WĚMASƐ́DÓMƐ JAKI TƆN

1 Nyɛ Jaki, éé nyí kannumɔ Mawu kpó Aklúnɔ Jezu Klísu kpó tɔn é, wɛ ɖo wěma wlán sɛ́dó akɔta 12 e gba kpé lɛ́ é wɛ:

Un dó gbe sɛ́dó mi!

2 Nɔví ce lɛ́ mi, ényí mi ɖo mɛtɛ́nkpɔ́n tɛnmɛ tɛnmɛ lɛ́ mɛ hǔn, mi ní nɔ j’awǎ tawun, 3 ɖó mi tuun ɖɔ, ényí nǔɖiɖi mitɔn gézé ɖo wǔvɛ́ mɔ̌hun lɛ́ mɛ ɔ, mi nɔ kplɔ́n bo nɔ dɛ. 4 Amɔ̌, mi jó didɛ ɔ dó nú é w’azɔ̌ tɔn yi fó, bónú mi ná dó sixú ɖo blěbú bo ná ɖó blɔ̌ ɖěbǔ ǎ ɖo ali bǐ nu, lobɔ nǔ ɖěbǔ ná hwedó mi ǎ.

5 Énɛ́ wú ɔ, ényí nǔnywɛ́ hwedó mɛɖé ɖo mi mɛ hǔn, ní fɔ́n bo ɖo byɔ̌byɔ́ Mawu wɛ, ɖó é nɔ hun alɔ dó ná nǔ mɛ bǐ, é ka nɔ dó hwɛ mɛ ǎ; énɛ́ ɔ, Mawu ná ná ɛ. 6 Amɔ̌, ní fɔ́n bo ɖo byɔ̌byɔ́ wɛ kpó nǔɖiɖi kpó, é ní ma xo nǔ kpɔ́n ɖěbǔ ó, ɖó mɛ e nɔ xo nǔ kpɔ́n é cí aslɔkɛ́ e si te ɖo xu jí, bɔ jɔhɔn d’alɔ mɛ, bo dɔn yi dě ɔ, é nɔ dɔn yi dě é ɖɔhun. 7 Nǔgbó ɔ, mɛ énɛ́ ɖó ná ɖó nukún nǔɖé sín Jexóva* gɔ́n ǎ. 8 Mɛ e ayi tɔn ma nɔ nɔ fí ɖokpó ǎ é wɛ n’i, bɔ nǔwiwa tɔn lɛ́ nɔ ɖyɔ́ hwebǐnu.

9 Amɔ̌, nɔví e nyí wamamɔnɔ é ní j’awǎ,* ɖó sɔ́ e è sɔ́ ɛ su é wú, 10 bónú dɔkunnɔ ní j’awǎ, ɖó é kplɔ́n mɛɖéesɔ́hwe wútu, ɖó dɔkunnɔ sín xó ná fó folówa e ɖo gle mɛ é ɖɔhun. 11 Ðó lěe hwesivɔ́ nɔ tɔ́n, bɔ zozo tɔn nɔ ɖo gáɖágáɖá, bo nɔ fyɔ́ gběhan, bɔ folówa tɔn nɔ j’ayǐ, lobɔ ɖɛkpɛ tɔn nɔ bú gbɔn é ɔ, mɔ̌ ɖokpó ɔ wɛ dɔkunnɔ sín xó ná fó gbɔn, ɖo nǔ e gbé nya wɛ é ɖe lɛ́ é tɛ́ntin.

12 Awǎjijɛnɔ wɛ nyí mɛ e fɔ́n bo ɖo didɛ wɛ ɖo mɛtɛ́nkpɔ́n nu é, ɖó ényí nǔ tɔn nyɔ́ Mawu nukúnmɛ ɔ, é ná mɔ axɔ́súgbákún gbɛ tɔn e sín akpá Jexóva* dó nú mɛ ɖěɖěe kpo ɖo wǎnyíyí ɖó n’i wɛ lɛ́ é yí. 13 Ényí mɛɖé ɖo mɛtɛ́nkpɔ́n mɛ hǔn, ní ma ɖɔ: “Mawu wɛ ɖo tíntɛ́n mì kpɔ́n wɛ” ó. Ðó nǔ nyanya sixú tɛ́n Mawu kpɔ́n ǎ, Mawu ɖésú ka nɔ sɔ́ nǔ nyanya dó tɛ́n mɛ ɖěbǔ kpɔ́n ǎ. 14 É nyɔ́ wa ɔ, mɛ ɖokpó ɖokpó nɔ jɛ tɛ́nkpɔ́n mɛ hwenu e jlǒ mɛɖésúnɔ tɔn dɔn mɛ, bo lú mɛ* é. 15 Énɛ́ gúdo ɔ, ényí jlǒ ɔ wá syɛ́n ɔ, é nɔ zɔ́n bɔ mɛ ɔ nɔ hu hwɛ;* bɔ ényí é hu hwɛ gúdo ɔ, énɛ́ nɔ dɔn kú wá.

