WĚMA E È WLÁN SƐ́DÓ GALÁTINU LƐ́ É

1 Nyɛ Pɔ́lu, éé nyí mɛsɛ́dó ɖé é wɛ ɖo wěma wlán sɛ́dó mi wɛ. Gbɛtɔ́ lɛ́ wɛ sɔ́ mì mɛsɛ́dó ǎ; è ka lɛ́ sɔ́ mì gbɔn gbɛtɔ́ ɖé jí ǎ. Amɔ̌, Jezu Klísu kpó Mawu Tɔ́ ɔ, éé fɔ́n ɛ sín kú é kpó wɛ sɔ́ mì. 2 Ɛɛn, nyɛ Pɔ́lu kpó nɔví e ɖo kpɔ́ xá mì lɛ́ é bǐ kpó wɛ ɖo wěma wlán sɛ́dó agun e ɖo Galáti lɛ́ é wɛ.

3 Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi. 4 Sɔgbe kpó jlǒ Mawu mǐtɔn e lɛ́ nyí Tɔ́ mǐtɔn é tɔn kpó ɔ, é sɔ́ éɖée jó dó hwɛ mǐtɔn lɛ́ tamɛ, bo ná dó sixú hwlɛ́n mǐ sín gbɛ* nyanya élɔ́ mɛ. 5 Susu ní nyí Mawu tɔn káká sɔ́yi mavɔmavɔ. Amǐ.

6 É kpácá mì ɖɔ mi yá wǔ jɛ kɔ lɛ́ sín mɛ e ylɔ́ mi gbɔn fɛ́nú Klísu tɔn gblamɛ é gúdo jí,* bo jɛ gbe yí nú wɛn ɖagbe alɔkpa ɖěvo jí. 7 É nyí ɖɔ wɛn ɖagbe ɖěvo lɛ́vɔ́ tíin wɛ ǎ; amɔ̌, mɛɖé lɛ́ tíin bo ɖo mi dɔn bú wɛ, lobo lɛ́ ɖo biba ná sló kɔ nú wɛn ɖagbe e kunkplá Klísu é wɛ. 8 É ɖo mɔ̌ có, nú é tlɛ nyí mǐ mɛ ɖě alǒ wɛnsagun ɖé wɛ gosín jǐxwé bo jlá wɛn ɖagbe ɖé mi, b’ɛ gbɔn vo nú wɛn ɖagbe e mǐ jlá mi é hǔn, è ní dónu i. 9 Lěe mǐ ko ɖɔ gbɔn nú mi wá yi é ɔ, un lɛ́ ɖo ɖiɖɔ nú mi wɛ din ɖɔ: mɛ ɖěbǔ e ɖo wɛn ɖagbe ɖé jlá mi wɛ b’ɛ gbɔn vo nú nǔ e mi ko yí gbe ná é ɔ, è ní dónu i.

10 Nǔgbó ɔ, tíntɛ́nkpɔ́n wɛ un ɖe bónú nǔ ce ná nyɔ́ gbɛtɔ́ lɛ́ nukúnmɛ a, alǒ Mawu nukúnmɛ? Alǒ tíntɛ́nkpɔ́n wɛ un ɖe bo ná hɛn xomɛ gbɛtɔ́ lɛ́ tɔn hun a? Ényí un kpo ɖo xomɛ gbɛtɔ́ lɛ́ tɔn hɛn hun wɛ ɔ, un sɔ́ ná nyí kannumɔ Klísu tɔn ǎ. 11 Nɔví lɛ́ mi, un jló ɖɔ mi ní tuun ɖɔ wɛn ɖagbe e un jlá mi é kún gosín gbɛtɔ́ lɛ́ gɔ́n ó; 12 ɖó, gbɛtɔ́ wɛ dó wɛn énɛ́ mì ǎ, mɔ̌ jɛ́n é ma ka lɛ́ nyí ɖɔ kplɔ́n wɛ è kplɔ́n wɛn énɛ́ mì ǎ é nɛ́, loɔ, Jezu Klísu wɛ ɖe xlɛ́ mì.

13 Nǔgbó ɔ, mi se lěe un wa nǔ gbɔn ɖ’ayǐ ɖo Jwifu lɛ́ sín sinsɛn mɛ é, é wɛ nyí ɖɔ un nɔ dó ya nú agun Mawu tɔn ɔ syɛ́nsyɛ́n,* bo nɔ tɛ́n kpɔ́n bá sú kún tɔn dó. 14 Gɔ́ ná ɔ, un ɖo nukɔnyiyi ɖó wɛ tawun ɖo Jwifu lɛ́ sín sinsɛn mɛ hú gǎn gbɛ̌ ce jí e ɖo akɔta ce mɛ lɛ́ é gěgé. Ðó akpakpa nɔ sɔ́ mì tawun dó hwɛndomɛnú tɔ́ ce lɛ́ tɔn lɛ́ wú hú gǎn yě. 15 Amɔ̌, hwenu e Mawu e ɖe mì sín nɔ ce xomɛ, bo ylɔ́ mì gbɔn fɛ́nú tɔn gblamɛ é mɔ ɖɔ é nyɔ́ 16 ɖɔ émí ní ɖe Vǐ émítɔn xlɛ́ gbɔn jǐ ce, bónú má dó sixú jlá wɛn ɖagbe e kunkplá ɛ é akɔta lɛ́ é ɔ, un yi ba wěɖexámɛ ɖo gbɛtɔ́* ɖěbǔ gɔ́n hwenɛ́nu tlóló ǎ. 17 Un ka lɛ́ yi mɛ ɖěɖěe ko nyí mɛsɛ́dó jɛ nukɔn nú mì lɛ́ é gɔ́n ɖo Jeluzalɛ́mu ǎ. Loɔ un yi Alabíi, bɔ énɛ́ gúdo ɔ, un lɛ́ kɔ yi Damási.

18 Bɔ ɖo xwe atɔn gúdo ɔ, un wá yi Jeluzalɛ́mu bo yi ba Sefási* kpɔ́n, lobo nɔ gɔ̌n tɔn nú azǎn 15. 19 Amɔ̌, un mɔ mɛsɛ́dó ɖě lɛ́ ɖěbǔ ǎ. Jaki, Aklúnɔ sín nɔví ɔ kɛ́ɖɛ́ jɛ́n un mɔ. 20 Din ɔ, un ɖo gǎnjɛwú ná mi wɛ ɖo Mawu nukɔn dó nǔ e wlán sɛ́dó mi wɛ un ɖe lɛ́ é wú ɖɔ un kún ɖo adingban ɖó wɛ ó.

