Nǔ Sinsɛnzɔ́ Towe Ni Bí Alɔ nú We D’eji: Wɛnɖagbejijla Ðò Ajɔ̌watɛn Lɛ
Nǔ E Wu É Ðò Taji É: Ðó mɛ gègě nɔ w’azɔ̌ nú ganxixo mɔkpan wutu ɔ, hwɛhwɛ ɔ, wlɛnwín ɖagbe hugǎn e è sixu zán bo jla wɛn Axɔsuɖuto ɔ tɔn ye é wɛ nyí kúnnuɖiɖe nú ye ɖò azɔ̌watɛn yetɔn. Wɛnɖagbejijla ɖò ajɔ̌watɛn lɛ sixu hɛn awǎjijɛ kpo sínsɛ́n ɖagbe lɛ kpo wá, ɖó è nɔ ba mɛɖé kpò ǎ, bɔ azɔ̌watɔ́ lɛ nɔ lɛ́ ɖó sísí nú mɛ ɖěɖee ye nɔ lin ɖɔ ye sixu nyí axisinɔ lɛ é. Bonu é na dó sixu kpa wɛnjlatɔ́ lɛ ɔ, ye ɖó na nɔ ɖó ayi te bo na lɛ́ nyí kpɔ́ndéwú ɖò nǔsisɔ kpo acɔ́biba yetɔn kpo mɛ. (2 Kɔ. 6:3) Enɛ wu ɔ, nukúnkpénuwutɔ́ sinsɛnzɔ́ tɔn ɖó na nɔ gbéjé azɔn nabi e è nɔ ɖekúnnu ɖò ajɔ̌watɛn lɛ é kpo wɛnjlatɔ́ e nɔ ɖekúnnu ɖò finɛ lɛ é kpo kpɔ́n tɛnwin lɛnwin.
Lee È Sixu Bló Gbɔn É:
• Sɔnǔ nú nùxwlémɛ klewun ɖé. Enyi mǐ yí hwenu azɔ̌watɔ́ ɔ tɔn dín ɔ, é sixu gbɛ́ xó mǐtɔn hweɖevonu.
• Nɔ yì ba ajɔ̌tɔ́ lɛ kpɔ́n ɖò hwenu e alɔnu yetɔn ma ján dín ǎ é, ɖi hwenu e ye hun hɔn tlolo é.
• Tɛnkpɔn bo ɖɔ xó nú mɛ e nyí gǎn ɖò finɛ é jɛ nukɔn. Nɔ yawu dó mɛ bo nɔ lɛ́ dɔn mɛ. A sixu ɖɔ: “Mǐ ɖò mɛ lɛ ba kpɔ́n wɛ klewun ɖò azɔ̌watɛn yetɔn lɛ ɖó é nɔ vɛwǔ ɖɔ è ni mɔ ye ɖò xwégbe.” Ðɔ xó klewun ɖé n’i, bo xwlé é tlati, xójlawema, alǒ wema ɖevo ɖé. Bonu è ma wá vɛdo ɖɔ nǔsatɔ́ wɛ mǐ nyí ó wutu ɔ, é nyɔ́ hugǎn ɖɔ mǐ ni ma nɔ ɖɔ nùnina xó ó, afi nú è kanbyɔ mǐ ɖɔ nɛ̌ mǐ ka nɔ mɔ akwɛ dó wà azɔ̌ mǐtɔn gbɔn à jí ɔ nɛ.
• Enyi gǎn fí ɔ tɔn dɔn mɛ dó wu ɔ, byɔ gbè é bo na mɔ tɛn dó ɖɔ xó klewun xá azɔ̌watɔ́ ɖevo lɛ. Ðò ajɔ̌watɛn ɖé lɛ ɔ, é sixu nyɔ́ hugǎn ɖɔ a ni byɔ gbè ɖɔ emi ni jó wema ɖé lɛ dó fí e azɔ̌watɔ́ lɛ nɔ ɖu nǔ alǒ gbɔjɛ ɖè é à jí.
• Ðǒ ayi te, bo nɔ lɛ́ ɖyɔ alɔ. Ði kpɔ́ndéwú ɔ, enyi azɔ̌watɔ́ ɖé ɖò xó ɖɔ xá axisinɔ ɖé wɛ alǒ enyi alɔnu tɔn ján hǔn, nɔte kaka jɛ hwenu e alɔ tɔn nu vo dó é cobo sɛkpɔ ɛ.
Tɛ́n Nǔ Elɔ Kplɔ́n Sun ɔ Mɛ:
• Ðò Sinsɛn-Biblo Xwédo Tɔn towe e jǎwe é hwenu hǔn, blǒ vɔ̌gbɔnji nùxwlémɛ klewun e a sixu zán hwenu e è na byɔ we ɖɔ hwi ni ɖekúnnu ɖò ajɔ̌watɛn ɖé é tɔn.