16 Nɔví ce vívɛ́ná lɛ́ mi, mi ma blɛ́ miɖée ó. 17 Nǔníná ɖagbe ɖagbe bǐ kpó nǔníná e nǔ bǐ vɔ ɖ’é wú é bǐ kpó ɔ, aga wɛ yě nɔ gosín; yě nɔ jɛ te sín Tɔ́ wěziza jǐnukúnsin tɔn lɛ́ tɔn ɔ gɔ́n, é nɔ ɖyɔ́ alǒ húzú yɛtɛn lɛ́ ɖɔhun ǎ. 18 Jlǒ tɔn wɛ nyí ɖɔ é ní ji mǐ gbɔn nǔgbó ɔ gblamɛ, bónú mǐ ná húzú nǔɖíɖó tɔn lɛ́ sín sínsɛ́n nukɔntɔn lɛ́ ɖo ali ɖé nu.

19 Nɔví ce vívɛ́ná lɛ́ mi, mi ní tuun nǔ élɔ́: mɛ ɖokpó ɖokpó ɖó ná ɖo gbesisɔmɛ bo ná nɔ ɖótó mɛ, bo ná nɔ yá wǔ ɖɔ xó ǎ, lobo ná nɔ yá wǔ sin xomɛ ǎ, 20 ɖó xomɛsin gbɛtɔ́ tɔn nɔ wa nǔ sɔgbe xá nǔjlɔ́jlɔ́wiwa Mawu tɔn ǎ. 21 Énɛ́ wú ɔ, mi ɖe nǔ kwíji bǐ kpó nǔnyanyawiwa ɖěbǔ e kpo ɖo ayi mitɔn mɛ é* kpó síin, bo sɔ́ xomɛfífá dó yí gbe bónú xó e kpé wú bo ná hwlɛ́n mi* é ní dó ɖɔ do ɖo ayi mitɔn lɛ́ mɛ.

22 Mi ma nɔ nyí xósetɔ́ kpowun, bo nɔ ɖo miɖée blɛ́ wɛ kpó linlin masɔgbe lɛ́ kpó ó, loɔ, mi ní nɔ bló ɖó xó ɔ jí. 23 Ðó ényí mɛɖé nɔ se xó ɔ kpowun, bo ma nɔ bló ɖ’é jí ǎ ɔ, mɛ énɛ́ cí nya e ɖo nukúnmɛ éɖésúnɔ tɔn* kpɔ́n wɛ ɖo wěkpɛ́n mɛ é ɖɔhun. 24 É kpɔ́n éɖée bo ɖidó, bɔ tlóló ɔ, é wɔn mɛ alɔkpa e é nyí é. 25 Amɔ̌, mɛ e nɔ gbéjé sɛ́n maɖóblɔ̌, éé nyí mɛɖésúsíninɔ tɔn é kpɔ́n tɛ́nwín lɛnwín bo kpo ɖo mɔ̌ wa wɛ é, ko húzú mɛ e nɔ bló ɖó xó ɔ jí é, é nyí xósetɔ́ nǔwɔntɔ́ ǎ. É ná ɖó awǎjijɛ ɖo nǔ e wa wɛ é ɖe é mɛ.

26 Ényí mɛɖé lin ɖɔ émí nyí mawusɛntɔ́,* bo ma ka nɔ dó gan ɖɛ̌ tɔn* ǎ ɔ, é ɖo ayi éɖésúnɔ tɔn blɛ́ wɛ, bɔ mawusinsɛn tɔn nyí nǔ yǎyá. 27 Mawusinsɛn* alɔkpa e mɛ́, bɔ nǔ kwíjikwíji ɖěbǔ ma va d’é wú ǎ, ɖo Mawu Tɔ́ mǐtɔn nukúnmɛ é ɖíe: è ní kpé nukún dó tɔ́cyɔvǐ lɛ́ kpó asúkúsi lɛ́ kpó wú ɖo wǔvɛ́ yětɔn lɛ́ mɛ, lobo cɔ́ mɛɖée bónú gbɛ ɔ ma hɛn mɛ blí ó.

