PIYƐ́Ɛ NUKƆNTƆN

1 Nyɛ Piyɛ́ɛ, éé nyí mɛsɛ́dó Jezu Klísu tɔn é, wɛ ɖo wěma wlán sɛ́dó mi mɛ e Mawu cyán, bɔ mi ɖo gbɛ élɔ́ mɛ nú hwenu kléwún ɖé, bo gba kpé Pɔ́ɔn, Galáti, Kapadɔ́si, Azíi kpó Bitiníi kpó lɛ́ é wɛ. 2 É wɛ nyí Tɔ́ jǐxwé tɔn ɔ, bo cyán mi sɔgbe xá tuto e é ko bló é. É ná mi gbigbɔ mímɛ́ dó bló bɔ mi nyí mɛ mímɛ́. É wa mɔ̌, bónú mi ná dó sixú se tónú n’i, lobo ná mɛ́, ɖó hun Jezu Klísu tɔn wútu:

Fɛ́nú Mawu tɔn kpó fífá tɔn kpó ní túnflá nú mi.

3 Susu nú Mawu Aklúnɔ mǐtɔn Jezu Klísu sín Tɔ́, ɖó ɖo nǔbláwǔkúnúmɛ tɔn ɖaxó ɔ mɛ ɔ, é vɔ́ mǐ ji nú nukúnɖíɖó gbɛɖe ɖé, gbɔn fínfɔ́n sín kú Jezu Klísu tɔn gblamɛ, 4 bónú mǐ ná ɖu gǔ e ma nɔ gblé ǎ, bɔ nǔ kwíji ɖěbǔ ma va d’é wú ǎ, lobo ma nɔ cá ǎ é. È sɔ́ ɖ’ayǐ nú mi ɖo jǐxwé, 5 mi mɛ e jí Mawu nɔ cyɔ́n alɔ gbɔn hlɔ̌nhlɔ́n tɔn gblamɛ, ɖó mi ɖó nǔɖiɖi wútu lɛ́ é. Mawu ɖo alɔ cyɔ́n mi jí wɛ nú hwlɛngán e ko sɔgbe, bɔ è ná ɖe xlɛ́ ɖo hwenu gǔdo gúdo tɔn ɔ mɛ é. 6 Énɛ́ wú ɔ, mi ɖo awǎ jɛ wɛ tawun, ényí é tlɛ byɔ́ ɖɔ nú hwenu kléwún ɖé ɔ, mɛtɛ́nkpɔ́n vovo lɛ́ zɔ́n bɔ mi nɔ aluwɛ mɛ ɔ nɛ́. 7 Nǔ énɛ́ lɛ́ jɛ, bónú nǔɖiɖi mitɔn e gbɔn mɛtɛ́nkpɔ́n mɛ é ní dó sixú zɔ́n bónú è ná mlá mi, bo kpa susu nú mi, lobo wlí yɛ̌yi nú mi, ɖo hwenu e è ná ɖe nǔwiwa Jezu Klísu tɔn lɛ́ xlɛ́ é. Nǔɖiɖi alɔkpa énɛ́ xɔ akwɛ́ hú siká e è nɔ hɛn gbɔn myɔ mɛ* có, é ka nɔ wá gblé é. 8 Mi mɔ ɛ kpɔ́n ǎ có, mi ka yí wǎn n’i. Mi ɖo mimɔ ɛ wɛ din ǎ có, mi ɖi nǔ n’i, bo ɖó awǎjijɛ ɖaxó. Awǎjijɛ mitɔn túnflá bɔ è sixú jlɛ́ ǎ, 9 ɖó mi ná mɔ nǔ e wú mi ɖi nǔ é yí, é wɛ nyí hwlɛngán mitɔn.*

10 Gbeyíɖɔ e ɖɔ nǔ ɖ’ayǐ dó fɛ́nú e nyí mitɔn é wú lɛ́ é ba do nú nǔ hlɛ́nhlɛ́n dó hwlɛngán énɛ́ wú, bo kíjé nǔ lɛ́ tɛ́nwín lɛnwín. 11 Mawu ko zán gbigbɔ tɔn bo ɖɔ nú yě ɖ’ayǐ ɖɔ Klísu ná mɔ wǔvɛ́ bɔ énɛ́ gúdo ɔ, è ná sɔ́ ɛ su. Énɛ́ wú wɛ yě dó gǎn tawun bo ná mɔ do nú nǔ e ná xá Klísu lɛ́ é kpó hwenu e nǔ ná nyí mɔ̌ é kpó. 12 Mawu ɖe xlɛ́ gbeyíɖɔ lɛ́ ɖɔ é kún nyí yěɖésúnɔ wa sinsɛnzɔ́ ná wɛ yě ɖe ó, loɔ, mi wa ná wɛ yě ɖe. Gbeyíɖɔ lɛ́ wlán nǔ dó nǔ e è ɖɔ nú mi lɛ́ é wú, bɔ mi se nǔ énɛ́ lɛ́ gbɔn mɛ ɖěɖěe è sɛ́ gbigbɔ mímɛ́ dó sín jǐxwé, bɔ yě jlá wɛn ɖagbe ɔ mi lɛ́ é gblamɛ. Wɛnsagun lɛ́ nɔ jló tawun bo ná gbéjé nǔ énɛ́ lɛ́ kpɔ́n tɛ́nwín lɛnwín.

