WĚMA WEGƆ́ E È WLÁN SƐ́DÓ KƆLƐ́NTINU LƐ́ É

1 Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn gblamɛ é, kpó nɔví mǐtɔn Timɔtée kpó wɛ ɖo wěma wlán sɛ́dó agun Mawu tɔn e ɖo Kɔlɛ́nti é, káká jɛ mɛ mímɛ́ e ɖo Akáyi lɛ́ é bǐ jí wɛ:

2 Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi.

3 Susu nú Mawu e nyí Aklúnɔ mǐtɔn Jezu Klísu sín Tɔ́ é; é wɛ nyí Tɔ́ e nɔ kú nǔbláwǔ ɖaxó nú mɛ é, bo lɛ́ nyí Mawu e nɔ dó gbɔ nú mɛ ɖo ali bǐ nu é; 4 é wɛ nɔ dó gbɔ* nú mǐ ɖo mɛtɛ́nkpɔ́n* mǐtɔn lɛ́ bǐ mɛ, bónú mǐ ní dó sixú kpé wú bo sɔ́ gbɔ e é nɔ dó nú mǐ é dó dó gbɔ nú mɛ ɖěvo lɛ́ ɖo mɛtɛ́nkpɔ́n* alɔkpa ɖěbǔ mɛ. 5 Ðó lěe wǔvɛ́ e mǐ nɔ mɔ ɖó Klísu wú é túnflá sɔ é ɔ, mɔ̌ jɛ́n gbɔ e è nɔ dó nú mǐ gbɔn Klísu gblamɛ é lɔ túnflá sɔ é nɛ́. 6 Din ɔ, mǐ ɖo mɛtɛ́nkpɔ́n* lɛ́ mɛ gbɔn wɛ, bónú è ná dó gbɔ nú mi bo lɛ́ hwlɛ́n mi gán; bɔ nú è ɖo gbɔ dó nú mǐ wɛ ɔ, gbɔ dó nú mi lɔ wɛ è ɖe, ɖó mɔ̌ wiwa nɔ d’alɔ mi bɔ mi nɔ dɛ ɖo wǔvɛ́ ɖokpó ɔ lɛ́ e nu mǐ lɔ dɛ ɖe é nu. 7 Nǔ e ɖó nukún wɛ mǐ ɖe dó ta mitɔn mɛ é sɛ do ǎ, ɖó mǐ tuun ɖɔ ényí mi ɖó mǐmá ɖo wǔvɛ́ mǐtɔn lɛ́ mɛ ɔ, mi ná lɛ́ ɖó mǐmá ɖo gbɔ e è dó nú mǐ é mɛ.

8 Nɔví lɛ́ mi, mǐ ba ɖɔ mi ní dán wǔvɛ́ e mǐ mɔ ɖo tokpɔn Azíi tɔn mɛ lɛ́ é ǎ. Wǔvɛ́ e mǐ mɔ é syɛ́n tawun bo zɛ hlɔ̌nhlɔ́n mǐtɔn wú, bɔ mǐ tlɛ tuun nú mǐ ná gán ɖ’é mɛ ǎ. 9 Nǔgbó ɔ, é cí nú mǐ ɖɔ kúhwɛ wɛ è ɖó nú mǐ ɖɔhun. Nǔ nyí mɔ̌ bónú mǐ ní ma nɔ gán jɛ mǐɖésúnɔ wú ó, loɔ, mǐ ní nɔ gán jɛ Mawu e nɔ fɔ́n mɛkúkú lɛ́ é wú. 10 É hwlɛ́n mǐ sín kúdán ɖaxó mɔ̌hun mɛ, bo ná lɛ́ hwlɛ́n mǐ, bɔ mǐ ɖeji dó wǔ tɔn ɖɔ é ná lɛ́ kpo ɖo mǐ hwlɛ́n wɛ. 11 Mi lɔ sixú d’alɔ mǐ gbɔn vo sisa dó ta mǐtɔn mɛ gblamɛ, ɖó nú mɛ gěgé byɔ́ nǔ Mawu dó ta mǐtɔn mɛ ɔ, Mawu ná se bo ná d’alɔ mǐ, bɔ é ná sín énɛ́ wú bɔ mɛ gěgé ná dó kú nú Mawu.

12 Nǔ e wú mǐ nɔ gó é ɖíe: Ayixa mǐtɔn nɔ ɖe kúnnu nú mǐ ɖɔ, ɖo gbɛ ɔ mɛ ɔ, tají ɔ, ɖo tɛ́ntin mitɔn ɔ, mǐ zán gbɛ mímɛ́ bo lɛ́ wa yɛmɛnú ǎ, é nyí nǔnywɛ́ gbɛtɔ́ tɔn wɛ mǐ xwedó dó wa mɔ̌ ǎ, é nyɔ́ wa ɔ, fɛ́nú Mawu tɔn wɛ mǐ ɖe xlɛ́ ɖo nǔwiwa mǐtɔn mɛ. 13 Ðó é sɔ́ nyí nǔ vo wlán sɛ́dó mi wɛ mǐ ɖe zɛ nǔ e mi sixú xa* bo mɔ nukúnnú jɛ mɛ lɛ́ é wú ǎ, bɔ un ɖo nukún ɖó wɛ ɖɔ mi ná kpo ɖo nukúnnú mɔ jɛ nǔ énɛ́ lɛ́ wú wɛ mlɛ́mlɛ́;* 14 é ɖo wɛn ɖɔ mi mɔ nǔ jɛ wú ɖó bǎ ɖé mɛ ɖɔ mǐ nyí hwɛjijɔ e wú mi ná gó é, lěe mi lɔ ná nyí hwɛjijɔ e wú mǐ ná gó ɖo Aklúnɔ mǐtɔn Jezu sín azǎn gbe é gbɔn é.

15 Ðó un ɖó jiɖiɖe énɛ́ wútu ɔ, un ɖo linlin wɛ bo ná wá mi gɔ́n jɛ nukɔn, bónú ali ná lɛ́ hun nú mi azɔn wegɔ́ ɔ bónú mi ná j’awǎ;* 16 ɖó un ɖo linlin wɛ ɖ’ayǐ bo ná ba mi kpɔ́n hwenu e un ná xwe Masedwáni é, bo ná lɛ́ lɛ́ kɔ wá gɔ̌n mitɔn hwenu e un ná gosín Masedwáni é, énɛ́ gúdo ɔ, mi ná nyi mì kpɛɖé bɔ un ná yi Judée. 17 Hwenu e un ɖó linlin mɔ̌hun é ɔ, un kpɔ́n xó ɔ dó mɔ nǔ e ma hwɛ́n nǔɖé ǎ é ná ǎ, kabǐ? Alǒ, un nɔ lin nǔ lɛ́ lěe gbɛtɔ́ nɔ lin nǔ gbɔn é,* bo nɔ mɔ tɛn dó ɖɔ: “Ɛɛn, ɛɛn,” bɔ énɛ́ gúdo ɔ, un nɔ ɖɔ: “Éǒ, éǒ” wɛ a? 18 Amɔ̌, lěe è sixú ɖeji dó Mawu wú gbɔn é ɔ, xó e mǐ ɖɔ nú mi é nyí “éǒ” bónú mǐ ka ɖɔ “ɛɛn” ǎ. 19 Ðó Vǐ Mawu tɔn Jezu Klísu, éé mǐ, énɛ́ wɛ nyí nyɛ kpó Siivɛ́ɛn* kpó, kpódó Timɔtée kpán jlá mi é nyí “ɛɛn” bo wá nyí “éǒ” ǎ, é nyɔ́ wa ɔ, é nyí “ɛɛn” hwebǐnu. 20 Ðó lěe akpá Mawu tɔn lɛ́ sukpɔ́ sɔ é nɛ́, có yě ka nyí “ɛɛn” gbɔn gbla tɔn mɛ. Énɛ́ wú ɔ, jǐ tɔn wɛ è nɔ lɛ́ ɖɔ “amǐ” nú Mawu gbɔn, bɔ énɛ́ nɔ xɔ susu n’i gbɔn gbla mǐtɔn mɛ. 21 Amɔ̌, Mawu wɛ nyí mɛ e ná gǎnjɛwú ɖɔ mi kpó mǐ kpó nyí Klísu tɔn é, é wɛ lɛ́ nyí mɛ e sɔ́ mǐ é. 22 É lɛ́ ɖó wuntun mǐ bo ná gǎnjɛwú nǔ e ja é tɔn* mǐ ɖo ayi mǐtɔn mɛ, énɛ́ wɛ nyí gbigbɔ ɔ.

23 Din ɔ, un xwlé nǔ dó gbɛ* ce jí, bo sɔ́ Mawu dó ɖó kúnnuɖetɔ́ ɖɔ wǔ ní ma wá kú mi dín ó wɛ zɔ́n bɔ un ma ko wá Kɔlɛ́nti ǎ. 24 É nyí mǐ nɔ kp’acɛ dó nǔɖiɖi mitɔn jí wɛ ǎ, loɔ, azɔ̌watɔ́gbɛ́ wɛ mǐ nyí bónú mi ní dó sixú ɖó awǎjijɛ, ɖó nǔɖiɖi mitɔn wɛ zɔ́n bɔ mi ɖo te.

2 Ðó un wá gbeta ɔ kɔn ɖɔ un kún ná bló bónú wǔ ná kú mi hwenu e un ná lɛ́vɔ́ wá mi gɔ́n é ó. 2 Ðó ényí un bló bónú wǔ kú mi ɔ, mɛ̌ ka ná bló bɔ un ná j’awǎ zɛ mi mɛ e un bló bɔ wǔ kú lɛ́ é wú? 3 Un wlán nǔ e un wlán é bónú hwenu e un ná wá é ɔ, mi mɛ ɖěɖěe tamɛ un ɖó ná j’awǎ dó lɛ́ é ní ma zɔ́n bónú wǔ kú mì ó, ɖó un ɖeji ɖɔ nǔ e nɔ hɛn awǎjijɛ wá nú mì lɛ́ é nɔ hɛn awǎjijɛ ɖokpó ɔ wá nú mi mɛ bǐ. 4 Wǔvɛ́ gěgé mɛ wɛ un ɖe, bɔ ayi ce lɛ́ gba dó hwenu e un wlán nǔ sɛ́dó mi kpó ɖasin gěgé kpó é, é ka nyí bónú wǔ ní kú mi wútu wɛ ǎ, loɔ, bónú mi ní tuun lěe wǎn e un yí nú mi é gɔ́ngɔ́n sɔ é wú wɛ.

5 Din ɔ, ényí mɛ ɖěbǔ bló bónú wǔ kú mɛ ɔ, é nyí nyɛ wɛ é bló bɔ wǔ kú ǎ, loɔ, mi mɛ bǐ wɛ é bló bɔ wǔ kú ɖó bǎ ɖé mɛ; un ka jló ná syɛ́n nukún dín ɖo nǔ e ɖɔ wɛ un ɖe é mɛ ǎ. 6 Tó e mɛ gěgé dɔn nú nya énɛ́ é ko kpé; 7 din ɔ, mi ɖó ná sɔ́ hwɛ kɛ ɛ kpó xomɛnyínyɔ́ kpó bo dó gbɔ n’i, bónú wǔ ní ma wá kú i zɛ xwé wú bónú é ní jó gbe* ó. 8 Énɛ́ wú ɔ, un byɔ́ mi ɖɔ mi ní ɖe xlɛ́ ɛ ɖɔ émí yí wǎn n’i. 9 Nǔ e wú un lɛ́ wlán nǔ sɛ́dó mi é ɖíe: un jló ná kpɔ́n ɖɔ mi ka ná xlɛ́ ɖɔ émí nɔ se tónú ɖo nǔ bǐ mɛ a jí. 10 Ényí mi sɔ́ nǔ ɖěbǔ sín hwɛ kɛ mɛ ɖěbǔ ɔ, nyi lɔ wa mɔ̌. Nǔgbó ɔ, nǔ ɖěbǔ e un sɔ́ kɛ mɛ é ɔ (ényí un sɔ́ nǔ ɖěbǔ kɛ mɛ ɔ nɛ́), ɖagbe mitɔn wú wɛ, ɖo Klísu nukɔn, 11 bónú Satáan ní ma wá kpé mǐ wú* ó, ɖó mǐ dán linlin* tɔn lɛ́ ǎ.