2 Nɔví ce lɛ́ mi, nɛ̌ mi ka ná ɖɔ ɖɔ émí ɖi nǔ nú Aklúnɔ mǐtɔn Jezu Klísu susunɔ ɔ, bo ka ná nɔ lɛ́ ɖe mɛɖé ɖó vo ɖo mɛɖé mɛ gbɔn? 2 Mǐ ní ɖɔ ɖɔ mɛ e dó sikálɔkɛ lɛ́ kpó awu ɖɛkpɛ ɖɛkpɛ lɛ́ kpó é ɖokpó wá kplé mitɔn, bɔ wamamɔnɔ e dó awu kwíjikwíji é lɔmɔ̌ wá. 3 Amɔ̌ din ɔ, mi wlí yɛ̌yi ɖaxó nú mɛ e dó awu ɖɛkpɛ ɖɛkpɛ é, bo ɖɔ n’i ɖɔ: “Hwɛ ɔ, jǐnjɔ́n fí ɖo tɛn ɖagbe élɔ́ mɛ,” bo ka wá ɖɔ nú wamamɔnɔ ɔ ɖɔ: “Hwɛ ɔ, cí te fí,” alǒ: “Jǐnjɔ́n dě ɖo afɔ ce kpá.”* 4 Ényí mɔ̌ wɛ mi nɔ wa nǔ gbɔn hǔn, mɛ ɖě ɖe ɖó vo nú mɛ ɖě wɛ mi ɖe, bo húzú hwɛɖɔtɔ́ ɖěɖěe nɔ wá gbeta nyanya lɛ́ kɔn é nɛ́ ǎ cé?

5 Nɔví ce vívɛ́ná lɛ́ mi, mi ɖótó. É ma nyí mɛ e nyí wamamɔnɔ ɖo gbɛ ɔ nukúnmɛ lɛ́ é wɛ Mawu cyán, bónú yě ná nyí dɔkunnɔ ɖo nǔɖiɖi mɛ, bo lɛ́ ɖu Axɔ́súɖuto e sín akpá é dó nú mɛ ɖěɖěe yí wǎn n’i lɛ́ é sín gǔ ǎ cé? 6 Amɔ̌, mi nɔ sɔ́ wamamɔnɔ lɛ́ xo kɔ́. É ma ka nyí dɔkunnɔ lɛ́ wɛ nɔ gb’acɛ mi wú, bo nɔ dɔn mi yi hwɛ nukɔn ǎ cé? 7 Yě nɔ nylá nu dó nyǐkɔ ɖagbe e è ná mi é wú ǎ cé? 8 Nǔwlánwlán mímɛ́ lɛ́ ɖɔ: “A ɖó ná yí wǎn nú nɔzo towe hwiɖésúnɔ ɖɔhun.” Énɛ́ wú ɔ, ényí mi nɔ se tónú nú sɛ́nxɔ́sú énɛ́ hǔn, nǔ ɖagbe wa wɛ mi ɖe. 9 Amɔ̌, ényí mi kpo ɖo mɛɖé ɖe ɖó vo ɖo mɛɖé mɛ wɛ hǔn, hwɛ hu wɛ mi ɖe, bɔ sɛ́n ɔ xlɛ́ nyi wɛn* ɖɔ mi nyí hwɛhutɔ́.

10 Ðó ényí mɛɖé se tónú nú Sɛ́n ɔ bǐ bo ka ɖe afɔ gbɔ ɖo nǔ e Sɛ́n ɔ byɔ́ lɛ́ é ɖokpó mɛ ɔ, Sɛ́n ɔ bǐ wɛ é gba. 11 Ðó mɛ e ɖɔ: “A ɖó ná dó afɔ gbě alǒ ba nyɔ̌nu ɖěvo ǎ” é, lɛ́vɔ́ ɖɔ: “A ɖó ná hu mɛ ǎ.” Din ɔ, ényí a ma dó afɔ gbě alǒ ba nyɔ̌nu ɖěvo ǎ, bo ka hu mɛ ɔ, a húzú sɛ́ngbatɔ́. 12 Mi ní kpo ɖo xó ɖɔ wɛ, bo kpo ɖo nǔ wa wɛ, mɛ ɖěɖěe è ná ɖɔ hwɛ xá, sɔgbe xá sɛ́n togun e ɖo éɖésúnɔ sí é tɔn* lɛ́ é ɖɔhun. 13 Ðó mɛ e ma nɔ kú nǔbláwǔ nú mɛ ǎ é ɔ, è ja hwɛ ɖɔ xá ɛ gbé ɔ, è ná kú nǔbláwǔ n’i ǎ. Nǔbláwǔkúnúmɛ nɔ ɖu ɖo hwɛɖiɖɔ jí.

