bɔ mǐ dó hwɛ gbɔ xá Mawu ɔ, é ɖo wɛn ɖɔ din e mǐ ko dó hwɛ gbɔ xá Mawu é ɔ, gbɛ e é ɖe é ná zɔ́n bɔ è ná hwlɛ́n mǐ. 11 Énɛ́ kɛ́ɖɛ́ ka wɛ ǎ, loɔ, mǐ lɛ́ ɖo awǎ jɛ wɛ ɖo Mawu mɛ gbɔn Aklúnɔ mǐtɔn Jezu Klísu gblamɛ; jǐ tɔn wɛ mǐ ko dó hwɛ gbɔ xá Mawu gbɔn.

12 Hwɛhuhu byɔ́ gbɛ ɔ mɛ gbɔn gbɛtɔ́ ɖokpó jí, bɔ hwɛhuhu ɔ dɔn kú wá, énɛ́ wú ɔ, gbɛtɔ́ lɛ́ bǐ nɔ kú ɖó yě mɛ bǐ wɛ hu hwɛ. 13 Ðó hwɛhuhu ko ɖo gbɛ ɔ mɛ jɛ nukɔn nú Sɛ́n ɔ, amɔ̌, hwenu e sɛ́n ɖě ma ɖe ǎ é ɔ, è xa hwɛ dó kɔ nú mɛ ɖěbǔ ǎ. 14 É ɖo mɔ̌ có, kú ɖu axɔ́sú sín Adámu hwenu káká wá Mɔyízi hwenu, é tlɛ ɖu axɔ́sú dó mɛ ɖěɖěe ma hu hwɛ lěe Adámu gba sɛ́n gbɔn é ɖɔhun ǎ lɛ́ é jí. Adámu ɔ ɖi mɛ e jawě é.

15 Amɔ̌, nǔníná ɔ cí hwɛhuhu ɔ ɖɔhun ǎ. Ðó ényí mɛ gěgé kú ɖó hwɛhuhu gbɛtɔ́ ɖokpó tɔn wú ɔ, é ɖo wɛn ɖɔ fɛ́nú Mawu tɔn kpó nǔ e Mawu nɔ ná mɛ vɔ̌nu gbɔn fɛ́nú gbɛtɔ́ ɖokpó, énɛ́ wɛ nyí Jezu Klísu tɔn gblamɛ é kpó ná túnflá nú mɛ gěgé hú gǎn. 16 Nǔ e nǔníná vɔ̌nu ɔ hɛn wá lɛ́ é gbɔn vo nú nǔ e hwɛ e gbɛtɔ́ ɖokpó hu é ji lɛ́ é. Ðó hwɛɖónúmɛ wɛ hwɛhuhu ɖokpó dɔn wá, loɔ, nǔníná e jɛ hwɛhuhu gěgé gúdo é wɛ nyí ɖɔ e è ɖɔ ɖɔ è nyí nǔjlɔ́jlɔ́watɔ́ é. 17 Ðó nú é sín hwɛhuhu gbɛtɔ́ ɖokpó tɔn wú, bɔ kú ɖu axɔ́sú gbɔn gbɛtɔ́ ɖokpó énɛ́ jí ɔ, é ɖo wɛn ɖɔ mɛ ɖěɖěe mɔ fɛ́nú kpó nǔníná vɔ̌nu nǔjlɔ́jlɔ́watɔ́ nyínyí tɔn kpó yí b’ɛ túnflá lɛ́ é ná nɔ gbɛ, bo ɖu axɔ́sú gbɔn mɛ ɖokpó gblamɛ; mɛ énɛ́ wɛ nyí Jezu Klísu.

18 Énɛ́ wú ɔ, lěe hwɛhuhu ɖokpó dɔn hwɛɖónúmɛ wá gbɛtɔ́ alɔkpa lɛ́ bǐ jí gbɔn é ɔ, mɔ̌ ɖokpó ɔ, nǔjlɔ́jlɔ́wiwa ɖokpó zɔ́n bɔ è ɖɔ ɖɔ gbɛtɔ́ alɔkpa lɛ́ bǐ nyí nǔjlɔ́jlɔ́watɔ́, bo ná mɔ gbɛ. 19 Ðó lěe tónúmase gbɛtɔ́ ɖokpó tɔn zɔ́n bɔ mɛ gěgé húzú hwɛhutɔ́ gbɔn é ɔ, mɔ̌ ɖokpó ɔ, tónúsise mɛ ɖokpó tɔn zɔ́n bɔ mɛ gěgé ná húzú nǔjlɔ́jlɔ́watɔ́. 20 Sɛ́n ɔ wá atɛ jí, bónú hwɛhuhu ní dó sixú jɛjí. Amɔ̌, fí e hwɛhuhu túnflá ɖe é ɔ, fɛ́nú Mawu tɔn lɛ́ túnflá ɖo fínɛ́ hú gǎn. 21 Étɛ́wú ka wɛ? Bónú lěe hwɛhuhu kpó kú kpó ɖu axɔ́sú gbɔn é ɔ, fɛ́nú Mawu tɔn lɔ ní ɖu axɔ́sú gbɔn nǔjlɔ́jlɔ́wiwa gblamɛ. Bɔ énɛ́ ná tɔ́n kɔ dó gbɛ mavɔmavɔ mɛ gbɔn Aklúnɔ mǐtɔn Jezu Klísu jí.

6 Étɛ́ mǐ ka ná ɖɔ din? Mǐ ɖó ná kpo ɖo hwɛ hu wɛ, bónú fɛ́nú Mawu tɔn ní dó sixú jɛjí wɛ a? 2 Gbeɖé kpɔ́n! Ðó è ko ɖe mǐ sín hwɛhuhu kannu* wútu ɔ, nɛ̌ mǐ ka sixú lɛ́ kpo ɖo hwɛ hu wɛ gbɔn? 3 Alǒ mi tuun ɖɔ mǐ mɛ e bló batɛ́mu ɖo Klísu Jezu mɛ lɛ́ é bǐ ɔ, mǐ lɛ́ bló batɛ́mu ɖo kú tɔn mɛ ǎ cé? 4 Énɛ́ wú ɔ, è ɖi mǐ kpó é kpó gbɔn batɛ́mu e mǐ bló ɖo kú tɔn mɛ é gblamɛ, bónú lěe è fɔ́n Klísu sín kú gbɔn susu Tɔ́ ɔ tɔn gblamɛ gbɔn é ɔ, mǐ lɔ ní dó sixú zán gbɛ yɔ̌yɔ́ ɖé. 5 Ényí mǐ ɖo bǔ xá ɛ ɖó kú e mǐ kú éɖɔhun é wútu ɔ, é ɖo wɛn ɖɔ mǐ ná lɛ́ nɔ bǔ xá ɛ ɖó fɔ́n e è ná fɔ́n mǐ sín kú éɖɔhun é wútu. 6 Ðó mǐ tuun ɖɔ è xwe gbɛtɔ́ xóxó e mǐ nyí ɖ’ayǐ é nyi atín wú xá ɛ bónú hwɛhuhu gbaza mǐtɔn ní ba hlɔ̌nhlɔ́n kpo, mɔ̌ mɛ ɔ, mǐ sɔ́ ná nyí kannumɔ nú hwɛhuhu ɖě ǎ. 7 Ðó mɛ e kú é ɔ, è ko tún kan n’i sín hwɛ tɔn lɛ́ sí.*

8 Gɔ́ ná ɔ, ényí mǐ kú xá Klísu ɔ, mǐ ɖi nǔ ɖɔ mǐ ná lɛ́ nɔ gbɛ xá ɛ. 9 Ðó mǐ tuun ɖɔ Klísu ɔ, din e è fɔ́n ɛ sín kú é ɔ, é sɔ́ ná kú ɖě ǎ; kú sɔ́ ɖó acɛ dó jǐ tɔn ǎ. 10 Ðó kú e é kú é ɔ, é kú azɔn ɖokpó bɔ xó fó, bo ná dó dɔn nǔ gbɔn hwɛhuhu jí,* amɔ̌, gbɛ e é ɖe din é ɔ, é ɖo gbɛ bo ná dó wa jlǒ Mawu tɔn. 11 Ðo ali ɖokpó ɔ nu ɔ, mi lɔmɔ̌ ɔ, mi ní nɔ mɔ miɖée dó mɔ mɛ e kú bo dɔn nǔ gbɔn hwɛhuhu jí, bo ka ɖo gbɛ bo ná wa jlǒ Mawu tɔn gbɔn Klísu Jezu gblamɛ lɛ́ é.

12 Mi bo ma jó hwɛhuhu dó bónú é ní kpo ɖo axɔ́sú ɖu dó agbaza mitɔn e ná kú é jí wɛ, bónú mi ná nɔ se tónú nú jlǒ tɔn lɛ́ ó. 13 Mi ma sɔ́ nɔ sɔ́ agbaza* mitɔn lɛ́ ɖó hwɛhuhu sín kannu, alyánnú nǔagɔwiwa tɔn lɛ́ ɖɔhun ɖě ó, é nyɔ́ wa ɔ, mi ní nɔ wa sinsɛnzɔ́ nú Mawu mɛ e fɔ́n sín kú wá gbɛ lɛ́ é ɖɔhun. Gɔ́ ná ɔ, mi zán agbaza* mitɔn lɛ́ dó wa sinsɛnzɔ́ nú Mawu, alyánnú nǔjlɔ́jlɔ́wiwa tɔn lɛ́ ɖɔhun. 14 Hwɛhuhu ɖó ná ɖó acɛ dó mi jí ǎ, ɖó mi ɖo Sɛ́n ɔ glɔ́ ǎ, é nyɔ́ wa ɔ, fɛ́nú Mawu tɔn glɔ́ wɛ mi ɖe.

15 Étɛ́ mǐ ka ná ɖɔ din? Mǐ ná hu hwɛ ɖó mǐ ɖo Sɛ́n ɔ glɔ́ ǎ, bo ɖo fɛ́nú Mawu tɔn glɔ́ wútu wɛ a? Gbeɖé kpɔ́n! 16 Mi tuun ɖɔ, ényí mi sɔ́ miɖée jó nú mɛɖé kannumɔ tónúsetɔ́ lɛ́ ɖɔhun ɔ, mɛ e mi nɔ se tónú ná é sín kannumɔ wɛ mi nyí ǎ cé? Mi ná nyí kannumɔ nú hwɛhuhu e nɔ kplá mɛ yi kú é, alǒ mi ná nyí kannumɔ nú tónúsise e nɔ kplá mɛ yi nǔjlɔ́jlɔ́wiwa kɔn é. 17 Amɔ̌, è ní dó kú nú Mawu, ɖó mi nyí kannumɔ nú hwɛhuhu ɖ’ayǐ có, mi wá jɛ tónú se nú nǔkplɔ́nmɛ alɔkpa énɛ́ e è sɔ́ d’así nú mi é jí kpó ayi bǐ kpó. 18 Ɛɛn, ɖó è ɖe mi sín hwɛhuhu kannu wútu ɔ, mi húzú kannumɔ nú nǔjlɔ́jlɔ́wiwa. 19 Ðó agbaza mitɔn ɖó gǎn ǎ wútu ɔ, un ɖo xókwín e gbɛtɔ́ lɛ́ nɔ zán kpaa é zán dó ɖɔ xó nú mi wɛ; ɖó ɖ’ayǐ ɔ, mi jó wǔjɔnú mitɔn lɛ́ dó nú nǔblíblíwiwa kpó sɛ́ngbigba kpó kannumɔ lɛ́ ɖɔhun, bɔ é zɔ́n bɔ mi nɔ gba sɛ́n, amɔ̌ din ɔ, mi ní jó wǔjɔnú mitɔn lɛ́ dó nú nǔjlɔ́jlɔ́wiwa kannumɔ lɛ́ ɖɔhun bo ná dó sixú nɔ wa nǔ e nyí nǔ mímɛ́ lɛ́ é. 20 Ðó hwenu e mi nyí kannumɔ nú hwɛhuhu é ɔ, é ɖo dandan ɖɔ mi ní wa nǔ jlɔ́jlɔ́ ǎ.

21 Sínsɛ́n tɛ́ mi ka nɔ ná hwe énɛ́ nu lo? Nǔ ɖěɖěe nɔ hu winnyá nú mi din lɛ́ é wɛ. Ðó kú wɛ nǔ énɛ́ lɛ́ nɔ kplá mɛ yi. 22 É ɖo mɔ̌ có, din e è ɖe mi sín hwɛhuhu kannu bɔ mi húzú kannumɔ Mawu tɔn lɛ́ é ɔ, gbɛ mímɛ́ zínzán wɛ nyí sínsɛ́n e mi nɔ ná é, bɔ énɛ́ ná kplá mi yi gbɛ mavɔmavɔ mɛ. 23 Ðó axɔ́ e hwɛhuhu nɔ sú mɛ é wɛ nyí kú, amɔ̌, nǔ e Mawu nɔ ná mɛ é wɛ nyí gbɛ mavɔmavɔ gbɔn Klísu Jezu Aklúnɔ mǐtɔn gblamɛ.

