WĚMA E È WLÁN SƐ́DÓ EFƐ́ZINU LƐ́ É

1 Nyɛ Pɔ́lu, éé nyí mɛsɛ́dó Klísu Jezu tɔn ɖé, gbɔn jlǒ Mawu tɔn gblamɛ é, wɛ ɖo wěma élɔ́ wlán sɛ́dó mɛ mímɛ́ ɖěɖěe ɖo Efɛ́zi, bo ɖo gbejí ɖo bǔ e yě ɖe xá Klísu Jezu é mɛ lɛ́ é wɛ:

2 Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi.

3 Susu nú Mawu, Aklúnɔ mǐtɔn Jezu Klísu sín Tɔ́, ɖó é kɔn nyɔ̌ná gbigbɔ tɔn tɛnmɛ tɛnmɛ dó mǐ jí ɖo nɔtɛn jǐxwé tɔn lɛ́, ɖo bǔ e mǐ ɖe xá Klísu é mɛ. 4 Jɛ nukɔn nú hwenu e è ɖó gbɛ ɔ ayǐ é* ɔ, é sɔ́ mǐ bónú mǐ ná nɔ bǔ xá ɛ,* lobo ná ɖe wǎnyíyí xlɛ́, bo ná nyí mɛ mímɛ́, bɔ blɔ̌ ɖěbǔ ná ɖo mǐ wú ǎ, ɖo nukɔn tɔn. 5 Ðó é ko sɔ́ mǐ jɛ nukɔn, bo ná sɔ́ mǐ dó ɖó vǐ éɖésúnɔ tɔn lɛ́, gbɔn Jezu Klísu gblamɛ, sɔgbe xá nǔ e nyɔ́ nukún tɔn mɛ é kpó jlǒ tɔn kpó. 6 Bónú è ná dó sixú kpa fɛ́nú tɔn susunɔ e é nyɔ́ xomɛ bo ná mǐ, gbɔn Vǐ vívɛ́ná tɔn gblamɛ é. 7 È vɔ́ mǐ xɔ bo tún kan nú mǐ, gbɔn Vǐ tɔn gblamɛ. Ɛɛn, è sɔ́ hwɛ mǐtɔn lɛ́ kɛ mǐ, gbɔn hun mɛ énɛ́ tɔn gblamɛ. Fɛ́nú Mawu tɔn d’agba tawun!

8 É ná mǐ fɛ́nú énɛ́ b’ɛ túnflá gɔ́ nú nǔnywɛ́ bǐ kpó nukúnnúmɔjɛnǔmɛ* bǐ kpó, 9 gbɔn blǒ e é bló bɔ mǐ tuun nǔbúdo e kunkplá jlǒ tɔn é gblamɛ. Énɛ́ sɔgbe xá nǔ e nyɔ́ nukún tɔn mɛ, bɔ éɖésúnɔ ko bló tuto tɔn é. 10 Linlin tɔn wɛ nyí ɖɔ é ná sɔ́ tuto nukúnkpíkpé dó nǔ wú tɔn ɖé ɖ’ayǐ, bɔ nǔ ná nyí mɔ̌ ɖo hwenu e é ko ɖó dó é sín vivɔnu. Énɛ́ wɛ nyí ɖɔ é ná xo nǔ lɛ́ bǐ kplé ɖó kpɔ́ dó Klísu glɔ́, nǔ e ɖo jǐxwé lɛ́ é kpó nǔ e ɖo ayǐkúngban jí lɛ́ é kpó. Ɛɛn, dó glɔ̌ tɔn. 11 Mǐ ɖo bǔ xá ɛ, bɔ Mawu sɔ́ mǐ bónú mǐ ná ɖu gǔ xá ɛ. É ko sɔ́ mǐ jɛ nukɔn sɔgbe xá jlǒ tɔn, ɖó é nɔ wa nǔ lɛ́ bǐ sɔgbe xá jlǒ tɔn, 12 bónú mǐ mɛ e nyí mɛ nukɔntɔn bo ɖó nukún nǔ ɖo Klísu mɛ lɛ́ é ní dó kpa susu Mawu tɔn. 13 Amɔ̌, ée mi se nǔgbó ɔ sín xó, énɛ́ wɛ nyí wɛn ɖagbe e kunkplá hwlɛngán mitɔn é gúdo é ɔ, mi lɔmɔ̌ ɖó nukún nǔ ɖo éyɛ́ mɛ. Ée mi ɖi nǔ gúdo é ɔ, è sɔ́ gbigbɔ mímɛ́ e sín akpá è dó é dó ɖó wuntun mi, gbɔn gbla tɔn mɛ. 14 Gbigbɔ mímɛ́ énɛ́ nyí xlɛ̌ e jɛ nukɔn é* ɖé nú gǔ mǐtɔn. Mawu bló mɔ̌ bo ná dó tún kan nú nǔɖókan éɖésúnɔ tɔn gbɔn gbɛxixɔ ɖé gblamɛ, bónú è ná kpa susu tɔn.