14 Nɔví ce lɛ́ mi, ényí mɛɖé ɖɔ ɖɔ émí ɖó nǔɖiɖi, bo ma ka nɔ wa nǔ ɖagbe ǎ ɔ, le tɛ́ ka ɖ’é mɛ n’i? Nǔɖiɖi énɛ́ sixú hwlɛ́n ɛ ǎ, kabǐ? 15 Mǐ ní ɖɔ ɖɔ nɔví súnnu ɖé, alǒ nɔví nyɔ̌nu ɖé ɖó awu ǎ,* bo ka lɛ́ ɖó nǔ e é ná ɖu ɖo azǎn ɖokpó ɖokpó jí é ǎ. 16 Ényí mi mɛ ɖokpó ɖɔ n’i ɖɔ: “Yi ɖo fífá mɛ; glɔ̌n yǒzo nú hwiɖée, bo ɖu nǔ ní kpé we,” lobo ma ka ná ɛ nǔ e sín hudó agbaza tɔn ɖó é ǎ ɔ, le tɛ́ ka ɖ’é mɛ nú mi? 17 Nǔ ɖokpó ɔ wɛ é nyí xá nǔɖiɖi, ényí mǐ ma nɔ wa nǔ ɖagbe ǎ ɔ, nǔɖiɖi mǐtɔn ná nyí nǔɖéwanú ǎ.

18 É ɖo mɔ̌ có, mɛɖé ná ɖɔ: “A ɖó nǔɖiɖi, bɔ nyɛ nɔ wa nǔ ɖagbe lɛ́. Xlɛ́ mì nǔɖiɖi towe nǔwiwa lɛ́ mɛvo, nyɛ ná xlɛ́ we nǔɖiɖi ce, gbɔn nǔwiwa ce lɛ́ gblamɛ.” 19 A ɖi nǔ ɖɔ Mawu ɖokpó géé wɛ ɖe, kabǐ? A bló ɖó ganjí. É ɖo mɔ̌ có, awǒvi lɛ́ lɔ ɖi nǔ bo nɔ sísɔ́. 20 Amɔ̌, nǔmanywɛ́tɔ́ è! Kúnnuɖenú lɛ́ ba wɛ a ɖe ɖɔ nǔɖiɖi e ma nɔ ɖe éɖée xlɛ́ gbɔn nǔwiwa lɛ́ gblamɛ ǎ é kún nyí nǔɖéwanú ó a? 21 Nǔ e tɔ́ mǐtɔn Ablaxámu wa é wɛ zɔ́n bɔ Mawu ɖɔ ɖɔ é nyí nǔjlɔ́jlɔ́watɔ́ ǎ cé? Ɛɛn, ée é sɔ́ vǐ tɔn Izáki ɖó vɔ̌sákpe ɔ jí gúdo é wɛ Mawu ɖɔ ɖɔ é nyí nǔjlɔ́jlɔ́watɔ́. 22 A mɔ ganjí ɖɔ nǔɖiɖi tɔn kpó nǔwiwa tɔn lɛ́ kpó w’azɔ̌ ɖó kpɔ́, bɔ nǔwiwa tɔn lɛ́ zɔ́n bɔ nǔ bǐ vɔ ɖo nǔɖiɖi tɔn wú, 23 bɔ akpáxwé nǔwlánwlán mímɛ́ lɛ́ tɔn e ɖɔ xó élɔ́ é jɛnu: “Ablaxámu ɖi nǔ nú Jexóva,* bɔ è kpɔ́n ɛ dó mɔ nǔjlɔ́jlɔ́watɔ́,” lobɔ è ylɔ́ ɛ ɖɔ xɔ́ntɔn Jexóva* tɔn.

24 Mi mɔ din ɖɔ é kún nyí nǔɖiɖi kɛ́ɖɛ́ wɛ ná zɔ́n bɔ è ná ylɔ́ mɛɖé ɖɔ nǔjlɔ́jlɔ́watɔ́ ó, loɔ, é ná lɛ́ sín nǔwiwa tɔn lɛ́ wú. 25 Mɔ̌ ɖokpó ɔ, nǔ e Hlaxábu tonyatɔ́ ɔ wa é wɛ zɔ́n bɔ Mawu kpɔ́n ɛ dó mɔ nǔjlɔ́jlɔ́watɔ́ ǎ cé? Ɛɛn, ée é yí amɛ̌* lɛ́ bo d’alɔ yě bɔ yě hɔn gbɔn ali ɖěvo gúdo é wɛ Mawu kpɔ́n ɛ dó mɔ nǔjlɔ́jlɔ́watɔ́. 26 Nǔgbó ɔ, lěe agbaza e mɛ gbigbɔ* ma ɖe ǎ é nyí nǔ kúkú gbɔn é ɔ, mɔ̌ ɖokpó ɔ wɛ nǔɖiɖi e ma nɔ ɖe éɖée xlɛ́ gbɔn nǔwiwa lɛ́ gblamɛ ǎ ɔ nyí nǔ kúkú gbɔn.

