WĚMA E È WLÁN SƐ́DÓ FILÍPUNU LƐ́ É

1 Nyɛ Pɔ́lu kpó Timɔtée kpó, éé nyí kannumɔ Klísu Jezu tɔn lɛ́ é wɛ ɖo wěma wlán sɛ́dó mɛ mímɛ́ e ɖo bǔ xá Klísu Jezu bo ɖo Filípu lɛ́ é bǐ, gɔ́ nú nukúnkpénǔwútɔ́ lɛ́ kpó mɛsɛntɔ́ agun tɔn lɛ́ kpó wɛ:

2 Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi.

3 Un nɔ dó kú nú Mawu ce hweɖébǔnu e un flín mi, 4 ɖo vo e un nɔ sa dó mi bǐ tamɛ lɛ́ é bǐ mɛ é. Kpó awǎjijɛ kpó wɛ un nɔ sa vo énɛ́ lɛ́ dó ta mitɔn mɛ, 5 ɖó gǔdo e mi nɔ nú wɛn ɖagbe ɔ* sín azǎn nukɔntɔn ɔ gbe, káká jɛ din é wútu. 6 Ðó un gán jɛ nǔ élɔ́ wú: mɛ e bɛ́ azɔ̌ ɖagbe ɖo mi wú é ná wa yi fó, káká jɛ Klísu Jezu sín azǎn gbe. 7 É sɔgbe ɖɔ má lin nǔ mɔ̌hun dó mi bǐ wú, ɖó mi ɖo ayi ce mɛ, mi wɛ nɔ gǔdo nú mì ɖo gan mɛ, bo lɛ́ nɔ gǔdo nú mì bɔ un jɛ hun dó wɛn ɖagbe ɔ jí, lobo ɖó ayǐ ɖo sɛ́n linu; mɔ̌ mɛ ɔ, nyi kpó mi kpó bǐ ɖó mǐmá ɖo fɛ́nú Mawu tɔn mɛ.

8 Mawu sixú ɖe kúnnu nú mì ɖɔ un jló tawun bo ná mɔ mi bǐ, ɖó un ɖó wǎnyíyí e gɔ́ngɔ́n é nú mi Klísu ɖɔhun. 9 Bɔ nǔ e tamɛ un nɔ fɔ́n bo nɔ ɖo ɖɛ xo dó wɛ é ɖíe: wǎnyíyí mitɔn ní kpo ɖo syɛ́nsyɛ́n d’é jí wɛ ɖo nǔtuuntuun e sɔgbe é kpó nukúnnúmɔjɛnǔmɛ mlɛ́mlɛ́ kpó mɛ; 10 mi ní tuun nǔ e nyí nǔ tají hú gǎn lɛ́ é, bo ná dó sixú nyí mɛ maɖóblɔ̌, bo ma wá nyí afɔklɛ́nnú nú mɛ ɖěvo lɛ́ ó, káká jɛ Klísu sín azǎn gbe; 11 bónú sínsɛ́n nǔjlɔ́jlɔ́wiwa tɔn e è nɔ ná gbɔn Jezu Klísu gblamɛ é ní dó sixú túnflá ɖo mi mɛ, bónú è ní kpa susu nú Mawu lobo mlá ɛ.

12 Din ɔ, nɔví lɛ́ mi, un jló ɖɔ mi ní tuun ɖɔ ninɔmɛ ce zɔ́n bɔ wɛn ɖagbe ɔ yi nukɔn, 13 ɖó Sɔ́ja hɔnmɛcɔ́tɔ́ lɛ́ bǐ kpó mɛ e kpo lɛ́ é bǐ kpó tuun ganjí ɖɔ Klísu wú wɛ un ɖo gan mɛ. 14 Gan mɛ e un ɖe é zɔ́n bɔ gěgé nɔví e ɖo sinsɛnzɔ́ wa nú Aklúnɔ wɛ lɛ́ é tɔn ɖó jiɖiɖe bo ɖo akɔ́n kpan wɛ hú gǎn, bo nɔ ɖɔ xó Mawu tɔn ma ɖi xɛsi.

