WĚMA E È WLÁN SƐ́DÓ EBLÉE LƐ́ É

1 Ðo hwexónu ɔ, Mawu ɖɔ xó nú tɔ́gbó mǐtɔn lɛ́ gbɔn gbeyíɖɔ lɛ́ gblamɛ ɖo ninɔmɛ gěgé mɛ, bo lɛ́ wa mɔ̌ ɖo ali gěgé nu. 2 Din ɔ, ɖo vivɔnu azǎn élɔ́ lɛ́ tɔn ɔ, é ɖɔ xó nú mǐ gbɔn vǐ tɔn gblamɛ; é wɛ é sɔ́, bɔ é nyí gǔɖutɔ́ nǔ lɛ́ bǐ tɔn, lobɔ é bló gbɛ* ɔ gbɔn jǐ tɔn. 3 É wɛ nyí susu Mawu tɔn sín xlɛ̌, bo nyí akpajlɛ́ mɛ e Mawu nyí tawun é tɔn pɛ́pɛ́pɛ́; é hɛn nǔ lɛ́ bǐ ɖó te gbɔn xó tɔn hlɔ̌nhlɔ́nnɔ ɔ gblamɛ. Ée é lɛ mǐ wé sín hwɛ mǐtɔn lɛ́ mɛ gúdo é ɔ, é jínjɔ́n ɖisíxwé nú Mawu Susubǐnɔ ɔ ɖo jǐxwé. 4 Énɛ́ wú ɔ, é wá hú gǎn wɛnsagun lɛ́ sɔmɔ̌, bɔ nyǐkɔ e sín gǔ é wá ɖu é ɖo tají hú yětɔn.

5 Ði kpɔ́ndéwú ɔ, wɛnsagun lɛ́ ɖětɛ́ Mawu ka ɖɔ ná gbeɖé ɖɔ: “Vǐ ce wɛ a nyí; égbé ɔ, un húzú tɔ́ towe”? Bo lɛ́ ɖɔ: “Un ná húzú tɔ́ tɔn, bɔ é ná húzú vǐ ce”? 6 Amɔ̌, hwenu e é lɛ́vɔ́ sɛ́ nukɔngbéví tɔn dó gbɛ ɔ mɛ* é ɔ, é ɖɔ: “Wɛnsagun Mawu tɔn lɛ́ bǐ ní ɖe kɔ́* n’i.”

7 Gɔ́ ná ɔ, é ɖɔ dó wɛnsagun lɛ́ wú ɖɔ: “É nɔ bló bɔ wɛnsagun tɔn lɛ́ nɔ nyí gbigbɔ, bo nɔ bló bɔ sinsɛnzɔ́watɔ́ tɔn lɛ́* nɔ cí myɔ e ɖo jiji wɛ é ɖɔhun.” 8 Amɔ̌, é ɖɔ dó Vǐ ɔ wú ɖɔ: “Mawu wɛ nyí axɔ́súzinkpo towe káká sɔ́yi mavɔmavɔ, bɔ gǎnkpo Axɔ́súɖuto towe tɔn nyí gǎnkpo nǔjlɔ́jlɔ́wiwa* tɔn. 9 A yí wǎn nú nǔjlɔ́jlɔ́wiwa, bo gbɛ́ wǎn nú sɛ́ngbigba. Énɛ́ wɛ zɔ́n bɔ Mawu, Mawu towe kɔn ami awǎjijɛ tɔn dó ta nú we dó sɔ́ we, bɔ é hú gǎn hǎgbɛ́ towe lɛ́ tɔn.” 10 É lɛ́ ɖɔ: “Aklúnɔ è, ɖo bǐbɛ́mɛ ɔ, a ɖó dodónú ayǐkúngban ɔ tɔn lɛ́ ayǐ, bɔ jǐnukúnsin nyí alɔ towe núwiwa. 11 Ayǐkúngban ɔ kpó jǐnukúnsin kpó ná dɔn, amɔ̌, hwɛ ná kpo ɖo te; yě bǐ ná gbi lěe awu nɔ gbi gbɔn é, 12 bɔ a ná mlá yě awu ɖaxó ɖɔhun, bo ná ɖyɔ́ yě awu ɖɔhun. Amɔ̌ hwɛ ɔ, mɛ ɖokpó ɔ wɛ a nyí, bɔ xwe towe lɛ́ ná wá vivɔnu gbeɖé ǎ.”

13 Wɛnsagun lɛ́ ɖětɛ́ Mawu ka ɖɔ ná gbeɖé ɖɔ: “Jǐnjɔ́n ɖisí ce xwé káká jɛ hwenu e un ná sɔ́ kɛntɔ́ towe lɛ́ dó bló afɔɖótɛn towe é”? 14 Gbigbɔ wɛ yě bǐ nyí bo nɔ wa sinsɛnzɔ́ mímɛ́,* bɔ è sɛ́ yě dó bónú yě ná d’alɔ mɛ ɖěɖěe ná mɔ hwlɛngán yí lɛ́ é ǎ cé?

2 Énɛ́ wú wɛ é ɖo tají ɖɔ mǐ ní wlí tó nǔ e mǐ se lɛ́ é wú hú lěe mǐ ko nɔ wa gbɔn é, bo ma wá bú ali gbeɖé ó. 2 Ðó ényí xó e è ɖɔ gbɔn wɛnsagun lɛ́ gblamɛ é ɖó gǎnjɛwú, bɔ è dɔn tó nú mɛ ɖó sɛ́ngbigba bǐ kpó tónúmase bǐ kpó wú, sɔgbe xá hwɛjijɔ ɔ, 3 nú mǐ dó vɛ̌ nú hwlɛngán e d’agba gbɔn mɔ̌ é ɔ, nɛ̌ mǐ ka ná xo gló tódɔnnúmɛ gbɔn? Ðó Aklúnɔ mǐtɔn jɛ hwlɛngán énɛ́ sín xó ɖɔ jí, bɔ mɛ ɖěɖěe se bɔ é ɖo ɖiɖɔ wɛ lɛ́ é dó zǒgbe jí nú mǐ; 4 ée é ɖo ɖiɖɔ wɛ é ɔ, Mawu ɖe kúnnu ná gbɔn wuntun lɛ́, nǔdabaɖa lɛ́, nǔjíwǔ tɛnmɛ tɛnmɛ lɛ́ kpó gbigbɔ mímɛ́ níná mɛ sɔgbe xá jlǒ tɔn kpó gblamɛ.

5 Ðó é nyí wɛnsagun lɛ́ sín acɛ glɔ́ wɛ é sɔ́ gbɛ* e jawě, bɔ mǐ ɖo xó tɔn ɖɔ wɛ é ɖó ǎ. 6 Loɔ, kúnnuɖetɔ́ ɖé ɖɔ ɖo fí ɖé ɖɔ: “Étɛ́ gbɛtɔ́ ka nyí bɔ a nɔ flín i? Alǒ étɛ́ gbɛtɔ́ví ka nyí bɔ a nɔ kpé nukún dó wǔ tɔn? 7 A bló bɔ hlɔ̌nhlɔ́n tɔn hwe hú wɛnsagun lɛ́ tɔn kpɛɖé; a xɔ susu n’i, bo wlí yɛ̌yi n’i, lobo sɔ́ ɛ ɖó alɔ towe núwiwa lɛ́ nu. 8 Nǔ lɛ́ bǐ wɛ a sɔ́ ɖó afɔ tɔn lɛ́ glɔ́.” Ée Mawu sɔ́ nǔ lɛ́ bǐ ɖó glɔ̌ tɔn é ɔ, é jó nǔ ɖěbǔ dó bónú é gɔn glɔ̌ tɔn nɔ ǎ. Amɔ̌ din ɔ, mǐ ko mɔ nǔ lɛ́ bǐ ɖo glɔ̌ tɔn ǎ. 9 Mǐ ka mɔ Jezu; è bló bɔ hlɔ̌nhlɔ́n tɔn hwe hú wɛnsagun lɛ́ tɔn kpɛɖé, bɔ din ɔ, è xɔ susu n’i, bo lɛ́ wlí yɛ̌yi n’i, ɖó kú e é kú é wú, bónú gbɔn fɛ́nú Mawu tɔn gblamɛ ɔ, é ní dó sixú kú dó mɛ bǐ tamɛ.

10 Ðó mɛ e wú nǔ lɛ́ bǐ tíin, bɔ yě lɛ́ tíin gbɔn gbla tɔn mɛ é ɖo blǒbló wɛ bónú vǐ gěgé ní xɔ susu wútu ɔ, é sɔgbe ɖɔ é ní bló bónú Afɔsɔ́ɖótetɔ́gán hwlɛngán yětɔn tɔn ní nyí mɛ maɖóblɔ̌ gbɔn wǔvɛ́ lɛ́ gblamɛ. 11 Ðó mɛ ɖokpó ɔ gɔ́n wɛ mɛ e ɖo blǒbló wɛ bónú è ná nyí mɛ mímɛ́ é kpó mɛ ɖěɖěe è ɖo blǒbló wɛ bónú yě ná nyí mɛ mímɛ́ lɛ́ é kpó bǐ gosín; hwɛjijɔ énɛ́ wú wɛ winnyá ma hu i bónú é ná ylɔ́ yě ɖɔ nɔví ǎ; 12 ɖó é ɖɔ: “Un ná jlá nyǐkɔ towe nɔví ce lɛ́, un ná ji han dó kpa susu nú we ɖo agun mɛ.” 13 É lɛ́ ɖɔ: “Un ná ɖeji dó wǔtu tɔn.” Bo lɛ́ ɖɔ: “Nyi kpó vǐ kpɛví ɖěɖěe Jexóva* ná mì lɛ́ é kpó ɖíe.”

14 Énɛ́ wú ɔ, ɖó “vǐ kpɛví lɛ́” ɖó mǐmá ɖo hun kpó agbaza kpó mɛ wútu ɔ, mɔ̌ ɖokpó ɔ, é lɔmɔ̌ ɖó mǐmá ɖo nǔ énɛ́ lɛ́ ɖokpó ɔ mɛ, bónú gbɔn kú tɔn gblamɛ ɔ, é ní dó sixú sú kún dó nú mɛ e ɖó nǔwúkpíkpé bo ná hu mɛ é, mɛ énɛ́ wɛ nyí Awǒvi; 15 mɔ̌ mɛ ɔ, é ná tún kan nú mɛ ɖěɖěe é sín xɛsi e yě nɔ ɖi nú kú é wú, bɔ yě nɔ kannumɔgbénu ɖo gbɛzán yětɔn bǐ mɛ lɛ́ é bǐ. 16 Ðó é ɖo wɛn ɖɔ é kún nyí wɛnsagun lɛ́ d’alɔ wɛ é ɖe ó, loɔ, kúnkan* Ablaxámu tɔn d’alɔ wɛ é ɖe. 17 Énɛ́ wú ɔ, é ɖó ná cí “nɔví” tɔn lɛ́ ɖɔhun ɖo ali bǐ nu, bo ná dó kpé wú bo húzú vɔ̌sánúxwlémawutɔ́ ɖaxó e nɔ kú nǔbláwǔ nú mɛ, bo lɛ́ ɖo gbejí é ɖé ɖo nǔ e kunkplá Mawu lɛ́ é mɛ, bo ná mɔ tɛn dó xwlé vɔ̌sísá hwɛsúnsúnsínkɔnúmɛ tɔn ɖé Mawu dó togun ɔ sín hwɛ lɛ́ tamɛ.* 18 Ðó éɖésúnɔ se wǔvɛ́ hwenu e è ɖo tíntɛ́n ɛ kpɔ́n wɛ é wútu ɔ, é ɖó nǔwúkpíkpé bo ná d’alɔ mɛ ɖěɖěe tɛ́n kpɔ́n wɛ è ɖe lɛ́ é.

3 Énɛ́ wú ɔ, nɔví mímɛ́ lɛ́ mi, midɛɛ lɛ́ e è ylɔ́ bɔ mi ná yi jǐxwé lɛ́ é ɔ, mi ní sɔ́ ayi ɖó Jezu e mǐ yí gbe ɖɔ* é nyí mɛsɛ́dó bo lɛ́ nyí vɔ̌sánúxwlémawutɔ́ ɖaxó é jí. 2 É nɔ gbejí nú Mɛ e sɔ́ ɛ é, lěe Mɔyízi lɔ nɔ gbejí gbɔn ɖo xwé Mɛ énɛ́ tɔn bǐ gbe é. 3 Ðó è kpɔ́n ɛ* dó mɔ mɛ e jɛxá susu hú gǎn Mɔyízi é, ɖó è nɔ wlí yɛ̌yi nú mɛ e gbá xɔ ɖé é hú xɔ ɔ ɖésúnɔ. 4 Nǔgbó ɔ, mɛɖé jɛ́n nɔ gbá xɔ ɖé, Mawu wɛ ka nyí mɛ e bló nǔ lɛ́ bǐ é. 5 Mɔyízi nɔ gbejí mɛsɛntɔ́ ɖé ɖɔhun ɖo xwé Mɛ énɛ́ tɔn bǐ gbe, bɔ énɛ́ nyí kúnnuɖenú* nǔ e è ná wá ɖɔ ɖo nukɔnmɛ lɛ́ é tɔn, 6 amɔ̌, Klísu nɔ gbejí vǐ ɖɔhun ɖo xwé Mawu tɔn nu. Nǔgbó ɔ, mǐdɛɛ lɛ́ wɛ nyí xwé tɔn, ényí mǐ tɛ́ dó vo e mǐ nɔ vo bo nɔ ɖɔ xó é kpó nukúnɖíɖó e wú mǐ nɔ gó é kpó wú gbánwúngbánwún, káká jɛ vivɔnu ɔ nɛ́.