12 Hwenu e un wá Tlowási bo ná jlá wɛn ɖagbe e kunkplá Klísu é, bɔ è hun hɔn ɖé nú mì ɖo Aklúnɔ sín azɔ̌ mɛ é ɔ, 13 ayi ce j’ayǐ ɖěbǔ ǎ, ɖó un mɔ nɔví ce Titu ǎ wútu. Énɛ́ wú ɔ, un dó éɖabɔ nú yě bo ɖidó Masedwáni.

14 Amɔ̌, è ní dó kú nú Mawu, é nɔ nɔ nukɔn nú mǐ hwebǐnu, bɔ mǐ cí sɔ́ja e ɖu ɖo ahwan jí bo lɛ́ kɔ lɛ́ é ɖɔhun ɖo bǔ e mǐ ɖe xá Klísu é mɛ. É nɔ lɛ́ gbɔn jǐ mǐtɔn bo nɔ bló bɔ nukúnnúmɔjɛnǔmɛ ɖíɖó dó wǔtu tɔn nɔ gba kpé fí bǐ wǎn ɖagbe ɖé ɖɔhun. 15 Ðó wɛn e kunkplá Klísu é sín wǎn ɖagbe ɖé wɛ mǐ nyí nú Mawu ɖo mɛ ɖěɖěe hwlɛ́n gán wɛ è ɖe lɛ́ é kpó mɛ ɖěɖěe ɖo dindɔn wɛ lɛ́ é kpó tɛ́ntin; 16 kúwán e nɔ kplá mɛ yi kú é wɛ mǐ nɔ hwɛ́n dó mɛ ɖěɖěe ɖo dindɔn wɛ lɛ́ é, bo ka nɔ hwɛ́n gbɛwán e nɔ kplá mɛ yi gbɛ mɛ é dó mɛ ɖěɖěe hwlɛ́n gán wɛ è ɖe lɛ́ é. Bɔ mɛ̌ ka jɛxá azɔ̌ énɛ́ tawun? 17 Mǐdɛɛ lɛ́ wɛ, ɖó mǐ nɔ sɔ́ xó Mawu tɔn dó wa ajɔ̌ ná lěe mɛ gěgé nɔ bló gbɔn é ǎ, é nyɔ́ wa ɔ, ée é nyí ɖɔ Mawu wɛ sɛ́ mǐ dó é ɔ, mǐ nɔ ɖɔ xójɔxó mlɛ́mlɛ́ ɖo Mawu nukɔn ɖo bǔ e mǐ ɖe xá Klísu é mɛ.

3 Mǐɖée kpa jí wɛ mǐ lɛ́ jɛ a? Alǒ, é byɔ́ ɖɔ mǐ ní sɔ́ wěmasɛ́dómɛ e mɛ è kpa mǐ ɖe lɛ́ é nú mi alǒ yí ɖo mi sí mɛɖé lɛ́ ɖɔhun wɛ a? 2 Miɖésúnɔ wɛ nyí wěmasɛ́dómɛ mǐtɔn, bɔ è wlán dó ayi mǐtɔn lɛ́ mɛ lobɔ gbɛtɔ́ lɛ́ bǐ tuun bo ɖo xixa wɛ. 3 Ðó é ɖo wɛn ɖɔ wěmasɛ́dómɛ Klísu tɔn e mǐ sinsɛnzɔ́watɔ́ lɛ́ wlán é wɛ mi nyí, è wlán kpó kwélesin kpó ǎ, loɔ, gbigbɔ Mawu gbɛɖe ɔ tɔn wɛ è dó wlán ná, è wlán dó awǐnnyatɛ lɛ́ jí ǎ, loɔ, ayi mitɔn lɛ́ mɛ wɛ è wlán dó.

4 Mǐ ɖó jiɖiɖe alɔkpa énɛ́ ɖo Mawu nukɔn gbɔn Klísu gblamɛ. 5 É nyí ɖɔ mǐɖésúnɔ jɛxá bo nɔ wa nǔ ɖě wɛ ǎ, loɔ, Mawu wɛ nɔ bló bɔ mǐ nɔ jɛxá bo nɔ wa nǔ. 6 Nǔgbó ɔ, é wɛ bló bɔ mǐ jɛxá bo nyí sinsɛnzɔ́watɔ́ akɔjijɛ yɔ̌yɔ́ ɖé tɔn, é nyí Sɛ́n ɔ tɔn ǎ, loɔ, gbigbɔ ɔ tɔn; ɖó Sɛ́n ɔ nɔ ɖó kúhwɛ nú mɛ, amɔ̌, gbigbɔ ɔ nɔ ná gbɛ mɛ.

7 Din ɔ, Sɛ́n e nɔ dɔn mɛ yi kú bɔ è wlán dó awǐnnyatɛ lɛ́ jí é wá kpó susu kpó sɔmɔ̌ bɔ Izlayɛ́li ví lɛ́ sixú kpɔ́n Mɔyízi nukúnmɛ ǎ, ɖó susu e ɖo kínkɔ́n wɛ ɖo nukún tɔn mɛ é wútu. É ɖo mɔ̌ có, susu énɛ́ ɖó ná bú. 8 Énɛ́ wú ɔ, étɛ́wú nǔ ɖěɖěe gbigbɔ ɔ sixú bló lɛ́ é ma ka ɖó ná ɖó susu e tlɛ hú gǎn mɔ̌ é ǎ? 9 Ényí Sɛ́n e nɔ dɔn hwɛɖónúmɛ wá é ɖó susu ɔ, azɔ̌ e nɔ zɔ́n bɔ gbɛtɔ́ lɛ́ nɔ nyí nǔjlɔ́jlɔ́watɔ́ é ná ɖó susu hú mɔ̌ ǎ cé? 10 Nǔgbó ɔ, nǔ e è xɔ susu ná ɖ’ayǐ é ba susu tɔn kpo, ɖó susu e zɛ ée é ɖó é wú é wútu. 11 Ðó ényí nǔ e ɖó ná bú é wá kpó susu kpó ɔ, nǔ e ná nɔ ayǐ é ɖó ná ɖó susu hú mɔ̌ ǎ cé?

12 Ðó mǐ ɖó nukúnɖíɖó mɔ̌hun wútu ɔ, mǐ nɔ vo bo nɔ ɖɔ xó, 13 mǐ nɔ wa nǔ e Mɔyízi wa é ǎ; éyɛ́ cyɔ́n avɔ nukúnmɛ bónú Izlayɛ́li ví lɛ́ ní ma dó sixú kpɔ́n vivɔnu nǔ e ɖó ná bú é tɔn tlítlí ó. 14 Amɔ̌, ayi yětɔn kú atli. Ðó káká jɛ égbé ɔ, ényí è xa akɔjijɛ xóxó ɔ ɔ, avɔ ɖokpó ɔ nɔ kpo ɖo fínɛ́, ɖó kpó alɔdó Klísu tɔn kpó kɛ́ɖɛ́ jɛ́n è sixú ɖe síin. 15 Nǔgbó ɔ, káká jɛ égbé ɔ, hweɖébǔnu e è xa nǔwlánwlán Mɔyízi tɔn lɛ́ é ɔ, avɔ ɖé nɔ cyɔ́n ayi yětɔn lɛ́ jí. 16 Amɔ̌, ényí mɛɖé lɛ́ kɔ wá Jexóva* gɔ́n ɔ, è nɔ ɖe avɔ ɔ síin. 17 Jexóva* ɔ, Gbigbɔ wɛ, bɔ fí e gbigbɔ Jexóva* tɔn ɖe é ɔ, mɛɖéesíjijɛ ɖo fínɛ́. 18 Mǐ mɛ e è ɖe avɔ ɔ sín nukúnmɛ ná lɛ́ é bǐ cí wěkpɛ́n e ɖo susu Jexóva* tɔn ɖe xlɛ́ wɛ lɛ́ é ɖɔhun; è húzú mǐ bónú mǐ ná cí Mawu ɖɔhun, bo ná nɔ ɖo susu tɔn ɖe xlɛ́ d’é jí wɛ, lěe Jexóva* e nyí Gbigbɔ é* bló gbɔn é pɛ́pɛ́pɛ́.

4 Énɛ́ wú ɔ, ɖó è sɔ́ sinsɛnzɔ́ énɛ́ d’alɔ mɛ nú mǐ gbɔn nǔbláwǔ e è kú nú mǐ é gblamɛ wútu ɔ, mǐ nɔ jó gbe ǎ. 2 Amɔ̌, mǐ gbɛ́ winnyánú e è nɔ wa ɖo nǔglɔ́ lɛ́ é, mǐ nɔ zán ayi wínníwínní alǒ sló kɔ nú xó Mawu tɔn ǎ; loɔ, mǐ nɔ ɖe nǔgbó ɔ xlɛ́, bɔ mɔ̌ mɛ ɔ, mǐ nɔ húzú kpɔ́ndéwú ɖagbe nú gbɛtɔ́ lɛ́ bǐ* ɖo Mawu nukɔn. 3 Nǔgbó ɔ, ényí wɛn ɖagbe e mǐ jlá é d’ablu, cí nǔ ɖɔ avɔ wɛ è cyɔ́n dó ɖɔhun ɔ, mɛ e ɖo dindɔn wɛ lɛ́ é wɛ é d’ablu ná, 4 nǔmaɖitɔ́ énɛ́ lɛ́ sín ayi wɛ mawu gbɛ* élɔ́ tɔn va nukún ná, bónú wɛn ɖagbe susunɔ e kunkplá Klísu akpajlɛ́ Mawu tɔn ɔ é sín wěziza ní ma hɔ́n dó jǐ yětɔn ó. 5 Ðó hwenu e mǐ ɖo mawuxó jlá wɛ é ɔ, mǐ nɔ jlá ɖɔ mǐɖésúnɔ nyí Aklúnɔ ǎ, loɔ, mǐ nɔ jlá ɖɔ Jezu Klísu nyí Aklúnɔ, bo nɔ jlá ɖɔ mǐ nyí mɛsɛntɔ́ mitɔn ɖó Jezu wú. 6 Ðó Mawu wɛ nyí mɛ e ɖɔ xó élɔ́ é: “Wěziza ní hɔ́n sín ablu mɛ.” Mawu bló bɔ wěziza tɔn hɔ́n dó ayi mǐtɔn mɛ, bɔ nukúnnúmɔjɛnǔmɛ e jí wǔ é ɖíɖó dó Mawu wú za wě dó ayi mǐtɔn mɛ gbɔn nukúnmɛ Klísu tɔn gblamɛ.

7 Mǐ cí kozɛ́n lɛ́ ɖɔhun có, mǐ ɖó dɔkun énɛ́ bónú è ní dó sixú mɔ céɖécéɖé ɖɔ hlɔ̌nhlɔ́n e mǐ mɔ yí é zɛ gbɛtɔ́ tɔn wú; hlɔ̌nhlɔ́n énɛ́ nyí mǐɖésúnɔ tɔn ǎ, loɔ, Mawu gɔ́n wɛ é gosín. 8 È fyɔ́n mǐ ɖo ali bǐ nu, amɔ̌, mǐ ján bónú tɛnsisɛ gló ǎ; mǐ dán ɖěwagbɛn, amɔ̌, fí gbɔn tɔ́n hán ǎ;* 9 è dó ya nú mǐ, amɔ̌, Mawu jó mǐ dó ǎ; è sɔ́ mǐ zin dɛ́, amɔ̌, mǐ dɔn ǎ. 10 Hwebǐnu wɛ mǐ nɔ dɛ ɖo wǔvɛ́ e nɔ dɔn kú wá lɛ́ é nu ɖo agbaza mǐtɔn mɛ Jezu ɖɔhun, bónú è ní dó sixú ɖe gbɛzán Jezu tɔn lɔ xlɛ́ ɖo agbaza mǐtɔn mɛ. 11 Ðó mǐ mɛ e ɖo gbɛ lɛ́ é ɔ, gbɛ mǐtɔn ɖo axɔ́ nu hwebǐnu ɖó Jezu wú, bónú è ní dó sixú ɖe gbɛzán Jezu tɔn lɔ xlɛ́ ɖo agbaza mǐtɔn e ná kú é mɛ. 12 Énɛ́ wú ɔ, kú ɖo azɔ̌ wa wɛ ɖo mǐ mɛ, amɔ̌, gbɛ ɖo azɔ̌ wa wɛ ɖo midɛɛ lɛ́ mɛ.

