PIYƐ́Ɛ WEGƆ́

1 Nyɛ Sinmɔ́ɔ Piyɛ́ɛ, éé nyí kannumɔ Jezu Klísu tɔn bo lɛ́ nyí mɛsɛ́dó tɔn é, wɛ ɖo wěma sɛ́ dó mɛ ɖěɖěe ɖó nǔɖiɖi xɔ akwɛ́ mǐtɔn ɖɔhun,* ɖó nǔjlɔ́jlɔ́wiwa Mawu mǐtɔn tɔn kpó Hwlɛngántɔ́ mǐtɔn Jezu Klísu tɔn kpó wútu lɛ́ é wɛ:

2 Fɛ́nú kpó fífá kpó ní túnflá nú mi, gbɔn nukúnnúmɔjɛnǔmɛ e sɔgbe bo kunkplá Mawu kpó Aklúnɔ mǐtɔn Jezu kpó é gblamɛ. 3 Hlɔ̌nhlɔ́n Mawu tɔn ná mǐ nǔ e ná zɔ́n bɔ mǐ ná nɔ gbɛ bo ná lɛ́ nɔ gbejí n’i lɛ́ é bǐ,* ɖó nukúnnúmɔjɛnǔmɛ e sɔgbe bo kunkplá mɛ e ylɔ́ mǐ, gbɔn susu éɖésúnɔ tɔn kpó xomɛnyínyɔ́ tɔn kpó gblamɛ é wútu. 4 Gbɔn nǔ énɛ́ lɛ́ gblamɛ ɔ, é d’akpá ɖěɖěe xɔ akwɛ́ bo lɛ́vɔ́ d’agba tawun lɛ́ é nú mǐ,* bónú mi ná dó sixú ɖó mǐmá ɖo susu e Mawu ɖó é mɛ, gbɔn nǔ énɛ́ lɛ́ gblamɛ. É bló mɔ̌, ɖó mǐ hɔn nú walɔ nyanya gbɛ élɔ́ tɔn e jlǒ nyanya* lɛ́ nɔ dɔn wá lɛ́ é wútu.

5 Ðó hwɛjijɔ énɛ́ ɖokpó ɔ wútu ɔ, mi dó gǎn lɛ́ bǐ bo sɔ́ jijɔ ɖagbe gɔ́ nú nǔɖiɖi mitɔn, bo sɔ́ nǔtuuntuun gɔ́ nú jijɔ ɖagbe mitɔn, 6 mi sɔ́ mɛɖéejíɖuɖe gɔ́ nú nǔtuuntuun mitɔn, bo sɔ́ didɛ gɔ́ nú mɛɖéejíɖuɖe mitɔn, lobo sɔ́ gbejí nɔ nú Mawu gɔ́ nú didɛ mitɔn, 7 mi sɔ́ wǎnyíyí nɔví nɔví tɔn gɔ́ nú gbejí nɔ nú Mawu mitɔn, bo sɔ́ wǎnyíyí gɔ́ nú wǎnyíyí nɔví nɔví tɔn mitɔn. 8 Ðó ényí jijɔ énɛ́ lɛ́ ɖo mi sí bo túnflá ɔ, yě ná zɔ́n bɔ mi ná zán nukúnnúmɔjɛnǔmɛ e sɔgbe bo kunkplá Aklúnɔ mǐtɔn Jezu Klísu é, bo ná gɔn azɔ̌ wa alǒ gɔn sínsɛ́n ná ǎ.