7 Énɛ́ wú ɔ, lěe gbigbɔ mímɛ́ ɖɔ gbɔn é ɔ: “Ényí mi se gbe tɔn égbé hǔn, 8 mi ma nú ayi mitɔn syɛ́n, lěe é nyí gbɔn hwenu e è dó xomɛsin nú mì syɛ́nsyɛ́n, ɖo gbe e gbe è tɛ́n mì kpɔ́n ɖo gbětótló mɛ é ó. 9 Tɔ́gbó mitɔn lɛ́ mɔ nǔwiwa ce lɛ́ nú xwe 40 có, yě tɛ́n mì kpɔ́n bo dó mì kpɔ́n ɖo fínɛ́. 10 Énɛ́ wú wɛ jijimɛ énɛ́ xyɔ́ wǔ nú mì, bɔ un ɖɔ: ‘Ayi yětɔn nɔ ɖo ali bú wɛ hwebǐnu, bɔ yě ko kplɔ́n bo tuun ali ce lɛ́ ǎ.’ 11 Énɛ́ wú ɔ, un xwlé nǔ ɖo xomɛsin ce mɛ ɖɔ: ‘Yě ná byɔ́ gbɔjɛ ce mɛ ǎ.’”

12 Nɔví lɛ́ mi, mi cɔ́ miɖée, bónú mɛ ɖěbǔ ní ma ɖo mi mɛ bo wá ɖó ayi nyanya e ma nɔ ɖi nǔ ǎ é, ɖó é sɛ yi zɔ nú Mawu gbɛɖe ɔ wútu ó; 13 amɔ̌, mi ní nɔ ɖo akɔ́nkpinkpan ná miɖée lɛ́ wɛ gbe bǐ gbe, káká jɛ hwenu e azǎn e è ylɔ́ ɖɔ “égbé” é ná kpo ɖo te é, bónú mɛ ɖěbǔ ní ma ɖo mi mɛ bo wá ɖó ayi e syɛ́n é, ɖó hlɔ̌nhlɔ́n mɛblɛ́blɛ́ tɔn hwɛhuhu tɔn wútu ó. 14 Ðó ényí mǐ tɛ́ dó jiɖiɖe e mǐ ɖó ɖo bǐbɛ́mɛ é wú gbánwúngbánwún, káká jɛ vivɔnu ɔ jɛ́n mǐ ná ɖó mǐmá xá Klísu nǔgbó. 15 Lěe è ɖɔ gbɔn é ɔ: “Ényí mi se gbe tɔn égbé hǔn, mi ma nú ayi mitɔn syɛ́n, lěe é nyí gbɔn hwenu e è dó xomɛsin nú mì syɛ́nsyɛ́n é ó.”

16 Nǔgbó ɔ, mɛ̌ mɛ̌ e ka se, cóbó ka dó xomɛsin n’i syɛ́nsyɛ́n? Yě mɛ e Mɔyízi kplá tɔ́n sín Ejípu lɛ́ é bǐ wɛ ǎ cé? 17 Mɛ̌ mɛ̌ e ka xyɔ́ wǔ nú Mawu nú xwe 40? Yě mɛ ɖěɖěe hu hwɛ bo kú ɖo gbětótló mɛ lɛ́ é wɛ ǎ cé? 18 Bɔ mɛ̌ mɛ̌ e é ka xwlé nǔ ná ɖɔ yě kún ná byɔ́ gbɔjɛ émítɔn mɛ ó? Mɛ ɖěɖěe tlí tó lɛ́ é wɛ ǎ cé? 19 Énɛ́ wú ɔ, mǐ mɔ ɖɔ yě kún kpé wú bo byɔ́ gbɔjɛ tɔn mɛ ó, ɖó nǔɖiɖi e yě ma ɖó ǎ é wú.

4 Énɛ́ wú ɔ, ɖó akpá e Mawu dó ɖɔ è ná byɔ́ gbɔjɛ émítɔn mɛ é kpo ɖo te wútu ɔ, mi nú mǐ ní nɔ acéjí,* bónú mɛ ɖěbǔ ní ma ɖo mi mɛ, bónú è kpɔ́n ɛ dó mɔ mɛ e ma jɛxá ǎ é ó. 2 Ðó è jlá wɛn ɖagbe ɔ mǐ, lěe è jlá yě lɔmɔ̌ gbɔn é; amɔ̌, xó e yě se lɛ́ é hɛn le wá nú yě ǎ, ɖó yě ɖó nǔɖiɖi ɖokpó ɔ mɛ e ɖótó lɛ́ é ɖɔhun ǎ. 3 Mǐ mɛ e ɖe xlɛ́ ɖɔ mǐ ɖi nǔ lɛ́ é byɔ́ gbɔjɛ ɔ mɛ, ɖó azɔ̌ tɔn lɛ́ ko fó sín hwenu e è ɖó gbɛ ɔ ayǐ é* có, é ɖɔ: “Énɛ́ wú ɔ, un xwlé nǔ ɖo xomɛsin ce mɛ ɖɔ: ‘Yě ná byɔ́ gbɔjɛ ce mɛ ǎ.’” 4 Ðó é ɖɔ dó azǎn tɛ́nwegɔ́ ɔ wú ɖo fí ɖé ɖɔ: “Bɔ ée Mawu wa azɔ̌ tɔn lɛ́ bǐ gúdo é ɔ, é gbɔjɛ ɖo azǎn tɛ́nwegɔ́ ɔ gbe.” 5 É lɛ́ ɖɔ ɖo fí ɖěvo ɖɔ: “Yě ná byɔ́ gbɔjɛ ce mɛ ǎ.”

6 Énɛ́ wú ɔ, ɖó é kpo mɛɖé lɛ́ bo ná byɔ́ mɛ, bɔ é sín tónúmase wú bɔ mɛ ɖěɖěe è jlá wɛn ɖagbe ɔ jɛ nukɔn lɛ́ é ma byɔ́ mɛ ǎ wútu ɔ, 7 é lɛ́vɔ́ sɔ́ azǎn ɖé, ɖó ée hwenu gěgé ko wá yi gúdo é ɔ, é ɖɔ: “Égbé” ɖo ɖɛhan Davídi tɔn mɛ; lěe è ko ɖɔ gbɔn ɖo aga é ɔ: “Ényí mi se gbe tɔn égbé hǔn, mi ma nú ayi mitɔn syɛ́n ó.” 8 Ðó ényí Jozuwée ko kplá yě byɔ́ gbɔjɛtɛn ɖé mɛ wɛ ɔ, Mawu sɔ́ ná wá ɖɔ azǎn ɖěvo xó ǎ. 9 Énɛ́ wú ɔ, gbɔjɛ sín azǎn ɖé kpo ɖo te nú togun Mawu tɔn. 10 Ðó mɛ e byɔ́ gbɔjɛ Mawu tɔn mɛ é ɖó azɔ̌ éɖésúnɔ tɔn lɛ́ wiwa lɔ te, lěe Mawu gbɔjɛ gbɔn hwenu e é wa azɔ̌ tɔn fó gúdo é.

11 Énɛ́ wú ɔ, mi nú mǐ ní wa nǔ e wú mǐ kpé é bǐ bá byɔ́ gbɔjɛ énɛ́ mɛ, bónú mɛ ɖěbǔ ní ma xwedó tónúmase sín kpɔ́ndéwú ɖokpó ɔ ó. 12 Ðó xó Mawu tɔn ɖo gbɛ, bo ɖó hlɔ̌nhlɔ́n; é ɖá hú hwǐ nuwenɔ ɖěbǔ; é nɔ yi káká bo nɔ má lǐndɔ̌n* kpó gbigbɔ* kpó ɖó vovo; é nɔ ɖe gǒflɛ́mɛ lɛ́ ɖó vo nú fɔn lɛ́; é kpé wú bo nɔ mɔ nukúnnú jɛ linlin gbɛtɔ́ tɔn lɛ́ kpó nǔ e ɖo ayi tɔn mɛ lɛ́ é kpó mɛ. 13 Nǔɖíɖó ɖěbǔ ɖe bo ɖo hwlǎhwlá dó Mawu ǎ, loɔ, nǔ lɛ́ bǐ wɛ ɖo mɛ̌ bo ɖo wědedé ɖo éyɛ́ mɛ e mǐ ɖó ná ɖó gbe ná é nukɔn.

14 Énɛ́ wú ɔ, ɖó mǐ ɖó vɔ̌sánúxwlémawutɔ́ ɖaxó bǐ e xo jǐnukúnsin zlɛ́ é, Jezu Vǐ Mawu tɔn ɔ wútu ɔ, mi nú mǐ ní kpo ɖo nǔɖiɖi e mǐ ɖó n’i é jlá wɛ ɖo agbawungba. 15 Ðó é nyí vɔ̌sánúxwlémawutɔ́ ɖaxó e ma sixú se wǔvɛ́ xá mǐ ɖo gǎnmaɖó mǐtɔn lɛ́ mɛ ǎ é wɛ mǐ ɖó ǎ, loɔ, vɔ̌sánúxwlémawutɔ́ ɖaxó e mǐ ɖó é ɔ, è tɛ́n ɛ kpɔ́n ɖo ali bǐ nu mǐɖɔhun, é ka hu hwɛ ǎ. 16 Énɛ́ wú ɔ, mi nú mǐ ní sɛkpɔ́ axɔ́súzinkpo fɛ́nú tɔn ɔ kpó jiɖiɖe* kpó, bónú mǐ ní dó sixú mɔ nǔbláwǔkúnúmɛ kpó fɛ́nú kpó yí, bɔ yě ná d’alɔ mǐ ɖo hwetɔnnu.

5 Ðó vɔ̌sánúxwlémawutɔ́ ɖaxó ɖěbǔ e è sɔ́ ɖo gbɛtɔ́ lɛ́ mɛ é ɔ, bo ná dó wa sinsɛnzɔ́ nú Mawu dó gbɛtɔ́ lɛ́ tamɛ wú wɛ è nɔ sɔ́, bónú é ní dó sixú xwlé nǔníná lɛ́ kpó vɔ̌sánú lɛ́ kpó Mawu dó hwɛ lɛ́ tamɛ. 2 É kpé wú bo ná se wǔvɛ́ xá* mɛ e ma tuun nǔɖé ǎ lɛ́ é kpó mɛ e nɔ wa nǔ nyi do lɛ́ é* kpó, ɖó é lɔ nɔ ɖí xwi xá gǎnmaɖó éɖésúnɔ tɔn lɛ́. 3 Énɛ́ wú ɔ, é ɖó ná xwlé nǔníná Mawu dó hwɛ éɖésúnɔ tɔn lɛ́ tamɛ, lěe é nɔ xwlé dó mɛ e ɖo togun ɔ mɛ lɛ́ é tamɛ gbɔn é.

4 Mɛɖé nɔ wlí yɛ̌yi énɛ́ nú éɖée ǎ, loɔ, ényí Mawu ylɔ́ ɛ ɔ jɛ́n é nɔ mɔ yí, lěe é nyí gbɔn nú Aalɔ́ɔn é. 5 Énɛ́ wú ɔ, Klísu lɔ xɔ susu nú éɖée, gbɔn vɔ̌sánúxwlémawutɔ́ ɖaxó nyínyí gblamɛ ǎ, loɔ, Mɛ e ɖɔ xó élɔ́ n’i é wɛ xɔ susu n’i: “Vǐ ce wɛ a nyí; égbé ɔ, un húzú tɔ́ towe.” 6 Lěe é lɛ́ ɖɔ gbɔn ɖo akpá ɖěvo xwé é ɔ: “A nyí vɔ̌sánúxwlémawutɔ́ káká sɔ́yi Mɛlukisedɛ́ki ɖɔhun.”

7 Hwenu e Klísu ɖo gbɛ ɖo ayǐkúngban jí é ɔ,* é sa vo bo lɛ́ byɔ́ nǔ Mɛ e kpé wú bo ná hwlɛ́n ɛ sín kú sí é kpó xósúsú ɖaxó kpó, kpódó avǐ kpán, bɔ é se ɖɛ tɔn lɛ́, ɖó é ɖó sísí e gɔ́ngɔ́n é nú Mawu wútu. 8 Vǐ wɛ é nyí có, é kplɔ́n tónúsise, gbɔn nǔ e sín wǔvɛ́ é se lɛ́ é gblamɛ. 9 Ée è bló bɔ é nyí mɛ maɖóblɔ̌* gúdo é ɔ, é húzú mɛ e gblamɛ mɛ ɖěɖěe se tónú n’i lɛ́ é bǐ ná mɔ hwlɛngán mavɔmavɔ gbɔn é, 10 ɖó Mawu sɔ́ ɛ, bɔ é nyí vɔ̌sánúxwlémawutɔ́ ɖaxó Mɛlukisedɛ́ki ɖɔhun.