13 Nǔ e è wlán é ɖíe: “Un ɖe xlɛ́ ɖɔ un ɖi nǔ, énɛ́ wú wɛ un ɖɔ xó”; mǐ lɔ nɔ ɖe xlɛ́ ɖɔ mǐ ɖó nǔɖiɖi ɖokpó ɔ, nǔ e wú mǐ nɔ ɖɔ xó é nɛ́, 14 ɖó mǐ tuun ɖɔ mɛ e fɔ́n Jezu é ná fɔ́n mǐ lɔ xá Jezu, bo ná kplá mǐ kpó mi kpó wá nukɔn tɔn. 15 Ðó mi wú wɛ nǔ énɛ́ lɛ́ bǐ jɛ, bónú fɛ́nú Mawu tɔn e ɖo jijɛjí wɛ é ní dó túnflá hú mɔ̌, ɖó mɛ gěgé wɛ ɖo kú dó wɛ nú susu Mawu tɔn.

16 Énɛ́ wú ɔ, mǐ nɔ jó gbe ǎ, é nyɔ́ wa ɔ, ényí mɛ e mǐ nyí ɖo wěxo é tlɛ ɖo gǔdo wá yi wɛ ɔ, é ɖo wɛn ɖɔ mɛ e mǐ nyí ɖo xomɛ é ɖo yɔ̌yɔ́ húzú wɛ ayǐhɔ́ngbe ayǐhɔ́ngbe. 17 Ðó nǔgbó wɛ ɖɔ wǔvɛ́* lɛ́ nyí hwenu kpɛɖé tɔn bo lɛ́ hwɛ́n nǔ káká ɖé ǎ, amɔ̌, yě nɔ tɔ́n kɔ dó susu e nɔ fɔ́n bo nɔ ɖo agba dó d’é jí wɛ, bo lɛ́ nyí susu mavɔmavɔ é mɛ nú mǐ; 18 énɛ́ wú ɔ, mǐ nɔ sɔ́ nukún mǐtɔn lɛ́ ɖó nǔ e è nɔ mɔ lɛ́ é jí ǎ, é nyɔ́ wa ɔ, nǔ e è ma nɔ mɔ ǎ lɛ́ é jí wɛ mǐ nɔ sɔ́ ɖó. Ðó nǔ e è nɔ mɔ lɛ́ é ɔ, hwenu kpɛɖé jɛ́n yě nɔ nɔ ayǐ ná, nǔ e è ma nɔ mɔ ǎ lɛ́ é ka nɔ nɔ ayǐ káká sɔ́yi.

5 Ðó mǐ tuun ɖɔ ényí xɔ mǐtɔn ayǐkúngban jí tɔn e nyí goxɔ élɔ́ é wá kíjá ɔ, Mawu ná ná xɔ ɖé mǐ; xɔ e alɔ ma bló ǎ é ɖé, énɛ́ wɛ nyí xɔ mavɔmavɔ ɖo jǐxwé. 2 Ðó nǔgbó ɔ, mǐ nɔ wɛn azɔn ɖo xɔ élɔ́ mɛ,* lobo nɔ jló tawun bo ná sɔ́ agbaza e è sɔ́ nǔ ná nú mǐ ɖo jǐxwé* é dó. 3 Bónú hwenu e mǐ ná sɔ́ dó é ɔ, è ní ma wá mɔ mǐ ɖo mɛ̌ ó. 4 Nǔgbó ɔ, mǐ mɛ e ɖo goxɔ élɔ́ mɛ lɛ́ é ɖo agban kpinkpɛn glɔ́, bo ɖo azɔn wɛn wɛ, é ka nyí ɖɔ mǐ ba bo ná ɖe goxɔ élɔ́ wútu wɛ ǎ, loɔ, mǐ ba bo ná sɔ́ ɖě ɔ dó wútu wɛ, bónú gbɛ ní dó sixú sɔ́ nǔ e nɔ kú é mì. 5 Mawu wɛ sɔ́ nǔ nú mǐ nú gbɛ mɔ̌hun; é ná mǐ gbigbɔ ɔ, b’ɛ nyí gǎnjɛwú nǔ e ja é tɔn.*

6 Énɛ́ wú ɔ, mǐ nɔ kpankɔ́n mlɛ́mlɛ́ hwebǐnu, bo tuun ɖɔ ényí agbaza élɔ́ mɛ jɛ́n mǐ kpo ɖe ɔ,* mǐ lín dó Aklúnɔ, 7 ɖó nǔɖiɖi gblamɛ wɛ mǐ ɖo zɔnlin ɖi gbɔn wɛ, é nyí gbɔn nǔ e è nɔ mɔ lɛ́ é gblamɛ ǎ. 8 Amɔ̌, mǐ nɔ kpankɔ́n mlɛ́mlɛ́ bo ba ná lín dó agbaza élɔ́, lobo ná yi nɔ kpɔ́ xá Aklúnɔ. 9 Énɛ́ wú ɔ, ényí mǐ ɖo kpɔ́ xá ɛ alǒ lín d’è ɔ, nǔ e gbé mǐ nɔ nya é wɛ nyí ɖɔ nǔ mǐtɔn ní nyɔ́ nukún tɔn mɛ. 10 Ðó mǐ mɛ bǐ wɛ ɖó ná wá* hwɛɖiɖɔzinkpo* Klísu tɔn nukɔn, bónú è ná dó sú axɔ́ mɛ ɖokpó ɖokpó sɔgbe xá nǔ ɖěɖěe mɛ ɔ wa hwenu e é ɖo agbaza élɔ́ mɛ lɛ́ é, é sixú nyí nǔ ɖagbe alǒ nǔ nyanya.

11 Énɛ́ wú ɔ, ɖó mǐ tuun nǔ e sísí e gɔ́ngɔ́n é ɖíɖó nú Aklúnɔ nyí é wútu ɔ, mǐ nɔ bló bónú mɛ lɛ́ ná húzú linlin, amɔ̌, Mawu tuun mǐ ganjí. É ɖo mɔ̌ có, un ɖó nukún ɖɔ ayixa mitɔn lɔ tuun mǐ ganjí. 12 É nyí mǐɖée kpa wɛ mǐ lɛ́vɔ́ ɖe ɖo mi gɔ́n ǎ, loɔ, wǔsyɛ́n dó lanmɛ nú mi wɛ mǐ ɖe, bónú mi ná gó ɖó mǐ wú, mɔ̌ mɛ ɔ, mi ná kpé wú bo ná xósin mɛ ɖěɖěe nɔ gó ɖó nǔ e ɖo wěxo lɛ́ é wú, b’ɛ ma nyí ɖó nǔ e ɖo ayi mɛ lɛ́ é wú ǎ lɛ́ é. 13 Ényí tamɛ mǐtɔn ma sɔgbe ǎ hǔn, Mawu wútu wɛ; ényí tamɛ mǐtɔn ka sɔgbe ɔ, mi wútu wɛ. 14 Wǎnyíyí Klísu tɔn kp’acɛ dó mǐ jí mlɛ́mlɛ́, ɖó gbeta e kɔn mǐ wá é ɖíe: Mɛ ɖokpó kú dó mɛ bǐ tamɛ; ɖó mɛ bǐ wɛ ko kú. 15 É kú dó mɛ bǐ tamɛ bónú mɛ e ɖo gbɛ lɛ́ é ní ma sɔ́ nɔ gbɛ nú yěɖésúnɔ ɖě ó, loɔ, yě ní nɔ gbɛ nú éyɛ́ mɛ e kú dó yě tamɛ, bɔ è fɔ́n wá gbɛ é.

16 Énɛ́ wú ɔ, bɛ́sín din ɔ, mǐ sɔ́ nɔ kpɔ́n mɛ ɖěbǔ sɔgbe xá linlin gbɛtɔ́ tɔn ǎ. Ényí mǐ tlɛ nɔ kpɔ́n Klísu ɖ’ayǐ ɖo agbaza lixo ɔ, é ɖo wɛn ɖɔ mǐ kún sɔ́ nɔ kpɔ́n ɛ ɖo ali énɛ́ nu din ó. 17 Hǔn, ényí mɛ ɖěbǔ ɖo bǔ xá Klísu ɔ, mɛ énɛ́ nyí nǔɖíɖó yɔ̌yɔ́ ɖé; nǔ xóxó lɛ́ ko bú; éɖíe, nǔ yɔ̌yɔ́ lɛ́ ko wá. 18 Amɔ̌, Mawu gɔ́n wɛ nǔ lɛ́ bǐ gosín; é wɛ dó hwɛ gbɔ xá mǐ gbɔn Klísu jí, bo sɔ́ sinsɛnzɔ́ hwɛdógbɔ tɔn d’así nú mǐ, 19 é wɛ nyí ɖɔ, Mawu ɖo hwɛ dó gbɔ xá gbɛ ɔ wɛ gbɔn Klísu jí, é ka nɔ xa hwɛ yětɔn lɛ́ dó kɔ nú yě ǎ. É sɔ́ wɛn hwɛdógbɔ tɔn ɔ d’así nú mǐ.

20 Énɛ́ wú ɔ, afɔsɔ́ɖótetɔ́ Mawu tɔn lɛ́ wɛ mǐ nyí ɖo Klísu tɛnmɛ, cí nǔ ɖɔ Mawu ɖo mɛ lɛ́ ylɔ́ wɛ gbɔn jǐ mǐtɔn ɖɔhun. Ðó mǐ ɖo Klísu tɛnmɛ wútu ɔ, mǐ nɔ sa vo ɖɔ: “Mi dó hwɛ gbɔ xá Mawu.” 21 Mɛ e ma tuun hwɛhuhu ǎ é ɔ, Mawu bló bɔ é húzú nǔníná hwɛsɔ́kɛmɛ tɔn* dó ta mǐtɔn mɛ, bónú mǐ ní dó sixú húzú nǔjlɔ́jlɔ́watɔ́ ɖo Mawu nukúnmɛ gbɔn gbla tɔn mɛ.

6 Ðó mǐ ɖo azɔ̌ wa ɖó kpɔ́ xá Mawu wɛ wútu ɔ, mǐ lɛ́ ɖo byɔ̌byɔ́ mi wɛ ɖɔ mi ní ma yí gbe nú fɛ́nú Mawu tɔn dó wǔvɔ́ ó. 2 Ðó é ɖɔ: “Ðo wǔjɔmɛ hwenu ɔ, un se xó towe, bɔ ɖo hwlɛngánzángbe ɔ, un d’alɔ we.” Éɖíe! Wǔjɔmɛ hwenu wɛ mǐ ɖe din. Hwlɛngánzángbe wɛ mǐ ɖe din.