7 Nɔví lɛ́ mi, mi tuun ɖɔ ényí gbɛtɔ́ kpo ɖo gbɛ jɛ́n wɛ ɔ, Sɛ́n ɔ ɖó acɛ dó jǐ tɔn ǎ cé? (Ðó mɛ e tuun Sɛ́n ɔ lɛ́ é ɖɔ xó ná wɛ un ɖe). 2 Ði kpɔ́ndéwú ɔ, Sɛ́n ɔ cá nyɔ̌nu e d’asú é ɖó kpɔ́ xá asú tɔn nú hwenu e asú tɔn ná nɔ gbɛ xɔ é bǐ. Amɔ̌, ényí asú tɔn kú ɔ, é gosín acɛ* asú tɔn tɔn glɔ́. 3 Énɛ́ wú ɔ, ényí asú tɔn kpo ɖo gbɛ bónú é da súnnu ɖěvo ɔ, è ná ylɔ́ ɛ ɖɔ afɔdógbětɔ́. Amɔ̌, ényí asú tɔn kú ɔ, é gosín acɛ* tɔn glɔ́, bɔ ényí é da súnnu ɖěvo hǔn, é nyí afɔdógbětɔ́ ǎ.

4 Mɔ̌ ɖokpó ɔ, nɔví ce lɛ́ mi, ɖo Sɛ́n ɔ lixo ɔ, mi lɔmɔ̌ kú gbɔn agbaza Klísu tɔn gblamɛ. Nǔ nyí mɔ̌ bónú mi ná dó sixú nyí mɛ ɖěvo tɔn. Mɛ énɛ́ wɛ nyí mɛ e è fɔ́n sín mɛkúkú lɛ́ mɛ é, nú mǐ ná dó sixú ná sínsɛ́n nú susu Mawu tɔn. 5 Ðó hwenu e mǐ nɔ zán gbɛ sɔgbe xá hwɛhuhu gbaza mǐtɔn é ɔ, Sɛ́n ɔ bló bɔ mǐ tuun jlǒ hwɛhuhu tɔn ɖěɖěe ɖo azɔ̌ wa wɛ ɖo agbaza* mǐtɔn lɛ́ mɛ, bo nɔ kplá mɛ yi kú lɛ́ é. 6 Amɔ̌ din ɔ, è ko ɖe mǐ sín Sɛ́n ɔ kannu, ɖó mǐ ko kú ɖo Sɛ́n énɛ́ e sɔ́ mǐ dó ɖó gantɔ́ ná é lixo, bo ná dó sixú nyí kannumɔ ɖo ali yɔ̌yɔ́ ɖé nu, gbɔn gbigbɔ ɔ gblamɛ, é nyí ɖo ali xóxó ɔ nu, gbɔn Sɛ́n e è wlán é gblamɛ ǎ.

7 Étɛ́ mǐ ka ná ɖɔ din? Sɛ́n ɔ, hwɛhuhu wɛ é nyí a? Gbeɖé kpɔ́n! Nǔgbó ɔ, é ma nyí Sɛ́n ɔ wɛ ǎ ɔ, un ná ko tuun nǔ e hwɛhuhu nyí é ǎ. Ði kpɔ́ndéwú ɔ, ényí Sɛ́n ɔ ma ko ɖɔ: “A ɖó ná jló mɛ nú ǎ” ǎ ɔ, un ná ko tuun nǔ e mɛnújlójló nyí é ǎ. 8 Amɔ̌, ée hwɛhuhu mɔ ali e gbeɖiɖe énɛ́ hun é ɔ, é fɔ́n mɛnújlójló alɔkpa lɛ́ bǐ dó lanmɛ nú mì, ɖó Sɛ́n ɔ mɛvo ɔ, nǔkúkú wɛ hwɛhuhu nyí. 9 Nǔgbó ɔ, un ɖo gbɛ ɖ’ayǐ Sɛ́n ɔ mɛvo, amɔ̌, hwenu e gbeɖiɖe ɔ wá é ɔ, hwɛhuhu lɛ́ wá gbɛ, bɔ nyɛ kú. 10 Gbeɖiɖe e ná zɔ́n bɔ è ná mɔ gbɛ é ɔ, un wá mɔ nǔ jɛ wú ɖɔ kú wɛ è kplá mɛ yi. 11 Ðó ée hwɛhuhu mɔ ali e gbeɖiɖe ɔ hun n’i é ɔ, é flú mì bo hu mì gbɔn gbeɖiɖe ɔ gblamɛ. 12 Énɛ́ wú ɔ, Sɛ́n ɔ, nǔ mímɛ́ wɛ é nyí, bɔ gbeɖiɖe ɔ lɔ nyí nǔ mímɛ́, nǔ jlɔ́jlɔ́, nǔ ɖagbe.

13 Ényí mɔ̌ hǔn, nǔ e nyí nǔ ɖagbe é wɛ zɔ́n bɔ un kú a? Ðěbǔ ǎ! Hwɛhuhu wɛ zɔ́n bɔ un kú. Sɛ́n ɔ, nǔ ɖagbe wɛ, amɔ̌, é ɖe xlɛ́ céɖécéɖé ɖɔ hwɛhuhu wɛ ɖo kú ce zɔ́n wɛ, énɛ́ wú ɔ, gbeɖiɖe ɔ ɖe lě do hwɛhuhu nylá sɔ é xlɛ́. 14 Ðó mǐ tuun ɖɔ Sɛ́n ɔ, Mawu gɔ́n wɛ é gosín, amɔ̌, gbɛtɔ́ kpowun wɛ nyɛ nyí, bɔ è sa mì nú hwɛhuhu. 15 Ðó un mɔ nukúnnú jɛ nǔ e wa wɛ un ɖe é mɛ ǎ. Ðó nǔ e jló mì é wɛ un nɔ wa ǎ, é nyɔ́ wa ɔ, nǔ e un gbɛ́ wǎn ná é wɛ un nɔ wa. 16 Un yí gbe ɖɔ Sɛ́n ɔ nyɔ́, é ɖo mɔ̌ có, un kpo ɖo nǔ e un ma jló ná wa ǎ lɛ́ é wa wɛ. 17 Énɛ́ wú ɔ, é sɔ́ nyí nyɛ wɛ ɖo nǔ énɛ́ lɛ́ wa wɛ ǎ, loɔ, hwɛhuhu e ɖo nyɛ mɛ é wɛ ɖ’é wú. 18 Ðó un tuun ɖɔ nǔ ɖagbe ɖěbǔ kún ɖo nyɛ, énɛ́ wɛ nyí agbaza ce mɛ ó; ɖó un ɖó jlǒ bo ná wa nǔ e nyí nǔ ɖagbe é, un ka kpé wiwa tɔn wú ǎ. 19 Ðó un nɔ wa nǔ ɖagbe e un jló ná wa é ǎ, é nyɔ́ wa ɔ, nǔ nyanya e un ma jló ná wa ǎ é wɛ un nɔ wa. 20 Hǔn, ényí nǔ e ma jló mì ǎ é wɛ un nɔ wa ɔ, é sɔ́ nyí nyɛ wɛ ɖo wiwa wɛ ǎ, loɔ, hwɛhuhu e ɖo nyɛ mɛ é wɛ ɖ’é wú.

21 Un mɔ din ɖɔ, ɖo ninɔmɛ ce mɛ ɔ, sɛ́n élɔ́ nyí nǔgbó: Hwenu e un jló ná wa nǔ e sɔgbe é ɔ, nǔ e nylá é wɛ nɔ xwetɔ́n ɖo nyɛ mɛ. 22 Nǔgbó ɔ, sɛ́n Mawu tɔn nɔ dó xomɛhunhun nú mì ɖo ayi ce mɛ, 23 amɔ̌, un nɔ mɔ sɛ́n ɖěvo ɖo agbaza ce* mɛ bɔ é nɔ ɖo ahwan fun xá sɛ́n e ɖo linlin ce mɛ é wɛ, lobo nɔ sɔ́ mì dó ɖó gantɔ́ nú hwɛhuhu sín sɛ́n e ɖo agbaza ce* mɛ é. 24 Gbɛ ce blá wǔ lóóo! Mɛ̌ ka ná hwlɛ́n mì ɖo agbaza élɔ́ e kplá mì xwe kú* é sí? 25 Un dó kú nú Mawu gbɔn Jezu Klísu Aklúnɔ mǐtɔn jí! Énɛ́ wú ɔ, ɖo linlin ce mɛ ɔ, un nyí kannumɔ nú sɛ́n Mawu tɔn, amɔ̌, ɖo agbaza ce mɛ ɔ, un nyí kannumɔ nú hwɛhuhu sín sɛ́n.

8 Énɛ́ wú ɔ, hwɛ ɖě ɖo kɔ nú mɛ e ɖo bǔ xá Klísu Jezu lɛ́ é ǎ. 2 Ðó gbigbɔ mímɛ́ ɔ sín sɛ́n e nɔ ná gbɛ mɛ, ɖo kɔnɖókpɔ́ mɛ xá Klísu Jezu é ko ɖe mi sín hwɛhuhu kpó kú kpó sín sɛ́n ɔ kannu. 3 Nǔ e Sɛ́n ɔ ma kpé wú bo wa ǎ, ɖó agbaza ɔ vɔ́ da n’i wútu é ɔ, Mawu wa nǔ énɛ́ gbɔn Vǐ éɖésúnɔ tɔn e é sɛ́ dó ɖo akpajlɛ́ gbɛtɔ́ hwɛhutɔ́ tɔn mɛ, bónú é ná sú kún dó nú hwɛhuhu é gblamɛ; mɔ̌ mɛ ɔ, é ɖó hwɛ nú hwɛhuhu e ɖo agbaza ɔ mɛ é. 4 Nǔ nyí mɔ̌ bónú mǐ mɛ e nɔ zán gbɛ sɔgbe xá gbigbɔ ɔ, b’ɛ ma nyí sɔgbe xá agbaza ɔ ǎ lɛ́ é ní dó sixú wa nǔ jlɔ́jlɔ́ e Sɛ́n ɔ zɔ́n lɛ́ é. 5 Ðó mɛ ɖěɖěe nɔ zán gbɛ sɔgbe xá agbaza ɔ lɛ́ é nɔ sɔ́ ayi yětɔn ɖó nǔ e nyí agbaza tɔn lɛ́ é jí, loɔ, mɛ ɖěɖěe nɔ zán gbɛ sɔgbe xá gbigbɔ ɔ lɛ́ é nɔ sɔ́ ayi yětɔn ɖó nǔ e nyí gbigbɔ tɔn lɛ́ é jí. 6 Kú mɛ wɛ ayi sísɔ́ ɖó nǔ e nyí agbaza tɔn lɛ́ é jí nɔ tɔ́n kɔ dó, amɔ̌, ayi sísɔ́ ɖó nǔ e nyí gbigbɔ tɔn lɛ́ é jí nɔ tɔ́n kɔ dó gbɛ kpó fífá kpó mɛ; 7 ɖó ényí è sɔ́ ayi ɖó nǔ agbaza tɔn lɛ́ jí ɔ, kɛntɔ́ Mawu tɔn wɛ è nɔ nyí, ɖó agbaza ɔ nɔ se tónú nú sɛ́n Mawu tɔn ǎ, é ka tlɛ sixú se tónú ná lɔ bo gbɔ ǎ. 8 Énɛ́ wú ɔ, mɛ ɖěɖěe nɔ wa nǔ sɔgbe xá agbaza ɔ lɛ́ é sín nǔ sixú nyɔ́ Mawu nukúnmɛ ǎ.

9 É ɖo mɔ̌ có, midɛɛ lɛ́ ɔ, ényí gbigbɔ Mawu tɔn ɖo mi mɛ nǔgbó hǔn, gbigbɔ ɔ wɛ mi nɔ zán gbɛ sɔgbe xá, é nyí agbaza ɔ ǎ. Amɔ̌, ényí mɛɖé ma ɖó gbigbɔ Klísu tɔn ǎ ɔ, mɛ énɛ́ ɔ nyí étɔn ǎ. 10 Ényí Klísu ka ɖo bǔ xá mi ɔ, agbaza ɔ kú ɖó hwɛhuhu wútu, amɔ̌, gbigbɔ ɔ bló bɔ mi ɖo gbɛ ɖó nǔjlɔ́jlɔ́wiwa wútu. 11 Din ɔ, ényí mɛ e fɔ́n Jezu sín mɛkúkú lɛ́ mɛ é sín gbigbɔ ɖo mi mɛ ɔ, mɛ énɛ́ e fɔ́n Klísu Jezu sín mɛkúkú lɛ́ mɛ é ná bló bɔ agbaza mitɔn e ko kú lɛ́ é lɔmɔ̌ ná nɔ gbɛ, gbɔn gbigbɔ tɔn e ɖo mi mɛ é gblamɛ.