11 Mǐ ɖó nǔ gěgé bo ná ɖɔ dó wǔ tɔn, é ka vɛ́ wǔ bɔ è ná tínmɛ, ɖó mi wá húzú mɛ e ma nɔ yá wǔ mɔ nukúnnú jɛ nǔ mɛ ǎ lɛ́ é. 12 Ðó nǔkplɔ́nmɛtɔ́ wɛ mi ɖó ná ko nyí din* có, é ka lɛ́ byɔ́ ɖɔ mɛɖé ní kplɔ́n xó mímɛ́ Mawu tɔn lɛ́ sín nǔ dodónú tɔn lɛ́ mi bɛ́sín bǐbɛ́mɛ, bɔ mi húzú mɛ e ɖó hudó anɔ̌sin tɔn, b’ɛ ma nyí nǔɖuɖu syɛ́nsyɛ́n tɔn ǎ lɛ́ é. 13 Mɛ ɖěbǔ e kpo ɖo anɔ̌sin nu wɛ é tuun xó nǔjlɔ́jlɔ́wiwa tɔn ɔ ǎ, ɖó vǐ yɛ̌yɛ́ wɛ é nyí. 14 Amɔ̌, nǔɖuɖu syɛ́nsyɛ́n ɔ, mɛ e zin lɛ́ é tɔn wɛ, mɛ ɖěɖěe nɔ zán nǔwúkpíkpé nukúnnúmɔjɛnǔmɛ tɔn yětɔn, bɔ mɔ̌ mɛ ɔ, yě kplɔ́n nǔwúkpíkpé énɛ́, bónú é ná nɔ tuun nǔ ɖagbe ɖó vo nú nǔ nyanya lɛ́ é tɔn wɛ.

6 Énɛ́ wú ɔ, din e mǐ ko yi nukɔn bo zɛ nǔkplɔ́nmɛ nukɔntɔn ɖěɖěe kunkplá Klísu é wú é ɔ, mi nú mǐ ní dó gǎn bo zin; mǐ ní ma ka vɔ́ dodónú ɔ ɖó ayǐ ó, énɛ́ wɛ nyí, nǔwiwa maɖótaɖé lɛ́ ní vɛ́ nú mɛ* kpó nǔɖiɖi ɖíɖó nú Mawu kpó, 2 nǔkplɔ́nmɛ e kunkplá batɛ́mu vovo lɛ́ kpó alɔ sísɔ́ ɖó mɛ jí kpó é, nǔkplɔ́nmɛ e kunkplá fínfɔ́n sín kú mɛkúkú lɛ́ tɔn kpó hwɛɖiɖɔ mavɔmavɔ ɔ kpó é. 3 Ényí Mawu jló ɔ, nǔ e mǐ ná wa é nɛ́.

4 Ðó mɛ ɖěɖěe ko nɔ wěziza nu kpɔ́n, bo ɖɔ́ nǔníná vɔ̌nu jǐxwé tɔn ɔ kpɔ́n, bo lɛ́ ɖó mǐmá ɖo gbigbɔ mímɛ́ ɔ mɛ, 5 lobo lɛ́ ɖɔ́ xó ɖagbe Mawu tɔn kpó hlɔ̌nhlɔ́n gbɛ* e ja é tɔn lɛ́ kpó kpɔ́n, 6 bo ka lɛ́ kɔ sín nǔɖiɖi ɔ gúdo lɛ́ é ɔ, è sixú lɛ́ bló bónú hwɛ yětɔn lɛ́ ní vɛ́ nú yě* ǎ, ɖó yěɖésúnɔ lɛ́vɔ́ xwe Vǐ Mawu tɔn nyi atín wú, bo dó winnyá ɛ ɖo agbawungba. 7 Ényí ayǐkúngban nu jǐ e nɔ ja kɔn nyi jǐ tɔn hwɛhwɛ é sín sin, bo ná sínsɛ́n ɖagbe mɛ e wú è lɛ lɛ́ é ɔ, é nɔ mɔ nyɔ̌ná Mawu tɔn yí. 8 Amɔ̌, ényí é ná wunkan kpó gběhan nyanya kpó ɔ, è nɔ jó è dó bɔ nudómɛ nɔ ɖo te kpɔ́n ɛ, lobɔ ɖo vivɔnu ɔ, è ná dó è zo.

9 Amɔ̌, mɛ vívɛ́ná ce lɛ́ mi, midɛɛ lɛ́ ɔ, mǐ gán jɛ wú ɖɔ nǔ ɖagbe hú gǎn lɛ́ wa wɛ mi ɖe, nǔ e nɔ zɔ́n bɔ è nɔ mɔ hwlɛngán lɛ́ é, ényí mǐ ná bo tlɛ ɖo xó ɖɔ wɛ gbɔn mɔ̌ ɔ nɛ́. 10 Ðó Mawu nyí nǔagɔwatɔ́ bo ná wɔn azɔ̌ e mi wa é kpó xlɛ́ e mi xlɛ́ ɖɔ émí yí wǎn nú nyǐkɔ tɔn é kpó ǎ. Lěe mi wa nǔ énɛ́ lɛ́ gbɔn é wɛ nyí ɖɔ mi d’alɔ mɛ mímɛ́ lɛ́, bo ka lɛ́ kpo ɖo alɔ dó yě wɛ. 11 Amɔ̌, mǐ jló ɖɔ mi mɛ ɖokpó ɖokpó ní nɔ w’azɔ̌ syɛ́nsyɛ́n gbɔn mɔ̌, bo ná dó ɖeji dó nukúnɖíɖó ɔ wú bǐ mlɛ́mlɛ́, káká jɛ vivɔnu, 12 énɛ́ ɔ, mi ná húzú fɔnlínnɔ ǎ, é nyɔ́ wa ɔ, mi ná nɔ wa nǔ mɛ ɖěɖěe ɖu gǔ akpá lɛ́ tɔn gbɔn nǔɖiɖi kpó suúlu kpó gblamɛ lɛ́ é ɖɔhun.

13 Ðó hwenu e Mawu dó akpá nú Ablaxámu é ɔ, ɖó mɛ ɖěbǔ ma hú gǎn ɛ bónú é ná xwlé ǎ wútu ɔ, é xwlé éɖésúnɔ, 14 bo ɖɔ: “Un ná kɔn nyɔ̌ná dó jǐ towe dandan, un ná bló bɔ kúnkan towe ná sukpɔ́ dandan.” 15 Hǔn, ée Ablaxámu ɖó suúlu gúdo é ɔ, è dó akpá énɛ́ n’i. 16 Ðó gbɛtɔ́ lɛ́ ɔ, mɛ e hú gǎn yě é wɛ yě nɔ xwlé, bɔ nǔ e yě nɔ xwlé é nɔ ɖó nǔdindɔn bǐ te, ɖó é nɔ nyí gǎnjɛwú nú yě ɖo sɛ́n lixo. 17 Ðo ali ɖokpó ɔ nu ɔ, hwenu e Mawu wá gbeta ɔ kɔn bo ná ɖe lěe linlin* tɔn ma nɔ húzú ǎ gbɔn é xlɛ́ mɛ e ná ɖu gǔ akpá ɔ tɔn lɛ́ é nyi wɛn hú gǎn é ɔ, é xwlé nǔ dó ná gǎnjɛwú tɔn,* 18 bónú gbɔn nǔ we énɛ́ lɛ́ e ma sixú húzú ǎ, lobɔ Mawu ma sixú ɖó adingban ɖo yě mɛ ǎ lɛ́ é gblamɛ ɔ, mǐ mɛ e hɔn wá bibɛtɛn lɛ́ é ní dó sixú ɖó akɔ́nkpinkpan ɖaxó, bo zunfán nukúnɖíɖó e è sɔ́ ɖó nukɔn nú mǐ é gbánwúngbánwún. 19 Mǐ ɖó nukúnɖíɖó énɛ́ bɔ é cí gandótɔnu ɖɔhun nú lǐndɔ̌n,* é ɖó jiɖe bo lɛ́ lí dǒ; é lɛ́ yi xɔmɛgbovɔ ɔ gúdo. 20 Fínɛ́ wɛ nukɔntɔ́ ɖé yi dó ta mǐtɔn mɛ, mɛ énɛ́ wɛ nyí Jezu; é húzú vɔ̌sánúxwlémawutɔ́ ɖaxó Mɛlukisedɛ́ki ɖɔhun káká sɔ́yi.

7 Ðó Mɛlukisedɛ́ki énɛ́ e nyí axɔ́sú Salɛ́mu tɔn, bo lɛ́ nyí vɔ̌sánúxwlémawutɔ́ Mawu Ajalɔ̌nlɔn ɔ tɔn é yi kpé Ablaxámu, hwenu e Ablaxámu ɖu ɖo axɔ́sú lɛ́ jí bo lɛ́ kɔ é, lobo kɔn nyɔ̌ná dó jǐ tɔn, 2 bɔ Ablaxámu ná ɛ mǎɖówǒ nǔ lɛ́ bǐ tɔn.* Jɛ nukɔn hwɛ̌ ɔ, nyǐkɔ tɔn sín tínmɛ wɛ nyí “Axɔ́sú nǔjlɔ́jlɔ́wiwa tɔn,” bɔ gɔ́ nú énɛ́ ɔ, é lɛ́ nyí axɔ́sú Salɛ́mu tɔn, énɛ́ wɛ nyí “Axɔ́sú fífánɔ.” 3 È tuun tɔ́ tɔn ǎ, è tuun nɔ tɔn ǎ, è tuun kúnkan tɔn ǎ, è tuun gbe e gbe è ji i é ǎ, è ka lɛ́ tuun gbe e gbe é kú é ǎ, mɔ̌ mɛ ɔ, é cí Vǐ Mawu tɔn ɖɔhun, bo nyí vɔ̌sánúxwlémawutɔ́ káká sɔ́yi.*

4 Mi kpɔ́n lěe nya énɛ́ e tatɔ́ xwédo tɔn* Ablaxámu ná mǎɖówǒ nǔ ɖagbe hú gǎn e yě bɛ́ ɖo ahwangbénu lɛ́ é tɔn é nyí nǔɖaxó sɔ é! 5 Nǔgbó ɔ, sɔgbe xá Sɛ́n ɔ, è ɖe gbe nú Levíi ví e è sɔ́ vɔ̌sánúxwlémawutɔ́ lɛ́ é ɖɔ yě ní nɔ yí mǎɖówǒ ɖo togun ɔ sí, énɛ́ wɛ nyí, ɖo nɔví yětɔn lɛ́ sí, ényí mɛ énɛ́ lɛ́ ná bo tlɛ nyí kúnkan Ablaxámu tɔn ɔ nɛ́. 6 Amɔ̌, nya énɛ́ e ma nyí kúnkan Levíi tɔn ǎ é yí mǎɖówǒ ɖo Ablaxámu sí, bo kɔn nyɔ̌ná dó mɛ e è dó akpá lɛ́ ná é jí. 7 É ɖo wɛn din ɖɔ mɛ e nyí nǔɖaxó é wɛ kɔn nyɔ̌ná dó mɛ e hwe hú gǎn é jí. 8 Ðo ninɔmɛ nukɔntɔn ɔ mɛ ɔ, mɛ e sixú kú lɛ́ é wɛ mɔ mǎɖówǒ yí, amɔ̌, ɖo ninɔmɛ wegɔ́ ɔ mɛ ɔ, mɛ e è ɖe kúnnu ná ɖɔ é ɖo gbɛ é wɛ mɔ yí. 9 Gɔ́ ná ɔ, è sixú ɖɔ ɖɔ Levíi e nɔ mɔ mǎɖówǒ yí é ɖésú tlɛ sú mǎɖówǒ gbɔn Ablaxámu jí, 10 ɖó é nyí kúnkan sɔgúdo tɔn tɔ́gbó tɔn Ablaxámu tɔn, hwenu e Mɛlukisedɛ́ki kpé Ablaxámu é.

11 Vɔ̌sánúxwlémawutɔ́zɔ́ e Levíi ví lɛ́ nɔ wa é nyí Sɛ́n e è ná togun ɔ é sín akpáxwé ɖé; hǔn, ényí vɔ̌sánúxwlémawutɔ́zɔ́ e yě nɔ wa é sixú zɔ́n bɔ è nyí mɛ maɖóblɔ̌ ɔ, étɛ́wú è ka ná lɛ́ ɖó hudó vɔ̌sánúxwlémawutɔ́ ɖěvo tɔn, bɔ é ná cí Mɛlukisedɛ́ki ɖɔhun, b’ɛ ma ná cí Aalɔ́ɔn ɖɔhun ǎ? 12 Ðó è ɖo vɔ̌sánúxwlémawutɔ́zɔ́ ɔ húzú wɛ wútu ɔ, é ɖo dandan ɖɔ è ní húzú Sɛ́n ɔ lɔmɔ̌. 13 Ðó akɔta ɖěvo mɛ wɛ nya e wú è ɖɔ xó énɛ́ lɛ́ dó é gosín; akɔta énɛ́ sín mɛ ɖě ka wa sinsɛnzɔ́ ɖo vɔ̌sákpe ɔ kɔn ǎ. 14 Ðó é ɖo wɛn ɖɔ kúnkan Judáa tɔn mɛ wɛ Aklúnɔ mǐtɔn jɔ ɖe, é ɖo mɔ̌ có, Mɔyízi ɖɔ xó ɖěbǔ dó vɔ̌sánúxwlémawutɔ́ ná gosín akɔta énɛ́ mɛ wú ǎ.

15 Bɔ énɛ́ tlɛ jɛ wě hú gǎn hwenu e vɔ̌sánúxwlémawutɔ́ ɖěvo wá bo cí Mɛlukisedɛ́ki ɖɔhun é; 16 é húzú mɛ mɔ̌hun, é ka nyí gbɔn nǔ e Sɛ́n ɔ byɔ́ bɔ é nɔ sín kúnkan e mɛ è jɔ ɖe é wú é gblamɛ ǎ, loɔ, é nyí mɔ̌ gbɔn hlɔ̌nhlɔ́n gbɛ e è ma sixú sú kún dó ná ǎ é tɔn gblamɛ. 17 Ðó è ɖe kúnnu dó wǔ tɔn ɖɔ: “A nyí vɔ̌sánúxwlémawutɔ́ káká sɔ́yi Mɛlukisedɛ́ki ɖɔhun.”

