TÀN 26
Jɔbu Nɔ Gbeji Nú Mawu
NYA azinzɔnnɔ e ɖò ɖiɖe ɔ mɛ é sín nǔ blawu nú we à cé? É nɔ nyí Jɔbu. Asì tɔn wɛ nyí nyɔnu ɔ. A ka tuùn xó e ɖɔ nú Jɔbu wɛ é ɖè é à? ‘Gbɛ̌ Mawu bo kú.’ Mǐ ni kpɔ́n nǔ e wu é ɖɔ mɔ̌ é, kpo nǔ e wu Jɔbu ɖò ya jì wɛ sɔmɔ̌ é kpo.
Jɔbu setónú nú Jehovah bo nyí gbejinɔtɔ́. É nɔ nɔ tò Uzi tɔn mɛ. Uzi ka lín dó Kanaa ǎ. Jehovah yí wǎn nú Jɔbu tawun, amɔ̌, mɛ ɖokpo ka gbɛ́ wǎn n’i. A ka tuùn mɛ ɔ à?
Sataan Awovi wɛ. A ka flín ɖɔ Sataan wɛ nyí wɛnsagun nyanya e gbɛ́ wǎn nú Jehovah é à? É kpéwú bo blɛ́ Adamu kpo Ɛva kpo, bɔ ye tlitó nú Jehovah. É lɛ́ lin ɖɔ emi na blɛ́ mɛ lɛ bǐ, bɔ ye na tlitó nú Jehovah. Amɔ̌, é ka kpéwú à? Eǒ. Flín sunnu kpo nyɔnu kpo e nɔ gbeji nú Mawu, bɔ mǐ kplɔ́n nǔ dó ye wu wá yì lɛ é. Ye mɛ nabi sín nyikɔ a ka sixu slɛ́?
Jɔbu wɛ nɔ gbeji nú Jehovah hugǎn ɖò ayikúngban ɔ jí hwenu e Jakɔbu kpo Jozɛfu kpo kú ɖò Ejipu gudo é. Jehovah jló na xlɛ́ Sataan ɖɔ é kún sixu blɛ́ mɛ lɛ bǐ bonu ye na tlitó nú emi ó. Enɛ wu ɔ, é ɖɔ n’i ɖɔ: ‘Kpɔ́n Jɔbu. Kpɔ́n lee é nyí gbejinɔtɔ́ nú mì sɔ́ é.’
Sataan ɖɔ: ‘É nyí gbejinɔtɔ́ a ɖɔ à! A dó n’i, bɔ é ɖó nǔ ɖagbe gègě wɛ zɔ́n. Enyi a hɛn nǔ tɔn lɛ gblé dìn ɔ, é na gbɛ́ we.’
Jehovah ɖɔ n’i ɖɔ: ‘Yì, hɛn nǔ tɔn lɛ bǐ gblé. Wà nǔ nyanya e jló we é bǐ n’i. Mǐ na kpɔ́n ɖɔ é na gbɛ́ mì à jí. Amɔ̌, ma ka hu i ó.’
Jɛ nukɔn ɔ, Sataan bló bɔ ajotɔ́ lɛ fin nyibu tɔn lɛ kpo lakunmi tɔn lɛ kpo. Mɛ ɖevo lɛ lɛ́ hu lɛngbɔ̌ tɔn lɛ. É lɛ́ bló bɔ jɔhɔn ɖaxó ɖé hɔ xɔ dó vǐ tɔn 10 lɛ jí, bɔ ye bǐ kú. Enɛ gudo ɔ, Sataan lɛ́ dó azɔn baɖabaɖa ɖé Jɔbu. Jɔbu mɔ wuvɛ̌ tawun. Nǔ e zɔ́n bɔ asì tɔn ɖɔ n’i ɖɔ: ‘Gbɛ̌ Mawu bo kú’ é nɛ. Amɔ̌, Jɔbu ka bló mɔ̌ ǎ. Xɔ́ntɔn-nyijɛtɔ́ atɔn ɖé lɛ wá, bo ɖɔ gbɛ̀ nyanya e é nɔ zán é wɛ zɔ́n bɔ é ɖò ya jì wɛ. É ɖò mɔ̌ có, Jɔbu kpò ɖò gbeji nú Jehovah.
Nǔ enɛ hun xomɛ nú Jehovah kaka, bɔ é dó nú Jɔbu lee mɔ gbɔn wɛ a ɖè ɖò ɖiɖe ɔ mɛ é. É gbɔ azɔn n’i. Jɔbu lɛ́ jì vǐ ɖɛkpɛɖɛkpɛ 10. É lɛ́ wá ɖó kanlin e é ɖó ɖ’ayǐ lɛ é mɔhunkɔtɔn donu wè.
A ka na nɔ gbeji nú Jehovah hwebǐnu Jɔbu ɖɔhun à? Enyi a bló mɔ̌ ɔ, a na nɔ gbɛ̀ kaka sɔyi ɖò ayikúngban ɔ jí.
Job 1:1-22; 2:1-13; 42:10-17.