TÀN 11
Ayiɖóhwɛɖó Nukɔntɔn Ɔ
A KA tuùn nǔ nukɔntɔn e Nɔwee wà hwenu e é kpo xwédo tɔn kpo tɔ́n sín tɔjihun ɔ mɛ é à? É savɔ̌ nú Mawu lee mɔ gbɔn wɛ a ɖè ɖò ɖiɖe e ɖò dò é mɛ é. Nɔwee sɔ́ kanlin ɖé lɛ dó savɔ̌ nú Mawu, bo dó dokú n’i nú hwlɛn e é hwlɛn ye gán hwenu e sìn vɔ gbɛ̀ ɔ é.
Jehovah ka hun xomɛ dó vɔ̌ e Nɔwee sá é wu à? Ɛɛn. Enɛ wu wɛ é d’akpá n’i ɖɔ emi kún sɔ́ na sɔ́ sìn dó vɔ gbɛ̀ ɔ na kpɔ́n gbeɖé ó.
Ee ye tɔ́n sín tɔjihun ɔ mɛ bɔ é nɔ zaan é ɔ, ayǐ mɛ nyɔ́, bɔ Nɔwee kpo xwédo tɔn kpo gbá xɔ lɛ bo jɛ gle lɛ̀ jí. Mawu xoɖɛ ɖagbe nú ye, bo ɖɔ: ‘Mi jì vǐ gègě. Mi ni sukpɔ́ kaka bo gɔ́ ayikúngban ɔ jí bǐ.’
Amɔ̌, hwenu e gbɛtɔ́ lɛ na wá sè sìn vɔ gbɛ̀ ɔ sín tàn é ɔ, ye sixu ɖi xɛsi ɖɔ nǔ mɔhun na lɛ́ jɛ. Enɛ wu wɛ Mawu bló nùɖé, b’ɛ na nɔ flín gbɛtɔ́ lɛ ɖɔ sìn kún sɔ́ na vɔ gbɛ̀ ɔ kpɔ́n gbeɖé ó. A ka tuùn nǔ e wɛ é à? Ayiɖóhwɛɖó wɛ.
Ayiɖóhwɛɖó nɔ yawu tɔ́n hwenu e jǐ ja kɛ̀n bɔ hwesivɔ hun é. É nɔ ɖó hwɛkan gègě. A ka ko mɔ ayiɖóhwɛɖó kpɔ́n à? Kpɔ́n ee ɖò ɖiɖe ɔ mɛ é.
Nǔ e Mawu ɖɔ é ɖíe: ‘Un d’akpá ɖɔ sìn sɔ́ na vɔ gbɛtɔ́ kpo kanlin kpo kpɔ́n gbeɖé ǎ. Un sɔ́ ayiɖóhwɛɖó ce ɖó akpɔ́kpɔ́ mɛ. Enyi é tɔ́n ɔ, Un na mɔ bo na flín akpá e Un dó é.’
Enɛ wu ɔ, enyi ayiɖóhwɛɖó tɔ́n ɔ, etɛ a ka ɖó na flín? Mawu d’akpá ɖɔ emi kún sɔ́ na sɔ́ sìn dó vɔ gbɛ̀ ɔ na kpɔ́n gbeɖé ó.
Genèse 8:18-22; 9:9-17.