TÀN 22
È Zé Jozɛfu Dó Gankpa Mɛ
XWÈ 17 jɛn Jozɛfu ɖó hwenu e ajɔ̌tɔ́ lɛ kplá ɛ wá Ejipu é. Ye sɔ́ ɛ sà nú nya e nɔ nyí Potifaa é. Potifaa nɔ w’azɔ̌ ɖò axɔsu Ejipu tɔn Falawɔɔn sín agbasa.
Jozɛfu nɔ ɖókan dó azɔ̌ e gǎn tɔn Potifaa nɔ zɔ́n ɛ lɛ é wu. Enɛ wu ɔ, ee Jozɛfu wá nyí mɛxo é ɔ, Potifaa sɔ́ ɛ gǎn ɖó xwé tɔn nu. Aniwu Jozɛfu ka lɛ́ wá tɔ́n ɖò gankpa mɛ? Potifaa sín asì wu wɛ.
Jozɛfu sù bo nyɔ́ ɖɛkpɛ tawun, bɔ Potifaa sín asì jló ɖɔ é ni ɖóxó xá emi. Amɔ̌, Jozɛfu mɔ ɖɔ nǔ nyanya wɛ bo gbɛ́. Xomɛ sìn Potifaa sín asì ɖesu. Enɛ wu ɔ, ee asú tɔn wá xwégbe é ɔ, é ɖó adingban n’i bo ɖɔ: ‘Jozɛfu nùbaɖabaɖa ɔ hwlɛn kàn xá mì!’ Potifaa ɖi xó e asì tɔn ɖɔ é. É sìn xomɛ dó Jozɛfu wu kaka, bo sɔ́ ɛ dó gankpa mɛ.
Zaan ɔ, gantɔ́cɔ́tɔ́ ɔ ɖ’ayi wu ɖɔ Jozɛfu kún nyí mɛ nyanya ɖé ó. Enɛ wu ɔ, é sɔ́ ɛ gǎn ɖó gantɔ́ e kpò lɛ é nu. Falawɔɔn lɔmɔ̌ wá sìn xomɛ dó ahanbanumɛtɔ́ tɔn kpo wɔxúxúɖatɔ́ tɔn kpo wu, bo bɛ́ ye dó gankpa mɛ. Zǎn ɖokpo mɛ ɔ, ye mɛ wè enɛ lɛ kú dlɔ̌, bo tuùn tinmɛ tɔn ǎ. Ayihɔngbe tɔn ɔ, Jozɛfu ɖɔ nú ye ɖɔ: ‘Mi ɖɔ dlɔ̌ mitɔn lɛ nú mì.’ Ee ye ɖɔ dlɔ̌ lɛ nú Jozɛfu é ɔ, Mawu d’alɔ ɛ, bɔ é tinmɛ nú ye.
Jozɛfu ɖɔ nú ahanbanumɛtɔ́ ɔ ɖɔ: ‘Cobonu mǐ na ɖɔ azǎn atɔn ɔ, Falawɔɔn na ɖè we tɔ́n sín gankpa mɛ, bɔ a na lɛ́ jɛ azɔ̌ towe wà jí.’ É ka lɛ́ ɖɔ n’i ɖɔ: ‘Enyi a tɔ́n hǔn, ɖɔ xó ce nú Falawɔɔn, bo d’alɔ mì nú ma tɔ́n sín fí.’ Amɔ̌, Jozɛfu ɖɔ nú wɔxúxúɖatɔ́ ɔ ɖɔ: ‘Cobonu mǐ na ɖɔ azǎn atɔn ɔ, Falawɔɔn na na gbè, bɔ è na gbò ta we.’
Azǎn atɔn vlamɛ nugbǒ ɔ, nǔ e Jozɛfu ɖɔ é jɛ pɛ́ɛ́. Falawɔɔn na gbè bɔ è gbò ta wɔxúxúɖatɔ́ ɔ. É lɛ́ na gbè bɔ è ɖè ahanbanumɛtɔ́ ɔ tɔ́n sín gankpa mɛ, bɔ é lɛ́ jɛ azɔ̌ tɔn wà jí. Amɔ̌, ahanbanumɛtɔ́ ɔ wɔn Jozɛfu. É ɖɔ xó tɔn nú Falawɔɔn ǎ, bɔ Jozɛfu cí gankpa mɛ.
Genèse 39:1-23; 40:1-23