13 Énɛ́ wú ɔ, mi sɔ́ nǔ nú miɖée, bá w’azɔ̌ syɛ́nsyɛ́n; mi ní zán nǔwúkpíkpé tamɛ linlin tɔn mitɔn mlɛ́mlɛ́; mi ní ɖó nukún fɛ́nú e è ná hɛn wá nú mi ɖo hwenu e è ná ɖe Jezu Klísu xlɛ́ é. 14 Vǐ Mawu tɔn e nɔ se tónú n’i lɛ́ é wɛ mi nyí din, énɛ́ wú ɔ, mi ma sɔ́ nɔ wa nǔ sɔgbe xá jlǒ nyanya ɖěɖěe mi ɖó hwenu e mi ma ko tuun i ǎ lɛ́ é ó. 15 Amɔ̌, Mɛ mímɛ́ e ylɔ́ mi é ɖɔhun ɔ, mi ní húzú mɛ mímɛ́ ɖo nǔwiwa mitɔn lɛ́ bǐ mɛ, 16 ɖó è wlán ɖɔ: “Mi ɖó ná nyí mɛ mímɛ́, ɖó mɛ mímɛ́ wɛ un nyí.”

17 Ényí mi ɖo ɖɛ xo sɛ́dó Mawu Tɔ́ ɔ, éé nɔ ɖɔ hwɛ xá mɛ bǐ gbɔn alɔkpa ɖokpó ɔ sɔgbe xá nǔ e mɛ ɖokpó ɖokpó wa é wɛ hǔn, mi nú nǔwiwa mitɔn lɛ́ ní nɔ xlɛ́ ɖɔ mi ɖó sísí n’i, din e mi ɖo gbɛ élɔ́ mɛ nú hwenu kléwún ɖé é. 18 Ðó mi tuun ɖɔ é kún nyí nǔ e nɔ gblé lɛ́ é, ɖi siká alǒ kpatágan, wɛ è dó tún kan nú mi* sín gbɛ maɖótaɖé, éé sín gǔ tɔ́gbó* mitɔn lɛ́ jó dó nú mi é sí ó. 19 Loɔ, hun xɔ akwɛ́ Klísu tɔn wɛ, lɛ̌ngbɔ́ví e ma ɖó blɔ̌ ɖěbǔ ǎ, bo mɛ́ é tɔn ɖɔhun. 20 Nǔgbó wɛ ɖɔ è ko sɔ́ ɛ jɛ nukɔn nú hwenu e è ɖó gbɛ ɔ ayǐ é.* Amɔ̌, è ɖe è xlɛ́ ɖo azǎn gǔdo gúdo tɔn lɛ́ mɛ, ɖó mi wútu. 21 É wɛ nyí tɔn bɔ mi ɖi nǔ nú Mawu e fɔ́n ɛ sín kú bo sɔ́ ɛ su é, bónú mi ní dó ɖi nǔ bo ɖó nukún Mawu.

22 Mi ko slá wǔ nú miɖée,* gbɔn tónúsise nú nǔgbó ɔ gblamɛ, bɔ énɛ́ zɔ́n bɔ mi ɖó wǎnyíyí nɔví nɔví tɔn e ma nyí yɛmɛnúwiwa tɔn ǎ é. Énɛ́ wú ɔ, mi yí wǎn ɖaxó nú miɖée lɛ́ sín ayi mɛ. 23 Ðó è vɔ́ mi ji, é ka nyí gbɔn nǔkún e nɔ gblé é gblamɛ ǎ, loɔ, gbɔn nǔkún e ma nɔ gblé ǎ é* gblamɛ, gbɔn xó Mawu e ɖo gbɛ káká sɔ́yi é tɔn gblamɛ. 24 Ðó “gbɛtɔ́* lɛ́ bǐ wɛ cí gběhan ɖɔhun, bɔ susu yětɔn bǐ cí folówa e ɖo gle mɛ é ɖɔhun; gběhan nɔ xú, bɔ folówa nɔ j’ayǐ, 25 amɔ̌, xó Jexóva* tɔn* ná nɔ te káká sɔ́yi.” “Xó” énɛ́ ɔ* wɛ nyí wɛn ɖagbe e è jlá mi é.

