WĚMA WEGƆ́ E È WLÁN SƐ́DÓ TƐSALONÍKINU LƐ́ É

1 Nyɛ Pɔ́lu, Siivɛ́ɛn* kpó Timɔtée kpó wɛ ɖo wěma wlán sɛ́dó agun Tɛsaloníkinu e ɖo bǔ xá Mawu Tɔ́ mǐtɔn kpó Aklúnɔ Jezu Klísu kpó lɛ́ é tɔn wɛ:

2 Mawu Tɔ́ ɔ kpó Aklúnɔ Jezu Klísu kpó ní ná fɛ́nú kpó fífá kpó mi.

3 Nɔví lɛ́ mi, é ɖo dandan nú mǐ hwebǐnu ɖɔ mǐ ní nɔ dó kú nú Mawu dó ta mitɔn mɛ. É jɛxá ɖɔ mǐ ní wa mɔ̌, ɖó nǔɖiɖi mitɔn ɖo jijɛjí wɛ mɔ̌hunkɔtɔn, bɔ wǎnyíyí e mi mɛ ɖokpó ɖokpó ɖó nú miɖée lɛ́ é ɖo jijɛjí wɛ. 4 Nǔ e mɛ é tɔ́n kɔ dó é wɛ nyí ɖɔ mǐɖésúnɔ nɔ gó ɖó mi wú ɖo agun Mawu tɔn lɛ́ tɛ́ntin, ɖó yadónúmɛ lɛ́ kpó wǔvɛ́ lɛ́ kpó ɖo fínɛ́ có, mi ɖo didɛ wɛ, bo nɔ lɛ́ ɖe xlɛ́ ɖɔ émí ɖó nǔɖiɖi. 5 Hwɛ jlɔ́jlɔ́ ɖiɖɔ Mawu tɔn sín kúnnuɖenú ɖé wɛ énɛ́ nyí; é ná zɔ́n bɔ è ná kpɔ́n mi dó mɔ mɛ e jɛxá Axɔ́súɖuto Mawu tɔn lɛ́ é; é wú wɛ mi ɖo wǔvɛ́ se wɛ nǔgbó.

6 Ðó nǔgbó ɔ, nǔjlɔ́jlɔ́wiwa wɛ é nyí ɖɔ Mawu ní dɔn tó nú mɛ e nɔ dɔn wǔvɛ́ wá nú mi lɛ́ é. 7 Amɔ̌, è ná ná vivo mi mɛ e ɖo wǔvɛ́ se wɛ lɛ́ é gɔ́ nú mǐ, ɖo hwenu e è ná ɖe Aklúnɔ Jezu xlɛ́ sín jǐxwé kpó wɛnsagun tɔn hlɔ̌nhlɔ́nnɔ lɛ́ kpó, 8 ɖo myɔ hɛhɛ ɖé mɛ é; ɖo hwenɛ́nu ɔ, é ná ba hlɔn mɛ e ma tuun Mawu ǎ lɛ́ é kpó mɛ e ma nɔ se tónú nú wɛn ɖagbe e kunkplá Aklúnɔ mǐtɔn Jezu é ǎ lɛ́ é kpó wú. 9 Tó e è ná dɔn nú mɛ énɛ́ lɛ́ é wɛ nyí ɖɔ è ná sú kún yětɔn dó káká sɔ́yi sín Aklúnɔ kpó hlɔ̌nhlɔ́n tɔn susunɔ ɔ kpó nukɔn. 10 Nǔ ná nyí mɔ̌ hwenu e é ná wá, bónú è ná kpa susu nú é kpó mɛ mímɛ́ tɔn lɛ́ kpó, lobonú ɖo azǎn énɛ́ gbe ɔ, mɛ e ɖe xlɛ́ ɖɔ émí ɖi nǔ lɛ́ é bǐ ná kpɔ́n ɛ bɔ é ná jí wǔ nú yě é. Ðó mi ɖi nǔ nú kúnnu e mǐ ɖe nú mi é wútu ɔ, mi lɔ ná ɖó mǐmá ɖ’é mɛ.