21 Énɛ́ gúdo ɔ, un yi Silíi kpó Silisíi kpó sín xá lɛ́ mɛ. 22 Amɔ̌, agun e ɖo Judée bo ɖo bǔ xá Klísu lɛ́ é mɔ mì kpɔ́n ǎ. 23 Nǔ e yě nɔ se kpowun é ɖíe: “Nya e ko dó ya nú mǐ ɖ’ayǐ é ɖo nǔɖiɖi e é ko tɛ́n kpɔ́n bá sú kún dó ná é sín wɛn ɖagbe jlá wɛ din.” 24 Énɛ́ wú ɔ, yě jɛ susu kpa nú Mawu jí, ɖó nyɛ wú.

2 Ðo xwe 14 gúdo ɔ, un lɛ́vɔ́ yi Jeluzalɛ́mu, nyi kpó Baanabási kpó; un lɛ́ kplá Titu dó nyiɖée jí hwe ɔ nu. 2 Nǔɖexlɛ́mɛ ɖé gúdo wɛ un yi dɔ̌n, bɔ un xwlé wɛn ɖagbe e jlá akɔta ɖě lɛ́ wɛ un ɖe é nɔví lɛ́. Un wa mɔ̌ ɖo nǔglɔ́; amɔ̌, mɛ e è nɔ ɖó sísí ná tawun lɛ́ é nukɔn wɛ un wa mɔ̌ ɖe, bo ná dó ɖó gǎnjɛwú ɖɔ un kún ɖo wezun kán wɛ dó wǔvɔ́ ó, alǒ un kún kán wezun dó wǔvɔ́ ó. 3 Titu e kpó nyi kpó zɔn é tlɛ nyí Glɛ̌kinu có, mɛ ɖěbǔ ka ɖɔ ɖɔ é ɖó ná gbo ada dandan ǎ. 4 Amɔ̌, xó énɛ́ fɔ́n, ɖó nɔví-nyíjɛtɔ́ e lun byɔ́ agun ɔ mɛ lɛ́ é wútu. Yě lun byɔ́ agun ɔ mɛ amɛ̌ lɛ́ ɖɔhun, bo ná dó hɛn nǔ gblé dó mɛɖésúsíninɔ e sín vǐví mǐ nɔ ɖu, ɖo bǔ e mǐ ɖe xá Klísu Jezu é mɛ é wú, lobo ná dó sixú sɔ́ mǐ dó ɖó kannumɔ bǐ mlɛ́mlɛ́. 5 Mǐ lɔn bɔ yě ɖu ɖo mǐ jí ǎ, éǒ, cɛ́nnyícɛ́nnyí ɖé* lɔ ǎ, bónú mi ná dó sixú kpo ɖo nǔgbó wɛn ɖagbe ɔ tɔn zunfán wɛ gbánwúngbánwún.

6 Amɔ̌, yě mɛ énɛ́ lɛ́ e cí mɛ nukúnɖéjí lɛ́ ɖɔhun, bɔ è nɔ ɖó sísí ná tawun lɛ́ é ɔ, yě byɔ́ mì ɖɔ nyi ní wa nǔ yɔ̌yɔ́ ɖěvo ɖěbǔ ǎ. Ɛɛn, mɛ alɔkpa ɖěbǔ wɛ yě ná bo nyí ɖ’ayǐ ɔ, énɛ́ ɖo tají nú mì ǎ, ɖó é nyí nǔ e mɛɖé nyí ɖo wěxo é wɛ Mawu nɔ kpɔ́n ǎ. 7 Amɔ̌, yě mɔ ɖɔ è sɔ́ wɛn ɖagbe ɔ jíjlá mɛ e ma gbo ada ǎ lɛ́ é sín azɔ̌ d’así nú mì, lěe è zɔ́n Piyɛ́ɛ ɖɔ é ní jlá mɛ e gbo ada lɛ́ é gbɔn é ɖɔhun. 8 Ðó mɛ e ná nǔwúkpíkpé Piyɛ́ɛ bónú é ná wa mɛsɛ́dózɔ́ nú mɛ e gbo ada lɛ́ é jɛ́n lɛ́ ná nǔwúkpíkpé nyi lɔ, bónú má wa mɛsɛ́dózɔ́ nú mɛ e ɖo akɔta ɖě lɛ́ mɛ lɛ́ é. 9 Bɔ ée yě mɔ nǔ jɛ fɛ́nú e Mawu ná mì é wú é ɔ, Jaki, Sefási* kpó Jaan kpó, éé è nɔ kpɔ́n dó mɔ dotín agun ɔ tɔn lɛ́ é ná alɔ ɖisí nyi kpó Baanabási kpó, dó ɖe xlɛ́ ɖɔ mǐ kpó yě kpó ɖo nǔ ɖokpó ɔ lɛ́ gbé nya wɛ,* bónú mǐdɛɛ lɛ́ ná yi akɔta ɖě lɛ́ gɔ́n, lobɔ yědɛɛ lɛ́ ná yi mɛ e gbo ada lɛ́ é gɔ́n. 10 Nǔ ɖokpó e yě byɔ́ mǐ é wɛ nyí ɖɔ wamamɔnɔ lɛ́ sín nǔ ní ɖu ayi mɛ nú mǐ, bɔ nǔ e nyi lɔ dó gǎn syɛ́nsyɛ́n bo wa é nɛ́.

11 É ɖo mɔ̌ có, hwenu e Sefási* wá Antyɔ́ci é ɔ, un gbɛ́ nǔ n’i* tlɔlɔ, ɖó é ɖo wɛn ɖɔ é wa nǔ nyi do.* 12 Ðó cóbónú mɛ e gosín Jaki gɔ́n lɛ́ é ná wá ɔ, é ko ɖó walɔ bo nɔ ɖu nǔ xá mɛ e ɖo akɔta ɖě lɛ́ mɛ lɛ́ é. Amɔ̌, hwenu e yě wá é ɔ, é ɖó mɔ̌ wiwa te bo jɛ zɔ nú yě, ɖó é ɖo xɛsi ɖi nú mɛ e nɔ jɛ hun dó adagbigbo jí lɛ́ é wɛ. 13 Jwifu e kpo lɛ́ é lɔ xo kpóɖó n’i ɖo yɛmɛnúwiwa énɛ́ mɛ, káká bɔ énɛ́ tlɛ wa nǔ dó Baanabási wú, bɔ é lɔ gɔ́ nú yě ɖo yɛmɛnúwiwa yětɔn mɛ. 14 Amɔ̌, hwenu e un mɔ ɖɔ yě kún ɖo nǔ wa sɔgbe xá nǔgbó wɛn ɖagbe ɔ tɔn wɛ ó é ɔ, un ɖɔ nú Sefási* ɖo yě bǐ nukúnmɛ ɖɔ: “Ényí hwɛ mɛ e nyí Jwifu é ɖo gbɛ zán wɛ akɔta ɖě lɛ́ ɖɔhun, bɔ é ma nyí Jwifu lɛ́ ɖɔhun ǎ ɔ, nɛ̌ a ka sixú byɔ́ mɛ ɖěɖěe ɖo akɔta ɖě lɛ́ mɛ lɛ́ é ɖɔ yě ní nɔ zán gbɛ sɔgbe xá walɔ Jwifu lɛ́ tɔn dandan gbɔn?”