12 Énɛ́ wú ɔ, nɔví lɛ́, é ɖo dandan ɖɔ mǐ ní wa nǔɖé, agbaza ɔ wɛ mǐ ka ɖó ná se tónú ná bo wa jlǒ tɔn lɛ́ ǎ; 13 ɖó ényí mi nɔ zán gbɛ sɔgbe xá agbaza ɔ hǔn, é ɖo wɛn ɖɔ mi ná kú; amɔ̌, ényí mi hu nǔwalɔ agbaza ɔ tɔn lɛ́ gbɔn gbigbɔ ɔ gblamɛ ɔ, mi ná nɔ gbɛ. 14 Ðó mɛ e gbigbɔ Mawu tɔn nɔ xlɛ́ ali lɛ́ é bǐ ɔ, vǐ Mawu tɔn lɛ́ wɛ yě nyí nǔgbó. 15 Ðó é nyí gbigbɔ e nɔ sɔ́ mɛ dó ɖó kannumɔ, bo nɔ lɛ́ zɔ́n bɔ è nɔ ɖo xɛsi jí é wɛ mi mɔ yí ǎ, loɔ, gbigbɔ e gblamɛ è sɔ́ mi dó ɖó vǐ é wɛ mi mɔ yí. Gbigbɔ énɛ́ gblamɛ wɛ mǐ nɔ sú xó gbɔn bo nɔ ɖɔ: “Abba,* Tɔ́!” 16 Gbigbɔ ɔ ɖésúnɔ nɔ ɖe kúnnu ɖó kpɔ́ xá gbigbɔ mǐtɔn ɖɔ mǐ nyí vǐ Mawu tɔn. 17 Hǔn, ényí mǐ nyí vǐ ɔ, mǐ lɛ́ nyí gǔɖutɔ́ nɛ́. Ɛɛn, gǔɖutɔ́ Mawu tɔn lɛ́ wɛ mǐ nyí, bo ka ná ɖu gǔ ɔ ɖó kpɔ́ xá Klísu; amɔ̌, mǐ ka ɖó ná se wǔvɛ́ xá ɛ hwɛ̌, bónú è ná dó xɔ susu nú mǐ lɔ ɖó kpɔ́ xá ɛ.

18 Ðó nyɛ mɔ ɖɔ wǔvɛ́ e mǐ nɔ se din lɛ́ é kún sɔ atɛ́n ɖo susu e è ná xɔ nú mǐ bɔ Mawu ja ɖiɖexlɛ́ gbé é kpá ó. 19 Ðó nǔɖíɖó lɛ́ ɖo te kpɔ́n hwenu e è ná ɖe vǐ Mawu tɔn lɛ́ xlɛ́ é kpó akpakpa sɔ́ mɛ kpó. 20 Ðó è jó nǔɖíɖó lɛ́ nú gbɛ e ma ɖó ta ɖé ǎ é, é ka sín jlǒ yěɖésúnɔ tɔn wú ǎ, loɔ, jlǒ mɛ e jó yě é tɔn wɛ, é ka ná mǐ nukúnɖíɖó 21 ɖɔ è ná ɖe nǔɖíɖó lɛ́ lɔmɔ̌ sín gbɛ gblégblé kannu, bɔ yě ná lɛ́ ɖó mǐmá ɖo mɛɖéesíjijɛ susunɔ vǐ Mawu tɔn lɛ́ tɔn mɛ. 22 Ðó mǐ tuun ɖɔ nǔɖíɖó lɛ́ bǐ wɛ ɖo azɔn wɛn wɛ, bo lɛ́ ɖo wǔvɛ́ se wɛ káká jɛ din. 23 Énɛ́ kɛ́ɖɛ́ ka wɛ ǎ, loɔ, mǐ mɛ e ɖó sínsɛ́n nukɔntɔn lɛ́, énɛ́ wɛ nyí gbigbɔ mímɛ́ ɔ lɛ́ é ɔ, ɛɛn, mǐɖésúnɔ ɖo azɔn wɛn wɛ, ée mǐ ɖo te kpɔ́n kpó akpakpa sɔ́ mɛ kpó ɖɔ è ná sɔ́ mǐ dó ɖó vǐ é; hwenɛ́nu ɔ, è ná tún kan nú mǐ sín agbaza mǐtɔn lɛ́ mɛ gbɔn gbɛxixɔ ɔ gblamɛ. 24 Ðó mǐ ɖó nukúnɖíɖó énɛ́ hwenu e è hwlɛ́n mǐ é; amɔ̌, ényí è mɔ nǔ e ɖó nukún wɛ è ɖe é ɔ, é sɔ́ nyí nukúnɖíɖó ǎ, ɖó ényí mɛɖé mɔ nǔɖé ɔ, é ná lɛ́ ɖó nukún nǔ énɛ́ wɛ a? 25 Amɔ̌, ényí mǐ ɖo nukún ɖó nǔ e mǐ ma ɖo mimɔ wɛ ǎ é ɔ, mǐ nɔ dɛ bo nɔ ɖo te kpɔ́n kpó akpakpa sɔ́ mɛ kpó.

26 Mɔ̌ ɖokpó ɔ, gbigbɔ mímɛ́ ɔ lɔ nɔ d’alɔ mǐ ɖo gǎnmaɖó mǐtɔn lɛ́ mɛ; ɖó wǔvɛ́ ɔ wɛ nyí ɖɔ hwenu e mǐ ɖó ná xo ɖɛ é ɔ, mǐ nɔ tuun nǔ e tamɛ mǐ ná xo ɖɛ dó é ǎ, amɔ̌, gbigbɔ ɔ ɖésúnɔ nɔ sa vo dó ta mǐtɔn mɛ hwenu e mǐ nɔ ɖo azɔn wɛn wɛ numakɛ é. 27 Mɛ e nɔ ba do nú nǔ e ɖo ayi mɛ é ka tuun nǔ e ɖɔ gbé gbigbɔ ɔ ja é, ɖó vo e sa wɛ gbigbɔ ɔ ɖe dó mɛ mímɛ́ lɛ́ tamɛ é sɔgbe xá jlǒ Mawu tɔn.

28 Mǐ tuun ɖɔ nǔ e Mawu nɔ wa lɛ́ é bǐ nɔ wa azɔ̌ ɖó kpɔ́ nú ɖagbe mɛ e yí wǎn n’i lɛ́ é tɔn, mɛ énɛ́ lɛ́ e é ylɔ́ sɔgbe xá linlin tɔn lɛ́ é; 29 ɖó yě mɛ e jí é sɔ́ ayi ɖó jɛ nukɔn lɛ́ é ɔ, é lɛ́ wá gbeta ɔ kɔn dó nukɔn ɖɔ yě ná nyí akpajlɛ́ Vǐ émítɔn tɔn, mɔ̌ mɛ ɔ, Vǐ tɔn ná nyí nukɔngbéví ɖo nɔví gěgé tɛ́ntin. 30 Gɔ́ ná ɔ, mɛ ɖěɖěe é sɔ́ jɛ nukɔn lɛ́ é wɛ lɛ́ nyí mɛ ɖěɖěe é ylɔ́ lɛ́ é, bɔ mɛ ɖěɖěe é ylɔ́ lɛ́ é wɛ lɛ́ nyí mɛ e é ɖɔ ɖɔ yě nyí nǔjlɔ́jlɔ́watɔ́ lɛ́ é. Gǔdo mɛ ɔ, mɛ ɖěɖěe é ɖɔ ɖɔ yě nyí nǔjlɔ́jlɔ́watɔ́ lɛ́ é wɛ lɛ́ nyí mɛ e é xɔ susu ná lɛ́ é.

31 Étɛ́ mǐ ka ná ɖɔ dó nǔ énɛ́ lɛ́ wú din? Ényí Mawu ɖo jǐ mǐtɔn ɔ, mɛ̌ ka sixú ɖu ɖo mǐ jí? 32 É tlɛ tɛ Vǐ éɖésúnɔ tɔn mǐ ǎ, loɔ, é jó è, dó ta mǐ bǐ tɔn mɛ. Énɛ́ wú ɔ, gɔ́ nú Vǐ tɔn e é ná mǐ é ɔ, é ná lɛ́ ná nǔ ɖěvo e kpo lɛ́ é bǐ mǐ kpó xomɛnyínyɔ́ kpó ǎ cé? 33 Mɛ̌ ka sixú dó hwɛ mɛ e Mawu cyán lɛ́ é? Mawu wɛ nyí mɛ e ɖɔ ɖɔ yě nyí nǔjlɔ́jlɔ́watɔ́ é. 34 Mɛ̌ ka sixú ɖó hwɛ nú yě? Klísu Jezu wɛ nyí mɛ e kú é, ɛɛn, hú gǎn mɔ̌ ɔ, é wɛ nyí mɛ e fɔ́n sín kú é, é wɛ ɖo ɖisíxwé nú Mawu bo nɔ lɛ́ sa vo dó ta mǐtɔn mɛ.

35 Étɛ́ ka sixú ɖe mǐ ɖó vo nú wǎnyíyí Klísu tɔn? Wǔvɛ́, adohu adohu, yadónúmɛ, xovɛ́, avɔ hán mɛ, awǒvinú alǒ hwǐ wɛ a? 36 È ko wlán ɖɔ: “È nɔ ɖo mǐ hu wɛ ɖo azǎn ɔ bǐ jí ɖó hwɛ wú; è nɔ kpɔ́n mǐ dó mɔ lɛ̌ngbɔ́ e è ná hu lɛ́ é.” 37 É ɖo mɔ̌ có, mǐ nɔ xo nǔ énɛ́ lɛ́ bǐ zlɛ́ mlɛ́mlɛ́ kpó ɖuɖéjí kpó gbɔn mɛ e yí wǎn nú mǐ é gblamɛ. 38 Ðó un kú d’é jí ɖɔ kú wɛ a, gbɛ wɛ a, wɛnsagun lɛ́ wɛ a, acɛkpikpa lɛ́ wɛ a, nǔ e tíin din lɛ́ é wɛ a, nǔ e ná wá tíin lɛ́ é wɛ a, hlɔ̌nhlɔ́n lɛ́ wɛ a, 39 nǔ e ɖo jǐ lɛ́ é wɛ a, nǔ e ɖo do lɛ́ é wɛ a, alǒ nǔɖíɖó ɖěvo ɖěbǔ kún sixú kpé wú bo ɖe mǐ ɖó vo nú wǎnyíyí Mawu tɔn e é ɖe xlɛ́ mǐ, gbɔn Klísu Jezu Aklúnɔ mǐtɔn jí é ó.

9 Nǔgbó ɖɔ wɛ un ɖe ɖo Klísu mɛ; un ɖo adingban ɖó wɛ ǎ, ayixa ce ɖo kúnnu ɖe nú mì wɛ gbɔn gbigbɔ mímɛ́ gblamɛ 2 ɖɔ un ɖo aluwɛ ɖaxó mɛ, bo nɔ ɖo wǔvɛ́ se wɛ ɖo ayi mɛ magbokɔ. 3 Ðó é ná ko jló mì ɖɔ è ní ɖe mì ɖó zɔ nú Klísu, mɛ e è dó nu é ɖɔhun dó nɔví ce lɛ́ tamɛ, yě wɛ nyí mɛ e ɖo akɔta ce mɛ lɛ́ é; 4 Izlayɛ́li ví lɛ́ wɛ. Yě wɛ Mawu sɔ́ dó ɖó vǐ, xɔ susu ná, jɛ akɔ xá, ná Sɛ́n ɔ, sɔ́ sinsɛnzɔ́ mímɛ́ ɔ d’así ná, bo lɛ́ d’akpá ná. 5 Tɔ́gbó mǐtɔn lɛ́ sín kúnkan wɛ yě nyí, bɔ ɖo agbaza lixo ɔ, kúnkan yětɔn mɛ wɛ Klísu gosín. Susu nú Mawu e ɖó acɛ dó nǔ bǐ jí é káká sɔ́yi. Amǐ.

6 É ɖo mɔ̌ có, ɖiɖɔ wɛ mǐ ɖe ɖɔ xó Mawu tɔn kún jɛnu ó ǎ. Ðó mɛ e nyí kúnkan Izlayɛ́li tɔn lɛ́ é bǐ wɛ nyí Izlayɛ́li ví nǔgbó ǎ. 7 Kúnkan* Ablaxámu tɔn e yě nyí é ka lɛ́ zɔ́n bónú yě bǐ nyí vǐ ǎ; é nyɔ́ wa ɔ, è wlán ɖɔ: “Nǔ e è ná ylɔ́ ɖɔ kúnkan* towe é ná wá gbɔn Izáki jí.” 8 Énɛ́ wɛ nyí ɖɔ vǐ e è ji lěe è nɔ ji vǐ bǐ gbɔn é ɖɔhun lɛ́ é kún nyí vǐ Mawu tɔn nǔgbó lɛ́ ó, é nyɔ́ wa ɔ, vǐ e è ji ɖó akpá ɖé wútu lɛ́ é wɛ è nɔ kpɔ́n dó mɔ kúnkan* ɔ. 9 Ðó lěe è dó akpá ɔ gbɔn é ɖíe: “Hwenu e un ɖó dó é su ɔ, un ná wá bɔ Sala ná ko ɖó vǐ súnnu ɖokpó.” 10 É ka nyí hwenɛ́nu kɛ́ɖɛ́ ǎ, loɔ, nǔ lɛ́vɔ́ nyí mɔ̌ hwenu e Hlebéka mɔ hǒxo sín xo nú tɔ́gbó mǐtɔn Izáki é; 11 ɖó hwenu e è ma ko ji vǐ énɛ́ lɛ́ ǎ, bɔ yě ma ko wa nǔ ɖagbe ɖě alǒ nǔ nyanya ɖě ǎ é ɔ, Mawu ko ɖɔ mɛ e é ná sɔ́ é dó nukɔn, ɖó Mawu nɔ sɔ́ mɛ e jló è é, é ka nɔ zɔn dó nǔ e è wa lɛ́ é wú ǎ, 12 énɛ́ wú wɛ è ɖɔ nú Hlebéka ɖɔ: “Mɛxó ɔ ná nyí mɛsɛntɔ́ yɔkpɔ́vú ɔ tɔn.” 13 Lěe è ko wlán ɖ’ayǐ gbɔn é ɔ, è ɖɔ: “Un yí wǎn nú Jakɔ́bu, loɔ, un gbɛ́ wǎn nú Esáwu.”