18 Énɛ́ wú ɔ, è dɔn nǔ gbɔn gbeɖiɖe nukɔntɔn ɔ jí, ɖó é vɔ́ da bo lɛ́ ɖó le ɖě ǎ. 19 Ðó Sɛ́n ɔ bló bónú nǔ ɖěbǔ húzú nǔ maɖóblɔ̌ ǎ, amɔ̌, nukúnɖíɖó e nyɔ́ hú gǎn bɔ Mawu ná mǐ é wa mɔ̌; gbɔn nukúnɖíɖó énɛ́ gblamɛ ɔ, mǐ ɖo sisɛkpɔ́ Mawu wɛ. 20 Gɔ́ ná ɔ, Mawu xwlé nǔ, hwenu e é sɔ́ Jezu vɔ̌sánúxwlémawutɔ́ é 21 (ɖó nǔgbó ɔ, mɛɖé lɛ́ tíin bɔ è xwlé nǔ cóbɔ yě húzú vɔ̌sánúxwlémawutɔ́ ǎ, amɔ̌, éyɛ́ húzú vɔ̌sánúxwlémawutɔ́ gbɔn xó élɔ́ e Mɛ e xwlé nǔ n’i é ɖɔ é gblamɛ: “Jexóva* ko xwlé nǔ ɖɔ: ‘A nyí vɔ̌sánúxwlémawutɔ́ káká sɔ́yi,’ é ná húzú linlin tɔn* ǎ”), 22 mɔ̌ mɛ ɔ, Jezu húzú gǎnjɛwú akɔjijɛ e nyɔ́ hú gǎn é tɔn.* 23 Gɔ́ ná ɔ, mɛ gěgé nyí vɔ̌sánúxwlémawutɔ́ ɖě jɛ ɖě gúdo, ɖó kú nɔ zɔ́n bɔ yě nɔ nyí mɔ̌ káká sɔ́yi ǎ, 24 amɔ̌, ɖó éyɛ́ kpo ɖo gbɛ káká sɔ́yi wútu ɔ, vɔ̌sánúxwlémawutɔ́ ɖěbǔ ná jɛ tɛn tɔn mɛ ǎ. 25 Hǔn, é lɛ́ kpé wú bo ná hwlɛ́n mɛ ɖěɖěe ɖo sisɛkpɔ́ Mawu wɛ gbɔn jǐ tɔn lɛ́ é bǐ mlɛ́mlɛ́, ɖó é ɖo gbɛ tɛgbɛ bo ná sa vo dó ta yětɔn mɛ.

26 Ðó vɔ̌sánúxwlémawutɔ́ ɖaxó mɔ̌hun wɛ é jɛxá ɖɔ mǐ ní ɖó, é ɖo gbejí, é nyí xomɛvɔ́nɔ, é nyí mɛ mímɛ́, é gbɔn vo nú hwɛhutɔ́ lɛ́, bɔ è lɛ́ sɔ́ ɛ su ɖo jǐxwé. 27 É gbɔn vo nú vɔ̌sánúxwlémawutɔ́ ɖaxó ɖě lɛ́, é byɔ́ ɖɔ é ní sá vɔ̌ ayǐhɔ́ngbe ayǐhɔ́ngbe dó hwɛ éɖésúnɔ tɔn lɛ́ tamɛ jɛ nukɔn, lobo wá sá dó togun ɔ tɔn lɛ́ tamɛ ǎ, ɖó é ko sá vɔ̌ azɔn ɖokpó bɔ xó fó, hwenu e é sɔ́ éɖée jó é. 28 Ðó Sɛ́n ɔ nɔ sɔ́ súnnu e ɖó gǎnmaɖó lɛ́ é, bɔ yě nɔ nyí vɔ̌sánúxwlémawutɔ́ ɖaxó, amɔ̌, xó e Mawu ɖɔ bo xwlé nǔ d’é jí ɖo Sɛ́n ɔ gúdo é ɔ, Vǐ e é bló bɔ é nyí mɛ maɖóblɔ̌ káká sɔ́yi é wɛ é sɔ́.

8 Din ɔ, nǔ e ɖo tají ɖo nǔ e ɖɔ wɛ mǐ ɖe lɛ́ é mɛ é ɖíe: Vɔ̌sánúxwlémawutɔ́ ɖaxó mɔ̌hun wɛ mǐ ɖó, bɔ é jínjɔ́n ɖisíxwé nú axɔ́súzinkpo Mawu Susubǐnɔ ɔ tɔn ɖo jǐxwé; 2 sinsɛnzɔ́watɔ́ tɛn mímɛ́ ɔ kpó goxɔ adodwé ɔ kpó tɔn wɛ é nyí,* Jexóva* wɛ gbá goxɔ énɛ́, é nyí gbɛtɔ́ ǎ. 3 Vɔ̌sánúxwlémawutɔ́ ɖaxó lɛ́ bǐ ɔ, è nɔ sɔ́ yě bónú yě ná xwlé nǔníná lɛ́ kpó vɔ̌sánú lɛ́ kpó Mawu; énɛ́ wú ɔ, é ɖo dandan ɖɔ é lɔmɔ̌ ní ɖó nǔɖé bo ná xwlé Mawu. 4 Ényí ayǐkúngban jí wɛ é ko ɖe ɔ, é ná nyí vɔ̌sánúxwlémawutɔ́ ǎ, ɖó súnnu ɖé lɛ́ ko ɖo ayǐkúngban jí bo ɖo nǔníná lɛ́ xwlé Mawu wɛ sɔgbe xá Sɛ́n ɔ. 5 Súnnu énɛ́ lɛ́ ɖo sinsɛnzɔ́ mímɛ́ wa wɛ, bɔ é nyí xlɛ̌ nǔ e ɖo jǐxwé lɛ́ é tɔn, bo lɛ́ nyí yɛ nǔ énɛ́ lɛ́ tɔn; lěe gbe e Mawu ɖe nú Mɔyízi, hwenu e é ja goxɔ ɔ gbá gbé é xlɛ́ gbɔn é wɛ: Ðó É ɖɔ: “Tɛ́n kpɔ́n bo bló nǔ lɛ́ bǐ bónú yě ní cí kpɔ́ndéwú yětɔn e è xlɛ́ we ɖo só ɔ jí é ɖɔhun.” 6 Amɔ̌ din ɔ, sinsɛnzɔ́ e è sɔ́ d’así nú Jezu é* nyɔ́ hú yědɛɛ lɛ́ tɔn tawun, ɖó é lɛ́ nyí hwɛdógbɔtɔ́ nú akɔjijɛ e nyɔ́ hú gǎn é ɖé; è sɔ́ akɔjijɛ énɛ́ jínjɔ́n akpá lɛ́ jí ɖo sɛ́n lixo.

7 Ényí nǔjɛdo ɖě ma ko ɖo akɔjijɛ nukɔntɔn énɛ́ wú ǎ wɛ ɔ, è sɔ́ ná ɖó hudó akɔjijɛ wegɔ́ ɔ tɔn ǎ. 8 Ðó é mɔ nǔjɛdo ɖo togun ɔ wú, hwenu e é ɖɔ xó élɔ́ é: “Jexóva* ɖɔ: ‘Éɖíe! Azǎn ɖé lɛ́ ja, bɔ un ná jɛ akɔ yɔ̌yɔ́ ɖé xá togun Izlayɛ́li tɔn kpó togun Judáa tɔn kpó.’ 9 Jexóva* lɛ́ ɖɔ: ‘É ná cí akɔ e un jɛ xá tɔ́gbó yětɔn lɛ́ gbe e gbe un hɛn alɔ yětɔn, bo kplá yě tɔ́n sín Ejípu to mɛ é ɖɔhun ǎ, ɖó yědɛɛ lɛ́ nɔ gbejí nú akɔjijɛ ce ǎ, énɛ́ wú ɔ, un sɔ́ nɔ kpé nukún dó yě wú ɖě ǎ.’

10 “Jexóva* lɛ́vɔ́ ɖɔ: ‘Ðó akɔ e un ná jɛ xá togun Izlayɛ́li tɔn ɖo azǎn énɛ́ lɛ́ gúdo é ɖíe: Un ná sɔ́ sɛ́n ce lɛ́ dó linlin yětɔn mɛ, bo ná wlán sɛ́n ce lɛ́ dó ayi yětɔn mɛ. Un ná húzú Mawu yětɔn, bɔ yě ná húzú togun ce.

11 “‘Yě sɔ́ ná kplɔ́n nǔ toví hǎtɔ́ yětɔn kpó nɔví yětɔn kpó ɖě bo ɖɔ: “Tuun Jexóva!”* ǎ. Ðó yě mɛ bǐ ná tuun mì, bɛ́sín mɛ kpɛví bǐ e ɖo yě mɛ é jí, káká jɛ mɛ ɖaxó bǐ ɔ jí. 12 Ðó un ná sɔ́ nǔ agɔ e yě wa lɛ́ é kɛ yě, un sɔ́ ná flín hwɛ yětɔn lɛ́ ɖě ǎ.’”

13 Ðɔ e é ɖɔ “akɔjijɛ yɔ̌yɔ́” é ɔ, blǒ wɛ é bló bɔ nukɔntɔn ɔ húzú nǔ xóxó gbɔn mɔ̌. Din ɔ, nǔ e nyí nǔ xóxó bo lɛ́ fɔ́n bo ɖo xó dó d’é jí wɛ é ko ɖo nǎ blí bú wɛ.

9 Akɔjijɛ nukɔntɔn ɔ ɖó sɛ́n ɖé lɛ́ nú sinsɛnzɔ́ mímɛ́ ɔ, bo lɛ́ ɖó tɛn mímɛ́ tɔn ɖo ayǐkúngban jí. 2 Ðó è gbá mǐmámɛ nukɔntɔn goxɔ ɔ tɔn, bɔ zogbɛ́nhɛnnú ɔ, távo ɔ kpó wɔ̌xúxú e è xwlé Mawu lɛ́ é kpó nɔ nɔ mɛ; lobɔ è nɔ ylɔ́ ɖɔ Tɛn mímɛ́ ɔ. 3 Amɔ̌, ɖo xɔmɛgbovɔ wegɔ́ ɔ gúdo ɔ, è nɔ mɔ mǐmámɛ goxɔ ɔ tɔn e è nɔ ylɔ́ ɖɔ Tɛn mímɛ́ bǐ ɔ é. 4 Zǎlínkpɔ́nfyɔ́nú e è sɔ́ siká dó bló é kpó akɔjijɛgbá e è kɔn siká dó bǐ mlɛ́mlɛ́ é kpó ɖo fínɛ́, lobɔ zɛ̌n e è sɔ́ siká dó bló bɔ mǎna ɖ’é mɛ é, kpo Aalɔ́ɔn tɔn e tɔ́n kun é kpó awǐnnyatɛ akɔjijɛ ɔ tɔn lɛ́ kpó ɖo akɔjijɛgbá ɔ mɛ; 5 Celubɛ́ɛn susunɔ lɛ́ ɖo akɔjijɛgbá ɔ ta, bo cyɔ́n yɛ nusú* hwɛsúnsúnsínkɔnúmɛ tɔn ɔ jí. Amɔ̌, hwenu e è ná ɖɔ xó dó gǒflɛ́mɛ nǔ énɛ́ lɛ́ tɔn wú é ɖíe ǎ.

6 Ée è gbá nǔ énɛ́ lɛ́ gbɔn mɔ̌ gúdo é ɔ, vɔ̌sánúxwlémawutɔ́ lɛ́ nɔ byɔ́ mǐmámɛ nukɔntɔn goxɔ ɔ tɔn mɛ hwɛhwɛ bo ná wa sinsɛnzɔ́ mímɛ́ lɛ́; 7 amɔ̌, vɔ̌sánúxwlémawutɔ́ ɖaxó ɔ ɖokpónɔ wɛ nɔ byɔ́ mǐmámɛ wegɔ́ ɔ mɛ azɔn ɖokpó ɖo xwe ɖokpó mɛ; é ka nɔ byɔ́ mɛ hun mɛvo ǎ; é nɔ xwlé hun énɛ́ Mawu dó éɖésúnɔ kpó hwɛ e togun ɔ hu ɖo manywɛ́ mɛ lɛ́ é kpó tamɛ. 8 Mɔ̌ mɛ ɔ, gbigbɔ mímɛ́ ɖe xlɛ́ nyi wɛn ɖɔ è kún ko kɔ́n sɛ sín ali e yi tɛn mímɛ́ ɔ mɛ é jí, hwenu e goxɔ nukɔntɔn ɔ kpo ɖo te é ó. 9 Nǔ e ɖo jijɛ wɛ ɖo hwe élɔ́ nu din lɛ́ é sín xlɛ̌ wɛ goxɔ énɛ́ nyí, bɔ sɔgbe xá tuto énɛ́ ɔ, è nɔ xwlé nǔníná lɛ́ kpó vɔ̌sánú lɛ́ kpó Mawu. É ɖo mɔ̌ có, nǔ énɛ́ lɛ́ nɔ kpé wú bo nɔ bló bónú mɛ e ɖo sinsɛnzɔ́ mímɛ́ wa wɛ é nɔ ɖó ayixa maɖóblɔ̌ ǎ. 10 Nǔɖuɖu, ahan kpó wǔsláslá lěe Sɛ́n ɔ byɔ́ gbɔn é* tɛnmɛ tɛnmɛ lɛ́ kpó kɛ́ɖɛ́ wɛ yě kan. Sɛ́n ɖěɖěe kunkplá agbaza é wɛ nǔ énɛ́ lɛ́ bǐ nyí bɔ è dó, káká jɛ hwenu e è ɖó dó, bo ná bló bɔ nǔ lɛ́ ná jɛ nǔganjí é.