9 Ðó mɛ ɖěbǔ e ma ɖó jijɔ énɛ́ lɛ́ ǎ é ɔ, nukúntɔ́nnɔ wɛ n’i, bɔ é myɔ́ nukún dó wěziza,* lobo wɔn ɖɔ è ko slá wǔ nú émí sín hwɛ e émí hu xóxó lɛ́ é mɛ. 10 Énɛ́ wú ɔ, nɔví lɛ́ mi, mi ní dó gǎn syɛ́nsyɛ́n d’é jí, bo zunfán wǔ e è jɔ mi, bo ylɔ́ mi lobo lɛ́ cyán mi é, ɖó ényí mi kpo ɖo nǔ énɛ́ lɛ́ wa wɛ ɔ, mi ná j’ayǐ gbeɖé ɖo ali ɖé nu ǎ. 11 Nǔgbó ɔ, ali énɛ́ nu wɛ mi ná mɔ nyɔ̌ná susunɔ ɔ, bo ná byɔ́ Axɔ́súɖuto mavɔmavɔ Aklúnɔ mǐtɔn kpó Hwlɛngántɔ́ mǐtɔn Jezu Klísu kpó tɔn mɛ ɖe.

12 Hwɛjijɔ énɛ́ wútu wɛ mi ko tuun nǔ énɛ́ lɛ́ bo lí dǒ ganjí ɖo nǔgbó e mi ko kplɔ́n é mɛ có, un ɖo gbesisɔmɛ hwebǐnu bo ná nɔ lɛ́ flín nǔ énɛ́ lɛ́ mi. 13 Amɔ̌, un mɔ ɖɔ é sɔgbe ɖɔ ényí un kpo ɖo goxɔ élɔ́* mɛ jɛ́n wɛ ɔ, un ná nɔ flín nǔ mi, 14 ɖó un tuun ɖɔ zaanɖé din ɔ, un ná jó goxɔ élɔ́ dó, lěe Aklúnɔ mǐtɔn Jezu Klísu lɔ ko tínmɛ nyi wɛn nú mì gbɔn é. 15 Un ná wa nǔ e wú un kpé é hwebǐnu, bónú un yi gúdo ɔ, mi ná sixú kpé wú bo flín nǔ énɛ́ lɛ́.*

16 Ényí tangbló e è hɛn ayi bo kpa lɛ́ é gblamɛ wɛ mǐ ɖe hlɔ̌nhlɔ́n Aklúnɔ mǐtɔn Jezu Klísu tɔn kpó fí ɖiɖe tɔn kpó xlɛ́ mi gbɔn ǎ, é nyɔ́ wa ɔ, mǐɖésúnɔ mɔ susu tɔn ɖó nukún mǐtɔn lɛ́ wú. 17 É mɔ yɛ̌yi kpó susu kpó yí sín Mawu Tɔ́ ɔ gɔ́n, nǔ nyí mɔ̌, hwenu e jɔtɛn susu ɖaxó tɔn ɔ ɖɔ xó élɔ́ lɛ́ n’i é:* “Vǐ súnnu ce ɖíe, vǐ vívɛ́ná ce, xomɛ nɔ hun mì dó wǔtu tɔn.” 18 Ɛɛn, hwenu e mǐ ɖo só mímɛ́ ɔ jí xá ɛ é wɛ mǐ se xó énɛ́ lɛ́ sín jǐxwé.

19 Nǔ e wú mǐ wá kán ɖ’é jí hú gǎn ɖɔ nǔ e Mawu ɖɔ lɛ́ é bǐ ná jɛnu é nɛ́. Mi sɔ́ ayi ɖó nǔ énɛ́ lɛ́ bǐ jí. Xó énɛ́ lɛ́ ɖó ná cí zogbɛ́n e ɖo ɖɛ̌ ɖi wɛ ɖo ablu mɛ é ɖɔhun ɖo ayi mitɔn lɛ́ mɛ. Mi ní ɖo mɔ̌ wa wɛ káká jɛ hwenu e ayǐ ná hɔ́n bɔ sunví kéze tɔn ɖé ná tɔ́n é. 20 Ðó mi tuun jɛ nukɔn ɖɔ nǔɖɔɖayǐ e ɖo Nǔwlánwlán mímɛ́ lɛ́ mɛ é ɖě kún wú kun sín linlin gbɛtɔ́ tɔn lɛ́ mɛ ó. 21 Nǔgbó ɔ, è ɖɔ nǔɖé ɖ’ayǐ gbɔn jlǒ gbɛtɔ́ tɔn gblamɛ kpɔ́n ǎ, loɔ, gbigbɔ mímɛ́ wɛ sísɛ́ gbɛtɔ́ lɛ́* bɔ yě ɖɔ nǔ e gosín Mawu gɔ́n lɛ́ é.