14 Étɛ́ mǐ ka ná ɖɔ din? Mawu nɔ dó hwɛ agɔ wɛ a? Gbeɖé kpɔ́n! 15 Ðó é ɖɔ nú Mɔyízi ɖɔ: “Un ná kú nǔbláwǔ nú mɛ ɖěbǔ e un ba ná kú nǔbláwǔ ná é, bo ná se wǔvɛ́ xá mɛ ɖěbǔ e un ba ná se wǔvɛ́ xá é.” 16 Hǔn, é nɔ sín jlǒ mɛɖé tɔn alǒ gǎndídó tɔn wú ǎ,* é nyɔ́ wa ɔ, nǔbláwǔkúnúmɛ Mawu tɔn wú wɛ é nɔ sín. 17 Ðó Mawu ɖɔ nú Falawɔ́ɔn ɖo nǔwlánwlán mímɛ́ ɔ mɛ ɖɔ: “Hwɛjijɔ e wú un jó we dó nyi gbɛ é ɖíe: bo ná dó ɖe hlɔ̌nhlɔ́n ce xlɛ́ gbɔn jǐ towe, lobonú è ní jlá nyǐkɔ ce gbɔn ayǐkúngban ɔ bǐ jí.” 18 Hǔn, Mawu nɔ kú nǔbláwǔ nú mɛ ɖěbǔ e jló è é, loɔ, é nɔ jó mɛ ɖěbǔ e ba ná nyí tasyɛ́ntɔ́ é dó bɔ é nɔ húzú tasyɛ́ntɔ́.

19 Énɛ́ wú ɔ, a ná ɖɔ nú mì ɖɔ: “Étɛ́wú é ka lɛ́ kpo ɖo nǔwanyido mɔ nú mɛ wɛ? Ðó mɛ̌ ka sixú klán gbe xá jlǒ tɔn?” 20 Amɔ̌, hwi gbɛtɔ́ è, mɛ̌ a ka nyí bo ná mɔ xó ɖɔ dó Mawu wú? Nǔ e è bló é nɔ ɖɔ nú mɛ e bló è é ɖɔ: “Étɛ́wú a ka bló mì gbɔn lě” wɛ a? 21 Étɛ́? Zɛ̌nmɛtɔ́ ɔ ɖó acɛ dó ko jí, bo ná sɔ́ ko nyinya ɖokpó ɔ dó bló zɛ̌n e è nɔ zán nú nǔjɔnǔ lɛ́ é ná, lobo lɛ́ sɔ́ dó bló zɛ̌n e è nɔ zán nú nǔ yǎyá lɛ́ é ná ǎ cé? 22 Ényí Mawu jló ná ɖe xomɛsin tɔn xlɛ́, bo ná lɛ́ bló bɔ è ná tuun hlɔ̌nhlɔ́n tɔn, lobo ka tin dó mɛ ɖěɖěe dó xomɛsin n’i bɔ é jɛxá ɖɔ è ní sú kún yětɔn dó lɛ́ é kpó suúlu ɖaxó kpó ɔ, étɛ́ mǐ ka ná ɖɔ lo? 23 Ényí é wa mɔ̌ bo ná dó ɖe lěe susu tɔn d’agba sɔ é xlɛ́ mɛ ɖěɖěe é ná kú nǔbláwǔ ná, bɔ é ko sɔ́ nǔ nú yě jɛ nukɔn bo ná xɔ susu ná lɛ́ é ɔ, 24 étɛ́ mǐ ka ná ɖɔ? Mǐdɛɛ lɛ́ wɛ nyí mɛ énɛ́ lɛ́. É nyí Jwifu lɛ́ kɛ́ɖɛ́ mɛ wɛ é ylɔ́ mǐ sín ǎ, loɔ, é lɛ́ ylɔ́ mǐ sín akɔta ɖě lɛ́ mɛ. 25 Lěe é lɛ́ ɖɔ gbɔn ɖo wěma Ozée tɔn mɛ é wɛ, é ɖɔ: “Un ná ylɔ́ mɛ ɖěɖěe ma nyí togun ce ɖ’ayǐ ǎ lɛ́ é ɖɔ ‘togun ce,’ bo ná ylɔ́ nyɔ̌nu e è ma yí wǎn ná ɖ’ayǐ ǎ é ɖɔ ‘wǎnyínámɔ’; 26 bɔ fí e è ɖɔ nú yě ɖɔ: ‘Mi nyí togun ce ǎ’ ɖe ɖ’ayǐ é ɔ, è ná ylɔ́ yě ɖɔ: ‘Mawu gbɛɖe ɔ sín vǐ lɛ́’ ɖo fínɛ́.”

27 Gɔ́ ná ɔ, Ezayíi sú xó bo ɖɔ dó Izlayɛ́li wú ɖɔ: “Ényí Izlayɛ́li ví lɛ́ sín kɛ́n ná bo cí nyɛ̌kɛ́n e ɖo xutó é ɖɔhun ɔ, yě mɛ kpɛɖé jɛ́n è ná hwlɛ́n gán. 28 Ðó Jexóva* ná ɖɔ hwɛ dó ayǐkúngban ɔ, é ná wa mɔ̌ bǐ mlɛ́mlɛ́, é ka ná dán lɛjɛlɛjɛ ɖ’é kɔn ǎ.”* 29 Ezayíi lɛ́ ɖɔ ɖ’ayǐ ɖɔ: “Ényí Jexóva* ahwankpá lɛ́ tɔn ma ko jó kúnkan* ɖé dó nú mǐ wɛ ǎ ɔ, mǐ ná ko cí Sodɔ́mu kpó Gomɔ́ɔ kpó ɖɔhun.”

30 Étɛ́ mǐ ka ná ɖɔ lo? Mɛ e ɖo akɔta ɖě lɛ́ mɛ lɛ́ é ɖo nǔjlɔ́jlɔ́watɔ́ nyínyí gbé nya wɛ ǎ có, yě kpé wú bo nyí nǔjlɔ́jlɔ́watɔ́, nǔjlɔ́jlɔ́watɔ́ e nǔɖiɖi nɔ zɔ́n bɔ è nɔ nyí é; 31 amɔ̌, Izlayɛ́li ɖo nǔjlɔ́jlɔ́watɔ́ nyínyí sín sɛ́n ɔ gbé nya wɛ có, é kpé wú bo nyi sɛ́n énɛ́ bǐ mlɛ́mlɛ́ ǎ. 32 Ðó hwɛjijɔ tɛ́ wú? Ðó yě nya gbě tɔn gbɔn nǔɖiɖi gblamɛ ǎ, loɔ, gbɔn nǔwiwa yětɔn gblamɛ wɛ. Yě klɛ́n afɔ dó “awǐnnya e nɔ zɔ́n bɔ è nɔ klɛ́n afɔ é” wú; 33 lěe è ko wlán ɖ’ayǐ gbɔn é ɔ, è ɖɔ: “Éɖíe! Un ɖo awǐnnya e nɔ zɔ́n bɔ è nɔ klɛ́n afɔ é kpó awǐnnya e nɔ zin mɛ dɛ́ é kpó dó do nyi Sinyɔ́ɔ wɛ, amɔ̌, mɛ e ná sɔ́ nǔɖiɖi tɔn jínjɔ́n jí é ɔ, è ná flú i ǎ.”

10 Nɔví lɛ́ mi, nǔgbó ɔ, nǔ e un nɔ jló nú yě ɖo ayi ce mɛ, bo nɔ lɛ́ sa vo tɔn nú Mawu dó ta yětɔn mɛ é wɛ nyí ɖɔ yě ní gán. 2 Ðó un sixú ɖe kúnnu ɖɔ akpakpa nɔ sɔ́ yě dó mawusinsɛn wú, loɔ, é jínjɔ́n nukúnnúmɔjɛnǔmɛ e sɔgbe é jí ǎ. 3 Yě tuun nǔjlɔ́jlɔ́wiwa Mawu tɔn ǎ, bo nɔ ba ná ɖó yěɖésúnɔ tɔn ayǐ. Énɛ́ wɛ zɔ́n bɔ yě ma nɔ hwíhwɛ́ yěɖée dó nǔjlɔ́jlɔ́wiwa Mawu tɔn glɔ́ ǎ. 4 Ðó Klísu wɛ nyí vivɔnu Sɛ́n ɔ tɔn, bónú è ná dó sixú kpɔ́n mɛ e ɖe xlɛ́ ɖɔ émí ɖi nǔ lɛ́ é bǐ dó mɔ nǔjlɔ́jlɔ́watɔ́.

5 Ðó Mɔyízi wlán nǔ dó nǔjlɔ́jlɔ́watɔ́ nyínyí sɔgbe xá Sɛ́n ɔ wú, bo ɖɔ: “Mɛ e ná wa nǔ énɛ́ lɛ́ é ná nɔ gbɛ gbɔn gbla yětɔn mɛ.” 6 È ka ɖɔ dó nǔjlɔ́jlɔ́watɔ́ e nǔɖiɖi nɔ zɔ́n bɔ è nɔ nyí é wú ɖɔ: “Ma nɔ ɖɔ xó élɔ́ lɛ́ dó ayi mɛ ó: ‘Mɛ̌ ka ná yi jǐxwé?’ É wɛ nyí ɖɔ, bo ná kplá Klísu jɛ te, 7 alǒ: ‘Mɛ̌ ka ná byɔ́ domaɖó azan mɛ?’ É wɛ nyí ɖɔ, bo ná ɖe Klísu tɔ́n sín mɛkúkú lɛ́ mɛ.” 8 Amɔ̌, étɛ́ nǔwlánwlán mímɛ́ ɔ ka ɖɔ? É ɖɔ: “Xó ɔ ɖo akpá mitɔn, é ɖo nu mitɔn mɛ, bo lɛ́ ɖo ayi mitɔn mɛ”; énɛ́ wɛ nyí, nǔɖiɖi sín “xó ɔ,” éé jlá wɛ mǐ ɖe é. 9 Ðó ényí a nɔ jlá kpó nu towe kpó ɖo agbawungba ɖɔ Jezu nyí Aklúnɔ, bo lɛ́ ɖi nǔ ɖo ayi towe mɛ ɖɔ Mawu fɔ́n ɛ sín mɛkúkú lɛ́ mɛ ɔ, a ná gán. 10 Ðó kpó ayi mɛtɔn kpó wɛ è nɔ ɖe xlɛ́ ɖɔ è ɖi nǔ, bo ná mɔ tɛn dó nyí nǔjlɔ́jlɔ́watɔ́, amɔ̌, kpó nu mɛtɔn kpó wɛ è nɔ ɖɔ nǔɖiɖi énɛ́ sín xó ɖo agbawungba, bo ná mɔ tɛn dó gán.

11 Ðó nǔwlánwlán mímɛ́ ɔ ɖɔ: “Mɛ ɖěbǔ e ná ɖi nǔ n’i* é ɔ, è ná flú i ǎ.” 12 Ðó vogbingbɔn ɖě ɖo Jwifu kpó Glɛ̌kinu kpó tɛ́ntin ǎ. Aklúnɔ ɖokpó ɔ wɛ mɛ bǐ ɖó, bɔ é nɔ kɔn nyɔ̌ná gěgé dó mɛ ɖěɖěe nɔ ylɔ́ ɛ lɛ́ é bǐ jí. 13 Ðó “mɛ ɖěbǔ e ylɔ́ nyǐkɔ Jexóva* tɔn é ɔ, è ná hwlɛ́n ɛ gán.” 14 Amɔ̌, ényí yě ma ɖi nǔ n’i ǎ ɔ, nɛ̌ yě ka ná ylɔ́ nyǐkɔ tɔn gbɔn? Bɔ nɛ̌ yě ka sixú ɖi nǔ nú mɛ e sín xó yě ma se ǎ é gbɔn? Ényí mɛɖé ma jlá xó tɔn yě ǎ ɔ, nɛ̌ yě ka ná se gbɔn? 15 Ényí è ma sɛ́ yě dó ǎ ɔ, nɛ̌ yě ka ná jlá gbɔn? Ðó è ko wlán ɖɔ: “Mɛ ɖěɖěe ɖo wɛn ɖagbe nǔ ɖagbe lɛ́ tɔn jlá wɛ lɛ́ é sín afɔ nyɔ́ ɖɛkpɛ mɛ nya!”