2 Énɛ́ wú ɔ, mi ní jó nǔnyanyawiwa bǐ, mɛblɛ́blɛ́, yɛmɛnúwiwa, mɛnújlójló kpó xónyanyaɖɔdómɛwú bǐ kpó dó. 2 Vǐ kpɛví e è ji tlóló lɛ́ é ɖɔhun ɔ, mi ní kplɔ́n bo nɔ ɖó jlǒ syɛ́nsyɛ́n nú anɔ̌sin mímɛ́ e ɖo xó ɔ mɛ é,* bónú mi ná dó sixú su bo mɔ hwlɛngán gbɔn gbla tɔn mɛ. 3 Ðó mi ko ɖɔ́ Aklúnɔ kpɔ́n, bo mɔ ɖɔ é nɔ nyɔ́ xomɛ.*

4 Gbɛtɔ́ lɛ́ ɖe kɔ dó awǐnnya gbɛɖe ɔ, amɔ̌, Mawu ka sɔ́ ɛ, b’ɛ xɔ akwɛ́ n’i. Ée mi sɛkpɔ́ ɛ é ɔ, 5 mi lɔmɔ̌ ɔ, ɖi awǐnnya gbɛɖe lɛ́ ɖɔhun ɔ, è ɖo mi sɔ́ dó gbá xwé gbigbɔ tɔn ɖé ná wɛ, bɔ mi ná nyí vɔ̌sánúxwlémawutɔ́ sín gbɛ̌ta mímɛ́ ɖé, bo ná dó sixú xwlé è vɔ̌sísá gbigbɔ tɔn e é ná yí gbe ná lɛ́ é, gbɔn Jezu Klísu jí. 6 Ðó è ɖɔ ɖo Nǔwlánwlán mímɛ́ lɛ́ mɛ ɖɔ: “Éɖíe! Un ɖo awǐnnya e è sɔ́ é ɖokpó dó do nyi Sinyɔ́ɔ wɛ, awǐnnya xɔ akwɛ́ zwe jí tɔn ɖé wɛ, bɔ mɛ ɖěbǔ e ɖe xlɛ́ ɖɔ émí ɖi nǔ n’i é ɔ, è ná flú i ǎ.”

7 Hǔn, midɛɛ lɛ́ wɛ é xɔ akwɛ́ ná, ɖó mi nyí nǔɖitɔ́; amɔ̌, nú nǔmaɖitɔ́ lɛ́ ɔ, “awǐnnya e xɔmɛtɔ́ lɛ́ xo nyi kɛ́n é, wɛ wá húzú awǐnnya zwe jí tɔn tají ɔ,” 8 bo nyí “awǐnnya e nɔ zɔ́n bɔ è nɔ klɛ́n afɔ é kpó só e nɔ zin mɛ dɛ́ é kpó.” Yě ɖo afɔ klɛ́n wɛ, ɖó yě se tónú nú xó ɔ ǎ wútu. Nǔ e mɛ é ná tɔ́n kɔ dó nú yě bɔ è ko ɖɔ ɖ’ayǐ é jɛ́n nɛ́. 9 Amɔ̌, midɛɛ lɛ́ ɔ, mi nyí “akɔ e è sɔ́ é ɖé, vɔ̌sánúxwlémawutɔ́ sín gbɛ̌ta e lɛ́ nyí axɔ́sú é ɖé, akɔta mímɛ́ ɖé, togun e ná wá nyí nǔɖókan bǔnɔ ɖé é, bónú mi ná jlá jijɔ ɖagbe”* Mɛ e ylɔ́ mi sín zǐnflú mɛ wá wěziza nu é tɔn lɛ́ “gbɔn fí bǐ.” 10 Ðó ɖ’ayǐ ɔ, mi nyí togun ɖé ǎ, amɔ̌ din ɔ, mi nyí togun Mawu tɔn; ɖ’ayǐ ɔ, è kú nǔbláwǔ nú mi ǎ, amɔ̌ din ɔ, è kú nǔbláwǔ nú mi.

11 Mɛ vívɛ́ná ce lɛ́ mi, un ɖo byɔ̌byɔ́ mi mɛ e nyí jǒnɔ bo ɖo gbɛ élɔ́ mɛ nú hwenu kléwún ɖé lɛ́ é wɛ ɖɔ mi ní nɔ zɔ nú jlǒ agbaza tɔn, éé nɔ ɖo ahwan fun xá mi* wɛ lɛ́ é. 12 Mi ní nɔ ɖó walɔ ɖagbe ɖo akɔta lɛ́ tɛ́ntin, bónú hwenu e yě ná dó hwɛ mi ɖɔ mi nyí nǔnyanyawatɔ́ é ɔ, yě ná nyí kúnnuɖetɔ́ azɔ̌ ɖagbe e mi wa lɛ́ é tɔn, bɔ wǎgbɔ tɔn ɔ, yě ná kpa susu nú Mawu, ɖo hwenu e é ná wá bo ná gbéjé nǔ kpɔ́n é.