3 Mǐ nɔ nyí afɔklɛ́nnú nú mɛ ɖo ali ɖěbǔ nu ǎ, bónú è ní ma wá mɔ nǔjɛdo ɖě ɖo sinsɛnzɔ́ mǐtɔn wú ó; 4 é nyɔ́ wa ɔ, mǐ nɔ ɖe mǐɖée xlɛ́ ɖo ali bǐ nu ɖɔ mǐ nyí sinsɛnzɔ́watɔ́ Mawu tɔn gbɔn nǔ élɔ́ lɛ́ gblamɛ: mǐ nɔ dɛ ɖo mɛtɛ́nkpɔ́n gěgé, wǔvɛ́ lɛ́, hwenu vɛ́ wǔ lɛ́ kpó tagba lɛ́ kpó nu, 5 è nɔ xo mǐ, è nɔ bɛ́ mǐ dó gan mɛ, adǎkaxotɔ́ lɛ́ nɔ nyi ahwan xísí dó mǐ, mǐ nɔ w’azɔ̌ syɛ́nsyɛ́n, zǎn ɖé lɛ́ mɛ ɔ, mǐ nɔ d’amlɔ ǎ, nǔɖuɖu nɔ hán mǐ hweɖélɛ́nu; 6 mǐ nɔ zán gbɛ mímɛ́, mǐ nɔ zán gbɛ sɔgbe xá nǔ e mǐ tuun é, mǐ nɔ ɖó suúlu, mǐ nɔ nyɔ́ xomɛ, mǐ nɔ jó gbigbɔ mímɛ́ dó b’ɛ nɔ xlɛ́ ali mǐ, mǐ ɖó wǎnyíyí e ma nyí yɛmɛnúwiwa tɔn ǎ é, 7 mǐ nɔ ɖɔ nǔgbó, mǐ nɔ ɖeji dó hlɔ̌nhlɔ́n Mawu tɔn wú; mǐ nɔ hɛn ahwanfunnú nǔjlɔ́jlɔ́wiwa tɔn lɛ́ dó ɖisílɔ* kpó amyɔlɔ* kpó mɛ, 8 è nɔ sɔ́ mǐ su bo nɔ lɛ́ dó hɛ̌n mǐ, è nɔ ɖɔ xó nyanya dó mǐ wú bo nɔ lɛ́ ɖɔ xó ɖagbe dó mǐ wú. È nɔ kpɔ́n mǐ dó mɔ mɛblɛ́tɔ́, amɔ̌, nǔgbóɖɔtɔ́ wɛ mǐ nyí, 9 è nɔ kpɔ́n mǐ dó mɔ mɛ e è ma tuun ǎ é, amɔ̌, è tuun mǐ, è nɔ kpɔ́n mǐ dó mɔ mɛ e ko ɖibla* kú é, amɔ̌, mǐ ɖo gbɛ ganjí, è nɔ kpɔ́n mǐ dó mɔ mɛ e è dɔn tó ná* é, amɔ̌, è hu mǐ ǎ, 10 è nɔ kpɔ́n mǐ dó mɔ mɛ e wǔ kú é, amɔ̌, mǐ nɔ j’awǎ hwebǐnu, è nɔ kpɔ́n mǐ dó mɔ wamamɔnɔ, amɔ̌, mǐ nɔ dó dɔkun nú mɛ gěgé, è nɔ kpɔ́n mǐ dó mɔ mɛ e ma ɖó nǔɖé ǎ é, amɔ̌, mǐ ɖó nǔ lɛ́ bǐ.

11 Mǐ ɖɔ xó nú mi mɛ Kɔlɛ́ntinu lɛ́ nyi wɛn, mǐ lɛ́ yí wǎn nú mi tawun.* 12 Wǎnyíyí e mǐ ɖó nú mi é ɖó dogbó ǎ, loɔ, wǎnyíyí e midɛɛ lɛ́ ɖó nú mǐ é wɛ ɖó dogbó. 13 Énɛ́ wú ɔ, un ɖo xó ɖɔ nú mi wɛ, vǐ ce lɛ́ ɖɔ xó ná wɛ un ɖe ɖɔhun ɖɔ mi ní gbló ada nú wǎnyíyí mitɔn.

14 Mi ma dó kɔ agbanhɛnkpo ɖokpó ɔ mɛ xá* nǔmaɖitɔ́ lɛ́ ó.* Ðó étɛ́ nǔjlɔ́jlɔ́wiwa kpó sɛ́ngbigba kpó ka kpé dó? Alǒ, étɛ́ wěziza kpó ablu kpó ka ɖó ɖo bǔ? 15 Gɔ́ ná ɔ, nǔwaɖókpɔ́ tɛ́ ka ɖo Klísu kpó Beliyáli* kpó tɛ́ntin? Alǒ, étɛ́ nǔɖitɔ́ ɖé ka ɖó ɖo bǔ xá nǔmaɖitɔ́ ɖé? 16 Kancícá tɛ́ ka ɖo tɛ́npli Mawu tɔn kpó bǒcyɔ lɛ́ kpó tɛ́ntin? Ðó tɛ́npli Mawu gbɛɖe ɔ tɔn wɛ mǐ nyí; lěe Mawu ɖɔ gbɔn é ɔ: “Un ná nɔ tɛ́ntin yětɔn bo ná ɖi zɔnlin ɖo tɛ́ntin yětɔn, un ná nyí Mawu yětɔn, bɔ yě ná nyí togun ce.” 17 “Jexóva* ɖɔ: ‘Énɛ́ wú ɔ, mi tɔ́n sín tɛ́ntin yětɔn bo klán miɖée ɖó vo, mi ma sɔ́ ɖ’alɔ nǔ blíblí wú ɖě ó’”; “‘énɛ́ ɔ, un ná yí mi.’” 18 “Jexóva* Nǔbǐwúkpétɔ́ ɔ lɛ́ ɖɔ: ‘Un ná húzú tɔ́ nú mi, bɔ mi ná húzú vǐ súnnu kpó vǐ nyɔ̌nu kpó nú mì.’”

7 Énɛ́ wú ɔ, mɛ vívɛ́ná ce lɛ́ mi, ɖó è dó akpá énɛ́ lɛ́ nú mǐ wútu ɔ, mi nú mǐ ní slá wǔ nú mǐɖée, bo ɖe nǔ e nɔ hɛn agbaza kpó gbigbɔ kpó blí lɛ́ é bǐ síin, bo ná dó sixú nyí mɛ mímɛ́ yi fó, lobo ɖo sísí e gɔ́ngɔ́n é ɖó nú Mawu wɛ.

2 Mi ní yí wǎn nú mǐ.* Mǐ wa nǔ nyi do nú mɛ ɖěbǔ ǎ, mǐ hɛn mɛ ɖěbǔ gblé ǎ, mǐ hízí mɛ ɖěbǔ ǎ. 3 Bo ná dó ɖó hwɛ nú mi wú wɛ un ɖɔ xó énɛ́ ǎ. Ðó un ko ɖɔ wá yi ɖɔ ényí mǐ ɖo gbɛ oo, mǐ kú oo, mi ɖo ayi mǐtɔn mɛ. 4 Un vo tawun bo ná ɖɔ xó nú mi. Un nɔ gó tawun ɖó mi wú. È dó gbɔ nú mì tawun; awǎjijɛ ce nɔ túnflá ɖo wǔvɛ́ mǐtɔn lɛ́ bǐ mɛ.

5 Nǔgbó ɔ, hwenu e mǐ wá Masedwáni é ɔ, agbaza mǐtɔn mɔ vivo ɖěbǔ ǎ, é nyɔ́ wa ɔ, mǐ nɔ ɖo wǔvɛ́ se wɛ ɖo ali bǐ nu: ahwan fun xá mɛ ɖo kɔ́xo, bɔ xɛsi ɖo tɛ́ntin mǐtɔn. 6 Amɔ̌, Mawu e nɔ dó gbɔ nú mɛ ɖěɖěe awakanmɛ kú lɛ́ é, dó gbɔ nú mǐ gbɔn ba e Titu ba mǐ kpɔ́n é* gblamɛ; 7 é nyí ba e é ba mǐ kpɔ́n é kɛ́ɖɛ́ ka wɛ ǎ, loɔ, gbɔdónúmɛ e sín vǐví é ɖu ɖó mi wú é lɔ dó gbɔ nú mǐ, ɖó é ɖó jlǒ syɛ́nsyɛ́n e mi ɖó bo ná mɔ mì é, aluwɛ ɖaxó e mɛ mi ɖe é kpó nǔ ce e nɔ ɖu ayi mɛ nú mi tawun é* kpó sín gbe nú mì; énɛ́ wú ɔ, xomɛ lɛ́ hun mì d’é jí.

8 Ðó nú é ná bo tlɛ sín wěmasɛ́dómɛ ce wú bɔ mi byɔ́ aluwɛ mɛ ɔ, é vɛ́ nú mì ǎ. Nǔgbó wɛ ɖɔ tlóló ɔ, é vɛ́ nú mì, ɖó un mɔ ɖɔ wěmasɛ́dómɛ ɔ zɔ́n bɔ mi byɔ́ aluwɛ mɛ, hwenu kpɛɖé jɛ́n nǔ ka nyí mɔ̌ ná; 9 amɔ̌ din ɔ, xomɛ hun mì, é ka sín aluwɛ mɛ e mi byɔ́ é kɛ́ɖɛ́ wú ǎ, loɔ, aluwɛ mɛ e mi byɔ́ káká bɔ hwɛ mitɔn lɛ́ vɛ́ nú mi* é wú wɛ. Ðó aluwɛ e sɔgbe xá jlǒ Mawu tɔn é mɛ wɛ mi byɔ́, énɛ́ ɔ, é sín mǐ wú bónú nǔ ɖěbǔ gblé dó mi wú ǎ. 10 Ðó aluwɛ e sɔgbe xá jlǒ Mawu tɔn é nɔ zɔ́n bɔ hwɛ mɛtɔn lɛ́ nɔ vɛ́ nú mɛ* bɔ è nɔ mɔ hwlɛngán, é ka nɔ wá vɛ́ nú mɛ ǎ; amɔ̌, aluwɛ gbɛ ɔ tɔn ɔ, kú wɛ é nɔ ji. 11 Mi kpɔ́n lěe aluwɛ e sɔgbe xá jlǒ Mawu tɔn bɔ mi byɔ́ mɛ é zɔ́n bɔ mi yá wǔ tawun bo wa nǔ gbɔn é, ɛɛn, mi klɔ́ cí sín nyǐkɔ mitɔn wú, xomɛ sin mi dó nǔwanyido ɔ wú, mi ɖi xɛsi, mi ɖó jlǒ syɛ́nsyɛ́n, mi ɖó kan dó nǔ wú, mi jlá nǔwanyido ɔ ɖó. Mi ɖe xlɛ́ ɖo ali bǐ nu ɖɔ émí mɛ́* ɖo xó énɛ́ mɛ. 12 Un wlán nǔ sɛ́dó mi có, é ka nyí mɛ e wa nǔ nyi do é wɛ zɔ́n bɔ un wa mɔ̌ ǎ, é ka lɛ́ nyí ɖó mɛ e è wa nǔ nyi do ná é wú ǎ, é nyɔ́ wa ɔ, bónú tó e mi nɔ yá wǔ ɖó mǐ é ní dó sixú jɛ wě ɖo tɛ́ntin mitɔn ɖo Mawu nukɔn wɛ zɔ́n. 13 Nǔ e dó gbɔ nú mǐ é nɛ́.

Amɔ̌, gbɔn vo nú gbɔ e è dó nú mǐ é ɔ, xomɛ tlɛ lɛ́ hun mǐ hú gǎn ɖó awǎjijɛ Titu tɔn wú, ɖó mi mɛ bǐ wɛ fá kɔ n’i.* 14 Ðó nú un ná bo gó ɖó mi wú ɖo nukɔn tɔn ɔ, un ɖu winnyá ǎ; é nyɔ́ wa ɔ, lěe nǔ e mǐ ɖɔ nú mi lɛ́ é bǐ nyí nǔgbó gbɔn é ɔ, mɔ̌ jɛ́n gǒ e mǐ gó ɖó mi wú ɖo Titu nukɔn é lɔ nyí nǔgbó gbɔn é nɛ́. 15 Gɔ́ ná ɔ, wǎnyíyí nɔví nɔví tɔn e é ɖó nú mi é syɛ́n sɔmɔ̌ bɔ é flín tónúsise mi bǐ tɔn, lěe mi yí i kpó xɛsi kpó, kpódó sísɔ́sísɔ́ kpán gbɔn é. 16 Xomɛ hun mì ɖɔ un sixú ɖeji dó mi wú* ɖo nǔ bǐ mɛ.