15 Énɛ́ wɛ zɔ́n bɔ sín hwenu e un se nǔɖiɖi e mi ɖó nú Aklúnɔ Jezu é, kpó wǎnyíyí e mi ɖe xlɛ́ mɛ mímɛ́ lɛ́ é kpó sín xó é ɔ, nyi lɔ 16 gɔn kú dó nú Mawu dó ta mitɔn mɛ gbeɖé ǎ. Un kpo ɖo ɖɛ xo dó ta mitɔn mɛ wɛ, 17 ɖɔ Mawu Aklúnɔ mǐtɔn Jezu Klísu tɔn, Tɔ́ susunɔ ɔ, ní ná mi hlɔ̌nhlɔ́n bónú mi ná dó sixú ɖó nǔnywɛ́, lobo mɔ nukúnnú jɛ nǔ ɖěɖěe é ɖe xlɛ́ lɛ́ é mɛ, bɔ mɔ̌ mɛ ɔ, mi ná ɖó nukúnnúmɔjɛnǔmɛ e sɔgbe é dó wǔtu tɔn. 18 É hun ayi mitɔn bónú é ná mɔ nǔ, bónú mi ná dó sixú tuun nukúnɖíɖó tɔn e kɔn é ylɔ́ mi dó é, dɔkun susunɔ ɖěɖěe é sɔ́ ɖ’ayǐ bɔ mɛ mímɛ́ lɛ́ ná wá ɖu gǔ tɔn é, 19 kpó lě do hlɔ̌nhlɔ́n tɔn ɖaxó e é ɖe xlɛ́ mǐ mɛ nǔɖitɔ́ lɛ́ é jí wǔ sɔ é kpó. È nɔ mɔ hlɔ̌nhlɔ́n tɔn ɖaxó énɛ́ ɖo nǔwiwa tɔn lɛ́ mɛ. 20 Hlɔ̌nhlɔ́n énɛ́ wɛ é zán dó fɔ́n Klísu sín mɛkúkú lɛ́ mɛ, bo sɔ́ ɛ jínjɔ́n ɖisí tɔn xwé ɖo jǐxwé. 21 É sɔ́ ɛ ɖó tɛn ɖaxó mɛ, bɔ é hú gǎn acɛkpikpa bǐ, gǎn bǐ, hlɔ̌nhlɔ́n bǐ, axɔ́sú bǐ, kpó nyǐkɔ e è nɔ ylɔ́ é bǐ kpó. É nyí ɖo gbɛ* élɔ́ mɛ kɛ́ɖɛ́ ǎ, loɔ, ɖo gbɛ* e ja é lɔ mɛ. 22 É lɛ́ sɔ́ nǔ lɛ́ bǐ ɖó afɔ tɔn lɛ́ glɔ́, bo sɔ́ ɛ gǎn nú nǔ e kan agun ɔ lɛ́ é bǐ. 23 Agun ɔ wɛ nyí agbaza tɔn, ée nǔ e kunkplá ɛ lɛ́ é gɔ́ é. Éyɛ́ wɛ nyí mɛ e gɔ́ nǔ lɛ́ bǐ ɖo ali bǐ nu é.

2 Gɔ́ ná ɔ, mi ko kú ɖó nǔwanyido mitɔn lɛ́ kpó hwɛhuhu mitɔn lɛ́ kpó wú có, Mawu fɔ́n mi wá gbɛ. 2 Mi ko wa nǔ énɛ́ lɛ́ ɖ’ayǐ, hwenu e mi nɔ ɖo gbɛ zán wɛ lěe gbɛ ɔ nɔ zán gbɛ gbɔn é, sɔgbe xá gǎn e kp’acɛ nú jɔhɔn gbɛ ɔ tɔn é, énɛ́ wɛ nyí gbigbɔ e ɖo azɔ̌ wa wɛ ɖo vǐ tónúmasetɔ́ lɛ́ mɛ é. 3 Ɛɛn, mǐ mɛ bǐ wɛ ko nɔ yě tɛ́ntin ɖo hweɖénu wá yi, bo nɔ wa nǔ sɔgbe xá jlǒ agbaza mǐtɔn tɔn lɛ́, lobo nɔ ɖo agbaza ɔ kpó linlin mǐtɔn lɛ́ kpó sín jlǒ wa wɛ, bɔ sín hwenu e è ji mǐ é ɔ, mǐ nyí vǐ xomɛsin tɔn lɛ́, mɛ e kpo lɛ́ é ɖɔhun. 4 Amɔ̌, nǔbláwǔkúnúmɛ Mawu tɔn túnflá, bɔ ɖó é yí wǎn ɖaxó nú mǐ wútu ɔ, 5 hwenu e mǐ tlɛ ko kú, ɖó nǔwanyido mǐtɔn lɛ́ wútu é ɔ, é fɔ́n mǐ wá gbɛ bo dɔn mǐ ɖó bǔ xá Klísu. Nǔgbó ɔ, é hwlɛ́n mi gán gbɔn fɛ́nú tɔn gblamɛ. 6 Gɔ́ ná ɔ, ɖo bǔ e mǐ ɖe xá Klísu Jezu é mɛ ɔ, é fɔ́n mǐ kpó é kpó wá gbɛ, bo sɔ́ mǐ jínjɔ́n nɔtɛn jǐxwé tɔn lɛ́ ɖó kpɔ́ xá ɛ, 7 bónú ɖo gbɛ* e ja é mɛ ɔ, é ná dó sixú ɖe lě do fɛ́nú tɔn túnflá sɔ é xlɛ́ mǐ, gbɔn xomɛnyínyɔ́* tɔn gblamɛ, ɖo bǔ e mǐ ɖe xá Klísu Jezu é mɛ.

8 Gbɔn fɛ́nú énɛ́ gblamɛ ɔ, è ko hwlɛ́n mi ɖó nǔ e mi ɖi é wú; gǎndídó mitɔn wɛ zɔ́n bɔ nǔ nyí mɔ̌ ǎ, loɔ, nǔníná Mawu tɔn wɛ. 9 Éǒ, nǔwiwa mitɔn lɛ́ wú wɛ è hwlɛ́n mi gán ǎ, bónú mɛ ɖěbǔ ní ma mɔ nǔ e wú é ná ɖó dó dó yí nugo é ó. 10 Alɔ Mawu tɔn núwiwa* wɛ mǐ nyí, bɔ ɖó mǐ ɖo bǔ xá Klísu Jezu wútu ɔ, è bló mǐ bónú mǐ ná wa azɔ̌ ɖagbe ɖěɖěe Mawu ko bló tuto tɔn jɛ nukɔn, bónú mǐ ná wa lɛ́ é.

