TÀN 18
Jakɔbu Yì Calan
A KA tuùn mɛ e ɖɔ xó xá wɛ Jakɔbu ɖè ɖò ɖiɖe ɔ mɛ lɛ é à? Lɛngbɔnyitɔ́ lɛ wɛ. Ee Jakɔbu zɔn ali nú azǎn mɔkpan gudo é wɛ é wá kplé xá ye ɖò sɛ́tɔ̀ ɖé nu, bɔ ye ɖò lɛngbɔ̌ nyí wɛ. É kanbyɔ ye ɖɔ: ‘Fitɛ mi ka gosin?’
Ye ɖɔ: ‘Calan.’
Jakɔbu lɛ́ kanbyɔ ye ɖɔ: ‘Mi ka tuùn Labaan à?’
Ye ɖɔ emi tuùn i, bo lɛ́ ɖɔ: ‘Kpɔ́n vǐ nyɔnu tɔn Hlacɛli lɔ nɛ ja kpo lɛngbɔhwan tɔ́ tɔn tɔn kpo nɛ.’ A ka mɔ Hlacɛli ɖò zɔ ja ɖò ɖiɖe ɔ mɛ à?
Ee Jakɔbu mɔ Hlacɛli ja kpo lɛngbɔ̌ nylɔ tɔn Labaan tɔn lɛ kpo é ɔ, é blí awinnya e è dó sú sɛ́tɔ̀ ɔ na é sín i, bonu lɛngbɔ̌ lɛ na mɔ tɛn bo nu sìn. Enɛ gudo ɔ, é kplá’sí kɔ nú Hlacɛli, bo ɖɔ n’i ɖɔ daanǔ tɔn sín vǐ wɛ nú emi. É víví nú Hlacɛli kaka, bɔ é yì xwégbe, bo tinmɛ nú tɔ́ tɔn Labaan.
Xomɛ hun Labaan ɖesu ɖó Jakɔbu jló na nɔ ye gɔ́n. Ee Jakɔbu ɖɔ emi na da Hlacɛli é ɔ, é lɛ́ víví nú Labaan. Amɔ̌, é ɖɔ nú Jakɔbu ɖɔ é na tó w’azɔ̌ nú emi nú xwè tɛnwe hwɛ̌. Jakɔbu yí gbè bo w’azɔ̌ ɔ, ɖó é yí wǎn nú Hlacɛli tawun. Amɔ̌, ee hwe ɔ nu sù bɔ è na kplá asì nú Jakɔbu é ɔ, a ka tuùn nǔ e jɛ é à?
Labaan kplá vǐnyɔnuɖaxo tɔn Lea nú Jakɔbu ɖó Hlacɛli tɛnmɛ. Ee Jakɔbu yí gbè bo lɛ́ w’azɔ̌ nú Labaan nú xwè tɛnwe ɖevo é ɔ, é kplá Hlacɛli lɔ n’i. Hwenɛnu ɔ, Mawu tin dó gbɛtɔ́ lɛ bɔ ye nɔ da asì gègě. Amɔ̌ lee Biblu xlɛ́ gbɔn dìn é ɔ, sunnu ɖokpo ɖó na ɖó asì ɖokpo géé.
Genèse 29:1-30.