15 Nǔgbó wɛ ɖɔ mɛɖé lɛ́ ɖo Klísu ɔ jlá wɛ ɖó mɛnújlójló kpó agbahwlɛ́nhwlɛ́n kpó wú, é ɖo mɔ̌ có, mɛ ɖěvo lɛ́ ɖo mɔ̌ wa wɛ ɖó yě ɖó jlǒ ɖagbe wú. 16 Yědɛɛ lɛ́ ɔ, wǎnyíyí wɛ nɔ sísɛ́ yě bɔ yě nɔ jlá Klísu ɔ, ɖó yě tuun ɖɔ è sɔ́ mì bónú má jɛ hun dó wɛn ɖagbe ɔ jí; 17 amɔ̌, mɛ ɖě lɛ́ ɔ, jlǒ cejɛ́nnábí tɔn wɛ nɔ sísɛ́ yě, yě nɔ wa mɔ̌ kpó linlin ɖagbe kpó ǎ, ɖó yě ɖo biba wɛ bo ná dɔn tagba wá nú mì ɖo gan mɛ. 18 Étɛ́ mɛ é ka tɔ́n kɔ dó? Nǔ ɔ wɛ nyí ɖɔ ɖěbǔ wɛ é ná bo nyí ɔ, è ɖo Klísu ɔ jlá wɛ, nú è ná bo ɖo mɔ̌ wa wɛ kpó linlin nyanya kpó alǒ kpó jlǒ ɖagbe kpó ɔ nɛ́, bɔ énɛ́ nɔ dó xomɛhunhun nú mì. Nǔgbó ɔ, un ná lɛ́ kpo ɖo awǎ jɛ wɛ, 19 ɖó un tuun ɖɔ énɛ́ ná tɔ́n kɔ dó hwlɛngán mɛ nú mì, ɖó vo e mi nɔ sa dó ta ce mɛ é, kpó gǔdo e gbigbɔ Jezu Klísu tɔn ɖe nú mì é kpó wú. 20 Énɛ́ sɔgbe xá nǔ e un ɖo te kpɔ́n vɛ́návɛ́ná bo ɖo nukún ɖó wɛ é, énɛ́ wɛ nyí ɖɔ winnyá ná hu mì ɖo ali ɖěbǔ nu ǎ; un ɖeji ɖɔ un ná vo bo ná kpo ɖo xó ɖɔ wɛ, mɔ̌ mɛ ɔ, agbaza ce ná kpa susu nú Klísu, lěe é ko nɔ nyí gbɔn tɛgbɛ é, un ɖo gbɛ oo alǒ un ná bo kú ɔ nɛ́.

21 Ðó ɖo ninɔmɛ ce mɛ ɔ, nú un ɖo gbɛ ɔ, un ɖo gbɛ nú Klísu, bɔ nú un kú ɔ, le wɛ é nyí nú mì. 22 Ényí un ɖó ná kpo ɖo gbɛ ɖo agbaza mɛ jɛ́n wɛ ɔ, azɔ̌ ce ná ná sínsɛ́n hú gǎn; é ɖo mɔ̌ có, nǔ e un ɖó ná sɔ́ é ɔ, un ɖɔ bónú mɛɖé tuun ǎ. 23 Nǔ we énɛ́ lɛ́ bǐ wɛ ɖo dindɔn mì wɛ, ɖó un jló ɖɔ è ní ɖe mì nyi te, bo lɛ́ ba ná nɔ kpɔ́ xá Klísu, bɔ é ɖo wɛn ɖɔ, énɛ́ nyɔ́ hú gǎn tawun. 24 É ɖo mɔ̌ có, é ɖo tají nú mì hú gǎn ɖɔ má nɔ agbaza mɛ dó ta mitɔn mɛ. 25 Ðó un gán jɛ énɛ́ wú wútu ɔ, un tuun ɖɔ un ná nɔ ayǐ bo ná nɔ kpɔ́ xá mi bǐ nú nukɔnyiyi mitɔn kpó awǎjijɛ mitɔn ɖo nǔɖiɖi mɛ kpó, 26 bónú awǎjijɛ mitɔn ní dó sixú túnflá ɖo Klísu Jezu mɛ ɖó nyɛ wú, hwenu e un ná lɛ́ ɖo kpɔ́ xá mi é.

