Mɛ Alɔkpa Tɛ Un ka Nyí?

ETƐ A KA NA WÀ?

Dǒ nukún nǔ elɔ mɛ kpɔ́n: Katé wá agɔ̌ ɖé tɛnmɛ, b’ɛ ɖó cɛju wǒ vɔ́vɔ́ ǎ bɔ é sè mɛ e é tuùn é ɖé sín gbè ɖò gudo tɔn.

Katé lilɛ bo mɔ ɖɔ xɔ́ntɔn emitɔn Jani wɛ, bɔ biya gò wè ko ɖò hunhun, ɖò alɔ tɔn mɛ. Jani dlɛn gò lɛ ɖokpo dó Katé bo ɖɔ, “A ma sɔ́ nyí yɔkpɔvu ayiɖeɖayi tɔn mɔ̌ nɛ, kabǐ?”

Katé jló na gbɛ́, amɔ̌ xɔ́ntɔn tɔn wɛ Jani ka nyí. Katé ka jló ɖɔ xɔ́ntɔn emitɔn ni lin ɖɔ emi ci mɛ ǎ. Gɔ́ na ɔ, Jani ɔ nyɔnuví jijɔ ɖagbenɔ lɛ ɖokpo wɛ. Enyi é ɖò ahan nu wɛ hǔn, é nyla dín ǎ nɛ sín. ‘Biya kpowun jɛn ka wɛ sín, é ma cí gěe nunu ɖɔhun nɛ.’ Katé lin mɔ̌ d’ayi mɛ.

Enyi hwi wɛ ɖò Katé sín tɛnmɛ ɔ, etɛ a ka na wà?

NƆTE BO LIN NǓ KPƆ́N!

Bo na dó sixu wá gbeta e nùnywɛ kpé é kɔn ɖò ninɔmɛ elɔ mɛ ɔ, a ɖó na tuùn mɛ alɔkpa e a nyí é. Mɛ alɔkpa e a nyí é tuùntuùn wɛ nyí ɖɔ a ni tuùn nǔ e nyí nùjɔnǔ nú we lɛ é kpo nǔ e a ɖi nǔ na lɛ é kpo. Enɛ tuùntuùn na na hlɔnhlɔn we bɔ a na ɖó acɛ dó gbɛ̀ towe jí, b’ɛ na nyí ɖɔ mɛ ɖevo lɛ wɛ na ɖó d’eji ǎ.​—1 Kɔlɛntinu lɛ 9:26, 27.

Nɛ̌ a ka sixu tɛnkpɔn bo ɖó hlɔnhlɔn mɔhun gbɔn? Xósin nùkanbyɔ ɛnɛ elɔ lɛ tɔn nina nyí fí ɖagbe e a na bɛ́sín é ɖé.

1 NǓWUKPIPKÉ TƐ LƐ UN KA ÐÓ?

Nǔ e wu a kpé lɛ é kpo jijɔ ɖagbe e a ɖó lɛ é kpo tuùntuùn na d’alɔ we bɔ a na hɛn jiɖiɖe towe lidǒ.

KPƆ́NDÉWU BIBLU TƆN: Mɛsɛ́dó Pɔlu wlan ɖɔ: “Ðò xóɖiɖɔ sín alixo ɔ, è sixu ɖɔ un kún nyɔ́ xó ɖɔ ó; amɔ̌ dandan mɛ ɔ, ɖò nùtuùntuùn lixo ɔ, è sixu ɖɔ un kún tuùn nǔ ó ǎ.” (2 Kɔlɛntinu lɛ 11:6) Ðó Pɔlu mɔ nǔ jɛ Mawuxó ɔ wu ganji wutu ɔ, é kpéwú bo lidǒ hwenu e mɛ ɖevo lɛ ɖò nǔɖɔ ba ɛ wɛ é. É lɔn bonu xómɔɖɔdómɛwu mɛ ɖevo lɛ tɔn túntún da kpò nú jiɖiɖe tɔn ǎ.​—2 Kɔlɛntinu lɛ 10:10; 11:5.

GBĚJÉ HWIÐÉE KPƆ́N: Wlǎn nǔwukpikpé towe ɖokpo ɖó dò.

Dìn ɔ, tinmɛ jijɔ ɖagbe e a ɖó é ɖokpo. (Ði kpɔ́ndéwú ɔ, a nɔ nyɔ́ xomɛ à? na nǔ mɛ à? nɔ nɔ ganmɛ jí à? a nyí gbɛtɔ́ ɖejid’ewu ɖé à?)

2 GǍNMAÐÓ TƐ LƐ UN KA ÐÓ?

Enyi cɛni ɖé na syɛn ɔ, kwín tɔn kpɛví bǐ ɔ lɔ ɖó na syɛn. Mɔ̌ ɖokpo ɔ, nǔ e nyí nùjɔnǔ nú we é kpo nǔ e a ɖi nǔ na é kpo sixu yawu huzu dó nyanya jí, enyi a lɔn bɔ gǎnmaɖó towe lɛ ɖ’acɛ dó gbɛzán towe jí ɔ nɛ.