3 Nɔví ce lɛ́ mi, mi mɛ gěgé ɖó ná húzú nǔkplɔ́nmɛtɔ́ ǎ, ɖó mi tuun ɖɔ è ná ɖɔ hwɛ xá mǐ syɛ́nsyɛ́n. 2 Ðó mǐ mɛ bǐ wɛ nɔ wa nǔ nyi do* hwɛhwɛ. Ényí mɛɖé ma nɔ wa nǔ nyi do ɖo xóɖiɖɔ mɛ ǎ ɔ, mɛ maɖóblɔ̌ wɛ é nyí, bo kpé wú bo ná lɛ́ ɖu ɖo agbaza tɔn blěbú jí. 3 Ényí mǐ nɔ dó gan nu nú sɔ́ lɛ́ dó bló bónú yě ná se tónú nú mǐ ɔ, mǐ nɔ lɛ́ xlɛ́ ali agbaza yětɔn blěbú. 4 Mi lɛ́ kpɔ́n nǔ dó tɔjíhún lɛ́ wú: yě d’agba tawun bɔ jɔhɔn syɛ́nsyɛ́n lɛ́ wɛ nɔ sísɛ́ yě có, zɛn* kpɛví títí ɖé wɛ nɔ xlɛ́ ali yě, yi fí ɖěbǔ e mɛ e ɖo hǔn ɔ kun wɛ é jló ná yi é.

5 Ðo ali ɖokpó ɔ nu ɔ, ɖɛ̌ nyí wǔjɔnú kpɛví agbaza tɔn ɖé, é ɖo mɔ̌ có, é nɔ flé nu zɛ xwé wú. Mi kpɔ́n lěe myɔ kpɛví ɖé ko kpé, bɔ zungbó ɖaxó ɖé ná wlí myɔ gbɔn é! 6 Ðɛ̌ ɔ, myɔ wɛ é nyí. Wǔjɔnú agbaza tɔn e nɔ wa nǔ nyanya bo nɔ hɛn agbaza ɔ blěbú blí é ɖé wɛ. É sixú sú kún dó nú gbɛzán mɛɖé tɔn. Jeyɛ́nu* ɖɔhun wɛ é cí, ɖó é sixú sú kún dó nú mɛ. 7 Ðó gběkanlin, xɛ, kanlin e nɔ sá é kpó nǔɖíɖó e ɖo xu mɛ é kpó tɛnmɛ tɛnmɛ lɛ́ wɛ è sixú dé, bɔ gbɛtɔ́ lɛ́ ka nɔ dé yě nǔgbó. 8 Amɔ̌, gbɛtɔ́ ɖěbǔ sixú kpé wú bo dé ɖɛ̌ tɔn ǎ. È sixú kpé jǐ tɔn ǎ, é báɖá, aɖǐ e nɔ hu mɛ é wɛ gɔ́. 9 É wɛ mǐ nɔ sɔ́ dó kpa susu nú Jexóva,* Tɔ́ ɔ ná, é wɛ mǐ ka nɔ lɛ́ sɔ́ dó dónu mɛ ɖěɖěe è dá “ɖo akpajlɛ́ Mawu tɔn mɛ” lɛ́ é ná. 10 Nu ɖokpó ɔ mɛ wɛ nyɔ̌ná kpó nudómɛ kpó nɔ zɛ hwɛ sín.

Nɔví ce lɛ́ mi, é sɔgbe ɖɔ nǔ lɛ́ ní nɔ nyí gbɔn mɔ̌ ǎ. 11 Tɔjɔtɛn ɖé nɔ ná sin e víví é kpó sin e vɛ́ é kpó gbɔn ali ɖokpó ɔ nu ǎ, kabǐ? 12 Nɔví ce lɛ́ mi, fígitín sixú sɛ́n olívu ǎ, vǐwuntín ka sixú sɛ́n fígi ǎ, kabǐ? Mɔ̌ jɛ́n tɔjɔtɛn e vɛ́ jɛ é ɖé ma sixú ná sin víví ǎ é nɛ́.

13 Mɛ̌ ka nyí nǔnywɛ́tɔ́ kpó nukúnnúmɔjɛnǔmɛtɔ́ kpó ɖo mi mɛ? Mɛ énɛ́ ɖó ná ɖó walɔ ɖagbe e nɔ xlɛ́ ɖɔ é nɔ wa nǔ bǐ kpó xomɛfífá e nɔ tɔ́n sín nǔnywɛ́ mɛ é kpó é. 14 Amɔ̌, ényí wǔhwinhwan baɖabaɖa kpó gbemanɔkpɔ́ syɛ́nsyɛ́n sín linlin* kpó ɖo ayi mitɔn mɛ ɔ, mi ɖó ná nɔ flé nu ɖó nǔnywɛ́ mitɔn wú ǎ; ényí mi bló mɔ̌ ɔ, adingban wɛ é ná nyí. 15 Nǔnywɛ́ e gosín jǐxwé é nɛ́ ǎ; ayǐkúngban jí tɔn wɛ, kanlinjɔmɔ lɛ́ tɔn kpó Awǒvi tɔn kpó. 16 Ðó fí ɖěbǔ e wǔhwinhwan kpó gbemanɔkpɔ́* kpó ɖe é ɔ, nǔ hannyahannya wiwa kpó nǔ nyanya bǐ kpó ná lɛ́ ɖo fínɛ́.