2 É ɖo mɔ̌ có, lěe gbeyíɖɔ adingbannɔ lɛ́ xwetɔ́n ɖo togun Izlayɛ́li tɔn mɛ gbɔn é ɔ, nǔkplɔ́nmɛtɔ́ adingbannɔ lɛ́ ná xwetɔ́n ɖo mi lɔ tɛ́ntin. Mɛ énɛ́ lɛ́ ná hɛn ayi bo ná ɖó sinsɛngbɛ́ta ɖěɖěe ná hu nǔɖiɖi mitɔn lɛ́ é ayǐ, bɔ mɛ e vɔ́ yě xɔ é ɔ, yě tlɛ ná gbɛ́ ɖɔ émí kún tuun i ó. Nǔ énɛ́ lɛ́ ná zɔ́n bɔ è ná yá wǔ sú kún yětɔn dó. 2 Gɔ́ ná ɔ, mɛ gěgé ná nɔ wa wunhínhɔ́nnú* yěɖɔhun, lobɔ é ná sín yědɛɛ lɛ́ wú bɔ è ná ɖɔ xó nyanya dó nǔgbó li ɔ wú. 3 Yě ná nɔ lɛ́ zán mɛblɛ́blɛ́xó lɛ́ dó xo mi ɖu, ɖó nukúnkɛn yětɔn wútu. Amɔ̌, hwɛ e ná ɖɔ xá yě wɛ è ɖe bo ko wá gbeta tɔn kɔn sín hwenu línlín ɖíe é ɖo lɛjɛlɛjɛ dán wɛ ǎ, lobɔ kún e ná sú dó nú yě wɛ è ɖe é ná gblá ǎ.

4 Nǔgbó ɔ, Mawu gɔn tó dɔn nú wɛnsagun e hu hwɛ lɛ́ é ǎ. É nyɔ́ wa ɔ, é bɛ́ yě nyi Taatáa* mɛ, bo dó wlɔ yě* ɖo zǐnflú gɔngɔn ɖé mɛ, bɔ yě ɖo te kpɔ́n hwenu e è ná ɖɔ hwɛ xá yě dó é. 5 É gɔn tó dɔn nú gbɛ hwexónu tɔn ɖé ǎ, amɔ̌, é hwlɛ́n Nɔwée, éé nyí mɛɖé bo nɔ jlá nǔjlɔ́jlɔ́wiwa é kpó mɛ tɛ́nwe ɖěvo kpó. É bló mɔ̌ hwenu e é bló bɔ sin vɔ gbɛ e mɛ mɛ e ma nɔ ɖó sísí nú Mawu ǎ lɛ́ é ɖe é. 6 Ée é bló bɔ toxo Sodɔ́mu kpó Gomɔ́ɔ kpó tɔn lɛ́ ji bo kɔn afín é ɔ, hwɛ wɛ é ɖó nú yě gbɔn mɔ̌, bɔ mɔ̌ mɛ ɔ, é zé kpɔ́ndéwú nǔ e ná wá jɛ lɛ́ é tɔn ɖ’ayǐ nú mɛ e ma nɔ ɖó sísí nú Mawu ǎ lɛ́ é. 7 Amɔ̌, é hwlɛ́n nǔjlɔ́jlɔ́watɔ́ Lɔti, ée wunhínhɔ́nnúwiwa* mɛ nyanya lɛ́ tɔn ɖó wǔvɛ́ ná tawun é, 8 ɖó ayǐhɔ́ngbe ayǐhɔ́ngbe ɔ, nǔnyanyawiwa ɖěɖěe nya nǔjlɔ́jlɔ́watɔ́ énɛ́ nɔ mɔ, bo nɔ lɛ́ se hwenu e é ɖo tɛ́ntin yětɔn lɛ́ é nɔ ɖo ayimɛya dó n’i wɛ wútu. 9 Énɛ́ wú ɔ, Jexóva* tuun lěe é nɔ hwlɛ́n mɛ e nɔ nɔ gbejí n’i lɛ́ é sín mɛtɛ́nkpɔ́n mɛ gbɔn é, bo lɛ́ tuun lěe é nɔ sɔ́ mɛ e nɔ wa nǔ agɔ lɛ́ é ɖó te bo ná sú kún yětɔn dó* ɖo hwɛɖɔzángbe gbɔn é, 10 tají ɔ, mɛ ɖěɖěe nɔ ba ná hɛn mɛ ɖěvo lɛ́ blí, bo ma nɔ ɖó sísí nú acɛkpikpa ǎ* lɛ́ é.