27 Mi vɛ́ nɔ zán gbɛ* lěe é jɛxá wɛn ɖagbe e kunkplá Klísu é gbɔn é, bónú un wá bo mɔ mi alǒ un ma ɖo fínɛ́ ǎ ɔ, má dó sixú se dó mi wú ɖɔ mi gbí dɔn bo ɖo bǔ ɖo linlin ɖokpó ɔ mɛ,* lobo ɖo azɔ̌ wa ɖó kpɔ́ wɛ alɔ ɖo alɔ mɛ dó nǔɖiɖi e jínjɔ́n wɛn ɖagbe ɔ jí é tamɛ, 28 bónú gbeklánxámɛtɔ́ mitɔn lɛ́ ní ma dó xɛsi mi ɖo ali ɖěbǔ nu ó. Nǔ énɛ́ nyí xlɛ̌ nú yě ɖɔ è ná sú kún yětɔn dó, bo ka nyí xlɛ̌ hwlɛngán tɔn nú mi; Mawu wɛ ɖe énɛ́ xlɛ́. 29 Ðó è jɔ wǔ mi dó Klísu tamɛ, é ka nyí bónú mi ná ɖi nǔ n’i kɛ́ɖɛ́ ǎ, loɔ, bónú mi ná lɛ́ se wǔvɛ́ dó ta tɔn mɛ. 30 Ahwan e mi mɔ bɔ un fun, bɔ mi se din ɖɔ un kpo ɖo funfun wɛ é ɖokpó ɔ fun wɛ mi ɖe.

2 Ényí mi sixú dó wǔsyɛ́n lanmɛ nú mɛ ɖo Klísu mɛ hweɖébǔnu hǔn, ényí mi sixú dó gbɔ nú mɛ kpó wǎnyíyí kpó hweɖébǔnu hǔn, ényí mi sixú nɔ bǔ xá mɛ ɖo gbigbɔ lixo hweɖébǔnu hǔn, ényí mi sixú ɖó wǎnyíyí e gɔ́ngɔ́n é nú mɛ bo lɛ́ se wǔvɛ́ xá mɛ hweɖébǔnu hǔn, 2 mi ní ɖó linlin ɖokpó ɔ, wǎnyíyí ɖokpó ɔ, bo nɔ bǔ bǐ mlɛ́mlɛ́,* lobo nɔ nya nǔ ɖokpó ɔ gbé, dó bló bónú awǎjijɛ ce ní nyí awǎjijɛ kpíkpé. 3 Jlǒ cejɛ́nnábí tɔn alǒ goyíyí ní ma nɔ sísɛ́ mi, bónú mi ní nɔ wa nǔ ɖěbǔ ó, é nyɔ́ wa ɔ, mi ní nɔ sɔ́ miɖée hwe bo nɔ mɔ ɖɔ mɛ ɖě lɛ́ hú gǎn émí, 4 mi ní ma nɔ ba ɖagbe miɖésúnɔ tɔn kɛ́ɖɛ́ ó, loɔ, mi ní nɔ lɛ́ ba ɖagbe mɛ ɖě lɛ́ tɔn.

5 Mi ní nɔ ɖó linlin élɔ́ e Klísu Jezu lɔmɔ̌ ɖó é: 6 é ɖó ninɔmɛ Mawu tɔn có, é tlɛ lin vɔ́vɔ́ ɖɔ émí ná tɛ́n kpɔ́n bo ná sɔ́ émíɖée ɖó Mawu há jí ǎ. 7 Éǒ, é nyɔ́ wa ɔ, é jó nǔ e é ɖó é bǐ dó bo sɔ́ kannumɔ sín ninɔmɛ lobo húzú gbɛtɔ́.* 8 Hú mɔ̌ ɔ, hwenu e é wá bo nyí gbɛtɔ́ é* ɔ, é sɔ́ éɖée hwe bo se tónú káká yi kú, ɛɛn, yatín* jí wɛ é kú ɖe. 9 Ðó hwɛjijɔ énɛ́ wú ɔ, Mawu sɔ́ ɛ ɖó tɛn ɖaxó ɖé mɛ, bo nyɔ́ xomɛ lobo ná ɛ nyǐkɔ e hú gǎn nyǐkɔ ɖěvo ɖěbǔ é, 10 bónú ɖo Jezu nyíkɔ mɛ ɔ, mɛ bǐ ní jɛ kpo: mɛ e ɖo jǐxwé lɛ́ é, mɛ e ɖo ayǐkúngban jí lɛ́ é kpó mɛ e ɖo kɔ́ glɔ́ lɛ́ é* kpó bǐ, 11 lobonú mɛ bǐ ní yí gbe ɖo agbawungba ɖɔ Jezu Klísu nyí Aklúnɔ nú susu Mawu Tɔ́ ɔ tɔn.

