Ali E Nu Mǐ Sixu Ðeji Dó Jehovah Wu Ðè É Atɔn

Davidi ɖu ɖò Goliyati jí ɖó é ɖeji dó Jehovah wu wutu. (1Sa 17:45) Jehovah jló na ɖè hlɔnhlɔn tɔn xlɛ́ dó mɛsɛntɔ́ tɔn lɛ bǐ takúnmɛ. (2Tan 16:9, nwt) Nɛ̌ mǐ ka sixu bló gbɔn bo na nɔ ɖeji dó alɔdó Jehovah tɔn wu, b’ɛ ma na nɔ nyí dó nǔ e mǐɖesunɔ ko mɔ kpɔ́n lɛ é kpo nǔwukpíkpé mǐtɔn lɛ kpo wu ǎ? Ali e nu mǐ sixu wà mɔ̌ ɖè é atɔn ɖíe:

• Nɔ xoɖɛ hwebǐnu. Ma nɔ xoɖɛ hwenu e a wà nǔɖe nyi dò bo ɖó hudo hwɛsɔ́kɛmɛ tɔn é kɛɖɛ ó, loɔ, nɔ lɛ́ wà mɔ̌ bá mɔ hlɔnhlɔn hwenu e nǔɖe tɛ́n we kpɔ́n nú a na wà nǔ nyanya é. (Mt 6:12, 13) Ma nɔ xoɖɛ ɖɔ Jehovah ni kɔn nyɔna dó gbeta e kɔn a ko wá lɛ é jí kɛɖɛ ó, loɔ, nɔ lɛ́ xoɖɛ bo nɔ byɔ alixlɛ́mɛ tɔn kpo nǔnywɛ tɔn kpo hwɛ̌ cobo nɔ wá gbeta lɛ kɔn.—Ja 1:5

• Ðǒ aca Biblu xixa kpo nǔkplɔnkplɔn kpo tɔn ɖé. Nɔ xà Biblu gbè bǐ gbè. (Ðɛ 1:2) Nɔ zán hwenu dó lin tamɛ dó kpɔ́ndéwú Biblu tɔn lɛ jí, bo nɔ zán nǔ e ye kplɔ́n we lɛ é. (Ja 1:23-25) Nɔ sɔnǔ nú sinsɛnzɔ́ ɔ cobo nɔ yì, bo nɔ ba dò nú nǔ ɖò wema mǐtɔn lɛ mɛ, ma nɔ ganjɛ nǔ e a ko mɔ kpɔ́n lɛ é wu ó. Nɔ sɔnǔ nú kplé agun tɔn lɛ bá dó ɖu vivǐ yetɔn ganji

• Nɔ wà nǔ ɖó kpɔ́ xá tutoblonunu Jehovah tɔn. Nɔ tuùn alixlɛ́mɛ gudogudo tɔn tutoblonunu ɔ tɔn lɛ, bo nɔ yawǔ xwedó ye. (Kɛ́ 9:17) Enyi mɛxo agun tɔn lɛ ɖè wě xá we alǒ na alixlɛ́mɛ we ɔ, nɔ ɖótó.—Eb 13:17

KPƆ́N VIDEO MǏ ÐÓ HWƐJIJƆ ÐEBǓ BO NA ÐI XƐSI NÚ YADONÚMƐ Ǎ Ɔ, ENƐ GUDO HǓN, NǍ XÓSIN NÚ NǓKANBYƆ ELƆ LƐ:

• Etɛ lɛ ka dó xɛsi nɔví sunnu lɛ kpo nɔví nyɔnu lɛ kpo?

• Etɛ ka d’alɔ ye bɔ ye ɖu ɖò nǔ e ɖò xɛsi dó ye wɛ lɛ é jí?