8 Din ɔ, nɔví lɛ́ mi, mǐ jló ɖɔ mi ní ɖó mɔjɛmɛ dó fɛ́nú Mawu tɔn e è ná agun ɖěɖěe ɖo Masedwáni lɛ́ é wú. 2 Wǔvɛ́ mɛ wɛ yě ɖe ɖó mɛtɛ́nkpɔ́n ɖaxó ɖé wútu có, awǎjijɛ yětɔn e túnflá é kpó ya ɖaxó e mɛ yě ɖe é kpó ɖe xlɛ́ ɖɔ yě nɔ hun alɔ dó ná nǔ mɛ tawun.* 3 Ðó yě ná nǔ sɔgbe xá nǔ e yě ɖó é, yě tlɛ ná nǔ zɛ nǔ e yě ɖó é wú, nyiɖésúnɔ nyí kúnnuɖetɔ́ énɛ́ tɔn. 4 Yěɖésúnɔ wɛ jló bo sa vo nú mǐ vɛ́návɛ́ná ɖɔ è ní jɔ wǔ émí bónú émí ní ná nǔ, lobo ɖ’alɔ ɖo sinsɛnzɔ́ sɔhɛnmɛ tɔn e wa dó mɛ mímɛ́ lɛ́ tamɛ wɛ è ɖe é mɛ. 5 Yě wa nǔ e ɖó nukún wɛ mǐ ɖe é kpowun ǎ, é nyɔ́ wa ɔ, gbɔn jlǒ Mawu tɔn gblamɛ ɔ, yě to sɔ́ yěɖée jó nú Aklúnɔ kpó mǐ kpó hwɛ̌. 6 Énɛ́ wú ɔ, mǐ dó wǔsyɛ́n lanmɛ nú Titu ɖɔ é ní xo nǔníná xomɛnyínyɔ́ tɔn mitɔn lɛ́ lɔmɔ̌ kplé yi fó, ɖó é wɛ nyí mɛ e jɛ azɔ̌ énɛ́ wa jí ɖo tɛ́ntin mitɔn é. 7 Gɔ́ ná ɔ, mi ɖó nǔ bǐ bɔ é túnflá, nǔɖiɖi mitɔn lí dǒ, mi ɖó nǔwúkpíkpé xóɖiɖɔ tɔn, nǔtuuntuun mitɔn túnflá, mi nɔ bí dó nǔ wú bǐ mlɛ́mlɛ́, mi yí wǎn nú mɛ ɖěvo lɛ́ tawun lěe mǐ yí wǎn nú mi gbɔn é. Mi bo nú nǔníná xomɛnyínyɔ́ tɔn mitɔn lɔ ní túnflá.

8 Bo ná dó ɖe gbe nú mi wú wɛ un ɖɔ mɔ̌ ǎ, é nyɔ́ wa ɔ, mi ní tuun lěe mɛ ɖěvo lɛ́ nɔ bí dó nǔ wú gbɔn é, lobonú má lɛ́ kpɔ́n ɖɔ mi ɖó wǎnyíyí adodwé a jí wú wɛ. 9 Ðó mi tuun fɛ́nú Aklúnɔ mǐtɔn Jezu Klísu tɔn; é nyí dɔkunnɔ có, é húzú wamamɔnɔ dó ta mitɔn mɛ, bónú mi ní dó sixú húzú dɔkunnɔ gbɔn wamamɔnɔ e é nyí é gblamɛ.

10 Nǔ e un lin dó xó énɛ́ wú é ɖíe: Ðagbe mitɔn wú wɛ, ɖó é ko bló xwe ɖokpó din bɔ mi bɛ́ azɔ̌ énɛ́, é nyí bɛ̌ kɛ́ɖɛ́ wɛ mi ka bɛ́ ǎ, mi lɛ́ ɖe xlɛ́ ɖɔ émí ɖó jlǒ bo ná w’azɔ̌ énɛ́. 11 Énɛ́ wú ɔ, mi bo fó azɔ̌ e mi bɛ́ é, bónú jlǒ e mi ɖó bo ná wa nǔ é ní dó sixú jɛnu bǐ mlɛ́mlɛ́ sɔgbe xá nǔ e mi ɖó é. 12 Ðó ényí mɛɖé ɖó jlǒ bo ná ná nǔ ɔ, nǔníná e sɔgbe xá nǔ e é ɖó é wɛ Mawu nɔ yí gbe ná hú gǎn, é nyí nǔníná e sɔgbe xá nǔ e é ma ɖó ǎ é ǎ. 13 Ðó un ba bónú nǔ lɛ́ ní bɔkun nú mɛ ɖěvo lɛ́, bo ka vɛ́ wǔ nú midɛɛ lɛ́ ǎ; 14 é nyɔ́ wa ɔ, un jló ɖɔ kpoɖéjí nǔ e mi ná din é tɔn ní dó sixú sú hudó yětɔn sín do, bónú kpoɖéjí nǔ e yě lɔ ná é tɔn ní dó sixú sú hudó mitɔn sín do, mɔ̌ mɛ ɔ, nǔ lɛ́ bǐ ná nɔ zɛ̌nzɛ̌n. 15 Lěe è ko wlán gbɔn é ɔ: “Mɛ e ɖó nǔ gěgé é ɖó nǔ dín ǎ, bɔ mɛ e ɖó nǔ kpɛɖé é ɔ, nǔ e é ɖó é hwe dín ǎ.”

16 Mǐ dó kú nú Mawu nú blǒ e é bló bɔ nǔ mitɔn nɔ ɖu ayi mɛ nú Titu tawun, lěe é nɔ ɖu ayi mɛ nú mǐ lɔ gbɔn é, 17 ɖó é yí gbe nú nǔ e mǐ ɖɔ n’i é, é ka lɛ́ jló tawun bá wa nǔ e mǐ zɔ́n ɛ é, énɛ́ wú ɔ, éɖésúnɔ wá gbeta ɔ kɔn bo ja mi gɔ́n. 18 Mǐ ɖo sísɛ́ ɛ dó wɛ gɔ́ nú nɔví e agun lɛ́ bǐ nɔ kpa, ɖó nǔ e é nɔ wa dó wɛn ɖagbe ɔ tamɛ lɛ́ é wú é. 19 Énɛ́ kɛ́ɖɛ́ ka wɛ ǎ, loɔ, agun lɛ́ lɛ́vɔ́ sɔ́ ɛ bónú é ná nɔ xwedó mǐ yi tomɛ, hwenu e mǐ ná ɖo nukún kpé dó nǔníná xomɛnyínyɔ́ tɔn énɛ́ wú wɛ nú susu Aklúnɔ tɔn é; énɛ́ ná xlɛ́ ɖɔ mǐ ɖo gbesisɔmɛ bo ná d’alɔ mɛ ɖěvo lɛ́. 20 Mɔ̌ mɛ ɔ, lěe kpé nukún dó nǔ énɛ́ e mi hun alɔ dó ná é wú gbɔn wɛ mǐ ɖe é ɔ, mɛ ɖěbǔ ná mɔ xó ɖɔ d’é wú ǎ. 21 Ðó mǐ ‘nɔ ɖɔ nǔgbó ɖo nǔ e wú kpé nukún dó wɛ mǐ ɖe lɛ́ é bǐ mɛ, é nyí ɖo Jexóva* nukúnmɛ kɛ́ɖɛ́ wɛ ǎ, loɔ, ɖo gbɛtɔ́ lɛ́ lɔmɔ̌ nukúnmɛ.’

22 Gɔ́ ná ɔ, mǐ ɖo nɔví mǐtɔn ɖěvo sɛ́ dó wɛ gɔ́ nú yě, mǐ ko tɛ́n ɛ kpɔ́n azɔn mɔ̌kpán bo mɔ lěe é bí dó nǔ wú ɖo ninɔmɛ gěgé mɛ gbɔn é, amɔ̌ din ɔ, é ná lɛ́ bí dó nǔ wú hú gǎn, ɖó jiɖiɖe ɖaxó e é ɖó dó mi wú é wútu. 23 Amɔ̌, ényí è kan nǔ ɖěbǔ byɔ́ dó Titu wú hǔn, azɔ̌gbɛ́ ce wɛ é nyí, bɔ nyi kpó é kpó nɔ w’azɔ̌ ɖó kpɔ́ nú le mitɔn; alǒ ényí è kan nǔ byɔ́ dó nɔví mǐtɔn lɛ́ wú hǔn, mɛsɛ́dó agun lɛ́ tɔn wɛ yě nyí, bo lɛ́ nyí susu Klísu tɔn. 24 Énɛ́ wú ɔ, mi ɖe xlɛ́ yě ɖɔ mi yí wǎn nú yě, bo ɖe nǔ e wú mǐ nɔ gó ɖó mi wú é xlɛ́ agun lɛ́.

9 Din ɔ, ɖo sinsɛnzɔ́ wiwa dó mɛ mímɛ́ lɛ́ tamɛ kpáxwé ɔ, é ɖo dandan nú mì sɔmɔ̌ ɖɔ má wlán nǔ sɛ́dó mi ǎ, 2 ɖó un tuun jlǒ ɖagbe e mi ɖó é bo nɔ gó ɖó énɛ́ wú ɖo Masedwáninu lɛ́ gɔ́n, bo nɔ ɖɔ ɖɔ Akáyi ko ɖo gbesisɔmɛ sín xwe ɖokpó ɖíe, bɔ gǎn e mi dó kpó ayi bǐ kpó é ko sɔ́ akpakpa gěgé yětɔn. 3 Amɔ̌, un ɖo nɔví lɛ́ sɛ́ dó wɛ, bónú gǒ e mǐ gó ɖó mi wú ɖo ali énɛ́ nu é ní ma wá nyí dó wǔvɔ́ ó, lobonú mi ní dó sixú ɖo gbesisɔmɛ nǔgbó, lěe un ɖɔ gbɔn é. 4 É ma nyí mɔ̌ ǎ ɔ, ényí Masedwáninu lɛ́ zɔn xá mì wá, bo mɔ ɖɔ mi kún ɖo gbesisɔmɛ ó ɔ, mǐ ná ɖu winnyá ɖó jiɖe e mǐ ɖó dó mi wú é wú; mi lɔ ka ná ɖu winnyá. 5 Énɛ́ wú ɔ, un lin ɖɔ é ɖo dandan ɖɔ má dó wǔsyɛ́n lanmɛ nú nɔví lɛ́ bónú yě ní wá gɔ̌n mitɔn dó nukɔn, bo sɔ́ nǔ nú nǔníná xomɛnyínyɔ́ tɔn e sín akpá mi dó é ɖ’ayǐ jɛ nukɔn, mɔ̌ mɛ ɔ, é ná ko ɖo gbesisɔmɛ nǔ e è hun alɔ dó ná é ɖɔhun, é nyí nǔ e è zín mɛ jí bɔ è ná é ɖɔhun ǎ.

6 Nǔ e ɖɔ wɛ un ɖe é ɖíe: mɛ ɖěbǔ e dó nǔ kpɛɖé é ná ya kpɛɖé, bɔ mɛ ɖěbǔ e dó nǔ gěgé é ná ya gěgé. 7 Mi nú mɛ ɖokpó ɖokpó ní wa nǔ lěe é wá gbeta ɔ kɔn gbɔn ɖo ayi tɔn mɛ é, ní ma nyí wǔɖéwúɖé alǒ gǎn wɛ è hú i ó, ɖó Mawu yí wǎn nú mɛ e nɔ ná nǔ mɛ kpó xomɛhunhun kpó é.