Ðó yě nɔ zɛn nǔ bo nɔ syɛ́n ta wútu ɔ, nu nylánylá dó mɛ e Mawu sɔ́ su lɛ́ é wú nɔ dó xɛsi yě ǎ. 11 Wɛnsagun lɛ́ ɖó hlɔ̌nhlɔ́n kpó agbɔ̌n kpó hú yě có, yě ka nɔ zán xógbe mɛzunzun tɔn lɛ́ dó dó hwɛ yě ǎ, ɖó sísí e yě ɖó nú Jexóva* é wútu. 12 Amɔ̌, lěe kanlin lɛ́ ma nɔ lin tamɛ cóbó nɔ wa nǔ ǎ, bɔ è dá yě bónú è ná wlí yě bo sú kún yětɔn dó gbɔn é ɔ, mɔ̌ wɛ mɛ énɛ́ lɛ́ cí; yě nɔ nylá nu dó nǔ ɖěɖěe mɛ yě ma mɔ nukúnnú jɛ ǎ lɛ́ é wú. Walɔ nǔhɛngblé tɔn yěɖésúnɔ tɔn wɛ ná sú kún yětɔn dó. 13 È ná dɔn tó nú yě, ɖó walɔ nyanya yětɔn lɛ́ wú.

Fɛɛmɛninɔ sín gbɛ e yě kpo ná, bo tlɛ nɔ zán gbɛ énɛ́ ɖo kéze é, nɔ dó xomɛhunhun nú yě. Yě cí ɖixó e ɖo avɔ mɛ lɛ́ é kpó blɔ̌ e ɖo nukúnmɛ lɛ́ é kpó ɖɔhun, bɔ nǔkplɔ́nmɛ mɛblɛ́blɛ́ tɔn yětɔn lɛ́ nɔ dó xomɛhunhun nú yě tawun,* hwenu e yě nɔ ɖo agɔ̌ ɖu ɖó kpɔ́ xá mi wɛ é. 14 Afɔdógbě alǒ nyɔ̌nu ɖěvo biba sín nukún wɛ ɖo ta nú yě, yě nɔ kpé wú bo nɔ jó hwɛhuhu dó ǎ, bo nɔ blɛ́ mɛ* e ma lí dǒ ǎ lɛ́ é. Nukúnkɛn wɛ gɔ́ ayi yětɔn lɛ́ mɛ. Vǐ e è dónu lɛ́ é wɛ nú yě. 15 Ðó yě jó ali jlɔ́jlɔ́ ɔ dó wútu ɔ, yě bú ali. Yě mlɛ́ ali Baláamu tɔn; Bosɔ́ɔ ví wɛ é nyí bo yí wǎn nú ajɔ nǔnyanyawiwa tɔn. 16 Amɔ̌, è kɛ nu dó nǔ wú n’i, ɖó nǔwanyido éɖésúnɔ tɔn wútu. Tócí e ma sixú ɖɔ xó ǎ é ɖé jɛ xó ɖɔ jí gbɛtɔ́ ɖɔhun, bo sú ali dó taɖunɔnú e gbeyíɖɔ ɔ jló ná wa é.