12 Énɛ́ wú ɔ, nɔví ce vívɛ́ná lɛ́ mi, mi nɔ se tónú tɛgbɛ, é nyí hwenu e un ɖo fínɛ́ é kɛ́ɖɛ́ ǎ, loɔ, mi lɛ́ ɖo gbesisɔmɛ din hú gǎn bo nɔ wa mɔ̌ hwenu e un ma ɖo fínɛ́ ǎ é, énɛ́ wɛ zɔ́n bɔ un ɖo byɔ̌byɔ́ mi wɛ ɖɔ mi ní nɔ dó gǎn lɛ́ bǐ kpó xɛsi kpó, kpódó sísɔ́sísɔ́ kpán bá mɔ hwlɛngán. 13 Ðó Mawu wɛ nyí mɛ e ɖo azɔ̌ wa ɖo mi mɛ wɛ é, bo nɔ ná mi jlǒ kpó hlɔ̌nhlɔ́n kpó bǐ, bónú mi ná wa nǔ sɔgbe xá nǔ e nɔ hun xomɛ n’i lɛ́ é. 14 Mi ɖo nǔ ɖěbǔ wa wɛ hǔn, mi ní ma nɔ húnhún nǔ ɖɔ alǒ dɔn nǔ ɖ’é kɔn ó, 15 énɛ́ ɔ, mi ná nyí mɛ e wú è ma nɔ mɔ xó ɖé ɖɔ dó ǎ é kpó xomɛvɔ́nɔ kpó, mi ná nyí vǐ Mawu tɔn e ma ɖó blɔ̌ ɖo wǔ ǎ é ɖo jijimɛ gblégblé, ayigɛ́dɛ́gɛ́dɛ́nɔ ɖé tɛ́ntin; yě tɛ́ntin wɛ mi ɖo kínkɔ́n ɖe wɛ ɖo gbɛ ɔ mɛ, nǔ e nɔ ná wěziza lɛ́ é ɖɔhun, 16 bo nɔ tɛ́ dó xó e nɔ ná gbɛ mɛ é wú gbánwúngbánwún. Énɛ́ ɔ, un ná ɖó hwɛjijɔ bo ná j’awǎ ɖo Klísu sín azǎn gbe, ɖó un ná tuun ɖɔ un kún kán wezun dó wǔvɔ́, alǒ w’azɔ̌ syɛ́nsyɛ́n dó wǔvɔ́ ó. 17 É ɖo mɔ̌ có, ényí è tlɛ ɖo kinkɔn mì nyi ayǐ dó vɔ̌sísá kpó sinsɛnzɔ́ mímɛ́ kpó e kɔn nǔɖiɖi mitɔn dɔn mi wá é jí wɛ nǔníná vɛ̌ɛn tɔn* ɖé ɖɔhun ɔ, xomɛ nɔ hun mì, bɔ un nɔ j’awǎ xá mi bǐ. 18 Mɔ̌ ɖokpó ɔ, xomɛ ní hun mi lɔ bónú mi ní j’awǎ xá mì.

19 Din ɔ, un ɖo nukún ɖó wɛ ɖɔ ényí é jló Aklúnɔ Jezu ɔ, un ná sɛ́ Timɔtée dó mi ɖo malínmálín mɛ, bónú hwenu e un ná se lěe mi ɖe gbɔn é ɔ, énɛ́ ní dó sixú dó wǔsyɛ́n lanmɛ nú mì. 20 Ðó un sɔ́ ɖó mɛ ɖěvo ɖěbǔ bɔ é ɖó jijɔ tɔn lobɔ nǔ mitɔn ná ɖu ayi mɛ n’i nǔgbó nǔgbó ǎ. 21 Ðó mɛ ɖě lɛ́ bǐ ɔ, ɖagbe yěɖésúnɔ tɔn lɛ́ ba wɛ yě ɖe, é nyí Jezu Klísu tɔn lɛ́ ǎ. 22 Amɔ̌, mi tuun kúnnuɖenú e é ná dó éɖésúnɔ wú é, é wɛ nyí ɖɔ, vǐ kpó tɔ́ kpó ɖɔhun ɔ, é wa mɛsɛntɔ́zɔ́ xá mì nú nukɔnyiyi wɛn ɖagbe ɔ tɔn. 23 Énɛ́ wú ɔ, ényí un mɔ lěe nǔ lɛ́ ná yi gbɔn nú mì é tlóló ɔ, éyɛ́ wɛ nyí mɛ e un ɖo nukún ɖó wɛ bo ná sɛ́ dó mi é. 24 Nǔgbó ɔ, un ɖeji dó Aklúnɔ wú ɖɔ nyi lɔ ná wá zaanɖé.