17 Amɔ̌, nǔnywɛ́ e gosín jǐxwé é ɔ, nǔ mímɛ́ wɛ é to nyí hwɛ̌, énɛ́ gúdo ɔ, é nɔ xo fífá kan, é ɖo jlɛ̌ jí, é ɖo gbesisɔmɛ bo ná se tónú, é nɔ kú nǔbláwǔ nú mɛ tawun, bo nɔ ná sínsɛ́n ɖagbe gěgé, é nɔ ɖe mɛɖé ɖó vo ɖo mɛɖé mɛ ǎ, é nɔ wa yɛmɛnú ǎ. 18 Gɔ́ ná ɔ, mɛ e nɔ xo fífá kan lɛ́ é ɔ, fífá mɛ wɛ yě nɔ dó nǔ dó, bo nɔ ya sínsɛ́n nǔjlɔ́jlɔ́wiwa tɔn.

4 Fítɛ́ ahwan kpó hunxixo kpó e ɖo tɛ́ntin mitɔn lɛ́ é ka gosín? É ma nyí jlǒ agbaza tɔn e ɖo hun xo wɛ ɖo xo mitɔn mɛ* lɛ́ é wú wɛ yě sín ǎ cé? 2 Mi ɖo nǔɖé ba wɛ, amɔ̌, mi ka mɔ ǎ. Mi nɔ ɖo mɛ hu wɛ bo nɔ ɖo mɛ nú jló wɛ, amɔ̌, mi ka kpé wú bo mɔ ǎ. Mi nɔ fɔ́n bo nɔ ɖo hun xo wɛ lobo nɔ ɖo ahwan fun wɛ. Mi mɔ nǔ e ba wɛ mi ɖe é ǎ, ɖó mi byɔ́ ǎ wútu. 3 Ényí mi ka byɔ́ ɔ, mi nɔ mɔ ǎ, ɖó linlin nyanya lɛ́ wú wɛ mi ɖo byɔ̌byɔ́ wɛ, bo ná dó sixú zán nú jlǒ agbaza tɔn mitɔn lɛ́.

4 Gbejímanɔtɔ́ è mi,* mi tuun ɖɔ xɔ́ntɔn zunzun xá gbɛ ɔ ɔ, kɛntɔ́ Mawu tɔn nyínyí wɛ ǎ cé? Énɛ́ wú ɔ, mɛ ɖěbǔ e jló ná nyí xɔ́ntɔn gbɛ ɔ tɔn é, ɖo éɖée sɔ́ dó ɖó kɛntɔ́ Mawu tɔn wɛ. 5 Nǔwlánwlán mímɛ́ ɔ ɖɔ: “Linlin e dó ɖɔ do ɖo ayi mǐtɔn mɛ é nɔ fɔ́n bo nɔ ɖo nukúnkɛn dó wɛ.” Yǎyá wú wɛ nǔwlánwlán mímɛ́ ɔ ɖɔ mɔ̌ bɔ mi lin a? 6 É ɖo mɔ̌ có, fɛ́nú e Mawu nɔ ná mǐ é kló hú linlin mɔ̌hun. Énɛ́ wú ɔ, nǔwlánwlán mímɛ́ ɔ ɖɔ: “Mawu nɔ húzú kpan nukɔn goyítɔ́ lɛ́, amɔ̌, é nɔ ná fɛ́nú mɛɖéesɔ́hwetɔ́ lɛ́.”

7 Énɛ́ wú ɔ, mi hwihwɛ́ miɖée dó Mawu glɔ́; amɔ̌, mi húzú kpan nukɔn Awǒvi, énɛ́ ɔ, é ná hɔn yi zɔ nú mi. 8 Mi sɛkpɔ́ Mawu, énɛ́ ɔ, é ná sɛkpɔ́ mi. Hwɛhutɔ́ lɛ́ mi, mi klɔ́ alɔ mitɔn lɛ́. Nǔxokpɔ́ntɔ́ lɛ́ mi, mi slá wǔ nú ayi mitɔn lɛ́. 9 Mi ní blá wǔ bo nɔ aluwɛ mɛ lobo ya avǐ. Mi nú nǔkiko mitɔn ní húzú aluwɛ, mi ma sɔ́ j’awǎ ɖě ó, loɔ, wǔ ní kú mi. 10 Mi hwihwɛ́ miɖée ɖo Jexóva* nukɔn, énɛ́ ɔ, é ná sɔ́ mi su.