8 Gɔ́ ná ɔ, Mawu kpé wú bo ná ná fɛ́nú tɔn bǐ mi bɔ é ná túnflá, bónú hwebǐnu ɔ, mi ná nɔ ɖó nǔ bɔ é ná nɔ kpé mi ɖo ali bǐ nu mlɛ́mlɛ́, bo lɛ́ ɖó nǔ e mi ná dó wa nǔ ɖagbe bǐ ná é bɔ é ná túnflá. 9 (Lěe è wlán gbɔn é ɔ: “É hun alɔ dó ná nǔ; é ná nǔ wamamɔnɔ lɛ́. Nǔjlɔ́jlɔ́wiwa tɔn ɖo te káká sɔ́yi.” 10 Din ɔ, Mɛ e nɔ ná nǔkún nǔkúndótɔ́ bɔ é nɔ túnflá, bo nɔ lɛ́ ná wɔ̌xúxú e è ná ɖu é mɛ é, ná ná nǔkún e mi ná dó é mi bɔ é ná túnflá, bo ná lɛ́ bló bɔ nǔjlɔ́jlɔ́wiwa mitɔn sín sínsɛ́n ná sukpɔ́ d’é jí.) 11 È kɔn nyɔ̌ná dó mi jí ɖo nǔ bǐ mɛ, bónú mi ní dó sixú hun alɔ dó ná nǔ mɛ ɖo ali bǐ nu; alɔhundónánǔmɛ énɛ́ zɔ́n bɔ gbɔn gbla mǐtɔn mɛ ɔ, mɛ lɛ́ nɔ dó kú nú Mawu; 12 ɖó é nyí bo ná dó sú nǔ e hudó mɛ mímɛ́ lɛ́ é sín do ganjí kɛ́ɖɛ́ wú wɛ mi ɖo sinsɛnzɔ́ énɛ́* wa wɛ ǎ, loɔ, é ná lɛ́ zɔ́n bɔ mɛ gěgé ná dó kú nú Mawu. 13 Gbɔn kúnnu e sinsɛnzɔ́ sɔhɛnmɛ tɔn énɛ́ nɔ ɖe é gblamɛ ɔ, yě nɔ kpa susu nú Mawu ɖó mi hwíhwɛ́ miɖée dó wɛn ɖagbe e kunkplá Klísu bɔ mi nɔ jlá é glɔ́, bo lɛ́ hun alɔ dó ná nǔ mɛ mímɛ́ lɛ́ kpó mɛ bǐ kpó wútu. 14 Yě sa vo dó ta mitɔn mɛ, bo lɛ́ ɖe xlɛ́ ɖɔ émí yí wǎn nú mi ɖó fɛ́nú Mawu tɔn e ɖo kpɔ́ xá mi bɔ é túnflá é wú.

15 Mi nú mǐ ní dó kú nú Mawu nú nǔníná tɔn vɔ̌nu e è ma sixú jlɛ́ ǎ é.

10 Nyɛ Pɔ́lu e mi mɛ ɖé lɛ́ nɔ ɖɔ ɖɔ un kún nɔ hwɛ́n nǔɖé hwenu e un ɖo tɛ́ntin mitɔn cɔɔ lě é ó, bo ka nɔ gbó adɔ hwenu e un ma ɖo fínɛ́ ǎ é ɖésúnɔ wɛ ɖo vo sa nú mi wɛ, gbɔn xomɛfífá Klísu tɔn kpó xomɛnyínyɔ́ tɔn kpó gblamɛ. 2 Un ɖo vo sa nú mi wɛ ɖɔ mi ní ma lɔn bónú hwenu e un ná ɖo gɔ̌n mitɔn é ɔ, é ní byɔ́ ɖɔ má gbó adɔ bo wá gbeta syɛ́nsyɛ́n lɛ́ kɔn, lěe ɖó nukún tɔn gbɔn wɛ un ɖe é dó mɛɖé lɛ́ wú ó; yě nɔ kpɔ́n mǐ dó mɔ mɛ e linlin gbɛtɔ́ tɔn nɔ xlɛ́ ali lɛ́ é. 3 Ðó mǐ nɔ zán gbɛ gbɛtɔ́ ɖě lɛ́ ɖɔhun* có, mǐ ka nɔ fun ahwan sɔgbe xá nǔ e mǐ nyí ɖo agbaza mɛ é ǎ. 4 Ahwanfunnú e mǐ nɔ fun ahwan ná lɛ́ é nyí gbɛtɔ́ tɔn ǎ, loɔ, ahwanfunnú hlɔ̌nhlɔ́nnɔ lɛ́ wɛ Mawu ná mǐ, bónú mǐ ná nɔ mu ahohó lɛ́ ná. 5 Ðó mǐ nɔ flí linlin kpó nǔ ɖaxó ɖaxó ɖěɖěe nɔ sí te dó nǔ tuuntuun dó Mawu wú jí lɛ́ é bǐ kpó xwe, mǐ nɔ lɛ́ wlí linlin bǐ dó gan bo ná mɔ tɛn dó bló bónú yě ná se tónú nú Klísu; 6 mǐ lɛ́ ɖo gbesisɔmɛ bo ná dɔn tó nú tónúmasetɔ́ bǐ, ényí miɖésúnɔ se tónú bǐ mlɛ́mlɛ́ ɔ nɛ́.

7 Lěe nǔ lɛ́ xɔ akwɛ́ gbɔn ɖo nukúnta é wɛ mi nɔ kpɔ́n. Ényí mɛ ɖěbǔ ɖeji dó éɖée wú ɖɔ émí nyí Klísu tɔn hǔn, mɛ ɔ ní lɛ́ lin tamɛ dó nǔgbó élɔ́ jí: Lěe é nyí Klísu tɔn gbɔn é ɔ, mɔ̌ wɛ mǐ lɔ nyí gbɔn. 8 Aklúnɔ ná mǐ acɛ bónú mǐ ná bló bónú mi ná lí dǒ, é nyí bo ná dó zin mi dɛ́ ǎ; ényí un ka tlɛ gó zɛ xwé wú kpɛví ɖé ɖó acɛ énɛ́ wú ɔ, un ná ɖu winnyá ǎ. 9 Ðó un jló ná wa nǔ cí nǔ ɖɔ un ɖo tíntɛ́nkpɔ́n wɛ bo ná dó xɛsi mi, gbɔn wěmasɛ́dómɛ ce lɛ́ gblamɛ ɖɔhun ǎ. 10 Ðó yě nɔ ɖɔ: “Wěmasɛ́dómɛ tɔn lɛ́ nɔ ɖó zin, bo nɔ ɖó hlɔ̌nhlɔ́n, è ka mɔ éɖésúnɔ cɔɔ lě ɔ, é nɔ ɖó gǎn ǎ, bɔ xó tɔn lɛ́ nɔ hwɛ́n nǔtí ǎ.” 11 Mɛ mɔ̌hun lɛ́ ní tuun ɖɔ nǔ e mǐ nɔ ɖɔ* gbɔn wěmasɛ́dómɛ lɛ́ gblamɛ hwenu e mǐ ma ɖo fínɛ́ ǎ lɛ́ é ɔ, mǐ ná lɛ́ wa* hwenu e mǐ ná ɖo fínɛ́ é. 12 Ðó mǐ nɔ glá bo nɔ xwe mǐɖée dó mɛɖé lɛ́ sín ahwan mɛ, alǒ jlɛ́ mǐɖée dó yě wú ǎ; yě nɔ kpa yěɖée. Amɔ̌, yě nɔ jlɛ́ yěɖésúnɔ lɛ́ sɔgbe xá nǔjlɛ́nú yěɖésúnɔ tɔn lɛ́, bo nɔ lɛ́ jlɛ́ yěɖée lɛ́ dó yěɖée lɛ́ wú, bɔ énɛ́ xlɛ́ ɖɔ yě kún ɖó nukúnnúmɔjɛnǔmɛ ɖě ó.

13 É ɖo mɔ̌ có, mǐ ná gó zɛ dogbó e è ɖó nú mǐ lɛ́ é wú ǎ, é nyɔ́ wa ɔ, mǐ ná gó sɔgbe xá dogbó fí e Mawu ɖe* nú mǐ bo bló bɔ é tlɛ hun káká wá gɔ̌n mitɔn é tɔn. 14 Nǔgbó ɔ, mǐ ɖo nǔ wa wɛ zɛ dogbó mǐtɔn lɛ́ wú, cí nǔ ɖɔ mǐ kún wa azɔ̌ wá gɔ̌n mitɔn ó ɖɔhun ǎ, ɖó mǐdɛɛ lɛ́ wɛ nyí mɛ nukɔntɔn e hun káká wá gɔ̌n mitɔn, bo jlá wɛn ɖagbe e kunkplá Klísu é mi é. 15 Mǐ nɔ gó zɛ azɔ̌ e è zɔ́n mǐ é sín dogbó lɛ́ wú ǎ, é wɛ nyí ɖɔ mǐ kún nɔ gó, ɖó gǎndídó mɛ ɖěvo tɔn lɛ́ wú ó, é nyɔ́ wa ɔ, mǐ ɖo nukún ɖó wɛ ɖɔ ée nǔɖiɖi mitɔn ná ɖo jijɛjí wɛ é ɔ, azɔ̌ e mǐ wa é ní ɖo jijɛjí wɛ, ɖo fí e è ɖe nú mǐ é. Mɔ̌ mɛ ɔ, azɔ̌ mǐtɔn ná lɛ́ gbló ada d’é jí, 16 bónú mǐ ní dó sixú jlá wɛn ɖagbe ɔ to e jɛ zɔ nú mi lɛ́ é, bo ma wá gó ɖó nǔ e è ko wa ɖo fí e è ɖe nú mɛ ɖěvo é wú ó. 17 “Amɔ̌, mɛ e nɔ gó é, ní nɔ gó ɖó tuun e é tuun Jexóva* é wú.” 18 Ðó mɛ e nɔ kpa éɖée é sín nǔ wɛ nɔ nyɔ́ Mawu nukúnmɛ ǎ, loɔ, mɛ e Jexóva* nɔ kpa é wɛ.

11 Un jló ɖɔ mi ní dɛ bónú má ɖɔ xó mɛ e ta tɔn mɛ ma sɔgbe ǎ é ɖɔhun kpɛɖé. Nǔgbó ɔ, mi ka ɖo didɛ ɖo nu ce wɛ! 2 Ðó un ɖo wǔ hwan dó ta mitɔn mɛ wɛ lěe Mawu nɔ hwan wǔ* gbɔn é ɖɔhun, ɖó nyiɖésúnɔ dó akpá bo ná sɔ́ mi da nú asú ɖokpó, é wɛ nyí Klísu, lobɔ un jló ná sɔ́ mi xwlé è ɖyɔ̌vǐ ɖo alɔjí mímɛ́ ɖɔhun. 3 Amɔ̌, un ɖo xɛsi ɖi wɛ ɖɔ lěe dan ɔ zán ayi wínníwínní bo flú Ɛvu gbɔn é ɔ, ɖo ali ɖé nu ɔ, è ní ma wá flú mi ɖo linlin mitɔn mɛ, bo lɛ́ kɔ nú mi sín nǔgbó kpó mǐmɛ́ kpó e jɛxá Klísu é gúdo ó. 4 Nǔ e wú un ɖɔ mɔ̌ é ɖíe: ényí mɛɖé wá bo jlá Jezu ɖěvo mi zɛ mɛ e mǐ jlá mi é wú, alǒ hɛn gbigbɔ ɖěvo wá nú mi zɛ ée mi ko mɔ yí é wú, alǒ jlá wɛn ɖagbe ɖěvo mi zɛ ée mi ko yí gbe ná é wú ɔ, mi nɔ yá wǔ yí gbe nú mɛ énɛ́. 5 Ðó un nɔ mɔ ɖɔ un kún hwe hú mɛsɛ́dó nukúnɖéjí enyíi mitɔn lɛ́ ɖo nǔ ɖěbǔ mɛ ó. 6 Amɔ̌, ényí un na bo ma tlɛ nyɔ́ xó ɖɔ ganjí ǎ ɔ, un ka tuun nǔ; nǔgbó ɔ, mǐ ɖe énɛ́ xlɛ́ mi nyi wɛn ɖo ali bǐ nu, ɖo nǔ bǐ mɛ.