11 Énɛ́ wú wɛ mǐ nɔ xo ɖɛ dó ta mitɔn mɛ hwebǐnu, bo nɔ byɔ́ ɖɔ Mawu mǐtɔn ní kpɔ́n mi dó mɔ mɛ e jɛxá ylɔ̌ e é ylɔ́ mi é; mǐ nɔ lɛ́ byɔ́ ɖɔ é ní zán hlɔ̌nhlɔ́n tɔn dó wa nǔ ɖagbe e nɔ nyɔ́ nukún tɔn mɛ lɛ́ é bǐ mlɛ́mlɛ́, lobo bló bónú nǔɖiɖizɔ́ mitɔn lɛ́ bǐ ní yi ta. 12 Nǔ nyí mɔ̌, bónú è ní dó sixú kpa susu nú Aklúnɔ mǐtɔn Jezu sín nyǐkɔ gbɔn gbla mitɔn mɛ, lobonú è ní dó sixú lɛ́ kpa susu nú mi ɖo bǔ e mi ɖe xá ɛ é mɛ, sɔgbe xá fɛ́nú Mawu mǐtɔn kpó Aklúnɔ Jezu Klísu kpó tɔn.

2 É ɖo mɔ̌ có, nɔví lɛ́ mi, ɖo fí ɖiɖe Aklúnɔ mǐtɔn Jezu Klísu tɔn kpó kplé e è ná kplé mǐ ɖó kpɔ́ xá ɛ é kpó kpáxwé ɔ, mǐ ɖo byɔ̌byɔ́ mi wɛ ɖɔ 2 ényí nǔɖɔɖayǐ* ɖé, wɛn ɖé, alǒ wěmasɛ́dómɛ e é cí ɖɔ é gosín mǐ gɔ́n é ɖé ɖɔ ɖɔ azǎn Jexóva* tɔn ko wá hǔn, énɛ́ ní ma yá wǔ dán mi bónú mi gɔn nǔwúkpíkpé tamɛ linlin tɔn mitɔn zán ó, ayi mitɔn ní ma ka gba dó ó.

3 Mi ma nú mɛ ɖěbǔ ní dɔn mi bú* ɖo ali ɖěbǔ nu ó, ɖó ényí gǔfínfɔ́n dó Mawu jí ma to wá jɛ nukɔn, bónú sɛ́ngbatɔ́ ɔ, éé nyí mɛ e è ná sú kún dó ná é jɛ wě ǎ ɔ, azǎn ɔ ná wá ǎ. 4 Sɛ́ngbatɔ́ ɔ, gbeklánxámɛtɔ́ wɛ n’i, bɔ é nɔ sɔ́ éɖée ɖó aga nú mɛ e gbɛtɔ́ lɛ́ nɔ kpɔ́n dó mɔ mawu lɛ́ é bǐ, alǒ nú nǔmɛsɛn lɛ́ bǐ, bɔ mɔ̌ mɛ ɔ, é jínjɔ́n tɛ́npli Mawu tɔn mɛ, bo nɔ ɖe xlɛ́ ɖo agbawungba ɖɔ émí nyí mawu ɖé. 5 Mi flín ɖɔ hwenu e un kpo ɖo kpɔ́ xá mi é ɔ, un nɔ ɖɔ nǔ énɛ́ lɛ́ nú mi ǎ cé?

6 Din ɔ, mi tuun nǔ e ɖo ali glɔ́n n’i wɛ, bónú é ní ma jɛ wě jɛ nukɔn nú hwenu e è ɖó dó é ó é. 7 Nǔgbó ɔ, hlɔ̌nhlɔ́n e sɛ́ngbigba énɛ́ ɖó bo nyí nǔbúdo é ko ɖo azɔ̌ wa wɛ, amɔ̌, mɔ̌ jɛ́n é ná nɔ káká jɛ hwenu e mɛ e ɖo ali glɔ́n n’i wɛ din é ma sɔ́ ná tíin ǎ é. 8 Énɛ́ gúdo ɔ, sɛ́ngbatɔ́ ɔ ná jɛ wě nǔgbó; Aklúnɔ Jezu ná hu i, gbɔn hlɔ̌nhlɔ́n e nɔ tɔ́n sín nu tɔn mɛ é gblamɛ,* bo ná sú kún tɔn dó, gbɔn fí ɖiɖe tɔn ɖiɖe xlɛ́ gblamɛ. 9 Amɔ̌, fí ɖiɖe sɛ́ngbatɔ́ ɔ tɔn ɔ, Satáan sín nǔwiwa wɛ; nǔ e gblamɛ é nɔ wa mɔ̌ gbɔn lɛ́ é wɛ nyí nǔjíwǔ tɛnmɛ tɛnmɛ lɛ́, wuntun mɛblɛ́blɛ́ tɔn lɛ́, nǔdabaɖa lɛ́ 10 kpó mɛblɛ́blɛ́ e nǔagɔwiwa nɔ dɔn wá lɛ́ é bǐ kpó. Nǔ énɛ́ lɛ́ nɔ blɛ́ mɛ e è ná sú kún dó ná lɛ́ é, bɔ énɛ́ nyí tódɔnnúmɛ ɖé nú yě, ɖó gbe e yě ma yí nú nǔgbó ɔ, bo yí wǎn ná, bónú è ná dó sixú hwlɛ́n yě gán ǎ é wútu. 11 Énɛ́ wú wɛ Mawu ná tɛn hlɔ̌nhlɔ́n mɛblɛ́blɛ́ tɔn ɖé, bónú é ná nɔ blɛ́ yě, bónú yě ní dó sixú ɖi nǔ nú adingban, 12 énɛ́ ɔ, è ná ɖɔ hwɛ xá yě bǐ, ɖó yě ɖi nǔ nú nǔgbó ɔ ǎ, bɔ nǔagɔwiwa nɔ víví nú yě wútu.