16 É ɖo mɔ̌ có, yě mɛ bǐ yí* wɛn ɖagbe ɔ ǎ. Ðó Ezayíi ɖɔ: “Jexóva,* mɛ̌ ka ɖi nǔ nú xó e è se ɖo mǐ nu é?” 17 Hǔn, nǔ e è se é wɛ nɔ zɔ́n bɔ è nɔ ɖó nǔɖiɖi. Nǔ e è se é wɛ ka nyí xó e è ɖɔ dó Klísu wú é. 18 Amɔ̌, un kanbyɔ́ ɖɔ: Yě ma ka gɔn sise nɛ́, kabǐ? Nǔgbó ɔ, “gbe yětɔn kpé ayǐkúngban ɔ bǐ jí, bɔ è se wɛn yětɔn káká yi fí e ayǐkúngban ɔ fó ɖó é.” 19 Un lɛ́vɔ́ kanbyɔ́ ɖɔ: Izlayɛ́li ma ka gɔn tuuntuun nɛ́, kabǐ? Jɛ nukɔn hwɛ̌ ɔ, Mɔyízi ɖɔ: “Un ná bló bɔ a ná hwan wǔ togun e ma nyí akɔta ǎ é; un ná bló bɔ a ná sin xomɛ tawun, ɖó akɔta e ma nyí nǔɖéwanú ǎ é wú.” 20 Énɛ́ gúdo ɔ, Ezayíi gbó adɔ tawun bo ɖɔ: “Mɛ e ma ɖo biba mì wɛ ǎ lɛ́ é mɔ mì; mɛ e ma ɖo kinkan mì byɔ́ wɛ ǎ lɛ́ é wá tuun mì.” 21 Amɔ̌, é ɖɔ dó Izlayɛ́li wú ɖɔ: “Gbe bǐ gbe wɛ un kɛ awa nú togun tótlítɔ́ tasyɛ́ntɔ́ ɖé.”

11 Énɛ́ wú ɔ, un kanbyɔ́ ɖɔ: Mawu gbɛ́ togun tɔn ǎ, kabǐ? Ðěbǔ lɔ ǎ! Ðó nyi lɔmɔ̌ ɔ, Izlayɛ́li ví wɛ un nyí, bo gosín kúnkan* Ablaxámu tɔn mɛ, lobo gosín akɔta Bɛnjamɛ́ɛ tɔn mɛ. 2 Mawu gbɛ́ togun tɔn e jí é sɔ́ ayi ɖó jɛ nukɔn é ǎ. Mi tuun nǔ e nǔwlánwlán mímɛ́ ɔ ɖɔ dó Elíi wú é ǎ cé? Elíi sa vo, bo jɛ Izlayɛ́li ví lɛ́ sín hwɛ nú Mawu. É ɖɔ: 3 “Jexóva,* yě hu gbeyíɖɔ towe lɛ́, bo gba vɔ̌sákpe towe lɛ́; nyiɖokpónɔ wɛ kpo, bɔ din ɔ, yě ɖo tíntɛ́nkpɔ́n wɛ bo ná hu mì.” 4 Amɔ̌, étɛ́ Mawu ka ɖɔ n’i? “É kpo súnnu 7 000 ɖo gbɛ nú mì, bɔ yědɛɛ lɛ́ jɛ kpo nú Baálu ǎ.” 5 Ðo ali ɖokpó ɔ nu ɔ, din ɖésú ɔ, é lɛ́ kpo mɛ kpɛɖé; mɛ e è cyán gbɔn fɛ́nú Mawu tɔn gblamɛ lɛ́ é wɛ. 6 Hǔn din ɔ, ényí fɛ́nú gblamɛ wɛ è cyán yě gbɔn ɔ, é sɔ́ nyí nǔ e yě wa lɛ́ é gblamɛ ǎ nɛ́; é ma nyí mɔ̌ ǎ ɔ, fɛ́nú Mawu tɔn sɔ́ ná nyí fɛ́nú ǎ.

7 Étɛ́ mǐ ka ná ɖɔ lo? Nǔ e ba wɛ Izlayɛ́li ví lɛ́ ɖe vɛ́návɛ́ná é ɔ, yě mɔ yí ǎ, mɛ e è cyán lɛ́ é ka mɔ yí. Mɛ e kpo lɛ́ é ɔ, ayi yětɔn kú atli, 8 lěe è ko wlán gbɔn é, é wɛ nyí ɖɔ: “Káká jɛ égbé ɔ, Mawu bló bɔ yě cí mɛ e ɖo amlɔ ɖaxó mɛ lɛ́ é ɖɔhun; nukún yětɔn lɛ́ nɔ mɔ nǔ ǎ, tó yětɔn lɛ́ nɔ se nǔ ǎ.” 9 Gɔ́ ná ɔ, Davídi ɖɔ: “Agɔ̌ e yě nɔ ɖu lɛ́ é* ní húzú mɔ, fɛ́ca, afɔklɛ́nnú kpó nǔ e wú è ná dɔn tó nú yě é kpó nú yě. 10 Nukún yětɔn lɛ́ ní dó zǐnflú, bónú yě ní ma sɔ́ kpé wú bo mɔ nǔ ó; lɛ̌ bló bónú yě ní nɔ nɔ tɔ́tɔ́ hwebǐnu.”

11 Énɛ́ wú ɔ, un kanbyɔ́ ɖɔ: yě klɛ́n afɔ bo j’ayǐ bǐ mlɛ́mlɛ́ ǎ, kabǐ? Ðěbǔ ǎ! Amɔ̌, afɔ e yě ɖe nyi do é nyí hwlɛngán nú mɛ e ɖo akɔta ɖě lɛ́ mɛ lɛ́ é, bo ná dó zɔ́n wǔ hwan yě. 12 Hǔn, ényí afɔ e yě ɖe nyi do é dó dɔkun* nú gbɛ ɔ, bɔ ɖe e yě ɖe kpo é dó dɔkun nú mɛ e ɖo akɔta ɖě lɛ́ mɛ lɛ́ é ɔ, mi kpɔ́n lě do kɛ́n yě bǐ tɔn ná dó dɔkun nú mɛ sɔ é!

13 Mi mɛ e ɖo akɔta ɖě lɛ́ mɛ lɛ́ é ɖɔ xó ná gbé wɛ un ja din. Ðó un nyí mɛsɛ́dó nú mɛ e ɖo akɔta ɖě lɛ́ mɛ lɛ́ é wútu ɔ, un nɔ xɔ susu nú sinsɛnzɔ́ ce, 14 bo ná kpɔ́n ɖɔ un ka ná sixú zɔ́n wǔ hwan mɛ e ɖo togun ce ɖésú mɛ lɛ́ é* ɖo ali ɖé nu, bo ná hwlɛ́n yě mɛ ɖé lɛ́ a jí. 15 Ðó ényí gbɛ̌ e è gbɛ́ yě é zɔ́n bɔ gbɛ ɔ dó hwɛ gbɔ xá Mawu ɔ, gbe e è yí nú yě é ná zɔ́n bɔ yě ná fɔ́n sín kú wá gbɛ ǎ cé? 16 Gɔ́ ná ɔ, ényí linfín nyinya ɔ sín akpáxwé e è kpɔ́n dó mɔ sínsɛ́n nukɔntɔn lɛ́ é nyí nǔ mímɛ́ ɔ, linfín nyinya ɔ blěbú lɔ nyí nǔ mímɛ́ nɛ́; bɔ ényí ɖɔ ɔ nyí nǔ mímɛ́ hǔn, ala lɛ́ lɔ nyí nǔ mímɛ́ nɛ́.

17 É ɖo mɔ̌ có, è jlá ala lɛ́ hǎbǔ síin, bɔ hwi mɛ e nyí olívutín gbě tɔn é ɔ, è sɔ́ we kpé dó fí e è jlá ala lɛ́ sín é nu, bɔ a ɖó mǐmá ɖo nǔ ɖagbe ɖagbe tobutóbú e ɖo olívutín ɔ sín ɖɔ mɛ lɛ́ é mɛ; ényí mɔ̌ hǔn, 18 ma yí nugo ala lɛ́ wú ó. Ényí nugo wɛ a ka nɔ yí yě wú hǔn, flín ɖɔ é kún nyí hwi wɛ hɛn ɖɔ ɔ ɖó te ó, loɔ, é wɛ hɛn we ɖó te. 19 A ka ná ɖɔ: “Ala lɛ́ wɛ è sɛ́n síin, bo mɔ tɛn dó sɔ́ mì kpé dó fí e è sɛ́n yě sín é nu.” 20 Nǔgbó wɛ! È sɛ́n yě síin ɖó nǔmaɖi yětɔn wú, amɔ̌ hwɛ ɔ, a kpo ɖo te, ɖó nǔɖiɖi towe wú. Ma yí nugo ó, é nyɔ́ wa ɔ, xɛsi ní ɖi we. 21 Ðó ényí Mawu ma jó ala dodó lɛ́ dó nyi atín ɔ wú ǎ ɔ, é ná jó hwi lɔ dó ǎ. 22 Énɛ́ wú ɔ, lin tamɛ dó xomɛnyínyɔ́ Mawu tɔn kpó tódɔnnúmɛ tɔn kpó jí. Mawu ná dɔn tó nú mɛ e j’ayǐ lɛ́ é, amɔ̌ hwɛ ɔ, é ná nyɔ́ xomɛ dó wǔtu towe, ényí a kpo ɖo xomɛnyínyɔ́ tɔn jɛxá wɛ ɔ nɛ́, é ma nyí mɔ̌ ǎ ɔ, è ná sɛ́n hwi lɔ síin. 23 Yě lɔmɔ̌ ɔ, ényí yě lɛ́ kɔ sín nǔmaɖi yětɔn gúdo ɔ, è ná sɔ́ yě kpé dó fí e è ɖe yě sín é nu, ɖó Mawu kpé wú, bo ná lɛ́ sɔ́ yě kpé dó fí e yě ɖe ɖ’ayǐ é nu. 24 È sɛ́n we sín olívutín e nyí gbě tɔn é wú, bo sɔ́ we kpé dó olívutín e ɖo jikpá mɛ é nu, mɔ̌ bíbló ka nyí jɔwámɔ sín nǔ ǎ; ényí mɔ̌ ɔ, é ná bɔ wǔ tawun ɖɔ è ní sɔ́ ala dodó énɛ́ lɛ́ kpé dó olívutín e wú yě ɖe ɖ’ayǐ é nu ǎ cé?

25 Nɔví lɛ́ mi, bónú mi ma wá húzú nǔnywɛ́tɔ́ ɖo miɖésúnɔ nukúnmɛ ó ɔ, un ba bónú mi ní dán do nú nǔbúdo Mawu tɔn élɔ́ ǎ: Izlayɛ́li ví ɖé lɛ́ sín ayi kú atli, káká jɛ hwenu e è ná xo mɛ e ɖo akɔta ɖě lɛ́ mɛ lɛ́ é kplé fó dó é; 26 bɔ mɔ̌ mɛ ɔ, è ná hwlɛ́n Izlayɛ́li ví lɛ́ bǐ gán. Ðó è ko wlán ɖɔ: “Mɛhwlɛ́ngántɔ́ ɔ ná tɔ́n sín Sinyɔ́ɔ, bo ná sú kún dó nú nǔnyanyawiwa bǐ sín Jakɔ́bu kún mɛ. 27 Hwenu e un ná sɔ́ hwɛ yětɔn lɛ́ kɛ yě é ɔ, akɔ e un ná jɛ xá yě é nɛ́.” 28 Nǔgbó ɔ, yě nyí kɛntɔ́ wɛn ɖagbe ɔ tɔn lɛ́, bɔ énɛ́ ka hɛn le wá nú mi; amɔ̌, Mawu cyán yě, bɔ yě nyí mɛ vívɛ́ná tɔn lɛ́, ɖó tɔ́gbó yětɔn lɛ́ wútu. 29 Ðó nǔ e Mawu ná lɛ́ é ná vɛ́ n’i ǎ, mɔ̌ jɛ́n mɛ e é ylɔ́ lɛ́ é ma ná vɛ́ n’i ǎ é nɛ́. 30 Ðó lěe mi ko vɛ́ tóli nú Mawu ɖ’ayǐ, bɔ din ɔ, é ka kú nǔbláwǔ nú mi, ɖó tónúmase yětɔn wú gbɔn é ɔ, 31 mɔ̌ jɛ́n mɛ énɛ́ lɛ́ lɔ vɛ́ tóli din, bɔ énɛ́ zɔ́n bɔ è kú nǔbláwǔ nú mi, bónú è ní dó sixú kú nǔbláwǔ nú yě lɔ din. 32 Mawu jó yě bǐ dó, bɔ yě nyí gantɔ́ nú tónúmase, bónú é ná dó sixú kú nǔbláwǔ nú yě mɛ bǐ.

33 Nyɔ̌ná Mawu tɔn, nǔnywɛ́ tɔn kpó nǔtuuntuun tɔn kpó d’agba lóóo! Mɛ̌ ka sixú mɔ do nú hwɛɖiɖɔ tɔn lɛ́? Mɛ̌ ka sixú mɔ nǔ jɛ nǔwiwa tɔn lɛ́ wú? 34 Ðó “mɛ̌ ka tuun linlin Jexóva* tɔn, alǒ mɛ̌ ka húzú wěɖexámɛtɔ́ tɔn?” 35 Alǒ, “mɛ̌ ka ná nǔ i jɛ nukɔn, bɔ é ɖó ná sú axɔ́ tɔn mɛ ɔ?” 36 Ðó gɔ̌n tɔn wɛ nǔ bǐ gosín, é wɛ nyí tɔn bɔ nǔ bǐ tíin, bɔ nǔ bǐ nyí étɔn. Susu ní nyí étɔn káká sɔ́yi. Amǐ.