25 Amɔ̌, din hwɛ̌ ɔ, un mɔ ɖɔ é ɖo dandan ɖɔ má sɛ́ Epaflodíti dó mi, nɔví ce wɛ bo nyí azɔ̌gbɛ́ ce, lobo lɛ́ nyí sɔ́ja hǎtɔ́ ce; é wɛ nyí mɛ e mi sɛ́ dó bónú é ná wa mɛsɛntɔ́zɔ́ dó kpé nukún dó hudó ce lɛ́ wú é. 26 Un ɖo sísɛ́ ɛ dó wɛ, ɖó é ɖo biba wɛ vɛ́návɛ́ná bo ná mɔ mi bǐ, bɔ se e mi se ɖɔ é jɛ azɔn é ɖó linkpɔ́n n’i wútu. 27 Nǔgbó ɔ, é jɛ azɔn káká bo ɖibla kú; amɔ̌, Mawu kú nǔbláwǔ n’i, è ka ná ɖɔ ɔ, é nyí éyɛ́ kɛ́ɖɛ́ wɛ é kú nǔbláwǔ ná ǎ, loɔ, é lɛ́ kú nǔbláwǔ nú nyi lɔ bónú un ma wá byɔ́ aluwɛ mɛ ɖě jɛ ɖě gúdo ó. 28 Énɛ́ wú ɔ, un yá wǔ tawun bo ɖo sísɛ́ ɛ dó wɛ bónú hwenu e mi ná mɔ ɛ é ɔ, xomɛ ní dó sixú lɛ́ hun mi lobonú ado ní ma sɔ́ hu nyi lɔ dín ó. 29 Hǔn, mi yí i kpó awǎjijɛ ɖaxó kpó lěe é nɔ nyí gbɔn ɖo Aklúnɔ mɛ é, lobonú mɛ mɔ̌hun lɛ́ ní kpo ɖo mɛ vívɛ́ná nyí nú mi wɛ, 30 ɖó é ɖibla kú dó Klísu* sín azɔ̌ ɔ tamɛ, bo sɔ́ gbɛ* tɔn ɖó axɔ́ nu bo ná mɔ tɛn dó sú fí élɔ́ e mi ma ɖe bo ná wa mɛsɛntɔ́zɔ́ dó ta ce mɛ ǎ é sín do wútu.

3 Bo ná dó fó ɔ, nɔví ce lɛ́ mi, mi ní nɔ ɖo awǎ jɛ wɛ ɖo Aklúnɔ mɛ. Nǔ ɖokpó ɔ lɛ́ wínwlán sɛ́dó mi nɔ ci kɔ nú mì ǎ, ɖó ayijayǐ mitɔn wútu wɛ.

2 Mi cɔ́ miɖée dó cukú lɛ́* wú; mi cɔ́ miɖée dó mɛ e nɔ hɛn nǔ gblé dó mɛ wú lɛ́ é wú; mi cɔ́ miɖée dó mɛ e nɔ já wǔtu lɛ́ é* wú. 3 Ðó mǐ mɛ e ɖo sinsɛnzɔ́ mímɛ́ wa wɛ gbɔn gbigbɔ Mawu tɔn gblamɛ, bo nɔ gó ɖo Klísu Jezu mɛ, lobo ma nɔ ɖeji dó agbaza ɔ wú ǎ lɛ́ é wɛ nyí mɛ e gbo ada jɔ ada lɛ́ é, 4 amɔ̌, ɖo mɛ lɛ́ bǐ mɛ ɔ, nyɛ wɛ ɖó hwɛjijɔ bo ná ɖeji dó agbaza ɔ wú.