13 Mi kpɔ́n dó Aklúnɔ wú, bo hwíhwɛ́ miɖée dó acɛkpikpa* e gbɛtɔ́ ɖó ayǐ lɛ́ é bǐ glɔ́. Mɛ e hú gǎn mi bo nyí axɔ́sú é wɛ a, 14 alǒ tokpɔngán ɖěɖěe é sɛ́ dó bɔ yě ná nɔ dɔn tó nú nǔnyanyawatɔ́ lɛ́, bo ná nɔ kpa mɛ e nɔ wa nǔ ɖagbe lɛ́ é ɔ, mi ní nɔ hwíhwɛ́ miɖée dó glɔ̌ yětɔn. 15 Ðó jlǒ Mawu tɔn wɛ nyí ɖɔ xlonɔ énɛ́ lɛ́ e nɔ ɖo xó ɖɔ dó mi wú wɛ, ɖó yě tuun nǔɖé ǎ wútu lɛ́ é ɔ, mi ní xwe nu yětɔn dó xɔ,* gbɔn nǔɖagbewiwa mitɔn gblamɛ. 16 Mi ní cí mɛ e ɖo yěɖésúnɔ sí lɛ́ é ɖɔhun. Mi ma zán mɛɖésúsíninɔ mitɔn dó cyɔ́n nǔ dó* nǔnyanyawiwa ó, amɔ̌, mi ní zán kannumɔ Mawu tɔn lɛ́ ɖɔhun. 17 Mi wlí yɛ̌yi nú gbɛtɔ́ alɔkpa lɛ́ bǐ, mi yí wǎn nú kplékplé nɔví lɛ́ tɔn,* mi ɖó sísí e gɔ́ngɔ́n é nú Mawu, mi wlí yɛ̌yi nú axɔ́sú.

18 Mi nú mɛsɛntɔ́ lɛ́ ní nɔ hwíhwɛ́ yěɖée dó gǎn yětɔn lɛ́ glɔ́ kpó xɛsi e jɛxá é bǐ kpó, é ní ma nyí dó gǎn ɖěɖěe nyɔ́ bo nɔ nɔ jlɛ̌ jí lɛ́ é kɛ́ɖɛ́ glɔ́ ó, loɔ, dó yě mɛ ɖěɖěe é nɔ vɛ́ wǔ bɔ è ná wa nǔ bo nyɔ́ ɖo nukún yětɔn mɛ lɛ́ é lɔmɔ̌ glɔ́. 19 Nǔgbó ɔ, ényí mɛɖé dɛ ɖo mɛtɛ́nkpɔ́n* nu, bo se wǔvɛ́ ɖó nǔagɔwaxámɛ wú, bo ná dó ɖó ayixa ɖagbe ɖo Mawu nukɔn ɔ, nǔ ɖagbe wɛ. 20 Ðó ényí è xo mi ɖó hwɛhuhu wútu bɔ mi dɛ ɖ’é nu ɔ, le tɛ́ ka ɖ’é mɛ nú mi? Amɔ̌, ényí mi dɛ ɖo wǔvɛ́ lɛ́ nu, ɖó nǔɖagbewiwa wútu ɔ, nǔɖé wɛ énɛ́ nyí bo nɔ nyɔ́ Mawu nukúnmɛ.

21 Nǔgbó ɔ, énɛ́ ɔ wú wɛ è ylɔ́ mi, ɖó Klísu tlɛ se wǔvɛ́ dó ta mitɔn mɛ, bo zé kpɔ́ndéwú ɖé ɖ’ayǐ nú mi, bónú mi ná zé afɔ dó afɔdo tɔn lɛ́ mɛ tlélé. 22 É hu hwɛ ɖě ǎ, mɔ̌ jɛ́n è ma ka lɛ́ se mɛblɛ́blɛ́xó ɖě ɖo nu tɔn ǎ é nɛ́. 23 Ée è zun i* é ɔ, é zun* mɛ ǎ. Ée é ɖo wǔvɛ́ se wɛ é ɔ, é gblɔ́n adǎn nú mɛ ǎ, é nyɔ́ wa ɔ, é sɔ́ éɖée d’alɔ mɛ nú Mɛ e nɔ ɖɔ hwɛ jlɔ́jlɔ́ é. 24 Éɖésúnɔ hɛn hwɛ mǐtɔn lɛ́ ɖo agbaza éɖésúnɔ tɔn mɛ ɖo kpo* ɔ wú, bónú è ná dó sixú tún kan nú mǐ sín hwɛhuhu sí,* bɔ mǐ ná nɔ gbɛ bo ná nɔ wa nǔ jlɔ́jlɔ́. “Akpa tɔn lɛ́ zɔ́n bɔ azɔn mitɔn gbɔ.” 25 Ðó lɛ̌ngbɔ́ e ɖo bǔbú wɛ lɛ́ é ɖɔhun wɛ mi cí ɖ’ayǐ, amɔ̌ din ɔ, mi ko lɛ́ kɔ wá lɛ̌ngbɔ́nyitɔ́ e ɖo nukún kpé dó lǐndɔ̌n* mitɔn lɛ́ wú wɛ é gɔ́n.