11 É ɖo mɔ̌ có, hwenu e Klísu wá bo nyí vɔ̌sánúxwlémawutɔ́ ɖaxó nǔ ɖagbe e ko ɖo ayǐ lɛ́ é tɔn é ɔ, é gbɔn goxɔ e ɖo tají hú gǎn, bo nyí maɖóblɔ̌ hú gǎn é mɛ; é nyí alɔ gbɛtɔ́ tɔn wɛ bló goxɔ énɛ́ ǎ, énɛ́ wɛ nyí ɖɔ, é nyí hwe glɔ́ fí tɔn ǎ. 12 É nyí gbagbǎ kpó nyibúsú wínnyáwínnyá kpó sín hun wɛ é hɛn byɔ́ tɛn mímɛ́ ɔ mɛ ǎ, loɔ, hun éɖésúnɔ tɔn wɛ; é wa mɔ̌ azɔn ɖokpó bɔ xó fó, bo mɔ hwlɛngán* mavɔmavɔ yí nú mǐ. 13 Ðó ényí bo ná dó slá wǔ nú agbaza ɔ, gbagbǎ kpó nyibúsú kpó sín hun, gɔ́ nú nyibúsixwɛ sín afín, ée è nɔ mì dó mɛ ɖěɖěe blí lɛ́ é wú é nɔ bló bɔ yě nɔ nyí mɛ mímɛ́ ɔ, 14 é ɖo wɛn ɖɔ Klísu e ma ɖó blɔ̌ ɖo wǔ ǎ, bo sɔ́ éɖée xwlé Mawu gbɔn gbigbɔ mavɔmavɔ ɖé gblamɛ é sín hun ná lɛ ayixa mǐtɔn wé sín nǔwiwa maɖótaɖé lɛ́ mɛ, bónú mǐ ní dó sixú wa sinsɛnzɔ́ mímɛ́ nú Mawu gbɛɖe ɔ ǎ cé?

15 Énɛ́ wú wɛ é nyí hwɛdógbɔtɔ́ akɔjijɛ yɔ̌yɔ́ ɖé tɔn, bónú mɛ ɖěɖěe è ylɔ́ lɛ́ é ní dó sixú mɔ akpá gǔ mavɔmavɔ ɔ tɔn yí; nǔ nyí mɔ̌, ɖó é kú bo ná tún kan nú yě gbɔn gbɛxixɔ ɔ gblamɛ sín nǔ ɖěɖěe yě wa nyi do ɖo akɔjijɛ nukɔntɔn ɔ glɔ́ lɛ́ é sí. 16 Ðó ényí mɛɖé jɛ akɔ xá Mawu ɔ, é ɖo dandan ɖɔ è ní kú d’é jí ɖɔ mɛ e jɛ akɔ ɔ é kú hwɛ̌, 17 ɖó kú wɛ nɔ zɔ́n bɔ akɔjijɛ ɖé nɔ ɖó acɛ, ɖó ényí mɛ e jɛ akɔ ɔ é kpo ɖo gbɛ jɛ́n wɛ ɔ, akɔjijɛ ɔ nɔ ɖó acɛ ɖěbǔ ǎ. 18 Énɛ́ wú wɛ akɔjijɛ nukɔntɔn ɔ lɔmɔ̌ ma bɛ́ azɔ̌* hun mɛvo ǎ. 19 Ðó hwenu e Mɔyízi ɖɔ xó dó gbeɖiɖe e ɖo Sɛ́n ɔ mɛ lɛ́ é bǐ wú nú togun ɔ bǐ gúdo é ɔ, é sɔ́ nyibúsú wínnyáwínnyá kpó gbagbǎ kpó sín hun, gɔ́ nú sin, avɔ vɔvɔ cɛ́cɛ́ kpó izɔ́pu kpó bo mì dó wěma* ɔ kpó togun ɔ bǐ kpó wú, 20 lobo ɖɔ: “Akɔjijɛ e Mawu ɖe gbe nú mi ɖɔ mi ní nɔ gbejí ná é sín hun ɖíe.” 21 Mɔ̌ ɖokpó ɔ, é mì hun ɔ dó goxɔ ɔ kpó nǔzínzán e è nɔ sɔ́ dó wa sinsɛnzɔ́ mímɛ́* ná lɛ́ é bǐ kpó wú. 22 Ɛɛn, sɔgbe xá Sɛ́n ɔ, hun wɛ è nɔ sɔ́ dó lɛ ɖibla nyí nǔ lɛ́ bǐ wé ná, bɔ ényí ɖɔ è ma kɔn hun nyi ayǐ ǎ ɔ, hwɛsɔ́kɛmɛ ɖě nɔ ɖe ǎ.

23 Hǔn, é ɖo dandan ɖɔ è ní lɛ nǔ e nyí xlɛ̌ nǔ e ɖo jǐxwé lɛ́ é tɔn lɛ́ é wé gbɔn mɔ̌, amɔ̌, nǔ e ɖo jǐxwé lɛ́ é byɔ́ vɔ̌sísá e nyɔ́ hú mɔ̌ é flaflá tɔn. 24 Ðó Klísu byɔ́ fí mímɛ́ e alɔ gbɛtɔ́ tɔn bló, bɔ é nyí kpɔ́ndéwú adodwé ɔ tɔn é mɛ ǎ, é nyɔ́ wa ɔ, jǐxwé ɖésú wɛ é yi bo ɖo Mawu nukɔn* din ɖó ta mǐtɔn mɛ. 25 É nyí bónú é ná sɔ́ éɖée dó sá vɔ̌ azɔn gěgé lěe vɔ̌sánúxwlémawutɔ́ ɖaxó ɔ nɔ hɛn hun e ma nyí éɖésúnɔ tɔn ǎ é bo nɔ byɔ́ tɛn mímɛ́ ɔ mɛ xwewú xwewú gbɔn é wú wɛ nǔ nyí mɔ̌ ǎ. 26 Ényí mɔ̌ wɛ ɔ, é ná ko byɔ́ ɖɔ é ní se wǔvɛ́ azɔn gěgé sín hwenu e è ɖó gbɛ ɔ ayǐ é.* Amɔ̌ din ɔ, é ɖe éɖée xlɛ́ azɔn ɖokpó bɔ xó fó ɖo azǎn gǔdo gúdo tɔn gbɛ* élɔ́ tɔn lɛ́ mɛ, bo ná dó sú kún dó nú hwɛhuhu gbɔn éɖée sísɔ́ dó sá vɔ̌ gblamɛ. 27 Lěe kú ɖo te kpɔ́n gbɛtɔ́ lɛ́ azɔn ɖokpó bɔ xó fó, bɔ énɛ́ gúdo ɔ, è ka ná ɖɔ hwɛ xá yě gbɔn é ɔ, 28 mɔ̌ ɖokpó ɔ wɛ Klísu lɔmɔ̌ sɔ́ éɖée dó sá vɔ̌ azɔn ɖokpó bɔ xó fó, bo ná dó hɛn hwɛ mɛ gěgé tɔn, bɔ azɔn wegɔ́ e é ná wá é ɔ, é ná kpé nǔ ɖě xá hwɛhuhu ǎ, bɔ mɛ ɖěɖěe ɖo te kpɔ́n ɛ vɛ́návɛ́ná bónú é ná hwlɛ́n yě lɛ́ é ná mɔ ɛ.

10 Ðó Sɛ́n ɔ nyí yɛ nǔ ɖagbe e ja lɛ́ é tɔn, bo ma nyí nǔ lɛ́ ɖésú tawun lě ǎ wútu ɔ, é* sixú bló gbeɖé, bónú mɛ ɖěɖěe ɖo sisɛkpɔ́ Mawu wɛ lɛ́ é ná nyí mɛ maɖóblɔ̌, gbɔn vɔ̌ ɖokpó ɔ e è nɔ fɔ́n bo nɔ ɖo sísá wɛ xwewú xwewú lɛ́ é gblamɛ ǎ. 2 É ma nyí mɔ̌ ǎ ɔ, è ná ko ɖó vɔ̌ e sá wɛ è ɖe lɛ́ é te ǎ cé? Ðó ényí è vɛ́ ko lɛ mɛ ɖěɖěe ɖo sinsɛnzɔ́ mímɛ́ wa wɛ lɛ́ é wé ɔ, yě sɔ́ ɖó ná nɔ dó hwɛ yěɖée, ɖó hwɛ yětɔn lɛ́ wú ɖě ǎ. 3 Loɔ, hwɛ e è hu lɛ́ é wɛ vɔ̌sísá énɛ́ lɛ́ nɔ flín mɛ xwewú xwewú, 4 ɖó nyibúsú kpó gbagbǎ kpó sín hun sixú ɖe hwɛ mɛtɔn lɛ́ síin ǎ.

5 Énɛ́ wú ɔ, hwenu e é wá gbɛ ɔ mɛ é ɔ, é ɖɔ: “‘A ba vɔ̌sísá kpó nǔníná kpó ǎ, amɔ̌, a sɔ́ nǔ nú agbaza ɖé nú mì. 6 Nǔníná e è nɔ dó blěbú tɔn zo é kpó nǔníná hwɛsɔ́kɛmɛ tɔn kpó nyɔ́ nukún towe mɛ ǎ.’ 7 Énɛ́ gúdo ɔ, un ɖɔ: ‘Éɖíe! Mawu è, un wá (è wlán xó énɛ́ lɛ́ dó wǔ ce ɖo wěma mlámlá ɔ* mɛ) bo ná wa jlǒ towe.’” 8 É ɖɔ xó élɔ́ jɛ nukɔn: “A ba vɔ̌sísá, nǔníná, nǔníná e è nɔ dó blěbú tɔn zo é kpó nǔníná hwɛsɔ́kɛmɛ tɔn kpó ǎ, yě ka lɛ́ nyɔ́ nukún towe mɛ ǎ,” énɛ́ wɛ nyí vɔ̌ ɖěɖěe è nɔ sá sɔgbe xá Sɛ́n ɔ lɛ́ é. 9 Énɛ́ gúdo ɔ, é ɖɔ: “Éɖíe! Un wá bo ná wa jlǒ towe.” É sú kún dó nú nǔ nukɔntɔn ɔ, bo ná dó ɖó wegɔ́ ɔ ayǐ. 10 Gbɔn “jlǒ” énɛ́ gblamɛ ɔ, è bló bɔ mǐ nyí mɛ mímɛ́, gbɔn agbaza Jezu Klísu tɔn e è sɔ́ dó sá vɔ̌ azɔn ɖokpó bɔ xó fó é gblamɛ.

11 Gɔ́ ná ɔ, vɔ̌sánúxwlémawutɔ́ ɖokpó ɖokpó nɔ nɔ tɛn e nyí étɔn é mɛ, bɔ ayǐhɔ́ngbe ayǐhɔ́ngbe ɔ, é nɔ ɖo sinsɛnzɔ́ mímɛ́ wa wɛ,* lobo nɔ ɖo vɔ̌ ɖokpó ɔ lɛ́ sá wɛ hwɛhwɛ; vɔ̌sísá énɛ́ lɛ́ ka sixú súnsún hwɛ lɛ́ síin bǐ mlɛ́mlɛ́ gbeɖé ǎ. 12 Amɔ̌, nya énɛ́ sá vɔ̌ ɖokpó dó hwɛ lɛ́ tamɛ káká sɔ́yi, bo jínjɔ́n ɖisíxwé nú Mawu, 13 bɔ sín hwenɛ́nu ɔ, é ɖo te kpɔ́n hwenu e è ná sɔ́ kɛntɔ́ tɔn lɛ́ dó bló afɔɖótɛn tɔn é. 14 Ðó gbɔn vɔ̌sísá ɖokpó gblamɛ wɛ é bló, bɔ mɛ ɖěɖěe è ɖo blǒbló wɛ bónú yě ná nyí mɛ mímɛ́ lɛ́ é nyí mɛ maɖóblɔ̌ káká sɔ́yi. 15 Gɔ́ ná ɔ, gbigbɔ mímɛ́ ɔ lɔmɔ̌ nɔ ɖe kúnnu tɔn nú mǐ, ɖó é ɖɔ: 16 “Jexóva* ɖɔ: ‘Akɔ e un ná jɛ xá yě ɖo azǎn énɛ́ gúdo é ɖíe: Un ná sɔ́ sɛ́n ce lɛ́ dó ayi yětɔn mɛ, bo ná wlán sɛ́n ce lɛ́ dó linlin yětɔn mɛ.’” 17 Bo wá ɖɔ: “Bɔ un sɔ́ ná flín hwɛ yětɔn lɛ́ kpó sɛ́n e yě gba lɛ́ é kpó ɖě ǎ.” 18 Din ɔ, fí e è sɔ́ nǔ énɛ́ lɛ́ kɛ mɛ ɖe é ɔ, è sɔ́ ɖó hudó vɔ̌sísá dó hwɛ lɛ́ tamɛ tɔn ɖě ǎ.

