TÀN 6
Kanyɛɛ kpo Abɛli Kpo
KPƆ́N Kanyɛɛ kpo Abɛli kpo. Ye bǐ ko sù. Kanyɛɛ nyí glesi, bo nɔ dó jinukún, mǎ kpo atín e nɔ na sínsɛ́n lɛ é kpo.
Abɛli ka nyí lɛngbɔnyitɔ́. É yí wǎn nú nukúnkpikpe dó lɛngbɔví lɛ wu. Lɛngbɔví lɛ wá sù, bɔ é ɖó lɛngbɔkpo ɖaxó e wu é nɔ kpénukún dó é.
Gbè ɖokpo wá sù bɔ Kanyɛɛ kpo Abɛli kpo ja nǔ na Mawu gbé. Kanyɛɛ na jinukún tɔn ɖé lɛ, bɔ Abɛli na lɛngbɔ̌ tɔn e nyɔ́ wǔ hú lɛngbɔ̌ lɛ bǐ é. Jehovah hun xomɛ dó Abɛli kpo nǔ e é na ɛ é kpo wu. Amɔ̌, xomɛ tɔn hun ɖebǔ dó Kanyɛɛ kpo nùnina tɔn kpo wu ǎ. A ka tuùn nǔ e zɔ́n é à?
Jehovah yí wǎn nú nǔ e Abɛli na ɛ é hú Kanyɛɛ tɔn, ɖó Abɛli nyí mɛ ɖagbe. É yí wǎn nú Jehovah kpo nɔví tɔn kpo. Amɔ̌, Kanyɛɛ ɔ mɛ nyanya wɛ, ɖó é gbɛ́ wǎn nú Abɛli.
Enɛ wu ɔ, Mawu ɖɔ nú Kanyɛɛ ɖɔ é ɖó na ɖyɔ jijɔ. Amɔ̌, Kanyɛɛ ka ba na sè ǎ. Xomɛ sìn i tawun ɖó Mawu yí wǎn nú Abɛli hú i. Enɛ wu ɔ, Kanyɛɛ ɖɔ nú Abɛli ɖɔ ‘mǐ ni yì gle mɛ.’ Ee ye jɛ dɔ̌n bɔ mɛɖé ma ɖò finɛ ǎ é ɔ, Kanyɛɛ xò Abɛli hu. Nǔ baɖabaɖa tɛ Kanyɛɛ ka dosin nɛ!
Abɛli kú có Mawu kpó ɖò flínflín i wɛ. Abɛli nyí mɛ ɖagbe. Jehovah nɔ wɔn gbɛtɔ́ mɔhun lɛ gbeɖé ǎ. Enɛ wu ɔ, Jehovah na fɔ́n Abɛli sín kú gbè ɖokpo. Hwenɛnu ɔ, é sɔ́ na kú gbeɖé ǎ. É na nɔ gbɛ̀ kaka sɔyi ɖò ayikúngban jí. Kpo awǎjijɛ kpo wɛ mǐ na zun xɔ́ntɔn xá gbɛtɔ́ Abɛli ɖɔhun lɛ hwenɛnu.
Amɔ̌, Mawu nɔ yí wǎn nú Kanyɛɛ gbɛ́tɔ́ lɛ ǎ. Enɛ wu ɔ, ee Kanyɛɛ hu nɔví tɔn gudo é ɔ, é dɔn tó n’i, bo nya ɛ dó gbě. Hwenu e Kanyɛɛ xwè awa ɖevo jí é ɔ, é kplá nyɔnu ɖé, bɔ é wá nyí asì tɔn. Nyɔnu enɛ ɔ sixu ko nyí nɔví tɔn.
Kanyɛɛ kpo asì tɔn kpo wá jì vǐ lɛ. Adamu kpo Ɛva kpo sín vǐ ɖevo lɛ lɔmɔ̌ d’asú bo d’asì bo jì vǐ lɛ. Hwenu kpɛɖé gudo ɔ, gbɛtɔ́ sukpɔ́ ɖò ayikúngban ɔ jí. Mǐ ni kplɔ́n nǔ dó ye mɛ ɖé lɛ wu.
Genèse 4:2-26; 1 Jaan 3:11, 12; Jaan 11:25.