TÀN 17
Ezawu kpo Jakɔbu Kpo
VǏ WÈ e ɖò ɖiɖe ɔ mɛ lɛ é gbɔn vo nú yeɖee, kabǐ? A ka tuùn nyikɔ yetɔn à? Gběnyatɔ́ ɔ nɔ nyí Ezawu, bɔ lɛngbɔnyitɔ́ ɔ nɔ nyí Jakɔbu.
Hoxo wɛ nú Ezawu kpo Jakɔbu kpo, bɔ ye nyí vǐ Izaki kpo Hlebeka kpo tɔn. Izaki yí wǎn nú Ezawu tawun, ɖó gběnyatɔ́ e nɔ hu lan ganji, bo nɔ hɛn nùɖuɖu wá xwégbe é wɛ n’i. Amɔ̌ Hlebeka ka yí wǎn nú Jakɔbu, ɖó é nɔ jɛ tagba ǎ.
Daagbo yetɔn Ablaxamu kpò ɖò gbɛ̀. É nɔ kpi tàn nú ye dó mɛ alɔkpa e Jehovah nyí é kpo lee É d’alɔ ɛ gbɔn é kpo wu. Jakɔbu na ko nɔ ba na ɖótó é. Hwenu e hoxo lɛ ɖó xwè 15 é ɔ, Ablaxamu ɖó xwè 175 bo kú.
Ee Ezawu ɖó xwè 40 é ɔ, é da Kanaanu wè. Nǔ enɛ kú wǔ nú Izaki kpo Hlebeka kpo tawun, ɖó nyɔnu enɛ lɛ nɔ sɛ̀n Jehovah ǎ.
Gbè ɖokpo ɔ, nùɖé jɛ, bo dó xomɛsin xomɛ nú Ezawu dó Jakɔbu wu. Hwenu sù bɔ Izaki na xoɖɛ nú vǐɖaxo tɔn. Ðó Ezawu wɛ nyí mɛxo ɔ wu ɔ, é nɔ ɖó nukún ɖɔ emi wɛ tɔ́ emitɔn na xoɖɛ na. Amɔ̌, é sà vǐɖaxo tɔn sín acɛ nú Jakɔbu é ɔ, é lín ǎ. Gɔ́ nú enɛ ɔ, hwenu e è jì vǐ wè enɛ lɛ é ɔ, Mawu ko ɖɔ ɖɔ Jakɔbu wɛ na yí vǐɖaxo sín acɛ ɔ. Nǔ wá nyí mɔ̌ nugbǒ, bɔ Izaki xoɖɛ nú vǐ tɔn Jakɔbu.
Enɛ gudo ɔ, ee Ezawu sè ɖɔ Izaki xoɖɛ nú Jakɔbu é ɔ, é sìn xomɛ kaka bo ɖɔ emi na hu Jakɔbu. Hwenu e Hlebeka sè mɔ̌ é ɔ, ado hu i. É lɛ́ ɖò xɛsi ɖi wɛ ɖɔ Jakɔbu lɔ taa yí da Kanaanu. Enɛ wu ɔ, é ɖɔ nú Izaki ɖɔ: ‘Enyi Jakɔbu lɔ yí da Kanaanu ɔ, é na nyla ɖesu.’
Enɛ wu ɔ, Izaki ylɔ vǐ tɔn Jakɔbu ɔ, bo ɖɔ n’i ɖɔ: ‘Ma da Kanaanu ó. Yì daagbo towe Betuwɛlu xwégbe ɖò Calan, bo da vǐ tɔn Labaan sín vǐ nyɔnu lɛ ɖokpo.’
Jakɔbu setónú nú tɔ́ tɔn, bo wlí ali tlolo ɖido Calan, fí e hɛnnumɔ tɔn lɛ ɖè é.
Genèse 25:5-11, 20-34; 26:34, 35; 27:1-46; 28:1-5; Eble lɛ 12:16, 17.