Joziyasi Yí Wǎn nú Sɛ́n Mawu Tɔn

Joziyasi huzu axɔsu Judáa tɔn hwenu e é ɖó xwè tantɔn é. Ðò hwe enɛ nu ɔ, togun ɔ nɔ bló majiki bo nɔ sɛ̀n vodun lɛ. Hwenu e Joziyasi ɖó xwè 16 é ɔ, é tɛ́n kpɔ́n bo kplɔ́n lee è na sɛ̀n Jehovah ɖò ali e sɔgbe é nu gbɔn é. Hwenu e é ɖó xwè 20 é ɔ, é jɛ vodun lɛ kpo vɔsakpe lɛ kpo gbà jí gbɔn tò ɔ bǐ mɛ. Bɔ hwenu e é ɖó xwè 26 é ɔ, é bló tuto bonu è na jla tɛmpli Jehovah tɔn ɖó.

Vɔsanúxwlémawutɔ́ ɖaxó Ilukyahu mɔ wema mlámlá e jí Sɛ́n Jehovah tɔn ɖè é ɖò tɛmpli ɔ mɛ, é sixu ko nyí wema mlámlá e Mɔyizi ɖesu wlan é. Wěgbojinɔtɔ́ axɔsu ɔ tɔn Cafani sɔ́ wema mlámlá ɔ wá Joziyasi gɔ́n bo jɛ Sɛ́n ɔ xà dó aga jí. Ee Joziyasi ɖò tó ɖó wɛ é ɔ, é wá mɔ nukúnnú jɛ mɛ ɖɔ togun ɔ ko tlitó nú Jehovah nú xwè gègě. Axɔsu Joziyasi ɖɔ nú Ilukyahu ɖɔ: ‘Jehovah sìn xomɛ dó mǐ tawun. Yì bo ɖɔ xó n’i. Jehovah na ɖɔ nǔ e mǐ na bló é nú mǐ.’ Jehovah na xósin gbɔn gbeyiɖɔ nyɔnu Hulida jí bo ɖɔ: ‘Togun Judáa tɔn ko jó mì dó. Un na dɔn tó nú ye, amɔ̌, é na nyí hwenu e Joziyasi na ɖò axɔsu ɖu wɛ é ǎ, ɖó é sɔ́ éɖée hwe.’

Hwenu e Axɔsu Joziyasi sè wɛn ɔ é ɔ, é yì tɛmpli ɔ mɛ bo ylɔ togun Judáa tɔn kplé. Enɛ gudo ɔ, é xà Sɛ́n Jehovah tɔn dó jǐ nú akɔta ɔ bǐ. Joziyasi kpo togun ɔ kpo d’akpá ɖɔ ye na setónú nú Jehovah kpo ayixa yetɔn bǐ kpo.

Akɔta Judáa tɔn sɔ́ ɖu Dindinwayixwe ɔ ǎ nú xwè mɔkpan. Amɔ̌, hwenu e Joziyasi xà ɖò Sɛ́n ɔ mɛ ɖɔ è ɖó na ɖu Dindinwayixwe ɔ xwewu xwewu tɛgbɛ é ɔ, é ɖɔ nú akɔta ɔ ɖɔ: ‘Mǐ na ɖu Dindinwayixwe nú Jehovah.’ Enɛ wu ɔ, Joziyasi sɔnǔ bo na savɔ̌ gègě, bo bló tuto nú hanjigbɛta ɖé ɖò tɛmpli ɔ mɛ. Enɛ gudo ɔ, akɔta ɔ ɖu Dindinwayixwe ɔ, bo lɛ́ ɖu Wɔxúxú E Mɛ È Ma Dó Tɔ́n Ǎ É Sín Xwè e è nɔ ɖu xɔ azǎn tɛnwe é bɔ d’ewu. È ko ɖu Dindinwayixwe mɔhunkɔtɔn kpɔ́n sín Samuwɛli hwenu ǎ. Joziyasi yí wǎn nú Sɛ́n Mawu tɔn tawun. Nǔ kpinkplɔn dó Jehovah wu ka nɔ víví nú we à?