7 Alǒ sɔ́ e un sɔ́ nyiɖée hwe bónú mi ní dó sixú xɔ susu, ɖó un jlá wɛn ɖagbe Mawu tɔn mi vɔ̌nu kpó xomɛhunhun kpó wútu é ɔ, hwɛ wɛ é nyí bɔ un hu a? 8 Un yí gbe bɔ agun ɖěvo lɛ́ d’alɔ* mì, bɔ énɛ́ cí ɖɔ nǔ yětɔn wɛ un fin dó wa sinsɛnzɔ́ nú mi ɖɔhun. 9 É ɖo mɔ̌ có, hwenu e un ɖo gɔ̌n mitɔn bo ma ɖó nǔ e hudó mì é ǎ é ɔ, un húzú agban nú mɛ ɖěbǔ ǎ, ɖó nɔví e gosín Masedwáni lɛ́ é ná nǔ e hudó mì lɛ́ é mì bɔ é túnflá. Ɛɛn, ɖo ali bǐ nu ɔ, un lɔn bo húzú agban nú mi ǎ, bo ka ná lɛ́ kpo ɖo mɔ̌ wa wɛ. 10 Ényí nǔgbó Klísu tɔn kpo ɖo nyɛ mɛ jɛ́n wɛ ɔ, un ná ɖó gǒ e un nɔ gó ɖo Akáyi sín xá lɛ́ mɛ é te ǎ. 11 Ðó hwɛjijɔ tɛ́ wú? Un yí wǎn nú mi ǎ wútu wɛ a? Mawu tuun ɖɔ un yí wǎn nú mi.

12 Amɔ̌, nǔ e wa wɛ un ɖe é ɔ, un ná kpo ɖo wiwa wɛ, bónú mɛ ɖěɖěe nɔ ɖo nǔ e wú yě ná ɖó dó bo* ná ɖe xlɛ́ ɖɔ yě nyí nǔ ɖokpó ɔ xá mǐ é ba wɛ, bo nɔ gó ɖó nǔ* e yě wa lɛ́ é wú lɛ́ é ní ma ɖó hwɛjijɔ ɖěbǔ ó. 13 Ðó mɛ mɔ̌hun lɛ́ ɔ, mɛsɛ́dó-nyíjɛtɔ́ lɛ́ wɛ nú yě, azɔ̌watɔ́ mɛblɛ́ɖutɔ́ lɛ́ wɛ yě nyí, bɔ yě nɔ sɔ́ mɛsɛ́dó Klísu tɔn lɛ́ sín ninɔmɛ. 14 Nǔkpácámɛ ɖé ka ɖo fínɛ́ ǎ, ɖó Satáan ɖésúnɔ nɔ ɖo wɛnsagun wěziza tɔn sín ninɔmɛ sɔ́ wɛ. 15 Énɛ́ wú ɔ, ényí azɔ̌watɔ́ tɔn lɛ́ lɔ nɔ ɖo azɔ̌watɔ́ nǔ e sɔgbe é tɔn sín ninɔmɛ sɔ́ wɛ ɔ, é nɔ kpácá mǐ ɖěbǔ ǎ. Amɔ̌, lěe xó yětɔn ná fó gbɔn é ná sɔgbe xá nǔwiwa yětɔn lɛ́.

16 Un lɛ́ ɖo vǐvɔ́ ɖɔ wɛ: Mɛ ɖěbǔ ní ma lin ɖɔ un nyí taɖunɔ ó. Amɔ̌, ényí mi tlɛ lin mɔ̌ hǔn, mi bo yí mì taɖunɔ wɛ un nyí ɖɔhun, bónú nyi lɔ ní dó sixú gó kpɛɖé. 17 Nǔ e ɖɔ wɛ un ɖe din é ɔ, é nyí kpɔ́ndéwú Aklúnɔ tɔn xwedó wɛ un ɖe ǎ, loɔ, lěe taɖunɔ e nɔ gó bo nɔ lɛ́ ɖeji dó éɖée wú é ɖé ná ɖɔ gbɔn é wɛ. 18 Ðó mɛ gěgé nɔ gó sɔgbe xá hwɛhuhu gbaza* wútu ɔ, nyi lɔ ná gó. 19 Ðó “tamɛ mitɔn sɔgbe” tawun wútu ɔ, mi nɔ yí gbe nú taɖunɔ lɛ́ kpó xomɛhunhun kpó. 20 Nǔgbó ɔ, mi nɔ yí gbe nú mɛ ɖěbǔ e nɔ sɔ́ mi dó ɖó kannumɔ é, mɛ ɖěbǔ e nɔ vɔ nǔɖókan mitɔn lɛ́ é, mɛ ɖěbǔ e nɔ klá jɛ nǔ e mi ɖó lɛ́ é nu é, mɛ ɖěbǔ e nɔ sɔ́ éɖée gǎn ɖó mi nu é kpó mɛ ɖěbǔ e nɔ gba nukúnmɛ nú mi é kpó.

21 Un ɖɔ mɔ̌ dó kɔ́n wi mǐtɔn, ɖó é sixú cí ɖɔ mǐ wa nǔ mɛ e ma ɖó gǎn ǎ lɛ́ é ɖɔhun.

Amɔ̌, ényí mɛ ɖěvo lɛ́ nɔ wa nǔ kpó adɔgbígbó kpó hǔn (xó ɖɔ wɛ un ɖe ta ce mɛ sɔgbe ǎ ɖɔhun), nyi lɔ nɔ wa nǔ kpó adɔgbígbó kpó. 22 Eblée wɛ nú yě a? Eblée wɛ nyi lɔ nyí. Izlayɛ́li ví wɛ nú yě a? Izlayɛ́li ví wɛ nyi lɔ nyí. Ablaxámu sín kúnkan* wɛ nú yě a? É wɛ nyi lɔ nyí. 23 Sinsɛnzɔ́watɔ́ Klísu tɔn wɛ nú yě a? Un ná ná xósin taɖunɔ ɖɔhun, un nyí sinsɛnzɔ́watɔ́ tɔn hú yě flaflá tɔn: un wa azɔ̌ hú yě, è sɔ́ mì dó gan mɛ hwɛhwɛ hú yě, azɔn nabí e è xo mì é ɔ, un sixú xa ǎ, kúdán gbo mì azɔn gěgé. 24 Azɔn atɔ́ɔ́n wɛ Jwifu lɛ́ sɛ́n lanbá nú mì azɔn 40 é hwe ɖokpó, 25 è sɔ́ kpo dó xo mì azɔn atɔn, è nyi awǐnnyaglo dó mì azɔn ɖokpó, tɔjíhún gba dó mì azɔn atɔn, un nɔ xu nukúnmɛ kéze ɖokpó zǎn ɖokpó; 26 un nɔ yi tomɛ hwɛhwɛ, adǎn gbo mì ɖo tɔ jí, adǎn gbo mì ɖo ajotɔ́ lɛ́ lɔ mɛ, adǎn gbo mì ɖo togun nyiɖésúnɔ tɔn mɛ, adǎn gbo mì ɖo akɔta ɖě lɛ́ mɛ, adǎn gbo mì ɖo toxo mɛ, adǎn gbo mì ɖo gbětótló mɛ, adǎn gbo mì ɖo xu jí, adǎn gbo mì ɖo nɔví-nyíjɛtɔ́ lɛ́ tɛ́ntin, 27 un nɔ wa azɔ̌ syɛ́nsyɛ́n bo nɔ lɛ́ xo kan, hwɛhwɛ ɔ, un nɔ d’amlɔ zǎnmɛ ǎ, xovɛ́ nɔ sin mì bɔ kɔ nɔ xú mì, nǔɖuɖu nɔ hán mì hwɛhwɛ, jɔhɔn nɔ sin mì bɔ avɔ nɔ hán mì.*

28 Gɔ́ nú nǔ alɔkpa énɛ́ lɛ́ bǐ ɔ, nǔ ɖěvo ɖe bo nɔ ɖu ayi mɛ* nú mì ayǐhɔ́ngbe ayǐhɔ́ngbe, é wɛ nyí ɖɔ ado nɔ hu mì, ɖó agun lɛ́ bǐ wú. 29 Mɛ̌ ka ba gǎn kpo, bɔ un ma ba gǎn kpo ǎ? Mɛ̌ ka klɛ́n afɔ, bɔ xomɛ ma sin mì tawun ǎ?

30 Ényí un ɖó ná gó ɔ, un ná gó ɖó nǔ ɖěɖěe nɔ ɖe gǎnmaɖó ce xlɛ́ lɛ́ é wútu. 31 Mawu e lɛ́ nyí Aklúnɔ Jezu sín Tɔ́, bo lɛ́ nyí Mɛ e è ná kpa susu ná káká sɔ́yi é tuun ɖɔ un kún ɖo adingban ɖó wɛ ó. 32 Hwenu e un ɖo Damási é ɔ, tokpɔngán e ɖo axɔ́sú Aletási glɔ́ é ɖo toxo Damásinu lɛ́ tɔn cɔ́ wɛ bo ná mɔ tɛn dó wlí mì, 33 amɔ̌, è sɔ́ mì dó xasun mɛ, bo sɔ́ mì jɛ te gbɔn dǒ toxo ɔ tɔn sín flɛtɛ́li lɛ́ ɖokpó nu, bɔ un xo gló è.

12 Un ɖó ná gó. Le ɖěbǔ ɖ’é mɛ ǎ. Amɔ̌, un ná gbɛ kan d’é nu, bo ná ɖɔ xó dó nǔmimɔ kpó nǔɖexlɛ́mɛ kpó Aklúnɔ tɔn lɛ́ jí. 2 Un tuun nya e ɖo bǔ xá Klísu é ɖé, bɔ xwe 14 ɖíe ɔ, è sɔ́ ɛ yi jǐnukúnsin atɔngɔ́ ɔ; é to nyí agbaza mɛ wɛ é ɖe oo, alǒ é to ma ɖo agbaza mɛ ǎ ɔ, un tuun ǎ, Mawu wɛ tuun. 3 Ɛɛn, un tuun nya mɔ̌hun ɖé, é to nyí agbaza mɛ wɛ é ɖe oo, alǒ é to ma ɖo agbaza mɛ ǎ ɔ, un tuun ǎ, Mawu wɛ tuun; 4 è sɔ́ ɛ yi palaɖísi mɛ, bɔ é se xó e è ma sixú ɖɔ ǎ, bɔ è ma ka ná gbe gbɛtɔ́ ɖɔ ní ɖɔ ǎ é. 5 Un ná gó ɖó nya mɔ̌hun wú, amɔ̌, un ná gó ɖó nyiɖésúnɔ wú ǎ; gǎnmaɖó ce lɛ́ kɛ́ɖɛ́ wú jɛ́n un ná gó. 6 Ényí un tlɛ jló ná gó ɔ, un ná nyí taɖunɔ ǎ, ɖó nǔgbó wɛ un ná ɖɔ. Amɔ̌, un ná gó ǎ, bónú mɛ ɖěbǔ ní ma wá xɔ susu nú mì zɛ nǔ e un wa é alǒ nǔ e é se ɖo nu ce é sín susu wú ó; 7 é ní ma sín nǔjíwǔ mɔ̌hun e è ɖe xlɛ́ mì lɛ́ é wú kpowun ó.