13 É ɖo mɔ̌ có, nɔví e Jexóva* yí wǎn ná lɛ́ é mi, é ɖo dandan nú mǐ hwebǐnu ɖɔ mǐ ní nɔ dó kú nú Mawu dó ta mitɔn mɛ, ɖó sín bǐbɛ́mɛ wɛ Mawu sɔ́ mi bónú mi ná mɔ hwlɛngán, gbɔn gbigbɔ tɔn zínzán dó bló bónú mi ní nyí mɛ mímɛ́ kpó nǔ e mi ɖi nú nǔgbó ɔ é kpó gblamɛ. 14 É gbɔn wɛn ɖagbe e mǐ nɔ jlá é gblamɛ dó ylɔ́ mi bónú mi ná mɔ hwlɛngán, bónú mi ní dó sixú mɔ susu Aklúnɔ mǐtɔn Jezu Klísu tɔn yí. 15 Énɛ́ wú ɔ, nɔví lɛ́, mi gbí dɔn, bo tɛ́ dó nǔ ɖěɖěe è kplɔ́n mi lɛ́ é wú, é ná bo nyí nǔ ɖěɖěe è kplɔ́n mi ɖó nu wú, alǒ gbɔn wěmasɛ́dómɛ mǐtɔn ɖé gblamɛ é ɔ nɛ́. 16 Gɔ́ ná ɔ, Aklúnɔ mǐtɔn Jezu Klísu ɖésúnɔ kpó Mawu Tɔ́ mǐtɔn e yí wǎn nú mǐ bo dó gbɔ nú mǐ káká sɔ́yi, lobo ná mǐ nukúnɖíɖó ɖagbe gbɔn fɛ́nú tɔn gblamɛ é kpó 17 ní dó gbɔ nú mi,* bo lɛ́ bló bónú mi ní lí dǒ* ɖo nǔɖagbewiwa bǐ kpó xó ɖagbe ɖiɖɔ bǐ kpó mɛ.

3 Bo ná dó fó ɔ, nɔví lɛ́, mi ní nɔ ɖo ɖɛ xo nú mǐ wɛ, bónú xó Jexóva* tɔn ní fɔ́n bo ɖo gbigba kpé wɛ bléblé, bónú è ní lɛ́ kpa susu ná, lěe é nyí gbɔn ɖo mi gɔ́n é, 2 lobonú è ní dó sixú hwlɛ́n mǐ ɖo mɛdídá lɛ́ kpó mɛ nyanya lɛ́ kpó lɔ mɛ, ɖó nǔɖiɖi nyí mɛ bǐ sín nǔ ǎ. 3 Amɔ̌, Aklúnɔ ɖo gbejí, é ná ná hlɔ̌nhlɔ́n mi, bo lɛ́ nya xɛ ɖo mi jí sín mɛ nyanya ɔ sí. 4 Gɔ́ ná ɔ, mǐ ɖeji dó mi wú ɖo Aklúnɔ mɛ ɖɔ mi ɖo wě e mǐ ɖe xá mi lɛ́ é xwedó wɛ, bo ka ná lɛ́ kpo ɖ’é wú. 5 Aklúnɔ ní kpo ɖo ali xlɛ́ ayi mitɔn lɛ́ wɛ, bónú mi ná yí wǎn nú Mawu, bo lɛ́ ɖó didɛ e sín hudó mi ɖó, bá xwedó Klísu é.