19 Énɛ́ wú ɔ, nɔví lɛ́, mǐ ɖó adɔgbígbó,* gbɔn hun Jezu tɔn gblamɛ, bo ná gbɔn ali e yi tɛn mímɛ́ ɔ mɛ é nu. 20 Ali énɛ́ wɛ é hun nú mǐ, bɔ é nyí ali yɔ̌yɔ́ gbɛɖe ɖé, gbɔn xɔmɛgbovɔ ɔ mɛ, énɛ́ wɛ nyí, agbaza tɔn. 21 Mǐ lɛ́ ɖó vɔ̌sánúxwlémawutɔ́ ɖaxó ɖé ɖo xwé Mawu tɔn nu. 22 Mi bo nú mǐ ní sɛkpɔ́ Mawu kpó ayi bǐ kpó, bo ɖi nǔ bǐ mlɛ́mlɛ́, ɖó è ko lɛ ayi mǐtɔn wé, bɔ mǐ sɔ́ ɖó ayixa nyanya ǎ, lobɔ è ko sɔ́ sin e mɛ́ é dó lɛ agbaza mǐtɔn lɛ́. 23 Mi nú mǐ ní tɛ́ dó nukúnɖíɖó mǐtɔn jlájlá ɖo agbawungba wú gbánwúngbánwún, bo ma sɛ do ó, ɖó mɛ e dó akpá ɔ é ɖo gbejí. 24 Gɔ́ ná ɔ, mi nú nǔ mǐɖée lɛ́ tɔn ní nɔ ɖu ayi mɛ nú mǐ,* bónú mǐ ná dó flɔ́ wǎnyíyí kpó azɔ̌ ɖagbe wiwa kpó sín zo dó lanmɛ nú mǐɖée lɛ́. 25 Mǐ ní ma nɔ gɔn kplé mǐtɔn lɛ́, lěe é nyí walɔ mɛɖé lɛ́ tɔn gbɔn é ó, é nyɔ́ wa ɔ, mǐ ní nɔ dó wǔsyɛ́n lanmɛ nú mǐɖée lɛ́. Mǐ ɖó ná nɔ wa nǔ énɛ́ lɛ́ hú gǎn, din e mi mɔ ɖɔ azǎn ɔ ɖo sisɛkpɔ́ wɛ é.

26 Ðó ényí mǐ nɔ jló bo nɔ hu hwɛ, hwenu e mǐ ko ɖó nukúnnúmɔjɛnǔmɛ e sɔgbe é dó nǔgbó ɔ wú gúdo é hǔn, vɔ̌ ɖě sɔ́ kpo, bónú è ná sá dó hwɛ lɛ́ tamɛ ǎ, 27 amɔ̌, nǔ e kpo é wɛ nyí adohu adohu jí ninɔ dó nɔ te kpɔ́n hwɛɖónúmɛ kpó xomɛsin e ɖo jiji wɛ myɔ ɖɔhun, bo ja mɛ e nɔ klán gbe xá Mawu lɛ́ é fyɔ́ gbé é kpó. 28 Ényí mɛ ɖěbǔ gba Mɔyízisɛ́n ɔ, bɔ mɛ we alǒ atɔn ɖe kúnnu ná ɔ, è nɔ kú nǔbláwǔ n’i ǎ, è nɔ hu i. 29 Étɛ́ mi ka lin? É ɖo wɛn ɖɔ mɛ e gbídí Vǐ Mawu tɔn ɖó afɔ wú, bo sɔ́ akɔjijɛ ɔ sín hun e gblamɛ è bló bɔ é nyí mɛ mímɛ́ gbɔn é dó mɔ nǔ yǎyá, lobo zun gbigbɔ fɛ́nú tɔn ɔ é ɔ, tó e é jɛxá bɔ è ná dɔn n’i é ná syɛ́n hú mɔ̌ ǎ cé? 30 Ðó mǐ tuun Mɛ e ɖɔ xó élɔ́ é: “Nyɛ wɛ nɔ ba hlɔn; un ná sú nǔ e è jɛxá é sín axɔ́ mɛ.” È lɛ́ wlán ɖɔ: “Jexóva* ná ɖɔ hwɛ xá togun tɔn.” 31 É hu ado ɖésú ɖɔ è ní jɛ Mawu gbɛɖe ɔ sín alɔ mɛ.

32 Amɔ̌, mi ní nɔ flín azǎn e wá yi lɛ́ é, azǎn énɛ́ lɛ́ gbe wɛ mi fun ahwan syɛ́nsyɛ́n, bo dɛ ɖo wǔvɛ́ lɛ́ nu, hwenu e è ko tá wěziza dó mi jí gúdo é. 33 Hweɖélɛ́nu ɔ, è zun mi bo dó ya nú mi ɖo agbawungba, bɔ ɖo hwe ɖěvo lɛ́ nu ɔ, mi ɖó mǐmá ɖo wǔvɛ́ mɛ ɖěɖěe ɖo nǔ mɔ̌hun lɛ́ ɖí xwi xá wɛ lɛ́ é tɔn mɛ.* 34 Ðó mi se wǔvɛ́ xá mɛ e ɖo gankpá mɛ lɛ́ é, bo lɛ́ yí gbe kpó xomɛhunhun kpó, bɔ è vɔ nǔɖókan mitɔn lɛ́, ɖó mi tuun ɖɔ émí ɖó nǔɖókan e nyɔ́ hú gǎn, bo ná nɔ ayǐ sɔ́yi é.

35 Énɛ́ wú ɔ, mi ma jó adɔgbígbó e mi ɖó é* dó ó, ɖó ajɔ ɖaxó ɖ’é mɛ. 36 Ðó mi ɖó hudó didɛ tɔn, bo ná dó sixú mɔ nǔ e sín akpá è dó é yí, hwenu e mi ná ko wa jlǒ Mawu tɔn gúdo é. 37 Ðó “hwenu kpɛví ɖé” wɛ kpo, bɔ “mɛ e jawě é ná wá, é ka ná gbɔ hwenu ǎ.” 38 “Amɔ̌, nǔjlɔ́jlɔ́watɔ́ ce ná nɔ gbɛ ɖó nǔ e é ɖi é wútu.” Gɔ́ ná ɔ, “ényí é dó gǔdofɔ ɔ, nǔ tɔn ná nyɔ́ nukún ce mɛ* ǎ.” 39 Mǐ ka ɖo mɛ e nɔ dó gǔdofɔ bo ná dɔn lɛ́ é mɛ ǎ, loɔ, mɛ e ɖi nǔ bo ná hwlɛ́n gbɛ* yětɔn gán lɛ́ é mɛ wɛ mǐ ɖe.

11 Nǔɖiɖi wɛ nyí te ninɔ kpɔ́n nǔ e ɖó nukún wɛ è ɖe é kpó jiɖiɖe kpó; nǔ e tíin bɔ è ma nɔ mɔ ǎ lɛ́ é sín kúnnuɖenú e ɖo wɛn* é wɛ. 2 Ðó gbɔn gbla tɔn mɛ ɔ, è ɖe kúnnu nú mɛ hwexónu tɔn lɛ́.*

3 Gbɔn nǔɖiɖi gblamɛ ɔ, mǐ mɔ nukúnnú jɛ wú ɖɔ è ɖó gbɛ* ɔ ayǐ gbɔn xó Mawu tɔn gblamɛ, bɔ Mawu zán nǔ e è ma nɔ mɔ ǎ lɛ́ é dó bló nǔ e è nɔ mɔ lɛ́ é.

4 Gbɔn nǔɖiɖi gblamɛ ɔ, Abɛ́li sá vɔ̌ e xɔ akwɛ́ hú Kanyɛ́ɛ tɔn é nú Mawu, bɔ gbɔn nǔɖiɖi énɛ́ gblamɛ ɔ, è ɖe kúnnu n’i ɖɔ é nyí nǔjlɔ́jlɔ́watɔ́, ɖó Mawu yí gbe nú nǔníná tɔn lɛ́,* bɔ é ko kú có, é kpo ɖo xó ɖɔ wɛ gbɔn nǔɖiɖi tɔn gblamɛ.

5 Gbɔn nǔɖiɖi gblamɛ ɔ, è sɛ tɛn nú Enɔ́ki bónú é ní ma kú ó, bɔ é ɖo fí ɖěbǔ bónú è ná mɔ ɛ ǎ, ɖó Mawu ko sɛ tɛn n’i, ɖó cóbónú è ná sɛ tɛn n’i ɔ, è ɖe kúnnu n’i ɖɔ nǔ tɔn nyɔ́ Mawu nukúnmɛ tawun. 6 Gɔ́ ná ɔ, nǔɖiɖi mɛvo ɔ, nǔ mɛtɔn sixú nyɔ́ Mawu nukúnmɛ ǎ, ɖó mɛ ɖěbǔ e sɛkpɔ́ Mawu é ɖó ná ɖi nǔ ɖɔ é tíin, bo nɔ dó ajɔ mɛ e ɖo biba ɛ wɛ vɛ́návɛ́ná lɛ́ é.

7 Gbɔn nǔɖiɖi gblamɛ ɔ, ée Mawu gb’akpá nú Nɔwée dó nǔ e é ma ko mɔ ǎ lɛ́ é wú gúdo é ɔ, é ɖó sísí e gɔ́ngɔ́n é nú Mawu, bo bló tɔjíhún ɖokpó bo ná dó hwlɛ́n xwédo tɔn; bɔ gbɔn nǔɖiɖi énɛ́ gblamɛ ɔ, é ɖó hwɛ nú gbɛ ɔ lobo húzú gǔɖutɔ́ nǔjlɔ́jlɔ́wiwa e mɛ nǔɖiɖi nɔ tɔ́n kɔ dó é tɔn.

8 Gbɔn nǔɖiɖi gblamɛ ɔ, hwenu e è ylɔ́ Ablaxámu é ɔ, é se tónú bo tɔ́n, lobo ɖidó fí e sín gǔ é ná ɖu é; é ɖidó, có é ka tuun fí e é xwe é ǎ. 9 Gbɔn nǔɖiɖi gblamɛ ɔ, é nɔ akpádídó yíkúngban ɔ jí jǒnɔ ɖɔhun, to ɖěvo mɛ wɛ é ɖe ɖɔhun; é nɔ nɔ goxɔ lɛ́ mɛ é kpó Izáki kpó, kpódó Jakɔ́bu kpán; súnnu énɛ́ lɛ́ kpó é kpó wɛ nyí gǔɖutɔ́ akpá ɖokpó ɔ tɔn. 10 Ðó é ɖo te kpɔ́n toxo e ɖó dodónú syɛ́nsyɛ́n lɛ́, bɔ Mawu ɖe wě tɔn, bo gbá é.

11 Gbɔn nǔɖiɖi gblamɛ ɔ, Sala lɔmɔ̌ mɔ hlɔ̌nhlɔ́n bo mɔ xo, có é ka ko kpo bǐ,* ɖó é ɖi nǔ ɖɔ Mɛ e dó akpá ɔ é ɖo gbejí.* 12 Ðó hwɛjijɔ énɛ́ wú ɔ, nya e é cí ɖɔ é ko kú wɛ ɖɔhun é ji vǐ, bɔ vǐ tɔn lɛ́ sukpɔ́ káká bo cí sunví e ɖo jǐnukúnsin lɛ́ é ɖɔhun; yě sukpɔ́ káká bɔ è sixú xa ǎ kɔ́gúdu e ɖo xutó é ɖɔhun.

13 Yě mɛ énɛ́ lɛ́ bǐ wɛ kú dó nǔɖiɖi mɛ, có yě ka mɔ nǔ e sín akpá è dó lɛ́ é yí ǎ; amɔ̌, yě mɔ nǔ énɛ́ lɛ́ sɛ́dó zɔ, bo j’awǎ dó ta yětɔn mɛ, lobo ɖɔ ɖo agbawungba ɖɔ émí nyí jǒnɔ, bo lɛ́ ɖo to ɔ mɛ nú hwenu kléwún ɖé. 14 Ðó mɛ e nɔ ɖɔ xó gbɔn mɔ̌ lɛ́ é nɔ xlɛ́ nyi wɛn ɖɔ émí ɖo nɔtɛn émíɖésúnɔ tɔn ba wɛ vɛ́návɛ́ná. 15 É ɖo mɔ̌ có, ényí yě ko nɔ fɔ́n bo nɔ ɖo fí e yě gosín é flín wɛ wɛ ɔ, yě ná ko mɔ ali bo ná lɛ́ kɔ. 16 Amɔ̌ din ɔ, yě ɖo nɔtɛn e nyɔ́ hú gǎn é ɖé gbé nya wɛ, énɛ́ wɛ nyí nɔtɛn jǐxwé tɔn. Énɛ́ wú ɔ, wínnyá hu Mawu bónú è ná ylɔ́ ɛ ɖɔ Mawu yětɔn ǎ, ɖó é sɔ́ nǔ nú toxo ɖé nú yě.

17 Gbɔn nǔɖiɖi gblamɛ ɔ, hwenu e è tɛ́n Ablaxámu kpɔ́n é ɔ, é cí ɖɔ é sɔ́ Izáki dó sá vɔ̌ ná wɛ ɖɔhun, ɛɛn, nya e è dó akpá lɛ́ ná, bɔ é yí kpó xomɛhunhun kpó é tɛ́n kpɔ́n bo ná sɔ́ vǐɖokpónɔ tɔn dó sá vɔ̌, 18 có è ka ko ɖɔ n’i ɖɔ: “Nǔ e è ná ylɔ́ ɖɔ kúnkan* towe é ná wá gbɔn Izáki jí.” 19 Amɔ̌, é ɖi nǔ ɖɔ Mawu kpé wú bo ná fɔ́n Izáki sín kú, bɔ è ɖe vǐ tɔn sín kú lɔ mɛ bo sɔ́ jó n’i, bɔ énɛ́ nyí kpɔ́ndéwú ɖé.