Bónú un ma wá jɛ go yí jí ó wútu ɔ, è sɔ́ wun ɖé dó lan ce mɛ, bɔ é cí wɛnsagun Satáan tɔn ɖé ɖɔhun; é ná nɔ ɖo tíntɔ́n mì wɛ,* bónú un ma wá húzú goyítɔ́ ó. 8 Azɔn atɔn wɛ un sa vo nú Aklúnɔ dó wun énɛ́ tamɛ ɖɔ é ní gosín lan ce mɛ. 9 Amɔ̌, é ɖɔ nú mì ɖɔ: “Fɛ́nú ce ko kpé we, ɖó hlɔ̌nhlɔ́n ce ɖo bǔte nyí wɛ ɖo gǎnmaɖó towe mɛ.” Énɛ́ wú ɔ, un ná gó ɖó gǎnmaɖó ce lɛ́ wú kpó xomɛhunhun kpó hú gǎn, bónú hlɔ̌nhlɔ́n Klísu tɔn ní dó sixú cyɔ́n mì goxɔ ɖé ɖɔhun. 10 Gǎnmaɖó ce lɛ́, zun e è nɔ zun mì lɛ́ é, hudó mɛ e un nɔ nɔ hweɖélɛ́nu é, yadónúmɛ lɛ́ kpó wǔvɛ́ lɛ́ kpó nɔ dó xomɛhunhun nú mì ɖó Klísu wú. Ðó hwenu e un ma ɖó gǎn ǎ é ɔ, un nɔ mɔ hlɔ̌nhlɔ́n.

11 Un húzú taɖunɔ. Mi wɛ ka zɔ́n, ɖó mi ɖó ná ko kpa mì wɛ. Ðó un hwe hú mɛsɛ́dó nukúnɖéjí enyíi mitɔn lɛ́ ɖo nǔ ɖěbǔ mɛ ǎ, ényí un ma tlɛ nyí nǔtí ǎ ɔ nɛ́. 12 Nǔgbó ɔ, un ɖe wuntun e xlɛ́ ɖɔ un nyí mɛsɛ́dó lɛ́ é xlɛ́ ɖo tɛ́ntin mitɔn kpó didɛ ɖaxó kpó gbɔn wuntun lɛ́, nǔdabaɖa lɛ́ kpó nǔjíwǔ lɛ́ kpó gblamɛ. 13 Ðó ali tɛ́ nu è ma ka jɔ wǔ mi sɔ agun ɖě lɛ́ ǎ ɖe? Agban e un ma húzú nú mi ǎ é jɛ́n é ná nyí. Mi kɛnklɛ́n sɔ́ hwɛ énɛ́ kɛ mì.

14 Éɖíe! Azɔn atɔngɔ́ ɔ ɖíe un ɖo gbesisɔmɛ bo ja gɔ̌n mitɔn è, bɔ un ka ná húzú agban nú mi ǎ. Ðó é nyí nǔɖókan mitɔn lɛ́ ba wɛ un ɖe ǎ, loɔ, miɖésúnɔ ba wɛ un ɖe; ɖó è nɔ ɖó nukún ɖɔ vǐ lɛ́ ní kplé nǔ ɖ’ayǐ nú mɛjitɔ́ yětɔn lɛ́ ǎ, loɔ, mɛjitɔ́ lɛ́ wɛ nɔ kplé nǔ ɖ’ayǐ nú vǐ yětɔn lɛ́. 15 Nyɛ ɔ, kpó xomɛhunhun ɖaxó kpó wɛ un ná zán nǔ e un ɖó lɛ́ é dó ta mitɔn mɛ,* bo ná lɛ́ zán nyiɖée bǐ mlɛ́mlɛ́ dó ta mitɔn mɛ.* Ényí un yí wǎn nú mi sɔmɔ̌ ɔ, wǎn e midɛɛ lɛ́ yí nú mì é ɖó ná hwe hú mɔ̌ wɛ a? 16 Amɔ̌, ɖěbǔ wɛ é ná bo nyí ɔ, un húzú agban nú mi ǎ. É ɖo mɔ̌ có, mi ɖɔ ɖɔ un nyí mɛ bo “hízí,” bo zán “ayi wínníwínní” dó wlí mi. 17 Un ɖu le ɖo jǐ mitɔn gbɔn mɛ e un sɛ́ dó mi lɛ́ é ɖěbǔ gblamɛ ǎ, kabǐ? 18 Un byɔ́ Titu ɖɔ é ní wá mi gɔ́n, bɔ un sɛ́ é kpó nɔví ɖokpó kpó dó. Titu ɖu le ɖo jǐ mitɔn ɖěbǔ ǎ, kabǐ? Linlin ɖokpó ɔ wɛ nɔ xlɛ́ ali mǐ, kabǐ? Bɔ mǐ nɔ wa nǔ gbɔn alɔkpa ɖokpó ɔ, kabǐ?

19 Linlin wɛ mi ka ɖe sín tɛgbɛ ɖɔ hun jɛ dó mǐɖée jí wɛ mǐ ɖe ɖo nukɔn mitɔn a? Mawu nukɔn ɖɔ xó ɖe wɛ mǐ ɖe ɖo bǔ e mǐ ɖe xá Klísu é mɛ. Amɔ̌, mɛ vívɛ́ná ce lɛ́ mi, nǔ e mǐ wa lɛ́ é bǐ ɔ, bo ná dó bló bónú mi ná lí dǒ wú wɛ. 20 Ðó un ɖo xɛsi ɖi wɛ ɖɔ hwenu e un ná wá é ɔ, ɖo ali ɖé nu ɔ, un ná mɔ mi ɖo lěe un jló gbɔn é ǎ, bɔ mi lɔ ná mɔ mì ɖó lěe mi jló gbɔn é ǎ, é nyɔ́ wa ɔ, jlɛɖiɖɔ, wǔhwinhwan, xomɛsin syɛ́nsyɛ́n, gbemanɔkpɔ́, xónyanyaɖɔdómɛwú, nǔ húnhún ɖɔ,* goyíyí kpó nǔhannyahannyawiwa kpó sixú tíin. 21 Bóyá hwenu e un ná lɛ́ wá é ɔ, Mawu ce sixú dó winnyá mì ɖo nukɔn mitɔn, bɔ é sixú byɔ́ ɖɔ má nɔ aluwɛ mɛ dó mɛ ɖěɖěe hu hwɛ ɖ’ayǐ, bɔ nǔ blíblí e yě wa lɛ́ é, aga e yě lɛ é* kpó wunhínhɔ́nnú* e yě wa lɛ́ é kpó ma vɛ́ ná* ǎ é gěgé tamɛ.

13 Azɔn atɔngɔ́ ɔ ɖíe un ja gɔ̌n mitɔn è. “È ɖó ná kú dó nǔ lɛ́ bǐ jí, ɖó kúnnuɖiɖe mɛ we alǒ mɛ atɔn tɔn wú.” 2 Un ɖo fínɛ́ din ǎ có, é cí ɖɔ un ɖo fínɛ́ azɔn wegɔ́ ɔ wɛ ɖɔhun, bɔ un ɖo akpá gba nú mɛ ɖěɖěe hu hwɛ ɖ’ayǐ lɛ́ é kpó mɛ e kpo lɛ́ é bǐ kpó wɛ jɛ nukɔn ɖɔ ényí un lɛ́ kɔ wá gbeɖé ɔ, un kún ná kpɔ́n bo ɖɔ xá yě mɛ ɖěbǔ ó, 3 ɖó mi ɖo kúnnuɖenú e xlɛ́ ɖɔ Klísu ɖo xó ɖɔ wɛ gbɔn jǐ ce nǔgbó nǔgbó é ba wɛ wútu. Éyɛ́ ka vɔ́ da ɖo tɛ́ntin mitɔn ǎ, é nyɔ́ wa ɔ, é ɖe hlɔ̌nhlɔ́n tɔn xlɛ́. 4 Ðó nǔgbó ɔ, è xwe è nyi atín wú, ɖó gǎnmaɖó tɔn wú, amɔ̌, é ɖo gbɛ, ɖó hlɔ̌nhlɔ́n Mawu tɔn wútu. Nǔgbó ɔ, mǐ lɔ ɖó gǎn ǎ éɖɔhun, amɔ̌, mǐ ná nɔ gbɛ xá ɛ, ɖó hlɔ̌nhlɔ́n Mawu tɔn e ɖo mi mɛ é wútu.

5 Mi ní nɔ ɖo kpínkpɔ́n wɛ ɖɔ émí ka ɖo nǔɖiɖi ɔ mɛ a jí; mi ní nɔ ɖo nǔ e miɖésúnɔ nyí é gbéjé kpɔ́n wɛ. Alǒ mi mɔ nǔ jɛ wú ɖɔ Jezu Klísu ɖo bǔ xá mi ǎ cé? Afi nú nǔ mitɔn ma nyɔ́ Mawu nukúnmɛ ǎ ɔ nɛ́. 6 Un ɖo nukún ɖó wɛ nǔgbó nǔgbó ɖɔ mi ná mɔ nǔ jɛ wú ɖɔ nǔ mǐtɔn nyɔ́ Mawu nukúnmɛ.

7 Din ɔ, mǐ ɖo ɖɛ xo sɛ́dó Mawu wɛ bónú mi ní ma wa nǔ nyanya ɖěbǔ ó, é nyí bónú mǐ ná cí mɛ e sín nǔ nyɔ́ Mawu nukúnmɛ lɛ́ é ɖɔhun wútu wɛ ǎ, loɔ, bónú mi ní dó sixú wa nǔ ɖagbe wútu wɛ, ényí é ná bo tlɛ cí ɖɔ nǔ mǐtɔn kún nyɔ́ Mawu nukúnmɛ ó ɖɔhun ɔ nɛ́. 8 Ðó mǐ sixú wa nǔ ɖěbǔ b’ɛ ná glɔ́n ali nú nǔgbó ɔ ǎ, loɔ, nǔ e ná nɔ gǔdo nú nǔgbó ɔ é kɛ́ɖɛ́ wɛ mǐ ná wa. 9 É ɖo wɛn ɖɔ xomɛ nɔ hun mǐ hweɖébǔnu e mǐ ma ɖó gǎn ǎ, bɔ midɛɛ lɛ́ ɖó hlɔ̌nhlɔ́n é. Bɔ ɖɛ e mǐ nɔ xo é wɛ nyí ɖɔ mi ní jlá miɖée ɖó. 10 Nǔ e wú un wlán nǔ énɛ́ lɛ́ sɛ́dó mi hwenu e un ma ɖo gɔ̌n mitɔn ǎ é nɛ́, bónú hwenu e un ná ɖo gɔ̌n mitɔn é ɔ, é ná byɔ́ ɖɔ má zán acɛ e Aklúnɔ ná mì é kpó hunnylánylá kpó ǎ; un ná zán bo ná dó bló bónú è ná lí dǒ, é nyí bo ná dó zin mɛ dɛ́ ǎ.

11 Bo ná dó fó ɔ, nɔví lɛ́, mi ní nɔ ɖo awǎ jɛ wɛ, mi ní nɔ ɖo miɖée jlá ɖó wɛ, mi ní yí gbe bónú è ní nɔ ɖo gbɔ dó nú mi wɛ, mi ní nɔ ɖó linlin ɖokpó ɔ, mi ní nɔ nɔ fífá mɛ; énɛ́ ɔ, Mawu wǎnyíyínɔ e lɛ́ nyí fífánɔ é ná nɔ kpɔ́ xá mi. 12 Mi kí nɔví nɔví sín si nú miɖée lɛ́, dó dó gbe miɖée lɛ́. 13 Mɛ mímɛ́ lɛ́ bǐ dó gbe sɛ́dó mi.

14 Fɛ́nú Aklúnɔ Jezu Klísu tɔn kpó wǎnyíyí Mawu tɔn kpó, kpódó gbigbɔ mímɛ́ e sín le ɖu wɛ mi ɖe é kpán ní nɔ kpɔ́ xá mi bǐ.