3 Ðo ali ɖokpó ɔ nu ɔ, asi lɛ́ mi, mi nɔ hwíhwɛ́ miɖée dó asú mitɔn lɛ́ glɔ́, bónú ényí yě mɛ ɖě ma nɔ se tónú nú mawuxó ɔ ǎ ɔ, mi ná dó sixú dɔn yě, gbɔn walɔ mitɔn lɛ́ gblamɛ, é byɔ́ ɖɔ mi ní ɖɔ xó ɖé ǎ, 2 ɖó yě ná nyí kúnnuɖetɔ́ walɔ mímɛ́ mitɔn kpó sísí ɖaxó e mi ɖó é kpó tɔn. 3 Mi ma nú acɔ́biba mitɔn ní nyí acɔ́biba wěxo tɔn, ɖi ɖa bláblá, acɔ́banú e è sɔ́ siká dó bló ná lɛ́ é dídó, alǒ avɔ ɖagbe lɛ́ dídó ó. 4 Loɔ, mi nú è ní mɔ ɖɛkpɛ mitɔn ɖo lěe mi cí ɖo ayi mitɔn mɛ é mɛ. Énɛ́ wú ɔ, mi ní sɔ́ xwííninɔ kpó xomɛfífá kpó dó ba acɔ́. Nǔ e nɔ xɔ akwɛ́ tawun ɖo Mawu nukúnmɛ é nɛ́. Gɔ́ ná ɔ, acɔ́ énɛ́ nɔ gblé ǎ. 5 Ðó mɔ̌ wɛ nyɔ̌nu mímɛ́ hwexónu tɔn e nɔ ɖó nukún Mawu lɛ́ é nɔ ba acɔ́ gbɔn; yě nɔ hwíhwɛ́ yěɖée dó asú yětɔn lɛ́ glɔ́, 6 lěe Sala nɔ se tónú nú Ablaxámu, bo nɔ ylɔ́ ɛ ɖɔ aklúnɔ gbɔn é. Bɔ ényí mi kpo ɖo nǔ ɖagbe wa wɛ, bo ma jó miɖée dó nú xɛsi ǎ ɔ, mi ná húzú vǐ tɔn lɛ́.

7 Ðo ali ɖokpó ɔ nu ɔ, asú lɛ́ mi, mi nɔ wa nǔ xá asi mitɔn lɛ́ kpó nukúnnúmɔjɛnǔmɛ kpó.* Mi nɔ wlí yɛ̌yi nú yě, lěe mi ná kpé nukún dó zɛ̌n e sixú yá wǔ gba é wú gbɔn é ɖɔhun, ɖó yě lɔmɔ̌ ná ɖu gǔ gbɛ tɔn xá mi, gbɔn fɛ́nú Mawu tɔn gblamɛ, bónú nǔɖé ma wá sú ali dó ɖɛ mitɔn lɛ́ ó.

8 Bo ná dó fó ɔ, mi mɛ bǐ ní nɔ ɖó linlin ɖokpó ɔ,* nǔ mɛ ɖěvo lɛ́ tɔn ní nɔ ɖu ayi mɛ nú mi, mi nɔ ɖe wǎnyíyí nɔví nɔví tɔn, nǔbláwǔkúnúmɛ e gɔ́ngɔ́n é kpó mɛɖéesɔ́hwe kpó xlɛ́. 9 Mi ma sɔ́ nyanya dó sú nyanya xɔ́ ná ó, mi ma sɔ́ zun dó sú zun xɔ́ ná ó. É nyɔ́ wa hǔn, mi nɔ xo nyɔ̌ná ɖɛ dó sú axɔ́ ná, ɖó nǔ e è ylɔ́ mi ná é nɛ́, bónú mi ná dó sixú ɖu nyɔ̌ná sín gǔ.

10 Ðó “mɛ ɖěbǔ e yí wǎn nú gbɛ, bo nɔ ba ná ɖu gbɛ sín vǐví é ɖó ná cɔ́ ɖɛ̌ tɔn, bo ná nɔ ɖɔ xó nyanya ǎ; lobo cɔ́ nufló tɔn lɛ́, bo ná nɔ blɛ́ mɛ ǎ. 11 É ní lɛ́ kɔ sín nǔnyanyawiwa gúdo, bo nɔ wa nǔ ɖagbe; é ní nɔ ba fífá lobo nɔ nya gbě tɔn. 12 Ðó nukún Jexóva* tɔn lɛ́ ɖo nǔjlɔ́jlɔ́watɔ́ lɛ́ jí, bɔ tó tɔn lɛ́ nɔ se vosisa yětɔn. Amɔ̌, Jexóva* nɔ dó gǔdo mɛ e nɔ wa nǔ nyanya lɛ́ é.”

13 Nǔgbó ɔ, ényí akpakpa nɔ sɔ́ mi dó nǔɖagbewiwa wú ɔ, mɛ̌ ka ná wa nǔ nyanya nú mi? 14 Amɔ̌, ényí mi tlɛ se wǔvɛ́ ɖó nǔjlɔ́jlɔ́wiwa wú ɔ, mi ná nyí awǎjijɛnɔ. É ɖo mɔ̌ có, xɛsi ní ma ɖi mi dó nǔ e nɔ dó xɛsi yě lɛ́ é* wú ó, ayi mitɔn ní ma gba dó ó. 15 Amɔ̌, mi ní tuun dó ayi mitɔn mɛ ɖɔ Klísu nyí Aklúnɔ bo nyí mɛ mímɛ́. Mi ní ɖo gbesisɔmɛ hwebǐnu, bo ná ná xósin mɛ ɖěbǔ e ná kan nǔɖé byɔ́ mi dó nukúnɖíɖó e mi ɖó é wú é. Mi ka bló mɔ̌ kpó xomɛfífá kpó, kpódó sísí ɖaxó kpán.

