TÀN 13
Ablaxamu, Xɔ́ntɔn Mawu Tɔn
FÍ E gbɛtɔ́ lɛ sá xwé dó ɖò Sìn Vɔ Gbɛ̀ ɔ gudo é ɖokpo nɔ nyí Uli. Toxo enɛ ɔ wá hun nukún, bɔ xwé ɖɛkpɛɖɛkpɛ lɛ ɖ’emɛ. Amɔ̌, mɛ e ɖ’emɛ lɛ é nɔ sɛ̀n vodun lɛ, lee ye ko nɔ bló gbɔn ɖò Babɛli é. Mɛ e ɖò Uli kpo Babɛli kpo lɛ é cí Nɔwee kpo Sɛmu kpo ɖɔhun ǎ, ɖó yedɛɛ lɛ lɛkɔ sín Jehovah gudo ǎ.
Sìn vɔ gbɛ̀ bɔ é bló xwè 350 é wɛ Nɔwee gbejinɔtɔ́ ɔ kú. Xwè wè gudo kpowun ɔ, è jì nya e mɔ wɛ a ɖè ɖò ɖiɖe ɔ mɛ é. Nya bunɔ ɖé wɛ é nyí nú Mawu. Nyikɔ tɔn nɔ nyí Ablaxamu. É kpo hɛnnumɔ tɔn lɛ kpo nɔ nɔ Uli.
Jehovah ɖɔ nú Ablaxamu gbè ɖokpo ɖɔ: ‘Tɔ́n sín Uli, jǒ hɛnnumɔ towe lɛ dó, bo yì tò e Un na xlɛ́ we é mɛ.’ Ablaxamu ka setónú nú Mawu bo tɔ́n sín Uli à? É wà mɔ̌. É nɔ setónú nú Mawu hwebǐnu wɛ zɔ́n, bɔ é nyí Mawu xɔ́ntɔn.
Hɛnnumɔ Ablaxamu tɔn ɖé lɛ xwedó é hwenu e é tɔ́n sín Uli é. Tɔ́ tɔn Talaa, ataví-ylɔ-ví tɔn Lɔti kpo asì éɖesunɔ tɔn Saala kpo xwedó é. Ye ɖò yìyì wɛ kaka bo jɛ Calan. Finɛ wɛ Talaa kú ɖè. Calan lín dó Uli tawun.
Hwenu kpɛɖé gudo ɔ, Ablaxamu kpo mɛ tɔn lɛ kpo tɔ́n sín Calan bo wá tò Kanaa tɔn mɛ. Jehovah ɖɔ n’i ɖò finɛ ɖɔ: ‘Tò elɔ wɛ Un na na vǐ towe lɛ.’ Ablaxamu sá xwé dó Kanaa bo nɔ nɔ goxɔ lɛ mɛ.
Mawu dó nú Ablaxamu, bɔ é ɖó lɛngbɔkpo gègě kpo kanlin ɖevo lɛ kpo. É lɛ́ ɖó deví kanweko donu mɔkpan. Amɔ̌, é kpo Saala kpo ko ɖó vǐ ɖě ǎ.
Hwenu e Ablaxamu ɖó xwè 99 é ɔ, Jehovah ɖɔ n’i ɖɔ: ‘Un d’akpá nú we ɖɔ a na nyí tɔ́ akɔta gègě tɔn.’ Nɛ̌ enɛ ka sixu jɛ gbɔn, eɖíe Ablaxamu kpo Saala kpo ko kpò bo ma ka ɖó vǐ ɖě ǎ è?
Genèse 11:27-32; 12:1-7; 17:1-8, 15-17; 18:9-19.