Ényí mɛ ɖěvo ɖěbǔ lin ɖɔ émí ɖó hwɛjijɔ bo ná ɖeji dó agbaza ɔ wú ɔ, nyɛ ɖó hwɛjijɔ hú gǎn: 5 è gbo ada nú mì ɖo azǎn tántɔngɔ́ ɔ gbe, Izlayɛ́li ví wɛ nú mì, bɔ un jɔ ɖo akɔta Bɛnjamɛ́ɛ tɔn mɛ, Eblée wɛ nú mì bɔ mɛjitɔ́ ce lɛ́ lɔ nyí Eblée; un nyí Falizyɛn bo nɔ xwedó Sɛ́n ɔ tɛ́nwín lɛnwín; 6 un dó ya nú agun ɔ kpó kanɖódónǔwú kpó; un ɖe xlɛ́ ɖɔ un nyí mɛ e wú è ma nɔ mɔ nǔɖé ɖɔ dó ǎ é gbɔn Sɛ́n ɔ nyinyi tɛ́nwín lɛnwín gblamɛ. 7 É ɖo mɔ̌ có, nǔ e nyí le nú mì lɛ́ é ɔ, un kpɔ́n dó mɔ nǔlámɛ* ɖó Klísu wútu. 8 Hú mɔ̌ ɔ, un nɔ lɛ́ kpɔ́n nǔ bǐ dó mɔ nǔlámɛ, ɖó lě do Klísu Jezu Aklúnɔ ce tuuntuun xɔ akwɛ́ hú nǔ bǐ gbɔn é wú. Éyɛ́ wú wɛ un nɔ kpɔ́n nǔ lɛ́ bǐ dó mɔ nǔlámɛ, bo nɔ lɛ́ kpɔ́n nǔ lɛ́ bǐ dó mɔ zunkɔ́ ná, bo ná dó sixú ɖu Klísu sín le, 9 bɔ è ná mɔ mì ɖo bǔ xá ɛ. É nyí Sɛ́n ɔ e un xwedó é wɛ zɔ́n bɔ un nyí nǔjlɔ́jlɔ́watɔ́ ǎ, é nyɔ́ wa ɔ, nǔɖiɖi ɖíɖó nú Klísu wɛ zɔ́n bɔ un nyí nǔjlɔ́jlɔ́watɔ́; Mawu wɛ nɔ kpɔ́n mɛ dó mɔ nǔjlɔ́jlɔ́watɔ́ ɖó nǔɖiɖi wú. 10 Nǔ e gbé nya wɛ un ɖe é wɛ nyí ɖɔ má tuun Klísu kpó fínfɔ́n sín kú tɔn sín hlɔ̌nhlɔ́n kpó, bo ɖó mǐmá ɖo wǔvɛ́ e é se lɛ́ é mɛ, lobo jó nyiɖée dó nú kú alɔkpa e é kú é, 11 bo ná dó kpɔ́n ɖɔ ényí un wa nǔ e wú un kpé é bǐ ɔ, un ka sixú nɔ mɛ nukɔntɔn e è ná fɔ́n sín kú lɛ́ é mɛ a jí.

12 É nyí un ko mɔ yí, alǒ è ko bló bɔ un húzú mɛ maɖóblɔ̌ wɛ ǎ, é nyɔ́ wa ɔ, gǎn dó wɛ un ɖe bo ná kpɔ́n ɖɔ alɔ nyi lɔ tɔn ka sixú jɛ nǔ e wú Klísu Jezu sɔ́ mì* é wú a jí. 13 Nɔví lɛ́ mi, nyiɖée kpɔ́n dó mɔ mɛ e sín alɔ jɛ wú é wɛ un ko ɖe ǎ; amɔ̌, nǔ ɖokpó ɖo wɛn: Ée un ɖo ya wɔn nú nǔ e ɖo gǔdo lɛ́ é wɛ, bo ɖo gǎn dó wɛ xwe nǔ e ɖo nukɔn lɛ́ é kɔn é ɔ, 14 un ɖo wezun kán wɛ xwe nǔ e gbé nya wɛ un ɖe é kɔn, bo ná dó mɔ ylɔ̌ e Mawu ylɔ́ mǐ gbɔn Klísu Jezu gblamɛ bónú mǐ ná yi jǐxwé é sín ajɔ yí. 15 Énɛ́ wú ɔ, mi nú mǐ mɛ e zin lɛ́ é ní ɖó linlin énɛ́; ényí mi ɖó linlin ɖěvo ɖo ali ɖěbǔ nu ɔ, Mawu ná ɖe linlin e xó un ɖɔ wá yi é xlɛ́ mi. 16 Ðěbǔ wɛ é ná bo nyí ɔ, ényí bǎ ɖěbǔ mɛ wɛ mǐ ná bo yi nukɔn yi ɖó hǔn, mi nú mǐ ní kpo ɖo zɔnlin ɖi wɛ tlélé ɖo ali ɖokpó énɛ́ ɔ jí.