17 Mɛ énɛ́ lɛ́ cí tɔjɔtɛn e ma ɖó sin ǎ lɛ́ é kpó amǔ* e mɛ jɔhɔn ɖaxó e ɖo adǎn jí é d’alɔ é kpó ɖɔhun, bɔ è sɔ́ zǐnflú gɔngɔn ɖó te nú yě. 18 Yě nɔ ɖɔ nǔ e vlɛ́ nǔ tají bo ma ka nyí nǔɖéwanú ǎ lɛ́ é. Gbɔn jlǒ agbaza tɔn lɛ́ kpó wunhínhɔ́nnú* lɛ́ kpó gblamɛ ɔ, yě nɔ dɔn mɛ lɛ́ dó nǔnyanyawiwa e mɛ yě ko ɖe alɔ sín tlóló lɛ́ é mɛ. 19 Yě nɔ dó mɛɖésúsíninɔ sín akpá nú mɛ e nɔ xwedó yě lɛ́ é, yědɛɛ ɖésúnɔ ka nyí kannumɔ nú nǔ nyanya; ɖó mɛ ɖěbǔ e jí mɛɖé ɖu ɖe é nɔ húzú kannumɔ mɛ ɔ tɔn.* 20 Nǔgbó ɔ, ényí yě hɔn nú walɔ blíblí gbɛ ɔ tɔn lɛ́, gbɔn nukúnnúmɔjɛnǔmɛ e sɔgbe bo kunkplá Aklúnɔ kpó Hwlɛngántɔ́ mǐtɔn Jezu Klísu kpó é gblamɛ, bɔ gǔdo mɛ ɔ, yě lɛ́ wá ɖ’alɔ ɖo nǔ énɛ́ lɛ́ mɛ bɔ yě ɖu ɖo jǐ yětɔn hǔn, ninɔmɛ yětɔn gǔdo tɔn ɔ lɛ́ nylá hú nukɔntɔn ɔ. 21 É ná ko kpɔ́n te nú yě ɖɔ yě ní ma ɖó nukúnnúmɔjɛnǔmɛ e sɔgbe é dó ali nǔjlɔ́jlɔ́wiwa tɔn ɔ kpó gbeɖiɖe mímɛ́ ɔ kpó wú ó, hú ɖɔ yě ní tuun nǔ énɛ́ lɛ́ ganjí bo ka lɛ́ wá lɛ́ kɔ sín gúdo. 22 Nǔ e jɛ dó yě jí é xlɛ́ ɖɔ lǒ élɔ́ nyí nǔgbó: “Cukú lɛ́ kɔ yi nǔ e é vi é kɔn bo bɛ́ ɖu, bɔ aglǔza e è lɛ wǔ ná é lɛ́ lɛ́ kɔ yi lɛ babá.”

