TÀN 50
Nyɔnu Akɔnkpantɔ́ Wè
ENYI adǎn gbò Izlayɛli-ví lɛ ɔ, ye nɔ súxó ylɔ Jehovah. Jehovah nɔ sè xósusu yetɔn, lobo nɔ ɖè akɔnkpantɔ́ ɖé lɛ dó ye nu, bɔ ye nɔ d’alɔ ye. Biblu ylɔ mɛ enɛ lɛ ɖɔ hwɛɖɔtɔ́ lɛ. Jozuwe wà hwɛɖɔtɔ́ sín azɔ̌, lobo lɛ́ nɔ nu nú ye hwenu e é ɖò gbɛ̀ é. Ee é kú gudo é ɔ, Jehovah lɛ́ ɖè hwɛɖɔtɔ́ ɖevo lɛ dó nu yetɔn. Ye mɛ ɖé lɛ nɔ nyí: Otiniyɛlu, Ewuɖu kpo Camugaa kpo. Amɔ̌, nyɔnu wè ɖò mɛ e d’alɔ Izlayɛli-ví lɛ é mɛ. Ye nɔ nyí Ðebola kpo Jaɛlu kpo.
Ðebola nyí nyɔnu gbeyiɖɔ Mawu tɔn. Jehovah nɔ ɖɔ nǔ e na jɛ ɖò sɔgudo é n’i, bɔ é nɔ wá ɖó gbè nú togun ɔ. Ðebola lɛ́ nyí hwɛɖɔtɔ́. É nɔ junjɔn ayǐ ɖò dětín ɖé sá ɖò tò e ɖò sókan mɛ é mɛ. Gbɛtɔ́ lɛ nɔ wá gɔ̌n tɔn, bɔ é nɔ d’alɔ ye, bɔ nǔgbomɛ yetɔn lɛ nɔ gbò.
Jabɛɛn wɛ ɖò axɔsu Kanaa tɔn nyí wɛ hwenɛnu. É ɖó ahwankɛkɛ 900. Ahwangɔnu Jabɛɛn tɔn ɖó hlɔnhlɔn ɖesu. Enɛ zɔ́n bɔ Izlayɛli-ví gègě huzu kannumɔ tɔn gannugánnú. Siselaa wɛ nyí gǎn nú ahwangɔnu Axɔsu Jabɛɛn tɔn.
Gbè ɖokpo sù bɔ Ðebola sɛ́ wɛn dó Hwɛɖɔtɔ́ Balaki bo ɖɔ: ‘Jehovah ɖɔ: “Kplá sunnu 10 000 yì Tabɔɔ Só kɔn. Un na kplá Siselaa wá nú we ɖò finɛ, bɔ a na ɖu ɖò é kpo ahwangɔnu tɔn kpo jí.”’
Balaki ɖɔ nú Ðebola ɖɔ: ‘Enyi a na xwedó mì ɔ, un na yì.’ Ðebola xwedó é, amɔ̌ é ɖɔ nú Balaki ɖɔ: ‘Ahwanjiɖuɖe sín susu ɔ na nyí towe ǎ, ɖó nyɔnu sín alɔ mɛ wɛ Siselaa na kú dó.’ Nǔ e jɛ é nɛ.
Balaki jɛte sín Tabɔɔ Só ɔ jí, bo yí kpé ahwanfuntɔ́ Siselaa tɔn lɛ. Ajijimɛ ɔ, Jehovah ja kɛ́njí ɖaxó ɖé, bɔ é hu ahwanfuntɔ́ Siselaa tɔn gègě bo kplɔ́ ye sɔyi. Amɔ̌, Siselaa lɔ́n jɛte sín ahwankɛkɛ tɔn jí, bo hɔn.
Hwenu kpɛɖé gudo ɔ, Siselaa wá goxɔ Jaɛlu tɔn nu. Jaɛlu ylɔ ɛ dó goxɔ ɔ mɛ, lobo na ɛ nyibunɔsin, bɔ é nu. Tlolo ɔ, amlɔgɔ jɛ sìnsìn i jí, bɔ é d’amlɔ yì kàn mɛ. Enɛ gudo ɔ, Jaɛlu sún só goxɔ ɔ tɔn ɖokpo, bo xwè dó ta nya baɖabaɖa enɛ tɔn mɛ. Ee Balaki wá é ɔ, é xlɛ́ Siselaa cyɔ ɛ. Xó e Ðebola ɖɔ é jɛ nugbǒ.
Gudo mɛ ɔ, è hu Axɔsu Jabɛɛn lɔmɔ̌, bɔ Izlayɛli-ví lɛ mɔ vivo nú hwenu ɖé.
Juges 2:14-22; 4:1-24; 5:1-31.