12 Énɛ́ wú ɔ, nɔví lɛ́ mi, un ɖo vo sa nú mi wɛ gbɔn nǔbláwǔkúnúmɛ Mawu tɔn gblamɛ ɖɔ, mi ní xwlé agbaza mitɔn Mawu, vɔ̌sánú gbɛɖe e mɛ́, bɔ Mawu lɛ́ yí gbe ná é ɖɔhun; énɛ́ wɛ nyí sinsɛnzɔ́ mímɛ́ wiwa kpó nǔwúkpíkpé tamɛ linlin tɔn mitɔn kpó. 2 Gɔ́ ná ɔ, mi ma sɔ́ nɔ wa nǔ gbɛ* élɔ́ ɖɔhun ɖě ó, é nyɔ́ wa ɔ, mi jó Mawu dó nú é ní húzú linlin mitɔn, mɔ̌ mɛ ɔ, mi ná mɔ nǔ jɛ jlǒ Mawu tɔn wú; é nyɔ́ bɔ è sixú yí gbe ná, lobɔ nǔ bǐ lɛ́ vɔ ɖ’é wú.

3 Ðó gbɔn fɛ́nú e è ná mì é gblamɛ ɔ, un ɖo ɖiɖɔ nú mi mɛ ɖokpó ɖokpó wɛ ɖɔ mi ní ma nɔ mɔ miɖée zɛ nǔ e mi nyí é wú ó, é nyɔ́ wa ɔ, mi ní nɔ ɖó linlin e ɖo jlɛ̌ jí é sɔgbe xá nǔɖiɖi e Mawu ná* mi mɛ ɖokpó ɖokpó é. 4 Ðó lěe agbaza mǐtɔn ɖó wǔjɔnú gěgé, bɔ yě bǐ ma ka nɔ wa azɔ̌ ɖokpó ɔ ǎ gbɔn é ɔ, 5 mɔ̌ ɖokpó ɔ, mǐ sukpɔ́ có, mǐ nyí agbaza ɖokpó bo ɖo bǔ xá Klísu, amɔ̌, mǐ mɛ ɖokpó ɖokpó nyí wǔjɔnú agbaza ɔ tɔn lɛ́ bo cá dó mǐɖée lɛ́ wú. 6 Hǔn, ɖó nǔníná vovo wɛ mǐ ɖó sɔgbe xá fɛ́nú e è ná mǐ é wútu ɔ, ényí gbeyíɖɔzɔ́ wiwa tɔn wɛ hǔn, mi bo nú mǐ ní wa gbeyíɖɔzɔ́ sɔgbe xá nǔɖiɖi e mǐ ɖó é; 7 ényí sinsɛnzɔ́ ɖé wiwa tɔn wɛ hǔn, mi bo nú mǐ ní wa sinsɛnzɔ́ énɛ́; mɛ e nɔ kplɔ́n nǔ mɛ é ní bo nɔ kplɔ́n nǔ mɛ; 8 mɛ e nɔ dó wǔsyɛ́n lanmɛ nú mɛ* é ní bo nɔ dó wǔsyɛ́n lanmɛ nú mɛ;* mɛ e nɔ ná nǔ mɛ* é ní bo nɔ hun alɔ dó wa mɔ̌; mɛ e ɖo ali xlɛ́ mɛ wɛ é ní wa mɔ̌ kpó kanɖódónǔwú* kpó; mɛ e nɔ kú nǔbláwǔ nú mɛ é ní nɔ wa mɔ̌ kpó xomɛhunhun kpó.

9 Wǎnyíyí mitɔn ní ma nyí yɛmɛnúwiwa tɔn ó. Mi gbɛ́ wǎn nú nǔ e nyí nǔ nyanya é bo tɛ́ dó nǔ e nyí nǔ ɖagbe é wú. 10 Mi yí wǎn nú miɖée lɛ́ nɔví nɔví ɖɔhun, bo ɖó wǎnyíyí e gɔ́ngɔ́n é nú miɖée lɛ́. Mi ní nɔ jɛ nukɔn* bo nɔ wlí yɛ̌yi nú miɖée lɛ́. 11 Mi ní nyí azɔ̌syɛ́nsyɛ́nwatɔ́,* mi ma nyí fɔnlínnɔ ó.* Mi jó gbigbɔ mímɛ́ ɔ dó nú é ní bló bónú akpakpa ní nɔ sɔ́ mi. Mi ní nɔ wa azɔ̌ nú Jexóva* kannumɔ ɖɔhun. 12 Mi ní nɔ j’awǎ ɖó nukúnɖíɖó mitɔn wú. Mi ní nɔ dɛ ɖo wǔvɛ́ lɛ́ nu. Mi ní nɔ ɖó kan dó ɖɛxixo wú. 13 Mi ní nɔ má nǔ e mi ɖó lɛ́ é xá mɛ mímɛ́ lɛ́, sɔgbe xá hudó yětɔn lɛ́. Mi ní nɔ yí mɛ. 14 Mi ní nɔ byɔ́ nyɔ̌ná dó mɛ e nɔ dó ya nú mi lɛ́ é jí; mi ní nɔ byɔ́ nyɔ̌ná dó mɛ jí, bo ma nɔ dó nu mɛ ó. 15 Mi ní nɔ j’awǎ xá mɛ e ɖo awǎ jɛ wɛ lɛ́ é; mi ní nɔ y’avǐ xá mɛ e ɖo avǐ ya wɛ lɛ́ é. 16 Mi ní nɔ ɖó linlin e mi nɔ ɖó dó miɖésúnɔ wú é ɖokpó ɔ dó mɛ ɖěvo lɛ́ wú; mi ma nɔ sɔ́ ayi mitɔn ɖó nǔ ɖaxó ɖaxó lɛ́ jí* ó, é nyɔ́ wa ɔ, mi ní nɔ ɖó linlin mɛɖéesɔ́hwe tɔn lɛ́. Mi ma nɔ mɔ miɖée dó mɔ nǔnywɛ́tɔ́ ó.

17 Mi ma sɔ́ nyanya dó sú nyanyaxɔ́ mɛ ɖěbǔ ó. Nǔ e mɛ bǐ nɔ lin ɖɔ é nyí nǔ ɖagbe é* ní nɔ ɖu ayi mɛ nú mi. 18 Mi wa nǔ e wú mi kpé é bǐ, bo nɔ fífá mɛ xá mɛ lɛ́ bǐ, nú é nyɔ́ bló ɔ nɛ́. 19 Mɛ vívɛ́ná ce lɛ́ mi, miɖésúnɔ ní ma nɔ ba hlɔn ó, é nyɔ́ wa ɔ, mi jó Mawu dó bónú é ní ɖe xomɛsin tɔn xlɛ́; ɖó è ko wlán ɖɔ: “‘Nyɛ wɛ nɔ ba hlɔn; un ná sú nǔ e è jɛxá é sín axɔ́ mɛ,’ wɛ Jexóva* ɖɔ.” 20 É nyɔ́ wa ɔ, “ényí xovɛ́ sin kɛntɔ́ towe hǔn, nǎ nǔɖuɖu i; ényí kɔ xú i hǔn, nǎ sin i; ɖó ényí a ɖo mɔ̌ bló wɛ ɔ, é ná cí ɖɔ myɔkán kplé ɖó ta n’i wɛ a ɖe ɖɔhun.”* 21 Ma jó hwiɖée dó bónú nǔ nyanya ní ɖu ɖo jǐ towe ó, é nyɔ́ wa ɔ, nɔ wa nǔ ɖagbe dó ɖu ɖo nǔ nyanya jí.

13 Mɛ* ɖokpó ɖokpó ní nɔ hwíhwɛ́ éɖée dó acɛkpatɔ́* lɛ́ glɔ́, ɖó ényí Mawu ma yí gbe nú acɛkpikpa ɖé ǎ ɔ, é sixú tíin ǎ; Mawu wɛ yí gbe bɔ acɛkpatɔ́ lɛ́ tíin bo ɖo tɛn acɛkpikpa tɔn vovo lɛ́ mɛ. 2 Énɛ́ wú ɔ, mɛ ɖěbǔ e fɔ́n gǔ dó acɛkpikpa jí é ɔ, tuto Mawu tɔn jí wɛ é sí te dó; yě mɛ e sí te d’é jí lɛ́ é ná dɔn hwɛɖónúmɛ dó yěɖée jí. 3 Ðó è nɔ ɖi xɛsi nú gǎn énɛ́ lɛ́, é ka nyí mɛ e nɔ wa nǔ ɖagbe lɛ́ é wɛ nɔ ɖi xɛsi nú yě ǎ, loɔ, mɛ e nɔ wa nǔ nyanya lɛ́ é. A ka jló ná gɔn xɛsi ɖi nú acɛkpatɔ́ lɛ́ a? Bo nɔ ɖo nǔ ɖagbe wa wɛ, énɛ́ ɔ, yě ná kpa susu nú we; 4 ɖó Mawu ɖo yě zán wɛ bónú yě ná wa azɔ̌ nú ɖagbe towe. Amɔ̌, ényí a nɔ wa nǔ nyanya hǔn, xɛsi ní ɖi we, ɖó linlin ɖé wú wɛ yě hɛn hwǐ. Azɔ̌ wa nú Mawu wɛ yě ɖe bo nyí hlɔnbatɔ́, bo ná dó ɖe xomɛsin xlɛ́* mɛ e nɔ wa nǔ nyanya é.

5 Énɛ́ wú ɔ, é ɖo dandan ɖɔ a ní nɔ hwíhwɛ́ hwiɖée, é ka nyí ɖó xomɛsin énɛ́ kɛ́ɖɛ́ wú ǎ, loɔ, é lɛ́ nyí ɖó ayixa towe wú. 6 Nǔ e wú a nɔ lɛ́ sú takwɛ́ é nɛ́; ɖó azɔ̌ wa nú Mawu wɛ yě ɖe dó mɛ bǐ tamɛ, bo nɔ ɖ’é wú hwebǐnu. 7 Mi sú nǔ e jɛxá mɛ ɖokpó ɖokpó é sín axɔ́ ɛ: mi sú takwɛ́ mɛ e byɔ́ takwɛ́ é; mi sú kuzú* mɛ e byɔ́ kuzú é; mi ɖi xɛsi nú mɛ e è ɖó ná ɖi xɛsi ná é; mi wlí yɛ̌yi nú mɛ e è ɖó ná wlí yɛ̌yi ná é.

8 Mi ma ɖu nǔ ɖěbǔ xɔ́ dó mɛ ɖěbǔ zɛ wǎn yíyí nú miɖée lɛ́ wú ó; ɖó mɛ ɖěbǔ e yí wǎn nú nɔzo tɔn é ko nyi Sɛ́n ɔ. 9 Ðó sɛ́n e ɖɔ: “A ɖó ná dó afɔ gbě alǒ ba nyɔ̌nu ɖěvo ǎ, a ɖó ná hu mɛ ǎ, a ɖó ná ja ajo ǎ, a ɖó ná jló mɛ nú ǎ” é kpó gbeɖiɖe ɖěvo ɖěbǔ kpó wɛ è sɛ sin xwe ná gbɔn lěe: “A ɖó ná yí wǎn nú nɔzo towe hwiɖésúnɔ ɖɔhun.” 10 Wǎnyíyí nɔ wa nǔ nyanya nú mɛɖé ǎ; hǔn, mɛ e yí wǎn nú mɛ é nyi Sɛ́n ɔ bǐ.

11 Mi ní wa mɔ̌, ɖó mi tuun hwenu e mǐ ɖe é, énɛ́ wɛ nyí ɖɔ hwenu e mi ɖó ná fɔ́n sín amlɔ mɛ é ko su, ɖó hwlɛngán mǐtɔn ko sɛkpɔ́ din hú hwenu e mǐ húzú nǔɖitɔ́ é. 12 Zǎn ko sɛ yi; ayǐ ko ɖo nǎ hɔ́n wɛ. Énɛ́ wú ɔ, mi nú mǐ ní ɖe nǔwiwa e nyí zǐnflú tɔn lɛ́ é nyi ayǐ, bo fɔ alyánnú wěziza tɔn lɛ́ kplá. 13 Mi nú mǐ ní nɔ zán gbɛ mímɛ́ kéze wɛ mǐ ɖe ɖɔhun, mǐ ní ma nɔ yi agɔ̌ e tɛnmɛ è nɔ wa nǔ gblégblé ɖe lɛ́ é* ó, mǐ ní ma nɔ nu ahan mú, alǒ lɛ aga, alǒ wa wunhínhɔ́nnú,* alǒ ɖɔ jlɛ, alǒ hwan wǔ ó. 14 É nyɔ́ wa ɔ, mi ní nɔ wa nǔ Aklúnɔ Jezu Klísu ɖɔhun,* mi ma nɔ ɖo jlǒ agbaza tɔn lɛ́ sín tito bló wɛ ó.