15 Mǐ mɛ ɖěɖěe nyí Jwifu jiji, bo ma nyí hwɛhutɔ́ e gosín akɔta ɖě lɛ́ mɛ lɛ́ é ǎ é ɔ, 16 mǐ mɔ nǔ jɛ wú ɖɔ é kún nyí Sɛ́n ɔ e mɛɖé nɔ nyi é wɛ nɔ zɔ́n bɔ è nɔ ɖɔ ɖɔ é nyí nǔjlɔ́jlɔ́watɔ́ ó, loɔ, nǔɖiɖi e é ɖó nú Jezu Klísu é kɛ́ɖɛ́ wɛ nɔ zɔ́n. Énɛ́ wú ɔ, mǐ ɖi nǔ nú Klísu Jezu bónú è ná dó sixú ɖɔ ɖɔ mǐ nyí nǔjlɔ́jlɔ́watɔ́, ɖó nǔ e mǐ ɖi nú Klísu é wú, é nyí ɖó Sɛ́n ɔ e mǐ nɔ nyi é wú ǎ. Nǔgbó ɔ, è ná ɖɔ ɖɔ mɛ* ɖěbǔ nyí nǔjlɔ́jlɔ́watɔ́, ɖó é nɔ nyi Sɛ́n ɔ wútu ǎ. 17 Din ɔ, ényí hwenu e mǐ ɖo biba wɛ ɖɔ gbɔn Klísu gblamɛ ɔ, è ní ɖɔ ɖɔ mǐ nyí nǔjlɔ́jlɔ́watɔ́ é ɔ, è lɛ́ mɔ hwe ɖokpó ɔ nu ɖɔ mǐ nyí hwɛhutɔ́ ɔ, xlɛ́xlɛ́ wɛ énɛ́ ɖe ɖɔ Klísu nɔ dó wǔsyɛ́n lanmɛ nú mǐ ɖɔ mǐ ní hu hwɛ a? Ðěbǔ ǎ! 18 Ényí un lɛ́vɔ́ gbá nǔ ɖěɖěe nyiɖésú ko gba hánnyá lɛ́ é ɔ, xlɛ́xlɛ́ wɛ un ɖe ɖɔ un nyí sɛ́ngbatɔ́ nɛ́. 19 Ðó ɖo Sɛ́n ɔ linu ɔ, un kú gbɔn Sɛ́n ɔ xwixwedó gblamɛ, bo ná dó sixú nɔ gbɛ bo sɛn Mawu. 20 È xwe mì dó atín ɔ wú xá Klísu. É sɔ́ nyí nyɛ wɛ ɖo gbɛ ǎ, loɔ, Klísu wɛ ɖo gbɛ bo ɖo bǔ xá mì. Nǔgbó ɔ, gbɛ e zán wɛ un ɖe din ɖo agbaza mɛ é ɔ, un ɖo zǐnzán wɛ sɔgbe xá nǔɖiɖi e un ɖó nú Vǐ Mawu tɔn e yí wǎn nú mì, bo sɔ́ éɖée jó dó ta ce mɛ é. 21 Un gbɛ́ fɛ́nú Mawu tɔn ǎ,* ɖó ényí Sɛ́n ɔ xwixwedó wɛ nɔ zɔ́n bɔ è nɔ nyí nǔjlɔ́jlɔ́watɔ́ hǔn, Klísu kú dó wǔvɔ́ nɛ́.

3 Galátinu xlonɔ è mi! Midɛɛ lɛ́ e è ko tínmɛ ná nyi wɛn ɖɔ è xwe Klísu nyi atín wú é ɔ, mɛ̌ ka hɛn ayi dó blɛ́ mi? 2 Nǔ ɖokpó e un jló ná kanbyɔ́ mi é* ɖíe: Sɛ́n ɔ xwixwedó wɛ zɔ́n bɔ è ná mi gbigbɔ mímɛ́ ɔ a? Alǒ nǔɖiɖi ɖíɖó nú nǔ e mi se é wɛ zɔ́n? 3 Mi jɔ xlo sɔmɔ̌ wɛ a? Ðo bǐbɛ́mɛ ɔ, mi zán gbɛ sɔgbe xá gbigbɔ Mawu tɔn, bɔ din ɔ, jlǒ agbaza tɔn lɛ́ sɔ́ dó wa mɔ̌ ná yi fó wɛ mi ɖe a? 4 Mi se wǔvɛ́ tobutóbú énɛ́ lɛ́ dó wǔvɔ́ wɛ a? Un kú d’é jí ɖɔ é kún nyí dó wǔvɔ́ ó. 5 Hǔn, mɛ e nɔ ná mi gbigbɔ mímɛ́, bo nɔ lɛ́ bló nǔjíwǔ lɛ́ ɖo tɛ́ntin mitɔn é ɔ, Sɛ́n ɔ e mi nɔ xwedó é wɛ zɔ́n bɔ é nɔ wa mɔ̌ a? Abǐ nǔɖiɖi e mi ɖó nú nǔ e mi se é wɛ zɔ́n? 6 Lěe é nyí gbɔn nú Ablaxámu é wɛ: é “ɖi nǔ nú Jexóva,* bɔ è kpɔ́n ɛ dó mɔ nǔjlɔ́jlɔ́watɔ́.”