16 Mi ní ɖó ayixa mímɛ́, énɛ́ ɔ, nú è ɖo xó agɔ ɖěbǔ ɖɔ dó mi wú wɛ ɔ, winnyá ní hu mɛ e ɖo xó agɔ ɖɔ dó mi wú wɛ lɛ́ é, ɖó ahwanvú Klísu tɔn sín walɔ ɖagbe e mi ɖó é wútu. 17 Ðó ényí Mawu yí gbe ɖɔ mi ní se wǔvɛ́ ɖó nǔɖagbewiwa wútu ɔ, é nyɔ́ hú ɖɔ mi ní se wǔvɛ́ ɖó nǔnyanyawiwa wútu. 18 Ðó Klísu kú azɔn ɖokpó bɔ xó fó dó hwɛ lɛ́ tamɛ, énɛ́ wɛ nyí ɖɔ, nǔjlɔ́jlɔ́watɔ́ ɖé kú dó nǔagɔwatɔ́ lɛ́ tamɛ, bo ná dó kplá mi yi Mawu gɔ́n. È hu i ɖo agbaza mɛ, amɔ̌, è fɔ́n ɛ wá gbɛ bɔ é nyí gbigbɔ ɖé. 19 Ninɔmɛ énɛ́ mɛ wɛ é zɔn, bo yi jlá wɛn hwɛɖónúmɛ tɔn ɔ wɛnsagun e ɖo ganxó lɛ́ é. 20 Yě ko tlí tó ɖ’ayǐ, hwenu e Mawu xwe sɔ bo nɔ te* ɖo Nɔwée sín azǎn gbe, hwenu e è ɖo tɔjíhún e mɛ mɛ kpɛɖé, énɛ́ wɛ nyí lǐndɔ̌n* tántɔn, byɔ́ bo xo sin ɔ zlɛ́ wǔyɛ́yɛ́ afɔyɛ́yɛ́ é bló wɛ é.

21 Batɛ́mu, éé sɔgbe xá énɛ́ é lɛ́ ɖo mi lɔ hwlɛ́n wɛ din (é nyí gbɔn ɖixó agbaza tɔn lɛ́ kíklɔ́ síin gblamɛ wɛ ǎ, loɔ, gbɔn ayixa mímɛ́ ɖé byɔ́byɔ́ Mawu gblamɛ wɛ), gbɔn fínfɔ́n sín kú Jezu Klísu tɔn gblamɛ. 22 É ɖo ɖisíxwé nú Mawu, ɖó é yi jǐxwé, bɔ Mawu hwíhwɛ́ wɛnsagun lɛ́, acɛkpikpa lɛ́ kpó hlɔ̌nhlɔ́n lɛ́ kpó dó glɔ̌ tɔn.

4 Ðó Klísu ji ya ɖo agbaza mɛ wútu ɔ, mi lɔmɔ̌ ɔ, mi sɔ́ nǔ nú miɖée, bónú linlin mitɔn ná nyí ɖokpó ɔ xá étɔn. Ðó mɛ e ji ya ɖo agbaza mɛ ɔ sɔ́ kpé nǔɖé xá hwɛhuhu ǎ. 2 Mɔ̌ mɛ ɔ, é ná kpé wú bo zán hwenu e kpo n’i bɔ é ná zán ɖo agbaza mɛ ɔ dó wa jlǒ Mawu tɔn ná, é sɔ́ ná nɔ zán dó wa jlǒ gbɛtɔ́ tɔn lɛ́ ná ɖě ǎ. 3 Ðó ɖ’ayǐ ɔ, mi ko zán hwenu gěgé dó wa jlǒ akɔta lɛ́ tɔn, bo jó miɖée dó nú wunhínhɔ́nnú* lɛ́, jlǒ masɔgbe lɛ́, ahannudíngan, agɔ̌ e tɛnmɛ è nɔ wa nǔ gblégblé ɖe lɛ́ é,* ahan nunu sín agɔ̌ lɛ́, kpó bǒcyɔsinsɛn baɖabaɖa lɛ́ kpó. 4 É kpácá yě ɖɔ mi kún sɔ́ nɔ ɖ’alɔ ɖo gbɛ kwíjikwíji e yě nɔ zán é mɛ xá yě ɖě ó, énɛ́ wú ɔ, yě nɔ ɖo mi zun wɛ. 5 Amɔ̌, yě ná ɖó gbe nú mɛ e ɖo gbesisɔmɛ bo ná ɖɔ hwɛ xá mɛ e ɖo gbɛ lɛ́ é kpó mɛ e ɖo kú lɛ́ é kpó é. 6 Nǔgbó ɔ, è ɖɔ hwɛ xá mɛkúkú lɛ́ ɖo agbaza mɛ, sɔgbe xá linlin gbɛtɔ́ tɔn có, nǔ e wú è jlá wɛn ɖagbe ɔ yě lɔmɔ̌, bónú yě ná dó sixú zán gbɛ ɖo gbigbɔ lixo, sɔgbe xá linlin Mawu tɔn é nɛ́.