11 Nɔví lɛ́ mi, mi ma sɔ́ nɔ ɖɔ xó nyanya dó miɖée lɛ́ wú ɖě ó. Mɛ ɖěbǔ e nɔ ɖɔ xó nyanya dó nɔví ɖé wú, alǒ nɔ ɖɔ hwɛ xá nɔví tɔn é ɔ, sɛ́n ɔ wú ɖɔ xó nyanya dó wɛ é ɖe, bo lɛ́ ɖo hwɛ ɖɔ xá sɛ́n ɔ wɛ. Ényí a nɔ ɖɔ hwɛ xá sɛ́n ɔ hǔn, a sɔ́ nyí sɛ́nnyitɔ́ ǎ, loɔ, hwɛɖɔtɔ́ wɛ a nyí nɛ́. 12 Mɛ ɖokpó géé wɛ nyí Sɛ́nnámɛtɔ́ kpó Hwɛɖɔtɔ́ kpó, é wɛ nyí mɛ e kpé wú bo ná hwlɛ́n mɛ, bo ná lɛ́ sú kún dó nú mɛ é. Amɔ̌ hwɛ ɔ, mɛ̌ a ka nyí bo ná ɖɔ hwɛ xá nɔzo towe?

13 Din ɔ, mi mɛ e nɔ ɖɔ: “Égbé alǒ sɔ ɔ, mǐ ná yi toxo lě mɛ, bo ná nɔ fínɛ́ nú xwe ɖokpó, lobo ná w’ajɔ̌ bo ɖu le” lɛ́ é ɔ, mi ɖótó mì, 14 nǔ e gbɛ mitɔn ná nyí ɖo sɔ é ɔ, mi tuun ǎ. Ðó mi cí amǔ* e nɔ sú nú hwenu kpɛɖé, bo nɔ wá hɔ́n é ɖɔhun. 15 Nǔ e mi ɖó ná nɔ ɖɔ é ɖíe: “Nú é jló Jexóva* ɔ, mǐ ná ɖo gbɛ bo ná wa nǔ lě alǒ nǔ lě.” 16 Amɔ̌ din ɔ, mi nɔ gó ɖo ajɔ̌ e mi nɔ jlá nú miɖée kpó goyíyí kpó é mɛ. Ajɔ̌jíjlá nú mɛɖée mɔ̌hun bǐ wɛ nylá. 17 Énɛ́ wú ɔ, ényí mɛɖé tuun nǔ e sɔgbe é bo ma ka bló ǎ hǔn, hwɛ wɛ é hu.

5 Din ɔ, mi mɛ dɔkunnɔ lɛ́, mi ɖótó: mi ya avǐ bo ná alě, ɖó wǔblá e ja mi jí lɛ́ é wú. 2 Dɔkun mitɔn lɛ́ nyɔ, bɔ avɔɖwivɔɖwi ɖu avɔ mitɔn lɛ́. 3 Siká mitɔn kpó kpatágan mitɔn kpó ná jɛ ko, bɔ kojijɛ yětɔn ná ɖe nǔwanyido mitɔn xlɛ́, bo ná ɖu agbaza mitɔn. Nǔ e mi xo kplé lɛ́ é ná cí myɔ ɖɔhun, ɖo azǎn gǔdo gúdo tɔn lɛ́ mɛ. 4 Mi ɖótó! Azɔ̌watɔ́ ɖěɖěe ya nǔkún ɖo gle mitɔn lɛ́ mɛ lɛ́ é ɖo xó sú wɛ magbokɔ, ɖó mi sú azɔ̌kwɛ́ yě ǎ wútu. Xó e sú wɛ nǔkúnyatɔ́ lɛ́ ɖe, bo ɖo alɔdó byɔ́ wɛ é jɛ Jexóva* ahwankpá lɛ́ tɔn sín tó mɛ. 5 Mi zán vivomɛninɔ sín gbɛ, bo kpo nú gbɛɖuɖu ɖo ayǐkúngban ɔ jí. Mi bló bɔ ayi mitɔn dó jǒ káká jɛ gbe e gbe è ná hu mi é. 6 Mi ɖó hwɛ nú mɛ; mi hu nǔjlɔ́jlɔ́watɔ́ ɔ. É ɖo gbe klán xá mi wɛ ǎ cé?