7 Mi tuun ganjí ɖɔ mɛ e ɖó nǔɖiɖi lɛ́ é wɛ nyí vǐ Ablaxámu tɔn lɛ́. 8 É ko lín din bɔ Mawu ɖɔ ɖo Nǔwlánwlán mímɛ́ lɛ́ mɛ ɖɔ émí ná kpɔ́n mɛ e ɖo akɔta ɖě lɛ́ mɛ lɛ́ é dó mɔ nǔjlɔ́jlɔ́watɔ́, ɖó nǔɖiɖi yětɔn wú. É jlá wɛn ɖagbe ɔ Ablaxámu dó nukɔn, bo ɖɔ: “Akɔta lɛ́ bǐ ná mɔ nyɔ̌ná gbɔn jǐ towe.” 9 Énɛ́ wú ɔ, è ɖo nyɔ̌ná kɔn dó mɛ ɖěɖěe ɖó nǔɖiɖi lɛ́ é jí wɛ, lěe è kɔn nyɔ̌ná dó Ablaxámu e ɖi nǔ é jí gbɔn é.

10 Mɛ ɖěɖěe nɔ gán jɛ Sɛ́n ɔ xwixwedó wú lɛ́ é bǐ ɔ, nu wɛ è dó yě, ɖó è wlán ɖɔ: “Mɛ ɖěbǔ e ma nɔ tɛ́ dó nǔ e è wlán dó wěma mlámlá Sɛ́n ɔ tɔn mɛ lɛ́ é bǐ wú bo nɔ xwedó ǎ é ɔ, nu wɛ è dó è.” 11 Gɔ́ ná ɔ, é ɖo wɛn ɖɔ Mawu kún nɔ ɖɔ ɖɔ mɛɖé nyí nǔjlɔ́jlɔ́watɔ́, ɖó é ɖo Sɛ́n ɔ nyi wɛ wú ó, ɖó “nǔjlɔ́jlɔ́watɔ́ ná nɔ gbɛ ɖó nǔ e é ɖi é wútu.” 12 Sɛ́n ɔ jínjɔ́n nǔɖiɖi jí ǎ. É nyɔ́ wa ɔ, “mɛ ɖěbǔ e ná wa nǔ énɛ́ lɛ́ é ná nɔ gbɛ gbɔn gbla yětɔn mɛ.” 13 Klísu yí gbe nú nudómɛ ɔ ɖó tɛn mǐtɔn mɛ, bɔ mɔ̌ mɛ ɔ, é xɔ mǐ bo tún kan nú mǐ sín nudómɛ Sɛ́n ɔ tɔn sí, ɖó è ko wlán ɖɔ: “Mɛ ɖěbǔ e è xwe nyi atín wú é ɔ, nu wɛ è dó è.” 14 Nǔ nyí mɔ̌, bónú akɔta lɛ́ ná mɔ nyɔ̌ná e sín akpá è dó nú Ablaxámu é, gbɔn Klísu Jezu gblamɛ, lobonú mǐ ná dó sixú mɔ gbigbɔ e sín akpá è dó é yí, gbɔn nǔɖiɖi mǐtɔn gblamɛ.

15 Nɔví lɛ́ mi, nǔ e nɔ jɛ ayǐvɔ̌gbe é sín nǔjlɛ́dónǔwú ɖé zán dó ɖɔ xó nú mi wɛ un ɖe: Ényí è dó zǒgbe akɔjijɛ ɖé jí gúdo ɔ, nú é ná bo tlɛ nyí gbɛtɔ́ wɛ dó zǒgbe jí ɔ, mɛ ɖěbǔ sɔ́ nɔ dɔn nǔ gbɔn jí alǒ gɔ́ nǔ ɖěvo lɛ́ ná ǎ. 16 Din ɔ, Ablaxámu kpó kúnkan* tɔn kpó wɛ è dó akpá lɛ́ ná. È ɖɔ: “Kpó kúnkan towe lɛ́ kpó,” dó ɖe xlɛ́ ɖɔ mɛ gěgé wɛ ǎ. É nyɔ́ wa ɔ, è ɖɔ: “Kpó kúnkan towe kpó,” dó ɖe xlɛ́ ɖɔ mɛ ɖokpó wɛ, é wɛ nyí Klísu. 17 Gɔ́ ná ɔ, un ɖo ɖiɖɔ wɛ ɖɔ: Sɛ́n ɔ, ée è ná ɖo xwe 430 gúdo é gba akɔ e Mawu jɛ wá yi é, bo dɔn nǔ gbɔn akpá e é dó é jí ǎ. 18 Ðó ényí Sɛ́n ɔ wɛ è ná xwedó cóbó ná ɖu gǔ ɔ hǔn, é sɔ́ nyí akpá tɔn wɛ è dó ǎ nɛ́. Amɔ̌ Mawu ɔ, ɖo xomɛnyínyɔ́ tɔn mɛ ɔ, é ná gǔ énɛ́ Ablaxámu, gbɔn akpá ɖé dídó gblamɛ.

19 Étɛ́ ka dɔn Sɛ́n ɔ xó wá lo? È gɔ́ Sɛ́n ɔ ná, bo ná dó ɖe nǔwanyido lɛ́ xlɛ́, káká jɛ hwenu e kúnkan* e è dó akpá ɔ ná é ná wá dó é. Mawu zán wɛnsagun lɛ́ dó ná Sɛ́n ɔ, gbɔn hwɛdógbɔtɔ́ ɖé jí. 20 Din ɔ, ényí mɛ ɖokpó wɛ akɔjijɛ ɖé kan ɔ, hwɛdógbɔtɔ́ ɖě nɔ tíin ǎ. Amɔ̌, Mawu wa nǔ mɛ ɖokpó géé ɖɔhun. 21 Énɛ́ wú ɔ, Sɛ́n ɔ sɔ́ ta akpá Mawu tɔn lɛ́ wɛ a? Ðěbǔ lɔ ǎ! Ðó ényí è ko ná sɛ́n ɖé bɔ é sixú ná gbɛ mɛ wɛ ɔ, sɛ́n ɔ sixú ko zɔ́n bɔ nǔjlɔ́jlɔ́wiwa ná tíin. 22 Amɔ̌, Nǔwlánwlán mímɛ́ lɛ́ sɔ́ nǔ lɛ́ bǐ ɖó hwɛhuhu sín acɛ glɔ́, bónú nyɔ̌ná e sín akpá è dó, b’ɛ nɔ tɔ́n sín nǔɖiɖi ɖíɖó nú Jezu Klísu mɛ é ɔ, è ní dó sixú kɔn dó mɛ ɖěɖěe ɖi nǔ lɛ́ é jí.