7 Amɔ̌, vivɔnu nǔ lɛ́ bǐ tɔn ko sɛkpɔ́. Énɛ́ wú ɔ, ayi mitɔn ní ɖo te, bónú mi ní nɔ acéjí* bo nɔ xo ɖɛ. 8 Tají bǐ ɔ, mi ɖó wǎnyíyí e gɔ́ngɔ́n é nú miɖée lɛ́, ɖó wǎnyíyí nɔ cyɔ́n nǔ dó hwɛ wɔ̌búwɔ́bú. 9 Mi ma nɔ húnhún nǔ ɖɔ cóbó nɔ yí miɖée ó. 10 Mi mɛ ɖokpó ɖokpó wɛ mɔ nǔníná ɖé yí. Énɛ́ wú ɔ, mi ní zán dó wa sinsɛnzɔ́ nú miɖée lɛ́ nǔjíkpɔ́ntɔ́ ɖagbe fɛ́nú Mawu tɔn tɔn lɛ́ ɖɔhun. Fɛ́nú énɛ́ nɔ ɖe éɖée xlɛ́ ɖo ali vovo nu. 11 Ényí mɛɖé ɖo xó ɖɔ wɛ hǔn, ní wa mɔ̌ cí nǔ ɖɔ xó e Mawu ɖɔ lɛ́ é ɖɔ wɛ é ɖe ɖɔhun; ényí mɛɖé ɖo sinsɛnzɔ́ wa wɛ hǔn, é ní gán jɛ hlɔ̌nhlɔ́n e Mawu nɔ ná mɛ é wú; bónú è ná dó sixú kpa susu nú Mawu ɖo nǔ bǐ mɛ, gbɔn Jezu Klísu jí. Susu kpó hlɔ̌nhlɔ́n kpó nyí étɔn káká sɔ́yi mavɔmavɔ. Amǐ.

12 Mɛ vívɛ́ná ce lɛ́ mi, mɛtɛ́nkpɔ́n syɛ́nsyɛ́n myɔ ɖɔhun e mɛ gbɔn wɛ mi ɖe lɛ́ é ní ma kpácá mi, cí nǔ ɖɔ nǔ yɔ̌yɔ́ ɖé wɛ ɖo mi gbo wɛ ɖɔhun ó. 13 É nyɔ́ wa hǔn, mi nɔ ɖo awǎ jɛ wɛ, ɖó mi ɖo wǔvɛ́ ɖokpó ɔ e Klísu mɔ lɛ́ é mɔ wɛ, bo ná dó sixú j’awǎ, bɔ awǎjijɛ mitɔn ná lɛ́ túnflá hwenu e è ná ɖe susu tɔn xlɛ́ é. 14 Ényí è ɖo mi zun wɛ,* ɖó nyǐkɔ Klísu tɔn wú hǔn, awǎjijɛnɔ wɛ nú mi, ɖó gbigbɔ susunɔ ɔ, ɛɛn, gbigbɔ Mawu tɔn ɖo mi jí.

15 É ɖo mɔ̌ có, un ba ɖɔ mɛɖé ní se wǔvɛ́ ɖo mi mɛ, ɖó é húzú mɛhutɔ́, alǒ ajotɔ́, alǒ nǔnyanyawatɔ́, alǒ nɔ dó nu mɛ ɖěvo xó mɛ wútu ǎ. 16 Amɔ̌, ényí mɛ ɖěbǔ ɖo wǔvɛ́ se wɛ, ɖó klisánwun e é nyí é wútu hǔn, winnyá ní ma hu i ó, é nyɔ́ wa ɔ, é ní kpo ɖo susu kpa nú Mawu wɛ, gbɔn gbɛ zínzán klisánwun ɖɔhun gblamɛ. 17 Ðó hwenu e è ɖó bɔ hwɛɖiɖɔ ɔ ná bɛ́sín xwé Mawu tɔn gbe é wɛ su. Din ɔ, ényí é bɛ́sín mǐ jí jɛ nukɔn ɔ, étɛ́ mɛ é ka ná wá tɔ́n kɔ dó nú mɛ e ma se tónú nú wɛn ɖagbe Mawu tɔn ǎ lɛ́ é? 18 “Bɔ ényí ɖɔ nǔjlɔ́jlɔ́watɔ́ ɖé ɖó ná dó gǎn tawun cóbɔ Mawu ná hwlɛ́n ɛ ɔ, étɛ́ ka ná gbo mɛ e ma nɔ ɖó sísí nú Mawu ǎ é kpó hwɛhutɔ́ kpó?” 19 Ényí mɔ̌ hǔn, mi nú mɛ ɖěɖěe ɖo wǔvɛ́ se wɛ, ɖó yě ɖo jlǒ Mawu tɔn wa wɛ wútu lɛ́ é ní kpo ɖo yěɖée* sɔ́ dó así nú Gbɛɖótɔ́ ɔ, éé ɖo gbejí é wɛ, bo ɖo ɖagbe wa wɛ.