7 Nɔví lɛ́ mi, mi bo ɖó suúlu, káká jɛ fí ɖiɖe Aklúnɔ tɔn hwenu. Éɖíe! Glesi nɔ nɔ te kpɔ́n sínsɛ́n xɔ akwɛ́ ayǐkúngban ɔ tɔn, é nɔ ɖó suúlu káká jɛ hwenu e xwejí kpó zǒjí kpó nɔ ja dó é. 8 Mi lɔmɔ̌ ní ɖó suúlu; mi ná hlɔ̌nhlɔ́n ayi mitɔn, ɖó fí ɖiɖe Aklúnɔ tɔn ko sɛkpɔ́.

9 Nɔví lɛ́ mi, mi ma nɔ húnhún nǔ ɖɔ* dó miɖée lɛ́ wú, bónú è wá ɖó hwɛ nú mi ó. Hwɛɖɔtɔ́ ɔ ko ɖo hɔn ta. 10 Nɔví lɛ́ mi, mi cí gbeyíɖɔ e ɖɔ xó ɖo nyǐkɔ Jexóva* tɔn mɛ lɛ́ é ɖɔhun. Yě se wǔvɛ́ ɖo ali gěgé nu, bo dɛ kpó suúluɖíɖó kpó. 11 Mǐ nɔ mɔ ɖɔ awǎjijɛnɔ* wɛ nú mɛ ɖěɖěe dɛ lɛ́ é. Mi se lěe Jɔbu dɛ gbɔn é sín xó, bo tuun nyɔ̌ná e Jexóva* kɔn dó jǐ tɔn é, bɔ mɔ̌ mɛ ɔ, mi mɔ ɖɔ Jexóva* nɔ kú nǔbláwǔ nú mɛ, bo nɔ lɛ́ yí wǎn nú mɛ titewungbe.

12 Nɔví ce lɛ́ mi, tají hú bǐ ɔ, mi ma sɔ́ nɔ xwlé jǐxwé alǒ ayǐkúngban, alǒ nǔ ɖěvo ɖěbǔ ɖě ó. É nyɔ́ wa ɔ, mi nú “ɛɛn” mitɔn ní nyí ɛɛn, bónú “éǒ” mitɔn ní nyí éǒ, bónú Mawu ma wá ɖɔ hwɛ xá mi ó.

13 Mɛɖé ɖo wǔvɛ́ se wɛ ɖo mi mɛ wɛ a? Mi nú é ní xo ɖɛ. Mɛɖé ɖo awǎjijɛ mɛ ɖo mi mɛ wɛ a? Mi nú é ní ji ɖɛhan lɛ́. 14 Mɛɖé ɖo azɔn jɛ wɛ ɖo mi mɛ wɛ a? Mi nú é ní ylɔ́ mɛxó agun tɔn lɛ́ bónú yě ní xo ɖɛ n’i, bo kɔn ami dó ta n’i ɖo nyǐkɔ Jexóva* tɔn mɛ. 15 Ðɛ e è xo kpó nǔɖiɖi kpó é ná zɔ́n bɔ azinzɔnnɔ ɔ* ná jɛ te, bɔ Jexóva* ná sɔ́ ɛ sí te. Gɔ́ ná ɔ, ényí é hu hwɛ wɛ ɔ, è ná sɔ́ hwɛ tɔn lɛ́ kɛ ɛ.

16 Énɛ́ wú ɔ, mi nɔ ɖɔ hwɛ e mi hu lɛ́ é nú miɖée lɛ́ nyi wɛn, bo nɔ xo ɖɛ nú miɖée lɛ́, bónú è ná dó sixú gbɔ azɔn nú mi. Nǔjlɔ́jlɔ́watɔ́ sín vosisa nɔ w’azɔ̌ tawun.* 17 Elíi ɔ, gbɛtɔ́ wɛ é nyí mǐ bǐ ɖɔhun. É ɖo mɔ̌ có, hwenu e é xo ɖɛ vívɛ́ ɖɔ jǐ ní ma ja ó é ɔ, jǐ ja dó ayǐkúngban ɔ jí ǎ káká nú xwe atɔn sun ayizɛ́n. 18 Énɛ́ gúdo ɔ, é lɛ́ xo ɖɛ, bɔ jǐ ja, lobɔ ayǐkúngban ɔ ná sínsɛ́n.

19 Nɔví ce lɛ́ mi, ényí mɛɖé ɖo mi mɛ bo zɛ gbě sín nǔgbó li ɔ jí, bɔ mɛ ɖěvo lɛ́ kɔ n’i ɔ, 20 mi ní tuun ɖɔ mɛ ɖěbǔ e lɛ́ kɔ nú hwɛhutɔ́ ɖé sín nǔwanyido li jí é ná hwlɛ́n ɛ* ɖo kú sí, bo ná cyɔ́n nǔ dó hwɛ wɔ̌búwɔ́bú.