17 Nɔví lɛ́ mi, mi bǐ ní nɔ wa nǔ nyiɖɔhun; mi sɔ́ nukún mitɔn lɛ́ ɖó mɛ ɖěɖěe ɖo zɔnlin ɖi wɛ sɔgbe xá kpɔ́ndéwú e mǐ zé ɖ’ayǐ nú mi lɛ́ é jí. 18 Ðó mɛ gěgé tíin bo ɖo zɔnlin ɖi wɛ yatín* Klísu tɔn sín kɛntɔ́ lɛ́ ɖɔhun; un ko nɔ ɖɔ xó yětɔn hwɛhwɛ, amɔ̌ din ɔ, un lɛ́ ɖo xó yětɔn ɖɔ wɛ kpó avǐ kpó. 19 Kún yětɔn e è ná sú dó é wɛ ná nyí vivɔnu yětɔn, adɔgo yětɔn wɛ nyí mawu yětɔn, winnyá yětɔn wɛ nyí susu yětɔn, bɔ linlin yětɔn lɛ́ nɔ ɖo nǔ e nyí ayǐkúngban jí tɔn lɛ́ é jí. 20 Amɔ̌, toví jǐxwé tɔn lɛ́ wɛ nú mǐ, bɔ mǐ ɖo te kpɔ́n hwlɛngántɔ́ ɖé sín jǐxwé kpó akpakpa sɔ́ mɛ kpó, é wɛ nyí, Aklúnɔ Jezu Klísu; 21 é ná ɖyɔ́ agbaza mǐtɔn e ma hwɛ́n nǔɖé ǎ é, bɔ é ná cí agbaza éyɛ́tɔn susunɔ ɔ ɖɔhun,* gbɔn hlɔ̌nhlɔ́n ɖaxó e é nɔ zán dó hwíhwɛ́ nǔ lɛ́ bǐ dó éɖésúnɔ glɔ́ é gblamɛ.

4 Énɛ́ wú ɔ, nɔví ce e un yí wǎn ná bo ɖo nukún ɖó wɛ bo ná mɔ lɛ́ é mi, mi mɛ e nyí awǎjijɛ ce kpó axɔ́súgbákún ce kpó lɛ́ é mi, mɛ vívɛ́ná ce lɛ́ mi, mi gbí dɔn lěe un ko ɖɔ nú mi gbɔn é, ɖo Aklúnɔ mɛ.

2 Un ɖo byɔ̌byɔ́ Evodíi kpó Sɛntíci kpó wɛ vɛ́návɛ́ná ɖɔ yě ní ɖó linlin ɖokpó ɔ ɖo Aklúnɔ mɛ. 3 Ɛɛn, un lɛ́ ɖo byɔ̌byɔ́ hwi mɛ e nyí azɔ̌gbɛ́ ce gbejínɔtɔ́ é* wɛ ɖɔ a ní kpo ɖo alɔ dó nyɔ̌nu énɛ́ lɛ́ e xo kan* xá mì alɔ ɖo alɔ mɛ dó wɛn ɖagbe ɔ tamɛ lɛ́ é wɛ; yě lɛ́ xo kan* xá Klemáa kpó azɔ̌gbɛ́ ce e kpo, bɔ nyǐkɔ yětɔn ɖo gbɛwéma ɔ mɛ lɛ́ é kpó.

4 Mi ní nɔ j’awǎ hwebǐnu ɖo Aklúnɔ mɛ. Un lɛ́ ɖo vǐvɔ́ ɖɔ wɛ, mi ní nɔ j’awǎ! 5 Mi nú mɛ lɛ́ bǐ ní mɔ ɖɔ mi nɔ nɔ jlɛ̌ jí. Aklúnɔ ko sɛkpɔ́. 6 Ado ní ma nɔ hu mi dó nǔ ɖěbǔ wú ó, é nyɔ́ wa ɔ, ɖo ninɔmɛ lɛ́ bǐ mɛ ɔ, mi ní nɔ byɔ́ nǔ Mawu gbɔn ɖɛxixo, vosisa kpó kúdídó kpó gblamɛ; 7 énɛ́ ɔ, fífá Mawu tɔn e zɛ nukúnnúmɔjɛnǔmɛ bǐ wú é ná nya xɛ ɖo ayi mitɔn kpó linlin* mitɔn kpó jí gbɔn Klísu Jezu gblamɛ.

8 Bo ná dó fó ɔ, nɔví lɛ́ mi, nǔ ɖěbǔ e nyí nǔgbó é, nǔ ɖěbǔ e ɖo tají é, nǔ ɖěbǔ e sɔgbe é, nǔ ɖěbǔ e mɛ́ é, nǔ ɖěbǔ e è sixú yí wǎn ná é, nǔ ɖěbǔ e wú è nɔ ɖɔ xó ɖagbe dó é, nǔ ɖěbǔ e nyɔ́ é kpó nǔ ɖěbǔ e susu jɛxá é kpó é ɔ, mi ní nɔ ɖo tamɛ lin dó nǔ énɛ́ lɛ́ jí wɛ. 9 Nǔ e mi kplɔ́n bo yí gbe ná, bo se lobo mɔ ɖo gɔ̌n ce lɛ́ é ɔ, mi zán yě, énɛ́ ɔ, Mawu fífánɔ ɔ ná nɔ kpɔ́ xá mi.

