Nǔ Sinsɛnzɔ́ Towe Ni Bí Alɔ nú We D’eji: Azɔ̌ Kpinkplɔn Biblu Kplɔntɔ́ lɛ Bonu Ye Na Ðó Nùkpinkplɔn Sín Aca Ðagbe
Nǔ E Wu É Ðò Taji É: Bo na dó sixu yì nukɔn bo zin ɖò gbigbɔ lixo ɔ, nùkplɔnmɛ dòdó lɛ kɛɖɛ wɛ Biblu kplɔntɔ́ lɛ ɖó na kpó na ǎ. (Ebl. 5:12–6:1) Nùkpinkplɔn nɔ byɔ gǎndido. É nɔ byɔ ɖɔ mǐ ni sɔ́ nǔ yɔyɔ̌ lɛ sɔ́ jlɛ́ dó nǔ e mǐ ko tuùn ɖ’ayǐ lɛ é wu, bo mɔ nukúnnú jɛ lee è sixu zán ye gbɔn é wu. (Nùnywɛxó 2:1-6) Enyi nùkplɔntɔ́ lɛ kplɔ́n lee yeɖesunɔ sixu ba dò nú nǔ gbɔn é ɔ, é na zɔ́n bɔ ye na nɔ zán wema mǐtɔn lɛ dó na xósin nú nùkanbyɔ Biblu tɔn lɛ. Gǎn syɛnsyɛn e ye nɔ dó bo na zán nǔ e ye kplɔ́n lɛ é na d’alɔ ye bɔ ye na syɛnlǐn ɖò mɛtɛnkpɔn e ye na mɔ ɖó ye nyí Klisanwun wutu lɛ é nukɔn.—Luk. 6:47, 48.
Lee È Sixu Bló Gbɔn É:
• Tɛɖɛ̌ lee é ɖò taji ɖɔ è ni nɔ ba alɔdo Jehovah tɔn ɖò ɖɛ mɛ jɛ nukɔn nú nùkpinkplɔn ɖokpo ɖokpo gbɔn é jí.—Jaan 14:26; 1 Kɔ. 2:10.
• Ðò bǐbɛ̌mɛ ɔ, dǒ wusyɛn lanmɛ nú nùkplɔntɔ́ towe ɖɔ é ni nɔ sɔnǔ nú Biblu kpinkplɔn tɔn jɛ nukɔn. Xlɛ́ ɛ wema towe, bo kplɔ́n ɛ lee é na zɛ xwi dó xókwin alǒ nukɛgbe taji lɛ kɛɖɛ glɔ kabǐ ɖó wuntun ye gbɔn é.
• Nǔ nùkplɔntɔ́ towe ni nɔ zán xógbe éɖesunɔ tɔn lɛ dó na xósin nùkanbyɔ lɛ tɔn. Ma lɔn bonu nùkpinkplɔn ɔ huzu nùkanbyɔ kpo xósin kpo, bɔ nùkplɔntɔ́ ɔ na nɔ xà xósin lɛ tlɔlɔ ɖò wema ɔ mɛ kpowun ó.
• Dǒ wusyɛn lanmɛ nú nùkplɔntɔ́ towe bonu é ni nɔ xà Xó Mawu Tɔn sín akpáxwé ɖé ayihɔngbe ayihɔngbe. Xlɛ́ ɛ tuto Biblu xixa tɔn e tinmɛ lee é sixu wà mɔ̌ gbɔn é ɖò jw.org jí. Tintɛnkpɔn bo na ɖó aca Biblu xixa ayihɔngbe ayihɔngbe tɔn na byɔ gǎndido, amɔ̌, gǎndido enɛ ɔ na hɛn lè wá.—Ðɛh. 1:2, 3.
• Xlɛ́ nùkplɔntɔ́ towe lee é sixu zán Watchtower Library alǒ WEMASƐXWETƐN ƐNTƐNƐTI JÍ TƆN Watchtower tɔn dó na xósin nú nùkanbyɔ Biblu tɔn lɛ gbɔn é. D’alɔ ɛ bonu é ni tuùn wekwín e nɔ dó gesí wema e mǐ nɔ zán hwɛhwɛ ɖò kplé agun tɔn lɛ jí é é; ɖi kpɔ́ndéwú ɔ, fg nɔte nú alɔnuwema Wɛnɖagbe ɖé Sín Mawu Gɔ́n!
Tɛ́n Nǔ Elɔ Kpɔ́n Sun ɔ Mɛ:
• Ðò vivɔnu xotalá alǒ wemata ɖé tɔn hǔn, byɔ Biblu kplɔntɔ́ towe ɖɔ é ni sɛ̀ sìn xwè nú nǔ e é kplɔ́n tlolo é ɖò klewun mɛ. Enyi a ma ɖó nùkplɔntɔ́ ɖé ǎ hǔn, nɔ sɛ̀ sìn xwè nú akpáxwé Biblu tɔn ɖé alǒ Atọ̀họ̀-Nuhihọ́ lọ Tọn sín akpáxwé ɖé ɖò klewun mɛ, bo na dó sixu bló bonu lee a nɔ mɔ nukúnnú jɛ nǔ e a nɔ xà lɛ é mɛ gbɔn é na kpɔ́n te.