11 Énɛ́ wú ɔ, mi ní flín ɖɔ ɖo hweɖénu wá yi ɔ, mɛ ɖěɖěe gbɛtɔ́ lɛ́ gbo ada ná lɛ́ é nɔ ylɔ́ mi mɛ e ma nyí Jwifu jiji ǎ lɛ́ é ɖɔ mɛ e ma gbo ada ǎ lɛ́ é. 12 Hwe énɛ́ nu ɔ, mi tuun Klísu ǎ, bo ɖo zɔ nú akɔta Izlayɛ́li tɔn, lobo nyí jǒnɔ nú akɔjijɛ akpá ɔ tɔn lɛ́; mi ɖó nukúnɖíɖó ɖě ǎ, mi tuun Mawu ǎ, bo ɖo gbɛ ɔ mɛ mɔ̌ kpowun. 13 Amɔ̌ din ɔ, mi mɛ e ko lín dó Mawu ɖ’ayǐ lɛ́ é ko sɛkpɔ́ ɛ, gbɔn hun Klísu tɔn gblamɛ, ɖó bǔ e mi ɖe xá Klísu Jezu é wú. 14 Ðó é wɛ nyí fífá mǐtɔn, é wɛ xo gbɛ̌ta we lɛ́ kplé, bɔ yě húzú ɖokpó. É wɛ mu dǒ e ɖo tɛ́ntin yětɔn bo má yě ɖ’ayǐ é. 15 Gbɔn agbaza tɔn gblamɛ ɔ, é sú kún dó nú nǔ e ɖo kɛn dɔn wá wɛ é, é wɛ nyí Sɛ́n ɔ, éé mɛ gbeɖiɖe lɛ́ kpó gbetakɛ́n lɛ́ kpó ɖe é, bo ná dó bló bɔ gbɛ̌ta we e ɖo bǔ xá ɛ lɛ́ é ná húzú mɛ yɔ̌yɔ́ ɖokpó, lobo ná lɛ́ bló bɔ fífá ná tíin. 16 É lɛ́ wa mɔ̌, bónú togun we e húzú agbaza ɖokpó lɛ́ é ní dó dó hwɛ gbɔ xá Mawu bǐ mlɛ́mlɛ́, gbɔn yatín* ɔ gblamɛ, ɖó éɖésúnɔ ko hu nǔ e ɖo kɛn dɔn wá wɛ é. 17 Gɔ́ ná ɔ, é wá bo jlá wɛn ɖagbe fífá tɔn ɔ mi mɛ e ɖo zɔ nú Mawu ɖ’ayǐ lɛ́ é, lobo jlá fífá mɛ ɖěɖěe sɛkpɔ́ ɛ lɛ́ é. 18 Ðó gbɔn jǐ tɔn ɔ, mǐ mɛ togun we lɛ́ bǐ sixú yi Tɔ́ ɔ gɔ́n faa, gbɔn gbigbɔ ɖokpó ɔ gblamɛ.

19 Énɛ́ wú ɔ, mi sɔ́ nyí jǒnɔ ǎ, mi ka sɔ́ lɛ́ nyí toɖévomɛnu ǎ. Loɔ, toví wɛ mi nyí, mɛ mímɛ́ ɖěvo lɛ́ bǐ ɖɔhun, bo ɖo xwédo Mawu tɔn mɛ, 20 lobɔ è ko dó mi do nyi dodónú ɖé jí, é wɛ nyí mɛsɛ́dó lɛ́ kpó gbeyíɖɔ lɛ́ kpó tɔn; Klísu Jezu wɛ ka nyí awǐnnya zwe jí tɔn dodónú ɔ tɔn. 21 Xɔ ɔ blěbú e ɖo bǔ xá ɛ, bɔ è ján akpáxwé tɔn lɛ́ bǐ ganjí é ɖo jǐ yi wɛ, bo ná húzú tɛ́npli mímɛ́ nú Jexóva.* 22 Ðó bǔ e mi ɖe xá ɛ é wútu ɔ, è ɖo mi lɔ gbá ɖó kpɔ́ xá mɛ ɖě lɛ́ wɛ, bónú mi ná húzú nɔtɛn e Mawu ná nɔ, gbɔn gbigbɔ tɔn gblamɛ é.

3 Énɛ́ wú ɔ, nyɛ Pɔ́lu ɖo gankpá mɛ, ɖó un nyí Klísu Jezu tɔn, bo lɛ́ d’alɔ mi mɛ e ɖo akɔta ɖě lɛ́ mɛ lɛ́ é wútu. 2 Nǔgbó ɔ, mi se sɔ́ e è sɔ́ mì, bónú má wa sinsɛnzɔ́ nǔjíkpɔ́ntɔ́ fɛ́nú Mawu tɔn tɔn ɖɔhun dó ta mitɔn mɛ é sín xó. 3 Énɛ́ wɛ nyí ɖɔ è ɖe nǔbúdo Mawu tɔn ɔ xlɛ́ mì ɖo nǔmimɔ mɛ, lěe un ko wlán gbɔn wá yi kléwún é. 4 Énɛ́ wú ɔ, ée mi ná ɖo xixa wɛ é ɔ, mi ná tuun lěe un mɔ nukúnnú jɛ nǔbúdo Mawu tɔn e kunkplá Klísu é mɛ gbɔn é. 5 Ðo jijimɛ e wá yi lɛ́ é mɛ ɔ, è ɖe nǔbúdo énɛ́ xlɛ́ gbɛtɔ́ lɛ́, lěe è ɖe xlɛ́ mɛsɛ́dó mímɛ́ lɛ́ kpó gbeyíɖɔ lɛ́ kpó din gbɔn gbigbɔ gblamɛ gbɔn é ǎ. 6 Énɛ́ wɛ nyí ɖɔ mɛ e ɖo akɔta ɖě lɛ́ mɛ lɛ́ é ɔ, ɖó bǔ e yě ɖe xá Klísu Jezu é kpó wɛn ɖagbe ɔ kpó wútu ɔ, yě ná ɖu gǔ xá mǐ, bo ná húzú wǔjɔnú agbaza ɖokpó ɔ tɔn lɛ́, lobo ná ɖó mǐmá ɖo akpá ɔ mɛ xá mǐ. 7 Un húzú sinsɛnzɔ́watɔ́ énɛ́ tɔn, sɔgbe xá fɛ́nú Mawu tɔn e è ná mì vɔ̌nu, gbɔn hlɔ̌nhlɔ́n tɔn sín nǔwiwa gblamɛ é.

8 Nyɛ mɛ e hwe hú mɛ kpɛví bǐ e ɖo mɛ mímɛ́ lɛ́ mɛ é wɛ è ná fɛ́nú énɛ́, bónú má jlá wɛn ɖagbe e kunkplá nyɔ̌ná Klísu tɔn e è ma sixú jlɛ́ ǎ lɛ́ é mɛ e ɖo akɔta ɖě lɛ́ mɛ lɛ́ é, 9 lobo lɛ́ d’alɔ gbɛtɔ́ lɛ́, bónú yě ná mɔ lěe Mawu kpé nukún dó nǔbúdo, ée éyɛ́ mɛ e dá nǔ bǐ é sɔ́ hwlá, sín hwenu línlín ɖíe é wú gbɔn é. 10 Nǔ nyí mɔ̌, bónú din ɔ, gbɔn agun ɔ gblamɛ ɔ, Mawu ná bló bɔ acɛkpikpa kpó gǎn kpó ɖěɖěe ɖo nɔtɛn jǐxwé tɔn lɛ́ é ná tuun nǔnywɛ́ tɔn, ée é ɖe xlɛ́ ɖo ali vovo gěgé nu é. 11 Énɛ́ sɔgbe xá linlin mavɔmavɔ e é ɖó, b’ɛ kunkplá Klísu Jezu, Aklúnɔ mǐtɔn é. 12 Éyɛ́ wɛ zɔ́n bɔ mǐ nɔ vo bo nɔ ɖɔ xó, bo nɔ lɛ́ sɛkpɔ́ Mawu faa kpó jiɖiɖe kpó, gbɔn nǔɖiɖi e mǐ ɖó n’i é gblamɛ. 13 Énɛ́ wú ɔ, awakanmɛ ní ma kú mi, ɖó wǔvɛ́ e un se dó ta mitɔn mɛ lɛ́ é wútu ó, ɖó wǔvɛ́ énɛ́ lɛ́ ɔ, susu mitɔn wɛ.