23 É ɖo mɔ̌ có, cóbónú nǔɖiɖi ná wá ɔ, Sɛ́n ɔ cyɔ́n alɔ mǐ jí, bɔ mǐ ɖo acɛ tɔn glɔ́, lobo ɖo nukún ɖó nǔɖiɖi e ɖe xlɛ́ gbé è ko ja é wɛ. 24 Énɛ́ wú ɔ, Sɛ́n ɔ húzú alɔcyɔ́nmɛjítɔ́* mǐtɔn bo kplá mǐ wá Klísu gɔ́n, bónú è ná dó sixú ɖɔ ɖɔ mǐ nyí nǔjlɔ́jlɔ́watɔ́ gbɔn nǔɖiɖi gblamɛ. 25 Amɔ̌, din e nǔɖiɖi wá é ɔ, mǐ sɔ́ ɖo alɔcyɔ́nmɛjítɔ́* ɖé glɔ́ ǎ.

26 Nǔgbó ɔ, mi mɛ bǐ wɛ nyí vǐ Mawu tɔn lɛ́, gbɔn nǔɖiɖi e mi ɖó nú Klísu Jezu é gblamɛ. 27 Ðó mi mɛ e bló batɛ́mu bo ɖo bǔ xá Klísu din lɛ́ é bǐ ko sɔ́ Klísu dó. 28 Jwifu ɖo vo nú Glɛ̌kinu ǎ, kannumɔ ɖo vo nú mɛ e ɖo éɖée sí é ǎ, súnnu ɖo vo nú nyɔ̌nu ǎ, ɖó mi mɛ bǐ wɛ nyí ɖokpó bo ɖo bǔ xá Klísu Jezu. 29 Gɔ́ ná ɔ, ényí mi ɖo bǔ xá Klísu hǔn, kúnkan* Ablaxámu tɔn wɛ mi nyí nǔgbó, bɔ mi sixú ɖu gǔ e sín akpá è dó nú Ablaxámu é.

4 Din ɔ, un ɖo ɖiɖɔ wɛ ɖɔ ényí gǔɖutɔ́ ɔ kpo ɖo vǔ jɛ́n wɛ ɔ, é gbɔn vo nú kannumɔ ǎ, ényí é ná bo tlɛ nyí aklúnɔ nú nǔ lɛ́ bǐ ɔ nɛ́. 2 Ðó é nɔ nɔ acɛ nukúnkpénǔwútɔ́ lɛ́ kpó nǔjíkpɔ́ntɔ́ lɛ́ kpó tɔn glɔ́, káká jɛ hwenu e tɔ́ tɔn ɖó dó é. 3 Mɔ̌ ɖokpó ɔ, hwenu e mǐ lɔ ɖo vǔ é ɔ, mǐ nyí kannumɔ nú nǔ yǎyá gbɛ ɔ tɔn lɛ́. 4 Amɔ̌, ée hwenu e Mawu ɖó dó é wá su é ɔ, é sɛ́ Vǐ tɔn dó, bɔ nyɔ̌nu ɖé ji i, lobɔ é lɛ́ nɔ Sɛ́n ɔ glɔ́, 5 bo ná dó sixú sú axɔ́ e ná tún kan nú mɛ ɖěɖěe ɖo Sɛ́n ɔ glɔ́ lɛ́ é, bónú Mawu ní dó sixú sɔ́ mǐ dó ɖó vǐ.

6 Din ɔ, ɖó mi nyí vǐ wútu ɔ, Mawu sɛ́ gbigbɔ Vǐ tɔn tɔn dó ayi mǐtɔn lɛ́ mɛ, bɔ é nɔ sú xó ɖɔ: “Abba,* Tɔ́!” 7 Énɛ́ wú ɔ, a sɔ́ nyí kannumɔ ǎ, loɔ, vǐ wɛ a nyí, bɔ ényí a nyí vǐ hǔn, a lɛ́ nyí gǔɖutɔ́, gbɔn Mawu gblamɛ.

8 É ɖo mɔ̌ có, hwenu e mi ma ko tuun Mawu ǎ é ɔ, mi nyí kannumɔ nú mawu ɖěɖěe ma nyí Mawu nǔgbó ǎ lɛ́ é. 9 Amɔ̌, din e mi ko tuun Mawu é ɔ, alǒ nú è ná ɖɔ ɔ, din e Mawu ko tuun mi é ɔ, nɛ̌ ka lɛ́ gbɔn bɔ mi ɖo kɔ lɛ́ yi nǔ yǎyá e ma ɖó gǎn ǎ, bo ma lɛ́ nyí nǔɖéwanú ǎ lɛ́ é kɔn wɛ, lobo lɛ́ ɖo biba wɛ bo ná lɛ́vɔ́ nyí kannumɔ nú yě? 10 Mi nɔ ɖó kɛ́n azǎn ɖé lɛ́, sun ɖé lɛ́, hwenu ɖé lɛ́ kpó xwe ɖé lɛ́ kpó jí ganjí, bo nɔ sɔ́ yě dó ɖó nǔ bǔnɔ. 11 Un ɖo xɛsi ɖi wɛ ɖɔ gǎn e un dó dó ta mitɔn mɛ lɛ́ é táá nyí dó wǔvɔ́.