5 Énɛ́ wú ɔ, ɖó nyi lɔ nyí mɛxó agun tɔn, bo nyí kúnnuɖetɔ́ wǔvɛ́ e Klísu mɔ lɛ́ é tɔn, lobo ɖó mǐmá ɖo susu e è ná wá ɖe xlɛ́ é mɛ wútu ɔ, un ɖo nǔ élɔ́ byɔ́* mɛxó agun tɔn e ɖo mi mɛ lɛ́ é wɛ vɛ́návɛ́ná: 2 Mi nyi lɛ̌ngbɔ́ Mawu tɔn e è sɔ́ d’así nú mi lɛ́ é, lobo nɔ kpé nukún dó yě wú ganjí. Mi nɔ wa mɔ̌ kpó jlǒ kpó ɖo Mawu nukɔn, é ní ma nyí gǎn wɛ è hú mi ó; é ní ma nyí ɖó wǎn yí nú afu wútu ó, loɔ, kpó akpakpa sɔ́ mɛ kpó; 3 Mi ma nɔ kp’acɛ gannaganna nú mɛ e nyí gǔ Mawu tɔn lɛ́ é ó, loɔ, mi ní nyí kpɔ́ndéwú nú lɛ̌ngbɔ́hwan ɔ. 4 Bɔ hwenu e è ná ɖe lɛ̌ngbɔ́nyitɔ́gán ɔ xlɛ́ é ɔ, mi ná mɔ axɔ́súgbákún susunɔ e ma sixú cá ǎ é yí.

5 Ðo ali ɖokpó ɔ nu ɔ, dɔ̌nkpɛvú lɛ́ mi, mi ní nɔ hwíhwɛ́ miɖée dó súnnu e wa ɖaxó mi lɛ́ é* glɔ́. Amɔ̌, mi bǐ ní sɔ́ mɛɖéesɔ́hwe dó* ɖo nǔ e mi nɔ wa xá miɖée lɛ́ é mɛ, ɖó Mawu nɔ húzú kpan nukɔn goyítɔ́ lɛ́, loɔ, é nɔ ná fɛ́nú mɛɖéesɔ́hwetɔ́ lɛ́.

6 Énɛ́ wú ɔ, mi ní nɔ hwíhwɛ́ miɖée dó alɔ hlɔ̌nhlɔ́nnɔ Mawu tɔn glɔ́, bónú é ná sɔ́ mi su ɖo hwetɔnnu. 7 Mi zlɔ́n linkpɔ́n* mitɔn lɛ́ bǐ dó jǐ tɔn, ɖó nǔ mitɔn nɔ ɖu ayi mɛ n’i. 8 Mi zán nǔwúkpíkpé tamɛ linlin tɔn mitɔn, mi nɔ acéjí! Kɛntɔ́ mitɔn Awǒvi ɔ ɖo lɛ̌ lɛ́ wɛ kinnikínní e ɖo gbe dó wɛ é ɖɔhun, bo ɖo mɛ e é ná vún ɖu é ba wɛ. 9 Amɔ̌, mi húzú kpan nukɔn ɛ, bo lí dǒ ɖo nǔɖiɖi mɛ, lobo tuun ɖɔ kplékplé nɔví lɛ́ tɔn* mitɔn e ɖo gbɛ ɔ mɛ é lɔ ɖo wǔvɛ́ ɖokpó ɔ lɛ́ se wɛ. 10 Ényí mi ka se wǔvɛ́ nú hwenu kpɛɖé gúdo ɔ, Mawu fɛ́nú bǐ nɔ e ylɔ́ mi dó susu tɔn mavɔmavɔ ɔ mɛ, ɖó bǔ e mi ɖe xá Klísu é wútu é ɖésúnɔ ná kplɔ́n azɔ̌ mi mlɛ́mlɛ́. É ná bló bɔ mi ná lí dǒ, é ná bló bɔ mi ná ɖó hlɔ̌nhlɔ́n, é ná dó mi do nyi dodónú syɛ́nsyɛ́n jí. 11 Hlɔ̌nhlɔ́n ní nyí étɔn káká sɔ́yi. Amǐ.

12 Un wlán nǔɖé sɛ́dó mi gbɔn Siivɛ́ɛn,* ée un nɔ kpɔ́n dó mɔ nɔví súnnu gbejínɔtɔ́ é jí, bo ná dó sixú dó wǔsyɛ́n lanmɛ nú mi, lobo lɛ́ dó zǒgbe jí ɖɔ fɛ́nú Mawu tɔn nǔgbó ɔ nɛ́. Mi bo lí dǒ ɖ’é mɛ. 13 Nyɔ̌nu e ɖo Babilɔ́nu, bɔ è sɔ́ miɖɔhun é dó gbe sɛ́dó mi, bɔ vǐ ce Maki lɔmɔ̌ dó gbe sɛ́dó mi. 14 Mi kí si nú miɖée lɛ́ dó dó gbe miɖée lɛ́, dó ɖe wǎnyíyí mitɔn xlɛ́.

Fífá ní nɔ kpɔ́ xá mi mɛ e ɖo bǔ xá Klísu lɛ́ é bǐ.