14 Hwɛjijɔ énɛ́ wú wɛ un jɛ kpo ɖo Tɔ́ ɔ nukɔn. 15 Éyɛ́ wɛ zɔ́n bɔ xwédo e ɖo jǐxwé kpó ayǐkúngban jí kpó lɛ́ é bǐ dó tíin. 16 Un ɖo ɖɛ xo wɛ ɖɔ ɖo susu tɔn e túnflá é mɛ ɔ, é ní bló bónú mi ní lí dǒ ɖo nǔ e mi nyí ɖo xomɛ é mɛ, gbɔn hlɔ̌nhlɔ́n gbigbɔ tɔn tɔn gblamɛ. 17 Lobonú gbɔn nǔɖiɖi mitɔn gblamɛ ɔ, Klísu ní dó sixú nɔ ayi mitɔn lɛ́ mɛ ɖo wǎnyíyí mɛ. Mi ní dó ɖɔ do, bo lí dǒ ɖo dodónú ɔ jí, 18 bónú mi kpó mɛ mímɛ́ lɛ́ bǐ kpó ní dó sixú kpé wú ganjí, bo mɔ nukúnnú jɛ lěe nǔgbó ɔ gbló, ɖi ga, yi jǐ, bo gɔ́ngɔ́n sɔ é wú bǐ mlɛ́mlɛ́, 19 lobo lɛ́ tuun wǎnyíyí Klísu tɔn e hú gǎn nukúnnúmɔjɛnǔmɛ bǐ é, bónú mi ní dó sixú ɖó jijɔ e Mawu nɔ ná lɛ́ é bǐ.

20 Mawu ɔ, sɔgbe xá hlɔ̌nhlɔ́n tɔn e ɖo azɔ̌ wa wɛ ɖo mǐ mɛ é ɔ, é sixú wa nǔ zɛ nǔ ɖěɖěe mǐ byɔ́, alǒ sixú lin lɛ́ é bǐ wú flaflá tɔn. 21 Énɛ́ wú ɔ, susu ní nyí étɔn gbɔn agun ɔ kpó Klísu Jezu kpó gblamɛ, ɖo jijimɛ lɛ́ bǐ mɛ káká sɔ́yi mavɔmavɔ. Amǐ.

4 Énɛ́ wú ɔ, nyɛ mɛ e nyí gantɔ́ ɖó Aklúnɔ wútu é, ɖo byɔ̌byɔ́ mi wɛ ɖɔ gbɛ e mi nɔ zán é ní jɛxá ylɔ̌ e è ylɔ́ mi é. 2 Hwebǐnu hǔn, mi nɔ sɔ́ miɖée hwe, bo nɔ lɛ́ fá xomɛ, mi nɔ ɖó suúlu, mi nɔ mɔ miɖée gbɔ ɖo wǎnyíyí mɛ, 3 lobo nɔ lɛ́ wa nǔ e wú mi kpé é bǐ, bo hɛn bǔ e gbigbɔ ɔ zɔ́n bɔ mi ɖe é ɖó te, gbɔn fífá mɛ ninɔ xá miɖée lɛ́ gblamɛ. 4 Agbaza ɖokpó wɛ ɖe, bɔ gbigbɔ mímɛ́ ɖokpó ɖe, lěe nukúnɖíɖó e è ylɔ́ mi ná é lɔ nyí ɖokpó gbɔn é. 5 Aklúnɔ ɖokpó, nǔɖiɖi ɖokpó, batɛ́mu ɖokpó. 6 Mawu ɖokpó wɛ ɖe, bo nyí Tɔ́ nú mɛ bǐ. É kló hú mɛ ɖěvo ɖěbǔ, é nɔ w’azɔ̌ gbɔn mǐ bǐ jí, bɔ hlɔ̌nhlɔ́n tɔn nɔ w’azɔ̌ ɖo ali bǐ nu.

7 Mǐ mɛ ɖokpó ɖokpó mɔ fɛ́nú yí sín Mawu gɔ́n. Klísu wɛ ka má nǔníná vɔ̌nu énɛ́ nú mǐ mɛ ɖokpó ɖokpó. 8 Ðó Nǔwlánwlán mímɛ́ lɛ́ ɖɔ: “Hwenu e é yi jǐ aga é ɔ, é kplá gantɔ́ lɛ́ yi. É ná súnnu lɛ́ bɔ yě nyí nǔníná lɛ́.” 9 Étɛ́ ka nyí tínmɛ xógbe “é yi jǐ” ɔ tɔn? Tínmɛ tɔn wɛ nyí ɖɔ é ko wá do ɖ’ayǐ hwɛ̌, énɛ́ wɛ nyí ayǐkúngban ɔ jí. 10 Mɛ e jɛ te é jɛ́n lɛ́ nyí mɛ e yi jǐ aga, bo zɛ jǐnukúnsin lɛ́ bǐ wú é, bo ná dó sixú bló bónú nǔ lɛ́ bǐ ná jɛnu.