12 Nɔví lɛ́ mi, un ɖo vo sa nú mi wɛ ɖɔ mi ní cí nyɛɖɔhun, ɖó nyɛ ɖésú ko cí miɖɔhun ɖ’ayǐ. Mi wa nǔɖé nyi do nú mì ǎ. 13 Amɔ̌, mi tuun ɖɔ azɔn ɖé wɛ un jɛ, bɔ é hun ali nú mì bɔ un jlá wɛn ɖagbe ɔ mi azɔn nukɔntɔn ɔ. 14 Nǔgbó wɛ ɖɔ azɔn e jɛ wɛ un ɖe é ɖó wǔvɛ́ nú mi có, mi gbɛ́ wǎn nú mì alǒ kpɔ́n mì dó mɔ nǔgbɛ́hɛn* ǎ. Loɔ, mi yí mì wɛnsagun Mawu tɔn ɖɔhun, bo yí mì Klísu Jezu ɖɔhun. 15 Fítɛ́ awǎjijɛ énɛ́ e mi ɖó é ka ɖe? Ðó un kú d’é jí ɖɔ ényí é ko nyɔ́ bló wɛ ɔ, mi ná ko ɖe nukún mitɔn lɛ́ bo ná mì. 16 Bɔ din ɔ, nǔgbó e un ɖɔ nú mi é wɛ zɔ́n bɔ un húzú kɛntɔ́ mitɔn a? 17 Mɛ énɛ́ lɛ́ ɖo nǔ e wú yě kpé é bǐ wa wɛ bo ná dɔn mi dó ahwan yětɔn mɛ. Amɔ̌, é ka nyí ɖó linlin ɖagbe wú ǎ. Yě ba bo ná sɛ mi dó zɔ nú mì, bónú mi ná dó sixú ɖó jlǒ syɛ́nsyɛ́n bá xwedó yě. 18 É nylá ɖɔ mɛɖé ní wa nǔ e wú é kpé lɛ́ é bǐ bo ná dó dɔn mi ǎ, nú é vɛ́ ko nyí ɖó linlin ɖagbe wú ɔ nɛ́. Bɔ nǔ ka ɖó ná nɔ nyí mɔ̌ hwenu e un ɖo kpɔ́ xá mi é kɛ́ɖɛ́ ǎ. 19 Vǐ ce vívɛ́ná lɛ́ mi, un lɛ́ ɖo wǔvɛ́ se wɛ ɖó mi wú, bɔ wǔvɛ́ énɛ́ cí nyɔ̌nu e ɖo ajidonu é tɔn ɖɔhun. Un ná kpo ɖo wǔvɛ́ se wɛ, káká jɛ hwenu e mi ná wa nǔ Klísu ɖɔhun dó é. 20 Ényí un sixú ɖo kpɔ́ xá mi din bo ɖɔ xó nú mi kpó kɔnugbe ɖěvo kpó wɛ ɔ, é ná nyɔ́, ɖó un mɔ nukúnnú jɛ nǔ e ɖo mi wa wɛ é mɛ ǎ.

21 Mi mɛ e jló ná nɔ Sɛ́n ɔ glɔ́ lɛ́ è mi, mi se nǔ e Sɛ́n ɔ ɖɔ é ǎ cé? 22 Ði kpɔ́ndéwú ɔ, è wlán ɖɔ Ablaxámu ɖó vǐ súnnu we: nyɔ̌nu kannumɔ ɔ ji ɖokpó n’i, bɔ nyɔ̌nu e ɖo éɖésúnɔ sí é ji ɖokpó n’i. 23 È ji nyɔ̌nu kannumɔ ɔ sín vǐ, lěe è nɔ ji vǐ bǐ gbɔn é. Amɔ̌, è ji nyɔ̌nu e ɖo éɖésúnɔ sí é sín vǐ, ɖó akpá ɖé wútu. 24 Nǔ vovo énɛ́ lɛ́ ɖó tínmɛ ɖěvo, ɖó nyɔ̌nu we énɛ́ lɛ́ nɔ te nú akɔjijɛ we. È jɛ ɖokpó ɖo Sinayíi só ɔ jí. Mɛ ɖěɖěe ɖo akɔjijɛ énɛ́ glɔ́ lɛ́ é bǐ wɛ nyí kannumɔ, bɔ akɔjijɛ énɛ́ cí Agáa ɖɔhun. 25 Agáa nɔ te nú Sinayíi; só ɖé wɛ bo ɖo Alabíi, bɔ é nɔ te nú Jeluzalɛ́mu égbé tɔn, ɖó é kpó vǐ tɔn lɛ́ kpó ɖo kannumɔgbénu. 26 Amɔ̌, Jeluzalɛ́mu jǐxwé tɔn ɔ ɖo éɖée sí, bɔ éyɛ́ wɛ nyí nɔ mǐtɔn.

27 Nǔgbó ɔ, è wlán ɖɔ: “Nyɔ̌nu wɛnsinɔ, hwɛ mɛ e ma ɖó vǐ ǎ é ɔ, j’awǎ; sú xó kpó awǎjijɛ kpó, hwi mɛ e ma se wǔvɛ́ ajidonu tɔn ǎ é; ɖó nyɔ̌nu e è wɔn ya ná é sín vǐ lɛ́ sukpɔ́ hú nyɔ̌nu e ɖó asú é tɔn lɛ́.” 28 Din ɔ, nɔví lɛ́, akpá e Mawu dó é sín vǐ wɛ mi nyí Izáki ɖɔhun. 29 Mɛ e è ji lěe è nɔ ji vǐ bǐ gbɔn é dó ya nú mɛ e è ji gbɔn gbigbɔ mímɛ́ gblamɛ é, bɔ nǔ ɖokpó ɔ wɛ lɛ́ ɖo jijɛ wɛ din. 30 É ɖo mɔ̌ có, étɛ́ nǔwlánwlán mímɛ́ ɔ ka ɖɔ? “Nya nyɔ̌nu kannumɔ ɔ kpó vǐ tɔn kpó, ɖó nyɔ̌nu kannumɔ ɔ sín vǐ ná ɖu gǔ xá nyɔ̌nu e ɖo éɖésúnɔ sí é sín vǐ ɖo ali ɖěbǔ nu ǎ.” 31 Énɛ́ wú ɔ, nɔví lɛ́ mi, mǐ nyí nyɔ̌nu kannumɔ sín vǐ ǎ, loɔ, nyɔ̌nu e ɖo éɖésúnɔ sí é sín vǐ wɛ mǐ nyí.

5 Mɛɖésúsíninɔ mɔ̌hun wútu wɛ Klísu tún kan nú mǐ. Énɛ́ wú ɔ, mi lí dǒ, bo ma lɛ́ wá cí kannumɔ e ɖo agbanhɛnkpo glɔ́ lɛ́ é ɖɔhun ó.