10 Xomɛ hun mì tawun ɖo Aklúnɔ mɛ ɖɔ din ɔ, nǔ ce lɛ́ wá jɛ ayi mɛ ɖu nú mi jí. Nǔ ce ko nɔ ɖu ayi mɛ nú mi, amɔ̌, ali tɔn hun nú mi bónú mi ná ɖe xlɛ́ ǎ. 11 Hudó mɛ wɛ un ɖe wɛ zɔ́n bɔ un ɖo mɔ̌ ɖɔ wɛ ǎ, ɖó un ko kplɔ́n bɔ nǔ e un ɖó é nɔ kpé mì, un ná bo ɖo ninɔmɛ ɖěbǔ mɛ ɔ nɛ́. 12 Un tuun nǔ e è ɖó nǔ kpɛɖé nyí é, bo lɛ́ tuun nǔ e è ɖó nǔ gěgé nyí é. Ðo nǔ bǐ kpó ninɔmɛ bǐ kpó mɛ ɔ, un kplɔ́n bo tuun nǔ e è gɔ́ xo nyí é kpó nǔ e è ɖo xovɛ́ nyí é kpó, un lɛ́ kplɔ́n bo tuun nǔ e è ɖó nǔ gěgé nyí é kpó nǔ e nǔ hán mɛ nyí é kpó. 13 Mɛ e nɔ ná mì hlɔ̌nhlɔ́n é wɛ nɔ zɔ́n bɔ un nɔ mɔ hlɔ̌nhlɔ́n dó kpé nǔ lɛ́ bǐ wú.

14 É ɖo mɔ̌ có, alɔ e mi dó mì ɖo wǔvɛ́ ce mɛ é ɔ, nǔ ɖagbe wɛ é nyí bɔ mi wa. 15 Nǔgbó ɔ, mi mɛ Filípunu lɛ́ lɔ tuun ɖɔ, ée mi se wɛn ɖagbe ɔ azɔn nukɔntɔn ɔ gúdo, bɔ un gosín Masedwáni é ɔ, agun ɖěbǔ kún ɖó mǐmá ɖo nǔnámɛ kpó nǔyíɖomɛsí kpó sín xó ɔ mɛ xá mì zɛ midɛɛ lɛ́ kɛ́ɖɛ́ wú ó; 16 ɖó hwenu e un ɖo Tɛsaloníki é ɔ, mi sɛ́ nǔɖé dó mì bo ná sú hudó ce lɛ́ sín do, é ka nyí azɔn ɖokpó kɛ́ɖɛ́ ǎ, loɔ, azɔn we. 17 É nyí nǔníná ɖé ɖó nukún wɛ un ɖe ǎ, loɔ, sínsɛ́n e ná hɛn le wá nú mi d’é jí é ba wɛ un ɖe. 18 É ɖo mɔ̌ có, un ɖó nǔ e hudó mì lɛ́ é bǐ bo tlɛ lɛ́ ɖó hú mɔ̌. Din e un mɔ nǔ e mi sɛ́ dó mì gbɔn Epaflodíti jí lɛ́ é ɔ, nǔ ɖěbǔ sɔ́ hwedó mì ǎ; nǔ énɛ́ lɛ́ cí vɔ̌sísá wǎnɖagbenɔ e Mawu yí gbe ná, bɔ é nyɔ́ nukún tɔn mɛ tawun é ɖɔhun. 19 Mawu ce ná sú nǔ e hudó mi lɛ́ é bǐ sín do nú mi mlɛ́mlɛ́ sɔgbe xá dɔkun tɔn susunɔ ɔ gbɔn Klísu Jezu jí. 20 Susu ní nyí Mawu e lɛ́ nyí Tɔ́ mǐtɔn é tɔn káká sɔ́yi mavɔmavɔ. Amǐ.

21 Mi dó gbe mɛ mímɛ́ e ɖo bǔ xá Klísu Jezu lɛ́ é bǐ nú mì. Nɔví e ɖo kpɔ́ xá mì lɛ́ é dó gbe sɛ́dó mi. 22 Mɛ mímɛ́ lɛ́ bǐ, ɖo tají ɔ, yě mɛ e ɖo hɔnmɛ Sezáa tɔn lɛ́ é dó gbe sɛ́dó mi.

23 Fɛ́nú Aklúnɔ Jezu Klísu tɔn ní nɔ kpɔ́ xá mi, hwenu e mi ná ɖo jijɔ ɖagbe lɛ́ ɖe xlɛ́ wɛ é.