TÀN 47
Ajotɔ́ Ðé Ðò Izlayɛli
KPƆ́N nǔ e ɖi wɛ nya enɛ ɖè dó goxɔ tɔn mɛ é! Awu ɖɛkpɛɖɛkpɛ ɖé, siká kpo kpatagan ɖé lɛ kpo wɛ. É bɛ́ ye ɖò toxo Jeliko tɔn mɛ. Amɔ̌, etɛ è ka ɖó na wà nú nǔ e è mɔ ɖò Jeliko lɛ é? A ka flín à?
È ɖó na sú kún dó nú ye, bo na bɛ́ siká kpo kpatagan lɛ kpo dó dɔkungba e ɖò goxɔ Jehovah tɔn mɛ é mɛ. Amɔ̌, mɛ e ɖò ɖiɖe ɔ mɛ lɛ é tlitó nú Mawu. Ye ja ajo dó é. Nya ɔ nɔ nyí Akaan, bɔ mɛ e ɖò xwédo tɔn mɛ é ɖé lɛ kpo é kpo wɛ ɖò finɛ. Mi nú mǐ ni kpɔ́n nǔ e jɛ é.
Ee Akaan fin nǔ enɛ lɛ gudo é wɛ Jozuwe sɛ́ sunnu ɖé lɛ dó, bonu ye ni yì gbà toxo Ayii tɔn. Amɔ̌, ye cí ahwan. È hu mɛɖé lɛ, bɔ mɛ é kpò lɛ é hɔn. Wǔ kú Jozuwe ɖesu. É xwè agbɔnnúsú dò, bo xoɖɛ sɛ́dó Jehovah ɖɔ: ‘Etɛwu a ka tin, bɔ nǔ enɛ jɛ dó mǐ wu?’
Jehovah ɖɔ: ‘Site! Izlayɛli hu hwɛ. Ye bɛ̌ nǔ e è ɖó na sú kún dó na alǒ è na bɛ̌ dó goxɔ ce mɛ é ɖé lɛ. Ye fin nǔ enɛ lɛ, bo fɔ hwla. Enyi a ma sú kún dó nú nǔ enɛ lɛ kpo ajotɔ́ lɛ kpo ǎ ɔ, Un na dó nú mi ǎ.’ Jehovah ɖɔ nú Jozuwe ɖɔ emi na ɖè nya baɖabaɖa enɛ gbà.
Enɛ wu ɔ, Jozuwe xò togun ɔ kplé ɖó kpɔ́, bɔ Jehovah ɖè Akaan gbà. Akaan ɖɔ: ‘Un hu hwɛ. Un mɔ awu ɖɛkpɛɖɛkpɛ ɖé, gɔ́ nú siká kpo kpatagan ɖé lɛ kpo. Ye jló mì kaka, bɔ un bɛ́, bo ɖi dó goxɔ ce mɛ.’
Ee è mɔ nǔ enɛ lɛ, bo bɛ́ wá nú Jozuwe é ɔ, é ɖɔ nú Akaan ɖɔ: ‘Etɛwu a ka dɔn mǐ dó wuvɛ̌ mɛ? Jehovah na dɔn hwi lɔ dó wuvɛ̌ mɛ!’ Enɛ gudo ɔ, togun ɔ bǐ nyì awinnyaglo dó hu Akaan kpo xwédo tɔn kpo. Tàn enɛ kplɔ́n mǐ ɖɔ mǐ kún ɖó na sɔ́ mɛ ɖevo nǔ dó gudo tɔn gbeɖé ó. Kabǐ?
Enɛ gudo ɔ, Izlayɛli-ví lɛ lɛ́vɔ yì tɔ́n ahwan toxo Ayii tɔn. Jehovah nɔ togun tɔn gudo lo, bɔ ye ɖu ɖò ahwan ɔ jí.
Josué 7:1-26; 8:1-29.