11 É sɔ́ mɛɖé lɛ́ bɔ yě nyí mɛsɛ́dó, mɛɖé lɛ́ nyí gbeyíɖɔ, mɛɖé lɛ́ nyí wɛnɖagbejlátɔ́, mɛɖé lɛ́ nyí lɛ̌ngbɔ́nyitɔ́ kpó nǔkplɔ́nmɛtɔ́ kpó. 12 É wa mɔ̌, bo ná dó sɔ́ mɛ mímɛ́ lɛ́ ɖó ali jlɔ́jlɔ́ ɔ jí,* bónú yě ná wa mɛsɛntɔ́zɔ́ lobo hɛn agbaza Klísu tɔn ɔ lí dǒ, 13 káká jɛ hwenu e mǐ mɛ bǐ ná húzú ɖokpó* ɖo nǔɖiɖi mɛ, lobo ɖó nukúnnúmɔjɛnǔmɛ e sɔgbe é dó Vǐ Mawu tɔn ɔ wú é, bo ná nyí mɛ e ko su kpé* é, bɔ ɖo ali énɛ́ nu ɔ, mǐ ná húzú mɛ e lí dǒ ɖo ali bǐ nu lɛ́ é Klísu ɖɔhun. 14 Énɛ́ wú ɔ, mǐ sɔ́ ɖó ná cí yɔkpɔ́vú lɛ́ ɖɔhun ǎ, ɖó mɛ e nɔ xwedó nǔkplɔ́nmɛ masɔgbe mɛ ɖěɖěe nɔ blɛ́ mɛ lɛ́ é tɔn lɛ́ é ná cí tɔjíhún e ɖo xu jí, bɔ jɔhɔn kpó aslɔkɛ́ lɛ́ kpó xo yi dě ɔ, yě nɔ xo yi dě é ɖɔhun. Ayi wínníwínní wɛ mɛ énɛ́ lɛ́ nɔ zán dó dɔn mɛ dó nǔ nyanya mɛ. 15 Amɔ̌, ée mǐ ná nɔ ɖo nǔgbó ɖɔ wɛ é ɔ, wǎnyíyí ní sísɛ́ mǐ, bónú mǐ ní su ɖo nǔ lɛ́ bǐ mɛ ɖo kɔnɖókpɔ́ mɛ xá Klísu e nyí ta ɔ é. 16 È dɔn agbaza ɔ bǐ ɖó bǔ ganjí gbɔn jǐ tɔn, bɔ wǔjɔnú lɛ́ ɖokpó ɖokpó nɔ d’alɔ yěɖée lɛ́, bo nɔ ná nǔ e sín hudó agbaza ɔ ɖó lɛ́ é. Ényí wǔjɔnú ɖokpó ɖokpó wa azɔ̌ tɔn ganjí ɔ, énɛ́ nɔ zɔ́n bɔ agbaza ɔ nɔ su, bónú agbaza ɔ blěbú ná lí dǒ ɖo wǎnyíyí mɛ.

17 Énɛ́ wú ɔ, nǔ e un ɖɔ bo jlá ɖo Aklúnɔ nyíkɔ mɛ é ɖíe: Mi sɔ́ ɖó ná kpo ɖo gbɛ zán wɛ akɔta ɖě lɛ́ ɖɔhun ǎ, ɖó yědɛɛ lɛ́ ɔ, linlin maɖótaɖé* yětɔn lɛ́ wɛ yě nɔ zán gbɛ sɔgbe xá. 18 Yě* ɖo ablu mɛ bo jɛ zɔ nú gbɛ e nyí Mawu tɔn é, ɖó yě ba ná tuun Mawu ǎ, bɔ ayi yětɔn lɛ́vɔ́ kú atli.* 19 Ðó nǔ ɖěbǔ sɔ́ nɔ nyí winnyá nú yě ǎ wútu ɔ, yě jó yěɖée dó nú wunhínhɔ́nnúwiwa,* bo nɔ wa nǔ blíblí alɔkpa lɛ́ bǐ, b’ɛ ka nɔ jɛmɛ nú yě gbeɖé ǎ.

20 Amɔ̌, mi kplɔ́n nǔ mɔ̌hun ɖé dó Klísu wú ǎ. 21 Jezu kplɔ́n mɛ nǔ e nǔgbó ɔ nyí é, bɔ ényí mi se xó tɔn lɛ́, lobɔ è lɛ́ kplɔ́n nǔ mi gbɔn jǐ tɔn hǔn, mi tuun nǔ énɛ́ ganjí nɛ́. 22 È kplɔ́n mi ɖɔ mi ní ɖe gbɛtɔ́ xóxó ɔ nyi ayǐ. É wɛ sɔgbe xá walɔ e mi nɔ zán ɖ’ayǐ é, lobɔ é nɔ lɛ́ fɔ́n bo nɔ ɖo gblěgblé wɛ, ɖó jlǒ tɔn mɛblɛ́blɛ́ tɔn lɛ́ wútu. 23 Mi ɖó ná kpo ɖo blǒbló wɛ, bɔ hlɔ̌nhlɔ́n e nɔ xlɛ́ ali linlin mitɔn é ná ɖo yɔ̌yɔ́ húzú wɛ. 24 Mi ɖó ná sɔ́ gbɛtɔ́ yɔ̌yɔ́ ɔ dó. É wɛ nyí gbɛtɔ́ yɔ̌yɔ́ e Mawu dá sɔgbe xá jlǒ tɔn é. Gbɛtɔ́ yɔ̌yɔ́ énɛ́ ɔ nɔ wa nǔ jlɔ́jlɔ́, bo nɔ lɛ́ nɔ gbejí nǔgbó nǔgbó tɔn.

25 Énɛ́ wútu ɔ, din e mi ko jó mɛblɛ́blɛ́ dó é ɔ, mɛ ɖokpó ɖokpó ní nɔ ɖɔ nǔgbó nú nɔzo tɔn, ɖó agbaza ɖokpó ɔ sín wǔjɔnú lɛ́ wɛ mǐ nyí. 26 É sixú wá jɛ bɔ mi sin xomɛ, amɔ̌, mi ma hu hwɛ ó. Mi ma nɔ xomɛsin jí káká bónú hwe ní yi xɔ ó. 27 Mi ma hun ali nú* Awǒvi ó. 28 Mɛ e nɔ j’ajo é ní ma sɔ́ j’ajo ɖě ó. É nyɔ́ wa ɔ, é ní nɔ w’azɔ̌ syɛ́nsyɛ́n, bo nɔ w’azɔ̌ ɖagbe lɛ́ kpó alɔ tɔn lɛ́ kpó, bo ná dó sixú ɖó nǔɖé bá má xá mɛ e ɖo hudó mɛ é. 29 Xó gblégblé ɖé ní ma nɔ tɔ́n sín nu mitɔn mɛ ó. Loɔ, ní nɔ nyí xó ɖagbe e ná bló bɔ ɖěvo lɛ́ ná lí dǒ, sɔgbe xá lěe ninɔmɛ ɔ byɔ́ ɖó é kɛ́ɖɛ́, bo ná dó sixú nɔ ɖɔ nǔ e ɖó le é nú mɛ e ɖo sise wɛ lɛ́ é. 30 Gɔ́ ná ɔ, mi ma nɔ dɔn gbigbɔ mímɛ́ Mawu tɔn dó aluwɛ mɛ* ó. É wɛ è dó ɖó wuntun mi ná káká jɛ gbe e gbe è ná tún kan nú mi, gbɔn gbɛxixɔ ɔ gblamɛ é.

