Nukɔnyiyi Sinsɛnzɔ́ ɔ Tɔn Lɛ

Ðò République centrafricaine ɔ, è nɔ ɖè xójlawema La Tour de Garde, wema lɛ, alɔnuwema lɛ kpo video lɛ kpo tɔ́n dó gbè e tò ɔ mɛ nu lɛ nɔ dó hugǎn b’ɛ nɔ nyí Sango é mɛ. È nɔ lɛ́ lilɛ wema mǐtɔn lɛ dó Gbaya mɛ ɖò Gbadahweji tò ɔ tɔn.

Ðò Abɔxwísun 2014 tɔn mɛ ɔ, è ɖó Azɔ̌xɔsa Lilɛdogbeɖevomɛ Tɔn ɖé ayǐ ɖò Kelo ɖò Tchad tò ɔ mɛ b’ɛ nɔ kpé nukún dó lilɛdogbeɖevomɛ Lele sín gbè ɔ tɔn wu. Wema lɛ lɛ́ tíìn ɖò Moundang, Ngambai kpo Sar kpo sín gbè mɛ.

Ðò Cameroun ɔ, lilɛdogbeɖevomɛ sín azɔ̌ ɔ ɖò nukɔn yì wɛ b’ɛ jiwǔ. Ðibla yì Avivɔsun 2014 tɔn sín vivɔnu ɔ, è ɖó gbɛ̌ta lilɛdogbeɖevomɛ tɔn ee na nɔ ayǐ nú táan ɖé é wè ayǐ dó Pidgin (Cameroun) sín gbè mɛ hwenu e è ko kplɔ́n azɔ̌ ye gudo é. Ðò Zǒsun ɔ sín vivɔnu mɔ̌ ɔ, ye ko lilɛ tlati tantɔn, alɔnuwema atɔn kpo video kpɛví kpɛví ɛnɛ kpo dó gbè ɔ mɛ. Ðò Aluùnsun 2015 tɔn mɛ ɔ, è yí gbè nú gbɛ̌ta lilɛdogbeɖevomɛ tɔn e na nɔ ayǐ hwebǐnu é ɛnɛ. Gbè ɖevo lɛ lɔ ɖò nukɔn yì wɛ. Gbè elɔ lɛ ɖokpo ɖokpo ɖó gbɛ̌ta lilɛdogbeɖevomɛ tɔn e na nɔ ayǐ hwebǐnu é wè: Bassa (Cameroun), Boulou kpo Douala kpo. Nǔ e gbé nya wɛ azɔ̌ enɛ e jiwǔ é ɖè é wɛ nyí ɖɔ é na bló bɔ nukúnnúmɔjɛnǔmɛ nugbǒ ɔ na túnflá bo na tíìn nú mɛ bǐ.—Dan. 12:4, NW.