3 Mɛ vívɛ́ná ce lɛ́ mi, wěma wegɔ́ ɔ ɖíe wlán sɛ́dó mi wɛ un ɖe é, bɔ lěe é nyí gbɔn ɖo nukɔntɔn ɔ mɛ é ɔ, un ɖo wǔsyɛ́n dó lanmɛ nú mi wɛ bónú mi ná nɔ lin tamɛ kpɔ́n dó nǔjɔnǔ mɛ, gbɔn nǔ e mi ko tuun lɛ́ é flínflín mi gblamɛ. 2 Un ɖo mɔ̌ wa wɛ bónú mi ná flín xó* e gbeyíɖɔ mímɛ́ lɛ́ ko ɖɔ ɖ’ayǐ lɛ́ é, gɔ́ nú sɛ́n Aklúnɔ mǐtɔn kpó Hwlɛngántɔ́ mǐtɔn kpó tɔn, ée è ná mi gbɔn mɛsɛ́dó e è sɛ́ dó mi lɛ́ é jí é. 3 Jɛ nukɔn hwɛ̌ ɔ, mi ní tuun ɖɔ ɖo azǎn gǔdo gúdo tɔn lɛ́ mɛ ɔ, mɛcákotɔ́ lɛ́ ná wá kpó mɛcáko yětɔn kpó, bo ná nɔ wa nǔ sɔgbe xá jlǒ yěɖésúnɔ tɔn lɛ́, 4 lobo ná nɔ ɖɔ: “Fítɛ́ fí ɖiɖe tɔn e sín akpá è dó é ka ɖe? Sín gbe e gbe tɔ́gbó mǐtɔn lɛ́ kú é ɔ, nǔ bǐ kpo ɖo lěe yě ɖe sín hwenu e è dá gbɛ ɔ é pɛ́ɛ́.”

5 Ðó yě nɔ jló bo nɔ wɔn ya nú nǔgbó élɔ́: é ko lín din bɔ jǐnukúnsin tíin, lobɔ gbɔn xó e Mawu ɖɔ é gblamɛ ɔ, ayǐkúngban xúxú tɔ́n sín sin mɛ bo cí sin ɔ tɛ́ntin; 6 nǔ énɛ́ lɛ́ sú kún dó nú gbɛ hwenɛ́nu tɔn ɔ, nǔ nyí mɔ̌ hwenu e sin gɔ́ ayǐkúngban ɔ bǐ jí é. 7 Amɔ̌, gbɔn xó ɖokpó ɔ gblamɛ ɔ, è sɔ́ jǐnukúnsin kpó ayǐkúngban kpó e tíin din é ɖó te nú myɔ, bo lɛ́ hɛn yě ɖó te káká jɛ hwɛɖɔzángbe kpó hwenu e è ná sú kún dó nú mɛ e ma nɔ ɖó sísí nú Mawu ǎ lɛ́ é dó é kpó.

8 É ɖo mɔ̌ có, mɛ vívɛ́ná ce lɛ́ mi, mi ma lɔn nú ayi mitɔn fɛ́ sín nǔ élɔ́ jí ó, é wɛ nyí ɖɔ ɖo Jexóva* nukɔn ɔ, azǎn ɖokpó cí xwe afatɔ́n ɖɔhun, bɔ xwe afatɔ́n cí azǎn ɖokpó ɖɔhun. 9 Jexóva* ɖo lɛjɛlɛjɛ dán wɛ dó akpá e é dó é wú, lěe mɛɖé lɛ́ nɔ lin gbɔn é ǎ, é nyɔ́ wa ɔ, é ɖó suúlu dó mi wú, ɖó é jló ɖɔ è ní sú mɛ ɖěbǔ sín kún dó ǎ, loɔ, é jló ɖɔ ali ní hun nú mɛ lɛ́ bǐ, bónú hwɛ yětɔn lɛ́ ní vɛ́ nú yě.* 10 Amɔ̌, azǎn Jexóva* tɔn ná wá ajotɔ́ ɖɔhun, bɔ jǐnukúnsin ná wá yi bléwún kpó xósúsú ɖaxó* kpó. Nǔ e ɖo jǐnukúnsin kpó ayǐkúngban jí kpó bo hun myɔ gáɖágáɖá lɛ́ é ná sínsín, bɔ è ná kɔ́n sɛ sín ayǐkúngban ɔ kpó nǔ e ɖ’é jí lɛ́ é kpó jí.