31 Mi ní jó mɛhɛndóxomɛ syɛ́nsyɛ́n bǐ, xomɛsin bǐ, majijɛ bǐ, jlɛɖiɖɔ bǐ, mɛzunzun bǐ, kpó nǔ ɖěvo e nɔ wa nǔ dó mɛ wú é bǐ kpó dó. 32 Amɔ̌, mi nɔ nyɔ́ xomɛ dó miɖée lɛ́ wú, bo nɔ ɖe nǔbláwǔkúnúmɛ e gɔ́ngɔ́n é xlɛ́, lobo nɔ sɔ́ hwɛ kɛ miɖée lɛ́ faa, lěe Mawu ɖésúnɔ sɔ́ hwɛ kɛ mi faa, gbɔn Klísu jí gbɔn é ɖɔhun.

5 Énɛ́ wú ɔ, mi ní nɔ xwedó kpɔ́ndéwú Mawu tɔn, vǐ vívɛ́ná lɛ́ ɖɔhun, 2 bo nɔ ɖo wǎnyíyí ɖe xlɛ́ wɛ, lěe Klísu lɔ yí wǎn nú mǐ,* bo sɔ́ éɖée jó dó ta mǐtɔn* mɛ, ɖi nǔníná wǎnɖagbenɔ kpó vɔ̌sísá wǎnɖagbenɔ kpó ɖɔhun nú Mawu gbɔn é.

3 Lěe é ɖó ná nyí gbɔn nú togun mímɛ́ ɖé é ɔ, mi ma nú è tlɛ se agalilɛ,* nǔblíblíwiwa alɔkpa ɖěbǔ kpó nukúnkɛndídó kpó sín xó ɖo tɛ́ntin mitɔn ó. 4 È ɖó ná lɛ́ se nǔwalɔ e hu winnyá é, xlonɔxó alǒ alisá blíblí sín xó ɖo tɛ́ntin mitɔn ǎ, ɖó nǔ énɛ́ lɛ́ sɔgbe ǎ. É nyɔ́ wa ɔ, mi ɖó ná nɔ dó kú nú Mawu. 5 Ðó mi tuun, bo lɛ́ mɔ nǔ jɛ wú mlɛ́mlɛ́ ɖɔ mɛ e nɔ lɛ aga é,* alǒ mɛ e nɔ wa nǔblíblí é, abǐ mɛ e nɔ dó nukúnkɛn é ɖě kún ná ɖu Axɔ́súɖuto Klísu kpó Mawu kpó tɔn sín gǔ ó, ɖó nukúnkɛndídó ɔ, bǒcyɔsinsɛn alɔkpa ɖé wɛ.

6 Mi ma nú mɛɖé sɔ́ xó maɖótaɖé lɛ́ dó blɛ́ mi ná ó, ɖó nǔ mɔ̌hun lɛ́ wú wɛ xomɛsin Mawu tɔn ja vǐ tótlítɔ́ lɛ́ jí. 7 Énɛ́ wú ɔ, mi ma kpé nǔ ɖěbǔ xá yě ó. 8 Ðó mi ko nɔ zǐnflú mɛ ɖ’ayǐ, amɔ̌ din ɔ, mi ɖo wěziza nu, ɖó bǔ e mi ɖe xá Aklúnɔ é wútu. Mi ní nɔ ɖo gbɛ zán wɛ vǐ wěziza tɔn lɛ́ ɖɔhun, 9 ɖó sínsɛ́n e wěziza nɔ ná lɛ́ é wɛ nyí ɖagbewiwa alɔkpa bǐ, nǔjlɔ́jlɔ́wiwa alɔkpa bǐ kpó nǔgbóɖiɖɔ alɔkpa bǐ kpó. 10 Mi ní nɔ ɖo do ba nú nǔ e nyɔ́ Aklúnɔ nukúnmɛ lɛ́ é wɛ hwebǐnu. 11 Gɔ́ ná ɔ, mi ma sɔ́ nɔ ɖ’alɔ ɖo azɔ̌ e ma nɔ ná sínsɛ́n ǎ, bo nyí zǐnflú tɔn lɛ́ é mɛ ó. É nyɔ́ wa ɔ, mi nɔ ɖe nǔ e yě nyí é xlɛ́. 12 Ðó nǔ e yě nɔ wa ɖo nǔglɔ́ lɛ́ é ɔ, ɖiɖɔ tɔn tlɛ hu winnyá. 13 Nǔ e è sɔ́ ɖó wěziza nu* lɛ́ é bǐ ɔ, è ɖo yě ɖe xlɛ́ wɛ, bɔ nǔ e ɖe xlɛ́ wɛ è ɖe lɛ́ é bǐ húzú wěziza. 14 Énɛ́ wú ɔ, è ɖɔ: “Amlɔdɔ́tɔ́ è, fɔ́n, bo sí te sín mɛkúkú lɛ́ mɛ, bónú Klísu ná tá wěziza dó jǐ towe.”

