Tàn Biblu Tɔn lɛ Sín Wema Ce

Xóxwlémɛ

TÀN nǔ e jɛ nugbǒ lɛ é tɔn wɛ ɖò wema elɔ mɛ. Biblu e nyí wema nukúnɖeji hugǎn ɖò gbɛ̀ ɔ mɛ é mɛ wɛ è ɖè ye sín. Ye kpi tàn gbɛ̀ ɔ tɔn sín hwenu e Mawu jɛ nǔ lɛ ɖó jí é kaka wá jɛ hwe mǐtɔn nu. Ye tlɛ ɖɔ xó dó nǔ e Mawu dó akpá bo na bló ɖò sɔ e ja é wu.

Wema elɔ na d’alɔ we bɔ a na ɖó linlin ɖé dó nǔ e ɖò Biblu mɛ lɛ é bǐ wu. É ɖɔ xó dó mɛ e xó Biblu ɖɔ lɛ é kpo nǔ e ye wà lɛ é kpo wu. É lɛ́ xlɛ́ nukúnɖiɖo ɖagbe e Mawu na gbɛtɔ́ lɛ bɔ ye na nɔ gbɛ̀ kaka sɔyi ɖò palaɖisi mɛ ɖò ayikúngban jí é.

Tàn 116 wɛ ɖò wema elɔ mɛ, bɔ è má ye ɖó akpáxwé tantɔn. Bìbɛ̌ akpáxwé ɖokpo ɖokpo tɔn nɔ na tinmɛ klewun ɖé dó nǔ e ɖò akpáxwé ɔ mɛ é wu. È tò tàn lɛ ɖebɔdoɖewu lee nǔ lɛ jɛ gbɔn ɖò hwenuxó mɛ é tɔn. Enɛ na d’alɔ we bɔ a na tuùn hwenu e nǔ ɖokpo ɖokpo jɛ dó ɖò hwenuxó mɛ é, bɔ a hɛn ɔ a na sɔ́ ɖejlɛdoɖewu.

Lee è kpi tàn lɛ gbɔn é bɔkun. Mi mɛ yɔkpɔvu lɛ hɛn ɔ mi na xà. Enyi mi mɛ mɛjitɔ́ lɛ nɔ xà tàn elɔ lɛ nú vǐ mitɔn kpɛví lɛ hwɛhwɛ ɔ, mi na mɔ ɖɔ é na nɔ víví nú ye tawun. Mi na mɔ ɖɔ tàn gègě ɖò wema elɔ mɛ bo na dɔn yɔkpɔvu kpo mɛxo kpo bǐ.

È slɛ́ wemafɔ Biblu tɔn ɖé lɛ ɖó vivɔnu tàn ɖokpo ɖokpo tɔn. Mǐ dó wusyɛn lanmɛ nú mi ɖɔ mi ni nɔ xà wemafɔ Biblu tɔn e jí tàn elɔ lɛ junjɔn é.