14 Mi ní nɔ yí mɛ e sín nǔɖiɖi ma ɖó gǎn ǎ é, bo ma ka nɔ mɔ xó ɖɔ dó linlin e gbɔn vo nú mitɔn lɛ́ é* wú ó. 2 Mɛ e sín nǔɖiɖi lí dǒ é nɔ ɖu nǔ bǐ, mɛ e sín nǔɖiɖi ma ka ɖó gǎn ǎ é nɔ ɖu mǎ kɛ́ɖɛ́. 3 Mɛ e nɔ ɖu nǔ bǐ é ní ma nɔ kpɔ́n mɛ e ma nɔ ɖu nǔ bǐ ǎ é dó mɔ mɛ e ma nyí nǔɖéwanú ǎ é ó, bónú mɛ e ma nɔ ɖu nǔ bǐ ǎ é ní ma nɔ ɖɔ hwɛ xá mɛ e nɔ ɖu nǔ bǐ é ó, ɖó Mawu ko yí i. 4 Mɛ̌ a ka nyí bo ná ɖɔ hwɛ xá mɛsɛntɔ́ mɛ ɖěvo tɔn? Gǎn éɖésúnɔ tɔn wɛ ná ɖɔ ɖɔ é ɖo te, alǒ é j’ayǐ. É ka ná nɔ te, ɖó Jexóva* hɛn ɔ, é ná bló bɔ é ná nɔ te.

5 Mɛ ɖě nɔ ɖɔ ɖɔ azǎn ɖě ɖo tají hú ɖěvo; mɛ ɖěvo ka nɔ ɖɔ ɖɔ azǎn lɛ́ bǐ wɛ nyí ɖokpó ɔ; mi nú mɛ ɖokpó ɖokpó ní kú dó linlin éɖésúnɔ tɔn jí mlɛ́mlɛ́. 6 Mɛ e nɔ kpɔ́n azǎn ɖě dó mɔ azǎn bǔnɔ é nɔ wa mɔ̌ dó wlí yɛ̌yi nú Jexóva.* Gɔ́ ná ɔ, mɛ e nɔ ɖu nǔ bǐ é nɔ wa mɔ̌ dó wlí yɛ̌yi nú Jexóva,* ɖó é nɔ dó kú nú Mawu; mɛ e ma nɔ ɖu nǔ bǐ ǎ é nɔ wa mɔ̌ dó wlí yɛ̌yi nú Jexóva,* có é nɔ dó kú nú Mawu. 7 Nǔgbó ɔ, mǐ mɛ ɖěbǔ nɔ nɔ gbɛ nú mǐɖésúnɔ kɛ́ɖɛ́ ǎ, mǐ mɛ ɖěbǔ nɔ kú nú mǐɖésúnɔ kɛ́ɖɛ́ ǎ. 8 Ðó ényí mǐ ɖo gbɛ ɔ, mǐ ɖo gbɛ nú Jexóva,* ényí mǐ kú ɔ, mǐ kú nú Jexóva.* Énɛ́ wú ɔ, ényí mǐ ɖo gbɛ oo, mǐ kú oo, Jexóva* tɔn wɛ mǐ nyí. 9 Ðó nǔ e wú Klísu kú bo lɛ́ wá gbɛ é wɛ nyí ɖɔ é ní dó sixú nyí Aklúnɔ nú mɛkúkú lɛ́ kpó mɛ e ɖo gbɛ lɛ́ é kpó bǐ.

10 Amɔ̌, étɛ́wú a ka nɔ ɖɔ hwɛ xá nɔví towe? Alǒ, étɛ́wú a ma ka nɔ ké ya nú nɔví towe ǎ? Mǐ mɛ bǐ wɛ ná nɔ te ɖo hwɛɖiɖɔzinkpo* Mawu tɔn nukɔn. 11 Ðó è ko wlán ɖɔ: “Jexóva* ɖɔ: ‘Un xwlé gbɛ nyiɖésúnɔ tɔn nú mi ɖɔ mɛ bǐ ná jɛ kpo nú mì, bɔ gbɛtɔ́ lɛ́ bǐ ná yí gbe ɖɔ nyi wɛ nyí Mawu.’” 12 Énɛ́ wú ɔ, mɛ ɖokpó ɖokpó wɛ ná ɖó gbe nǔ e éɖésúnɔ wa lɛ́ é tɔn nú Mawu.

13 Hǔn, mi nú mǐ ní ma sɔ́ nɔ ɖɔ hwɛ xá mǐɖée lɛ́ ɖě ó, é nyɔ́ wa ɔ, mǐ ní kán ɖ’é jí bo ma wa nǔ e ná nyí afɔklɛ́nnú nú nɔví ɖé, alǒ zɔ́n bɔ é ná j’ayǐ é ɖěbǔ ó. 14 Un tuun bo lɛ́ kú d’é jí ɖo Aklúnɔ Jezu mɛ ɖɔ è ná ɖɔ ɔ, nǔ ɖěbǔ nyí nǔ blíblí ǎ; ényí mɛɖé kpɔ́n nǔɖé dó mɔ nǔ blíblí ɔ jɛ́n é nɔ nyí nǔ blíblí n’i. 15 Ðó ényí nǔ e ɖu wɛ a ɖe é nɔ ɖó wǔvɛ́ nú nɔví towe ɔ, a sɔ́ ɖo zɔnlin ɖi wɛ ɖo wǎnyíyí mɛ ǎ nɛ́. É ní ma sín nǔ e ɖu wɛ a ɖe é wú, bónú a sú kún dó nú mɛ e Klísu kú ná é ó. 16 Énɛ́ wú ɔ, ma lɔn nú è ní ɖɔ xó nyanya dó nǔ ɖagbe e a nɔ wa lɛ́ é wú ó. 17 Ðó Axɔ́súɖuto Mawu tɔn nyí nǔ e è nɔ ɖu é kpó nǔ e è nɔ nu é kpó sín xó ǎ, é nyɔ́ wa ɔ, nǔjlɔ́jlɔ́wiwa, fífá kpó awǎjijɛ kpó, éé nɔ sín gbigbɔ mímɛ́ wú é sín xó wɛ. 18 Mɛ ɖěbǔ e nɔ wa mɛsɛntɔ́zɔ́ nú Klísu gbɔn mɔ̌ é ɔ, nǔ tɔn nɔ nyɔ́ Mawu kpó gbɛtɔ́ lɛ́ kpó nukúnmɛ.

19 Énɛ́ wú ɔ, mi nú mǐ ní nya nǔ e nɔ zɔ́n bɔ fífá nɔ tíin lɛ́ é kpó nǔ e nɔ bló bɔ è nɔ lí dǒ lɛ́ é kpó gbé. 20 Mi ma sɔ́ nɔ sú kún dó nú azɔ̌ Mawu tɔn ɖó nǔɖuɖu kpowun wútu ɖě ó. Nǔgbó ɔ, nǔɖuɖu lɛ́ bǐ wɛ mɛ́, amɔ̌, é nylá tawun ɖɔ è ní ɖu nǔɖé, bónú é ná nyí afɔklɛ́nnú nú mɛ ɖěvo. 21 É ná nyɔ́ hú gǎn ɖɔ a ní ma ɖu lan, nu vɛ̌ɛn, alǒ wa nǔ ɖěbǔ e ná zɔ́n bɔ nɔví towe ná klɛ́n afɔ é ó. 22 Nǔɖiɖi e a ɖó é ɔ, hɛn nú hwiɖée ɖo Mawu nukɔn. Awǎjijɛnɔ wɛ nyí mɛ e ma ɖɔ hwɛ xá éɖée ɖó nǔ e é yí gbe ná é wú ǎ é. 23 Amɔ̌, ényí é xo nǔ kpɔ́n bo ka ɖu ɔ, è ko ɖó hwɛ n’i, ɖó é zɔn dó nǔɖiɖi jí bo ɖu ǎ wútu. Nǔgbó ɔ, nǔ ɖěbǔ e è ma wa kpó nǔɖiɖi kpó ǎ é ɔ, hwɛ wɛ.

15 Amɔ̌, mǐ mɛ e ɖó hlɔ̌nhlɔ́n ɖo nǔɖiɖi mɛ lɛ́ é ɖó ná dɛ ɖo gǎnmaɖó mɛ e ma ɖó hlɔ̌nhlɔ́n ǎ lɛ́ é tɔn nu; mǐ ɖó ná nɔ wa nǔ dó nyɔ́ ɖo mǐɖée sí ǎ. 2 Mi nú mɛ ɖokpó ɖokpó ní nɔ wa nǔ dó nyɔ́ ɖo nɔzo tɔn sí nú ɖagbe tɔn bo ná dó bló bónú é ná lí dǒ. 3 Ðó Klísu ɖésú tlɛ wa nǔ dó nyɔ́ ɖo éɖée sí ǎ, lěe è ko wlán gbɔn dó wǔtu tɔn é, é wɛ nyí ɖɔ: “Nǔ e mɛ lɛ́ ɖɔ dó zun we é ɔ, yě ɖɔ dó zun nyi lɔmɔ̌.” 4 Ðó nǔ e è ko wlán ɖ’ayǐ lɛ́ é bǐ ɔ, è wlán yě bo ná dó kplɔ́n nǔ mǐ, bónú gbɔn dɛ e mǐ nɔ dɛ é kpó gbɔ e Nǔwlánwlán mímɛ́ lɛ́ nɔ dó nú mɛ é kpó gblamɛ ɔ, mǐ ní dó sixú ɖó nukún nǔ. 5 Mawu e nɔ ná didɛ mɛ, bo nɔ lɛ́ dó gbɔ nú mɛ é ní bló bónú mi ní ɖó linlin ɖokpó ɔ e Klísu Jezu ɖó é ɖo miɖée lɛ́ tɛ́ntin, 6 bónú mi ná dó sixú nɔ bǔ, bo ɖó gbe kpɔ́* dó kpa susu nú Mawu, éé nyí Aklúnɔ mǐtɔn Jezu Klísu sín Tɔ́ é.

7 Énɛ́ wú ɔ, mi ní nɔ yí miɖée lɛ́ lěe Klísu lɔmɔ̌ yí mi gbɔn é, nú susu Mawu tɔn. 8 Ðó un jló ɖɔ mi ní tuun ɖɔ Klísu húzú mɛsɛntɔ́ nú mɛ e gbo ada lɛ́ é, bo ná dó xlɛ́ ɖɔ Mawu nyí nǔgbóɖɔtɔ́, mɔ̌ mɛ ɔ, é dó zǒgbe akpá e Mawu dó nú tɔ́gbó yětɔn lɛ́ é jí. 9 É lɛ́ wa mɔ̌ bónú mɛ e ɖo akɔta ɖě lɛ́ mɛ lɛ́ é ní kpa susu nú Mawu ɖó nǔbláwǔkúnúmɛ tɔn wú. Ðó è ko wlán ɖɔ: “Énɛ́ wú wɛ un ná kpa susu nú we ɖo agbawungba ɖo akɔta ɖě lɛ́ mɛ, bo ná ji han dó kpa susu nú nyǐkɔ towe.” 10 È lɛ́ ɖɔ: “Akɔta lɛ́ è mi, mi j’awǎ xá togun tɔn.” 11 Bo lɛ́ ɖɔ: “Akɔta lɛ́ è mi, mi bǐ ní kpa susu nú Jexóva,* bónú togun lɛ́ bǐ ní kpa susu n’i.” 12 Ezayíi lɛ́ ɖɔ: “Kúnkan Jɛsée tɔn ná wá, é wɛ nyí mɛ e ná sí te bo ná kpa acɛ dó akɔta lɛ́ nu é; é wɛ ná nyí nukúnɖíɖó akɔta lɛ́ tɔn.” 13 Mawu e nɔ ná mɛ nukúnɖíɖó é ní bló bónú awǎjijɛ ɖaxó kpó fífá ɖaxó kpó ní gɔ́ ayi mitɔn mɛ, ɖó ji e mi ɖe dó wǔ tɔn é wú, bónú nukúnɖíɖó mitɔn ní dó sixú túnflá, gbɔn hlɔ̌nhlɔ́n gbigbɔ mímɛ́ tɔn gblamɛ.

14 Din ɔ, nɔví ce lɛ́ mi, nyiɖésúnɔ kú d’é jí ɖɔ mi ɖo gbesisɔmɛ bo ná wa nǔ ɖagbe lɛ́, mi tuun nǔ bǐ bo lɛ́ kpé wú bo ná ɖe wě xá* miɖée lɛ́. 15 É ɖo mɔ̌ có, un wlán nǔ sɛ́ dó mi nyi wɛn dó nǔɖé lɛ́ jí, bo ná dó lɛ́vɔ́ flín nǔ mi, ɖó fɛ́nú e Mawu ná mì é wútu. 16 É ná fɛ́nú tɔn mì, bónú má dó sixú wa mɛsɛntɔ́zɔ́ nú Klísu Jezu dó mɛ e ɖo akɔta ɖě lɛ́ mɛ lɛ́ é tamɛ. Un ɖo wɛn ɖagbe Mawu tɔn sín azɔ̌ mímɛ́ wa wɛ, bónú yě ní dó sixú nyí nǔníná e Mawu yí gbe ná, bɔ è bló bɔ é nyí nǔ mímɛ́ gbɔn gbigbɔ mímɛ́ gblamɛ é.