20 Gbɔn nǔɖiɖi gblamɛ ɔ, Izáki lɔmɔ̌ kɔn nyɔ̌ná dó Jakɔ́bu kpó Esáwu kpó jí, bo ɖɔ nǔ e ná jɛ ɖo sɔgúdo lɛ́ é nú yě.

21 Gbɔn nǔɖiɖi gblamɛ ɔ, hwenu e Jakɔ́bu ɖo nǎ kú wɛ é ɔ, é kɔn nyɔ̌ná dó vǐ súnnu Jozɛ́fu tɔn lɛ́ ɖokpó ɖokpó jí, bo sɛn Mawu hwenu e é gán jɛ kpogɛ tɔn jí é.

22 Gbɔn nǔɖiɖi gblamɛ ɔ, hwenu e Jozɛ́fu sɛkpɔ́ gbɛzán tɔn sín vivɔnu é ɔ, é ɖɔ xó dó tíntɔ́n Izlayɛ́li ví lɛ́ tɔn wú, bo ɖe wě xá mɛ dó xú tɔn lɛ́* wú.

23 Gbɔn nǔɖiɖi gblamɛ ɔ, mɛjitɔ́ Mɔyízi tɔn lɛ́ sɔ́ ɛ hwlá nú sun atɔn ɖo jiji tɔn gúdo, ɖó yě mɔ ɖɔ vǐ kpɛví ɔ nyɔ́ ɖɛkpɛ, lobɔ yě ɖi xɛsi nú gbe e axɔ́sú ɔ ɖe é ǎ. 24 Gbɔn nǔɖiɖi gblamɛ ɔ, hwenu e Mɔyízi su é ɔ, é gbɛ́ ɖɔ è ní ma ylɔ́ émí ɖɔ vǐ nyɔ̌nu Falawɔ́ɔn tɔn sín vǐ ó; 25 é yí gbe ɖɔ è ní dó ya nú émí xá togun Mawu tɔn hú ɖɔ é ní mɔ vǐví e ɖo hwɛhuhu mɛ nú hwenu kléwún ɖé é, 26 ɖó é mɔ ɖɔ ényí è dó wínnyá émí mɛ e è sɔ́ é* ɖɔhun ɔ, é xɔ akwɛ́ tawun hú dɔkun Ejípu tɔn lɛ́, ɖó nukún tɔn ɖo ajɔ ɔ mimɔ yí jí dáán. 27 Gbɔn nǔɖiɖi gblamɛ ɔ, é gosín Ejípu ma ɖi xɛsi nú xomɛsin axɔ́sú ɔ tɔn, ɖó é kpo ɖo dɔn gbí wɛ cí nǔ ɖɔ é ɖo Mɛ e è ma nɔ mɔ ǎ é mɔ wɛ ɖɔhun. 28 Gbɔn nǔɖiɖi gblamɛ ɔ, é ɖu Dǐndínwáyixwe ɔ, bo mì hun ɔ dó hɔnkpo lɛ́ wú bónú kúnsúdónúmɛtɔ́ ɔ ní ma wa nǔ dó* nukɔngbéví yětɔn lɛ́ wú ó.

29 Gbɔn nǔɖiɖi gblamɛ ɔ, yě d’asá xu vɔvɔ ɔ, cí nǔ ɖɔ ayǐkúngban xúxú jí gbɔn wɛ yě ɖe ɖɔhun, amɔ̌, ée Ejípunu lɛ́ tɛ́n kpɔ́n bo ná gbɔn mɛ é ɔ, yě kú tɔ.

30 Gbɔn nǔɖiɖi gblamɛ ɔ, dǒ Jelíko tɔn lɛ́ mu, hwenu e togun ɔ ko ɖi zɔnlin lɛ́ lɛ̌ dó nú azǎn tɛ́nwe gúdo é. 31 Gbɔn nǔɖiɖi gblamɛ ɔ, hwenu e mɛ e ma nɔ se tónú ǎ lɛ́ é dɔn é ɔ, Hlaxábu tonyatɔ́ ɔ dɔn ɖě ǎ, ɖó é yí amɛ̌ lɛ́ ɖo fífá mɛ.

32 Étɛ́ un ka ná lɛ́ ɖɔ gɔ́ ná? Ðó ényí un gbɛ́ ná ɖɔ xó dó Jedenyɔ́ɔ, Baláaki, Sanmusɔ́ɔn, Jɛfutée, Davídi, gɔ́ nú Samuwɛ́li kpó gbeyíɖɔ ɖě lɛ́ kpó wú ɔ, hwenu ná kpé mì ǎ. 33 Gbɔn nǔɖiɖi gblamɛ ɔ, yě ɖu ɖo axɔ́súɖuto lɛ́ jí, yě bló bɔ nǔjlɔ́jlɔ́wiwa tíin, è dó akpá lɛ́ nú yě, yě bɔ nu dó nú kinnikínní lɛ́, 34 yě xo myɔ e ɖo jiji wɛ hɛhɛ é cí, yě xo gló hwǐ, yě ɖó gǎn ɖ’ayǐ ǎ, è ka wá bló bɔ yě ɖó hlɔ̌nhlɔ́n, yě húzú ahwanfuntɔ́ syɛ́nsyɛ́n lɛ́, yě gba ahwangɔnu e wá tɔ́n ahwan yě lɛ́ é dó, 35 nyɔ̌nu ɖé lɛ́ tíin bɔ è fɔ́n mɛ yětɔn e kú lɛ́ é nú yě, amɔ̌, mɛ ɖěvo lɛ́ tíin bɔ è dó ya nú yě, ɖó yě yí gbe bónú è tún kan nú yě gbɔn gbɛxixɔ alɔkpa ɖé gblamɛ ǎ, bo ná dó sixú mɔ fínfɔ́n sín kú e nyɔ́ hú gǎn é yí. 36 Ɛɛn, mɛ ɖěvo lɛ́ tíin, bɔ bo ná dó dó ya nú yě ɔ, è cá nú yě, bo lɛ́ sɔ́ lanbá dó xo yě, nǔgbó ɔ, éé lɛ́ nylá hú mɔ̌ é wɛ nyí ɖɔ è dó wlɔ yě bo bɛ́ yě dó gankpá mɛ. 37 È nyi awǐnnyaglo dó hu yě, è tɛ́n yě kpɔ́n, è sɔ́ sá dó sɛ́n yě ɖó we,* è sɔ́ hwǐ dó hu yě, yě nɔ dó lɛ̌ngbɔ́nyú kpó gbɔ̌nyú kpó bo nɔ ɖo yiyi wɛ, yě nɔ hudó mɛ, è dó ya nú yě, è xo dǎka yě wú; 38 gbɛ ɔ jɛxá yě ǎ. Yě nɔ ɖo gbětótló mɛ flú gbɔn wɛ, bo nɔ ɖo sókan mɛ sókan mɛ flú gbɔn wɛ; yě nɔ ɖo sónu mɛ sónu mɛ flú gbɔn wɛ, bo nɔ ɖo domɛ domɛ flú gbɔn wɛ.

39 Yě mɛ énɛ́ lɛ́ bǐ ɔ, è ɖe kúnnu ɖagbe nú yě ɖó nǔɖiɖi yětɔn wú có, yě mɔ nǔ e sín akpá è dó é yí ǎ, 40 ɖó Mawu ko mɔ nǔ e nyɔ́ hú gǎn é ɖé sɛ́dó nú mǐ, bónú yě ní ma húzú mɛ maɖóblɔ̌ mǐdɛɛ lɛ́ mɛvo ó.

12 Énɛ́ wú ɔ, ɖó mǐ ɖó kúnnuɖetɔ́ wɔ̌búwɔ́bú mɔ̌hun, bɔ yě lɛ́ lɛ̌ dó mǐ wútu ɔ, mi nú mǐ lɔ ní ɖe agban lɛ́ bǐ, gɔ́ nú hwɛhuhu e nɔ yá wǔ vun blá mǐ é nyi ayǐ; mi nú mǐ ní kán wezun e è sɔ́ ɖó te nú mǐ é kpó didɛ kpó, 2 hwenu e mǐ ná ɖo Jezu e nyí Afɔsɔ́ɖótetɔ́gán nǔɖiɖi mǐtɔn tɔn, bo lɛ́ nyí Mɛ e ná bló bɔ nǔɖiɖi mǐtɔn ná nyí nǔɖiɖi kpíkpé é kpɔ́n wɛ tlítlí é. Ðó awǎjijɛ e è sɔ́ ɖó te n’i é wú ɔ, é dɛ ɖo yatín* jí, é kpɔ́n winnyá e ɖ’é mɛ é ǎ, bɔ din ɔ, é jínjɔ́n ɖisíxwé nú axɔ́súzinkpo Mawu tɔn. 3 Nǔgbó ɔ, mi ní lin tamɛ kpó sɔxwixwe kpó dó mɛ e dɛ ɖo dǎkaxó mɔ̌hun e hwɛhutɔ́ lɛ́ ɖɔ dó wǔ tɔn, dó wa nǔ dó yěɖée wú é nu é jí, mɔ̌ mɛ ɔ, nǔ ná ci kɔ nú mi bɔ mi ná jó gbe ǎ.

4 Ðo ahwan e fun xá hwɛhuhu énɛ́ wɛ mi ɖe é mɛ ɔ, mi ko fun káká bónú é byɔ́ ɖɔ hun mitɔn ní kɔn nyi ayǐ kpɔ́n ǎ. 5 Bɔ mi wɔn nǔ élɔ́ e Mawu byɔ́ mi vɛ́návɛ́ná vǐ ɖɔhun é bǐ mlɛ́mlɛ́: “Vǐ ce, Jexóva* ɖo kplɔ́nkplɔ́n we wɛ hǔn, ma dó vɛ̌ ná ó; ényí é gbɛ́ nǔ nú we hǔn, ma jó gbe ó; 6 ɖó mɛ ɖěɖěe Jexóva* yí wǎn ná lɛ́ é wɛ é nɔ kplɔ́n, nǔgbó ɔ, mɛ ɖěɖěe é sɔ́ dó ylɔ́ vǐ lɛ́ é bǐ wɛ é nɔ ɖó bǎ* ná.”

7 Mi ɖó ná dɛ ɖo wǔvɛ́ mitɔn lɛ́ nu, lobo kpɔ́n dó mɔ ali e nu è ɖo mi kplɔ́n* ɖe wɛ é ɖé. Mawu ɖo nǔ wa xá mi wɛ vǐ ɖɔhun. Ðó vǐ tɛ́ tɔ́ tɔn ma ka nɔ kplɔ́n ǎ? 8 Amɔ̌, ényí è ma kplɔ́n mi bǐ gbɔn mɔ̌ ǎ hǔn, mi nyí vǐ jɔ vǐ ǎ, agaví wɛ mi nyí. 9 Gɔ́ ná ɔ, tɔ́ mǐtɔn ayǐkúngban jí tɔn* lɛ́ nɔ kplɔ́n mǐ, bɔ mǐ nɔ ɖó sísí nú yě. Mǐ ɖó ná jló bo hwíhwɛ́ mǐɖée dó Tɔ́ mǐtɔn e nɔ xlɛ́ ali gbɛzán mǐtɔn gbɔn gbigbɔ mímɛ́ tɔn gblamɛ é glɔ́ hú mɔ̌, bo ná nɔ gbɛ ǎ cé? 10 Ðó yě nɔ kplɔ́n mǐ nú hwenu kléwún ɖé sɔgbe xá nǔ e yě mɔ ɖɔ é nyɔ́ é, amɔ̌, éyɛ́ nɔ wa mɔ̌ ɖó le mǐtɔn wú, bónú mǐ ní dó sixú húzú mɛ mímɛ́ éɖɔhun. 11 Nǔgbó ɔ, hweɖébǔnu e è ɖo mǐ kplɔ́n wɛ é ɔ, é nɔ nyí awǎjijɛ sín nǔ tɛn tɔn mɛ ǎ; é nyɔ́ wa ɔ, wǔvɛ́* sín nǔ wɛ é nɔ nyí, amɔ̌, mɛ ɖěɖěe yí gbe nú kplɔ́n e è kplɔ́n yě é ɔ, sínsɛ́n e yě nɔ mɔ ɖ’é mɛ é wɛ nyí fífá e è nɔ mɔ ɖo nǔjlɔ́jlɔ́wiwa mɛ é.