15 Mi bo nɔ cɔ́ lěe mi nɔ zán gbɛ gbɔn é ganjí, mi ma nɔ zán gbɛ xlonɔ lɛ́ ɖɔhun ó, loɔ, nǔnywɛ́tɔ́ lɛ́ ɖɔhun. 16 Mi ní nɔ zán hwenu mitɔn ganjí,* ɖó azǎn lɛ́ nyɔ́ ǎ. 17 Énɛ́ wú ɔ, mi ma sɔ́ nɔ wa nǔ ayivɔvúnnánɔ lɛ́ ɖɔhun ɖě ó, loɔ, mi ní nɔ ɖo nukúnnú mɔ jɛ nǔ e nyí jlǒ Jexóva* tɔn é mɛ wɛ. 18 Gɔ́ ná ɔ, mi ma nɔ nu ahan mú ó, ɖó ahannumú nɔ dɔn mɛ dó nǔbaɖabaɖawiwa* mɛ. Loɔ, mi ní nɔ bló bónú gbigbɔ mímɛ́ ní gɔ́ ayi mitɔn mɛ. 19 Mi nɔ ɖɔ xó nú miɖée lɛ́,* gbɔn ɖɛhan lɛ́, susu kpikpa nú Mawu kpó han gbigbɔ tɔn lɛ́ kpó gblamɛ. Mi ní nɔ ji han bo nɔ lɛ́ xo nǔ ɖo ayi mitɔn lɛ́ mɛ nú Jexóva.* 20 Hwebǐnu hǔn, mi nɔ dó kú nú Mawu mǐtɔn e lɛ́ nyí Tɔ́ mǐtɔn é nú nǔ lɛ́ bǐ, ɖo Aklúnɔ mǐtɔn Jezu Klísu nyíkɔ mɛ.

21 Mi nɔ hwíhwɛ́ miɖée dó miɖée lɛ́ glɔ́, ɖó sísí ɖaxó e mi ɖó nú Klísu é wú. 22 Asi lɛ́ ní nɔ hwihwɛ́ yěɖée dó asú yětɔn lɛ́ glɔ́, lěe yě nɔ hwihwɛ́ yěɖée dó Aklúnɔ glɔ́ gbɔn é. 23 Ðó asú wɛ nyí ta nú asi tɔn, lěe Klísu nyí ta nú agun ɔ, éé nyí agbaza tɔn é gbɔn é. Éyɛ́ wɛ nyí hwlɛngántɔ́ agbaza énɛ́ tɔn. 24 Nǔgbó ɔ, lěe agun ɔ nɔ hwíhwɛ́ éɖée dó Klísu glɔ́ gbɔn é ɔ, mɔ̌ ɖokpó ɔ wɛ asi lɛ́ lɔ ɖó ná nɔ hwíhwɛ́ yěɖée dó asú yětɔn lɛ́ glɔ́ gbɔn ɖo nǔ bǐ mɛ. 25 Asú lɛ́ mi, mi ní nɔ yí wǎn nú asi mitɔn, lěe Klísu lɔ yí wǎn nú agun ɔ, bo sɔ́ éɖée jó dó ta tɔn mɛ gbɔn é. 26 É wa mɔ̌, bo ná dó lɛ agun ɔ wé, lobo sɔ́ xó Mawu tɔn dó klɔ́ ná, cí nǔ ɖɔ sin wɛ é zán ɖɔhun, 27 bónú agun ɔ ná nyɔ́ ɖɛkpɛ ɖo nukún éɖésúnɔ tɔn mɛ, bɔ ɖixó alǒ blɔ̌ abǐ nǔ mɔ̌hun lɛ́ ɖěbǔ ná ɖo wǔ tɔn ǎ. É nyɔ́ wa ɔ, é ná mɛ́ bo ná ɖó blɔ̌ ɖěbǔ ǎ.

28 Ðo ali ɖokpó ɔ nu ɔ, asú lɛ́ ɖó ná yí wǎn nú asi yětɔn, agbaza yěɖésúnɔ tɔn ɖɔhun. Súnnu e yí wǎn nú asi tɔn ɔ yí wǎn nú éɖésúnɔ. 29 Ðó mɛ ɖěbǔ gbɛ́ wǎn nú agbaza éɖésúnɔ tɔn kpɔ́n ǎ, loɔ, é nɔ ná nǔɖuɖu i bo nɔ lébe n’i, lěe Klísu nɔ bló nú agun ɔ gbɔn é. 30 Ðó agbaza tɔn sín wǔjɔnú lɛ́ wɛ mǐ nyí. 31 “Ðó hwɛjijɔ énɛ́ wú ɔ, súnnu ná jó tɔ́ tɔn kpó nɔ tɔn kpó dó bo ná tɛ́ dó asi tɔn wú,* bɔ yě mɛ we lɛ́ ná nyí agbaza ɖokpó.” 32 Nǔbúdo Mawu tɔn énɛ́ d’agba. Klísu kpó agun ɔ kpó wú ɖɔ xó dó wɛ un ɖe din. 33 É ɖo mɔ̌ có, asú ɖokpó ɖokpó ɖó ná yí wǎn nú asi tɔn éɖésúnɔ ɖɔhun. Ðo alɔ ɖěvo mɛ ɔ, asi ɖó ná ɖó sísí ɖaxó nú asú tɔn.

6 Vǐ lɛ́ mi, mi ní nɔ se tónú nú mɛjitɔ́ mitɔn lɛ́ lěe Aklúnɔ jló gbɔn é, ɖó nǔ énɛ́ sɔgbe. 2 Sɛ́n nukɔntɔn e è dó, bɔ akpá ɖé gɔ́ ná é wɛ nyí: “Wlǐ yɛ̌yi nú tɔ́ towe kpó nɔ towe kpó. 3 Énɛ́ ɔ, nǔ bǐ ná yi ganjí* nú we, bɔ a ná dɔ́ ji ɖo ayǐkúngban jí.” 4 Gɔ́ ná ɔ, tɔ́ lɛ́ mi, mi ma nɔ dó xomɛsin nú vǐ mitɔn lɛ́ ó. É nyɔ́ wa ɔ, mi nɔ kplɔ́n yě sɔgbe xá nǔgbódodó Jexóva* tɔn lɛ́ kpó wěɖexámɛ tɔn lɛ́ kpó.