KPƆ́NDÉWÚ BIBLU TƆN: Pɔlu mɔ nǔ jɛ gǎnmaɖó tɔn lɛ wu. É wlan ɖɔ: “Ðò linlin ce mɛ ɔ, Mawusɛ́n ɔ wɛ nɔ dó xomɛhunhun nú mì. Amɔ̌, sɛ́n ɖevo tíìn ɖò agbaza ce mɛ, bo ɖò hun xò xá sɛ́n e ɖò linlin ce mɛ é wɛ, bo sɔ́ mì dó ɖó gantɔ́ nú hwɛhuhu sɛ́n.”​—Hlɔmanu lɛ 7:22, 23.

GBĚJÉ HWIÐÉE KPƆ́N: Gǎnmaɖó tɛ lɛ jí a ka ɖó na tɛnkpɔn bo ɖ’acɛ dó?

3 ETƐ LƐ GBÉ NYA WƐ UN KA ÐÈ?

A ka sixu dó zemijan ɖé bo na ɖɔ nú zemijannɔ ɔ ɖɔ è ni ɖò lɛlɛ̌ dó toxo ɔ wɛ kpowun kaka jɛ hwenu e sánsin tɔn na vɔ dó é à? Taɖunɔnú wɛ é na nyí, bo na lɛ́ hɛn akwɛ gú!

Etɛ enɛ ka kplɔ́n mɛ? Nùɖé gbé nyinya nɔ d’alɔ mɛ bɔ è nɔ ɖò flúflú wɛ ǎ. È nɔ ɖó fí ɖé bo na yì bo nɔ lɛ́ tuùn lee è na yì gbɔn é.

KPƆ́NDÉWÚ BIBLU TƆN: Pɔlu wlan ɖɔ: “Hwenu e un ɖò wezun kán wɛ ɔ, nukún ce ɖò fí e un xwè ɔ wu.” (1 Kɔlɛntinu lɛ 9:26) Pɔlu nɔ yí nǔ lɛ ɖó lee é mɔ ɖó é kpowun ǎ, é nyɔ́ wà ɔ, é nɔ sɔ́ nùɖé lɛ ɖó nukɔn bo nɔ ɖò nyinya wɛ.​—Filipunu lɛ 3:12-14.

GBĚJÉ HWIÐÉE KPƆ́N: Wlǎn nǔ e gbé a na nya bo na kpéwú ɖò xwè e ja é mɛ é atɔn dó wema ɖé jí.

4 ETƐ LƐ JÍ UN KA KÚ DÓ?

Enyi a ma kú dó nùɖé jí ǎ ɔ, a na nɔ xò nǔ kpɔ́n. Aganma ɖɔhun ɔ, a na nɔ ɖyɔ sinmɛ bo na nɔ sɔgbe xá gbɛ̌ towe lɛ. Enɛ na xlɛ́ gannaganna ɖɔ a kún tuùn mɛ alɔkpa e hwiɖesunɔ nyí é ó.

Amɔ̌, enyi nǔ e a nɔ wà lɛ é junjɔn nǔ e jí a kú dó lɛ é jí ɔ, a na kpó ɖò mɛ alɔkpa e a nyí é nyí wɛ hwebǐnu.

KPƆ́NDÉWÚ BIBLU TƆN: Hwenu e Daniyɛli na ko kpó ɖò dɔnkpɛvumɛ é ɔ, é ɖò mɛ tɔn lɛ kpá ǎ có, é “tuùn dó ayi tɔn mɛ” ɖɔ emi na setónú nú sɛ́n Mawu tɔn lɛ. (Daniyɛli 1:8) Mɔ̌ mɛ ɔ, é nɔ gbeji nú éɖée. Daniyɛli nɔ gbɛ̀ sɔgbe kpo nǔ e jí é kú dó lɛ é kpo.

GBĚJÉ HWIÐÉE KPƆ́N: Etɛ lɛ jí a ka kú dó? Kpɔ́ndéwú: A ka ɖi nǔ nú Mawu à? Enyi mɔ̌ wɛ ɔ, etɛwu? Kúnnuɖenú tɛ ka na ganjɛwu hwɛ ɖɔ é tíìn?

A ka ɖi ɖɔ ɖagbe towe wu wɛ Mawu dó sɛ́n walɔ ɖagbe tɔn lɛ à? Enyi mɔ̌ wɛ ɔ, etɛwu?

Bo na dó sú ta na ɔ, etɛ ɖɔhun a ka jló na cí? Ama e jɔhɔn flɛ́flɛ́ lɛ nɔ dan é ɖé ɖɔhun wɛ à alǒ atín e tlɛ nɔ dɛ ɖò jɔhɔn ɖaxó lɛ nu é ɖɔhun? Nǔ nǔ e nyí nùjɔnǔ nú we lɛ é kpo nǔ e a ɖi nǔ na lɛ é kpo ni lidǒ ganji ɖò ayi towe mɛ, enɛ ɔ, a na cí atín enɛ ɖɔhun. Bɔ enɛ na d’alɔ we bɔ a na mɔ xósin nú nùkanbyɔ ɔ, Mɛ alɔkpa tɛ un ka nyí?