12 Énɛ́ wú ɔ, mi ní ná hlɔ̌nhlɔ́n alɔ e kú yɛ lɛ́ é kpó koli e ba gǎn kpo lɛ́ é kpó, 13 mi ní nɔ ɖo ali jlɔ́jlɔ́ ɖe nú afɔ mitɔn lɛ́ wɛ, bónú afɔ e ɖó wɔ̌n é ní ma lílɛ́ ó, é nyɔ́ wa ɔ, é ní jɛ ganjí. 14 Mi ní nya fífá mɛ ninɔ xá mɛ lɛ́ bǐ kpó mǐmɛ́jíninɔ* kpó gbé; mǐmɛ́jíninɔ* mɛvo ɔ, mɛ ɖě ná mɔ Aklúnɔ ǎ. 15 Mi nɔ acéjí ganjí, bónú mɛ ɖě ní ma xo fɛ́nú Mawu tɔn kpo ó, mɔ̌ mɛ ɔ, ɖɔ aɖǐnɔ ɖěbǔ ná wú kun, bo ná dɔn tagba wá, lobo hɛn mɛ gěgé blí ǎ; 16 mi ní nɔ acéjí, bónú mɛ e nɔ lɛ aga* é ɖě ní ma nɔ tɛ́ntin mitɔn ó, lobonú mɛ e nǔ mímɛ́ lɛ́ ma nɔ su nukún tɔn mɛ ǎ Esáwu ɖɔhun é ɖě ní nɔ tɛ́ntin mitɔn ó; éyɛ́ sɔ́ nukɔngbéví sín acɛ tɔn lɛ́ jó, ɖó nǔɖuɖuká ɖokpó wú. 17 Ðó mi tuun ɖɔ ée é wa mɔ̌ gúdo é ɔ, é ba ná ɖu nyɔ̌ná ɔ sín gǔ, è ka gbɛ́ ɛ; nǔgbó ɔ, é dó gǎn dó nǔjɔnǔ mɛ kpó avǐ kpó, bo ná bló bɔ è* ná húzú linlin có, é kpa ɛ ǎ.*

18 Ðó é nyí nǔ e wú è sixú ɖ’alɔ é, nǔ e è dó zo é, akpɔ́kpɔ́ wiwi, ablu gɔngɔn kpó jɔhɔn syɛ́nsyɛ́n kpó wɛ mi sɛkpɔ́ ǎ, 19 é ka lɛ́ nyí kpɛn e ɖo nǔ ɖɔ wɛ é kpó gbe e ɖo xó ɖɔ wɛ bɔ ée togun ɔ se é ɔ, é sa vo ɖɔ é ní ma sɔ́ ɖɔ xó ɖě nú émí ó é kpó ǎ. 20 Ðó gbeɖiɖe élɔ́ dó xɛsi yě tawun: “Ényí kanlin vɔ́vɔ́ t’afɔ só ɔ jí ɔ, è ɖó ná nyi awǐnnyaglo dó hu i.” 21 Gɔ́ ná ɔ, nɔtɛn ɔ dó xɛsi sɔmɔ̌ bɔ Mɔyízi ɖɔ: “Xɛsi ɖi mì bɔ un ɖo sísɔ́sísɔ́ wɛ.” 22 Loɔ, midɛɛ lɛ́ ɔ, mi sɛkpɔ́ Sinyɔ́ɔ só ɔ kpó toxo Mawu gbɛɖe ɔ tɔn, éé nyí Jeluzalɛ́mu jǐxwé tɔn é kpó, gɔ́ nú wɛnsagun afatɔ́n mɔ̌kpán* 23 e kplé ɖó kpɔ́ lɛ́ é; mi lɛ́ sɛkpɔ́ agun nukɔngbéví e sín nyǐkɔ è dó wěma mɛ ɖo jǐxwé lɛ́ é tɔn, Mawu e nyí hwɛɖɔtɔ́ nú mɛ bǐ é, nǔjlɔ́jlɔ́watɔ́ e nɔ zán gbɛ sɔgbe xá gbigbɔ mímɛ́, bɔ è bló bɔ yě nyí mɛ maɖóblɔ̌ lɛ́ é, 24 Jezu e nyí hwɛdógbɔtɔ́ akɔjijɛ yɔ̌yɔ́ ɖé tɔn é kpó hun e è mì dó mǐ wú bɔ é nyɔ́ hú gǎn hun Abɛ́li tɔn é kpó.

25 Mi cɔ́ miɖée bo ma gbɛ́ tó ɖó mɛ e ɖo xó ɖɔ wɛ é ó,* ɖó ényí mɛ ɖěɖěe gbɛ́ bo ma ɖótó mɛ e ɖo akpágbanúmɛ Mawu tɔn xó ɖɔ wɛ ɖo ayǐkúngban jí é ǎ lɛ́ é ma gán ɖ’é mɛ ǎ ɔ, é ɖo wɛn ɖɔ ényí mǐ dó gǔdo mɛ e ɖo xó ɖɔ wɛ sín jǐxwé é ɔ, mǐ kún ná gán ɖ’é mɛ ó ǎ cé? 26 Hwenɛ́nu ɔ, gbe tɔn húnhún ayǐkúngban ɔ, amɔ̌ din ɔ, é d’akpá ɖɔ: “Un ná lɛ́ húnhún ayǐkúngban ɔ azɔn ɖokpó d’é jí, é ka sɔ́ ná nyí ayǐkúngban ɔ kɛ́ɖɛ́ wɛ un ná húnhún ǎ, loɔ, un ná húnhún jǐnukúnsin lɔmɔ̌.” 27 Xógbe “azɔn ɖokpó d’é jí” ɔ xlɛ́ ɖɔ è ná ɖe nǔ ɖěɖěe húnhún lɛ́ é, énɛ́ wɛ nyí, nǔ ɖěɖěe è bló lɛ́ é síin, bónú nǔ ɖěɖěe ma húnhún ǎ lɛ́ é ní nɔ ayǐ. 28 Énɛ́ wú ɔ, ɖó mǐ ná mɔ Axɔ́súɖuto e ma sixú húnhún ǎ é yí wútu ɔ, mi nú mǐ ní kpo ɖo fɛ́nú e gblamɛ mǐ sixú wa sinsɛnzɔ́ mímɛ́ nú Mawu kpó sísí e gɔ́ngɔ́n é kpó, kpódó xɛsi kpán, bɔ é ná yí gbe ná é mɔ yí wɛ. 29 Ðó Mawu mǐtɔn ɔ, myɔ e nɔ fyɔ́ nǔ é wɛ n’i.

13 Mi ní kpo ɖo wǎnyíyí nɔví nɔví tɔn ɖó nú miɖée lɛ́ wɛ. 2 Mi ma wɔn bo gɔn mɛ yí ó,* ɖó gbɔn mɔ̌ wiwa gblamɛ ɔ, mɛɖé lɛ́ ko yí wɛnsagun lɛ́ ɖo manywɛ́ mɛ. 3 Mi ní flín mɛ ɖěɖěe ɖo gankpá mɛ* lɛ́ é, cí nǔ ɖɔ è wlí mi lɔ dó gan mɛ xá yě wɛ ɖɔhun, bo nɔ flín mɛ e dó ya ná wɛ è ɖe lɛ́ é, ɖó gbɛtɔ́ wɛ mi lɔmɔ̌ nyí.* 4 Alɔwlíwlí ní nyí nǔ e wlí yɛ̌yi é ɖo mɛ bǐ nukúnmɛ; è ní ma hɛn kancícá alɔwlíwlí tɔn blí ó, ɖó Mawu ná ɖɔ hwɛ xá agalɛtɔ́* lɛ́ kpó mɛ e nɔ d’afɔ gbě alǒ ba nyɔ̌nu ɖěvo lɛ́ é kpó. 5 Mi ma yí wǎn nú akwɛ́ ɖo lěe mi nɔ zán gbɛ gbɔn é mɛ ó, é nyɔ́ wa ɔ, nǔ e mi ɖó lɛ́ é ní kpé mi. Ðó é ɖɔ: “Un ná jó we dó gbeɖé ǎ, un ná ɖe alɔ sín kan towe mɛ gbeɖé ǎ.” 6 Énɛ́ ɔ, mǐ sixú kpankɔ́n mlɛ́mlɛ́ bo ɖɔ: “Jexóva* wɛ nyí mɛ e nɔ d’alɔ mì é; un ná ɖi xɛsi ǎ. Étɛ́ gbɛtɔ́ ka sixú wa nú mì?”

7 Mi ní flín mɛ ɖěɖěe ɖo ali xlɛ́ mi wɛ lɛ́ é, yědɛɛ lɛ́ wɛ ɖɔ xó Mawu tɔn nú mi; ée mi ná ɖo nǔ e mɛ walɔ yětɔn tɔ́n kɔ dó lɛ́ é kpɔ́n wɛ kpó sɔxwixwe kpó é ɔ, mi ɖi nǔ yěɖɔhun.

8 Mɛ ɖokpó ɔ e Jezu Klísu nyí sɔ é wɛ é nyí égbé, bo ná lɛ́ nyí káká sɔ́yi.

9 Mi ma nú nǔkplɔ́nmɛ tɛnmɛ tɛnmɛ lɛ́ kpó nǔkplɔ́nmɛ e nyí jǒnɔ nú mi lɛ́ é kpó ní dɔn mi bú ó, ɖó é nyɔ́ ɖɔ fɛ́nú Mawu tɔn ní ná hlɔ̌nhlɔ́n ayi mɛtɔn hú ɖɔ nǔɖuɖu* ní wa mɔ̌; nǔɖuɖu énɛ́ lɛ́ nɔ hɛn le wá nú mɛ e nɔ sɔ́ yě ylɔ́ ɖɔ nǔjɔnǔ hú gǎn lɛ́ é ǎ.

10 Ðó mǐ ɖó vɔ̌sákpe ɖokpó, bɔ mɛ ɖěɖěe nɔ wa sinsɛnzɔ́ mímɛ́ ɖo goxɔ ɔ mɛ lɛ́ é ɖó acɛ ɖěbǔ bo ná ɖu nǔ e è xwlé Mawu ɖ’é jí lɛ́ é ǎ. 11 Ðó kanlin e sín hun vɔ̌sánúxwlémawutɔ́ ɖaxó ɔ nɔ sɔ́ byɔ́ tɛn mímɛ́ ɔ mɛ, bo ná dó sá hwɛsɔ́kɛmɛvɔ́ ná lɛ́ é ɔ, fí e è ɖó gɔnu ɖó é gúdo wɛ è nɔ dó kúkú yětɔn zo ɖe. 12 Énɛ́ wú ɔ, Jezu lɔmɔ̌ se wǔvɛ́ ɖo toxo ɔ gúdo, bo ná dó sɔ́ hun éɖésúnɔ tɔn dó slá wǔ nú togun ɔ. 13 Mi bo nú mǐ ní yi gɔ̌n tɔn ɖo fí e è ɖó gɔnu ɖó é gúdo, bo ɖu winnyá ɖokpó ɔ éɖɔhun, 14 ɖó mǐ ɖó toxo e ná nɔ ayǐ é ɖé ɖo fí ǎ, amɔ̌, mǐ ɖo éé jawě é ba wɛ vɛ́návɛ́ná. 15 Mi nú mǐ ní nɔ sá vɔ̌ susu kpikpa tɔn nú Mawu hwebǐnu gbɔn jǐ tɔn; énɛ́ wɛ nyí ɖɔ mǐ ní nɔ sɔ́ nu mǐtɔn dó ɖɔ nyǐkɔ tɔn sín xó ɖo agbawungba. 16 Gɔ́ ná ɔ, mi ma wɔn bo gɔn ɖagbe wa ó, mi ma lɛ́ wɔn bo gɔn nǔ e mi ɖó lɛ́ é má xá mɛ ɖěvo lɛ́ ó, ɖó vɔ̌sísá mɔ̌hun lɛ́ nɔ nyɔ́ Mawu nukúnmɛ titewungbe.

17 Mi ní nɔ se tónú nú mɛ ɖěɖěe ɖo ali xlɛ́ mi wɛ lɛ́ é, bo nɔ hwíhwɛ́ miɖée dó glɔ̌ yětɔn, ɖó yě ɖo xɛ nya ɖo mi* jí wɛ bo ná wá ɖó gbe tɔn. Énɛ́ ɔ, yě ná nya xɛ ɖo mi jí kpó awǎjijɛ kpó, é ná nyí wǔɖéwúɖé ǎ, ɖó énɛ́ ná hɛn nǔ gblé dó mi wú.

18 Mi ní nɔ fɔ́n bo nɔ ɖo ɖɛ xo dó ta mǐtɔn mɛ wɛ, ɖó mǐ ɖeji ɖɔ mǐ ɖó ayixa mímɛ́,* bo lɛ́ jló ná zán gbɛ ɖagbe ɖo nǔ bǐ mɛ. 19 Amɔ̌, un ɖo vo sa nú mi wɛ vɛ́návɛ́ná ɖɔ mi ní nɔ xo ɖɛ bónú má dó sixú lɛ́ kɔ wá mi gɔ́n ɖo malínmálín mɛ.

20 Din ɔ, Mawu fífánɔ ɔ, éé fɔ́n Aklúnɔ mǐtɔn Jezu lɛ̌ngbɔ́nyitɔ́ ɖaxó lɛ̌ngbɔ́ lɛ́ tɔn sín kú, kpó hun akɔjijɛ mavɔmavɔ ɖé tɔn kpó é, 21 ní ná nǔ ɖagbe e mi ná sɔ́ dó wa jlǒ tɔn é bǐ mi, bo wa nǔ e nɔ nyɔ́ nukún tɔn mɛ lɛ́ é ɖo mǐ mɛ, gbɔn Jezu Klísu jí; susu ní nyí étɔn káká sɔ́yi mavɔmavɔ. Amǐ.

22 Din ɔ nɔví lɛ́, un ɖo byɔ̌byɔ́ mi wɛ vɛ́návɛ́ná ɖɔ mi ní ɖótó wǔsyɛ́n dó lanmɛ nú mɛ sín xó élɔ́ kpó sɔxwixwe kpó, ɖó wěma e un wlán sɛ́dó mi é ɖi ga ǎ. 23 Un jló ɖɔ mi ní tuun ɖɔ è ko ɖe nɔví mǐtɔn Timɔtée nyi te. Ényí é wá ɖo malínmálín mɛ ɔ, nyi kpó é kpó ná ɖo kpɔ́ hwenu e un ná mɔ mi é.

24 Mi dó gbe mɛ e ɖo ali xlɛ́ mi wɛ lɛ́ é bǐ kpó mɛ mímɛ́ lɛ́ bǐ kpó nú mì. Nɔví e ɖo Italíi lɛ́ é dó gbe sɛ́dó mi.

25 Fɛ́nú Mawu tɔn ní nɔ kpɔ́ xá mi bǐ.