5 Kannumɔ lɛ́ mi, mi ní nɔ se tónú kpó ayi bǐ kpó nú gǎn mitɔn e ɖo ayǐkúngban jí lɛ́ é. Mi nɔ wa mɔ̌ kpó xɛsi kpó, kpódó sísí ɖaxó kpó, Klísu wa ná wɛ mi ɖe ɖɔhun; 6 é ní ma nyí hwenu e è ɖo mi kpɔ́n wɛ é kɛ́ɖɛ́ wɛ mi ná nɔ wa mɔ̌ bá dó nyɔ́ gbɛtɔ́ nukúnmɛ kpowun ó, loɔ, mi nɔ wa mɔ̌ kannumɔ Klísu tɔn e nɔ wa jlǒ Mawu tɔn kpó lǐndɔ̌n* yětɔn bǐ kpó lɛ́ é ɖɔhun. 7 Mi wa kannumɔzɔ́ mitɔn kpó jlǒ ɖagbe kpó, Jexóva* wa ná wɛ mi ɖe ɖɔhun, é nyí nú gbɛtɔ́ lɛ́ ǎ. 8 Ðó mi tuun ɖɔ ɖagbe ɖěbǔ e mɛ ɖokpó ɖokpó nɔ wa é ɔ, mɛ ɔ ná mɔ ajɔ tɔn ɖo Jexóva* gɔ́n, mɛ ɔ ná bo nyí kannumɔ alǒ ɖo éɖée sí ɔ nɛ́. 9 Gɔ́ ná ɔ, mi mɛ gǎn lɛ́ mi, mi ní kpo ɖo nǔ wa xá yě wɛ ɖo ali ɖokpó ɔ nu. Mi ma nɔ ván nukún dó* yě ó, ɖó mi tuun ɖɔ Gǎn yětɔn kpó mi lɔ tɔn kpó ɖo jǐxwé. É ka nɔ ɖe mɛɖé ɖó vo ɖo mɛɖé mɛ ǎ.

10 Bo ná dó fó ɔ, mi ní kpo ɖo hlɔ̌nhlɔ́n mɔ yí sín Aklúnɔ gɔ́n wɛ, ɖó hlɔ̌nhlɔ́n tɔn d’agba. 11 Mi fɔ ahwanfunnú e Mawu ná mi lɛ́ é bǐ kplá, bo ná dó sixú kpé wú bo gbí dɔn ɖo ayi wínníwínní* Awǒvi tɔn lɛ́ nukɔn. 12 Ðó mǐ ɖó ahwan* ɖé, é ka nyí hun kpó agbaza kpó ná fun* xá wɛ mǐ ɖe ǎ. Loɔ, awǒvi ɖěɖěe ɖo jǐxwé sín xá lɛ́ mɛ, bo nyí acɛkpikpa kpó gǎn kpó, éé ɖo acɛ kpa dó gbɛ e ɖo ablu mɛ é jí wɛ lɛ́ é ná fun* xá wɛ mǐ ɖe. 13 Ðó hwɛjijɔ énɛ́ wú ɔ, mi fɔ ahwanfunnú e Mawu ná mi lɛ́ é bǐ kplá, bo ná dó sixú kpé wú bo syɛ́nlǐn ɖo azǎn nyanya ɔ gbe, bɔ hwenu e mi ná wa nǔ lɛ́ bǐ fó gúdo é ɔ, mi ná gbí dɔn.

14 Énɛ́ wú ɔ, mi gbí dɔn, bónú nǔgbó ní nyí gǒjíblánú ɖo alin mitɔn. Nǔjlɔ́jlɔ́wiwa ní nyí ganwu ɖo kɔ mitɔn, 15 bónú gbesisɔmɛ ninɔ bo ná jlá wɛn ɖagbe fífá tɔn ɔ ní nyí afɔkpa ɖo afɔ mitɔn lɛ́. 16 Gbɔn vo nú nǔ énɛ́ lɛ́ bǐ ɔ, nǔɖiɖi ní nyí gǎglónú ɖaxó ɖo alɔ mitɔn mɛ, bónú mi ná sɔ́ dó xo gǎ myɔnɔ mɛ nyanya ɔ tɔn lɛ́ bǐ cí. 17 Gɔ́ ná ɔ, hwlɛngán ní nyí gangbákún ɖo ta mitɔn, bónú hwǐ gbigbɔ mímɛ́ tɔn, énɛ́ wɛ nyí xó Mawu tɔn, ní ɖo alɔ mitɔn mɛ. 18 Ðo hwe ɖokpó ɔ nu ɔ, mi ní nɔ fɔ́n bo nɔ ɖo ɖɛ xo wɛ ɖo ninɔmɛ lɛ́ bǐ mɛ ɖo kɔnɖókpɔ́ mɛ xá gbigbɔ ɔ, gbɔn ɖɛ tɛnmɛ tɛnmɛ lɛ́ xixo, kpó vosisa tɛnmɛ tɛnmɛ lɛ́ kpó gblamɛ. Énɛ́ wú ɔ, mi nɔ wunzɛn, bo nɔ sa vo dó mɛ mímɛ́ lɛ́ bǐ tamɛ hwebǐnu. 19 Mi nɔ xo ɖɛ dó ta nyi lɔ tɔn mɛ, bónú Mawu ní nɔ ná mì xó e sɔgbe é, hwenu e un hun nu bo ja xó ɖɔ gbé é. Énɛ́ ɔ, un ná sixú kpé wú bo nɔ ɖɔ xó kpó adɔgbígbó kpó, hwenu e un ɖo nǔbúdo Mawu tɔn e kunkplá wɛn ɖagbe ɔ é xó ɖɔ wɛ é. 20 Wɛn ɖagbe énɛ́ jlá wɛ un ɖe afɔsɔ́ɖótetɔ́ ɖé ɖɔhun, énɛ́ wú wɛ è dó wlɔ mì. Mi nɔ xo ɖɛ dó ta ce mɛ, bónú má sixú ɖɔ wɛn ɖagbe ɔ sín xó kpó adɔgbígbó kpó, lěe é ɖó ná nyí gbɔn é.

21 Din ɔ, bónú mi ná dó sixú lɛ́ tuun nǔ e wa wɛ un ɖe lɛ́ é kpó lěe un ɖe gbɔn é kpó ɔ, Ticíku e nyí nɔví súnnu vívɛ́ná ɖé, bo lɛ́ nyí sinsɛnzɔ́watɔ́ gbejínɔtɔ́ ɖé ɖo Aklúnɔ mɛ é ná ɖɔ nǔ lɛ́ bǐ nú mi. 22 Linlin énɛ́ wú wɛ un sɛ́ ɛ dó mi, bónú mi ná dó sixú tuun lěe mǐ ɖe gbɔn é, bɔ é ná lɛ́ dó gbɔ nú mi.

23 Mawu Tɔ́ ɔ kpó Aklúnɔ Jezu Klísu kpó, ní ná fífá kpó wǎnyíyí e zɔn kpɔ́ xá nǔɖiɖi é kpó nɔví lɛ́. 24 Fɛ́nú Mawu tɔn ní nɔ kpɔ́ xá mɛ ɖěɖěe ɖó wǎnyíyí adodwé nú Aklúnɔ mǐtɔn Jezu Klísu lɛ́ é bǐ.