TÀN 44
Laxabu Hwla Amɛ̌ Lɛ
ADǍN gbò sunnu e ɖò ɖiɖe ɔ mɛ lɛ é. Ye ɖó na hɔn, é ma nyí mɔ̌ ǎ ɔ, è na hu ye. Amɛ̌ Izlayɛlinu wɛ nú ye. Laxabu wɛ nyí nyɔnu e ɖò alɔ gɔ́ nú ye wɛ é. Laxabu nɔ nɔ xɔ enɛ e ɖò ahoho Jeliko tɔn jí é mɛ. Mi nú mǐ ni ba dò nú nǔ e wu adǎn gbò sunnu enɛ lɛ é.
Izlayɛli-ví lɛ ko ɖò na d’asa Judɛɛn Tɔ̀ ɔ wɛ, bo na jɛ Kanaa. Cobonu ye na d’asa tɔ̀ ɔ, Jozuwe sɛ́ sunnu wè dó, bo ɖɔ nú ye ɖɔ: ‘Mi yì ba dò nú Jeliko tò ɔ, bo wá.’
Ee amɛ̌ lɛ wá Jeliko é ɔ, ye yì Laxabu xwégbe. Amɔ̌, mɛ ɖokpo ɖɔ nú axɔsu Jeliko tɔn ɖɔ: ‘Izlayɛlinu wè wá dò ba nú tò ɔ gbé zǎnmɛ dìn.’ Ee axɔsu ɔ sè mɔ̌ é ɔ, é sɛ́ sunnu ɖé lɛ dó Laxabu gɔ́n, bɔ ye ɖɔ n’i ɖɔ: ‘Ðè sunnu e ɖò xɔ towe mɛ lɛ é tɔ́n!’ Amɔ̌, Laxabu ko sɔ́ amɛ̌ lɛ hwla dó azata. É ɖɔ nú mɛ e axɔsu sɛ́dó lɛ é ɖɔ: ‘Sunnu ɖé lɛ wá xwé ce gbè nugbǒ, amɔ̌, un tuùn fí e ye gosin é ǎ. Ablu jɛ dido jí tlolo é jɛn ye ɖido, cobɔ è sú hɔntogbo toxo ɔ tɔn. Enyi mi yawu dìn ɔ, mi sixu wlí ye!’ Nugbǒ ɔ, ye jɛ amɛ̌ lɛ gbé mɛ.
Ee ye gosin finɛ gudo é ɔ, Laxabu yawu yì aza ɔ ta. É ɖɔ nú amɛ̌ lɛ ɖɔ: ‘Un tuùn ɖɔ Jehovah na na mi ayikúngban elɔ. Mǐ sè lee é má Xù Vɔvɔ ɔ ɖó wè hwenu e mi tɔ́n sín Ejipu é, kpo lee mi hu axɔsu Sihɔɔn kpo Ɔgu kpo gbɔn é. Un nyɔ́ xomɛ dó mi wu. Enɛ wu ɔ, mi kɛnklɛn d’akpá nú mì ɖɔ emi lɔmɔ̌ na nyɔ́ xomɛ dó wutu ce, bo na hwlɛn tɔ́ ce, nɔ ce, nɔví ce sunnu lɛ kpo nɔví ce nyɔnu lɛ kpo.’
Amɛ̌ lɛ d’akpá ɖɔ emi na wà mɔ̌. Amɔ̌, Laxabu ɖó na bló nùɖé. Ye ɖɔ n’i ɖɔ: ‘Yí kàn vɔvɔ elɔ, bo sìn dó flɛtɛli towe nu. Enɛ gudo hǔn, ɖɔ nú hɛnnumɔ towe lɛ, bonu mi kplé miɖee dó xɔ towe mɛ. Enyi mǐ wá Jeliko yí gbé ɔ, mǐ na mɔ kàn ɔ ɖò flɛtɛli towe nu, bo na hu mɛɖebǔ ɖò xɔ towe mɛ ǎ.’ Ee amɛ̌ lɛ lɛkɔ yì Jozuwe gɔ́n é ɔ, ye wlí nǔ e jɛ lɛ é bǐ ɖɔ n’i.
Josué 2:1-24; Eble lɛ 11:31.