TÀN 9
Nɔwee Bló Tɔjihun Ðé
NƆWEE ɖó asì ɖokpo kpo vǐ atɔn kpo. Vǐ tɔn lɛ nɔ nyí Sɛmu, Xamu kpo Jafɛti kpo. Ye bǐ ɖó asì ɖokpo ɖokpo. Mɛ e ɖò xwédo Nɔwee tɔn mɛ lɛ é bǐ bló mɛ tantɔn.
Mawu zɔ́n azɔ̌ e mɛɖé ma ko wà kpɔ́n ǎ é Nɔwee. É ɖɔ n’i ɖɔ é ni bló tɔjihun ɖaxó ɖé. Tɔjihun enɛ ɔ cí gbǎ gaga ɖé ɖɔhun bo lɛ́ d’agba ɖesu. É lɛ́ ɖɔ n’i ɖɔ: ‘Blǒ bonu tɔjihun ɔ ni ɖó síngbó atɔn, lɛ̌ gbò xɔnu lɛ d’emɛ.’ Nɔwee, xwédo tɔn, kanlin lɛ kpo nùɖuɖu e sín hudo ye na ɖó lɛ é kpo wɛ na nɔ xɔnu enɛ lɛ mɛ.
Mawu ɖɔ nú Nɔwee ɖɔ é ni sá sɛ̀n e kpɛ̀n é dó tɔjihun ɔ bonu sìn ma byɔ mɛ ó. Mawu ɖɔ: ‘Un na bló bɔ jǐ ɖaxó na ja bo na sú kún dó nú mɛ e ma ɖò tɔjihun ɔ mɛ ǎ lɛ é bǐ.’
Nɔwee kpo vǐ tɔn lɛ kpo jɛ tɔjihun ɔ bló jí. Amɔ̌, mɛ ɖevo lɛ ka nɔ ɖò ye ko wɛ bo gbɛ́ kɔ lɛ́ sín nǔ nyanya gudo. Ee Nɔwee ɖò nǔ e Mawu ja wiwa gbé é ɖɔ nú ye wɛ é ɔ, ye mɛ ɖebǔ ɖi xó tɔn ǎ.
Tɔjihun ɔ biblo ɖu hwenu ɖesu, ɖó é d’agba tawun. Amɔ̌, ye wá bló fó ɖò xwè gègě gudo. Enɛ gudo ɔ, Mawu ɖɔ nú Nɔwee ɖɔ é ni bɛ́ kanlin lɛ dó tɔjihun ɔ mɛ. Kanlin ɖé lɛ tíìn bɔ é na bɛ́ asú ɖokpo asì ɖokpo d’emɛ. Ðevo lɛ tíìn bɔ é na bɛ́ tɛnwe tɛnwe d’emɛ. Mawu lɛ́ ɖɔ nú Nɔwee ɖɔ é ni bɛ́ xɛ alɔkpa alɔkpa lɛ bǐ d’emɛ. Nɔwee bló nǔ e Mawu ɖɔ n’i é pɛ́ɛ́.
Enɛ gudo ɔ, Nɔwee kpo xwédo tɔn kpo byɔ tɔjihun ɔ mɛ bɔ Mawu sú hɔn ɔ. Ye ɖò te kpɔ́n nǔ e na jɛ é. Sɔ́ hwiɖee ɖó tɛn yetɔn mɛ bo kpɔ́n. Sìn ka na vɔ gbɛ̀ ɔ lee Mawu ɖɔ gbɔn é dóó à?
Genèse 6:9-22; 7:1-9.