17 Énɛ́ wú ɔ, un ɖó hwɛjijɔ bo ná j’awǎ ɖo Klísu Jezu mɛ, ɖó nǔ e kunkplá Mawu lɛ́ é wú. 18 Ðó un ná ɖɔ xó ɖěbǔ zɛ nǔ e Klísu wa gbɔn jǐ ce, bónú mɛ e ɖo akɔta ɖě lɛ́ mɛ lɛ́ é ní dó se tónú é wú ǎ; é wa mɔ̌ gbɔn xó ce lɛ́ kpó nǔ e un wa lɛ́ é kpó gblamɛ, 19 gbɔn hlɔ̌nhlɔ́n nǔjíwǔ lɛ́ kpó nǔdabaɖa lɛ́ kpó tɔn gblamɛ, gbɔn hlɔ̌nhlɔ́n gbigbɔ Mawu tɔn tɔn gblamɛ; énɛ́ zɔ́n bɔ un jlá wɛn ɖagbe e kunkplá Klísu é bǐ mlɛ́mlɛ́, sín Jeluzalɛ́mu káká yi Ililíi. 20 Mɔ̌ mɛ ɔ, un dó gǎn bo sɔ́ jlá wɛn ɖagbe ɔ gbɔn fí e è ko bló bɔ è tuun nyǐkɔ Klísu tɔn ɖe lɛ́ é ǎ, bónú é ma wá cí xɔ mimɛ nyi mɛ ɖěvo sín dodónú jí ɖɔhun ó; 21 ɖó è ko wlán ɖɔ: “Mɛ e è ma ɖɔ xó tɔn ná ǎ lɛ́ é ná mɔ, bɔ mɛ e ma se ǎ lɛ́ é ná mɔ nukúnnú jɛ mɛ.”

22 Nǔ e lɛ́ glɔ́n ali nú mì azɔn mɔ̌kpán, bɔ un ma wá gɔ̌n mitɔn ǎ é nɛ́. 23 Amɔ̌ din ɔ, un sɔ́ ɖó fí e è ma ko w’azɔ̌ ɖe ǎ é ɖě ɖo xá énɛ́ lɛ́ mɛ ǎ, bɔ sín xwe mɔ̌kpán* ɖíe ɔ, un ɖo biba wɛ vɛ́návɛ́ná bo ná wá mi gɔ́n. 24 Énɛ́ wú ɔ, un ɖo nukún ɖó wɛ ɖɔ hwenu e un ná yi Ɛsipányi é ɔ, un ná wá mɔ mi, bɔ ényí un ɖu kpɔ́ninɔ xá mi sín vǐví nú hwenu ɖé ɔ, mi ná nyi mì jɛ fí ɖé. 25 Amɔ̌ din ɔ, un xwe Jeluzalɛ́mu bo ná d’alɔ mɛ mímɛ́ lɛ́. 26 Ðó xomɛ hun mɛ e ɖo Masedwáni kpó Akáyi kpó lɛ́ é ɖɔ yě ní má nǔ e yě ɖó lɛ́ é, gbɔn nǔ níná wamamɔnɔ e ɖo mɛ mímɛ́ lɛ́ mɛ ɖo Jeluzalɛ́mu lɛ́ é gblamɛ. 27 Nǔgbó wɛ ɖɔ yě wa mɔ̌ kpó xomɛhunhun kpó, amɔ̌, nú è ná ɖɔ ɔ, yě ɖu axɔ́ tɔn dó mɛ mímɛ́ e ɖo Jeluzalɛ́mu lɛ́ é; ɖó ényí mɛ e ɖo akɔta ɖě lɛ́ mɛ lɛ́ é ɖó mǐmá ɖo nǔ gbigbɔ tɔn e nyí mɛ mímɛ́ énɛ́ lɛ́ tɔn lɛ́ é mɛ ɔ, yě lɔ ɖó ná sɔ́ nǔɖókan yětɔn lɛ́ dó d’alɔ yě ná. 28 Énɛ́ wú ɔ, hwenu e un ná ko ɖɔ énɛ́ fó, bo ná sɔ́ nǔníná* énɛ́ jó nú yě gúdo é ɔ, un ná zɛ gbɔn mi gɔ́n, hwenu e un ná xwe Ɛsipányi é. 29 Gɔ́ ná ɔ, un tuun ɖɔ ényí un jawě mi gɔ́n ɔ, un ná hɛn nyɔ̌ná kpíkpé Klísu tɔn wá.

30 Din ɔ, nɔví lɛ́ mi, un ɖo wǔsyɛ́n dó lanmɛ nú mi wɛ, gbɔn Aklúnɔ mǐtɔn Jezu Klísu kpó wǎnyíyí e gbigbɔ ɔ nɔ zɔ́n bɔ è nɔ ɖó é kpó gblamɛ ɖɔ mi ní xo kpóɖó nú mì, bo nɔ xo ɖɛ vívɛ́ sɛ́dó Mawu dó ta ce mɛ, 31 bónú è ní dó sixú hwlɛ́n mì sín nǔmaɖitɔ́ e ɖo Judée lɛ́ é lɔ mɛ, lobonú mɛ mímɛ́ e ɖo Jeluzalɛ́mu lɛ́ é ní dó sixú yí gbe nú sinsɛnzɔ́ e wa dó ta yětɔn mɛ wɛ un ɖe é, 32 bónú ényí é jló Mawu ɔ, un ná wá gɔ̌n mitɔn kpó awǎjijɛ kpó, bɔ mǐ ná fá kɔ nú mǐɖée lɛ́. 33 Mawu e nɔ ná fífá mɛ é ní nɔ kpɔ́ xá mi bǐ. Amǐ.

16 Un jló ná dó gesí nɔví nyɔ̌nu mǐtɔn Fwebée nú mi;* é nɔ wa sinsɛnzɔ́ ɖo agun Sanklé tɔn mɛ. 2 Mi kɛnklɛ́n bo yí i ɖo Aklúnɔ mɛ lěe é jɛxá mɛ mímɛ́ lɛ́ gbɔn é, lobo dó alɔ ɖěbǔ e sín hudó é sixú ɖó é è, ɖó éɖésúnɔ ko nya xɛ ɖo mɛ gěgé jí, káká jɛ nyi lɔ jí.

3 Mi dó gbe Plisílu kpó Akilási kpó nú mì; azɔ̌watɔ́gbɛ́ ce lɛ́ wɛ yě nyí ɖo Klísu Jezu mɛ. 4 Yě zé gbɛ yětɔn ɖó axɔ́ nu dó ta ce mɛ,* bɔ nyi kpó agun e ɖo akɔta ɖě lɛ́ mɛ lɛ́ é bǐ kpó nɔ dó kú nú yě. 5 Mi lɛ́ dó gbe agun e ɖo xwé yětɔn gbe é nú mì. Mi dó gbe mɛ vívɛ́ná ce Epenɛ́ti nú mì; é ɖo mɛ nukɔntɔn e húzú ahwanvú Klísu tɔn ɖo Azíi lɛ́ é mɛ.* 6 Mi dó gbe Mali nú mì; é w’azɔ̌ syɛ́nsyɛ́n dó ta mitɔn mɛ. 7 Mi dó gbe Andlonikúsi kpó Juniyási kpó, hɛ̌nnumɔ ce wɛ yě nyí bo lɛ́ nyí gantɔ́ gbɛ̌ ce lɛ́; mɛsɛ́dó lɛ́ tuun yě ganjí, bɔ yě ko ɖo bǔ xá Klísu jɛ nukɔn nú nyɛ.

8 Mi dó gbe Anpliatúsi nú mì, mɛ vívɛ́ná ce wɛ ɖo Aklúnɔ mɛ. 9 Mi dó gbe azɔ̌watɔ́gbɛ́ mǐtɔn ɖo Klísu mɛ Wibɛ́ɛn, bo lɛ́ dó gbe mɛ vívɛ́ná ce Sitakísi. 10 Mi dó gbe Apɛ́lu, mɛ e nǔ tɔn nyɔ́ Klísu nukúnmɛ é. Mi dó gbe mɛ ɖěɖěe ɖo Alisitobúlu xwé lɛ́ é. 11 Mi dó gbe hɛ̌nnumɔ ce Elodiɔ́n. Mi dó gbe mɛ ɖěɖěe ɖo Naasísi xwé, bo nyí ahwanvú Aklúnɔ tɔn lɛ́ é. 12 Mi dó gbe Tlifɛ́nu kpó Tlifózu kpó, ɖó nyɔ̌nu énɛ́ lɛ́ w’azɔ̌ syɛ́nsyɛ́n ɖo Aklúnɔ mɛ. Mi dó gbe Pɛsízi, mɛ vívɛ́ná mǐtɔn ɔ, ɖó é nɔ wa azɔ̌ syɛ́nsyɛ́n ɖo Aklúnɔ mɛ. 13 Mi dó gbe Hlufúsi e Aklúnɔ sɔ́ é, kpó nɔ tɔn e cí nɔ ɖɔhun nú nyi lɔ é kpó. 14 Mi dó gbe Asɛnklíti, Flegɔ́ɔn, Ɛɛmɛ́si, Patlɔbási, Ɛɛmási kpó nɔví e ɖo kpɔ́ xá yě lɛ́ é kpó. 15 Mi dó gbe Filolɔ́gu kpó Juli kpó, Nɛlée kpó nɔví nyɔ̌nu tɔn kpó, gɔ́ nú Olɛnpási kpó mɛ mímɛ́ e ɖo kpɔ́ xá yě lɛ́ é bǐ kpó. 16 Mi kí nɔví nɔví sín si nú miɖée dó dó gbe miɖée lɛ́. Agun Klísu tɔn lɛ́ bǐ dó gbe sɛ́dó mi.

17 Din ɔ, nɔví lɛ́, un ɖo wǔsyɛ́n dó lanmɛ nú mi wɛ ɖɔ mi ní ɖó kɛ́n mɛ ɖěɖěe nɔ dɔn kínklán kpó afɔklɛ́nnú lɛ́ kpó wá, b’ɛ ma ka sɔgbe xá nǔ e mi kplɔ́n lɛ́ é ǎ lɛ́ é jí, lobo nɔ zɔ nú yě. 18 Ðó mɛ alɔkpa énɛ́ lɛ́ ɔ, kannumɔ wɛ yě nyí, yě ka nyí kannumɔ nú Klísu Aklúnɔ mǐtɔn ǎ, loɔ, jlǒ* yěɖésúnɔ tɔn lɛ́ wɛ yě nyí ná, bo nɔ ɖɔ xó víví kpó mɛblɛ́blɛ́xó kpó dó flú mɛ e ma nɔ nɔ acéjí ǎ lɛ́ é. 19 Tónúsise mitɔn wá jɛ wě nú mɛ bǐ, énɛ́ wú ɔ, un nɔ j’awǎ ɖó mi wú. Amɔ̌, un jló ɖɔ mi ní nyí nǔnywɛ́tɔ́ ɖo nǔ e kunkplá nǔ ɖagbe é mɛ, bo ka nyí xomɛvɔ́nɔ ɖo nǔ e kunkplá nǔ nyanya é mɛ. 20 Ðó Mawu e nɔ ná fífá mɛ é ná nyínyɛ́ Satáan dó afɔ mitɔn lɛ́ glɔ́ zaanɖé. Fɛ́nú Aklúnɔ mǐtɔn Jezu tɔn ní nɔ kpɔ́ xá mi.

21 Azɔ̌watɔ́gbɛ́ ce Timɔtée dó gbe sɛ́dó mi, hɛ̌nnumɔ ce Lusiwúsi, Jazɔ́ɔn kpó Sosipatlɔ́si kpó lɔmɔ̌ dó gbe sɛ́dó mi.

22 Nyɛ Tɛtiwúsi e wlán wěmasɛ́dómɛ élɔ́ é dó gbe sɛ́dó mi ɖo Aklúnɔ nyíkɔ mɛ.

23 Gayiwúsi e xwé un ɖe, bɔ agun ɔ bǐ nɔ lɛ́ kplé ɖo xwé tɔn gbe é dó gbe sɛ́dó mi. Akwɛ́gbáwúkpénukúndótɔ́* toxo ɔ tɔn Elasíti dó gbe sɛ́dó mi, bɔ nɔví súnnu tɔn Kaatúsi lɔmɔ̌ dó gbe sɛ́dó mi. 24* ——

25 Mawu kpé wú bo ná bló bɔ mi ná lí dǒ, gbɔn wɛn ɖagbe e un nɔ jlá é kpó wɛn e kunkplá Klísu é kpó gblamɛ; wɛn ɖagbe énɛ́ sɔgbe xá ɖe e è ɖe nǔbúdo Mawu tɔn xlɛ́ é. È sɔ́ nǔbúdo énɛ́ hwlá sín hwenu línlín ɖíe. 26 Amɔ̌ din ɔ, è ko ɖe xlɛ́ akɔta lɛ́ bǐ bo ko bló bɔ yě tuun, gbɔn nǔɖɔɖayǐ e ɖo Nǔwlánwlán mímɛ́ lɛ́ mɛ lɛ́ é gblamɛ, sɔgbe xá gbe e Mawu mavɔmavɔ ɔ ɖe é, bónú akɔta lɛ́ bǐ ní dó sixú ɖi nǔ bo lɛ́ se tónú n’i; 27 susu nú Mawu e éɖokpónɔ nyí nǔnywɛ́tɔ́ é gbɔn Jezu Klísu jí káká sɔ́yi. Amǐ.