11 Ðó è ná sínsín nǔ énɛ́ lɛ́ bǐ gbɔn mɔ̌ wútu ɔ, mi lin tamɛ dó mɛ alɔkpa e mi ɖó ná nyí é wú. Mi ɖó ná ɖó walɔ mímɛ́, bo ná nɔ wa gbejí nɔ nú Mawu sín nǔ lɛ́, 12 ée mi ná ɖo te kpɔ́n wǐwá* azǎn Jexóva* tɔn tɔn, bo lɛ́ hɛn azǎn énɛ́ ayi mɛ ganjí* é; hwenɛ́nu wɛ è ná sú kún dó nú jǐnukúnsin ɖo myɔ mɛ, bo ná sɔ́ yǒzo syɛ́nsyɛ́n dó sínsín nǔ e ɖo jǐnukúnsin kpó ayǐkúngban jí kpó lɛ́ é! 13 Amɔ̌, jǐnukúnsin yɔ̌yɔ́ kpó ayǐkúngban yɔ̌yɔ́ ɖé kpó tíin bɔ mǐ ɖo te kpɔ́n, sɔgbe xá akpá e é dó é, lobɔ nǔjlɔ́jlɔ́wiwa ná nɔ nɔ fí énɛ́ lɛ́.

14 Énɛ́ wú ɔ, mɛ vívɛ́ná ce lɛ́ mi, ɖó mi ɖo te kpɔ́n nǔ énɛ́ lɛ́ wútu ɔ, mi wa nǔ e wú mi kpé é bǐ bónú ɖo vivɔnu ɔ, Mawu ná mɔ mi ɖo mǐmɛ́ jí, ma ɖó blɔ̌ ɖo wǔ, ɖo fífá mɛ. 15 Gɔ́ ná ɔ, mi ní nɔ kpɔ́n suúlu Aklúnɔ mǐtɔn tɔn dó mɔ hwlɛngán sín ali, lěe nɔví súnnu vívɛ́ná mǐtɔn Pɔ́lu lɔ wlán sɛ́dó mi, sɔgbe xá nǔnywɛ́ e è ná ɛ é gbɔn é. 16 Nǔgbó ɔ, é ɖɔ xó dó nǔ énɛ́ lɛ́ wú ɖo wěmasɛ́dómɛ tɔn lɛ́ bǐ mɛ. É ɖo mɔ̌ có, nǔɖé lɛ́ ɖo wěmasɛ́dómɛ énɛ́ lɛ́ mɛ, bɔ é nɔ vɛ́ wǔ bɔ è ná mɔ nukúnnú jɛ mɛ, lobɔ mɛ e ma nɔ mɔ nukúnnú jɛ nǔ mɛ ganjí ǎ, bo ma ka lɛ́ lí dǒ ǎ lɛ́ é* nɔ sló kɔ ná, lěe yě nɔ lɛ́ bló nú Nǔwlánwlán mímɛ́ lɛ́ sín akpáxwé e kpo lɛ́ é gbɔn é; énɛ́ ná zɔ́n bɔ è ná sú kún yětɔn dó.

17 Énɛ́ wú ɔ, mɛ vívɛ́ná ce lɛ́ mi, ɖó mi ko tuun nǔ énɛ́ lɛ́ dó nukɔn wútu ɔ, mi bo nɔ acéjí, bónú mɛblɛ́blɛ́ mɛ nyanya lɛ́ tɔn ní ma wá zɔ́n, bónú mi zɛ gbě xá yě ó, ɖó énɛ́ sixú zɔ́n bɔ mi sɔ́ ná lí dǒ* ǎ. 18 Mi ní nɔ zán gbɛ ɖó alɔkpa ɖé, bo ná dó sixú ɖo fɛ́nú Aklúnɔ mǐtɔn kpó Hwlɛngántɔ́ mǐtɔn Jezu Klísu kpó tɔn mɔ yí d’é jí wɛ, lobo lɛ́ ɖo nukúnnúmɔjɛnǔmɛ e gɔ́ngɔ́n é ɖó dó wǔ tɔn d’é jí wɛ. Susu ní nyí étɔn din, bo lɛ́ nyí káká sɔ́yi. Amǐ.