2 Éɖíe! Nyɛ, Pɔ́lu, ɖo ɖiɖɔ nú mi wɛ ɖɔ ényí mi gbo ada ɔ, Klísu ná ɖó le ɖě nú mi ǎ. 3 Un lɛ́ ɖo flínflín súnnu ɖěbǔ e gbo ada é wɛ ɖɔ é ɖo dandan ɖɔ é ní xwedó Sɛ́n ɔ blěbú. 4 Mi mɛ e ɖo tíntɛ́nkpɔ́n wɛ bónú è ná ɖɔ ɖɔ mi nyí nǔjlɔ́jlɔ́watɔ́, ɖó mi nɔ xwedó Sɛ́n ɔ wútu lɛ́ è mi, zɔ wɛ mi jɛ nú Klísu; fɛ́nú tɔn gúdo wɛ mi lɛ́ kɔ sín. 5 Amɔ̌ mǐdɛɛ lɛ́ ɔ, gbɔn gbigbɔ mímɛ́ gblamɛ ɔ, kpó akpakpa sɔ́ mɛ kpó, kpódó nukúnɖíɖó kpán wɛ mǐ ɖo te kpɔ́n ɖɔ è ní ɖɔ ɖɔ mǐ nyí nǔjlɔ́jlɔ́watɔ́, ɖó nǔ e mǐ ɖi é wútu. 6 Nú mɛ ɖěɖěe ɖo bǔ xá Klísu Jezu lɛ́ é ɔ, è gbo ada oo, è ma gbo ada oo, nǔ énɛ́ lɛ́ ɖě ɖo tají ǎ. Loɔ, nǔɖiɖi wɛ ɖo tají, bɔ nǔɖiɖi ɔ nɔ w’azɔ̌ gbɔn wǎnyíyí gblamɛ.

7 Mi ɖo wezun ɔ kán wɛ ganjí ɖ’ayǐ. Mɛ̌ ka sú tónú sise nú nǔgbó ɔ sín ali dó mi din? 8 Nǔkplɔ́nmɛ mɛ e sú ali dó mi lɛ́ é tɔn gosín Mɛ e ylɔ́ mi é gɔ́n ǎ. 9 Tɔ́n kpɛví ɖé wɛ nɔ fɔ́n linfín e è nya é blěbú. 10 Un ɖeji ɖɔ mi mɛ e ɖo bǔ xá Aklúnɔ lɛ́ é kún ná ɖó linlin vo ó. Amɔ̌, mɛ e ɖo tagba dó nú mi wɛ é ɔ, nú é tlɛ nyí mɛ ɖěbǔ wɛ ɔ, è ná dɔn tó e jɛxá ɛ é n’i. 11 Nɔví lɛ́ mi, nú nyɛ ɔ, ényí jlǎjlá wɛ un kpo ɖe ɖɔ è ɖó ná gbo ada ɔ, aniwú è ka kpo ɖo ya dó nú mì wɛ lo? Ényí mɔ̌ wa wɛ un kpo ɖe hǔn, yatín* ɔ sɔ́ nyí afɔklɛ́nnú ǎ nɛ́. 12 Un jló ɖɔ mɛ e ɖo tíntɛ́nkpɔ́n wɛ bo ná dɔn hunnyahunnya dó mi mɛ lɛ́ é ní sá yěɖée.*

13 Nɔví lɛ́ mi, mi ná jɛ miɖée sí wú wɛ è ylɔ́ mi. Nǔ ɖokpó e ɖ’é mɛ é wɛ ka nyí ɖɔ, mi ma gbɔn mɛɖésúsíninɔ énɛ́ sín yɛkan mɛ, bo nya jlǒ agbaza tɔn lɛ́ gbé ó. Loɔ, wǎnyíyí ní sísɛ́ mi, bónú mi ní húzú mɛsɛntɔ́ nú miɖée lɛ́. 14 Ðó gbeɖiɖe ɖokpó élɔ́ jí wɛ jijɛnu* Sɛ́n ɔ bǐ tɔn jínjɔ́n: “A ɖó ná yí wǎn nú nɔzo towe hwiɖésúnɔ ɖɔhun.” 15 É ɖo mɔ̌ có, ényí mi nɔ ɖo wǔ gblé miɖée lɛ́ wɛ, bo nɔ ɖo ahwan tɔ́n miɖée lɛ́ wɛ hǔn, mi cɔ́ miɖée, é ma nyí mɔ̌ ǎ ɔ, mi ná wá sú kún dó nú miɖée lɛ́.

16 Amɔ̌, un ɖo ɖiɖɔ nú mi wɛ ɖɔ mi ní nɔ zán gbɛ sɔgbe xá ali e gbigbɔ ɔ nɔ xlɛ́ mɛ é, énɛ́ ɔ, mi ná wa jlǒ agbaza tɔn ɖěbǔ ǎ. 17 Ðó agbaza ɔ, é sín jlǒ tɔn lɛ́ wú bɔ é nɔ xo hun xá gbigbɔ ɔ, bɔ gbigbɔ ɔ nɔ xo hun xá agbaza ɔ. Yě nɔ xo hun xá yěɖée lɛ́, bónú mi ní ma wa nǔ e mi nɔ jló ná wa lɛ́ é ó. 18 Gɔ́ ná ɔ, ényí gbigbɔ ɔ nɔ xlɛ́ ali mi hǔn, mi ɖo Sɛ́n ɔ glɔ́ ǎ nɛ́.

19 Hwɛhuhu gbaza sín nǔwiwa lɛ́ ɖo nǔglɔ́ ǎ, yě wɛ nyí: agalilɛ,* nǔblíblíwiwa, wunhínhɔ́nnúwiwa,* 20 bǒcyɔsinsɛn, awǒvinúwiwa,* kɛndómɛ, jlɛɖiɖɔ, wǔhwinhwan, xomɛ sinsin zɛ xwé wú, gbemanɔkpɔ́ syɛ́nsyɛ́n lɛ́, kínklán, sinsɛngbɛ́ta lɛ́ ɖíɖó ayǐ, 21 mɛnújlójló, ahannumú, agɔ̌ e tɛnmɛ è nɔ wa nǔ gblégblé ɖe lɛ́ é* kpó nǔ hǔnmɛ énɛ́ lɛ́ kpó. Un ɖo akpá gba nú mi wɛ dó nǔ énɛ́ lɛ́ wú, lěe un ko gb’akpá nú mi gbɔn ɖ’ayǐ é, ɖɔ mɛ ɖěɖěe nɔ wa nǔ mɔ̌hunkɔtɔn lɛ́ é kún ná ɖu Axɔ́súɖuto Mawu tɔn sín gǔ ó.

22 Ðo alɔ ɖěvo mɛ ɔ, sínsɛ́n gbigbɔ mímɛ́ tɔn lɛ́ wɛ nyí: wǎnyíyí, awǎjijɛ, fífá, suúluɖíɖó, xomɛnyínyɔ́, ɖagbewiwa, nǔɖiɖi, 23 xomɛfífá, mɛɖéejíɖuɖe. Sɛ́n ɖě ɖe bo gbɛ́ nǔ mɔ̌hun lɛ́ ǎ. 24 Gɔ́ ná ɔ, mɛ e nyí Klísu Jezu tɔn lɛ́ é ko xwe agbaza ɔ dó atín ɔ wú, gɔ́ nú jlǒ tɔn syɛ́nsyɛ́n lɛ́ kpó jlǒ tɔn nyanya lɛ́ kpó.

