KLISÁNWUN GBƐ ZÍNZÁN
Nɔ ba linlin Mawu tɔn
Mǐ jló ná hɛn xomɛ Jexóva tɔn hun ɖo nǔ e mǐ nɔ wa lɛ́ é bǐ mɛ. (Nǔx 27:11) Bo ná dó wa mɔ̌ ɔ, mǐ ɖó ná nɔ wá gbeta e sɔgbe xá linlin tɔn lɛ́ é kɔn, ényí sɛ́n alǒ gbeɖiɖe ɖé má tlɛ tíin bo ɖɔ nǔ e mǐ ná wa tlɔlɔ é ǎ ɔ nɛ́. Étɛ́ ka sixú d’alɔ mǐ bɔ mǐ ná kpé wú?
Ðǒ aca Biblu kplɔ́nkplɔ́n tɔn gbesisɔ tɔn ɖé. Nú mǐ ɖo Biblu xa wɛ hweɖébǔnu ɔ, é nɔ cí ɖɔ hwenu zán ɖó kpɔ́ xá Jexóva wɛ mǐ ɖe ɖɔhun. Mǐ sixú kplɔ́n nǔ dó linlin e Jexóva nɔ ɖó é wú, gbɔn lěe é wa nǔ xá togun tɔn gbɔn é, kpó kpɔ́ndéwú mɛ ɖěɖěe wa nǔ ɖagbe kpó nǔ nyanya kpó ɖo nukún tɔn mɛ lɛ́ é tɔn gbígbéjé kpɔ́n kpó gblamɛ. Ényí mǐ jló ná wá gbeta ɖé kɔn ɔ, gbigbɔ mímɛ́ sixú flín mǐ nǔ tají e mǐ ko kplɔ́n lɛ́ é kpó nǔgbódodó tají ɖěɖěe mǐ mɔ ɖo Xó Mawu tɔn mɛ lɛ́ é kpó.—Jn 14:26.
Nɔ ba do nú nǔ. Ényí a jló ná wá gbeta ɖé kɔn hǔn, kan nǔ élɔ́ byɔ́ hwiɖée: ‘Wěmafɔ alǒ tan Biblu tɔn tɛ́ lɛ́ ka sixú d’alɔ mì bɔ ná mɔ nǔ jɛ nǔ e Jexóva lin dó xó ɔ wú é mɛ?’ Xo ɖɛ bo byɔ́ alɔdó Jexóva tɔn, bo lɛ́ zán azɔ̌wanú dobanúnǔ tɔn e ɖo gbe towe mɛ, bo sixú d’alɔ we bɔ a ná mɔ nǔgbódodó Biblu tɔn e sɔgbe xá ninɔmɛ towe bo lɛ́ zán yě lɛ́ é.—Ðɛ 25:4.
KPƆ́N VIDEO MǏ ÐÓ NÁ ‘DƐ ÐO WEZUN Ɔ NU’: ÐU NǓÐUÐU ÐAGBE LƐ́ Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́ LƐ́:
Kɔ tɛ́ lɛ́ è ka gbídí nú nɔví nyɔ̌nu wínnyáwínnyá ɔ ɖo video ɔ mɛ?
Ényí è ɖo kɔ mɔ̌hun gbídí nú we wɛ ɔ, nɛ̌ a ka sixú zán azɔ̌wanú dobanúnǔ tɔn lɛ́ dó mɔ nǔ e ná d’alɔ we bɔ a ná ɖí xwi xá lɛ́ é gbɔn?
Ényí mǐ nɔ zán hwenu dó ba do nú nǔ, bo nɔ lɛ́ hɛn alɔnu mǐtɔn ján ɖo nǔkplɔ́nkplɔ́n mɛɖésúnɔ tɔn e ná d’alɔ mǐ bɔ mǐ ná wá gbeta ɖagbe lɛ́ kɔn é mɛ ɔ, nɛ̌ mǐ ka nɔ ɖu le tɔn gbɔn?—Eb 5:13, 14