TÀN 15
Asì Lɔti Tɔn Kpɔ́n Gudo
A KA flín Lɔti, ataví-ylɔ-ví Ablaxamu tɔn e xwedó é, bɔ ye sá xwé dó Kanaa é à? Ye mɛ wè lɛ bǐ kpo xwédo yetɔn kpo wɛ nɔ kpɔ́ ɖò finɛ. Ablaxamu ɖɔ nú Lɔti gbè ɖokpo ɖɔ: ‘Tɛnmɛ sɔ́ sukpɔ́ nú kanlin mǐtɔn lɛ ǎ. Kɛnklɛn bonu mǐ ni jɛ vovo. Enyi a yì awa elɔ xwé ɔ, nyɛ na yì awa ɖě ɔ xwé.’
Lɔti kpɔ́n ayikúngban ɔ bo sɔ́ akpáxwé e nyɔ́ hugǎn é. Judɛɛn gbeji wɛ, bɔ sìn kpo gbehan e na nyɔ́ ɖu nú kanlin tɔn lɛ é kpo sukpɔ́ ɖò finɛ. É kpo xwédo tɔn kpo kanlin tɔn lɛ kpo jɛ finɛ. Enɛ gudo ɔ, ye sá xwé nyí toxo Sodɔmu tɔn mɛ.
Sodɔmunu lɛ baɖa ɖesu. É nɔ vɛ́ nú Lɔti, ɖó mɛ ɖagbe wɛ n’i. Mɔ̌ jɛn é nɔ vɛ́ nú Mawu lɔ é nɛ. Enɛ wu ɔ, Mawu sɛ́ wɛnsagun tɔn wè dó Lɔti bonu ye ni ɖɔ n’i ɖɔ emi na viva Sodɔmu kpo toxo e sɛkpɔ ɛ bo nɔ nyí Gomɔɔ é kpo.
Wɛnsagun lɛ ɖɔ nú Lɔti ɖɔ: ‘Yawǔ! Kplá asì towe kpo vǐ nyɔnu towe wè lɛ kpo bo tɔ́n sín fí.’ Lɔti kpo xwédo tɔn kpo jɛ lɛkanlɛkan dan jí, bɔ wɛnsagun lɛ dɔn alɔ yetɔn bo kplá ye sín toxo ɔ mɛ. Wɛnsagun lɛ ɖokpo ka ɖɔ: ‘Mi hɔn, bo hwlɛn gbɛ̀ mitɔn! Mi ma kpɔ́n gudo ó. Mi hɔn yì só lɛ jí, enɛ ɔ, mi na gán.’
Lɔti kpo vǐ nyɔnu tɔn lɛ kpo setónú bo hɔn sín Sodɔmu. Ye nɔte ɖò fí ɖebǔ ǎ, mɔ̌ jɛn ye ma ka lɛ́ kpɔ́n gudo ǎ é nɛ. Amɔ̌, ee ye sɛyi kpɛɖé é ɔ, Lɔti sín asì tlitó bo kpɔ́n gudo, ɖó ayi tɔn ɖò dɔkun tɔn e ɖò tò ɔ mɛ lɛ é wu. Tlolo ɔ, é huzu jɛgǒ dó te. A ka mɔ ɛ ɖò ɖiɖe ɔ mɛ à?
Tàn elɔ kplɔ́n nǔ taji ɖé mǐ. É kplɔ́n mǐ ɖɔ Mawu nɔ hwlɛn mɛ e setónú n’i lɛ é, amɔ̌, mɛ e tlitó n’i lɛ é na kú.
Genèse 13:5-13; 18:20-33; 19:1-29; Luka 17:28-32; 2 Piyɛɛ 2:6-8.