25 Ényí mǐ ɖo gbɛ zán sɔgbe xá gbigbɔ ɔ wɛ hǔn, mi nú mǐ ní kpo ɖo ali e gbigbɔ ɔ nɔ xlɛ́ mɛ é xwedó wɛ lyɛ̌ngbelyɛ̌ngbe. 26 Mi nú mǐ ní ma húzú goyítɔ́ ó, mǐ ní ma nɔ hwlɛ́n agba xá mǐɖée lɛ́ ó, mǐ ní ma nɔ jló mǐɖée lɛ́ nú ó.

6 Nɔví lɛ́ mi, ényí mɛɖé tlɛ ɖe afɔ nyi do cóbó wá ɖ’ayi wú hǔn, mi mɛ e ɖó nǔwúkpíkpé ɖo gbigbɔ lixo lɛ́ é ní tɛ́n kpɔ́n bo lɛ́ kɔ nú mɛ mɔ̌hun wá ali jlɔ́jlɔ́ ɔ jí kpó xomɛfífá kpó. Amɔ̌, nɔ acéjí, bónú è ma wá tɛ́n hwi lɔ kpɔ́n ó. 2 Mi ní nɔ hɛn wǔvɛ́gban mitɔn lɛ́ xá miɖée lɛ́, mɔ̌ mɛ ɔ, Klísu sín sɛ́n ɔ se tónú ná wɛ mi ɖe. 3 Ðó ényí mɛ ɖěbǔ lin ɖɔ émí nyí nǔɖé, lobo ma ka nyí nǔtí ǎ ɔ, éɖée blɛ́ wɛ é ɖe. 4 Amɔ̌, mi nú mɛ ɖokpó ɖokpó ní nɔ gbéjé nǔwiwa éɖésúnɔ tɔn lɛ́ kpɔ́n. Énɛ́ ɔ, é ná j’awǎ ɖó nǔ e kan éɖésúnɔ lɛ́ é wútu, é ná nyí ɖó é jlɛ́ éɖée dó mɛ ɖěvo lɛ́ wú wútu ǎ. 5 Ðó mɛ ɖokpó ɖokpó wɛ ná hɛn agban éɖésúnɔ tɔn.*

6 Gɔ́ ná ɔ, mi nú mɛ ɖěbǔ e kplɔ́n xó ɔ* wɛ è ɖe é ní má nǔ ɖagbe alɔkpa lɛ́ bǐ xá mɛ e ɖo nǔ mɔ̌hun kplɔ́n ɛ* wɛ é.

7 Mi ma blɛ́ miɖée ó: È sixú wa yɛ nú Mawu ǎ. Ðó nǔ e mɛɖé dó é wɛ é ná ya. 8 Mɛ e nɔ xwedó hwɛhuhu gbaza tɔn dó dó nǔ é ɔ, hwɛhuhu gbaza tɔn ná ji nǔ nyanya n’i. Amɔ̌, mɛ e nɔ xwedó gbigbɔ ɔ dó dó nǔ é ɔ, gbigbɔ ɔ ná zɔ́n b’ɛ ná mɔ gbɛ mavɔmavɔ. 9 Énɛ́ wú ɔ, mi ma nú awakanmɛ kú mǐ dó nǔɖagbewiwa wú ó. Ðó é jɛ hwetɔnnu ɔ, mǐ ná ya sínsɛ́n tɔn lɛ́, ényí nǔ ma ci kɔ nú mǐ ǎ ɔ nɛ́.* 10 Ényí mɔ̌ hǔn, nú ali tɔn hun* nú mǐ hweɖébǔnu hǔn, mi nú mǐ ní nɔ wa nǔ ɖagbe nú mɛ bǐ, ɖo tají ɔ, nú nǔɖitɔ́ hǎtɔ́ mǐtɔn lɛ́.

11 Mi kpɔ́n wěkwín kloklo e un zán dó wlán nǔ sɛ́dó mi kpó alɔ ce ɖésú kpó lɛ́ é.

12 Mɛ ɖěɖěe ɖo tíntɛ́nkpɔ́n wɛ bo ná hɛn mi gǎnnugǎnnu, bɔ mi ná gbo ada lɛ́ é ɔ, gbɛtɔ́ sí ba ná nyɔ́ ɖe wɛ yě bǐ ɖe.* Nǔ ɖokpó e wú yě nɔ wa mɔ̌ é wɛ nyí ɖɔ è ní ma dó ya nú yě, ɖó yatín* Klísu tɔn wú ó. 13 Ðó yě mɛ e tlɛ gbo ada lɛ́ é ɖésúnɔ nɔ nyi Sɛ́n ɔ ǎ, biba wɛ yě ɖe ɖɔ mi ní gbo ada, bónú yě ná dó sixú nɔ yí nugo, ɖó nǔ e è wa nú agbaza mitɔn é wútu. 14 Amɔ̌, nyɛ ɔ, un ní ma yí nugo gbeɖé ó, afi ɖó yatín* Aklúnɔ mǐtɔn Jezu Klísu tɔn wútu. Nú nyɛ ɔ, è ko hu gbɛ ɔ,* gbɔn gbla tɔn mɛ. Amɔ̌, nú gbɛ ɔ ɔ, è ko hu mì,* gbɔn gbla tɔn mɛ. 15 Ðó adagbigbo kpó adamagbo kpó ɖě ɖo tají ǎ. Loɔ, è ní nyí nǔɖíɖó yɔ̌yɔ́ wɛ nyí nǔ e ɖo tají é. 16 Fífá kpó nǔbláwǔkúnúmɛ kpó ní nɔ kpɔ́ xá mɛ ɖěɖěe nɔ zán gbɛ sɔgbe xá xó énɛ́ lɛ́ é bǐ, ɛɛn, ní nɔ kpɔ́ xá Izlayɛ́li Mawu tɔn ɔ.

17 Bɛ́sín din ɔ, mɛ ɖěbǔ ní ma sɔ́ dó ya nú mì ó, ɖó wuntun ɖěɖěe nɔ ɖe xlɛ́ ɖɔ è nyí kannumɔ Jezu tɔn é ɖo agbaza ce wú.

18 Nɔví lɛ́ mi, fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi, hwenu e mi ná ɖo jijɔ ɖagbe lɛ́ ɖe xlɛ́ wɛ é. Amǐ.