6 Din ɔ, nɔví lɛ́, mǐ ɖo wě ɖe xá mi wɛ ɖo Aklúnɔ mǐtɔn Jezu Klísu nyíkɔ mɛ ɖɔ mi ní hɔn nú nɔví ɖěbǔ, éé nɔ zán gbɛ hannyahannya, bo ma nɔ zán gbɛ sɔgbe xá nǔ e mi* mɔ yí ɖo gɔ̌n mǐtɔn lɛ́ é* ǎ é. 7 Miɖésúnɔ tuun lěe mi ɖó ná wa nǔ mǐɖɔhun gbɔn é, ɖó mǐ zán gbɛ hannyahannya ɖo tɛ́ntin mitɔn ǎ, 8 mɔ̌ jɛ́n mǐ ma ka lɛ́ ɖu mɛɖé sín nǔɖuɖu vɔ̌nu* ǎ é nɛ́. É nyɔ́ wa ɔ, mǐ wa azɔ̌ syɛ́nsyɛ́n, bo lɛ́ xo kan zǎn kéze, bo ma wá sɔ́ agban kpinkpɛn dó mi mɛ ɖěbǔ jí ó. 9 É nyí mǐ ɖó acɛ bo ná yí nǔ ɖo mi sí ǎ wú wɛ ǎ, loɔ, mǐ ba ná nyí kpɔ́ndéwú nú mi, bónú mi ná xwedó. 10 Nǔgbó ɔ, hwenu e mǐ ɖo kpɔ́ xá mi é ɔ, mǐ ko nɔ ɖe gbe élɔ́ nú mi: “Ényí mɛ ɖěbǔ ma jló ná w’azɔ̌ ǎ hǔn, mɛ ɔ ní bo ma ɖu nǔ ó.” 11 Ðó mǐ se ɖɔ mɛɖé lɛ́ ɖo gbɛ hannyahannya zán wɛ ɖo mi mɛ, bo nɔ w’azɔ̌ ɖěbǔ ǎ, lobo nɔ ɖo nu dó nǔ e ma kan yě ǎ lɛ́ é mɛ wɛ. 12 Mǐ ɖo gbe ɖe nú mɛ mɔ̌hun lɛ́ wɛ, bo lɛ́ ɖo byɔ̌byɔ́ yě wɛ vɛ́návɛ́ná ɖo Aklúnɔ Jezu Klísu mɛ ɖɔ yě ɖó ná wa azɔ̌ ɖo fífá mɛ, bo lɛ́ ɖu nǔɖuɖu e yěɖésúnɔ jɛ tagba bo mɔ lɛ́ é.

13 Amɔ̌ nɔví lɛ́, midɛɛ lɛ́ ɔ, mi ma jó gbe ɖo nǔɖagbewiwa mɛ ó. 14 Ényí mɛ ɖěbǔ ma ka nɔ se tónú nú xó e mǐ ɖɔ gbɔn wěmasɛ́dómɛ élɔ́ gblamɛ lɛ́ é ǎ hǔn, mi ɖó kɛ́n mɛ énɛ́ jí, bo ma sɔ́ nɔ dó gbɛ̌ xá ɛ ɖě ó, bónú winnyá ní dó sixú hu i. 15 É ɖo mɔ̌ có, mi ma sɔ́ ɛ dó ɖó kɛntɔ́ ó, loɔ, mi kpo ɖo wě ɖe xá ɛ wɛ nɔví ɖɔhun.

16 Din ɔ, Aklúnɔ fífánɔ ɔ ɖésúnɔ ní nɔ ná fífá mi hwebǐnu ɖo ali lɛ́ bǐ nu. Aklúnɔ ní nɔ kpɔ́ xá mi bǐ.

17 Nyɛ Pɔ́lu dó gbe sɛ́dó mi, alɔ nyiɖésúnɔ tɔn wɛ un sɔ́ dó wlán ná. Wuntun ɖé wɛ é nyí ɖo wěmasɛ́dómɛ ce lɛ́ bǐ mɛ; lěe un nɔ wlán nǔ gbɔn é nɛ́.

18 Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ.