TÀN 37
Goxɔ E Mɛ Izlayɛli-ví lɛ Nɔ Sɛ̀n Mawu Ðè É
AKA tuùn nǔ e xɔ elɔ ɖò te na é à? Goxɔ bunɔ ɖé wɛ, bɔ Izlayɛli-ví lɛ nɔ sɛ̀n Jehovah ɖ’emɛ. Ye gosin Ejipu bɔ xwè ɖokpo wá yí gudo é wɛ ye gbá xɔ enɛ. A ka tuùn mɛ e zɔ́n xɔ ɔ gbá é à?
Jehovah wɛ. Ee Mɔyizi ɖò Sinayi Só jí é wɛ Jehovah ɖɔ lee è na gbá gbɔn é n’i. É ɖɔ ye ni gbá goxɔ ɔ ɖó alɔ ɖé jí, bonu è hɛn ɔ, è na nɔ tún bo na nɔ bɛ́ yì fí ɖevo, lobo na nɔ lɛ́vɔ gbá. Enɛ zɔ́n, bɔ hwenu e Izlayɛli-ví lɛ ɖò tɛn sɛ̀ wɛ sín fí ɖé jɛ fí ɖevo ɖò gbetótló ɔ mɛ é ɔ, ye nɔ sɛ̀ tɛn kpo goxɔ ɔ lɔ kpo.
Enyi a kpɔ́n xɔnu kpɛví e ɖò fifonu goxɔ ɔ tɔn é mɛ sɛ́dó ɔ, a na mɔ gbǎ ɖé. È nɔ ylɔ gbǎ enɛ ɔ ɖɔ akɔjɛgba. Wɛnsagun wè ɖò ta tɔn, bɔ è sɔ́ siká dó bló ye na. Mawu lɛ́vɔ wlan Sɛ́n Wǒ lɛ dó awinnya-tɛ wè ɖevo jí, ɖó Mɔyizi ko hɛn nukɔntɔn lɛ gbà. È fɔ awinnya-tɛ enɛ lɛ dó akɔjɛgba ɔ mɛ. È lɛ́ sɔ́ zɛ̌n ɖé d’emɛ, bɔ mana ɖò zɛ̌n enɛ ɔ mɛ. A ka flín nǔ e nyí mana é à?
Mɔyizi sín fofó Alɔɔn wɛ Jehovah ɖè, bɔ é nyí vɔsanúxwlémawutɔ́ ɖaxó ɔ. É wɛ nɔ nɔ nukɔn nú togun ɔ, bɔ ye nɔ sɛ̀n Jehovah. Vǐ sunnu tɔn lɛ lɔmɔ̌ nyí vɔsanúxwlémawutɔ́.
Kpɔ́n xɔnu ɖaxó goxɔ ɔ tɔn lo. É d’agba sɔ̀ xɔnu kpɛví ɔ donu wè. A ka mɔ gbǎ e mɛ azɔ ɖò tíntɔ́n sín wɛ é sɛ́dó à? Vɔsakpe e jí vɔsanúxwlémawutɔ́ lɛ nɔ dó zalinkpɔ́n zo ɖè é wɛ. A na lɛ́ mɔ zogbɛ́n-hɛ́nnú e jí zogbɛ́n tɛnwe ɖè é ɖò finɛ. Tavo wɛ nyí nǔ atɔngɔ e ɖò xɔnu enɛ mɛ é. Wɔxúxú 12 nɔ nɔ tavo enɛ jí.
Nǔ e nɔ hɛn sìn é ɖaxó ɖé ɖò goxɔ ɔ sín kɔxota, bɔ sìn gɔ́ mɛ. Vɔsanúxwlémawutɔ́ lɛ nɔ sɔ́ sìn enɛ ɔ dó klɔ́ alɔ kpo afɔ kpo na. Vɔsakpe ɖaxó ɖevo lɛ́ ɖò finɛ, bɔ è nɔ mɛ̀ kanlin lɛ ɖ’eji dó savɔ̌ nú Jehovah. Goxɔ Jehovah tɔn ɔ ɖò toxo ɔ tɛntin, bɔ goxɔ e mɛ Izlayɛli-ví lɛ nɔ nɔ é lɛlɛ̌ dó é.
Exode 25:8-40; 26:1-37; 27:1-8; 28:1; 30:1-10, 17-21; 34:1, 2; Eble lɛ 9:1-5.